॥ Shakambhari Tatha Vanashankari Sahasranamastotram Bengali Lyrics ॥
॥ শ্রীশাকম্ভরী তথা বনশঙ্করীসহস্রনামস্তোত্রম্ ॥
শান্তা শারদচন্দ্রসুন্দরমুখী শাল্যন্নভোজ্যপ্রিয়া
শাকৈঃ পালিতবিষ্টপা শতদৃশা শাকোল্লসদ্বিগ্রহা ।
শ্যামাঙ্গী শরণাগতার্তিশমনী শক্রাদিভিঃ শংসিতা
শঙ্কর্যষ্টফলপ্রদা ভগবতী শাকম্ভরী পাতু মাম্ ॥
শূলং পাশকপালচাপকুলিশান্বাণান্সৃণিং খেটকাং
শঙ্কং চক্রগদাহিখড্গমভয়ং খট্বাঙ্গদণ্ডান্ধরাম্ ।
বর্ষাভাববশাদ্ধতান্মুনিগণান্শাকেন য়া রক্ষতি
লোকানাং জননীং মহেশদয়িতাং তাং নৌমি শাকম্ভরীম্ ॥ ১ ॥
কৈলাসশিখরাসীনং স্কন্দং মুনি গণান্বিতম্ ।
প্রণম্য শক্রঃ পপ্রচ্ছ লোকানাং হিতকাম্যয়া ॥ ২ ॥
শক্র উবাচ –
স্কন্দ স্কন্দ মহাবাহো সর্বজ্ঞ শিবনন্দন ।
নাম্নাং সহস্রমাচক্ষ্ব শাকম্ভর্যাঃ সুসিদ্ধিদম্ ॥ ৩ ॥
স্কন্দ উবাচ –
য়া দেবী শতবার্ষিক্যামনাবৃষ্ট্যাং স্বদেহজৈঃ ।
শাকৈরবীভরত্সর্বানৃষীন্ শক্র শতং সমাঃ ॥ ৪ ॥
মহাসরস্বতী সৈব জাতা শাকম্ভরী শিবা ।
নাম্নাং সহস্রং তস্যাস্তে বক্ষ্যামি শ্রুণুভক্তিতঃ ॥ ৫ ॥
ওঁ অস্য শ্রীশাকম্ভরীসহস্রনামমালামন্ত্রস্য মহাদেবঃ ঋষিঃ ।
অনুষ্টুপ্ ছন্দঃ । শাকম্ভরী দেবতা । সৌঃ বীজং । ক্লীং শক্তিঃ ।
হ্রীং কীলকং । মম শ্রী শাকম্ভরীপ্রসাদসিদ্ধ্যর্থে
তত্সহস্রনামপারায়ণে বিনিয়োগঃ ।
করন্যাসঃ ॥
ওঁ সৌঃ চামুণ্ডায়ৈ অঙ্গুষ্ঠাভ্যাং নমঃ ।
ওঁ ক্লীং শতাক্ষ্যৈ তর্জনীভ্যাং নমঃ ।
ওঁ হ্রীং শাকম্ভর্যৈ মধ্যমাভ্যাং নমঃ ।
ওঁ সৌঃ চামুণ্ডায়ৈ অনামিকাভ্যাং নমঃ ।
ওঁ ক্লীং শতাক্ষ্যে কনিষ্ঠিকাভ্যাং নমঃ ।
ওঁ হ্রীং শাকম্ভর্যৈ করতলকরপৃষ্ঠাভ্যাং নমঃ ।
এবং হৃদয়াদিন্যাসঃ ।
ওঁ সৌঃ ক্লীং হ্রীং ওঁ মন্ত্রেণ দিগ্বন্ধঃ । ইতি ॥
॥ ধ্যানম্ ॥
সৌবর্ণসিংহাসনসংস্থিতাং শিবাং ত্রিলোচনা চন্দ্রকলাবতংসিকাম্ ।
শূলং কপালং নিজবামহস্তয়োস্তদন্যয়োঃ খড্গমভীতিমুদ্রিকাম্ ॥
পাণ্যোর্দধানাং মণিভূষণাজ্জ্বলাং সুবাসসং মাল্যবিলেপনাঞ্চিতাম্ ।
প্রসন্নাবক্ত্রাং পরদেবতা মুদা ধ্যায়ামি ভক্ত্যা বনশঙ্করীং হৃদি ॥
লমিত্যাদিপঞ্চপূজা –
ওঁ সৌঃ ক্লীং হ্রীং ওঁ ।
ওঁ শাকম্ভর্যৈ নমঃ ।
হ্রীং শাকম্ভর্যৈ নমঃ ।
ওঁ হ্রীং শাকম্ভর্যৈ নমঃ ।
সৌঃ ক্লীং হ্রীং শাকম্ভর্যৈ নমঃ ।
ওঁ সৌঃ ক্লীং হ্রীং শাকম্ভর্যৈ নমঃ ।
ওঁ সৌঃ ক্লীং হ্রীং শাকম্ভর্যৈ নমঃ ওঁ ।
ইত্যেষু গুরূপদিষ্টং মন্ত্রং জপেত্ ।
॥ অথ সহস্রনামস্তোত্রম্ ॥
ওঁ শাকম্ভরী শতাক্ষী চ চামুণ্ডা রক্তদন্তিকা ।
মহাকালী মহাশক্তির্মধুকৈটভনাশিনী ॥ ১ ॥
ব্রহ্মাদিতেজঃ সম্ভূতা মহালক্ষ্মীর্বরাননা ।
অষ্টাদশভুজা সম্রাণ্মহিষাসুরমর্দিনী ॥ ২ ॥
মহামায়া মহাদেবী সৃষ্টিস্থিত্যন্তকারিণী ।
কান্তিঃ কামপ্রদা কাম্যা কল্যাণী করুণানিধিঃ ॥
সিংহস্থিতা নারসিংহী বৈষ্ণবী বিষ্ণুবল্লভা ।
ভ্রামরী রক্তচামুণ্ডা রক্তাক্ষী রক্তপায়িনী ॥ ৪ ॥
রক্তপ্রিয়া সুরক্তোষ্ঠী রক্তবীজবিনাশিনী ।
সুরক্তবসনা রক্তমাল্যা রক্তবিভূষণা ॥ ৫ ॥
রক্তপাণিতলা রক্তনখী রক্তোত্পলাঙ্ঘ্রিকা ।
রক্তচন্দনলিপ্তাঙ্গী রমণী রতিদায়িনী ॥ ৬ ॥
সুরভিঃ সুন্দরী বালা বগলা ভৈরবী সমিত্ ।
চন্দ্রলাম্বা সুমঙ্গল্যা ভীমা ভয়নিবারিণী ॥ ৭ ॥
