It is the heart of Skanda Purana in the form of a dialogue between Lord Shiva and Goddess Parvati. The direct experience of Suta is brilliantly expressed through each and every couplet in it.
The couplets of this Guru Gita is a great remedy for the longlasting disease of birth and death. It is the sweetest nectar for Sadhakas. The merit is diminished by drinking the nectar of heaven. By drinking the nectar of this Gita sin is destroyed which leads to Absolute Peace and Knowledge of one’s real nature.
॥ Guru Gita Bengali Lyrics ॥
॥ গুরু গীতা ॥
॥ প্রথমোঽধ্যায়ঃ ॥
অচিন্ত্যাব্যক্তরূপায় নির্গুণায় গণাত্মনে ।
সমস্তজগদাধারমূর্তয়ে ব্রহ্মণে নমঃ ॥ ১ ॥
ঋষয় ঊচুঃ ।
সূত সূত মহাপ্রাজ্ঞ নিগমাগমপারগম্ ।
গুরুস্বরূপমস্মাকং ব্রূহি সর্বমলাপহম্ ॥ ২ ॥
যস্য শ্রবণমাত্রেণ দেহী দুঃখাদ্বিমুচ্যতে ।
যেন মার্গেণ মুনয়ঃ সর্বজ্ঞৎবং প্রপেদিরে ॥ ৩ ॥
যৎপ্রাপ্য ন পুনর্যাতি নরঃ সংসারবন্ধনম্ ।
তথাবিধং পরং তত্ত্বং বক্তব্যমধুনা ৎবয়া ॥ ৪ ॥
গুহ্যাদ্গুহ্যতমং সারং গুরুগীতা বিশেষতঃ ।
ৎবৎপ্রসাদাচ্চ শ্রোতব্যা তৎসর্বং ব্রূহি সূত নঃ ॥ ৫ ॥
ইতি সম্প্রার্থিতঃ সূতো মুনিসঙ্ঘৈর্মুহুর্মুহুঃ ॥
কুতূহলেন মহতা প্রোবাচ মধুরং বচঃ ॥ ৬ ॥
সূত উবাচ ।
শ্রুণুধ্বং মুনয়ঃ সর্বে শ্রদ্ধয়া পরয়া মুদা ।
বদামি ভবরোগঘ্নীং গীতাং মাতৃস্বরূপিণীম্ ॥ ৭ ॥
পুরা কৈলাসশিখরে সিদ্ধগন্ধর্বসেবিতে ।
তত্র কল্পলতাপুষ্পমন্দিরেঽত্যন্তসুন্দরে ॥ ৮ ॥
ব্যাঘ্রাজিনে সমাসীনং শুকাদিমুনিবন্দিতম্ ।
বোধয়ন্তং পরং তত্ত্বং মধ্যে মুনিগণে ক্বচিৎ ॥ ৯ ॥
প্রণম্রবদনা শশ্বন্নমস্কুর্বন্তমাদরাৎ ।
দৃষ্ট্বা বিস্ময়মাপন্ন পার্বতী পরিপৃচ্ছতি ॥ ১০ ॥
পার্বত্যুবাচ ।
ওঁ নমো দেব দেবেশ পরাৎপর জগদ্গুরো ।
ৎবাং নমস্কুর্বতে ভক্ত্যা সুরাসুরনরাঃ সদা ॥ ১১ ॥
বিধিবিষ্ণুমহেন্দ্রাদ্যৈর্বন্দ্যঃ খলু সদা ভবান্ ।
নমস্করোষি কস্মৈ ৎবং নমস্কারাশ্রয়ঃ কিল ॥ ১২ ॥
দৃষ্ট্বৈতৎকর্ম বিপুলমাশ্চর্য প্রতিভাতি মে ।
কিমেতন্ন বিজানেঽহং কৃপয়া বদ মে প্রভো ॥ ১৩ ॥
ভগবন্ সর্বধর্মজ্ঞ ব্রতানাং ব্রতনায়কম্ ।
ব্রূহি মে কৃপয়া শম্ভো গুরুমাহাত্ম্যমুত্তমম্ ॥ ১৪ ॥
কেন মার্গেণ ভো স্বামিন্ দেহী ব্রহ্মময়ো ভবেৎ ।
তৎকৃপাং কুরু মে স্বামিন্নমামি চরণৌ তব ॥ ১৫ ॥
ইতি সম্প্রার্থিতঃ শশ্বন্মহাদেবো মহেশ্বরঃ ।
আনন্দভরতিঃ স্বান্তে পার্বতীমিদমব্রবীৎ ॥ ১৬ ॥
শ্রী মহাদেব উবাচ ।
ন বক্তব্যমিদং দেবি রহস্যাতিরহস্যকম্ ।
ন কস্যাপি পুরা প্রোক্তং ৎবদ্ভক্ত্যর্থং বদামি তৎ ॥ ১৭ ॥
মম রূপাসি দেবি ৎবমতস্তৎকথয়ামি তে ।
লোকোপকারকঃ প্রশ্নো ন কেনাপি কৃতঃ পুরা ॥ ১৮ ॥
যস্য দেবে পরা ভক্তির্যথা দেবে তথা গুরৌ ।
তস্যৈতে কথিতা হ্যর্থাঃ প্রকাশন্তে মহাত্মনঃ ॥ ১৯ ॥
যো গুরুঃ স শিবঃ প্রোক্তো যঃ শিবঃ স গুরুঃ স্মৃতঃ ।
বিকল্পং যস্তু কুর্বীত স নরো গুরুতল্পগঃ ॥ ২০ ॥
দুর্লভং ত্রিষু লোকেষু তচ্ছৃণুশ্ব বদাম্যহম্ ।
গুরুব্রহ্ম বিনা নান্যঃ সত্যং সত্যং বরাননে ॥ ২১ ॥
বেদশাস্ত্রপুরাণানি চেতিহাসাদিকানি চ ।
মন্ত্রয়ন্ত্রাদিবিদ্যানাং মোহনোচ্চাটনাদিকম্ ॥ ২২ ॥
শৈবশাক্তাগমাদীনি হ্যন্যে চ বহবো মতাঃ ।
অপভ্রংশাঃ সমস্তানাং জীবানাং ভ্রান্তচেতসাম্ ॥ ২৩ ॥
জপস্তপো ব্রতং তীর্থং যজ্ঞো দানং তথৈব চ ।
গুরুতত্ত্বমবিজ্ঞায় সর্বং ব্যর্থং ভবেৎপ্রিয়ে ॥ ২৪ ॥
গুরুবুদ্ধ্যাত্মনো নান্যৎ সত্যং সত্যং বরাননে ।
তল্লাভার্থং প্রয়ত্নস্তু কর্তব্যশ্চ মনীষিভিঃ ॥ ২৫ ॥
গূঢাবিদ্যা জগন্মায়া দেহশ্চাজ্ঞানসম্ভবঃ ।
বিজ্ঞানং যৎপ্রসাদেন গুরুশব্দেন কথয়তে ॥ ২৬ ॥
যদঙ্ঘ্রিকমলদ্বন্দ্বং দ্বন্দ্বতাপনিবারকম্ ।
তারকং ভবসিন্ধোশ্চ তং গুরুং প্রণমাম্যহম্ ॥ ২৭ ॥
দেহী ব্রহ্ম ভবেদ্যস্মাৎ ৎবৎকৃপার্থং বদামি তৎ ।
সর্বপাপবিশুদ্ধাত্মা শ্রীগুরোঃ পাদসেবনাৎ ॥ ২৮ ॥
সর্বতীর্থাবগাহস্য সম্প্রাপ্নোতি ফলং নরঃ ।
গুরোঃ পাদোদকং পীৎবা শেষং শিরসি ধারয়ন্ ॥ ২৯ ॥
শোষণং পাপপঙ্কস্য দীপনং জ্ঞানতেজসঃ ।
গুরোঃ পাদোদকং সম্যক্ সংসারার্ণবতারকম্ ॥ ৩০ ॥
অজ্ঞানমূলহরণং জন্মকর্মনিবারকম্ ।
জ্ঞানবিজ্ঞানসিদ্ধ্যর্থং গুরুপাদোদকং পিবেৎ ॥ ৩১ ॥
গুরুপাদোদকং পানং গুরোরুচ্ছিষ্টভোজনম্ ।
গুরুমূর্তেঃ সদা ধ্যানং গুরোর্নাম্নঃ সদা জপঃ ॥ ৩২ ॥
স্বদেশিকস্যৈব চ নামকীর্তনং
ভবেদনন্তস্য শিবস্য কীর্তনম্ ।
স্বদেশিকস্যৈব চ নামচিন্তনং
ভবেদনন্তস্য শিবস্য চিন্তনম্ ॥ ৩৩ ॥
যৎপাদরেণুর্বৈ নিত্যং কোঽপি সংসারবারিধৌ ।
সেতুবন্ধায়তে নাথং দেশিকং তমুপাস্মহে ॥ ৩৪ ॥
যদনুগ্রহমাত্রেণ শোকমোহৌ বিনশ্যতঃ ।
তস্মৈ শ্রীদেশিকেন্দ্রায় নমোঽস্তু পরমাত্মনে ॥ ৩৫ ॥
যস্মাদনুগ্রহং লব্ধ্বা মহদজ্ঞান্মুৎসৃজেৎ ।
তস্মৈ শ্রীদেশিকেন্দ্রায় নমশ্চাভীষ্টসিদ্ধয়ে ॥ ৩৬ ॥
কাশীক্ষেত্রং নিবাসশ্চ জান্হবী চরণোদকম্ ।
গুরুবিশ্বেশ্বরঃ সাক্ষাৎ তারকং ব্রহ্মনিশ্চয়ঃ ॥ ৩৭ ॥
গুরুসেবা গয়া প্রোক্তা দেহঃ স্যাদক্ষয়ো বটঃ ।
তৎপাদং বিষ্ণুপাদং স্যাৎ তত্র দত্তমনন্তকম্ ॥ ৩৮ ॥
গুরুমূর্তি স্মরেন্নিত্যং গুরুর্নাম সদা জপেৎ ।
গুরোরাজ্ঞাং প্রকুর্বীত গুরোরন্যং ন ভাবয়েৎ ॥ ৩৯ ॥
গুরুবক্ত্রে স্থিতং ব্রহ্ম প্রাপ্যতে তৎপ্রসাদতঃ ।
গুরোর্ধ্যানং সদা কুর্যাৎ কুলস্ত্রী স্বপতিং যথা ॥ ৪০ ॥
