Maha Mrityunjaya Mantra means sacred mantra / prayer dedicated to Lord Shiva -the conqueror over death.
॥ মৃত্যুঞ্জয়সহস্রনামস্তোত্রম্ ॥
শ্রীগণেশায় নমঃ ।
শ্রীভৈরব উবাচ ।
অধুনা শৃণু দেবেশি সহস্রাখ্যস্তবোত্তমম্ ।
মহামৃত্যুঞ্জয়স্যাস্য সারাত্ সারোত্তমোত্তমম্ ॥
অস্য শ্রীমহামৃত্যুঞ্জসহস্রনামস্তোত্র মন্ত্রস্য,
ভৈরব ঋষিঃ, উষ্ণিক্ ছন্দঃ, শ্রীমহামৃত্যুঞ্জয়ো দেবতা,
ওঁ বীজং, জুং শক্তিঃ, সঃ কীলকং, পুরুষার্থসিদ্ধয়ে
সহস্রনাম পাঠে বিনিয়োগঃ ।
ধ্যানম্
উদ্যচ্চন্দ্রসমানদীপ্তিমমৃতানন্দৈকহেতুং শিবং
ওঁজুংসঃভুবনৈকসৃষ্টিপ্রলয়োদ্ভূত্যেকরক্ষাকরম্ ।
শ্রীমত্তারদশার্ণমণ্ডিততনুং ত্র্যক্ষং দ্বিবাহুং পরং
শ্রীমৃত্যুঞ্জয়মীড্যবিক্রমগুণৈঃ পূর্ণং হৃদব্জে ভজে ॥
ওঁজুংসঃহৌং মহাদেবো মন্ত্রজ্ঞো মানদায়কঃ ।
মানী মনোরমাঙ্গশ্চ মনস্বী মানবর্ধনঃ ॥ ১ ॥
মায়াকর্তা মল্লরূপো মল্লো মারান্তকো মুনিঃ ।
মহেশ্বরো মহামান্যো মন্ত্রী মন্ত্রিজনপ্রিয়ঃ ॥ ২ ॥
মারুতো মরুতাং শ্রেষ্ঠো মাসিকঃ পক্ষিকোঽমৃতঃ ।
মাতঙ্গকো মত্তচিত্তো মতচিন্মত্তভাবনঃ ॥ ৩ ॥
মানবেষ্টপ্রদো মেষো মেনকাপতিবল্লভঃ ।
মানকায়ো মধুস্তেয়ী মারয়ুক্তো জিতেন্দ্রিয়ঃ ॥ ৪ ॥
জয়ো বিজয়দো জেতা জয়েশো জয়বল্লভঃ ।
ডামরেশো বিরূপাক্ষো বিশ্বভোক্তা বিভাবসুঃ ॥ ৫ ॥
বিশ্বেশো বিশ্বনাথশ্চ বিশ্বসূর্বিশ্বনায়কঃ ।
বিনেতা বিনয়ী বাদী বান্তদো বাক্প্রদো বটুঃ ॥ ৬ ॥
স্থূলঃ সূক্ষ্মোঽচলো লোলো লোলজিহ্বঃ করালকঃ ।
বিরাধেয়ো বিরাগীনো বিলাসী লাস্যলালসঃ ॥ ৭ ॥
লোলাক্ষো লোলধীর্ধর্মী ধনদো ধনদার্চিতঃ ।
ধনী ধ্যেয়োঽপ্যধ্যেয়শ্চ ধর্ম্যো ধর্মময়ো দয়ঃ ॥ ৮ ॥
দয়াবান্ দেবজনকো দেবসেব্যো দয়াপতিঃ ।
ডুলিচক্ষুর্দরীবাসো দম্ভী দেবময়াত্মকঃ ॥ ৯ ॥
কুরূপঃ কীর্তিদঃ কান্তঃ ক্লীবোঽক্লীবাত্মকঃ কুজঃ ।
বুধো বিদ্যাময়ঃ কামী কামকালান্ধকান্তকঃ ॥ ১০ ॥
জীবো জীবপ্রদঃ শুক্রঃ শুদ্ধঃ শর্মপ্রদোঽনঘঃ ।
শনৈশ্চরো বেগগতির্বাচালো রাহুরব্যয়ঃ ॥ ১১ ॥