জাগৃতিঃ স্বপ্নরূপা চ সুষুপ্তিসুখরূপিণী ।
তুর্যোংন্মনী ত্রিমাত্রা চ ত্রয়ী ত্রেতা ত্রিমূর্তিকা ॥ ৮ ॥
বিষ্ণুমায়া বিষ্ণুশক্তির্বিষ্ণুজিহ্বা বিনোদিনী ।
ছায়া শান্তিঃ ক্ষমা ক্ষুত্তৃট্তুষ্টিঃ পুষ্টির্ধৃতির্ভৃতিঃ ॥ ৯ ॥
মতির্মিতির্নতির্নীতিঃ সংয়তির্নিয়তি কৃতিঃ ।
স্ফূর্তিঃ কীর্তিঃ স্তুতির্জূতিঃ পূর্তির্মূর্তির্নিজপ্রদা ॥ ১০ ॥
ত্রিশূলধারিণী তীক্ষ্ণগদিনী খড্গধারিণী ।
পাশিনী ত্রাসিনী বামা বামদেবী বরাননা ॥ ১১ ॥
বামাক্ষী বারুণীমত্তা বামোরুর্বাসবস্তুতা ।
ব্রহ্মবিদ্যা মহাবিদ্যা য়োগিনী য়োগপূজিতা ॥ ১২ ॥
ত্রিকূটনিলয়া নিত্যা কল্পাতীতা চ কল্পনা ।
কামেশ্বরী কামদাত্রী কামান্তককুটুম্বিনী ॥ ১৩ ॥
কালরাত্রির্মহারাত্রির্মোহরাত্রিশ্চ দারুণা ।
নানাদ্রুমলতাকীর্ণগিরিমধ্যনিবাসিনী ॥ ১৪ ॥
শাকপোষিতসর্বর্ষিঃ পাকশাসনপূজিতা ।
ক্লেদিনী ভেদিনী ভ্রান্তির্ভীতিদা ভ্রান্তিনাশিনী ॥ ১৫ ॥
ক্রান্তিঃ সঙ্ক্রান্তিরুত্ক্রান্তির্বিক্রান্তিঃ ক্রান্তিবর্জিতা ।
ডিণ্ডিমধ্বনিসংহৃষ্টা ভেরীনাদবিনোদিনী ॥ ১৬ ॥
সুতন্ত্রীবাদনরতা স্বরভেদবিচক্ষণা ।
গান্ধর্বশাস্ত্রনিপূণা নাট্যশাস্ত্রবিশারদা ॥ ১৭ ॥
হাবভাবপ্রমাণজ্ঞা চতুঃষষ্টিকলান্বিতা ।
পদবাক্যপ্রমাণাব্ধিপারীণা বাদিভঙ্গিনী ॥ ১৮ ॥
সর্বতন্ত্রস্বতন্ত্রা চ মন্ত্রশাস্ত্রাব্ধিপারগা ।
নানায়ন্ত্র বিধানজ্ঞা সৌগতাগমকোবিদা ॥ ১৯ ॥
বৈখানসাদ্যাগমজ্ঞা শৈবাগম বিচক্ষণা ।
বামদক্ষিণমার্গজ্ঞা ভৈরবাগমভেদবিত্ ॥ ২০ ॥
পঞ্চায়তনতত্ত্বজ্ঞা পঞ্চাম্নায়প্রপঞ্চবিত্ ।
রাজরাজেশ্বরী ভট্টারিকা ত্রিপুরসুন্দরী ॥ ২১ ॥
মহাদক্ষিণকালী চ মাতঙ্গী মদ্যমাংসভুক্ ।
লুলায়বলিসন্তুষ্টা মেষচ্ছাগবলিপ্রিয়া ॥ ২২ ॥
দীপিকাক্রীডনরতা ডমড্ডমরুনাদিনী ।
মহাপ্রদীপিকাদেহলেহনাদ্ভুতশক্তিদা ॥ ২৩ ॥
নিজাবেশবদুন্মত্তভক্তোক্ত ফলদায়িনী ।
উদোউদোমহাধ্বান শ্রবণাসক্তমানসা ॥ ২৪ ॥
চৌডেশ্বরী চৌডবাদ্যপ্রবাদনপরায়ণা ।
কপর্দমালাভরণা কপর্দিপ্রাণবল্লভা ॥ ২৫ ॥
নগ্রস্ত্রীবীক্ষণরতা নগ্নিকোদ্ভিন্নয়ৌবনা ।
বালা বদরবক্ষোজা মধ্যা বিল্বফলস্তনী ॥ ২৬ ॥
নারিকেলস্তনী প্রৌঢা প্রগল্ভা চ ঘটস্তনী ।
কাত্যায়নী নম্রকুচা প্রৌঢাদ্ভুতপরাক্রমা ।
কদলীবনমধ্যস্থা কদম্ববনবাসিনী ॥ ২৭ ॥
নিজোপকণ্ঠসম্প্রাপ্তনদীমাহাত্ম্যবর্ধিনী ।
কাবেরী তাম্রপর্ণী চ কামাক্ষী কামিতার্থদা ॥ ২৮ ॥
মূকাম্বিকা মহাশক্তিঃ শ্রীশৈলভ্রমরাম্বিকা ।
জোগলাম্বা জগন্মাতা মাতাপুরনিবাসিনী ॥ ২৯ ॥
জমদগ্নিপ্রিয়া সাধ্বী তাপসীবেষধারিণী ।
কার্তবীর্যমুখানেকক্ষত্রবিধ্বংসকারিণী ॥ ৩০ ॥
নানাবতারসম্পন্না নানাবিধচরিত্রকৃত্ ।
করবীরমহালক্ষ্মীঃ কোল্হাসুরবিনাশিনী ॥ ৩১ ॥
নাগলিঙ্গভগাঙ্কাঢ্যমৌলিঃ শক্রাদিসংস্তুতা ।
দুর্গমাসুরসংহর্ত্রী দুর্গাঽনর্গলশাসনা ॥ ৩২ ॥
নানাবিধভয়ত্রাত্রী সুত্রামাদিসুধাশনা ।
নাগপর্যংকশয়না নাগী নাগাঙ্গনার্চিতা ॥ ৩৩ ॥
হাটকালঙ্কৃতিমতী হাটকেশসভাজিতা ।
বাগ্দেবতাস্ফূর্তিদাত্রী ত্রাতবাগ্বীজজাপকা ॥ ৩৪ ॥
জপ্যা জপবিধিজ্ঞা চ জপসিদ্ধিপ্রদায়িনী ।
মন্ত্রশক্তির্মন্ত্রবিদ্যা সুমন্ত্রা মান্ত্রিকম্প্রিয়া ॥ ৩৫ ॥
