॥ Umasahasram Sahasranama Stotram Bengali Lyrics ॥
॥ উমাসহস্রম্ ॥
%c01-q1/Nalini.Kalavacharla/uma\_sahasram1-25।txt medskip
প্রথমং শতকম্
প্রথমঃ স্তবকঃ
ব্যোমশরীরা, স্ত্রীরূপা চ (আর্যাবৃত্তম্)
অখিলজগন্মাতোমা তমসা তাপেন চাকুলানস্মান্ ।
অনুগৃহ্ণাত্বনুকম্পাসুধার্দ্রয়া হসিতচন্দ্রিকয়া ॥ ১.১ ॥
নিখিলেষু প্রবহন্তীং নিরুপাধিবিমর্শয়োগদৃশ্যোর্মিম্ ।
অজরামজামমেয়াং কামপি বন্দে মহাশক্তিম্ ॥ ১.২ ॥
সা তত্ত্বতঃ সমন্তাত্সত্যস্য বিভোস্ততা তপশ্শক্তিঃ ।
লীলামহিলাবপুষা হৈমবতী তনুষু কুণ্ডলিনী ॥ ১.৩ ॥
পরমঃ পুরুষো নাভির্লোকানাং সত্য উচ্যতে লোকঃ ।
পরিতস্ততঃ সরন্তী সূক্ষ্মা শক্তিস্তপো লোকঃ ॥ ১.৪ ॥
অন্তর্গূঢার্থানাং পুরুষাগ্নের্ধূমকল্প উদ্গারঃ ।
শক্তিজ্বালাঃ পরিতঃ প্রান্তেষ্বভবজ্জনো লোকঃ ॥ ১.৫ ॥
অতিসূক্ষ্মধূমকল্পং লোকং ততমাখ़্যয়াঽন্যয়া নাকম্ ।
এতং ততোঽপি সূক্ষ্মা ব্যাপ্তাঽন্তরতঃ পরা শক্তিঃ ॥ ১.৬ ॥
ধূমান্তরোষ্মকল্পা শুদ্ধজ্বালোপমা চ য়া শক্তিঃ ।
তাং দিবমাহুঃ কেচন পরমং ব্যোমাপরে প্রাহুঃ ॥ ১.৭ ॥
উদ্গীর্ণধূমকল্পো য়োঽয়মপারো মহাঞ্জনো লোকঃ ।
ব্যোমান্তরিক্ষগগনপ্রভৃতিভিরভিধাভিরাহুস্তম্ ॥ ১.৮ ॥
প্রান্তেষু কোঽপি শক্তেঃ পৃথগাত্মা বিয়দুপাধিসঙ্গেন ।
পরমাত্মনো বিভক্তঃ স্বয়মভিমন্তা বিনিষ্পেদে ॥ ১.৯ ॥
দক্ষঃ পরোক্ষমুদিতঃ পন্থা এষ ত্বিষাং জনো লোকঃ ।
তদ্গর্ভে লব্ধাত্মা কথিতা দাক্ষায়ণী শক্তিঃ ॥ ১.১০ ॥
সত্যাঃ প্রাগপি শক্তেঃ প্রাদুর্ভাবঃ স কীর্ত্যতে প্রথমঃ ।
ঈশাভিমানময়্যাঃ পৃথগভিমানিত্বনিষ্পত্ত্যা ॥ ১.১১ ॥
আকাশস্য সুতৈবং লক্ষণয়া বস্তুতঃ প্রসূঃ শক্তিঃ ।
অদিতের্দক্ষো দক্ষাদদিতিরিতি শ্রুতিরবাধৈবম্ ॥ ১.১২ ॥
জগতাং মাতাপিতরৌ সতীভবৌ কেঽপি পণ্ডিতাঃ প্রাহুঃ ।
অদিতিপ্রজাপতী তাবপরেষাং ভাষয়া বিদুষাম্ ॥ ১.১৩ ॥
দিব্যপুমাকৃতিমীশে বিভ্রতি লীলার্থমস্য রমণায় ।
দিব্যবনিতাকৃতিং সা বভার মাতা চ ভুবনানাম্ ॥ ১.১৪ ॥
ভাসুরহেমাভরণাং বহুশোভামীশ্বরপ্রমোদকলাম্ ।
মূর্তিং পাবনকীর্তিং তাং হৈমবতীমুমামাহুঃ ॥ ১.১৫ ॥
তস্য প্রথমঃ সাক্ষী ভুবনজুষাং নয়নশালিনাং মধ্যে ।
বপুষঃ কীলাদিসুদৃশো নিরুপমপুণ্যো নিলিম্পপতিঃ ॥ ১.১৬ ॥
পল্লবমৃদু বেদিগতজ্বলনপবিত্রং মহার্ঘমণিকান্তম্ ।
নবচন্দ্রখণ্ডসৌম্যং শিবসুদৃশস্তত্স্মরামি বপুঃ ॥ ১.১৭ ॥
কেচন গৌরীং দেবীং শীতাদ্রের্দেবতাত্মনো জাতাম্ ।
কথয়ন্তি স্ত্রিয়মুত্তমলাবণ্যাস্বাদিতো গণ্যাম্ ॥ ১.১৮ ॥
সত্যৈব ভবতু সেয়ং কথা তথাঽপি প্রভাষিতাং ভক্তৈঃ ।
তাং মূর্তিমাদিসুদৃশো জানীয়াত্কমপি তেজোংশম্ ॥ ১.১৯ ॥
মন্যন্তে কেঽপি ঘনং পর্বতমুক্তং নিগূঢয়া বাচা ।
প্রাদুর্ভবতি গভীরধ্বনিরবিষহ্যা য়তঃ শক্তিঃ ॥ ১.২০ ॥
আকাশো গোলেভ্যো য়দ্বিতরতি নিজরজশ্চয়াদন্নম্ ।
নেশায় কীর্ত্যতে সা সংসারে দক্ষয়াগকথা ॥ ১.২১ ॥
ব্যাপ্তাঽপি য়ন্নিগূঢা বহিরীক্ষকবুদ্ধ্যপেক্ষয়া নষ্টা ।
শক্তির্যাগে তস্মিন্নবসানং তদুদিতং সত্যাঃ ॥ ১.২২ ॥
পর্বতনাম্নো বৈদিকভাষায়াং য়দিয়মতিবলা শক্তিঃ ।
ঘনতো ভবতি ব্যক্তা তদভিহিতং পার্বতীজননম্ ॥ ১.২৩ ॥
তেজোংশতঃ শিবাবিহ হিমাচলেঽনুগ্রহায় ভূমিজুষাম্ ।
দত্তো য়ত্সান্নিধ্যং লীলাচারিত্রমন্যদিদম্ ॥ ১.২৪ ॥
এতাসামার্যাণাং জানন্তঃ শাস্ত্রসম্মতং ভাবম্ ।
জানীয়ুর্ভবমহিষীং ভুবনানামম্বিকাং দেবীম্ ॥ ১.২৫ ॥ 25
%c01-q2/Nandini.Kuppa/uma-c01-q2।txt medskip
দ্বিতীয়ঃ স্তবকঃ
সর্গাদিবর্ণনম্ (পঞ্চচামরবৃত্তম্)
সহাদরেণ য়ো বলক্ষপারিজাতমালয়া
গলস্থলীবিভূষয়া ধ্বনিং বিনৈব ভাষতে ।
মহেশপুণ্যয়োষিতো মনোজ্ঞহাস এষ মে
বিভূতয়ে প্রকল্পতাং বিধূতয়ে চ পাপ্মনাম্ ॥ ২.১ ॥
নিরন্তরশ্রিতে সদা কৃপারসপ্রবাহিনী
বিলাসিনীতনুর্বিভোঃ পুমাকৃতের্বিমোহিনী ।
সুধাতরঙ্গকল্পহাসভাসুরাননা শিবা
পদাব্জলম্বিনো ধুনোতু পাপ্মনঃ ফলং মম ॥ ২.২ ॥
করোতি য়া বিভর্তি য়া নিহন্তি য়া জগত্ত্রয়ং
সমন্ততো বিভাতি য়া ন দৃশ্যতে ক্বচিচ্চ য়া ।
অতীব গুপ্তরূপিণী গুরূপদেশমন্তরা
ন শক্যতে বুধৈশ্চ বোদ্ধুমন্ধকারিসুন্দরী ॥ ২.৩ ॥
মহান্ধকারবন্ধুরস্য ভূতসঞ্চয়স্য য়া
বিনিদ্রিতস্য সর্ববীজধাম্নি মৌনমুদ্রিতে ।
সমন্ততো বিজৃম্ভণায় ভাসনায় চাভবন্
মহদ্বিধায় চেষ্টিতং মমেয়মিষ্টদেবতা ॥ ২.৪ ॥
মহেশগর্ভতঃ সমস্তভূতবীজকোশতঃ
কিরন্ত্যশেষবিশ্বমপ্যপারদিব্যবৈভবা ।
বিচিত্রচেষ্টয়াঽঽদ্যয়া বিধূতনাথনিদ্রয়া
জগন্নুতা জয়ত্যসাবনাদিশক্তিরদ্ভুতা ॥ ২.৫ ॥
ভবং ভণন্তি তান্ত্রিকাস্ত্বদাশ্রয়ং তমব্যয়ং
সমামনন্তি বৈদিকাঃ সদর্চিতে সদাহ্বয়ম্ ।
ন কশ্চিদর্থভেদ এতদাখ্যয়োর্দ্বয়োর্ভবে-
দ্ভিদেয়মাদিমং পদং পুমান্পরং নপুংসকম্ ॥ ২.৬ ॥
স চেদ্ভবোঽভিধানতো ভবান্যসি ত্বমব্যয়ে
সমীর্যতে স সদ্যদি ত্বমম্ব ভণ্যসে সতী ।
ন তেঽস্তি ভাবতা ন শক্তিরূপিণী হি বিদ্যসে
ন বেদ্মি কালিকে কথং সতোঽসতশ্চ ভিদ্যসে ॥ ২.৭ ॥
জগদ্বিধানকার্যতঃ পুরা সুরাসুরস্তুতে
ত্বমম্ব জীবিতং ভবস্যভাবমূলবাদিনাম্ ।
বিকল্পবর্জিতা মতিঃ প্রবোধমূলবাদিনাং
রসোঽনপেক্ষ উত্তমঃ প্রমোদমূলবাদিনাম্ ॥ ২.৮ ॥
ভবত্যসাবতো ভবান্যনাদিরন্তবর্জিতা
জগন্তি মাতি নিত্যমোরসৌ তদভ্যুধায়্যুমা ।
রসাত্মিকোশ্যতেঽখিলৈরসৌ ততঃ শিবোচ্যতে
পরৈবমীশিতুশ্চিতিস্ত্রিধা বুধৈরুদীর্যতে ॥ ২.৯ ॥
চিতিঃ পরৈব কামনা রসেন কেনচিদ্যুতা
চিতিঃ পরৈব সর্বদাঽপ্যনস্ত্যজস্য তু ক্রিয়া ।
চিতিঃ পরৈব গোচরাবভাসিকা মতিঃ স্মৃতা
ত্রিতৈবমন্যথা চিতেশ্চিরন্তনৈরুদীর্যতে ॥ ২.১০ ॥
চিকীর্ষতি প্রভৌ জ্বলত্ত্বদীয়কীলসন্ততের্-
বিকীর্ণধূমজালমেতদম্বরস্থলং ততম্ ।
বিসৃষ্টিতঃ পুরাঽসি য়া শিবপ্রভুত্বরূপিণী
পৃথক্প্রভুশ্চ লক্ষিতাঽসি সা সবিত্রি পুষ্করে ॥ ২.১১ ॥
পুনর্বিপাকতো ঘনীভবদ্ভিরক্ষিগোচরৈ-
স্ততস্ততঃ সমুজ্জ্বলৈঃ খসূক্ষ্মরেণুগোলকৈঃ ।
অজাণ্ডবৃক্ষকোটিকন্দবৃন্দবদ্ব্যধাঃ পুরা
মহেশদৃষ্টিময়্যুমেঽম্ব মণ্ডলানি ভাস্বতাম্ ॥ ২.১২ ॥
তপোঽগ্নিধূমজালকে ভবন্তি তৈজসাণবো
ভবন্তি জীবনাণবো ভবন্তি পার্থিবাণবঃ ।
ক্রমেণ তদ্বিসৃষ্টিরীশশক্তিপাকবৈভবে
সহস্রভানুমণ্ডলং তু গোচরাদি গৃহ্যতাম্ ॥ ২.১৩ ॥
ময়ূখমালিমণ্ডলে নিধায় পাদমুগ্রয়া
ময়ূখশক্তিরূপয়া ত্বয়াঽম্ব চেষ্টমানয়া ।
খকোশতঃ সমাহৃতৈঃ পুনস্ত্রিরূপরেণুভির্-
ব্যধায়ি মঙ্গলাদিভিঃ সহ গ্রহৈরিয়ং মহী ॥ ২.১৪ ॥
বিসর্জনেন ভূয়সাঽপি দেব্যতৃপ্তয়েয়তা
বিচেষ্টিতং বিলক্ষণং পুনর্ব্যধীয়ত ত্বয়া ।
ইহান্তরে বসুন্ধরাময়ূখমালিবিম্বয়োর্-
অমুষ্য কর্মণঃ সবিত্রি চন্দ্রমণ্ডলং ফলম্ ॥ ২.১৫ ॥
বধূপুমাকৃতী ততো বভূবথুর্যুবাং শিবে
ত্বমীশ্বরশ্চ লীলয়া বিহর্তুমত্র বিষ্টপে ।
অহো প্রভুং নভস্তনুং ত্বদীয়গর্ভসম্ভবা-
দ্ভণন্তি কালি তত্র চিত্রভাষণাস্ত্বদাত্মজম্ ॥ ২.১৬ ॥
পুমানথো স বিম্বতো হিরণ্ময়ো দিবাকরে
ধিয়াঽপি নৈব কেবলং হিরণ্ময়েন বর্ষ্মণা ।
ইদং তু কার্যরূপমন্যদুচ্যতে বুধৈঃ প্রভো-
রিহান্তরে নৃণাং পুনর্বপুস্তদম্ব বিম্বিতম্ ॥ ২.১৭ ॥
স্বয়ং চ কাঞ্চনপ্রকাশবর্ষ্মণা প্রভাকরে
তথাঽন্তরে নৃণাং চ তস্য বিম্বিতাঽসি সন্নিধৌ ।
রসস্য দেবতাঽসি দেবি পুষ্করে দিবাকরে
ময়ূখদেবতাঽসি ভোগদেবতাঽসি দেহিষু ॥ ২.১৮ ॥
বিসর্জনেন ভূয়সা নভস্যমুত্র ভাস্করে
মহীষু চাম্বিকে য়ুবাং বিধায় দেহিনো বহূন্ ।
ক্ষিতেঃ সুধাকরং গতান্ পিতৄন্ বিনেতুমব্যয়ে
তনূ চ তত্র বভ্রথুঃ প্রপঞ্চরাজ্ঞি মায়য়া ॥ ২.১৯ ॥
নভোঽন্তরে হিরণ্ময়ং বিভুং প্রচক্ষতে হরং
দিনেশবিম্ববিম্বিতং ভণন্তি পঙ্কজাসনম্ ।
ইহাস্মদন্তরালয়ং বদন্তি বিষ্ণুমচ্যুতং
সবিত্রি জন্মিনামিয়ং ত্রিমূর্তিবাদিধোরণি ॥ ২.২০ ॥
নভোঽন্তরে প্রচক্ষতে হিরণ্ময়াঙ্গমীশ্বরং
দিনেশবিম্বপূরুষং হিরণ্যগর্ভমাখ্যয়া ।
বিরাজমানমক্ষরং বিরাজমন্তরে নৃণাং
সবিত্রি তত্ত্ববেদিনামিয়ং তু নামকল্পনা ॥ ২.২১ ॥
হিরণ্ময়াঙ্গমম্বরে বদন্তি সোমমম্বিকে
দিবাকরস্য মণ্ডলে তু বিম্বিতং পুরন্দরম্ ।
শরীরিণামিহান্তরেঽগ্নিমালপন্তি ভাসুরং
চিরন্তনোক্তিদর্শিনামিয়ং শিবে প্রণালিকা ॥ ২.২২ ॥
সরোরুহাক্ষবাগ্বধূমনোহরৌ তু পূর্বব-
ত্সুধাংশুবিম্বপূরুষস্তু রুদ্রসংজ্ঞকঃ শিবে ।
হিরণ্ময়োঽন্তরিক্ষজাত ঈশ্বরঃ সদাশিবঃ
সদেব বস্তু কাঞ্চনাঙ্গি পঞ্চমূর্তিবাদিনাম্ ॥ ২.২৩ ॥
প্রভোঃ প্রমাঽঽদিতস্ততঃ প্রমাবতী স্বয়ং পৃথগ্
বিহায়সা শরীরিণী প্রভৌ ততো হিরণ্ময়ে
হিরণ্ময়াঙ্গনাকৃতির্নভোঽন্তরে চ ভাস্করে
তথাঽন্তরেষু দেহিনাং মহেশ্বরী জয়ত্যুমা ॥ ২.২৪ ॥
মদীয়মম্বিকাঽখিলস্য বিষ্টপস্য দুষ্টধী-
দবিষ্ঠপাদপঙ্কজা ধুনোতু কষ্টজালকম্ ।
ইমে চ কোমলৈঃ পদৈরমূল্যতল্পশালিন-
স্তদীয়মঞ্চরূপতাং ভজন্তু পঞ্চচামরাঃ ॥ ২.২৫ ॥ 50
%c01-q3/Sarada.Susarla/uma-c01-q3-itrans.txt medskip
তৃতীয়ঃ স্তবকঃ
সশরীরায়াশ্চ সাধনম্ (তনুমধ্যাবৃত্তম্)
শুভ্রস্মিতলেশো মাতুর্মরুতান্নঃ ।
অন্তস্তিমিরাণামন্তং বিদধাতু ॥ ৩.১ ॥
আদ্যৌ ভুবনানাং মাতাপিতরৌ তৌ ।
দেবাসুরমর্ত্যৈর্বন্দ্যাববিনিন্দ্যৌ ॥ ৩.২ ॥
ব্রূতে পৃথগেকস্তৌ বিগ্রহবন্তৌ ।
আহৈকশরীরং দ্বন্দ্বং কবিরন্যঃ ॥ ৩.৩ ॥
শক্তিং তনুশূন্যামীশং চ পুমাংসম্ ।
বক্তি প্রমদায়াং সন্দেহয়ুতোঽন্যঃ ॥ ৩.৪ ॥
ঈশং চ তমেকে সন্মাত্রমুশন্তি ।
ব্রহ্মৈকমথান্যে গায়ন্তি ন শক্তিম্ ॥ ৩.৫ ॥
কেচিত্তনুহীনং প্রজ্ঞায়ুতমীশম্ ।
শক্তিং বিদুরস্য প্রজ্ঞামবিকুণ্ঠাম্ ॥ ৩.৬ ॥
উক্তং দধতস্তৈঃ কেচিত্ পুনরাহুঃ ।
মায়াতনুবন্ধং নাথস্য ন শক্তেঃ ॥ ৩.৭ ॥
নিত্যং সশরীরৌ য়েষাং পিতরৌ তৌ ।
একোঽপ্যথবা তান্ প্রত্যাহ নিসর্গঃ ॥ ৩.৮ ॥
মাতাপিতরৌ য়ত্ তাবেকশরীরৌ ।
চিত্রপ্রথনার্থা সা কাচন লীলা ॥ ৩.৯ ॥
সন্মাত্রকথানাং কার্যে মনুজাদৌ
ধীস্বান্তবিকাসঃ স্যাত্কারণহীনঃ ॥ ৩.১০ ॥
অদ্বৈতিভিরন্যা মায়াঽঽশ্রয়ণীয়া ।
শক্তেরতিরিক্তা সা কিং কিমু বাদৈঃ ॥ ৩.১১ ॥
ন স্যাত্ পৃথগাত্মা শক্তেঃ কিমুপাধেঃ ।
চক্ষুঃ শ্রিতচিত্তের্বিশ্বাকৃতিতা বা ॥ ৩.১২ ॥
একান্তবিদেহৌ তৌ চেদতিসূক্ষ্মৌ ।
লীলাতনুবন্ধাশক্তাবভিধেয়ৌ ॥ ৩.১৩ ॥
ভক্তাননুগৃহ্ণন্ দিব্যাদ্ভুতলীলঃ ।
তদ্বিগ্রহবন্ধো বোধ্যো লসদর্থঃ ॥ ৩.১৪ ॥
স্ত্রীত্বং য়দি নেষ্টং পুংস্ত্বং কুত ইষ্টম্ ।
না বা কিমু নারী ন স্যাদনুমেয়া ॥ ৩.১৫ ॥
তস্মাত্ পিতরৌ তৌ বাচ্যৌ মতিমন্তৌ ।
সূক্ষ্মাবপি ভূয়ো লীলাতনুমন্তৌ ॥ ৩.১৬ ॥
নাস্মত্তনুবত্তে শক্তীশ্বরমূর্তী ।
একাঽমৃতরূপা ত্বন্যা প্রণবাত্মা ॥ ৩.১৭ ॥
দিব্যং ঘনতেজঃ কুর্বদ্ ধ্বনিমন্তঃ ।
সম্পশ্যদশেষং মূর্তিঃ প্রণবাত্মা ॥ ৩.১৮ ॥
দিব্যো ঘনসোমঃ স্যংদন্ রসমন্তঃ ।
ভুঞ্জন্ ভুবনৌঘং পীয়ূষশরীরম্ ॥ ৩.১৯ ॥
বোধোঽনবলম্বো দিব্যং খলু তেজঃ ।
মোদঃ পরিশুদ্ধো দিব্যঃ খলু সোমঃ ॥ ৩.২০ ॥
সোমাংশমহোংশৌ য়াতো ঘনভাবম্ ।
পিত্রোর্ভুবনানাং সঙ্কল্পমহিম্না ॥ ৩.২১ ॥
আরাধয়সীশং তং চিন্ময়কায়ম্ ।
আনন্দময়াঙ্গী ত্বম্ দেবি কিলেয়ম্ ॥ ৩.২২ ॥
দিব্যং তব কায়ং দিব্যে তব বস্ত্রে ।
দিব্যানি তবাম্ব স্বর্ণাভরণানি ॥ ৩.২৩ ॥
য়দ্দেবি বিলোক্যাঽস্যপ্রাকৃতকায়া ।
য়ুক্তীঃ সমতীতা সেয়ং তব মায়া ॥ ৩.২৪ ॥
নব্যাস্তনুমধ্যাঃ প্রত্নাং তনুমধ্যাম্ ।
বিদ্বত্সদসীমাঃ সম্যক্প্রথয়ন্তু ॥ ৩.২৫ ॥ 75
%c01-q4/Prasad.Kuppa/c01-q4।txt medskip
চতুর্থঃ স্তবকঃ
আধ্যাত্মিকবিভূতয়ঃ (গীতিবৃত্তম্)
অমৃতাংশুবিংবসারাদ্ ভূয়োঽপি বিনির্গতো ভৃশং সূক্ষ্মঃ ।
সারো গৌরীবদনাদ্ দরহাসো হরতু দুঃখজালং নঃ ॥ ৪.১ ॥
কুলকুণ্ডে প্রাণুবন্তী চেতন্তী হৃদি সমস্তজন্তূনাম্ ।
মূর্ধনি বিচিন্তয়ন্তী মৃত্যুঞ্জয়মহিষি বিজয়তে ভবতী ॥ ৪.২ ॥
তেজোজলান্নসারৈস্ত্রয়োঽণবো মূলহৃদয়মস্তেষু
পাকাত্তে নিষ্পন্নাস্ত্রৈলোক্যব্যাপিকেঽংব দেহবতাম্ ॥ ৪.৩ ॥
পূর্ণে শরীরশিল্পে দ্বারেণ ব্রহ্মরন্ধ্রসংজ্ঞেন ।
নাডীপথেন গত্বা তৈজসমণুমাবিশস্যমেয়বলে ॥ ৪.৪ ॥
অংশেনাবিশ্যাদৌ য়াসি পুনস্তং ততশ্চ নির্যাসি ।
মার্গাভ্যাং দ্বাভ্যাং ত্বং নাড্যাঃ পশ্চাত্ পুরশ্চ সিদ্ধাভ্যাম্ ॥ ৪.৫ ॥
য়াতায়াতবিহারে মাতস্তস্মিন্ ভবত্যুপাধিস্তে
আরভ্য মস্তকস্থলমামূলাধারমস্থিপঞ্জরিকা ॥ ৪.৬ ॥
নৃতনুষু বিহরন্তীং ত্বাম্ উপাধিবীণাকৃতের্জগন্মাতঃ ।
সাদৃশ্যাত্ কুণ্ডলিনীং পরোক্ষবাদপ্রিয়াঃ প্রভাষন্তে ॥ ৪.৭ ॥
নভসঃ শীর্ষদ্বারা প্রবহন্তীং য় ইহ বিগ্রহে শক্তিম্ ।
অনুসন্দধাতি নিত্যং কৃতিনস্তস্যেতরৈরলং য়োগৈঃ ॥ ৪.৮ ॥
সর্বেষু বিশসি তুল্যং নির্গচ্ছসি তুল্যমম্ব ভুবনানাম্ ।
জ্ঞাতা চেদসি শক্ত্যৈ ন জ্ঞাতা চেদ্ভবস্যহঙ্কৃত্যৈ ॥ ৪.৯ ॥
অবতরণং ধ্যাতং চেদ্ আরোহণমদ্ভুতং ভবেচ্ছক্তেঃ ।
য়স্মিন্নিদং শরীরং ভবতি মহদ্বৈদ্যুতাগ্নিয়ন্ত্রমিব ॥ ৪.১০ ॥
আরোহণমধ্যাতৃষু হৃদয়েঽহঙ্কারমাত্রনিষ্পত্যৈ ।
তদনু শরীরমিদং স্যাত্ সুখায় দুঃখায় বা য়থাভোগম্ ॥ ৪.১১ ॥
য়া ব্যক্তিতা জনিমতামহঙ্কৃতিঃ সকলভেদধীভূমিঃ ।
পৃথগিব তবাম্বিকে সা সত্তৈবোপাধিসংশ্রয়াদ্ ভান্তী ॥ ৪.১২ ॥
এতামাহুরবিদ্যাং বীজং সংসারবৃক্ষরাজস্য ।
সর্বরসফলয়ুতস্য প্রারব্ধজলেন দেবি দোহদিনঃ ॥ ৪.১৩ ॥
ব্যক্তিত্বার্পকদেহে নিম্নে কুল্যেব জনিমতাং মাতঃ ।
প্রবহত্যনারতং তে শক্তিশ্চিত্রাণি দেবি তন্বানা ॥ ৪.১৪ ॥
সারমপামণুভূতং হৃদয়স্থং সূরয়ো বিদুশ্চিত্তম্ ।
শ্রেষ্ঠং প্রাণং কেচন পঞ্চানিলমূলভূতমাহুরিমম্ ॥ ৪.১৫ ॥
মন এব চিত্তসংজ্ঞং ব্যবহরতাং বিভজনানভিজ্ঞানাম্ ।
কবিলোকব্যবহারস্তদধীনস্তত্ত্বধীর্ভবত্যন্যা ॥ ৪.১৬ ॥
তদনাহতস্য বিলসদ্ দক্ষিণতো দহরনামকগুহায়াম্ ।
চিত্তং কুলকুণ্ডাত্তে কাঽপ্যনুগৃহ্ণাতি দেবি রশ্মিকলা ॥ ৪.১৭ ॥
চিত্তমণু শ্লিষ্টং তে কলয়াঽঙ্গুষ্ঠপ্রমাণমিব ভাসা ।
দর্পণমমলব্রহ্মপ্রতিবিম্বাকর্ষকং শিবে ভবতি ॥ ৪.১৮ ॥
অন্তরমাবর্তাভং প্রতিবিম্বমকায়মেতদীশস্য ।
অংগুষ্ঠাভং প্রাহুর্মানেনোপাধিচৈত্তভাসস্তে ॥ ৪.১৯ ॥
দম্পত্যোর্বাং রূপপ্রতিবিম্বৌ চক্ষুষোঃ শিবে ভবতঃ ।
কুলকুণ্ডে হৃদয়ে চাপ্যরূপয়োরেব কশ্চিদুল্লাসঃ ॥ ৪.২০ ॥
চিত্তমণীয়ো বিত্তং য় ইদং মূল্যে প্রপঞ্চতোঽপ্যধিকম্ ।
হৃদয়গুহায়াং নিহিতং জানীতে স বিজহাতি বহিরাশাঃ ॥ ৪.২১ ॥
অপ্রাপ্তা মূর্ধানং হৃদয়াত্ সম্প্রস্থিতা ধৃতা নাড্যা ।
ত্বদ্রুচিরুক্তা বুদ্ধিস্ত্বয়ি নিষ্ঠা ভবতি দেবি তন্নিষ্ঠা ॥ ৪.২২ ॥
অন্নময়াণুং প্রাপ্তং ধীজ্যোতিশ্চন্দ্রমার্কমিব তেজঃ ।
পরিভাষ্যতে মহেশ্বরি মন ইতি সঙ্কল্পসম্ভবস্থানম্ ॥ ৪.২৩ ॥
সঙ্কল্পে সঙ্কল্পে চিচ্ছক্তিং মনসি বিস্ফুরন্তীং ত্বাম্ ।
য় উপাস্তে স জনস্তে গৃহ্ণাতি মহেশবল্লভে চরণম্ ॥ ৪.২৪ ॥
আধারচক্রশয়নে মমেহ নিদ্রাং বিহায় বিচলন্তীম্ ।
গীতয় এতাঃ পরমামুপতিষ্ঠন্তাং জগদ্বিভোঃ কান্তাম্ ॥ ৪.২৫ ॥ 100
॥ সমাপ্তং চ প্রথমং শতকম্ ॥
%c02-q1/Ravi.Shamavedam/uma-c02-q1।txt medskip
দ্বিতীয়ং শতকম্
পঞ্চমঃ স্তবকঃ
পরিণয়ঃ (উপজাতিবৃত্তম্)
শ্রীখণ্ডচর্চামিব কল্পয়ন্ত্যো
মুহুঃ কপোলেষু সখীজনস্য ।
শ্রীকণ্ঠকান্তাহসিতাঙ্কুরাণাং
শ্রীমন্তি কুর্বন্তু জগন্তি ভাসঃ ॥ ৫.১ ॥
কীর্তির্বলক্ষা কুসুমায়ুধস্য
স্বর্ণাদ্রিকোদণ্ডজয়োন্নতস্য ।
দরস্মিতশ্রীর্দ্বিরদাস্যমাতুর্-
দ্রাঘীয়সীং বো বিতনোতু ভূতিম্ ॥ ৫.২ ॥
প্রমথ্যমানামৃতরাশিবীচি-
প্রোদ্গচ্ছদচ্ছাচ্ছতুষারকল্পাঃ ।
য়ুষ্মাকমিচ্ছাং বিদধত্বমোঘাং
বিঘ্নেশমাতুর্দরহাসলেশাঃ ॥ ৫.৩ ॥
চন্দ্রাতপঃ কশ্চন সম্প্রসন্নো
মহেশনেত্রাতিথিতর্পণো নঃ ।
মনোভিলাষং সফলীকরোতু
মহেশ্বরীহাসলবপ্রকাশঃ ॥ ৫.৪ ॥
বলক্ষবক্ষোজপটাঞ্চলেন
চলেন সার্ধং কৃতকেলয়ো নঃ ।
পুরত্রয়ারাতিকলত্রহাস-
ভাসো নিরাসং বিপদাং ক্রিয়াসুঃ ॥ ৫.৫ ॥
ভূয়াসুরায়াসহরাণি তানি
স্মিতানি ভূতেশমৃগীদৃশো নঃ ।
য়েষাং ত্বিষো বিভ্রতি দিগ্বধূটী-
গণ্ডেষু কর্পূরপরাগলীলাম্ ॥ ৫.৬ ॥
কুর্বন্তু কামং সফলং (ত্ব) মদীয়ং
কুলাদ্রিকন্যাহসিতানি তানি ।
য়েষাং ময়ূখৈঃ ক্রিয়তে সিতাদ্রের্-
উদ্যানবাটীষু নবো বসন্তঃ ॥ ৫.৭ ॥
আম্রেডিতং ভূষণচন্দ্রভাসাং
নাসাবিভূষামহসাং দ্বিরুক্তিঃ ।
পুরারিনারীস্মিতকান্তয়ো মে
পূর্ণানি কুর্বন্তু সমীহিতানি ॥ ৫.৮ ॥
নির্মায় বিশ্বালয়মম্ব শর্ব-
স্ত্বয়া সমং শিল্পবিদা স শিল্পী ।
বিহর্তুমিচ্ছন্নয়ি বোঢুমৈচ্ছ-
ন্নারীং ভবন্তীং পুরুষো ভবংস্ত্বাম্ ॥ ৫.৯ ॥
দিব্যং দুকূলং ধবলং দধানা
বেণ্যা ফণীন্দ্রোপময়া লসন্তী ।
প্রফুল্লরাজীববিলোচনা ত্বং
প্রপঞ্চভর্তুর্নয়নান্যহার্ষীঃ ॥ ৫.১০ ॥
প্রত্যঙ্গবন্ধং জ্বলদুত্তমং তে
ভুজঙ্গরাজোপমবেণিরূপম্ ।
আত্মৈকনিষ্ঠস্য চ বিশ্বভর্তুর্-
আরাধয়ামাস বিলোচনানি ॥ ৫.১১ ॥
অভূস্ত্বমাদ্যস্য মনোমদায়
স চাপি তে প্রীতিপদং বভূব ।
ন কেবলং বাং সকলস্য চাসী-
দ্দাম্পত্যবন্ধস্য তদম্ব বীজম্ ॥ ৫.১২ ॥
তবাতিকান্তা নয়ানান্তবৃত্তি-
র্হাসঃ পুরারেশ্চ নবেন্দুহারী ।
উভৌ বিবাহোত্সবপূর্বরঙ্গং
নির্বর্তয়ামাসতুরাদিরামে ॥ ৫.১৩ ॥
দাতুং প্রভুঃ সান্ত্বয়িতুং সমর্থঃ
কর্তুং ক্ষমস্তর্জয়িতুং চ শক্তঃ ।
সংরক্ষতান্মাং তব সর্ববন্দ্যে
করস্তুষারাংশুভৃতা গৃহীতঃ ॥ ৫.১৪ ॥
স্প্রষ্টুং ন শক্যা পরমে পরৈস্ত্বং
স চান্যয়া চিন্তয়িতুং ন শক্যঃ ।
ত্বমেব শর্বস্য স এব তেঽম্ব
দাম্পত্যমেবং য়ুবয়োস্তু সত্যম্ ॥ ৫.১৫ ॥
নিজাদ্বতংসেন্দুত ইন্দুমন্য-
মুত্পাদ্য তে শম্ভুরদাদ্বতংসম্ ।
মূর্তামিবাসৌ শুভগাত্রি রাত্রিং
প্রাপ্য ত্বদীয়াং কবরীং চকাসে ॥ ৫.১৬ ॥
বভূবিথাগেন্দ্রগৃহে য়দা ত্বং
স চেশ্বরস্তত্র চকার বাসম্ ।
বিলোকমানস্তব দেবি বিদ্যুত্
পাঞ্চালিকায়াঃ কমনীয়ভাবম্ ॥ ৫.১৭ ॥
সিদ্ধং স বাং সাধয়িতুং প্রবৃত্তো
য়োগং প্রদগ্ধো মদনশ্চ কল্পে ।
বশীতি কীর্তিং গিরিশস্য ভর্তুং
তুভ্যং ত্বপর্ণেতি য়শশ্চ কর্তুম্ ॥ ৫.১৮ ॥
ঘোরং তপশ্চেদ্রচিতং ত্বয়াঽপি
প্রাগ্রূপভর্তুঃ সমনুগ্রহায় ।
বিহায় য়ত্নং ক ইহাখিলাঽম্ব
সম্বদ্ধমপ্যর্থমুপৈতু জন্তুঃ ॥ ৫.১৯ ॥
জ্বলত্কপর্দো দহনাঙ্কভালঃ
কপালমালী করিকৃত্তিবাসাঃ ।
ভুজঙ্গভূষো ভসিতাঙ্গরাগঃ
পুষ্পেষু বৈরী পরুষাট্টহাসঃ ॥ ৫.২০ ॥
শ্মশানবাসী পুরুষস্ত্রিশূলী
জহার তে চেদনঘাঙ্গি চেতঃ ।
দৃষ্টান্তমর্থোঽয়মবাপ নৈব
প্রীতির্বহিঃকারণমাশ্রিতেতি ॥ ৫.২১ ॥
রূপং পুরারেরথবা তদেতত্
সেয়ং চ চেষ্টা সময়ান্তরেষু ।
কান্তং বপুঃ কান্ততরাশ্চ লীলা-
স্ত্বয়া সমং খেলিতুমেষ ধত্তে ॥ ৫.২২ ॥
প্রহৃষ্টয়ক্ষঃ সমবেতসিদ্ধো
নৃত্যদ্গণেন্দ্রো বিকসন্মুনীন্দ্রঃ ।
ভূয়োঽপি য়োগো য়ুবয়োর্হিমাদ্রৌ
বভার মাতর্মহমদ্বিতীয়ম্ ॥ ৫.২৩ ॥