কেতুঃ কারাপতিঃ কালঃ সূর্যোঽমিতপরাক্রমঃ ।
চন্দ্রো রুদ্রপতিঃ ভাস্বান্ ভাগ্যদো ভর্গরূপভৃত্ ॥ ১২ ॥
ক্রূরো ধূর্তো বিয়োগী চ সঙ্গী গঙ্গাধরো গজঃ ।
গজাননপ্রিয়ো গীতো গানী স্নানার্চনপ্রিয়ঃ ॥ ১৩ ॥
পরমঃ পীবরাঙ্গশ্চ পার্বতীবল্লভো মহান্ ।
পরাত্মকো বিরাড্ধৌম্যঃ বানরোঽমিতকর্মকৃত্ ॥ ১৪ ॥
চিদানন্দী চারুরূপো গারুডো গরুডপ্রিয়ঃ ।
নন্দীশ্বরো নয়ো নাগো নাগালঙ্কারমণ্ডিতঃ ॥ ১৫ ॥
নাগহারো মহানাগো গোধরো গোপতিস্তপঃ ।
ত্রিলোচনস্ত্রিলোকেশস্ত্রিমূর্তিস্ত্রিপুরান্তকঃ ॥ ১৬ ॥
ত্রিধাময়ো লোকময়ো লোকৈকব্যসনাপহঃ ।
ব্যসনী তোষিতঃ শম্ভুস্ত্রিধারূপস্ত্রিবর্ণভাক্ ॥ ১৭ ॥
ত্রিজ্যোতিস্ত্রিপুরীনাথস্ত্রিধাশান্তস্ত্রিধাগতিঃ ।
ত্রিধাগুণী বিশ্বকর্তা বিশ্বভর্তাঽঽধিপূরুষঃ ॥ ১৮ ॥
উমেশো বাসুকির্বীরো বৈনতেয়ো বিচারকৃত্ ।
বিবেকাক্ষো বিশালাক্ষোঽবিধির্বিধিরনুত্তমঃ ॥ ১৯ ॥
বিদ্যানিধিঃ সরোজাক্ষো নিঃস্মরঃ স্মরনাশনঃ ।
স্মৃতিমান্ স্মৃতিদঃ স্মার্তো ব্রহ্মা ব্রহ্মবিদাং বরঃ ॥ ২০ ॥
ব্রাহ্মব্রতী ব্রহ্মচারী চতুরশ্চতুরাননঃ ।
চলাচলোঽচলগতির্বেগী বীরাধিপো বরঃ ॥ ২১ ॥
সর্ববামঃ সর্বগতিঃ সর্বমান্যঃ সনাতনঃ ।
সর্বব্যাপী সর্বরূপঃ সাগরশ্চ সমেশ্বরঃ ॥ ২২ ॥
সমনেত্রঃ সমদ্যুতিঃ সমকায়ঃ সরোবরঃ ।
সরস্বান্ সত্যবাক্ সত্যঃ সত্যরূপঃ সুধীঃ সুখী ॥ ২৩ ॥
সুরাট্ সত্যঃ সত্যমতী রুদ্রো রৌদ্রবপুর্বসুঃ ।
বসুমান্ বসুধানাথো বসুরূপো বসুপ্রদঃ ॥ ২৪ ॥
ঈশানঃ সর্বদেবানামীশানঃ সর্ববোধিনাম্ ।
ঈশোঽবশেষোঽবয়বী শেষশায়ী শ্রিয়ঃ পতিঃ ॥ ২৫ ॥
ইন্দ্রশ্চন্দ্রাবতংসী চ চরাচরজগত্স্থিতিঃ ।
স্থিরঃ স্থাণুরণুঃ পীনঃ পীনবক্ষাঃ পরাত্পরঃ ॥ ২৬ ॥
পীনরূপো জটাধারী জটাজূটসমাকুলঃ ।
পশুরূপঃ পশুপতিঃ পশুজ্ঞানী পয়োনিধিঃ ॥ ২৭ ॥
বেদ্যো বৈদ্যো বেদময়ো বিধিজ্ঞো বিধিমান্ মৃডঃ ।
শূলী শুভঙ্করঃ শোভ্যঃ শুভকর্তা শচীপতিঃ ॥ ২৮ ॥
শশাঙ্কধবলঃ স্বামী বজ্রী শঙ্খী গদাধরঃ ।
চতুর্ভুজশ্চাষ্টভুজঃ সহস্রভুজমণ্ডিতঃ ॥ ২৯ ॥
স্রুবহস্তো দীর্ঘকেশো দীর্ঘো দম্ভবিবর্জিতঃ ।
