From Laxminarayaniyasamhita khanda 2 adhyaya 240
This does not really have 1000 names but perhaps with the mention of “sahasrarupena harerdarshanam’ in the end it is considered /referenced in Purana Index for sahasranamastotra.
॥ Lakshminarayaniyasamhita’s Narayanasahasranamastotram Odia Lyrics ॥
॥ ନାରାୟଣସହସ୍ରନାମସ୍ତୋତ୍ରଂ ଶ୍ରୀଲକ୍ଷ୍ମୀନାରାୟଣୀୟସଂହିତାୟାମ୍ ॥
ଓଂ ଶ୍ରୀ ଗଣେଶାୟ ନମଃ
ଶ୍ରୀକୃଷ୍ଣ ଉଵାଚ
ଶୃଣୁ ତ୍ଵଂ ରାଧିକେ ଚାନ୍ୟଂ ଚମତ୍କାରଂ ଶ୍ରିୟଃପତେଃ ।
କୁଂକୁମଵାପିକାକ୍ଷେତ୍ରେ ଜାତଂ ୟୋଗେଶ୍ଵରଂ ପ୍ରତି ॥ ୧ ॥
ଵୀତିହୋତ୍ରୋ ମହୋୟୋଗୀ ଵନେ ୟୋଗେଶ୍ଵରୋଽଭଵତ୍ ।
ହିମାଚଲେ ବଦର୍ୟାଂ ସ ତପସ୍ତେପେଽତିଦାରୁଣମ୍ ॥ ୨ ॥
ସର୍ଵୟୋଗକଲାଃ ପ୍ରାପ ୟଥା ଶଂଭୁସ୍ତଥାଽଭଵତ୍ ।
ତେନ ୟୋଗପ୍ରତାପେନ ଦୃଷ୍ଟା ଵୈ ଦିଵ୍ୟଚକ୍ଷୁଷା ॥ ୩ ॥
କେତୁମାଲେ କୃତା ୟଜ୍ଞାଃ କେନାଟେଽପି କୃତା ମଖାଃ ।
ଅମରୀଣାଂ ପ୍ରଦେଶେଷୁ କୃତଂ ୟଦ୍ଧରିଣା ତୁ ତତ୍ ॥ ୪ ॥
ଊର୍ଜାକୃଷ୍ଣାଷ୍ଟମୀଜନ୍ମମହୋତ୍ସଵଶ୍ଚ ୟଃ କୃତଃ ।
ଶାରଦାପୂଜନାଦ୍ୟଂ ଚ ହ୍ୟନ୍ନକୂଟମହୋତ୍ସଵଃ ॥ ୫ ॥
ଏତତ୍ସର୍ଵଂ ଦିଵ୍ୟଦୃଷ୍ଟ୍ୟା ଵିଜ୍ଞାୟ ପରମେଶ୍ଵରମ୍ ।
କାଂଭରେୟଂ ବାଲକୃଷ୍ଣଂ ଦ୍ରଷ୍ଟୁଂ ସାକ୍ଷାଦୁପାୟୟୌ ॥ ୬ ॥
ଆୟୟୌ କୁଂକୁମଵାପୀକ୍ଷେତ୍ରେ କୃଷ୍ଣନାରାୟଣମ୍ ।
ସହସ୍ରରୂପଧର୍ତାଽସୌ ଵୀତିହୋତ୍ରଃ ସମାଧିମାନ୍ ॥ ୭ ॥
ମାର୍ଗଶୀର୍ଷତୃତୀୟାୟାମଶ୍ଵପଟ୍ଟସରସ୍ତଟେ ।
ସେତୁମାଶ୍ରିତ୍ୟ ଚ ନ୍ୟଗ୍ରୋଧସ୍ୟାଽଧୋଽଧାନ୍ନିଜାସନମ୍ ॥ ୮ ॥
ସହସ୍ରରୂପଧର୍ତାଽସୌ ସଂକଲ୍ପ୍ୟ ନିଷସାଦ ହ ।
ମମ ମୂଲସ୍ଵରୂପଂ ଚାଗତ୍ୟାଽଽଶ୍ଲିଷ୍ୟେତ୍ ରମାପତିଃ ॥ ୯ ॥
ତତଃ ସହସ୍ରରୂପୈଶ୍ଚାଽଽଶ୍ଲିଷ୍ୟେନ୍ମାଂ ସ ପ୍ରଭୁଃ ପୁନଃ ।
