Portion from Kurmapurana Adhyaya 12
॥ Sri Devisahasranamastotram Bengali Lyrics ॥
॥ শ্রীদেবীসহস্রনামস্তোত্রম্ কূর্মপুরাণান্তর্গতম্ ॥
ঋষয়ঃ ঊচুঃ —
কৈষা ভগবতী দেবী শংকরার্ধশরীরিণী ।
শিবা সতী হৈমবতী য়থাবদ্ব্রূহি পৃচ্ছতাম্ ॥ ১ ॥
তেষাং তদ্বচনং শ্রুত্বা মুনীনাং পুরুষোত্তমঃ ।
প্রত্যুবাচ মহায়োগী ধ্যাত্বা স্বং পরমং পদম্ ॥ ২ ॥
শ্রীকূর্ম উবাচ —
পুরা পিতামহেনোক্তং মেরুপৃষ্ঠে সুশোভনম্ ।
রহস্যমেতদ্ বিজ্ঞানং গোপনীয়ং বিশেষতঃ ॥ ৩ ॥
সাংখ্যানাং পরমং সাংখ্যং ব্রহ্মবিজ্ঞানমুত্তমম্ ।
সংসারার্ণবমগ্নানাং জন্তূনামেকমোচনম্ ॥ ৪ ॥
য়া সা মাহেশ্বরী শক্তির্জ্ঞানরূপাঽতিলালসা ।
ব্যোমসংজ্ঞা পরা কাষ্ঠা সেয়ং হৈমবতী মতা ॥ ৫ ॥
শিবা সর্বগতাঽনন্তা গুণাতীতা সুনিষ্কলা ।
একানেকবিভাগস্থা জ্ঞানরূপাঽতিলালসা ॥ ৬ ॥
অনন্যা নিষ্কলে তত্ত্বে সংস্থিতা তস্য তেজসা ।
স্বাভাবিকী চ তন্মূলা প্রভা ভানোরিবামলা ॥ ৭ ॥
একা মাহেশ্বরী শক্তিরনেকোপাধিয়োগতঃ ।
পরাবরেণ রূপেণ ক্রীডতে তস্য সন্নিধৌ ॥ ৮ ॥
সেয়ং করোতি সকলং তস্যাঃ কার্যমিদং জগত্ ।
ন কার্যং নাপি করণমীশ্বরস্যেতি সূরয়ঃ ॥ ৯ ॥
চতস্রঃ শক্তয়ো দেব্যাঃ স্বরূপত্বেন সংস্থিতাঃ ।
অধিষ্ঠানবশাত্তস্যাঃ শৃণুধ্বং মুনিপুঙ্গবাঃ ॥ ১০ ॥
শান্তির্বিদ্যা প্রতিষ্ঠা চ নিবৃত্তিশ্চেতি তাঃ স্মৃতাঃ ।
চতুর্ব্যূহস্ততো দেবঃ প্রোচ্যতে পরমেশ্বরঃ ॥ ১১ ॥
অনয়া পরয়া দেবঃ স্বাত্মানন্দং সমশ্নুতে ।
চতুর্ষ্বপি চ বেদেষু চতুর্মূর্তির্মহেশ্বরঃ ॥ ১২ ॥
অস্যাস্ত্বনাদিসংসিদ্ধমৈশ্বর্যমতুলং মহত্ ।
তত্সম্বন্ধাদনন্তায়াঃ রুদ্রেণ পরমাত্মনা ॥ ১৩ ॥
সৈষা সর্বেশ্বরী দেবী সর্বভূতপ্রবর্তিকা ।
প্রোচ্যতে ভগবান্ কালো হরিঃ প্রাণো মহেশ্বরঃ ॥ ১৪ ॥
তত্র সর্বমিদং প্রোতমোত চৈবাখিলং জগত্ ।
স কালোঽগ্নির্হরো রুদ্রো গীয়তে বেদবাদিভিঃ ॥ ১৫ ॥
কালঃ সৃজতি ভূতানি কালঃ সংহরতে প্রজাঃ ।
সর্বে কালস্য বশগা ন কালঃ কস্যচিদ্ বশে ॥ ১৬ ॥
প্রধানং পুরুষস্তত্ত্বং মহানাত্মা ত্বহংকৃতিঃ ।
কালেনান্যানি তত্ত্বানি সমাবিষ্টানি য়োগিনা ॥ ১৭ ॥
তস্য সর্বজগত্সূতিঃ শক্তির্মায়েতি বিশ্রুতা ।
তয়েদং ভ্রাময়েদীশো মায়াবী পুরুষোত্তমঃ ॥ ১৮ ॥
সৈষা মায়াত্মিকা শক্তিঃ সর্বাকারা সনাতনী ।
বৈশ্বরূপং মহেশস্য সর্বদা সম্প্রকাশয়েত্ ॥ ১৯ ॥
অন্যাশ্চ শক্তয়ো মুখ্যাস্তস্য দেবস্য নির্মিতাঃ ।
জ্ঞানশক্তিঃ ক্রিয়াশক্তিঃ প্রাণশক্তিরিতি ত্রয়ম্ ॥ ২০ ॥
সর্বাসামেব শক্তীনাং শক্তিমন্তো বিনির্মিতাঃ ।
মায়য়ৈবাথ বিপ্রেন্দ্রাঃ সা চানাদিরনন্তয়াঃ ॥ ২১ ॥
সর্বশক্ত্যাত্মিকা মায়া দুর্নিবারা দুরত্যয়া ।
মায়াবী সর্বশক্তীশঃ কালঃ কালকারঃ প্রভুঃ ॥ ২২ ॥
করোতি কালঃ সকলং সংহরেত্ কাল এব হি ।
কালঃ স্থাপয়তে বিশ্বং কালাধীনমিদং জগত্ ॥ ২৩ ॥
লব্ধ্বা দেবাধিদেবস্য সন্নিধিং পরমেষ্ঠিনঃ ।
অনন্তস্যাখিলেশস্য শংভোঃ কালাত্মনঃ প্রভোঃ ॥ ২৪ ॥
প্রধানং পুরুষো মায়া মায়া চৈবং প্রপদ্যতে ।
একা সর্বগতানন্তা কেবলা নিষ্কলা শিবা ॥ ২৫ ॥