স্বাশ্রমং চ স্বজাতিং চ স্বকীর্তিং পুষ্টিবর্ধনম্ ।
এতৎসর্বং পরিত্যজ্য গুরুমেব সমাশ্রয়েৎ ॥ ৪১ ॥
অনন্যাশ্চিন্তয়ন্তো যে সুলভং পরমং সুখম্ ।
তস্মাৎসর্বপ্রয়ত্নেন গুরোরারাধনং কুরু ॥ ৪২ ॥
গুরুবক্ত্রে স্থিতা বিদ্যা গুরুভক্ত্যা চ লভ্যতে ।
ত্রৈলোক্যে স্ফুটবক্তারো দেবর্ষিপিতৃমানবাঃ ॥ ৪৩ ॥
গুকারশ্চান্ধকারো হি রুকারস্তেজ উচ্যতে ।
অজ্ঞানগ্রাসকং ব্রহ্ম গুরুরেব ন সংশয়ঃ ॥ ৪৪ ॥
গুকারো ভবরোগঃ স্যাৎ রুকারস্তন্নিরোধকৃৎ ।
ভবরোগহরত্যাচ্চ গুরুরিত্যভিধীয়তে ॥ ৪৫ ॥
গুকারশ্চ গুণাতীতো রূপাতীতো রুকারকঃ ।
গুণরূপবিহীনৎবাৎ গুরুরিত্যভিধীয়তে ॥ ৪৬ ॥
গুকারঃ প্রথমো বর্ণো মায়াদিগুণভাসকঃ ।
রুকারোঽস্তি পরং ব্রহ্ম মায়াভ্রান্তিবিমোচনম্ ॥ ৪৭ ॥
এবং গুরুপদং শ্রেষ্ঠং দেবানামপি দুর্লভম্ ।
গরুডোরগগন্ধর্বসিদ্ধাদিসুরপূজিতম্ ॥ ৪৮ ॥
ধ্রুবং দেহি মুমুক্ষূণাং নাস্তি তত্ত্বং গুরোঃ পরম্ ।
গুরোরারাধনং কুর্যাৎ স্বজীবৎবং নিবেদয়েৎ ॥ ৪৯ ॥
আসনং শয়নং বস্ত্রং বাহনং ভূষণাদিকম্ ।
সাধকেন প্রদাতব্যং গুরুসন্তোষকারণম্ ॥ ৫০ ॥
কর্মণা মনসা বাচা সর্বদাঽঽরাধয়েদ্গুরুম্ ।
দীর্ঘদণ্ডং নমস্কৃত্য নির্লজ্জৌ গুরুসন্নিধৌ ॥ ৫১ ॥
শরীরমিন্দ্রিয়ং প্রাণমর্থস্বজনবান্ধবান্ ।
আত্মদারাদিকং সর্বং সদ্গুরুভ্যো নিবেদয়েৎ ॥ ৫২ ॥
গুরুরেকো জগৎসর্বং ব্রহ্মবিষ্ণুশিবাত্মকম্ ।
গুরোঃ পরতরং নাস্তি তস্মাৎসম্পূজয়েদ্গুরুম্ ॥ ৫৩ ॥
সর্বশ্রুতিশিরোরত্নবিরাজিতপদাংবুজম্ ।
বেদান্তার্থপ্রবক্তারং তস্মাৎ সম্পূজয়েদ্গুরুম্ ॥ ৫৪ ॥
যস্য স্মরণমাত্রেণ জ্ঞানমুৎপদ্যতে স্বয়ম্ ।
স এব সর্বসম্পত্তিঃ তস্মাৎসম্পূজয়েদ্গুরুম্ ॥ ৫৫ ॥
কৃমিকোটিভিরাবিষ্টং দুর্গন্ধকুলদূষিতম্ ।
অনিত্যং দুঃখনিলয়ং দেহং বিদ্ধি বরাননে ॥ ৫৬ ॥
সংসারবৃক্ষমারূঢাঃ পতন্তি নরকার্ণবে ।
যস্তানুদ্ধরতে সর্বান্ তস্মৈ শ্রীগুরবে নমঃ ॥ ৫৭ ॥
গুরুর্ব্রহ্মা গুরুর্বিষ্ণুর্গুরুর্দেবো মহেশ্বরঃ ।
গুরুরেব পরং ব্রহ্ম তস্মৈ শ্রীগুরবে নমঃ ॥ ৫৮ ॥
অজ্ঞানতিমিরান্ধস্য জ্ঞানাঞ্জনশলাকয়া ।
চক্ষুরুন্মীলিতং যেন তস্মৈ শ্রীগুরবে নমঃ ॥ ৫৯ ॥
অখণ্ডমণ্ডলাকারং ব্যাপ্তং যেন চরাচরম্ ।
তৎপদং দর্শিতং যেন তস্মৈ শ্রীগুরবে নমঃ ॥ ৬০ ॥
স্থাবরং জঙ্গমং ব্যাপ্তং যৎকিঞ্চিৎসচরাচরম্ ।
ৎবংপদং দর্শিতং যেন তস্মৈ শ্রীগুরবে নমঃ ॥ ৬১ ॥
চিন্ময়ং ব্যাপিতং সর্বং ত্রৈলোক্যং সচরাচরম্ ।
অসিৎবং দর্শিতং যেন তস্মৈ শ্রীগুরবে নমঃ ॥ ৬২ ॥
নিমিষন্নিমিষার্ধ্বাদ্বা যদ্বাক্যাদৈ বিমুচ্যতে ।
স্বাত্মানং শিবমালোক্য তস্মৈ শ্রীগুরবে নমঃ ॥ ৬৩ ॥
চৈতন্যং শাশ্বতং শাংতং ব্যোমাতীতং নিরঞ্জনম্ ।
নাদবিন্দুকলাতীতং তস্মৈ শ্রীগুরবে নমঃ ॥ ৬৪ ॥
নির্গুণং নির্মলং শান্তং জংগমং স্থিরমেব চ ।
ব্যাপ্তং যেন জগৎসর্বং তস্মৈ শ্রীগুরবে নমঃ ॥ ৬৫ ॥
স পিতা স চ মে মাতা স বন্ধুঃ স চ দেবতা ।
সংসারমোহনাশায় তস্মৈ শ্রীগুরবে নমঃ ॥ ৬৬ ॥
যৎসত্ত্বেন জগৎসত্যং যৎপ্রকাশেন ভাতি তৎ ।
যদানন্দেন নন্দন্তি তস্মৈ শ্রীগুরবে নমঃ ॥ ৬৭ ॥
যস্মিন্স্থিতমিদং সর্বং ভাতি যদ্ভানরূপতঃ ।
প্রিয়ং পুত্রাদি যৎপ্রীত্যা তস্মৈ শ্রীগুরবে নমঃ ॥ ৬৮ ॥
যেনেদং দর্শিতং তত্ত্বং চিত্তচৈত্যাদিকং তথা ।
জাগ্রৎস্বপ্নসুষুপ্ত্যাদি তস্মৈ শ্রীগুরবে নমঃ ॥ ৬৯ ॥
যস্য জ্ঞানমিদং বিশ্বং ন দৃশ্যং ভিন্নভেদতঃ ।
সদৈকরূপরূপায় তস্মৈ শ্রীগুরবে নমঃ ॥ ৭০ ॥
যস্য জ্ঞাতং মতং তস্য মতং যস্য ন বেদ সঃ ।
অনন্যভাবভাবায় তস্মৈ শ্রীগুরবে নমঃ ॥ ৭১ ॥
যস্মৈ কারণরূপায় কার্যরূপেণ ভাতি যৎ ।
কার্যকারণরূপায় তস্মৈ শ্রীগুরবে নমঃ ॥ ৭২ ॥
নানারূপমিদং বিশ্বং ন কেনাপ্যস্তি ভিন্নতা ।
কার্যকারণরূপায় তস্মৈ শ্রীগুরবে নমঃ ॥ ৭৩ ॥
জ্ঞানশক্তিসমারূঢতত্ত্বমালাবিভূষণে ।
ভুক্তিমুক্তিপ্রদাত্রে চ তস্মৈ শ্রীগুরবে নমঃ ॥ ৭৪ ॥
অনেকজন্মসম্প্রাপ্তকর্মবন্ধবিদাহিনে ।
জ্ঞানানিলপ্রভাবেন তস্মৈ শ্রীগুরবে নমঃ ॥ ৭৫ ॥
শোষণং ভবসিন্ধোশ্চ দীপনং ক্ষরসম্পদাম্ ।
গুরোঃ পাদোদকং যস্য তস্মৈ শ্রীগুরবে নমঃ ॥ ৭৬ ॥
ন গুরোরধিকং তত্ত্বং ন গুরোরধিকং তপঃ ।
ন গুরোরধিকং জ্ঞানং তস্মৈ শ্রীগুরবে নমঃ ॥ ৭৭ ॥
মন্নাথঃ শ্রীজগন্নাথো মদ্গুরুঃ শ্রীজগদ্গুরুঃ ।
মমাত্মা সর্বভূতাত্মা তস্মৈ শ্রীগুরবে নমঃ ॥ ৭৮ ॥
গুরুরাদিরনাদিশ্চ গুরুঃ পরমদৈবতম্ ।
গুরুমন্ত্রসমো নাস্তি তস্মৈ শ্রীগুরবে নমঃ ॥ ৭৯ ॥
এক এব পরো বন্ধুর্বিষমে সমুপস্থিতে ।
গুরুঃ সকলধর্মাত্মা তস্মৈ শ্রীগুরবে নমঃ ॥ ৮০ ॥
গুরুমধ্যে স্থিতং বিশ্বং বিশ্বমধ্যে স্থিতো গুরুঃ ।
গুরুর্বিশ্বং ন চান্যোঽস্তি তস্মৈ শ্রীগুরবে নমঃ ॥ ৮১ ॥
ভবারণ্যপ্রবিষ্টস্য দিঙ্মোহভ্রান্তচেতসঃ ।
যেন সন্দর্শিতঃ পন্থাঃ তস্মৈ শ্রীগুরবে নমঃ ॥ ৮২ ॥
তাপত্রয়াগ্নিতপ্তনামশান্তপ্রাণিনাং ভুবি ।
যস্য পাদোদকং গঙ্গা তস্মৈ শ্রীগুরবে নমঃ ॥ ৮৩ ॥
অজ্ঞানসর্পদষ্টানাং প্রাণিনাং কশ্চিকিৎসকঃ ।
সম্যগ্জ্ঞানমহামন্ত্রবেদিনং সদ্গুরু বিনা ॥ ৮৪ ॥
হেতবে জগতামেব সংসারার্ণবসেতবে ।
প্রভবে সর্ববিদ্যানাং শম্ভবে গুরবে নমঃ ॥ ৮৫ ॥
ধ্যানমূলং গুরোর্মূর্তিঃ পূজামূলং গুরোঃ পদম্ ।
মন্ত্রমূলং গুরোর্বাক্যং মুক্তিমূলং গুরোঃ কৃপা ॥ ৮৬ ॥
সপ্তসাগরপর্যন্তং তীর্থস্নানফলং তু যৎ ।
গুরুপাদপয়োবিন্দোঃ সহস্রাংশেন তৎফলম্ ॥ ৮৭ ॥
শিবে রুষ্টে গুরুস্ত্রাতা গুরৌ রুষ্টে ন কশ্চন ।
লব্ধ্বা কুলগুরু সম্যগ্গুরুমেব সমাশ্রয়েৎ ॥ ৮৮ ॥
