From Laxminarayaniyasamhita khanda 2 adhyaya 240
This does not really have 1000 names but perhaps with the mention of “sahasrarupena harerdarshanam’ in the end it is considered /referenced in Purana Index for sahasranamastotra.
॥ Lakshminarayaniyasamhita’s Narayanasahasranamastotram Bengali Lyrics ॥
॥ নারায়ণসহস্রনামস্তোত্রং শ্রীলক্ষ্মীনারায়ণীয়সংহিতায়াম্ ॥
ওঁ শ্রী গণেশায় নমঃ
শ্রীকৃষ্ণ উবাচ
শৃণু ত্বং রাধিকে চান্যং চমত্কারং শ্রিয়ঃপতেঃ ।
কুংকুমবাপিকাক্ষেত্রে জাতং য়োগেশ্বরং প্রতি ॥ ১ ॥
বীতিহোত্রো মহোয়োগী বনে য়োগেশ্বরোঽভবত্ ।
হিমাচলে বদর্যাং স তপস্তেপেঽতিদারুণম্ ॥ ২ ॥
সর্বয়োগকলাঃ প্রাপ য়থা শংভুস্তথাঽভবত্ ।
তেন য়োগপ্রতাপেন দৃষ্টা বৈ দিব্যচক্ষুষা ॥ ৩ ॥
কেতুমালে কৃতা য়জ্ঞাঃ কেনাটেঽপি কৃতা মখাঃ ।
অমরীণাং প্রদেশেষু কৃতং য়দ্ধরিণা তু তত্ ॥ ৪ ॥
ঊর্জাকৃষ্ণাষ্টমীজন্মমহোত্সবশ্চ য়ঃ কৃতঃ ।
শারদাপূজনাদ্যং চ হ্যন্নকূটমহোত্সবঃ ॥ ৫ ॥
এতত্সর্বং দিব্যদৃষ্ট্যা বিজ্ঞায় পরমেশ্বরম্ ।
কাংভরেয়ং বালকৃষ্ণং দ্রষ্টুং সাক্ষাদুপায়য়ৌ ॥ ৬ ॥
আয়য়ৌ কুংকুমবাপীক্ষেত্রে কৃষ্ণনারায়ণম্ ।
সহস্ররূপধর্তাঽসৌ বীতিহোত্রঃ সমাধিমান্ ॥ ৭ ॥
মার্গশীর্ষতৃতীয়ায়ামশ্বপট্টসরস্তটে ।
সেতুমাশ্রিত্য চ ন্যগ্রোধস্যাঽধোঽধান্নিজাসনম্ ॥ ৮ ॥
সহস্ররূপধর্তাঽসৌ সংকল্প্য নিষসাদ হ ।
মম মূলস্বরূপং চাগত্যাঽঽশ্লিষ্যেত্ রমাপতিঃ ॥ ৯ ॥
ততঃ সহস্ররূপৈশ্চাঽঽশ্লিষ্যেন্মাং স প্রভুঃ পুনঃ ।
ঋষভস্য কারয়েন্যে সদ্রুরোর্দর্শনং য়দি ॥ ১০ ॥
তদাঽহং শ্রীহরেরগ্রে নিবত্স্যেঽত্র সদাঽনুগঃ ।
মোক্ষং প্রসাধয়িষ্যেঽত্র বদর্যা ন প্রয়োজনম্ ॥ ১১ ॥
ন গুরোরপরস্যাপি মোক্ষদো হি গুরুর্যতঃ ।
য়ত্রাত্মনো ভবেত্পুষ্টির্যেন তরতি সাগরম্ ॥ ১২ ॥
য়স্মাচ্চাত্মমহাশান্তিস্তং গুরুং ত্বাশ্রয়েজ্জনঃ ।
য়স্মাত্পাপবিনাশশ্চ য়স্মাদজ্ঞাননাশনম্ ॥ ১৩ ॥
য়স্মাদ্ বৃত্তিনিরোধশ্চ বাসনাক্ষপণং য়তঃ ।
য়স্মাদাত্মপ্রকাশশ্চ তং গুরুং ত্বাশ্রয়েজ্জনঃ ॥ ১৪ ॥