ইন্দুমণ্ডলপীঠস্থা সূর্যমণ্ডলপীঠগা ।
চন্দ্রশক্তিঃ সূর্যশক্তির্গ্রহশক্তির্গ্রহার্তিহা ॥ ৩৬ ॥
গ্রহপীডাহরী সৌম্যা শুভগ্রহফলপ্রদা ।
জ্যোতির্মণ্ডলসংস্থানা গ্রহতারাধিদেবতা ॥ ৩৭ ॥
সপ্তবিংশতিয়োগেশী ববাদিকরণেশ্বরী ।
প্রভবাদ্যব্দশক্তিশ্চ কালচক্রপ্রবর্তিনী ॥ ৩৮ ॥
সোহংমন্ত্রজপাধারা ঊর্ধ্বষট্চক্রদেবতা ।
ইডাখ্যা পিঙ্গলাখ্যা চ সুষুম্না ব্রহ্মরন্ধ্রগা ॥ ৩৯ ॥
শিবশক্তিঃ কুণ্ডলিনী নাভিমণ্ডলনিদ্রিতা ।
য়োগোদ্বুদ্ধা মুক্তিদাত্রী সহস্রারাব্জপীঠগা ॥ ৪০ ॥
পীয়ূষবর্ষিণী জীবশিবভেদতিনাশিনী ।
নাভৌ পরা চ পশ্যন্তী হৃদয়ে মধ্যমা গলে ॥ ৪১ ॥
জিহ্বাগ্রে বৈখরীবাণী পঞ্চাশন্মাতৃকাত্মিকা ।
ওঙ্কাররূপিণী শব্দসূষ্টিরূপাঽর্থরূপিণী ॥ ৪২ ॥
মৌনশক্তির্মুনিধ্যেয়া মুনিমানসসংস্থিতা ।
ব্যষ্টিঃ সমষ্টিস্ত্রিপুটী তাপত্রয়বিনাশিনী ॥ ৪৩ ॥
গায়ত্রী ব্যাহৃতিঃ সন্ধ্যা সাবিত্রী চ পিতৃপ্রসূঃ ।
নন্দা ভদ্রা জয়া রিক্তা পূর্ণা বিষ্টিশ্চ বৈধৃতিঃ ॥ ৪৪ ॥
শ্রুতিঃ স্মৃতিশ্চ মীমাংসা বিদ্যাঽবিদ্যা পরাবরা ।
সুমেরুশৃঙ্গনিলয়া লোকালোকনিবাসিনী ॥ ৪৫ ॥
মানসোত্তরগোত্রস্থা পুষ্করদ্বীপদেবতা ।
মন্দরাদ্রিকৃতক্রীডা নীপোপবনবাসিনী ॥ ৪৬ ॥
মণিদ্বীপকৃতাবাসা পীতবাসঃ সুপূজিতা ।
প্লক্ষাদিদ্বীপগোত্রস্থা তত্রত্যজনপূজিতা ॥ ৪৭ ॥
সুরাব্ধি দ্বীপনিলয়া সুরাপানপরায়ণ ।
একপাদেকহস্তৈকদৃগেকশ্রুতিপার্শ্বিকা ॥ ৪৮ ॥
অর্ধনারীশ্বরার্ধাঙ্গী স্যূতালোকোত্তরাকৃতিঃ ।
ভক্তৈকভক্তি সংসাধ্যা ধ্যানাধারা পরার্হণা ॥ ৪৯ ॥
পঞ্চকোশান্তরগতা পঞ্চকোশবিবর্জিতা ।
পঞ্চভূতাতরালস্থা প্রপঞ্চাতীতবৈভবা ॥ ৫০ ॥
পঞ্চীকৃতমহাভূতনির্মিতানেকভৌতিকা ।
সর্বাংতর্যামিণী শম্ভুকামিনী সিংহগামিনী ॥ ৫১ ॥
য়ামিনীকৃতসঞ্চারা শাকিন্যাদিগণেশ্বরী ।
খট্বাঙ্গিনী খেটকিনী কুন্তিনী ভিন্দিপালিনী ॥ ৫২ ॥
বর্মিণী চর্মিণী চণ্ডী চণ্ডমুণ্ডপ্রমাথিনী ।
অনীকিনী চ ধ্বজিনী মোহিন্যেজত্পতাকিনী ॥ ৫৩ ॥
অশ্বিনী গজিনী চাট্টহাসিনী দৈত্যনাশিনী ।
শুম্ভঘ্নী চ নিশুম্ভঘ্নী ধূম্রলোচননাশিনী ॥ ৫৪ ॥
বহুশীর্ষা বহুকুক্ষির্ব্যাদিতাস্যাঽশিতাসুরা ।
দংষ্ট্রাসঙ্কটসংলগ্নদৈত্যসাস্রান্ত্র মালিনী ॥ ৫৫ ॥
দৈত্যাসৃঙ্মাংসসন্তৃপ্তা ক্রব্যাদকৃতবন্দনা ।
লম্বকেশী প্রলম্বোষ্ঠী লম্বকুক্ষির্মহাকটী ॥ ৫৬ ॥
লম্বস্তনী লম্বজিহ্বা লম্বপাণ্যঙ্ঘ্রিজঙ্ঘিকা ।
লম্বোরুর্লম্বজঘনা কালিকা কর্কশাত্কৃতিঃ ॥ ৫৭ ॥
ভিন্নভেরীখররবা বারণগ্রাসকারিণী ।
প্রেতদেহপরীধানা রুণ্ডকুণ্ডলমণ্ডিতা ॥ ৫৮ ॥
গণ্ডশৈলস্পর্ধিগণ্ডা শৈলকন্দুকধারিণী ।
শিবদূতী ঘোররূপা শিবাশতনিনাদিনী ॥ ৫৯ ॥
নারায়ণী জগদ্ধাত্রী জগত্পাত্রী জগন্ময়ী ।
অল্লাংম্বাক্কা কামদুঘাঽনল্পদা কল্পবল্লিকা ॥ ৬০ ॥
মল্লীমতল্লিকা গুঞ্জালঙ্কৃতিঃ শিবমোহিনী ।
গান্ধর্বগানরসিকা কেকাবাক্কীরপালিনী ॥ ৬১ ॥
সিনীবালী কুহূ রাকাঽনুমতিঃ কৌমুদী ককুপ্ ।
ব্রহ্মাণ্ডমণ্ডপস্থূণা ব্রহ্মাণ্ডগৃহদেবতা ॥ ৬২ ॥
মহাগৃহস্থমহিষী পশুপাশবিমোচিনী ।
বীরস্থানগতা বীরা বীরাসনপরিগ্রহা ॥ ৬৩ ॥
দীপস্থানগতা দীপ্তা দীপোত্সবকুতূহলা ।
তীর্থপাত্রপ্রদা তীর্থকুম্ভপূজনসংভ্রমা ॥ ৬৪ ॥
মাহেশ্বরজনপ্রীতা পশুলোকপরাঙ্মুখী ।