একা শক্তিঃ শিবৈকোঽপি শক্তিমানুচ্যতে শিবঃ ।
শক্তয়ঃ শক্তিমন্তোঽন্যে সর্বশক্তিসমুদ্ভবাঃ ॥ ২৬ ॥
শক্তিশক্তিমতোর্ভেদং বদন্তি পরমার্থতঃ ।
অভেদং চানুপশ্যন্তি য়োগিনস্তত্ত্বচিন্তকাঃ ॥ ২৭ ॥
শক্তয়ো গিরিজা দেবী শক্তিমন্তোঽথ শংকরঃ ।
বিশেষঃ কথ্যতে চায়ং পুরাণে ব্রহ্মবাদিভিঃ ॥ ২৮ ॥
ভোগ্যা বিশ্বেশ্বরী দেবী মহেশ্বরপতিব্রতা ।
প্রোচ্যতে ভগবান্ ভোক্তা কপর্দী নীললোহিতঃ ॥ ২৯ ॥
মন্তা বিশ্বেশ্বরো দেবঃ শংকরো মন্মথান্তকঃ ।
প্রোচ্যতে মতিরীশানী মন্তব্যা চ বিচারতঃ ॥ ৩০ ॥
ইত্যেতদখিলং বিপ্রাঃ শক্তিশক্তিমদুদ্ভবম্ ।
প্রোচ্যতে সর্ববেদেষু মুনিভিস্তত্ত্বদর্শিভিঃ ॥ ৩১ ॥
এতত্প্রদর্শিতং দিব্যং দেব্যা মাহাত্ম্যমুত্তমম্ ।
সর্ববেদান্তবেদেষু নিশ্চিতং ব্রহ্মবাদিভিঃ ॥ ৩২ ॥
একং সর্বগতং সূক্ষ্মং কূটস্থমচলং ধ্রুবম্ ।
য়োগিনস্তত্প্রপশ্যন্তি মহাদেব্যাঃ পরং পদম্ ॥ ৩৩ ॥
আনন্দমক্ষরং ব্রহ্ম কেবলং নিষ্কলং পরম্ ।
য়োগিনস্তত্প্রপশ্যন্তি মহাদেব্যাঃ পরং পদম্ ॥ ৩৪ ॥
পরাত্পরতরং তত্ত্বং শাশ্বতং শিবমচ্যুতম্ ।
অনন্তপ্রকৃতৌ লীনং দেব্যাস্তত্পরমং পদম্ ॥ ৩৫ ॥
শুভং নিরঞ্জনং শুদ্ধং নির্গুণং দ্বৈতবর্জিতম্ ।
আত্মোপলব্ধিবিষয়ং দেব্যাস্ততপরমং পদম্ ॥ ৩৬ ॥
সৈষা ধাত্রী বিধাত্রী চ পরমানন্দমিচ্ছতাম্ ।
সংসারতাপানখিলান্নিহন্তীশ্বরসংশ্রয়া ॥ ৩৭ ॥
তস্মাদ্বিমুক্তিমন্বিচ্ছন্ পার্বতীং পরমেশ্বরীম্ ।
আশ্রয়েত্সর্বভূতানামাত্মভূতাং শিবাত্মিকাম্ ॥ ৩৮ ॥
লব্ধ্বা চ পুত্রীং শর্বাণীং তপস্তপ্ত্বা সুদুশ্চরন্ ।
সভার্যঃ শরণং য়াতঃ পার্বতীং পরমেশ্বরীম্ ॥ ৩৯ ॥
তাং দৃষ্ট্বা জায়মানাং চ স্বেচ্ছয়ৈব বরাননাম্ ।
মেনা হিমবতঃ পত্নী প্রাহেদং পর্বতেশ্বরম্ ॥ ৪০ ॥
মেনোবাচ —
পশ্য বালামিমাং রাজন্ রাজীবসদৃশাননাম্ ।
হিতায় সর্বভূতানাং জাতা চ তপসাঽঽবয়োঃ ॥ ৪১ ॥
সোঽপি দৃষ্ট্বা ততঃ দেবীং তরুণাদিত্যসন্নিভাম্ ।
কপর্দিনীং চতুর্বক্ত্রাং ত্রিনেত্রামতিলালসাম্ ॥ ৪২ ॥
অষ্টহস্তাং বিশালাক্ষীং চন্দ্রাবয়বভূষণাম্ ।
নির্গুণাং সগুণাং সাক্ষাত্সদসদ্ব্যক্তিবর্জিতাম্ ॥ ৪৩ ॥
প্রণম্য শিরসা ভূমৌ তেজসা চাতিবিহ্বলঃ ।
ভীতঃ কৃতাঞ্জলিস্তস্যাঃ প্রোবাচ পরমেশ্বরীম্ ॥ ৪৪ ॥
হিমবানুবাচ —
কা ত্বং দেবি বিশালাক্ষি শশাঙ্কাবয়বাঙ্কিতে ।
ন জানে ত্বামহং বত্সে য়থাবদ্ব্রূহি পৃচ্ছতে ॥ ৪৫ ॥
গিরীন্দ্রবচনং শ্রুত্বা ততঃ সা পরমেশ্বরী ।
ব্যাজহার মহাশৈলং য়োগিনামভয়প্রদা ॥ ৪৬ ॥
দেব্যুবাচ —
মাং বিদ্ধি পরমাং শক্তিং পরমেশ্বরসমাশ্রয়াম্ ।
অনন্যামব্যয়ামেকাং য়াং পশ্যন্তি মুমুক্ষবঃ ॥ ৪৭ ॥
অহং বৈ সর্বভাবানাত্মা সর্বান্তরা শিবা ।
শাশ্বতৈশ্বর্যবিজ্ঞানমূর্তিঃ সর্বপ্রবর্তিকা ॥ ৪৮ ॥
অনন্তাঽনন্তমহিমা সংসারার্ণবতারিণী ।
দিব্যং দদামি তে চক্ষুঃ পশ্য মে রূপমৈশ্বরম্ ॥ ৪৯ ॥
এতাবদুক্ত্বা বিজ্ঞানং দত্ত্বা হিমবতে স্বয়ম্ ।
স্বং রূপং দর্শয়ামাস দিব্যং তত্ পারমেশ্বরম্ ॥ ৫০ ॥
কোটিসূর্যপ্রতীকাশং তেজোবিম্বং নিরাকুলম্ ।
জ্বালামালাসহস্রাঢ্যং কালানলশতোপমম্ ॥ ৫১ ॥