য়স্মাচ্ছিক্ষামবাপ্যেতৈশ্বর্যং চমত্কৃতিং তথা ।
দিব্যভাবমধিতিষ্ঠেত্তং গুরুং ত্বাশ্রয়েজ্জনঃ ॥ ১৫ ॥
গুরবো বহবঃ সন্তি লৌকিকাশ্চাপ্যলৌকিকাঃ ।
লৌকিকেন হি লোকস্থাঃ কার্যা বৈ গুরবো য়থা ॥ ১৬ ॥
অলৌকিকেন শিষ্যেণাঽলৌকিকা গুরবো ধৃতাঃ ।
ময়াঽপ্যলৌকিকঃ সোঽয়ং কর্তব্যো ভগবান্ গুরুঃ ॥ ১৭ ॥
য়ত্র সর্বং হি কর্তব্যং হরৌ পরিসমাপ্যতে ।
মাতা গুরুর্হি জনুদা পিতা গুরুর্হি বীজদঃ ॥ ১৮ ॥
অন্যে রক্ষাকরাঃ সন্তি দেহস্য গুরবো হি তে ।
ভাষাজ্ঞানকরাশ্চান্যে বান্ধবাদ্যাশ্চ য়োষিতঃ ॥ ১৯ ॥
তথা শিক্ষাকরাশ্চান্যে বিদ্যাদানকরা অপি ।
কলাকৌশল্যশিক্ষায়া দাতারো গুরবোঽপি চ ॥ ২০ ॥
ত এতে দেহয়াত্রায়া ভবন্তি গুরবঃ খলু ।
আত্মজ্ঞানপ্রদো য়স্তু বিষ্ণুমন্ত্রপ্রদশ্চ য়ঃ ॥ ২১ ॥
ধর্মবৃত্তিপ্রদো য়শ্চ গুরুঃ শ্রেষ্ঠো হি সম্মতঃ ।
ব্রহ্মস্থিতিপ্রদো য়শ্চ য়োগসিদ্ধিপ্রদশ্চ য়ঃ ॥ ২২ ॥
বৈশারদ্যপ্রদো বুদ্ধৌ গুরুঃ শ্রেষ্ঠতরো হি সঃ ।
নির্মূলাং বাসনাং কৃত্বা পরমেশপ্রদর্শকঃ ॥ ২৩ ॥
আত্মনা পরমাত্মানং প্রাপকো দিব্যমোক্ষদঃ ।
ব্রহ্মলোকপ্রেষকশ্চ গুরুঃ শ্রেষ্ঠতমো হি সঃ ॥ ২৪ ॥
গকারস্ত্বন্ধমজ্ঞানং রকারো জ্ঞানমুজ্জ্বলম্ ।
অজ্ঞানহা জ্ঞানদশ্চ গুরুর্গৌরববান্মতঃ ॥ ২৫ ॥
গময়ত্যক্ষরং ধাম রময়ত্যপি ধামিনা ।
গুরুঃ সোঽয়ং মোক্ষদাতা নান্যঃ শ্রেষ্ঠস্ততো গুরুঃ ॥ ২৬ ॥
গুরুর্যোগী ব্রহ্মচারী ধর্মী জ্ঞানী বিরাগবান্ ।
সাধুশীলো গুরুশ্চাপি নারায়ণঃ পরো গুরুঃ ॥ ২৭ ॥
ভুক্ত্তিদাতা মোক্ষদাতা সর্বস্বদো হরির্গুরুঃ ।
গুরোঃ সাক্ষাত্কারয়িতা গুরোর্গুরুর্যতোঽত্র সঃ ॥ ২৮ ॥
স এব শ্রীহরিশ্চাঽয়ং মুক্ত্তানাং পরমো গুরুঃ ।
গুরুঃ সর্বাবতারাণাং সতীনাং চ সতাং গুরুঃ ॥ ২৯ ॥
ঈশ্বরাণাং তথা ধাম্নাং য়োগিনাং সর্গসংবিদাম্ ।
পূর্বেষাং সৃষ্টিকর্তৄণাং মহর্ষীণাং দ্যুবাসিনাম্ ॥ ৩০ ॥
প্রজেশানাং কর্মঠানাং ভক্তানাং চ পরো গুরুঃ ।
গুরূণাং য়াবতামগ্র্যো নারায়ণগুরোর্গুরুঃ ॥ ৩১ ॥
অনাদি শ্রীকৃষ্ণনারায়ণঃ শ্রীকৃষ্ণবল্লভঃ ।