মহেশ্বরস্ত্বাং পরিণীয় লেভে
য়াবাত্মজৌ দ্বাবনঘাঙ্গি মুখ্যৌ ।
একস্তয়োর্ভ্রাম্যতি বিশ্বমত্তুং
ভূভৃত্তটীরাশ্রয়তে বতান্যঃ ॥ ৫.২৪ ॥
সঙ্কীর্তয়ন্ত্যো জগতাং জনন্যাঃ
কল্যাণবার্তাঃ কমনীয়কীর্তেঃ ।
ইমাঃ প্রমোদায় সতাং ভবন্তু
সন্দর্ভশুদ্ধা উপজাতয়ো নঃ ॥ ৫.২৫ ॥ 125
%c02-q2/Bhoga.Pappu/uma-02-q2-itrans.txt medskip
ষষ্ঠঃ স্তবকঃ
মাহাভাগ্যম্ (মদলেখাবৃত্তম্)
হর্তারঃ শশিকীর্তেঃ কর্তারো নবভাসাম্ ।
ভর্তারো মম সন্তু স্কন্দাম্বাদরহাসাঃ ॥ ৬.১ ॥
দিগ্বল্লীষ্বতিশুভ্রাং কুর্বন্তঃ কুসুমর্দ্ধিম্ ।
ভূয়াসুস্তব ভূত্যৈ মন্মাতুঃ স্মিতলেশাঃ ॥ ৬.২ ॥
একশ্চেত্তব শক্তো ব্রহ্মাণ্ডস্য ভবায় ।
ভর্গপ্রেয়সি হাসঃ কিং স্তোত্রং তব ভূয়ঃ ॥ ৬.৩ ॥
উদ্যানে বিয়দাখ্যে কালি ত্বাং বিহরন্তীম্ ।
গোলৈঃ কন্দুককল্পৈরল্পা বাক্কিমু মাতি ॥ ৬.৪ ॥
খং ক্রীডাভবনং তে কঃ কার্যালয় এষঃ ।
পৃথ্বীয়ং বহুলান্না মাতর্ভোজনশালা ॥ ৬.৫ ॥
বুদ্ধীনামসি দাত্রী সিদ্ধীনামসি নেত্রী ।
বীর্যাণামসি পেটী কার্যাণামসি ধাটী ॥ ৬.৬ ॥
বিদ্যানামসি ভাবো হৃদ্যানামসি হাবঃ ।
দেবানামসি লীলা দৈত্যানামসি হেলা ॥ ৬.৭ ॥
গন্তৄণামসি চেষ্টা স্থাণূনামসি নিষ্ঠা ।
লোকানামসি মূলং লোকাদেরসি জালম্ ॥ ৬.৮ ॥
দেবী ব্যাপকতেজঃ শক্তিস্তত্ত্ববিচারে ।
অত্যন্তং সুকুমারী নারী মূর্তিবিচারে ॥ ৬.৯ ॥
ক্ব জ্যোতির্মহতোঽস্মাদাকাশাদপি ভূয়ঃ ।
তত্সর্বং বিনয়ন্তী তন্বঙ্গী ক্ব নু নারী ॥ ৬.১০ ॥
দেবেন্দ্রায় বিভুত্বং সূর্যায়োস্রসহস্রম্ ।
ঊষ্মাণং দহনায় জ্যোত্স্নামোষধিরাজে ॥ ৬.১১ ॥
বাতায়ামিতবীর্যং বিস্তারং গগনায় ।
সান্দ্রত্বং বসুধায়ৈ তোয়ায় দ্রবভাবম্ ॥ ৬.১২ ॥
মাহাভাগ্যমপারং কোটিভ্যো বিবুধানাম্ ।
চিত্রাঃ কাশ্চন সিদ্ধীর্লক্ষেভ্যো মনুজানাম্ ॥ ৬.১৩ ॥
স্থাণুভ্যো ধৃতিশক্তিং গন্তৃভ্যো গতিশক্তিম্ ।
কস্মাচ্চিন্নিজকোশাদেকা দেবি দদানা ॥ ৬.১৪ ॥
আশ্চর্যং বিদধানা সর্বং বস্তু দধানা ।
হন্ত ত্বং মম মাতঃ কাচিত্কোমলগাত্রী ॥ ৬.১৫ ॥
শ্রোণীভারনতায়াং কস্যাঞ্চিত্তনুগাত্র্যাম্ ।
ঈদৃক্ষা য়দি শক্তিঃ কাবেতো ননু মায়া ॥ ৬.১৬ ॥
রূপং তে তনুগাত্রং বাণী তে মৃদুনাদা ।
চাপং তে মধুরেক্ষুঃ পাণিস্তে সুকুমারঃ ॥ ৬.১৭ ॥
লোলে লোচনয়ুগ্মে ভীরুত্বং প্রকটং তে ।
ব্রহ্মাণ্ডং ত্বদধীনং শ্রদ্ধত্তামিহ কো বা ॥ ৬.১৮ ॥
ভ্রূভঙ্গং কুরুষে চেন্মুগ্ধে গৌরি মুখাব্জে ।
ভূতান্যপ্যয়ি বিভ্যত্যেজেরন্নপি তারাঃ ॥ ৬.১৯ ॥
শুদ্ধান্তেশ্বরি শম্ভোরিচ্ছা চেত্তব কাঽপি ।
ঘোরোঽগ্নিস্তৃণগর্ভাদ্ঘোরাগ্নেরপি শৈত্যম্ ॥ ৬.২০ ॥
দ্রষ্টুং বিশ্বমপারং ভারস্তে দয়িতস্য ।
কর্তুং কার্যমশেষং শ্রীমাতস্তব ভারঃ ॥ ৬.২১ ॥
সাক্ষী কেবলমীশঃ কর্তুং ভর্তুমুতাহো ।
হর্তুং বাঽখিলমম্ব ত্বং সাক্ষাদ্ধৃতদীক্ষা ॥ ৬.২২ ॥
কারঙ্কারমুমে য়দ্ ব্রহ্মাণ্ডানি নিহংসি ।
তন্মন্যে সুরমান্যে বালৈবাঽম্ব সদা ত্বম্ ॥ ৬.২৩ ॥
লীলোজ্জীবিতকামে রামে শঙ্করসক্তে ।
ত্বত্পাদার্চনসক্তং ভক্তং মাং কুরু শক্তম্ ॥ ৬.২৪ ॥
এতাঃ পাবনগন্ধাঃ সর্বেশপ্রমদে তে ।
হৈরম্ব্যো মদলেখাঃ সন্তোষায় ভবন্তু ॥ ৬.২৫ ॥ 150
%c02-q3/Amrutha.Kuppa/c02-q3-b.txt medskip
সপ্তমঃ স্তবকঃ
ব্যোমশরীরা, মাতৃকাদিবিভূতয়শ্চ (বসন্ততিলকাবৃত্তম্)
বাণীসরোরুহদৃশো হয়রাজহংসো
বক্ত্রারবিন্দনিলয়াদ্বহিরাগতায়াঃ ।
আলাপকালদরহাস ইহ স্থিতানাং
ক্ষেমং করোতু সুতরাং হরসুন্দরীয়ঃ ॥ ৭.১ ॥
নাদোঽসি বাগসি বিভাঽসি চিদস্যখণ্ডা
খণ্ডীভবন্ত্যপি চিদস্যখিলেন্দ্রকান্তে ।
তত্তাদৃশীং নিখিলশক্তিসমষ্টিমীশে
ত্বামন্তরিক্ষপরিকৢপ্ততনুং নমামি ॥ ৭.২ ॥
বিশ্বপ্রসিদ্ধবিভবাস্ত্রিষু বিষ্টপেষু
য়াঃ শক্তয়ঃ প্রবিলসন্তি পরঃসহস্রাঃ ।
তাসাং সমষ্টিরতিচিত্রনিধানদৃষ্টিঃ
সৃষ্টিস্থিতিপ্রলয়কৃদ্ ভুবনেশ্বরি ত্বম্ ॥ ৭.৩ ॥
জানে ন য়ত্তব জগজ্জনয়িত্রি রূপং
সঙ্কল্প্যতে কিমপি তন্মনসো বলেন ।
সঙ্কল্পিতস্য বপুষঃ শ্রিতশোকহন্ত্রি
বিন্যস্যতে তব বচোতিগধাম নাম ॥ ৭.৪ ॥
কামং বদন্তু বনিতামিতিহাসদক্ষা-
স্ত্বাং সর্বলোকজনয়িত্রি সদেহবন্ধাম্ ।
সত্যং চ তদ্ভবতু সা তব কাঽপি লীলা
দিব্যং রজস্তু তব বাস্তবিকং শরীরম্ ॥ ৭.৫ ॥
ভূজন্মপাংসুভিরগর্হিতশুদ্ধরূপা
য়া কাঽপি পাংসুপটলী বিপুলেঽন্তরিক্ষে ।
সা তে তনুঃ সুমহতী বরদে সুসূক্ষ্মা
তামেব দেবসরণিং কথয়ন্তি ধীরাঃ ॥ ৭.৬ ॥
য়া দেবি দেবসরণির্ভবমগ্নদুর্গা
বৈরোচনীতি কথিতা তপসা জ্বলন্তী ।
রাজীববন্ধুমহসা বিহিতাঙ্গরাগা
সা তে তনুর্ভবতি সর্বসুপর্ববর্ণ্যে ॥ ৭.৭ ॥
প্রাণাস্তবাত্র হৃদয়ং চ বিরাজতেঽত্র
নেত্রাণি চাত্র শতশঃ শ্রবণানি চাত্র ।
ঘ্রাণানি চাত্র রসনানি তথা ত্বচশ্চ
বাচোঽত্র দেবি চরণানি চ পাণয়োঽত্র ॥ ৭.৮ ॥
সর্বত্র পশ্যসি শৃণোষি চ সর্বতোঽম্ব
সর্বত্র খাদসি বিজিঘ্রসি সর্বতোঽপি ।
সর্বত্র চ স্পৃশসি মাতরভিন্নকালে
কঃ শক্নুয়ান্নিগদিতুং তব দেবি ভাগ্যম্ ॥ ৭.৯ ॥
সর্বত্র নন্দসি বিমুঞ্চসি সর্বতোঽম্ব
সর্বত্র সংসরসি গর্জসি সর্বতোঽপি ।
সর্বত্রদেবি কুরুষে তব কর্মজাল-
বৈচিত্র্যমীশ্বরি নিরূপয়িতুং ক্ষমঃ কঃ ॥ ৭.১০ ॥
বিশ্বাম্বিকে ত্বয়ি রুচাং পতয়ঃ কিয়ন্তো
নানাবিধাব্ধিকলিতা ক্ষিতয়ঃ কিয়ত্যঃ ।
বিম্বানি শীতমহসাং লসতাং কিয়ন্তি
নৈতচ্চ বেদ য়দি কো বিবুধো বহুজ্ঞঃ ॥ ৭.১১ ॥
অব্যক্তশব্দকলয়াঽখিলমন্তরিক্ষং
ত্বং ব্যাপ্য দেবি সকলাগমসম্প্রগীতে ।
নাদোঽস্যুপাধিবশতোঽথ বচাংসি চাসি
ব্রাহ্মীং বদন্তি কবয়োঽমুকবৈভবাং ত্বাম্ ॥ ৭.১২ ॥
নানাবিধৈর্ভুবনজালসবিত্রি রূপৈর্-
ব্যাপ্তৈকনিষ্কলগভীরমহস্তরঙ্গৈঃ ।
ব্যক্তং বিচিত্রয়সি সর্বমখর্বশক্তে
সা বৈষ্ণবী তব কলা কথিতা মুনীন্দ্রৈঃ ॥ ৭.১৩ ॥
ব্যক্তিত্বমম্ব হৃদয়ে হৃদয়ে দধাসি
য়েন প্রভিন্ন ইব বদ্ধ ইবান্তরাত্মা ।
সেয়ং কলা ভুবননাটকসূত্রভর্ত্রি
মাহেশ্বরীতি কথিতা তব চিদ্বিভূতিঃ ॥ ৭.১৪ ॥
আহারশুদ্ধিবশতঃ পরিশুদ্ধসত্ত্বে
নিত্যস্থিরস্মৃতিধরে বিকসত্সরোজে ।
প্রাদুর্ভবস্যমলতত্ত্ববিভাসিকা য়া
সা ত্বং স্মৃতা গুরুগুহস্য সবিত্রি শক্তিঃ ॥ ৭.১৫ ॥
হব্যং য়য়া দিবিষদো মধুরং লভন্তে
কব্যং য়য়া রুচিকরং পিতরো ভজন্তে ।
অশ্নাতি চান্নমখিলোঽপি জনো য়য়ৈব
সা তে বরাহবদনেতি কলাঽম্ব গীতা ॥ ৭.১৬ ॥
দুষ্টান্নিহংসি জগতামবনায় সাক্ষা-
দন্যৈশ্চ ঘাতয়সি তপ্তবলৈর্মহদ্ভিঃ ।
দম্ভোলিচেষ্টিতপরীক্ষ্যবলা বলারেঃ
শক্তির্ন্যগাদি তব দেবি বিভূতিরেষা ॥ ৭.১৭ ॥
সঙ্কল্পরক্তকণপানবিবৃদ্ধশক্ত্যা
জাগ্রত্সমাধিকলয়েশ্বরি তে বিভূত্যা ।
মূলাগ্নিচণ্ডশশিমুণ্ডতনুত্রভেত্র্যা
চামুণ্ডয়া তনুষু দেবি ন কিং কৃতং স্যাত্ ॥ ৭.১৮ ॥
ত্বং লোকরাজ্ঞি পরমাত্মনি মূলমায়া
শক্রে সমস্তসুরভর্তরি জালমায়া ।
ছায়েশ্বরান্তরপুমাত্মনি য়োগমায়া
সংসারসক্তহৃদয়েষ্বসি পাশমায়া ॥ ৭.১৯ ॥
ত্বং ভূতভর্তরি ভবস্যনুভূতিনিদ্রা
সোমস্যপাতরি বিডৌজসি মোদনিদ্রা ।
সপ্তাশ্ববিম্বপুরুষাত্মনি য়োগনিদ্রা
সংসারমগ্নহৃদয়েষ্বসি মোহনিদ্রা ॥ ৭.২০ ॥
বিষ্ণুশ্চকার মধুকৈটভনাশনং য়ন্-
মুক্তঃ সহস্রদলসম্ভবসংস্তুতা সা ।
কালী ঘনাঞ্জননিভপ্রভদেহশালি-
ন্যুগ্রা তবাম্ব ভুবনেশ্বরি কোঽপি ভাগঃ ॥ ৭.২১ ॥
বিদ্যুত্প্রভাময়মধৃষ্যতমং দ্বিষদ্ভি-
শ্চণ্ডপ্রচণ্ডমখিলক্ষয়কার্যশক্তম্ ।
য়ত্তে সবিত্রি মহিষস্য বধে স্বরূপং
তচ্চিন্তনাদিহ নরস্য ন পাপভীতিঃ ॥ ৭.২২ ॥
শুম্ভং নিশুম্ভমপি য়া জগদেকবীরৌ
শূলাগ্রশান্তমহসৌ মহতী চকার ।
সা কৌশিকী ভবতি কাশয়শাঃ কৃশোদ-
র্যাত্মাঙ্গজা তব মহেশ্বরি কশ্চিদংশঃ ॥ ৭.২৩ ॥
মায়ে শিবে শ্রিতবিপদ্বিনিহন্ত্রি মাতঃ
পশ্য প্রসাদভরশীতলয়া দৃশা মাম্ ।
এষোঽহমাত্মজকলত্রসুহৃত্সমেতো
দেবি ত্বদীয়চরণং শরণং গতোঽস্মি ॥ ৭.২৪ ॥
ধিন্বন্তু কোমলপদাঃ শিববল্লভায়া-
শ্চেতো বসন্ততিলকাঃ কবিকুঞ্জরস্য ।
আনন্দয়ন্তু চ পদাশ্রিতসাধুসঙ্ঘং
কষ্টং বিধূয় সকলং চ বিধায় চেষ্টম্ ॥ ৭.২৫ ॥ 175
%c02-q4/Shailaja.Dhulipala/umasahasram\_ashtamasthabakam.txt medskip
অষ্টমঃ স্তবকঃ
চরিত্রত্রয়ম্ (অনুষ্টুব্বৃত্তম্)
তমসামভিতো হন্তা চণ্ডিকাহাসবাসরঃ ।
সতাং হৃদয়রাজীববিকাসায় প্রকল্পতাম্ ॥ ৮.১ ॥
য়া নিদ্রা সর্বভূতানাং য়োগনিদ্রা রমাপতেঃ ।
ঈড্যতাং সা মহাকালী মহাকালসখী সখে ॥ ৮.২ ॥
বিরিঞ্চিনা স্তুতে মাতঃ কালি ত্বং চেন্ন মুঞ্চসি ।
মধুকৈটভসংহারং করোতু কথমচ্যুতঃ ॥ ৮.৩ ॥
বাসবঃ কাশনীকাশয়শোলঙ্কৃতদিঙ্মুখঃ ।
মহোগ্রবিক্রমাদ্যস্মাদাসীদাজৌ পরাঙ্মুখঃ ॥ ৮.৪ ॥
য়ত্প্রতাপেন সন্তপ্তো মন্যে বাডবরূপভৃত্ ।
ভগবাননলোঽদ্যাপি সিন্ধুবাসং ন মুঞ্চতি ॥ ৮.৫ ॥
কুর্বাণে ভূতকদনং য়স্মিন্বিস্মিতচেতসঃ ।
এষ এবান্তকো নাহমিত্যাসীদন্তকস্য ধীঃ ॥ ৮.৬ ॥
রণে য়েনাতিরস্কৃত্য ত্যক্তো রাক্ষস ইত্যতঃ ।
চিরায় হরিদীশেষু কোণেশঃ প্রাপ্তবান্যশঃ ॥ ৮.৭ ॥
য়ন্নিয়ন্তুমশক্তস্য কুর্বাণমসতীঃ ক্রিয়াঃ ।
নিয়ন্তুরসতামাসীত্পাশিনো মলিনং য়শঃ ॥ ৮.৮ ॥
বাহুবীর্যপরাভূতো য়স্য প্রায়েণ মারুতঃ ।
বভূব ক্ষণদান্তেষু রতান্তপরিচারকঃ ॥ ৮.৯ ॥
নিধীন্যেন জিতো হিত্বা রাজরাজঃ পলায়িতঃ ।
স্পষ্টং বভাণ মাধুর্যং প্রাণানামখিলাদপি ॥ ৮.১০ ॥
য়স্মিন্নুত্তরপূর্বস্যা দিশ একাদশাধিপাঃ ।
কুণ্ঠা বভূবুরাত্মীয়কণ্ঠোপমিতকীর্তয়ঃ ॥ ৮.১১ ॥
নিজশুদ্ধান্তকান্তানামাননৈরেব নির্জিতম্ ।
ললজ্জে য়ঃ পুনর্জিত্বা শূরমানী সুধাকরম্ ॥ ৮.১২ ॥
বালস্যেব ক্রীডনকৈঃ প্রবীরৈর্যস্য খেলতঃ ।
লীলাকন্দুকধীরাসীদ্দেবে দীধিতিমালিনি ॥ ৮.১৩ ॥
ত্রিয়ামাচরশুদ্ধান্তভ্রূবিলাসনিবারণম্ ।
বিষ্ণোঃ সুদর্শনং চক্রং য়স্য নাপশ্যদন্তরম্ ॥ ৮.১৪ ॥
মহিষং তং মহাবীর্যং য়া সর্বসুরদেহজা ।
অবধীদ্দানবং তস্যৈ চণ্ডিকায়ৈ নমো নমঃ ॥ ৮.১৫ ॥
মুখং তবাসেচনকং ধ্যায়ং ধ্যায়ং নিরন্তরম্ ।
মৃগেন্দ্রবাহে কালেন মৃডস্ত্বন্মুখতাং গতঃ ॥ ৮.১৬ ॥
কার্তিকীচন্দ্রবদনা কালিন্দীবীচিদোর্লতা ।
অরুণাম্ভোজচরণা জয়তি ত্রিরুচিঃ শিবা ॥ ৮.১৭ ॥
য়ত্তে কচভরঃ কালো য়দ্বাহুর্লোকরক্ষকঃ ।
য়ুক্তং দ্বয়ং শিবে মধ্যস্ত্বসন্নাকো ন নাকরাট্ ॥ ৮.১৮ ॥
স্বদেহাদেব য়া দেবী প্রদীপাদিব দীপিকা ।
আবির্ভভূব দেবানাং স্তুবতাং হর্তুমাপদঃ ॥ ৮.১৯ ॥
ধৈর্যচাতুর্যগাম্ভীর্যবীর্যসৌন্দর্যশালিনীম্ ।
রত্নং নিতম্বিনীজাতৌ মেনিরে য়াং সুরাসুরাঃ ॥ ৮.২০ ॥
য়দীয়হুঙ্কৃত্যনলে ধূম্রাক্ষোঽভবদাহুতিঃ ।
সমাপ্তিং ভীষণং য়াবন্নৈবাবাপ বিকত্থনম্ ॥ ৮.২১ ॥
চামুংডাশিবদূত্যৌ য়ত্ কলে দারুণবিক্রমে ।
ভক্ষয়ামাসতুর্মূর্তীঃ কীর্তিভিঃ সহ রক্ষসাম্ ॥ ৮.২২ ॥
য়স্যাঃ শূলে জগামাস্তং য়শঃ শুম্ভনিশুম্ভয়োঃ ।
নমামি বিমলশ্লোকাং কৌশিকীং নাম তামুমাম্ ॥ ৮.২৩ ॥
য়শোদাগর্ভজননাদ্ য়শোদাং গোকুলস্য তাম্ ।
বন্দে ভগবতীং নন্দাং বিন্ধ্যাচলনিবাসিনীম্ ॥ ৮.২৪ ॥
অম্বিকামুপতিষ্ঠন্তামেতাশ্চণ্ডীমনুষ্টুভঃ ।
প্রসন্নাঃ সাধ্বলঙ্কারাঃ সিদ্ধপদ্মেক্ষণা ইব ॥ ৮.২৫ ॥ 200
॥ সমাপ্তং চ দ্বিতীয়ং শতকম্ ॥
% c03-q1/Vijay.Sai.Reddy/c03-q1।txt medskip
তৃতীয়ং শতকম্
নবমঃ স্তবকঃ
মন্দহাসঃ (আর্যাবৃত্তম্)
শারদবলক্ষপক্ষক্ষণদাবৈমল্যশিক্ষকোঽস্মাকম্ ।
জাগর্তু রক্ষণায় স্থাণুপুরন্ধ্রীমুখবিকাসঃ ॥ ৯.১ ॥
ব্যাখ্যানং হর্ষস্য প্রত্যাখ্যানং শরত্সুধাভানোঃ ।
দিশতু হৃদয়প্রসাদং গৌরীবদনপ্রসাদো নঃ ॥ ৯.২ ॥
অন্তর্গতস্য হর্ষক্ষীরসমুদ্রস্য কশ্চন তরঙ্গঃ ।
হাসো হরহরিণদৃশো গতপঙ্কং মম করোতু মনঃ ॥ ৯.৩ ॥
দিশি দিশি বিসর্পদংশুপ্রশমিততাপং পরাস্তমালিন্যম্ ।
কুশলানি প্রদিশতু নঃ পশুপতিহৃদয়েশ্বরীহসিতম্ ॥ ৯.৪ ॥
অন্তর্গতং চ তিমিরং হরন্তি বিহসন্তি রোহিণীকান্তম্ ।
হসিতানি গিরিশসুদৃষো মম প্রবোধায় কল্পন্তাম্ ॥ ৯.৫ ॥
ভাষাতুষারদীধিতিদীধিত্যা সহ বিহায়সো রঙ্গে ।
বিচরন্ পুরহরতরুণীদরহাসো মে হরত্বেনঃ ॥ ৯.৬ ॥
রুদ্রাণীদরহসিতান্যস্মাকং সংহরন্তু দুরিতানি ।
য়েষামুদয়ো দিবসো ভূষাপীয়ূষকিরণস্য ॥ ৯.৭ ॥
স্কন্দজননীমুখেন্দোরস্মান্ পুষ্ণাতু সুস্মিতজ্যোত্স্না ।
মুনিমতিকৈরবিণীনামুল্লাসকথা য়দায়ত্তা ॥ ৯.৮ ॥
কমনীয়কণ্ঠমালামুক্তামণিতারকাবয়স্যো নঃ ।
কামান্ বিতরতু গৌরীদরহাসো নাম ধবলাংশুঃ ॥ ৯.৯ ॥
অনবদ্যকণ্ঠমালামুক্তাবলিকিরণনিবহসহবাসী ।
হরদয়িতাদরহাসো হরতু মমাশেষমজ্ঞানম্ ॥ ৯.১০ ॥
ঞ ইব জ্ঞদৃশ্য উত্তম ইলাধরাধীশনন্দিনীহাসঃ ।
পূর্ণং করোতু মানসমভিলাষং সর্বমস্মাকম্ ॥ ৯.১১ ॥
আলোকমাত্রতো য়ঃ শঙ্করমসমাস্ত্রকিঙ্করং চক্রে ।
অল্পোঽপ্যনল্পকর্মা হাসো নঃ পাতু স শিবায়াঃ ॥ ৯.১২ ॥
স্মরমতরতমীশং য়ঃ করোতি ভাবপ্রসঙ্গচাতুর্যা ।
দ্বিজগণপুরস্কৃতোঽব্যাত্ স শিবাহাসপ্রবক্তা নঃ ॥ ৯.১৩ ॥
রদবাসসা রথী মাং শরী করৈঃ পাতু পার্বতীহাসঃ ।
পাবকদৃশং জিগীষোঃ পঞ্চপৃষত্কস্য সেনানীঃ ॥ ৯.১৪ ॥
শিবহৃদয়মর্মভেদি স্মিতং তদদ্রীশবংশমুক্তায়াঃ ।
দশনদ্যুতিদ্বিগুণিতশ্রীকং শোকং ধুনোতু মম ॥ ৯.১৫ ॥
ব্রহ্মাণ্ডরঙ্গভাজো নট্যাঃ শিবসূত্রধারসহচর্যাঃ ।
শ্রীবর্ধনোঽনুলেপো মুখস্য হাসঃ পুনাত্বস্মান্ ॥ ৯.১৬ ॥
অধরপ্রবালশয়নে নাসাভরণপ্রভাবিলাসিন্যা ।
রমমাণো হররমণীহাসয়ুবা হরতু নঃ শোকম্ ॥ ৯.১৭ ॥
অধরোষ্ঠবেদিকায়াং নাসাভরণাংশুশাবকৈঃ সাকম্ ।
কুলমখিলমবতু খেলন্নদ্রিসুতাহাসবালো নঃ ॥ ৯.১৮ ॥
অনুলেপনস্য বীপ্সা দ্বির্ভাবঃ কুচতটীদুকূলস্য ।
হরতু হৃদয়ব্যথাং মে হসিতং হরজীবিতেশ্বর্যাঃ ॥ ৯.১৯ ॥
গিরিশাঙ্গরাগভসিতং স্বাগতবচসাঽভিনন্দদাদরতঃ ।
গিরিজালীলাহসিতং গরীয়সীং মে তনোতু ধিয়ম্ ॥ ৯.২০ ॥
দয়িতেন সঁল্লপন্ত্যাঃ সহ তুহিনমরীচিশিশুকিরীটেন ।
বাগমৃতবুদ্বুদোঽব্যাদলসো মামগভুবো হাসঃ ॥ ৯.২১ ॥
শুদ্ধঃ কুচাদ্রিনিলয়াদপি মুক্তাহারতো হরপুরন্ধ্র্যাঃ ।
বদনশ্রীপ্রাসাদে বিলসন্ হাসোঽলসোঽবতু মাম্ ॥ ৯.২২ ॥
ব্যর্থীভূতে চূতে গতবতি পরিভূতিমসিতজলজাতে ।
অনিতে সিদ্ধিমশোকে কমলেঽপি গলজ্জয়শ্রীকে ॥ ৯.২৩ ॥
বহুধা বিভেদ হৃদয়ং হরস্য বাণেন য়েন সুমবাণঃ ।
তদুমালীলাহসিতং মল্লীসুমমস্তু মে ভূত্যৈ ॥ ৯.২৪ ॥
অমলদরস্মিতচিহ্নাস্তা এতাঃ সর্বমঙ্গলা আর্যাঃ ।
কমনীয়তমাস্বসমামুপতিষ্ঠন্তামুমাং দেবীম্ ॥ ৯.২৫ ॥ 225
%c03-q2/Sriarsha.Pvss/Umashahasram-c03-q02।txt medskip
দশমঃ স্তবকঃ
কেশাদিপাদান্তবর্ণনম্ (ললিতাবৃত্তম্)
সঙ্ক্ষালনায় হরিতাং বিভূতয়ে
লোকত্রয়স্য মদনায় ধূর্জটেঃ ।
কাত্যায়নীবদনতঃ শনৈঃ শনৈর্-
নির্যন্তি শুভ্রহসিতানি পান্তু নঃ ॥ ১০.১ ॥
স্বল্পোঽপি দিক্ষু কিরণান্ প্রসারয়ন্
মন্দোঽপি বোধমমলং দধত্সতাম্ ।
শুভ্রোঽপি রাগকৃদনঙ্গবৈরিণো
হাসঃ পুরাণসুদৃশঃ পুনাতু নঃ ॥ ১০.২ ॥
চেতোহরোঽপ্যতিজুগুপ্সিতো ভবেত্
সর্বোঽপি জীবকলয়া য়য়া বিনা ।
সা বর্ণ্যতাং কথমপারচারুতা
পীয়ূষসিন্ধুরখিলেন্দ্রসুন্দরী ॥ ১০.৩ ॥
অত্যল্পদেববনিতাং চ পার্থিবৈর্-
ভাবৈর্বয়ং তুলয়িতুং ন শক্নুমঃ
তাং কিং পুনঃ সকলদেবসুন্দরী ।
লোকাক্ষিপারণতনুপ্রভামুমাম্ ॥ ১০.৪ ॥
বর্ষাপয়োদপটলস্য সান্দ্রতা
সূর্যাত্মজোর্মিচয়নিম্নতুঙ্গতা ।
কালাহিভূমিপতিদীর্ঘতা চ তে
কেশেষু ভর্গভবনেশ্বরি ত্রয়ম্ ॥ ১০.৫ ॥
ঈশানসুন্দরি তবাস্যমণ্ডলা-
ন্নীচৈর্নিতান্তমমৃতাংশুমণ্ডলম্ ।
কো বা ন কীর্তয়তি লোষ্টপিণ্ডকং
লোকে নিকৃষ্টমিহ মানবীমুখাত্ ॥ ১০.৬ ॥
বিভ্রত্যমর্ত্যভুবনস্থদীর্ঘিকা
পঙ্কেরুহাণি বদনায় তে বলিম্ ।
নো চেত্ কথং ভবতি সৌরভং মহ-
দ্ভিন্নে সুমেভ্য উরুকেশি তে মুখে ॥ ১০.৭ ॥
গীর্বাণলোকতটিনীজলেরুহাং
গন্ধে শুভে ভবতু তে মনোরতিঃ ।
লোকাধিরাজ্ঞি তব বক্ত্রসৌরভে
লোকাধিরাজমনসস্তু সম্মদঃ ॥ ১০.৮ ॥
কো ভাষতাং তব সবিত্রি চারুতাং
য়স্যাঃ স্মিতস্য ধবলদ্যুতির্লবঃ ।
য়স্যাঃ শরীররুচিসিন্ধুবীচয়ঃ
শম্পালতাঃ পৃথুলদীপ্তিভূময়ঃ ॥ ১০.৯ ॥
লোকাম্বিকে ন বিলসন্তি কে পুরো
মন্দস্মিতস্য তব রোচিষাং নিধেঃ ।
য়ে তু ব্যধায়িষত তেন পৃষ্ঠতো
হন্তৈষু কাঽপি তিমিরচ্ছটা ভবেত্ ॥ ১০.১০ ॥
কিং বা রদাবলিরুচির্মুখস্য কিং
সম্ফুল্লতা বরধিয়ঃ কিমূর্মিকা ।
সন্তোষপাদপসুমং নু শঙ্কর-
প্রেমস্বরূপমুত দেবি তে স্মিতম্ ॥ ১০.১১ ॥
দিক্ষু প্রকাশপটলং বিতন্বতা
কোটিপ্রভাকরবিভক্ততেজসা ।
নেত্রেণ তে বিষমনেত্রবল্লভে
পঙ্কেরুহং ক উপমাতি পণ্ডিতঃ ॥ ১০.১২ ॥
শ্রীকর্ণ এষ তব লোচনাঞ্চলে
ভান্ত্যা দয়াদয়িতয়া প্রবোধিতঃ ।
এতং সবিত্রি মম কঞ্চন স্তবং
শ্রুত্বা তনোতু ভরতাবনেঃ শ্রিয়ম্ ॥ ১০.১৩ ॥
স্বা নাসিকা ভবতি য়ুঞ্জতাং সতাং
সংস্তম্ভিনী চলতমস্য চক্ষুষঃ ।
ত্বন্নাসিকা পুরহরস্য চক্ষুষঃ
সংস্তম্ভিনী ভবতি চিত্রমম্বিকে ॥ ১০.১৪ ॥
বিম্বপ্রবালনবপল্লবাদিতঃ
পীয়ূষসারভরণাদ্ গুণাধিকঃ ।
গোত্রস্য পুত্রি শিবচিত্তরঞ্জকঃ
শ্রেষ্ঠো নিতান্তমধরাধরোঽপি তে ॥ ১০.১৫ ॥
দোর্বল্লিকে জননি তে তটিত্প্রভা-
মন্দারমাল্যমৃদুতাপহারিকে ।
নিশ্শেষবন্ধদমনস্য ধূর্জটের্-
বন্ধায় ভদ্রচরিতে বভূবতুঃ ॥ ১০.১৬ ॥
হস্তাব্জয়োস্তব মৃদুত্বমদ্ভুতং
গৃহ্ণাতি য়ে সদয়মেব ধূর্জটিঃ
অত্যদ্ভুতং জননি দাঢর্যমেতয়োঃ
শুম্ভাদিদর্পবিলয়ো য়য়োরভূত্ ॥ ১০.১৭ ॥
রাজন্তু তে কুচসুধাপ্রপায়িনো
লোকস্য মাতরনঘাঃ সহস্রশঃ ।
এতেষু কশ্চন গজাননঃ কৃতী
গায়ন্তি য়ং সকলদায়িসত্করম্ ॥ ১০.১৮ ॥
ত্বন্নাভিকূপপতিতাং দৃশং প্রভোর্-
নেতুং বিনির্মলগুণে পুনস্তটম্ ।
সৌম্যত্বদীয়হৃদয়প্রসারিতঃ
পাশঃ সবিত্রি তব রোমরাজিকা ॥ ১০.১৯ ॥
ত্বন্মধ্যমো গগনলোক এব চেত্
ত্বদ্দিব্যবৈভববিদো ন বিস্ময়ঃ ।
প্রাজ্ঞৈর্হি সুন্দরি পুরত্রয়দ্বিষ-
স্ত্বং দেহিনী ত্রিভুবনেন গীয়সে ॥ ১০.২০ ॥
নাভিহৃদাদ্বিগলিতঃ কটীশিলা-
ভঙ্গাত্ পুনঃ পততি কিং দ্বিধাকৃতঃ ।
কান্তোরুয়ুগ্মমিষতঃ সবিত্রি তে
ভাবারিপূর ইভশুণ্ডয়োঃ সমঃ ॥ ১০.২১ ॥
জঙ্ঘায়ুগং তব মহেশনায়িকে
লাবণ্যনির্ঝরি জগদ্বিধায়িকে ।
অন্তঃপরিস্ফুরদগুপ্তসুপ্রভা-
বাণাঢ্যতূণয়ুগলং রতীশিতুঃ ॥ ১০.২২ ॥
পুষ্পাস্ত্রশাসননিশান্তরাজ্ঞি তে
লোকত্রয়স্থখলকম্পনং বলম্ ।
শ্রোণীভরেণ গমনে কিল শ্রমং
প্রাপ্নোষি কেন তব তত্ত্বমুচ্যতাম্ ॥ ১০.২৩ ॥
য়ত্রৈব নিত্যবিহৃতেরভূদ্রমা
রাজীবমন্দিরচরীতি নামতঃ ।
তন্মে সদা ভণতু মঙ্গলং শিবা
পাদাম্বুসম্ভবমমেয়বৈভবম্ ॥ ১০.২৪ ॥
কেশাদিপাদকমলান্তগায়িনীঃ
কন্তুপ্রশাসননিশান্তনায়িকা ।
অঙ্গীকরোতু ললিতা ইমাঃ কৃতীর্-
গৌরী কবেশ্চরণকঞ্জসেবিনঃ ॥ ১০.২৫ ॥ 250
%c03-q3/Ravi.Shamavedam/uma-c03-q3।txt medskip
একাদশঃ স্তবকঃ
পাদাদিকেশান্তবর্ণনম্ (আর্যাবৃত্তম্)
ঝষকেতুনা প্রয়ুক্তঃ সম্মোহনচূর্ণমুষ্টিরীশানে ।
দরহাসো ধরদুহিতুঃ করোতু ভুবনং বশেঽস্মাকম্ ॥ ১১.১ ॥
