॥ Mahatripurasundari Sahasranamastotram Bengali Lyrics ॥
॥ শ্রীমহাত্রিপুরসুন্দরীসহস্রনামস্তোত্রম্ ॥
অথ শ্রীমহাত্রিপুরসুন্দরীসহস্রনামস্তোত্রম্ ।
কৈলাসশিখরে রম্যে নানারত্নোপশোভিতে ।
কল্পপাদপমধ্যস্থে নানাপুষ্পোপশোভিতে ।
মণিমণ্ডপমধ্যস্থে মুনিগন্ধর্বসেবিতে ।
তঙ্কশ্চিত্সুখমাসীনম্ভগবন্তঞ্জগদ্গুরুম্ ॥
কপালখট্বাঙ্গধরঞ্চন্দ্রার্দ্ধকৃতশেখরম্ ।
ত্রিশূলডমরূহস্তমহাবৃষভবাহনম্ ॥
জটাজূটধরন্দেববাসুকীকণ্ঠভূষণম্ ।
বিভূতিভূষণন্দেবন্নীলকণ্ঠন্ত্রিলোচনম্ ॥
দ্বীপিচর্মপরীধানং শুদ্ধস্ফটিকসন্নিভম্ ।
সহস্রাদিত্যসঙ্কাশঙ্গিরিজার্দ্ধাঙ্গভূষণম্ ॥
প্রণম্য শিরসা নাথঙ্কারণবিশ্বরূপিণম্ ।
কৃতাঞ্জলিপুটো ভূত্বা প্রাহৈনং শিখিবাহনঃ ॥
কার্তিকেয় উবাচ –
দেবদেব জগন্নাথ সৃষ্টিস্থিতিলয়াত্মক ।
ত্বমেব পরমাত্মা চ ত্বঙ্গতিঃ সর্বদেহিনাম্ ॥
ত্বং গতিস্সর্বলোকানান্দীনানাঞ্চ ত্বমেব হি ।
ত্বমেব জগদাধারস্ত্বমেষ বিশ্বকারণঃ ॥
ত্বমেব পূজ্যস্সর্বেষান্ত্বদন্যো নাস্তি মে গতিঃ ।
কিঙ্গুহ্যম্পরমং লোকে কিমেকং সর্বসিদ্ধিদম্ ॥
কিমেকম্পরমং শ্রেষ্ঠঙ্কি য়োগং স্বর্গমোক্ষদম্ ।
বিনা তীর্থেন তপসা বিনা দানৈর্বিনা মখৈঃ ॥
বিনা লয়েন ধ্যানেন নরঃ সিদ্ধিমবাপ্নুয়াত্ ।
কস্মাদুত্পদ্যতে সৃষ্টিঃ কস্মিংশ্চ প্রলয়ো ভবেত্ ॥
কস্মাদুত্তীর্যতে দেব সংসারার্ণবসঙ্কটাত্ ।
তদহং শ্রোতুমিচ্ছামি কথয়স্ব মহেশ্বর ॥
ঈশ্বর উবাচ –
সাধু সাধু ত্বয়া পৃষ্টম্পার্বতীপ্রিয়নন্দন ।
অস্তি গুহ্যতমম্পুত্র কথয়িষ্যাম্যসংশয়ম্ ॥
সত্ত্বং রজস্তমশ্চৈব য়ে চান্যে মহদাদয়ঃ ।
য়ে চান্যে বহবো ভূতাঃ সর্বপ্রকৃতিসম্ভবাঃ ॥
সৈব দেবী পরাশক্তির্মহাত্রিপুরসুন্দরী ।
সৈব প্রসূয়তে বিশ্ববিশ্বং সৈব প্রয়াস্যতি ॥
সৈব সংহরতে বিশ্বঞ্জগদেতচ্চরাচরম্ ।
আধারস্সর্বভূতানাং সৈব রোগার্তিহারিণী ॥
ইচ্ছাজ্ঞানক্রিয়াশক্তির্বহ্মবিষ্ণুশিবাদয়ঃ ।
ত্রিধা শক্তিস্বরূপেণ সৃষ্টিস্থিতিবিনাশিনী ।
সৃজ্যতে ব্রহ্মরূপেণ বিষ্ণুরূপেণ পাল্যতে ।
সংহরেদ্রুদ্ররূপেণ জগদেতচ্চরাচরম্ ॥
য়স্যা য়োনৌ জগত্সর্বমদ্যাপি পরিবর্ততে ।
য়স্যাম্প্রলীয়তে চান্তে য়স্যাঞ্চ জায়তে পুনঃ ।
য়াং সমারাধ্য ত্রৈলোক্যং সম্প্রাপ্তম্পদমুত্তমম্ ।
তস্যা নাম সহস্রন্তু কথয়ামি শৃণুষ্ব তত্ ॥
ওঁ অস্য শ্রীমহাত্রিপুরসুন্দরীসহস্রনামস্তোত্রমন্ত্রস্য
