॥ Rishabha Gita from Bhagavata Purana Odia Lyrics ॥
॥ ॥ Rishabha Gita from Bhagavata Purana – (Bhagavatam Skandha 5, chapters 5-6)
ସ କଦାଚିଦଟମାନୋ ଭଗବାନୃଷଭୋ ବ୍ରହ୍ମାବର୍ତଗତୋ
ବ୍ରହ୍ମର୍ଷିପ୍ରବରସଭାୟାଂ ପ୍ରଜାନାଂ ନିଶାମୟନ୍ତୀନାମାତ୍ମଜାନବହିତାତ୍ମନଃ
ପ୍ରଶ୍ରୟପ୍ରଣୟଭରସୁୟନ୍ତ୍ରିତାନପ୍ୟୁପଶିକ୍ଷୟନ୍ନିତି ହୋବାଚ ॥ ୫.୪.୧୯ ॥
ଋଷଭ ଉବାଚ
ନାୟଂ ଦେହୋ ଦେହଭାଜାଂ ନୃଲୋକେ କଷ୍ଟାନ୍କାମାନର୍ହତେ ବିଡ୍ଭୁଜାଂ ଯେ ।
ତପୋ ଦିବ୍ୟଂ ପୁତ୍ରକା ଯେନ ସତ୍ତ୍ୱଂ ଶୁଦ୍ଧ୍ୟେଦ୍ୟସ୍ମାଦ୍ବ୍ରହ୍ମସୌଖ୍ୟଂ ତ୍ୱନନ୍ତମ୍ ॥ ୫.୫.୧ ॥
ମହତ୍ସେବାଂ ଦ୍ୱାରମାହୁର୍ୱିମୁକ୍ତେସ୍ତମୋଦ୍ୱାରଂ ଯୋଷିତାଂ ସଙ୍ଗିସଙ୍ଗମ୍ ।
ମହାନ୍ତସ୍ତେ ସମଚିତ୍ତାଃ ପ୍ରଶାନ୍ତା ବିମନ୍ୟବଃ ସୁହୃଦଃ ସାଧବୋ ଯେ ॥ ୫.୫.୨ ॥
ଯେ ବା ମୟୀଶେ କୃତସୌହୃଦାର୍ଥା ଜନେଷୁ ଦେହମ୍ଭରବାର୍ତିକେଷୁ ।
ଗୃହେଷୁ ଜାୟାତ୍ମଜରାତିମତ୍ସୁ ନ ପ୍ରୀତିୟୁକ୍ତା ଯାବଦର୍ଥାଶ୍ଚ ଲୋକେ ॥ ୫.୫.୩ ॥
ନୂନଂ ପ୍ରମତ୍ତଃ କୁରୁତେ ବିକର୍ମ ଯଦିନ୍ଦ୍ରିୟପ୍ରୀତୟ ଆପୃଣୋତି ।
ନ ସାଧୁ ମନ୍ୟେ ଯତ ଆତ୍ମନୋଽୟମସନ୍ନପି କ୍ଲେଶଦ ଆସ ଦେହଃ ॥ ୫.୫.୪ ॥
ପରାଭବସ୍ତାବଦବୋଧଜାତୋ ଯାବନ୍ନ ଜିଜ୍ଞାସତ ଆତ୍ମତତ୍ତ୍ୱମ୍ ।
ଯାବତ୍କ୍ରିୟାସ୍ତାବଦିଦଂ ମନୋ ବୈ କର୍ମାତ୍ମକଂ ଯେନ ଶରୀରବନ୍ଧଃ ॥ ୫.୫.୫ ॥
ଏବଂ ମନଃ କର୍ମବଶଂ ପ୍ରୟୁଙ୍କ୍ତେ ଅବିଦ୍ୟଯାଽଽତ୍ମନ୍ୟୁପଧୀୟମାନେ ।
ପ୍ରୀତିର୍ନ ଯାବନ୍ମୟି ବାସୁଦେବେ ନ ମୁଚ୍ୟତେ ଦେହୟୋଗେନ ତାବତ୍ ॥ ୫.୫.୬ ॥
