॥ Brahma Gita of Yoga Vasishtha Bengali Lyrics ॥
॥ ব্রহ্মগীতা যোগবাসিষ্ঠান্তর্গতা ॥
Yoga Vasishtha – MokSha-Nirvana Uttarardha Brahmagita – Chs. 173-186
॥ যোগবাসিষ্ঠান্তর্গতা ব্রহ্মগীতা ॥
সর্গ-ক্রমাংক নাম শ্লোকসংখ্যা
১ – ১৭৩ পরমার্থোপদেশঃ ৩৪
২ – ১৭৪ নির্বাণোপদেশঃ ৩০
৩ – ১৭৫ অদ্বৈতয়ুক্তিঃ ৭৯
৪ – ১৭৬ ব্রহ্মাণ্ডোপাখ্যানম্ ২৫
৫ – ১৭৭ সত্যবর্ণনম্ ৪৪
৬ – ১৭৮ ঐন্দবোপাখ্যানম্ ৬৪
৭ – ১৭৯ ব্রহ্মময়ৎবপ্রতিপাদনম্ ২২
৮ – ১৮০ তাপসোপাখ্যানম্ ৪১
৯ – ১৮১ গৌর্যাশ্রমবর্ণনম্ ৩৯
১০ – ১৮২ সপ্তদীপেশ্বর ৫৩
১১ – ১৮৩ দ্বীপসপ্কাষ্টকবর্ণনম্ ৭০
১৩ – ১৮৫ কুন্দদন্তপ্রবোধঃ ২৭
১৪ – ১৮৬ সর্বং খল্বিদং ব্রহ্মেতি- ৯০
প্রতিপাদনয়োগোপদেশঃ
৬১৮
॥ অথ প্রারভ্যতে যোগবাসিষ্ঠান্তর্গতা ব্রহ্মগীতা ॥
শ্রীরাম উবাচ ।
সর্বানুভবরূপস্য তথা সর্বাত্মনোঽপ্যযম্ ।
অনংতস্যাত্মতত্ত্বস্য দেহেঽপি কিমহংগ্রহঃ ॥ ১ ॥
চিতঃ পাষাণকাষ্ঠৎবং স্বপ্নাদিষু কথং ভবেৎ ।
ইদং পাষাণকাষ্ঠাদি কথং নাস্ত্যস্তি বা কথম্ ॥ ২ ॥
বসিষ্ঠ উবাচ ।
শরীরিণো যথা হস্তে হস্ততায়াং যথাগ্রহঃ ।
সর্বাত্মনস্তথা দেহে দেহতায়াং তথাগ্রহঃ ॥ ৩ ॥
পাদপস্থ যথা পত্রে পত্রতায়াং যথাগ্রহঃ ।
সর্বাত্মনস্তথা বৃক্ষে বৃক্ষতায়াং তথাগ্রহঃ ॥ ৪ ॥
আকাশস্য যথা শূন্যে শূন্যতায়াং যথাগ্রহঃ ।
সর্বাত্মনস্তথা দ্রব্যে দ্রব্যতায়াং তথাগ্রহঃ ॥ ৫ ॥
স্বপ্নোচিতঃ স্বপ্নপুরে রূপতায়াং যথাগ্রহঃ ।
সর্বাত্মনস্তথা স্বপ্নজাগ্রদাদৌ তথাগ্রহঃ ॥ ৬ ॥
যথাগেন্দ্রে দৃষদ্দৃক্ষবার্যাদৌ স তথাগ্রহঃ ।
তথা সর্বাত্মনোঽগেন্দ্রপুরতায়াং তথাগ্রহঃ ॥ ৭ ॥
শরীরস্য যথা কেশনখাদিষু যথাগ্রহঃ ।
সর্বাত্মনস্তথা কাষ্ঠদৃষদাদৌ তথাগ্রহঃ ॥ ৮ ॥
চিত এব যথা স্বপ্নে ভবেৎকাষ্ঠোপলাদিতা ।
চিদাকাশস্য সর্গাদৌ তথৈবাবয়বাদিতা ॥ ৯ ॥
চেতনাচেতনাত্মৈকং পুরুষস্য যথা বপুঃ ।