দেবো মহোদধির্দিব্যো দিব্যকীর্তির্দিবাকরঃ ॥ ৩০ ॥
উগ্ররূপ উগ্রপতিরুগ্রবক্ষাস্তপোময়ঃ ।
তপস্বী জটিলস্তাপী তাপহা তাপবর্জিতঃ ॥ ৩১ ॥
হবির্হরো হয়পতির্হয়দো হরিমণ্ডিতঃ ।
হরিবাহী মহৌজস্কো নিত্যো নিত্যাত্মকোঽনলঃ ॥ ৩২ ॥
সম্মানী সংসৃতির্হারী সর্গী সন্নিধিরন্বয়ঃ ।
বিদ্যাধরো বিমানী চ বৈমানিকবরপ্রদঃ ॥ ৩৩ ॥
বাচস্পতির্বসাসারো বামাচারী বলন্ধরঃ ।
বাগ্ভবো বাসবো বায়ুর্বাসনাবীজমণ্ডিতঃ ॥ ৩৪ ॥
বাসী কোলশৃতির্দক্ষো দক্ষয়জ্ঞবিনাশনঃ ।
দাক্ষো দৌর্ভাগ্যহা দৈত্যমর্দনো ভোগবর্ধনঃ ॥ ৩৫ ॥
ভোগী রোগহরো হেয়ো হারী হরিবিভূষণঃ ।
বহুরূপো বহুমতির্বহুবিত্তো বিচক্ষণঃ ॥ ৩৬ ॥
নৃত্তকৃচ্চিত্তসন্তোষো নৃত্তগীতবিশারদঃ ।
শরদ্বর্ণবিভূষাঢ্যো গলদগ্ধোঽঘনাশনঃ ॥ ৩৭ ॥
নাগী নাগময়োঽনন্তোঽনন্তরূপঃ পিনাকভৃতঃ ।
নটনো হাটকেশানো বরীয়াংশ্চ বিবর্ণভৃত্ ॥ ৩৮ ॥
ঝাঙ্কারী টঙ্কহস্তশ্চ পাশী শার্ঙ্গী শশিপ্রভঃ ।
সহস্ররূপো সমগুঃ সাধূনামভয়প্রদঃ ॥ ৩৯ ॥
সাধুসেব্যঃ সাধুগতিঃ সেবাফলপ্রদো বিভুঃ ।
সুমহা মদ্যপো মত্তো মত্তমূর্তিঃ সুমন্তকঃ ॥ ৪০ ॥
কীলী লীলাকরো লান্তঃ ভববন্ধৈকমোচনঃ ।
রোচিষ্ণুর্বিষ্ণুরচ্যুতশ্চূতনো নূতনো নবঃ ॥ ৪১ ॥
ন্যগ্রোধরূপো ভয়দো ভয়হাঽভীতিধারণঃ ।
ধরণীধরসেব্যশ্চ ধরাধরসুতাপতিঃ ॥ ৪২ ॥
ধরাধরোঽন্ধকরিপুর্বিজ্ঞানী মোহবর্জিতঃ ।
স্থাণুকেশো জটী গ্রাম্যো গ্রামারামো রমাপ্রিয়ঃ ॥ ৪৩ ॥
প্রিয়কৃত্ প্রিয়রূপশ্চ বিপ্রয়োগী প্রতাপনঃ ।
প্রভাকরঃ প্রভাদীপ্তো মন্যুমান্ অবনীশ্বরঃ ॥ ৪৪ ॥
তীক্ষ্ণবাহুস্তীক্ষ্ণকরস্তীক্ষ্ণাংশুস্তীক্ষ্ণলোচনঃ ।
তীক্ষ্ণচিত্তস্ত্রয়ীরূপস্ত্রয়ীমূর্তিস্ত্রয়ীতনুঃ ॥ ৪৫ ॥
হবির্ভুগ্ হবিষাং জ্যোতির্হালাহলো হলীপতিঃ ।
হবিষ্মল্লোচনো হালাময়ো হরিতরূপভৃত্ ॥ ৪৬ ॥
ম্রদিমাঽঽম্রময়ো বৃক্ষো হুতাশো হুতভুগ্ গুণী ।
গুণজ্ঞো গরুডো গানতত্পরো বিক্রমী ক্রমী ॥ ৪৭ ॥
ক্রমেশ্বরঃ ক্রমকরঃ ক্রমিকৃত্ ক্লান্তমানসঃ ।
মহাতেজা মহামারো মোহিতো মোহবল্লভঃ ॥ ৪৮ ॥
মহস্বী ত্রিদশো বালো বালাপতিরঘাপহঃ ।