ଯଦା ନ ପଶ୍ୟତ୍ୟଯଥା ଗୁଣେହାଂ ସ୍ୱାର୍ଥେ ପ୍ରମତ୍ତଃ ସହସା ବିପଶ୍ଚିତ୍ ।
ଗତସ୍ମୃତିର୍ୱିନ୍ଦତି ତତ୍ର ତାପାନାସାଦ୍ୟ ମୈଥୁନ୍ୟମଗାରମଜ୍ଞଃ ॥ ୫.୫.୭ ॥
ପୁଂସଃ ସ୍ତ୍ରିୟା ମିଥୁନୀଭାବମେତଂ ତୟୋର୍ମିଥୋ ହୃଦୟଗ୍ରନ୍ଥିମାହୁଃ ।
ଅତୋ ଗୃହକ୍ଷେତ୍ରସୁତାପ୍ତବିତ୍ତୈର୍ଜନସ୍ୟ ମୋହୋଽୟମହଂ ମମେତି ॥ ୫.୫.୮ ॥
ଯଦା ମନୋହୃଦୟଗ୍ରନ୍ଥିରସ୍ୟ କର୍ମାନୁବଦ୍ଧୋ ଦୃଢ ଆଶ୍ଲଥେତ ।
ତଦା ଜନଃ ସମ୍ପରିବର୍ତତେଽସ୍ମାନ୍ମୁକ୍ତଃ ପରଂ ଯାତ୍ୟତିହାୟ ହେତୁମ୍ ॥ ୫.୫.୯ ॥
ହଂସେ ଗୁରୌ ମୟି ଭକ୍ତ୍ୟାନୁବୃତ୍ୟା ବିତୃଷ୍ଣୟା ଦ୍ୱନ୍ଦ୍ୱତିତିକ୍ଷୟା ଚ ।
ସର୍ୱତ୍ର ଜନ୍ତୋର୍ୱ୍ୟସନାବଗତ୍ୟା ଜିଜ୍ଞାସୟା ତପସେହାନିବୃତ୍ତ୍ୟା ॥ ୫.୫.୧୦ ॥
ମତ୍କର୍ମଭିର୍ମତ୍କଥୟା ଚ ନିତ୍ୟଂ ମଦ୍ଦେବସଙ୍ଗାଦ୍ଗୁଣକୀର୍ତନାନ୍ମେ ।
ନିର୍ୱୈରସାମ୍ୟୋପଶମେନ ପୁତ୍ରା ଜିହାସୟା ଦେହଗେହାତ୍ମବୁଦ୍ଧେଃ ॥ ୫.୫.୧୧ ॥
ଅଧ୍ୟାତ୍ମୟୋଗେନ ବିବିକ୍ତସେବୟା ପ୍ରାଣେନ୍ଦ୍ରିୟାତ୍ମଭିଜୟେନ ସଧ୍ର୍ୟକ୍ ।
ସଚ୍ଛ୍ରଦ୍ଧୟା ବ୍ରହ୍ମଚର୍ୟେଣ ଶଶ୍ୱଦସମ୍ପ୍ରମାଦେନ ଯମେନ ବାଚାମ୍ ॥ ୫.୫.୧୨ ॥
ସର୍ୱତ୍ର ମଦ୍ଭାବବିଚକ୍ଷଣେନ ଜ୍ଞାନେନ ବିଜ୍ଞାନବିରାଜିତେନ ।
ଯୋଗେନ ଧୃତ୍ୟୁଦ୍ୟମସତ୍ତ୍ୱୟୁକ୍ତୋ ଲିଙ୍ଗଂ ବ୍ୟପୋହେତ୍କୁଶଲୋଽହମାଖ୍ୟମ୍ ॥ ୫.୫.୧୩ ॥
କର୍ମାଶୟଂ ହୃଦୟଗ୍ରନ୍ଥିବନ୍ଧମବିଦ୍ୟଯାଽଽସାଦିତମପ୍ରମତ୍ତଃ ।
ଅନେନ ଯୋଗେନ ଯଥୋପଦେଶଂ ସମ୍ୟଗ୍ୱ୍ୟପୋହ୍ୟୋପରମେତ ଯୋଗାତ୍ ॥ ୫.୫.୧୪ ॥
ପୁତ୍ରାଂଶ୍ଚ ଶିଷ୍ୟାଂଶ୍ଚ ନୃପୋ ଗୁରୁର୍ୱା ମଲ୍ଲୋକକାମୋ ମଦନୁଗ୍ରହାର୍ଥଃ ।
ଇତ୍ଥଂ ବିମନ୍ୟୁରନୁଶିଷ୍ୟାଦତଜ୍ଜ୍ଞାନ୍ନ ଯୋଜୟେତ୍କର୍ମସୁ କର୍ମମୂଢାନ୍ ।
