॥ Shiva Geetaa Bengali Lyrics ॥
॥ শ্রীশিবগীতা ॥
॥ শিব গীতা ॥
অথ শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
১ শিবভক্ত্যুৎকর্ষনিরূপণং নাম প্রথমোঽধ্যায়ঃ ॥ ১ ॥ ৪০
২ বৈরাগ্যোপদেশো নাম দ্বিতীয়োঽধ্যায়ঃ ॥ ২ ॥ ৪৩
৩ বিরজাদীক্ষানিরূপণং নাম তৃতীয়োঽধ্যায়ঃ ॥ ৩ ॥ ৩৫
৪ শিবপ্রদুর্ভাবাখ্যঃ নাম চতুর্থোঽধ্যায়ঃ ॥ ৪ ॥ ৫২
৫ রামায় বরপ্রদানং নাম পঞ্চমোঽধ্যায়ঃ ॥ ৫ ॥ ৪১
৬ বিভূতিয়োগো নাম ষষ্ঠোঽধ্যায়ঃ ॥ ৬ ॥ ৬০
৭ বিশ্বরূপদর্শনং নাম সপ্তমোঽধ্যায়ঃ ॥ ৭ ॥ ৪৭
৮ পিণ্ডোৎপত্তিকথনং নাম অষ্টমোঽধ্যায়ঃ ॥ ৮ ॥ ৭০
৯ দেহস্বরূপনির্ণয়ো নাম নবমোঽধ্যায়ঃ ॥ ৯ ॥ ৫১
১০ জীবস্বরূপকথনং নাম দশমোঽধ্যায়ঃ ॥ ১০ ॥ ৬৩
১১ জীবগত্যাদিনিরূপণং নাম একাদশোঽধ্যায়ঃ ॥ ১১ ॥ ৪৫
১২ উপাসনাজ্ঞানফলং নাম দ্বাদশোঽধ্যায়ঃ ॥ ১২ ॥ ৪২
১৩ মোক্ষয়োগো নাম ত্রয়োদশোঽধ্যায়ঃ ॥ ১৩ ॥ ৩৮
১৪ পঞ্চকোশোপপাদনং নাম চতুর্দশোঽধ্যায়ঃ ॥ ১৪ ॥ ৪৫
১৫ ভক্তিয়োগো নাম পঞ্চদশোঽধ্যায়ঃ ॥ ১৫ ॥ ৪২
১৬ গীতাধিকারিনিরূপণং নাম ষোডশোঽধ্যায়ঃ ॥ ১৬ ॥ ৬৯ ট্ = ৭৮৩
॥ শিব গীতা ॥
অথ প্রথমোঽধ্যায়ঃ ।
সূত উবাচ ॥
অথাতঃ সম্প্রবক্ষ্যামি শুদ্ধং কৈবল্যমুক্তিদম্ ।
অনুগ্রহান্মহেশস্য ভবদুঃখস্য ভেষজম্ ॥ ১॥
ন কর্মণামনুষ্ঠানৈর্ন দানৈস্তপসাপি বা ।
কৈবল্যং লভতে মর্ত্যঃ কিংতু জ্ঞানেন কেবলম্ ॥ ২॥
রামায় দণ্ডকারণ্যে পার্বতীপতিনা পুরা ।
যা প্রোক্তা শিবগীতাখ্যা গুহ্যাদ্গুহ্যতমা হি সা ॥ ৩॥
যস্যাঃ শ্রবণমাত্রেণ নৃণাং মুক্তির্ধ্রুবং ভবেৎ ।
পুরা সনৎকুমারায় স্কন্দেনাভিহিতা হি সা ॥ ৪॥
সনৎকুমারঃ প্রোবাচ ব্যাসায় মুনিসত্তমাঃ ।
মহ্যং কৃপাতিরেকেণ প্রদদৌ বাদরায়ণঃ ॥ ৫॥
উক্তং চ তেন কস্মৈচিন্ন দাতব্যমিদং ৎবয়া ।
সূতপুত্রান্যথা দেবাঃ ক্ষুভ্যন্তি চ শপন্তি চ ॥ ৬॥
অথ পৃষ্টো ময়া বিপ্রা ভগবান্বাদরায়ণঃ ।
ভগবন্দেবতাঃ সর্বাঃ কিং ক্ষুভ্যন্তি শপন্তি চ ॥ ৭॥
তাসামত্রাস্তি কা হানির্যযা কুপ্যন্তি দেবতাঃ ।
পারাশর্যোঽথ মামাহ যৎপৃষ্টং শৃণু বৎস তৎ ॥ ৮॥
নিত্যাগ্নিহোত্রিণো বিপ্রাঃ সংতি যে গৃহমেধিনঃ ।
ত এব সর্বফলদাঃ সুরাণাং কামধেনবঃ ॥ ৯॥
ভক্ষ্যং ভোজ্যং চ পেয়ং চ যদ্যদিষ্টং সুপর্বণাম্ ।
অগ্নৌ হুতেন হবিষা সৎসর্বং লভ্যতে দিবি ॥ ১০॥
নান্যদস্তি সুরেশানামিষ্টসিদ্ধিপ্রদং দিবি ।
দোগ্ধ্রী ধেনুর্যথা নীতা দুঃখদা গৃহমেধিনাম্ ॥ ১১॥
তথৈব জ্ঞানবান্বিপ্রো দেবানাং দুঃখদো ভবেৎ ।
ত্রিদশাস্তেন বিঘ্নন্তি প্রবিষ্টা বিষয়ং নৃণাম্ ॥ ১২॥
ততো ন জায়তে ভক্তিঃ শিবে কস্যাপি দেহিনঃ ।
তস্মাদবিদুষাং নৈব জায়তে শূলপাণিনঃ ॥ ১৩॥
যথাকথংচিজ্জাতাপি মধ্যে বিচ্ছিদ্যতে নৃণাম্ ।
জাতং বাপি শিবজ্ঞানং ন বিশ্বাসং ভজত্যলম্ ॥ ১৪॥
ঋষয় ঊচুঃ ॥
যদ্যেবং দেবতা বিঘ্নমাচরন্তি তনূভৃতাম্ ।
পৌরুষং তত্র কস্যাস্তি যেন মুক্তির্ভবিষ্যতি ॥ ১৫॥
সত্যং সূতাত্মজ ব্রূহি তত্রোপায়োঽস্তি বা ন বা ॥
সূত উবাচ ॥
কোটিজন্মার্জিতৈঃ পুণ্যৈঃ শিবে ভক্তিঃ প্রজায়তে ॥ ১৬॥
ইষ্টাপূর্তাদিকর্মাণি তেনাচরতি মানবঃ ।
শিবার্পণধিয়া কামান্পরিত্যজ্য যথাবিধি ॥ ১৭॥
অনুগ্রহাত্তেন শংভোর্জায়তে সুদৃঢো নরঃ ।
ততো ভীতাঃ পলায়ন্তে বিঘ্নং হিৎবা সুরেশ্বরাঃ ॥ ১৮॥
জায়তে তেন শুশ্রূষা চরিতে চন্দ্রমৌলিনঃ ।
শৃণ্বতো জায়তে জ্ঞানং জ্ঞানাদেব বিমুচ্যতে ॥ ১৯॥
বহুনাত্র বিমুক্তেন যস্য ভক্তিঃ শিবে দৃঢা ।
মহাপাপোপপাপৌঘকোটিগ্রস্তোঽপি মুচ্যতে ॥ ২০॥
অনাদরেণ শাঠ্যেন পরিহাসেন মায়যা ।
শিবভক্তিরতশ্চেৎস্যাদন্ত্যজোঽপি বিমুচ্যতে ॥ ২১॥
এবং ভক্তিশ্চ সর্বেষাং সর্বদা সর্বতোমুখী ।
তস্যাং তু বিদ্যমানায়াং যস্তু মর্ত্যো ন মুচ্যতে ॥ ২২॥
সংসারবন্ধনাত্তস্মাদন্যঃ কো বাস্তি মূঢধীঃ ।
নিয়মাদ্যস্তু কুর্বীত ভক্তিং বা দ্রোহমেব বা ॥ ২৩॥
তস্যাপি চেৎপ্রসন্নোঽসৌ ফলং যচ্ছতি বাঞ্ছিতম্ ।
ঋদ্ধং কিংচিৎসমাদায় ক্ষুল্লকং জলমেব বা ॥ ২৪॥
যো দত্তে নিয়মেনাসৌ তস্মৈ দত্তে জগত্ত্রয়ম্ ।
তত্রাপ্যশক্তো নিয়মান্নমস্কারং প্রদক্ষিণাম্ ॥ ২৫॥
যঃ করোতি মহেশস্য তস্মৈ তুষ্টো ভবেচ্ছিবঃ ।
প্রদক্ষিণাস্বশক্তোঽপি যঃ স্বান্তে চিন্তয়েচ্ছিবম্ ॥ ২৬॥
গচ্ছন্সমুপবিষ্টো বা তস্যাভীষ্টং প্রয়চ্ছতি ।
চন্দনং বিল্বকাষ্ঠস্য পুষ্পাণি বনজান্যপি ॥ ২৭॥
ফলানি তাদৃশান্যেব যস্য প্রীতিকরাণি বৈ ।
দুষ্করং তস্য সেবায়াং কিমস্তি ভুবনত্রয়ে ॥ ২৮॥
বন্যেষু যাদৃশী প্রীতির্বর্ততে পরমেশিতুঃ ।
উত্তমেষ্বপি নাস্ত্যেব তাদৃশী গ্রামজেষ্বপি ॥ ২৯॥
তং ত্যক্ত্বা তাদৃশং দেবং যঃ সেবেতান্যদেবতাম্ ।
স হি ভাগীরথীং ত্যক্ত্বা কাঙ্ক্ষতে মৃগতৃষ্ণিকাম্ ॥ ৩০॥
কিংতু যস্যাস্তি দুরিতং কোটিজন্মসু সংচিতম্ ।
তস্য প্রকাশতে নায়মর্থো মোহান্ধচেতসঃ ॥ ৩১॥
ন কালনিয়মো যত্র ন দেশস্য স্থলস্য চ ।
যত্রাস্য চিত্রং রমতে তস্য ধ্যানেন কেবলম্ ॥ ৩২॥
আত্মৎবেন শিবস্যাসৌ শিবসায়ুজ্যমাপ্নুয়াৎ ।
অতিস্বল্পতরায়ুঃ শ্রীর্ভূতেশাংশাধিপোঽপি যঃ ॥ ৩৩॥
স তু রাজাহমস্মীতি বাদিনং হন্তি সান্বয়ম্ ।
কর্তাপি সর্বলোকানামক্ষয়ৈশ্বর্যবানপি ॥ ৩৪॥
শিবঃ শিবোঽহমস্মীতি বাদিনং যং চ কঞ্চন ।
আত্মনা সহ তাদাত্ম্যভাগিনং কুরুতে ভৃশম্ ॥ ৩৫॥
ধর্মার্থকামমোক্ষাণাং পারং যস্যাথ যেন বৈ ।
মুনয়স্তৎপ্রবক্ষ্যামি ব্রতং পাশুপতাভিধম্ ॥ ৩৬॥
কৃৎবা তু বিরজাং দীক্ষাং ভূতিরুদ্রাক্ষধারিণঃ ।
জপন্তো বেদসারাখ্যং শিবনামসহস্রকম্ ॥ ৩৭॥
সংত্যজ্য তেন মর্ত্যৎবং শৈবীং তনুমবাপ্স্যথ ।
ততঃ প্রসন্নো ভগবাঞ্ছংকরো লোকশংকরঃ ॥ ৩৮॥
ভবতাং দৃশ্যতামেত্য কৈবল্যং বঃ প্রদাস্যতি ।
রামায় দণ্ডকারণ্যে যৎপ্রাদাৎকুম্ভসংভবঃ ॥ ৩৯॥
তৎসর্বং বঃ প্রবক্ষ্যামি শৃণুধ্বং ভক্তিয়োগিনঃ ॥ ৪০॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
শিবভক্ত্যুৎকর্ষনিরূপণং নাম প্রথমোঽধ্যায়ঃ ॥ ১ ॥
অথ দ্বিতীয়োঽধ্যায়ঃ ॥
ঋষয় ঊচুঃ ॥
কিমর্থমাগতোঽগস্ত্যো রামচন্দ্রস্য সন্নিধিম্ ।
কথং বা বিরজাং দীক্ষাং কারয়ামাস রাঘবম্ ।
ততঃ কিমাপ্তবান্ রামঃ ফলং তদ্বক্তুমর্হসি ॥ ১॥
সূত উবাচ ॥
রাবণেন যদা সীতাঽপহৃতা জনকাত্মজা ।
তদা বিয়োগদুঃখেন বিলপন্নাস রাঘবঃ ॥ ২॥
নির্নিদ্রো নিরহংকারো নিরাহারো দিবানিশম্ ।
মোক্তুমৈচ্ছত্ততঃ প্রাণান্সানুজো রঘুনন্দনঃ ॥ ৩॥
লোপামুদ্রাপতির্জ্ঞাৎবা তস্য সন্নিধিমাগমৎ ।
অথ তং বোধয়ামাস সংসারাসারতাং মুনিঃ ॥ ৪॥
অগস্ত্য উবাচ ॥
কিং বিষীদসি রাজেন্দ্র কান্তা কস্য বিচার্যতাম্ ।
জডঃ কিং নু বিজানাতি দেহোঽয়ং পাঞ্চভৌতিকঃ ॥ ৫॥
নির্লেপঃ পরিপূর্ণশ্চ সচ্চিদানন্দবিগ্রহঃ ।
আত্মা ন জায়তে নৈব ম্রিয়তে ন চ দুঃখভাক্ ॥ ৬॥
সূর্যোঽসৌ সর্বলোকস্য চক্ষুষ্ট্বেন ব্যবস্থিতঃ ।
তথাপি চাক্ষুষৈর্দোষৈর্ন কদাচিদ্বিলিপ্যতে ॥ ৭॥
সর্বভূতান্তরাত্মাপি তদ্বদ্দৃশ্যৈর্ন লিপ্যতে ।
দেহোঽপি মলপিণ্ডোঽয়ং মুক্তজীবো জডাত্মকঃ ॥ ৮॥
দহ্যতে বহ্নিনা কাষ্ঠৈঃ শিবাদ্যৈর্ভক্ষ্যতেঽপি বা ।
তথাপি নৈব জানাতি বিরহে তস্য কা ব্যথা ॥ ৯॥
সুবর্ণগৌরী দূর্বায়া দলবচ্ছ্যামলাপি বা ।
পীনোত্তুঙ্গস্তনাভোগভুগ্নসূক্ষ্মবলগ্নিকা ॥ ১০॥
বৃহন্নিতম্বজঘনা রক্তপাদসরোরুহা ।
রাকাচন্দ্রমুখী বিম্বপ্রতিবিম্বরদচ্ছদা ॥ ১১॥
নীলেন্দীবরনীকাশনয়নদ্বয়শোভিতা ।
মত্তকোকিলসঁল্লাপা মত্তদ্বিরদগামিনী ॥ ১২॥
কটাক্ষৈরনুগৃহ্ণাতি মাং পঞ্চেষুশরোত্তমৈঃ ।
ইতি যাং মন্যতে মূঢ স তু পঞ্চেষুশাসিতঃ ॥ ১৩॥
তস্যাবিবেকং বক্ষ্যামি শৃণুষ্বাবহিতো নৃপ ।
ন চ স্ত্রী ন পুমানেষ নৈব চায়ং নপুংসকঃ ॥ ১৪॥
অমূর্তঃ পুরুষঃ পূর্ণো দ্রষ্টা দেহী স জীবিনঃ ।
যা তন্বঙ্গী মৃদুর্বালা মলপিণ্ডাত্মিকা জডা ॥ ১৫॥
সা ন পশ্যতি যৎকিংচিন্ন শৃণোতি ন জিঘ্রতি ।
চর্মমাত্রা তনুস্তস্যা বুদ্ধ্বা ত্যক্ষস্ব রাঘব ॥ ১৬॥
যা প্রাণাদধিকা সৈব হংত তে স্যাদ্ঘৃণাস্পদম্ ।
জায়ন্তে যদি ভূতেভ্যো দেহিনঃ পাঞ্চভৌতিকাঃ ॥ ১৭॥
আত্মা যদেকলস্তেষু পরিপূর্ণঃ সনাতনঃ ।
কা কান্তা তত্র কঃ কান্তঃ সর্ব এব সহোদরাঃ ॥ ১৮॥
নির্মিতায়াং গৃহাবল্যাং তদবচ্ছিন্নতাং গতম্ ।
নভস্তস্যাং তু দগ্ধায়াং ন কাংচিৎক্ষতিমৃচ্ছতি ॥ ১৯॥
তদ্বদাত্মাপি দেহেষু পরিপূর্ণঃ সনাতনঃ ।
হন্যমানেষু তেষ্বেব স স্বয়ং নৈব হন্যতে ॥ ২০॥
হন্তা চেন্মন্যতে হন্তুং হতশ্চেন্মন্যতে হতম্ ।
তাবুভৌ ন বিজানীতো নায়ং হন্তি ন হন্যতে ॥ ২১॥
অস্মান্নৃপাতিদুঃখেন কিং খেদস্যাস্তি কারণম্ ।
স্বস্বরূপং বিদিৎবেদং দুঃখং ত্যক্ত্বা সুখী ভব ॥ ২২॥
রাম উবাচ ॥
মুনে দেহস্য নো দুঃখং নৈব চেৎপরমাত্মনঃ ।
সীতাবিয়োগদুঃখাগ্নির্মাং ভস্মীকুরুতে কথম্ ॥ ২৩॥
সদাঽনুভূয়তে যোঽর্থঃ স নাস্তীতি ৎবয়েরিতঃ ।
জায়াতাং তত্র বিশ্বাসঃ কথং মে মুনিপুঙ্গব ॥ ২৪॥
অন্যোঽত্র নাস্তি কো ভোক্তা যেন জন্তুঃ প্রতপ্যতে ।
সুখস্য বাপি দুঃখস্য তদ্ব্রূহি মুনিসত্তম ॥ ২৫॥
অগস্ত্য উবাচ ॥
দুর্জ্ঞেয়া শাংভবী মায়া তয়া সংমোহ্যতে জগৎ ।
মায়া তু প্রকৃতিং বিদ্যান্মায়িনং তু মহেশ্বরম্ ।২৬॥
তস্যাবয়বভূতৈস্তু ব্যাপ্তং সর্বমিদং জগৎ।
সত্যজ্ঞানাত্মকোঽনন্তো বিভুরাত্মা মহেশ্বরঃ ॥ ২৭॥
তস্যৈবাংশো জীবলোকে হৃদয়ে প্রাণিনাং স্থিতঃ ।
বিস্ফুলিঙ্গা যথা বহ্নের্জায়ন্তে কাষ্ঠয়োগতঃ ॥ ২৮॥
অনাদিকর্মসংবদ্ধাস্তদ্বদংশা মহেশিতুঃ ।
অনাদিবাসনায়ুক্তাঃ ক্ষেত্রজ্ঞা ইতি তে স্মৃতাঃ ॥ ২৯॥
মনো বুদ্ধিরহংকারশ্চিত্তং চেতি চতুষ্টয়ম্ ।
অন্তঃকরণমিত্যাহুস্তত্র তে প্রতিবিম্বিতাঃ ॥ ৩০॥
জীবৎবং প্রাপ্নুয়ুঃ কর্মফলভোক্তার এব তে ।
ততো বৈষয়িকং তেষাং সুখং বা দুঃখমেব বা ॥ ৩১॥
ত এব ভুঞ্জতে ভোগায়তনেঽস্মিন্ শরীরকে ।
স্থাবরং জঙ্গমং চেতি দ্বিবিধং বপুরুচ্যতে ॥ ৩২॥
স্থাবরাস্তত্র দেহাঃ স্যুঃ সূক্ষ্মা গুল্মলতাদয়ঃ ।
অণ্ডজাঃ স্বেদজাস্তদ্বদুদ্ভিজ্জা ইতি জঙ্গমাঃ ॥ ৩৩॥
যোনিমন্যে প্রপদ্যন্তে শরীরৎবায় দেহিনঃ ।
স্থাণুমন্যেঽনুসংয়ন্তি যথাকর্ম যথাশ্রুতম্ ॥ ৩৪॥
সুখ্যহং দুঃখ্যহং চেতি জীব এবাভিমন্যতে ।
নির্লেপোঽপি পরং জ্যোতির্মোহিতঃ শংভুমায়যা ॥ ৩৫॥
কামঃ ক্রোধস্তথা লোভো মদো মাৎসর্যমেব চ ।
মোহশ্চেত্যরিষড্বর্গমহংকারগতং বিদুঃ ॥ ৩৬॥
স এব বধ্যতে জীবঃ স্বপ্নজাগ্রদবস্থয়োঃ ।
সুষুপ্তৌ তদভাবাচ্চ জীবঃ শংকরতাং গতঃ ॥ ৩৭॥
স এব মায়াসংস্পৃষ্টঃ কারণং সুখদুঃখয়োঃ ।
শুক্তো রজতবদ্বিশ্বং মায়যা দৃশ্যতে শিবে ॥ ৩৮॥
ততো বিবেকজ্ঞানেন ন কোঽপ্যত্রাস্তি দুঃখভাক্ ।
ততো বিরম দুঃখাত্ত্বং কিং মুধা পরিতপ্যসে ॥ ৩৯॥
শ্রীরাম উবাচ ॥
মুনে সর্বমিদং তথ্যং যন্মদগ্রে ৎবয়েরিতম্ ।
তথাপি ন জহাত্যেতৎপ্রারব্ধাদৃষ্টমুল্বণম্ ॥ ৪০॥
মত্তং কুর্যাদ্যথা মদ্যং নষ্টাবিদ্যমপি দ্বিজম্ ।
তদ্বৎপ্রারব্ধভোগোঽপি ন জহাতি বিবেকিনম্ ॥ ৪১॥
ততঃ কিং বহুনোক্তেন প্রারব্ধসচিবঃ স্মরঃ ।
বাধতে মাং দিবারাত্রমহংকারোঽপি তাদৃশঃ ॥ ৪২॥
অত্যন্তপীডিতো জীবঃ স্থূলদেহং বিমুঞ্চতি ।
তস্মাজ্জীবাপ্তয়ে মহ্যমুপায়ঃ ক্রিয়তাং দ্বিজ ॥ ৪৩॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
বৈরাগ্যোপদেহো নাম দ্বিতীয়োঽধ্যায়ঃ ॥ ২ ॥
অথ তৃতীয়োঽধ্যায়ঃ ॥
অগস্ত্য উবাচ ॥
ন গৃহ্ণাতি বচঃ পথ্যং কামক্রোধাদিপীডিতঃ ।
হিতং ন রোচতে তস্য মুমূর্ষোরিব ভেষজম্ ॥ ১॥
মধ্যেসমুদ্রং যা নীতা সীতা দৈত্যেন মায়িনা ।
আয়াস্যতি নরশ্রেষ্ঠ সা কথং তব সংনিধিম্ ॥ ২॥
বধ্যন্তে দেবতাঃ সর্বা দ্বারি মর্কটয়ূথবৎ ।
কিং চ চামরধারিণ্যো যস্য সংতি সুরাঙ্গনাঃ ॥ ৩॥
ভুঙ্ক্তে ত্রিলোকীমখিলাং যঃ শংভুবরদর্পিতঃ ।
নিষ্কণ্টকং তস্য জয়ঃ কথং তব ভবিষ্যতি ॥ ৪॥
ইন্দ্রজিন্নাম পুত্রো যস্তস্যাস্তীশবরোদ্ধতঃ ।
তস্যাগ্রে সংগরে দেবা বহুবারং পলায়িতাঃ ॥ ৫॥
কুম্ভকর্ণাহ্বয়ো ভ্রাতা যস্যাস্তি সুরসূদনঃ ।
অন্যো দিব্যাস্ত্রসংয়ুক্তশ্চিরজীবী বিভীষণঃ ॥ ৬॥
দুর্গং যস্যাস্তি লংকাখ্যং দুর্জেয়ং দেবদানবৈঃ ।
চতুরঙ্গবলং যস্য বর্ততে কোটিসংখ্যযা ॥ ৭॥
একাকিনা ৎবয়া জেয়ঃ স কথং নৃপনন্দন ।
আকাংক্ষতে করে ধর্তুং বালশ্চন্দ্রমসং যথা ।
তথা ৎবং কামমোহেন জয়ং তস্যাভিবাঞ্ছসি ॥ ৮॥
শ্রীরাম উবাচ ॥
ক্ষত্রিয়োঽহং মুনিশ্রেষ্ঠ ভার্যা মে রক্ষসা হৃতা ।