চতুঃষষ্টিমহাতন্ত্রপ্রতিপাদ্যাগমাধ্বগা ॥ ৬৫ ॥
শুদ্ধাচারা শুদ্ধপূজ্যা শুদ্ধপূজা জনাশ্রিতা ।
অষ্টাদশমহাপীঠা শ্রীচক্রপরদেবতা ॥ ৬৬ ॥
য়োগিনীপূজনপ্রীতা য়োগিনীচক্রবন্দিতা ।
রণত্কাঞ্চীক্ষুদ্রঘণ্টা ঘণ্টাধ্বনিবিনোদিনী ॥ ৬৭ ॥
তৌর্যত্রিককলাভিজ্ঞা মনোজ্ঞা মঞ্জুভাষিণী ।
শিববামাঙ্কলসিতা সুস্মিতা ললিতালসা ॥ ৬৮ ॥
লাবণ্যভূমিস্তল্লেশনির্মিতামরসুন্দরী ।
শ্রীর্ধীর্ভীর্হ্রীর্নতির্জাতিরীজ্যাজ্যা পূজ্যপাদুকা ॥ ৬৯ ॥
সুরস্রবন্তী য়মুনা তথা গুপ্তসরস্বতী ।
গোমতী গণ্ডকী তাপী শতদ্রুশ্চ বিপাশিকা ॥ ৭০ ॥
সরয়ূর্নর্মদা গোদা পয়োষ্ণী চ পুনঃ পুনা ।
ভীমা কৃষ্ণা তুঙ্গভদ্রা নানাতীর্থস্বরূপিণী ॥ ৭১ ॥
দ্বারকা মধুরা মায়া কাশ্যয়োধ্যা ত্ববন্তিকা ।
গয়া কাঞ্চী বিশালা চ মুক্তিক্ষেত্রস্বরূপিণী ॥ ৭২ ॥
মন্ত্রদীক্ষা য়াগদীক্ষা য়োগদীক্ষাঽক্ষতব্রতা ।
অক্ষমালাবিভেদজ্ঞাঽঽসনভেদবিচক্ষণা ॥ ৭৩ ॥
মাতৃকান্যাসকুশলা মন্ত্রন্যাসবিশারদা ।
নানামুদ্রাপ্রভেদজ্ঞা পঞ্চোপাস্তিপ্রভেদবিত্ ॥ ৭৪ ॥
সর্বমন্ত্রোপদেষ্ট্রী চ ব্যাখ্যাত্রী দেশিকোত্তরা ।
বাগ্বাদিনী দুর্বিবাদিপ্রৌঢবাক্স্তম্ভকারিণী ॥ ৭৫ ॥
স্বতন্ত্রয়ন্ত্রণাশক্তিস্তদ্যন্ত্রিতজগত্ত্রয়ী ।
ব্রহ্মাদ্যাকর্ষিণী শম্ভুমোহিন্যুচ্চাটিনী দ্বিষাম্ ॥ ৭৬ ॥
সুরাসুরাণাং প্রদ্বেষকারিণী দৈত্যমারিণী ।
পূরিণী ভক্তকামানাং শ্রিতপ্রত্যূহবারিণী ॥ ৭৭ ॥
সাধারণী ধারিণী চ প্রৌঢবাগ্ধারিণী প্রধূঃ ।
প্রভূর্বিভূঃ স্বয়ম্ভূশ্চ নিগ্রহানুগ্রহক্ষমা ॥ ৭৮ ॥
ক্ষমাঽক্ষমা ক্ষমাধারা ধারাধরনিভদ্যুতিঃ ।
কাদম্বিনী কালশক্তিঃ কর্ষিণী বর্ষিণীর্ষিণী ॥ ৭৯ ॥
অদেবমাতৃকা দেবমাতৃকা চোর্বরা কৃষিঃ ।
কৃষ্টপচ্যাঽকৃষ্টপচ্যাঽনূষরাঽধিত্যকা গুহা ॥ ৮০ ॥
উপত্যকা দরী বন্যাঽরণ্যানী শৈলনিম্নগা ।
কেদারভূমির্ব্রীহিলা কমলর্ধির্মহাফলা ॥ ৮১ ॥
ইক্ষুমত্যূর্জিতা জম্বূপনসাম্রাদিশালিনী ।
অষ্টাপদখনী রৌপ্যখনী রত্নখনিঃ খনিঃ ॥ ৮২ ॥
রুচাং ভাবখনির্জীবখনিঃ সৌভাগ্যসত্খনিঃ ।
লাবণ্যস্য খনির্ধৈর্যখনিঃ শৌর্যখনিঃ খনিঃ ॥ ৮৩ ॥
গাম্ভীর্যস্য বিলাসস্য খনিঃ সাহিত্যসত্খনিঃ ।
পক্ষমাসর্তুবর্ষাণাং খনিঃ খনিরনেহসাম্ ॥ ৮৪ ॥
খনিশ্চ য়ুগকল্পানাং সূর্যচন্দ্রমসোঃ খনিঃ ।
খনির্মনূনামিন্দ্রাণাং খনিঃ কৌতুকসত্খনিঃ ॥ ৮৫ ॥
মষী লেখনিকা পাত্রী বর্ণপঙ্ক্তির্লিপিঃ কথা ।
কবিতা কাব্যকর্ত্রী চ দেশভাষা জনশ্রুতিঃ ॥ ৮৬ ॥
রচনা কল্পনাঽঽচারভটী ধাটী পটীয়সী ।
অপসব্যলিপির্দেবলিপী রক্ষোলিপির্লিপিঃ ॥ ৮৭ ॥
তুলজা রামবরদা শবরী বর্বরালকা ।
জ্যোতির্লিঙ্গময়ী লিঙ্গমস্তকা লিঙ্গধারিণী ॥ ৮৮ ॥
রুদ্রাক্ষধারিণী ভূতিধারিণী লৈঙ্গিকব্রতা ।
বিষ্ণুব্রতপরা বিষ্ণুমুদ্রিকা প্রিয়বৈষ্ণবী ॥ ৮৯ ॥
জৈনী দৈগম্বরী নানাবিধবৈদিক মার্গগা ।
পঞ্চদ্রবিডসংসেব্যা পঞ্চগৌডসমর্চিতা ॥ ৯০ ॥
হিঙ্গুলা শারদা জ্বালামুখী গঞ্জাধিদেবতা ।
মন্দুরাদেবতাঽঽলানদেবতা গোষ্ঠদেবতা ॥ ৯১ ॥
গৃহাদিদেবতাসৌধদেবতোদ্যানদেবতা ।
শৃঙ্গারদেবতা গ্রামদেবতা চৈত্যদেবতা ॥ ৯২ ॥
পূর্দেবতা রাজসভাদেবতাঽশোকদেবতা ।
চতুর্দশানাং লোকানাং দেবতা পরদেবতা ॥ ৯৩ ॥
বাপীকূপতডাগাদিদেবতা বনদেবতা ।