କଂ ଯୋଜୟନ୍ମନୁଜୋଽର୍ଥଂ ଲଭେତ ନିପାତୟନ୍ନଷ୍ଟଦୃଶଂ ହି ଗର୍ତେ ॥ ୫.୫.୧୫ ॥
ଲୋକଃ ସ୍ୱୟଂ ଶ୍ରେୟସି ନଷ୍ଟଦୃଷ୍ଟିର୍ୟୋଽର୍ଥାନ୍ସମୀହେତ ନିକାମକାମଃ ।
ଅନ୍ୟୋନ୍ୟବୈରଃ ସୁଖଲେଶହେତୋରନନ୍ତଦୁଃଖଂ ଚ ନ ବେଦ ମୂଢଃ ॥ ୫.୫.୧୬ ॥
କସ୍ତଂ ସ୍ୱୟଂ ତଦଭିଜ୍ଞୋ ବିପଶ୍ଚିଦବିଦ୍ୟାୟାମନ୍ତରେ ବର୍ତମାନମ୍ ।
ଦୃଷ୍ଟ୍ୱା ପୁନସ୍ତଂ ସଘୃଣଃ କୁବୁଦ୍ଧିଂ ପ୍ରୟୋଜୟେଦୁତ୍ପଥଗଂ ଯଥାନ୍ଧମ୍ ॥ ୫.୫.୧୭ ॥
ଗୁରୁର୍ନ ସ ସ୍ୟାତ୍ସ୍ୱଜନୋ ନ ସ ସ୍ୟାତ୍ପିତା ନ ସ ସ୍ୟାଜ୍ଜନନୀ ନ ସା ସ୍ୟାତ୍ ।
ଦୈବଂ ନ ତତ୍ସ୍ୟାନ୍ନ ପତିଶ୍ଚ ସ ସ୍ୟାନ୍ନ ମୋଚୟେଦ୍ୟଃ ସମୁପେତମୃତ୍ୟୁମ୍ ॥ ୫.୫.୧୮ ॥
ଇଦଂ ଶରୀରଂ ମମ ଦୁର୍ୱିଭାବ୍ୟଂ ସତ୍ତ୍ୱଂ ହି ମେ ହୃଦୟଂ ଯତ୍ର ଧର୍ମଃ ।
ପୃଷ୍ଠେ କୃତୋ ମେ ଯଦଧର୍ମ ଆରାଦତୋ ହି ମାମୃଷଭଂ ପ୍ରାହୁରାର୍ୟାଃ ॥ ୫.୫.୧୯ ॥
ତସ୍ମାଦ୍ଭବନ୍ତୋ ହୃଦୟେନ ଜାତାଃ ସର୍ୱେ ମହୀୟାଂସମମୁଂ ସନାଭମ୍ ।
ଅକ୍ଲିଷ୍ଟବୁଦ୍ଧ୍ୟା ଭରତଂ ଭଜଧ୍ୱଂ ଶୁଶ୍ରୂଷଣଂ ତଦ୍ଭରଣଂ ପ୍ରଜାନାମ୍ ॥ ୫.୫.୨୦ ॥
ଭୂତେଷୁ ବୀରୁଦ୍ଭ୍ୟ ଉଦୁତ୍ତମା ଯେ ସରୀସୃପାସ୍ତେଷୁ ସବୋଧନିଷ୍ଠାଃ ।
ତତୋ ମନୁଷ୍ୟାଃ ପ୍ରମଥାସ୍ତତୋଽପି ଗନ୍ଧର୍ୱସିଦ୍ଧା ବିବୁଧାନୁଗା ଯେ ॥ ୫.୫.୨୧ ॥
ଦେବାସୁରେଭ୍ୟୋ ମଘବତ୍ପ୍ରଧାନା ଦକ୍ଷାଦୟୋ ବ୍ରହ୍ମସୁତାସ୍ତୁ ତେଷାମ୍ ।
ଭବଃ ପରଃ ସୋଽଥ ବିରିଞ୍ଚବୀର୍ୟଃ ସ ମତ୍ପରୋଽହଂ ଦ୍ୱିଜଦେବଦେବଃ ॥
୫.୫.୨୨ ॥ var ବିରଞ୍ଚ
ନ ବ୍ରାହ୍ମଣୈସ୍ତୁଲୟେ ଭୂତମନ୍ୟତ୍ପଶ୍ୟାମି ବିପ୍ରାଃ କିମତଃ ପରଂ ତୁ ।
ଯସ୍ମିନ୍ନୃଭିଃ ପ୍ରହୁତଂ ଶ୍ରଦ୍ଧୟାହମଶ୍ନାମି କାମଂ ନ ତଥାଗ୍ନିହୋତ୍ରେ ॥ ୫.୫.୨୩ ॥