নখকেশজলাকাশধর্মমাকারভাসুরম্ ॥ ১০ ॥
চেতনাচেতনাত্মৈকং তথা সর্বাত্মনো বপুঃ ।
জংগমং স্থাবরময়ং কিংতু নিত্যমনাকৃতি ॥ ১১ ॥
যথাস্থিতং শাম্যতীদং সম্যগ্জ্ঞানবতো জগৎ ।
স্বপ্নে স্বপ্নপরিজ্ঞাতুর্যথা দৃষ্টার্থসংভ্রমঃ ॥ ১২ ॥
চিন্মাত্রাকাশমেবেদং ন দ্রষ্টাস্তি ন দৃশ্যতা ।
ইতি মৌনমলং স্বপ্নদ্রষ্টুর্যৎসা প্রবুদ্ধতা ॥ ১৩ ॥
কল্পকোটিসহস্রাণি সর্গা আয়ান্তি যান্তি চ ।
ত এবান্যে চ চিদ্ব্যোম্নি জলাবর্তা ইবার্ণবে ॥ ১৪ ॥
করোত্যব্ধৌ যথোর্ম্যাদৌ নানা কচকচং বপুঃ ।
চিৎকরোতি তথা সংজ্ঞাঃ সর্গাদ্যাশ্চেতনে নিজে ॥ ১৫ ॥
যথাস্থিতমিদং বিশ্বং ব্রহ্মৈবানাময়ং সদা ।
তত্ত্বজ্ঞং প্রত্যতত্ত্বজ্ঞজনতানিশ্চয়াদৃতে ॥ ১৬ ॥
নাহং তরংগঃ সলিলমহমিত্যেব যুক্তিতঃ ।
বুদ্ধং যেন তরংগেণ কুতস্তস্য তরংগতা ॥ ১৭ ॥
ব্রহ্মণোঽস্য তরংগৎবমিবাভানং যতস্ততঃ ।
তরংগৎবাতরংগৎবে ব্রাহ্ম্যৌ শক্তী স্থিতিং গতে ॥ ১৮ ॥
চিদ্ব্যোম্নোঽত্যজতো রূপং স্বপ্নবদ্ব্যস্তবেদনম্ ।
তদিদং হি মনো রাম ব্রহ্মেত্যুক্তঃ পিতামহঃ ॥ ১৯ ॥
এবমাদ্যঃ প্রজানাথো নিরাকারো নিরাময়ঃ ।
চিন্মাত্ররূপসংকল্পপুরবৎকারণোজ্ঝিতঃ ॥ ২০ ॥
যেনাংগদৎবং নাস্তীতি বুদ্ধং হেমাংগদেন বৈ ।
অংগদৎবং কুতস্তস্য তস্য শুদ্ধেব হেমতা ॥ ২১ ॥
অজে সংকল্পমাত্রাত্মচিন্মাত্রব্যোমদেহিনি ।
অহং ৎবং জগদিত্যাদি যদ্বিভাতং তদেব তৎ ॥ ২২ ॥
চিচ্চমৎকৃতয়ো ভান্তি যাশ্চিদ্ব্যোমনি শূন্যতাঃ ।
এতাস্তাঃ সর্গসংহারস্থিতিসংরভসংবিদঃ ॥ ২৩ ॥
অচ্ছং চিন্মাত্রনভসঃ কচনং স্বয়মেব তৎ ।
স্বপ্নাভং চিত্ততামাত্রং স এষ প্রপিতামহঃ ॥ ২৪ ॥
যথা তরংগস্তেনৈব রূপেণান্যেন বানিশম্ ।
স্ফুরত্যেবমনাদ্যন্তঃ সর্গপ্রলয়বিভ্রমঃ ॥ ২৫ ॥
চিদ্ব্যোম্নঃ কচনং কান্তং যদ্বিরাডিতি শব্দিতম্ ।
ভবেৎসংকল্পপুরবত্তস্য কুর্যান্মনোঽপি বৈ ॥ ২৬ ॥
সর্গঃ স্বপ্নঃ স্বপ্ন এব জাগ্রদ্দেহঃ স এব চ ।
ঘনং সুষুপ্তং তৈমির্যাদ্যথা সংবেদনং ভবেৎ ॥ ২৭ ॥