শ্রীকৃষ্ণবল্লভঃ স্বাপী কাংভরেয়ঃ পরাত্পরঃ ॥ ৩২ ॥
শ্রীমদ্গোপালবালোঽয়ং স্বামী বৈ সর্বদেহিনাম্ ।
ময়া লব্ধঃ স মে পূর্ণং করিষ্যত্যেব মানসম্ ॥ ৩৩ ॥
নিবত্স্যামি চরণেঽস্য প্রাপ্স্যামি ধাম চাক্ষরম্ ।
সঞ্চিন্ত্যেতি বীতিহোত্রো ধ্যানমগ্নঃ সহস্রধা ॥ ৩৪ ॥
সহস্ররূপবান্ জাতো দৃষ্ট্বা তং মানবাস্তটে ।
স্নাতারোঽগুঃ পরশ্চর্যং কস্যেমানি সমানি বৈ ॥ ৩৫ ॥
রূপাণি, কে চাগতা বৈ য়োগিনোঽত্র সহস্রশঃ ।
সমবেষাঃ সমদেহাঃ সমাংগাঃ সন্তি সদৃশাঃ ॥ ৩৬ ॥
সমকেশাঃ সমধ্যানাঃ সমানপরিমাণকাঃ ।
ভ্রাতরো বা ভবন্ত্যেতে ধামমুক্তা ভবন্তি বা ॥ ৩৭ ॥
বদরীবাসিনো বাঽপি শ্বেতমুক্তাঃ কিমাগতাঃ ।
শংকরস্য গণাঃ কিংবা দেবাস্তাপসরূপিণঃ ॥ ৩৮ ॥
সাধ্যা বা দেবতা য়দ্বা মেরুবাসা হি তাপসাঃ ।
ক এতে তু ভবেয়ুর্বৈ চন্দ্রাস্যা ভাস্করপ্রভাঃ ॥ ৩৯ ॥
ধ্যানয়োগা য়োগিনো বা য়োগীশ্বরাঃ সহস্রশঃ ।
ন বদন্তি ন পশ্যন্তি ন প্রাণান্ চালয়ন্ত্যপি ॥ ৪০ ॥
স্থিরমৌনাঃ স্থিরচিতা ঈশ্বরাঃ স্যুশ্চ কেন্বিমে ।
ইত্যেবং তর্কয়ন্তো বৈ কুংকুমবাপিকাজনাঃ ॥ ৪১ ॥
সংঘশো বৈ সমায়ান্তি দ্রষ্টুং কুতূহলান্বিতাঃ ।
কেচিন্নমন্তি দৃষ্ট্বৈব প্রশংসন্তি বদন্তি চ ॥ ৪২ ॥
প্রতাপোঽয়ং বালকৃষ্ণকৃপানাথস্য বর্ততে ।
অস্য দর্শনলাভার্থং নিত্যমায়ান্তি য়োগিনঃ ॥ ৪৩ ॥
অদৃশ্যা ঈদৃশাঃ সর্বেঽধুনা তে দৃশ্যতাং গতাঃ ।
রুদ্রাঃ সহস্রশশ্চাপি বিষ্ণবশ্চ সহস্রশঃ ॥ ৪৪ ॥
সহস্রসোঽপি ব্রহ্মাণো দ্রষ্টুমায়ান্তি সদ্বরম্ ।
তথা মহর্ষয়ো নিত্যং পিতরো দেবতাস্তথা ॥ ৪৫ ॥
সাধ্যা বিশ্বে চ মরুতো দ্রষ্টুমায়ান্তি নিত্যশঃ ।
তীর্থান্যপি সমায়ান্তি দিক্পালাঃ সৃষ্টিপালকাঃ ॥ ৪৬ ॥
অথবা পার্ষদা দিব্যা গোলোকাদিনিবাসিনঃ ।
সমায়ান্তি চ বৈকুণ্ঠপার্ষদা অপি নিত্যশঃ ॥ ৪৭ ॥
গ্রহনক্ষত্রতারাশ্চ সূর্যাশ্চন্দ্রাঃ সহস্রশঃ ।
বৈমানিকাঃ সমায়ান্তি লোকান্তরেভ্য আদৃতাঃ ॥ ৪৮ ॥
বালখিল্যাঃ সমায়ান্তি য়দ্বা ব্রহ্মসভাদ্বিজাঃ ।
কিং বা ভবেয়ুর্গান্ধর্বা য়ক্ষা বা ধনদাশ্চ বা ॥ ৪৯ ॥