দংষ্ট্রাকরালং দুর্ধর্ষং জটামণডলমণ্ডিতম্ ।
ত্রিশূলবরহস্তং চ ঘোররূপং ভয়ানকম্ ॥ ৫২ ॥
প্রশান্তং সোম্যবদনমনন্তাশ্চর্যসংয়ুতম্ ।
চন্দ্রাবয়বলক্ষ্মাণং চন্দ্রকোটিসমপ্রভম্ ॥ ৫৩ ॥
কিরীটিনং গদাহস্তং নূপুরৈরুপশোভিতম্ ।
দিব্যমাল্যাম্বরধরং দিব্যগন্ধানুলেপনম্ ॥ ৫৪ ॥
শঙ্খচক্রধরং কাম্যং ত্রিনেত্রং কৃত্তিবাসসম্ ।
অণ্ডস্থং চাণ্ডবাহ্যস্থং বাহ্যমাভ্যন্তরং পরম্ ॥ ৫৫ ॥
সর্বশক্তিময়ং শুভ্রং সর্বাকারং সনাতনম্ ।
ব্রহ্মোন্দ্রোপেন্দ্রয়োগীন্দ্রৈর্বন্দ্যমানপদাম্বুজম্ ॥ ৫৬ ॥
সর্বতঃ পাণিপাদান্তং সর্বতোঽক্ষিশিরোমুখম্ ।
সর্বমাবৃত্য তিষ্ঠন্তং দদর্শ পরমেশ্বরম্ ॥ ৫৭ ॥
দৃষ্ট্বা তদীদৃশং রূপং দেব্যা মাহেশ্বরং পরম্ ।
ভয়েন চ সমাবিষ্টঃ স রাজা হৃষ্টমানসঃ ॥ ৫৮ ॥
আত্মন্যাধায় চাত্মানমোঙ্কারং সমনুস্মরন্ ।
নাম্নামষ্টসহস্রেণ তুষ্টাব পরমেশ্বরীম্ ॥ ৫৯ ॥
হিমবানুবাচ —
শিবোমা পরমা শক্তিরনন্তা নিষ্কলামলা ।
শান্তা মাহেশ্বরী নিত্যা শাশ্বতী পরমাক্ষরা ॥ ৬০ ॥
অচিন্ত্যা কেবলাঽনন্ত্যা শিবাত্মা পরমাত্মিকা ।
অনাদিরব্যয়া শুদ্ধা দেবাত্মা সর্বগাঽচলা ॥ ৬১ ॥
একানেকবিভাগস্থা মায়াতীতা সুনির্মলা ।
মহামাহেশ্বরী সত্যা মহাদেবী নিরঞ্জনা ॥ ৬২ ॥
কাষ্ঠা সর্বান্তরস্থা চ চিচ্ছক্তিরতিলালসা ।
নন্দা সর্বাত্মিকা বিদ্যা জ্যোতীরূপাঽমৃতাক্ষরা ॥ ৬৩ ॥
শান্তিঃ প্রতিষ্ঠা সর্বেষাং নিবৃত্তিরমৃতপ্রদা ।
ব্যোমমূর্তির্ব্যোমলয়া ব্যোমাধারাঽচ্যুতাঽমরা ॥ ৬৪ ॥
অনাদিনিধনাঽমোঘা কারণাত্মা কুলাকুলা ।
ক্রতুঃ প্রথমজা নাভিরমৃতস্যাত্মসংশ্রয়া ॥ ৬৫ ॥
প্রাণেশ্বরপ্রিয়া মাতা মহামহিষঘাতিনী ।
প্রাণেশ্বরী প্রাণরূপা প্রধানপুরুষেশ্বরী ॥ ৬৬ ॥
মহামায়া সুদুষ্পূরা মূলপ্রকৃতিরীশ্বরী ।
সর্বশক্তিকলাকারা জ্যোত্স্না ধৌর্মহিমাস্পদা ॥ ৬৭ ॥
সর্বকার্যনিয়ন্ত্রী চ সর্বভূতেশ্বরেশ্বরী ।
সংসারয়োনিঃ সকলা সর্বশক্তিসমুদ্ভবা ॥ ৬৮ ॥
সংসারপারা দুর্বারা দুর্নিরীক্ষ্য দুরাসদা ।
প্রাণশক্তিঃ প্রাণবিদ্যা য়োগিনী পরমা কলা ॥ ৬৯ ॥
মহাবিভূতিদুর্ঘর্ষা মূলপ্রকৃতিসম্ভবা ।
অনাদ্যনন্তবিভবা পরার্থা পুরুষারণিঃ ॥ ৭০ ॥
সর্গস্থিত্যন্তকরণী সুদুর্বাচ্যা দুরত্যয়া ।
শব্দয়োনিঃ শব্দময়ী নাদাখ্যা নাদবিগ্রহা ॥ ৭১ ॥
অনাদিরব্যক্তগুণা মহানন্দা সনাতনী ।
আকাশয়োনির্যোগস্থা মহায়োগেশ্বরেশ্বরী ॥ ৭২ ॥
মহামায়া সুদুষ্পারা মূলপ্রকৃতিরীশ্বরী ।
প্রধানপুরুষাতীতা প্রধানপুরুষাত্মিকা ॥ ৭৩ ॥
পুরাণী চিন্ময়ী পুংসামাদিঃ পুরুষরূপিণী ।
ভূতান্তরাত্মা কূটস্থা মহাপুরুষসংজ্ঞিতা ॥ ৭৪ ॥
জন্মমৃত্যুজরাতীতা সর্বশক্তিসমন্বিতা ।
ব্যাপিনী চানবচ্ছিন্না প্রধানানুপ্রবেশিনী ॥ ৭৫ ॥
ক্ষেত্রজ্ঞশক্তিরব্যক্তলক্ষণা মলবর্জিতা ।
অনাদিমায়াসংভিন্না ত্রিতত্ত্বা প্রকৃতির্গুহা ॥ ৭৬ ॥
মহামায়াসমুত্পন্না তামসী পৌরুষী ধ্রুবা ।
ব্যক্তাব্যক্তাত্মিকা কৃষ্ণা রক্তা শুক্লা প্রসূতিকা ॥ ৭৭ ॥
অকার্যা কার্যজননী নিত্যং প্রসবধর্মিণী ।
সর্গপ্রলয়নির্মুক্তা সৃষ্টিস্থিত্যন্তধর্মিণী ॥ ৭৮ ॥