সৃষ্টিখেলা ক্ষেমখেলা প্রতিসংহারখেলনা ॥ ৯৪ ॥
পুষ্পপর্যঙ্কশয়না পুষ্পবত্কুণ্ডলদ্বয়ী ।
তাম্বূলচর্বণপ্রীতা গৌরী প্রথমপুষ্পিণী ॥ ৯৫ ॥
কল্যাণীয়ুগসম্পন্না কামসঞ্জীবনী কলা ।
কলাকলাপকুশলা কলাতীতা কলাত্মিকা ॥ ৯৬ ॥
মহাজাঙ্গলকী কালভুজঙ্গবিষনাশিনী ।
চিকিত্সা বৈদ্যবিদ্যা চ নানাময়নিদানবিত্ ॥ ৯৭ ॥
পিত্তপ্রকোপশমনী বাতঘ্নী কফনাশিনী ।
আমজ্বরপ্রকোপঘ্নী নবজ্বরনিবারিণী ॥ ৯৮ ॥
অর্শোঘ্নী শূলশমনী গুল্মব্যাধিনিবারিণী ।
গ্রহণীনিগ্রহকরী রাজয়ক্ষ্মবিনাশিনী ॥ ৯৯ ॥
মেহঘ্নী পাণ্ডুরোগঘ্নী ক্ষয়াপস্মারনাশিনী ।
উপদংশহরী শ্বাসকাসচ্ছর্দিনিবারিণী ॥ ১০০ ॥
প্লীহপ্রকোপসংহর্ত্রী পামাকণ্ডূবিনাশিনী ।
দদ্রুকুষ্ঠাদিরোগঘ্নী নানারোগবিনাশিনী ॥ ১০১ ॥
য়ক্ষরাক্ষসবেতালকূষ্মাডগ্রহভেদিনী ।
বালগ্রহঘ্নী চণ্ডালগ্রহচণ্ডগ্রহার্দিনী ॥ ১০২ ॥
ভূতপ্রেতপিশাচঘ্নী নানাগ্রহবিমর্দিনী ।
শাকিনীডাকিনীলামদস্ত্রীগ্রহনিষূদিনী ॥ ১০৩ ॥
অভিচারকদুর্বাধোন্মথিন্যুন্মাদনাশিনী ।
নানাবিষার্তিসংহর্ত্রী দুষ্টদৃষ্ট্যার্তিনাশিনী ॥ ১০৪ ॥
দুষ্টস্থানস্থিতার্কাদিগ্রহপীডাবিনাশিনী ।
য়োগক্ষেমকরী পুষ্টিকরী তুষ্টিকরীষ্টদা ॥ ১০৫ ॥
ধনদা ধান্যদা গোদা বাসোদা বহুমানদা ।
কামিতার্থপ্রদা শন্দা চতুর্বিধতুমর্থদা ॥ ১০৬ ॥
ব্রহ্মমান্যা বিষ্ণুমান্যা শিবমান্যেন্দ্রমানিতা ।
দেবর্ষিমান্যা ব্রহ্মর্ষিমান্যা রাজর্ষিমানিতা ॥ ১০৭ ॥
জগন্মান্যা জগদ্ধাত্রী ত্র্যম্বকা ত্র্যম্বকাঙ্গনা ।
গুহেভবক্ত্রজননী ভদ্রকাল্যময়ঙ্করী ॥ ১০৮ ॥
সতী দাক্ষায়ণী দক্ষা দক্ষাধ্বরনিষূদিনী ।
উমা হিমাদ্রিজাঽপর্ণা কর্ণপূরাঞ্চিতাননা ॥ ১০৯ ॥
ক্ষোণীধরনিতম্বাম্বা বিম্বাভরদনচ্ছদা ।
কুন্দকোরকনীকাশরদপঙ্ক্তিঃ সুনাসিকা ॥ ১১০ ॥
নাসিকামৌক্তিকমণিপ্রভামলরদচ্ছদা ।
সুমন্দহসিতালোকবিমুহ্যচ্ছম্ভু মানসা ॥ ১১১ ॥
মানসৌকোগতিঃ সিঞ্জন্মঞ্জীরাদিবিভূষণা ।
কাঞ্চীক্কণত্ক্ষুদ্রঘণ্টা কলধৌতঘটস্তনী ॥ ১১২ ॥
মুক্তাবিদ্রুমহারশ্রীরাজন্কুচতটস্থলী ।
তাটঙ্কয়ুগসত্কান্তিবিলসদ্গণ্ডদর্পণা ॥ ১১৩ ॥
ধম্মিল্লপ্রোত সৌবর্ণকেতকীদলমণ্ডিতা ।
শিবার্পিতস্বলাবণ্যতারুণ্যকিলিকিঞ্চিতা ॥ ১১৪ ॥
সগ্রৈবেয়কচিন্তাকবিভ্রাজত্কম্বুকন্ধরা ।
সখীস্কন্ধাসক্তবাহুলতাসুললিতাঙ্গিকা ॥ ১১৫ ॥
নিতম্বকুচভারার্তকৃশমধ্যসুমধ্যমা ।
নাভীসরোবরোদ্ভূতরোমাবলিবিরাজিতা ॥ ১১৬ ॥
ত্রিবলীরাজললিতগৌরবর্ণতলোদরী ।
চামরগ্রাহিণীবীজ্যমানেন্দুদ্যুতিচামরা ॥ ১১৭ ॥
মহাকুরবকাশোকপুষ্পবচয়লালসা ।
স্বতপঃসুফলীভূতবরোত্তমমহেশ্বরী ॥ ১১৮ ॥
হিমাচলতপঃপুণ্যফলভূতসুতাকৃতিঃ ।
ত্রৈলোক্যরমণীরত্না শিবচিচ্চন্দ্রচন্দ্রিকা ॥ ১১৯ ॥
কীর্তিজ্যোত্স্নাধবলিতানেকব্রহ্মাণ্ডগোলিকা ।
শিবজীবাতুগুলিকালসদঙ্গুলিমুদ্রিকা ॥ ১২০ ॥
প্রীতিলালিতসত্পুত্রগজাননষডাননা ।
গঙ্গাসাপত্ন্যজনিতের্যায়তেক্ষণশোণিমা ॥ ১২১ ॥
শিববামাঙ্কপর্যংঙ্ককৃতাসনপরিগ্রহা ।
শিবদৃষ্টিচকোরীষ্টমুখপূর্ণেন্দুমণ্ডলা ॥ ১২২ ॥
উরোজশৈলয়ুগলভ্রমচ্ছিবমনোমৃগা ।
ব্রহ্মবিষ্ণুমুখাশেষবৃন্দারকনভস্কৃতা ॥ ১২৩ ॥
অপাঙ্গাঙ্গণসন্তিষ্ঠন্নিগ্রহানুগ্রহদ্বয়ী ।
সনত্কুমারদুর্বাসঃ প্রমুখোপাসকার্থিতা ॥ ১২৪ ॥