ଋଷଭସ୍ୟ କାରୟେନ୍ୟେ ସଦ୍ରୁରୋର୍ଦର୍ଶନଂ ୟଦି ॥ ୧୦ ॥
ତଦାଽହଂ ଶ୍ରୀହରେରଗ୍ରେ ନିଵତ୍ସ୍ୟେଽତ୍ର ସଦାଽନୁଗଃ ।
ମୋକ୍ଷଂ ପ୍ରସାଧୟିଷ୍ୟେଽତ୍ର ବଦର୍ୟା ନ ପ୍ରୟୋଜନମ୍ ॥ ୧୧ ॥
ନ ଗୁରୋରପରସ୍ୟାପି ମୋକ୍ଷଦୋ ହି ଗୁରୁର୍ୟତଃ ।
ୟତ୍ରାତ୍ମନୋ ଭଵେତ୍ପୁଷ୍ଟିର୍ୟେନ ତରତି ସାଗରମ୍ ॥ ୧୨ ॥
ୟସ୍ମାଚ୍ଚାତ୍ମମହାଶାନ୍ତିସ୍ତଂ ଗୁରୁଂ ତ୍ଵାଶ୍ରୟେଜ୍ଜନଃ ।
ୟସ୍ମାତ୍ପାପଵିନାଶଶ୍ଚ ୟସ୍ମାଦଜ୍ଞାନନାଶନମ୍ ॥ ୧୩ ॥
ୟସ୍ମାଦ୍ ଵୃତ୍ତିନିରୋଧଶ୍ଚ ଵାସନାକ୍ଷପଣଂ ୟତଃ ।
ୟସ୍ମାଦାତ୍ମପ୍ରକାଶଶ୍ଚ ତଂ ଗୁରୁଂ ତ୍ଵାଶ୍ରୟେଜ୍ଜନଃ ॥ ୧୪ ॥
ୟସ୍ମାଚ୍ଛିକ୍ଷାମଵାପ୍ୟେତୈଶ୍ଵର୍ୟଂ ଚମତ୍କୃତିଂ ତଥା ।
ଦିଵ୍ୟଭାଵମଧିତିଷ୍ଠେତ୍ତଂ ଗୁରୁଂ ତ୍ଵାଶ୍ରୟେଜ୍ଜନଃ ॥ ୧୫ ॥
ଗୁରଵୋ ବହଵଃ ସନ୍ତି ଲୌକିକାଶ୍ଚାପ୍ୟଲୌକିକାଃ ।
ଲୌକିକେନ ହି ଲୋକସ୍ଥାଃ କାର୍ୟା ଵୈ ଗୁରଵୋ ୟଥା ॥ ୧୬ ॥
ଅଲୌକିକେନ ଶିଷ୍ୟେଣାଽଲୌକିକା ଗୁରଵୋ ଧୃତାଃ ।
ମୟାଽପ୍ୟଲୌକିକଃ ସୋଽୟଂ କର୍ତଵ୍ୟୋ ଭଗଵାନ୍ ଗୁରୁଃ ॥ ୧୭ ॥
ୟତ୍ର ସର୍ଵଂ ହି କର୍ତଵ୍ୟଂ ହରୌ ପରିସମାପ୍ୟତେ ।
ମାତା ଗୁରୁର୍ହି ଜନୁଦା ପିତା ଗୁରୁର୍ହି ବୀଜଦଃ ॥ ୧୮ ॥
ଅନ୍ୟେ ରକ୍ଷାକରାଃ ସନ୍ତି ଦେହସ୍ୟ ଗୁରଵୋ ହି ତେ ।
ଭାଷାଜ୍ଞାନକରାଶ୍ଚାନ୍ୟେ ବାନ୍ଧଵାଦ୍ୟାଶ୍ଚ ୟୋଷିତଃ ॥ ୧୯ ॥
ତଥା ଶିକ୍ଷାକରାଶ୍ଚାନ୍ୟେ ଵିଦ୍ୟାଦାନକରା ଅପି ।
କଲାକୌଶଲ୍ୟଶିକ୍ଷାୟା ଦାତାରୋ ଗୁରଵୋଽପି ଚ ॥ ୨୦ ॥
ତ ଏତେ ଦେହୟାତ୍ରାୟା ଭଵନ୍ତି ଗୁରଵଃ ଖଲୁ ।
ଆତ୍ମଜ୍ଞାନପ୍ରଦୋ ୟସ୍ତୁ ଵିଷ୍ଣୁମନ୍ତ୍ରପ୍ରଦଶ୍ଚ ୟଃ ॥ ୨୧ ॥
ଧର୍ମଵୃତ୍ତିପ୍ରଦୋ ୟଶ୍ଚ ଗୁରୁଃ ଶ୍ରେଷ୍ଠୋ ହି ସମ୍ମତଃ ।
ବ୍ରହ୍ମସ୍ଥିତିପ୍ରଦୋ ୟଶ୍ଚ ୟୋଗସିଦ୍ଧିପ୍ରଦଶ୍ଚ ୟଃ ॥ ୨୨ ॥
ଵୈଶାରଦ୍ୟପ୍ରଦୋ ବୁଦ୍ଧୌ ଗୁରୁଃ ଶ୍ରେଷ୍ଠତରୋ ହି ସଃ ।
ନିର୍ମୂଲାଂ ଵାସନାଂ କୃତ୍ଵା ପରମେଶପ୍ରଦର୍ଶକଃ ॥ ୨୩ ॥