মধুলুব্ধো যথা ভৃঙ্গঃ পুষ্পাৎপুষ্পান্তরং ব্রজেৎ ।
জ্ঞানলুব্ধস্তথা শিষ্যো গুরোর্গুর্বন্তরং ব্রজেৎ ॥ ৮৯ ॥
বন্দে গুরুপদদ্বন্দ্বং বাঙ্মনাতীতগোচরম্ ।
শ্বেতরক্তপ্রভাভিন্নং শিবশক্ত্যাত্মকং পরম্ ॥ ৯০ ॥
গুকারং চ গুণাতীতং রূকারং রূপবর্জিতম্ ।
গুণাতীতমরূপং চ যো দদ্যাৎ স গুরুঃ স্মৃতঃ ॥ ৯১ ॥
অত্রিনেত্রঃ শিবঃ সাক্ষাৎ দ্বিবাহুশ্চ হরিঃ স্মৃতঃ ।
যোঽচতুর্বদনো ব্রহ্মা শ্রীগুরুঃ কথিতঃ প্রিয়ে ॥ ৯২ ॥
অয়ং ময়াঞ্জলির্বদ্ধো দয়াসাগরসিদ্ধয়ে ।
যদনুগ্রহতো জন্তুশ্চিত্রসংসারমুক্তিভাক্ ॥ ৯৩ ॥
শ্রীগুরোঃ পরমং রূপং বিবেকচক্ষুরগ্রতঃ ।
মন্দভাগ্যা ন পশ্যন্তি অন্ধাঃ সূর্যোদয়ং যথা ॥ ৯৪ ॥
কুলানাং কুলকোটীনাং তারকস্তত্র তৎক্ষণাৎ ।
অতস্তং সদ্গুরু জ্ঞাৎবা ত্রিকালমভিবাদয়েৎ ॥ ৯৫ ॥
শ্রীনাথচরণদ্বন্দ্বং যস্যাং দিশি বিরাজতে ।
তস্যাং দিশি নমস্কুর্যাদ্ ভক্ত্যা প্রতিদিনং প্রিয়ে ॥ ৯৬ ॥
সাষ্টাঙ্গপ্রণিপাতেন স্তুবন্নিত্যং গুরুং ভজেৎ ।
ভজনাৎস্থৈর্যমাপ্নোতি স্বস্বরূপময়ো ভবেৎ ॥ ৯৭ ॥
দোর্ভ্যাং পদ্ভ্যাং চ জানুভ্যামুরসা শিরসা দৃশা ।
মনসা বচসা চেতি প্রণামোষ্টাঙ্গ উচ্যতে ॥ ৯৮ ॥
তস্যৈ দিশে সততমজ্জলিরেষ নিত্যম্
প্রক্ষিপ্যতাং মুখরিতৈর্মধুরৈঃ প্রসূনৈঃ ।
জাগর্তি যত্র ভগবান্ গুরুচক্রবর্তী
বিশ্বস্থিতিপ্রলয়নাটকনিত্যসাক্ষী ॥ ৯৯ ॥
অভৈস্তৈঃ কিমু দীর্ঘকালবিমলৈর্ব্যাদিপ্রদৈর্দুষ্করৈঃ
প্রাণায়ামশতৈরনেককরণৈর্দুঃখাত্মকৈর্দুর্জয়ৈঃ ।
যস্মিন্নভ্যুদিতে বিনশ্যতি বলী বায়ুঃ স্বয়ং তৎক্ষণাৎ
প্রাপ্তুং তৎসহজস্বভাবমনিশং সেবেত চৈকং গুরুম্ ॥ ১০০ ॥
জ্ঞানং বিনা মুক্তিপদং লভ্যতে গুরুভক্তিতঃ ।
গুরোঃ প্রসাদতো নান্যৎ সাধনং গুরুমার্গিণাম্ ॥ ১০১ ॥
যস্মাৎপরতরং নাস্তি নেতি নেতীতি বৈ শ্রুতিঃ ।
মনসা বচসা চৈব সত্যমারাধয়েদ্গুরুম্ ॥ ১০২ ॥
গুরোঃ কৃপাপ্রসাদেন ব্রহ্মবিষ্ণুশিবাদয়ঃ ।
সামর্থ্যমভজন্ সর্বে সৃষ্টিস্থিত্যন্তকর্মণি ॥ ১০৩ ॥
দেবকিন্নরগন্ধর্বাঃ পিতৃয়ক্ষাস্তু তুম্বুরুঃ ।
মুনয়োঽপি ন জানন্তি গুরুশুশ্রূষণে বিধিম্ ॥ ১০৪ ॥
তার্কিকাশ্ছান্দসাশ্চৈব দৈবজ্ঞাঃ কর্মঠাঃ প্রিয়ে ।
লৌকিকাস্তে ন জানন্তি গুরুতত্ত্বং নিরাকুলম্ ॥ ১০৫ ॥
মহাহঙ্কারগর্বেণ ততোবিদ্যাবলেন চ ।
ভ্রমন্ত্যেতস্মিন্ সংসারে ঘটীয়ন্ত্রং যথা পুনঃ ॥ ১০৬ ॥
যজ্ঞিনোঽপি ন মুক্তাঃ স্যুঃ ন মুক্তা যোগিনস্তথা ।
তাপসা অপি নো মুক্তা গুরুতত্ত্বাৎপরাঙ্মুখাঃ ॥ ১০৭ ॥
ন মুক্তাস্তু গন্ধর্বাঃ পিতৃয়ক্ষাস্তু চারণাঃ ।
ঋষয়ঃ সিদ্ধদেবাদ্যা গুরুসেবাপরাঙ্মুখাঃ ॥ ১০৮ ॥
॥ ইতি শ্রীস্কংদপুরাণে উত্তরখংডে উমামহেশ্বর সংবাদে
শ্রী গুরুগীতায়াং প্রথমোঽধ্যায়ঃ ॥
॥ দ্বিতীয়োঽধ্যায়ঃ ॥
ধ্যানং শ্রুণু মহাদেবি সর্বানন্দপ্রদায়কম্ ।
সর্বসৌখ্যকরং চৈব ভুক্তিমুক্তিপ্রদায়কম্ ॥ ১০৯ ॥
শ্রীমৎপরং ব্রহ্ম গুরুং স্মরামি
শ্রীমৎপরং ব্রহ্ম গুরুং ভজামি ।
শ্রীমৎপরং ব্রহ্ম গুরুং বদামি
শ্রীমৎপরং ব্রহ্ম গুরুং নমামি ॥ ১১০ ॥
ব্রহ্মানন্দং পরমসুখদং কেবলং জ্ঞানমূর্তিম্
দ্বন্দ্বাতীতং গগনসদৃশং তত্ত্বমস্যাদিলক্ষ্যম্ ।
একং নিত্যং বিমলমচলং সর্বধীসাক্ষিভূতম্
ভাবাতীতং ত্রিগুণরহিতং সদ্গুরুং তং নমামি ॥ ১১১ ॥
হৃদম্বুজে কর্ণিকমধ্যসংস্থে
সিংহাসনে সংস্থিতদিব্যমূর্তিম্ ।
ধ্যায়েদ্গুরুং চন্দ্রকলাপ্রকাশম্
সচ্চিৎসুখাভীষ্টবরং দধানম্ ॥ ১১২ ॥
শ্বেতাম্বরং শ্বেতবিলেপপুষ্পম্
মুক্তাবিভূষং মুদিতং দ্বিনেত্রম্ ।
বামাঙ্কপীঠস্থিতদিব্যশক্তিম্
মন্দস্মিতং পূর্ণকৃপানিধানম্ ॥ ১১৩ ॥
জ্ঞানস্বরূপং নিজভাবয়ুক্তম্ আনন্দমানন্দকরং প্রসন্নম্ ।
যোগীন্দ্রমীড্যং ভবরোগবৈদ্যম্ শ্রীমদ্গুরুং নিত্যমহং নমামি ॥ ১১৪ ॥
বন্দে গুরূণাং চরণারবিন্দম্ সন্দর্শিতস্বাত্মসুখাম্বুধীনাম্ ।
জনস্য যেষাং গুলিকায়মানং সংসারহালাহলমোহশান্ত্যৈ ॥ ১১৫ ॥
যস্মিন্ সৃষ্টিস্থিস্তিধ্বংসনিগ্রহানুগ্রহাত্মকম্ ।
কৃত্যং পঞ্চবিধং শশ্বৎ ভাসতে তং গুরুং ভজেৎ ॥ ১১৬ ॥
পাদাব্জে সর্বসংসারদাবকালানলং স্বকে ।
ব্রহ্মরন্ধ্রে স্থিতাম্ভোজমধ্যস্থং চন্দ্রমণ্ডলম্ ॥ ১১৭ ॥
অকথাদিত্রিরেখাব্জে সহস্রদলমণ্ডলে ।
হংসপার্শ্বত্রিকোণে চ স্মরেত্তন্মধ্যগং গুরুম্ ॥ ১১৮ ॥
নিত্যং শুদ্ধং নিরাভাসং নিরাকারং নিরঞ্জনম্ ।
নিত্যবোধং চিদানন্দং গুরুং ব্রহ্ম নমাম্যহম্ ॥ ১১৯ ॥
সকলভুবনসৃষ্টিঃ কল্পিতাশেষসৃষ্টিঃ
নিখিলনিগমদৃষ্টিঃ সৎপদার্থৈকসৃষ্টিঃ ।
অতদ্গণপরমেষ্টিঃ সৎপদার্থৈকদৃষ্টিঃ
ভবগুণপরমেষ্টির্মোক্ষমার্গৈকদৃষ্টিঃ ॥ ১২০ ॥
সকলভুবনরঙ্গস্থাপনাস্তম্ভয়ষ্টিঃ
সকরুণরসবৃষ্টিস্তত্ত্বমালাসমষ্টিঃ ।
সকলসময়সৃষ্টিস্সচ্চিদানন্দদৃষ্টিঃ
নিবসতু ময়ি নিত্যং শ্রীগুরোর্দিব্যদৃষ্টিঃ ॥ ১২১ ॥
ন গুরোরধিকং ন গুরোরধিকং
ন গুরোরধিকং ন গুরোরধিকম্ ।
শিবশাসনতঃ শিবশাসনতঃ
শিবশাসনতঃ শিবশাসনতঃ ॥ ১২২ ॥
ইদমেব শিবমিদমেব শিবম্ ইদমেব শিবমিদমেব শিবম্ ।
হরিশাসনতো হরিশাসনতো হরিশাসনতো হরিশাসনতঃ ॥ ১২৩ ॥
বিদিতং বিদিতং বিদিতং বিদিতং
বিজনং বিজনং বিজনং বিজনম্ ।
বিধিশাসনতো বিধিশাসনতো
বিধিশাসনতো বিধিশাসনতঃ ॥ ১২৪ ॥
এবংবিধং গুরুং ধ্যাৎবা জ্ঞানমুৎপদ্যতে স্বয়ম্ ।
তদা গুরূপদেশেন মুক্তোঽহমিতি ভাবয়েৎ ॥ ১২৫ ॥
গুরূপদিষ্টমার্গেণ মনঃশুদ্ধিং তু কারয়েৎ ।
অনিত্যং খণ্ডয়েৎসর্বং যৎকিঞ্চিদাত্মগোচরম্ ॥ ১২৬ ॥
জ্ঞেয়ং সর্বং প্রতীতং চ জ্ঞানং চ মন উচ্যতে ।
