॥ Shambhu Krutha Sri Rama Stava Sanskrit Lyrics ॥
॥ श्री राम स्तवः (शम्भु कृतम्) ॥
श्रीराघवं करुणाकरं भवनाशनं दुरितापहं
माधवं खगगामिनं जलरूपिणं परमेश्वरम् ।
पालकं जनतारकं भवहारकं रिपुमारकं
त्वां भजे जगदीश्वरं नररूपिणं रघुनन्दनम् ॥ १ ॥
भूधवं वनमालिनं घनरूपिणं धरणीधरं
श्रीहरिं त्रिगुणात्मकं तुलसीधवं मधुरस्वरम् ।
श्रीकरं शरणप्रदं मधुमारकं व्रजपालकं
त्वां भजे जगदीश्वरं नररूपिणं रघुनन्दनम् ॥ २ ॥
विठ्ठलं मधुरास्थितं रजकान्तकं गजमारकं
सन्नुतं बकमारकं वृकघातकं तुरगार्दनम् ।
नन्दजं वसुदेवजं बलियज्ञगं सुरपालकं
त्वां भजे जगदीश्वरं नररूपिणं रघुनन्दनम् ॥ ३ ॥
केशवं कपिवेष्टितं कपिमारकं मृगमर्दिनं
सुन्दरं द्विजपालकं दितिजार्दनं दनुजार्दनम् ।
बालकं खरमर्दिनं ऋषिपूजितं मुनिचिन्तितं
त्वां भजे जगदीश्वरं नररूपिणं रघुनन्दनम् ॥ ४ ॥
शङ्करं जलशायिनं कुशबालकं रथवाहनं
सरयूनतं प्रियपुष्पकं प्रियभूसुरं लवबालकम् ।
श्रीधरं मधुसूदनं भरताग्रजं गरुडध्वजं
त्वां भजे जगदीश्वरं नररूपिणं रघुनन्दनम् ॥ ५ ॥
गोप्रियं गुरुपुत्रदं वदतां वरं करुणानिधिं
भक्तपं जनतोषदं सुरपूजितं श्रुतिभिः स्तुतम् ।
भुक्तिदं जनमुक्तिदं जनरञ्जनं नृपनन्दनं
त्वां भजे जगदीश्वरं नररूपिणं रघुनन्दनम् ॥ ६ ॥
चिद्घनं चिरजीविनं मणिमालिनं वरदोन्मुखं
श्रीधरं धृतिदायकं बलवर्धनं गतिदायकम् ।
शान्तिदं जनतारकं शरधारिणं गजगामिनं
त्वां भजे जगदीश्वरं नररूपिणं रघुनन्दनम् ॥ ७ ॥
शार्ङ्गिणं कमलाननं कमलादृशं पदपङ्कजं
श्यामलं रविभासुरं शशिसौख्यदं करुणार्णवम् ।
सत्पतिं नृपबालकं नृपवन्दितं नृपतिप्रियं
त्वां भजे जगदीश्वरं नररूपिणं रघुनन्दनम् ॥ ८ ॥
निर्गुणं सगुणात्मकं नृपमण्डनं मतिवर्धनं
अच्युतं पुरुषोत्तमं परमेष्ठिनं स्मितभाषिणम् ।
ईश्वरं हनुमन्नुतं कमलाधिपं जनसाक्षिणं
त्वां भजे जगदीश्वरं नररूपिणं रघुनन्दनम् ॥ ९ ॥
इति श्री शंभु कृत श्री राम स्तवः ।
– Chant Stotra in Other Languages –
Shambhu Krutha Sri Rama Stava in Sanskrit – English – Kannada – Telugu – Tamil