বাল্যো রিপুহরো হাহী গোবির্গবিমতোঽগুণঃ ॥ ৪৯ ॥
সগুণো বিত্তরাড্ বীর্যো বিরোচনো বিভাবসুঃ ।
মালাময়ো মাধবশ্চ বিকর্তনো বিকত্থনঃ ॥ ৫০ ॥
মানকৃন্মুক্তিদোঽতুল্যো মুখ্যঃ শত্রুভয়ঙ্করঃ ।
হিরণ্যরেতাঃ সুভগঃ সতীনাথঃ সিরাপতিঃ ॥ ৫১ ॥
মেঢ্রী মৈনাকভগিনীপতিরুত্তমরূপভৃত্ ।
আদিত্যো দিতিজেশানো দিতিপুত্রক্ষয়ঙ্করঃ ॥ ৫২ ॥
বসুদেবো মহাভাগ্যো বিশ্বাবসুর্বসুপ্রিয়ঃ ।
সমুদ্রোঽমিততেজাশ্চ খগেন্দ্রো বিশিখী শিখী ॥ ৫৩ ॥
গরুত্মান্ বজ্রহস্তশ্চ পৌলোমীনাথ ঈশ্বরঃ ।
য়জ্ঞপেয়ো বাজপেয়ঃ শতক্রতুঃ শতাননঃ ॥ ৫৪ ॥
প্রতিষ্ঠস্তীব্রবিস্রম্ভী গম্ভীরো ভাববর্ধনঃ ।
গায়িষ্ঠো মধুরালাপো মধুমত্তশ্চ মাধবঃ ॥ ৫৫ ॥
মায়াত্মা ভোগিনাং ত্রাতা নাকিনামিষ্টদায়কঃ ।
নাকীন্দ্রো জনকো জন্যঃ স্তম্ভনো রম্ভনাশনঃ ॥ ৫৬ ॥
শঙ্কর ঈশ্বর ঈশঃ শর্বরীপতিশেখরঃ ।
লিঙ্গাধ্যক্ষঃ সুরাধ্যক্ষো বেদাধ্যক্ষো বিচারকঃ ॥ ৫৭ ॥
ভর্গোঽনর্ঘ্যো নরেশানো নরবাহনসেবিতঃ ।
চতুরো ভবিতা ভাবী ভাবদো ভবভীতিহা ॥ ৫৮ ॥
ভূতেশো মহিতো রামো বিরামো রাত্রিবল্লভঃ ।
মঙ্গলো ধরণীপুত্রো ধন্যো বুদ্ধিবিবর্ধনঃ ॥ ৫৯ ॥
জয়ী জীবেশ্বরো জারো জাঠরো জহ্নুতাপনঃ ।
জহ্নুকন্যাধরঃ কল্পো বত্সরো মাসরূপধৃত্ ॥ ৬০ ॥
ঋতুরৃভূসুতাধ্যক্ষো বিহারী বিহগাধিপঃ ।
শুক্লাম্বরো নীলকণ্ঠঃ শুক্লো ভৃগুসুতো ভগঃ ॥ ৬১ ॥
শান্তঃ শিবপ্রদোঽভেদ্যোঽভেদকৃচ্ছান্তকৃত্ পতিঃ ।
নাথো দান্তো ভিক্ষুরূপী দাতৃশ্রেষ্ঠো বিশাম্পতিঃ ॥ ৬২ ॥
কুমারঃ ক্রোধনঃ ক্রোধী বিরোধী বিগ্রহী রসঃ ।
নীরসঃ সরসঃ সিদ্ধো বৃষণী বৃষঘাতনঃ ॥ ৬৩ ॥
পঞ্চাস্যঃ ষণ্মুখশ্চৈব বিমুখঃ সুমুখীপ্রিয়ঃ ।
দুর্মুখো দুর্জয়ো দুঃখী সুখী সুখবিলাসদঃ ॥ ৬৪ ॥
পাত্রী পৌত্রী পবিত্রশ্চ ভূতাত্মা পূতনান্তকঃ ।
অক্ষরং পরমং তত্বং বলবান্ বলঘাতনঃ ॥ ৬৫ ॥
ভল্লী ভৌলির্ভবাভাবো ভাবাভাববিমোচনঃ ।
নারায়ণো মুক্তকেশো দিগ্দেবো ধর্মনায়কঃ ॥ ৬৬ ॥
কারামোক্ষপ্রদোঽজেয়ো মহাঙ্গঃ সামগায়নঃ ।
তত্সঙ্গমো নামকারী চারী স্মরনিসূদনঃ ॥ ৬৭ ॥