জ্ঞানং জ্ঞেয়ং সমং কুর্যান্নান্যঃ পন্থা দ্বিতীয়কঃ ॥ ১২৭ ॥
কিমত্র বহুনোক্তেন শাস্ত্রকোটিশতৈরপি ।
দুর্লভা চিত্তবিশ্রান্তিঃ বিনা গুরুকৃপাং পরাম্ ॥ ১২৮ ॥
করুণাখড্গপাতেন ছিৎবা পাশাষ্টকং শিশোঃ ।
সম্যগানন্দজনকঃ সদ্গুরুঃ সোঽভিধীয়তে ॥১২৯ ॥
এবং শ্রুৎবা মহাদেবি গুরুনিন্দাং করোতি যঃ ।
স যাতি নরকান্ ঘোরান্ যাবচ্চন্দ্রদিবাকরৌ ॥ ১৩০ ॥
যাবৎকল্পান্তকো দেহস্তাবদ্দেবি গুরুং স্মরেৎ ।
গুরুলোপা ন কর্তব্যঃ স্বচ্ছন্দো যদি বা ভবেৎ ॥ ১৩১ ॥
হুঙ্কারেণ ন বক্তব্যং প্রাজ্ঞশিষ্যৈঃ কদাচন ।
গুরোরগ্র ন বক্তব্যমসত্যং তু কদাচন ॥ ১৩২ ॥
গুরুং ৎবংকৃত্য হুংকৃত্য গুরুসান্নিধ্যভাষণঃ ।
অরণ্যে নির্জলে দেশে সম্ভবেদ্ ব্রহ্মরাক্ষসঃ ॥ ১৩৩ ॥
অদ্বৈতং ভাবয়েন্নিত্যং সর্বাবস্থাসু সর্বদা ।
কদাচিদপি নো কুর্যাদ্দ্বৈতং গুরুসন্নিধৌ ॥ ১৩৪ ॥
দৃশ্যবিস্মৃতিপর্যন্তং কুর্যাদ্ গুরুপদার্চনম্ ।
তাদৃশস্যৈব কৈবল্যং ন চ তদ্ব্যতিরেকিণঃ ॥ ১৩৫ ॥
অপি সম্পূর্ণতত্ত্বজ্ঞো গুরুত্যাগি ভবেদ্যদা ।
ভবত্যেব হি তস্যান্তকালে বিক্ষেপমুৎকটম্ ॥ ১৩৬ ॥
গুরুকার্যং ন লঙ্ঘেত নাপৃষ্ট্বা কার্যমাচরেৎ ।
ন হ্যুত্তিষ্ঠেদ্দিশেঽনৎবা গুরুসদ্ভ্বশোভিতঃ ॥ ১৩৭ ॥
গুরৌ সতি স্বয়ং দেবি পরেষাং তু কদাচন ।
উপদেশং ন বৈ কুর্যাৎ তথা চেদ্রাক্ষসো ভবেৎ ॥ ১৩৮ ॥
ন গুরোরাশ্রমে কুর্যাৎ দুষ্পানং পরিসর্পণম্ ।
দীক্ষা ব্যাখ্যা প্রভুৎবাদি গুরোরাজ্ঞাং ন কারয়েৎ ॥ ১৩৯ ॥
নোপাশ্রমং চ পর্যকং ন চ পাদপ্রসারণম্ ।
নাঙ্গভোগাদিকং কুর্যান্ন লীলামপরামপি ॥ ১৪০ ॥
গুরূণাং সদসদ্বাপি যদুক্তং তন্ন লংঘয়েৎ ।
কুর্বন্নাজ্ঞাং দিবা রাত্রৌ দাসবন্নিবসেদ্গুরো ॥ ১৪১ ॥
অদত্তং ন গুরোর্দ্রব্যমুপভুঞ্জীত কর্হিচিৎ ।
দত্তে চ রংকবদ্গ্রাহ্যং প্রাণোঽপ্যেতেন লভ্যতে ॥ ১৪২ ॥
পাদুকাসনশয়্যাদি গুরুণা যদভীষ্টিতম্ ।
নমস্কুর্বীত তৎসর্বং পাদাভ্যাং ন স্পৃশেৎ ক্বচিৎ ॥ ১৪৩ ॥
গচ্ছতঃ পৃষ্ঠতো গচ্ছেৎ গুরুচ্ছায়াং ন লংঘয়েৎ ।
নোল্বণং ধারয়েদ্বেষং নালংকারাংস্ততোল্বণান্ ॥ ১৪৪ ॥
গুরুনিন্দাকরং দৃষ্ট্বা ধাবয়েদথ বাসয়েৎ ।
স্থানং বা তৎপরিত্যাজ্যং জিহ্বাছেদাক্ষমো যদি ॥ ১৪৫ ॥
নোচ্ছিষ্টং কস্যচিদ্দেয়ং গুরোরাজ্ঞাং ন চ ত্যজেৎ ।
কৃৎস্নমুচ্ছিষ্টমাদায় হবির্বদ্ভক্ষয়েৎস্বয়ম্ ॥ ১৪৬ ॥
নানৃতং নাপ্রিয়ং চৈব ন গর্ব নাপি বা বহু ।
ন নিয়োগধরং ব্রূয়াৎ গুরোরাজ্ঞাং বিভাবয়েৎ ॥ ১৪৭ ॥
প্রভো দেবকুলেশানাং স্বামিন্ রাজন্ কুলেশ্বর ।
ইতি সম্বোধনৈর্ভীতো সচ্চরেদ্গুরুসন্নিধৌ ॥ ১৪৮ ॥
মুনিভিঃ পন্নগৈর্বাপি সুরৈর্বা শাপিতো যদি ।
কালমৃত্যুভয়াদ্বাপি গুরুঃ সংত্রাতি পার্বতি ॥ ১৪৯ ॥
অশক্তা হি সুরাদ্যাশ্চ হ্যশক্তাঃ মুনয়স্তথা ।
গুরুশাপোপপন্নস্য রক্ষণায় চ কুত্রচিৎ ॥ ১৫০ ॥
মন্ত্ররাজমিদং দেবি গুরুরিত্যক্ষরদ্বয়ম্ ।
স্মৃতিবেদপুরাণানাং সারমেব ন সংশয়ঃ ॥ ১৫১ ॥
সৎকারমানপূজার্থং দণ্ডকাষয়ধারণঃ ।
স সংন্যাসী ন বক্তব্যঃ সংন্যাসী জ্ঞানতৎপরঃ ॥ ১৫২ ॥
বিজানন্তি মহাবাক্যং গুরোশ্চরণ সেবয়া ।
তে বৈ সংন্যাসিনঃ প্রোক্তা ইতরে বেষধারিণাঃ ॥ ১৫৩ ॥
নিত্যং ব্রহ্ম নিরাকারং নির্গুণং সত্যচিদ্ধনম্ ।
যঃ সাক্ষাৎকুরুতে লোকে গুরুৎবং তস্য শোভতে ॥ ১৫৪ ॥
গুরুপ্রসাদতঃ স্বাত্মন্যাত্মারামনিরীক্ষণাৎ ।
সমতা মুক্তিমার্গেণ স্বাত্মজ্ঞানং প্রবর্ততে ॥ ১৫৫ ॥
আব্রহ্মস্তম্ভপর্যন্তং পরমাত্মস্বরূপকম্ ।
স্থাবরং জংগমং চৈব প্রণমামি জগন্ময়ম্ ॥ ১৫৬ ॥
বন্দেহং সচ্চিদানন্দং ভাবাতীতং জগদ্গুরুম্ ।
নিত্যং পূর্ণং নিরাকারং নির্গুণং স্বাত্মসংস্থিতম্ ॥ ১৫৭ ॥
পরাৎপরতরং ধ্যায়েন্নিত্যমানন্দকারকম্ ।
হৃদয়াকাশমধ্যস্থং শুদ্ধস্ফটিকসন্নিভম্ ॥ ১৫৮ ॥
স্ফাটিকে স্ফাটিকং রূপং দর্পণে দর্পণো যথা ।
তথাত্মনি চিদাকারমানন্দং সোঽহমিত্যুত ॥ ১৫৯ ॥
অংগুষ্ঠমাত্রং পুরুষং ধ্যায়েচ্চ চিন্ময়ং হৃদি ।
তত্র স্ফুরতি যো ভাবঃ শ্রুণু তৎকথয়ামি তে ॥ ১৬০ ॥
অজোঽহমমরোঽহং চ হ্যনাদিনিধনো হ্যহম্ ।
অবিকারশ্চিদানন্দো হ্যণীয়ান্মহতো মহান্ ॥ ১৬১ ॥
অপূর্বমপরং নিত্যং স্বয়ংজ্যোতির্নিরাময়ম্ ।
বিরজং পরমাকাশং ধ্রুবমানন্দমব্যযম্ ॥ ১৬২ ॥
অগোচরং তথাঽগম্যং নামরূপবিবর্জিতম্ ।
নিঃশব্দং তু বিজানীয়াৎস্বভাবাদ্ব্রহ্ম পার্বতি ॥ ১৬৩ ॥
যথা গন্ধস্বভাবাবৎবং কর্পূরকুসুমাদিষু ।
শীতোষ্ণৎবস্বভাবৎবং তথা ব্রহ্মণি শাশ্বতম্ ॥ ১৬৪ ॥
যথা নিজস্বভাবেন কুণ্ডলকটকাদয়ঃ ।
সুবর্ণৎবেন তিষ্ঠন্তি তথাঽহং ব্রহ্ম শাশ্বতম্ ॥ ১৬৫ ॥
স্বয়ং তথাবিধো ভূৎবা স্থাতব্যং যত্রকুত্রচিৎ ।
কীটো ভৃঙ্গ ইব ধ্যানাদ্যথা ভবতি তাদৃশঃ ॥ ১৬৬ ॥
গুরুধ্যানং তথা কৃৎবা স্বয়ং ব্রহ্মময়ো ভবেৎ ।
পিণ্ডে পদে তথা রূপে মুক্তাস্তে নাত্র সংশয়ঃ ॥ ১৬৭ ॥
শ্রীপার্বতী উবাচ ।
পিণ্ডং কিং তু মহাদেব পদং কিং সমুদাহৃতম্ ।
রূপাতীতং চ রূপং কিং এতদাখ্যাহি শংকর ॥ ১৬৮ ॥
শ্রীমহাদেব উবাচ ।
পিণ্ডং কুণ্ডলিনী শক্তিঃ পদং হংসমুদাহৃতম্ ।
রূপং বিন্দুরিতি জ্ঞেয়ং রূপাতীতং নিরঞ্জনম্ ॥ ১৬৯ ॥
পিণ্ডে মুক্তাঃ পদে মুক্তা রূপে মুক্তা বরাননে ।
রূপাতীতে তু যে মুক্তাস্তে মুক্তা নাত্র সংশয়ঃ ॥ ১৭০ ॥
গুরুর্ধ্যানেনৈব নিত্যং দেহী ব্রহ্মময়ো ভবেৎ ।
স্থিতশ্চ যত্র কুত্রাপি মুক্তোঽসৌ নাত্র সংশয়ঃ ॥ ১৭১ ॥
জ্ঞানং স্বানুভবঃ শান্তির্বৈরাগ্যং বক্তৃতা ধৃতিঃ ।