ব্রহ্মগর্ভা চতুর্বিশা পদ্মনাভাঽচ্যুতাত্মিকা ।
বৈদ্যুতী শাশ্বতী য়োনির্জগন্মাতেশ্বরপ্রিয়া ॥ ৭৯ ॥
সর্বাধারা মহারূপা সর্বৈশ্বর্যসমন্বিতা ।
বিশ্বরূপা মহাগর্ভা বিশ্বেশেচ্ছানুবর্তিনী ॥ ৮০ ॥
মহীয়সী ব্রহ্ময়োনিঃ মহালক্ষ্মীসমুদ্ভবা ।
মহাবিমানমধ্যস্থা মহানিদ্রাত্মহেতুকা ॥ ৮১ ॥
সর্বসাধারণী সূক্ষ্মা হ্যবিদ্যা পারমার্থিকা ।
অনন্তরূপাঽনন্তস্থা দেবী পুরুষমোহিনী ॥ ৮২ ॥
অনেকাকারসংস্থানা কালত্রয়বিবর্জিতা ।
ব্রহ্মজন্মা হরের্মূর্তির্ব্রহ্মবিষ্ণুশিবাত্মিকা ॥ ৮৩ ॥
ব্রহ্মেশবিষ্ণুজননী ব্রহ্মাখ্যা ব্রহ্মসংশ্রয়া ।
ব্যক্তা প্রথমজা ব্রাহ্মী মহতী জ্ঞানরূপিণী ॥ ৮৪ ॥
বৈরাগ্যৈশ্বর্যধর্মাত্মা ব্রহ্মমূর্তির্হৃদিস্থিতা ।
অপাংয়োনিঃ স্বয়ংভূতির্মানসী তত্ত্বসংভবা ॥ ৮৫ ॥
ঈশ্বরাণী চ শর্বাণী শংকরার্দ্ধশরীরিণী ।
ভবানী চৈব রুদ্রাণী মহালক্ষ্মীরথাম্বিকা ॥ ৮৬ ॥
মহেশ্বরসমুত্পন্না ভুক্তিমুক্তিফলপ্রদা ।
সর্বেশ্বরী সর্ববন্দ্যা নিত্যং মুদিতমানসা ॥ ৮৭ ॥
ব্রহ্মেন্দ্রোপেন্দ্রনমিতা শংকরেচ্ছানুবর্তিনী ।
ঈশ্বরার্দ্ধাসনগতা মহেশ্বরপতিব্রতা ॥ ৮৮ ॥
সকৃদ্বিভাতা সর্বার্তি সমুদ্রপরিশোষিণী ।
পার্বতী হিমবত্পুত্রী পরমানন্দদায়িনী ॥ ৮৯ ॥
গুণাঢ্যা য়োগজা য়োগ্যা জ্ঞানমূর্তির্বিকাসিনী ।
সাবিত্রীকমলা লক্ষ্মীঃ শ্রীরনন্তোরসি স্থিতা ॥ ৯০ ॥
সরোজনিলয়া মুদ্রা য়োগনিদ্রা সুরার্দিনী ।
সরস্বতী সর্ববিদ্যা জগজ্জ্যেষ্ঠা সুমঙ্গলা ॥ ৯১ ॥
বাগ্দেবী বরদা বাচ্যা কীর্তিঃ সর্বার্থসাধিকা ।
য়োগীশ্বরী ব্রহ্মবিদ্যা মহাবিদ্যা সুশোভনা ॥ ৯২ ॥
গুহ্যবিদ্যাত্মবিদ্যা চ ধর্মবিদ্যাত্মভাবিতা ।
স্বাহা বিশ্বংভরা সিদ্ধিঃ স্বধা মেধা ধৃতিঃ শ্রুতিঃ ॥ ৯৩ ॥
নীতিঃ সুনীতিঃ সুকৃতির্মাধবী নরবাহিনী ।
পূজ্যা বিভাবরী সৌম্যা ভোগিনী ভোগশায়িনী ॥ ৯৪ ॥
শোভা বংশকরী লোলা মালিনী পরমেষ্ঠিনী ।
ত্রৈলোক্যসুন্দরী রম্যা সুন্দরী কামচারিণী ॥ ৯৫ ॥
মহানুভাবা সত্ত্বস্থা মহামহিষমর্দিনী ।
পদ্মমালা পাপহরা বিচিত্রা মুকুটাননা ॥ ৯৬ ॥
কান্তা চিত্রাম্বরধরা দিব্যাবরণভূষিতা ।
হংসাখ্যা ব্যোমনিলয়া জগত্সৃষ্টিবিবর্দ্ধিনী ॥ ৯৮ ॥
নির্যন্ত্রা য়ন্ত্রবাহস্থা নন্দিনী ভদ্রকালিকা ।
আদিত্যবর্ণা কৌমারী ময়ূরবরবাহিনী ॥ ৯৯ ॥
বৃষাসনগতা গৌরী মহাকালী সুরার্চিতা ।
অদিতির্নিয়তা রৌদ্রী পদ্মগর্ভা বিবাহনা ॥ ১০০ ॥
বিরূপাক্ষী লেলিহানা মহাপুরনিবাসিনী ।
মহাফলাঽনবদ্যাঙ্গী কামরূপা বিভাবরী ॥ ১০১ ॥
বিচিত্ররত্নমুকুটা প্রণতার্তিপ্রভঞ্জনী ।
কৌশিকী কর্ষণী রাত্রিস্ত্রিদশার্তিবিনাশিনী ॥ ১০২ ॥
বহুরূপা স্বরূপা চ বিরূপা রূপবর্জিতা ।
ভক্তার্তিশমনী ভব্যা ভবভারবিনাশনী ॥ ১০৩ ॥
নির্গুণা নিত্যবিভবা নিঃসারা নিরপত্রপা ।
য়শস্বিনী সামগীতির্ভবাঙ্গনিলয়ালয়া ॥ ১০৪ ॥
দীক্ষা বিদ্যাধরী দীপ্তা মহেন্দ্রবিনিপাতিনী ।
সর্বাতিশায়িনী বিশ্বা সর্বসিদ্ধিপ্রদায়িনী ॥ ১০৫ ॥
সর্বেশ্বরপ্রিয়া ভার্যা সমুদ্রান্তরবাসিনী ।
অকলঙ্কা নিরাধারা নিত্যসিদ্ধা নিরাময়া ॥ ১০৬ ॥
কামধেনুর্বৃহদ্গর্ভা ধীমতী মোহনাশিনী ।