উপজীবদ্ভিঃ কান্তের্লেশাংস্তে জগতি সুন্দরৈর্ভাবৈঃ ।
উপমিতুমঙ্গানি তব প্রায়ো লজ্জেঽম্ব য়তমানঃ ॥ ১১.২ ॥
অবতংসপল্লবতুলাং বিভ্রাণং শ্রুতিনতভ্রুবঃ শিরসি ।
চরণং ব্রজামি শরণং বামং কামারিললনায়াঃ ॥ ১১.৩ ॥
শঙ্করনয়নোন্মাদনমতিমধুরং ভাতি মতিমতা বর্ণ্যে ।
জঙ্ঘায়ুগং ভবত্যাঃ কুসুমপৃষত্কস্য সর্বস্বম্ ॥ ১১.৪ ॥
একৈকলোকনে দ্বয়মন্যোন্যস্মরণহেতুতামেতি ।
দেবি ভবস্য তবোরুঃ শুণ্ডা চ গজেন্দ্রবদনস্য ॥ ১১.৫ ॥
নাকোঽবলগ্নমীশ্বরি কটিরবনির্ভোগিনাং জগন্নাভিঃ ।
কুক্ষৌ ন কেবলং তে বহিরপি বপুষি ত্রয়ো লোকাঃ ॥ ১১.৬ ॥
মন্যে মহাকৃপাণং তব বেণীমচলপুত্রি মদনস্য ।
অসিধেনুকাং বিশঙ্কে নিশিততরাগ্রাং তু রোমালিম্ ॥ ১১.৭ ॥
দ্বিরদবদনেন পীতং ষড্বদনেনাথ সকলভুবনেন ।
অক্ষয়্যক্ষীরামৃতমম্বায়াঃ কুচয়ুগং জয়তি ॥ ১১.৮ ॥
জগদম্ব লম্বমানা পার্শ্বদ্বিতয়ে তবাগলাদ্ভাতি ।
সান্দ্রগ্রথিতমনোজ্ঞপ্রসূনমালেব ভুজয়ুগলী ॥ ১১.৯ ॥
জানন্তি শক্তিমসুরাঃ সুষমাং সখ্যো বদান্যতামৃষয়ঃ ।
মৃদুতাং তবাম্ব পাণের্বেদ স দেবঃ পুরাং ভেত্তা ॥ ১১.১০ ॥
কম্বুসদৃগম্ব জগতাং মণিবেষোডুস্রজাকৃতাকল্পঃ ।
কণ্ঠোঽনঘস্বরস্তে ধূর্জটিদোর্নয়নকর্ণহিতঃ ॥ ১১.১১ ॥
হরকান্তে বদনং তে দর্শং দর্শং বতংসশীতাংশুঃ ।
পূর্ণোঽপ্যবাপ কৃশতাং প্রায়েণাসূয়য়া শুষ্কঃ ॥ ১১.১২ ॥
চন্দ্রং রণায় সকলা চপলাক্ষীবদনজাতিরাহ্বয়তাম্ ।
তং তু মহসা মুখং তে মহেশকান্তে জিগায়ৈকম্ ॥ ১১.১৩ ॥
বদনকমলং তবেশ্বরি কমলজয়াদ্দর্পিতং সুধাভানুম্ ।
নির্জিত্য কমলজাতেরমলং মহদাজহার য়শঃ ॥ ১১.১৪ ॥
লাবণ্যমরন্দাশা ভ্রমদ্ভবালোকবম্ভরং পরিতঃ ।
মুগ্ধং মুখারবিন্দং জয়তি নগাধীশনন্দিন্যাঃ ॥ ১১.১৫ ॥
শুদ্ধেন্দুসারনির্মিতমাস্যার্ধং তে ভবানি ভালময়ম্ ।
সকলরমণীয়সারৈর্নির্মিতমর্ধান্তরং বিধিনা ॥ ১১.১৬ ॥
বদনং তবাদ্রিদুহিতর্বিজিতায় নতায় শীতকিরণায় ।
দ্বারপপদবীং প্রদদা বয়মিহ দরহাসনামধরঃ ॥ ১১.১৭ ॥
তে তে বদন্তু সন্তো নয়নং তাটঙ্কমালয়ং মুকুটম্ ।
কবয়ো বয়ং বদামঃ সিতমহসং দেবি তে হাসম্ ॥ ১১.১৮ ॥
বিম্বাধরস্য শোভামম্বায়াঃ কো নু বর্ণয়িতুমীষ্টে ।
অন্তরপি য়া প্রবিশ্য প্রমথপতের্বিতনুতে রাগম্ ॥ ১১.১৯ ॥
গণপতয়ে স্তনঘটয়োঃ পদকমলে সপ্তলোকভক্তেভ্যঃ ।
অধরপুটে ত্রিপুরজিতে দধাসি পিয়ূষমম্ব ত্বম্ ॥ ১১.২০ ॥
দৃক্পীয়ূষতটিন্যাং নাসাসেতৌ বিনির্মিতে বিধিনা ।
ভাসাং ভবতি শিবে তে মুখে বিহারো নিরাতঙ্কঃ ॥ ১১.২১ ॥
কমলাবিলাসভবনং করুণাকেলীগৃহং চ কমনীয়ে ।
হরদয়িতে তে বিনিতহিতে নয়নে তে জননি বিজয়েতে ॥ ১১.২২ ॥
সর্বাণ্যপ্যঙ্গানি শ্রীমন্তি তবেন্দুচূডকুলকান্তে ।
কবিনিবহবিনুতিপাত্রে শ্রোত্রে দেবি শ্রিয়াবেব ॥ ১১.২৩ ॥
অপি কুটিলমলিনমুগ্ধস্তব কেশঃ পুত্রি গোত্রসুত্রাম্ণঃ ।
বিভ্রত্সুমানি কান্যপি হৃদয়ং ভুবনপ্রভোর্হরতি ॥ ১১.২৪ ॥
চরণাদিকুন্তলান্তপ্রকৃষ্টসৌন্দর্যগায়িনীরেতাঃ ।
অঙ্গীকরোতু শম্ভোরম্ভোজদৃগাত্মজস্যার্যাঃ ॥ ১১.২৫ ॥ 275
%c03-q4/Jayanth.Ganapathiraju/transliteration.txt medskip
দ্বাদশঃ স্তবকঃ
শৃঙ্গারবর্ণনম্ (রথোদ্ধতাবৃত্তম্)
শর্বধৈর্যগুণশাতশস্ত্রিকা শম্বরারিজয়কেতুপট্টিকা ।
মন্দহাসিকলিকা মদাপদং পর্বতেন্দ্রদুহিতুর্ব্যপোহতু ॥ ১২.১ ॥
মুক্তভোগিকটকেন পাণিনা মুগ্ধগাত্রি পরিগৃহ্য তে করম্ ।
একদা শশিকিশোরশেখরঃ সঞ্চচার রজতাদ্রিভূমিষু ॥ ১২.২ ॥
তস্য তত্র পরিতঃ পরিভ্রমন্ বল্লভাং বকুলপুষ্পচুম্বিনীম্ ।
পার্বতি ত্বদলকোপমদ্যুতিঃ চ্ঞ্চরীকতরুণো মনোঽধুনোত্ ॥ ১২.৩ ॥
প্রেয়সীং চপলচারুলোচনামুল্লিখন্ বপুষি শৃঙ্গকোটিনা ।
ত্বদ্বিলোকিতনিভৈর্বিলোকিতৈঃ ধূর্জটেরমদয়ন্মনো মৃগঃ ॥ ১২.৪ ॥
মঞ্জুকুঞ্জভবনানি মালতীপুষ্পরেণুসুরভিঃ সমীরণঃ ।
পেশলা চ পিকবালকাকলী মোহমীশ্বরি হরস্য তেনিরে ॥ ১২.৫ ॥
অগ্রতঃ কুসুমশোভিতা লতাঃ পার্শ্বতস্ত্বমগপালবালিকে ।
সর্বতো মদনশিঞ্জিনীধ্বনির্ধীরতা কথমিবাস্য বর্ততাম্ ॥ ১২.৬ ॥
কীরকূজিতসমাকুলে বনে শম্ভুমম্ব তব পার্শ্ববর্তিনম্ ।
আজঘান মকরধ্বজশ্শরৈরর্দয়ন্ত্যবসরে হি শত্রবঃ ॥ ১২.৭ ॥
তাডিতো মকরকেতুনা শরৈরংসদেশমবলম্ব্য পণিনা ।
একহায়নকুরঙ্গলোচনা ত্বামিদং কিল জগাদ শঙ্করঃ ॥ ১২.৮ ॥
কাকলীকলকলং করোত্যসৌ বালচূতমধিরুহ্য কোকিলা ।
বাচমুদ্গির সরোজলোচনে গর্বমুন্নতমিয়ং বিমুঞ্চতু ॥ ১২.৯ ॥
ফুল্লকুন্দমকরন্দবাহিনো মল্লিকামুকুলধূলিধারিণঃ ।
কম্পয়ন্তি শিশবঃ সমীরণাঃ পল্লবানি হৃদয়ং চ তন্বি মে ॥ ১২.১০ ॥
বর্ণনেন হৃতচক্ষুষঃ শ্রিয়ঃ সুপ্রসন্নমধুরাকৃতীনি তে ।
অঙ্গকানি দয়িতে ভজেঽর্ভকঃ স্বেদবিন্দুহরণেন বাঽনিলঃ ॥ ১২.১১ ॥
তাবদেব মম চেতসো মুদে বর্হমেতদনঘাঙ্গি বর্হিণঃ ।
য়াবদক্ষিপথমেষ বিশ্লথো গাহতে ন কবরীভরস্তব ॥ ১২.১২ ॥
রাগবানধর এষ সন্ততং নির্মলদ্বিজসমীপবর্ত্যপি ।
এভিরস্য সহবাসতঃ প্রিয়ে নেষদপ্যপগতো নিজো গুণঃ ॥ ১২.১৩ ॥
চক্ষুষঃ সুদতি তে সগোত্রতা কৈরবৈর্নিশি দিনে কুশেশয়ৈঃ ।
কশ্যপৈরপি বসিষ্ঠবান্ধবৈর্ভূসুপর্বণ ইব দ্বিগোত্রিণঃ ॥ ১২.১৪ ॥
অল্পয়াঽপ্যতিসমর্থয়া স্মিতজ্যোত্স্নয়া গগনগং হরত্তমঃ ।
কেবলং সুবচনামৃতং কিরচ্চন্দ্রবিম্বমতুষারমাননম্ ॥ ১২.১৫ ॥
নিত্যমব্জমুখি তে পরস্পরশ্লিষ্টমশ্লথপটীকুটীরগম্ ।
শর্বরীভয়বিবর্জিতং স্থলীচক্রবাকমিথুনং কুচদ্বয়ম্ ॥ ১২.১৬ ॥
লালনীয়ময়ি দেবমৌলিভিঃ কোমলং চরণপল্লবদ্বয়ম্ ।
কচ্চিদদ্রিপুরুহূতপুত্রিকে ন স্থলী তুদতি কর্কশা তব ॥ ১২.১৭ ॥
এবমাদি বদতি ত্রিলোচনে ত্বন্মুখে লসতি মৌনমুদ্রয়া ।
আততান জলচারিকেতনো নর্তনং নগমহেন্দ্রবালিকে ॥ ১২.১৮ ॥
দেবি তে পুরজিতাবতংসিতঃ পারিজাতকুসুমস্রজা কচঃ ।
মানসং পুরজিতোঽমুনা হৃতং স্মর্যতে ক্ব মলিনাত্মনা কৃতম্ ॥ ১২.১৯ ॥
ব্রহ্মচর্যনিয়মাদচঞ্চলা নায়িকা য়দি লুলায়মর্দিনী ।
নায়কশ্চ সুমবাণসূদনো বেদ কো রতিরহস্যমাবয়োঃ ॥ ১২.২০ ॥
লোচনোত্সববিধৌ বিশারদে বারিদাবরণদোষবর্জিতে ।
মর্দয়ত্যপি নভোগতং তমঃ শ্যামিকারহিতসুন্দরাকৃতৌ ॥ ১২.২১ ॥
ভাতি শীতকিরণস্তনন্ধয়ে প্রাণনায়কজটাকুটীজুষি ।
শুভ্রপর্বততটে শুভাঙ্গি তে সম্মদায় ন বভূব কা নিশা ॥ ১২.২২ ॥
সন্তু ভূষণসুধাংশুদীধিতি ব্যক্তমুগ্ধমুখশোভয়োর্মিথঃ ।
তানি তানি গিরিজাগিরীশয়োঃ ক্রীডিতানি জগতো বিভূতয়ে ॥ ১২.২৩ ॥
মোদকাদনপরস্য সৃষ্টয়ে ক্রীডিতং জননি বাং কিমপ্যভূত্ ।
শক্তিভৃত্তনয়রত্নজন্মনে কিঞ্চিদীশ্বরি বভূব খেলনম্ ॥ ১২.২৪ ॥
মাধুরীরসপরিপ্লুতা ইমাঃ কাব্যকণ্ঠবিদুষো রথোদ্ধতাঃ ।
আদধত্বচলনাথনন্দিনী মানসে কমপি মোদমুত্তমম্ ॥ ১২.২৫ ॥ 300
॥ সমাপ্তং চ তৃতীয়ং শতকম্ ॥
%c04-q1/Prabhanjan.Pandalaneni/umasahasramu\_301-325।txt medskip
চতুর্থং শতকম্
ত্রয়োদশঃ স্তবকঃ
কটাক্ষঃ (উপজাতিবৃত্তম্)
ভবাম্বুধিং তারয়তাদ্ভবন্তং
হাসোঽদ্ভুতঃ কুঞ্জরবক্ত্রমাতুঃ ।
য়ো হন্তি বিম্বাধরলঙ্ঘনেঽপি
ব্যক্তালসত্বো হরিতাং তমাংসি ॥ ১৩.১ ॥
সক্তঃ সদা চন্দ্রকলাকলাপে
সর্বেষু ভূতেষু দয়াং দধানঃ ।
গৌরীকটাক্ষো রমণো মুনির্বা
মদীয়মজ্ঞানমপাকরোতু ॥ ১৩.২ ॥
কৃপাবলোকো নগকন্যকায়াঃ
করোতু মে নির্মলমন্তরঙ্গম্ ।
য়েনাঙ্কিতঃ শঙ্কর একতত্ত্বং
বিশ্বং লুলোকে জগতে জগৌ চ ॥ ১৩.৩ ॥
কালীকটাক্ষো বচনানি মহ্যং
দদাতু মোচামদমোচনানি ।
য়ত্পাতপূতং রঘুবংশকারং
নরাকৃতিং প্রাহুরজস্য নারীম্ ॥ ১৩.৪ ॥
য়ুষ্মাকমগ্র্যাং বিতনোতু বাণী-
মেণীদৃগেষা গিরিশস্য য়োষা ।
য়স্যাঃ কটাক্ষস্য বিসারি বীর্যং
গিরাময়ং মে বিবিধো বিলাসঃ ॥ ১৩.৫ ॥
নগাত্মজায়াঃ করুণোর্মিশালী
দৃগন্তসন্তানধুনীপ্রবাহঃ ।
ভীষ্মেণ তপ্তান্ভবনামকেন
গ্রীষ্মেণ য়ুষ্মাঁচ্ছিশিরীকরোতু ॥ ১৩.৬ ॥
অজস্রমার্দ্রা দর্যয়াঽন্তরঙ্গে
য়থা ভবো নিম্নগয়োত্তমাঙ্গে ।
সন্তাপশান্তিং ভবসুন্দরী মে
করোতু শীতেন বিলোকিতেন ॥ ১৩.৭ ॥
পুণ্যা সদাঽপীশ্বর এব সক্তা
পতিব্রতাসাম্যমিতা তবেক্ষা ।
কুলাচলাধীশ্বরকন্যকে মে
সংহরমংহোবিততের্বিধত্তাম্ ॥ ১৩.৮ ॥
শর্বস্য রামে নিয়মেন হীনা
শ্যামা তবেক্ষা গণিকাঙ্গনেব ।
নীচেঽপি মর্ত্যে নিপতত্যনর্ঘা
বিভর্তি না ষোডশ য়ঃ সুবর্ণান্ ॥ ১৩.৯ ॥
পদ্মায়তাক্ষি ক্ষিতিধারিকন্যে
কটাক্ষনামা তব কালসর্পঃ ।
য়ং সন্দশত্যেষ জগত্সমস্তং
বিস্মৃত্য চাহো ন দধাতি মোহম্ ॥ ১৩.১০ ॥
ঈশদ্বিষা শৈলমহেন্দ্রকন্যে
করোতি মৈত্রীং বিষমায়ুধেন ।
প্রভাষতে পাতকিনশ্চ পক্ষে
কুতঃ কটাক্ষো ন তবাম্ব মুগ্ধঃ ॥ ১৩.১১ ॥
কৃপান্বিতঃ কর্ণসমীপচারী
শ্রীমান্সদা পুণ্যজনানুকূলঃ ।
সাম্যং কুরুণামধিপস্য শম্ভোঃ
প্রাণপ্রিয়ে তে ভজতে কটাক্ষঃ ॥ ১৩.১২ ॥
কর্ণান্তিকস্থোঽপি ন ধর্মবৈরী
কৃষ্ণোঽপি মতার্নকুলং ন পাতি ।
শীতোঽপি সন্দীপয়তি স্মরাগ্নিং
হরস্য তে শৈলসুতে কটাক্ষঃ ॥ ১৩.১৩ ॥
অয়ং কটাক্ষস্তব তোয়বাহঃ
কারুণ্যকালে পরিজৃম্ভমাণঃ ।
গৃহেষু লীনান্ সুখিনো বিহায়
নিরাশ্রয়ান্ সিঞ্চতি বিশ্বমাতঃ ॥ ১৩.১৪ ॥
কস্যাপি বাচা বপুষা বলেন
সমস্য সর্বৈরপি য়ন্নিদেশাঃ ।
অম্ভোধিবেলাস্বপি ন স্খলন্তি
শম্ভোঃ প্রিয়েঽয়ং তব দৃক্প্রসাদঃ ॥ ১৩.১৫ ॥
দ্বারেষু তেষাং বিচরন্তি শূরাঃ
সৌধেষু সারঙ্গদৃশস্তরুণ্যঃ ।
প্রগল্ভবাচঃ কবয়ঃ সভাসু
শর্বাণি তে য়েষু কৃপাকটাক্ষঃ ॥ ১৩.১৬ ॥
য়ত্রাম্ব তে কোঽপি কটাক্ষলেশঃ
স দুর্জয়ঃ সঙ্গরসীম্নি শূরঃ ।
পূর্বং দিবং পূরয়তি দ্বিষদ্ভি-
স্ততো য়শোভির্ভুবমিন্দুগৌরৈঃ ॥ ১৩.১৭ ॥
য়ং তারকাকান্তকলাপকান্তে
ন লোকসে কোঽপি ন লোকতে তম্ ।
য়ং লোকসে তেন বিলোকিতোঽপি
শ্রিয়ং সমৃদ্ধাং সমুপৈতি লোকঃ ॥ ১৩.১৮ ॥
সুধাং হসন্তী মধু চাক্ষিপন্তী
য়শো হরন্তী বনিতাধরস্য ।
পরিষ্করোত্যস্য কবিত্বধারা
মুখং হরপ্রেয়সি লোকসে য়ম্ ॥ ১৩.১৯ ॥
সর্বেন্দ্রিয়ানন্দকরী পুরন্ধ্রী
বিদ্যাঽনবদ্যা বিপুলা চ লক্ষ্মীঃ ।
ইয়ং ত্রিরত্নী পুরুষস্য য়স্য
দুর্গে ত্বয়া দৃষ্টমিমং তু বিদ্মঃ ॥ ১৩.২০ ॥
মুধা ক্ষিপস্যদ্রিসুতে কটাক্ষান্
কৈলাসকান্তারমহীরুহেষু ।
ইতঃ কিরেষত্তব নাস্তি হানিঃ
সিদ্ধ্যত্যভীষ্টং চ সমস্তমস্য ॥ ১৩.২১ ॥
শীতাচলাধীশকুমারি শীতঃ
সংরক্ষণে সংশ্রিতমানবানাম্ ।
দুর্ধর্ষদুষ্টাসুরমর্দনেষু
নিতান্তমুষ্ণশ্চ তবাবলোকঃ ॥ ১৩.২২ ॥
রুষা সমেতং বিদধাতি নাশং
করোতি পোষং কৃপয়া সনাথম্ ।
অম্বৌষধস্যেব তবেক্ষিতস্য
য়োগস্য ভেদেন গুণস্য ভেদঃ ॥ ১৩.২৩ ॥
নাশায় তুল্যোদ্ধতকামলোভ-
ক্রোধত্রিদোষস্য ভবাময়স্য ।
শিবপ্রিয়ে বীক্ষিতভেষজং তে
ক্রীণানি ভক্ত্যা বদ ভোঃ কিয়ত্যা ॥ ১৩.২৪ ॥
অভিষ্টুতাং চারণসিদ্ধসঙ্ঘৈ-
স্ত্রিষ্টুব্বিশেষা অপি মর্ত্যসূনোঃ
কৃপাকটাক্ষৈর্বিনতান্পুনানাং
কপর্দিনঃ সম্মদয়ন্তু কান্তাম্ ॥ ১৩.২৫ ॥ 325
%c04-q2/eama.krishnan.Dadibhatla/c04-q2।txt medskip
চতুর্দশঃ স্তবকঃ
কালী গৌরী কুণ্ডলিনী চ (উপগীতিবৃত্তম্)
কারণমখিলমতীনাং বারণমন্তর্লসত্তমসঃ ।
মন্দস্মিতং মহেশ্বরসুদৃশো মে শ্রেয়সে ভবতু ॥ ১৪.১ ॥
বিশ্বতনুস্তনুগাত্রী বজ্রময়ী পুষ্পসুকুমারী ।
সর্বস্য শক্তিরবলা কালী গৌর্যম্বিকা জয়তি ॥ ১৪.২ ॥
তামাহুর্জগদংবাং গৌরীং কেচিত্ পরে কালীম্ ।
সা গৌরী মহিলাতনুরম্বরতনুরুচ্যতে কালী ॥ ১৪.৩ ॥
পাচকশক্তেঃ কাল্যাঃ কেবললিঙ্গেন ভিদ্যতে কালঃ ।
য়ত্পাকতো গভীরাদ্ভুবনে সর্বেঽপি পরিণামাঃ ॥ ১৪.৪ ॥
সর্বভুবনাশ্রয়ত্বাত্ কালী নাম্না দিগন্যেন ।
লোকে তু ব্যবহরণং বিদুষাং দিক্কালয়োর্ভাক্তম্ ॥ ১৪.৫ ॥
দিগদিতিরগাদ্যখণ্দা পরিণময়িত্রী স্মৃতা কালী ।
দক্ষস্যৈকা দুহিতা সা দ্বে গুণভেদমুগ্ধদৃশাম্ ॥ ১৪.৬ ॥
দেহে দেহে সেয়ং কুণ্ডলিনী নাম জগদম্বা ।
সা স্বপিতি সংসৃতিমতাং য়ুঞ্জানানাং প্রবুদ্ধা স্যাত্ ॥ ১৪.৭ ॥
মূলাধারাদগ্নির্জ্বলতি শিরস্তঃ শশী দ্রবতি ।
কুণ্ডলিনীময়ি মন্যে বীণাশয়নাত্প্রবুদ্ধেয়ম্ ॥ ১৪.৮ ॥
য়দ্দ্রবতি তত্র কিং ত্বং কিং তত্র ত্বমসি য়জ্জ্বলতি ।
কিমু তত্রাসি মহেশ্বরি য়দুভয়মেতদ্বিজানাতি ॥ ১৪.৯ ॥
এতাবগ্নীষোমৌ জ্বালভিশ্চন্দ্রিকাভিরপি ।
আবৃণুতস্তনুমনয়োর্ব্যক্তিত্বং মে পশুর্ভবতু ॥ ১৪.১০ ॥
অগ্নিস্ত্বং সোমস্ত্বং ত্বমধো জ্বলসি দ্র্বস্যূর্ধ্বম্ ।
অমৃতমনয়োঃ ফলং ত্বং তস্য চ ভোক্ত্রী চিদম্ব ত্বম্ ॥ ১৪.১১ ॥
কিন্নু সুকৃতং ময়া কৃতমখিলেশ্বরি কিং তপস্তপ্তম্ ।
ক্রীডয়সি মাং প্রতিক্ষণমানন্দসুধানিধাবন্তঃ ॥ ১৪.১২ ॥
ক্ষান্তং কিং মম দুরিতং শান্তং কিং দেবি তে স্বান্তম্ ।
অনুগৃহ্ণাসি বিচিত্রং মামপ্যপরাধিনাং প্রথমম্ ॥ ১৪.১৩ ॥
কালে কালে সন্ধ্যারূপা নোপাসিতা ভবতী ।
বিচ্ছিন্নঃ স্মার্তাগ্নিস্ত্রেতা কুত এব বহ্নীনাম্ ॥ ১৪.১৪ ॥
দাতুং নার্জিতমন্নং বহু দেবেভ্যশ্চ ভূতেভ্যঃ ।
য়ত্কিঞ্চিদার্জিতং বা কলত্রপুত্রান্বিতোঽশ্নামি ॥ ১৪.১৫ ॥
কশ্চিদপি পাপহারী ন পুরশ্চরিতশ্চ তে মন্ত্রঃ ।
কং গুণমভিলক্ষ্য মম প্রবুদ্ধ্যসেঽন্তর্জগন্মাতঃ ॥ ১৪.১৬ ॥
তব ময়ি পৃথক্তনূজপ্রেমা চেত্পক্ষপাতোঽয়ম্ ।
অথবা সতাং নিসর্গঃ সোঽয়ং ত্বয়ি চাংব সম্ভাব্যঃ ॥ ১৪.১৭ ॥
লক্ষ্যং বিনৈব মন্ত্রঃ কিং সিদ্ধ্যতি কোটিশোঽপ্যুক্তঃ ।
দধ্মস্তদ্যদি লক্ষ্যং তব রূপং গলতি হা মন্ত্রঃ ॥ ১৪.১৮ ॥
সঙ্কল্পানাং বাচামনুভূতীনাং চ য়ন্মূলম্ ।
য়ত্র প্রাণো বদ্ধস্তল্লক্ষ্যং দেবি তে রূপম্ ॥ ১৪.১৯ ॥ ॥ ৩৪৪।
নৈসর্গিকস্ববৃত্তেরহঙ্কৃতের্মূলমন্বিষ্য ।
ত্বাং কিল সাক্ষাত্কুরুতে রমণমহর্ষেরিয়ং দৃষ্টিঃ ॥ ১৪.২০ ॥
মন্যে পর্বতকন্যে মম সেয়মহঙ্কৃতির্মহতী ।
অবতরতা বর্ষগণৈরপি তন্মূলং ন লব্ধমহো ॥ ১৪.২১ ॥
এষ প্রৌঢো ভগবতি বহুলং গর্জত্যহঙ্কারঃ ।
এতস্মিন্নয়ি কালে ভবতী চাবোধি কুণ্ডলিনী ॥ ১৪.২২ ॥
তব পশ্চাত্সম্ভূতিং জানাতি ন সোঽয়মদ্যাপি ।
প্রাগিব গর্জতি ধীরং বিভেতি মৃত্যোর্ন নেদিষ্ঠাত্ ॥ ১৪.২৩ ॥
অতিপুষ্টমহঙ্কারং পশুমেতং তুভ্যমর্পয়তে ।
প্রমথপতিপ্রাণেশ্বরি গণপতিরেকান্তভক্তোঽয়ম্ ॥ ১৪.২৪ ॥
উপগীতয়ো গণপতেরুপতিষ্ঠন্তামিমাঃ প্রীত্যা ।
উত্সবসহস্রলোলামুকারবাচ্যস্য গৃহনাথাম্ ॥ ১৪.২৫ ॥ 350
%c04-q3/Sarada.Susarla/uma-c04-q3-itrans.txt medskip
পঞ্চদশঃ স্তবকঃ
শক্তেঃ স্বাগতম্ (স্বাগতাবৃত্তম্)
আপদামপহরন্তু ততিং নঃ
সম্পদামপি দিশন্তু সমৃদ্ধিম্ ।
দন্তকুন্দরুচিদত্তবলানি
ব্যোমকেশসুদৃশো হসিতানি ॥ ১৫.১ ॥
অল্পমপ্যধিকশক্তিসমৃদ্ধং
মন্দমপ্যধিকসূক্ষ্মবিসারম্ ।
সুস্মিতং স্মরবিরোধিরমণ্যাঃ
কল্পতাং মম কুলস্য শুভায় ॥ ১৫.২ ॥
পুষ্করাদ্রবিমতো ভুবমেতাং
ভূমিতশ্শশধরং ক্রমমাণা ।
নৈব মুঞ্চতি পদং বত পূর্বং
নোত্তরং ব্রজতি নেশপুরন্ধ্রী ॥ ১৫.৩ ॥
ভূষণেষ্বিব সবিত্রি সুবর্ণং
মৃত্তিকামিব ঘটেষ্বখিলেষু ।
বিশ্ববস্তুষু নিরস্তবিশেষাং
দেবি পশ্যতি সতীং বিবুধস্ত্বাম্ ॥ ১৫.৪ ॥
কিট্টভূতমখিলেশ্বরজায়ে
দৃশ্যজাতমখিলং নিজপাকে ।
প্রাণবুদ্ধিমনসামিহ বর্গঃ
সারভূত ইতি সূরিজনোক্তিঃ ॥ ১৫.৫ ॥
সারমীশ্বরি তিলেষ্বিব তৈলং
বিগ্রহেষু নিখিলেষু নিগূঢম্ ।
য়ে ধিয়া মথনতো বিদুরেকং
তে ভবন্তি বিবুধাস্ত্বয়ি লীনাঃ ॥ ১৫.৬ ॥
আয়সং ত্রিভুবনেশ্বরি পিণ্ডং
বহ্নিনেব তপসা তনুপিণ্ডম্ ।
য়স্য চিজ্জ্বলনজালময়ং স্যাত্
তপ্তমম্ব স তবালয়ভূতঃ ॥ ১৫.৭ ॥
য়োঽরণের্মথনতোঽতিপবিত্রং
বীতিহোত্রমিব বীতকলঙ্কঃ ।
প্রাণমুজ্জ্বলয়তি স্বশরীরাত্
ত্বামসাবভয়দেঽর্হতি য়ষ্টুম্ ॥ ১৫.৮ ॥
প্রাণতা শ্বসিতমেব বিচার্যং
কুর্বতা করণমেব নিভাল্যম্ ।
গচ্ছতা গমনমেব বিশোধ্যং
তত্তনৌ মথনমাগমবোধ্যম্ ॥ ১৫.৯ ॥
য়ো রসং পিবতি মূর্ধসরোজাত্
সোমপোঽয়মনঘঃ প্রয়তাত্মা ।
অগ্নিহোত্রমখিলেশ্বরি নিত্যং
মূলকুণ্ডদহনস্থিতিরস্য ॥ ১৫.১০ ॥
চিন্ময়ী পিবসি সোমমিমং কিং
সোম এব কিমসাবসি মাতঃ ।
পীয়সে পিবসি চ স্বয়মেকা
পেয়পাতৃয়ুগলং কিমু ভূত্বা ॥ ১৫.১১ ॥
তৈজসং কনকমগ্নিবিতপ্তং
তেজ এব কনকাঙ্গি য়থা স্যাত্ ।
মোদরূপকলয়া তব তপ্তং
তন্ময়ং ভবতি মোদজপিণ্ডম্ ॥ ১৫.১২ ॥
কাঽপি মোদলহরী তব বীচির্-
নির্গতা দশশতারসুধাব্ধেঃ ।
পূরয়ত্যখিলমম্ব শরীরং
নেহ বেদ্মি পরমে জডভাগম্ ॥ ১৫.১৩ ॥
সেয়মুত্তমতমা নিপতন্তী
শীতলাদ্দশশতারপয়োদাত্ ।
প্রেরিতাদখিলরাজ্ঞি ভবত্যা
বুদ্ধিসস্যমবতাদ্রসবৃষ্টিঃ ॥ ১৫.১৪ ॥
দুগ্ধসিন্ধুমথনাদমৃতং বা
শব্দসিন্ধুমথনাত্প্রণবো বা ।
লভ্যতে সুকৃতিভিস্তব বীচির্-
মূর্ধকঞ্জমথনাদ্রস এষঃ ॥ ১৫.১৫ ॥
অস্থিষু প্রবহতি প্রতিবেগং
মজ্জসারমমৃতং বিদধানা ।
বিভ্রতী মদমনুষ্ণমদোষং
মূর্ধকঞ্জনিলয়ে তব ধারা ॥ ১৫.১৬ ॥
তৈত্তিরীয়কথিতো রসলাভঃ
সোঽয়মেব সকলাগমবর্ণ্যে
এতদেব শশিমণ্ডলনাথে
তন্ত্রভাষিতপরামৃতপানম্ ॥ ১৫.১৭ ॥
মূর্ধসোমমজরামররূপে
য়ুক্তবীক্ষণকরেণ নিপীড্য ।
শম্ভুসুন্দরি সুনোমি ধিনোমি
ত্বাং প্রদীপ্তকুলকুণ্ডনিশান্তাম্ ॥ ১৫.১৮ ॥
দৃষ্টিরেব রবিদীধিতিরুগ্রা
শীর্ষকঞ্জশশিনং প্রবিশন্তী ।
শীতলামৃতময়ী খলু ভূত্বা
য়োগিনো দ্রবতি মোদকলা তে ॥ ১৫.১৯ ॥
মূর্ধনি দ্রবসি য়োগয়ুতানাং
চক্ষুষি জ্বলসি শঙ্করভামে
তিষ্ঠসি স্থিরপদা কুলকুণ্ডে
বাহ্যতঃ স্খলসি নৈব কদাঽপি ॥ ১৫.২০ ॥
সা য়দি দ্রবতি মোদকলা স্যাত্
সা য়দি জ্বলতি চিত্কলিকা স্যাত্ ।
সা পরা স্থিরপদা য়দি তিষ্ঠ-
ত্যক্ষরা ভবতি কাচন সত্তা ॥ ১৫.২১ ॥
পশ্যতা নয়নমণ্ডলবৃত্তিং
গৃহ্যসে ত্বমচলাধিপকন্যে ।
জানতা দশশতারবিলাসং
স্পৃশ্যসে বিদিতমম্ব রহস্যম্ ॥ ১৫.২২ ॥
ব্যাপ্তশক্ত্যসুবলেন লসন্তী
ভানুবিম্বনয়নেন তপন্তী ।
চন্দ্রবিম্বমনসা বিহরন্তী
সা পুনর্জয়তি মূর্ধ্নি বসন্তী ॥ ১৫.২৩ ॥
স্বাগতং সকললোকনুতায়ৈ
স্বাগতং ভুবনরাজমহিষ্যৈ ।
স্বাগতং ময়ি ভৃশং সদয়ায়ৈ
স্বাগতং দশশতারমিতায়ৈ ॥ ১৫.২৪ ॥
সত্কবিক্ষিতিভুজো ললিতাভিঃ
স্বাগতাভিরনঘাভিরিমাভিঃ ।
স্বাগতং ভণিতমস্তু ভবান্যৈ
খেলনায় শির এতদিতায়ৈ ॥ ১৫.২৫ ॥ 375
%c04-q4/Kamesvararao.Tata/c04-q4।txt medskip
ষোডশঃ স্তবকঃ
অধ্যাত্মং শক্তিবৈভবম্ (কুমারললিতাবৃত্তম্)
মহোবিহতমোহং মহেশমহিলায়াঃ ।
স্মিতং বিতনুতান্মে গৃহেষু মহমগ্র্যম্ ॥ ১৬.১ ॥
ইয়দ্বহুলগোলং জগল্লঘু দধানা ।
পিতামহমুখৈরপ্যখণ্ডিতবিধানা ॥ ১৬.২ ॥
অদুষ্টচরিতেভ্যঃ শুভান্যভিদধানা ।
কুলানি মলিনানাং হতানি বিদধানা ॥ ১৬.৩ ॥
দুকূলমরুণাংশুপ্রভং পরিদধানা
হরস্য রজতাদ্রিক্ষিতীশিতুরধীনা ॥ ১৬.৪ ॥
মুনীন্দ্রকৃততন্ত্রপ্রসিদ্ধবহুদানা
উমা বলমলং নস্তনোত্বতুলমানা ॥ ১৬.৫ ॥
নিরস্তবিষয়াং য়দ্ দধাতি মতিকীলাম্ ।
সমস্তজগদীশে ধৃতিস্তব মতেয়ম্ ॥ ১৬.৬ ॥
শ্রুতা প্রবণচিত্তং স্মৃতা নরমপাপম্ ।
ধৃতা হৃদি বিধত্সে গতস্বপরভাবম্ ॥ ১৬.৭ ॥
অহংমতিতটিন্যাঃ সতামবনিমূলম্ ।