ষড্গুণৈশ্বর্যযুক্তো হি ভগবান্ শ্রীগুরুঃ প্রিয়ে ॥ ১৭২ ॥
গুরুঃ শিবো গুরুর্দেবো গুরুর্বন্ধুঃ শরীরিণাম্ ।
গুরুরাত্মা গুরুর্জীবো গুরোরন্যন্ন বিদ্যতে ॥ ১৭৩ ॥
একাকী নিস্পৃহঃ শান্তশ্চিন্তাসূয়াদিবর্জিতঃ ।
বাল্যভাবেন যো ভাতি ব্রহ্মজ্ঞানী স উচ্যতে ॥ ১৭৪ ॥
ন সুখং বেদশাস্ত্রেষু ন সুখং মন্ত্রয়ন্ত্রকে ।
গুরোঃ প্রসাদাদন্যত্র সুখং নাস্তি মহীতলে ॥ ১৭৫ ॥
চার্বাকবৈষ্ণবমতে সুখং প্রাভাকরে ন হি ।
গুরোঃ পাদান্তিকে যদ্বৎসুখং বেদান্তসম্মতম্ ॥ ১৭৬ ॥
ন তৎসুখং সুরেন্দ্রস্য ন সুখং চক্রবর্তিনাম্ ।
যৎসুখং বীতরাগস্য মুনেরেকান্তবাসিনঃ ॥ ১৭৭ ॥
নিত্যং ব্রহ্মরসং পীৎবা তৃপ্তো যঃ পরমাত্মনি ।
ইন্দ্রং চ মন্যতে তুচ্ছং নৃপাণাং তত্র কা কথা ॥ ১৭৮ ॥
যতঃ পরমকৈবল্যং গুরুমার্গেণ বৈ ভবেৎ ।
গুরুভক্তিরতঃ কার্যা সর্বদা মোক্ষকাংক্ষিভিঃ ॥ ১৭৯ ॥
এক এবাদ্বিতীয়োঽহং গুরুবাক্যেন নিশ্চিতঃ ।
এবমভ্যস্যতা নিত্যং ন সেব্যং বৈ বনান্তরম্ ॥ ১৮০ ॥
অভ্যাসান্নিমিষেণৈবং সমাধিমধিগচ্ছতি ।
আজন্মজনিতং পাপং তৎক্ষণাদেব নশ্যতি ॥ ১৮১ ॥
কিমাবাহনমব্যক্তৈ ব্যাপকং কিং বিসর্জনম্ ।
অমূর্তো চ কথং পূজা কথং ধ্যানং নিরাময়ে ॥ ১৮২ ॥
গুরুর্বিষ্ণুঃ সত্ত্বময়ো রাজসশ্চতুরাননঃ ।
তামসো রুদ্ররূপেণ সৃজত্যবতি হন্তি চ ॥ ১৮৩ ॥
স্বয়ং ব্রহ্মময়ো ভূৎবা তৎপরং নাবলোকয়েৎ ।
পরাৎপরতরং নান্যৎ সর্বগং চ নিরাময়ম্ ॥ ১৮৪ ॥
তস্যাবলোকনং প্রাপ্য সর্বসংগবিবর্জিতঃ ।
একাকী নিস্পৃহঃ শান্তঃ স্থাতব্যং তৎপ্রসাদতঃ ॥ ১৮৫ ॥
লব্ধং বাঽথ ন লব্ধং বা স্বল্পং বা বহুলং তথা ।
নিষ্কামেনৈব ভোক্তব্যং সদা সংতুষ্টমানসঃ ॥ ১৮৬ ॥
সর্বজ্ঞপদমিত্যাহুর্দেহী সর্বময়ো ভুবি ।
সদাঽনন্দঃ সদা শান্তো রমতে যত্রকুত্রচিৎ ॥ ১৮৭ ॥
যত্রৈব তিষ্ঠতে সোঽপি স দেশঃ পুণ্যভাজনঃ ।
মুক্তস্য লক্ষণং দেবি তবাগ্রে কথিতং ময়া ॥ ১৮৮ ॥
উপদেশস্ত্বয়ং দেবি গুরুমার্গেণ মুক্তিদঃ ।
গুরুভক্তিস্তথাত্যান্তা কর্তব্যা বৈ মনীষিভিঃ ॥ ১৮৯ ॥
নিত্যযুক্তাশ্রয়ঃ সর্বো বেদকৃৎসর্ববেদকৃৎ ।
স্বপরজ্ঞানদাতা চ তং বন্দে গুরুমীশ্বরম্ ॥ ১৯০ ॥
যদ্যপ্যধীতা নিগমাঃ ষডংগা আগমাঃ প্রিয়ে ।
অধ্যাত্মাদীনি শাস্ত্রাণি জ্ঞানং নাস্তি গুরুং বিনা ॥ ১৯১ ॥
শিবপূজারতো বাপি বিষ্ণুপূজারতোঽথবা ।
গুরুতত্ত্ববিহীনশ্চেত্তৎসর্বং ব্যর্থমেব হি ॥ ১৯২ ॥
শিবস্বরূপমজ্ঞাৎবা শিবপূজা কৃতা যদি ।
সা পূজা নামমাত্রং স্যাচ্চিত্রদীপ ইব প্রিয়ে ॥ ১৯৩ ॥
সর্বং স্যাৎসফলং কর্ম গুরুদীক্ষাপ্রভাবতঃ ।
গুরুলাভাৎসর্বলাভো গুরুহীনস্তু বালিশঃ ॥ ১৯৪ ॥
গুরুহীনঃ পশুঃ কীটঃ পতংগো বক্তুমর্হতি ।
শিবরূপং স্বরূপং চ ন জানাতি যতস্স্বয়ম্ ॥ ১৯৫ ॥
তস্মাৎসর্বপ্রয়ত্নেন সর্বসংগবিবর্জিতঃ ।
বিহায় শাস্ত্রজালানি গুরুমেব সমাশ্রয়েৎ ॥ ১৯৬ ॥
নিরস্তসর্বসন্দেহো একীকৃত্য সুদর্শনম্ ।
রহস্যং যো দর্শয়তি ভজামি গুরুমীশ্বরম্ ॥ ১৯৭ ॥
জ্ঞানহীনো গুরুস্ত্যাজ্যো মিথ্যাবাদি বিডম্বকঃ ।
স্ববিশ্রান্তিং ন জানাতি পরশান্তিং করোতি কিম্ ॥ ১৯৮ ॥
শিলায়াঃ কিং পরং জ্ঞানং শিলাসংঘপ্রতারণে ।
স্বয়ং তর্তুং ন জানাতি পরং নিস্তারয়েৎ কথম্ ॥ ১৯৯ ॥
ন বন্দনীয়াস্তে কষ্টং দর্শনাদ্ভ্রান্তিকারকাঃ ।
বর্জয়েতান্ গুরুন্ দূরে ধীরানেব সমাশ্রয়েৎ ॥ ২০০ ॥
পাষণ্ডিনঃ পাপরতাঃ নাস্তিকা ভেদবুদ্ধয়ঃ ।
স্ত্রীলম্পটা দুরাচারাঃ কৃতঘ্না বকবৃত্তয়ঃ ॥ ২০১ ॥
কর্মভ্রষ্টাঃ ক্ষমানষ্টা নিন্দ্যতর্কেশ্চ বাদিনঃ ।
কামিনঃ ক্রোধিনশ্চৈব হিংস্রাশ্চণ্ডাঃ শঠাস্তথা ॥ ২০২ ॥
জ্ঞানলুপ্তা ন কর্তব্যা মহাপাপাস্তথা প্রিয়ে ।
এভ্যো ভিন্নো গুরুঃ সেব্যঃ একভক্ত্যা বিচার্য চ ॥ ২০৩ ॥
শিষ্যাদন্যত্র দেবেশি ন বদেদ্যস্য কস্যচিৎ ।
নরাণাং চ ফলপ্রাপ্তৌ ভক্তিরেব হি কারণম্ ॥ ২০৪ ॥
গূঢো দৃঢশ্চ প্রীতশ্চ মৌনেন সুসমাহিতঃ ।
সকৃৎকামগতৌ বাপি পঞ্চধা গুরুরীরিতঃ ॥ ২০৫ ॥
সর্বং গুরুমুখাল্লব্ধং সফলং পাপনাশনম্ ।
যদ্যদাত্মহিতং বস্তু তত্তদ্দ্রব্যং ন বঞ্চয়েৎ ॥ ২০৬ ॥
গুরুদেবার্পণং বস্তু তেন তুষ্টোঽস্মি সুব্রতে ।
শ্রীগুরোঃ পাদুকাং মুদ্রাং মূলমন্ত্রং চ গোপয়েৎ ॥ ২০৭ ॥
নতাস্মি তে নাথ পদারবিন্দং
বুদ্ধীন্দ্রিয়াপ্রাণমনোবচোভিঃ ।
যচ্চিন্ত্যতে ভাবিত আত্ময়ুক্তৌ
মুমুক্ষিভিঃ কর্মময়োপশান্তয়ে ॥ ২০৮ ॥
অনেন যদ্ভবেৎকার্যং তদ্বদামি তব প্রিয়ে ।
লোকোপকারকং দেবি লৌকিকং তু বিবর্জয়েৎ ॥ ২০৯ ॥
লৌকিকাদ্ধর্মতো যাতি জ্ঞানহীনো ভবার্ণবে ।
জ্ঞানভাবে চ যৎসর্বং কর্ম নিষ্কর্ম শাম্যতি ॥ ২১০ ॥
ইমাং তু ভক্তিভাবেন পঠেদ্বৈ শ্রুণুয়াদপি ।
লিখিৎবা যৎপ্রদানেন তৎসর্বং ফলমশ্নুতে ॥ ২১১ ॥
গুরুগীতামিমাং দেবি হৃদি নিত্যং বিভাবয় ।
মহাব্যাধিগতৈর্দুঃখৈঃ সর্বদা প্রজপেন্মুদা ॥ ২১২ ॥
গুরুগীতাক্ষরৈকৈকং মন্ত্ররাজমিদং প্রিয়ে ।
অন্যে চ বিবিধা মন্ত্রাঃ কলাং নার্হন্তি ষোডশীম্ ॥ ২১৩ ॥
অনন্ত ফলমাপ্নোতি গুরুগীতা জপেন তু ।
সর্বপাপহরা দেবি সর্বদারিদ্র্যনাশিনী ॥ ২১৪ ॥
অকালমৃত্যুহর্ত্রী চ সর্বসংকটনাশিনী ।
যক্ষরাক্ষসভূতাদিচোরব্যাঘ্রবিঘাতিনী ॥ ২১৫ ॥
সর্বোপদ্রবকুষ্ঠাদিদুষ্টদোষনিবারিণী ।
যৎফলং গুরুসান্নিধ্যাত্তৎফলং পঠনাদ্ভবেৎ ॥ ২১৬ ॥
মহাব্যাধিহরা সর্ববিভূতেঃ সিদ্ধিদা ভবেৎ ।
অথবা মোহনে বশ্যে স্বয়মেব জপেৎসদা ॥ ২১৭ ॥
কুশদূর্বাসনে দেবি হ্যাসনে শুভ্রকম্বলে ।
উপবিশ্য ততো দেবি জপেদেকাগ্রমানসঃ ॥ ২১৮ ॥
শুক্লং সর্বত্র বৈ প্রোক্তং বশ্যে রক্তাসনং প্রিয়ে ।