নিঃসঙ্কল্পা নিরাতঙ্কা বিনয়া বিনয়প্রদা ॥ ১০৭ ॥
জ্বালামালাসহস্রাঢ্যা দেবদেবী মনোময়ী ।
মহাভগবতী ভর্গা বাসুদেবসমুদ্ভবা ॥ ১০৮ ॥
মহেন্দ্রোপেন্দ্রভগিনী ভক্তিগম্যা পরাবরা ।
জ্ঞানজ্ঞেয়া জরাতীতা বেদান্তবিষয়া গতিঃ ॥ ১০৯ ॥
দক্ষিণা দহনা দাহ্যা সর্বভূতনমস্কৃতা ।
য়োগমায়া বিভাগজ্ঞা মহামায়া মহীয়সী ॥ ১১০ ॥
সংধ্যা সর্বসমুদ্ভূতির্ব্রহ্মবৃক্ষাশ্রয়ানতিঃ ।
বীজাঙ্কুরসমুদ্ভূতির্মহাশক্তির্মহামতিঃ ॥ ১১১ ॥
খ্যাতিঃ প্রজ্ঞা চিতিঃ সংবিত্ মহাভোগীন্দ্রশায়িনী ।
বিকৃতিঃ শাঙ্করী শাস্ত্রী গণগন্ধর্বসেবিতা ॥ ১১২ ॥
বৈশ্বানরী মহাশালা দেবসেনা গুহপ্রিয়া ।
মহারাত্রিঃ শিবানন্দা শচী দুঃস্বপ্ননাশিনী ॥ ১১৩ ॥
ইজ্যা পূজ্যা জগদ্ধাত্রী দুর্বিজ্ঞেয়া সুরূপিণী ।
গুহাম্বিকা গুণোত্পত্তির্মহাপীঠা মরুত্সুতা ॥ ১১৪ ॥
হব্যবাহান্তরাগাদিঃ হব্যবাহসমুদ্ভবা ।
জগদ্যোনির্জগন্মাতা জন্মমৃত্যুজরাতিগা ।
বুদ্ধিমাতা বুদ্ধিমতী পুরুষান্তরবাসিনী ॥ ১১৭ ॥
তপস্বিনী সমাধিস্থা ত্রিনেত্রা দিবিসংস্থিতা ।
সর্বেন্দ্রিয়মনোমাতা সর্বভূতহৃদিস্থিতা ॥ ১১৮ ॥
সংসারতারিণী বিদ্যা ব্রহ্মবাদিমনোলয়া ।
ব্রহ্মাণী বৃহতী ব্রাহ্মী ব্রহ্মভূতা ভবারণী ॥ ১১৯ ॥
হিরণ্ময়ী মহারাত্রিঃ সংসারপরিবর্ত্তিকা ।
সুমালিনী সুরূপা চ ভাবিনী তারিণী প্রভা ॥ ১২০ ॥
উন্মীলনী সর্বসহা সর্বপ্রত্যয়সাক্ষিণী ।
সুসৌম্যা চন্দ্রবদনা তাণ্ডবাসক্তমানসা ॥ ১২১ ॥
সত্ত্বশুদ্ধিকরী শুদ্ধির্মলত্রয়বিনাশিনী ।
জগত্প্রিয়া জগন্মূর্তিস্ত্রিমূর্তিরমৃতাশ্রয়া ॥ ১২২ ॥
নিরাশ্রয়া নিরাহারা নিরঙ্কুরবনোদ্ভবা ।
চন্দ্রহস্তা বিচিত্রাঙ্গী স্রগ্বিণী পদ্মধারিণী ॥ ১২৩ ॥
পরাবরবিধানজ্ঞা মহাপুরুষপূর্বজা ।
বিদ্যেশ্বরপ্রিয়া বিদ্যা বিদ্যুজ্জিহ্বা জিতশ্রমা ॥ ১২৪ ॥
বিদ্যাময়ী সহস্রাক্ষী সহস্রবদনাত্মজা ।
সহস্ররশ্মিঃ সত্ত্বস্থা মহেশ্বরপদাশ্রয়া ॥ ১২৫ ॥
ক্ষালিনী সন্ময়ী ব্যাপ্তা তৈজসী পদ্মবোধিকা ।
মহামায়াশ্রয়া মান্যা মহাদেবমনোরমা ॥ ১২৬ ॥
ব্যোমলক্ষ্মীঃ সিহরথা চেকিতানামিতপ্রভা ।
বীরেশ্বরী বিমানস্থা বিশোকা শোকনাশিনী ॥ ১২৭ ॥
অনাহতা কুণ্ডলিনী নলিনী পদ্মবাসিনী ।
সদানন্দা সদাকীর্তিঃ সর্বভূতাশ্রয়স্থিতা ॥ ১২৮ ॥
বাগ্দেবতা ব্রহ্মকলা কলাতীতা কলারণী ।
ব্রহ্মশ্রীর্ব্রহ্মহৃদয়া ব্রহ্মবিষ্ণুশিবপ্রিয়া ॥ ১২৯ ॥
ব্যোমশক্তিঃ ক্রিয়াশক্তির্জ্ঞানশক্তিঃ পরাগতিঃ ।
ক্ষোভিকা বন্ধিকা ভেদ্যা ভেদাভেদবিবর্জিতা ॥ ১৩০ ॥
অভিন্নাভিন্নসংস্থানা বংশিনী বংশহারিণী ।
গুহ্যশক্তির্গুণাতীতা সর্বদা সর্বতোমুখী ॥ ১৩১ ॥
ভগিনী ভগবত্পত্নী সকলা কালকারিণী ।
সর্ববিত্ সর্বতোভদ্রা গুহ্যাতীতা গুহারণিঃ ॥ ১৩২ ॥
প্রক্রিয়া য়োগমাতা চ গঙ্গা বিশ্বেশ্বরেশ্বরী ।
কপিলা কাপিলা কান্তাকনকাভাকলান্তরা ॥ ১৩৩ ॥
পুণ্যা পুষ্করিণী ভোক্ত্রী পুরংদরপুরস্সরা ।
পোষণী পরমৈশ্বর্যভূতিদা ভূতিভূষণা ॥ ১৩৪ ॥
পঞ্চব্রহ্মসমুত্পত্তিঃ পরমার্থার্থবিগ্রহা ।
ধর্মোদয়া ভানুমতী য়োগিজ্ঞেয় মনোজবা ॥ ১৩৫ ॥