চারণাঃ পর্বতবাসা মুনয়ো বা বনস্থিতাঃ ।
পরং সাদৃশ্যমেবৈষামপূর্বত্বং বিগাহতে ॥ ৫০ ॥
ললাটে বৈষ্ণবং পুণ্ড্রং মস্তকে তাপসী জটা ।
নেত্রমুদ্রা য়োগপুষ্টাঃ খ্যাপয়ন্ত্যংশমাচ্যুতম্ ॥ ৫১ ॥
য়ে বা কে বা ভবেয়ুস্তে সাক্ষাত্কৃতা য়দত্র তে ।
অস্মাভির্দৈবয়োগেন পুণ্যবদ্ভিঃ সুভাগ্যকৈঃ ॥ ৫২ ॥
অবশ্যমেষাং বিজ্ঞানং ক্ষণেঽত্রৈব ভবিষ্যতি ।
ইত্যেবং তে বদন্তশ্চ প্রজাঃ সংঘশ এব হ ॥ ৫৩ ॥
প্রপশ্যন্তি সরস্তীরে সহস্রয়োগিনস্তদা ।
অথ শ্রীমদ্বালকৃষ্ণো নারায়ণগুরোর্গুরূ ॥ ৫৪ ॥
সমায়য়ো সরস্তীরে সন্নিধৌ য়োগিনাং তদা ।
হার্দং জানঁস্তদা তূর্ণং প্রবীক্ষ্য মূলরূপিণম্ ॥ ৫৫ ॥
সমুত্তোল্য সমাহূয় নাম্না তং বীতিহোত্রক ! ।
উত্তিষ্ঠেতি করৌ ধৃত্বা কৃত্বা বক্ষসি য়োগিনম্ ॥ ৫৬ ॥
সমাশ্লিষ্যদ্ধসঁস্তূর্ণং স্বয়ং সহস্রধাঽভবত্ ।
সমুত্থিতৈঃ সহস্রস্বরূপৈরাশ্লিষ্যদচ্যুতঃ ॥ ৫৭ ॥
ততস্তূর্ণং হরিশ্চৈকস্বরূপঃ সম্বভূব হ ।
বীতীহোত্রোঽপি সহসা ত্বেকরূপো ব্যজায়ত ॥ ৫৮ ॥
আশ্চর্যচকিতা লোকা জয়শব্দান্ প্রচক্রিরে ।
তাবচ্ছ্রীবালকৃষ্ণোঽপি বভূব ঋষভো গুরুঃ ॥ ৫৯ ॥
বৃদ্ধঃ শ্বেতজটায়ুক্তো বিবস্ত্রো ধূলিধূসরঃ ।
বিচিত্ত ইব চোন্মত্তো জিতসর্বেন্দ্রিয়ো য়তিঃ ॥ ৬০ ॥
স্বভাবতেজসা ব্যাপ্তো ব্রহ্মনিষ্ঠাপরঃ পুমান্ ।
অপ্রাকৃত ইব ত্বাস্তে বিমনা ইব দেহিষু ॥ ৬১ ॥
বীতিহোত্রোঽপি চ গুরুমৃষভং বীক্ষ্য দণ্ডবত্ ।
চকার বহুধা তত্র তুষ্টাব পরমেশ্বরম্ ॥ ৬২ ॥
ত্বং গুরুস্ত্বং চান্তরাত্মা ঋষভস্ত্বং চ য়োগিরাট্ ।
য়োগেশ্বরো ভবানেব ত্বং চেশস্ত্বং পরেশ্বরঃ ॥ ৬৩ ॥
ত্বং মুক্তস্ত্বং মহামুক্তো মুক্তেশ্বরো ভবানপি ।
অক্ষরং ত্বং ভবান্ ব্রহ্ম পরব্রহ্ম ভবানপি ॥ ৬৪ ॥
ভগবান্ কৃষ্ণ এবাসি কৃষ্ণনারায়ণোঽসি চ ।
অনাদিশ্রীকৃষ্ণনারায়ণস্ত্বং পরমেশ্বরঃ ॥ ৬৫ ॥
অবতারাঃ ঋষভাদ্যাস্তবৈব শ্রীপতে বিভো ।
রাধাপতিস্ত্বমেবাঽসি লক্ষ্মীপতিস্ত্বমেব চ ॥ ৬৬ ॥
বাসুদেবীপতিস্ত্বং চ নারায়ণীপতিস্তথা ।
মুক্তপতির্ব্রহ্মপতির্ধামপতিস্ত্বমেব চ ॥ ৬৭ ॥
মহাকালস্য হেতুস্ত্বং মহাবিষ্ণোশ্চ কারণম্ ।