পদ্মাসনে জপেন্নিত্যং শান্তিবশ্যকরং পরম্ ॥ ২১৯ ॥
বস্ত্রাসনে চ দারিদ্র্যং পাষাণে রোগসম্ভবঃ ।
মেদিন্যাং দুঃখমাপ্নোতি কাষ্ঠে ভবতি নিষ্ফলম্ ॥ ২২০ ॥
কৃষ্ণাজিনে জ্ঞানসিদ্ধির্মোক্ষশ্রীর্ব্যাঘ্রচর্মণি ।
কুশাসনে জ্ঞানসিদ্ধিঃ সর্বসিদ্ধিস্তু কম্বলে ॥ ২২১ ॥
আগ্নেয়্যাং কর্ষণং চৈব বায়ব্যাং শত্রুনাশনম্ ।
নৈরৃত্যাং দর্শনং চৈব ঈশান্যাং জ্ঞানমেব চ ॥ ২২২ ॥
উদঙ্মুখঃ শান্তিজপ্যে বশ্যে পূর্বমুখস্তথা ।
যাম্যে তু মারণং প্রোক্তং পশ্চিমে চ ধনাগমঃ ॥ ২২৩ ॥
মোহনং সর্বভূতানাং বন্ধমোক্ষকরং পরম্ ।
দেবরাজ্ঞাং প্রিয়করং রাজানং বশমানয়েৎ ॥ ২২৪ ॥
মুখস্তম্ভকরং চৈব গুণানাং চ বিবর্ধনম্ ।
দুষ্কর্মনাশনং চৈব তথা সৎকর্মসিদ্ধিদম্ ॥ ২২৫ ॥
প্রসিদ্ধং সাধয়েৎকার্যং নবগ্রহভয়াপহম্ ।
দুঃস্বপ্ননাশনং চৈব সুস্বপ্নফলদায়কম্ ॥ ২২৬ ॥
মোহশান্তিকরং চৈব বন্ধমোক্ষকরং পরম্ ।
স্বরূপজ্ঞাননিলয়ং গীতাশাস্ত্রমিদং শিবে ॥ ২২৭ ॥
যং যং চিন্তয়তে কামং তং তং প্রাপ্নোতি নিশ্চয়ম্ ।
নিত্যং সৌভাগ্যদং পুণ্যং তাপত্রয়কুলাপহম্ ॥ ২২৮ ॥
সর্বশান্তিকরং নিত্যং তথা বন্ধ্যা সুপুত্রদম্ ।
অবৈধব্যকরং স্ত্রীণাং সৌভাগ্যস্য বিবর্ধনম্ ॥ ২২৯ ॥
আয়ুরারোগ্যমৈশ্বর্যং পুত্রপৌত্রপ্রবর্ধনম্ ।
নিষ্কামজাপী বিধবা পঠেন্মোক্ষমবাপ্নুয়াৎ ॥ ২৩০ ॥
অবৈধব্যং সকামা তু লভতে চান্যজন্মনি ।
সর্বদুঃখময়ং বিঘ্নং নাশয়েত্তাপহারকম্ ॥ ২৩১ ॥
সর্বপাপপ্রশমনং ধর্মকামার্থমোক্ষদম্ ।
যং যং চিন্তয়তে কামং তং তং প্রাপ্নোতি নিশ্চিতম্ ॥ ২৩২ ॥
কাম্যানাং কামধেনুর্বৈ কল্পিতে কল্পপাদপঃ ।
চিন্তামণিশ্চিন্তিতস্য সর্বমংগলকারকম্ ॥ ২৩৩ ॥
লিখিৎবা পূজয়েদ্যস্তু মোক্ষশ্রিয়মবাপ্নুয়াৎ ।
গুরূভক্তির্বিশেষেণ জায়তে হৃদি সর্বদা ॥ ২৩৪ ॥
জপন্তি শাক্তাঃ সৌরাশ্চ গাণপত্যাশ্চ বৈষ্ণবাঃ ।
শৈবাঃ পাশুপতাঃ সর্বে সত্যং সত্যং ন সংশয়ঃ ॥ ২৩৫ ॥
॥ ইতি শ্রীস্কংদপুরাণে উত্তরখংডে উমামহেশ্বর সংবাদে
শ্রী গুরুগীতায়াং দ্বিতীয়োঽধ্যায়ঃ ॥
॥ তৃতীয়ঃ অধ্যায়ঃ ॥
অথ কাম্যজপস্থানং কথয়ামি বরাননে ।
সাগরান্তে সরিতীরে তীর্থে হরিহরালয়ে ॥ ২৩৬ ॥
শক্তিদেবালয়ে গোষ্ঠে সর্বদেবালয়ে শুভে ।
বটস্য ধাত্র্যা মূলে বা মঠে বৃন্দাবনে তথা ॥ ২৩৭ ॥
পবিত্রে নির্মলে দেশে নিত্যানুষ্ঠানতোঽপি বা ।
নির্বেদনেন মৌনেন জপমেতৎ সমারভেৎ ॥ ২৩৮ ॥
জাপ্যেন জয়মাপ্নোতি জপসিদ্ধিং ফলং তথা ।
হীনং কর্ম ত্যজেৎসর্বং গর্হিতস্থানমেব চ ॥ ২৩৯ ॥
শ্মশানে বিল্বমূলে বা বটমূলান্তিকে তথা ।
সিদ্ধ্যন্তি কানকে মূলে চূতবৃক্ষস্য সন্নিধৌ ॥ ২৪০ ॥
পীতাসনং মোহনে তু হ্যসিতং চাভিচারিকে ।
জ্ঞেয়ং শুক্লং চ শান্ত্যর্থং বশ্যে রক্তং প্রকীর্তিতম্ ॥ ২৪১ ॥
জপং হীনাসনং কুর্বৎ হীনকর্মফলপ্রদম্ ।
গুরুগীতাং প্রয়াণে বা সংগ্রামে রিপুসংকটে ॥ ২৪২ ॥
জপন্ জয়মবাপ্নোতি মরণে মুক্তিদায়িকা ।
সর্বকর্মাণি সিদ্ধ্যন্তি গুরুপুত্রে ন সংশয়ঃ ॥ ২৪৩ ॥
গুরুমন্ত্রো মুখে যস্য তস্য সিদ্ধ্যন্তি নান্যথা ।
দীক্ষয়া সর্বকর্মাণি সিদ্ধ্যন্তি গুরুপুত্রকে ॥ ২৪৪ ॥
ভবমূলবিনাশায় চাষ্টপাশনিবৃত্তয়ে ।
গুরুগীতাম্ভসি স্নানং তত্ত্বজ্ঞঃ কুরুতে সদা ॥ ২৪৫ ॥
স এবং সদ্গুরুঃ সাক্ষাৎ সদসদ্ব্রহ্মবিত্তমঃ ।
তস্য স্থানানি সর্বাণি পবিত্রাণি ন সংশয়ঃ ॥ ২৪৬ ॥
সর্বশুদ্ধঃ পবিত্রোঽসৌ স্বভাবাদ্যত্র তিষ্ঠতি ।
তত্র দেবগণাঃ সর্বে ক্ষেত্রপীঠে চরন্তি চ ॥ ২৪৭ ॥
আসনস্থাঃ শয়ানা বা গচ্ছন্তস্তিষ্ঠন্তোঽপি বা ।
অশ্বারূঢা গজারূঢাঃ সুষুপ্তা জাগ্রতোঽপি বা ॥ ২৪৮ ॥
শুচিভূতা জ্ঞানবন্তো গুরুগীতা জপন্তি যে ।
তেষাং দর্শনসংস্পর্ষাৎ দিব্যজ্ঞানং প্রজায়তে ॥ ২৪৯ ॥
সমুদ্রে বৈ যথা তোয়ং ক্ষীরে ক্ষীরং জলে জলম্ ।
ভিন্নে কুম্ভে যথাকাশং তথাঽঽত্মা পরমাত্মনি ॥ ২৫০ ॥
তথৈব জ্ঞানবান্ জীবঃ পরমাত্মনি সর্বদা ।
ঐক্যেন রমতে জ্ঞানী যত্র কুত্র দিবানিশম্ ॥ ২৫১ ॥
এবংবিধো মহায়ুক্তঃ সর্বত্র বর্ততে সদা ।
তস্মাৎসর্বপ্রকারেণ গুরুভক্তিং সমাচরেৎ ॥ ২৫২ ॥
গুরুসন্তোষণাদেব মুক্তো ভবতি পার্বতি ।
অণিমাদিষু ভোক্তৃৎবং কৃপয়া দেবি জায়তে ॥ ২৫৩ ॥
সাম্যেন রমতে জ্ঞানী দিবা বা যদি বা নিশি ।
এবংবিধো মহামৌনী ত্রৈলোক্যসমতাং ব্রজেৎ ॥ ২৫৪ ॥
অথ সংসারিণঃ সর্বে গুরুগীতাজপেন তু ।
সর্বান্ কামাংস্তু ভুঞ্জন্তি ত্রিসত্যং মম ভাষিতম্ ॥ ২৫৫ ॥
সত্যং সত্যং পুনঃ সত্যং ধর্মসারং ময়োদিতম্ ।
গুরুগীতাসমং স্তোত্রং নাস্তি তত্ত্বং গুরোঃ পরম্ ॥ ২৫৬ ॥
গুরুর্দেবো গুরুর্ধর্মো গুরৌ নিষ্ঠা পরং তপঃ ।
গুরোঃ পরতরং নাস্তি ত্রিবারং কথয়ামি তে ॥ ২৫৭ ॥
ধন্যা মাতা পিতা ধন্যো গোত্রং ধন্যং কুলোদ্ভবঃ ।
ধন্যা চ বসুধা দেবি যত্র স্যাদ্গুরুভক্ততা ॥ ২৫৮ ॥
আকল্পজন্ম কোটীনাং যজ্ঞব্রততপঃক্রিয়াঃ ।
তাঃ সর্বাঃ সফলা দেবি গুরূসন্তোষমাত্রতঃ ॥ ২৫৯ ॥
শরীরমিন্দ্রিয়ং প্রাণশ্চার্থঃ স্বজনবন্ধুতা ।
মাতৃকুলং পিতৃকুলং গুরুরেব ন সংশয়ঃ ॥ ২৬০ ॥
মন্দভাগ্যা হ্যশক্তাশ্চ যে জনা নানুমন্বতে ।
গুরুসেবাসু বিমুখাঃ পচ্যন্তে নরকেশুচৌ ॥ ২৬১ ॥
বিদ্যা ধনং বলং চৈব তেষাং ভাগ্যং নিরর্থকম্ ।
যেষাং গুরূকৃপা নাস্তি অধো গচ্ছন্তি পার্বতী ॥ ২৬২ ॥
ব্রহ্মা বিষ্ণুশ্চ রুদ্রশ্চ দেবতাঃ পিতৃকিন্নরাঃ ।
সিদ্ধচারণয়ক্ষাশ্চ অন্যে চ মুনয়ো জনাঃ ॥ ২৬৩ ॥
গুরুভাবঃ পরং তীর্থমন্যর্থং নিরর্থকম্ ।