ଧୃତା ତନୂରୁଶତୀ ମେ ପୁରାଣୀ ଯେନେହ ସତ୍ତ୍ୱଂ ପରମଂ ପବିତ୍ରମ୍ ।
ଶମୋ ଦମଃ ସତ୍ୟମନୁଗ୍ରହଶ୍ଚ ତପସ୍ତିତିକ୍ଷାନୁଭବଶ୍ଚ ଯତ୍ର ॥ ୫.୫.୨୪ ॥
ମତ୍ତୋଽପ୍ୟନନ୍ତାତ୍ପରତଃ ପରସ୍ମାତ୍ସ୍ୱର୍ଗାପବର୍ଗାଧିପତେର୍ନ କିଞ୍ଚିତ୍ ।
ଯେଷାଂ କିମୁ ସ୍ୟାଦିତରେଣ ତେଷାମକିଞ୍ଚନାନାଂ ମୟି ଭକ୍ତିଭାଜାମ୍ ॥ ୫.୫.୨୫ ॥
ସର୍ୱାଣି ମଦ୍ଧିଷ୍ଣ୍ୟତୟା ଭବଦ୍ଭିଶ୍ଚରାଣି ଭୂତାନି ସୁତା ଧ୍ରୁବାଣି ।
ସମ୍ଭାବିତବ୍ୟାନି ପଦେ ପଦେ ବୋ ବିବିକ୍ତଦୃଗ୍ଭିସ୍ତଦୁ ହାର୍ହଣଂ ମେ ॥ ୫.୫.୨୬ ॥
ମନୋବଚୋଦୃକ୍କରଣେହିତସ୍ୟ ସାକ୍ଷାତ୍କୃତଂ ମେ ପରିବର୍ହଣଂ ହି ।
ବିନା ପୁମାନ୍ୟେନ ମହାବିମୋହାତ୍କୃତାନ୍ତପାଶାନ୍ନ ବିମୋକ୍ତୁମୀଶେତ୍ ॥ ୫.୫.୨୭ ॥
ଶ୍ରୀଶୁକ ଉବାଚ
ଏବମନୁଶାସ୍ୟାତ୍ମଜାନ୍ସ୍ୱୟମନୁଶିଷ୍ଟାନପି ଲୋକାନୁଶାସନାର୍ଥଂ
ମହାନୁଭାବଃ ପରମ ସୁହୃଦ୍ଭଗବାନୃଷଭାପଦେଶ
ଉପଶମଶୀଲାନାମୁପରତକର୍ମଣାଂ ମହାମୁନୀନାଂ ଭକ୍ତିଜ୍ଞାନବୈରାଗ୍ୟଲକ୍ଷଣଂ
ପାରମହଂସ୍ୟଧର୍ମମୁପଶିକ୍ଷମାଣଃ ସ୍ୱତନୟଶତଜ୍ୟେଷ୍ଠଂ
ପରମଭାଗବତଂ ଭଗବଜ୍ଜନପରାୟଣଂ ଭରତଂ ଧରଣିପାଲନାୟାଭିଷିଚ୍ୟ
ସ୍ୱୟଂ ଭବନ ଏବୋର୍ୱରିତଶରୀରମାତ୍ରପରିଗ୍ରହ ଉନ୍ମତ୍ତ
ଇବ ଗଗନପରିଧାନଃ ପ୍ରକୀର୍ଣକେଶ ଆତ୍ମନ୍ୟାରୋପିତାହବନୀୟୋ
ବ୍ରହ୍ମାବର୍ତାତ୍ପ୍ରବବ୍ରାଜ ॥ ୫.୫.୨୮ ॥
ଜଡାନ୍ଧମୂକବଧିରପିଶାଚୋନ୍ମାଦକବଦବଧୂତବେଷୋଽଭିଭାଷ୍ୟମାଣୋଽପି
ଜନାନାଂ ଗୃହୀତମୌନବ୍ରତସ୍ତୂଷ୍ଣୀଂ ବଭୂବ ॥ ୫.୫.୨୯ ॥
ତତ୍ର ତତ୍ର ପୁରଗ୍ରାମାକରଖେଟବାଟଖର୍ୱଟଶିବିରବ୍ରଜଘୋଷସାର୍ଥଗିରି-
ବନାଶ୍ରମାଦିଷ୍ୱନୁପଥମବନିଚରାପସଦୈଃ