ত্বমেব কিল সেয়ং মহর্ষিরমণোক্তিঃ ॥ ১৬.৮ ॥
অহংমতিলতায়াস্ত্বয়ীশবধু কন্দে ।
স্থিতোঽম্ব ভুবনস্য প্রবিন্দতি রহস্যম্ ॥ ১৬.৯ ॥
য়দেতদখিলাম্ব প্রসিদ্ধমিব দৃশ্যম্ ।
তবৈব কিল জালং গতো ভণতি মূলম্ ॥ ১৬.১০ ॥
প্রপশ্যসি পরাচী জগদ্বিবিধভেদম্ ।
স্বতঃ কিমপি নান্যত্প্রতীচি পুরতস্তে ॥ ১৬.১১ ॥
স্তুতা ভবসি শশ্বত্ স্মৃতা চ ভজনে ত্বম্ ।
ধৃতা ভবসি য়োগে ততা ভবসি বোধে ॥ ১৬.১২ ॥
স্তুতা দিশসি কামং স্মৃতা হরসি পাপম্ ।
ধৃতাঽস্যধিকশক্ত্যৈ ততা ভবসি মুক্ত্যৈ ॥ ১৬.১৩ ॥
বিশুধ্যতি য়তাশী প্রমাদ্যতি ন শুদ্ধঃ ।
প্রমাদরহিতস্য স্ফুটে লসসি কঞ্জে ॥ ১৬.১৪ ॥
স্ফুটং য়দি সরোজং নটীব পটু নাট্যম্ ।
করোষি য়তবুদ্ধের্জগজ্জননি শীর্ষে ॥ ১৬.১৫ ॥
শিরোগতমিদং নঃ প্রফুল্লময়ি পদ্মম্ ।
অনল্পমকরন্দং ত্বমম্ব ভব ভৃঙ্গী ॥ ১৬.১৬ ॥
সরোজমতুদন্তী পিবাম্ব মকরন্দম্ ।
মহামধুকরি ত্বং ভজের্মদমমন্দম্ ॥ ১৬.১৭ ॥
অমঙ্গলমিতঃ প্রাঙ্ ময়েশবধু ভুক্তম্ ।
ইতঃ পরমমেয়ে সুখান্যনুভব ত্বম্ ॥ ১৬.১৮ ॥
অহঙ্কৃতিবশান্মে চিদীশ্বরি পুরাঽভূত্ ।
তবাভবদিদানীং মমাস্তি ন বিভুত্বম্ ॥ ১৬.১৯ ॥
য়দাঽভবদিয়ং মে তদাঽন্বভবদার্তিম্ ।
তবেশ্বরি ভবন্তী ভুনক্তু শমিদানীম্ ॥ ১৬.২০ ॥
করোত্বিয়মহন্তা বিবাদমধুনাঽপি ।
তথাঽপি পুরতস্তে মহেশ্বরি বিবীর্যা ॥ ১৬.২১ ॥
ইয়ং চ তব বুদ্ধের্যতো ভবতি বৃত্তিঃ
ইমামপি কুরু স্বাং ক্ষমাবতি বিরোষা ॥ ১৬.২২ ॥
সুধাব্ধিরিহ মাতস্তরঙ্গশতমালী ।
চিদভ্রপুরমত্র প্রভাপদমদভ্রম্ ॥ ১৬.২৩ ॥
কুরু ত্বমিদমেকং নিজালয়শতেষু ।
সবিত্রি বিহরাস্মিন্ য়থেষ্টময়ি দেহে ॥ ১৬.২৪ ॥
কুমারললিতানাং কৃতির্গণপতীয়া ।
করোতু মুদমেষা কপর্দিদয়িতায়াঃ ॥ ১৬.২৫ ॥ 400
॥ সমাপ্তং চ চতুর্থং শতকম্ ॥
%c05-q1/Mohana.Rao/us-ch5-q1।TXT medskip
পঞ্চমং শতকম্
সপ্তদশঃ স্তবকঃ
মদকরীশক্তিঃ (চম্পকমালাবৃত্তম্)
পাপবিধূতৌ নির্মলগঙ্গা তাপনিরাসে চন্দ্রমরীচিঃ ।
ভর্গপুরন্ধ্রীহাসকলা মে ভদ্রমমিশ্রং কাঽপি করোতু ॥ ১৭.১ ॥
শিষ্টকুলানাং সম্মদয়িত্রী দুষ্টজনানাং সংশময়িত্রী ।
কষ্টমপারং পাদজুষো মে বিষ্টপরাজ্ঞী সা বিধুনোতু ॥ ১৭.২ ॥
নূতনভাস্বদ্বিম্বনিভাঙ্ঘ্রিং শীতলরশ্মিদ্বেষিমুখাব্জাম্ ।
খ্যাতবিভূতিং পুষ্পশরারেঃ পূতচরিত্রাং য়োষিতমীডে ॥ ১৭.৩ ॥
উজ্জ্বলতারে ব্যোম্নি লসন্তী সারসবন্ধৌ ভাতি তপন্তী ।
শীতলভাসা চিন্তনকর্ত্রী পাতু কুলং মে বিষ্টপভর্ত্রী ॥ ১৭.৪ ॥
প্রাণমনোবাগ্ব্যস্তবিভূতির্লোকবিধাতুঃ কাচন ভূতিঃ ।
পুষ্করপৃথ্বীপাবকরূপা শুষ্কমঘং নঃ সা বিদধাতু ॥ ১৭.৫ ॥
ইষ্টফলানামম্ব সমৃদ্ধ্যৈ কষ্টফলানাং তত্ক্ষণধূত্যৈ ।
চেষ্টিতলেশোদ্দীপিতশক্তিং বিষ্টপভর্ত্রি ত্বামহমীডে ॥ ১৭.৬ ॥
ভূমিরুহাগ্রস্থাপিতভণ্ডাদ্যো মধু পায়ং পায়মজস্রম্ ।
বিস্মৃতবিশ্বো নন্দতি মাতস্তত্র কিল ত্বং ধাম দধাসি ॥ ১৭.৭ ॥
কোঽপি সহস্রৈরেষ মুখানাং শেষ ইতীড্যঃ পন্নগরাজঃ ।
উদ্গিরতীদং য়দ্বদনেভ্যো দেবি তনৌ মে তদ্বত পাসি ॥ ১৭.৮ ॥
সাকমমেয়ে দেবি ভবত্যা প্রাতুমহন্তা য়াবদুদাস্যা ।
তাবদিয়ং তাং মূর্ছয়তীশে পন্নগরাজোদ্গারজধারা ॥ ১৭.৯ ॥
শাম্যতিচিন্তাজীবিতমস্যামিন্দ্রিয়সত্তাঽপ্যস্তমুপৈতি ।
য়াতি নিরুদ্ধা হা গলদেশে সংশয়মেষা মাতরহন্তা ॥ ১৭.১০ ॥
গৌরি মহেশপ্রাণসখী মাং পাহি বিপন্নাং মাতরহন্তাম্ ।
সা য়দি জীবেদীশ্বরি তুভ্যং দাসজনস্তামর্পয়তেঽয়ম্ ॥ ১৭.১১ ॥
ত্বত্স্মৃতিবীর্যাচ্ছান্তিসমৃদ্ধাং মাতরহন্তাং শুদ্ধতমাং মে ।
আত্মভুজিষ্যাং কর্তুমিদানীং শাংতধিয়স্তে কোঽস্তি বিকল্পঃ ॥ ১৭.১২ ॥
মন্দরধারী নামৃতহেতুর্বাসুকিরজ্জুর্নামৃতহেতুঃ ।
মন্থনহেতুস্সাঽমৃতহেতুঃ সর্ববলাত্মা শর্বপুরন্ধ্রী ॥ ১৭.১৩ ॥
প্রাণিশরীরং মন্দরশৈলো মূলসরোজং কচ্ছপরাজঃ ।
পূর্ণমনন্তং ক্ষীরসমুদ্রঃ পৃষ্ঠগবীণা বাসুকিরজ্জুঃ ॥ ১৭.১৪ ॥
দক্ষিণনাডী নির্জরসেনা বামগনাডী দানবসেনা ।
শক্তিবিলাসো মন্থনকৃত্যং শীর্ষজধারা কাঽপি সুধোক্তা ॥ ১৭.১৫ ॥
কণ্ঠনিরুদ্ধে ভূরিবিষাগ্নৌ তৈজসলিঙ্গাবাসিহরেণ ।
ত্বদ্বলজাতং স্বাদ্বমৃত্তং কো দেবি নিপীয় প্রেত ইহ স্যাত্ ॥ ১৭.১৬ ॥
য়েন বিভুস্তে মাদ্যতি শর্বো য়ত্র শিবে ত্বং ক্রীডসি হৃষ্টা ।
সম্মদমূলং তং মদমাদ্যে বর্ধয় পুত্রেঽনুগ্রহপাত্রে ॥ ১৭.১৭ ॥
য়ো মদমীদৃঙ্মার্গমুপেক্ষ্য স্বর্বিভুপূজ্যে গর্বসমেতঃ ।
আহরতি শ্রীবাহ্যসমৃদ্ধ্যা না সুরয়া বা সোঽসুর উক্তঃ ॥ ১৭.১৮ ॥
তাম্যতি তীব্রাফেননিষেবী ক্লাম্যতি সংবিত্পত্রনিষেবী ।
ভ্রাম্যতি হালাভাণ্ডনিষেবী শাম্যতি শীর্ষদ্রাবনিষেবী ॥ ১৭.১৯ ॥
অস্তু বিরেকে পথ্যমফেনং পত্রমজীর্ণেষ্বস্তু নিষেব্যম্ ।
অস্তু হিতং তদ্যক্ষ্মণি মদ্যং সংসৃতিহারী দেবি রসস্তে ॥ ১৭.২০ ॥
নৈব মহান্তস্সত্ত্বসমৃদ্ধাঃ সর্বমদেষ্বপ্যম্ব চলন্তু ।
অল্পজনানাং মাদকবস্তুপ্রাশনমীশে নাশনমুক্তম্ ॥ ১৭.৪২১ ॥
কেঽপি য়জন্তে য়ন্মধুমাংসৈস্ত্বাং ত্রিপুরারের্জীবিতনাথে ।
অত্র ন য়াগো দূষণভাগী দ্রব্যসসঙ্গো দুষ্যতি য়ষ্টা ॥ ১৭.২২ ॥
দক্ষিণমার্গে সিদ্ধ্যতি ভক্তঃ সব্যসরণ্যাং সিদ্ধ্যতি বীরঃ ।
নেশ্বরি সব্যে নাপ্যপসব্যে সিদ্ধ্যতি দিব্যে ত্বধ্বনি মৌনী ॥ ১৭.২৩ ॥
নার্চনভারো নাপি জপোঽস্যাং দিব্যসরণ্যাং ভব্যতমায়াম্ ।
কেবলমম্বাপাদসরোজং নিশ্চলমত্যা মৃগ্যমজস্রম্ ॥ ১৭.২৪ ॥
কাচিদমূল্যা চংপকমালা বৃত্তনিবদ্ধা মঞ্জুলমালা ।
অস্তু গণেশস্যেশ্বরকান্তা কণ্ঠবিলোলা চংপকমালা ॥ ১৭.২৫ ॥ 425
%c05-q2/Subhadra.bala.Venuturupalli/c05-q2।txt medskip
অষ্টাদশঃ স্তবকঃ
রূপবিশেষাঃ কুণ্ডলিনীসমুল্লাসশ্চ (প্রহর্ষিণীবৃত্তম্)
ধুন্বন্ত্যস্তিমিরততিং হরিত্তটীনাং
ধিন্বন্ত্যঃ পুরমথনস্য লোচনানি ।
স্কন্দাম্বাহসিতরুচো হরন্তু মোহং
সান্দ্রং মে হৃদয়গতং প্রসহ্য সদ্যঃ ॥ ১৮.১ ॥
তন্বানা বিনতহিতং বিরোধিবর্গং
ধুন্বানা বুধজনমোদমাদধানা ।
সম্রাজ্ঞী ত্রিদিবধরারসাতলানাং
রুদ্রাণী ভণতু শিবানী মত্কুলস্য ॥ ১৮.২ ॥
য়োঽম্ব ত্বাং হৃদি বিদধত্তটিত্প্রকাশাং
পীয়ূষদ্যুতিমদহৃন্মুখারবিন্দাম্ ।
অন্যত্তু স্মৃতিপথতো ধুনোতি সর্বং
কামারেঃ সুদতি নতস্য ভুব্যসাধ্যম্ ॥ ১৮.৩ ॥
কালাভ্রদ্যুতিমসমানবীর্যসারাং
শক্ত্যূর্মিভ্রমকরশুক্লঘোরদংষ্ট্রাম্ ।
য়ো ধীরো মনসি দধাতি ভর্গপত্নি
ত্বামস্য প্রভবতি সঙ্গরেষু শস্ত্রম্ ॥ ১৮.৪ ॥
য়ঃ প্রাজ্ঞস্তরুণদিবাকরোজ্জ্বলাঙ্গীং
তন্বঙ্গি ত্রিপুরজিতো বিচিন্তয়েত্ত্বাম্ ।
তস্যাজ্ঞাং দধতি শিরস্সু ফুল্লজাজী-
মালাং বা ধরণিজুষো বশে ভবন্তঃ ॥ ১৮.৫ ॥
য়ো রাকাশশধরকান্তিসারশুভ্রাং
বিভ্রাণাং করকমলেন পুস্তকং ত্বাম্ ।
ভূতেশং প্রভুমস্কৃত্প্রবোধয়ন্তীং
ধ্যায়েদ্বাগ্ভবতি বশেঽস্য নাকদূতী ॥ ১৮.৬ ॥
জানীমো ভগবতি ভক্তচিত্তবৃত্তে-
স্তুল্যং ত্বং সপদি দধাসি রূপমগ্র্যম্ ।
প্রশ্নোঽয়ং ভবতি নগাধিনাথকন্যে
রূপং তে মদয়তি কীদৃশং স্মরারিম্ ॥ ১৮.৭ ॥
চারু স্যাদলমিতি বক্তুমম্ব শক্যং
রূপং তে ন বদতি কোঽপি কীদৃশং বা ।
সম্মোহং পরমুপয়ান্তি কান্তিভাণ্ডে
কামারেরপি নয়নানি য়ত্র দৃষ্টে ॥ ১৮.৮ ॥
সঙ্কল্পৈঃ কিমু তব ভূষণান্যভূবঁ-
চ্ছিল্পীন্দ্রাঃ কিমু বিদধুর্যথাঽত্র লোকে ।
তত্স্বর্ণং ভগবতি কীদৃশং মণীনাং
কিং রূপং ভবতি চ তত্র য়োজিতানাম্ ॥ ১৮.৯ ॥
য়ান্যঙ্গান্যখিলমনোজ্ঞসারভূতা-
ন্যেতেষামপি কিমু ভূষণৈরুমে তে ।
আহোস্বিল্ললিততমানি ভান্তি ভূয়ো
ভূষাভির্বিকৃততমাভিরপ্যমূনি ॥ ১৮.১০ ॥
মুক্তাভির্ভবতি তবাম্ব কিন্নু হারঃ
পীয়ূষদ্যুতিকরসারনির্মলাভিঃ ।
মুণ্ডৈর্র্বা ঘলঘলশব্দমাদধদ্ভিঃ
সঙ্ঘর্ষাত্ ত্রিভুবনসার্বভৌমভামে ॥ ১৮.১১ ॥
বস্ত্রং স্যাদ্যদি তব সর্বশাস্ত্রগম্যে
কার্পাসং দিবি চ তদুদ্ভবোঽনুমেয়ঃ ।
ক্ষৌমং চেদ্ভগবতি তস্য হেতুভূতাঃ
কীটাঃ স্যুর্গগনজগত্যপীতি বাচ্যম্ ॥ ১৮.১২ ॥
রুদ্রস্য প্রিয়দয়িতেঽথবা সুরদ্রুর্-
ভূষাণাং মণিকনকপ্রকল্পিতানাম্ ।
বস্ত্রাণামপি মনসে পরং হিতানাং
কামং তে ভবতি সমর্পকঃ সমর্থঃ ॥ ১৮.১৩ ॥
সুস্কন্ধো বহুবিটপঃ প্রবালশোভী
সম্ফুল্লপ্রসবসুগন্ধবাসিতাশঃ ।
বৃক্ষঃ কিং ভগবতি কল্পনামকোঽয়ং
সঙ্কল্পঃ কিমু তব কোঽপি দেবি সত্যঃ ॥ ১৮.১৪ ॥
সঙ্কল্পান্ন ভবতি কল্পপাদপোঽন্যঃ
স্বর্দোগ্ধ্রী পুনরিতরা ন কুণ্ডলিন্যাঃ ।
য়ঃ কুর্যাদ্ দ্বয়মিদমুদ্গতাত্মবীর্যং
কারুণ্যাত্তব ভুবি চাস্য নাকভাগ্যম্ ॥ ১৮.১৫ ॥
আপীনং ভবতি সহস্রপত্রকঞ্জং
বত্সোঽস্যাঃ পটুতরমূলকুণ্ডবহ্নিঃ ।
দোগ্ধাঽঽত্মা দহরসরোরুহোপবিষ্টো
মৌনং স্যাত্সুরসুরভেস্তনূষু দোহঃ ॥ ১৮.১৬ ॥
দোগ্ধ্র্যাস্তে ভগবতি দোহনেন লব্ধং
বত্সাগ্নিপ্রথমনিপানসদ্রবায়াঃ ।
দুগ্ধং স্বাদ্বমৃতময়ং পিবন্মমাত্মা
সন্তৃপ্তো ন ভবতি দুর্ভরোঽস্য কুক্ষিঃ ॥ ১৮.১৭ ॥
বত্সোঽগ্নিঃ পিবতি দৃঢাঙ্ঘ্রিরম্ব পশ্চা-
দশ্রান্তং পিবতি দুহন্ পুরোঽন্তরাত্মা ।
বৃদ্ধিং চ ব্রজতি পয়ঃ প্রতিপ্রদ্রোহং
দোগ্ধ্র্যাস্তে দ্রব ইহ কুণ্ডলিন্যপারঃ ॥ ১৮.১৮ ॥
সোমস্য দ্রবমিমমাহুরম্ব কেচিদ্
দুগ্ধাব্ধেরমৃতরসং গদন্তি কেঽপি ।
বাষ্পং কেঽপ্যভিদধতে তু কৌলকুণ্ডং
পীনোধস্স্রবমিতরে ভণন্তি ধেনোঃ ॥ ১৮.১৯ ॥
মূলে ত্বং জ্বলদলনপ্রকাশরূপা
বীণায়াং প্রবলমহামদোষ্মরূপা ।
শীর্ষাব্জে সততগলদ্রসস্বরূপা
ভ্রূমধ্যে ভবসি লসত্তটিত্স্বরূপা ॥ ১৮.২০ ॥
হার্দে চেদবতরসীহ পুণ্ডরীকে
ছায়াবত্সকলমপি প্রপশ্যসি ত্বম্ ।
আরূঢা দশশতপত্রমদ্রিপুত্রি
স্যাশ্চেত্ত্বং ভণসি জগত্সুধাসমুদ্রম্ ॥ ১৮.২১ ॥
নেত্রাভ্যাং সরসিরুহচ্ছদায়তাভ্যাং
বক্ত্রেণ প্রবিমলহাসভাসুরেণ ।
প্রত্যক্ষা মম মনসঃ পুরঃ পুরন্ধ্রী
কামারেঃ পরণিতমস্মদীয়ভাগ্যম্ ॥ ১৮.২২ ॥
পুণ্যানাং পরিণতিরেব ভূতভর্তুঃ
সিদ্ধানাং বলনিধিরেব কোঽপি গূঢঃ ।
ভক্তানাং দৃঢতরিরেব শোকসিন্ধৌ
মগ্নানাং মম জননী মহীধ্রপুত্রী ॥ ১৮.২৩ ॥
উদ্ধর্তুং বিনতজনং বিষাদগর্তাত্
সংস্কর্তুং ভুবনহিতায় য়োগয়ুক্তম্ ।
সংহর্তুং খলকুলমুদ্ধতং চ দর্পাদ্
ভর্গস্য প্রিয়তরুণী সদা সদীক্ষা ॥ ১৮.২৪ ॥
মৃদ্বীকাং মধুরতয়া সুধাং মহিম্না
গাম্ভীর্যাত্সুরতটিনীং চ নির্জয়ন্তী ।
শর্বাণীচরিতপরা প্রহর্ষিণীনাং
শ্রেণীয়ং জয়তু গণেশ্বরেণ বদ্ধা ॥ ১৮.২৫ ॥ 450
%c05-q3/Syam.Sunder.Vinjamuri/umAsahasram\_c05-q3।txt medskip
একোনবিংশঃ স্তবকঃ
ধ্যেয়ললিতারূপম্ (প্রমাণিকাবৃত্তম্)
প্রফুল্লকল্পপাদপপ্রসূনসদ্যশোহরম্ ।
মহারুজং ধুনোতু তে মহেশসুন্দরীস্মিতম্ ॥ ১৯.১ ॥
মুনীন্দ্রমূলবেদিভূধনঞ্জয়প্রবোধনম্ ।
য়তীন্দ্রহার্দপেটিকা কবাটবন্ধভেদনম্ ॥ ১৯.২ ॥
য়থাবিধিক্রিয়াপরদ্বিজাতিচিত্তশোধনম্ ।
মমাম্বিকাস্মিতং ভবত্বঘপ্রতাপরোধনম্ ॥ ১৯.৩ ॥
সুবর্ণসালভঞ্জিকা চরেব শোভয়াঽধিকা ।
অতীব মার্দবান্বিতা নবেব পুষ্পিতা লতা ॥ ১৯.৪ ॥
সুপর্বমৌলিরত্নভা বিরাজিহেমপাদুকা ।
মরালিকানিমন্ত্রকপ্রশস্তরত্ননূপুরা ॥ ১৯.৫ ॥
বলক্ষদীধিতিপ্রভাবিশেষহৃন্নখাবলী ।
মুনীন্দ্রশুদ্ধমানসপ্রমেয়পাদসৌষ্ঠবা ॥ ১৯.৬ ॥
ঘনীভবত্তটিত্প্রভাপ্রবাহকল্পজঙ্ঘিকা ।
মতঙ্গজেন্দ্রনাসিকা মনোজ্ঞসক্থিশোভিনী ॥ ১৯.৭ ॥
প্রসূনসায়কাগমপ্রবাদচুঞ্চুকাঞ্চিকা ।
বিশালকেশচুম্বিতোল্লসন্নিতম্বমণ্ডলা ॥ ১৯.৮ ॥
অজাণ্ডপিণ্ডসংহতিপ্রপূর্ণকুক্ষিশালিনী ।
অপারদিব্যকান্তিবার্নিধাননাভিদীর্ঘিকা ॥ ১৯.৯ ॥
বিসপ্রসূনসায়কচ্ছুরাভরোমরাজিকা ।
জগত্ত্রয়ীবসজ্জনোপজীব্যদুগ্ধভৃত্কুচা ॥ ১৯.১০ ॥
মহেশকণ্ঠবন্ধকপ্রশস্তবাহুবল্লরী ।
সমস্তবিষ্টপাভয়প্রদায়িপাণিপঙ্কজা ॥ ১৯.১১ ॥
বিলোলহারমৌক্তিকপ্রতানসংবদত্স্মিতা ।
বিশুদ্ধসুন্দরস্মিতপ্রকাশভাসিতাম্বরা ॥ ১৯.১২ ॥
সুকোমলোষ্ঠকম্পনপ্রভীতদুর্জয়াসুরা ।
সুয়ুক্তকুন্দকুট্মলপ্রকাশদন্তপঙ্ক্তিকা ॥ ১৯.১৩ ॥
শরত্সুধাংশুমণ্ডলপ্রভাবিগর্হণাননা ।
সুধামরন্দবজ্জপাসুমোপমাধরাধরা ॥ ১৯.১৪ ॥
তিলপ্রসূনচারুতাঽপহাসিভাসিনাসিকা ।
নবীনভাভনাসিকাবিলম্বিদিব্যমৌক্তিকা ॥ ১৯.১৫ ॥
বিশুদ্ধগণ্ডবিম্বিতস্বরূপরত্নকুণ্ডলা ।
মহামহস্তরঙ্গিতপ্রভাবশালিলোচনা ॥ ১৯.১৬ ॥
দলান্তরস্থয়ামিনীপ্রভুপ্রভালিকস্থলী ।
ময়ূরবর্হগর্হণপ্রকৃষ্টকেশভাসিনী ॥ ১৯.১৭ ॥
দিবাকরায়ুতোজ্জ্বলা হিমাংশুলক্ষশীতলা ।
তটিত্সহস্রভাসুরা নিরঙ্কচন্দ্রশেখরা ॥ ১৯.১৮ ॥
নভোন্তরালচারিণী মহাবিচিত্রকারিণী ।
কুলাগ্নিকুণ্ডশায়িনী জগত্কথাবিধায়িনী ॥ ১৯.১৯ ॥
নভস্তলে বলেশ্বরী ধরাতলে ক্রিয়েশ্বরী ।
দিবাকরে বিভেশ্বরী সুধাকরে রসেশ্বরী ॥ ১৯.২০ ॥
মহেশবেশ্মদীপিকা জগত্ত্রয়প্রমাপিকা ।
অশেষশীর্ষশাসিনী সমস্তহৃন্নিবাসিনী ॥ ১৯.২১ ॥
গুণস্তবে গুণস্তবে গুণপ্রকর্ষদায়িনী ।
বিচিন্তনে বিচিন্তনে বিশিষ্টশক্তিধায়িনী ॥ ১৯.২২ ॥
ভ্রমাকুলেন দুস্তরা ভবালসেন দুর্গমা ।
অমন্ত্রকেণ দুর্ভরা জগত্ত্রয়েণ দুর্জয়া ॥ ১৯.২৩ ॥
সুবর্ণচেলধারিণী সমস্তমোদকারিণী ।
বিলাসিনী নিরাময়া বিচিন্ত্যতাং মনস্ত্বয়া ॥ ১৯.২৪ ॥
পদাব্জবন্দিনঃ কবেরিয়ং প্রমাণিকাবলী ।
মহেশমানসেশ্বরী গৃহে মহায় কল্পতাম্ ॥ ১৯.২৫ ॥ 475
%c05-q4/Rekha.Venuturupalli/uma-c05-q4।txt medskip
বিংশঃ স্তবকঃ
সর্বসারময়ী (মণিবন্ধবৃত্তম্)
প্রীতিবিকাসে স্বল্পতমো রোষবিশেষে ভূরিতরঃ ।
অদ্ভুতহাসো বিশ্বসুবো রক্ষতু সাধুং হন্তু খলম্ ॥ ২০.১ ॥
সজ্জনচিত্তানন্দকরী সংশ্রিতপাপব্রাতহরী ।
লোকসবিত্রী নাকচরী স্তান্মম ভূয়ো ভদ্রকরী ॥ ২০.২ ॥
অর্চনকালে রূপগতা সংস্তুতিকালে শব্দগতা ।
চিন্তনকালে প্রাণগতা তত্ত্ববিচারে সর্বগতা ॥ ২০.৩ ॥
উজ্জ্বলরূপে নৃত্যকরী নিষ্প্রভরূপে সুপ্তিকরী ।
গোপিতরুপে সিদ্ধিকরী গোচররূপে বন্ধকরী ॥ ২০.৪ ॥
অম্বরদেশে শব্দবতী পাবকতাতে স্পর্শবতী ।
কাঞ্চনবীর্যে রূপবতী সাগরকাঞ্চ্যাং গন্ধবতী ॥ ২০.৫ ॥
অপ্স্বমলাসু স্পষ্টরসা চন্দ্রবিভায়াং গুপ্তরসা ।
সংসৃতিভোগে সর্বরসা পূর্ণসমাধাবেকরসা ॥ ২০.৬ ॥
চক্ষুষি দৃষ্টিশ্শাততমা চেতসি দৃষ্টিশ্চিত্রতমা ।
আত্মনি দৃষ্টিশ্শুদ্ধতমা ব্রহ্মণি দৃষ্টিঃ পূর্ণতমা ॥ ২০.৭ ॥
শীর্ষসরোজে সোমকলা ভালসরোজে শক্রকলা ।
হার্দসরোজে সূর্যকলা মূলসরোজে বহ্নিকলা ॥ ২০.৮ ॥
স্থূলশরীরে কান্তিমতী প্রাণশরীরে শক্তিমতী ।
স্বান্তশরীরে ভোগবতী বুদ্ধিশরীরে য়োগবতী ॥ ২০.৯ ॥
সারসবন্ধোরুজ্জ্বলভা কৈরববন্ধোঃ সুনদরভা ।
বৈদ্যুতবহ্নেরদ্ভুতভা ভৌমকৃশানোর্দীপকভা ॥ ২০.১০ ॥
য়োধবরাণামায়ুধভা য়োগিবরাণামীক্ষণভা ।
ভূমিপতীনামাসনভা প্রেমবতীনামাননভা ॥ ২০.১১ ॥
শস্ত্রধরাণাং ভীকরতা শাস্ত্রধরাণাং বোধকতা ।
য়ন্ত্রধরাণাং চালকতা মন্ত্রধরাণাং সাধকতা ॥ ২০.১২ ॥
গানপটূনাং রঞ্জকতা ধ্যানপটূনাং মাপকতা ।
নীতিপটূনাং ভেদকতা ধূতিপটূনাং ক্ষেপকতা ॥ ২০.১৩ ॥
দীধিতিধারা লোকয়তাং জীবিতধারা বর্তয়তাম্ ।
জ্ঞাপকধারা চিন্তয়তাং মাদকধারা দ্রাবয়তাম্ ॥ ২০.১৪ ॥
মন্ত্রপরাণাং বাক্যবলং য়োগপরাণাং প্রাণবলম্ ।
আত্মপরাণাং শান্তিবলং ধর্মপরাণাং ত্যাগবলম্ ॥ ২০.১৫ ॥
সূরিবরাণাং বাদবলং বীরবরাণাং বাহুবলম্ ।
মর্ত্যপতীনাং সৈন্যবলং রাগবতীনাং হাসবলম্ ॥ ২০.১৬ ॥
বৈদিকমন্ত্রে ভাববতী তান্ত্রিকমন্ত্রে নাদবতী ।
শাবরমন্ত্রে কল্পবতী সন্ততমন্ত্রে সারবতী ॥ ২০.১৭ ॥
ব্রহ্মমুখাব্জে বাগ্বনিতা বক্ষসি বিষ্ণোঃ শ্রীর্ললিতা ।
শম্ভুশরীরে ভাগমিতা বিশ্বশরীরে ব্যোম্নি ততা ॥ ২০.১৮ ॥
ভূগ্রহগোলৈঃ কন্দুকিনী বিষ্টপধানে কৌতুকিনী ।
য়াবদনন্তং বৈভবিনী প্রাণিষু ভূয়স্সম্ভবিনী ॥ ২০.১৯ ॥
কঞ্জভবাণ্ডে মণ্ডলিনী প্রাণিশরীরে কুণ্ডলিনী ।
পামরভাবে সল্ললনা পণ্ডিতভাবে মোদঘনা ॥ ২০.২০ ॥
নার্যপি পুংসা মূলবতী তন্ব্যপি শক্ত্যা ব্যাপ্তিমতী ।
ব্যাপ্তিমতীত্বে গুপ্তিমতী চিত্রবিচিত্রা কাঽপি সতী ॥ ২০.২১ ॥
দীধিতিরূপা চিত্তময়ী প্রাণশরীরাঽপ্যদ্বিতয়ী ।
ব্রহ্মশরীরং ব্রহ্মবিভা ব্রহ্মবিভূতির্ব্রহ্মপরম্ ॥ ২০.২২ ॥
বিষ্টপমাতা ভূরিকৃপা বিষ্টপরাজ্ঞী ভূরিবলা ।
বিষ্টপরূপা শিষ্টনুতা বিষ্টপপারে শিষ্টমিতা ॥ ২০.২৩ ॥
দুর্জনমূলোচ্ছেদকরী দীনজনার্তিধ্বংসকরী ।
ধীবললক্ষ্মীনাশকৃশং পুণ্যকুলং নঃ পাতু শিবা ॥ ২০.২৪ ॥
চন্দ্রকিরীটাম্ভোজদৃশঃ শান্তিসমৃদ্ধং স্বান্তমিমে ।
সম্মদয়ন্তু শ্রোত্রসুখাঃ সন্মণিবন্ধাঃ সূরিপতেঃ ॥ ২০.২৫ ॥ 500
॥ সমাপ্তং চ পঞ্চমং শতকম্ ॥
Shloka hailaja Dhulipala/umasahasram\_ch\_06\_q1।txt medskip
ষষ্ঠং শতকম্
একবিংশঃ স্তবকঃ
অর্ধনারীশ্বরঃ (অনুষ্টুব্বৃত্তম্)
ইতঃ পীত্বা কুচং স্কন্দে প্রসারিতকরে ততঃ ।
জয়তি স্মিতমুদ্ভূতং শিবয়োরেকদেহয়োঃ ॥ ২১.১ ॥
একতো মণিমঞ্জীরক্বাণাহূতসিতচ্ছদম্ ।
অন্যতো নূপুরাহীন্দ্রফূত্কারকৃততদ্ভয়ম্ ॥ ২১.২ ॥
গীর্বাণপৃতনাপালং বালং লালয়দেকতঃ ।
উত্সঙ্গে গণসম্রাজমর্ভকং বিভ্রদন্যতঃ ॥ ২১.৩ ॥
বিডম্বিতব্রহ্মচারিকোকৈকস্তনমেকতঃ ।
কবাটার্ধনিভং বিভ্রদ্বক্ষঃ কেবলমন্যতঃ ॥ ২১.৪ ॥
সেনান্যাঽঽস্বাদিতস্তন্যমনুফূত্কুর্বতৈকতঃ ।
ফূত্কারমুখরং নাগমুগ্রং জাগ্রতমন্যতঃ ॥ ২১.৫ ॥
একতো দোর্লতাং বিভ্রন্ মৃণালশ্রীবিডম্বিনীম্ ।
শুক্রশুণ্ডালশুণ্ডাভং চণ্ডং দোর্দণ্ডমন্যতঃ ॥ ২১.৬ ॥
কুত্রাপ্যবিদ্যমানেঽপি বন্দনীয়ে তদা তদা ।
পরস্পরকরস্পর্শলোভতো বিহিতাঞ্জলি ॥ ২১.৭ ॥
শক্রনীলসবর্ণত্বাদ্ ভাগয়োরুভয়োরপি ।
ঊর্ধ্বাধরাঙ্গসাপেক্ষসন্ধিজ্ঞানগলস্থলম্ ॥ ২১.৮ ॥
একতঃ কৈরবশ্রেণীনিদ্রামোচনলোচনম্ ।
অন্যতঃ কমলাবাসক্ষণাধায়কবীক্ষণম্ ॥ ২১.৯ ॥
একতশ্চক্ষুষা চারুতারেণাধীতবিভ্রমম্ ।
অন্যতঃ পাণিপাথোজে খেলতো মৃগবালতঃ ॥ ২১.১০ ॥
একতো ভালফলকে কাশ্মীরেণ বিশেষিতম্ ।
অন্যতোঽর্ধেক্ষণেনৈব রতিভ্রূবিভ্রমদ্রুহাঃ ॥ ২১.১১ ॥
একতঃ শীতলালোকং সাধুলোকশিবঙ্করম্ ।
অন্যতঃ প্রজ্বলত্প্রেক্ষং দুষ্টগোষ্ঠীভয়ঙ্করম্ ॥ ২১.১২ ॥
একতো মণিতাটঙ্কপ্রভাধৌতকপোলকম্ ।
অন্যতঃ কুণ্ডলীভূতকুণ্ডলীভূতকুণ্ডলি ॥ ২১.১৩ ॥
একতঃ কুন্তলান্ বিভ্রদিন্দ্রনীলোপমদ্যুতীন্ ।
অন্যতঃ পাবকজ্বালাপাটলাংশুচ্ছটা জটাঃ ॥ ২১.১৪ ॥
একতঃ কেশপাশেন কীর্ণেনোরসি ভাসুরম্ ।
অন্যতো লম্বমানস্য ভোগিনো হরতা শ্রিয়ম্ ॥ ২১.১৫ ॥
অবতংসিতমম্লানপারিজাতস্রজৈকতঃ ।
বিমলোল্লোলমালিন্যা বিভুধাপগয়াঽন্যতঃ ॥ ২১.১৬ ॥
রৌপ্যাচলকৃতাবাসং প্রাপ্যং য়ুক্তেন চেতসা ।
বস্তু রামাপুমাকারং হৃদি সন্নিদধাতু মে ॥ ২১.১৭ ॥
কান্তার্ধবিগ্রহে মাতর্জটার্ধাশ্চিকুরাস্তব ।
দধত্যদভ্রসন্ধ্যাভ্রয়ুক্তকালাভ্রবিভ্রমম্ ॥ ২১.১৮ ॥
দম্পত্যোর্যুবয়োরেষ লোপো য়ন্নাস্তি শৈলজে ।
বামং পার্শ্বং বিভোঃ শেতুং দাতুং তে দক্ষিণঃ করঃ ॥ ২১.১৯ ॥
লোকে স্ত্রী স্তনয়ুগ্মেন পুষ্ণাত্যেকং সুতং ন বা ।
স্তনেনৈকেন শর্বাণি পুষ্ণাসি ত্বং জগত্ত্রয়ম্ ॥ ২১.২০ ॥