ଆତ୍ମନା ପରମାତ୍ମାନଂ ପ୍ରାପକୋ ଦିଵ୍ୟମୋକ୍ଷଦଃ ।
ବ୍ରହ୍ମଲୋକପ୍ରେଷକଶ୍ଚ ଗୁରୁଃ ଶ୍ରେଷ୍ଠତମୋ ହି ସଃ ॥ ୨୪ ॥
ଗକାରସ୍ତ୍ଵନ୍ଧମଜ୍ଞାନଂ ରକାରୋ ଜ୍ଞାନମୁଜ୍ଜ୍ଵଲମ୍ ।
ଅଜ୍ଞାନହା ଜ୍ଞାନଦଶ୍ଚ ଗୁରୁର୍ଗୌରଵଵାନ୍ମତଃ ॥ ୨୫ ॥
ଗମୟତ୍ୟକ୍ଷରଂ ଧାମ ରମୟତ୍ୟପି ଧାମିନା ।
ଗୁରୁଃ ସୋଽୟଂ ମୋକ୍ଷଦାତା ନାନ୍ୟଃ ଶ୍ରେଷ୍ଠସ୍ତତୋ ଗୁରୁଃ ॥ ୨୬ ॥
ଗୁରୁର୍ୟୋଗୀ ବ୍ରହ୍ମଚାରୀ ଧର୍ମୀ ଜ୍ଞାନୀ ଵିରାଗଵାନ୍ ।
ସାଧୁଶୀଲୋ ଗୁରୁଶ୍ଚାପି ନାରାୟଣଃ ପରୋ ଗୁରୁଃ ॥ ୨୭ ॥
ଭୁକ୍ତ୍ତିଦାତା ମୋକ୍ଷଦାତା ସର୍ଵସ୍ଵଦୋ ହରିର୍ଗୁରୁଃ ।
ଗୁରୋଃ ସାକ୍ଷାତ୍କାରୟିତା ଗୁରୋର୍ଗୁରୁର୍ୟତୋଽତ୍ର ସଃ ॥ ୨୮ ॥
ସ ଏଵ ଶ୍ରୀହରିଶ୍ଚାଽୟଂ ମୁକ୍ତ୍ତାନାଂ ପରମୋ ଗୁରୁଃ ।
ଗୁରୁଃ ସର୍ଵାଵତାରାଣାଂ ସତୀନାଂ ଚ ସତାଂ ଗୁରୁଃ ॥ ୨୯ ॥
ଈଶ୍ଵରାଣାଂ ତଥା ଧାମ୍ନାଂ ୟୋଗିନାଂ ସର୍ଗସଂଵିଦାମ୍ ।
ପୂର୍ଵେଷାଂ ସୃଷ୍ଟିକର୍ତୄଣାଂ ମହର୍ଷୀଣାଂ ଦ୍ୟୁଵାସିନାମ୍ ॥ ୩୦ ॥
ପ୍ରଜେଶାନାଂ କର୍ମଠାନାଂ ଭକ୍ତାନାଂ ଚ ପରୋ ଗୁରୁଃ ।
ଗୁରୂଣାଂ ୟାଵତାମଗ୍ର୍ୟୋ ନାରାୟଣଗୁରୋର୍ଗୁରୁଃ ॥ ୩୧ ॥
ଅନାଦି ଶ୍ରୀକୃଷ୍ଣନାରାୟଣଃ ଶ୍ରୀକୃଷ୍ଣଵଲ୍ଲଭଃ ।
ଶ୍ରୀକୃଷ୍ଣଵଲ୍ଲଭଃ ସ୍ଵାପୀ କାଂଭରେୟଃ ପରାତ୍ପରଃ ॥ ୩୨ ॥
ଶ୍ରୀମଦ୍ଗୋପାଲବାଲୋଽୟଂ ସ୍ଵାମୀ ଵୈ ସର୍ଵଦେହିନାମ୍ ।
ମୟା ଲବ୍ଧଃ ସ ମେ ପୂର୍ଣଂ କରିଷ୍ୟତ୍ୟେଵ ମାନସମ୍ ॥ ୩୩ ॥
ନିଵତ୍ସ୍ୟାମି ଚରଣେଽସ୍ୟ ପ୍ରାପ୍ସ୍ୟାମି ଧାମ ଚାକ୍ଷରମ୍ ।
ସଞ୍ଚିନ୍ତ୍ୟେତି ଵୀତିହୋତ୍ରୋ ଧ୍ୟାନମଗ୍ନଃ ସହସ୍ରଧା ॥ ୩୪ ॥
ସହସ୍ରରୂପଵାନ୍ ଜାତୋ ଦୃଷ୍ଟ୍ଵା ତଂ ମାନଵାସ୍ତଟେ ।
ସ୍ନାତାରୋଽଗୁଃ ପରଶ୍ଚର୍ୟଂ କସ୍ୟେମାନି ସମାନି ଵୈ ॥ ୩୫ ॥
ରୂପାଣି, କେ ଚାଗତା ଵୈ ୟୋଗିନୋଽତ୍ର ସହସ୍ରଶଃ ।
ସମଵେଷାଃ ସମଦେହାଃ ସମାଂଗାଃ ସନ୍ତି ସଦୃଶାଃ ॥ ୩୬ ॥