ପରିଭୂୟମାନୋ ମକ୍ଷିକାଭିରିବ ବନଗଜସ୍ତର୍ଜନ
ତାଡନାବମେହନଷ୍ଠୀବନଗ୍ରାବଶକୃଦ୍ରଜଃପ୍ରକ୍ଷେପ-
ପୂତିବାତଦୁରୁକ୍ତୈସ୍ତଦବିଗଣୟନ୍ନେବାସତ୍ସଂସ୍ଥାନ
ଏତସ୍ମିନ୍ଦେହୋପଲକ୍ଷଣେ ସଦପଦେଶ ଉଭୟାନୁଭବସ୍ୱରୂପେଣ
ସ୍ୱମହିମାବସ୍ଥାନେନାସମାରୋପିତାହଂ ମମାଭିମାନତ୍ୱାଦବିଖଣ୍ଡିତମନଃ
ପୃଥିବୀମେକଚରଃ ପରିବଭ୍ରାମ ॥ ୫.୫.୩୦ ॥
ଅତିସୁକୁମାରକରଚରଣୋରଃସ୍ଥଲବିପୁଲବାହ୍ୱଂସଗଲବଦନାଦ୍ୟବୟବବିନ୍ୟାସଃ
ପ୍ରକୃତି ସୁନ୍ଦରସ୍ୱଭାବହାସସୁମୁଖୋ
ନବନଲିନଦଲାୟମାନଶିଶିରତାରାରୁଣାୟତନୟନରୁଚିରଃ
ସଦୃଶସୁଭଗକପୋଲକର୍ଣକଣ୍ଠନାସୋ ବିଗୂଢସ୍ମିତବଦନମହୋତ୍ସବେନ
ପୁରବନିତାନାଂ ମନସି କୁସୁମଶରାସନମୁପଦଧାନଃ
ପରାଗବଲମ୍ବମାନକୁଟିଲଜଟିଲକପିଶକେଶଭୂରିଭାରୋଽବଧୂତମଲିନନିଜ-
ଶରୀରେଣ ଗ୍ରହଗୃହୀତ ଇବାଦୃଶ୍ୟତ ॥ ୫.୫.୩୧ ॥
ଯର୍ହି ବାବ ସ ଭଗବାନ୍ଲୋକମିମଂ ଯୋଗସ୍ୟାଦ୍ଧା
ପ୍ରତୀପମିବାଚକ୍ଷାଣସ୍ତତ୍ପ୍ରତିକ୍ରିୟାକର୍ମ ବୀଭତ୍ସିତମିତି
ବ୍ରତମାଜଗରମାସ୍ଥିତଃ ଶୟାନ ଏବାଶ୍ନାତି ପିବତି ଖାଦତ୍ୟବମେହତି ହଦତି
ସ୍ମ ଚେଷ୍ଟମାନ ଉଚ୍ଚରିତ ଆଦିଗ୍ଧୋଦ୍ଦେଶଃ ॥ ୫.୫.୩୨ ॥
ତସ୍ୟ ହ ଯଃ ପୁରୀଷସୁରଭିସୌଗନ୍ଧ୍ୟବାୟୁସ୍ତଂ ଦେଶଂ ଦଶୟୋଜନଂ
ସମନ୍ତାତ୍ସୁରଭିଂ ଚକାର ॥ ୫.୫.୩୩ ॥
ଏବଂ ଗୋମୃଗକାକଚର୍ୟଯା ବ୍ରଜଂସ୍ତିଷ୍ଠନ୍ନାସୀନଃ ଶୟାନଃ
କାକମୃଗଗୋଚରିତଃ ପିବତି ଖାଦତ୍ୟବମେହତି ସ୍ମ ॥ ୫.୫.୩୪ ॥
ଇତି ନାନାୟୋଗଚର୍ୟାଚରଣୋ
ଭଗବାନ୍କୈବଲ୍ୟପତିରୃଷଭୋଽବିରତପରମମହାନନ୍ଦାନୁଭବ
ଆତ୍ମନି ସର୍ୱେଷାଂ ଭୂତାନାମାତ୍ମଭୂତେ ଭଗବତି ବାସୁଦେବ
ଆତ୍ମନୋଽବ୍ୟବଧାନାନନ୍ତରୋଦରଭାବେନ ସିଦ୍ଧସମସ୍ତାର୍ଥପରିପୂର୍ଣୋ