সর্বতীর্থময়ং দেবি শ্রীগুরোশ্চরণাম্বুজম্ ॥ ২৬৪ ॥
কন্যাভোগরতা মন্দাঃ স্বকান্তায়াঃ পরাঙ্মুখাঃ ।
অতঃ পরং ময়া দেবি কথিতন্ন মম প্রিয়ে ॥ ২৬৫ ॥
ইদং রহস্যমস্পষ্টং বক্তব্যং চ বরাননে ।
সুগোপ্যং চ তবাগ্রে তু মমাত্মপ্রীতয়ে সতি ॥ ২৬৬ ॥
স্বামিমুখ্যগণেশাদ্যান্ বৈষ্ণবাদীংশ্চ পার্বতি ।
ন বক্তব্যং মহামায়ে পাদস্পর্শং কুরুষ্ব মে ॥ ২৬৭ ॥
অভক্তে বঞ্চকে ধূর্তে পাষণ্ডে নাস্তিকাদিষু ।
মনসাঽপি ন বক্তব্যা গুরুগীতা কদাচন ॥ ২৬৮ ॥
গুরবো বহবঃ সন্তি শিষ্যবিত্তাপহারকাঃ ।
তমেকং দুর্লভং মন্যে শিষ্যহৃত্তাপহারকম্ ॥ ২৬৯ ॥
চাতুর্যবান্ বিবেকী চ অধ্যাত্মজ্ঞানবান্ শুচিঃ ।
মানসং নির্মলং যস্য গুরুৎবং তস্য শোভতে ॥ ২৭০ ॥
গুরবো নির্মলাঃ শান্তাঃ সাধবো মিতভাষিণঃ ।
কামক্রোধবিনির্মুক্তাঃ সদাচারাঃ জিতেন্দ্রিয়াঃ ॥ ২৭১ ॥
সূচকাদিপ্রভেদেন গুরবো বহুধা স্মৃতাঃ ।
স্বয়ং সম্যক্ পরীক্ষ্যাথ তত্ত্বনিষ্ঠং ভজেৎসুধীঃ ॥ ২৭২ ॥
বর্ণজালমিদং তদ্বদ্বাহ্যশাস্ত্রং তু লৌকিকম্ ।
যস্মিন্ দেবি সমভ্যস্তং স গুরুঃ সুচকঃ স্মৃতঃ ॥ ২৭৩ ॥
বর্ণাশ্রমোচিতাং বিদ্যাং ধর্মাধর্মবিধায়িনীম্ ।
প্রবক্তারং গুরুং বিদ্ধি বাচকং ৎবিতি পার্বতি ॥ ২৭৪ ॥
পঞ্চাক্ষর্যাদিমন্ত্রাণামুপদেষ্টা তু পার্বতি ।
স গুরুর্বোধকো ভূয়াদুভয়োরয়মুত্তমঃ ॥ ২৭৫ ॥
মোহমারণবশ্যাদিতুচ্ছমন্ত্রোপদর্শিনম্ ।
নিষিদ্ধগুরুরিত্যাহুঃ পণ্ডিতাস্তত্ত্বদর্শিনঃ ॥ ২৭৬ ॥
অনিত্যমিতি নির্দিশ্য সংসারং সংকটালয়ম্ ।
বৈরাগ্যপথদর্শী যঃ স গুরুর্বিহিতঃ প্রিয়ে ॥ ২৭৭ ॥
তত্ত্বমস্যাদিবাক্যানামুপদেষ্টা তু পার্বতি ।
কারণাখ্যো গুরুঃ প্রোক্তো ভবরোগনিবারকঃ ॥ ২৭৮ ॥
সর্বসন্দেহসন্দোহনির্মূলনবিচক্ষণঃ ।
জন্মমৃত্যুভয়ঘ্নো যঃ স গুরুঃ পরমো মতঃ ॥ ২৭৯ ॥
বহুজন্মকৃতাৎ পুণ্যাল্লভ্যতেঽসৌ মহাগুরুঃ ।
লব্ধ্বাঽমুং ন পুনর্যাতি শিষ্যঃ সংসারবন্ধনম্ ॥ ২৮০ ॥
এবং বহুবিধা লোকে গুরবঃ সন্তি পার্বতি ।
তেষু সর্বপ্রয়ত্নেন সেব্যো হি পরমো গুরুঃ ॥ ২৮১ ॥
নিষিদ্ধগুরুশিষ্যস্তু দুষ্টসংকল্পদূষিতঃ ।
ব্রহ্মপ্রলয়পর্যন্তং ন পুনর্যাতি মর্ত্যতাম্ ॥ ২৮২ ॥
এবং শ্রুৎবা মহাদেবী মহাদেববচস্তথা ।
অত্যন্তবিহ্বলমনা শংকরং পরিপৃচ্ছতি ॥ ২৮৩ ॥
পার্বত্যুবাচ ।
নমস্তে দেবদেবাত্র শ্রোতব্যং কিংচিদস্তি মে ।
শ্রুৎবা ৎবদ্বাক্যমধুনা ভৃশং স্যাদ্বিহ্বলং মনঃ ॥ ২৮৪ ॥
স্বয়ং মূঢা মৃত্যুভীতাঃ সুকৃতাদ্বিরতিং গতাঃ ।
দৈবান্নিষিদ্ধগুরুগা যদি তেষাং তু কা গতিঃ ॥ ২৮৫ ॥
শ্রী মহাদেব উবাচ ।
শ্রুণু তত্ত্বমিদং দেবি যদা স্যাদ্বিরতো নরঃ ।
তদাঽসাবধিকারীতি প্রোচ্যতে শ্রুতিমস্তকৈঃ ॥ ২৮৬ ॥
অখণ্ডৈকরসং ব্রহ্ম নিত্যমুক্তং নিরাময়ম্ ।
স্বস্মিন্ সন্দর্শিতং যেন স ভবেদস্যং দেশিকঃ ॥ ২৮৭ ॥
জলানাং সাগরো রাজা যথা ভবতি পার্বতি ।
গুরূণাং তত্র সর্বেষাং রাজায়ং পরমো গুরুঃ ॥ ২৮৮ ॥
মোহাদিরহিতঃ শান্তো নিত্যতৃপ্তো নিরাশ্রয়ঃ ।
তৃণীকৃতব্রহ্মবিষ্ণুবৈভবঃ পরমো গুরুঃ ॥ ২৮৯ ॥
সর্বকালবিদেশেষু স্বতন্ত্রো নিশ্চলস্সুখী ।
অখণ্ডৈকরসাস্বাদতৃপ্তো হি পরমো গুরুঃ ॥ ২৯০ ॥
দ্বৈতাদ্বৈতবিনির্মুক্তঃ স্বানুভূতিপ্রকাশবান্ ।
অজ্ঞানান্ধতমশ্ছেত্তা সর্বজ্ঞঃ পরমো গুরুঃ ॥ ২৯১ ॥
যস্য দর্শনমাত্রেণ মনসঃ স্যাৎ প্রসন্নতা ।
স্বয়ং ভূয়াৎ ধৃতিশ্শান্তিঃ স ভবেৎ পরমো গুরুঃ ॥ ২৯২ ॥
সিদ্ধিজালং সমালোক্য যোগিনাং মন্ত্রবাদিনাম্ ।
তুচ্ছাকারমনোবৃত্তির্যস্যাসৌ পরমো গুরুঃ ॥ ২৯৩ ॥
স্বশরীরং শবং পশ্যন্ তথা স্বাত্মানমদ্বয়ম্ ।
যঃ স্ত্রীকনকমোহঘ্নঃ স ভবেৎ পরমো গুরুঃ ॥ ২৯৪ ॥
মৌনী বাগ্মীতি তত্ত্বজ্ঞো দ্বিধাভূচ্ছৃণু পার্বতি ।
ন কশ্চিন্মৌনিনা লাভো লোকেঽস্মিন্ভবতি প্রিয়ে ॥ ২৯৫ ॥
বাগ্মী তূৎকটসংসারসাগরোত্তারণক্ষমঃ ।
যতোসৌ সংশয়চ্ছেত্তা শাস্ত্রয়ুক্ত্যনুভূতিভিঃ ॥ ২৯৬ ॥
গুরুনামজপাদ্দেবি বহুজন্মর্জিতান্যপি ।
পাপানি বিলয়ং যান্তি নাস্তি সন্দেহমণ্বপি ॥ ২৯৭ ॥
শ্রীগুরোস্সদৃশং দৈবং শ্রীগুরোসদৃশঃ পিতা ।
গুরুধ্যানসমং কর্ম নাস্তি নাস্তি মহীতলে ॥ ২৯৮ ॥
কুলং ধনং বলং শাস্ত্রং বান্ধবাস্সোদরা ইমে ।
মরণে নোপয়ুজ্যন্তে গুরুরেকো হি তারকঃ ॥ ২৯৯ ॥
কুলমেব পবিত্রং স্যাৎ সত্যং স্বগুরুসেবয়া ।
তৃপ্তাঃ স্যুস্সকলা দেবা ব্রহ্মাদ্যা গুরুতর্পণাৎ ॥ ৩০০ ॥
গুরুরেকো হি জানাতি স্বরূপং দেবমব্যযম্ ।
তজ্জ্ঞানং যৎপ্রসাদেন নান্যথা শাস্ত্রকোটিভিঃ ॥ ৩০১ ॥
স্বরূপজ্ঞানশূন্যেন কৃতমপ্যকৃতং ভবেৎ ।
তপোজপাদিঅক্ং দেবি সকলং বালজল্পবৎ ॥ ৩০২ ॥
শিবং কেচিদ্ধরিং কেচিদ্বিধিং কেচিত্তু কেচন ।
শক্তিং দেবমিতি জ্ঞাৎবা বিবদন্তি বৃথা নরাঃ ॥ ৩০৩ ॥
ন জানন্তি পরং তত্ত্বং গুরূদীক্ষাপরাঙ্মুখাঃ ।
ভ্রান্তাঃ পশুসমা হ্যেতে স্বপরিজ্ঞানবর্জিতাঃ ॥ ৩০৪ ॥
তস্মাৎকৈবল্যসিদ্ধ্যর্থং গুরূমেব ভজেৎপ্রিয়ে ।
গুরূং বিনা ন জানন্তি মূঢাস্তৎপরমং পদম্ ॥ ৩০৫ ॥
ভিদ্যতে হৃদয়গ্রন্থিশ্ছিদ্যন্তে সর্বসংশয়াঃ ।
ক্ষীয়ন্তে সর্বকর্মাণি গুরোঃ করূণয়া শিবে ॥ ৩০৬ ॥
কৃতায়া গুরুভক্তেস্তু বেদশাস্ত্রানুসারতঃ ।
মুচ্যতে পাতকাদ্ঘোরাদ্গুরূভক্তো বিশেষতঃ ॥ ৩০৭ ॥
দুঃসংগং চ পরিত্যজ্য পাপকর্ম পরিত্যজেৎ ।
চিত্তচিহ্নমিদং যস্য দীক্ষা বিধীয়তে ॥ ৩০৮ ॥
চিত্তত্যাগনিয়ুক্তশ্চ ক্রোধগর্ববিবর্জিতঃ ।
দ্বৈতভাবপরিত্যাগী তস্য দীক্ষা বিধীয়তে ॥ ৩০৯ ॥
এতল্লক্ষণ সংয়ুক্তং সর্বভূতহিতে রতম্ ।