ସମକେଶାଃ ସମଧ୍ୟାନାଃ ସମାନପରିମାଣକାଃ ।
ଭ୍ରାତରୋ ଵା ଭଵନ୍ତ୍ୟେତେ ଧାମମୁକ୍ତା ଭଵନ୍ତି ଵା ॥ ୩୭ ॥
ବଦରୀଵାସିନୋ ଵାଽପି ଶ୍ଵେତମୁକ୍ତାଃ କିମାଗତାଃ ।
ଶଂକରସ୍ୟ ଗଣାଃ କିଂଵା ଦେଵାସ୍ତାପସରୂପିଣଃ ॥ ୩୮ ॥
ସାଧ୍ୟା ଵା ଦେଵତା ୟଦ୍ଵା ମେରୁଵାସା ହି ତାପସାଃ ।
କ ଏତେ ତୁ ଭଵେୟୁର୍ଵୈ ଚନ୍ଦ୍ରାସ୍ୟା ଭାସ୍କରପ୍ରଭାଃ ॥ ୩୯ ॥
ଧ୍ୟାନୟୋଗା ୟୋଗିନୋ ଵା ୟୋଗୀଶ୍ଵରାଃ ସହସ୍ରଶଃ ।
ନ ଵଦନ୍ତି ନ ପଶ୍ୟନ୍ତି ନ ପ୍ରାଣାନ୍ ଚାଲୟନ୍ତ୍ୟପି ॥ ୪୦ ॥
ସ୍ଥିରମୌନାଃ ସ୍ଥିରଚିତା ଈଶ୍ଵରାଃ ସ୍ୟୁଶ୍ଚ କେନ୍ଵିମେ ।
ଇତ୍ୟେଵଂ ତର୍କୟନ୍ତୋ ଵୈ କୁଂକୁମଵାପିକାଜନାଃ ॥ ୪୧ ॥
ସଂଘଶୋ ଵୈ ସମାୟାନ୍ତି ଦ୍ରଷ୍ଟୁଂ କୁତୂହଲାନ୍ଵିତାଃ ।
କେଚିନ୍ନମନ୍ତି ଦୃଷ୍ଟ୍ଵୈଵ ପ୍ରଶଂସନ୍ତି ଵଦନ୍ତି ଚ ॥ ୪୨ ॥
ପ୍ରତାପୋଽୟଂ ବାଲକୃଷ୍ଣକୃପାନାଥସ୍ୟ ଵର୍ତତେ ।
ଅସ୍ୟ ଦର୍ଶନଲାଭାର୍ଥଂ ନିତ୍ୟମାୟାନ୍ତି ୟୋଗିନଃ ॥ ୪୩ ॥
ଅଦୃଶ୍ୟା ଈଦୃଶାଃ ସର୍ଵେଽଧୁନା ତେ ଦୃଶ୍ୟତାଂ ଗତାଃ ।
ରୁଦ୍ରାଃ ସହସ୍ରଶଶ୍ଚାପି ଵିଷ୍ଣଵଶ୍ଚ ସହସ୍ରଶଃ ॥ ୪୪ ॥
ସହସ୍ରସୋଽପି ବ୍ରହ୍ମାଣୋ ଦ୍ରଷ୍ଟୁମାୟାନ୍ତି ସଦ୍ଵରମ୍ ।
ତଥା ମହର୍ଷୟୋ ନିତ୍ୟଂ ପିତରୋ ଦେଵତାସ୍ତଥା ॥ ୪୫ ॥
ସାଧ୍ୟା ଵିଶ୍ଵେ ଚ ମରୁତୋ ଦ୍ରଷ୍ଟୁମାୟାନ୍ତି ନିତ୍ୟଶଃ ।
ତୀର୍ଥାନ୍ୟପି ସମାୟାନ୍ତି ଦିକ୍ପାଲାଃ ସୃଷ୍ଟିପାଲକାଃ ॥ ୪୬ ॥
ଅଥଵା ପାର୍ଷଦା ଦିଵ୍ୟା ଗୋଲୋକାଦିନିଵାସିନଃ ।
ସମାୟାନ୍ତି ଚ ଵୈକୁଣ୍ଠପାର୍ଷଦା ଅପି ନିତ୍ୟଶଃ ॥ ୪୭ ॥
ଗ୍ରହନକ୍ଷତ୍ରତାରାଶ୍ଚ ସୂର୍ୟାଶ୍ଚନ୍ଦ୍ରାଃ ସହସ୍ରଶଃ ।
ଵୈମାନିକାଃ ସମାୟାନ୍ତି ଲୋକାନ୍ତରେଭ୍ୟ ଆଦୃତାଃ ॥ ୪୮ ॥
ଵାଲଖିଲ୍ୟାଃ ସମାୟାନ୍ତି ୟଦ୍ଵା ବ୍ରହ୍ମସଭାଦ୍ଵିଜାଃ ।
କିଂ ଵା ଭଵେୟୁର୍ଗାନ୍ଧର୍ଵା ୟକ୍ଷା ଵା ଧନଦାଶ୍ଚ ଵା ॥ ୪୯ ॥
ଚାରଣାଃ ପର୍ଵତଵାସା ମୁନୟୋ ଵା ଵନସ୍ଥିତାଃ ।