মনোহরা মনোরক্ষা তাপসী বেদরূপিণী ।
বেদশক্তির্বেদমাতা বেদবিদ্যাপ্রকাশিনী ॥ ১৩৬ ॥
য়োগেশ্বরেশ্বরী মাতা মহাশক্তির্মনোময়ী ।
বিশ্বাবস্থা বিয়ন্মূর্ত্তির্বিদ্যুন্মালা বিহায়সী ॥ ১৩৭ ॥
কিন্নরী সুরভির্বন্দ্যা নন্দিনী নন্দিবল্লভা ।
ভারতী পরমানন্দা পরাপরবিভেদিকা ॥ ১৩৮ ॥
সর্বপ্রহরণোপেতা কাম্যা কামেশ্বরেশ্বরী ।
অচিন্ত্যাঽচিন্ত্যবিভবা হৃল্লেখা কনকপ্রভা ॥ ১৩৯ ॥
কূষ্মাণ্ডী ধনরত্নাঢ্যা সুগন্ধা গন্ধদায়িনী ।
ত্রিবিক্রমপদোদ্ভূতা ধনুষ্পাণিঃ শিবোদয়া ॥ ১৪০ ॥
সুদুর্লভা ধনাদ্যক্ষা ধন্যা পিঙ্গললোচনা ।
শান্তিঃ প্রভাবতী দীপ্তিঃ পঙ্কজায়তলোচনা ॥ ১৪১ ॥
আদ্যা হৃত্কমলোদ্ভূতা গবাং মতা রণপ্রিয়া ।
সত্ক্রিয়া গিরিজা শুদ্ধা নিত্যপুষ্টা নিরন্তরা ॥ ১৪২ ॥
দুর্গা কাত্যায়নী চণ্ডী চর্চিকা শান্তবিগ্রহা ।
হিরণ্যবর্ণা রজনী জগদ্যন্ত্রপ্রবর্তিকা ॥ ১৪৩ ॥
মন্দরাদ্রিনিবাসা চ শারদা স্বর্ণমালিনী ।
রত্নমালা রত্নগর্ভা পৃথ্বী বিশ্বপ্রমাথিনী ॥ ১৪৪ ॥
পদ্মাননা পদ্মনিভা নিত্যতুষ্টাঽমৃতোদ্ভবা ।
ধুন্বতী দুঃপ্রকম্পা চ সূর্যমাতা দৃষদ্বতী ॥ ১৪৫ ॥
মহেন্দ্রভগিনী মান্যা বরেণ্যা বরদায়িকা ।
কল্যাণী কমলা রামা পঞ্চভূতা বরপ্রদা ॥ ১৪৬ ॥
বাচ্যা বরেশ্বরী বন্দ্যা দুর্জয়া দুরতিক্রমা ।
কালরাত্রির্মহাবেগা বীরভদ্রপ্রিয়া হিতা ॥ ১৪৭ ॥
ভদ্রকালী জগন্মাতা ভক্তানাং ভদ্রদায়িনী ।
করালা পিঙ্গলাকারা নামভেদা মহামদা ॥ ১৪৮ ॥
য়শস্বিনী য়শোদা চ ষডধ্বপরিবর্ত্তিকা ।
শঙ্খিনী পদ্মিনী সাংখ্যা সাংখ্যয়োগপ্রবর্তিকা ॥ ১৪৯ ॥
চৈত্রা সংবত্সরারূঢা জগত্সম্পূরণীন্দ্রজা ।
শুম্ভারিঃ খেচরীস্বস্থা কম্বুগ্রীবাকলিপ্রিয়া ॥ ১৫০ ॥
খগধ্বজা খগারূঢা পরার্যা পরমালিনী ।
ঐশ্বর্যপদ্মনিলয়া বিরক্তা গরুডাসনা ॥ ১৫১ ॥
জয়ন্তী হৃদ্গুহা রম্যা গহ্বরেষ্ঠা গণাগ্রণীঃ ।
সংকল্পসিদ্ধা সাম্যস্থা সর্ববিজ্ঞানদায়িনী ॥ ১৫২ ॥
কলিকল্মষহন্ত্রী চ গুহ্যোপনিষদুত্তমা ।
নিষ্ঠা দৃষ্টিঃ স্মৃতির্ব্যাপ্তিঃ পুষ্টিস্তুষ্টিঃ ক্রিয়াবতী ॥ ১৫৩ ॥
বিশ্বামরেশ্বরেশানা ভুক্তির্মুক্তিঃ শিবাঽমৃতা ।
লোহিতা সর্পমালা চ ভীষণী বনমালিনী ॥ ১৫৪ ॥
অনন্তশয়নাঽনন্তা নরনারায়ণোদ্ভবা ।
নৃসিংহী দৈত্যমথনী শঙ্খচক্রগদাধরা ॥ ১৫৫ ॥
সংকর্ষণসমুত্পত্তিরম্বিকাপাদসংশ্রয়া ।
মহাজ্বালা মহামূর্ত্তিঃ সুমূর্ত্তিঃ সর্বকামধুক্ ॥ ১৫৬ ॥
সুপ্রভা সুস্তনা সৌরী ধর্মকামার্থমোক্ষদা ।
ভ্রূমধ্যনিলয়া পূর্বা পুরাণপুরুষারণিঃ ॥ ১৫৭ ॥
মহাবিভূতিদা মধ্যা সরোজনয়না সমা ।
অষ্টাদশভুজানাদ্যা নীলোত্পলদলপ্রভা । ১৫৮ ॥
সর্বশক্ত্যাসনারূঢা ধর্মাধর্মার্থবর্জিতা ।
বৈরাগ্যজ্ঞাননিরতা নিরালোকা নিরিন্দ্রিয়া ॥ ১৫৯ ॥
বিচিত্রগহনাধারা শাশ্বতস্থানবাসিনী ।
স্থানেশ্বরী নিরানন্দা ত্রিশূলবরধারিণী ॥ ১৬০ ॥
অশেষদেবতামূর্ত্তির্দেবতা বরদেবতা ।
গণাম্বিকা গিরেঃ পুত্রী নিশুম্ভবিনিপাতিনী ॥ ১৬১ ॥
অবর্ণা বর্ণরহিতা ত্রিবর্ণা জীবসংভবা ।
অনন্তবর্ণাঽনন্যস্থা শংকরী শান্তমানসা ॥ ১৬২ ॥
অগোত্রা গোমতী গোপ্ত্রী গুহ্যরূপা গুণোত্তরা ।