শ্রীভগবান্দক্ষিণামূর্তিরৃষিঃ জগতীচ্ছন্দঃ
সমস্তপ্রকটগুপ্তসম্প্রদায়কুলকৌলোত্তীর্ণনির্গর্ভরহস্যাচিন্ত্যপ্রভা
বতী দেবতা ওম্বীজম্ ॥ মায়াশক্তিঃ কামরাজবীজকীলকম্ জীবো বীজম্
সুষুম্না নাডী সরস্বতী শক্তির্ধর্মার্থকামমোক্ষার্থে জপে বিনিয়োগঃ ॥
আধারে তরুণার্কবিম্বরুচিরং হেমপ্রভম্বাগ্ভবম্-
বীজং মন্মথমিন্দ্রগোপসদৃশং হৃত্পঙ্কজে সংস্থিতম্ ॥
বিষ্ণুব্রহ্মপদস্থশক্তিকলিতং সোমপ্রভাভাসুর
য়ে ধ্যায়ন্তি পদত্রয়ন্তব শিবে তে য়ান্তি সৌখ্যম্পদম্ ॥
কল্যাণী কমলা কালী করালী কামরূপিণী ।
কামাখ্যা কামদা কাম্যা কামনা কামচারিণী ॥
কালরাত্রির্মহারাত্রিঃ কপালী কালরূপিণী ।
কৌমারী করুণামুক্তিঃ কলিকল্মষনাশিনী ॥
কাত্যায়নী করাধারা কৌমুদী কমলপ্রিয়া ।
কীর্তিদা বুদ্ধিদা মেধা নীতিজ্ঞা নীতিবত্সলা ॥
মাহেশ্বরী মহামায়া মহাতেজা মহেশ্বরী ।
মহাজিহ্বা মহাঘোরা মহাদংষ্ট্রা মহাভুজা ॥
মহামোহান্ধকারঘ্নী মহামোক্ষপ্রদায়িনী ।
মহাদারিদ্র্যনাশা চ মহাশত্রুবিমর্দ্দিনী ॥
মহামায়া মহাবীর্যা মহাপাতকনাশিনী ।
মহামখা মন্ত্রময়ী মণিপূরকবাসিনী ॥
মানসী মানদা মান্যা মনশ্চক্ষূ রণেচরা ।
গণমাতা চ গায়ত্রী গণগন্ধর্বসেবিতা ॥
গিরিজা গিরিশা সাধ্বী গিরিস্থা গিরিবল্লভা ।
চণ্ডেশ্বরী চণ্ডরূপা প্রচণ্ডা চণ্ডমালিনী ॥
চর্বিকা চর্চিকাকারা চণ্ডিকা চারুরূপিণী ।
য়জ্ঞেশ্বরী য়জ্ঞরূপা জপয়জ্ঞপরায়ণা ॥
য়জ্ঞমাতা য়জ্ঞভোক্ত্রী য়জ্ঞেশী য়জ্ঞসম্ভবা ।
সিদ্ধয়জ্ঞক্রিয়াসিদ্ধির্যজ্ঞাঙ্গী য়জ্ঞরক্ষিকা ॥
য়জ্ঞক্রিয়া য়জ্ঞরূপা য়জ্ঞাঙ্গী য়জ্ঞরক্ষিকা ।
য়জ্ঞক্রিয়া চ য়জ্ঞা চ য়জ্ঞায়জ্ঞক্রিয়ালয়া ॥
জালন্ধরী জগন্মাতা জাতবেদা জগত্প্রিয়া ।
জিতেন্দ্রিয়া জিতক্রোধা জননী জন্মদায়িনী ॥
গঙ্গা গোদাবরী চৈব গোমতী চ শতদ্রুকা ।
ঘর্ঘরা বেদগর্ভা চ রেচিকা সমবাসিনী ॥
সিন্ধুর্মন্দাকিনী ক্ষিপ্রা য়মুনা চ সরস্বতী ।
ভদ্রা রাগবিপাশা চ গণ্ডকী বিন্ধ্যবাসিনী ॥
নর্মদা সিন্ধু কাবেরী বেত্রবত্যা সুকৌশিকী ।
মহেন্দ্রতনয়া চৈব অহল্যা চর্মকাবতী ॥
অয়োধ্যা মথুরা মায়া কাশী কাঞ্চী অবন্তিকা ।
পুরী দ্বারাবতী তীর্থা মহাকিল্বিষনাশিনীই ॥
পদ্মিনী পদ্মমধ্যস্থা পদ্মকিঞ্জল্কবাসিনী ।
পদ্মবক্ত্রা চকোরাক্ষী পদ্মস্থা পদ্মসম্ভবা ॥
হ্রীঙ্কারী কুণ্ডলীধারী হৃত্পদ্মস্থা সুলোচনা ।
শ্রীঙ্কারীভূষণা লক্ষ্মীঃ ক্লীঙ্কারী ক্লেশনাশিনী ॥