খিদ্যন্তি য়োষিতঃ কুক্ষৌ বহন্ত্যোঽর্ভকমেককম্ ।
অর্ধকুক্ষৌ দধাসি ত্বং ত্রিলোকীমম্ব লীলয়া ॥ ২১.২১ ॥
অনুরূপা শিবস্য ত্বমনুরূপঃ শিবস্তব ।
অলঙ্কারোঽনুরূপো বামকলঙ্কোঽর্ভকঃ শশী ॥ ২১.২২ ॥
তবৈব তব দেহাংশো হরস্যৈব হরস্য য়ঃ ।
প্রাণাস্তু জগতাং ধাত্রি হরস্য ত্বং হরস্তব ॥ ২১.২৩ ॥
অবিভক্তং ভবানি স্বং ভবস্য তব চোভয়োঃ ।
সকৃত্সকরুণং চেতঃ সঙ্কল্পয়তু নশ্শিবম্ ॥ ২১.২৪ ॥
ভবস্য ভাগমুত্সৃজ্য ভবানী ভাগমাত্মনঃ ।
ভজত্বনুষ্টুভামাসাং সৃষ্টানাং নারসিংহিনা ॥ ২১.২৫ ॥ 525
%c06-q2/Karthik.Sitaram.Tenneti/c06-q2।txt medskip
দ্বাবিংশঃ স্তবকঃ
হরকুটুম্বকম্ (বিয়োগিনীবৃত্তম্)
অখিলস্য বিকাসকারণং ব্যসনিজ্ঞানিজনাবনেষু নঃ ।
বিতনোতু বিশেষতঃ শিবং শিবরাজীবদৃশো দরস্মিতম্ ॥ ২২.১ ॥
বিকলে সকলে সুরব্রজে ব্রজতি শ্যামলিমানমচ্যুতে ।
জগতস্সদয়ো হলাহলং চুলুকীকৃত্য ভয়ং নুনোদ য়ঃ ॥ ২২.২ ॥
নিগমৈস্তুরগী ভুবা রথী বিধিনা সারথিমান্ বিভেদ য়ঃ ।
কনকাদ্রিবরেণ কার্মুকী কমলাক্ষেণ শরী পুরত্রয়ম্ ॥ ২২.৩ ॥
অজিতস্য চ গাঢমত্সরৈঃ কমলাকান্তপুরস্সরৈস্সুরৈঃ ।
পদজায়ুধধারয়া রয়াদ্বধমাধত্ত জলন্ধরস্য য়ঃ ॥ ২২.৪ ॥
কমলাসনকঞ্জলোচনৌ ছললিঙ্গস্য শিরোঙ্ঘ্রি বীক্ষিতুম্ ।
বত হংসবরাহভূমিকৌ য়তমানাবপি য়স্য ন প্রভূ ॥ ২২.৫ ॥
নয়নং নিটলান্তরস্থিতং বিঘটয়্যেষদিবান্বিতো রুষা ।
ভুবনত্রয়নির্জয়োন্নতং মদনং গাঢমদং দদাহ য়ঃ ॥ ২২.৬ ॥
সকলে ধবলঃ কলেবরে হরিনীলোপলমঞ্জুলঃ ক্বচিত্ ।
অমৃতাংশুরিবাদধাতি য়ঃ পরমামক্ষিমুদং প্রপশ্যতাম্ ॥ ২২.৭ ॥
অবতংসতুষারদীধিতিদ্যুতিভির্যস্য য়শোভরৈরপি ।
সমমচ্ছতরীকৃতো দিশামবকাশস্সুতরাং প্রকাশতে ॥ ২২.৮ ॥
গগনানলজীবনানিলক্ষিতিসোমারুণসোময়াজিভিঃ ।
মহতো বত য়স্য মূর্তিভির্ভুবনং ক্রান্তমিদং সমন্ততঃ ॥ ২২.৯ ॥
সহ তেন ধবেন রাজতে বসুধাধারিণি কাঽপি রাজতে ।
বনিতা ভবতাপনাশিনী চরণপ্রেষ্যনিবেদিতাশিনী ॥ ২২.১০ ॥
বনিতাপুরুষৌ পুরাতনৌ বিমলে ব্যোমনি দেবদম্পতী ।
ভুবনত্রিতয়স্য তৌ বিভূ রজতাদ্রাবিহ সিদ্ধদম্পতী ॥ ২২.১১ ॥
গজচর্মধরঃ কপালভৃদ্ গৃহনাথো গৃহিণী তু কালিকা ।
রুধিরাবিলমুণ্ডমালিনী কথিতৌ তৌ বত পণ্ডিতৈঃ শিবৌ ॥ ২২.১২ ॥
স কিমিন্দুকলাশিরোমণিঃ কিমুতাশ্লীলকপালভূষণঃ ।
কিমুমে ভবতী কপালিনী কিমু বিভ্রাজিতরত্নমালিনী ॥ ২২.১৩ ॥
রমসেঽম্ব কপালমালিনী ক্বচিদীশেন কপালমালিনা ।
অতুলপ্রভনিষ্কমালিনা ক্বচিদত্যুত্তমরত্নমালিনী ॥ ২২.১৪ ॥
য়ুবয়োর্মরুতস্তনূভুবো বলবন্তো ভুবনপ্রকম্পনাঃ ।
শশিদীধিতিহারি য়দ্যশো নিগমে পাবনমম্ব গীয়তে ॥ ২২.১৫ ॥
গুরুমুত্তমমভ্রচারিণামসমব্রহ্মনিধাননায়কম্ ।
তব দেবি শিবে তনূভুবাং মরুতামন্যতমং প্রচক্ষতে ॥ ২২.১৬ ॥
দ্বিরদং বদনে মহামদং সিতদন্তচ্ছবিধৌতদিক্তটম্ ।
ইতরত্র মুখান্নরাকৃতিং বিদুরস্যৈব বিবর্তমদ্ভুতম্ ॥ ২২.১৭ ॥
অখিলামরনির্জয়োন্নতঃ প্রথনে তারকদানবো বলী ।
হৃতবীর্যমদো বভূব য়দ্ঘনশক্ত্যায়ুধতেজসাঽঞ্জসা ॥ ২২.১৮ ॥
অমলে হৃদি নির্মলাশনাচ্ছিথিলে গ্রন্থিচয়ে নরায় য়ঃ ।
পরিপক্বধিয়ে প্রদর্শয়েত্ তমসঃ পারমপারবৈভবঃ ॥ ২২.১৯ ॥
দ্রবিডেষু শিশুত্বমেত্য য়ো গিরিশশ্লোকবিশেষগায়িনীম্ ।
অমৃতদ্রবসারহারিণীং নিগমাভাং নিববন্ধ সংস্তুতিম্ ॥ ২২.২০ ॥
ভুবি ভট্টকুমারিলাখ্যয়া ভবমেত্যাধ্বররক্ষণায় য়ঃ ।
বরজৈমিনিভাষিতাশয়ং বহুলাভিঃ খলু য়ুক্তিভির্দধৌ ॥ ২২.২১ ॥
অধুনা বিধুনোতি য়স্তমো বিবুধপ্রেক্ষিতমার্গরোধকম্ ।
রমণাখ্যমহর্ষিবেষভৃত্শ্রিতশোণাচলচারুকন্দরঃ ॥ ২২.২২ ॥
স গুহোঽতিমহো মহামহাস্রিদশানাং প্রথিতশ্চমূপতিঃ ।
জগতামধিরাজ্ঞি কোঽপি তে সুতরাং প্রীতিপদং কুমারকঃ ॥ ২২.২৩ ॥
জয়তি ত্রিপুরারিভামিনী গণপত্যাদিমরুত্প্রসূরুমা ।
তমসূত সুরারিধূতয়ে ত্রিদশানামপি য়া চমূপতিম্ ॥ ২২.২৪ ॥
স্বকুটুম্বকথাভিধায়িনীর্গণনাথস্য বিয়োগিনীরিমাঃ ।
অবধারয়তু প্রসন্নয়া নগনাথপ্রিয়নন্দিনী ধিয়া ॥ ২২.২৫ ॥ 550
%c06-q3/Mohana Rao/us-ch6-q3।TXT medskip
ত্রয়োবিংশঃ স্তবকঃ
প্রকীর্ণকম্ (নরমনোরমাবৃত্তম্)
(অস্মিন্ স্তবকে তত্সবিতুরিতি গায়ত্রীমন্ত্রস্য
চতুর্বিংশতিবর্ণাঃ ক্রমশঃ পদ্যানাং
তৃতীয়পাদস্য চতুর্থবর্ণে দৃশ্যন্তে ) ।
কিরদিবামৃতং কিরণমালয়া ।
জয়তি তত্সিতং শিববধূস্মিতম্ ॥ ২৩.১ ॥
তব পদং পরে মম গুহান্তরে ।
স্ফুরতু সর্বদা বিকসিতং মুদা ॥ ২৩.২ ॥
পদমধোঽম্বুজান্ন কিল ভিদ্যতে ।
মদনবিদ্বিষঃ সদনরাজ্ঞি তে ॥ ২৩.৩ ॥
বিভুতয়োররীকৃতবহূদ্ভবৌ ।
বিদধতুর্জগত্ত্রয়মিদং শিবৌ ॥ ২৩.৪ ॥
তব তু খেলনে নলিনজাণ্ডকম্ ।
গিরিশবল্লভে ভবতি কন্দুকম্ ॥ ২৩.৫ ॥
সকলমস্ত্যুমে সদভয়ঙ্করে ।
তব করে পরে কিমপি নো নরে ॥ ২৩.৬ ॥
কিমিব বর্ণ্যতাং কশশিকুণ্ডলা ।
উডুমণিস্রজাপ্রবিলসদ্গলা ॥ ২৩.৭ ॥
ভণ নিরন্তরং বহুগুণামুমাম্ ।
গতভয়ং বিধেহ্যমলবাণি মাম্ ॥ ২৩.৮ ॥
অব জহীহি বা ননু ভজাম্যহম্ ।
ভুবনভর্ত্রি তে চরণমন্বহম্ ॥ ২৩.৯ ॥
গণপতেঃ শিরঃকমলচুম্বিনী ।
ভবতু গোপতিধ্বজকুটুম্বিনী ॥ ২৩.১০ ॥
দহরমজ্জনং বিদধতং জনম্ ।
পরমদেবতে নয়সি ধাম তে ॥ ২৩.১১ ॥
জননি বিজ্ঞতা ভবতু ধীমতাম্ ।
অনুভবস্তু তে করুণয়া সতাম্ ॥ ২৩.১২ ॥
অচলয়া ধিয়া হৃদি গবেষণম্ ।
বৃষহয়প্রিয়ানগরশোধনম্ ॥ ২৩.১৩ ॥
ন বিজহামি তে চরণনীরজম্ ।
অবনি ধীমতামব ন বা নিজম্ ॥ ২৩.১৪ ॥
পদমুমেঽম্ব তে হৃদি বিচিন্বতে ।
পলিতমস্তকাঃ পরমদেবতে ॥ ২৩.১৫ ॥
স্বয়মনাময়ে সকলধাত্র্যসি ।
নিজমহিম্নি সা ত্বময়ি তিষ্ঠসি ॥ ২৩.১৬ ॥
স্থিতিমসাদয়ঁস্তব পদাম্বুজে ।
বিধিমধিক্ষিপত্যলসনীরজে ॥ ২৩.১৭ ॥
স্যতু মদাপদং শিববধূপদম্ ।
য়দৃষয়ো বিধুস্ত্রিভুবনাস্পদম্ ॥ ২৩.১৮ ॥
গুণগণং গৃণঁস্তব শিবে শিবম্ ।
গতভয়োঽভবং মদমিতো নবম্ ॥ ২৩.১৯ ॥
তবকৃপাবশাত্ তদিদমব্যয়ে ।
জননি নঃ প্লুতিস্তব য়দঙ্ঘ্রয়ে ॥ ২৩.২০ ॥
নয়নদৃশ্যয়োরয়ি য়দন্তরম্ ।
তদমরস্তুতে তব বপুঃ পরম্ ॥ ২৩.২১ ॥
অহমিতি স্মৃতিঃ ক্ব নু বিভাসতে ।
ইতি বিচোদয়ন্ মহতি লীয়তে ॥ ২৩.২২ ॥
অমৃতসংজ্ঞকে সুখচিদাত্মকে ।
মতিমদর্থিতে জননি ধাম্নি তে ॥ ২৩.২৩ ॥
অয়ি মুদাস্পদং স্পৃশতি তে পদম্ ।
শ্বসিতয়াত্রয়া সততদৃষ্টয়া ॥ ২৩.২৪ ॥
দধতু সত্কবের্গণপতেরিমাঃ ।
নগভুবো মুদং নরমনোরমাঃ ॥ ২৩.২৫ ॥ 575
%c06-q4/Pattabhi Nadimpally/Arava \_satakamu \_chaturtha \_stabakamu \_576 \_600txt medskip
চতুর্বিংশঃ স্তবকঃ
প্রকীর্ণকম্ (সুপ্রতিষ্ঠাবৃত্তম্)
চন্দ্রিকাসিতং চণ্ডিকাস্মিতম্ ।
ভূতলে সতাং ভাতু ভূতয়ে ॥ ২৪.১ ॥
ভালচক্ষুষশ্চক্ষুষাং ধনম্ ।
কিঞ্চিদস্তু মে শস্তবর্ধনম্ ॥ ২৪.২ ॥
সাধুসন্ততিক্ষেমকারিণী ।
ঘোরদানবানীকদারিণী ॥ ২৪.৩ ॥
য়োগয়ুক্তসচ্চিত্তচারিণী ।
পাদসেবকপ্রাজ্ঞতারিণী ॥ ২৪.৪ ॥
পুষ্পবাণজিন্নেত্রহারিণী ।
পাতু মাং জগচ্চক্রধারিণী ॥ ২৪.৫ ॥
দ্বাদশান্তভূজাতশারিকা ।
সর্ববাঙ্ময়স্যৈককারিকা ॥ ২৪.৬ ॥
পুণ্যকর্মসু স্বচ্ছমস্তকা ।
য়োগশালিষু ছিন্নমস্তকা ॥ ২৪.৭ ॥
আত্মনি স্থিতেঃ সম্প্রদায়িকা ।
সর্বজন্মিনাং সম্প্রবর্তিকা ॥ ২৪.৮ ॥
মাং পুনাতু সত্পূজ্যপাদুকা ।
ভাললোচনপ্রাণনায়িকা ॥ ২৪.৯ ॥
দানতো য়শঃ পৌরুষাদ্রমা ।
সম্পদো মদঃ শীলতঃ ক্ষমা ॥ ২৪.১০ ॥
সত্যতো জগত্যত্র গৌরবম্ ।
য়জ্ঞতো দিবি স্থানমুজ্জ্বলম্ ॥ ২৪.১১ ॥
সংয়মাদঘব্রাতবীততা ।
য়োগতো মহাসিদ্ধিশালিতা ॥ ২৪.১২ ॥
শর্বনারি তে পাদসেবয়া ।
সর্বসত্ফলাবাপ্তিরগ্র্যয়া ॥ ২৪.১৩ ॥
নোদ্যমেন য়া সিদ্ধিরুত্তমা ।
বিশ্বনায়িকাবীক্ষিতেন সা ॥ ২৪.১৪ ॥
সম্পদাং রমা ভারতী গিরাম্ ।
ত্বং শিবে প্রভুঃ প্রাণসংবিদাম্ ॥ ২৪.১৫ ॥
চক্ষুষা নভোলক্ষ্যধারিণা ।
সিদ্ধ্যতীব তে দেবি ধারণা ॥ ২৪.১৬ ॥
আশিরো দধন্নাভিতোঽনিলম্ ।
দেবি বিন্দতি ত্বন্মুনির্বলম্ ॥ ২৪.১৭ ॥
হৃদ্গৃহান্তরে য়দ্বিশোধনম্ ।
তত্সবিত্রি তে স্যাদুপাসনম্ ॥ ২৪.১৮ ॥
কাঽপ্যহম্মতির্গোচরং বিনা ।
লোকধাত্রি তে রূপভাবনা ॥ ২৪.১৯ ॥
অস্যমণ্ডনং কোঽপি বিদ্যয়া ।
খণ্ডনং পরঃ প্রাহ না য়য়া ॥ ২৪.২০ ॥
মাতরেতয়া জীয়তে ত্বয়া ।
একয়া তনূভিন্নয়া ধিয়া ॥ ২৪.২১ ॥
বাহ্যদর্শনে বিশ্বপঙ্কিলা ।
অন্যথা ভবস্যম্ব কেবলা ॥ ২৪.২২ ॥
খণ্ডবন্নৃণাং ভাসি ভোগিনাম্ ।
অস্যভিন্নচিত্ কাঽপি য়োগিনাম্ ॥ ২৪.২৩ ॥
বন্ধ এষ য়দ্ভাসি খণ্ডিতা ।
মোক্ষ এষ য়দ্ভাস্যখণ্ডিতা ॥ ২৪.২৪ ॥
এতদীশিতুঃ পত্নি হৃন্মুদে ।
সৌপ্রতিষ্ঠসদ্গীতমস্তু তে ॥ ২৪.২৫ ॥ 600
॥ সমাপ্তং চ ষষ্ঠং শতকম্ ॥
%c07-q1/Madhusudhan.Reddy/uma\_c07-q1\_itrans.txt medskip
সপ্তমং শতকম্
পঞ্চবিংশঃ স্তবকঃ
ক্ষেত্রমালা (ইন্দ্রবজ্রাবৃত্তম্)
কন্যাকুমারী সুতরাং বদান্যা
মান্যা সমস্তৈঃ প্রকৃতেরনন্যা ।
আক্ষেপকং সাগরবুদ্বুদানাং
হাসং বিধত্তাং জগতঃ সুখায় ॥ ২৫.১ ॥
রক্ষ স্বচেতো মদমত্সরাদের্-
ভিক্ষস্ব কালে তনুরক্ষণায় ।
বীক্ষস্ব রামেশবধূপদাব্জং
মোক্ষস্বলাভে য়দি তেভিঽলাষঃ ॥ ২৫.২ ॥
লোকস্ব দূরীকৃতভক্তশোকং
হালাস্যনাথেক্ষণপুণ্যপাকম্ ।
ভীতিঃ সখে চেদ্ভবতঃ পবিত্রং
জ্যোতির্বিশেষং জলচারিনেত্রম্ ॥ ২৫.৩ ॥
য়ো লোকতে তামখিলাণ্ডরাজ্ঞী-
মজ্ঞানবিধ্বংসবিধানবিজ্ঞাম্ ।
অম্বাং পরাং জীবনলিঙ্গশক্তিং
ভূয়ঃ স কায়ং ন ভবে লভেত ॥ ২৫.৪ ॥
বিভ্রত্সহস্রং চ মুখানি শক্তো
বক্তুং গুণান্ কঃ কমলালয়স্য ।
জন্মাপি য়ত্র প্রভবেজ্জনানাং
মুক্ত্যৈ মুনীনামপি দুর্লভায়ৈ ॥ ২৫.৫ ॥
ব্যাঘ্রাঙ্ঘ্রিবাতাশনপূজিতস্য
নাট্যস্থলীনায়িকয়া শিবস্য ।
নেত্রাধ্বভাজা শিবকাময়া বো
মিত্রাণি কামাঃ ফলিনো ভবন্তু ॥ ২৫.৬ ॥
আলোকতেঽপীতকুচাময়ি ত্বা-
মালোলচিত্তামরুণাচলে য়ঃ ।
নির্বেদবান্ পর্বসুধাংশুবক্ত্রে
সর্বে বশে তস্য ভবন্তি কামাঃ ॥ ২৫.৭ ॥
য়ঃ কুণ্ডলীপট্টণরাজধানী-
মালোকতে কামপি কৃত্তমস্তাম্ ।
নিস্সারমানন্দকথাবিহীনং
সংসারমেতং স জহাতি বুদ্ধ্যা ॥ ২৫.৮ ॥
দৃষ্ট্বা বধূমাদিপুরীশ্বরস্য
য়ো লোচনারোচকমাধুনোতি ।
তস্যান্তরঙ্গং ধুতসর্বসঙ্গং
ভূয়ো ভবারোচকমাবৃণোতি ॥ ২৫.৯ ॥
কাঞ্চী রমণ্যাঃ কুরুতাং গৃহস্থে
ক্বাণৈর্মুদং কামপি কিঙ্কিণীনাম্ ।
কাঞ্চী ভুবঃ পুণ্যপুরী য়তীন্দ্র
ত্বামম্বিকানামরবৈর্ধিনোতু ॥ ২৫.১০ ॥
শ্রীকালহস্তিস্থলদর্শনস্য
কৈলাসবীক্ষাং পুনরুক্তিমাহুঃ ।
জ্ঞানং প্রদাতুং চরণাশ্রিতেভ্যো
জ্ঞানাম্বিকা য়ত্র নিবদ্ধদীক্ষা ॥ ২৫.১১ ॥
শ্রীশৈলশৃঙ্গস্য বিলোকনেন
সঙ্গেন হীনো ভবিতা মনুষ্যঃ ।
ধামাস্তি য়ত্র ভ্রমরালকায়াঃ
শান্তভ্রমং তদ্ভ্রমরাম্বিকায়াঃ ॥ ২৫.১২ ॥
তীরে বিপশ্চিদ্বর পশ্চিমাব্ধের্-
গোকর্ণগাং লোকয় ভদ্রকর্ণীম্ ।
বুদ্ধিং শিবাং সর্বমনোরথানাং
সিদ্ধিং চ য়দ্যস্তি মনোঽধিগন্তুম্ ॥ ২৫.১৩ ॥
ধাম্নি প্রসিদ্ধে করবীরনাম্নি
পুণ্যাভিধানাং কৃতসন্নিধানাম্ ।
দেবীং পরাং পশ্যতি য়ো বিরক্তো
মুক্তেঃ স পাণিগ্রহণায় শক্তঃ ॥ ২৫.১৪ ॥
জ্ঞানে দৃঢা তে য়দি কাপি কাঙ্ক্ষা
নানেহসং মিত্র মুধা ক্ষিপেমম্ ।
সেবস্ব দেবীং তুলজাপুরস্থাং
নৈব স্বরূপাদিতরা কিলেয়ম্ ॥ ২৫.১৫ ॥
গোপালিনীবেষভৃতং ভজস্ব
লীলাসখীং তাং ভুবনেশ্বরস্য ।
ইষ্টং হৃদিস্থং তব হস্তগং স্যাত্
কষ্টং চ সংসারভবং ন ভূয়ঃ ॥ ২৫.১৬ ॥
আরাধ্যতে বৈতরণীতটস্থা
য়েনেয়মম্বা বিরজোঽভিধানা ।
আরাধিতং তেন সমস্তমন্যত্
সারো ধরায়াময়মার্যগীতঃ ॥ ২৫.১৭ ॥
সঙ্গীয়মানং স্থলমার্যবৃন্দৈর্-
বৃন্দারকাণাং সরিতস্তটেঽস্তি ।
য়ঃ কালিকাং পশ্যতি কালকেশীং
তত্রাস্য কালাদপি নৈব ভীতিঃ ॥ ২৫.১৮ ॥
নীলাচলং সিদ্ধসমূহসেব্যং
লীলানিকেতং প্রবদন্তি য়স্যাঃ ।
ভদ্রা পরা কাচন গুহ্যমুদ্রা
কামেশ্বরী সা ভুবনস্য মূলম্ ॥ ২৫.১৯ ॥
মাঙ্গল্যগৌরীপদদর্শনস্য
কর্তা তু ভূত্বা সুকৃতস্য ভর্তা ।
আচারপূতৈরধিগম্যমগ্র্যং
স্থানং প্রপদ্যেত য়তো ন পাতঃ ॥ ২৫.২০ ॥
বারাণসী শুভ্রগিরেরনূনং
ক্ষেত্রং পবিত্রং ভুবনত্রয়েঽপি ।
অর্থে প্রজানাং বিধৃতান্নপাত্রা
গৌরী স্বয়ং য়ত্র বিশালনেত্রা ॥ ২৫.২১ ॥
বৃন্দারকারাধিতপাদপদ্মাং
নন্দামিমামিন্দুসমানবক্ত্রাম্ ।
আলোক্য বিন্ধ্যাচলবাসিনীং না
নালোচয়েত্সংসৃতিতো ভয়ানি ॥ ২৫.২২ ॥
আনন্দদেহামিহ মুক্তিসংজ্ঞাং
নারীং পরীরব্ধুমনা মনুষ্যঃ ।
দূতীং বৃণোতু প্রমথেশ্বরস্য
কান্তামবন্তীপুরনায়িকাং তাম্ ॥ ২৫.২৩ ॥
য়ত্রাচলচ্ছিদ্রকৃতা সহাহং
ভ্রাত্রা মুহুঃ খেলিতবান্ বনেষু ।
তং সিদ্ধদেবর্ষিনুতং স্মরামি
কৈলাসমাবাসগিরিং জনন্যাঃ ॥ ২৫.২৪ ॥
পূর্ণাঽম্বরে শীতকরেঽধিকারং
বিভ্রত্যগেন্দ্রে ধবলে সলীলা ।
ক্ষেত্রেষু কাশ্যাদিষু গুপ্তশক্তির্-
গৌরীন্দ্রবজ্রাসু চ সন্নিধত্তাম্ ॥ ২৫.২৫ ॥ 625
%c07-q2/Jayanth.Ganapathiraju/c07-q2।txt medskip
ষড্বিংশঃ স্তবকঃ
অপীতকুচাম্বা (দোধকবৃত্তম্)
আগমবিন্মতিকৈরবিণীনাং
বোধমজস্রমসৌ বিদধানঃ ।
পাতু মহেশবধূবদনাংশো
হাসশশী সকলানি কুলানি ॥ ২৬.১ ॥
আয়তলোচনচুম্বিতকর্ণা
দানয়শোজিততোয়দকর্ণা ।
শোণনগেশমনঃ প্রিয়বর্ণা
নাশয়তাজ্জগদার্তিমপর্ণা ॥ ২৬.২ ॥
বেদতুরঙ্গবিলোচনভাগ্যং
বেদশিরোনিচয়ৈরপি মৃগ্যম্ ।
শোকবিদারিসুধাকিরণাস্যং
শোণগিরৌ সমলোকি রহস্যম্ ॥ ২৬.৩ ॥
মুঞ্চ সমস্তমনোরথলাভে
সংশয়মদ্য করামলকাভে ।
দৃক্পথমাপ নগেন্দ্রতনূজা
সোঽহমিতঃ পরমন্তররাজা ॥ ২৬.৪ ॥
শিল্পবিদঃ প্রতিমাং প্রবিশন্তী
স্বল্পবিদাং তরণায় চকাস্তি ।
শোণধরাভৃতি সম্প্রতি লব্ধা
হন্ত চিরাদিয়মেব মমাম্বা ॥ ২৬.৫ ॥
ভারতভূবলয়েঽত্র বিশালে
সন্ত্বনঘানি বহূনি গৃহাণি ।
আস্যবিগীতসুধাকরবিম্বা
শোণগিরৌ রমতেঽত্র মদম্বা ॥ ২৬.৬ ॥
বারিতসংশ্রিতপাতকজালা
বারিধিবীচিনিরঙ্কুশলীলা ।
বারিজপত্রবিডম্বননেত্রা
বারণরাজমুখেন সপুত্রা ॥ ২৬.৭ ॥
আয়তবক্রঘনাসিতকেশী
তোয়জবাণরিপোর্হৃদয়েশী ।
কাশসুমাচ্ছয়শাঃ পরমৈষা
পাশভিদস্তু তবেন্দুবিভূষা ॥ ২৬.৮ ॥
পঙ্কজসম্ভবপূজিতপাদা
পঙ্কবিনাশনপাবননামা ।
কিঙ্করকল্পলতা পরমেয়ং
শঙ্করনেত্রসুধা শরণং নঃ ॥ ২৬.৯ ॥
চঞ্চলদৃগ্বিনতামরবল্লী
পঞ্চপৃষত্কশরাসনঝিল্লী ।
কাঞ্চনগর্ভমুখপ্রণুতেয়ং
পঞ্চমুখপ্রমদা শরণং নঃ ॥ ২৬.১০ ॥
অম্ব বিধূয় ভটান্মদনাদীন্
নূপুরনাদবিভীষিকয়ৈষঃ ।
হন্ত জহার বলেন মনো মে
শোণনগাঙ্ঘ্রিনিবাসিনি তেঽঙ্ঘ্রিঃ ॥ ২৬.১১ ॥
কর্ণপুটে কুরু মুগ্ধ মমোক্তিং
মুঞ্চ ধনাদিষু মানসসক্তিম্ ।
শোণগিরীন্দ্রবধূপদভক্তিং
শীলয় শীলয় য়াস্যসি মুক্তিম্ ॥ ২৬.১২ ॥
জীর্ণতরে জরয়াঽখিলদেহে
বুদ্ধিবলং চ বিলুম্পতি মোহে ।
হন্ত সবিত্রি তপন্মতিরন্তে
সেবিতুমিচ্ছতি না চরণং তে ॥ ২৬.১৩ ॥
তন্ত্রবিদো নবয়োনি তু চক্রং
শোণধরাধররূপমুশন্তি ।
অর্ধমমুষ্য বপুর্মদনারে-
রর্ধমগেন্দ্রসুতে তব গাত্রম্ ॥ ২৬.১৪ ॥
অস্তু নগেশ্বরনন্দিনি লিঙ্গং
তৈজসমেতদিহাপি তবাংশঃ ।
বীতগুণস্য বিনা তব য়োগং
দেবি শিবস্য কুতঃ খলু তেজঃ ॥ ২৬.১৫ ॥
স্থাপিতমূর্তিরিয়ং তব নম্যা
পূজয়িতুং জগদীশ্বরি রম্যা ।
শোণনগার্ধমিদং তব রূপং
কীর্তয়িতুং নগজে ধুতপাপম্ ॥ ২৬.১৬ ॥
শোণনগার্ধতনোঽনিশমঙ্কে
ধারয়সেঽয়ি গুহং রমণাখ্যম্ ।
আগতমপ্যয়ি হা মুহুরম্বো-
চ্চাটয়সে গণপং ননু কস্মাত্ ॥ ২৬.১৭ ॥
অঙ্কজুষে রমণায় নু দাতুং
মানববেষধরায় গুহায় ।
শোণনগার্ধতনো বহু দুগ্ধং
মাতরপীতকুচেহ বিভাসি ॥ ২৬.১৮ ॥
পূর্ণসমাধিবশাত্ স্বপিষি ত্বং
পীতমপীতকুচেঽম্ব ন বেত্সি ।
অঙ্কজুষা রমণেন সুতেন
প্রেক্ষ্য য়থেষ্টমুরোরুহদুগ্ধম্ ॥ ২৬.১৯ ॥
জ্ঞানরসাহ্বয়মম্ব নিপীয়
স্তন্যমসৌ রমণো মুনিরাট্ তে ।
জ্ঞানময়োঽভবদীশ্বরি সর্বঃ
পুষ্যতি য়েন তনুং হি তদাত্মা ॥ ২৬.২০ ॥
প্রীতিপদায় পয়োধরকুম্ভাত্
পার্বতি ধীময়দুগ্ধমপীতাত্ ।
অস্তু গুহায় শিবে বহু দত্তং
কিঞ্চিদিবেশ্বরি ধারয় মহ্যম্ ॥ ২৬.২১ ॥
প্রৌঢমিমং য়দি বেত্সি তনূজং
শৈলসুতে মদবারি দধানম্ ।
মাস্তুপয়ো বিতরানঘমন্নং
য়েন দধানি মহেশ্বরি শক্তিম্ ॥ ২৬.২২ ॥
স্বার্জিতমেব ময়া য়দি ভোজ্যং
সম্মদ এব মমাখিলমাতঃ ।
আশিষমগ্র্যতমাময়ি দত্ত্বা
প্রেষয় য়ানি জয়ানি ধরিত্রীম্ ॥ ২৬.২৩ ॥
বিদ্যুতি বিদ্যুতি বীক্ষ্যবিলাসা
বীক্ষিতকর্মণি লক্ষ্যরহস্যা ।
পার্বণচন্দ্রমুখী ললিতাঙ্গী
তৈজসলিঙ্গসখী শরণং নঃ ॥ ২৬.২৪ ॥
মাতরপীতকুচেঽরুণশৈলা-
ধীশ্বরভামিনি ভামহনীয়ে ।
সাধু বিধায় সমর্পয়তে তে
দোধকমাল্যমিদং গণনাথঃ ॥ ২৬.২৫ ॥ 650
%c07-q3/Sarada.Susarla/uma-c07-q3-itrans.txt medskip
সপ্তবিংশঃ স্তবকঃ
প্রচণ্ডচণ্ডী (শিখরিণীবৃত্তম্)
বিধুন্বন্ধ্বান্তানি প্রতিদিশমধর্মং পরিহরঁ-
চ্ছ্রিয়ং ব্যাতন্বানস্সপদি শময়ন্ দুঃখপটলম্ ।
সহস্রারাম্ভোজে দ্রবমসদৃশং মে প্রজনয়ন্
প্রচণ্ডায়াশ্চণ্ড্যাস্সিতহসিতলেশো বিজয়তে ॥ ২৭.১ ॥
অরীণাং শীর্ষেষু জ্বলিতদবকীলীন্দ্রসদৃশং
বিনম্রাণাং শীর্ষেষ্বমৃতকরবিম্বেন তুলিতম্ ।
বিরোধিধ্বান্তানাং তরুণতরণিপ্রাভবহরং
প্রচণ্ডায়াশ্চণ্ড্যাশ্চরণমসতাং হন্তু বিভবম্ ॥ ২৭.২ ॥
ভজে ভাসাং শালাং নিখিলধিষণানাং জনিভুবং
বলানামাধাত্রীং নিখিলভুবনেন্দ্রস্য দয়িতাম্ ।
ভজন্তে য়াং গীতৈর্মধুসময়মাদ্যাত্পিকবধূ-
কলালাপা হৃদ্যৈর্হয়বদনপঙ্কেরুহদৃশঃ ॥ ২৭.৩ ॥
জ্বলন্তী তেজোভির্মহিষমথনে য়া তব তনুর্-
লসন্তী লাবণ্যৈর্গিরিশরমণে য়া তব তনুঃ ।
বিনা ক্রোধপ্রীতি ন কিমপি তয়োর্ভেদকমভূত্
তয়োরাদ্যা দুর্গা ভবতি ললিতাঽন্যা মুনিনুতে ॥ ২৭.৪ ॥
সহস্রং ভানূনাং ভবতি দিবাসানামধিপতেঃ
সহস্রং শীর্ষাণাং ভবতি ভুজগানামধিপতেঃ ।
সহস্রং নেত্রাণাং ভবতি বিবুধানামধিপতেঃ
সহস্রং বাহূনাং ভবতি সময়ে হৈমবতি তে ॥ ২৭.৫ ॥
প্রসন্নো বক্ত্রেন্দুর্ন চ নয়নয়োঃ কোঽপ্যরুণিমা
ন কম্পো বিম্বোষ্ঠে স্মিতমপি লসত্কাশবিশদম্ ।
সরোজাভঃ পাণিঃ কিণবিরহিতঃ কোমলতমো
জ্বলচ্ছূলং ত্বাসীজ্জননি তাব শুম্ভায় ভয়দম্ ॥ ২৭.৬ ॥
বধে শুম্ভস্যাসীত্তব জননি য়া কাচন তনুর্-
দধানাঽগ্র্যাঃ শক্তীঃ শশিকিরণসারোপমরুচিঃ ।
ইমাং ধ্যায়ং ধ্যায়ং স্মরহরসখি ব্যাকুলমিদং
মনো মে বিশ্রান্তিং ভজতি ভজতাং কল্পলতিকে ॥ ২৭.৭ ॥
য়দি ত্বং সংহারে পটুরসি সবিত্রি ত্রিজগত-
স্তদেতত্ত্বাং য়াচে সরসিরুহগর্ভাদিবিনুতে ।
ইমে মে পাপ্মানো ভগবতি নদন্তো বহুবিধা-
স্তদেষু প্রখ্যাতং প্রতিভয়তমং দর্শয় বলম্ ॥ ২৭.৮ ॥
বিভেদোরঃ ক্রোধাত্কনককশিপোরব্ধিতনয়া-
কুচগ্রাবোল্লীঢৈরতিশিতশিখৈর্যঃ কিল নখৈঃ ।
ত্বয়া দত্তা শক্তির্নরহরিশরীরায় জগতাং
বিনেত্রে পুংসেঽস্মৈ জননি রণরঙ্গস্থলরমে ॥ ২৭.৯ ॥
অজেয়স্ত্রৈলোক্যপ্রকটিতপতাকঃ পলভুজাং
বিডৌজা য়ত্কারাগৃহপরিচয়ী পঙ্ক্তিবদনঃ ।
সহস্রারং সাক্ষাদ্ধৃতনরশরীরং তমজয়ত্
তবৈবাবেশেন প্রিয়পরশুরম্ব দ্বিজশিশুঃ ॥ ২৭.১০ ॥
ত্বদীয়া সা শক্তিস্ককলজগদন্তেঽপ্যনলসা