নির্মলং জীবিতং যস্য তস্য দীক্ষা বিধীয়তে ॥ ৩১০ ॥
ক্রিয়যা চান্বিতং পূর্বং দীক্ষাজালং নিরূপিতম্ ।
মন্ত্রদীক্ষাভির্র্ধ সাংগোপাংগ শিবোদিতম্ ॥ ৩১১ ॥
ক্রিয়যা স্যাদ্বিরহিতাং গুরূসায়ুজ্যদায়িনীম্ ।
গুরুদীক্ষাং বিনা কো বা গুরুৎবাচারপালকঃ ॥ ৩১২ ॥
শক্তো ন চাপি শক্তো বা দৈশিকাংঘ্রিসমাশ্রয়াৎ ।
তস্য জন্মাস্তি সফলং ভোগমোক্ষফলপ্রদম্ ॥ ৩১৩ ॥
অত্যন্তচিত্তপক্বস্য শ্রদ্ধাভক্তিয়ুতস্য চ ।
প্রবক্তব্যমিদং দেবি মমাত্মপ্রীতয়ে সদা ॥ ৩১৪ ॥
রহস্যং সর্বশাস্ত্রেষু গীতাশাস্ত্রদং শিবে ।
সম্যক্পরীক্ষ্য বক্তব্যং সাধকস্য মদ্যাত্মনঃ ॥ ৩১৫ ॥
সৎকর্মপরিপাকাচ্চ চিত্তশুদ্ধস্য ধীমতঃ ।
সাধকস্যৈব বক্তব্যা গুরুগীতা প্রয়ত্নতঃ ॥ ৩১৬ ॥
নাস্তিকায় কৃতঘ্নায় দাম্ভিকায় শঠায় চ ।
অভক্তায় বিভক্তায় ন বাচ্যেয়ং কদাচন ॥ ৩১৭ ॥
স্ত্রীলোলুপায় মূর্খায় কামোপহতচেতসে ।
নিন্দকায় ন বক্তব্যা গুরুগীতা স্বভাবতঃ ॥ ৩১৮ ॥
সর্ব পাপপ্রশমনং সর্বোপদ্রববারকম্ ।
জন্মমৃত্যুহরং দেবি গীতাশাস্ত্রমিদং শিবে ॥ ৩১৯ ॥
শ্রুতিসারমিদং দেবি সর্বমুক্তং সমাসতঃ ।
নান্যথা সদ্গতিঃ পুংসাং বিনা গুরুপদং শিবে ॥ ৩২০ ॥
বহুজন্মকৃতাৎপাদয়মর্থো ন রোচতে ।
জন্মবন্ধনিবৃত্যর্থং গুরুমেব ভজেৎসদা ॥ ৩২১ ॥
অহমেব জগৎসর্বমহমেব পরং পদম্ ।
এতজ্জ্ঞানং যতো ভূয়াত্তং গুরুং প্রণমাম্যহম্ ॥ ৩২২ ॥
অলং বিকল্পৈরহমেব কেবলো ময়ি স্থিতং বিশ্বমিদং চরাচরম্ ।
ইদং রহস্যং মম যেন দর্শিতম্ স বন্দনীয়ো গুরুরেব কেবলম্ ॥ ৩২৩ ॥
যস্যান্তং নাদিমধ্যং ন হি করচরণং নামগোত্রং ন সূত্রম্ ।
নো জাতির্নৈব বর্ণো ন ভবতি পুরুষো নো নপুংসং ন চ স্ত্রী ॥ ৩২৪ ॥
নাকারং নো বিকারং ন হি জনিমরণং নাস্তি পুণ্যং ন পাপম্ ।
নোঽতত্ত্বং তত্ত্বমেকং সহজসমরসং সদ্গুরুং তং নমামি ॥ ৩২৫ ॥
নিত্যায় সত্যায় চিদাত্মকায় নব্যায় ভব্যায় পরাৎপরায় ।
শুদ্ধায় বুদ্ধায় নিরঞ্জনায় নমোঽস্য নিত্যং গুরুশেখরায় ॥ ৩২৬ ॥
সচ্চিদানন্দরূপায় ব্যাপিনে পরমাত্মনে ।
নমঃ শ্রীগুরুনাথায় প্রকাশানন্দমূর্তয়ে ॥ ৩২৭ ॥
সত্যানন্দস্বরূপায় বোধৈকসুখকারিণে ।
নমো বেদান্তবেদ্যায় গুরবে বুদ্ধিসাক্ষিণে ॥ ৩২৮ ॥
নমস্তে নাথ ভগবন্ শিবায় গুরুরূপিণে ।
বিদ্যাবতারসংসিদ্ধ্যৈ স্বীকৃতানেকবিগ্রহ ॥ ৩২৯ ॥
নবায় নবরূপায় পরমার্থৈকরূপিণে ।
সর্বাজ্ঞানতমোভেদভানবে চিদ্ঘনায় তে ॥ ৩৩০ ॥
স্বতন্ত্রায় দয়াক্লৃপ্তবিগ্রহায় শিবাত্মনে ।
পরতন্ত্রায় ভক্তানাং ভব্যানাং ভব্যরূপিণে ॥ ৩৩১ ॥
বিবেকিনাং বিবেকায় বিমর্শায় বিমর্শিনাম্ ।
প্রকাশিনাং প্রকাশায় জ্ঞানিনাং জ্ঞানরূপিণে ॥ ৩৩২ ॥
পুরস্তৎপার্শ্বয়োঃ পৃষ্ঠে নমস্কুর্যাদুপর্যধঃ ।
সদা মচ্চিত্তরূপেণ বিধেহি ভবদাসনম্ ॥ ৩৩৩ ॥
শ্রীগুরুং পরমানন্দং বন্দে হ্যানন্দবিগ্রহম্ ।
যস্য সন্নিধিমাত্রেণ চিদানন্দায় তে মনঃ ॥ ৩৩৪ ॥
নমোঽস্তু গুরবে তুভ্যং সহজানন্দরূপিণে ।
যস্য বাগমৃতং হন্তি বিষং সংসারসংজ্ঞকম্ ॥ ৩৩৫ ॥
নানায়ুক্তোপদেশেন তারিতা শিষ্যমন্ততিঃ ।
তৎকৃতাসারবেদেন গুরুচিৎপদমচ্যুতম্ ॥ ৩৩৬ ॥
অচ্যুতায় মনস্তুভ্যং গুরবে পরমাত্মনে ।
সর্বতন্ত্রস্বতন্ত্রায় চিদ্ঘনানন্দমূর্তয়ে ॥ ৩৩৭ ॥
নমোচ্যুতায় গুরবে বিদ্যাবিদ্যাস্বরূপিণে ।
শিষ্যসন্মার্গপটবে কৃপাপীয়ূষসিন্ধবে ॥ ৩৩৮ ॥
ওমচ্যুতায় গুরবে শিষ্যসংসারসেতবে ।
ভক্তকার্যৈকসিংহায় নমস্তে চিৎসুখাত্মনে ॥ ৩৩৯ ॥
গুরুনামসমং দৈবং ন পিতা ন চ বান্ধবাঃ ।
গুরুনামসমঃ স্বামী নেদৃশং পরমং পদম্ ॥ ৩৪০ ॥
একাক্ষরপ্রদাতারং যো গুরুং নৈব মন্যতে ।
শ্বানয়োনিশতং গৎবা চাণ্ডালেষ্বপি জায়তে ॥ ৩৪১ ॥
গুরুত্যাগাদ্ভবেন্মৃত্যুর্মন্ত্রত্যাগাদ্দরিদ্রতা ।
গুরুমন্ত্রপরিত্যাগী রৌরবং নরকং ব্রজেৎ ॥ ৩৪২ ॥
শিবক্রোধাদ্গুরুস্ত্রাতা গুরুক্রোধাচ্ছিবো ন হি ।
তস্মাৎসর্বপ্রয়ত্নেন গুরোরাজ্ঞা ন লংঘয়েৎ ॥ ৩৪৩ ॥
সংসারসাগরসমুদ্ধরণৈকমন্ত্রং
ব্রহ্মাদিদেবমুনিপূজিতসিদ্ধমন্ত্রম্ ।
দারিদ্র্যদুঃখভবরোগবিনাশমন্ত্রং
বন্দে মহাভয়হরং গুরুরাজমন্ত্রম্ ॥ ৩৪৪ ॥
সপ্তকোটীমহামন্ত্রাশ্চিত্তবিভ্রংশকারকাঃ ।
এক এব মহামন্ত্রো গুরুরিত্যক্ষরদ্বয়ম্ ॥ ৩৪৫ ॥
এবমুক্ত্বা মহাদেবঃ পার্বতীং পুনরব্রবীৎ ।
ইদমেব পরং তত্ত্বং শ্রুণু দেবি সুখাবহম্ ॥ ৩৪৬ ॥
গুরুতত্ত্বমিদং দেবি সর্বমুক্তং সমাসতঃ ।
রহস্যমিদমব্যক্তন্ন বদেদ্যস্য কস্যচিৎ ॥ ৩৪৭ ॥
ন মৃষা স্যাদিয়ং দেবি মদুক্তিঃ সত্যরূপিণী ।
গুরুগীতাসমং স্তোত্রং নাস্তি নাস্তি মহীতলে ॥ ৩৪৮ ॥
গুরুগীতামিমাং দেবি ভবদুঃখবিনাশিনীম্ ।
গুরুদীক্ষাবিহীনস্য পুরতো ন পঠেৎ ক্বচিৎ ॥ ৩৪৯ ॥
রহস্যমত্যন্তরহস্যমেতন্ন পাপিনা লভ্যমিদং মহেশ্বরি ।
অনেকজন্মার্জিতপুণ্যপাকাদ্গুরোস্তু তত্ত্বং লভতে মনুষ্যঃ ॥ ৩৫০ ॥
যস্য প্রসাদাদহমেব সর্বং
ময়্যেব সর্বং পরিকল্পিতং চ ।
ইত্থং বিজানামি সদাত্মরূপং
গ্তস্যাংঘ্রিপদ্মং প্রণতোঽস্মি নিত্যম্ ॥ ৩৫১ ॥
অজ্ঞানতিমিরান্ধস্য বিষয়াক্রান্তচেতসঃ ।
জ্ঞানপ্রভাপ্রদানেন প্রসাদং কুরু মে প্রভো ॥ ৩৫২ ॥
॥ ইতি শ্রীগুরুগীতায়াং তৃতীয়োঽধ্যায়ঃ ॥
॥ ইতি শ্রীস্কংদপুরাণে উত্তরখংডে ঈশ্বরপার্বতী
সংবাদে গুরুগীতা সমাপ্ত ॥
॥ শ্রীগুরুদত্তাত্রেয়ার্পণমস্তু ॥
– Chant Stotra in Other Languages –
Guru Gita Long Version in in Sanskrit – English – Bengali – Gujarati – Kannada – Malayalam – Odia – Telugu – Tamil