হাদিকূটত্রয়োপাস্যা কাদিকূটত্রয়ার্চিতা ।
মৃদ্বীকমধুপানাদ্যুদ্বোধধূর্ণিতলোচনা ॥ ১২৫ ॥
অব্যক্তভাষণা চেটীদত্তবীটীগ্রহালসা ।
গায়ন্তী বিলসন্তী চ লিখন্তী প্রিয়লেখনা ॥ ১২৬ ॥
উল্লসন্তী লসন্তী চ দোলান্দোলনতুষ্টিভাক্ ।
বিপঞ্চীবাদনরতা সপ্তস্বরবিভেদবিত্ ॥ ১২৭ ॥
গন্ধর্বীকিন্নরীবিদ্যাধরীয়ক্ষসুরীনুতা ।
অমরীকবরীভৃঙ্গীস্থগিতাঙ্ঘ্রিসরোরুহা ॥ ১২৮ ॥
গন্ধর্বগানশ্রবণানন্দান্দোলিতমস্তকা ।
তিলোত্তমোর্বশীরম্ভানৃত্যদর্শনজাতমুত্ ॥ ১২৯ ॥
অচিন্ত্যমহিমাঽচিন্ত্যগরিমাঽচিন্ত্যলাধবা ।
অচিন্ত্যবিভবাঽচিন্ত্যবিক্রমাঽচিন্ত্যসদ্গুণা ॥ ১৩০ ॥
স্তুতিঃ স্তব্যা নতির্নম্যা গতির্গম্যা মহাসতী ।
অনসূয়াঽরুন্ধতী চ লোপামুদ্রাঽদিতির্দিতিঃ ॥ ১৩১ ॥
সপ্তসংস্থাস্বরূপা চারণিঃ স্রুগ্বেদিকা ধ্রুবা ।
ইডা প্রণীতা পাত্রী চ স্বধাস্বাহাঽঽহুতির্বপা ॥ ১৩২ ॥
কব্যরূপা হব্যরূপা য়জ্ঞপাত্রস্বরূপিণী ।
শঙ্করাহোপুরুষিকা গায়ত্রীগর্ভবল্লভা ॥ ১৩৩ ॥
চতুর্বিংশত্যক্ষরাত্মপরোরজসিসাবদোম্ ।
বেদপ্রসূর্বেদগর্ভা বিশ্বামিত্রর্ষিপূজিতা ॥ ১৩৪ ॥
ঋগ্যজুঃ সামত্রিপদা মহাসবিতৃদেবতা ।
দ্বিজত্বসিদ্ধিদাত্রী চ সাঙ্খ্যায়নসগোত্রিকা ॥ ১৩৫ ॥
গাতৃদুর্গতিসংহর্ত্রী চ গাতৃস্বর্গাপবর্গদা ।
ভৃগুবল্লী ব্রহ্মবল্লী কঠবল্লী পরাত্পরা ॥ ১৩৬ ॥
কৈবল্পোপনিষদ্ব্রহ্মোপনিষন্মুণ্ডকোপনিষত্ ।
ছান্দোগ্যোপনিষচ্চৈব সর্বোপনিষদাত্মিকা ॥ ১৩৭ ॥
তত্ত্বমাদিমহাবাক্যরূপাখণ্ডার্থবোধকৃত্ ।
উপক্রমাদিষড্লিঙ্গমহাতাত্পর্যবোধিনী ॥ ১৩৮ ॥
জহত্স্বার্থাজহত্স্বার্থভাগত্যাগাখ্যলক্ষণা ।
অসত্খ্যাতিশ্চ সত্খ্যাতির্মিথ্যাখ্যাতিঃ প্রভাঽপ্রভা ॥ ১৩৯ ॥
অস্তিভাতিপ্রিয়াত্মা চ নামরূপস্বরূপিণী ।
ষণ্মতস্থাপনাচার্যমহাদেবকুটুম্বিনী ॥ ১৪০ ॥
ভ্রান্তির্ভান্তিহরী ভ্রান্তিদায়িনী ভ্রান্তিকারিণী ।
বিকৃতির্নিকৃতিশ্চাপি কৃতিশ্চোপকৃতিস্তথা ॥ ১৪১ ॥
সকৃতিঃ সত্কৃতিঃ পাপকৃতিঃ সুকৃতিরুত্কৃতিঃ ।
আকৃতির্ব্যাকৃতিঃ প্রায়শ্চিত্তির্বিত্তিঃ স্থিতির্গতিঃ ॥ ১৪২ ॥
নবকুণ্ডী পঞ্চকুণ্ডী চতুষ্কুণ্ড্যেককুণ্ডিকা ।
দেবসেনাদৈত্যসেনারক্ষঃ সেনাদিভেদভাক্ ॥ ১৪৩ ॥
মহিষাস্যোদ্গতোদ্দণ্ডদৈত্যবেতণ্ডরুণ্ডহৃত্ ।
দৈত্যসেনাতৃণারণ্যজ্বালা জ্যোতিঃস্বরূপিণী ॥ ১৪৪ ॥
চণ্ডমুণ্ড মহাদৈত্যরুণ্ডডকন্দুকখেলকৃত্ ।
পশুদেহাসৃক্পললতৃপ্তা দক্ষিণকালিকা ॥ ১৪৫ ॥
তদঞ্চত্প্রেততদ্রুণ্ডমালা ব্যালবিভূষণা ।
হলদংষ্ট্রা শঙ্কুরদা পীতানেকসুরাঘটা ॥ ১৪৬ ॥
নেত্রভ্রমিপরাভূতরথচক্রদ্বয়ভ্রমিঃ ।
ব্যায়ামাগ্রাহ্যবক্ষোজন্যক্কৃতেভেন্দ্রকুম্ভিকা ॥ ১৪৭ ॥
মাতৃমণ্ডলমধ্যস্থা মাতৃমণ্ডলপূজিতা ।
ঘণ্টাঘণঘণধ্বানপ্রীতা প্রেতাসনস্থিতা ॥ ১৪৮ ॥
মহালসা চ মার্তণ্ডভৈরবপ্রাণবল্লভা ।
রাজবিদ্যা রাজসতী রাজস্ত্রী রাজসুন্দরী ॥ ১৪৯ ॥
গজরাজাদিরলকাপুরীস্থা য়ক্ষদেবতা ।
মত্স্যমূর্তিঃ কূর্মমূর্তিঃ স্বীকৃতক্রোডবিগ্রহা ॥ ১৫০ ॥
নৃসিংহমূর্তির্রত্যুগ্রা ধৃতবামনবিগ্রহা ।
শ্রীজামদগ্ন্যমূর্তিশ্চ শ্রীরামমূর্তির্হতাস্রপা ॥ ১৫১ ॥
কৃষ্ণমূর্তির্বুদ্ধমূর্তিঃ কল্কিমূর্তিরমূর্তিকা ।
বিরাণ্মূর্তির্জগন্মূর্তির্জগজ্জন্মাদিকারিণী ॥ ১৫২ ॥
আধারাধেয়সম্বন্ধহীনা তদুভয়াত্মিকা ।