তস্য কল্পান্তরজনী শিরোরুহতয়োদিতা ।
প্রকাশতমসী কালক্রিয়াখ্যাঃ স্বাংগসংধয়ঃ ॥ ২৮ ॥
তস্যাগ্নিরাস্যং দ্যৌর্মূর্ধা খং নাভিশ্চরণৌ ক্ষিতিঃ ।
চংদ্রার্কৌ দৃগ্দিশৌ শ্রোত্রে কল্পনেতি বিজৃম্ভিতা ॥ ২৯ ॥
এবং সম্যগ্দৃশ্যমানো ব্যোমাত্মা বিততাকৃতিঃ ।
অস্মৎসংকল্পশৈলাভো বিরাট্ স্বপ্নাকৃতিস্থিতঃ ॥ ৩০ ॥
যচ্চ চেতচ্চিদাকাশে স্বয়ং কচকচায়তে ।
তদেতজ্জগদিত্যেবং তেনাত্মৈবানুভূয়তে ॥ ৩১ ॥
বিরাডাত্মৈবমাকাশং ভাতি চিন্ময়মাততম্ ।
স্বভাবস্বপ্ননগরং নগনাগময়াত্মকম্ ॥ ৩২ ॥
অনুভবিতৈবানুভবং সত্যং স্বাত্মানমপ্যসন্তমিব ।
অনুভবতীয়ত্ত্বেন স্বপ্ননটঃ স্বপ্নদেশমিব ॥ ৩৩ ॥
বেদান্তার্হতসাংখ্যসৌগতগুরুত্র্যক্ষাদিসূক্তাদৃশো
ব্রহ্মৈব স্ফুরিতং তথাত্মকলয়াস্তাদাত্মনিত্যং যতঃ ।
তেষাং চাত্মবিদোঽনুরূপমখিলং স্বর্গং ফলং তদ্ভব-
ত্যস্য ব্রহ্মণ ঈদৃগেব মহিমা সর্বাত্ম যত্তদ্বপুঃ ॥ ৩৪ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু পরমার্থোপদেশো
নাম ত্রিসপ্তত্যধিকশততমঃ সর্গঃ ॥ ১৭৩ ॥ -১-
॥ অথ দ্বিতীয়োঽধ্যাঃ ॥
॥ নির্বাণোপদেশঃ ॥
বসিষ্ঠ উবাচ ।
সর্গাদৌ স্বপ্নসংবিত্যা চিদেবাভাতি কেবলা ।
জগদিত্যবভাসেব ব্রহ্মৈবাতো জগত্ত্রয়ম্ ॥ ১ ॥
সর্গাস্তরংগা ব্রহ্মাব্ধেস্তেষু সংবেদনং দ্রবঃ ।
সর্গান্তরং সুখাদ্যাত্ম দ্বৈত্যৈক্যাদীতরৎকুতঃ ॥ ২ ॥
যথা স্বপ্নসুষুপ্তাত্ম নিদ্রারূপকমেব খম্ ।
দৃশ্যাদৃশ্যাংশমেকাত্ম রূপং চিন্নভস্তথা ॥ ৩ ॥
জাগ্রতি স্বপ্ননগরং যাদৃক্তাদৃগিদং জগৎ ।
পরিজ্ঞাতং ভবেদত্র কথামাস্থা বিবেকিনঃ ॥ ৪ ॥
সর্গাদৌ সর্গসংবিত্তের্যথাভূতার্থবেদনাৎ ।
জাগ্রতি স্বাপ্ননগরং যাদৃশং তাদৃশং জগৎ ॥ ৫ ॥
জাগ্রতি স্বপ্ননগরবাসনা বিবিধা যথা ।
সত্যা অপি ন সত্যাস্তা জাগ্রত্যো বাসনাস্তথা ॥ ৬ ॥
অন্যথোপপ্রপদ্যেহ কল্প্যতে যদি কারণম্ ।
তৎকিং নেদীয়সী নাত্র ভ্রান্ততা কল্প্যতে তথা ॥ ৭ ॥