গৌর্গীর্গব্যপ্রিয়া গৌণী গণেশ্বরনমস্কৃতা ॥ ১৬৩ ॥
সত্যমাত্রা সত্যসন্ধ্যা ত্রিসন্ধ্যা সংধিবর্জিতা ।
সর্ববাদাশ্রয়া সাংখ্যা সাংখ্যয়োগসমুদ্ভবা ॥ ১৬৪ ॥
অসংখ্যেয়াঽপ্রমেয়াখ্যা শূন্যা শুদ্ধকুলোদ্ভবা ।
বিন্দুনাদসমুত্পত্তিঃ শংভুবামা শশিপ্রভা ॥ ১৬৫ ॥
বিসঙ্গা ভেদরহিতা মনোজ্ঞা মধুসূদনী ।
মহাশ্রীঃ শ্রীসমুত্পত্তিস্তমঃপারে প্রতিষ্ঠিতা ॥ ১৬৬ ॥
ত্রিতত্ত্বমাতা ত্রিবিধা সুসূক্ষ্মপদসংশ্রয়া ।
শন্তা ভীতা মলাতীতা নির্বিকারা নিরাশ্রয়া ॥ ১৬৭ ॥
শিবাখ্যা চিত্তনিলয়া শিবজ্ঞানস্বরূপিণী ।
দৈত্যদানবনির্মাত্রী কাশ্যপী কালকর্ণিকা ॥ ১৬৮ ॥
শাস্ত্রয়োনিঃ ক্রিয়ামূর্তিশ্চতুর্বর্গপ্রদর্শিকা ।
নারায়ণী নরোদ্ভূতিঃ কৌমুদী লিঙ্গধারিণী ॥ ১৬৯ ॥
কামুকী ললিতাভাবা পরাপরবিভূতিদা ।
পরান্তজাতমহিমা বডবা বামলোচনা ॥ ১৭০ ॥
সুভদ্রা দেবকী সীতা বেদবেদাঙ্গপারগা ।
মনস্বিনী মন্যুমাতা মহামন্যুসমুদ্ভবা ॥ ১৭১ ॥
অমৃত্যুরমৃতাস্বাদা পুরুহূতা পুরুষ্টুতা ।
অশোচ্যা ভিন্নবিষয়া হিরণ্যরজতপ্রিয়া ॥ ১৭২ ॥
হিরণ্যা রাজতী হৈমা হেমাভরণভূষিতা ।
বিভ্রাজমানা দুর্জ্ঞেয়া জ্যোতিষ্টোমফলপ্রদা ॥ ১৭৩ ॥
মহানিদ্রাসমুদ্ভূতিরনিদ্রা সত্যদেবতা ।
দীর্ঘা ককুদ্মিনী হৃদ্যা শান্তিদা শান্তিবর্দ্ধিনী ॥ ১৭৪ ॥
লক্ষ্ম্যাদিশক্তিজননী শক্তিচক্রপ্রবর্তিকা ।
ত্রিশক্তিজননী জন্যা ষডূর্মিপরিবর্জিতা ॥ ১৭৫ ॥
সুধামা কর্মকরণী য়ুগান্তদহনাত্মিকা ।
সংকর্ষণী জগদ্ধাত্রী কাময়োনিঃ কিরীটিনী ॥ ১৭৬ ॥
ঐন্দ্রী ত্রৈলোক্যনমিতা বৈষ্ণবী পরমেশ্বরী ।
প্রদ্যুম্নদয়িতা দাত্রী য়ুগ্মদৃষ্টিস্ত্রিলোচনা ॥ ১৭৭ ॥
মদোত্কটা হংসগতিঃ প্রচণ্ডা চণ্ডবিক্রমা ।
বৃষাবেশা বিয়ন্মাতা বিন্ধ্যপর্বতবাসিনী ॥ ১৭৮ ॥
হিমবন্মেরুনিলয়া কৈলাসগিরিবাসিনী ।
চাণূরহন্তৃতনয়া নীতিজ্ঞা কামরূপিণী ॥ ১৭৯ ॥
বেদবিদ্যাব্রতস্নাতা ধর্মশীলাঽনিলাশনা ।
বীরভদ্রপ্রিয়া বীরা মহাকামসমুদ্ভবা ॥ ১৮০ ॥
বিদ্যাধরপ্রিয়া সিদ্ধা বিদ্যাধরনিরাকৃতিঃ ।
আপ্যায়নী হরন্তী চ পাবনী পোষণী খিলা ॥ ১৮১ ॥
মাতৃকা মন্মথোদ্ভূতা বারিজা বাহনপ্রিয়া ।
করীষিণী সুধাবাণী বীণাবাদনতত্পরা ॥ ১৮২ ॥
সেবিতা সেবিকা সেব্যা সিনীবালী গরুত্মতী ।
অরুন্ধতী হিরণ্যাক্ষী মৃগাঙ্কা মানদায়িনী ॥ ১৮৩ ॥
বসুপ্রদা বসুমতী বসোর্ধারা বসুংধরা ।
ধারাধরা বরারোহা বরাবরসহস্রদা ॥ ১৮৪ ॥
শ্রীফলা শ্রীমতী শ্রীশা শ্রীনিবাসা শিবপ্রিয়া ।
শ্রীধরা শ্রীকরী কল্যা শ্রীধরার্ধশরীরিণী ॥ ১৮৫ ॥
অনন্তদৃষ্টিরক্ষুদ্রা ধাত্রীশা ধনদপ্রিয়া ।
নিহন্ত্রী দৈত্যসঙ্ঘানাং সিহিকা সিহবাহনা ॥ ১৮৬ ॥
সুষেণা চন্দ্রনিলয়া সুকীর্তিশ্ছিন্নসংশয়া ।
রসজ্ঞা রসদা রামা লেলিহানামৃতস্রবা ॥ ১৮৭ ॥
নিত্যোদিতা স্বয়ংজ্যোতিরুত্সুকা মৃতজীবনা ।
বজ্রদণ্ডা বজ্রজিহ্বা বৈদেহী বজ্রবিগ্রহা ॥ ১৮৮ ॥
মঙ্গল্যা মঙ্গলা মালা মলিনা মলহারিণী ।
গান্ধর্বী গারুডী চান্দ্রী কম্বলাশ্বতরপ্রিয়া ॥ ১৮৯ ॥
সৌদামিনী জনানন্দা ভ্রুকুটীকুটিলাননা ।
কর্ণিকারকরা কক্ষ্যা কংসপ্রাণাপহারিণী ॥ ১৯০ ॥