যদি তং ন নিহন্ম্যাশু জীবনে মেঽস্তি কিং ফলম্ ॥ ৯॥
অতস্তে তত্ত্ববোধেন ন মে কিংচিৎপ্রয়োজনম্ ।
কামক্রোধাদয়ঃ সর্বে দহন্ত্যেতে তনুং মম ॥ ১০॥
অহংকারোঽপি মে নিত্যং জীবনং হন্তুমুদ্যতঃ ।
হৃতায়াং নিজকান্তায়াং শত্রুণাঽবমতস্য বা ॥ ১১॥
যস্য তত্ত্ববুভুৎসা স্যাৎস লোকে পুরুষাধমঃ ।
তস্মাত্তস্য বধোপায়ং লঙ্ঘয়িৎবাম্বুধিং রণে ॥ ১২॥
অগস্ত্য উবাচ ॥
এবং চেচ্ছরণং যাহি পার্বতীপতিমব্যযম্ ।
স চেৎপ্রসন্নো ভগবান্বাঞ্ছিতার্থং প্রদাস্যতি ॥ ১৩॥
দেবৈরজেয়ঃ শক্রাদ্যৈর্হরিণা ব্রহ্মণাপি বা ।
স তে বধ্যঃ কথং বা স্যাচ্ছংকরানুগ্রহং বিনা ॥
অতস্ত্বাং দীক্ষয়িষ্যামি বিরজামার্গমাশ্রিতঃ ।
তেন মার্গেন মর্ত্যৎবং হিৎবা তেজোময়ো ভব ॥ ১৫॥
যেন হৎবা রণে শত্রূন্সর্বান্কামানবাপ্স্যসি ।
ভুক্ত্বা ভূমণ্ডলে চান্তে শিবসায়ুজ্যমাপ্স্যসি ॥ ১৬॥
সূত উবাচ ॥
অথ প্রণম্য রামস্তং দণ্ডবন্মুনিসত্তমম্ ।
উবাচ দুঃখনির্মুক্তঃ প্রহৃষ্টেনান্তরাত্মনা ॥ ১৭॥
শ্রীরাম উবাচ ॥
কৃতার্থোঽহং মুনে জাতো বাঞ্ছিতার্থো মমাগতঃ ।
পীতাম্বুধিঃ প্রসন্নস্ত্বং যদি মে কিমু দুর্লভম্ ।
অতস্ত্বং বিরজাং দীক্ষাং ব্রূহি মে মুনিসত্তম ॥ ১৮॥
অগস্ত্য উবাচ ॥
শুক্লপক্ষে চতুর্দশ্যামষ্টম্যাং বা বিশেষতঃ ।
একাদশ্যাং সোমবারে আর্দ্রায়াং বা সমারভেৎ ॥ ১৯॥
যং বায়ুমাহুর্যং রুদ্রং যমগ্নিং পরমেশ্বরম্ ।
পরাৎপরতরং চাহুঃ পরাৎপরতরং শিবম্ ॥ ২০॥
ব্রহ্মণো জনকং বিষ্ণোর্বহ্নের্বায়োঃ সদাশিবম্ ।
ধ্যাৎবাগ্নিনাঽবসথ্যাগ্নিং বিশোধ্য চ পৃথক্পৃথক্ ॥ ২১॥
পঞ্চভূতানি সংয়ম্য ধ্যাৎবা গুণবিধিক্রমাৎ ।
মাত্রাঃ পঞ্চ চতস্রশ্চ ত্রিমাত্রাদিস্ততঃ পরম্ ॥ ২২॥
একমাত্রমমাত্রং হি দ্বাদশান্তং ব্যবস্থিতম্ ।
স্থিত্যাং স্থাপ্যামৃতো ভূৎবা ব্রতং পাশুপতং চরেৎ ॥ ২৩॥
ইদং ব্রতং পাশুপতং করিষ্যামি সমাসতঃ ।
প্রাতরেবং তু সংকল্প্য নিধায়াগ্নিং স্বশাখয়া ॥ ২৪॥
উপোষিতঃ শুচিঃ স্নাতঃ শুক্লাম্বরধরঃ স্বয়ম্ ।
শুক্লয়জ্ঞোপবীতশ্চ শুক্লমাল্যানুলেপনঃ ॥ ২৫॥
জুহুয়াদ্বিরজামন্ত্রৈঃ প্রাণাপানাদিভিস্ততঃ ।
অনুবাকান্তমেকাগ্রঃ সমিদাজ্যচরূন্পৃথক্ ॥ ২৬॥
আত্মন্যগ্নিং সমারোপ্য যাতে অগ্নেতি মংত্রতঃ ।
ভস্মাদায়াগ্নিরিত্যাদ্যৈর্বিমৃজ্যাঙ্গানি সংস্পৃশেৎ ॥ ২৭॥
ভস্মচ্ছন্নো ভবেদ্বিদ্বান্মহাপাতকসংভবৈঃ ।
পাপৈর্বিমুচ্যতে সত্যং মুচ্যতে চ ন সংশয়ঃ ॥ ২৮॥
বীর্যমগ্নের্যতো ভস্ম বীর্যবান্ভস্মসংয়ুতঃ ।
ভস্মস্নানরতো বিপ্রো ভস্মশায়ী জিতেন্দ্রিয়ঃ ॥ ২৯॥
সর্বপাপবিনির্মুক্তঃ শিবসায়ুজ্যমাপ্নুয়াৎ ।
এবং কুরু মহাভাগ শিবনামসহস্রকম্ ॥ ৩০॥
ইদং তু সম্প্রদাস্যামি তেন সর্বার্থমাপ্স্যসি ।
সূত উবাচ ॥
ইত্যুক্ত্বা প্রদদৌ তস্মৈ শিবনামসহস্রকম্ ॥ ৩১॥
বেদসারাভিধং নিত্যং শিবপ্রত্যক্ষকারকম্ ।
উক্তং চ তেন রাম ৎবং জপ নিত্যং দিবানিশম্ ॥ ৩২॥
ততঃ প্রসন্নো ভগবান্মহাপাশুপতাস্ত্রকম্ ।
তুভ্যং দাস্যতি তেন ৎবং শত্রূন্হৎবাঽঽপ্স্যসি প্রিয়াম্ ॥ ৩৩॥
তস্যৈবাস্ত্রস্য মাহাত্ম্যাৎসমুদ্রং শোষয়িষ্যসি ।
সংহারকালে জগতামস্ত্রং তৎপার্বতীপতেঃ ॥ ৩৪॥
তদলাভে দানবানাং জয়স্তব সুদুর্লভঃ ।
তস্মাল্লব্ধং তদেবাস্ত্রং শরণং যাহি শংকরম্ ॥ ৩৫॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
বিরজাদীক্ষানিরূপণং নাম তৃতীয়োঽধ্যায়ঃ ॥ ৩ ॥
অথ চতুর্থোঽধ্যায়ঃ ॥
সূত উবাচ ॥
এবমুক্ত্বা মুনিশ্রেষ্ঠ গতে তস্মিন্নিজাশ্রমম্ ।
অথ রামগিরৌ রামস্তস্মিন্গোদাবরীতটে ॥ ১॥
শিবলিঙ্গং প্রতিষ্ঠাপ্য কৃৎবা দীক্ষাং যথাবিধি ।
ভূতিভূষিতসর্বাঙ্গো রুদ্রাক্ষাভরণৈর্যুতঃ ॥ ২॥
অভিষিচ্য জলৈঃ পুণ্যৈর্গৌতমীসিন্ধুসংভবৈঃ ।
অর্চয়িৎবা বন্যপুষ্পৈস্তদ্বদ্বন্যফলৈরপি ॥ ৩॥
ভস্মচ্ছন্নো ভস্মশায়ী ব্যাঘ্রচর্মাসনে স্থিতঃ ।
নাম্নাং সহস্রং প্রজপন্নক্তংদিবমনন্যধীঃ ॥ ৪॥
মাসমেকং ফলাহারো মাসং পর্ণাশনঃ স্থিতঃ ।
মাসমেকং জলাহারো মাসং চ পবনাশনঃ ॥ ৫॥
শান্তো দান্তঃ প্রসন্নাত্মা ধ্যায়ন্নেবং মহেশ্বরম্ ।
হৃৎপঙ্কজে সমাসীনমুমাদেহার্ধধারিণম্ ॥ ৬॥
চতুর্ভুজং ত্রিনয়নং বিদ্যুৎপিঙ্গজটাধরম্ ।
কোটিসূর্যপ্রতীকাশং চন্দ্রকোটিসুশীতলম্ ॥ ৭॥
সর্বাভরণসংয়ুক্তং নাগয়জ্ঞোপবীতিনম্ ।
ব্যাঘ্রচর্মাম্বরধরং বরদাভয়ধারিণম্ ॥ ৮॥
ব্যাঘ্রচর্মোত্তরীয়ং চ সুরাসুরনমস্কৃতম্ ।
পঞ্চবক্ত্রং চন্দ্রমৌলিং ত্রিশূলডমরূধরম্ ॥ ৯॥
নিত্যং চ শাশ্বতং শুদ্ধং ধ্রুবমক্ষরমব্যযম্ ।
এবং নিত্যং প্রজপতো গতং মাসচতুষ্টয়ম্ ॥ ১০॥
অথ জাতো মহানাদঃ প্রলয়াম্বুদভীষণঃ ।
সমুদ্রমথনোদ্ভূতমন্দরাবনিভৃদ্ধ্বনিঃ ॥ ১১॥
রুদ্রবাণাগ্নিসংদীপ্তভ্রশ্যত্ত্রিপুরবিভ্রমঃ ।
তমাকর্ণ্যাথ সংভ্রান্তো যাবৎপশ্যতি পুষ্করম্ ॥ ১২॥
তাবদেবো মহাতেজো সমস্যাসীৎপুরো দ্বিজাঃ ।
তেজসা তেন সংভ্রান্তো নাপশ্যৎস দিশো দশ ॥ ১৩॥
অন্ধীকৃতেক্ষণস্তূর্ণং মোহং যাতো নৃপাত্মজঃ ।
বিচিন্ত্য তর্কয়ামাস দৈত্যমায়াং দ্বিজেশ্বরাঃ ॥ ১৪॥
অথোত্থায় মহাবীরঃ সজ্জং কৃৎবা স্বকং ধনুঃ ।
অবিধ্যন্নিশিতৈর্বাণৈর্দিব্যাস্ত্রৈরভিমন্ত্রিতৈঃ ॥ ১৫॥
আগ্নেয়ং বারুণং সৌম্যং মোহনং সৌরপার্বতম্ ।
বিষ্ণুচক্রং মহাচক্রং কালচক্রং চ বৈষ্ণবম্ ॥ ১৬॥
রৌদ্রং পাশুপতং ব্রাহ্মং কৌবেরং কুলিশানিলম্ ।
ভার্গবাদিবহূন্যস্ত্রাণ্যযং প্রায়ুঙ্ক্ত রাঘবঃ ॥ ১৭॥
তস্মিংস্তেজসি শস্ত্রাণি চাস্ত্রান্যস্য মহীপতেঃ ।
বিলীনানি মহাভ্রস্য করকা ইব নীরধৌ ॥ ১৮॥
ততঃ ক্ষণেন জজ্বাল ধনুস্তস্য করচ্চ্যুতম্ ।
তূণীরং চাঙ্গুলিত্রাণং গোধিকাপি মহীপতে ॥ ১৯॥
তদ্দৃষ্ট্বা লক্ষ্মণো ভীতঃ পপাত ভুবি মূর্চ্ছিতঃ ।
অথাকিঞ্চিৎকরো রামো জানুভ্যামবনিং গতঃ ॥ ২০॥
মীলিতাক্ষো ভয়াবিষ্টঃ শংকরং শরণং গতঃ ।
স্বরেণাপ্যুচ্চরন্নুচ্চৈঃ শংভোর্নামসহস্রকম্ ॥ ২১॥
শিবং চ দণ্ডবদ্ভূমৌ প্রণনাম পুনঃ পুনঃ ।
পুনশ্চ পূর্ববচ্চাসীচ্ছব্দো দিঙ্মণ্ডলং গ্রসন্ ॥ ২২॥
চচাল বসুধা ঘোরং পর্বতাশ্চ চকম্পিরে ।
ততঃ ক্ষণেন শীতাংশুশীতলং তেজ আপতৎ ॥ ২৩॥
উন্মীলিতাক্ষো রামস্তু যাবদেতৎপ্রপশ্যতি ।
তাবদ্দদর্শ বৃষভং সর্বালংকারসংয়ুতম্ ॥ ২৪॥
পীয়ূষমথনোদ্ভূতনবনীতস্য পিণ্ডবৎ ।
প্রোতস্বর্ণং মরকতচ্ছায়শৃঙ্গদ্বয়ান্বিতম্ ॥ ২৫॥
নীলরত্নেক্ষণং হ্রস্বকণ্ঠকম্বলভূষিতম্ ।
রত্নপল্যাণসংয়ুক্তং নিবদ্ধং শ্বেতচামরৈঃ ॥ ২৬॥
ঘণ্টিকাঘর্ঘরীশব্দৈঃ পূরয়ন্তং দিশো দশ ।
তত্রাসীনং মহাদেবং শুদ্ধস্ফটিকবিগ্রহম্ ॥ ২৭॥
কোটিসূর্যপ্রতীকাশং কোটিশীতাংশুশীতলম্।
ব্যাঘ্রচর্মাম্বরধরং নাগয়জ্ঞোপবীতিনম্ ॥ ২৮॥
সর্বালংকারসংয়ুক্তং বিদ্যুৎপিঙ্গজটাধরম্ ।
নীলকণ্ঠং ব্যাঘ্রচর্মোত্তরীয়ং চন্দ্রশেখরম্ ॥ ২৯॥
নানাবিধায়ুধোদ্ভাসিদশবাহুং ত্রিলোচনম্ ।
যুবানং পুরুষশ্রেষ্ঠং সচ্চিদানন্দবিগ্রহম্ ॥ ৩০॥
তত্রৈব চ সুখাসীনাং পূর্ণচন্দ্রনিভাননাম্ ।
নীলেন্দীবরদামাভামুদ্যন্মরকতপ্রভাম্ ॥ ৩১॥
মুক্তাভরণসংয়ুক্তাং রাত্রিং তারাঞ্চিতামিব ।
বিন্ধ্যক্ষিতিধরোত্তুঙ্গকুচভারভরালসাম্ ॥ ৩২॥
সদসৎসংশয়াবিষ্টমধ্যদেশান্তরাম্বরাম্ ।
দিব্যাভরণসংয়ুক্তাং দিব্যগন্ধানুলেপনাম্ ॥ ৩৩॥
দিব্যমাল্যাম্বরধরাং নীলেন্দীবরলোচনাম্ ।
অলকোদ্ভাসিবদনাং তাম্বূলগ্রাসশোভিতাম্ ॥ ৩৪॥
শিবালিঙ্গনসংজাতপুলকোদ্ভাসিবিগ্রহাম্ ।
সচ্চিদানন্দরূপাঢ্যাং জগন্মাতরমম্বিকাম্ ॥ ৩৫॥
সৌন্দর্যসারসংদোহাং দদর্শ রঘুনন্দনঃ ।
স্বস্ববাহনসংয়ুক্তান্নানায়ুধলসৎকরান্ ॥ ৩৬॥
বৃহদ্রথন্তরাদীনি সামানি পরিগায়তঃ ।
স্বস্বকান্তাসমায়ুক্তান্দিক্পালান্পরিতঃ স্থিতান্ ॥ ৩৭॥
অগ্রগং গরুডারূঢং শংখচক্রগদাধরম্ ।
কালাম্বুদপ্রতীকাশং বিদ্যুৎকান্ত্যা শ্রিয়া যুতম্ ॥ ৩৮॥
জপন্তমেকমনসা রুদ্রাধ্যায়ং জনার্দনম্ ।
পশ্চাচ্চতুর্মুখং দেবং ব্রহ্মাণং হংসবাহনম্ ॥ ৩৯॥
চতুর্বক্ত্রৈশ্চতুর্বেদরুদ্রসূক্তৈর্মহেশ্বরম্ ।
স্তুবন্তং ভারতীয়ুক্তং দীর্ঘকূর্চং জটাধরম্ ॥ ৪০॥
অথর্বশিরসা দেবং স্তুবন্তং মুনিমণ্ডলম্ ।
গঙ্গাদিতটিনীয়ুক্তমম্বুধিং নীলবিগ্রহম্ ॥ ৪১॥
শ্বেতাশ্বতরমন্ত্রেণ স্তুবন্তং গিরিজাপতিম্ ।
অনন্তাদিমহানাগান্কৈলাসগিরিসন্নিভান্ ॥ ৪২॥
কৈবল্যোপনিষৎপাঠান্মণিরত্নবিভূষিতান্ ।
সুবর্ণবেত্রহস্তাঢ্যং নন্দিনং পুরতঃ স্থিতম্ ॥ ৪৩॥
দক্ষিণে মূষকারূঢং গণেশং পর্বতোপমম্ ।
ময়ূরবাহনারূঢমুত্তরে ষণ্মুখং তথা ॥ ৪৪॥
মহাকালং চ চণ্ডেশং পার্শ্বয়োর্ভীষণাকৃতিম্ ।
কালাগ্নিরুদ্রং দূরস্থং জ্বলদ্দাবাগ্নিসন্নিভম্ ॥ ৪৫॥
ত্রিপাদং কুটিলাকারং নটদ্ভৃঙ্গিরিটিং পুরঃ ।
নানাবিকারবদনান্কোটিশঃ প্রমথাধিপান্ ॥ ৪৬॥
নানাবাহনসংয়ুক্তং পরিতো মাতৃমণ্ডলম্ ।
পঞ্চাক্ষরীজপাসক্তান্সিদ্ধবিদ্যাধরাদিকান্ ॥ ৪৭॥
দিব্যরুদ্রকগীতানি গায়ৎকিন্নরবৃন্দকম্ ।
তত্র ত্রৈয়ম্বকং মন্ত্রং জপদ্দ্বিজকদম্বকম্ ॥ ৪৮॥
গায়ন্তং বীণয়া গীতং নৃত্যন্তং নারদং দিবি ।
নৃত্যতো নাট্যনৃত্যেন রম্ভাদীনপ্সরোগণান্ ॥ ৪৯॥
গায়চ্চিত্ররথাদীনাং গন্ধর্বাণাং কদম্বকম্ ।
কম্বলাশ্বতরৌ শংভুকর্ণভূষণতাং গতৌ ॥ ৫০॥
গায়ন্তৌ পন্নগৌ গীতং কপালং কম্বলং তথা ।
এবং দেবসভাং দৃষ্ট্বা কৃতার্থো রঘুনন্দনঃ ॥ ৫১॥
হর্ষগদ্গদয়া বাচা স্তুবন্দেবং মহেশ্বরম্ ।
দিব্যনামসহস্রেণ প্রণনাম পুনঃ পুনঃ ॥ ৫২॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
শিবপ্রাদুর্ভাবাখ্যশ্চতুর্থোঽধ্যায়ঃ ॥ ৪ ॥
অথ পঞ্হমোঽধ্যায়ঃ ॥
সূত উবাচ ॥
অথ প্রাদুরভূত্তত্র হিরণ্ময়রথো মহান্ ।
অনেকদিব্যরত্নাংশুকির্মীরিতদিগন্তরঃ ॥ ১॥
নদ্যুপান্তিকপঙ্কাঢ্যমহাচক্রচতুষ্টয়ঃ ।
মুক্তাতোরণসংয়ুক্তঃ শ্বেতচ্ছত্রশতাবৃতঃ ॥ ২॥
শুদ্ধহেমখলীনাঢ্যতুরঙ্গগণসংয়ুতঃ ।
শুক্তাবিতানবিলসদূর্ধ্বদিব্যবৃষধ্বজঃ ॥ ৩॥
মত্তবারণিকায়ুক্তঃ পট্টতল্পোপশোভিতঃ ।
পারিজাততরূদ্ভূতপুষ্পমালাভিরঞ্চিতঃ ॥ ৪॥
মৃগনাভিসমুদ্ভূতকস্তূরিমদপঙ্কিলঃ ।
কর্পূরাগধূপোত্থগন্ধাকৃষ্টমধুব্রতঃ ॥ ৫॥
সংবর্তঘনঘোষাঢ্যো নানাবাদ্যসমন্বিতঃ ।
বীণাবেণুস্বনাসক্তকিন্নরীগণসংকুলঃ ॥ ৬॥
এবং দৃষ্ট্বা রথশ্রেষ্ঠং বৃষাদুত্তীর্য শংকরঃ ।
অম্বয়া সহিতস্তত্র পট্টতল্পেঽবিশত্তদা ॥ ৭॥
নীরাজনৈঃ সুরস্ত্রীণাং শ্বেতচামরচালনৈঃ ।
দিব্যব্যজনপাতৈশ্চ প্রহৃষ্টো নীললোহিতঃ ॥ ৮॥
ক্বণৎকঙ্কণনিধ্বানৈর্মংজুমঞ্জীরসিঞ্জিতৈঃ ।
বীণাবেণুস্বনৈর্গীতৈঃ পূর্ণমাসীজ্জগত্ত্রয়ম্ ॥ ৯॥
শুককেকিকুলারাবৈঃ শ্বেতপারাবতস্বনৈঃ ।
উন্নিদ্রভূষাফণিনাং দর্শনাদেব বর্হিণঃ ॥ ১০॥
ননৃতুর্দর্শয়ন্তঃ সর্বাংশ্চন্দ্রকান্কোটিসংখ্যযা ।
প্রণমন্তং ততো রামমুত্থাপ্য বৃষভধ্বজঃ ॥ ১১॥
আনিনায় রথং দিব্যং প্রহৃষ্টেনান্তরাত্মনা ।
কমণ্ডলুজলৈঃ স্বচ্ছৈঃ স্বয়মাচম্য যত্নতঃ ॥ ১২॥
সমাচম্যাথ পুরতঃ স্বাংকে রামমুপানয়ৎ ।
অথ দিব্যং ধনুস্তস্মৈ দদৌ তূণীরমক্ষয়ম্ ॥ ১৩॥
মহাপাশুপতং নাম দিব্যমস্ত্রং দদৌ ততঃ ।
উক্তশ্চ তেন রামোঽপি সাদরং চন্দ্রমৌলিনা ॥ ১৪॥
জগন্নাশকরং রৌদ্রমুগ্রমস্ত্রমিদং নৃপ ।
অতো নেদং প্রয়োক্তব্যং সামান্যসমরাদিকে ॥ ১৫॥
অন্যন্নাস্তি প্রতীঘাতমেতস্য ভুবনত্রয়ে ।
তস্মাৎপ্রাণত্যযে রাম প্রয়োক্তব্যমুপস্থিতে ॥ ১৬॥
অন্যদৈত্যৎপ্রয়ুক্তং তু জগৎসংক্ষয়কৃদ্ভবেৎ ।
অথাহূয় সুরশ্রেষ্ঠান্ লোকপালান্মহেশ্বরঃ ॥ ১৭॥
উঅবাচ পরমপ্রীতঃ স্বং স্বমস্ত্রং প্রয়চ্ছত ।
রাঘবোঽয়ং চ তৈরস্ত্রৈ রাবণং নিহনিষ্যতি ॥ ১৮॥
তস্মৈ দেবৈরবধ্যৎবমিতি দত্তো বরো ময়া ।
তস্মাদ্বানরতামেত্য ভবন্তো যুদ্ধদুর্মদাঃ ॥ ১৯॥
সাহায়্যমস্য কুর্বন্তু তেন সুস্থা ভবিষ্যথ ।
তদাজ্ঞাং শিরসা গৃহ্য সুরাঃ প্রাঞ্জলয়স্তথা ॥ ২০॥
প্রণম্য চরণৌ শংভোঃ স্বং স্বমস্ত্রং দদুর্মুদা ।
নারায়ণাস্ত্রং দৈত্যারিরৈন্দ্রমস্ত্রং পুরংদরঃ ॥ ২১॥
ব্রহ্মাপি ব্রহ্মদণ্ডাস্ত্রমাগ্নেয়াস্ত্রং ধনংজয়ঃ ।
যাম্যং যমোঽপি মোহাস্ত্রং রক্ষোরাজস্তথা দদৌ ॥ ২২॥
বরুণো বারুণং প্রাদাদ্বায়ব্যাস্ত্রং প্রভঞ্জনঃ ।
কৌবেরং চ কুবেরোঽপি রৌদ্রমীশান এব চ ॥ ২৩॥
সৌরমস্ত্রং দদৌ সূর্যঃ সৌম্যং সোমশ্চ পার্বতম্ ।
বিশ্বেদেবা দদুস্তস্মৈ বসবো বাসবাভিধম্ ॥ ২৪॥
অথ তুষ্টঃ প্রণম্যেশং রামো দশরথাত্মজঃ ।
প্রাঞ্জলিঃ প্রণতো ভূৎবা ভক্তিয়ুক্তো ব্যজিজ্ঞপৎ ॥ ২৫॥