ପରଂ ସାଦୃଶ୍ୟମେଵୈଷାମପୂର୍ଵତ୍ଵଂ ଵିଗାହତେ ॥ ୫୦ ॥
ଲଲାଟେ ଵୈଷ୍ଣଵଂ ପୁଣ୍ଡ୍ରଂ ମସ୍ତକେ ତାପସୀ ଜଟା ।
ନେତ୍ରମୁଦ୍ରା ୟୋଗପୁଷ୍ଟାଃ ଖ୍ୟାପୟନ୍ତ୍ୟଂଶମାଚ୍ୟୁତମ୍ ॥ ୫୧ ॥
ୟେ ଵା କେ ଵା ଭଵେୟୁସ୍ତେ ସାକ୍ଷାତ୍କୃତା ୟଦତ୍ର ତେ ।
ଅସ୍ମାଭିର୍ଦୈଵୟୋଗେନ ପୁଣ୍ୟଵଦ୍ଭିଃ ସୁଭାଗ୍ୟକୈଃ ॥ ୫୨ ॥
ଅଵଶ୍ୟମେଷାଂ ଵିଜ୍ଞାନଂ କ୍ଷଣେଽତ୍ରୈଵ ଭଵିଷ୍ୟତି ।
ଇତ୍ୟେଵଂ ତେ ଵଦନ୍ତଶ୍ଚ ପ୍ରଜାଃ ସଂଘଶ ଏଵ ହ ॥ ୫୩ ॥
ପ୍ରପଶ୍ୟନ୍ତି ସରସ୍ତୀରେ ସହସ୍ରୟୋଗିନସ୍ତଦା ।
ଅଥ ଶ୍ରୀମଦ୍ବାଲକୃଷ୍ଣୋ ନାରାୟଣଗୁରୋର୍ଗୁରୂ ॥ ୫୪ ॥
ସମାୟୟୋ ସରସ୍ତୀରେ ସନ୍ନିଧୌ ୟୋଗିନାଂ ତଦା ।
ହାର୍ଦଂ ଜାନଁସ୍ତଦା ତୂର୍ଣଂ ପ୍ରଵୀକ୍ଷ୍ୟ ମୂଲରୂପିଣମ୍ ॥ ୫୫ ॥
ସମୁତ୍ତୋଲ୍ୟ ସମାହୂୟ ନାମ୍ନା ତଂ ଵୀତିହୋତ୍ରକ ! ।
ଉତ୍ତିଷ୍ଠେତି କରୌ ଧୃତ୍ଵା କୃତ୍ଵା ଵକ୍ଷସି ୟୋଗିନମ୍ ॥ ୫୬ ॥
ସମାଶ୍ଲିଷ୍ୟଦ୍ଧସଁସ୍ତୂର୍ଣଂ ସ୍ଵୟଂ ସହସ୍ରଧାଽଭଵତ୍ ।
ସମୁତ୍ଥିତୈଃ ସହସ୍ରସ୍ଵରୂପୈରାଶ୍ଲିଷ୍ୟଦଚ୍ୟୁତଃ ॥ ୫୭ ॥
ତତସ୍ତୂର୍ଣଂ ହରିଶ୍ଚୈକସ୍ଵରୂପଃ ସମ୍ବଭୂଵ ହ ।
ଵୀତୀହୋତ୍ରୋଽପି ସହସା ତ୍ଵେକରୂପୋ ଵ୍ୟଜାୟତ ॥ ୫୮ ॥
ଆଶ୍ଚର୍ୟଚକିତା ଲୋକା ଜୟଶବ୍ଦାନ୍ ପ୍ରଚକ୍ରିରେ ।
ତାଵଚ୍ଛ୍ରୀବାଲକୃଷ୍ଣୋଽପି ବଭୂଵ ଋଷଭୋ ଗୁରୁଃ ॥ ୫୯ ॥
ଵୃଦ୍ଧଃ ଶ୍ଵେତଜଟାୟୁକ୍ତୋ ଵିଵସ୍ତ୍ରୋ ଧୂଲିଧୂସରଃ ।
ଵିଚିତ୍ତ ଇଵ ଚୋନ୍ମତ୍ତୋ ଜିତସର୍ଵେନ୍ଦ୍ରିୟୋ ୟତିଃ ॥ ୬୦ ॥
ସ୍ଵଭାଵତେଜସା ଵ୍ୟାପ୍ତୋ ବ୍ରହ୍ମନିଷ୍ଠାପରଃ ପୁମାନ୍ ।
ଅପ୍ରାକୃତ ଇଵ ତ୍ଵାସ୍ତେ ଵିମନା ଇଵ ଦେହିଷୁ ॥ ୬୧ ॥
ଵୀତିହୋତ୍ରୋଽପି ଚ ଗୁରୁମୃଷଭଂ ଵୀକ୍ଷ୍ୟ ଦଣ୍ଡଵତ୍ ।
ଚକାର ବହୁଧା ତତ୍ର ତୁଷ୍ଟାଵ ପରମେଶ୍ଵରମ୍ ॥ ୬୨ ॥
ତ୍ଵଂ ଗୁରୁସ୍ତ୍ଵଂ ଚାନ୍ତରାତ୍ମା ଋଷଭସ୍ତ୍ଵଂ ଚ ୟୋଗିରାଟ୍ ।
ୟୋଗେଶ୍ଵରୋ ଭଵାନେଵ ତ୍ଵଂ ଚେଶସ୍ତ୍ଵଂ ପରେଶ୍ଵରଃ ॥ ୬୩ ॥