নির্গুণা নিষ্ক্রিয়াঽসঙ্গা ধর্মাধর্মবিবর্জিতা ॥ ১৫৩ ॥
মায়াসম্বন্ধরহিতাসচ্চিদানন্দবিগ্রহা ।
জগত্তরঙ্গজলধিরূপা চীত্কৃতিভেদভাক্ ॥ ১৫৪ ॥
মহাতত্ত্বাত্মিকা বৈকারাহঙ্কারস্বরূপিণী ।
রজোহঙ্কাররূপা চ তমোহঙ্কাররূপিণী ॥ ১৫৫ ॥
আকাশরূপিণী বায়ুরূপিণ্যগ্নিস্বরূপিণী ।
অম্বাত্মিকা ভূস্বরূপা পঞ্চজ্ঞানেন্দ্রিয়াত্মিকা ॥ ১৫৬ ॥
কর্মেন্দ্রিয়াত্মিকা প্রাণাপানব্যানাদিরূপিণী ।
নাগকূর্মাদিরূপা চ সর্বনাডীবিহারিণী ॥ ১৫৭ ॥
আধারচক্রাধিষ্ঠাত্রী স্বাধিষ্ঠানপ্রতিষ্ঠিতা ।
মণিপূরকসংস্থানাঽনাহতাব্জাধিদেবতা ॥ ১৫৮ ॥
বিশুদ্ধচক্রপীঠস্থাঽঽজ্ঞাচক্রপরমেশ্বরী ।
দ্বিপত্রী ষোডশদলী তথা দ্বাদশপত্রিকা ॥ ১৫৯ ॥
প্রদলদ্দশপত্রী চ ষড্দলী চ চতুর্দলী ।
বাসান্তমাতৃকা বাদিলান্তবর্ণাধিদেবতা ॥ ১৬০ ॥
ডাদিফান্তাক্ষরবতী কাদিঠান্তাক্ষরেশ্বরী ।
ষোডশস্বরবীজেশী স্পর্শোষ্মান্তঃস্থদেবতা ॥ ১৬১ ॥
হক্ষাক্ষরদ্বয়ীরূপা পঞ্চাশন্মাতৃকেশ্বরী ।
সহস্রারাব্জপীঠস্থা শিবশক্তির্বিমুক্তিদা ॥ ১৬২ ॥
পঞ্চাম্নায়শিবপ্রোক্তা মন্ত্রবীজাধিদেবতা ।
সৌঃক্লীংহ্রীংবীজফলদা মহাপ্লক্ষসরস্বতী ॥ ১৬৩ ॥
নবার্ণবা সপ্তশতী মালামন্ত্রস্বরূপিণী ।
অর্গলেশী কীলকেশী কবচেশী ত্রিমূর্তিকা ॥ ১৬৪ ॥
সকারাদিহকারান্তমহমন্ত্রাধিদেবতা ।
সকৃত্সপ্তশতীপাঠপ্রীতা প্রোক্তফলপ্রদা ॥ ১৬৫ ॥
কুমারীপূজনোদ্যন্মুচ্চিরণ্টীপূজনোত্সুকা ।
বিপ্রপূজনসন্তুষ্টা নিত্যশ্রীর্নিত্যমঙ্গলা ॥ ১৬৬ ॥
জয়দাদিমচারিত্রা শ্রীদ মধ্যচরিত্রিকা ।
বিদ্যাদোত্তমচারিত্রা কামিতার্থপ্রদায়িকা ॥ ১৬৭ ॥
ইষ্টকৃষ্ণাষ্টমী চেষ্টনবমী ভূতপূর্ণিমা ।
ইষ্টশুক্রারদিবসা ধূতদীপদ্বয়োত্সুকা ॥ ১৬৮ ॥
নবরাত্রোত্সবাসক্তা পূজাহোমবলিপ্রিয়া ।
ইষ্টেক্ষুকূষ্মাণ্ডফলাহূতিরিষ্টফলাহুতিঃ ॥ ১৬৯ ॥
প্রতিমাসূত্কৃষ্টপুণ্যা চ মহায়ন্ত্রার্চনাবিধিঃ ।
কাত্যায়নী কামদোগ্ধ্রী খেচরী খড্গচর্মধৃক্ ॥ ১৭০ ॥
গজাস্যমাতা ঘটিকা চণ্ডিকা চক্রধারিণী ।
ছায়া ছবিময়ী ছন্না জরামৃত্যুবিবর্জিতা ॥ ১৭১ ॥
ঝল্লীঝঙ্কারমুদিতা ঝঞ্ঝাবাতঝণত্কৃতিঃ ।
টঙ্কহস্তা টণচ্চাপঠদ্বয়ী পল্লবোন্মনুঃ ॥ ১৭২ ॥
ডমরুধ্বানমুদিতা ডাকিনীশাকিনীশ্বরী ।
ঢুণ্ঢিরাজস্য জননী ঢকাবাদ্যবিলাসিনী ॥ ১৭৩ ॥
তরিকা তারিকা তারা তন্বঙ্গী তনুমধ্যমা ।
ধূপীকৃতাসুরা দীর্ঘবেণী দৃপ্তা সুরার্তিহৃত্ ॥ ১৭৪ ॥
ধূম্রবর্ণা ধূম্রকেশী ধূম্রাক্ষপ্রাণহারিণী ।
নগেশতনয়া নারী মতল্লী পট্টিহেতিকা ॥ ১৭৫ ॥
পাতাললোকাধিষ্ঠাত্রী ফেরূকৃতমহাসুরা ।
ফণীন্দ্রশয়না বোধদায়িনী বহুরূপিণী ॥ ১৭৬ ॥
ভামিনী ভাসিনী ভ্রান্তিকরী ভ্রান্তিবিনাশিনী ।
মাতঙ্গী মদিরামত্তা মাধবী মাধবপ্রিয়া ॥ ১৭৭ ॥
য়ায়জূকার্চিতা য়োগিধ্যেয়া য়োগীশবল্লভা ।
রাকাচন্দ্রমুখী রামা রেণুকা রেণুকাত্মজা ॥ ১৭৮ ॥
লোকাক্ষী লোহিতা লজ্জা বামাক্ষী বাস্তুশান্তিদা ।
শাতোদরী শাশ্বতিকা শাতকুম্ভবিভূষণা ॥ ১৭৯ ॥
ষডাস্যমাতা ষট্চক্রবাসিনী সর্বমঙ্গলা ।
স্মেরাননা সুপ্রসন্না হরবামাঙ্কসংস্থিতা ॥ ১৮০ ॥
হারিবন্দিতপাদাব্জা হ্রীংবীজভুবনেশ্বরী ।
ক্ষৌমাম্বরেন্দুগোক্ষীরধবলা বনশঙ্করী ॥ ১৮১ ॥
( ॥ ষডঙ্গন্যাসধ্যান মানসোপচার পূজনম্ ॥)