শ্রীরাম উবাচ ॥
ভগবান্মানুষেণৈব নোল্লঙ্ঘ্যো লবণাম্বুধিঃ ।
তত্র লঙ্কাভিধং দুর্গং দুর্জয়ং দেবদানবৈঃ ॥ ২৬॥
অনেককোটয়স্তত্র রাক্ষসা বলবত্তরাঃ ।
সর্বে স্বাধ্যায়নিরতাঃ শিবভক্তা জিতেন্দ্রিয়াঃ ॥ ২৭॥
অনেকমায়াসংয়ুক্তা বুদ্ধিমন্তোঽগ্নিহোত্রিণঃ ।
কথমেকাকিনা জেয়া ময়া ভ্রাত্রা চ সংয়ুগে ॥ ২৮॥
শ্রীমহাদেব উবাচ ॥
রাবণস্য বধে রাম রক্ষসামপি মারণে ।
বিচারো ন ৎবয়া কার্যস্তস্য কালোঽয়মাগতঃ ॥ ২৯॥
অধর্মে তু প্রবৃত্তাস্তে দেবব্রাহ্মণপীডনে ।
তস্মাদায়ুঃক্ষয়ং যাতং তেষাং শ্রীরপি সুব্রত ॥ ৩০॥
রাজস্ত্রীকামনাসক্তং রাবণং নিহনিষ্যসি ।
পাপাসক্তো রিপুর্জেতুঃ সুকরঃ সমরাঙ্গণে ॥ ৩১॥
অধর্মে নিরতঃ শত্রুর্ভাগ্যেনৈব হি লভ্যতে ।
অধীতধর্মশাস্ত্রোঽপি সদা বেদরতোঽপি বা ॥ ৩২॥
বিনাশকালে সম্প্রাপ্তে ধর্মমার্গাচ্চ্যুতো ভবেৎ ।
পীড্যন্তে দেবতাঃ সর্বাঃ সততং যেন পাপিনা ॥ ৩৩॥
ব্রাহ্মণা ঋষয়শ্চৈব তস্য নাশঃ স্বয়ং স্থিতঃ ।
কিষ্কিংধানগরে রাম দেবানামংশসংভবাঃ ॥ ৩৪॥
বানরা বহবো জাতা দুর্জয়া বলবত্তরাঃ ।
সাহায়্যং তে করিষ্যন্তি তৈর্বধ্বা চ পয়োনিধিম্ ॥ ৩৫॥
অনেকশৈলসংবদ্ধে সেতৌ যান্তু বলীমুখাঃ ।
রাবণং সগণং হৎবা তামানয় নিজাং প্রিয়াম্ ॥ ৩৬॥
শস্ত্রৈর্যুদ্ধে জয়ো যত্র তত্রাস্ত্রাণি ন যোজয়েৎ ।
নিরস্ত্রেষ্বল্পশস্ত্রেষু পলায়নপরেষু চ ॥ ৩৭॥
অস্ত্রাণি মুঞ্চন্ দিব্যানি স্বয়মেব বিনশ্যতি ।
অথবা কিং বহূক্তেন ময়ৈবোৎপাদিতং জগৎ ॥ ৩৮॥
ময়ৈব পাল্যতে নিত্যং ময়া সংহ্রিয়তেঽপি চ ।
অহমেকো জগন্মৃত্যুর্মৃত্যোরপি মহীপতে ॥ ৩৯॥
গ্রসেঽহমেব সকলং জগদেতচ্চরাচরম্ ।
মম বক্ত্রগতাঃ সর্বে রাক্ষসা যুদ্ধদুর্মদাঃ ॥ ৪০॥
নিমিত্তমাত্রং ৎবং ভূয়াঃ কীর্তিমাপ্স্যসি সংগরে ॥ ৪১॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
রামায় বরপ্রদানং নাম পঞ্চমোঽধ্যায়ঃ ॥ ৫ ॥
অথ ষষ্ঠোঽধ্যায়ঃ ॥
শ্রীরাম উবাচ ॥
ভগবন্নত্র মে চিত্রং মহদেতৎপ্রজায়তে ।
শুদ্ধস্ফটিকসংকাশস্ত্রিনেত্রশ্চন্দ্রশেখরঃ ॥ ১॥
মূর্তস্ত্বং তু পরিচ্ছিন্নাকৃতিঃ পুরুষরূপধৃক্ ।
অম্বয়া সহিতোঽত্রৈব রমসে প্রমথৈঃ সহ ॥ ২॥
ৎবং কথং পঞ্চভূতাদি জগদেতচ্চরাচরম্ ।
তদ্ব্রূহি গিরিজাকান্ত ময়ি তেঽনুগ্রহো যদি ॥ ৩॥
শ্রীভগবানুবাচ ॥
সাধু পৃষ্টং মহাভাগ দুর্জ্ঞেয়মমরৈরপি।
তৎপ্রবক্ষ্যামি তে ভক্ত্যা ব্রহ্মচর্যেণ সুব্রত ॥ ৪॥
পারং যাস্যস্যনায়াসাদ্যেন সংসারনীরধেঃ ।
দৃশ্যন্তে পঞ্চভূতানি যে চ লোকাশ্চতুর্দশ ॥ ৫॥
সমুদ্রাঃ সরিতো দেবা রাক্ষসা ঋষয়স্তথা ।
দৃশ্যন্তে যানি চান্যানি স্থাবরাণি চরাণি চ ॥ ৬॥
গন্ধর্বাঃ প্রমথা নাগাঃ সর্বে তে মদ্বিভূতয়ঃ ।
পুরা ব্রহ্মাদয়ো দেবা দ্রষ্টুকামা মমাকৃতিম্ ॥ ৭॥
মংদরং প্রয়যুঃ সর্বে মম প্রিয়তরং গিরিম্ ।
স্তুৎবা প্রাঞ্জলয়ো দেবা মাং তদা পুরতঃ স্থিতাঃ ॥ ৮॥
তান্দৃষ্ট্বাথ ময়া দেবান্ লীলাকুলিতচেতসঃ ।
তেষামপহৃতং জ্ঞানং ব্রহ্মাদীনাং দিবৌকসাম্ ॥ ৯॥
অথ তেঽপহৃতজ্ঞানা মামাহুঃ কো ভবানিতি ।
অথাব্রুবমহং দেবানহমেব পুরাতনঃ ॥ ১০॥
আসং প্রথমমেবাহং বর্তামি চ সুরেশ্বরাঃ ।
ভবিষ্যামি চ লোকেঽস্মিন্মত্তো নান্যস্তি কশ্চন ॥ ১১॥
ব্যতিরিক্তং চ মত্তোঽস্তি নান্যৎকিঞ্চিৎসুরেশ্বরাঃ ।
নিত্যোঽনিত্যোঽহমনঘো ব্রহ্মণাং ব্রহ্মণস্পতিঃ ॥ ১২॥
দক্ষিণাঞ্চ উদঞ্চোঽহং প্রাঞ্চঃ প্রত্যঞ্চ এব চ ।
অধশ্চোর্ধ্বং চ বিদিশো দিশশ্চাহং সুরেশ্বরাঃ ॥ ১৩॥
সাবিত্রী চাপি গায়ত্রী স্ত্রী পুমানপুমানপি ।
ত্রিষ্টুব্জগত্যনুষ্টুপ্ চ পংক্তিশ্ছন্দস্ত্রয়ীময়ঃ ॥ ১৪॥
সত্যোঽহং সর্বগঃ শান্তস্ত্রেতাগ্নির্গৌর্যহং গুরুঃ ।
গৌর্যহং গহ্বরং চাহং দ্যৌরহং জগতাং বিভুঃ ॥ ১৫॥
জ্যেষ্ঠঃ সর্বসুরশ্রেষ্ঠো বরিষ্ঠোঽহমপাংপতিঃ ।
আর্যোঽহং ভগবানীশস্তেজোঽহং চাদিরপ্যহম্ ॥ ১৬॥
ঋগ্বেদোঽহং যজুর্বেদঃ সামবেদোঽহমাত্মভূঃ ।
অথর্বণশ্চ মন্ত্রোঽহং তথা চাঙ্গিরসো বরঃ ॥ ১৭॥
ইতিহাসপুরাণানি কল্পোঽহং কল্পবানহম্ ।
নারাশংসী চ গাথাহং বিদ্যোপনিষদোঽস্ম্যহম্ ॥ ১৮॥
শ্লোকাঃ সূত্রাণি চৈবাহমনুব্যাখ্যানমেব চ ।
ব্যাখ্যানানি পরা বিদ্যা ইষ্টং হুতমথাহুতিঃ ॥ ১৯॥
দত্তাদত্তময়ং লোকঃ পরলোকঽহমক্ষরঃ ।
ক্ষরঃ সর্বাণি ভূতানি দান্তিঃ শান্তিরহং খগঃ ॥ ২০॥
গুহ্যোঽহং সর্ববেদেষু আরণ্যোহমজোঽপ্যহম্ ।
পুষ্করং চ পবিত্রং চ মধ্যং চাহমতঃ পরম্ ॥ ২১॥
বহিশ্চাহং তথা চান্তঃ পুরস্তাদহমব্যযঃ ।
জ্যোতিশ্চাহং তমশ্চাহং তন্মাত্রাণীন্দ্রিয়াণ্যহম্ ॥ ২২॥
বুদ্ধিশ্চাহমহংকারো বিষয়াণ্যহমেব হি ।
ব্রহ্মা বিষ্ণুর্মহেশোহমুমা স্কন্দো বিনায়কঃ ॥ ২৩॥
ইন্দ্রোঽগ্নিশ্চ যমশ্চাহং নিরৃতির্বরুণোঽনিলঃ ।
কুবেরোঽহং তথেশানো ভূর্ভুবঃ স্বর্মহর্জনঃ ॥ ২৪॥
তপঃ সত্যং চ পৃথিবী চাপস্তেজোঽনিলোঽপ্যহম্ ।
আকাশোঽহং রবিঃ সোমো নক্ষত্রাণি গ্রহাস্তথা ॥ ২৫॥
প্রাণঃ কালস্তথা মৃত্যুরমৃতং ভূতমপ্যহম্ ।
ভব্যং ভবিষ্যৎকৃৎস্নং চ বিশ্বং সর্বাত্মকোঽপ্যহম্ ॥ ২৬॥
ওমাদৌ চ তথা মধ্যে ভূর্ভুবঃ স্বস্তথৈব চ ।
ততোঽহং বিশ্বরূপোঽস্মি শীর্ষং চ জপতাং সদা ॥ ২৭॥
অশিতং পায়িতং চাহং কৃতং চাকৃতমপ্যহম্ ।
পরং চৈবাপরং চাহমহং সর্বপরায়ণঃ ॥ ২৮॥
অহং জগদ্ধিতং দিব্যমক্ষরং সূক্ষ্মমব্যযম্ ।
প্রাজাপত্যং পবিত্রং চ সৌম্যমগ্রাহ্যমগ্রিয়ম্ ॥ ২৯॥
অহমেবোপসংহর্তা মহাগ্রাসৌজসাং নিধিঃ ।
হৃদি যো দেবতাৎবেন প্রাণৎবেন প্রতিষ্ঠিতঃ ॥ ৩০॥
শিরশ্চোত্তরতো যস্য পাদৌ দক্ষিণতস্তথা ।
যশ্চ সর্বোত্তরঃ সাক্ষাদোঙ্কারোঽহং ত্রিমাত্রকঃ ॥ ৩১॥
ঊর্ধ্বং চোন্নামহে যস্মাদধশ্চাপনয়াম্যহম্ ।
তস্মাদোঙ্কার এবাহমেকো নিত্যঃ সনাতনঃ ॥ ৩২॥
ঋচো যজূংষি সামানি যো ব্রহ্মা যজ্ঞকর্মণি ।
প্রণামহে ব্রাহ্মণেভ্যস্তেনাহং প্রণবো মতঃ ॥ ৩৩॥
স্নেহো যথা মাংসপিণ্ডং ব্যাপ্নোতি ব্যাপ্যযত্যপি ।
সর্বান্ লোকানহং তদ্বৎসর্বব্যাপী ততোঽস্ম্যহম্ ॥ ৩৪॥
ব্রহ্মা হরিশ্চ ভগবানাদ্যন্তং নোপলব্ধবান্ ।
ততোঽন্যে চ সুরা যস্মাদনন্তোঽহমিতীরিতঃ ॥ ৩৫॥
গর্ভজন্মজরামৃত্যুসংসারভবসাগরাৎ ।
তারয়ামি যতো ভক্তং তস্মাত্তারোঽহমীরিতঃ ॥ ৩৬॥
চতুর্বিধেষু দেহেষু জীবৎবেন বসাম্যহম্ ।
সূক্ষ্মো ভূৎবা চ হৃদ্দেশে যত্তৎসূক্ষ্মং প্রকীর্তিতঃ ॥ ৩৭॥
মহাতমসি মগ্নেভ্যো ভক্তেভ্যো যৎপ্রকাশয়ে ।
বিদ্যুদ্বদতুলং রূপং তস্মাদ্বিদ্যুতমস্ম্যহম্ ॥ ৩৮॥
এক এব যতো লোকান্ বিসৃজামি সৃজামি চ ।
বিবাসয়ামি গৃহ্ণামি তস্মাদেকোঽহমীশ্বরঃ ॥ ৩৯॥
ন দ্বিতীয়ো যতস্তস্থে তুরীয়ং ব্রহ্ম যৎস্বয়ম্ ।
ভূতান্যাত্মনি সংহৃত্য চৈকো রুদ্রো বসাম্যহম্ ॥ ৪০॥
সর্বাংল্লোকান্যদীশেহমীশিনীভিশ্চ শক্তিভিঃ ।
ঈশানমস্য জগতঃ স্বর্দৃশং চক্ষুরীশ্বরম্ ॥ ৪১॥
ঈশানশ্চাস্মি জগতাং সর্বেষামপি সর্বদা ।
ঈশানঃ সর্ববিদ্যানাং যদীশানস্ততোঽস্ম্যহম্ ॥ ৪২॥
সর্বভাবান্নিরীক্ষেঽহমাত্মজ্ঞানং নিরীক্ষয়ে ।
যোগং চ গময়ে তস্মাদ্ভগবান্মহতো মতঃ ॥ ৪৩॥
অজস্রং যচ্চ গৃহ্ণামি বিসৃজামি সৃজামি চ ।
সর্বাংল্লোকান্বাসয়ামি তেনাহং বৈ মহেশ্বরঃ ॥ ৪৪॥
মহত্যাত্মজ্ঞানয়োগৈশ্বর্যে যস্তু মহীয়তে ।
সর্বান্ ভাবান্ পরিত্যজ্য মহাদেবশ্চ সোঽস্ম্যহম্ ॥ ৪৫॥
এষোঽস্মি দেবঃ প্রদিশো নু সর্বাঃ
পূর্বো হি জাতোস্ম্যহমেব গর্ভে ।
অহং হি জাতশ্চ জনিষ্যমাণঃ
প্রত্যগ্জনস্তিষ্ঠতি সর্বতোমুখঃ ॥ ৪৬॥
বিশ্বতশ্চক্ষুরুত বিশ্বতোমুখো
বিশ্বতোবাহুরুত বিশ্বতস্পাৎ ।
সংবাহুভ্যাং ধমতি সম্পতত্রৈ-
র্দ্যাবাভূমী জনয়ন্দেব একঃ ॥ ৪৭॥
বালাগ্রমাত্রং হৃদয়স্য মধ্যে
বিশ্বং দেবং জাতবেদং বরেণ্যম্ ।
মামাত্মস্থং যেঽনুপশ্যন্তি ধীরা-
স্তেষাং শান্তিঃ শাশ্বতী নেতরেষাম্ ॥ ৪৮॥
অহং যোনিমধিতিষ্ঠামি চৈকো
ময়েদং পূর্ণং পঞ্চবিধং চ সর্বম্ ।
মামীশানং পুরুষং দেবমীড্যং বিদিৎবা
নিচায়্যেমাং শান্তিমত্যন্তমেতি ॥ ৪৯॥
প্রাণেষ্বন্তর্মনসো লিঙ্গমাহু-
রস্মিন্ক্রোধোউআ চ তৃষ্ণা ক্ষমা চ ।
তৃষ্ণাং হিৎবা হেতুজালস্য মূলং
বুদ্ধ্যা চিত্তং স্থাপয়িৎবা ময়ীহ ।
এবং যে মাং ধ্যায়মানা ভজংতে
তেষাং শান্তিঃ শাশ্বতী নেতরেষাম্ ॥ ৫০॥
যতো বাচো নিবর্তন্তে অপ্রাপ্য মনসা সহ ।
আনন্দং ব্রহ্ম মাং জ্ঞাৎবা ন বিভেতি কুতশ্চন ॥ ৫১॥
শ্রুৎবেতি দেবা মদ্বাক্যং কৈবল্যজ্ঞানমুত্তমম্ ।
জপন্তো মম নামানি মম ধ্যানপরায়ণাঃ ॥ ৫২॥
সর্বে তে স্বস্বদেহান্তে মৎসায়ুজ্যং গতাঃ পুরা ।
ততোঽগ্রে পরিদৃশ্যন্তে পদার্থা মদ্বিভূতয়ঃ ॥ ৫৩॥
ময়্যেব সকলং জাতং ময়ি সর্বং প্রতিষ্ঠিতম্ ।
ময়ি সর্বং লয়ং যাতি তদ্ব্রহ্মাদ্বয়মস্ম্যহম্ ॥ ৫৪॥
অণোরণীয়ানহমেব তদ্ব-
ন্মহানহং বিশ্বমহং বিশুদ্ধঃ ।
পুরাতনোঽহং পুরুষোঽহমীশো
হিরণ্ময়োঽহং শিবরূপমস্মি ॥ ৫৫॥
অপাণিপাদোঽহমচিন্ত্যশক্তিঃ
পশ্যাম্যচক্ষুঃ স শৃণোম্যকর্ণঃ ।
অহং বিজানামি বিবিক্তরূপো
ন চাস্তি বেত্তা মম চিৎসদাহম্ ॥ ৫৬॥
বেদৈরশেষৈরহমেব বেদ্যো
বেদান্তকৃদ্বেদবিদেব চাহম্ ।
ন পুণ্যপাপে মম নাস্তি নাশো
ন জন্ম দেহেন্দ্রিয়বুদ্ধিরস্তি ॥ ৫৭॥
ন ভূমিরাপো ন চ বহ্নিরস্তি
ন চানিলো মেঽস্তি ন মে নভশ্চ ।
এবং বিদিৎবা এবং মাং তত্ত্বতো বেত্তি যস্তু রাম মহাম্তে
পরমাত্মরূপং
গুহাশয়ং নিষ্কলমদ্বিতীয়ম্॥ ৫৮॥
সমস্তসাক্ষিং সদসদ্বিহীনঃ
প্রয়াতি শুদ্ধং পর্মাত্মরূপম্ ॥ ৫৯॥
এবং মাং তত্ত্বতো বেত্তি যস্তু রাম মহামতে ।
স এব নান্য লোকেষু কৈবল্যফলমশ্নুতে ॥ ৬০॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
বিভূতিয়োগো নাম ষষ্ঠোঽধ্যায়ঃ ॥ ৬ ॥
অথ সপ্তমোঽধ্যায়ঃ ॥
শ্রীরাম উবাচ ॥
ভগবন্যন্ময়া পৃষ্টং তত্তথৈব স্থিতং বিভো ।
অত্রোত্তরং ময়া লব্ধং ৎবত্তো নৈব মহেশ্বর ॥ ১॥
পরিচ্ছিন্নপরীমাণে দেহে ভগবতস্তব ।
উৎপত্তিঃ পঞ্চভূতানাং স্থিতির্বা বিলয়ঃ কথম্ ॥ ২॥
স্বস্বাধিকারসংবদ্ধাঃ কথং নাম স্থিতাঃ সুরাঃ ।
তে সর্বে কথং দেব ভুবনানি চতুর্দশ ॥ ৩॥
ৎবত্তঃ শ্রুৎবাপি দেবাত্র সংশয়ো মে মহানভূৎ ।
অপ্রত্যায়িতচিত্তস্য সংশয়ং ছেত্তুমর্হসি ॥ ৪॥
শ্রীভগবানুবাচ ॥
বটবীজেঽতিসূক্ষ্মেঽপি মহাবটতরুর্যথা ।
সর্বদাস্তেঽন্যথা বৃক্ষঃ কুত আয়াতি তদ্বদ ॥ ৫॥
তদ্বন্মম তনৌ রাম ভূতানামাগতির্লয়ঃ ।
মহাসৈন্ধবপিণ্ডোঽপি জলে ক্ষিপ্তো বিলীয়তে ॥ ৬॥
ন দৃশ্যতে পুনঃ পাকাৎকুত আয়াতি পূর্ববৎ ।
প্রাতঃপ্রাতর্যথাঽঽলোকো জায়তে সূর্যমণ্ডলাৎ ॥ ৭॥
এবং মত্তো জগৎসর্বং জায়তেঽস্তি বিলীয়তে ।
ময়্যেব সকলং রাম তদ্বজ্জানীহি সুব্রত ॥ ৮॥
শ্রীরাম উবাচ ॥
কথিতেঽপি মহাভাগ দিগ্জডস্য যথা দিশি ।
নিবর্ততে ভ্রমো নৈব তদ্বন্মম করোমি কিম্ ॥ ৯॥
শ্রীভগবানুবাচ ॥
ময়ি সর্বং যথা রাম জগদেতচ্চরাচরম্ ।
বর্ততে তদ্দর্শয়ামি ন দ্রষ্টুং ক্ষমতে ভবান্ ॥ ১০॥
দিব্যং চক্ষুঃ প্রদাস্যামি তুভ্যং দশরথাত্মজ ।
তেন পশ্য ভয়ং ত্যক্ত্বা মত্তেজোমণ্ডলং ধ্রুবম্ ॥ ১১॥
ন চর্মচক্ষুষা দ্রষ্টুং শক্যতে মামকং মহঃ ।
নরেণ বা সুরেণাপি তন্মমানুগ্রহং বিনা ॥ ১২॥
সূত উবাচ ॥
ইত্যুক্ত্বা প্রদদৌ তস্মৈ দিব্যং চক্ষুর্মহেশ্বরঃ ।
অথাদর্শয়দেতস্মৈ বক্ত্রং পাতালসংনিভম্ ॥ ১৩॥
বিদ্যুৎকোটিপ্রভং দীপ্তমতিভীমং ভয়াবহম্ ।
তদ্দৃষ্ট্বৈব ভয়াদ্রামো জানুভ্যামবনিং গতঃ ॥ ১৪॥
প্রণম্য দণ্ডবদ্ভূমৌ তুষ্টাব চ পুনঃ পুনঃ ।
অথোত্থায় মহাবীরো যাবদেব প্রপশ্যতি ॥ ১৫॥
বক্ত্রং পুরভিদস্তত্র অন্তর্ব্রহ্মাণ্ডকোটয়ঃ ।
চটকা ইব লক্ষ্যন্তে জ্বালামালাসমাকুলাঃ ॥ ১৬॥
মেরুমন্দরবিন্ধ্যাদ্যা গিরয়ঃ সপ্তসাগরাঃ ।
দৃশ্যন্তে চন্দ্রসূর্যাদ্যাঃ পঞ্চ ভূতানি তে সুরাঃ ॥ ১৭॥
অরণ্যানি মহানাগা ভুবনানি চতুর্দশ ।
প্রতিব্রহ্মাণ্ডমেবং তদ্দৃষ্ট্বা দশরথাত্মজঃ ॥ ১৮॥
সুরাসুরাণাং সংগ্রামস্তত্র পূর্বাপরানপি ।
বিষ্ণোর্দশাবতারাংশ্চ তত্তৎকর্মাণ্যপি দ্বিজাঃ ॥ ১৯॥
পরাভবাংশ্চ দেবানাং পুরদাহং মহেশিতুঃ ।
উৎপদ্যমানানুৎপন্নান্সর্বানপি বিনশ্যতঃ ॥ ২০॥
দৃষ্ট্বা রামো ভয়াবিষ্টঃ প্রণনাম পুনঃ পুনঃ ।
উৎপন্নতত্ত্বজ্ঞানোঽপি বভূব রঘুনন্দনঃ ॥ ২১॥
অথোপনিষদাং সারৈরর্থৈস্তুষ্টাব শংকরম্ ॥ ২২॥
শ্রীরাম উবাচ ॥
দেব প্রপন্নার্তিহর প্রসীদ
প্রসীদ বিশ্বেশ্বর বিশ্ববন্দ্য ।
প্রসীদ গঙ্গাধর চন্দ্রমৌলে
মাং ত্রাহি সংসারভয়াদনাথম্ ॥ ২৩॥
ৎবত্তো হি জাতং জগদেতদীশ