ତ୍ଵଂ ମୁକ୍ତସ୍ତ୍ଵଂ ମହାମୁକ୍ତୋ ମୁକ୍ତେଶ୍ଵରୋ ଭଵାନପି ।
ଅକ୍ଷରଂ ତ୍ଵଂ ଭଵାନ୍ ବ୍ରହ୍ମ ପରବ୍ରହ୍ମ ଭଵାନପି ॥ ୬୪ ॥
ଭଗଵାନ୍ କୃଷ୍ଣ ଏଵାସି କୃଷ୍ଣନାରାୟଣୋଽସି ଚ ।
ଅନାଦିଶ୍ରୀକୃଷ୍ଣନାରାୟଣସ୍ତ୍ଵଂ ପରମେଶ୍ଵରଃ ॥ ୬୫ ॥
ଅଵତାରାଃ ଋଷଭାଦ୍ୟାସ୍ତଵୈଵ ଶ୍ରୀପତେ ଵିଭୋ ।
ରାଧାପତିସ୍ତ୍ଵମେଵାଽସି ଲକ୍ଷ୍ମୀପତିସ୍ତ୍ଵମେଵ ଚ ॥ ୬୬ ॥
ଵାସୁଦେଵୀପତିସ୍ତ୍ଵଂ ଚ ନାରାୟଣୀପତିସ୍ତଥା ।
ମୁକ୍ତପତିର୍ବ୍ରହ୍ମପତିର୍ଧାମପତିସ୍ତ୍ଵମେଵ ଚ ॥ ୬୭ ॥
ମହାକାଲସ୍ୟ ହେତୁସ୍ତ୍ଵଂ ମହାଵିଷ୍ଣୋଶ୍ଚ କାରଣମ୍ ।
ସଦାଶିଵସ୍ୟ ହେତୁସ୍ତ୍ଵଂ ଵୈରାଜସ୍ୟ ଚ କାରଣମ୍ ॥ ୬୮ ॥
ଭୂମା ତ୍ଵଂ ପୂରୁଷସଂଜ୍ଞଃ ପୁରୁଷୋତ୍ତମ ଇତ୍ୟପି ।
ବ୍ରହ୍ମଵିଷ୍ଣୁମହେଶାନାଂ ରୁଦ୍ରାଣାଂ ସର୍ଜକୋ ଭଵାନ୍ ॥ ୬୯ ॥
ଦେଵାନାଂ ଲୋକପାଲାନାଂ ପିତୄଣାଂ ସର୍ଜକୋ ଭଵାନ୍ ।
ମହର୍ଷୀଣାଂ ୟତୀନାଂ ଚ ସାଧୂନାଂ ସର୍ଜକଃ ସତାମ୍ ॥ ୭୦ ॥
ସତୀନାଂ କମଲାଦ୍ୟାନାଂ ପତିଃ ପାତା ଚ ଵୈ ଭଵାନ୍ ।
ସୁରାଣାଂ ମାନଵାନାଂ ଚ ପଶୂନାଂ ପକ୍ଷିଣାଂ ତଥା ॥ ୭୧ ॥
ଵଲ୍ଲୀନାଂ ଚ ଦ୍ରୁମାଣାଂ ଚ ସର୍ଜକସ୍ତ୍ଵଂ ରସପ୍ରଦଃ ।
କାମଧେନୁକାମଵଲ୍ଲୀଚିନ୍ତାମଣ୍ୟାଦିସର୍ଜକଃ ॥ ୭୨ ॥
ୟକ୍ଷରକ୍ଷଃପିଶାଚାନାଂ ସର୍ଜକସ୍ତ୍ଵଂ ଖଚାରିଣାମ୍ ।
ଵାରିଜାନାଂ ଵନସ୍ଥାନାଂ ଭୂଗର୍ଭାଣାଂ ପ୍ରସର୍ଜକଃ ॥ ୭୩ ॥
ଦୈତ୍ୟାନାଂ ଦାନଵାନାଂ ଚ ସର୍ଜକସ୍ତ୍ଵଂ ଜନାର୍ଦନଃ ।
ଦୀନାନାଥଦରିଦ୍ରାନାଂ ରକ୍ଷକଃ ପୋଷକୋ ଭଵାନ୍ ॥ ୭୪ ॥
ଆଶ୍ରିତାନାମନ୍ନଦାତା ଶରଣ୍ୟଶ୍ଚାର୍ତିଦେହିନାମ୍ ।
କାମୁକାନାଂ କାମଦାତା ସକାମାନାଂ ପ୍ରପୂରକଃ ॥ ୭୫ ॥
ତ୍ଵଂ ନାରୀ ତ୍ଵଂ ନରଶ୍ଚାସ୍ସେ ତ୍ଵଂ ଗର୍ଭସ୍ତ୍ଵଂ କୁମାରକଃ
ତ୍ଵଂ ବୀଜଂ ତ୍ଵଂ ସସ୍ୟରୂପସ୍ତ୍ଵଂ ପୁଷ୍ପଂ ଫଲମିତ୍ୟପି ॥ ୭୬ ॥
ତ୍ଵମିନ୍ଦ୍ରସ୍ତ୍ଵମିନ୍ଦ୍ରିୟସ୍ତ୍ଵଂ ନିଦ୍ରା ତ୍ଵଂ ଜାଗରୋ ଭଵାନ୍ ।