স্বানুভূয়ত এবেয়ং ভ্রান্তিঃ স্বপ্নজগৎস্বিব ।
কারণং ৎবনুমাসাধ্যং ক্বানুমানুভবাধিকা ॥ ৮ ॥
দৃষ্টমপ্যস্তি যন্নেশে ন চাত্মনি বিচারিতম্ ।
অন্যথানুপপত্ত্যান্তর্ভ্রান্ত্যাত্ম স্বপ্নশৈলবৎ ॥ ৯ ॥
নির্বিকল্পং পরং জাড্যং সবিকল্পং তু সংসৃতিঃ ।
ধ্যানং তেন সমাধানং ন সংভবতি কিংচন ॥ ১০ ॥
সচেত্যং সংসৃতির্ধ্যানমচেত্যং তূপলস্থিতি ।
মোক্ষো নোপলবদ্ভানং ন বিকল্পাত্মকং ততঃ ॥ ১১ ॥
ন চ নামোপলাভেন নির্বিকল্পসমাধিনা ।
অন্যদাসাদ্যতে কিংচিল্লভ্যতে কিং স্বনিদ্রয়া ॥ ১২ ॥
তস্মাৎসম্যক্পরিজ্ঞানাদ্ভ্রান্তিমাত্রং বিবেকিনঃ ।
সর্গাত্যন্তাসংভবতো যো জীবন্মুক্ততোদয়ঃ ॥ ১৩ ॥
নির্বিকল্পং সমাধানং তদনন্তমিহোচ্যতে ।
যথাস্থিতমবিক্ষুব্ধমাসনং সর্বভাসনম্ ॥ ১৪ ॥
তদনন্তসুষুপ্তাখ্যং তত্তুরীয়মিতি স্মৃতম্ ।
তন্নির্বাণমিতি প্রোক্তং তন্মোক্ষ ইতি শব্দিতম্ ॥ ১৫ ॥
সম্যগ্বোধৈকঘনতা যাসৌ ধ্যানমিতি স্মৃতম্ ।
দৃশ্যাত্যন্তাসংভবাত্ম বোধমাহুঃ পরং পদম্ ॥ ১৬ ॥
তচ্চ নোপলবজ্জাড্যং ন সুষুপ্তোপমং ভবেৎ ।
ন নির্বিকল্পং ন চ বা সবিকল্পং ন বাপ্যসৎ ॥ ১৭ ॥
দৃশ্যাত্যন্তাসংভবাত্ম তদেবাদ্যং হি বেদনম্ ।
তৎসর্বং তন্ন কিংচিচ্চ তদ্বদেবাংগ বেত্তি তৎ ॥ ১৮ ॥
সম্যক্প্রবোধান্নির্বাণং পরং তৎসমুদাহৃতম্ ।
যথাস্থিতমিদং বিশ্বং তত্রালংপ্রলয়ং গতম্ ॥ ১৯ ॥
ন তত্র নানানানা ন ন চ কিংচিন্ন কিংচন ।
সমস্তসদ সদ্ভাবসীমান্তঃ স উদাহৃতঃ ॥ ২০ ॥
অত্যন্তাসংভবং দৃশ্যং যদ্বৈ নির্বাণমাসিতম্ ।
শুদ্ধবোধোদয়ং শান্তং তদ্বিদ্ধি পরমং পদম্ ॥ ২১ ॥
স চ সম্প্রাপ্যতে শুদ্ধো বোধো ধ্যানমনুত্তমম্ ।
শাস্ত্রাৎপদপদার্থজ্ঞবোধিনোৎপন্নবুদ্ধিনা ॥ ২২ ॥
মোক্ষোপায়াভিধং শাস্ত্রমিদং বাচয়তানিশম্ ।
বুদ্ধ্যুপায়েন শুদ্ধেন পুংসা নান্যেন কেনচিৎ ॥ ২৩ ॥
ন তীর্থেন ন দানেন ন স্নানেন ন বিদ্যযা ।
ন ধ্যানেন ন যোগেন ন তপোভির্ন চাধ্বরৈঃ ॥ ২৪ ॥