ৎবয়্যেব ভূতানি বসন্তি নিত্যম্ ।
ৎবয়্যেব শংভো বিলয়ং প্রয়ান্তি
ভূমৌ যথা বৃক্ষলতাদয়োঽপি ॥ ২৪॥
ব্রহ্মেন্দ্র রুদ্রাশ্চ মরুদ্গণাশ্চ
গন্ধর্বয়ক্ষাঽসুরসিদ্ধসঙ্ঘাঃ ।
গঙ্গাদি নদ্যো বরুণালয়াশ্চ
বসন্তি শূলিংস্তব বক্ত্রয়ংত্রে ॥ ২৫॥
ৎবন্মায়যা কল্পিতমিন্দুমৌলে
ৎবয়্যেব দৃশ্যৎবমুপৈতি বিশ্বম্ ।
ভ্রান্ত্যা জনঃ পশ্যতি সর্বমেত-
চ্ছুক্তৌ যথা রৌপ্যমহিং চ রজ্জৌ ॥ ২৬॥
তেজোভিরাপূর্য জগৎসমস্তং
প্রকাশমানঃ কুরুষে প্রকাশম্ ।
বিনা প্রকাশং তব দেবদেব
ন দৃশ্যতে বিশ্বমিদং ক্ষণেন ॥ ২৭॥
অল্পাশ্রয়ো নৈব বৃহন্তমর্থং
ধত্তেঽণুরেকো ন হি বিন্ধ্যশৈলম্ ।
ৎবদ্বক্ত্রমাত্রে জগদেতদস্তি
ৎবন্মায়যৈবেতি বিনিশ্চিনোমি ॥ ২৮॥
রজ্জৌ ভুজঙ্গো ভয়দো যথৈব
ন জায়তে নাস্তি ন চৈতি নাশম্ ।
ৎবন্মায়যা কেবলমাত্ররূপং
তথৈব বিশ্বং ৎবয়ি নীলকণ্ঠ ॥ ২৯॥
বিচার্যমাণে তব যচ্ছরীর-
মাধারভাবং জগতামুপৈতি ।
তদপ্যযশ্যং মদবিদ্যযৈব
পূর্ণশ্চিদানদময়ো যতস্ত্বম্ ॥ ৩০॥
পূজেষ্টপূর্তাদিবরক্রিয়াণাং
ভোক্তুঃ ফলং যচ্ছসি বিশ্বমেব ।
মৃষৈতদেবং বচনং পুরারে
ৎবত্তোঽস্তি ভিন্নং ন চ কিঞ্চিদেব ॥ ৩১॥
অজ্ঞানমূঢা মুনয়ো বদন্তি
পূজোপচারাদিবহিঃক্রিয়াভিঃ ।
তোষং গিরীশো ভজতীতি মিথ্যা
কুতস্ত্বমূর্তস্য তু ভোগলিপ্সা ॥ ৩২॥
কিঞ্চিদ্দলং বা চুলকোদকং বা
যস্ত্বং মহেশ প্রতিগৃহ্য দৎসে ।
ত্রৈলোক্যলক্ষ্মীমপি যজ্জনেভ্যঃ
সর্বং ৎববিদ্যাকৃতমেব মন্যে ॥ ৩৩॥
ব্যাপ্নোষি সর্বা বিদিশো দিশশ্চ
ৎবং বিশ্বমেকঃ পুরুষঃ পুরাণঃ ।
নষ্টেঽপি তস্মিংস্তব নাস্তি হানি-
র্ঘটে বিনষ্টে নভসো যথৈব ॥ ৩৪॥
যথৈকমাকাশগমর্কবিম্বং
ক্ষুদ্রেষু পাত্রেষু জলান্বিতেষু ।
ভজত্যনেকপ্রতিবিম্বভাবং
তথা ৎবমন্তঃকরণেষু দেব ॥ ৩৫॥
সংসর্জনে বাঽপ্যবনে বিনাশে
বিশ্বস্য কিঞ্চিত্তব নাস্তি কার্যম্ ।
অনাদিভিঃ প্রাণভৃতামদৃষ্টৈ-
স্তথাপি তৎস্বপ্নবদাতনোষি ॥ ৩৬॥
স্থূলস্য সূক্ষ্মস্য জডস্য ভোগো
দেহস্য শংভো ন চিদং বিনাস্তি ।
অতস্ত্বদারোপণমাতনোতি
শ্রুতিঃ পুরারে সুখদুঃখয়োঃ সদা ॥ ৩৭॥
নমঃ সচ্চিদাম্ভোধিহংসায় তুভ্যং
নমঃ কালকালায় কালাত্মকায় ।
নমস্তে সমস্তাঘসংহারকর্ত্রে
নমস্তে মৃষাচিত্তবৃত্ত্যৈকভোক্ত্রে ॥ ৩৮॥
সূত উবাচ ॥
এবং প্রণম্য বিশ্বেশং পুরতঃ প্রাঞ্জলিঃ স্থিতঃ ।
বিস্মিতঃ পরমেশানং জগাদ রঘুনন্দনঃ ॥ ৩৯॥
শ্রীরাম উবাচ ॥
উপসংহর বিশ্বাত্মন্বিশ্বরূপমিদং তব ।
প্রতীতং জগদৈকাত্ম্যং শংভো ভবদনুগ্রহাৎ ॥ ৪০॥
শ্রীভগবানুবাচ ॥
পশ্য রাম মহাবাহো মত্তো নান্যোঽস্তি কশ্চন ॥ ৪১॥
সূত উবাচ ॥
উত্যুক্ত্বৈবোপসংজহ্রে স্বদেহে দেবতাদিকান্ ।
মীলিতাক্ষঃ পুনর্হর্ষাদ্যাবদ্রামঃ প্রপশ্যতি ॥ ৪২॥
তাবদেব গিরেঃ শৃঙ্গে ব্যাঘ্রচর্মোপরি স্থিতম্ ।
দদর্শ পঞ্চবদনং নীলকণ্ঠং ত্রিলোচনম্ ॥ ৪৩॥
ব্যাঘ্রচর্মাম্বরধরং ভূতিভূষিতবিগ্রহম্ ।
ফণিকঙ্কণভূষাঢ্যং নাগয়জ্ঞোপবীতিনম্ ॥ ৪৪॥
ব্যাঘ্রচর্মোত্তরীয়ং চ বিদ্যুৎপিঙ্গজটাধরম্ ।
একাকিনং চন্দ্রমৌলিং বরেণ্যমভয়প্রদম্ ॥ ৪৫॥
চতুর্ভুজং খণ্ডপরশুং মৃগহস্তং জগৎপতিম্ ।
অথাজ্ঞয়া পুরস্তস্য প্রণম্যোপবিবেশ সঃ ॥ ৪৬॥
অথাহ রামং দেবেশো যদ্যৎপ্রষ্টুমভীচ্ছসি ।
তৎসর্বং পৃচ্ছ রাম ৎবং মত্তো নান্যোঽস্তি তে গুরুঃ ॥ ৪৭॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
বিশ্বরূপদর্শনং নাম সপ্তমোঽধ্যায়ঃ ॥ ৭ ॥
অথ অষ্টমোঽধ্যায়ঃ ॥
শ্রীরাম উবাচ ॥
পাঞ্চভৌতিকদেহস্য চোৎপত্তির্বিলয়ঃ স্থিতিঃ ।
স্বরূপং চ কথং দেব ভগবন্বক্তুমর্হসি ॥ ১॥
শ্রীরাম উবাচ ॥
পাঞ্চভৌতিকদেহস্য চোৎপত্তির্বিলয়ঃ স্থিতিঃ ।
স্বরূপং চ কথং দেব ভগবন্বক্তুমর্হসি ॥ ১॥
শ্রীভগবানুবাচ ॥
পঞ্চভূতৈঃ সমারব্ধো দেহোঽয়ং পাঞ্চভৌতিকঃ ।
তত্র প্রদানং পৃথিবী শেষাণাং সহকারিতা ॥ ২॥
জরায়ুজোঽণ্ডজশ্চৈব স্বেদজশ্চোদ্ভিজস্তথা ।
এবং চতুর্বিধঃ প্রোক্তো দেহোঽয়ং পাঞ্চভৌতিকঃ ॥ ৩॥
মানসস্তু পরঃ প্রোক্তো দেবানামেব সংস্মৃতঃ ।
তত্র বক্ষ্যে প্রথমতঃ প্রধানৎবাজ্জরায়ুজম্ ॥ ৪॥
শুক্রশোণিতসংভূতা বৃত্তিরেব জরায়ুজঃ ।
স্ত্রীণাং গর্ভাশয়ে শুক্রমৃতুকালে বিশেদ্যদা ॥ ৫॥
যোষিতো রজসা যুক্তং তদেব স্যাজ্জরায়ুজম্ ।
বাহুল্যাদ্রজসা স্ত্রী স্যাচ্ছুক্রাধিক্যে পুমান্ভবেৎ ॥ ৬॥
শুক্রশোণিতয়োঃ সাম্যে জায়তে চ নপুংসকঃ ।
ঋতুস্নাতা ভবেন্নারী চতুর্থে দিবসে ততঃ ॥ ৭॥
ঋতুকালস্তু নির্দিষ্ট আষোডশদিনাবধি ।
তত্রায়ুগ্মদিনে স্ত্রী স্যাৎপুমান্যুগ্মদিনে ভবেৎ ॥ ৮॥
ষোডশে দিবসে গর্ভো জায়তে যদি সুভ্রুবঃ ।
চক্রবর্তী ভবেদ্রাজা জায়তে নাত্র সংশয়ঃ ॥ ৯॥
ঋতুস্নাতা যস্য পুংসঃ সাকাঙ্ক্ষং মুখমীক্ষতে ।
তদাকৃতির্ভবেদর্ভস্তৎপশ্যেৎস্বামিনো মুখম্ ॥ ১০॥
যাঽস্তি চর্মাবৃতিঃ সূক্ষ্মা জরায়ুঃ সা নিগদ্যতে ।
শুক্রশোণিতয়োর্যোগস্তস্মিন্নেব ভবেদ্যতঃ ।
তত্র গর্ভো ভবেদ্যস্মাত্তেন প্রোক্তো জরায়ুজঃ ॥ ১১॥
অণ্ডজাঃ পক্ষিসর্পাদ্যাঃ স্বেদজা মশকাদয়ঃ ।
উদ্ভিজ্জাস্তৃণগুল্মাদ্যা মানসাশ্চ সুরর্ষয়ঃ॥ ১২॥
জন্মকর্মবশাদেব নিষিক্তং স্মরমন্দিরে ।
শুক্রং রজঃসমায়ুক্তং প্রথমে মাসি তদ্দ্রবম্ ॥ ১৩॥
বুদ্বুদং কললং তস্মাত্ততঃ পেশী ভবেদিদম্ ।
পেশীঘনং দ্বিতীয়ে তু মাসি পিণ্ডঃ প্রজায়তে ।১৪॥
করাঙ্ঘ্রিশীর্ষকাদীনি তৃতীয়ে সংভবন্তি হি ।
অভিব্যক্তিশ্চ জীবস্য চতুর্থে মাসি জায়তে ॥ ১৫॥
ততশ্চলতি গর্ভোঽপি জনন্যা জঠরে স্বতঃ ।
পুত্রশ্চেদ্দক্ষিণে পার্শ্বে কন্যা বামে চ তিষ্ঠতি ॥ ১৬॥
নপুংসকস্তূদরস্য ভাগে তিষ্ঠতি মধ্যতঃ ।
অতো দক্ষিণপার্শ্বে তু শেতে মাতা পুমান্যদি ॥ ১৭॥
অঙ্গপ্রত্যঙ্গভাগাশ্চ সূক্ষ্মাঃ স্যুর্যুগপত্তদা ।
বিহায় শ্মশ্রুদন্তাদীঞ্জন্মানন্তরসংভবান্ ॥ ১৮॥
চতুর্থে ব্যক্ততা তেষাং ভাবানামপি জায়তে ।
পুংসাং স্থৈর্যাদয়ো ভাবা ভীরুৎবাদ্যাস্তু যোষিতাম্ ॥ ১৯॥
নপুংসকে চ তে মিশ্রা ভবন্তি রঘুনন্দন ।
মাতৃজং চাস্য হৃদয়ং বিষয়ানভিকাঙ্ক্ষতি ॥ ২০॥
ততো মাতুর্মনোঽভীষ্টং কুর্যাদ্গর্ভবিবৃদ্ধয়ে ।
তাং চ দ্বিহৃদয়াং নারীমাহুর্দৌহৃদিনীং ততঃ ॥ ২১॥
অদানাদ্দৌহৃদানাং স্যুর্গর্ভস্য ব্যঙ্গতাদয়ঃ ।
মাতুর্যদ্বিষয়ে লোভস্তদার্তো জায়তে সুতঃ ॥ ২২॥
প্রবুদ্ধং পঞ্চমে চিত্তং মাংসশোণিতপুষ্টতা ।
ষষ্ঠেঽস্থিস্নায়ুনখরকেশলোমবিবিক্ততা ॥ ২৩॥
বলবর্ণৌ চোপচিতৌ সপ্তমে ৎবঙ্গপূর্ণতা ।
পাদান্তরিতহস্তাভ্যাং শ্রোত্ররন্ধ্রে পিধায় সঃ ॥ ২৪॥
উদ্বিগ্নো গর্ভসংবাসাদস্তি গর্ভলয়ান্বিতঃ ॥ ২৫॥
আবির্ভূতপ্রবোধোঽসৌ গর্ভদুঃখাদিসংয়ুতঃ ।
হা কষ্টমিতি নির্বিণ্ণঃ স্বাত্মানং শোশুচীত্যথ ॥ ২৬॥
অনুভূতা মহাসহ্যাঃ পুরা মর্মচ্ছিদোঽসকৃৎ ।
করংভবালুকাস্তপ্তাশ্চাদহ্যন্তাসুখাশয়াঃ ॥ ২৭॥
জঠরানলসংতপ্তপিত্তাখ্যরসবিপ্লুষঃ ।
গর্ভাশয়ে নিমগ্নং তু দহন্ত্যতিভৃশং তু মাম্ ॥ ২৮॥
উদর্যকৃমিবক্ত্রাণি কূটশাল্মলিকণ্টকৈঃ ।
তুল্যানি চ তুদন্ত্যার্তং পার্শ্বাস্থিক্রকচার্দিতম্ ॥ ২৯॥
গর্ভে দুর্গন্ধভূয়িষ্ঠে জঠরাগ্নিপ্রদীপিতে ।
দুঃখং ময়াপ্তং যত্তস্মাৎকনীয়ঃ কুম্ভপাকজম্ ॥ ৩০॥
পূয়াসৃক্শ্লেষ্মপায়িৎবং বাগ্তাশিৎবং চ যদ্ভবেৎ ।
অশুচৌ কৃমিভাবশ্চ তৎপ্রাপ্তং গর্ভশায়িনা ॥ ৩১॥
গর্ভশয়্যাং সমারুহ্য দুঃখং যাদৃঙ্ ময়াপি তৎ ।
নাতিশেতে মহাদুঃখং নিঃশেষনরকেষু তৎ ॥ ৩২॥
এবং স্মরন্পুরা প্রাপ্তা নানাজাতীশ্চ যাতনাঃ ।
মোক্ষোপায়মভিধ্যায়ন্বর্ততেঽভ্যাসতৎপরঃ ॥ ৩৩॥
অষ্টমে ৎবক্সৃতী স্যাতামোজস্তেজশ্চ হৃদ্ভবম্ ।
শুভ্রমাপীতরক্তং চ নিমিত্তং জীবিতং মতম্ ॥ ৩৪॥
মাতরং চ পুনর্গর্ভং চঞ্চলং তৎপ্রধাবতি ।
ততো জাতোঽষ্টমে গর্ভো ন জীবত্যোজসোজ্ঝিতঃ ॥ ৩৫॥
কিংচিৎকালমবস্থানং সংস্কারাৎপীডিতাঙ্গবৎ ।
সময়ঃ প্রসবস্য স্যান্মাসেষু নবমাদিষু ॥ ৩৬॥
মাতুরস্রবহাং নাডীমাশ্রিত্যান্ববতারিতা ।
নাভিস্থনাডী গর্ভস্য মাত্রাহাররসাবহ ।
তেন জীবতি গর্ভোঽপি মাত্রাহারেণ পোষিতঃ ॥ ৩৭॥
অস্থিয়ন্ত্রবিনিষ্পিষ্টঃ পতিতঃ কুক্ষিবর্ত্মনা ।
মেদোঽসৃগ্দিগ্ধসর্বাঙ্গো জরায়ুপুটসংবৃতঃ ॥ ৩৮॥
নিষ্ক্রামন্ভৃশদুঃখার্তো রুদন্নুচ্চৈরধোমুখঃ ।
যন্ত্রাদেব বিনির্মুক্তঃ পতত্ত্যুত্তানশায়্যুত ॥ ৩৯॥
অকিংচিৎকস্তথা বালো মাংসপেশীসমাস্থিতঃ ।
শ্বমার্জারাদিদংষ্ট্রিভ্যো রক্ষ্যতে দণ্ডপাণিভিঃ ॥ ৪০॥
পিতৃবদ্রাক্ষসং বেত্তি মাতৃবড্ডাকিনীমপি ।
পূয়ং পয়োবদজ্ঞানাদ্দীর্ঘকষ্টং তু শৈশবম্ ॥ ৪১॥
শ্লেষ্মণা পিহিতা নাডী সুষুম্না যাবদেব হি ।
ব্যক্তবর্ণং চ বচনং তাবদ্বক্তুং ন শক্যতে ॥ ৪২॥
অত এব চ গর্ভেঽপি রোদিতুং নৈব শক্যতে ॥ ৪৩॥
দৃপ্তোঽথ যৌবনং প্রাপ্য মন্মথজ্বরবিহ্বলঃ ।
গায়ত্যকস্মাদুচ্চৈস্তু তথা কস্মাচ্চ বল্গতি ॥ ৪৪॥
আরোহতি তরূন্বেগাচ্ছান্তানুদ্বেজয়ত্যপি ।
কামক্রোধমদান্ধঃ সন্ন কাংশ্চিদপি বীক্ষতে ॥ ৪৫॥
অস্থিমাংসশিরালায়া বামায়া মন্মথালয়ে ।
উত্তানপূতিমণ্ডূকপাটিতোদরসন্নিভে ।
আসক্তঃ স্মরবাণার্ত আত্মনা দহ্যতে ভৃশম্ ॥ ৪৬॥
অস্থিমাংসশিরাৎবগ্ভ্যঃ কিমন্যদ্বর্ততে বপুঃ ।
বামানাং মায়যা মূঢো ন কিংচিদ্বীক্ষতে জগৎ ॥ ৪৭॥
নির্গতে প্রাণপবনে দেহো হংত মৃগীদৃশঃ ।
যথাহি জায়তে নৈব বীক্ষ্যতে পঞ্চষৈর্দিনৈঃ ॥ ৪৮॥
মহাপরিভবস্থানং জরাং প্রাপ্যাতিদুঃখিতঃ ।
শ্লেষ্মণা পিহিতোরস্কো জগ্ধমন্নং ন জীর্যতি ॥ ৪৯॥
সন্নদন্তো মন্দদৃষ্টিঃ কটুতিক্তকষায়ভুক্ ।
বাতভুগ্নকটিগ্রীবকরোরুচরণোঽবলঃ ॥ ৫০॥
গদায়ুতসমাবিষ্টঃ পরিত্যক্তঃ স্ববন্ধুভিঃ ।
নিঃশৌচো মলদিগ্ধাঙ্গ আলিঙ্গিতবরোষিতঃ ॥ ৫১॥
ধ্যায়ন্নসুলভান্ভোগান্কেবলং বর্ততে চলঃ ।
সর্বেন্দ্রিয়ক্রিয়ালোপাদ্ধস্যতে বালকৈরপি ॥ ৫২॥
ততো মৃতিজদুঃখস্য দৃষ্টান্তো নোপলভ্যতে ।
যস্মাদ্বিভ্যতি ভূতানি প্রাপ্তান্যপি পরাং রুজম্ ॥ ৫৩॥
নীয়তে মৃত্যুনা জন্তুঃ পরিষ্বক্তোঽপি বন্ধুভিঃ ।
সাগরান্তর্জলগতো গরুডেনেব পন্নগঃ ॥ ৫৪॥
হা কান্তে হা ধনং পুত্রাঃ ক্রন্দমানঃ সুদারুণম্ ।
মণ্ডূক ইব সর্পেণ মৃত্যুনা নীয়তে নরঃ ॥ ৫৫॥
মর্মসূন্মথ্যমানেষু মুচ্যমানেষু সংধিষু ।
যদ্দুঃখং ম্রিয়মাণস্য স্মর্যতাং তন্মুমুক্ষুভিঃ ॥ ৫৬॥
দৃষ্টাবাক্ষিপ্যমাণায়াং সংজ্ঞয়া হ্রিয়মাণয়া ।
মৃত্যুপাশেন বদ্ধস্য ত্রাতা নৈবোপলভ্যতে ॥ ৫৭॥
সংরুধ্যমানস্তমসা মচ্চিত্তমিবাবিশন্ ।
উপাহূতস্তদা জ্ঞাতীনীক্ষতে দীনচক্ষুষা ॥ ৫৮॥
অয়ঃ পাশেন কালেন স্নেহপাশেন বন্ধুভিঃ ।
আত্মানং কৃষ্যমাণং তং বীক্ষতে পরিতস্তথা ॥ ৫৯॥
হিক্কয়া বাধ্যমানস্য শ্বাসেন পরিশুষ্যতঃ ।
মৃত্যুনাকৃষ্যমাণস্য ন খল্বস্তি পরায়ণম্ ॥ ৬০॥
সংসারয়ন্ত্রমারূঢো যমদূতৈরধিষ্ঠিতঃ ।
ক্ব যাস্যামীতি দুঃখার্তঃ কালপাশেন যোজিতঃ ॥ ৬১॥
কিং করোমি ক্ব গচ্ছামি কিং গৃহ্ণামি ত্যজামি কিম্ ।
ইতি কর্তব্যতামূঢঃ কৃচ্ছ্রাদ্দেহাত্ত্যজত্যসূন্ ॥ ৬২॥
যাতনাদেহসংবদ্ধো যমদূতৈরধিষ্ঠিতাঃ ।
ইতো গৎবানুভবতি যা যাস্তা যময়াতনাঃ ।
তাসু যল্লভতে দুঃখং তদ্বক্তুং ক্ষমতে কুতঃ ॥ ৬৩॥
কর্পূরচন্দনাদ্যৈস্তু লিপ্যতে সততং হি যৎ ।
ভূষণৈর্ভূষ্যতে চিত্রৈঃ সুবস্ত্রৈঃ পরিবার্যতে ॥ ৬৪॥
অস্পৃশ্যং জায়তেঽপ্রেক্ষ্যং জীবত্যক্তং সদা বপুঃ ।
নিষ্কাসয়ন্তি নিলয়াৎক্ষণং ন স্থাপয়ন্ত্যপি ॥ ৬৫॥
দহ্যতে চ ততঃ কাষ্ঠৈস্তদ্ভস্ম ক্রিয়তে ক্ষণাৎ ।
ভক্ষ্যতে বা সৃগালৈশ্চ গৃধ্রকুক্করবায়সৈঃ ।
পুনর্ন দৃশ্যতে সোঽথ জন্মকোটিশতৈরপি ॥ ৬৬॥
মাতা পিতা গুরুজনঃ স্বজনো মমেতি
মায়োপমে জগতি কস্য ভবেৎপ্রতিজ্ঞা ।
একো যতো ব্রজতো কর্মপুরঃসরোঽয়ং
বিশ্রামবৃক্ষসদৃশঃ খলু জীবলোকঃ ॥ ৬৭॥
সায়ং সায়ং বাসবৃক্ষং সমেতাঃ
প্রাতঃ প্রাতস্তেন তেন প্রয়ান্তি ।
ত্যক্ত্বান্যোন্যং তং চ বৃক্ষং
বিহঙ্গা যদ্বত্তদ্বজ্জ্ঞাতয়োঽজ্ঞাতয়শ্চ ॥ ৬৮॥
মৃতিবীজং ভবেজ্জন্ম জন্মবীজং ভবেন্মৃতিঃ ।
ঘটয়ন্ত্রবদশ্রান্তো বম্ভ্রমীত্যনিশং নরঃ ॥ ৬৯॥
গর্ভে পুংসঃ শুক্রপাতাদ্যদুক্তং মরণাবধি ।
তদেতস্য মহাব্যাধের্মত্তো নান্যোঽস্তি ভেষজম্ ॥ ৭০॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
পিণ্ডোৎপত্তিকথনং নামাষ্টমোঽধ্যায়ঃ ॥ ৮ ॥
অথ নবমোঽধ্যায়ঃ ॥
শ্রীভগবানুবাচ ॥
দেহস্বরূপং বক্ষ্যামি শ্রুণুষ্বাবহিতো নৃপ ।
মত্তো হি জায়তে বিশ্বং ময়ৈবৈতৎপ্রধার্যতে ।