কৃষ্ণঃ কৃষ্ণাম্বরঃ স্তুত্যস্তারাবর্ণস্ত্রপাকুলঃ ।
ত্রপাবান্ দুর্গতিত্রাতা দুর্গমো দুর্গঘাতনঃ ॥ ৬৮ ॥
মহাপাদো বিপাদশ্চ বিপদং নাশকো নরঃ ।
মহাবাহুর্মহোরস্কো মহানন্দপ্রদায়কঃ ॥ ৬৯ ॥
মহানেত্রো মহাদাতা নানাশাস্ত্রবিচক্ষণঃ ।
মহামূর্ধা মহাদন্তো মহাকর্ণো মহোরগঃ ॥ ৭০ ॥
মহাচক্ষুর্মহানাসো মহাগ্রীবো দিগালয়ঃ ।
দিগ্বাসা দিতিজেশানো মুণ্ডী মুণ্ডাক্ষসূত্র ভৃত্ ॥ ৭১ ॥
শ্মশাননিলয়োঽরাগী মহাকটিরনূতনঃ ।
পুরাণপুরুষোঽপারঃ পরমাত্মা মহাকরঃ ॥ ৭২ ॥
মহালস্যো মহাকেশো মহোষ্ঠো মোহনো বিরাট্ ।
মহামুখো মহাজঙ্ঘো মণ্ডলী কুণ্ডলী নটঃ ॥ ৭৩ ॥
অসপত্নঃ পত্রকরঃ পাত্রহস্তশ্চ পাটবঃ ।
লালসঃ সালসঃ সালঃ কল্পবৃক্ষশ্চ কম্পিতঃ ॥ ৭৪ ॥
কম্পহা কল্পনাহারী মহাকেতুঃ কঠোরকঃ ।
অনলঃ পবনঃ পাঠঃ পীঠস্থঃ পীঠরূপকঃ ॥ ৭৫ ॥
পাটীনঃ কুলিশী পীনো মেরুধামা মহাগুণী ।
মহাতূণীরসংয়ুক্তো দেবদানবদর্পহা ॥ ৭৬ ॥
অথর্বশীর্ষঃ সোম্যাস্যঃ ঋক্সহস্রামিতেক্ষণঃ ।
য়জুঃসামমুখো গুহ্যো য়জুর্বেদবিচক্ষণঃ ॥ ৭৭ ॥
য়াজ্ঞিকো য়জ্ঞরূপশ্চ য়জ্ঞজ্ঞো ধরণীপতিঃ ।
জঙ্গমী ভঙ্গদো ভাষাদক্ষোঽভিগমদর্শনঃ ॥ ৭৮ ॥
অগম্যঃ সুগমঃ খর্বঃ খেটী খট্বাননঃ নয়ঃ ।
অমোঘার্থঃ সিন্ধুপতিঃ সৈন্ধবঃ সানুমধ্যগঃ ॥ ৭৯ ॥
প্রতাপী প্রজয়ী প্রাতর্মধ্যাহ্নসায়মধ্বরঃ ।
ত্রিকালজ্ঞঃ সুগণকঃ পুষ্করস্থঃ পরোপকৃত্ ॥ ৮০ ॥
উপকর্তাপহর্তা চ ঘৃণী রণজয়প্রদঃ ।
ধর্মী চর্মাম্বরশ্চারুরূপশ্চারুবিশোষণঃ ॥ ৮১ ॥
নক্তঞ্চরঃকালবশী বশী বশিবরোঽবশঃ ।
বশ্যো বশ্যকরো ভস্মশায়ী ভস্মবিলেপনঃ ॥ ৮২ ॥
ভস্মাঙ্গী মলিনাঙ্গশ্চ মালামণ্ডিতমূর্ধজঃ ।
গণকার্যঃ কুলাচারঃ সর্বাচারঃ সখা সমঃ ॥ ৮৩ ॥
সুকুরঃ গোত্রভিদ্ গোপ্তা ভীমরূপো ভয়ানকঃ ।
অরুণশ্চৈকচিন্ত্যশ্চ ত্রিশঙ্কুঃ শঙ্কুধারণঃ ॥ ৮৪ ॥
আশ্রমী ব্রাহ্মণো বজ্রী ক্ষত্রিয়ঃ কার্যহেতুকঃ ।
বৈশ্যঃ শূদ্রঃ কপোতস্থঃ ত্বষ্টা তুষ্টো রুষাকুলঃ ॥ ৮৫ ॥
রোগী রোগাপহঃ শূরঃ কপিলঃ কপিনায়কঃ ।
পিনাকী চাষ্টমূর্তিশ্চ ক্ষিতিমান্ ধৃতিমাংস্তথা ॥ ৮৬ ॥