হরিবক্ত্রোদ্ভবা শান্তা হরিবক্ত্রকৃতালয়া ।
হরিবক্ত্রোদ্ভবা শান্তা হরিবক্ষস্থলস্থিতা ॥
বৈষ্ণবী বিষ্ণুরূপা চ বিষ্ণুমাতৃস্বরূপিণী ।
বিষ্ণুমায়া বিশালাক্ষী বিশালনয়নোজ্জ্বলা ॥
বিশ্বেশ্বরী চ বিশ্বাত্মা বিশ্বেশী বিশ্বরূপিণী ।
বিশ্বেশ্বরী শিবারাধ্যা শিবনাথা শিবপ্রিয়া ॥
শিবমাতা শিবাখ্যা চ শিবদা শিবরূপিণী ।
ভবেশ্বরী ভবারাধ্যা ভবেশী ভবনায়িকা ॥
ভবমাতা ভবগম্যা ভবকণ্টকনাশিনী ।
ভবপ্রিয়া ভবানন্দা ভবানী ভবমোহিনী ॥
গায়ত্রী চৈব সাবিত্রী ব্রহ্মাণী ব্রহ্মরূপিণী ।
ব্রহ্মেশী ব্রহ্মদা ব্রহ্মা ব্রহ্মাণী ব্রহ্মবাদিনী ॥
দুর্গস্থা দুর্গরূপা চ দুর্গা দুর্গার্তিনাশিনী ।
সুগমা দুর্গমা দান্তা দয়া দোগ্ধ্রী দুরাপহা ॥
দুরিতঘ্নী দুরাধ্যক্ষা দুরা দুষ্কৃতনাশিনী ।
পঞ্চাস্যা পঞ্চমী পূর্ণা পূর্ণপীঠনিবাসিনী ॥
সত্ত্বস্থা সত্ত্বরূপা চ সত্ত্বস্থা সত্ত্বসম্ভবা ।
রজস্স্থা চ রজোরূপা রজোগুণসমুদ্ভবা ॥
তমস্স্থা চ তমোরূপা তামসী তামসপ্রিয়া ।
তমোগুণসমুদ্ভূতা সাত্ত্বিকী রাজসী কলা ॥
কাষ্ঠা মুহূর্তা নিমিষা অনিমেষা ততঃ পরম্ ।
অর্দ্ধমাসা চ মাসা চ সঁবত্সরস্বরূপিণী ॥
য়োগস্থা য়োগরূপা চ কল্পস্থা কল্পরূপিণী ।
নানারত্নবিচিত্রাঙ্গী নানাভরণমণ্ডিতা ॥
বিশ্বাত্মিকা বিশ্বমাতা বিশ্বপাশবিনাশিনী ।
বিশ্বাসকারিণী বিশ্বা বিশ্বশক্তিবিচারণা ॥
য়বাকুসুমসঙ্কাশা দাডিমীকুসুমোপমা ।
চতুরঙ্গী চতুর্বাহুশ্চতুরাচারবাসিনী ॥
সর্বেশী সর্বদা সর্বা সর্বদা সর্বদায়িনী ।
মাহেশ্বরী চ সর্বাদ্যা শর্বাণী সর্বমঙ্গলা ॥
নলিনী নন্দিনী নন্দা আনন্দা নন্দবর্দ্ধিনী ।
ব্যাপিনী সর্বভূতেষু শবভারবিনাশিনী ॥
সর্বশৃঙ্গারবেষাঢ্যা পাশাঙ্কুশকরোদ্যতা ।
সূর্যকোটিসহস্রাভা চন্দ্রকোটিনিভাননা ॥
গণেশকোটিলাবণ্যা বিষ্ণুকোট্যরিমর্দিনী ।
দাবাগ্নিকোটিনলিনী রুদ্রকোট্যুগ্ররূপিণী ॥
সমুদ্রকোটিগম্ভীরা বায়ুকোটিমহাবলা ।
আকাশকোটিবিস্তারা য়মকোটিভয়ঙ্করী ॥
মেরুকোটিসমুচ্ছ্রায়া গণকোটিসমৃদ্ধিদা ।
নিষ্কস্তোকা নিরাধারা নির্গুণা গুণবর্জিতা ॥
অশোকা শোকরহিতা তাপত্রয়বিবর্জিতা ।
বসিষ্ঠা বিশ্বজননী বিশ্বাখ্যা বিশ্ববর্দ্ধিনী ।
চিত্রা বিচিত্রচিত্রাঙ্গী হেতুগর্ভা কুলেশ্বরী ।
ইচ্ছাশক্তির্জ্ঞানশক্তিঃ ক্রিয়াশক্তিঃ শুচিস্মিতা ॥
শুচিঃ স্মৃতিময়ী সত্যা শ্রুতিরূপা শ্রুতিপ্রিয়া ।