ময়্যেবেদমধিষ্ঠানে লীয়তে শুক্তিরৌপ্যবৎ ॥ ১॥
অহং তু নির্মলঃ পূর্ণঃ সচ্চিদানন্দবিগ্রহঃ ।
অসংগো নিরহংকারঃ শুদ্ধং ব্রহ্ম সনাতনম্ ॥ ২॥
অনাদ্যবিদ্যায়ুক্তঃ সন্ জগৎকারণতাং ব্রজে ॥ ৩॥
অনির্বাচ্যা মহাবিদ্যা ত্রিগুণা পরিণামিনী ।
রজঃ সত্ত্বং তমশ্চেতি ত্রিগুণাঃ পরিকীর্তিতাঃ ॥ ৪॥
সত্ত্বং শুক্লং সমাদিষ্টং সুখজ্ঞানাস্পদং নৃণাম্ ।
দুঃখাস্পদং রক্তবর্ণং চঞ্চলং চ রজো মতম্ ॥ ৫॥
তমঃ কৃষ্ণং জডং প্রোক্তমুদাসীনং সুখাদিষু ॥ ৬॥
অতো মম সমায়োগাচ্ছক্তিঃ সা ত্রিগুণাত্মিকা ।
অধিষ্ঠানে তু ময়্যেব ভজতে বিশ্বরূপতাম্ ।
শুক্তৌ রজতবদ্রজ্জৌ ভুজঙ্গো যদ্বদেব তু ॥ ৭॥
আকাশাদীনি জায়ন্তে মত্তো ভূতানি মায়যা ।
তৈরারব্ধমিদং বিশ্বং দেহোঽয়ং পাঞ্চভৌতিকঃ ॥ ৮॥
পিতৃভ্যামশিতাদন্নাৎষট্কোশং জায়তে বপুঃ ।
স্নায়বোঽস্থীনি মজ্জা চ জায়ন্তে পিতৃতস্তথা ॥ ৯॥
ৎবঙ্মাংশোণিতমিতি মাতৃতশ্চ ভবন্তি হি ।
ভাবাঃ স্যুঃ ষড্বিধাস্তস্য মাতৃজাঃ পিতৃজাস্তথা ।
রসজা আত্মজাঃ সত্ত্বসংভূতাঃ স্বাত্মজাস্তথা ॥ ১০॥
মৃদবঃ শোণিতং মেদো মজ্জা প্লীহা যকৃদ্গুদম্ ।
হৃন্নাভীত্যেবমাদ্যাস্তু ভাবা মাতৃভবা মতাঃ ॥ ১১॥
শ্মশ্রুলোমকচস্নায়ুশিরাধমনয়ো নখাঃ ।
দশনাঃ শুক্রমিত্যাদ্যাঃ স্থিরাঃ পিতৃসমুদ্ভবাঃ ॥ ১২॥
শরীরোপচিতির্বর্ণো বৃদ্ধিস্তৃপ্তির্বলং স্থিতিঃ ।
অলোলুপৎবমুৎসাহ ইত্যাদি রসজং বিদুঃ ॥ ১৩॥
ইচ্ছা দ্বেষঃ সুখং দুঃখং ধর্মাধর্মৌ চ ভাবনা ।
প্রয়ত্নো জ্ঞানমায়ুশ্চেন্দ্রিয়াণীত্যেবমাত্মজাঃ ॥ ১৪॥
জ্ঞানেন্দ্রিয়াণি শ্রবণং স্পর্শনং দর্শনং তথা ।
রসনং ঘ্রাণমিত্যাহুঃ পঞ্চ তেষাং তু গোচরাঃ ॥ ১৫॥
শব্দঃ স্পর্শস্তথা রূপং রসো গন্ধ ইতি ক্রমাৎ ।
বাক্করাঙ্ঘ্রিগুদোপস্থান্যাহুঃ কর্মেন্দ্রিয়াণি হি ॥ ১৬॥
বচনাদানগমনবিসর্গরতয়ঃ ক্রমাৎ ।
কর্মেন্দ্রিয়াণাং জানীয়ান্মনশ্চৈবোভয়াত্মকম্ ॥ ১৭॥
ক্রিয়াস্তেষাং মনোবুদ্ধিরহংকারস্ততঃ পরম্ ।
অন্তঃকরণমিত্যাহুশ্চিত্তং চেতি চতুষ্টয়ম্ ॥ ১৮॥
সুখং দুঃখং চ বিষয়ৌ বিজ্ঞেয়ৌ মনসঃ ক্রিয়াঃ ।
স্মৃতিভীতিবিকল্পাদ্যা বুদ্ধিঃ স্যান্নিশ্চয়াত্মিকা ।
অহং মমেত্যহংকারশ্চিত্তং চেতয়তে যতঃ ॥ ১৯॥
সত্ত্বাখ্যমন্তঃকরণং গুণভেদাস্ত্রিধা মতম্ ।
সত্ত্বং রজস্তম ইতি গুণাঃ সত্ত্বাত্তু সাত্ত্বিকাঃ ॥ ২০॥
আস্তিক্যশুদ্ধিধর্মৈকমতিপ্রভৃতয়ো মতাঃ ।
রজসো রাজসা ভাবাঃ কামক্রোধমদাদয়ঃ ॥ ২১॥
নিদ্রালস্যপ্রমাদাদি বঞ্চনাদ্যাস্তু তামসাঃ ।
প্রসন্নেন্দ্রিয়তারোগ্যানালস্যাদ্যাস্তু সত্ত্বজাঃ ॥ ২২॥
দেহো মাত্রাত্মকস্তস্মাদাদত্তে তদ্গুণানিমান্ ।
শব্দঃ শ্রোত্রং মুখরতা বৈচিত্র্যং সূক্ষ্মতা ধৃতিঃ ॥ ২৩॥
বলং চ গগনাদ্বায়োঃ স্পর্শশ্চ স্পর্শনেন্দ্রিয়ম্ ।
উৎক্ষেপণমপক্ষেপাকুঞ্চনে গমনং তথা ॥ ২৪॥
প্রসারণমিতীমানি পঞ্চ কর্মাণি রূক্ষতা ।
প্রাণাপানৌ তথা ব্যানসমানোদানসংজ্ঞকান্ ॥ ২৫॥
নাগঃ কূর্মশ্চ কৃকলো দেবদত্তো ধনঞ্জয়ঃ ।
দশৈতা বায়ুবিকৃতীস্তথা গৃহ্ণাতি লাঘবম্ ॥ ২৬॥
তেষাং মুখ্যতরঃ প্রাণো নাভেঃ কণ্ঠাদবস্থিতঃ ।
চরত্যসৌ নাসিকয়োর্নাভৌ হৃদয়পঙ্কজে ॥ ২৭॥
শব্দোচ্চারণনিশ্বাসোচ্ছ্বাসাদেরপি কারণম্ ॥ ২৮॥
অপানস্তু গুদে মেঢ্রে কটিজঙ্ঘোদরেষ্বপি ।
নাভিকণ্ঠে বংক্ষণয়োরূরুজানুষু তিষ্ঠতি ।
তস্য মূত্রপুরীষাদিবিসর্গঃ কর্ম কীর্তিতম্ ॥ ২৯॥
ব্যানোঽক্ষিশ্রোত্রগুল্ফেষু জিহ্বাঘ্রাণেষু তিষ্ঠতি ।
প্রাণায়ামধৃতিত্যাগগ্রহণাদ্যস্য কর্ম চ ॥ ৩০॥
সমানো ব্যাপ্য নিখিলং শরীরং বহ্নিনা সহ ।
দ্বিসপ্ততিসহস্রেষু নাডীরন্ধ্রেষু সংচরন্ ॥ ৩১॥
ভুক্তপীতরসান্সম্যগানয়ন্দেহপুষ্টিকৃৎ ।
উদানঃ পাদয়োরাস্তে হস্তয়োরঙ্গসংধিষু ॥ ৩২॥
কর্মাস্য দেহোন্নয়নোৎক্রমণাদি প্রকীর্তিতম্ ।
ৎবগাদিধাতূনাশ্রিত্য পঞ্চ নাগাদয়ঃ স্থিতাঃ ॥ ৩৩॥
উদ্গারাদি নিমেষাদি ক্ষুৎপিপাসাদিকং ক্রমাৎ ।
তন্দ্রীপ্রভৃতি শোকাদি তেষাং কর্ম প্রকীর্তিতম্ ॥ ৩৪॥
অগ্নেস্তু রোচকং রূপং দীপ্তং পাকং প্রকাশতাম্ ।
অমর্ষতীক্ষ্ণসূক্ষ্মাণামোজস্তেজশ্চ শূরতাম্ ॥ ৩৫॥
মেধাবিতাং তথাঽঽদত্তে জলাত্তু রসনং রসম্ ।
শৈত্যং স্নেহং দ্রবং স্বেদং গাত্রাদিমৃদুতামপি ॥ ৩৬॥
ভূমের্ঘ্রাণেন্দ্রিয়ং গন্ধং স্থৈর্যং ধৈর্যং চ গৌরবম্ ।
ৎবগসৃঙ্মাংসমেদোঽস্থিমজ্জাশুক্রাণি ধাতবঃ ॥ ৩৭॥
অন্নং পুংসাশিতং ত্রেধা জায়তে জঠরাগ্নিনা ।
মলঃ স্থবিষ্ঠো ভাগঃ স্যান্মধ্যমো মাংসতাং ব্রজেৎ ।
মনঃ কনিষ্ঠো ভাগঃ স্যাত্তস্মাদন্নময়ং মনঃ ॥ ৩৮॥
অপাং স্থবিষ্ঠো মূত্রং স্যান্মধ্যমো রুধিরং ভবেৎ ।
প্রাণঃ কনিষ্ঠো ভাগঃ স্যাত্তস্মাৎপ্রাণো জলাত্মকঃ ॥ ৩৯॥
তেজসোঽস্থি স্থবিষ্ঠঃ স্যান্মজ্জা মধ্যম সংভবঃ ।
কনিষ্ঠা বাঙ্মতা তস্মাত্তেজোঽবন্নাত্মকং জগৎ ॥ ৪০॥
লোহিতাজ্জায়তে মাংসং মেদো মাংসসমুদ্ভবম্ ।
মেদসোঽস্থীনি জায়ন্তে মজ্জা চাস্থিসমুদ্ভবা ॥ ৪১॥
নাড্যোপি মাংসসংঘাতাচ্ছুক্রং মজ্জাসমুদ্ভবম্ ॥ ৪২॥
বাতপিত্তকফাশ্চাত্র ধাতবঃ পরিকীর্তিতাঃ ।
দশাঞ্জলি জলং জ্ঞেয়ং রসস্যাঞ্জলয়ো নব ॥ ৪৩॥
রক্তস্যাষ্টৌ পুরীষস্য সপ্ত স্যুঃ শ্লেষ্মণশ্চ ষট্।
পিত্তস্য পঞ্চ চৎবারো মূত্রস্যাঞ্জলয়স্ত্রয়ঃ ॥ ৪৪॥
বসায়া মেদসো দ্বৌ তু মজ্জা ৎবঞ্জলিসংমিতা ।
অর্ধাঞ্জলি তথা শুক্রং তদেব বলমুচ্যতে ॥ ৪৫॥
অস্থ্নাং শরীরে সংখ্যা স্যাৎষষ্টিয়ুক্তং শতত্রয়ম্ ।
জলজানি কপালানি রুচকাস্তরণানি চ ।
নলকানীতি তান্যাহুঃ পঞ্চধাস্থীনি সূরয়ঃ ॥ ৪৬॥
দ্বে শতে ৎবস্থিসংধীনাং স্যাতাং তত্র দশোত্তরে ।
রৌরবাঃ প্রসরাঃ স্কন্দসেচনাঃ স্যুরুলূখলাঃ ॥ ৪৭॥
সমুদ্গা মণ্ডলাঃ শংখাবর্তা বামনকুণ্ডলাঃ ।
ইত্যষ্টধা সমুদ্দিষ্টাঃ শরীরেষ্বস্থিসংধয়ঃ ॥ ৪৮॥
সার্ধকোটিত্রয়ং রোম্ণাং শ্মশ্রুকেশাস্ত্রিলক্ষকাঃ ।
দেহস্বরূপমেবং তে প্রোক্তং দশরথাত্মজ ॥ ৪৯॥
যস্মাদসারো নাস্ত্যেব পদার্থো ভুবনত্রয়ে ।
দেহেঽস্মিন্নভিমানেন ন মহোপায়বুদ্ধয়ঃ ॥ ৫০॥
অহংকারেণ পাপেন ক্রিয়ন্তে হংত সাংপ্রতম্ ।
তস্মাদেতৎস্বরূপং তু বিবোদ্ধব্যং মুমুক্ষিভিঃ ॥ ৫১॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
দেহস্বরূপনির্ণয়ো নাম নবমোঽধ্যায়ঃ ॥ ৯ ॥
অথ দশমোঽধ্যায়ঃ ॥
শ্রীরাম উবাচ ॥
ভগবন্নত্র জীবোঽসৌ জন্তোর্দেহেঽবতিষ্ঠতে ।
জায়তে বা কুতো জীবঃ স্বরূপং চাস্য কিং বদ ॥ ১॥
দেহান্তে কুত্র বা যাতি গৎবা বা কুত্র তিষ্ঠতি ।
কথমায়াতি বা দেহং পুনর্নায়াতি বা বদ ॥ ২॥
শ্রীভগবানুবাচ ॥
সাধু পৃষ্টং মহাভাগ গুহ্যাদ্গুহ্যতরং হি যৎ ।
দেবৈরপি সুদুর্জ্ঞেয়মিন্দ্রাদ্যৈর্বা মহর্ষিভিঃ ॥ ৩॥
অন্যস্মৈ নৈব বক্তব্যং ময়াপি রঘুনন্দন ।
ৎবদ্ভক্ত্যাহং পরং প্রীতো বক্ষ্যাম্যবহিতঃ শ্রুণু ॥ ৪॥
সত্যজ্ঞানাত্মকোঽনন্তঃ পরমানন্দবিগ্রহঃ ।
পরমাত্মা পরংজ্যোতিরব্যক্তো ব্যক্তকারণম্ ॥ ৫॥
নিত্যো বিশুদ্ধঃ সর্বাত্মা নির্লেপোঽহং নিরঞ্জনঃ ।
সর্বধর্মবিহীনশ্চ ন গ্রাহ্যো মনসাপি চ ॥ ৬॥
নাহং সর্বেন্দ্রিয়গ্রাহ্যঃ সর্বেষাং গ্রাহকো হ্যহম্ ।
জ্ঞাতাহং সর্বলোকস্য মম জ্ঞাতা ন বিদ্যতে ॥ ৭॥
দূরঃ সর্ববিকারাণাং পরিণামাদিকস্য চ ॥ ৮॥
যতো বাচো নিবর্তন্তে অপ্রাপ্য মনসা সহ ।
আনন্দং ব্রহ্ম মাং জ্ঞাৎবা ন বিভেতি কুতশ্চন ॥ ৯॥
যস্তু সর্বাণি ভূতানি ময়্যেবেতি প্রপশ্যতি ।
মাং চ সর্বেষু ভূতেষু ততো ন বিজুগুপ্সতে ॥ ১০॥
যস্য সর্বাণি ভূতানি হ্যাত্মৈবাভূদ্বিজানতঃ ।
কো মোহস্তত্র কঃ শোক একৎবমনুপশ্যতঃ ॥ ১১॥
এষ সর্বেষু ভূতেষু গূঢাত্মা ন প্রকাশতে ।
দৃশ্যতে ৎবগ্র্যযা বুদ্ধ্যা সূক্ষ্ময়া সূক্ষ্মদর্শিভিঃ ॥ ১২॥
অনাদ্যবিদ্যযা যুক্তস্তথাপ্যেকোঽহমব্যযঃ ।
অব্যাকৃতব্রহ্মরূপো জগৎকর্তাহমীশ্বরঃ ॥ ১৩॥
জ্ঞানমাত্রে যথা দৃশ্যমিদং স্বপ্নে জগত্ত্রয়ম্ ।
তদ্বন্ময়ি জগৎসর্বং দৃশ্যতেঽস্তি বিলীয়তে ॥ ১৪॥
নানাবিদ্যাসমায়ুক্তো জীবৎবেন বসাম্যহম্ ।
পঞ্চ কর্মেন্দ্রিয়াণ্যেব পঞ্চ জ্ঞানেন্দ্রিয়াণি চ ॥ ১৫॥
মনো বুদ্ধিরহংকারশ্চিত্তং চেতি চতুষ্টয়ম্ ।
বায়বঃ পঞ্চমিলিতা যান্তি লিঙ্গশরীরতাম্ ॥ ১৬
তত্রাবিদ্যাসমায়ুক্তং চৈতন্যং প্রতিবিম্বিতম্ ।
ব্যাবহারিকজীবস্তু ক্ষেত্রজ্ঞঃ পুরুষোঽপি চ ॥ ১৭॥
স এব জগতাং ভোক্তানাদ্যযোঃ পুণ্যপাপয়োঃ ।
ইহামুত্র গতী তস্য জাগ্রৎস্বপ্নাদিভোক্তৃতা ॥ ১৮॥
যথা দর্পণকালিম্না মলিনং দৃশ্যতে মুখম্ ।
তদ্বদন্তঃকরণগৈর্দোষৈরাত্মাপি দৃশ্যতে ॥ ১৯॥
পরস্পরাধ্যাসবশাৎস্যাদন্তঃকরণাত্মনোঃ ॥
একীভাবাভিমানেন পরাত্মা দুঃখভাগিব॥ ২০॥
মরুভূমৌ জলৎবেন মধ্যাহ্নার্কমরীচিকাঃ ।
দৃশ্যন্তে মূঢচিত্তস্য ন হ্যার্দ্রাস্তাপকারকাঃ ॥ ২১॥
তদ্বদাত্মাপি নির্লেপো দৃশ্যতে মূঢচেতসাম্ ।
স্বাবিদ্যাত্মাত্মদোষেণ কর্তৃৎবাধিকধর্মবান্ ॥ ২২॥
তত্র চান্নময়ে পিণ্ডে হৃদি জীবোঽবতিষ্ঠতে ।
আনখাগ্রং ব্যাপ্য দেহং তদ্ব্রুবেঽবহিতঃ শ্রুণু ।
সোঽয়ং তদভিধানেন মাংসপিণ্ডো বিরাজতে ॥ ২৩॥
নাভেরূর্ধ্বমধঃ কণ্ঠাদ্ব্যাপ্য তিষ্ঠতি যঃ সদা ।
তস্য মধ্যেঽস্তি হৃদয়ং সনালং পদ্মকোশবৎ ॥ ২৪॥
অধোমুখং চ তত্রাস্তি সূক্ষ্মং সুষিরমুত্তমম্ ।
দহরাকাশমিত্যুক্তং তত্র জীবোঽবতিষ্ঠতে ॥ ২৫॥
বালাগ্রশতভাগস্য শতধা কল্পিতস্য চ ।
ভাগো জীবঃ স বিজ্ঞেয়ঃ স চানন্ত্যায় কল্পতে ॥ ২৬॥
কদম্বকুসুমোদ্বদ্ধকেসরা ইব সর্বতঃ ।
প্রসৃতা হৃদয়ান্নাড্যো যাভির্ব্যাপ্তং শরীরকম্ ॥ ২৭॥
হিতং বলং প্রয়চ্ছন্তি তস্মাত্তেন হিতাঃ স্মৃতাঃ ।
দ্বাসপ্ততিসহস্রৈস্তাঃ সংখ্যাতা যোগবিত্তমৈঃ ॥ ২৮॥
হৃদয়াত্তাস্তু নিষ্ক্রান্তা যথার্কাদ্রশ্ময়স্তথা ।
একোত্তরশতং তাসু মুখ্যা বিষ্বগ্বিনির্গতঃ ॥ ২৯॥
প্রতীন্দ্রিয়ং দশ দশ নির্গতা বিষয়োন্মুখাঃ ।
নাড্যঃ শর্মাদিহেতুৎবাৎ স্বপ্নাদিফলভুক্তয়ে ॥ ৩০॥
বহন্ত্যম্ভো যথা নদ্যো নাড্যঃ কর্মফলং তথা ।
অনন্তৈকোর্ধ্বগা নাডী মূর্ধপর্যন্তমঞ্জসা ॥ ৩১॥
সুষুম্নেতি মাদিষ্টা তয়া গচ্ছন্বিমুচ্যতে ।
তয়োপচিতচৈতন্যং জীবাত্মানং বিদুর্বুধাঃ ॥ ৩২॥
যথা রাহুরদৃশ্যোঽপি দৃশ্যতে চন্দ্রমণ্ডলে ।
তদ্বৎসর্বগতোঽপ্যাত্মা লিঙ্গদেহে হি দৃশ্যতে ॥ ৩৩॥
দৃশ্যমানে যথা কুংভে ঘটাকাশোঽপি দৃশ্যতে ।
তদ্বৎসর্বগতোঽপ্যাত্মা লিঙ্গদেহে হি দৃশ্যতে ॥ ৩৪॥
নিশ্চলঃ পরিপূর্ণোঽপি গচ্ছতীত্যুপচর্যতে ।
জাগ্রৎকালে যথাজ্ঞেয়মভিব্যক্তবিশেষধীঃ ॥ ৩৫॥
ব্যাপ্নোতি নিষ্ক্রিয়ঃ সর্বান্ ভানুর্দশ দিশো যথা ।
নাডীভির্বৃত্তয়ো যান্তি লিঙ্গদেহসমুদ্ভবাঃ ॥ ৩৬॥
তত্তৎকর্মানুসারেণ জাগ্রদ্ভোগোপলব্ধয়ে ।
ইদং লিঙ্গশরীরাখ্যমামোক্ষং ন বিনশ্যতি ॥ ৩৭॥
আত্মজ্ঞানেন নষ্টেঽস্মিন্সাবিদ্যে স্বশরীরকে ।
আত্মস্বরূপাবস্থানং মুক্তিরিত্যভিধীয়তে ॥ ৩৮॥
উৎপাদিতে ঘটে যদ্বদ্ঘটাকাশৎবমৃচ্ছতি ।
ঘটে নষ্টে যথাকাশঃ স্বরূপেণাবতিষ্ঠতে ॥ ৩৯॥
জাগ্রৎকর্মক্ষয়বশাৎস্বপ্নভোগ উপস্থিতে ।
বোধাবস্থাং তিরোধায় দেহাদ্যাশ্রয়লক্ষণাম্ ॥ ৪০॥
কর্মোদ্ভাবিতসংস্কারস্তত্র স্বপ্নরিরংসয়া ।
অবস্থাং চ প্রয়াত্যন্যাং মায়াবী চাত্মমায়যা ॥ ৪১॥
ঘটাদিবিষয়ান্সর্বান্বুদ্ধ্যাদিকরণানি চ ।
ভূতানি কর্মবশতো বাসনামাত্রসংস্থিতান্ ॥ ৪২॥
এতান্ পশ্যন্ স্বয়ংজ্যোতিঃ সাক্ষ্যাত্মা ব্যবতিষ্ঠতে ॥ ৪৩॥
অত্রান্তঃকরণাদীনাং বাসনাদ্বাসনাত্মতা ।
বাসনামাত্রসাক্ষিৎবং তেন তচ্চ পরাত্মনঃ ॥ ৪৪॥
বাসনাভিঃ প্রপঞ্চোঽত্র দৃশ্যতে কর্মচোদিতঃ ।
জাগ্রদ্ভূমৌ যথা তদ্বৎকর্তৃকর্মক্রিয়াত্মকঃ ॥ ৪৫॥
নিঃশেষবুদ্ধিসাক্ষ্যাত্মা স্বয়মেব প্রকাশতে ।
বাসনামাত্রসাক্ষিৎবং সাক্ষিণঃ স্বাপ উচ্যতে ॥ ৪৬॥
ভূতজন্মনি যদ্ভূতং কর্ম তদ্বাসনাবশাৎ ।
নেদীয়স্ত্বাদ্বয়স্যাদ্যে স্বপ্নং প্রায়ঃ প্রপশ্যতি ॥ ৪৭॥
মধ্যে বয়সি কার্কশ্যাৎকরণানামিহার্জিতঃ ।
বীক্ষতে প্রায়শঃ স্বপ্নং বাসনাকর্মণোর্বশাৎ ॥ ৪৮॥
ইয়াসুঃ পরলোকং তু কর্মবিদ্যাদিসংভৃতম্ ।
ভাবিনো জন্মনো রূপং স্বপ্ন আত্মা প্রপশ্যতি ॥ ৪৯॥
যদ্বৎপ্রপতনাচ্ছ্যেনঃ শ্রান্তো গগনমণ্ডলে ।
আকুঞ্চ্য পক্ষৌ যততে নীডে নিলয়নায়নীঃ ॥ ৫০॥
এবং জাগ্রৎস্বপ্নভূমৌ শ্রান্ত আত্মাভিসংচরন্ ।
আপীতকরণগ্রামঃ কারণেনৈতি চৈকতাম্ ॥ ৫১॥
নাডীমার্গৈরিন্দ্রিয়াণামাকৃষ্যাদায় বাসনাঃ ।
সর্বং গ্রসিৎবা কার্যং চ বিজ্ঞানাত্মা বিলীয়তে ॥ ৫২॥