ভ্রান্তিমাত্রং কিলেদং সদসৎসদিব লক্ষ্যতে ।
ব্যোমৈব জগদাকারং স্বপ্নোঽনিদ্রে চিদংবরে ॥ ২৫ ॥
ন শাম্যতি তপস্তীর্থৈর্ভ্রান্তির্নাম কদাচন ।
তপস্তীর্থাদিনা স্বর্গাঃ প্রাপ্যন্তে ন তু মুক্ততা ॥ ২৬ ॥
ভ্রান্তিঃ শাম্যতি শাস্ত্রার্থাৎসম্যগ্বুদ্ধ্যাবলোকিতাৎ ।
আত্মজ্ঞানময়ান্মোক্ষোপায়াদেবেহ নান্যতঃ ॥ ২৭ ॥
আলোককারিণাত্যর্থং শাস্ত্রার্থেনৈব শাম্যতি ।
অমলেনাখিলা ভ্রান্তিঃ প্রকাশেনৈব তামসী ॥ ২৮ ॥
সর্গসংহারসংস্থানাং ভাসো ভান্তি চিদংবরে ।
স্পন্দনানীব মরুতি দ্রবৎবানীব বারিণি ॥ ২৯ ॥
দ্রব্যস্য হৃদ্যেব চমৎকৃতির্নিজা
নভস্বতঃ স্পন্দ ইবানিশং যথা ।
যথা স্থিতা সৃষ্টিরিয়ং তথাস্তিতা
লয়ং নভস্যন্তরনন্যরূপিণী ॥ ৩০ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু নির্বাণোপদেশো
নাম চতুঃসপ্তত্যধিকশততমঃ সর্গঃ ॥ ১৭৪ ॥ -২-
॥ অথ তৃতীয়োঽধ্যায়ঃ ॥
॥ অদ্বৈতয়ুক্তিঃ ॥
বসিষ্ঠ উবাচ ।
স্বপ্নাভমাদ্যং চিদ্ব্যোম কারণং দেহসংবিদাম্ ।
দৃশ্যান্যতা সংভবতশ্চিদ্ব্যোম্নস্তৎকুতো বপুঃ ॥ ১ ॥
সর্গাদৌ স্বপ্নসংবিত্তিরূপং সর্বং বিনানঘ ।
ন সর্গো ন পরো লোকো দৃশ্যমানোঽপি সিধ্যতি ॥ ২ ॥
অসদেবানুভূরিত্থমেবেদং ভাসতে জগৎ ।
স্বপ্নাংগনাসংগ ইব শান্তং চিদ্ব্যোম কেবলম্ ॥ ৩ ॥
এবং নামাস্তি চিদ্ধাতুরনাদিনিধনোঽমলঃ ।
শূন্যাত্মৈবাচ্ছরূপোঽপি জগদিত্যবভাতি যঃ ॥ ৪ ॥
মলস্ত্বেষোঽপরিজ্ঞাতঃ পরিজ্ঞাতঃ পরং ভবেৎ ।
কুতঃ কিল পরে ব্যোমন্যনাদিনিধনে মলঃ ॥ ৫ ॥
যদেতদ্বেদনং শুদ্ধং তদেব স্বপ্নপত্তনম্ ।
জগত্তদেব সর্গাদৌ পৃথ্ব্যাদেঃ সংভবঃ কুতঃ ॥ ৬ ॥
চিদ্ব্যোমাত্মাবভাসস্য নভসঃ সর্গরূপিণী ।
কৃতা পৃথ্ব্যাদিকলতা মনোবুদ্ধ্যাদিতা তথা ॥ ৭ ॥
বার্যাবর্ত ইঅবাভাতি পবনস্পংদবচ্চ যৎ ।
অবুদ্ধিপূর্বং চিদ্ব্যোম্নি জগদ্ভানমভিত্তিমৎ ॥ ৮ ॥
পশ্চাত্তস্যৈব তেনৈব স্বয়মৈশ্বর্যশংসিনা ।
কৃতং বুদ্ধ্যাদিপৃথ্ব্যাদিকল্পনং সদসন্ময়ম্ ॥ ৯ ॥