মহাসত্ত্বময়ী সত্ত্বা পঞ্চতত্ত্বোপরিস্থিতা ॥
পার্বতী হিমবত্পুত্রী পারস্থা পাররূপিণী ।
জয়ন্তী ভদ্রকালী চ অহল্যা কুলনায়িকা ॥
ভূতধাত্রী চ ভূতেশী ভূতস্থা ভূতভাবনা ।
মহাকুণ্ডলিনী শক্তির্মহাবিভববর্দ্ধিনী ॥
হংসাক্ষী হংসরূপা চ হংসস্থা হংসরূপিণী ।
সোমসূর্যাগ্নিমধ্যস্থা মণিমণ্ডলবাসিনী ॥
দ্বাদশারসরোজস্থা সূর্যমণ্ডলবাসিনী ।
অকলঙ্কা শশাঙ্কাভা ষোডশারনিবাসিনী ॥
ডাকিনী রাকিনী চৈব লাকিনী কাকিনী তথা ।
শাকিনী হাকিনী চৈব ষট্চক্রেষু নিবাসিনী ॥
সৃষ্টিস্থিতিবিনাশায় সৃষ্টিস্থিত্যন্তকারিণী ।
শ্রীকণ্ঠপ্রিয়হৃত্কণ্ঠা নন্দাখ্যা বিন্দুমালিনী ॥
চতুষ্ষষ্টিকলাধারা দেহদণ্ডসমাশ্রিতা ।
মায়া কালী ধৃতির্মেধা ক্ষুধা তুষ্টির্মহাদ্যুতিঃ ॥
হিঙ্গুলা মঙ্গলা সীতা সুষুম্নামধ্যগামিনী ।
পরঘোরা করালাক্ষী বিজয়া জয়দায়িনী ॥
হৃত্পদ্মনিলয়া ভীমমহাভৈরবনাদিনী ।
আকাশলিঙ্গসম্ভূতা ভুবনোদ্যানবাসিনী ॥
মহত্সূক্ষ্মা চ কঙ্কালী ভীমরূপা মহাবলা ।
মেনকাগর্ভসম্ভূতা তপ্তকাঞ্চনসন্নিভা ॥
অন্তরস্থা কূটবীজা ত্রিকূটাচলবাসিনী ।
বর্ণাখ্যা বর্ণরহিতা পঞ্চাশদ্বর্ণভেদিনী ॥
বিদ্যাধরী লোকধাত্রী অপ্সরা অপ্সরঃ প্রিয়া ।
দীক্ষা দাক্ষায়ণী দক্ষা দক্ষয়জ্ঞবিনাশিনী ॥
য়শঃ পূর্ণা য়শোদা চ য়শোদাগর্ভসম্ভবা ।
দেবকী দেবমাতা চ রাধিকা কৃষ্ণবল্লভা ॥
অরুন্ধতী শচীন্দ্রাণী গান্ধারী গন্ধমালিনী ।
ধ্যানাতীতা ধ্যানগম্যা ধ্যানজ্ঞা ধ্যানধারিণী ॥
লম্বোদরী চ লম্বোষ্ঠী জাম্ববন্তী জলোদরী ।
মহোদরী মুক্তকেশী মুক্তকামার্থসিদ্ধিদা ॥
তপস্বিনী তপোনিষ্ঠা সুপর্ণা ধর্মবাসিনী ।
বাণচাপধরা ধীরা পাঞ্চালী পঞ্চমপ্রিয়া ॥
গুহ্যাঙ্গী চ সুভীমা চ গুহ্যতত্ত্বা নিরঞ্জনা ।
অশরীরা শরীরস্থা সংসারার্ণবতারিণী ॥
অমৃতা নিষ্কলা ভদ্রা সকলা কৃষ্ণপিঙ্গলা ।
চক্রপ্রিয়া চ চক্রাহ্বা পঞ্চচক্রাদিদারিণী ॥
পদ্মরাগপ্রতীকাশা নির্মলাকাশসন্নিভা ।
অধঃস্থা ঊর্দ্ধ্বরূপা চ ঊর্দ্ধ্বপদ্মনিবাসিনী ॥
কার্যকারণ কর্তৃত্বে শশ্বদ্রূপেষু সংস্থিতা ।
রসজ্ঞা রসমধ্যস্থা গন্ধস্থা গন্ধরূপিণী ॥
প্রব্রহ্মস্বরূপা চ পরব্রহ্মনিবাসিনী ।
শব্দব্রহ্মস্বরূপা চ শব্দস্থা শব্দবর্জিতা ॥
সিদ্ধির্বুদ্ধিঃ পরাবুদ্ধিঃ সন্দীপ্তির্মধ্যসংস্থিতা ।
স্বগুহ্যা শাম্ভবীশক্তিস্তত্ত্বস্থা তত্ত্বরূপিণী ॥
শাশ্বতী ভূতমাতা চ মহাভূতাধিপপ্রিয়া ।