ঈশ্বারাখ্যেঽব্যাকৃতেঽথ যথা সুখময়ো ভবেৎ ।
কৃৎস্নপ্রপঞ্চবিলয়স্তথা ভবতি চাত্মনঃ ॥ ৫৩॥
যোষিতঃ কাম্যমানায়াঃ সংভোগান্তে যথা সুখম্ ।
স আনন্দময়োঽবাহ্যো নান্তরঃ কেবলস্তথা ॥ ৫৪॥
প্রাজ্ঞাত্মানং সমাসাদ্য বিজ্ঞানাত্মা তথৈব সঃ ।
বিজ্ঞানাত্মা কারণাত্মা তথা তিষ্ঠংস্তথাপি সঃ ॥ ৫৫॥
অবিদ্যাসূক্ষ্মবৃত্ত্যানুভবত্যেব সুখং যথা ।
তথাহং সুখমস্বাপ্সং নৈব কিঞ্চিদবেদিষম্।৫৬॥
অজ্ঞানমপি সাক্ষ্যাদি বৃত্তিভিশ্চানুভূয়তে ।
ইত্যেবং প্রত্যভিজ্ঞাপি পশ্চাত্তস্যোপজায়তে ॥ ৫৭॥
জাগ্রৎস্বপ্নসুষুপ্ত্যাখ্যমেবেহামুত্র লোকয়োঃ ।
পশ্চাৎকর্মবশাদেব বিস্ফুলিঙ্গা যথানলাৎ ।
জায়ন্তে কারণাদেব মনোবুদ্ধ্যাদিকানি তু ॥ ৫৮॥
পয়ঃপূর্ণো ঘটো যদ্বন্নিমগ্নঃ সলিলাশয়ে ।
তৈরেবিদ্ধত আয়াতি বিজ্ঞানাত্মা তথৈত্যজাৎ ॥ ৫৯॥
বিজ্ঞানাত্মা কারণাত্মা তথা তিষ্ঠংস্তথাপি সঃ ।
দৃশ্যতে সৎসু তেষ্বেব নষ্টেষ্বায়াত্যদৃশ্যতাম্ ॥ ৬০॥
একাকারোঽর্যমা তত্তৎকার্যেষ্বিব পরঃ পুমান্ ।
কূটস্থো দৃশ্যতে তদ্বদ্গচ্ছত্যাগচ্ছতীব সঃ॥ ৬১॥
মোহমাত্রান্তরায়ৎবাৎসর্বং তস্যোপপদ্যতে ।
দেহাদ্যতীত আত্মাপি স্বয়ংজ্যোতিঃ স্বভাবতঃ ॥ ৬২॥
এবং জীবস্বরূপং তে প্রোক্তং দশরথাত্মজ ॥ ৬৩॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
জীবস্বরূপকথনং নাম দশমোঽধ্যায়ঃ ॥ ১০ ॥
অথ একাদশোঽধ্যায়ঃ ॥
শ্রীভগবানুবাচ ॥
দেহান্তরগতিং তস্য পরলোকগতিং তথা ।
বক্ষ্যামি নৃপশার্দূল মত্তঃ শৃণু সমাহিতঃ ॥ ১॥
ভুক্তং পীতং যদস্ত্যত্র তদ্রসাদামবন্ধনম্ ।
স্থূলদেহস্য লিঙ্গস্য তেন জীবনধারণম্ ॥ ২॥
ব্যাধিনা জরয়া বাপি পীড্যতে জাঠরোঽনলঃ ।
শ্লেষ্মণা তেন ভুক্তান্নং পীতং বা ন পচত্যলম্ ॥ ৩॥
ভুক্তপীতরসাভাবাদাশু শুষ্যন্তি ধাতবঃ ।
ভুক্তপীতরসেনৈব দেহং লিম্পন্তি বায়বঃ ॥ ৪॥
সমীকরোতি যস্মাত্তৎসমানো বায়ুরুচ্যতে ।
তদানীং তদ্রসাভাবাদামবন্ধনহানিতঃ ॥ ৫॥
পরিপক্বরসৎবেন যথা গৌরবতঃ ফলম্ ।
স্বয়মেব পতত্যাশু তথা লিঙ্গং তনোর্ব্রজেৎ ॥ ৬॥
তত্তৎস্থানাদপাকৃষ্য হৃষীকাণাং চ বাসনাঃ ।
আধ্যাত্মিকাধিভূতানি হৃৎপদ্মে চৈকতাং গতঃ ॥ ৭॥
তদোর্ধ্বগঃ প্রাণবায়ুঃ সংয়ুক্তো নববায়ুভিঃ ।
ঊর্ধ্বোচ্ছ্বাসী ভবত্যেষ তথা তেনৈকতং গতঃ ॥ ৮॥
চক্ষুষো বাথ মূর্ধ্নো বা নাডীমার্গং সমাশ্রিতঃ ।
বিদ্যাকর্মসমায়ুক্তো বাসনাভিশ্চ সংয়ুতঃ।
প্রাজ্ঞাত্মানং সমাশ্রিত্য বিজ্ঞানাত্মোপসর্পতি ॥ ৯॥
যথা কুম্ভো নীয়মানো দেশাদ্দেশান্তরং প্রতি ।
খপূর্ণ এব সর্বত্র স সাকাশোঽপি তত্র তু ॥ ১০॥
ঘটাকাশাখ্যতাং যাতি তদ্বল্লিঙ্গং পরাত্মনঃ ॥ ১১॥
পুনর্দেহান্তরং যাতি যথা কর্মানুসারতঃ ।
আমোক্ষাৎসংচরেত্যেবং মৎস্যঃ কূলদ্বয়ং যথা ॥ ১২॥
পাপভোগায় চেদ্গচ্ছেদ্যমদূতৈরধিষ্ঠিতঃ ।
যাতনাদেহমাশ্রিত্য নরকানেব কেবলম্ ॥ ১৩॥
ইষ্টাপূর্তাদিকর্মাণি যোঽনুতিষ্ঠতি সর্বদা ।
পিতৃলোকং ব্রজত্যেষ ধূমমাশ্রিত্য বর্হিষঃ ॥ ১৪॥
ধূমাদ্রাত্রিং ততঃ কৃষ্ণপক্ষং তস্মাচ্চ দক্ষিণম্ ।
অয়নং চ ততো লোকং পিতৄণাং চ ততঃ পরম্ ।
চন্দ্রলোকে দিব্যদেহং প্রাপ্য ভুঙ্ক্তে পরাং শ্রিয়ম্ ॥ ১৫॥
তত্র চন্দ্রমসা সোঽসৌ যাবৎকর্মফলং বসেৎ ।
তথৈব কর্মশেষেণ যথেতং পুনরাব্রজেৎ ॥ ১৬॥
বপুর্বিহায় জীবৎবমাসাদ্যাকাশমেতি সঃ ।
আকাশাদ্বায়ুমাগত্য বায়োরম্ভো ব্রজত্যথ ॥ ১৭॥
অদ্ভ্যো মেঘং সমাসাদ্য ততো বৃষ্টির্ভবেদসৌ ।
ততো ধান্যানি ভক্ষ্যাণি জায়তে কর্মচোদিতঃ ॥ ১৮॥
যোনিমন্যে প্রপদ্যন্তে শরীরৎবায় দেহিনঃ ।
মুক্তিমন্যেঽনুসংয়ান্তি যথাকর্ম যথাশ্রুতম্ ॥ ১৯॥
ততোঽন্নৎবং সমাসাদ্য পিতৃভ্যাং ভুজ্যতে পরম্ ।
ততঃ শুক্রং রজশ্চৈব ভূৎবা গর্ভোঽভিজায়তে ॥ ২০॥
ততঃ কর্মানুসারেণ ভবেৎস্ত্রীপুংনপুংসকঃ ।
এবং জীবগতিঃ প্রোক্তা মুক্তিং তস্য বদামি তে ॥ ২১॥
যস্তু শান্ত্যাদিয়ুক্তঃ সন্সদা বিদ্যারতো ভবেৎ ।
স যাতি দেবয়ানেন ব্রহ্মলোকাবধিং নরঃ ॥ ২২॥
অর্চির্ভূৎবা দিনং প্রাপ্য শুক্লপক্ষমথো ব্রজেৎ ।
উত্তরায়ণমাসাদ্য সংবৎসরমথো ব্রজেৎ ॥ ২৩॥
আদিত্যচন্দ্রলোকৌ তু বিদ্যুল্লোকমতঃ পরম্ ।
অথ দিব্যঃ পুমান্কশ্চিদ্ব্রহ্মলোকাদিহৈতি সঃ ॥ ২৪॥
দিব্যে বপুষি সংধায় জীবমেবং নয়ত্যসৌ ॥ ২৫॥
ব্রহ্মলোকে দিব্যদেহে ভুক্ত্বা ভোগান্যথেপ্সিতান্ ।
তত্রোষিৎবা চিরং কালং ব্রহ্মণা সহ মুচ্যতে ॥ ২৬॥
শুদ্ধব্রহ্মরতো যস্তু ন স যাত্যেব কুত্রচিৎ ।
তস্য প্রাণা বিলীয়ন্তে জলে সৈন্ধবখিল্যবৎ ॥ ২৭॥
স্বপ্নদৃষ্টা যথা স্র়িষ্টিঃ প্রবুদ্ধস্য বিলীয়তে ।
ব্রহ্মজ্ঞানবতস্তদ্বদ্বিলীয়ন্তে তদৈব তে ।
বিদ্যাকর্মবিহীনো যস্তৃতীয়ং স্থানমেতি সঃ ॥ ২৮।
ভুক্ত্বা চ নরকান্ঘোরান্মহারৌরবরৌরবান্ ।
পশ্চাৎপ্রাক্তনশেষেণ ক্ষুদ্রজন্তুর্ভবেদসৌ ॥ ২৯॥
যূকামশকদংশাদি জন্মাসৌ লভতে ভুবি ।
এবং জীবগতিঃ প্রোক্তা কিমন্যচ্ছ্রোতুমিচ্ছসি ॥ ৩০॥
শ্রীরাম উবাচ ॥
ভগবন্যত্ত্বয়া প্রোক্তং ফলং তজ্জ্ঞানকর্মণোঃ ।
ব্রহ্মলোকে চংদ্রলোকে ভুঙ্ক্তে ভোগানিতি প্রভো ॥ ৩১॥
গন্ধর্বাদিষু লোকেষু কথং ভোগঃ সমীরিতঃ ।
দেবৎবং প্রাপ্নুয়াৎকশ্চিৎকশ্চিদিন্দ্রৎবমেতি চ ॥ ৩২॥
এতৎকর্মফলং বাস্তু বিদ্যাফলমথাপি বা ।
তদ্ব্রূহি গিরিজাকান্ত তত্র মে সংশয়ো মহান্ ॥ ৩৩॥
শ্রীভগবানুবাচ ॥
তদ্বিদ্যাকর্মণোরেবানুসারেণ ফলং ভবেৎ ।
যুবা চ সুন্দরঃ শূরো নীরোগো বলবান্ ভবেৎ ॥ ৩৪॥
সপ্তদ্বীপাং বসুমতীং ভুঙ্ক্তে নিষ্কণ্টকং যদি ।
স প্রোক্তো মানুষানন্দস্তস্মাচ্ছতগুণো মতঃ ॥ ৩৫॥
মনুষ্যস্তপসা যুক্তো গন্ধর্বো জায়তেঽস্য তু ।
তস্মাচ্ছতগুণো দেবগন্ধর্বাণাং ন সংশয়ঃ ॥ ৩৬॥
এবং শতগুণানন্দ উত্তরোত্তরতো ভবেৎ ।
পিতৄণাং চিরলোকানামাজানসুরসম্পদাম্ ॥ ৩৭॥
দেবতানামথেন্দ্রস্য গুরোস্তদ্বৎপ্রজাপতেঃ ।
ব্রহ্মণশ্চৈবমানন্দঃ পুরস্তাদুত্তরোত্তরঃ ॥ ৩৮॥
জ্ঞানাধিক্যাৎসুখাধিক্যং নান্যদস্তি সুরালয়ে ।
শ্রোত্রিয়োঽবৃজিনোঽকামহতো যশ্চ দ্বিজো ভবেৎ ॥ ৩৯॥
তস্যাপ্যেবং সমাখ্যাতা আনন্দাশ্চোত্তরোত্তরম্ ।
আত্মজ্ঞানাৎপরং নাস্তি তস্মাদ্দশরথাত্মজ ॥ ৪০॥
ব্রাহ্মণঃ কর্মভির্নৈব বর্ধতে নৈব হীয়তে ।
ন লিপ্যতে পাতকেন কর্মণা জ্ঞানবান্যদি ॥ ৪১॥
তস্মাৎসর্বাধিকো বিভো জ্ঞানবানেব জায়তে ।
জ্ঞাৎবা যঃ কুরুতে কর্ম তস্যাক্ষয়্যফলং লভেৎ ॥ ৪২॥
যৎফলং লভতে মর্ত্যঃ কোটিব্রাহ্মণভোজনৈঃ ।
তৎফলং সমবাপ্নোতি জ্ঞানিনং যস্তু ভোজয়েৎ ॥ ৪৩॥
জ্ঞানবন্তং দ্বিজং যস্তু দ্বিষতে চ নরাধমঃ ।
স শুষ্যমাণো ম্রিয়তে যস্মাদীশ্বর এব সঃ ॥ ৪৪॥
উপাসকো ন যাত্যেব যস্মাৎপুনরধোগতিম্ ।
উপাসনরতো ভূৎবা তস্মাদাস্স্ব সুখী নৃপ ॥ ৪৫॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
জীবগত্যাদিনিরূপণং নামৈকাদশোঽধ্যায়ঃ ॥ ১১ ॥
অথ দ্বাদশোঽধ্যায়ঃ ॥
শ্রীরাম উবাচ ॥
ভগবন্দেবদেবেশ নমস্তেঽস্তু মহেশ্বর ।
উপাসনবিধিং ব্রূহি দেশং কালং চ তস্য তু ॥ ১॥
অঙ্গানি নিয়মাংশ্চৈব ময়ি তেঽনুগ্রহো যদি ॥
ঈশ্বর উবাচ ॥
শৃণু রাম প্রবক্ষ্যামি দেশং কালমুপাসনে ॥ ২॥
সর্বাকারোঽহমেবৈকঃ সচ্চিদানন্দবিগ্রহঃ ।
মদংশেন পরিচ্ছিন্না দেহাঃ সর্বদিবৌকসাম্ ॥ ৩॥
যে ৎবন্যদেবতাভক্তা যজন্তে শ্রদ্ধয়ান্বিতাঃ ।
তেঽপি মামেব রাজেন্দ্র যজন্ত্যবিধিপূর্বকম্ ॥ ৪॥
যস্মাৎসর্বমিদং বিশ্বং মত্তো ন ব্যতিরিচ্যতে ।
সর্বক্রিয়াণাং ভোক্তাহং সর্বস্যাহং ফলপ্রদঃ ॥ ৫॥
যেনাকারেণ যে মর্ত্যা মামেবৈকমুপাসতে ।
তেনাকারেণ তেভ্যোঽহং প্রসন্নো বাঞ্ছিতং দদে ॥ ৬॥
বিধিনাঽবিধিনা বাপি ভক্ত্যা যে মামুপাসতে ।
তেভ্যঃ ফলং প্রয়চ্ছামি প্রসন্নোঽহং ন সংশয়ঃ ॥ ৭॥
অপি চেৎসুদুরাচারো ভজতে মামনন্যভাক্ ।
সাধুরেব স মন্তব্যঃ সম্যগ্ব্যবসিতো হি সঃ ॥ ৮॥
স্বজীবৎবেন যো বেত্তি মামেবৈকমনন্যধীঃ ।
তং ন স্পৃশন্তি পাপানি ব্রহ্মহত্যাদিকান্যপি ॥ ৯॥
উপাসাবিধয়স্তত্র চৎবারঃ পরিকীর্তিতাঃ ।
সম্পদারোপসংবর্গাধ্যাসা ইতি মনীষিভিঃ ॥ ১০॥
অল্পস্য চাধিকৎবেন গুণয়োগাদ্বিচিন্তনম্ ।
অনন্তং বৈ মন ইতি সম্পদ্বিধিরুদীরিতঃ ॥ ১১॥
বিধাবারোপ্য যোপাসা সারোপঃ পরিকীর্তিতঃ ।
যদ্বদোঙ্কারমুদ্গীথমুপাসীতেত্যুদাহৃতঃ ॥ ১২॥
আরোপো বুদ্ধিপূর্বেণ য উপাসাবিধিশ্চ সঃ ।
যোষিত্যগ্নিমতির্যত্তদধ্যাসঃ স উদাহৃতঃ ॥ ১৩॥
ক্রিয়ায়োগেন চোপাসাবিধিঃ সংবর্গ উচ্যতে ।
সংবর্তবায়ুঃ প্রলয়ে ভূতান্যেকোঽবসীদতি ॥ ১৪॥
উপসংগম্য বুদ্ধ্যা যদাসনং দেবতাত্মনা ।
তদুপাসনমন্তঃ স্যাত্তদ্বহিঃ সম্পদাদয়ঃ ॥ ১৫॥
জ্ঞানান্তরানন্তরিতসজাতিজ্ঞানসংহতেঃ ।
সম্পন্নদেবতাত্মৎবমুপাসনমুদীরিতম্ ॥ ১৬॥
সম্পদাদিষু বাহ্যেষু দৃঢবুদ্ধিরুপাসনম্ ।
কর্মকালে তদঙ্গেষু দৃষ্টিমাত্রমুপাসনম্ ।
উপাসনমিতি প্রোক্তং তদঙ্গানি ব্রুবে শৃণু ॥ ১৭॥
তীর্থক্ষেত্রাদিগমনং শ্রদ্ধাং তত্র পরিত্যজেৎ ।
স্বচিত্তৈকাগ্রতা যত্র তত্রাসীত সুখং দ্বিজঃ ॥ ১৮॥
কম্বলে মৃদুতল্পে বা ব্যাঘ্রচর্মণি বাস্থিতঃ ।
বিবিক্তদেশে নিয়তঃ সমগ্রীবশিরস্তনুঃ ॥ ১৯॥
অত্যাশ্রমস্থঃ সকলানীন্দ্রিয়াণি নিরুধ্য চ ।
ভক্ত্যাথ স্বগুরুং নৎবা যোগং বিদ্বান্প্রয়োজয়েৎ ॥ ২০॥
যস্ত্ববিজ্ঞানবান্ভবত্যযুক্তমনসা সদা ।
তস্যেন্দ্রিয়াণ্যবশ্যানি দুষ্টাশ্বাইব সারথেঃ ॥ ২১॥
বিজ্ঞানী যস্তু ভবতি যুক্তেন মনসা সদা ।
তস্যেন্দ্রিয়াণি বশ্যানি সদশ্বা ইব সারথেঃ ॥ ২২॥
যস্ত্ববিজ্ঞানবান্ ভবত্যমনস্কঃ সদাঽশুচিঃ ।
ন স তৎপদমাপ্নোতি সংসারমধিগচ্ছতি ॥ ২৩॥
বিজ্ঞানী যস্তু ভবতি সমনস্কঃ সদা শুচিঃ ।
স তৎপদমবাপ্নোতি যস্মাদ্ভূয়ো ন জায়তে ॥ ২৪॥
বিজ্ঞানসারথির্যস্তু মনঃ প্রগ্রহ এব চ ।
সোঽধ্বনঃ পারমাপ্নোতি মমৈব পরমং পদম্ ॥ ২৫॥
হৃৎপুণ্ডরীকং বিরজং বিশুদ্ধং বিশদং তথা ।
বিশোকং চ বিচিন্ত্যাত্র ধ্যায়েন্মাং পরমেশ্বরম্ ॥ ২৬॥
অচিন্ত্যরূপমব্যক্তমনন্তমমৃতং শিবম্ ।
আদিমধ্যান্তরহিতং প্রশান্তং ব্রহ্ম কারণম্ ॥ ২৭॥
একং বিভুং চিদানন্দমরূপমজমদ্ভুতম্ ।
শুদ্ধস্ফটিকসংকাশমুমাদেহার্ধধারিণম্ ॥ ২৮॥
ব্যাঘ্রচর্মাম্বরধরং নীলকণ্ঠং ত্রিলোচনম্ ।
জটাধরং চন্দ্রমৌলিং নাগয়জ্ঞোপবীতিনম্ ॥ ২৯॥
ব্যাঘ্রচর্মোত্তরীয়ং চ বরেণ্যমভয়প্রদম্ ।
পরাভ্যামূর্ধ্বহস্তাভ্যাং বিভ্রাণং পরশুং মৃগম্ ॥ ৩০॥
কোটিমধ্যাহ্নসূর্যাভং চন্দ্রকোটিসুশীতলম্ ।
চন্দ্রসূর্যাগ্নিনয়নং স্মেরবক্ত্রসরোরুহম্ ॥ ৩১॥
ভূতিভূষিতসর্বাঙ্গং সর্বাভরণভূষিতম্ ।
এবমাত্মারণিং কৃৎবা প্রণবং চোত্তরারণিম্ ।
ধ্যাননির্মথনাভ্যাসাৎসাক্ষাৎপশ্যতি মাং জনঃ ॥ ৩২॥
বেদবাক্যৈরলভ্যোঽহং ন শাস্ত্রৈর্নাপি চেতসা ।
ধ্যানেন বৃণুতে যো মাং সর্বদাহং বৃণোমি তম্ ॥ ৩৩॥
নাবিরতো দুশ্চরিতান্নাশান্তো নাসমাহিতঃ ।
নাশান্তমানসো বাপি প্রজ্ঞানেন লভেত মাম্ ॥ ৩৪॥
জাগ্রৎস্বপ্নসুষুপ্ত্যাদিপ্রপঞ্চো যঃ প্রকাশতে ।
তদ্ব্রহ্মাহমিতি জ্ঞাৎবা সর্ববন্ধৈঃ প্রমুচ্যতে ॥ ৩৫॥
ত্রিষু ধামসু যদ্ভোগ্যং ভোক্তা ভোগশ্চ যদ্ভবেৎ ।
তজ্জ্যোতির্লক্ষণঃ সাক্ষী চিন্মাত্রোঽহং সদাশিবঃ ॥ ৩৬॥
একো দেবঃ সর্বভূতেষু গূঢঃ
সর্বব্যাপী সর্বভূতান্তরাত্মা ।
সর্বাধ্যক্ষঃ সর্বভূতাধিবাসঃ
সাক্ষী চেতা কেবলো নির্গুণশ্চ ॥ ৩৭
একো বশী সর্বভূতান্তরাত্মা-
প্যেকং বীজং নিত্যদা যঃ করোতি ।
তং মাং নিত্যং যেঽনুপশ্যন্তি ধীরা-
স্তেষাং শান্তিঃ শাশ্বতী নেতরেষাম্ ॥ ৩৮॥
অগ্নির্যথৈকো ভুবনং প্রবিষ্টো
রূপং রূপং প্রতিরূপো বভূব ।
একস্তথা সর্বভূতান্তরাত্মা
ন লিপ্যতে লোকদুঃখেন বাহ্যঃ ॥ ৩৯॥
বেদেহ যো মাং পুরুষং মহান্ত-
মাদিত্যবর্ণং তমসঃ পরস্তাৎ ।
স এব বিদ্বানমৃতোঽত্র ভূয়া-
ন্নান্যস্তু পন্থা অয়নায় বিদ্যতে ॥ ৪০॥
হিরণ্যগর্ভং বিদধামি পূর্বং
বেদাংশ্চ তস্মৈ প্রহিণোমি যোঽহম্ ।
তং দেবমীড্যং পুরুষং পুরাণং
নিশ্চিত্য মাং মৃত্যুমুখাৎপ্রমুচ্যতে ॥ ৪১॥
এবং শান্ত্যাদিয়ুক্তঃ সন্ বেত্তি মাং তত্ত্বতস্তু যঃ ।
নির্মুক্তদুঃখসংতানঃ সোঽন্তে ময়্যেব লীয়তে ॥ ৪২॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
উপাসনাজ্ঞানফলং নাম দ্বাদশোঽধ্যায়ঃ ॥ ১২ ॥
অথ ত্রয়োদশোঽধ্যায়ঃ ।
সূত উবাচ ॥
এবং শ্রুৎবা কৌসলেয়স্তুষ্টো মতিমতাং বরঃ ।
পপ্রচ্ছ গিরিজাকান্তং সুভগং মুক্তিলক্ষণম্ ॥ ১॥
শ্রীরাম উবাচ ॥
ভগবন্করুণাবিষ্টহৃদয় ৎবং প্রসীদ মে ।