ତ୍ଵଂ ସୁଷୁପ୍ତିର୍ମହାନନ୍ଦସ୍ତ୍ଵଂ ପ୍ରୀତିସ୍ତ୍ଵଂ ରତିସ୍ତଥା ॥ ୭୭ ॥
ମନ୍ମଥସ୍ତ୍ଵଂ ମନୋଜନ୍ୟୋ ମନଃସଂସ୍ଥୋ ଭଵାନପି ।
ଜ୍ଞାନଂ ଜ୍ଞାତା ଜ୍ଞେୟମେଵ ତ୍ଵମେଵାଽସି ପରେଶ୍ଵର ॥ ୭୮ ॥
ତ୍ଵମ୍ ଋତୁସ୍ତ୍ଵଂ ଦିନଂ ରାତ୍ରିସ୍ତ୍ଵମୁଦ୍ୟୋଗୋ ଵିରାମକଃ ।
ତ୍ଵଂ ଵିଶ୍ଵାସଶ୍ଚାଶ୍ରୟଶ୍ଚ ତ୍ଵଂ ମାତା ଚ ପିତା ଗୁରୂଃ ॥ ୭୯ ॥
ଧନଂ ଧାନ୍ୟଂ ତ୍ଵମେଵାଽସିଂ ଶକ୍ତିର୍ବଲଂ ତ୍ଵମେଵ ଚ ।
ନୀତିର୍ଭକ୍ତିର୍ଵୃଷୋ ରାଗୋ ଵୈରାଗ୍ୟଂ ଚ ତ୍ଵମେଵ ହ ॥ ୮୦ ॥
ତ୍ଵଂ ପ୍ରାଣସ୍ତ୍ଵଂ ଜୀଵନଂ ଚ ନୈକଧା ଚୈକଧା ଭଵାନ୍ ।
ପ୍ରକାଶସ୍ତ୍ଵଂ ପ୍ରଵୃତ୍ତିସ୍ତ୍ଵଂ ନିରୋଧସ୍ତ୍ଵଂ ଗୁଣାତ୍ମକଃ ॥ ୮୧ ॥
ଗୁଣାତୀତସ୍ତ୍ଵମେଵାଽସି ସର୍ଵସିଦ୍ଧିଗୁଣାଶ୍ରୟଃ ।
ଆଶ୍ଚର୍ୟଂ ତ୍ଵଂ ଚମତ୍କାରସ୍ତ୍ଵମୈଶ୍ଵର୍ୟଂ ପ୍ରଭୁତ୍ଵକମ୍ ॥ ୮୨ ॥
ତ୍ଵଂ ଭୂର୍ଜଲଂ ଭଵାଁସ୍ତେଜୋଽନିଲସ୍ତ୍ଵଂ ତ୍ଵଂ ତଥାଽନଲଃ ।
ତ୍ଵଂ ଖଂ ତ୍ଵଂ ମାତ୍ରକଂ ତ୍ଵଂ ଚ ବୁଦ୍ଧିସ୍ତ୍ଵଂ ଚୈଷଣାତ୍ରୟମ୍ ॥ ୮୩ ॥
ତ୍ଵଂ ପରୀକ୍ଷା ତିତିକ୍ଷା ତ୍ଵଂ ତ୍ଵଂ ବୁଭୁକ୍ଷା ମୁମୁକ୍ଷତା ।
ତ୍ଵଂ ସ୍ନେହସ୍ତ୍ଵଂ ଧ୍ୟାନଵୃତ୍ତିସ୍ତ୍ଵଂ ସମାଧିଃ ପରାତ୍ପରଃ ॥ ୮୪ ॥
ଉପାସ୍ତିସ୍ତ୍ଵଂ ଚିତ୍ତଚୈତ୍ୟଂ ତ୍ଵଂ ଜାଡୟଂ ତ୍ଵଂ ତଥାଽଣୁତା ।
ତ୍ଵଂ ସାମ୍ୟଂ ତ୍ଵଂ ଚ ଵୈଷମ୍ୟଂ ତ୍ଵମେଵ ସର୍ଵମେଵ ହ ॥ ୮୫ ॥
ଅହଂ ତ୍ଵଂ ଵୀତିହୋତ୍ରସ୍ତ୍ଵଂ ତ୍ଵଂ ଗୁରୂଃ ଋଷଭସ୍ତଥା ।
ତଵୈଵାଂଽଶକଲାଽଽଵେଶଵିଭୂତିସୃଷ୍ଟିଜଂ ତ୍ଵିଦମ୍ ॥ ୮୬ ॥
ୟତ୍ କିଂଚିଦ୍ ଦୃଶ୍ୟତେ ଚାପି ଭୁଜ୍ୟତେ ଲୀୟତେଽପି ଚ ।
ୟସ୍ମାଦ୍ ୟତ୍ର ଚ ୟେନାପି ୟଦର୍ଥଂ ଚ ତ୍ଵମେଵ ସଃ ॥ ୮୭ ॥
ତସ୍ମୈ କୃଷ୍ଣାୟ ନାଥାୟ ବ୍ରହ୍ମଣେ ପରବ୍ରହ୍ମଣେ ।
ସମର୍ପୟାମି ଚାତ୍ମାନଂ ଵୀତିହୋତ୍ରାଭିଧଂ ସଦା ॥ ୮୮ ॥
ଦାନମେଵ ନ ତୁ ନ୍ୟାସଂ ନାପି କୁସୀଦକଂ ତଥା ।