শুচিপ্রেতা ধর্মসিদ্ধির্ধর্মবৃদ্ধিঃ পরাজিতা ॥
কামসন্দীপিণী কামা সদা কৌতূহলপ্রিয়া ।
জটাজূটধরা মুক্তা সূক্ষ্মা শক্তিবিভূষণা ॥
দ্বীপিচর্মপরীধানা চীরবল্কলধারিণী ।
ত্রিশূলডমরুধরা নরমালাবিভূষণা ॥
অত্যুগ্ররূপিণী চোগ্রা কল্পান্তদহনোপমা ।
ত্রৈলোক্যসাধিনী সাধ্যা সিদ্ধিসাধকবত্সলা ॥
সর্ববিদ্যাময়ী সারা চাসুরাণাবিনাশিনী ।
দমনী দামনী দান্তা দয়া দোগ্ধ্রী দুরাপহা ॥
অগ্নিজিহ্বোপমা ঘোরা ঘোরঘোরতরাননা ।
নারায়ণী নারসিংহী নৃসিংহহৃদয়েস্থিতা ॥
য়োগেশ্বরী য়োগরূপা য়োগমাতা চ য়োগিনী ।
খেচরী খচরী খেলা নির্বাণপদসংশ্রয়া ॥
নাগিনী নাগকন্যা চ সুবেশা নাগনায়িকা ।
বিষজ্বালাবতী দীপ্তা কলাশতবিভূষণা ॥
তীব্রবক্ত্রা মহাবক্ত্রা নাগকোটিত্বধারিণী ।
মহাসত্ত্বা চ ধর্মজ্ঞা ধর্মাতিসুখদায়িনী ॥
কৃষ্ণমূর্দ্ধা মহামূর্দ্ধা ঘোরমূর্দ্ধা বরাননা ।
সর্বেন্দ্রিয়মনোন্মত্তা সর্বেন্দ্রিয়মনোময়ী ॥
সর্বসঙ্গ্রামজয়দা সর্বপ্রহরণোদ্যতা ।
সর্বপীডোপশমনী সর্বারিষ্টনিবারিণী ॥
সর্বৈশ্বর্যসমুত্পন্না সর্বগ্রহবিনাশিনী ।
মাতঙ্গী মত্তমাতঙ্গী মাতঙ্গীপ্রিয়মণ্ডলা ॥
অমৃতোদধিমধ্যস্থা কটিসূত্রৈরলঙ্কৃতা ।
অমৃতোদধিমধ্যস্থা প্রবালবসনাম্বুজা ॥
মণিমণ্ডলমধ্যস্থা ঈষত্প্রহসিতাননা ।
কুমুদা ললিতা লোলা লাক্ষা লোহিতলোচনা ॥
দিগ্বাসা দেবদূতী চ দেবদেবাধিদেবতা ।
সিংহোপরিসমারূঢা হিমাচলনিবাসিনী ॥
অট্টাট্টহাসিনী ঘোরা ঘোরদৈত্যবিনাশিনী ।
অত্যুগ্ররক্তবস্ত্রাভা নাগকেয়ূরমণ্ডিতা ॥
মুক্তাহারলতোপেতা তুঙ্গপীনপয়োধরা ।
রক্তোত্পলদলাকারা মদাঘূর্ণিতলোচনা ॥
সমস্তদেবতামূর্তিঃ সুরারিক্ষয়কারিণী ।
খড্গিনী শূলহস্তা চ চক্রিণী চক্রমালিনী ॥
শঙ্খিনী চাপিনী বাণী বজ্রিণী বজ্রদণ্ডিনী ।
আনন্দোদধিমধ্যস্থা কটিসূত্রৈরলঙ্কৃতা ॥
নানাভরণদীপ্তাঙ্গা নানামণিবিভূষিতা ।
জগদানন্দসম্ভূতা চিন্তামণিগুণান্বিতা ॥
ত্রৈলোক্যনমিতা তুর্যা চিন্ময়ানন্দরূপিণী ।
ত্রৈলোক্যনন্দিনী দেবী দুঃখসুস্স্বপ্ননাশিনী ॥
ঘোরাগ্নিদাহশমনী রাজ্যদেবার্থসাধিনী ।
মহাপরাধরাশিঘ্নী মহাচৌরভয়াপহা ॥
রাগাদিদোষরহিতা জরামরণবর্জিতা ।
চন্দ্রমণ্ডলমধ্যস্থা পীয়ূষার্ণবসম্ভবা ॥
সর্বদেবৈঃ স্তুতা দেবী সর্বসিদ্ধৈর্ন্নমস্কৃতা ।
অচিন্ত্যশক্তিরূপা চ মণিমন্ত্রমহৌষধী ॥
অস্তিস্বস্তিময়ী বালা মলয়াচলবাসিনী ।
ধাত্রী বিধাত্রী সংহারী রতিজ্ঞা রতিদায়িনী ॥