পুরা কার্যস্যান্তে তনয়ময়ি হিত্বা নৃপরিপুম্ ।
অবিক্ষত্কাকুত্স্থং দশমুখকুলোন্মাথবিধয়ে
সহস্রাংশুং হিত্বা শশিনমিব ঘস্রে গলতি ভা ॥ ২৭.১১ ॥
হৃতে লোকব্রাতে ভগবতি ভবত্যৈব স পুরা-
মরিঃ কীর্তিং লব্ধুং চতুরমতিরায়াতি সময়ে ।
ত্বয়া লোকত্রাণে জননি রচিতে রাক্ষসবধাদ্
য়শোঽবাপ্তুং বিষ্ণুর্মিলতি চ কুতোঽপ্যেষ নিপুণঃ ॥ ২৭.১২ ॥
স্বরূপং তে বজ্রং বিয়তি রজসাং সূক্ষ্মমহসা-
মুপাধিস্তে স্তোমো ভবতি চপলা কাঽপি তনুভা ।
অরুদ্ধা তে ব্যাপ্তির্বলমখিলদত্তং বলনিধেঃ
সহস্রাংশঃ স্বস্য প্রভবসি সমস্তস্য চ শিবে ॥ ২৭.১৩ ॥
য়তঃ কালব্যাজাত্পচসি ভুবনং বৈদ্যুতমহঃ-
প্রভাবাত্কালীং ত্বাময়ি বিদুরতঃ পণ্ডিতবরাঃ ।
প্রভোঃ শস্ত্রং ভূত্বা দহসি য়দরীন্বজ্রবপুষা
প্রচণ্ডাং চণ্ডীং তদ্ভগবতি ভণন্ত্যক্ষয়বলে ॥ ২৭.১৪ ॥
অয়ি ত্বামেবেন্দ্রং কথয়তি মুনিঃ কশ্চিদজরে
ত্বয়া শস্ত্রাঢ্যং তং ভণতি তু পরস্তত্ত্ববিদৃষিঃ ।
য়ুবাং মাতাপুত্রৌ ভগবতি বিভাজ্যৌ ন ভবতস্-
ততো ধীনাং দ্বেধা বিবুধজনগোষ্ঠীষু গতয়ঃ ॥ ২৭.১৫ ॥
বিকুর্বাণা বিশ্বং বিবিধগুণভেদৈঃ পরিণমদ্
বিধুন্বানা ভাবান্ ভুবনগতিরোধায় ভবতঃ ।
বিতন্বানা শর্বং চলবদচলং কাচিদবিতুং
বিচিন্বানা জন্তোঃ কৃতলবমপীশা বিজয়তে ॥ ২৭.১৬ ॥
প্রভা ভানোর্যদ্বদ্ভবসি সকলস্যাপি তপনী
প্রচণ্ডা শক্তিঃ সত্যখিলভুবনেশস্য তপতঃ ।
সুধাংশোর্জ্যোত্স্নেব প্রমদয়সি চেতঃ প্রবিশতো
ভবন্তী ভূতাদের্দহরকুহরং মোদলহরী ॥ ২৭.১৭ ॥
প্রচণ্ডা গৌরী বা ত্বমসি বসুরুদ্রার্কবিনুতে
স ভীমঃ শম্ভুর্বা বিভুরভয়দঃ পাদসুহৃদাম্ ।
তয়োরেকং রূপং তব সহবিভোঃ খেলতি মহ-
ত্যমুষ্মিন্নাকাশে ধবলমহসি ক্রীডতি পরম্ ॥ ২৭.১৮ ॥
বিভক্তা য়া দ্বেধা ত্বমসি গগনে শীতমহস-
স্তথা রম্যে বিম্বে জ্বলিতললিতস্ত্রীতনুবিধা ।
তয়োর্ব্রূহীশানে জননি কতমা মে জননভূঃ
পুরাজন্মন্যাসীদ্বিকটমথবোগ্রৈব সুষুবে ॥ ২৭.১৯ ॥
দৃশোর্ভেদাদ্ দৃষ্টের্ন ভবতি ভিদা কাঽপি করয়োর্-
ন ভেদাদ্ভিন্নং স্যাত্কৃতমভিবিমানৈক্যবশতঃ ।
ভিদা তন্বোরেবং ন ভবতি ভিদায়ৈ তব শিবে
বিয়দ্দেশে চণ্ড্যাং সিতমহসি গৌর্যাং চ ভবতি ॥ ২৭.২০ ॥
তব চ্ছিন্নং শীর্ষং বিদুরখিলধাত্র্যাগমবিদো
মনুষ্যাণাং মস্তে বহুলতপসা য়দ্বিদলিতে ।
সুষুম্নায়াং নাড্যাং তনুকরণসম্পর্করহিতা
বহিশ্শক্ত্যা য়ুক্তা বিগতচিরনিদ্রা বিলসসি ॥ ২৭.২১ ॥
উতাহো তন্বঙ্গ্যাং ভৃগুকুলবিধাত্র্যাং পিতৃগিরা
তনূজেনচ্ছিন্নে শিরসি ভয়লোলাক্ষি নলিনে ।
ন্যধাস্তেজো ভীমং নিজময়ি য়দক্ষুদ্রমনঘং
তদাহুস্ত্বামম্ব প্রথিতচরিতে কৃত্তশিরসম্ ॥ ২৭.২২ ॥
হুতং ধারাজ্বালাজটিলচটুলে শস্ত্রদহনে
তপস্বিন্যাঃ কায়ং ভগবতি য়দাঽম্ব ত্বমবিশঃ ।
তদা তস্যাঃ কণ্ঠপ্রগলদসৃজঃ কৃত্তশিরসঃ
কবন্ধেন প্রাপ্তো ভুবনবিনুতঃ কোঽপি মহিমা ॥ ২৭.২৩ ॥
নিধেস্ত্বত্তো হৃত্বা ভগবতি ন লজ্জে ভুবি সৃজন্
রসক্ষোণীর্বাণীস্ত্বদমলয়শস্সৌরভজুষঃ ।
নৃপোদ্যানাত্সূনোত্করমপহরন্ ভক্তিনটনং
বিতন্বানস্তস্মৈ মুহুরুপহরঁত্সেবক ইব ॥ ২৭.২৪ ॥
দধানাস্সন্তোষং মনসি সুকবীনামতিতরাং
দদানাঃ প্রত্যগ্রং বিবুধসদসে ভাবমলঘুম্ ।
কুলানামুত্সাহং সপদি বিদধানাশ্শিববধূ-
পরাণাং শোভন্তাং জগতি শিখরিণ্যো গণপতেঃ ॥ ২৭.২৫ ॥ 675
%c07-q4/Padmaja Pandalaneni/umasahasramu\_676-700।txt medskip
অষ্টাবিংশঃ স্তবকঃ
রেণুকাদিবর্ণনম্ (বসন্ততিলকাবৃত্তম্)
অন্তর্বলক্ষপরিধিভ্রমমাদধানো
বক্ত্রস্য পূর্ণতুহিনদ্যুতিমণ্ডলস্য ।
হাসঃ করোতু ভবতাং পরমং প্রমোদং
শুদ্ধান্তপঙ্কজদৃশঃ প্রমথেশ্বরস্য ॥ ২৮.১ ॥
সম্মোহনানি তুহিনাংশুকলাধরস্য
সঞ্জীবনানি সরসীরুহসায়কস্য ।
সন্দীপনানি বিনতেষু জনেষু শক্তেঃ
সংহর্ষণানি মম সন্তু শিবাস্মিতানি ॥ ২৮.২ ॥
পাপানি মে হরতু কাচন কৃত্তশীর্ষা
মাতা পদাম্বুজভুজিষ্যবিতীর্ণহর্ষা ।
য়া ভক্তলোকবরদানবিধৌ বিনিদ্রা
বাসং কমণ্ডলুধুনীপুলিনে করোতি ॥ ২৮.৩ ॥
ষষ্ঠাবতারজননাবনিরেকবীরা
ভীমা ধুনোতু দুরিতানি গণাধিপস্য ।
য়া ভক্তরক্ষণবিধাবতিজাগরূকা
পুণ্যে কমণ্ডলুধুনীপুলিনে চকাস্তি ॥ ২৮.৪ ॥
ছেদায় চেদ্ গতরজা মুনিরাদিদেশ
চিচ্ছেদ চেদ্বহুগুণস্তনয়ঃ সবিত্রীম্ ।
দাহ্যং শরীরমখিলপ্রভুরীশশক্তিঃ
য়দ্যাবিবেশ চ কথা পরমাদ্ভুতেয়ম্ ॥ ২৮.৫ ॥
পুত্রঃ প্রিয়স্তব শিরঃ সহসা চকর্ত
কৃত্তা চ হর্ষভরিতা ভবতী ননর্ত ।
নো তস্য পাপমপি নো তব কাঽপি হানিঃ
নাশোঽস্য হা ভুজভুবামভবদ্বিপাকঃ ॥ ২৮.৬ ॥
অম্বৈব সা সুরভির্জুনভূপতির্যাং
বীর্যাজ্জহার স চ ভার্গব আজহার ।
তস্যা হতেঃ পরগৃহস্থিতিরেব হেতুঃ
গন্ধর্বদর্শনকথা রিপুকল্পিতৈব ॥ ২৮.৭ ॥
ছিন্নানি নো কতি শরীরভৃতাং শিরাংসি
তত্পূজ্যতে জগতি রৈণুকমেব শীর্ষম্ ।
কৃত্তাঃ কলেবরবতাং কতি নাভয়ো ন
চেতো ধিনোতি সুরভির্মৃগনাভিরেকঃ ॥ ২৮.৮ ॥
প্রাণা বসন্তি শিরসা রহিতে শরীরে
লীলাসরোজতি শিরস্তু করেঽস্য কৃত্তম্ ।
তন্নিঘ্নমেতদখিলং চ ধিয়ৈব ধীরাঃ
পশ্যন্তু নন্দনগরে তদিদং বিচিত্রম্ ॥ ২৮.৯ ॥
প্রাণেশ্বরী বিধিপুরে লসতঃ পুরারে-
রঙ্গীকরোতু শরণাগতিমম্বিকা মে ।
লব্ধং নিপীয় য়দুরোরুহকুম্ভদুগ্ধং
সম্বন্ধমূর্তিরভবত্কবিচক্রবর্তী ॥ ২৮.১০ ॥
অপ্রাপ্য লোকরচনাবনপাতনেষু
য়স্যাস্ত্রয়োঽপি পুরুষাঃ করুণাকটাক্ষম্ ।
নৈবেশতে কিমপি সা জগদেকমাতা
ভদ্রা পরা প্রকৃতিরস্ত্বঘনাশিনী নঃ ॥ ২৮.১১ ॥
রাকা প্রবোধশশিনো হৃদয়োদয়স্য
নৌকা বিপজ্জলনিধৌ পততাং জনানাম্ ।
বেদধ্বজস্য ললিতা ত্রিরুচিঃ পতাকা
কাচিন্মমাস্তু শরণং শিবমূলটীকা ॥ ২৮.১২ ॥
মৌলৌ মহেন্দ্রসুদৃশস্সুমনোনিকায়-
সংশোভিতে সদসি মান্য ইবাভিজাতঃ ।
রেণুশ্চ য়চ্চরণভূর্লভতেঽগ্রপীঠং
ত্রাণায় সা ভবতু ভূতপতের্বধূর্নঃ ॥ ২৮.১৩ ॥
অম্বাবৃণোতি পরিতোঽপ্যয়মন্ধকারো
নাত্মানমেব মম কিং তু কুলং চ দেশম্ ।
শীঘ্রং মদীয়হৃদয়োদয়পর্বতাগ্রে
শ্রীমানুদেতু তব পাদময়ূখমালী ॥ ২৮.১৪ ॥
কষ্টং ধুনোতু মম পর্বতপুত্রিকায়াঃ
প্র্ত্যগ্রপঙ্করুহবান্ধবকান্তিকান্তম্ ।
অম্ভোরুহাসনমুখামরমৌলিরত্ন-
জ্যোতির্বিশেষিতগুণং চরণারবিন্দম্ ॥ ২৮.১৫ ॥
জ্যাশিঞ্জিতানি সমরে গিরিশং জিগীষোঃ
কামস্য হংসনিবহস্য নিমন্ত্রণানি ।
ধুন্বন্তু মে বিপদমদ্রিকুমারিকায়াঃ
পাদারবিন্দকটকক্বণিতানি তানি ॥ ২৮.১৬ ॥
য়ঃ সর্বলোকমথনং মহিষং জিগায়
য়স্যৈব কর্ম দমনং চ তদন্তকস্য ।
নারীনরাকৃতিভৃতো মহসস্তমঙ্ঘ্রিং
মঞ্জীরনাদমধুরং শরণং ব্রজামি ॥ ২৮.১৭ ॥
আপন্মহোগ্রবিষরাশিনিমগ্নমেতং
দীনং ত্বদীয়চরণং শরণং প্রপন্নম্ ।
উদ্ধর্তুমম্ব করুণাপরিপূর্ণচিত্তে
বিত্তেশমিত্রকুলনারি তবৈব ভারঃ ॥ ২৮.১৮ ॥
লোকাধিরাজ্ঞি পতিতং বিপদন্ধকূপে
সংরুদ্ধদৃষ্টিমভিতস্তিমিরচ্ছটাভিঃ ।
মাতঃ সমুদ্ধর কৃপাকলিতে মৃডানি
পুত্রং করেণ জগতামভয়ঙ্করেণ ॥ ২৮.১৯ ॥
অস্য ত্বদীয়পদপঙ্কজকিঙ্করস্য
দুর্ভাগ্যপাকবিফলীকৃতপৌরুষস্য ।
প্রাণেশ্বরি প্রমথলোকপতেরুপায়ং
বীক্ষস্ব তারণবিধৌ নিপুণে ত্বমেব ॥ ২৮.২০ ॥
মৃত্যুঞ্জয়োরুমণিপীঠতটে নিষণ্ণে
তাটঙ্ককান্তিবহুলীকৃতগণ্ডশোভে ।
মাণিক্যকঙ্কণলসত্করবারিজাতে
জাতে কুলাচলপতের্জহি পাতকং নঃ ॥ ২৮.২১ ॥
কিং তে বপুর্জননি তপ্তসুবর্ণগৌরং
কামারিমোহিনি কিমিন্দুকলাবলক্ষম্ ।
পাকারিনীলমণিমেচককান্ত্যুতাহো
বন্ধূকপুষ্পকলিকারুচি বা স্মরামি ॥ ২৮.২২ ॥
ত্বং সুন্দরী নৃপতিজাতিজিতস্ত্বমম্বা
ধূমাবতী ত্বমজরে ভুবনেশ্বরী ত্বম্ ।
কালী ত্বমীশ্বরি শুকার্ভকধারিণী ত্বং
তারা ত্বমাশ্রিতবিপদ্দলনাসিধারা ॥ ২৮.২৩ ॥
ত্বং ভৈরবী ভগবতী বগলামুখী ত্বং
রামা চ সা কমলকাননচারিণী ত্বম্ ।
কৈলাসবাসিনয়নামৃতভানুরেখে
কো বেদ তে জননি জন্মবতাং বিভূতীঃ ॥ ২৮.২৪ ॥
ধুন্বন্তু সর্ববিপদঃ সুকৃতপ্রিয়াণাং
ধুন্বন্তু চাখিলসুখান্যঘলালসানাম্ ।
আবর্জ্য ভূরিকরুণং পুরজিত্তরুণ্যা-
শ্চিত্তং বসন্ততিলকাঃ কবিভর্তুরেতাঃ ॥ ২৮.২৫ ॥ 700
॥ সমাপ্তং চ সপ্তমং শতকম্ ॥
%c08-q1/Sesha.talpasAyi.Vadapalli/c08\_q1\_itrans.txt medskip
অষ্টমং শতকম্
একোনত্রিংশঃ স্তবকঃ
নববিধভজনম্ (মদলেখাবৃত্তম্)
আয়ুষ্যা ভুবনানাং চক্ষুষ্যাস্ত্রিপুরারেঃ ।
কুর্বন্তু প্রমদং নঃ পার্বত্যাঃ স্মিতলেশাঃ ॥ ২৯.১ ॥
নাত্যর্ঘাণি নিরর্থং নেতব্যানি দিনানি ।
অম্বায়াশ্চরিতানি শ্রোতব্যান্যনঘানি ॥ ২৯.২ ॥
উদ্যোগং কুরু জিহ্বে সংহর্তুং দুরিতানি ।
পূতান্যদ্রিসুতায়াঃ কীর্ত্যন্তাং চরিতানি ॥ ২৯.৩ ॥
শ্রীসক্তির্বিনিবার্যা চিন্তা কাঽপি ন কার্যা ।
নিত্যং চেতসি ধার্যা দীনানাং গতিরার্যা ॥ ২৯.৪ ॥
জ্ঞাতুং য়া গদিতুং য়া শ্রোতুং য়া শ্বসিতুং য়া ।
দ্রষ্টুং য়াঽন্তরশক্তিস্তিষ্ঠাত্র স্মৃতিরেষা ॥ ২৯.৫ ॥
বিভ্রাজীনশতাভং বিভ্রাণং শিরসীন্দুম্ ।
স্মর্তব্যং জগদম্বারূপং বা ধুতপাপম্ ॥ ২৯.৬ ॥
য়েষাং স্যাত্পরিতপ্তং প্রায়শ্চিত্তমঘেন ।
রুদ্রাণীপদসেবা প্রায়শ্চিত্তমমীষাম্ ॥ ২৯.৭ ॥
তদ্দীপ্তং পদয়ুগ্মং সেবে য়ত্র ভবন্তি ।
অঙ্গুল্যো দশ ভানোর্ভানূনাং শতকানি ॥ ২৯.৮ ॥
নো চেত্ কুপ্যসি কিঞ্চিদ্ য়াচে বাচমতীতে ।
সেবাং মাতরুরীকুর্বিষ্টং মে কুরু মা বা ॥ ২৯.৯ ॥
শর্বাণীচরণার্চাপীঠং পীবরকাণাম্ ।
বধ্যস্থানমিদং স্যাদুগ্রাণাং দুরিতানাম্ ॥ ২৯.১০ ॥
স্কন্দাম্বাপদপীঠস্পৃষ্টং চেদ্বলমাপ্তম্ ।
একৈকং সুমমংহস্বেকৈকং কুলিশং স্যাত্ ॥ ২৯.১১ ॥
অম্ভোজোপমমঙ্ঘ্রিং শম্ভোঃ পট্টমহিষ্যাঃ ।
অংহস্সংহতিমুগ্রাং সংহর্তুং প্রণমামঃ ॥ ২৯.১২ ॥
য়ে কালীপদবেষং নালীকং প্রণমন্তি ।
নৈষাং কিঞ্চিদশক্যং নালীকং মম বাক্যম্ ॥ ২৯.১৩ ॥
বাসস্তেঽত্র সমাপ্তঃ পঙ্কেতো ব্রজ দূরম্ ।
কালীং শঙ্করনারীং কালেঽস্মিন্ প্রণমামঃ ॥ ২৯.১৪ ॥
আশা রে তদবস্থা ভূভাগনটতস্তে ।
কামানাং ক্ব নু পারঃ কামারের্নম নারীম্ ॥ ২৯.১৫ ॥
ধন্যাস্তে তুহিনাদ্রেঃ কন্যাং য়ে প্রণমন্তি ।
অন্যানুন্নতশীর্ষান্ মন্যে বন্যলুলায়ান্ ॥ ২৯.১৬ ॥
পাদাম্ভোজমুমায়াঃ প্রাজ্ঞাস্সম্প্রণমন্তঃ ।
গৃহ্ণন্তি শ্রিয়মস্মিন্ রাজন্তীং নিজশক্ত্যা ॥ ২৯.১৭ ॥
মন্দারাদ্রিসুতাঙ্ঘ্রী দাতারৌ সদৃশৌ স্তঃ ।
উত্কণ্ঠৈঃ ফলমাদ্যাদন্যস্মান্নতকণ্ঠৈঃ ॥ ২৯.১৮ ॥
কালস্যাপি বিজেতুঃ শর্বাণ্যাশ্চরণস্য ।
এষোঽহং কবিলোকক্ষ্মাপালোঽস্মি ভুজিষ্যঃ ॥ ২৯.১৯ ॥
রক্তে দর্শয় রাগঃ রুদ্রাণীপদপদ্মে ।
চেতঃ পুষ্যতি শোভাং সারস্সারবতোঽগ্রে ॥ ২৯.২০ ॥
সংশোধ্যাগমজালং সারাংশং প্রবদামঃ ।
স্কন্দাম্বাপদভক্তির্ভুক্ত্যৈ চাথ বিমুক্ত্যৈ ॥ ২৯.২১ ॥
বাত্সল্যং গতিহীনেষ্বায়ুষ্যং সুকৃতস্য ।
ভূয়োভিঃ সহ সখ্যং শ্রীহেতুষ্বিহ মুখ্যম্ ॥ ২৯.২২ ॥
শ্লাঘ্যং পুষ্যতি কামং প্রেমা স্বপ্রমদায়াম্ ।
শর্বাণীপদভক্তির্নিত্যায় প্রমদায় ॥ ২৯.২৩ ॥
একৈবং বহুভেদা ভিন্নত্বাদ্বিষয়াণাম্ ।
রত্যাখ্যা দ্রুতিরন্তঃ সা সূতে ফলভেদান্ ॥ ২৯.২৪ ॥
হর্ষং কঞ্চন মাতুর্মত্তো ভক্তিভরেণ ।
তন্বন্নেষ বিধত্তাং হেরম্বো মদলেখাঃ ॥ ২৯.২৫ ॥ 725
%c08-q2/Pattabhi.Nadimpally/enimidava\_satakamu\_dvitiya\_stabakamu\_726\_750।txt medskip
ত্রিংশঃ স্তবকঃ
মানসপূজা (প্রমাণিকাবৃত্তম্)
কৃতেন সা নিসর্গতো ধৃতেন নিত্যমাননে ।
সিতেন শীতশৈলজা স্মিতেন শং তনোতু মে ॥ ৩০.১ ॥
প্রতিক্ষণং বিনশ্বরানয়ে বিসৃজ্য গোচরান্ ।
সমর্চয়েশ্বরীং মনো বিবিচ্য বিশ্বশায়িনীম্ ॥ ৩০.২ ॥
বিশুদ্ধদর্পণেন বা বিধারিতে হৃদাঽম্ব মে ।
অয়ি প্রয়চ্ছ সন্নিধিং নিজে বপুষ্যগাত্মজে ॥ ৩০.৩ ॥
পুরস্য মধ্যমাশ্রিতং সিতং য়দস্তি পঙ্কজম্ ।
অজাণ্ডমূল্যমস্তু তে সুরার্চিতে তদাসনম্ ॥ ৩০.৪ ॥
অখণ্ডধারয়া দ্রবন্নবেন্দুশেখরপ্রিয়ে ।
মদীয়ভক্তিজীবনং দধাতু তেঽম্ব পাদ্যতাম্ ॥ ৩০.৫ ॥
বিবাসনৌঘমানসপ্রসাদতোয়মম্ব মে ।
সমস্তরাজ্ঞি হস্তয়োরনর্ঘমর্ঘ্যমস্তু তে ॥ ৩০.৬ ॥
মহেন্দ্রয়োনিচিন্তনাদ্ ভবন্ভবস্য বল্লভে ।
মহারসো রসস্ত্বয়া নিপীয়তাং বিশুদ্ধয়ে ॥ ৩০.৭ ॥
সহস্রপত্রপঙ্কজদ্রবত্সুধাজলেন সা ।
সহস্রপত্রলোচনা পিনাকিনোঽভিষিচ্যতে ॥ ৩০.৮ ॥
মমার্জিতং য়দিন্দ্রিয়ৈঃ সুখং সুগাত্রি পঞ্চভিঃ ।
তদম্ব তুভ্যমর্পিতং সুধাখ্যপঞ্চকায়তাম্ ॥ ৩০.৯ ॥
বসিষ্ঠগোত্রজন্মনা দ্বিজেন নির্মিতং শিবে ।
ইদং শরীরমেব মে তবাস্তু দিব্যমংশুকম্ ॥ ৩০.১০ ॥
বিচিত্রসূক্ষ্মতন্তুভৃন্মমেয়মাত্মনাডিকা ।
সুখপ্রবোধবিগ্রহে মখোপবীতমস্তু তে ॥ ৩০.১১ ॥
মহদ্বিচিন্বতো মম স্বকীয়তত্ত্ববিত্তিজম্ ।
ইদং তু চিত্তসৌরভং শিবে তবাস্তু চন্দনম্ ॥ ৩০.১২ ॥
মহেশনারিনিঃশ্বসঁস্তথাঽয়মুচ্ছ্বসঁস্তদা ।
তবানিশং সমর্চকো মমাস্তু জীবমারুতঃ ॥ ৩০.১৩ ॥
বিপাককালপাবকপ্রদীপ্তপুণ্যগুগ্গুলুঃ ।
সুবাসনাক্যধূপভৃদ্ ভবত্বয়ং মমাম্ব তে ॥ ৩০.১৪ ॥
গুহাবতারমৌনিনা ময়ীশ্বরি প্রদীপিতা ।
ইয়ং প্রবোধদীপিকা প্রমোদদায়িকাঽস্তু তে ॥ ৩০.১৫ ॥
ইমাময়ি প্রিয়াত্প্রিয়াং মহারসামহঙ্কৃতিম্ ।
নিবেদয়ামি ভুজ্যতামিয়ং ত্বয়া নিরাময়ে ॥ ৩০.১৬ ॥
সরস্বতী সুধায়তে মনো দধাতি পূগতাম্ ।
হৃদেব পত্রমম্বিকে ত্রয়ং সমেত্য তেঽর্প্যতে ॥ ৩০.১৭ ॥
বিনীলতোয়দান্তরে বিরাজমানবিগ্রহা ।
নিজাবিভূতিরস্তু তে তটিল্লতা প্রকাশিকা ॥ ৩০.১৮ ॥
স্বরোঽয়মন্তরম্বিকে দ্বিরেফবত্স্বরঁস্তদা ।
মমাভিমন্ত্র্য ধীসুমং দদাতি দেবি তেঽঙ্ঘ্রয়ে ॥ ৩০.১৯ ॥
তবার্চনং নিরন্তরং য়তো বিধাতুমস্ম্যহম্ ।
ন বিশ্বনাথপত্নি তে বিসর্জনং বিধীয়তে ॥ ৩০.২০ ॥
বিয়োগ ইন্দুধারিণা ন চেহ বিশ্বনায়িকে ।
মদম্ব সোঽত্র রাজতে তটিল্লতাশিখান্তরে ॥ ৩০.২১ ॥
ইদং শরীরমেককং বিভাব্য নব্যমন্দিরম্ ।
বিহারমত্র সেশ্বরা ভবানি কর্তুমর্হসি ॥ ৩০.২২ ॥
জডেষ্বিবালসেষ্বিব প্রয়োজনং ন নিদ্রয়া ।
বিহর্তুমেব য়াচ্যসে হৃদীশসদ্মরাজ্ঞি মে ॥ ৩০.২৩ ॥
অয়ং তবাগ্রিমঃ সুতঃ শ্রিতো মনুষ্যবিগ্রহম্ ।
তনূজবেশ্মসৌষ্ঠবং মৃডানি পশ্য কীদৃশম্ ॥ ৩০.২৪ ॥
গণেশিতুর্মহাকবেরসৌ প্রমাণিকাবলী ।
মনোম্বুজে মহেশ্বরীপ্রপূজনেষু শব্দ্যতাম্ ॥ ৩০.২৫ ॥ 750
%c08-q3/Sesha.talpasAyi.Vadapalli/c08\_q3\_itrans.txt medskip
একত্রিংশঃ স্তবকঃ
নামবৈভবম্ (উপজাতিবৃত্তম্)
দরস্মিতশ্রীকপটা সুপর্ব-
স্রোতস্বিনী পর্বতজাস্যজাতা ।
পঙ্কং মম ক্ষালয়তাদশেষং
সংসারমগ্নে হৃদয়ে বিলগ্নম্ ॥ ৩১.১ ॥
হরাট্টহাসেন সমং মিলিত্বা
পিত্রেব পুত্রো গুরুণেব শিষ্যঃ ।
বিভ্রাজমানো মম শং করোতু
হাসাঙ্কুরঃ কেসরিবাহনায়াঃ ॥ ৩১.২ ॥
নমশ্শিবায়ৈ ভণত দ্বিপাদো
য়ুষ্মাকমগ্র্যাং ধিষণাং দধত্যৈ ।
আধারচক্রেশিতুরম্বিকায়ৈ
ব্রহ্মাণ্ডচক্রস্য বিধায়িকায়ৈ ॥ ৩১.৩ ॥
নদন্তি গাবোঽপি বিশিষ্টকালে-
ষ্বম্বেতি য়ো নাহ্বয়তে স কিং না ।
লক্ষ্যং পুনঃ প্রাণবদস্তু সর্বং
সর্বস্য চান্তর্হি পরাঽস্তি শক্তিঃ ॥ ৩১.৪ ॥
আত্মন্যুতান্যত্র বিধায় লক্ষ্যং
তাং শক্তিমাদ্যামখিলেষু সুপ্তাম্ ।
য়াবত্প্রবোধং মুহুরাহ্বয়স্ব
প্রবুধ্যতে সা য়দি কিন্ন্বসাধ্যম্ ॥ ৩১.৫ ॥
য়ে নাম শান্তিং পরমাং বহন্তো
নামানি শীতাচলপুত্রিকায়াঃ ।
সঙ্কীর্তয়ন্তো বিজনে বসন্তি
জয়ন্ততাতাদপি তে জয়ন্তি ॥ ৩১.৬ ॥
নামানি সঙ্কীর্তয়তাং জনানাং
কারুণ্যবত্যাঃ করিবক্ত্রমাতুঃ ।
পুনর্জনন্যা জঠরে নিবাসা-
দায়াসবত্তা ভবতীতি মিথ্যা ॥ ৩১.৭ ॥
পাপৈস্সমন্তাত্সমভিদ্রুতোঽপি
বিশ্বস্য তে বিক্রমমস্মি ধীরঃ ।
ন চেদ্রসজ্ঞে ভবতী ব্রবীতি
নামানি শীতাংশুভৃতো হতোঽহম্ ॥ ৩১.৮ ॥
দেহীতি সম্পল্লবদর্পিতানাং
দ্বারেষু ঘোষং কুরুষে পরেষাম্ ।
ভবানি ভদ্রে ভুবনাম্ব দুর্গে
পাহীতি নায়াতি কিমম্ব জিহ্বে ॥ ৩১.৯ ॥
বাক্যানি বক্তুং য়দি তে রসজ্ঞে
রসোজ্জ্বলানি ব্যসনং গরীয়ঃ ।
কিং বা নমোন্তানি সুধাং কিরন্তি
নামানি নো সন্তি কুমারমাতুঃ ॥ ৩১.১০ ॥
য়দ্ গীয়তে শৈলসুতাভিধানং
তদেব বোধ্যং সুকৃতং প্রধানম্ ।
অজ্ঞানিলোকস্য কৃতে ভণন্তি
য়জ্ঞাদিপুণ্যানি পরাণি বিজ্ঞাঃ ॥ ৩১.১১ ॥
সাম্না প্রয়ুক্তেন জগদ্বশে স্যাত্
নাম্না সদোক্তেন জগদ্বিনেত্রী ।
বেদোভয়ং সম্যগিদং কৃতী য়ো
ভবে ভয়ং তস্য কুতোঽপি ন স্যাত্ ॥ ৩১.১২ ॥
সঙ্কীর্তনাত্তুষ্যতি শর্বয়োষা
তুষ্টা ত্বভীষ্টং ন দদাতি নৈষা ।
ইমং ত্ববিজ্ঞায় জগত্যুপায়ং
ব্রজন্ত্যপায়ং বহুধা মনুষ্যাঃ ॥ ৩১.১৩ ॥
ভাষে ভুজঙ্গাভরণপ্রিয়ায়া
নামানি কামানিতরান্ বিহায় ।
অপি প্রপঞ্চাতিগঘোরকৃত্যং
করোতু কিং মাং তরণেরপত্যম্ ॥ ৩১.১৪ ॥
য়জ্ঞেন দানৈঃ কঠিনব্রতৈর্বা
সিদ্ধিং য় ইচ্ছেত্স গ্রহীতুমিচ্ছেত্ ।
মাতুঃ শয়ানোঽঙ্কতলে শশাঙ্কং
মহেশ্বরীং কীর্তয়তস্তু সিদ্ধিঃ ॥ ৩১.১৫ ॥
রহস্যতন্ত্রাণি বিবিচ্য দূরং
ব্যাজং বিমুচ্য প্রবদামি সারম্ ।
নামৈব কামারিপুরন্ধ্রিকায়াঃ
সিদ্ধের্নিদানং ন মখো ন দানম্ ॥ ৩১.১৬ ॥
পীয়ূষমীষন্মধুরং ভণন্তি
য়ে নাম রামাধরপানলোলাঃ ।
কামারিরামাহ্বয়গানলোলাঃ
কবীশ্বরাঃ কাঞ্জিকমালপন্তি ॥ ৩১.১৭ ॥
সুধাঘটঃ কোঽপ্যধরো বধূনাং
কবিস্সুধাতোয়ধরোঽভিধেয়ঃ ।
অয়ং সুধাবীচিবিতানমালী
নামপ্রণাদো নগকন্যকায়াঃ ॥ ৩১.১৮ ॥
সুরালয়ে ভাতিতরাং সুধৈকা
সুধা পরা বাচি মহাকবীনাম্ ।
বিম্বাধরে কঞ্জদৃশাং সুধাঽন্যা
সুধেতরা নামনি লোকমাতুঃ ॥ ৩১.১৯ ॥
মাধুর্যমাভাত্যধরে বধূনাং
চকোরবন্ধোঃ শকলে প্রসাদঃ ।
ত্রিস্রোতসো বারিণি পাবনত্বং
ত্রয়ং চ নাম্নি ত্রিপুরাম্বিকায়াঃ ॥ ৩১.২০ ॥
য়া মাধুরী প্রেমভরেণ দষ্টে
জাগর্তি কান্তাবরদন্তচেলে ।
সা দৃশ্যতে ভক্তিভরেণ গীতে
ধরাধরাধীশসুতাভিধানে ॥ ৩১.২১ ॥
য়ত্তে জগল্লম্পটকেঽপি বর্ণা-
স্তন্মেঽমৃতং নাম নগাত্মজায়াঃ ।
লালাময়ো য়ো মম তং ব্রবীষি
সুধাময়ং স্ত্রীদশনচ্ছদং ত্বম্ ॥ ৩১.২২ ॥
উচ্চারয়োচ্চাটিতপাতকানি
নামানি জিহ্বে ভুবনস্য মাতুঃ ।
তদা বদামো মধুচূতরম্ভা-
রামাধরাস্তে রুচয়ে য়দি স্যুঃ ॥ ৩১.২৩ ॥ @@773
আক্ষেপমিক্ষোরধিকং বিধত্তে
পীয়ূষদোষানভিতোঽভিধত্তে ।
কান্তাধরারব্ধদুরন্তবাদঃ
কপর্দিকান্তাবরনামনাদঃ ॥ ৩১.২৪ ॥
বিশ্বাসহীনৈঃ সুতরামবোধ্যং
নামানুভাবং নগকন্যকায়াঃ ।
জয়ন্তু সিদ্ধৈরপি গীয়মানং
গায়ন্ত্য এতা উপজাতয়ো নঃ ॥ ৩১.২৫ ॥ 775
%c08-q4/Jayaram.Manda/itrans.txt medskip
দ্বাত্রিংশঃ স্তবকঃ
ভক্তির্যোগশ্চ (আর্যাগীতিবৃত্তম্)
বিদধাতু সম্পদং মে
সকলজগন্নাথনয়নহারিজ़্যোত্স্নঃ ।
শীতোঽন্ধকারহারী
হাসশশী কশ্চিদঙ্করহিতো মাতুঃ ॥ ৩২.১ ॥
করুণারসার্দ্রহৃদয়া
হৃদয়ান্তরনির্যদচ্ছবীচিস্মেরা ।
প্রমথেশ্বরপ্রিয়তমা
পাদপ্রেষ্যস্য ভবতু কল্যাণয় ॥ ৩২.২ ॥
কারণকার্যবিভেদাদ্
রূপদ্বিতয়ং তবাম্ব য়দৃষিপ্রোক্তম্ ।
তত্রৈকং ভর্তুমিদং
বিহর্তুমন্যত্তু ভুতভর্তুর্ললনে ॥ ৩২.৩ ॥
শ্রোতুং স্তোত্রবিশেষং
ভক্তবিশেষং চ বোদ্ধুময়মীদৃগিতি ।
দাতুং চ বাঞ্ছিতার্থং