স্বরূপলক্ষণং মুক্তেঃ প্রব্রূহি পরমেশ্বর ॥ ২॥
শ্রীভগবানুবাচ ॥
সালোক্যমপি সারূপ্যং সার্ষ্ট্যং সায়ুজ্যমেব চ ।
কৈবল্যং চেতি তাং বিদ্ধি মুক্তিং রাঘব পঞ্চধা ॥ ৩॥
মাং পূজয়তি নিষ্কামঃ সর্বদা জ্ঞানবর্জিতঃ ।
স মে লোকং সমাসাদ্য ভুঙ্ক্তে ভোগান্যথেপ্সিতান্ ॥ ৪॥
জ্ঞাৎবা মাং পূজয়েদ্যস্তু সর্বকামবিবর্জিতঃ ।
ময়া সমানরূপঃ সন্মম লোকে মহীয়তে ॥ ৫॥
ইষ্টাপূর্তাদি কর্মাণি মৎপ্রীত্যৈ কুরুতে তু যঃ ।
যৎকরোতি যদশ্নাতি যজ্জুহোতি দদাতি যৎ ॥ ৬॥
যত্তপস্যতি তৎসর্বং যঃ করোতি মদর্পণম্ ।
মল্লোকে স শ্রিয়ং ভুঙ্ক্তে মত্তুল্যং প্রাভবং ভজেৎ ॥ ৭॥
যস্তু শান্ত্যাদিয়ুক্তঃ সন্মামাত্মৎবেন পশ্যতি ।
স জায়তে পরং জ্যোতিরদ্বৈতং ব্রহ্ম কেবলম্ ।
আত্মস্বরূপাবস্থানং মুক্তিরিত্যভিধীয়তে ॥ ৮॥
সত্যং জ্ঞানমনন্তং সদানন্দং ব্রহ্মকেবলম্ ।
সর্বধর্মবিহীনং চ মনোবাচামগোচরম্ ॥ ৯॥
সজাতীয়বিজাতীয়পদার্থানামসংভবাৎ ।
অতস্তদ্ব্যতিরিক্তানামদ্বৈতমিতি সংজ্ঞিতম্ ॥ ১০॥
মৎবা রূপমিদং রাম শুদ্ধং যদভিধীয়তে ।
ময়্যেব দৃশ্যতে সর্বং জগৎস্থাবরজঙ্গমম্ ॥ ১১॥
ব্যোম্নি গন্ধর্বনগরং যথা দৃষ্টং ন দৃশ্যতে ।
অনাদ্যবিদ্যযা বিশ্বং সর্বং ময়্যেব কল্প্যতে ॥ ১২॥
মম স্বরূপজ্ঞানেন যদাঽবিদ্যা প্রণশ্যতি ।
তদৈক এব বর্ত্তেঽহং মনোবাচামগোচরঃ ॥ ১৩॥
সদৈব পরমানন্দঃ স্বপ্রকাশশ্চিদাত্মকঃ।
ন কালঃ পঞ্চভূতানি ন দিশো বিদিশশ্চ ন ॥ ১৪॥
মদন্যন্নাস্তি যৎকিঞ্চিত্তদা বর্ত্তেঽহমেকলঃ ॥ ১৫॥
ন সংদৃশে তিষ্ঠতি মে স্বরূপং
ন চক্ষুষা পশ্যতি মাং তু কশ্চিৎ ।
হৃদা মনীষা মনসাভিক্লৃপ্তং
যে মাং বিদুস্তে হ্যমৃতা ভবন্তি ॥ ১৬॥
শ্রীরাম উবাচ ॥
কথং ভগবতো জ্ঞানং শুদ্ধং মর্ত্যস্য জায়তে ।
তত্রোপায়ং হর ব্রূহি ময়ি তেঽনুগ্রহো যদি ॥ ১৭॥
শ্রীভগবানুবাচ ॥
বিরজ্য সর্বভূয়েভ্য আবিরিংচিপদাদপি ।
ঘৃণাং বিতত্য সর্বত্র পুত্রমিত্রাদিকেষ্বপি ॥ ১৮॥
শ্রদ্ধালুর্ভক্তিমার্গেষু বেদান্তজ্ঞানলিপ্সয়া ।
উপায়নকরো ভূৎবা গুরুং ব্রহ্মবিদং ব্রজেৎ ॥ ১৯॥
সেবাভিঃ পরিতোষ্যৈনং চিরকালং সমাহিতঃ ।
সর্ববেদান্তবাক্যার্থং শৃণুয়াৎসুসমাহিতঃ ॥ ২০॥
সর্ববেদান্তবাক্যানাং ময়ি তাৎপর্যনিশ্চয়ম্ ।
শ্রবণং নাম তৎপ্রাহুঃ সর্বে তে ব্রহ্মবাদিনঃ ॥ ২১॥
লোহমণ্যাদিদৃষ্টান্তয়ুক্তিভির্যদ্বিচিন্তনম্ ।
তদেব মননং প্রাহুর্বাক্যার্থস্যোপবৃংহণম্ ॥ ২২॥
নির্মমো নিরহংকারঃ সমঃ সংগবর্জিতঃ।
সদা শান্ত্যাদিয়ুক্তঃ সন্নাত্মন্যাত্মানমীক্ষতে ॥ ২৩॥
যৎসদা ধ্যানয়োগেন তন্নিদিধ্যাসনং স্মৃতম্ ॥ ২৪॥
সর্বকর্মক্ষয়বশাৎসাক্ষাৎকারোঽপি চাত্মনঃ ।
কস্যচিজ্জায়তে শীঘ্রং চিরকালেন কস্যচিৎ ॥ ২৫॥
কূটস্থানীহ কর্মাণি কোটিজন্মার্জিতান্যপি ।
জ্ঞানেনৈব বিনশ্যন্তি ন তু কর্মায়ুতৈরপি ॥ ২৬॥
জ্ঞানাদূর্ধ্বং তু যৎকিঞ্চিৎপুণ্যং বা পাপমেব বা ।
ক্রিয়তে বহু বাল্পং বা ন তেনায়ং বিলিপ্যতে ॥ ২৭॥
শরীরারম্ভকং যত্তু প্রারব্ধং কর্ম জন্মিনঃ ।
তদ্ভোগেনৈব নষ্টং স্যান্ন তু জ্ঞানেন নশ্যতি ॥ ২৮॥
নির্মোহো নিরহংকারো নির্লেপঃ সংগবর্জিতঃ ।
সর্বভূতেষু চাত্মানং সর্বভূতানি চাত্মনি ।
যঃ পশ্যন্সংচরত্যেষ জীবন্মুক্তোঽভিধীয়তে ॥ ২৯॥
অহিনির্ল্বয়নী যদ্বদ্দ্রষ্টুঃ পূর্বং ভয়প্রদা ।
ততোঽস্য ন ভয়ং কিংচিত্তদ্বদ্দ্রষ্টুরয়ং জনঃ ॥ ৩০॥
যদা সর্বে প্রমুচ্যন্তে কামা যেঽস্য বশং গতাঃ ।
অথ মর্ত্যোঽমৃতো ভবত্যেতাবদনুশাসনম্ ॥ ৩১॥
মোক্ষস্য ন হি বাসোঽস্তি ন গ্রামান্তরমেব বা ।
অজ্ঞানহৃদয়গ্রন্থিনাশো মোক্ষ ইতি স্মৃতঃ ॥ ৩২॥
বৃক্ষাগ্রচ্যুতপাদো যঃ স তদৈব পতত্যধঃ ।
তদ্বজ্জ্ঞানবতো মুক্তির্জায়তে নিশ্চিতাপি তু ॥ ৩৩॥
তীর্থং চাণ্ডালগেহে বা যদি বা নষ্টচেতনঃ ।
পএরিত্যজন্দেহমিমং জ্ঞানাদেব বিমুচ্যতে ॥ ৩৪॥
সংবীতো যেন কেনাশ্নন্ভক্ষ্যং বাভক্ষ্যমেব বা ।
শয়ানো যত্র কুত্রাপি সর্বাত্মা মুচ্যতেঽত্র সঃ ॥ ৩৫॥
ক্ষীরাদুদ্ধৃতমাজ্যং তৎক্ষিপ্তং পয়সি তৎপুনঃ ।
ন তেনৈবৈকতাং যাতি সংসারে জ্ঞানবাংস্তথা ॥ ৩৬॥
নিত্যং পঠতি যোঽধ্যায়মিমং রাম শৃণোতি বা ।
স মুচ্যতে দেহবন্ধাদনায়াসেন রাঘব ॥ ৩৭॥
অতঃ সংয়তচিত্তস্ত্বং নিত্যং পঠ মহীপতে ।
অনায়াসেন তেনৈব সর্বথা মোক্ষমাপ্স্যসি ॥ ৩৮॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
মোক্ষয়োগো নাম ত্রয়োদশোঽধ্যায়ঃ ॥ ১৩ ॥
অথ চতুর্দশোঽধ্যায়ঃ ॥
শ্রীরাম উবাচ ॥
ভগবন্যদি তে রূপং সচ্চিদানন্দবিগ্রহম্ ।
নিষ্কলং নিষ্ক্রিয়ং শান্তং নিরবদ্যং নিরঞ্জনম্ ॥ ১॥
সর্বধর্মবিহীনং চ মনোবাচামগোচরম্ ।
সর্বব্যাপিতয়াত্মানমীক্ষতে সর্বতঃ স্থিতম্ ॥ ২॥
আত্মবিদ্যাতপোমূলং তদ্ব্রহ্মোপনিষৎপরম্ ।
অমূর্তং সর্বভূতাত্মাকারং কারণকারণম্ ॥ ৩॥
যত্তদদৃশ্যমগ্রাহ্যং তদ্গ্রাহ্যং বা কথং ভবেৎ ।
অত্রোপায়মজানানস্তেন খিন্নোঽস্মি শংকর ॥ ৪॥
শ্রীভগবানুবাচ ॥
শৃণু রাজন্প্রবক্ষ্যামি তত্রোপায়ং মহাভুজ ।
সগুণোপাসনাভিস্তু চিত্তৈকাগ্র্যং বিধায় চ ॥ ৫॥
স্থূলসৌরাংভিকান্যায়াত্তত্র চিত্তং প্রবর্তয়েৎ ।
তস্মিন্নন্নময়ে পিণ্ডে স্থূলদেহে তনূভৃতাম্ ॥ ৬॥
জন্মব্যাধিজরামৃত্যুনিলয়ে বর্ততে দৃঢা ॥ ৭॥
আত্মবুদ্ধিরহংমানাৎকদাচিন্নৈব হীয়তে ।
আত্মা ন জায়তে নিত্যো ম্রিয়তে বা কথংচন ॥ ৮॥
সংজায়তেঽস্তি বিপরিণমতে বর্ধতে তথা ।
ক্ষীয়তে নশ্যতীত্যেতে ষড্ভাবা বপুষঃ স্মৃতাঃ ॥ ৯॥
আত্মনো ন বিকারিৎবং ঘটস্থনভসো যথা ।
এবমাত্মাবপুস্তস্মাদিতি সংচিন্তয়েদ্বুধঃ ॥ ১০॥
মূষানিক্ষিপ্তহেমাভঃ কোশঃ প্রাণময়োঽত্র তু ।
বর্ততেঽন্তরতো দেহে বদ্ধঃ প্রাণাদিবায়ুভিঃ ॥ ১১॥
কর্মেন্দ্রিয়ৈঃ সমায়ুক্তশ্চলনাদিক্রিয়াত্মকঃ ।
ক্ষুৎপিপাসাপরাভূতো নায়মাত্মা জডো যতঃ ॥ ১২॥
চিদ্রূপ আত্মা যেনৈব স্বদেহমভিপশ্যতি ।
আত্মৈব হি পরং ব্রহ্ম নির্লেপঃ সুখনীরধিঃ ॥ ১৩॥
ন তদশ্নাতি কিংচৈতত্তদশ্নাতি ন কশ্চন ॥ ১৪॥
ততঃ প্রাণময়ে কোশে কোশোঽস্ত্যেব মনোময়ঃ ।
স সংকল্পবিকল্পাত্মা বুদ্ধীন্দ্রিয়সমায়ুতঃ ॥ ১৫॥
কামঃ ক্রোধস্তথা লোভো মোহো মাৎসর্যমেব চ ।
মদশ্চেত্যরিষড্বর্গো মমতেচ্ছাদয়োঽপি চ ।
মনোময়স্য কোশস্য ধর্মা এতস্য তত্র তু ॥ ১৬॥
যা কর্মবিষয়া বুদ্ধির্বেদশাস্ত্রার্থনিশ্চিতা ।
সা তু জ্ঞানেন্দ্রিয়ৈঃ সার্ধং বিজ্ঞানময়কোশতঃ ॥ ১৭॥
ইহ কর্তৃৎবাভিমানী স এব তু ন সংশয়ঃ ।
ইহামুত্র গতিস্তস্য স জীবো ব্যাবহারিকঃ ॥ ১৮॥
ব্যোমাদিসাত্ত্বিকাংশেভ্যো জায়ন্তে ধীন্দ্রিয়াণি তু ।
ব্যোম্নঃ শ্রোত্রং ভুবো ঘ্রাণং জলাজ্জিহ্বাথ তেজসঃ ॥ ১৯।
চক্ষুর্বায়োস্ত্বগুৎপন্না তেষাং ভৌতিকতা ততঃ ॥ ২০॥
ব্যোমাদীনাং সমস্তানাং সাত্ত্বিকাংশেভ্য এব তু ।
জায়ন্তে বুদ্ধিমনসী বুদ্ধিঃ স্যান্নিশ্চয়াত্মিকা ॥ ২১॥
বাক্পাণিপাদপায়ূপস্থানি কর্মেন্দ্রিয়াণি তু ।
ব্যোমাদীনাং রজোংঽশেভ্যো ব্যস্তেভ্যস্তান্যনুক্রমাৎ ॥ ২২॥
সমস্তেভ্যো রজোংঽশেভ্যঃ পঞ্চ প্রাণাদিবায়বঃ ।
জায়ন্তে সপ্তদশকমেবং লিঙ্গশরীরকম্ ॥ ২৩॥
এতল্লিঙ্গশরীরং তু তপ্তায়ঃপিণ্ডবদ্যতঃ ।
পরস্পরাধ্যাসয়োগাৎসাক্ষিচৈতন্যসংয়ুতম্ ॥ ২৪॥
তদানন্দময়ঃ কোশো ভোক্তৃৎবং প্রতিপদ্যতে ।
বিদ্যাকর্মফলাদীনাং ভোক্তেহামুত্র স স্মৃতঃ ॥ ২৫॥
যদাধ্যাসং বিহায়ৈষ স্বস্বরূপেণ তিষ্ঠতি ।
অবিদ্যামাত্রসংয়ুক্তঃ সাক্ষ্যাত্মা জায়তে তদা ॥ ২৬॥
দ্রষ্টান্তঃকরণাদীনামনুভূতেঃ স্মৃতেরপি ।
অতোঽন্তঃকরণাধ্যাসাদধ্যাসিৎবেন চাত্মনঃ ।
ভোক্তৃৎবং সাক্ষিতা চেতি দ্বৈধং তস্যোপপদ্যতে ॥ ২৭॥
আতপশ্চাপি তচ্ছায়া তৎপ্রকাশে বিরাজতে ।
একো ভোজয়িতা তত্র ভুঙ্ক্তেঽন্যঃ কর্মণঃ ফলম্ ॥ ২৮॥
ক্ষেত্রজ্ঞং রথিনং বিদ্ধি শরীরং রথমেব তু ।
বুদ্ধিং তু সারথিং বিদ্ধি প্রগ্রহং তু মনস্তথা ॥ ২৯॥
ইন্দ্রিয়াণি হয়ান্বিদ্ধি বিষয়াংস্তেষু গোচরান্ ।
ইন্দ্রিয়ৈর্মনসা যুক্তং ভোক্তারং বিদ্ধি পূরুষম্ ॥ ৩০॥
এবং শান্ত্যাদিয়ুক্তঃ সন্নুপাস্তে যঃ সদা দ্বিজঃ।
উদ্ঘাট্যোদ্ঘাট্যৈকমেকং যথৈব কদলীতরোঃ ॥ ৩১॥
বল্কলানি ততঃ পশ্চাল্লভতে সারমুত্তমম্ ।
তথৈব পঞ্চকোশেষু মনঃ সংক্রাময়ন্ক্রমাৎ ।
তেষাং মধ্যে ততঃ সারমাত্মানমপি বিন্দতি ॥ ৩২॥
এবং মনঃ সমাধায় সংয়তো মনসি দ্বিজঃ ।
অথ প্রবর্তয়েচ্চিত্তং নিরাকারে পরাত্মনি ॥ ৩৩॥
ততো মনঃ প্রগৃহ্ণাতি পরমাত্মানমব্যযম্ ।
যত্তদদ্রেশ্যমগ্রাহ্যমস্থূলাদ্যুক্তিগোচরম্ ॥ ৩৪॥
শ্রীরাম উবাচ ॥
ভগবঞ্ছ্রবণে নৈব প্রবর্তন্তে জনাঃ কথম্ ।
বেদশাস্ত্রার্থসম্পন্না যজ্বানঃ সত্যবাদিনঃ ॥ ৩৫॥
শৃণ্বন্তোঽপি তথাত্মানং জানতে নৈব কেচন ।
জ্ঞাৎবাপি মন্বতে মিথ্যা কিমেতত্তব মায়যা ॥ ৩৬॥
শ্রীভগবানুবাচ ॥
এবমেব মহাবাহো নাত্র কার্যা বিচারণা ।
দৈবী হ্যেষা গুণময়ী মম মায়া দুরত্যযা ॥ ৩৭॥
মামেব যে প্রপদ্যন্তে মায়ামেতাং তরন্তি তে ।
অভক্তা যে মহাবাহো মম শ্রদ্ধা বিবর্জিতাঃ ॥ ৩৮॥
ফলং কাময়মানাস্তে চৈহিকামুষ্মিকাদিকম্ ।
ক্ষয়িষ্ণ্বল্পং সাতিশয়ং যতঃ কর্মফলং মতম্ ॥ ৩৯॥
তদবিজ্ঞায় কর্মাণি যে কুর্বন্তি নরাধমাঃ ।
মাতুঃ পতন্তি তে গর্ভে মৃত্যোর্বক্ত্রে পুনঃ পুনঃ ॥ ৪০॥
এবং শান্ত্যাদিয়ুক্তঃ সন্নুপাস্তে যঃ সদা দ্বিজঃ।
উদ্ঘাট্যোদ্ঘাট্যৈকমেকং যথৈব কদলীতরোঃ ॥ ৩১॥
বল্কলানি ততঃ পশ্চাল্লভতে সারমুত্তমম্ ।
তথৈব পঞ্চকোশেষু মনঃ সংক্রাময়ন্ক্রমাৎ ।
তেষাং মধ্যে ততঃ সারমাত্মানমপি বিন্দতি ॥ ৩২॥
এবং মনঃ সমাধায় সংয়তো মনসি দ্বিজঃ ।
অথ প্রবর্তয়েচ্চিত্তং নিরাকারে পরাত্মনি ॥ ৩৩॥
ততো মনঃ প্রগৃহ্ণাতি পরমাত্মানমব্যযম্ ।
যত্তদদ্রেশ্যমগ্রাহ্যমস্থূলাদ্যুক্তিগোচরম্ ॥ ৩৪॥
শ্রীরাম উবাচ ॥
ভগবঞ্ছ্রবণে নৈব প্রবর্তন্তে জনাঃ কথম্ ।
বেদশাস্ত্রার্থসম্পন্না যজ্বানঃ সত্যবাদিনঃ ॥ ৩৫॥
শৃণ্বন্তোঽপি তথাত্মানং জানতে নৈব কেচন ।
জ্ঞাৎবাপি মন্বতে মিথ্যা কিমেতত্তব মায়যা ॥ ৩৬॥
শ্রীভগবানুবাচ ॥
এবমেব মহাবাহো নাত্র কার্যা বিচারণা ।
দৈবী হ্যেষা গুণময়ী মম মায়া দুরত্যযা ॥ ৩৭॥
মামেব যে প্রপদ্যন্তে মায়ামেতাং তরন্তি তে ।
অভক্তা যে মহাবাহো মম শ্রদ্ধা বিবর্জিতাঃ ॥ ৩৮॥
ফলং কাময়মানাস্তে চৈহিকামুষ্মিকাদিকম্ ।
ক্ষয়িষ্ণ্বল্পং সাতিশয়ং যতঃ কর্মফলং মতম্ ॥ ৩৯॥
তদবিজ্ঞায় কর্মাণি যে কুর্বন্তি নরাধমাঃ ।
মাতুঃ পতন্তি তে গর্ভে মৃত্যোর্বক্ত্রে পুনঃ পুনঃ ॥ ৪০॥
নানায়োনিষু জাতস্য দেহিনো যস্যকস্যচিৎ ।
কোটিজন্মার্জিতৈঃ পুণ্যৈর্ময়ি ভক্তিঃ প্রজায়তে ॥ ৪১॥
স এব লভতে জ্ঞানং মদ্ভক্তঃ শ্রদ্ধয়ান্বিতঃ ।
নান্যকর্মাণি কুর্বাণো জন্মকোটিশতৈরপি ॥ ৪২॥
ততঃ সর্বং পরিত্যজ্য মদ্ভক্তিং সমুদাহর ।
সর্বধর্মান্পরিত্যজ্য মামেকং শরণং ব্রজ ॥ ৪৩॥
অহং ৎবা সর্বপাপেভ্যো মোক্ষয়িষ্যামি মা শুচঃ ।
যৎকরোষি যদশ্নাসি যজ্জুহোষি দদাসি যৎ ॥ ৪৪॥
যত্তপস্যসি রাম ৎবং তৎকুরুষ্ব মদর্পণম্ ।
ততঃ পরতরা নাস্তি ভক্তির্ময়ি রঘূত্তম ॥ ৪৫॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
পঞ্চকোশোপপাদনং নাম চতুর্দশোঽধ্যায়ঃ ॥ ১৪ ॥
অথ পঞ্চদশোঽধ্যায়ঃ ॥
শ্রীরাম উবাচ ॥
ভক্তিস্তে কীদৃশী দেব জায়তে বা কথংচন ।
যয়া নির্বাণরূপং তু লভতে মোক্ষমুত্তমম্ ।
তদ্ ব্রূহি গিরিজাকান্ত ময়ি তেঽনুগ্রহো যদি ॥ ১॥
শ্রীভগবানুবাচ ॥
যো বেদাধ্যযনং যজ্ঞং দানানি বিবিধানি চ ।
মদর্পণধিয়া কুর্যাৎস মে ভক্তঃ স মে প্রিয়ঃ ॥ ২॥
নর্যভস্ম সমাদায় বিশুদ্ধং শ্রোত্রিয়ালয়াৎ ।
অগ্নিরিত্যাদিভির্মন্ত্রৈরভিমন্ত্র্য যথাবিধি ॥ ৩॥
উদ্ধূলয়তি গাত্রাণি তেন চার্চতি মামপি ।
তস্মাৎপরতরা ভক্তির্মম রাম ন বিদ্যতে ॥ ৪॥
সর্বদা শিরসা কণ্ঠে রুদ্রাক্ষান্ধারয়েত্তু যঃ ।
পঞ্চাক্ষরীজপরতঃ স মে ভক্তঃ স মে প্রিয়ঃ ॥ ৫॥
ভস্মচ্ছন্নো ভস্মশায়ী সর্বদা বিজিতেন্দ্রিয়ঃ ।
যস্তু রুদ্রং জপেন্নিত্যং চিন্তয়েন্মামনন্যধীঃ ॥ ৬॥
স তেনৈব চ দেহেন শিবঃ সংজায়তে স্বয়ম্ ।
জপেদ্যো রুদ্রসূক্তানি তথাথর্বশিরঃ পরম্ ॥ ৭॥
কৈবল্যোপনিষৎসূক্তং শ্বেতাশ্বতরমেব চ ।
ততঃ পরতরো ভক্তো মম লোকে ন বিদ্যতে ॥ ৮॥
অন্যত্র ধর্মাদন্যস্মাদন্যত্রাস্মাৎকৃতাকৃতাৎ ।
অন্যত্র ভূতাদ্ভব্যাচ্চ যৎপ্রবক্ষ্যামি তচ্ছৃণু ॥ ৯॥
বদন্তি যৎপদং বেদাঃ শাস্ত্রাণি বিবিধানি চ ।