রুদ্রাণী রুদ্ররূপা চ রুদ্ররৌদ্রার্ত্তিনাশিনী ।
সর্বজ্ঞা চৈব ধর্মজ্ঞা রসজ্ঞা দীনবত্সলা ॥
অনাহতা ত্রিনয়না নির্ভারা নির্বৃতিঃ পরা ।
পরাঘোরা করালাক্ষী সুমতী শ্রেষ্ঠদায়িনী ॥
মন্ত্রালিকা মন্ত্রগম্যা মন্ত্রমালা সুমন্ত্রিণী ।
শ্রদ্ধানন্দা মহাভদ্রা নির্দ্বন্দ্বা নির্গুণাত্মিকা ॥
ধরিণী ধারিণী পৃথ্বী ধরা ধাত্রী বসুন্ধরা ।
মেরুমন্দরমধ্যস্থাস্থিতিঃ শঙ্করবল্লভা ॥
শ্রীমতী শ্রীময়ী শ্রেষ্ঠা শ্রীকরী ভাবভাবিনী ।
শ্রীদা শ্রীমা শ্রীনিবাসা শ্রীমতী শ্রীমতাঙ্গতিঃ ॥
উমা সারঙ্গিণী কৃষ্ণা কুটিলা কুটিলালকা ।
ত্রিলোচনা ত্রিলোকাত্মা পুণ্যপুণ্যা প্রকীর্তিতা ॥
অমৃতা সত্যসঙ্কল্পা সাসত্যা গ্রন্থিভেদিনী ।
পরেশী পরমা সাধ্যা পরাবিদ্যা পরাত্পরা ॥
সুন্দরাঙ্গী সুবর্ণাভা সুরাসুরনমস্কৃতা ।
প্রজা প্রজাবতী ধন্যা ধনধান্যসমৃদ্ধিদা ॥
ঈশানী ভুবনেশানী ভবানী ভুবনেশ্বরী ।
অনন্তানতমহিতা জগত্সারা জগদ্ভবা ॥
অচিন্ত্যাত্মা চিন্ত্যশক্তিশ্চিন্ত্যাচিন্ত্যস্বরূপিণী ।
জ্ঞানগম্যা জ্ঞানমূর্তির্জ্ঞানিনী জ্ঞানশালিনী ॥
অসিতা ঘোররূপা চ সুধাধারা সুধাবহা ।
ভাস্করী ভাস্বতী ভীতির্ভাস্বদক্ষানুশায়িনী ॥
অনসূয়া ক্ষমা লজ্জা দুর্লভা ভরণাত্মিকা ।
বিশ্বঘ্নী বিশ্ববীরা চ বিশ্বঘ্নী বিশ্বসংস্থিতা ॥
শীলস্থা শীলরূপা চ শীলা শীলপ্রদায়িনী ।
বোধনী বোধকুশলা রোধনী বোধনী তথা ॥
বিদ্যোতিনী বিচিত্রাত্মা বিদ্যুত্পটলসন্নিভা ।
বিশ্বয়োনির্মহায়োনিঃ কর্ময়োনিঃ প্রিয়াত্মিকা ॥
রোহিণী রোগশমনী মহারোগজ্বরাপহা ।
রসদা পুষ্টিদা পুষ্টির্মানদা মানবপ্রিয়া ॥
কৃষ্ণাঙ্গবাহিনী কৃষ্ণা কৃষ্ণাকৃষ্ণসহোদরী ।
শাম্ভবী শম্ভুরূপা চ শম্ভুস্থা শম্ভুসম্ভবা ॥
বিশ্বোদরী য়োগমাতা য়োগমুদ্রাধ্নয়োগিনী ।
বাগীশ্বরী য়োগনিদ্রা য়োগিনীকোটিসেবিতা ॥
কৌলিকা মন্দকন্যা চ শৃঙ্গারপীঠবাসিনী ।
ক্ষেমঙ্করী সর্বরূপা দিব্যরূপা দিগম্বরী ॥
ধূম্রবক্ত্রা ধূম্রনেত্রা ধূম্রকেশী চ ধূসরা ।
পিনাকী রুদ্রবেতালী মহাবেতালরূপিণী ॥
তপিনী তাপিনী দীক্ষা বিষ্ণুবিদ্যাত্মনাশ্রীতা ।
মন্থরা জঠরা তীব্রা অগ্নিজিহ্বা ভয়াপহা ॥
পশুঘ্নী পশুরূপা চ পশুহা পশুবাহিনী ।
পীতা মাতা চ ধীরা চ পশুপাশবিনাশিনী ॥
চন্দ্রপ্রভা চন্দ্ররেখা চন্দ্রকান্তিবিভূষিণী ।
কুঙ্কুমাঙ্কিতসর্বাঙ্গী সুধাসদ্গুরুলোচনা ॥