জলমূর্তির্বায়ুমূর্তির্হুতাশঃ সোমমূর্তিমান্ ।
সূর্যদেবো য়জমান আকাশঃ পরমেশ্বরঃ ॥ ৮৭ ॥
ভবহা ভবমূর্তিশ্চ ভূতাত্মা ভূতভাবনঃ ।
ভবঃ শর্বস্তথা রুদ্রঃ পশুনাথশ্চ শঙ্করঃ ॥ ৮৮ ॥
গিরিজো গিরিজানাথো গিরীন্দ্রশ্চ মহেশ্বরঃ ।
গিরীশঃ খণ্ডহস্তশ্চ মহানুগ্রো গণেশ্বরঃ ॥ ৮৯ ॥
ভীমঃ কপর্দী ভীতিজ্ঞঃ খণ্ডপশ্চণ্ডবিক্রমঃ ।
খড্গভৃত্ খণ্ডপরশুঃ কৃত্তিবাসা বিষাপহঃ ॥ ৯০ ॥
কঙ্কালঃ কলনাকারঃ শ্রীকণ্ঠো নীললোহিতঃ ।
গণেশ্বরো গুণী নন্দী ধর্মরাজো দুরন্তকঃ ॥ ৯১ ॥
ভৃঙ্গিরীটী রসাসারো দয়ালূ রূপমণ্ডিতঃ ।
অমৃতঃ কালরুদ্রশ্চ কালাগ্নিঃ শশিশেখরঃ ॥ ৯২ ॥
সদ্যোজাতঃ সুবর্ণমুঞ্জমেখলী দুর্নিমিত্তহৃত্ ।
দুঃস্বপ্নহৃত্ প্রসহনো গুণিনাদপ্রতিষ্ঠিতঃ ॥ ৯৩ ॥
শুক্লস্ত্রিশুক্লঃ সম্পন্নঃ শুচির্ভূতনিষেবিতঃ ।
য়জ্ঞরূপো য়জ্ঞমুখো য়জমানেষ্টদঃ শুচিঃ ॥ ৯৪ ॥
ধৃতিমান্ মতিমান্ দক্ষো দক্ষয়জ্ঞবিঘাতকঃ ।
নাগহারী ভস্মধারী ভূতিভূষিতবিগ্রহঃ ॥ ৯৫ ॥
কপালী কুণ্ডলী ভর্গঃ ভক্তার্তিভঞ্জনো বিভুঃ ।
বৃষধ্বজো বৃষারূঢো ধর্মবৃষবিবর্ধকঃ ॥ ৯৬ ॥
মহাবলঃ সর্বতীর্থঃ সর্বলক্ষণলক্ষিতঃ ।
সহস্রবাহুঃ সর্বাঙ্গঃ শরণ্যঃ সর্বলোককৃত্ ॥ ৯৭ ॥
পবিত্রস্ত্রিককুন্মন্ত্রঃ কনিষ্ঠঃ কৃষ্ণপিঙ্গলঃ ।
ব্রহ্মদণ্ডবিনির্মাতা শতঘ্নীপাশশক্তিমান্ ॥ ৯৮ ॥
পদ্মগর্ভো মহাগর্ভো ব্রহ্মগর্ভো জলোদ্ভবঃ ।
দেবাসুরবিনির্মাতা দেবাসুরপরায়ণ ॥ ৯৯ ॥
দেবাসুরগুরুর্দেবো দেবাসুরনমস্কৃত্ ।
গুহপ্রিয়ো গণসেব্যঃ পবিত্রঃ সর্বপাবনঃ ॥ ১০০ ॥
ললাটাক্ষো বিশ্বদেবো দমনঃ শ্বেতপিঙ্গলঃ ।
বিমুক্তির্মুক্তিতেজস্কো ভক্তানাং পরমা গতিঃ ॥ ১০১ ॥
দেবাতিদেবো দেবর্ষির্দেবাসুরবরপ্রদঃ ।
কৈলাসগিরিবাসী চ হিমবদ্গিরিসংশ্রয়ঃ ॥ ১০২ ॥
নাথপূজ্যঃ সিদ্ধনৃত্যো নবনাথসমর্চিতঃ ।
কপর্দী কল্পকৃদ্ রুদ্রঃ সুমনা ধর্মবত্সলঃ ॥ ১০৩ ॥
বৃষাকপিঃ কল্পকর্তা নিয়তাত্মা নিরাকুলঃ ।
নীলকণ্ঠো ধনাধ্যক্ষো নাথঃ প্রমথনায়কঃ ॥ ১০৪ ॥
অনাদিরন্তরহিতো ভূতিদো ভূতিবিগ্রহঃ ।
সেনাকল্পো মহাকল্পো য়োগো য়ুগকরো হরিঃ ॥ ১০৫ ॥