সদাশিবস্য হেতুস্ত্বং বৈরাজস্য চ কারণম্ ॥ ৬৮ ॥
ভূমা ত্বং পূরুষসংজ্ঞঃ পুরুষোত্তম ইত্যপি ।
ব্রহ্মবিষ্ণুমহেশানাং রুদ্রাণাং সর্জকো ভবান্ ॥ ৬৯ ॥
দেবানাং লোকপালানাং পিতৄণাং সর্জকো ভবান্ ।
মহর্ষীণাং য়তীনাং চ সাধূনাং সর্জকঃ সতাম্ ॥ ৭০ ॥
সতীনাং কমলাদ্যানাং পতিঃ পাতা চ বৈ ভবান্ ।
সুরাণাং মানবানাং চ পশূনাং পক্ষিণাং তথা ॥ ৭১ ॥
বল্লীনাং চ দ্রুমাণাং চ সর্জকস্ত্বং রসপ্রদঃ ।
কামধেনুকামবল্লীচিন্তামণ্যাদিসর্জকঃ ॥ ৭২ ॥
য়ক্ষরক্ষঃপিশাচানাং সর্জকস্ত্বং খচারিণাম্ ।
বারিজানাং বনস্থানাং ভূগর্ভাণাং প্রসর্জকঃ ॥ ৭৩ ॥
দৈত্যানাং দানবানাং চ সর্জকস্ত্বং জনার্দনঃ ।
দীনানাথদরিদ্রানাং রক্ষকঃ পোষকো ভবান্ ॥ ৭৪ ॥
আশ্রিতানামন্নদাতা শরণ্যশ্চার্তিদেহিনাম্ ।
কামুকানাং কামদাতা সকামানাং প্রপূরকঃ ॥ ৭৫ ॥
ত্বং নারী ত্বং নরশ্চাস্সে ত্বং গর্ভস্ত্বং কুমারকঃ
ত্বং বীজং ত্বং সস্যরূপস্ত্বং পুষ্পং ফলমিত্যপি ॥ ৭৬ ॥
ত্বমিন্দ্রস্ত্বমিন্দ্রিয়স্ত্বং নিদ্রা ত্বং জাগরো ভবান্ ।
ত্বং সুষুপ্তির্মহানন্দস্ত্বং প্রীতিস্ত্বং রতিস্তথা ॥ ৭৭ ॥
মন্মথস্ত্বং মনোজন্যো মনঃসংস্থো ভবানপি ।
জ্ঞানং জ্ঞাতা জ্ঞেয়মেব ত্বমেবাঽসি পরেশ্বর ॥ ৭৮ ॥
ত্বম্ ঋতুস্ত্বং দিনং রাত্রিস্ত্বমুদ্যোগো বিরামকঃ ।
ত্বং বিশ্বাসশ্চাশ্রয়শ্চ ত্বং মাতা চ পিতা গুরূঃ ॥ ৭৯ ॥
ধনং ধান্যং ত্বমেবাঽসিং শক্তির্বলং ত্বমেব চ ।
নীতির্ভক্তির্বৃষো রাগো বৈরাগ্যং চ ত্বমেব হ ॥ ৮০ ॥
ত্বং প্রাণস্ত্বং জীবনং চ নৈকধা চৈকধা ভবান্ ।
প্রকাশস্ত্বং প্রবৃত্তিস্ত্বং নিরোধস্ত্বং গুণাত্মকঃ ॥ ৮১ ॥
গুণাতীতস্ত্বমেবাঽসি সর্বসিদ্ধিগুণাশ্রয়ঃ ।
আশ্চর্যং ত্বং চমত্কারস্ত্বমৈশ্বর্যং প্রভুত্বকম্ ॥ ৮২ ॥
ত্বং ভূর্জলং ভবাঁস্তেজোঽনিলস্ত্বং ত্বং তথাঽনলঃ ।
ত্বং খং ত্বং মাত্রকং ত্বং চ বুদ্ধিস্ত্বং চৈষণাত্রয়ম্ ॥ ৮৩ ॥
ত্বং পরীক্ষা তিতিক্ষা ত্বং ত্বং বুভুক্ষা মুমুক্ষতা ।
ত্বং স্নেহস্ত্বং ধ্যানবৃত্তিস্ত্বং সমাধিঃ পরাত্পরঃ ॥ ৮৪ ॥
উপাস্তিস্ত্বং চিত্তচৈত্যং ত্বং জাডয়ং ত্বং তথাঽণুতা ।