স্বয়মেব কচত্যচ্ছাচ্ছায়েয়ং স্বা মহাচিতিঃ ।
সর্গাভিধানমস্যৈব নভ এবেহ নেতরৎ ॥ ১০ ॥
ন চ কিংচন নামাংগ কচত্যচ্ছৈব সা স্মৃতা ।
চিন্মাত্রৈকৈককলনং ততমেবাত্মনাত্মনি ॥ ১১ ॥
চিদাকাশশ্চিদাকাশে তদিদং স্বমল বপুঃ ।
চিত্তং দৃশ্যমিবাভাতি স্বপ্নে তথা স্থিতম্ ॥ ১২ ॥
অন্যথানুপপন্যার্থকারণাভাবতঃ স্বতঃ ।
সর্গাদাবেব স্বাত্মৈব দৃশ্যং চিদ্ব্যোম পশ্যতি ॥ ১৩ ॥
স্বপ্নবত্তচ্চ নির্ধর্ম মনাগপি ন ভিদ্যতে ।
তস্মাচ্চিদ্ব্যোম চিদ্ব্যোম শূন্যৎবং গগনাদিবৎ ॥ ১৪ ॥
যদেব তৎপরং ব্রহ্ম সর্বরূপবিবর্জিতম্ ।
তদেবৈকং তথারূপমেবং সর্বতয়া স্থিতম্ ॥ ১৫ ॥
স্বপ্নেঽনুভূয়তে চৈতৎস্বপ্নো হ্যাত্মৈব ভাসতে ।
নানাবোধমনানৈব ব্রহ্মৈবামলমেব তৎ ॥ ১৬ ॥
ব্রহ্মৈবাত্মনি চিদ্ভাবাজ্জীবৎবমিব কল্পয়ৎ ।
রূপমন্যজদেবাচ্ছং মনস্তামিব গচ্ছতি ॥ ১৭ ॥
ইদং সর্বং তনোতীব তচ্চ খাত্মকমেব খম্ ।
ভবতীব জগদ্রূপং বিকারীবাবিকার্যপি ॥ ১৮ ॥
মন এব স্বয়ং ব্রহ্মা স সর্গম্য হৃদি স্থিতঃ ।
করোত্যবিরতং সর্বমজস্রং সংহরত্যপি ॥ ১৯ ॥
পৃথ্বাদিরহিতো যস্মিন্মনোহৃদ্যংগবর্জিতে ।
অন্যদ্বা ত্রিজগদ্ভাতি যথা স্বপ্নে নিরাকৃতি ॥ ২০ ॥
দেহরূপজগদ্রূপৈরহমেকমনাকৃতি ।
মনস্তিষ্ঠাম্যনংতাত্মবোধাবোধং পরাভবম্ ॥ ২১ ॥
নেহ পৃথ্ব্যাদি নো দেহো ন চৈবান্যাস্তি দৃশ্যতা ।
জগত্রয়া কেবলং খং মনঃ কচকচায়তে ॥ ২২ ॥
বিচার্যদৃষ্ট্যৈতদপি ন কিংচিদপি বিদ্যতে ।
কেবলং ভাতি চিন্মাত্রমাত্মনাত্মনি নির্ধনম্ ॥ ২৩ ॥
যতো বাচো নিবর্তন্তে তূষ্ণীংভাবোঽবশিষ্যতে ।
ব্যবহার্যপি খাত্মৈব তদ্বত্তিষ্ঠতি মূকবৎ ॥ ২৪ ॥
অনন্তাপারপর্যন্তা চিন্মাত্রপরমেষ্টকা ।
তূষ্ণীংভূৎবা ভবত্যেষ প্রবুদ্ধঃ পুরুষোত্তমঃ ॥ ২৫ ॥
অবুদ্ধিপূর্বং দ্রবতো যথাবর্তাদয়োংঽভসি ।
ক্রিয়ন্তে ব্রহ্মণা তদ্বচ্চিত্তবুদ্ধ্যাদয়ো জডাঃ ॥ ২৬ ॥
অবুদ্ধিপূর্বং বাতেন ক্রিয়তে স্পংদনং যথা ।