সর্বোপনিষদাং সারং দধ্নো ঘৃতমিবোদ্ধৃতম্ ॥ ১০॥
যদিচ্ছন্তো ব্রহ্মচর্যং চরন্তি মুনয়ঃ সদা ।
তত্তে পদং সংগ্রহেণ ব্রবীম্যোমিতি যৎপদম্ ॥ ১১॥
এতদেবাক্ষরং ব্রহ্ম এতদেবাক্ষরং পরম্ ।
এতদেবাক্ষরং জ্ঞাৎবা ব্রহ্মলোকে মহীয়তে ॥ ১২॥
ছন্দসাং যস্তু ধেনূনামৃষভৎবেন চোদিতঃ ।
ইদমেব পতিঃ সেতুরমৃতস্য চ ধারণাৎ ॥ ১৩॥
মেধসা পিহিতে কোশে ব্রহ্ম যৎপরমোমিতি ॥ ১৪॥
চতস্রস্তস্য মাত্রাঃ স্যুরকারোকারকৌ তথা ।
মকারশ্চাবসানেঽর্ধমাত্রেতি পরিকীর্তিতা ॥ ১৫॥
পূর্বত্র ভূশ্চ ঋগ্বেদো ব্রহ্মাষ্টবসবস্তথা ।
গার্হপত্যশ্চ গায়ত্রী গঙ্গা প্রাতঃসবস্তথা ॥ ১৬॥
দ্বিতীয়া চ ভুবো বিষ্ণূ রুদ্রোঽনুষ্টুব্যজুস্তথা ।
যমুনা দক্ষিণাগ্নিশ্চ মাধ্যন্দিনসবস্তথা ॥ ১৭॥
তৃতীয়া চ সুবঃ সামান্যাদিত্যশ্চ মহেশ্বরঃ ।
অগ্নিরাহবনীয়শ্চ জগতী চ সরস্বতী ॥ ১৮॥
তৃতীয়ং সবনং প্রোক্তমথর্বৎবেন যন্মতম্ ।
চতুর্থী যাবসানেঽর্ধমাত্রা সা সোমলোকগা ॥ ১৯॥
অথর্বাঙ্গিরসঃ সংবর্তকোঽগ্নিশ্চ মহস্তথা ।
বিরাট্ সভ্যাবসথ্যৌ চ শুতুদ্রির্যজ্ঞপুচ্ছকঃ॥ ২০॥
প্রথমা রক্তবর্ণা স্যাদ্ দ্বিতীয়া ভাস্বরা মতা ।
তৃতীয়া বিদ্যুদাভা স্যাচ্চতুর্থী শুক্লবর্ণিনী ॥ ২১॥
সর্বং জাতং জায়মানং তদোঙ্কারে প্রতিষ্ঠিতম্ ।
বিশ্বং ভূতং চ ভুবনং বিচিত্রং বহুধা তথা ॥ ২২॥
জাতং চ জায়মানং যত্তৎসর্বং রুদ্র উচ্যতে ।
তস্মিন্নেব পুনঃ প্রাণাঃ সর্বমোঙ্কার উচ্যতে ॥ ২৩॥
প্রবিলীনং তদোঙ্কারে পরং ব্রহ্ম সনাতনম্ ।
তস্মাদোঙ্কারজাপী যঃ স মুক্তো নাত্র সংশয়ঃ ॥ ২৪॥
ত্রেতাগ্নেঃ স্মার্তবহ্নের্বা শৈবাগ্নের্বা সমাহৃতম্ ।
ভস্মাভিমন্ত্র্য যো মাং তু প্রণবেন প্রপূজয়েৎ ॥ ২৫॥
তস্মাৎপরতরো ভক্তো মম লোকে ন বিদ্যতে ॥ ২৬॥
শালাগ্নের্দাববহ্নের্বা ভস্মাদায়াভিমন্ত্রিতম্ ।
যো বিলিম্পতি গাত্রাণি স শূদ্রোঽপি বিমুচ্যতে ॥ ২৭॥
কুশপুষ্পৈর্বিল্বদলৈঃ পুষ্পৈর্বা গিরিসংভবৈঃ ।
যো মামর্চয়তে নিত্যং প্রণবেন প্রিয়ো হি সঃ ॥ ২৮॥
পুষ্পং ফলং সমূলং বা পত্রং সলিলমেব বা ।
যো দদ্যাৎপ্রণবৈর্মহ্যং তৎকোটিগুণিতং ভবেৎ ॥ ২৯॥
অহিংসা সত্যমস্তেয়ং শৌচমিন্দ্রিয়নিগ্রহঃ ।
যস্যাস্ত্যধ্যযনং নিত্যং স মে ভক্তঃ স মে প্রিয়ঃ ॥ ৩০॥
প্রদোষে যো মম স্থানং গৎবা পূজয়তে তু মাম্ ।
স পরং শ্রিয়মাপ্নোতি পশ্চান্ময়ি বিলীয়তে ॥ ৩১॥
অষ্টম্যাং চ চতুর্দশ্যাং পর্বণোরুভয়োরপি ।
ভূতিভূষিতসর্বাংগো যঃ পূজয়তি মাং নিশি ॥ ৩২॥
কৃষ্ণপক্ষে বিশেষেণ স মে ভক্তঃ স মে প্রিয়ঃ ॥ ৩৩॥
একাদশ্যামুপোষ্যৈব যঃ পূজয়তি মাং নিশি ।
সোমবারে বিশেষেণ স মে ভক্তো ন নশ্যতি ॥ ৩৪॥
পঞ্চামৃতৈঃ স্নাপয়েদ্যঃ পঞ্চগব্যেন বা পুনঃ ।
পুষ্পোদকৈঃ কুশজলৈস্তস্মান্নন্যঃ প্রিয়ো মম ॥ ৩৫॥
পয়সা সর্পিষা বাপি মধুনেক্ষুরসেন বা ।
পক্বাম্রফলজেনাপি নারিকেরজলেন বা ॥ ৩৬॥
গন্ধোদকেন বা মাং যো রুদ্রমন্ত্রং সমুচ্চরন্ ।
অভিষিঞ্চেত্ততো নান্যঃ কশ্চিৎপ্রিয়তরো মম ॥ ৩৭॥
আদিত্যাভিমুখো ভূৎবা ঊর্ধ্ববাহুর্জলে স্থিতঃ ।
মাং ধ্যায়ন্ রবিবিম্বস্থমথর্বাংগিরস জপেৎ ॥ ৩৮॥
প্রবিশেন্মে শরীরেঽসৌ গৃহং গৃহপতির্যথা ।
বৃহদ্রথন্তরং বামদেব্যং দেবব্রতানি চ ॥ ৩৯॥
তদ্যোগয়াজ্যদোহাংশ্চ যো গায়তি মমাগ্রতঃ ।
ইহ শ্রিয়ং পরাং ভুক্ত্বা মম সায়ুজ্যমাপ্নুয়াৎ ॥ ৪০॥
ঈশাবাস্যাদি মন্ত্রান্ যো জপেন্নিত্যং মমাগ্রতঃ ।
মৎসায়ুজ্যমবাপ্নোতি মম লোকে মহীয়তে ॥ ৪১॥
ভক্তিয়োগো ময়া প্রোক্ত এবং রঘুকুলোদ্ভব ।
সর্বকামপ্রদো মত্তঃ কিমন্যচ্ছ্রোতুমিচ্ছসি ॥ ৪২॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
ভক্তিয়োগো নাম পঞ্চদশোঽধ্যায়ঃ ॥ ১৫ ॥
অথ ষোডশোঽধ্যায়ঃ ॥
শ্রীরাম উবাচ ॥
ভগবন্মোক্ষমার্গো যস্ত্বয়া সম্যগুদাহৃতঃ ।
তত্রাধিকারিণং ব্রূহি তত্র মে সংশয়ো মহান্ ॥ ১॥
শ্রীভগবানুবাচ ॥
ব্রহ্মক্ষত্রবিশঃ শূদ্রাঃ স্ত্রিয়শ্চাত্রাধিকারিণঃ ।
ব্রহ্মচারী গৃহস্থো বা।আনুপনীতোঽথবা দ্বিজঃ ॥ ২॥
বনস্থো বাঽবনস্থো বা যতিঃ পাশুপতব্রতী ।
বহুনাত্র কিমুক্তেন যস্য ভক্তিঃ শিবার্চনে ॥ ৩॥
স এবাত্রাধিকারী স্যান্নান্যচিত্তঃ কথংচন ।
জডোঽন্ধো বধিরো মূকো নিঃশৌচঃ কর্মবর্জিতঃ ॥ ৪॥
অজ্ঞোপহাসকাভক্তা ভূতিরুদ্রাক্ষধারিণঃ ।
লিংগিনো যশ্চ বা দ্বেষ্টি তে নৈবাত্রাধিকারিণঃ ॥ ৫॥
যো মাং গুরুং পাশুপতং ব্রতং দ্বেষ্টি ধরাধিপ ।
বিষ্ণুং বা ন স মুচ্যেত জন্মকোটিশতৈরপি ॥ ৬॥
অনেককর্মসক্তোঽপি শিবজ্ঞানবিবর্জিতঃ ।
শিবভক্তিবিহীনশ্চ সংসারান্নৈব মুচ্যতে ॥ ৭॥
আসক্তাঃ ফলরাগেণ যে ৎববৈদিককর্মণি ।
দৃষ্টমাত্রফলাস্তে তু ন মুক্তাবধিকারিণঃ ॥ ৮॥
অবিমুক্তে দ্বারকায়াং শ্রীশৈলে পুণ্ডরীককে ।
দেহান্তে তারকং ব্রহ্ম লভতে মদনুগ্রহাৎ ॥ ৯॥
যস্য হস্তৌ চ পাদৌ চ মনশ্চৈব সুসংয়তম্ ।
বিদ্যা তপশ্চ কীর্তিশ্চ স তীর্থফলমশ্নুতে ॥ ১০॥
বিপ্রস্যানুপনীতস্য বিধিরেবমুদাহৃতঃ ।
নাভিব্যাহারয়েদ্ব্রহ্ম স্বধানিনয়নাদৃতে ॥ ১১॥
স শূদ্রেণ সমস্তাবদ্যাবদ্বেদান্ন জায়তে ।
নামসংকীর্তনে ধ্যানে সর্ব এবাধিকারিণঃ ॥ ১২॥
সংসারান্মুচ্যতে জন্তুঃ শিবতাদাত্ম্যভাবনাৎ ।
তথা দানং তপো বেদাধ্যযনং চান্যকর্ম বা ।
সহস্রাংশং তু নার্হন্তি সর্বদা ধ্যানকর্মণঃ ॥ ১৩॥
জাতিমাশ্রমমঙ্গানি দেশং কালমথাপি বা ।
আসনাদীনি কর্মাণি ধ্যানং নাপেক্ষতে ক্বচিৎ ॥ ১৪॥
গচ্ছংস্তিষ্ঠন্ জপন্বাপি শয়ানো বান্যকর্মণি ।
পাতকেনাপি বা যুক্তো ধ্যানাদেব বিমুচ্যতে ॥ ১৫॥
নেহাভিক্রমনাশোঽস্তি প্রত্যবায়ো ন বিদ্যতে ।
স্বল্পমপ্যস্য ধর্মস্য ত্রায়তে মহতো ভয়াৎ ॥ ১৬॥
আশ্চর্যে বা ভয়ে শোকে ক্ষুতে বা মম নাম যঃ ।
ব্যাজেনাপি স্মরেদ্যস্তু স যাতি পরমাং গতিম্ ॥ ১৭॥
মহাপাপৈরপি স্পৃষ্টো দেহান্তে যস্তু মাং স্মরেৎ ।
পঞ্চাক্ষরীং বোচ্চরতি স মুক্তো নাত্র সংশয়ঃ ॥ ১৮॥
বিশ্বং শিবময়ং যস্তু পশ্যত্যাত্মানমাত্মনা ।
তস্য ক্ষেত্রেষু তীর্থেষু কিং কার্যং বান্যকর্মসু ॥ ১৯॥
সর্বেণ সর্বদা কার্যং ভূতিরুদ্রাক্ষধারণম্ ।
যুক্তেনাথাপ্যযুক্তেন শিবভক্তিমভীপ্সতা ॥ ২০॥
নর্যভস্মসমায়ুক্তো রুদ্রাক্ষান্যস্তু ধারয়েৎ ।
মহাপাপৈরপি স্পৃষ্টো মুচ্যতে নাত্র সংশয়ঃ ॥ ২১॥
অন্যানি শৈবকর্মাণি করোতু ন করোতু বা ।
শিবনাম জপেদ্যস্তু সর্বদা মুচ্যতে তু সঃ ॥ ২২॥
অন্তকালে তু রুদ্রাক্ষান্বিভূতিং ধারয়েত্তু যঃ ।
মহাপাপোপপাপোঘৈরপি স্পৃষ্টো নরাধমঃ ॥ ২৩॥
সর্বথা নোপসর্পন্তি তং জনং যমকিংকরাঃ ॥ ২৪॥
বিল্বমূলমৃদা যস্তু শরীরমুপলিম্পতি ।
অন্তকালেঽন্তকজনৈঃ স দূরীক্তিয়তে নরঃ ॥ ২৫॥
শ্রীরাম উবাচ ॥
ভগবন্পূজিতঃ কুত্র কুত্র বা ৎবং প্রসীদসি ।
তদ্ব্রূহি মম জিজ্ঞাসা বর্ততে মহতী বিভো ॥ ২৬॥
শ্রীভগবানুবাচ ॥
মৃদা বা গোময়েনাপি ভস্মনা চন্দনেন বা ।
সিকতাভির্দারুণা বা পাষাণেনাপি নির্মিতা ॥ ২৭॥
লোহেন বাথ রঙ্গেণ কাংস্যখর্পরপিত্তলৈঃ ।
তাম্ররৌপ্যসুবর্ণৈর্বা রত্নৈর্নানাবিধৈরপি ॥ ২৮॥
অথবা পারদেনৈব কর্পূরেণাথবা কৃতা ।
প্রতিমা শিবলিঙ্গং বা দ্রব্যৈরেতৈঃ কৃতং তু যৎ ॥ ২৯॥
তত্র মাং পূজয়েত্তেষু ফলং কোটিগুণোত্তরম্ ॥ ৩০॥
মৃদ্দারুকাংস্যলোহৈশ্চ পাষাণেনাপি নির্মিতা ।
গৃহিণা প্রতিমা কার্যা শিবং শশ্বদভীপ্সতা ।
আয়ুঃ শ্রিয়ং কুলং ধর্মং পুত্রানাপ্নোতি তৈঃ ক্রমাৎ ॥ ৩১॥
বিল্ববৃক্ষে তৎফলে বা যো মাং পূজয়তে নরঃ ।
পরাং শ্রিয়মিহ প্রাপ্য মম লোকে মহীয়তে ॥ ৩২॥
বিল্ববৃক্ষং সমাশ্রিত্য যো মন্ত্রান্বিধিনা জপেৎ ।
একেন দিবসেনৈব তৎপুরশ্চরণং ভবেৎ ॥ ৩৩॥
যস্তু বিল্ববনে নিত্যং কুটীং কৃৎবা বসেন্নরঃ ।
সর্বে মন্ত্রাঃ প্রসিদ্ধ্যন্তি জপমাত্রেণ কেবলম্ ॥ ৩৪॥
পর্বতাগ্রে নদীতীরে বিল্বমূলে শিবালয়ে ।
অগ্নিহোত্রে কেশবস্য সংনিধৌ বা জপেত্তু যঃ ॥ ৩৫॥
নৈবাস্য বিঘ্নং কুর্বন্তি দানবা যক্ষরাক্ষসঃ ।
তং ন স্পৃশন্তি পাপানি শিবসায়ুজ্যমৃচ্ছতি ॥ ৩৬॥
স্থণ্ডিলে বা জলে বহ্নৌ বায়াবাকাশ এব বা ।
গিরৌ স্বাত্মনি বা যো মাং পূজয়েৎপ্রয়তো নরঃ ॥ ৩৭॥
স কৃৎস্নং ফলমাপ্নোতি লবমাত্রেণ রাঘব ।
আত্মপূজাসমা নাস্তি পূজা রঘুকুলোদ্ভব ॥ ৩৮॥
মৎসায়ুজ্যমবাপ্নোতি চণ্ডালোঽপ্যাত্মপূজয়া ।
সর্বান্কামানবাপ্নোতি মনুষ্যঃ কম্বলাসনে ॥ ৩৯॥
কৃষ্ণাজিনে ভবেন্মুক্তির্মোক্ষশ্রীর্ব্যাঘ্রচর্মণি ।
কুশাসনে ভবেজ্জ্ঞানমারোগ্যং পত্রনির্মিতে ॥ ৪০॥
পাষাণে দুঃখমাপ্নোতি কাষ্ঠে নানাবিধান্ গদান্ ।
বস্ত্রেণ শ্রিয়মাপ্নোতি ভূমৌ মন্ত্রো ন সিদ্ধ্যতি ।
প্রাঙ্মুখোদঙ্মুখো বাপি জপং পূজাং সমাচরেৎ ॥ ৪১॥
অক্ষমালাবিধিং বক্ষ্যে শৃণুষ্বাবহিতো নৃপ ॥ ৪২॥
সাম্রাজ্যং স্ফাটিকে স্যাত্তু পুত্রজীবে পরাং শ্রিয়ম্ ।
আত্মজ্ঞানং কুশগ্রন্থৌ রুদ্রাক্ষঃ সর্বকামদঃ ॥ ৪৩॥
প্রবালৈশ্চ কৃতা মালা সর্বলোকবশপ্রদা ।
মোক্ষপ্রদা চ মালা স্যাদামলক্যাঃ ফলৈঃ কৃতা ॥ ৪৪॥
মুক্তাফলৈঃ কৃতা মালা সর্ববিদ্যাপ্রদায়িনী ।
মাণিক্যরচিতা মালা ত্রৈলোকস্য বশংকরী ॥ ৪৫॥
নীলৈর্মরকতৈর্বাপি কৃতা শত্রুভয়প্রদা ।
সুবর্ণরচিতা মালা দদ্যাদ্বৈ মহতীং শ্রিয়ম্ ॥ ৪৬॥
তথা রৌপ্যময়ী মালা কন্যাং যচ্ছতি কামিতাম্ ।
উক্তানাং সর্বকামানাং দায়িনী পারদৈঃ কৃতা ॥ ৪৭॥
অষ্টোত্তরশতা মালা তত্র স্যাদুত্তমোত্তমা ।
শতসংখ্যোত্তমা মালা পঞ্চাশন্মধ্যমা মতা ॥ ৪৮॥
চতুঃ পঞ্চশতী যদ্বা অধমা সপ্তবিংশতিঃ ।
অধমা পঞ্চবিংশত্যা যদি স্যাচ্ছতনির্মিতা ॥ ৪৯॥
পঞ্চাশদক্ষরাণ্যত্রানুলোমপ্রতিলোমতঃ ।
ইত্যেবং স্থাপয়েৎস্পষ্টং ন কস্মৈচিৎপ্রদর্শয়েৎ ॥ ৫০॥
বর্ণৈর্বিন্যস্তয়া যস্তু ক্রিয়তে মালয়া জপঃ ।
একবারেণ তস্যৈব পুরশ্চর্যা কৃতা ভবেৎ॥ ৫১॥
সব্যপার্ষ্ণিং গুদে স্থাপ্য দক্ষিণং চ ধ্বজোপরি ।
যোনিমুদ্রাবন্ধ এষ ভবেদাসনমুত্তমম্ ॥ ৫২॥
যোনিমুদ্রাসনে স্থিৎবা প্রজপেদ্যঃ সমাহিতঃ ।
যং কংচিদপি বা মন্ত্রং তস্য স্যুঃ সর্বসিদ্ধয়ঃ ॥ ৫৩॥
ছিন্না রুদ্ধাঃ স্তম্ভিতাশ্চ মিলিতা মূর্ছিতাস্তথা ।
সুপ্তা মত্তা হীনবীর্যা দগ্ধাস্ত্রস্তারিপক্ষগাঃ ॥ ৫৪॥
বালা যৌবনমত্তশ্চ বৃদ্ধা মন্ত্রাশ্চ যে মতাঃ ।
যোনিমুদ্রাসনে স্থিৎবা মন্ত্রানেবংবিধান্ জপেৎ ॥ ৫৫॥
তত্র সিদ্ধ্যন্তি তে মন্ত্রা নান্যস্য তু কথংচন ।
ব্রাহ্মং মুহূর্তমারভ্যামধ্যাহ্নং প্রজপেন্মনুম্ ॥ ৫৬॥
অত ঊর্ধ্বং কৃতে জাপ্যে বিনাশায় ভবেদ্ধ্রুবম্ ।
পুরশ্চর্যাবিধাবেবং সর্বকাম্যফলেষ্বপি ॥ ৫৭॥
নিত্যে নৈমিত্তিকে বাপি তপশ্চর্যাসু বা পুনঃ ।
সর্বদৈব জপঃ কার্যো ন দোষস্তত্র কশ্চন ॥ ৫৮॥
যস্তু রুদ্রং জপেন্নিত্যং ধ্যায়মানো মমাকৃতিম্ ।
ষডক্ষরং বা প্রণবং নিষ্কামো বিজিতেন্দ্রিয়ঃ ॥ ৫৯॥
তথাথর্বশিরোমন্ত্রং কৈবল্যং বা রঘূত্তম ।
স তেনৈব চ দেহেন শিবঃ সংজায়তে স্বয়ম্ ॥ ৬০॥
অধীতে শিবগীতাং যো নিত্যমেতাং জিতেন্দ্রিয়ঃ ।
শৃণুয়াদ্বা স মুক্তঃ স্যাৎসংসারান্নাত্র সংশয়ঃ ॥ ৬১॥
সূত উবাচ ॥
এবমুক্ত্বা মহাদেবস্তত্রৈবান্তরধীয়ত ।
রামঃ কৃতার্থমাত্মানমমন্যত তথৈব সঃ ॥ ৬২॥
এবং ময়া সমাসেন শিবগীতা সমীরিতা ।
এতাং যঃ প্রজপেন্নিত্যং শৃণুয়াদ্বা সমাহিতঃ ॥ ৬৩॥
একাগ্রচিত্তোয়ো মর্ত্যস্তস্য মুক্তিঃ করে স্থিতা ।
অতঃ শৃণুধ্বং মুনয়ো নিত্যমেতাং স্মাহিতাঃ ॥ ৬৪॥
অনায়াসেন বো মুক্তির্ভবিতা নাত্র সংশয়ঃ ।
কায়ক্লেশো মনঃক্ষোভো ধনহানির্ন চাত্মনঃ ॥ ৬৫॥
পীডাস্তি শ্রবণাদেব যস্মাৎকৈবল্যমাপ্নুয়াৎ ।
শিবগীতামতো নিত্যং শৃণুধ্বমৃষিসত্তমাঃ ॥ ৬৬॥
ঋষয় ঊচুঃ ॥
অদ্যপ্রভৃতি নঃ সূত ৎবমাচার্যঃ পিতা গুরুঃ ।
অবিদ্যায়াঃ পরং পারং যস্মাত্তারয়িতাসি নঃ ॥ ৬৭॥
উৎপাদকব্রহ্মদাত্রোর্গরীয়ান্ ব্রহ্মদঃ পিতা ।
তস্মাৎসূতাত্মজ ৎবত্তঃ সত্যং নান্যোঽস্তি নো গুরুঃ ॥ ৬৮॥
ব্যাস উবাচ ॥
ইত্যুক্ত্বা প্রয়যুঃ সর্বে সায়ংসংধ্যামুপাসিতুম্ ।
স্তুবন্তঃ সূতপুত্রং তে সংতুষ্টা গোমতীতটম্ ॥ ৬৯॥
ইতি শ্রীপদ্মপুরাণে উপরিভাগে শিবগীতাসূপনিষৎসু
ব্রহ্মবিদ্যায়াং যোগশাস্ত্রে শিবরাঘবসংবাদে
গীতাধিকারিনিরূপণং নাম ষোডশোঽধ্যায়ঃ ॥ ১৬॥
॥ ইতি শ্রীমচ্ছিবগীতা সমাপ্তা ॥
– Chant Stotra in Other Languages –
Shiva Gita in Sanskrit – English – Bengali – Gujarati – Kannada – Malayalam – Odia – Telugu – Tamil