ত্বং সাম্যং ত্বং চ বৈষম্যং ত্বমেব সর্বমেব হ ॥ ৮৫ ॥
অহং ত্বং বীতিহোত্রস্ত্বং ত্বং গুরূঃ ঋষভস্তথা ।
তবৈবাংঽশকলাঽঽবেশবিভূতিসৃষ্টিজং ত্বিদম্ ॥ ৮৬ ॥
য়ত্ কিংচিদ্ দৃশ্যতে চাপি ভুজ্যতে লীয়তেঽপি চ ।
য়স্মাদ্ য়ত্র চ য়েনাপি য়দর্থং চ ত্বমেব সঃ ॥ ৮৭ ॥
তস্মৈ কৃষ্ণায় নাথায় ব্রহ্মণে পরব্রহ্মণে ।
সমর্পয়ামি চাত্মানং বীতিহোত্রাভিধং সদা ॥ ৮৮ ॥
দানমেব ন তু ন্যাসং নাপি কুসীদকং তথা ।
য়থেষ্টবিনিয়োগার্হং সমর্পয়ামি মাং ত্বহম্ ॥ ৮৯ ॥
ইতি স্তুত্বা রাধিকে সম্পপাত পাদয়োর্হরেঃ ।
বীতিহোত্রশ্চাঽথ কৃষ্ণস্তমুত্থাপয়দূর্ধ্বকম্ ॥ ৯০ ॥
সমাশ্র্লিষ্য পুনর্হস্তৌ দত্বা তস্য চ মূর্ধনি ।
ন্যয়ুংক্ত বরলাভার্থং বীতিহোত্রং হরির্যদা ॥ ৯১ ॥
বীতিহোত্রস্তদা প্রাহ স্থাস্যেঽত্র তবপাদয়োঃ ।
অন্তে মোক্ষং গমিষ্যস্যক্ষরং ধাম তব প্রভো ॥ ৯২ ॥
দেহি বাসং সদা চাত্র তথাস্তূবাচ বৈ হরিঃ ।
রাধিকে তন্মহত্তীর্থম্ ঋষভাখ্যং সরোবরে ॥ ৯৩ ॥
বীতিহোত্রাভিধং তীর্থং সহস্রয়োগিতীর্থকম্ ।
এবং নাম্না তদেবাসীত্ প্রসিদ্ধং মোক্ষদং শুভম্ ॥ ৯৪ ॥
হরির্বভূব সহসা বালকৃষ্ণস্বরূপধৃক্ ।
প্রয়য়ৌ চ নিজাবাসং বীতিহোত্রস্তটে স্থিতঃ ॥ ৯৫ ॥
বটবৃক্ষং সমাশ্লিষ্য তাপসো জনদর্শনঃ ।
তত্র তীর্থে কৃতস্নানাঃ প্রাপ্স্যন্তি পরমাং গতিম্ ॥ ৯৬ ॥
য়োগসিদ্ধিমবাপ্স্যন্তি য়োগাভ্যাসং বিনাঽপি চ ।
রাধিকে তত্র সংস্নান্নাশমেষ্যন্তি পাতকম্ ॥ ৯৭ ॥
আর্দ্রং শুষ্কং মহত্স্বল্পং পরপীডাকরং চ য়ত্ ।
সর্বং নশ্যতি পাপং তজ্জলপানাদপি দ্রুতম্ ॥ ৯৮ ॥
তত্রাঽন্নদানতঃ স্যাত্তু বাজিমেধসমং ফলম্ ।
ঋষভস্যাঽঽলয়কর্তুর্মম ধামাঽক্ষরং ভবেত্ ॥ ৯৯ ॥
ইত্যেবং ভগবানাহ রাধিকে তীর্থবৈভবম্ ।
পঠনাচ্ছ্রবণাচ্চাস্য ভবেত্তত্তীর্থজং ফলম্ ॥ ১০০ ॥
॥ ইতিশ্রীলক্ষ্মীনারায়ণীয়সংহিতায়াং দ্বিতীয়ে ত্রেতাসন্তানে
বীতিহোত্রয়োগেশ্বরায় ঋষভরূপেণ সহস্ররূপেণ চ
হরের্দর্শনম্, ঋষভতীর্থীকরণম্, স্তুতিশ্চেত্যাদিনিরূপণনামা
চত্বারিংশদধিকদ্বিশততমোঽধ্যায়ঃ ॥