তব মাতশ্চন্দ্রলোকরূপং ভবতি ॥ ৩২.৪ ॥
কীশকিশোরন্যায়াত্
কারণরূপং তবাম্ব য়োগী ধত্তে ।
ওতুকিশোরন্যায়াদ্
ভক্তং পরিপাসি কার্যরূপেণ ত্বম্ ॥ ৩২.৫ ॥
দৃঢধারণা ন চেত্ত্ব-
চ্চ্যবতে য়োগী মহেশনয়নজ্যোত্স্নে ।
নায়ং মমেতি ভাব-
স্তব য়দি সদ্যঃ সবিত্রি ভক্তং ত্যজসি ॥ ৩২.৬ ॥
শিথিলধৃতির্যোগী স্যাদ্
বাহ্যৈর্বিষয়ৈর্নিতান্তমাকৃষ্টো য়ঃ ।
স্বীয়মতির্লুপ্যতি তে
ভক্তেঽহন্তাপ্রসারকলুষে মাতঃ ॥ ৩২.৭ ॥
সাহঙ্কৃতির্ন ভক্তিঃ
সবাহ্যবিষয়া ধৃতির্ন সর্বেশ্বরি তে ।
অবিজানন্তাবেতদ্
ভক্তো য়োগী চ নৈব সিদ্ধৌ স্যাতাম্ ॥ ৩২.৮ ॥
ব্যক্তিত্বাদপি য়স্য
প্রিয়ং ত্বদীয়ং সবিত্রি পাদাম্ভোজম্ ।
সোঽদ্ভুতশক্তির্ভক্তো
ভগবতি কিং কিং করোতি নাস্মিন্ জগতি ॥ ৩২.৯ ॥
ব্যক্তিত্বলোভবিবশে
সিদ্ধঃ কামোঽপি ভবতি সমবচ্ছিন্নঃ ।
প্রাপ্তোঽপি সলিলরাশিং
সলিলানি ঘটঃ কিয়ন্তি সঙ্গৃহ্ণীয়াত্ ॥ ৩২.১০ ॥
জীবন্নেব নরো য়ঃ
সায়ুজ্যং তে প্রয়াতি শম্ভোঃ প্রমদে ।
সর্বে কামাস্তস্য
প্রয়ান্তি বশমাশু বীতবিবিধভ্রান্তেঃ ॥ ৩২.১১ ॥
ব্যক্তিত্বং তুভ্যমিদং
মনীষয়া মে প্রদত্তমধিকারিণ্যা ।
বহুকালভোগবলতো
বিবদতি দেহো মদম্ব কিং করবাণি ॥ ৩২.১২ ॥
স্থূলেন বর্ষ্মণা সহ
সূক্ষ্মা কলহং মতির্ন কর্তুং শক্তা ।
সুতরাং বলবতি মাতর্-
বলাদ্ গৃহাণ স্বয়ং ত্বমস্মাত্স্বীয়ম্ ॥ ৩২.১৩ ॥
সর্বেষাং হৃদি য়স্মাত্-
ত্বমসি প্রাণাত্মিকাম্ব হেতোস্তস্মাত্ ।
অখিলপ্রাণ্যারাধন-
মারাধননির্বিশেষমগপুত্রি তব ॥ ৩২.১৪ ॥
জুহ্বতি কেঽপি কৃশানৌ
তস্মাত্প্রাপ্তিস্তবেতি সম্পশ্যন্তঃ ।
অপরে প্রাণিষু জুহ্বতি
সাক্ষাত্প্রাণাত্মিকাঽসি তেষ্বন্তরিতি ॥ ৩২.১৫ ॥
প্রাণিষ্বপি য়ঃ প্রাণং
ভূতাদিমনাদিমাত্মনি স্থিতমনঘম্ ।
সততমুপাস্তে য়োগী
তস্মিন্ হোমেন তেঽম্ব তৃপ্তিস্সুলভা ॥ ৩২.১৬ ॥
আত্মনি য়োঽম্ব শ্রেষ্ঠে
প্রাণে প্রাণান্ জুহোতি দহরাভিমুখঃ ।
ত্বদ্রূপে হতপাপে
তেন জিতং সকলমীশচিত্তারামে ॥ ৩২.১৭ ॥
উপসংহৃতমখিলেভ্যো
বিষয়েভ্যো নির্নিমেষমন্তঃকৃষ্টম্ ।
হৃদি দৃঢপদেন চক্ষু-
স্ত্বদ্রূপে হূয়তে মদম্ব প্রাণে ॥ ৩২.১৮ ॥
অন্তস্স্বরং নিগূঢং
শ্রেষ্ঠপ্রাণস্য দেবি তব ভাগস্য ।
শৃণ্বদিব প্রণবাখ্যং
শ্রবণং তত্রৈব ভবতি জগদম্ব হুতম্ ॥ ৩২.১৯ ॥
সর্বেষাং মন্ত্রাণাং
স্তোত্রাণাং চেশচিত্তনাথে প্রকৃতৌ ।
গূঢং সদা স্বরন্ত্যাং
প্রাণন্ত্যাং ত্বয়ি জুহোতি মৌনী বাচম্ ॥ ৩২.২০ ॥
দেহে স্খলতি মনশ্চেত্
বিষয়েষু হুতং দধাতি বিষয়াত্মত্বম্ ।
আবৃত্তং য়দি দেহাদ্
সূক্ষ্মায়াং ত্বয়ি হুতং ত্বদাকৃতি ভবতি ॥ ৩২.২১ ॥
ত্বগ্রসনঘ্রাণানা-
মনুভূতীঃ প্রাণশক্তিসাত্কুর্বাণঃ ।
কং নার্পয়তে ভোগং
ভগবতি তে সর্বলোকপার্থিববনিতে ॥ ৩২.২২ ॥
গচ্ছন্ কুর্বন্ বিসৃজন্
রমমাণাশ্চাম্ব সকললোকাধীশে ।
য়ঃ কেবলাং ক্রিয়ামপি
চিন্তয়তে তেন নিত্যয়জ্ঞঃ ক্রিয়তে ॥ ৩২.২৩ ॥
সর্বেষামগ্নীনাং
প্রাণাগ্নিস্তব বিভূতিরুক্তঃ শ্রেষ্ঠঃ ।
তস্মিন্হুতং তু সুহুতং
দ্রব্যাণি ধিয়ঃ ক্রিয়াশ্চ মন্ত্রঃ প্রণবঃ ॥ ৩২.২৪ ॥
আর্যাগীতীনাময়-
মধরীকৃতমধুসুধাধিমাধুর্যরসঃ ।
বর্গো গণপতিবদনা-
ন্নিষ্ক্রান্তো ভবতু শর্বসুদৃশঃ প্রীত্যৈ ॥ ৩২.২৫ ॥ 800
॥ সমাপ্তং চ অষ্টমং শতকম্ ॥
%c09-q1/Karthik.Sitaram.Tenneti/c09-q1।txt medskip
নবমং শতকম্
ত্রয়স্ত্রিংশঃ স্তবকঃ
জপো য়োগোঽর্পণং চ (বংশস্থবৃত্তম্)
সুধাং কিরন্তোঽখিলতাপহারিণীং
তমো হরন্তঃ পটলেন রোচিষাম্ ।
শ্রিয়ং দিশন্তো দিশি দিশ্যসঙ্ক্ষয়াং
জয়ন্তি শীতাদ্রিসুতাস্মিতাঙ্কুরাঃ ॥ ৩৩.১ ॥
কৃপাকটাক্ষস্তব কেন বাঽঽপ্যতে
মহেশশুদ্ধান্তপুরন্ধ্রি কর্মণা ।
নিরন্তরং মন্ত্রজপেন বা মতের্-
বিশোধনেনোত মনোর্পণেন বা ॥ ৩৩.২ ॥
বিশোধনাদ্দেবি মতেঃ প্রগৃহ্যসে
মনোর্পণেনেশবধু প্রসীদসি ।
জপেন মন্ত্রস্য শুভস্য বর্ধসে
জগত্ত্রয়ীধাত্রি কলেবরান্তরে ॥ ৩৩.৩ ॥
মনঃপ্রতাপস্য ভবত্যসংশয়ং
প্রবর্ধনং বৈদিকমন্ত্রচিন্তনম্ ।
প্রশস্যতে প্রাণমহঃপ্রদীপনে
দয়ান্বিতে তান্ত্রিকমন্ত্রসেবিতা ॥ ৩৩.৪ ॥
তবাম্বিকে তান্ত্রিকমন্ত্রমুত্তমং
স্তবাতিগং য়ঃ কনকাঙ্গি সেবতে ।
বিচিত্রয়ন্ত্রাদিব বৈদ্যুতং মহ-
স্ততো বিনির্যদ্ ভুবনং বিগাহতে ॥ ৩৩.৫ ॥
ন তস্য চেতো বিকৃতের্বশে ভবে-
ন্ন তস্য দৃষ্টির্বিষয়ৈর্বিকৃষ্যতে ।
ন তস্য রোগৈরপকৃষ্যতে বপুঃ
সবিত্রি য়স্তে ভজতে মহামনুম্ ॥ ৩৩.৬ ॥
স্মরন্তি মায়াং গগনাগ্নিশান্তিভিঃ
সহাচ্ছভাসা সহিতাভিরম্বিকে ।
তথা রসজ্ঞাং দ্রুহিণাগ্নিশান্তিভির্-
ভণন্তি দোগ্ধ্রীং তু খষষ্ঠবিন্দুভিঃ ॥ ৩৩.৭ ॥
অভণ্যতাদ্যা ভুবনেশ্বরী বুধৈর্-
অনন্তরা মাতরগাদি কালিকা ।
প্রচণ্ডচণ্ডী পরিকীর্তিতা পরা
ত্রয়োঽপ্যমী তে মনবো মহাফলাঃ ॥ ৩৩.৮ ॥
উপাধিভূতং শুচি নাভসং রজো
দধাতি সাক্ষাদ্ ভুবনেশ্বরীপদম্ ।
তদাশ্রয়া ব্যাপকশক্তিরদ্ভুতা
মনস্বিনী কাচন কালিকেরিতা ॥ ৩৩.৯ ॥
অমর্ত্যসাম্রাজ্যভৃতঃ প্রবর্তিকা
বিশাললোকত্রয়রঙ্গনর্তিকা ।
পরাক্রমাণামধিনায়িকোচ্যতে
প্রচণ্ডচণ্ডীতি কলা সবিত্রি তে ॥ ৩৩.১০ ॥
স্মরন্মনুং রোদিতি ভক্তিমাংস্তব
প্রগৃহ্য পাদং মুনিরম্ব লম্বতে ।
ফলং চিরায় প্রথমঃ সমাপ্নুয়াত্
পরো মরন্দং পদ এব বিন্দতি ॥ ৩৩.১১ ॥
পদং তবান্বিষ্টমনেকদা মুদা
হৃদন্তরে স্পৃষ্টমিবেদমম্বিকে ।
পলায়তেঽধোঽহমনন্তরং শুচা
পরাত্পরে রোদিমি মন্ত্রশব্দতঃ ॥ ৩৩.১২ ॥
ভণন্তি সন্তো মরুতাং সবিত্রি তে
মহামনুং ত্বত্পদভাস্করাতপম্ ।
ততো হি মূলাত্স্বর এষ নির্গত-
স্তপত্যঘৌঘং জরয়ন্মহোময়ঃ ॥ ৩৩.১৩ ॥
সবিত্রি সাক্ষাচ্চরণস্য তে প্রভাং
বিধারয়ঁস্তজ্জনিমূলমার্গণে ।
মুহুর্মুহুস্সোঽহমজে ধৃতোদ্যমঃ
পথা মহর্ষী রমণো বভাণ য়ম্ ॥ ৩৩.১৪ ॥
অহম্পদার্থো য়দি চিল্লতা ততা
কিমেষ দোগ্ধ্রীমনুভাবতোঽপরঃ ।
অহং য়দি প্রাণনিনাদবৈখরী
ন কূর্চ আখ্যাতুমসেতি শক্যতে ॥ ৩৩.১৫ ॥
পরে তু য়াং চেতনশক্তিমামন-
ন্ত্যভাণি সা কুণ্ডলিনীতি তান্ত্রিকৈঃ ।
বিলক্ষণা নাম চমত্কৃতির্জডান্
প্রতারয়ত্যাগমসারদূরগান্ ॥ ৩৩.১৬ ॥
ভবত্যখণ্ডানুভবঃ প্রবোধিনা-
মতীব সূক্ষ্মানুভবশ্চ য়োগিনাম্ ।
করং গতাস্সর্ববিধাশ্চ শেরতে
মহেশ্বরীমন্ত্রপরস্য সিদ্ধয়ঃ ॥ ৩৩.১৭ ॥
সহস্রসঙ্খ্যানি জনূংষি বা মম
প্রিয়াণি ভক্তিস্তব চেদ্ভবে ভবে ।
তব স্মৃতিং চেদ্ গলয়েন্ন সম্মদং
করোতি মোক্ষোঽপি মমেশবল্লভে ॥ ৩৩.১৮ ॥
বিনৈব দৃষ্টিং য়দি সত্প্রশিষ্যতে
ন সত্তয়াঽর্থঃ ফলহীনয়া তয়া ।
ইদং তু সত্ কিন্ন্বসতো বিশিষ্যতে
ন তাত মুক্তোপলয়োস্তদা ভিদা ॥ ৩৩.১৯ ॥
শুচাং নিবৃত্তির্যদি মুক্তিরিষ্যতে
সুখপ্রবৃত্তির্যদি নাত্র বিদ্যতে ।
সদেব চেত্তত্র মতির্ন ভাসতে
জডং বিমুক্তাদ্বচসৈব ভিদ্যতে ॥ ৩৩.২০ ॥
মতিঃ পরাচী ব্যবহারকারণং
ভবেত্প্রতীচী পরমার্থসম্পদি ।
উভে দিশৌ য়স্য মতির্বিগাহতে
পদা চ মূর্ধ্না চ স সিদ্ধ ইষ্যতে ॥ ৩৩.২১ ॥
দৃঢং পদং য়স্য মতেঃ সদাঽন্তরে
স না ধিয়োঽগ্রেণ বহিশ্চরন্নপি ।
সবিত্রি মগ্নস্ত্বয়ি সম্প্রকীর্ত্যতে
ন তস্য ভীঃ সঞ্চরতোঽপি সংসৃতেঃ ॥ ৩৩.২২ ॥
বিচিন্তনে চিন্তনশক্তিমদ্ভুতাং
বিলোকনে লোকনশক্তিমুজ্জ্বলাম্ ।
প্রভাষণে ভাষণশক্তিমুত্তমাং
নিভালয়ংস্ত্বাং বিষয়ৈর্ন জীয়তে ॥ ৩৩.২৩ ॥
বিলোকমানস্য বিলোকনং কবের্-
বিলোক্যমানেষু বিহায় সক্ততাম্ ।
বিলোচনে সন্নিহিতা নিরন্তরং
বিধূতভীতির্বিবুধস্তুতা শিবা ॥ ৩৩.২৪ ॥
অয়ং ভয়ানাং পরিমার্জকস্সতাং
সমস্তপাপৌঘনিবারণক্ষমঃ ।
মনোজ্ঞবংশস্থগণো গণেশিতুর্-
মনো মহেশাব্জদৃশো ধিনোত্বলম্ ॥ ৩৩.২৫ ॥ 825
%c09-q2/Muralidhar.Kalavacharla/uma\_sahasram\_chap9-q2।txt medskip
চতুস্ত্রিংশঃ স্তবকঃ
প্রার্থনা (হরিণীবৄত্তম্)
বিদিতমহিমা বিশ্বাধানাদনেকবিধাদ্ভুতাত্
প্রথিতচরিতঃ শর্বালোকপ্রতাপবিবর্ধনাত্ ।
প্রকটিতগুণঃ পাপধ্বান্তপ্রসারনিরোধনাত্
প্রদিশতু শিবাহাসো ভাসাং নিধিঃ কুশলানি মে ॥ ৩৪.১ ॥
হৃদি করুণয়া পূর্ণা বাহ্বোর্বলেন মহীয়সা
পদকমলয়োর্লক্ষ্ম্যা ভক্তৈর্জনৈরুপজীব্যয়া ।
মুখসিতকরে লাবণ্যেন ত্রিণেত্রদৃশাং বলং
বহু বিদধতা কালী মাতাঽবতাত্পদসেবিনম্ ॥ ৩৪.২ ॥
জগদধিপয়া সিদ্ধং দোগ্ধ্র্যাঽথবোত রসজ্ঞয়া
মুনিজননুতং দেবীমন্ত্রং জপেদ্যদি মানবঃ ।
অমৃতজলদীভূতঃ পূতঃ বিয়োগবিশেষবিত্
স ইহ বসুধালোকে ধারা গিরামভিবর্ষতি ॥ ৩৪.৩ ॥
ইমমভিমুখীভূতা শাতোদরী কমলালয়া
হয়গজঘটাপূর্ণাঽভ্যর্ণং সমেত্য নিষেবতে ।
সবিবুধমিদং বিশ্বং তস্য প্রয়াতি পুনর্বশং
প্রথিতয়শসাং সিদ্ধীনাং চাপ্যমুং ভজতেঽষ্টকম্ ॥ ৩৪.৪ ॥
সুবিমলধিয়স্তস্য ক্রোধাদ্ দৃগম্বুধুতদ্যুতী
রিপুজনবধূগণ্ডাভোগো ভবেদুত পাণ্ডুরঃ ।
সপদি ভুবনব্যাপ্তং চাপ্তৈঃ প্রমাণপুরস্সরং
ভণিতমজরং ভদ্রং জ্যোতিঃ পরং হৃদি ভাসতে ॥ ৩৪.৫ ॥
অদয়মরিভিঃ ক্রান্তে রাষ্ট্রে ত্বমীশ্বরি রক্ষিকা
সুমশরমুখৈর্ধূতে চিত্তে ত্বমীশ্বরি রক্ষিকা ।
প্রবলদুরিতৈর্গ্রস্তে বংশে ত্বমীশ্বরি রক্ষিকা-
ঽপ্যসৃজতি জলং মেঘে মোঘে ত্বমীশ্বরি রক্ষিকা ॥ ৩৪.৬ ॥
ভগবতি নিজৌ সাক্ষাত্পুত্রৌ বৃহস্পতিপাবকৌ
গণপতিগুহাবেতৌ বেষান্তরব্যবহারতঃ ।
ভরতধরণীখণ্ডে হেতোঃ কুতঃ কৃতসম্ভবৌ
কলকলয়ুতে কালী দেবি ব্যধাঃ কথয় দ্রুতম্ ॥ ৩৪.৭ ॥
সময়ময়ি তে ধৃত্বা পাদাম্বুজং রমণঃ সুতো
গিরিবরগুহাস্বন্তঃ শান্তো নয়েদ্যদি নাদ্ভুতম্ ।
স্থলবিরহতঃ স্বীয়স্থানে কিমত্র সমাগতো
ন বদসি কুতঃ কার্যং তস্মৈ কুলাচলকন্যকে ॥ ৩৪.৮ ॥
পরিভণতি চেচ্ছিষ্যব্যূহে মহাদ্ভুতসঙ্গতীর্-
জননি রমণো য়োগীশানস্ততো বহু নো ফলম্ ।
অমিততময়া দৃষ্টেঃ শক্ত্যা কদা সরণিং নয়ে-
দপথপতিতং ধাত্রীলোকং তদেব বদাম্বিকে ॥ ৩৪.৯ ॥
অহমিহ কুতো হেতোর্জাতো বিষণ্ণতমে স্থলে
চরণকমলচ্ছায়াং মায়াধিরাজ্ঞি বিহায় তে ।
পরমকরুণো ঘোরঃ শাপঃ কিমেষ সবিত্রি তে
কিমপি ভুবি বা কার্যং কর্তুং নিয়োজিতবত্যসি ॥ ৩৪.১০ ॥
ব্রজতি বিলয়ং স্নেহো দূরপ্রবাসবশাদিতি
প্রবদতি বুধঃ কশ্চিত্সত্যং প্রভাতি তদম্বিকে ।
ভগবতি নিজে কুক্ষৌ জাতং দিবো ধরণীগতং
স্মৃতিসরণিতো দূরে হা হা করোষি রুষা য়থা ॥ ৩৪.১১ ॥
মম তু বিমলা হৃদ্যা বিদ্যা মহেশ্বরি য়াঽভব-
ন্মনসি চ পরা চিত্রা শক্তিশ্চিরন্তনি য়াঽভবত্ ।
বচসি চ মহদ্ভাগ্যং শ্লাঘ্যং য়দীড্যতমেঽভবত্
তদয়ি গলিতং মত্তো বিত্তত্রয়ং ভবতো ভুবি ॥ ৩৪.১২ ॥
কৃতময়ি ময়া পাপং ঘোরং সুকর্মসু সঙ্গিনাং
য়দহমদয়ো বিঘ্নং নৄণাং মুহুর্মুহুরাচরম্ ।
অতিকটু ফলং তস্যাশ্নামি শ্রিতো নরবিগ্রহং
প্রমথনৃপতের্জায়ে মায়ে জনন্যব মামিমম্ ॥ ৩৪.১৩ ॥
ন ভবসি দৃশোর্মার্গে লোকাধিরাজ্ঞি কুতো গিরো
ন চ বহুকৃপে স্বপ্নে বা ত্বং প্রয়চ্ছসি দর্শনম্ ।
অপনয়সি নো সন্দেহং বা পরোক্ষকৃপাবশা-
দপি সুরনুতে লগ্না কার্যান্তরে কিমুতাদয়া ॥ ৩৪.১৪ ॥
নিরবধিশিবে মাহাত্ম্যং তে ভণন্তি মহর্ষয়ো
মনসি করুণা ন ন্যূনা তে য়থা প্রথিতাঃ কথাঃ ।
তদিদমখিলং মিথ্যা স্যাদিত্যসাধ্যমুদীরিতুং
য়দসি বিমুখী পুত্রে কিং বা ভবেদিহ কারণম্ ॥ ৩৪.১৫ ॥
ভুবনভরণং নাল্পং কার্যং ন দেবি তব ক্ষণো
গুরু চ বহুলং কৃত্যং নিত্যং তবাস্তি ন তন্মৃষা ।
ন তব কঠিনং মৌনং নিন্দ্যং তথাপি ন পার্বতি
স্মর সকৃদিমং দীনং পুত্রং তদেব মমাধিকম্ ॥ ৩৪.১৬ ॥
ন ভবতি সুধাধারাবর্ষাদয়ং মুদিতস্তনৌ
মধুমদমুষাং বাচাং সর্গান্ন চাপ্যয়মুদ্ধতঃ ।
তব পদয়ুগে নিষ্ঠালাভান্ন তৃপ্যতি চাপ্যয়ং
ভগবতি চিরাত্ সন্দেশং তে সুতঃ প্রতিবীক্ষতে ॥ ৩৪.১৭ ॥
কিমিহ ভুবনে কর্তব্যং মে কিমর্থমিহাগতো-
ঽস্ম্যবনি জগতাং কং বোপায়ং শ্রয়ে নিজশক্তয়ে ।
কিমপি কিমপি স্বান্তে ধ্বান্তে য়থা পরিদৃশ্যতে
স্ফুটমভয়দে বক্তুং কিঞ্চিচ্ছ্রমং ত্বমুরীকুরু ॥ ৩৪.১৮ ॥
ন মম পরমে মুক্তাবাশা ন বা বিভবাষ্টকে
ন চ গজঘটাপূর্ণায়াং বা মহেশ্বরি সম্পদি ।
ন চ মধুমুচাং বাচাং সর্গে নিরর্গলবৈভবে
মুনিভুবি কুতো জাতঃ সোঽহং তদেব সমীর্যতাম্ ॥ ৩৪.১৯ ॥
প্রথমমনঘং বাঞ্ছাম্যন্নং সদারসুতাতিথের্-
ভগবতি ততঃ পাদদ্বন্দ্বে তবাবিচলাং স্থিতিম্ ।
অথ সুরজগদ্বার্তাজ্ঞানং সবিত্রি ততঃ পরং
মুনিভুবি ভবে হেতুং জ্ঞাতুং মৃগাক্ষি পুরদ্বিষঃ ॥ ৩৪.২০ ॥
য়দি তব কৃপা পুত্রে ভক্তে পদাংবুজবন্দিনি
ব্রতশতকৃশে শীর্ষাম্ভোজামৃতং ত্বয়ি জুহ্বতি ।
ভরতধরণীসেবালোলে ভবপ্রিয়ভামিনি
স্বয়মুপদিশামুষ্মৈ য়োগ্যং বিধানমনাবিলম্ ॥ ৩৪.২১ ॥
জননি জগতাং স্বল্পে কামেঽপ্যয়ং ত্বয়ি লম্বতে
পুরভিদবলে মধ্যে কামেঽপ্যয়ং ত্বয়ি লম্বতে ।
বহুলকরুণে শ্রেষ্ঠে কামেঽপ্যয়ং ত্বয়ি লম্বতে
ভগবতি পরে বীতে কামেঽপ্যয়ং ত্বয়ি লম্বতে ॥ ৩৪.২২ ॥
তনুভুবি ময়ি প্রীত্যা বাঽম্ব ত্রিলোকবিধায়িকে
পদয়ুগরতে বাত্সল্যাদ্বা পুরারিপুরন্ধ্রিকে ।
স্ববিমলয়শোগানাসক্তে কৃপাবশতোঽথবা
পরুষমজরে মৌনং ত্যক্ত্বা স্ফুটীকুরু মে গতিম্ ॥ ৩৪.২৩ ॥
জয়তু ভরতক্ষোণীখণ্ডং বিষাদবিবর্জিতং
জয়তু গণপস্তস্য ক্ষেমং বিধাতুমনা মুনিঃ ।
জয়তু রমণস্তস্যাচার্যো মহর্ষিকুলাচলো
জয়তু চ তয়োর্মাতা পূতা মহেশবিলাসিনী ॥ ৩৪.২৪ ॥
গণপতিমুনেরেষা ভাষাবিদাং হৃদয়ঙ্গমা
সুকবিসুহৃদঃ শব্দৈরত্যুজ্জ্বলা হরিণীততিঃ ।
ললিতচতুরৈর্ভাবৈর্যান্তী সুরূপবনান্তরং
মদয়তু মনঃ কামারাতের্নিশান্তমৃগীদৃশঃ ॥ ৩৪.২৫ ॥ 850
%c09-q3/Sai.Susarla/uma-c09-q3।txt medskip
পঞ্চত্রিংশঃ স্তবকঃ
প্রার্থনা (ইন্দুবদনাবৃত্তম্)
অন্ধতমসং শশিবিভামভিদধানা
কান্তিমলমাস্যকমলস্য বিদধানা ।
অন্ধকবিরোধিদয়িতাস্মিতলবশ্রীর্-
ভাতু ভুবনস্য সকলস্য কুশলায় ॥ ৩৫.১ ॥
ভাহি বিবিধা কৃতিমতী দ্বিজসমূহে
পাহি গতিহীনমখিলেশ্বরি কুলং নঃ ।
দেহি বহুকালভজকায় বরমেতং
য়াহি নগনন্দিনি য়শঃ শশিবলক্ষম্ ॥ ৩৫.২ ॥
বারয়তি ঘোরতরপাতকসমূহং
বর্ধয়তি ধর্মমপি শর্মকরমন্তে ।
কিঙ্করজনস্য ন কিমাবহতি ভব্যং
শঙ্করপুরন্ধ্রি তব পাদপরিচর্যা ॥ ৩৫.৩ ॥
য়স্য মনুজস্য হৃদয়েঽস্তি সদয়ে তে
নাকচরসেব্যময়ি পাদসরসীজম্ ।
তং ভজতি পদ্মমুখি পদ্মবনবাসা
লাভভবনে ভবতু নামরপুরোধাঃ ॥ ৩৫.৪ ॥
য়দ্যখিলমৌনিগণগীতগুণজালং
কালভয়হারিকরুণারসমরন্দম্ ।
অদ্রিতনয়াঙ্ঘ্রিজলজন্ম হৃদয়ে স্যা-
দষ্টমগতোঽপি বিদধাতু রবিজঃ কিম্ ॥ ৩৫.৫ ॥
লেখললনাকচসুমৈঃ কৃতবলিং তে
য়ো ভজতি পাদঘৃণিমালিনমনন্তে ।
নিস্তরতি নূনময়মস্তমিতমোহঃ
শোকতিমিরং সকললোকগণমাতঃ ॥ ৩৫.৬ ॥
শীতকরদর্পহরবক্ত্রজলজাতে
শীতগিরিনন্দিনি তবাঙ্ঘ্রিজলজাতম্ ।
য়ঃ স্মরতি দেবি হৃদি বিস্মরতি সোঽয়ং
বিষ্টপমশেষমপি কষ্টততিমুক্তঃ ॥ ৩৫.৭ ॥
সক্তিরয়ি য়স্য তব পাদসরসীজে
শক্তিধরমাতরনলাক্ষগৃহনাথে ।
পূর্ণশশিজৈত্রমুখি পুণ্যপুরুষোঽসৌ
স্বর্ণশিখরীব বুধলোকশরণং স্যাত্ ॥ ৩৫.৮ ॥
বৈরিগণনির্দলনখড্গবরপাণে
বাসসি পদোর্দশনবাসসি চ শোণে ।
নেত্রমিষপাবকবিশেষিতললাটে
পাপমখিলং জহি মৃগাধিপতিঘোটে ॥ ৩৫.৯ ॥
বেদচয়বেদিজনবাদবিষয়স্য
প্রতিয়ুতলোকততিশোকশমনস্য ।
বেতনবিবর্জিতভটোঽয়মহমঙ্ঘ্রেঃ
শীতকরপোতধরপুণ্যবনিতে তে ॥ ৩৫.১০ ॥
কার্যময়ি মে কিমপি কার্যপটুবুদ্ধেঃ
পাদসরসীজয়ুগলীপরিজনস্য ।
অম্ব বদ জম্ভরিপুগীতগুণজালে
শুম্ভকুলনাশকরি শম্ভুকুলয়োষে ॥ ৩৫.১১ ॥
ত্বং য়দি শিলাবদয়ি নো বদসি কৃত্যং
নাস্তি তব রাজ্যপটুবুদ্ধিরিতি সত্যম্ ।
আদিশ য়থার্হকরণীয়কৃতিনিত্যং
রাজ্ঞি ভুবনস্য চরণাম্বুরুহভৃত্যম্ ॥ ৩৫.১২ ॥
পঞ্চসু বিহায় মনসঃ কমপি সঙ্গং
পুত্রধনমিত্রজনবান্ধববধূষু ।
এষ ভজতে জননি পাদজলজং তে
পালয় নু মুঞ্চ নু তবোপরি স ভারঃ ॥ ৩৫.১৩ ॥
বজ্রধরমুখ্যসুরসঞ্চয়কিরীট-
স্থাপিতমহার্ঘমণিরঞ্জিতনখায় ।
জীবিতমদায়ি জগদীশ্বরি মদীয়ং
পাদজলজায় তব পালয় নু মা বা ॥ ৩৫.১৪ ॥
দেহি জগদীশ্বরি ন বা মদভিলাষং
পাহি করুণাবতি ন বা কুলমিদং নঃ ।
শূলধরকামিনি সুরাসুরনিষেব্যং
পাদকমলং তব পরে ন বিজহামি ॥ ৩৫.১৫ ॥
পাসি কিল পাদয়ুগকিঙ্করসমূহং
হংসি কিল পাপততিমাপদি নুতা ত্বম্ ।
দন্তিবদনপ্রসু বদন্তি মতিমন্তো
নানৃতমিদং ভবতু নাকিজনবর্ণ্যে ॥ ৩৫.১৬ ॥
শক্রমুখদেবততিবন্দিতবিসৃষ্টে
বক্রঘনকেশি চরণে তব লুঠন্তম্ ।
আপদি নিমগ্নমিমমাশ্রিতমনাথং
নন্দিহয়সুন্দরি ন পালয়সি কেন ॥ ৩৫.১৭ ॥
ঘোষময়মম্ব বিদধাতি পদলগ্নো
নাবসি পুরাণি কিমু নারি বধিরাঽসি ।
বন্দিসুরবৃন্দনুতিভাষিতহৃতং বা
কর্ণয়ুগলং তব কপালিকুলয়োষে ॥ ৩৫.১৮ ॥
অম্ব ভব বিম্বফলকল্পরদচেলে
শম্বরসপত্নবলকারিবহুলীলে ।
প্রাগমৃতভানুমুকুটস্য মদয়িত্রী
তং কুরু ততঃ পরমুরীকৃতমদর্থম্ ॥ ৩৫.১৯ ॥
নির্মলসুধাকরকলাকলিতমস্তে
ধর্মরতপালিনি দয়াবতি নমস্তে ।
এতমব দেবি চরণাম্বুরুহবন্ধুং
শীতধরণীধরসুতে গময় নান্ধুম্ ॥ ৩৫.২০ ॥
অদ্রিকুলপালককুলধ্বজপতাকে
ভদ্রগজগামিনি দরিদ্রময়ি মত্যা ।
ক্ষুদ্রমিব শোচ্যমিমমঙ্ঘ্রিজলজাপ্তং
রুদ্রদয়িতে জননি পাহি ন জহীহি ॥ ৩৫.২১ ॥
অস্তু তব পাদকমলে স্থিতিরজস্রং
নাস্তি পরদুঃখবিবশে হৃদি তু শান্তিঃ ।
অস্তু করুণেঽয়মস্তু মতিলোপঃ
কষ্টমিদমম্ব মম ভূরি পরিশিষ্টম্ ॥ ৩৫.২২ ॥
দুঃখসুখভেদরহিতা ন মতিরাসীত্
সাধুখলভেদরহিতা ন মতিরাসীত্ ।
ভাগ্যমিতিমান্যমথবা মম তদেতন্-
মাতরিহ সঙ্ঘভজনে য়দবকাশঃ ॥ ৩৫.২৩ ॥
অস্তু মম ভেদমতিরস্তু মম পক্ষো
য়ত্নপরতাঽস্তু মম মাস্তু চ বিমোক্ষঃ ।
মোক্ষময়ি বেদ্মি কুলকষ্টততিমোক্ষং
প্রেষয় সকৃত্তব মহেশ্বরি কটাক্ষম্ ॥ ৩৫.২৪ ॥
শাক্বরগণেন মুখরেঽত্র গণনাথে
বিষ্ণুয়শসীশবধু জিষ্ণুমুখবন্দ্যে ।
অম্ব করুণাং কুরু শিবঙ্করি নিরঙ্ক-
স্বচ্ছকিরণার্ভকবিভূষিতললাটে ॥ ৩৫.২৫ ॥ 875
%c09-q4/Krishnashankavaram/devi\_itranstxt medskip
ষট্ত্রিংশঃ স্তবকঃ
প্রকীর্ণকম্ (তূণকবৃত্তম্)
উন্নতস্তনস্থলীবিলোলহারমৌক্তিক-
ব্রাতদীধিতিপ্রতানবদ্ধসৌহৃদা সদা ।
অন্ধকারিকামিনীদরস্মিতদ্যুতির্ধুনো-
ত্বন্ধকারমন্তরঙ্গবাসিনং ঘনং মম ॥ ৩৬.১ ॥
অম্বরস্থলে পুরা পুরন্দরো দদর্শ য়াং
য়াং বদন্তি পর্বতপ্রসূতিমৈতিহাসিকাঃ ।
সা পরা পুরামরেঃ পুরন্ধ্রিকাঽখিলাম্বিকা
পুত্রকায় মজ্জতে দদাতু দক্ষিণং করম্ ॥ ৩৬.২ ॥
পাদপঙ্কজে ধৃতা নরৈরবাহ্যভক্তিভিঃ
পাণিপঙ্কজে ধৃতা নবেন্দুখণ্ডধারিণা ।
চারুহেমহংসকা মনোজ্ঞরত্নকঙ্কণা
লোকজালপালিনী পুনাতু মাং বিলাসিনী ॥ ৩৬.৩ ॥
উক্ষরাজবাহনস্য জীবিতাদ্ গরীয়সী
পক্ষিরাজবাহনাদিবর্ণ্যমানবৈভবা ।
কেকিলোকচক্রবর্তিবাহনেন পুত্ত্রিণী
বারণারিসার্বভৌমবাহনা গতির্মম ॥ ৩৬.৪ ॥
বালকুন্দকুট্মলালিকান্তদন্তপঙ্ক্তিকা
কুণ্ডলানুবিম্বশোভিশুদ্ধগণ্ডমণ্ডলা ।
বিভ্রতী রতীশবেত্রবিভ্রমং ভ্রুবোর্যুগং
শুভ্রভানুশেখরস্য সুন্দরী প্রণম্যতে ॥ ৩৬.৫ ॥
আজিদক্ষবাহবৈরিয়াতুধানবাধিতং
য়া ররক্ষ দেববৃন্দমিন্দিরাদিবন্দিতা ।