য়ুগরূপো মহারূপো মহাগীতো মহাগুণঃ ।
বিসর্গো লিঙ্গরূপশ্চ পবিত্রঃ পাপনাশনঃ ॥ ১০৬ ॥
ঈড্যো মহেশ্বরঃ শম্ভুর্দেবসিংহো নরর্ষভঃ ।
বিবুধোঽগ্রবরঃ সূক্ষ্মঃ সর্বদেবস্তপোময়ঃ ॥ ১০৭ ॥
সুয়ুক্তঃ শোভনো বজ্রী দেবানাং প্রভবোঽব্যয়ঃ ।
গুহঃ কান্তো নিজসর্গঃ পবিত্রঃ সর্বপাবনঃ ॥ ১০৮ ॥
শৃঙ্গী শৃঙ্গপ্রিয়ো বভ্রূ রাজরাজো নিরাময়ঃ ।
দেবাসুরগণাধ্যক্ষো নিয়মেন্দ্রিয়বর্ধনঃ ॥ ১০৯ ॥
ত্রিপুরান্তকঃ শ্রীকণ্ঠস্ত্রিনেত্রঃ পঞ্চবক্ত্রকঃ ।
কালহৃত্ কেবলাত্মা চ ঋগ্যজুঃসামবেদবান্ ॥ ১১০ ॥
ঈশানঃ সর্বভূতামীশ্বরঃ সর্বরক্ষসাম্ ।
ব্রহ্মাধিপতির্ব্রহ্মপতির্ব্রহ্মণোঽধিপতিস্তথা ॥ ১১১ ॥
ব্রহ্মা শিবঃ সদানন্দী সদানন্তঃ সদাশিবঃ ।
মে-অস্তুরূপশ্চার্বঙ্গো গায়ত্রীরূপধারণঃ ॥ ১১২ ॥
অঘোরেভ্যোঽথঘোরেভ্যো ঘোরঘোরতরেভ্যশ্চ ।
সর্বতঃ শর্বসর্বেভ্যো নমস্তে রুদ্ররূপেভ্যঃ ॥ ১১৩ ॥
বামদেবস্তথা জ্যেষ্ঠঃ শ্রেষ্ঠঃ কালঃ করালকঃ ।
মহাকালো ভৈরবেশো বেশী কলবিকরণঃ ॥ ১১৪ ॥
বলবিকরণো বালো বলপ্রমথনস্তথা ।
সর্বভূতাদিদমনো দেবদেবো মনোন্মনঃ ॥ ১১৫ ॥
সদ্যোজাতং প্রপদ্যামি সদ্যোজাতায় বৈ নমঃ ।
ভবে ভবে নাতিভবে ভজস্ব মাং ভবোদ্ভবঃ ॥ ১১৬ ॥
ভাবনো ভবনো ভাব্যো বলকারী পরং পদম্ ।
পরঃ শিবঃ পরো ধ্যেয়ঃ পরং জ্ঞানং পরাত্পরঃ ॥১১৭ ॥
পারাবারঃ পলাশী চ মাংসাশী বৈষ্ণবোত্তমঃ ।
ওঁঐংহ্রীংশ্রীংহ্সৌঃ দেবো ওঁশ্রীংহৌং ভৈরবোত্তমঃ ॥ ১১৮ ॥
ওঁহ্রাং নমঃ শিবায়েতি মন্ত্রো বটুর্বরায়ুধঃ ।
ওঁহ্রীং সদাশিবঃ ওঁহ্রীং আপদুদ্ধারণো মনুঃ ॥ ১১৯ ॥
ওঁহ্রীং মহাকরালাস্যঃ ওঁহ্রীং বটুকভৈরবঃ ।
ভগবাংস্ত্র্যম্বক ওঁহ্রীং ওঁহ্রীং চন্দ্রার্ধশেখরঃ ॥ ১২০ ॥
ওঁহ্রীং সঞ্জটিলো ধূম্রো ওঁহ্রীং ত্রিপুরঘাতনঃ ।
হ্রাংহ্রীংহ্রুং হরিবামাঙ্গ ওঁহ্রীংহ্রূংহ্রীং ত্রিলোচনঃ ॥ ১২১ ॥
ওঁ বেদরূপো বেদজ্ঞ ঋগ্যজুঃসামমূর্তিমান্ ।
রুদ্রো ঘোররবোঽঘোরো ওঁ ক্ষ্ম্যূং অঘোরভৈরবঃ ॥ ১২২ ॥
ওঁজুংসঃ পীয়ুষসক্তোঽমৃতাধ্যক্ষোঽমৃতালসঃ ।
ওঁ ত্র্যম্বকং য়জামহে সুগন্ধিং পুষ্টিবর্ধনম্ ॥ ১২৩ ॥