শুক্লাম্বরধরা দেবী বীণাপুস্তকধারিণী ।
ঐরাবতপদ্মধারা শ্বেতপদ্মাসনস্থিতা ॥
রক্তাম্বরধরা দেবী রক্তপদ্মবিলোচনা ।
দুস্তরা তারিণী তারা তরুণী তাররূপিণী ॥
সুধাধারা চ ধর্মজ্ঞা ধর্মসঙ্গোপদেশিনী ।
ভগেশ্বরী ভগারাধ্যা ভগিনী ভগনায়িকা ॥
ভগবিম্বা ভগক্লিন্না ভগয়োনির্ভগপ্রদা ।
ভগেশ্বরী ভগারাধ্যা ভগিনী ভগনায়কা ॥
ভগেশী ভগরূপা চ ভগগুহ্যা ভগাবহা ।
ভগোদরী ভগানন্দা ভগস্থা ভগশালিনী ॥
সর্বসঙ্ক্ষোভিণী শক্তিস্সর্ববিদ্রাবিণী তথা ।
মালিনী মাধবী মাধ্বী মধুরূপা মহোত্কটা ॥
ভরুণ্ডচন্দ্রিকা জ্যোত্স্না বিশ্বচক্ষুস্তমোপহা ।
সুপ্রসন্না মহাদূতী য়মদূতী ভয়ঙ্করী ॥
উন্মাদিনী মহারূপা দিব্যরূপা সুরার্চিতা ।
চৈতন্যরূপিণী নিত্যা ক্লিন্না কামমদোদ্ধতা ॥
মদিরানন্দকৈবল্যা মদিরাক্ষী মদালসা ।
সিদ্ধেশ্বরী সিদ্ধবিদ্যা সিদ্ধাদ্যা সিদ্ধসম্ভবা ॥
সিদ্ধর্দ্ধিঃ সিদ্ধমাতা চ সিদ্ধিস্সর্বার্থসিদ্ধিদা ।
মনোময়ী গুণাতীতা পরঞ্জ্যোতিঃস্বরূপিণী ॥
পরেশী পরগা পারা পরাসিদ্ধিঃ পরাগতিঃ ।
বিমলা মোহিনী আদ্যা মধুপানপরায়ণা ॥
বেদবেদাঙ্গজননী সর্বশাস্ত্রবিশারদা ।
সর্বদেবময়ী বিদ্যা সর্বশাস্ত্রময়ী তথা ॥
সর্বজ্ঞানময়ী দেবী সর্বধর্মময়ীশ্বরী ।
সর্বয়জ্ঞময়ী য়জ্ঞা সর্বমন্ত্রাধিকারিণী ॥
সর্বসম্পত্প্রতিষ্ঠাত্রী সর্ববিদ্রাবিণী পরা ।
সর্বসঙ্ক্ষোভিণী দেবী সর্বমঙ্গলকারিণী ॥
ত্রৈলোক্যাকর্ষিণী দেবী সর্বাহ্লাদনকারিণী ।
সর্বসম্মোহিনী দেবী সর্বস্তম্ভনকারিণী ॥
ত্রৈলোক্যজৃম্ভিণী দেবী তথা সর্ববশঙ্করী ।
ত্রৈলোক্যরঞ্জিনী দেবী সর্বসম্পত্তিদায়িনী ।
সর্বমন্ত্রময়ী দেবী সর্বদ্বন্দ্বক্ষয়ঙ্করী ॥
সর্বসিদ্ধিপ্রদা দেবী সর্বসম্পত্প্রদায়িনী ।
সর্বপ্রিয়করী দেবী সর্বমঙ্গলকারিণী ॥
সর্বকামপ্রদা দেবী সর্বদুঃখবিমোচিনী ।
সর্বমৃত্যুপ্রশমনী সর্ববিঘ্নবিনাশিনী ॥
সর্বাঙ্গসুন্দরী মাতা সর্বসৌভাগ্যদায়িনী ।
সর্বজ্ঞা সর্বশক্তিশ্চ সর্বৈশ্বর্যফলপ্রদা ॥
সর্বজ্ঞানময়ী দেবী সর্বব্যাধিবিনাশিনী ।
সর্বাধারস্বরূপা চ সর্বপাপহরা তথা ॥
সর্বানন্দময়ী দেবী সর্বেক্ষায়াঃস্বরূপিণী ।
সর্বলক্ষ্মীময়ী বিদ্যা সর্বেপ্সিতফলপ্রদা ॥
সর্বারিষ্টপ্রশমনী পরমানন্দদায়িনী ।
ত্রিকোণনিলয়া ত্রিস্থা ত্রিমাত্রা ত্রিতনুস্থিতা ॥
ত্রিবেণী ত্রিপথা ত্রিস্থা ত্রিমূর্তিস্ত্রিপুরেশ্বরী ।
ত্রিধাম্নী ত্রিদশাধ্যক্ষা ত্রিবিত্ত্রিপুরবাসিনী ॥