অথ ফলশ্রুতিঃ ।
ইতীদং বনশঙ্কর্যাঃ প্রোক্তং নামসহস্রকম্ ।
শান্তিদং পুষ্টিদং পুণ্যং মহাবিপত্তিনাশনম্ ॥ ১ ॥
দারিদ্র্যদুঃখশমনং নানারোগনিবারণম্ ।
ইদং স্তোত্রং পঠেদ্ভক্ত্যা য়স্ত্রিসন্ধ্যং নরঃ শুচিঃ ॥ ২ ॥
নারী বা নিয়তা ভক্ত্যা সর্বান্কামানবাপ্নুয়াত্ ।
অস্য স্তোত্রস্য সততং য়ত্র পাঠঃ প্রবর্ততে ॥ ৩ ॥
তস্মিন্নগৃহে মহালক্ষ্মীঃ স্বভর্ত্রা সহ মোদতে ।
নানেন সদৃশং স্তোত্রং ভুক্তিমুক্তিপ্রদায়কম্ ॥ ৪ ॥
বিদ্যতেঽন্যসত্যমেতত্ শক্র বচ্মি পুনঃ পুনঃ ।
বকবন্ধ্যা কাকবন্ধ্যা নারীস্তোত্রমিদং পঠেত্ ॥ ৫ ॥
বষেণৈকেন সা পুত্রং লভেন্নাত্রাস্তি সংশয়ঃ ।
সামান্যকার্যসিদ্ধিস্তু শতাবর্তনতো ভবেত্ ॥ ৬ ॥
মহাকার্যস্য সিদ্ধিস্তু সহস্রাবর্তনাদ্ধ্রুবম্ ।
ন তত্র পীডা জায়েত ভূতপ্রেতগ্রহোদ্ভবা ॥ ৭ ॥
লোকবশ্যং রাজবশ্যং স্তোত্রস্য পঠনাদ্ভবেত্ ।
শত্রবঃ সংক্ষয়ং য়ান্তি দস্যবঃ পিশুনাস্তথা ॥ ৮ ॥
নৈব শাকম্ভরীভক্তাঃ সীদন্তি বলসূদন ।
শাকম্ভরী স্বভক্তানামবিত্রী জননী য়থা ॥ ৯ ॥
য়দ্যত্কার্যং সমুদ্দিশ্য ধ্যায়ন্ শাকম্ভরীং হৃদি ।
স্তোত্রমেতত্পঠেত্তস্য তত্কার্যং চ প্রসিদ্ধ্যতি ॥ ১০ ॥
মুচ্যতে বন্ধনাদ্বদ্ধো রোগী মুচ্যেত রোগতঃ ।
ঋণবানৃণতো মুচ্যেন্নাত্র কার্যা বিচারণা ॥ ১১ ॥
পৌষে মাসি সিতে পক্ষে প্রারভ্য তিথিমষ্টমীম্ ।
দেব্যাঃ আরাধনং কুর্যাদন্বহং পূর্ণিমাবধি ॥ ১২ ॥
সশাকৈরুত্তমান্নৈশ্চ ব্রাহ্মণাংশ্চ সুবাসিনীঃ ।
সন্তর্পয়েদ্যথাশক্তি দেবীং সম্পূজ্য ভক্তিতঃ ॥ ১৩ ॥
বিত্তশাঠ্যং ন কুর্বীত শাকম্ভর্যাঃ সমর্চনে ।
তস্মৈ প্রসন্না ভক্তায় দদ্যাত্কামানভীপ্সিতান্ ॥ ১৪ ॥
বিদ্যার্থী প্রাপ্নুয়াদ্বিদ্যাং ধনার্থী চাপ্নুয়াদ্ধনম্ ।
দারার্থী প্রাপ্নুয়াদ্দারানপত্যার্থী তদাপ্নুয়াত্ ॥ ১৫ ॥
আপ্নুয়ান্মন্দবুদ্ধিস্তু গ্রন্থধারণপাটবম্ ।
অস্য স্তোত্রস্য পাঠেন প্রাপ্নুয়াদ্যদ্যদীপ্সিতম্ ॥ ১৬ ॥
অয়ুতাবর্তনাদস্য স্তোত্রস্য বলসূদন ।
পশ্যেচ্ছাকম্ভরীং সাক্ষাত্তদ্ভক্তো নাত্র সংশয়ঃ ॥ ১৭ ॥
হোমং চ কুর্যাদ্বিধিবত্পায়সেন সসর্পিষা ।
সৌভাগ্যদ্রব্যয়ুক্তেন সেক্ষুকূষ্মাণ্ডকেন চ ॥ ১৮ ॥
সুবাসিনীঃ কুমারীশ্চ ব্রাহ্মণাংশ্চ দিনে দিনে ।
সম্ভোজয়েত্সদন্নেন সসিতামধুসর্পিষা ॥ ১৯ ॥
দদ্যাত্তেভ্যশ্চ তাভ্যশ্চ বস্ত্রালঙ্কারদক্ষিণাঃ ।
তস্মৈ শাকম্ভরী দদ্যাত্পুরুষার্থচতুষ্টয়ম্ ॥ ২০ ॥
আচন্দ্রার্কং তস্য বশঃ স্থাস্যত্যত্র গুণী সুখী ।
শাকম্ভর্যৈ নম ইতি য়স্তু মন্ত্রং ষডক্ষরম্ ॥ ২১ ॥
ভক্ত্যা জপেন্নরস্তস্য সর্বত্র জয়মঙ্গলম্ ।
শাকম্ভর্যা ইদং শক্র দিব্যং নামসহস্রকম্ ॥ ২২ ॥
গুরুভক্তায় শান্তায় দেয়ং শ্রদ্ধালবে ত্বয়া ।
ত্বমপ্যাখণ্ডল সদা পঠেদং স্তোত্রমুত্তমম্ ॥ ২৩ ॥
শত্রূন্ জেষ্যসি সঙ্গ্রামে সর্বান্কামানবাপ্স্যসি ।
ইতি শ্রুত্বা স্কন্দবাক্যং শক্রঃ সন্তুষ্টমানসঃ ॥ ২৪ ॥
প্রণম্য গুহমাপৃষ্ট্বা সগণঃ স্বদিবং য়য়ৌ ॥ ২৫ ॥
সূত উবাচ –
দুর্ভিক্ষে ঋষিপোষিণ্যাঃ শাকম্ভর্যাঃ প্রকীর্তিতম্ ।
ইদং নামসহস্রং বঃ কিং ভূয়ঃ শ্রোতুমিচ্ছথ ॥ ২৬ ॥
॥ ইতি শ্রীস্কন্দপুরাণে শাকম্ভরী তথা বনশঙ্করী সহস্রনামস্তোত্রং সম্পূর্ণম্ ॥