উর্বারুকমিব বন্ধনান্মৃত্যোর্মুক্ষীয় মামৃতাত্ ।
ওঁহৌংজুংসঃ ওঁভূর্ভুবঃ স্বঃ ওঁজুংসঃ মৃত্যুঞ্জয়ঃ ॥ ১২৪ ॥
ইদং নাম্নাং সহস্রং তু রহস্যং পরমাদ্ভুতম্ ।
সর্বস্বং নাকিনাং দেবি জন্তূনাং ভুবি কা কথা ॥ ১২৫ ॥
তব ভক্ত্যা ময়াখ্যাতং ত্রিষু লোকেষু দুর্লভম্ ।
গোপ্যং সহস্রনামেদং সাক্ষাদমৃতরূপকম্ ॥ ১২৬ ॥
য়ঃ পঠেত্ পাঠয়েদ্বাপি শ্রাবয়েচ্ছৃণুয়াত্ তথা ।
মৃত্যুঞ্জয়স্য দেবস্য ফলং তস্য শিবে শৃণু ॥ ১২৭ ॥
লক্ষ্ম্যা কৃষ্ণো ধিয়া জীবো প্রতাপেন দিবাকরঃ ।
তেজসা বহ্নিদেবস্তু কবিত্বে চৈব ভার্গবঃ ॥ ১২৮ ॥
শৌর্যেণ হরিসঙ্কাশো নীত্যা দ্রুহিণসন্নিভঃ ।
ঈশ্বরত্বেন দেবেশি মত্সমঃ কিমতঃ পরম্ ॥ ১২৯ ॥
য়ঃ পঠেদর্ধরাত্রে চ সাধকো ধৈর্যসংয়ুতঃ ।
পঠেত্ সহস্রনামেদং সিদ্ধিমাপ্নোতি সাধকঃ ॥ ১৩০ ॥
চতুষ্পথে চৈকলিঙ্গে মরুদেশে বনেঽজনে ।
শ্মশানে প্রান্তরে দুর্গে পাঠাত্ সিদ্ধির্ন সংশয়ঃ ॥ ১৩১ ॥
নৌকায়াং চৌরসঙ্ঘে চ সঙ্কটে প্রাণসংক্ষয়ে ।
য়ত্র য়ত্র ভয়ে প্রাপ্তে বিষবহ্নিভয়াদিষু ॥ ১৩২ ॥
পঠেত্ সহস্রনামাশু মুচ্যতে নাত্র সংশয়ঃ ।
ভৌমাবস্যাং নিশীথে চ গত্বা প্রেতালয়ং সুধীঃ ॥ ১৩৩ ॥
পঠিত্বা স ভবেদ্ দেবি সাক্ষাদিন্দ্রোঽর্চিতঃ সুরৈঃ ।
শনৌ দর্শদিনে দেবি নিশায়াং সরিতস্তটে ॥ ১৩৪ ॥
পঠেন্নামসহস্রং বৈ জপেদষ্টোত্তরং শতম্ ।
সুদর্শনো ভবেদাশু মৃত্যুঞ্জয়প্রসাদতঃ ॥ ১৩৫ ॥
দিগম্বরো মুক্তকেশঃ সাধকো দশধা পঠেত্ ।
ইহ লোকে ভবেদ্রাজা পরে মুক্তির্ভবিষ্যতি ॥ ১৩৬ ॥
ইদং রহস্যং পরমং ভক্ত্যা তব ময়োদিতম্ ।
মন্ত্রগর্ভং মনুময়ং ন চাখ্যেয়ং দুরাত্মনে ॥ ১৩৭ ॥
নো দদ্যাত্ পরশিষ্যেভ্যঃ পুত্রেভ্যোঽপি বিশেষতঃ ।
রহস্যং মম সর্বস্বং গোপ্যং গুপ্ততরং কলৌ ॥ ১৩৮ ॥
ষণ্মুখস্যাপি নো বাচ্যং গোপনীয়ং তথাত্মনঃ ।
দুর্জনাদ্ রক্ষণীয়ং চ পঠনীয়মহর্নিশম্ ॥ ১৩৯ ॥
শ্রোতব্যং সাধকমুখাদ্রক্ষণীয়ং স্বপুত্রবত্ ।
॥ ইতি শ্রীরুদ্রয়ামলে তন্ত্রে শ্রীদেবীরহস্যে
মৃত্যুঞ্জয়সহস্রনামং সম্পূর্ণম্ ॥