ଯୋଗୈଶ୍ୱର୍ୟାଣି ବୈହାୟସମନୋଜବାନ୍ତର୍ଧାନପରକାୟପ୍ରବେଶଦୂରଗ୍ରହଣାଦୀନି
ଯଦୃଚ୍ଛୟୋପଗତାନି ନାଞ୍ଜସା ନୃପ ହୃଦୟେନାଭ୍ୟନନ୍ଦତ୍ ॥ ୫.୫.୩୫ ॥
ଇତି ଶ୍ରୀମଦ୍ଭାଗବତେ ମହାପୁରାଣେ ପାରମହଂସ୍ୟାଂ ସଂହିତାୟାଂ ପଞ୍ଚମସ୍କନ୍ଧେ
ଋଷଭଦେବତାନୁଚରିତେ ପଞ୍ଚମୋଽଧ୍ୟାୟଃ ॥୫.୫ ॥
ରାଜୋବାଚ
ନ ନୂନଂ ଭଗବ ଆତ୍ମାରାମାଣାଂ
ଯୋଗସମୀରିତଜ୍ଞାନାବଭର୍ଜିତକର୍ମବୀଜାନାମୈଶ୍ୱର୍ୟାଣି ପୁନଃ କ୍ଲେଶଦାନି
ଭବିତୁମର୍ହନ୍ତି ଯଦୃଚ୍ଛୟୋପଗତାନି ॥ ୫.୬.୧ ॥
ଋଷିରୁବାଚ
ସତ୍ୟମୁକ୍ତଂ କିନ୍ତ୍ୱିହ ବା ଏକେ ନ ମନସୋଽଦ୍ଧା ବିଶ୍ରମ୍ଭମନବସ୍ଥାନସ୍ୟ
ଶଠକିରାତ ଇବ ସଙ୍ଗଚ୍ଛନ୍ତେ ॥ ୫.୬.୨ ॥
ତଥା ଚୋକ୍ତମ୍
ନ କୁର୍ୟାତ୍କର୍ହିଚିତ୍ସଖ୍ୟଂ ମନସି ହ୍ୟନବସ୍ଥିତେ ।
ଯଦ୍ୱିଶ୍ରମ୍ଭାଚ୍ଚିରାଚ୍ଚୀର୍ଣଂ ଚସ୍କନ୍ଦ ତପ ଐଶ୍ୱରମ୍ ॥ ୫.୬.୩ ॥
ନିତ୍ୟଂ ଦଦାତି କାମସ୍ୟ ଚ୍ଛିଦ୍ରଂ ତମନୁ ଯେଽରୟଃ ।
ଯୋଗିନଃ କୃତମୈତ୍ରସ୍ୟ ପତ୍ୟୁର୍ଜାୟେବ ପୁଂଶ୍ଚଲୀ ॥ ୫.୬.୪ ॥
କାମୋ ମନ୍ୟୁର୍ମଦୋ ଲୋଭଃ ଶୋକମୋହଭୟାଦୟଃ ।
କର୍ମବନ୍ଧଶ୍ଚ ଯନ୍ମୂଲଃ ସ୍ୱୀକୁର୍ୟାତ୍କୋ ନୁ ତଦ୍ବୁଧଃ ॥ ୫.୬.୫ ॥
ଅଥୈବମଖିଲଲୋକପାଲଲଲାମୋଽପି
ବିଲକ୍ଷଣୈର୍ଜଡବଦବଧୂତବେଷଭାଷାଚରିତୈରବିଲକ୍ଷିତ-
ଭଗବତ୍ପ୍ରଭାବୋ ଯୋଗିନାଂ ସାମ୍ପରାୟବିଧିମନୁଶିକ୍ଷୟନ୍ସ୍ୱକଲେବରଂ
ଜିହାସୁରାତ୍ମନ୍ୟାତ୍ମାନମସଂବ୍ୟବହିତମନର୍ଥାନ୍ତରଭାବେନାନ୍ୱୀକ୍ଷମାଣ
ଉପରତାନୁବୃତ୍ତିରୁପରରାମ ॥ ୫.୬.୬ ॥
ତସ୍ୟ ହ ବା ଏବଂ ମୁକ୍ତଲିଙ୍ଗସ୍ୟ ଭଗବତ ଋଷଭସ୍ୟ
ଯୋଗମାୟାବାସନୟା ଦେହ ଇମାଂ ଜଗତୀମଭିମାନାଭାସେନ ସଙ୍କ୍ରମମାଣଃ