সা কটাক্ষপাতধূতভক্তলোকপাতকা
পাবকাক্ষসুন্দরী পরাত্পরা গতির্মম ॥ ৩৬.৬ ॥
তারকাধিনাথচূডচিত্তরঙ্গনর্তকী
মন্দহাসসুন্দরাস্যপঙ্কজা নগাত্মজা ।
দীনপোষকৃত্যনিত্যবুদ্ধবুদ্ধিরব্যয়া
গৃহ্যতে গণাধিপেন সর্বতো নৃণাং পদে ॥ ৩৬.৭ ॥
অষ্টমীশশাঙ্কখণ্ডদর্পভঞ্জনালিকা
বিষ্টপত্রয়াধিনাথমানসস্য ডোলিকা ।
পাপপুঞ্জনাশকারিপাদকঞ্জধূলিকা
শ্রেয়সে মমাস্তু শৈললোকপালবালিকা ॥ ৩৬.৮ ॥
সানুমত্কুলাধিনাথবালিকালিকুন্তলা
জঙ্গমেব কাঽপি তপ্তহেমসালভঞ্জিকা ।
ভক্তিয়ুক্তলোকশোকবারণায় দীক্ষিতা
শীতশীতবীক্ষিতা লঘু স্যতাদঘং মম ॥ ৩৬.৯ ॥
পুণ্যনামসংহতিঃ পুরারিচিত্তমোহিনী
পুষ্পবাণচাপচারুঝিল্লিকাঽখিলাম্বিকা ।
পুণ্যবৈরিপুষ্টদুষ্টদৈত্যবংশনাশিনী
পুত্রকস্য রক্ষণং পুরাতনী করোতু মে ॥ ৩৬.১০ ॥
ক্ষামমধ্যমস্থলী সুধাঘটোপমস্তনী
কৃষ্ণসারলোচনা কুমুদ্বতীপ্রিয়াননা ।
ভ্রূবিলাসধূতধৈর্যকাঞ্চনাদ্রিকার্মুকা
কাচিদিক্ষুকার্মুকস্য জীবিকা জয়ত্যুমা ॥ ৩৬.১১ ॥
লোহিতাচলেশ্বরস্য লোচনত্রয়ীহিতা
লোহিতপ্রভানিমজ্জদব্জজাণ্ডকন্দরা ।
হাসকান্তিবর্ধ্যমানসারসারিমণ্ডলা
বাসমত্র মে করোতু মানসে মহেশ্বরী ॥ ৩৬.১২ ॥
দক্ষিণেক্ষণপ্রভাবিজৃম্ভিতাম্বুসম্ভবা
কামমিত্রবামনেত্রধামতৃপ্তকৈরবা ।
একতঃ পরঃ পুমান্পরা বরাঙ্গনাঽন্যতঃ
শুভ্রকীর্তিরেকমূর্তিরাদধাতু নশ্শিবম্ ॥ ৩৬.১৩ ॥
শুম্ভদৈত্যমারিণী সুপর্বহর্ষকারিণী
শম্ভুচিত্তহারিণী মুনীন্দ্রচিত্তচারিণী ।
কামিতার্থদায়িনী করিপ্রকাণ্ডগামিনী
বীতকল্কমাদধাতু বিঘ্নরাজমম্বিকা ॥ ৩৬.১৪ ॥
দেবতাসপত্নবংশকাননানলচ্ছটা
বারণারিসার্বভৌমবাহনা ঘনালকা ।
নন্দিবাহনস্য কাঽপি নেত্রনন্দিনী সুধা
নেত্রলাঞ্ছিতালিকা সুতং পুনাতু কালিকা ॥ ৩৬.১৫ ॥
রাজসুন্দরাননা মরালরাজগামিনী
রাজমৌলিবল্লভা মৃগাধিরাজমধ্যমা ।
রাজমানবিগ্রহা বিরাজমানসদ্গুণা
রাজতে মহীধরে মদম্বিকা বিরাজতে ॥ ৩৬.১৬ ॥
পর্বচন্দ্রমণ্ডলপ্রভাবিডম্বনাননা
পর্বতাধিনাথবংশপাবনী সনাতনী ।
গর্বগন্ধনাশিনী বিভাবরীবিচারিণাং
শর্বচিত্তনায়িকা করোতু মঙ্গলং মম ॥ ৩৬.১৭ ॥
ওজসশ্চ তেজসশ্চ জন্মভূমিরচ্যুতা
নীলকঞ্জবন্ধুবদ্ধমৌলিরাগমস্তুতা ।
বীতরাগপাশজালনাশবদ্ধকঙ্কণা
বিশ্বপালিনী ময়া মহেশ্বরী বিচিন্ত্যতে ॥ ৩৬.১৮ ॥
অণ্ডমণ্ডলং য়য়া নিরন্তরং চ পচ্যতে
সংস্ফুরত্যশেষভূতহার্দপীঠিকাসু য়া ।
শ্বাসদৃষ্টিসংবিদূষ্মনাদবারিবর্ত্মভির্-
য়ামুপাসতে বিদো নমামি তাং পরাত্পরাম্ ॥ ৩৬.১৯ ॥
পঞ্চয়ুগ্মবেষভৃত্পরাত্পরা সুরার্চিতা
পঞ্চবক্ত্রবক্ত্রপদ্মচঞ্চরীকলোকনা ।
বঞ্চকান্তরঙ্গশত্রুসঞ্চয়প্রণাশিনী
প্রেতমঞ্চশায়িনী কুলং চিরায় পাতু মে ॥ ৩৬.২০ ॥
কর্মণা য়থাবিধি দ্বিজাতয়ো য়জন্তি য়াং
ব্রহ্মণা য়থাশ্রুতং স্তুবন্তি য়ামধীতিনঃ ।
চেতসা য়থা গুরূক্তি চিন্তয়ন্তি য়াং বিদঃ
সা পরা জগত্ত্রয়ীজনন্যজা জয়ত্যুমা ॥ ৩৬.২১ ॥
বাসুদেবজায়য়া বিনম্রয়া নিষেবিতা
বামদেবচাটুচিত্রবাক্যবন্ধলালিতা ।
বাসবাদিদেবতাজয়প্রণাদহর্ষিতা
বারয়ত্বঘানি মে বসুন্ধরাভৃতস্সুতা ॥ ৩৬.২২ ॥
পূর্ণিমাসুধামরীচিসুন্দরাস্যমণ্ডলা
ফুল্লপদ্মপত্রদীর্ঘসম্প্রসন্নলোচনা ।
পুণ্যভূনিষেবণায় পুত্রমেতমুদ্যতং
পূর্ণকামমাদধাতু পাদলগ্নমম্বিকা ॥ ৩৬.২৩ ॥
লালয়ন্তি বালকং বতংসশীতদীধিতিং
শীলয়ন্তি সূক্ষ্মতাং মনাংসি য়োগিনামিব ।
কালয়ন্তু পাপিনাং কুলানি সংহতীস্সতাং
পালয়ন্তু চ স্মিতানি য়োষিতঃ পুরদ্বিষঃ ॥ ৩৬.২৪ ॥
পাদসেবিনঃ কবের্মনোহরাতিশক্বরী-
বর্গ এষ নাট্যকারিনির্জরীগণো য়থা ।
লোকজালচক্রবর্তিপুণ্যয়োষিতো মন-
স্সম্মদায় সাধুকষ্টবারণায় কল্পতাম্ ॥ ৩৬.২৫ ॥ 900
॥ সমাপ্তং চ নবমং শতকম্ ॥
%c10-q1/Jayanth.Ganapathiraju/c10-q1।txt medskip
দশমং শতকম্
সপ্তত্রিংশঃ স্তবকঃ
তত্ত্ববিচারঃ (অনুষ্টুব্বৃত্তম্)
উদ্দীপয়তু নশ্শক্তিমাদিশক্তের্দরস্মিতম্ ।
তত্ত্বং য়স্য মহস্সূক্ষ্মমানন্দো বেতি সংশয়ঃ ॥ ৩৭.১ ॥
পূর্ণং প্রজ্ঞাতৃ সদ্ব্রহ্ম তস্য জ্ঞানং মহেশ্বরী ।
মহিমা তেজ আহোস্বিচ্ছক্তির্বা প্রাণ এব বা ॥ ৩৭.২ ॥
প্রচক্ষতে চিদাত্মত্বং জ্ঞাতুর্জ্ঞানস্য চোভয়োঃ ।
প্রদীপস্য প্রভায়াশ্চ জ্যোতিরাকৃতিতাং য়থা ॥ ৩৭.৩ ॥
চিত একপদার্থত্বাচ্চিচ্চিতা ন বিশিষ্যতে ।
তস্মাদ্ গুণত্বং জ্ঞানস্য শঙ্করেণ নিরাকৃতম্ ॥ ৩৭.৪ ॥
জ্ঞাতুর্জ্ঞানং স্বরূপং স্যান্ন গুণো নাপি চ ক্রিয়া ।
য়দি স্বস্য স্বরূপেণ বৈশিষ্ট্যমনবস্থিতিঃ ॥ ৩৭.৫ ॥
বাচৈব শক্যতে কর্তুং বিভাগস্স্বস্বরূপয়োঃ ।
নানুভূত্যা ততো দ্বৈতং সচ্ছক্ত্যোর্ব্যাবহারিকম্ ॥ ৩৭.৬ ॥
ব্রহ্মজ্ঞানস্য পূর্ণস্য বিষয়ো দ্যৌরুদীর্যতে ।
সা ব্রহ্মণো ব্যাপকত্বাদ্বস্তুতো নাতিরিচ্যতে ॥ ৩৭.৭ ॥
বিকাসাদপি সঙ্কোচাত্ সর্গপ্রলয়য়োর্দ্বয়োঃ ।
প্রজ্ঞানস্য বুধৈরুক্তৌ জন্মনাশাবুভৌ দিবঃ ॥ ৩৭.৮ ॥
ধর্মভূতং পরস্যেদং ন কার্যং পরমং নভঃ ।
অখণ্ডত্বান্ন বিকৃতির্বিশ্বস্মিন্নপ্রকৃতিত্বতঃ ॥ ৩৭.৯ ॥
আকাশে পরমে দীপ্যত্ প্রজ্ঞানং পরমাত্মনঃ ।
একাগ্রত্বাত্প্রবৃদ্ধোষ্মগভীরমভবন্মহঃ ॥ ৩৭.১০ ॥
ত্রিধৈবং ধর্মভূতস্য জ্ঞানস্য বিকৃতিং বিনা ।
শুদ্ধত্ববিষয়ত্বাভ্যাং মহস্ত্বাচ্চ দশাত্রয়ম্ ॥ ৩৭.১১ ॥
বিজ্ঞানে ভাতি য়ে ভান্তি ভাবা দ্রব্যগুণাদয়ঃ ।
ন কিঞ্চিদনুভূয়ন্তে বিজ্ঞানোপরমে তু তে ॥ ৩৭.১২ ॥
এবং স্বতঃ প্রকাশত্বং বিষয়াণাং ন দৃশ্যতে ।
সিদ্ধিশ্চ পরতো ন স্যাত্ সম্বন্ধং কঞ্চিদন্তরা ॥ ৩৭.১৩ ॥
দৃশ্যতে বিষয়াকারা গ্রহণে স্মরণে চ ধীঃ ।
প্রজ্ঞাবিষয়তাদাত্ম্যমেবং সাক্ষাত্প্রদৃশ্যতে ॥ ৩৭.১৪ ॥
ন চেত্সমষ্টিবিজ্ঞানবিভূতিরখিলং জগত্ ।
বিষয়ব্যষ্টিবিজ্ঞানতাদাত্ম্যং নোপপদ্যতে ॥ ৩৭.১৫ ॥
য়থাঽস্মদাদিবিজ্ঞানে ধ্যেয়ং বুদ্ধিরিতি দ্বয়ম্ ।
পূর্ণে সমষ্টিবিজ্ঞানে বিকৃতিঃ প্রকৃতিস্তথা ॥ ৩৭.১৬ ॥
পরিণামো য়থা স্বপ্নঃ সূক্ষ্মস্য স্থূলরূপতঃ ।
জাগ্রত্প্রপঞ্চ এষ স্যাত্তথেশ্বরমহাচিতঃ ॥ ৩৭.১৭ ॥
বিকৃতিস্সর্বভূতানি প্রকৃতিঃ পরদেবতা ।
সতঃ পাদস্তয়োরাদ্যা ত্রিপাদী গীয়তে পরা ॥ ৩৭.১৮ ॥
কবলীকৃত্য সঙ্কল্পানেকাঽপি স্যাদ্যথা মতিঃ ।
ভূতানি কবলীকৃত্য দেবতাঽপি তথা পরা ॥ ৩৭.১৯ ॥
ভূতানামাত্মানস্সর্গে সংহৃতৌ চ তথাঽঽত্মনি ।
প্রভবেদ্দেবতা শ্রেষ্ঠা সঙ্কল্পানাং য়থা মতিঃ ॥ ৩৭.২০ ॥
অনুভূত্যাত্মিকা সেয়মীশশক্তিঃ পরাত্পরা ।
আধারচক্রে পিণ্ডেষু বিরাজতি বিভিন্নবত্ ॥ ৩৭.২১ ॥
সূক্ষ্মস্থূলে ততঃ শাখে বিদ্যুচ্ছক্তিসমীরবত্ ।
তত্রাদ্যা জ্ঞানশক্তিস্স্যাত্ ক্রিয়াশক্তিরনন্তরা ॥ ৩৭.২২ ॥
জ্ঞানেন্দ্রিয়াণি প্রথমা বিভূতির্মনসা সহ ।
কর্মেন্দ্রিয়াণি ত্বপরা বিভূতিস্সহসা সহ ॥ ৩৭.২৩ ॥
ক্রিয়ামূলমুত জ্ঞানমূলং কিমিতি চিন্তয়ন্ ।
আত্মশক্তিমিতো বিদ্বানমৃতত্বায় কল্পতে ॥ ৩৭.২৪ ॥
গভীরাস্সুতরামেতাঃ কালিকাতত্ত্বকারিকাঃ ।
ধিয়ো ভাসো গণপতের্ভবন্তু বিদুষাং মুদে ॥ ৩৭.২৫ ॥ 925
%c10-q2/Bhavani.Mallajosyula/uma\_c10\_q2\_1-25।txt medskip
অষ্টত্রিংশঃ স্তবকঃ
দশমহাবিদ্যাঃ (পাদাকুলকবৃত্তম্)
দূরীকুরুতাদ্ দুঃখং নিখিলং দুর্গায়াস্তদ্দরহসিতং নঃ ।
রচিতাস্যাম্ভোমৃদ্ভ্যাং য়দভুল্লেপনমমলং ব্রহ্মাণ্ডস্য ॥ ৩৮.১ ॥
জন্তৌ জন্তৌ ভুবি খেলন্তি ভূতে ভূতে নভসি লসন্তী ।
দেবে দেবে দিবি দীপ্যন্তী পৃথগিব পূর্ণা সংবিজ্জয়তি ॥ ৩৮.২ ॥
দহরসরোজাদ্ দ্বিদলসরোজং দ্বিদলসরোজাদ্দশশতপত্রম্
দশশতপত্রাদ্দেহং দেহাত্ সকলং বিষয়ং সংবিদ্ ব্রজতি ॥ ৩৮.৩ ॥
বহ্নিজ্বালা সমিধমিবৈষা সকলং দেহং সংবিত্প্রাপ্তা ।
পৃথগিব ভূতা ব্যপগতবীর্যা ভবতি সধূমা সংসারায় ॥ ৩৮.৪ ॥
অত্রানুভবস্সুখদুঃখানামত্রাহঙ্কৃতিরনৃতা ভবতি ।
অত্রৈবেদং সকলং ভিন্নং প্রতিভাসেত প্রজ্ঞাস্খলনে ॥ ৩৮.৫ ॥
দশশতপত্রাদ্ দ্বিদলসরোজং দ্বিদলসরোজাদ্দহরসরোজম্ ।
অবতরতীশা য়েষামেষা তেষামন্তর্নিত্যা নিষ্ঠা ॥ ৩৮.৬ ॥
অথবা দেহাদাবৃত্তস্সন্নন্যতমস্যামাসু স্থল্যাম্ ।
আধারস্থে কুলকুণ্ডে বা স্থিতধীর্নিত্যাং নিষ্ঠাং লভতে ॥ ৩৮.৭ ॥
দশশতপত্রে শক্তির্ললিতা বজ্রবতী সা দ্বিদলসরোজে ।
দহারাম্বুরুহে ভদ্রা কালী মূলাধারে ভৈরব্যাখ্যা ॥ ৩৮.৮ ॥
খেলতি ললিতা দ্রবতি স্থানে ছিন্নগ্রন্থিনি রাজত্যৈন্দ্রী ।
বদ্ধকবাটে ভদ্রা কালী তপসা জ্বলিতে ভৈরব্যাখ্যা ॥ ৩৮.৯ ॥
য়দ্যপি কালীবজ্রেশ্বর্যৌ স্যাতাং ভিন্নে ইব পিণ্ডেষু ।
ওজস্তত্ত্বস্যৈক্যাদণ্ডে ন দ্বৌ শক্তের্ভেদৌ ভবতঃ ॥ ৩৮.১০ ॥
এবমভেদো য়দ্যপি কর্মদ্বৈধাত্ দ্বৈধং তত্রাপি স্যাত্ ।
সৈব পচন্তী ভুবনং কালী সৈব দহন্তী শত্রূনৈন্দ্রী ॥ ৩৮.১১ ॥
পিণ্ডে চাণ্ডে জঙ্গমসারঃ শুদ্ধা প্রজ্ঞা সুন্দর্যুক্তা ।
বিষয়দশায়াং দেশীভূতা সেয়ং ভুবনেশ্বর্যাখ্যাতা ॥ ৩৮.১২ ॥
শূন্যপ্রখ্যা য়া চিল্লীনা প্রলয়ে ব্রহ্মণি জন্মিষু সুপ্তৌ
কবলিতসকলব্রহ্মাণ্ডাং তাং কবয়ঃ শ্রেষ্ঠাং জ্যেষ্ঠামাহুঃ ॥ ৩৮.১৩ ॥
নিদ্রাবিস্মৃতিমোহালস্যপ্রবিভেদৈস্সা ভবমগ্নেষু ।
এষৈব স্যাদ্যুঞ্জানেষু ধ্বস্তবিকল্পঃ কোঽপি সমাধিঃ ॥ ৩৮.১৪ ॥
ঐন্দ্রী শক্তির্ব্যক্তবলা চেদ্ ভিন্নে স্যাতাং শীর্ষকপালে ।
তস্মাদেতাং চতুরবচস্কাঃ পরিভাষন্তে ছিন্নশিরস্কাম্ ॥ ৩৮.১৫ ॥
ভবতি পরা বাগ্ভৈরব্যাখ্যা পশ্যন্তী সা কথিতা তারা ।
রসনিধিমাপ্তা জিহ্বারঙ্গং মাতঙ্গীতি প্রথিতা সেয়ম্ ॥ ৩৮.১৬ ॥
পিণ্ডে চাণ্ডে স্তম্ভনশক্তির্বগলা মাত্রস্তব মহিমৈকঃ ।
সর্বে ব্যক্তাঃ কিরণাঃ কমলা বাহ্যো মহিমা ভুবনাম্ব তব ॥ ৩৮.১৭ ॥
বোধে বোধে বোদ্ধুশ্শক্তিং সঙ্কল্পানাং পশ্চাদ্ভান্তীম্ ।
অবিমুঞ্চন্যো মনুতে ধীরো য়ত্কিঞ্চিদ্বা ললিতাঽবতি তম্ ॥ ৩৮.১৮ ॥
দৃষ্টৌ দৃষ্টৌ দ্রষ্টুশ্শক্তিং লোচনমণ্ডলমধ্যে ভান্তীম্ ।
অবিমুঞ্চন্যঃ পশ্যতি ধীরো য়ত্কিঞ্চিদ্বা তমবত্যৈন্দ্রী ॥ ৩৮.১৯ ॥
প্রাণসমীরং বিদধানমিমং নিত্যাং য়াত্রামত্র শরীরে ।
চরণে চরণে পরিশীলয়তি স্থিরদৃষ্টির্যস্তমবতি কালী ॥ ৩৮.২০ ॥
স্থূলবিকারান্ পরিমুঞ্চন্ত্যা নির্মলনভসি স্থিতয়া দৃষ্ট্যা ।
মজ্জন্ত্যা বা দহরাকাশে লোকেশ্বর্যাঃ করুণাং লভতে ॥ ৩৮.২১ ॥
সর্ববিকল্পান্ পরিভূয়ান্তর্বিমলং মৌনং মহদবলম্ব্য ।
কেবলমেকস্তিষ্ঠতি য়োঽন্তস্তং সা জ্যেষ্ঠা কুরুতে মুক্তম্ ॥ ৩৮.২২ ॥
মূলে স্থিত্যা ভৈরব্যাখ্যাং তারাং দেবীমুদ্গীথেন ।
সেবেতার্যো বিদিতরহস্যো মাতঙ্গীং তাং গুণগানেন ॥ ৩৮.২৩ ॥
আসনবন্ধাদচলো ভূত্বা রুদ্ধপ্রাণো বগলাং ভজতে ।
অভিতো ব্যাপ্তং ব্যক্তং তেজঃ কলয়ন্ কমলাকরুণাং লভতে ॥ ৩৮.২৪ ॥
একবিধাদৌ বহুভেদাঽথো শক্তিরনন্তা পরমেশস্য ।
সভজনমার্গং গণপতিমুনিনা পাদাকুলকৈরেবং বিবৃতা ॥ ৩৮.২৫ ॥ 950
%c10-q3/Sarada.Susarla/uma-c10-q3-itrans.txt medskip
একোনচত্বারিংশঃ স্তবকঃ
প্রায়ো ব্যোমশরীরা (ইন্দ্রবজ্রাবৃত্তম্)
ব্যাপ্যেদমিন্দোর্ভুবনং য় য়েব
প্রায়েণ তস্যামলচন্দ্রিকাঽভূত্ ।
মন্দস্তবার্তিং স ধুনোতু হাসো
নিঃশেষলোকেশ্বরবল্লভায়াঃ ॥ ৩৯.১ ॥
পূর্ণে বিয়ত্যেকতটিজ্জ্বলন্তী
লোকানশেষাননিশং পচন্তী ।
মেঘে কদাচিন্মহসা স্ফুরন্তী
চণ্ডী প্রচণ্ডা হরতাদঘং নঃ ॥ ৩৯.২ ॥
গোলানি কান্যপ্যধুনোদ্ভবন্তি
জীর্যন্তি কান্যপ্যখিলেশকান্তে
য়ান্ত্যম্বিকে কান্যপি বৃদ্ধিমত্র
পাকে ভবত্যাঃ পরিতঃ প্রবৃত্তে ॥ ৩৯.৩ ॥
ভাসাং বিনেত্রা মহতা গ্রহৈশ্চ
ভূরিপ্রমাণৈর্যুতমীশকান্তে ।
একৈকমণ্ডং তব লোমবচ্চেত্
কস্তে মহদ্ভাগ্যমিহ ব্রবীতু ॥ ৩৯.৪ ॥
নাথস্য তে রূপমণোরণীয়ো
মাতস্ত্বদীয়ং মহতো মহীয়ঃ ।
জনাতি য়ো দেবি রহস্যমেতদ্
ব্যাখ্যাতুমেষ প্রভবত্যশেষম্ ॥ ৩৯.৫ ॥
য়দ্ গর্জিতং বারিদঘর্ষণেষু
শব্দস্তবায়ং সুগভীরঘোষঃ ।
য়ল্লোকরাজ্ঞি স্ফুরিতং তদেত-
দুজ্জৃম্ভিতং কিঞ্চন কান্তিবীচেঃ ॥ ৩৯.৬ ॥
ইন্দ্রস্য বজ্রং জ্বলিতং কৃশানোর্-
জ্যোতিস্সহস্রচ্ছদবান্ধবস্য ।
পীয়ূষভানোর্হসিতং বিসারি
জীবস্য চক্ষুর্মম তাত দৈবম্ ॥ ৩৯.৭ ॥
য়স্যৈব তেজঃ প্রবিভক্তমর্ক-
বিদ্যুচ্ছশাঙ্কানললোচনেষু ।
গূঢং তদাকাশগৃহে সমন্তা-
দন্তানভিজ্ঞং প্রণমামি দৈবম্ ॥ ৩৯.৮ ॥
জাগ্রত্সু বুদ্ধির্নিমিষত্সু নিদ্রা
শুষ্কেষু পক্তিস্তরুণেষু বৃদ্ধিঃ ।
ধীরেষু নিষ্ঠা চপলেষু চেষ্টা
দেবী মমাপত্তিমপাকরোতু ॥ ৩৯.৯ ॥
বিদ্যাবতো বাদবিধানশক্তির্-
বীরস্য সঙ্গ্রামবিধানশক্তিঃ ।
নারীমণের্মোহবিধানশক্তির্-
লেশত্রয়ং কিঞ্চিদাপারশক্তেঃ ॥ ৩৯.১০ ॥
উত্সাহয়ন্তী তপতাং মনাংসি
সঞ্চোদয়ন্তী চ মহাক্রিয়াসু ।
সঙ্ক্ষোভয়ন্তী হৃদয়ং খলানাং
সম্মোহয়ন্তী চ পরাঽবতান্নঃ ॥ ৩৯.১১ ॥
সঞ্চালয়ন্তী সকলস্য দেহং
ব্যানস্য শক্ত্যা পরিতো লসন্ত্যা ।
জেতুঃ প্রতাপেঽস্তি পলায়নেঽস্তি
ভীতস্য চেয়ং নিখিলেশশক্তিঃ ॥ ৩৯.১২ ॥
একং স্বরূপং বহুচিত্রয়োগাত্
সন্দর্শয়ন্তী বিবিধং জনেভ্যঃ ।
সম্যগ্দৃশে স্বং বিভুমর্পয়ন্তী
সর্বাদিমায়ৈব মহেশজায়া ॥ ৩৯.১৩ ॥
য়স্সংশ্রয়েতাখিলসঙ্গতিস্ত্বাং
ধ্যানেন মন্ত্রেণ গুণস্তবৈর্বা ।
ত্রৈলোক্যসাম্রাজ্যধুরন্ধরস্য
শুদ্ধান্তকান্তে স কৃতী মনুষ্যঃ ॥ ৩৯.১৪ ॥
মূলাগ্নিমুদ্দীপ্য শিরশ্শশাঙ্কং
সন্দ্রাব্য য়স্তর্পয়তে কৃতী ত্বাম্ ।
তস্মিন্নগাধীশ্বরকন্যকে ত্বং
প্রাদুর্ভবন্তী ন কিমাদধাসি ॥ ৩৯.১৫ ॥
য়স্ত্বাং সহস্রারসরোজমধ্যে
সোমস্বরূপাং ভজতেঽম্ব য়োগী ।
তস্যান্তরঃ শান্তিমুপৈতি তাপো
বাহ্যস্য কা নাম কথাঽল্পকস্য ॥ ৩৯.১৬ ॥
দণ্ডেন য়োঽন্তর্দহরেঽবতীর্ণঃ
প্রাণেন বাচা মহসা ধিয়া বা ।
প্রাপ্নোতি সোঽয়ং পুরমদ্বিতীয়ং
য়ত্র ত্বমীশা সহ চিত্রলীলা ॥ ৩৯.১৭ ॥
তন্ত্রোদিতং বিশ্ববিনেত্রি মন্ত্রং
য়স্তে নরঃ সংয়মবানুপাস্তে ।
রুদ্রাণি সান্দ্রাম্বুদকেশপাশে
পাশৈর্বিমুক্তঃ স জয়ত্যশেষম্ ॥ ৩৯.১৮ ॥
পদ্মাসনো দ্বাদশবর্ণশান্তী
দম্ভোলিপাণির্ভুবনাধিনাথা ।
গীর্বাণমার্গো ভৃগুরব্জয়োনির্-
অন্তে তথাগ্রে চ হলাং বিরাজী ॥ ৩৯.১৯ ॥
জম্ভস্য হন্তাঽনলশান্তিচন্দ্রৈঃ
সংয়ুক্ত ঊষ্মা গলদেশজন্মা ।
দন্তস্থলীসম্ভব ঊষ্মবর্ণো
বাণীপতির্বজ্রধরশ্চ লজ্জা ॥ ৩৯.২০ ॥
বিদ্যা ত্বিয়ং পঞ্চদশাক্ষরাঢ্যা
সাক্ষান্মহামৌনগুরূপদিষ্টা ।
গোপ্যাসু গোপ্যা সুকৃতৈরবাপ্যা
শ্রেষ্ঠা বিনুত্যা পরমেষ্ঠিনাঽপি ॥ ৩৯.২১ ॥
দেহেষ্বিয়ং কুণ্ডলিনী ন্যগাদি
ভূতেষু বিদ্যুদ্ ভুবনেষু চাভ্রম্ ।
দেবাঙ্গনামস্তকলালিতাঙ্ঘ্রির্-
দেবী ভবানী খলু দেবতাসু ॥ ৩৯.২২ ॥
চক্ষুর্বিধায়াচলমন্তরেণ
প্রাণং প্রপশ্যন্ মনুবর্ণরূপম্ ।
সংসেবতে চেত্সকলস্য ধাত্রীং
সর্বেষ্টলাভো বিদুষঃ করস্থঃ ॥ ৩৯.২৩ ॥
একাক্ষরীঃ পঞ্চদশাক্ষরীং বা
বিদ্যাঃ প্রকৃষ্টাঃ সকলেশশক্তেঃ ।
য়ো ভক্তিয়ুক্তঃ প্রজপেদমুষ্য
প্রাণো বশে নিস্তুলসিদ্ধিয়োনিঃ ॥ ৩৯.২৪ ॥
এতাঃ কবীনাং পদকিঙ্করস্য
পূতাঃ প্রমোদং পরমাবহন্তু ।
গীতাস্সভক্তিদ্রবমিন্দ্রবজ্রাঃ
শ্বেতাচলাধীশ্বরবল্লভায়াঃ ॥ ৩৯.২৫ ॥ 975
%c10-q4/Sai.Susarla/c10-q4।txt medskip
চত্বারিংশঃ স্তবকঃ
দৈবগীতম্ (পাদাকুলকবৃত্তম্)
শময়তু পাপং দময়তু দুঃখং হরতু বিমোহং স্ফুটয়তু বোধম্ ।
প্রথয়তু শক্তিং মন্দং হসিতং মনসিজশাসনকুলসুদৃশো নঃ ॥ ৪০.১ ॥
আর্দ্রা দয়য়া পূর্ণা শক্ত্যা দৃষ্টিবশংবদবিষ্টপরাজা ।
অখিলপুরন্ধ্রীপূজ্যা নারী মম নিশ্শেষাং বিপদং হরতু ॥ ৪০.২ ॥
শুদ্ধব্রহ্মণি মোদো দৈবং তত্র সিসৃক্ষতি কামো দৈবম্ ।
সৃজতি পদার্থান্ দৃষ্টির্দৈবং তান্ বিভ্রাণে মহিমা দৈবম্ ॥ ৪০.৩ ॥
বিকৃতৌ বিকৃতৌ প্রকৃতির্দৈবং বিষয়ে বিষয়ে সত্তা দৈবম্ ।
দৃষ্টৌ দৃষ্টৌ প্রমিতির্দৈবং ধ্যানে ধ্যানে নিষ্ঠা দৈবম্ ॥ ৪০.৪ ॥
স্ফূর্তৌ স্ফূর্তৌ মায়া দৈবং চলনে চলনে শক্তির্দৈবম্ ।
তেজসি তেজসি লক্ষ্মীর্দৈবং শব্দে শব্দে বাণী দৈবম্ ॥ ৪০.৫ ॥
হৃদয়ে হৃদয়ে জীবদ্দৈবং শীর্ষে শীর্ষে ধ্যায়দ্দৈবম্ ।
চক্ষুষি চক্ষুষি রাজদ্দৈবং মূলে মূলে প্রতপদ্দৈবম্ ॥ ৪০.৬ ॥
অভিতো গগনে প্রসরদ্দৈবং পৃথিবীলোকে রোহদ্দৈবম্ ।
দিনকরবিম্বে দীপ্যদ্দৈবং সিতকরবিম্বে সিঞ্চদ্দৈবম্ ॥ ৪০.৭ ॥
শ্রাবং শ্রাবং বেদ্যং দৈবং নামং নামং রাধ্যং দৈবম্ ।
স্মারং স্মারং ধার্যং দৈবং বারং বারং স্তুত্যং দৈবম্ ॥ ৪০.৮ ॥
শ্রুতিষু বটূনাং গ্রাহ্যং দৈবং গৃহিণামগ্নৌ তর্প্যং দৈবম্ ।
তপতাং শীর্ষে পুষ্টং দৈবং য়তিনাং হৃদয়ে শিষ্টং দৈবম্ ॥ ৪০.৯ ॥
নমতা পুষ্পৈঃ পূজ্যং দৈবং কবিনা পদ্যারাধ্যং দৈবম্ ।
মুনিনা মনসা ধ্যেয়ং দৈবং য়তিনা স্বাত্মনি শোধ্যং দৈবম্ ॥ ৪০.১০ ॥
স্তুবতাং বাচো বিদধদ্দৈবং স্মরতাং চেতঃ স্ফুটয়দ্দৈবম্ ।
জপতাং শক্তিং প্রথয়দ্দৈবং নমতাং দুরিতং দময়দ্দৈবম্ ॥ ৪০.১১ ॥
বাচো বিনয়দ্বহ্নৌ দৈবং প্রাণান্ বিনয়দ্বিদ্যুতি দৈবম্ ।
কামান্ বিনয়চ্চন্দ্রে দৈবং বুদ্ধীর্বিনয়ত্সূর্যে দৈবম্ ॥ ৪০.১২ ॥
হৃদয়ে নিবসদ্ গৃহ্ণদ্দৈবং বস্তৌ নিবসদ্বিসৃজদ্দৈবম্ ।
কণ্ঠে নিবসত্প্রবদদ্দৈবং কুক্ষৌ নিবসত্প্রপচদ্দৈবম্ ॥ ৪০.১৩ ॥
দেহে নিবসদ্বিলচদ্দৈবং পঞ্চপ্রাণাকারং দৈবম্ ।
ভাগি সমস্তস্যান্নে দৈবং স্বাহাকারে তৃপ্যদ্দৈবম্ ॥ ৪০.১৪ ॥
বিভ্রন্নারীবেষং দৈবং শুভ্রদরস্মিতবিভ্রাড্ দৈবম্ ।
অভ্রমদাপহচিকুরং দৈবং বিভ্রমবাসস্থানং দৈবম্ ॥ ৪০.১৫ ॥
শীতজ্যোতির্বদনং দৈবং রুচিবিন্দূপমরদনং দৈবম্ ।
লাবণ্যামৃতসদনং দৈবং স্মররিপুলোচনমদনং দৈবম্ ॥ ৪০.১৬ ॥
লক্ষ্মীবীচিমদলিকং দৈবং প্রজ্ঞাবীচিমদীক্ষং দৈবম্ ।
তেজোবীচিমদধরং দৈবং সম্মদবীচিমদাস্যং দৈবম্ ॥ ৪০.১৭ ॥
করুণোল্লোলিতনেত্রং দৈবং শ্রীকারাভশ্রোত্রং দৈবম্ ।
কুসুমসুকোমলগাত্রং দৈবং কবিবাগ্বৈভবপাত্রং দৈবম্ ॥ ৪০.১৮ ॥
হিমবতি শৈলে ব্যক্তং দৈবং সিতগিরিশিখরে ক্রীডদ্দৈবম্ ।
তুম্বুরুনারদগীতং দৈবং সুরমুনিসিদ্ধধ্যাতং দৈবম্ ॥ ৪০.১৯ ॥
ক্বচিদপি রতিশতললিতং দৈবং ক্বচিদপি সুতরাং চণ্ডং দৈবম্ ।
ভক্তমনোনুগবেষং দৈবং য়োগিমনোনুগবিভবং দৈবম্ ॥ ৪০.২০ ॥
চরিতে মধুরং স্তুবতাং দৈবং চরণে মধুরং নমতাং দৈবম্ ।
অধরে মধুরং শম্ভোর্দৈবং মম তু স্তন্যে মধুরং দৈবম্ ॥ ৪০.২১ ॥
ভুজভৃতবিষ্টপভারং দৈবং পদধৃতসম্পত্সারং দৈবম্ ।
লালিতনির্জরবীরং দৈবং রক্ষিতসাত্ত্বিকধীরং দৈবম্ ॥ ৪০.২২ ॥
চিচ্ছক্ত্যাত্মকমধিতনু দৈবং তটিদাকৃত্যধিভূতং দৈবম্ ।
শ্রুতিষু শিবেতি প্রথিতং দৈবং জয়তি জগত্ত্রয়বিনুতং দৈবম্ ॥ ৪০.২৩ ॥
রমণমহর্ষেরন্তেবাসী মধ্যমপুত্রো নরসিংহস্য ।
বাসিষ্ঠোঽয়ং মরুতাং মাতুর্গণপতিরঙ্ঘ্রিং শরণমুপৈতি ॥ ৪০.২৪ ॥
ত্রিভুবনভর্তুঃ পরমা শক্তিস্সকলসবিত্রী গৌরী জয়তি ।
তন্নুতিরেষা গণপতিরচিতা পাদাকুলকপ্রান্তা জয়তি ॥ ৪০.২৫ ॥ 1000
॥ সমাপ্তং চ দশমং শতকম্ ॥
॥ ইতি শ্রীভগবন্মহর্ষিরমণান্তেবাসিনো বাসিষ্ঠস্য নরসিংহসূনোঃ ॥
গণপতেঃ কৃতিঃ উমাসহস্রং সমাপ্তম্ ॥