য়ুগন্ধরা য়ুগাবর্ত্তা ত্রিসংধ্যা হর্ষবর্ধিনী ।
প্রত্যক্ষদেবতা দিব্যা দিব্যগন্ধা দিবাপরা ॥ ১৯১ ॥
শক্রাসনগতা শাক্রী সান্ধ্যা চারুশরাসনা ।
ইষ্টা বিশিষ্টা শিষ্টেষ্টা শিষ্টাশিষ্টপ্রপূজিতা ॥ ১৯২ ॥
শতরূপা শতাবর্ত্তা বিনতা সুরভিঃ সুরা ।
সুরেন্দ্রমাতা সুদ্যুম্না সুষুম্ণা সূর্যসংস্থিতা ॥ ১৯৩ ॥
সমীক্ষ্যা সত্প্রতিষ্ঠা চ নিবৃত্তির্জ্ঞানপারগা ।
ধর্মশাস্ত্রার্থকুশলা ধর্মজ্ঞা ধর্মবাহনা ॥ ১৯৪ ॥
ধর্মাধর্মবিনির্মাত্রী ধার্মিকাণাং শিবপ্রদা ।
ধর্মশক্তি র্ধর্মময়ী বিধর্মা বিশ্বধর্মিণী ॥ ১৯৫ ॥
ধর্মান্তরা ধর্মমেঘা ধর্মপূর্বা ধনাবহা ।
ধর্মোপদেষ্ট্রী ধর্মাত্মা ধর্মগম্যা ধরাধরা ॥ ১৯৬ ॥
কাপালী সকলামূর্ত্তিঃ কলা কলিতবিগ্রহা ।
সর্বশক্তিবিনির্মুক্তা সর্বশক্ত্যাশ্রয়াশ্রয়া ॥ ১৯৭ ॥
সর্বা সর্বেশ্বরী সূক্ষ্মা সূক্ষ্মা জ্ঞানস্বরূপিণী ।
প্রধানপুরুষেশেষা মহাদেবৈকসাক্ষিণী ॥ ১৯৮ ॥
সদাশিবা বিয়ন্মূর্ত্তির্বিশ্বমূর্ত্তিরমূর্ত্তিকা ।
এবং নাম্নাং সহস্রেণ স্তুত্বাঽসৌ হিমবান্ গিরিঃ ॥ ১৯৯ ॥
ভূয়ঃ প্রণম্য ভীতাত্মা প্রোবাচেদং কৃতাঞ্জলিঃ ।
য়দেতদৈশ্বরং রূপং ঘোরং তে পরমেশ্বরি ॥ ২০০ ॥
ভীতোঽস্মি সাম্প্রতং দৃষ্ট্বা রূপমন্যত্ প্রদর্শয় ।
এবমুক্তাঽথ সা দেবী তেন শৈলেন পার্বতী ॥ ২০১ ॥
সংহৃত্য দর্শয়ামাস স্বরূপমপরং পুনঃ ।
নীলোত্পলদলপ্রখ্যং নীলোত্পলসুগন্ধিকম্ ॥ ২০২ ॥
দ্বিনেত্রং দ্বিভুজং সৌম্যং নীলালকবিভূষিতম্ ।
রক্তপাদাম্বুজতলং সুরক্তকরপল্লবম্ ॥ ২০৩ ॥
শ্রীমদ্বিশালসংবৃত্তংললাটতিলকোজ্জ্বলম্ ।
ভূষিতং চারুসর্বাঙ্গং ভূষণৈরতিকোমলম্ ॥ ২০৪ ॥
দধানমুরসা মালাং বিশালাং হেমনির্মিতাম্ ।
ঈষত্স্মিতং সুবিম্বোষ্ঠং নূপুরারাবসংয়ুতম্ ॥ ২০৫ ॥
প্রসন্নবদনং দিব্যমনন্তমহিমাস্পদম্ ।
তদীদৃশং সমালোক্য স্বরূপং শৈলসত্তমঃ ॥ ২০৬ ॥
নাম্নামষ্টসহস্রং তু দেব্যা য়ত্ সমুদীরিতম্ ।
জ্ঞাত্বাঽর্কমণ্ডলগতাং সংভাব্য পরমেশ্বরীম্ ॥ ২০৭ ॥
অভ্যর্চ্য গন্ধপুষ্পাদ্যৈর্ভক্তিয়োগসমন্বিতঃ ।
সংস্মরন্পরমং ভাবং দেব্যা মাহেশ্বরং পরম্ ॥ ২০৮ ॥
অনন্যমানসো নিত্যং জপেদামরণাদ্ দ্বিজঃ ।
সোঽন্তকালে স্মৃতিং লব্ধ্বা পরং ব্রহ্মাধিগচ্ছতি ॥ ২০৯ ॥
অথবা জায়তে বিপ্রো ব্রাহ্মণানাং কুলে শুচৌ ।
পূর্বসংস্কারমাহাত্ম্যাদ্ ব্রহ্মবিদ্যামবাপ্নুয়াত্ ॥ ২১০ ॥
সম্প্রাপ্য য়োগং পরমং দিব্যং তত্ পারমেশ্বরম্ ।
শান্তঃ সর্বগাতো ভূত্বা শিবসায়ুজ্যমাপ্নুয়াত্ ॥ ২১১ ॥
প্রত্যেকং চাথ নামানি জুহুয়াত্ সবনত্রয়ম্ ।
পূতনাদিকৃতৈর্দোষৈর্গ্রহদোষৈশ্চ মুচ্যতে ॥ ২১২ ॥
জপেদ্ বাঽহরহর্নিত্যং সংবত্সরমতন্দ্রিতঃ ।
শ্রীকামঃ পার্বতীং দেবীং পূজয়িত্বা বিধানতঃ ॥ ২১৩ ॥
সম্পূজ্য পার্শ্বতঃ শংভুং ত্রিনেত্রং ভক্তিসংয়ুতঃ ।
লভতে মহতীং লক্ষ্মীং মহাদেবপ্রসাদতঃ ॥ ২১৪ ॥
তস্মাত্ সর্বপ্রয়ত্নেন জপ্তব্যং হি দ্বিজাতিভিঃ ।
সর্বপাপাপনোদার্থং দেব্যা নাম সহস্রকম্ ॥ ২১৫ ॥
॥ ইতি শ্রীকূর্মপুরাণে ষট্সাহস্ত্র্যাং সংহিতায়াং
পূর্ববিভাগে শ্রীদেবীসহস্রনামস্তোত্রম্ ॥