କୋଙ୍କବେଙ୍କକୁଟକାନ୍ଦକ୍ଷିଣ କର୍ଣାଟକାନ୍ଦେଶାନ୍ୟଦୃଚ୍ଛୟୋପଗତଃ
କୁଟକାଚଲୋପବନ ଆସ୍ୟକୃତାଶ୍ମକବଲ ଉନ୍ମାଦ ଇବ ମୁକ୍ତମୂର୍ଧଜୋଽସଂବୀତ
ଏବ ବିଚଚାର ॥ ୫.୬.୭ ॥
ଅଥ ସମୀରବେଗବିଭୂତବେଣୁବିକର୍ଷଣଜାତୋଗ୍ରଦାବାନଲସ୍ତଦ୍ୱନମାଲେଲିହାନଃ
ସହ ତେନ ଦଦାହ ॥ ୫.୬.୮ ॥
ଯସ୍ୟ କିଲାନୁଚରିତମୁପାକର୍ଣ୍ୟ କୋଙ୍କବେଙ୍କକୁଟକାନାଂ
ରାଜାର୍ହନ୍ନାମୋପଶିକ୍ଷ୍ୟ କଲାବଧର୍ମ ଉତ୍କୃଷ୍ୟମାଣେ ଭବିତବ୍ୟେନ
ବିମୋହିତଃ ସ୍ୱଧର୍ମପଥମକୁତୋଭୟମପହାୟ କୁପଥପାଖଣ୍ଡମସମଞ୍ଜସଂ
ନିଜମନୀଷୟା ମନ୍ଦଃ ସମ୍ପ୍ରବର୍ତୟିଷ୍ୟତେ ॥ ୫.୬.୯ ॥
ଯେନ ହ ବାବ କଲୌ ମନୁଜାପସଦା ଦେବମାୟାମୋହିତାଃ
ସ୍ୱବିଧିନିୟୋଗଶୌଚଚାରିତ୍ରବିହୀନା ଦେବହେଲନାନ୍ୟପବ୍ରତାନି
ନିଜନିଜେଚ୍ଛୟା ଗୃହ୍ଣାନା ଅସ୍ନାନାନାଚମନାଶୌଚକେଶୋଲ୍ଲୁଞ୍ଚନାଦୀନି
କଲିନାଧର୍ମବହୁଲେନୋପହତଧିୟୋ ବ୍ରହ୍ମବ୍ରାହ୍ମଣୟଜ୍ଞପୁରୁଷଲୋକବିଦୂଷକାଃ
ପ୍ରାୟେଣ ଭବିଷ୍ୟନ୍ତି ॥ ୫.୬.୧୦ ॥
ତେ ଚ ହ୍ୟର୍ୱାକ୍ତନୟା ନିଜଲୋକୟାତ୍ରୟାନ୍ଧପରମ୍ପରୟାଽଽଶ୍ୱସ୍ତାସ୍ତମସ୍ୟନ୍ଧେ
ସ୍ୱୟମେବ ପ୍ରପତିଷ୍ୟନ୍ତି ॥ ୫.୬.୧୧ ॥
ଅୟମବତାରୋ ରଜସୋପପ୍ଲୁତକୈବଲ୍ୟୋପଶିକ୍ଷଣାର୍ଥଃ ॥ ୫.୬.୧୨ ॥
ତସ୍ୟାନୁଗୁଣାନ୍ ଶ୍ଲୋକାନ୍ଗାୟନ୍ତି
ଅହୋ ଭୁବଃ ସପ୍ତସମୁଦ୍ରବତ୍ୟା ଦ୍ୱୀପେଷୁ ବର୍ଷେଷ୍ୱଧିପୁଣ୍ୟମେତତ୍ ।
ଗାୟନ୍ତି ଯତ୍ରତ୍ୟଜନା ମୁରାରେଃ କର୍ମାଣି ଭଦ୍ରାଣ୍ୟବତାରବନ୍ତି ॥ ୫.୬.୧୩ ॥
ଅହୋ ନୁ ବଂଶୋ ଯଶସାବଦାତଃ ପ୍ରୈୟବ୍ରତୋ ଯତ୍ର ପୁମାନ୍ପୁରାଣଃ ।
କୃତାବତାରଃ ପୁରୁଷଃ ସ ଆଦ୍ୟଶ୍ଚଚାର ଧର୍ମଂ ଯଦକର୍ମହେତୁମ୍ ॥ ୫.୬.୧୪ ॥
କୋ ନ୍ୱସ୍ୟ କାଷ୍ଠାମପରୋଽନୁଗଚ୍ଛେନ୍ମନୋରଥେନାପ୍ୟଭବସ୍ୟ ଯୋଗୀ ।