ୟଥେଷ୍ଟଵିନିୟୋଗାର୍ହଂ ସମର୍ପୟାମି ମାଂ ତ୍ଵହମ୍ ॥ ୮୯ ॥
ଇତି ସ୍ତୁତ୍ଵା ରାଧିକେ ସମ୍ପପାତ ପାଦୟୋର୍ହରେଃ ।
ଵୀତିହୋତ୍ରଶ୍ଚାଽଥ କୃଷ୍ଣସ୍ତମୁତ୍ଥାପୟଦୂର୍ଧ୍ଵକମ୍ ॥ ୯୦ ॥
ସମାଶ୍ର୍ଲିଷ୍ୟ ପୁନର୍ହସ୍ତୌ ଦତ୍ଵା ତସ୍ୟ ଚ ମୂର୍ଧନି ।
ନ୍ୟୟୁଂକ୍ତ ଵରଲାଭାର୍ଥଂ ଵୀତିହୋତ୍ରଂ ହରିର୍ୟଦା ॥ ୯୧ ॥
ଵୀତିହୋତ୍ରସ୍ତଦା ପ୍ରାହ ସ୍ଥାସ୍ୟେଽତ୍ର ତଵପାଦୟୋଃ ।
ଅନ୍ତେ ମୋକ୍ଷଂ ଗମିଷ୍ୟସ୍ୟକ୍ଷରଂ ଧାମ ତଵ ପ୍ରଭୋ ॥ ୯୨ ॥
ଦେହି ଵାସଂ ସଦା ଚାତ୍ର ତଥାସ୍ତୂଵାଚ ଵୈ ହରିଃ ।
ରାଧିକେ ତନ୍ମହତ୍ତୀର୍ଥମ୍ ଋଷଭାଖ୍ୟଂ ସରୋଵରେ ॥ ୯୩ ॥
ଵୀତିହୋତ୍ରାଭିଧଂ ତୀର୍ଥଂ ସହସ୍ରୟୋଗିତୀର୍ଥକମ୍ ।
ଏଵଂ ନାମ୍ନା ତଦେଵାସୀତ୍ ପ୍ରସିଦ୍ଧଂ ମୋକ୍ଷଦଂ ଶୁଭମ୍ ॥ ୯୪ ॥
ହରିର୍ବଭୂଵ ସହସା ବାଲକୃଷ୍ଣସ୍ଵରୂପଧୃକ୍ ।
ପ୍ରୟୟୌ ଚ ନିଜାଵାସଂ ଵୀତିହୋତ୍ରସ୍ତଟେ ସ୍ଥିତଃ ॥ ୯୫ ॥
ଵଟଵୃକ୍ଷଂ ସମାଶ୍ଲିଷ୍ୟ ତାପସୋ ଜନଦର୍ଶନଃ ।
ତତ୍ର ତୀର୍ଥେ କୃତସ୍ନାନାଃ ପ୍ରାପ୍ସ୍ୟନ୍ତି ପରମାଂ ଗତିମ୍ ॥ ୯୬ ॥
ୟୋଗସିଦ୍ଧିମଵାପ୍ସ୍ୟନ୍ତି ୟୋଗାଭ୍ୟାସଂ ଵିନାଽପି ଚ ।
ରାଧିକେ ତତ୍ର ସଂସ୍ନାନ୍ନାଶମେଷ୍ୟନ୍ତି ପାତକମ୍ ॥ ୯୭ ॥
ଆର୍ଦ୍ରଂ ଶୁଷ୍କଂ ମହତ୍ସ୍ଵଲ୍ପଂ ପରପୀଡାକରଂ ଚ ୟତ୍ ।
ସର୍ଵଂ ନଶ୍ୟତି ପାପଂ ତଜ୍ଜଲପାନାଦପି ଦ୍ରୁତମ୍ ॥ ୯୮ ॥
ତତ୍ରାଽନ୍ନଦାନତଃ ସ୍ୟାତ୍ତୁ ଵାଜିମେଧସମଂ ଫଲମ୍ ।
ଋଷଭସ୍ୟାଽଽଲୟକର୍ତୁର୍ମମ ଧାମାଽକ୍ଷରଂ ଭଵେତ୍ ॥ ୯୯ ॥
ଇତ୍ୟେଵଂ ଭଗଵାନାହ ରାଧିକେ ତୀର୍ଥଵୈଭଵମ୍ ।
ପଠନାଚ୍ଛ୍ରଵଣାଚ୍ଚାସ୍ୟ ଭଵେତ୍ତତ୍ତୀର୍ଥଜଂ ଫଲମ୍ ॥ ୧୦୦ ॥
॥ ଇତିଶ୍ରୀଲକ୍ଷ୍ମୀନାରାୟଣୀୟସଂହିତାୟାଂ ଦ୍ଵିତୀୟେ ତ୍ରେତାସନ୍ତାନେ
ଵୀତିହୋତ୍ରୟୋଗେଶ୍ଵରାୟ ଋଷଭରୂପେଣ ସହସ୍ରରୂପେଣ ଚ
ହରେର୍ଦର୍ଶନମ୍, ଋଷଭତୀର୍ଥୀକରଣମ୍, ସ୍ତୁତିଶ୍ଚେତ୍ୟାଦିନିରୂପଣନାମା
ଚତ୍ଵାରିଂଶଦଧିକଦ୍ଵିଶତତମୋଽଧ୍ୟାୟଃ ॥