ত্রয়ীবিদ্যা চ ত্রিশিরা ত্রৈলোক্যা চ ত্রিপুষ্করা ।
ত্রিকোটরস্থা ত্রিবিধা ত্রিপুরা ত্রিপুরাত্মিকা ॥
ত্রিপুরাশ্রী ত্রিজননী ত্রিপুরা ত্রিপুরসুন্দরী ।
ইদন্ত্রিপুরসুন্দর্যাঃ স্তোত্রন্নাম সহস্রকম্ ॥
গুহ্যাদ্গুহ্যতরম্পুত্র তব প্রীত্যৈ প্রকীর্তিতম্ ।
গোপনীয়ম্প্রয়ত্নেন পঠনীয়ম্প্রয়ত্নতঃ ॥
নাতঃ পরতরম্পুণ্যন্নাতঃ পরতরন্তপঃ ।
নাতঃ পরতরং স্তোত্রন্নাতঃ পরতরা গতিঃ ॥
স্তোত্রং সহস্রনামাখ্যং মম বক্ত্রাদ্বিনির্গতম্ ।
য়ঃ পঠেত্প্রয়তো ভক্ত্যা শৃণুয়াদ্বা সমাহিতঃ ॥
মোক্ষার্থী লভতে মোক্ষং স্বর্গার্থী স্বর্গমাপ্নুয়াত্ ।
কামাংশ্চ প্রাপ্নুয়াত্কামী ধনার্থী চ লভেদ্ধনম্ ॥
বিদ্যার্থী লভতে বিদ্যায়শোর্থী লভতে য়শঃ ।
কন্যার্থী লভতে কন্যাং সুতার্থী লভতে সুতম্ ॥
গুর্বিণী জনয়েত্পুত্রঙ্কন্যা বিন্দতি সত্পতিম্ ।
মূর্খোঽপি লভতে শাস্ত্রং হীনোঽপি লভতে গতিম্ ॥
সঙ্ক্রান্ত্যাবার্কামাবস্যামষ্টম্যাঞ্চ বিশেষতঃ ।
পৌর্ণমাস্যাঞ্চতুর্দ্দশ্যান্নবম্যাম্ভৌমবাসরে ॥
পঠেদ্বা পাঠয়েদ্বাপি শৃণুয়াদ্বা সমাহিতঃ ।
স মুক্তস্সর্বপাপেভ্যঃ কামেশ্বরসমো ভবেত্ ॥
লক্ষ্মীবান্ধর্মবাংশ্চৈব বল্লভস্সর্বয়োষিতাম্ ।
তস্য বশ্যম্ভবেদাশু ত্রৈলোক্যং সচরাচরম্ ॥
রুদ্রন্দৃষ্ট্বা য়থা দেবা বিষ্ণুন্দৃষ্ট্বা চ দানবাঃ ।
য়থাহির্গরুডন্দৃষ্ট্বা সিংহন্দৃষ্ট্বা য়থা গজাঃ ।
কীটবত্প্রপলায়ন্তে তস্য বক্ত্রাবলোকনাত্ ।
অগ্নিচৌরভয়ন্তস্য কদাচিন্নৈব সম্ভবেত্ ॥
পাতকা বিবিধাঃ শান্তির্মেরুপর্বতসন্নিভাঃ ।
য়স্মাত্তচ্ছৃণুয়াদ্বিঘ্নাংস্তৃণবহ্নিহুতয়্যথা ॥
একদা পঠনাদেব সর্বপাপক্ষয়ো ভবেত্ ।
দশধা পঠনাদেব বাচা সিদ্ধিঃ প্রজায়তে ॥
শতধা পঠনাদ্বাপি খেচরো জায়তে নরঃ ।
সহস্রদশসঙ্খ্যাতয়ঃ পঠেদ্ভক্তিমানসঃ ॥
মাতাস্য জগতান্ধাত্রী প্রত্যক্ষা ভবতি ধ্রুবম্ ।
লক্ষপূর্ণে য়থা পুত্র স্তোত্ররাজম্পঠেত্সুধীঃ ॥
ভবপাশবিনির্মুক্তো মম তুল্যো ন সংশয়ঃ ।
সর্বতীর্থেষু য়ত্পুণ্যং সকৃজ্জপ্ত্বা লভেন্নরঃ ॥
সর্ববেদেষু য়ত্প্রোক্তন্তত্ফলম্পরিকীর্তিতম্ ।
ভূত্বা চ বলবান্পুত্র ধনবান্সর্বসম্পদঃ ॥
দেহান্তে পরমং স্থানয়ত্সুরৈরপি দুর্লভম্ ।
স য়াস্যতি ন সন্দেহঃ স্তবরাজস্য কীর্তনাত্ ॥
ইতি শ্রীবামকেশ্বরতন্ত্রে হরকুমারসঁবাদে মহাত্রিপুরসুন্দর্যাঃ
ষোডশ্যাঃ সহস্রনামস্তোত্রং সমাপ্তম্ ॥