ଯୋ ଯୋଗମାୟାଃ ସ୍ପୃହୟତ୍ୟୁଦସ୍ତା ହ୍ୟସତ୍ତୟା ଯେନ କୃତପ୍ରୟତ୍ନାଃ ॥ ୫.୬.୧୫ ॥
ଇତି ହ ସ୍ମ ସକଲବେଦଲୋକଦେବବ୍ରାହ୍ମଣଗବାଂ
ପରମଗୁରୋର୍ଭଗବତ ଋଷଭାଖ୍ୟସ୍ୟ ବିଶୁଦ୍ଧାଚରିତମୀରିତଂ
ପୁଂସାଂ ସମସ୍ତଦୁଶ୍ଚରିତାଭିହରଣଂ ପରମମହା-
ମଙ୍ଗଲାୟନମିଦମନୁଶ୍ରଦ୍ଧୟୋପଚିତୟାନୁଶୃଣୋତ୍ୟାଶ୍ରାବୟତି ବାବହିତୋ
ଭଗବତି ତସ୍ମିନ୍ୱାସୁଦେବ ଏକାନ୍ତତୋ ଭକ୍ତିରନୟୋରପି ସମନୁବର୍ତତେ ॥ ୫.୬.୧୬ ॥
ଯସ୍ୟାମେବ କବୟ ଆତ୍ମାନମବିରତଂ
ବିବିଧବୃଜିନସଂସାରପରିତାପୋପତପ୍ୟମାନମନୁସବନଂ ସ୍ନାପୟନ୍ତସ୍ତୟୈବ
ପରୟା ନିର୍ୱୃତ୍ୟା ହ୍ୟପବର୍ଗମାତ୍ୟନ୍ତିକଂ ପରମପୁରୁଷାର୍ଥମପି ସ୍ୱୟମାସାଦିତଂ
ନୋ ଏବାଦ୍ରିୟନ୍ତେ ଭଗବଦୀୟତ୍ୱେନୈବ ପରିସମାପ୍ତସର୍ୱାର୍ଥାଃ ॥ ୫.୬.୧୭ ॥
ରାଜନ୍ପତିର୍ଗୁରୁରଲଂ ଭବତାଂ ଯଦୂନାଂ
ଦୈବଂ ପ୍ରିୟଃ କୁଲପତିଃ କ୍ୱ ଚ କିଙ୍କରୋ ବଃ ।
ଅସ୍ତ୍ୱେବମଙ୍ଗ ଭଗବାନ୍ଭଜତାଂ ମୁକୁନ୍ଦୋ
ମୁକ୍ତିଂ ଦଦାତି କର୍ହିଚିତ୍ସ୍ମ ନ ଭକ୍ତିୟୋଗମ୍ ॥ ୫.୬.୧୮ ॥
ନିତ୍ୟାନୁଭୂତନିଜଲାଭନିବୃତ୍ତତୃଷ୍ଣଃ
ଶ୍ରେୟସ୍ୟତଦ୍ରଚନୟା ଚିରସୁପ୍ତବୁଦ୍ଧେଃ ।
ଲୋକସ୍ୟ ଯଃ କରୁଣୟାଭୟମାତ୍ମଲୋକମ୍
ଆଖ୍ୟାନ୍ନମୋ ଭଗବତେ ଋଷଭାୟ ତସ୍ମୈ ॥ ୫.୬.୧୯ ॥
ଇତି ଶ୍ରୀମଦ୍ଭାଗବତେ ମହାପୁରାଣେ ପାରମହଂସ୍ୟାଂ ସଂହିତାୟାଂ ପଞ୍ଚମସ୍କନ୍ଧେ
ଋଷଭଦେବତାନୁଚରିତେ ଷଷ୍ଠୋଽଧ୍ୟାୟଃ ॥୫.୬ ॥
– Chant Stotra in Other Languages –
Rishabha Gita in Sanskrit – English – Bengali – Gujarati – Kannada – Malayalam – Odia – Telugu – Tamil