অনন্যদেবং বুদ্ধ্যাদি ক্রিয়তে পরমাত্মনা ॥ ২৭ ॥
অনন্যদাত্মনো বায়োর্যথা স্পংদনমব্যযম্ ।
অনন্যদাত্মনস্তদ্বচ্চিন্মাত্রং পরমাত্মনঃ ॥ ২৮ ॥
চিদ্ব্যোম ব্রহ্মচিন্মাত্রমাত্মা চিতি মহানিতি ।
পরমাত্মেতি পর্যায়া জ্ঞেয়া জ্ঞানবতাং বর ॥ ২৯ ॥
ব্রহ্মোন্মেষনিমেষাত্ম স্পংদাস্পংদাত্ম বাতবৎ ।
নিমেষো যাদৃগেবাস্য সমুন্মেষস্তথা জগৎ ॥ ৩০ ॥
দৃশ্যমস্য সমুন্মেষো দৃশ্যাভাবো নিমেষণম্ ।
একমেতন্নিরাকারং তদ্দ্বয়োরপ্যুপক্ষয়াৎ ॥ ৩১ ॥
নিমেষোন্মেষয়োরেকরূপমেব পরং মতম্ ।
অতোঽস্তি দৃশ্যং নাস্তীতি সদসচ্চ সদাচিতিঃ ॥ ৩২ ॥
নিমেষো নান্য উন্মেষান্নোন্মেষোঽপি নিমেষতঃ ।
ব্রহ্মণঃ সর্গবপুষো নিমেষোন্মেষরূপিণঃ ॥ ৩৩ ॥
তদ্যথাস্থিতমেবেদং বিদ্ধি শান্তমশেষতঃ ।
অজাতমজরং ব্যোম সৌম্যং সমসমং জগৎ ॥ ৩৪ ॥
চিদচিত্যাত্মকং ব্যোম রূপং কচকচায়তে ।
চিন্নাম তদিদং ভাতি জগদিত্যেব তদ্বপুঃ ॥ ৩৫ ॥
ন নশ্যতি ন চোৎপন্নং দৃশ্যং নাপ্যনুভূয়তে ।
স্বয়ং চমৎকরোত্যন্তঃ কেবলং কেবলৈব চিৎ ॥ ৩৬ ॥
মহাচিদ্ব্যোমমণিভা দৃশ্যনাম্নী নিজাকরাৎ ।
অনন্যান্যেব ভাতাপি ভানুভাস ইবোষ্ণতা ॥ ৩৭ ॥
সুষুপ্তং স্বপ্নবদ্ভাতি ব্রহ্মৈব সর্গবৎ ।
সর্বমেকং শিবং শান্তং নানেবাপি স্থিতং স্ফুরৎ ॥ ৩৮ ॥
যদ্যৎসংবেদ্যতে যাদৃক্সদ্বাসদ্বা যথা যদা ।
তথানুভূয়তে তাদৃক্তৎসদস্ত্বসদস্তু বা ॥ ৩৯ ॥
অন্যথানুপপত্যা চেৎকারণং পরিকল্প্যতে ।
তৎস্বপ্নাভো জগদ্ভাবাদন্যথা নোপপদ্যতে ॥ ৪০ ॥
প্রমাতীতাৎপরাদ্বিশ্বমনন্যদুদিতং যতঃ ।
প্রমাতীতমিদং চৈব কিংচিন্নাভ্যুদিতং ততঃ ॥ ৪১ ॥
যস্য যদ্রসিকং চিত্তং তত্তথা তস্য গচ্ছতি ।
ব্রহ্মৈকরসিকং তেন মনস্তত্তাং সমশ্নুতে ॥ ৪২ ॥
যচ্চিত্তো যদ্গতপ্রাণো জনো ভবতি সর্বদা ।
তত্তেন বস্ত্বিতি জ্ঞাতং জানাতি তদসৌ স্ফুটম্ ॥ ৪৩ ॥
ব্রহ্মৈকরসিকং যৎস্যান্মনস্তত্তদ্ভবেৎক্ষণাৎ ।
যস্য যদ্রসিকং চেতো বুদ্ধং তেন তদেব সৎ ॥ ৪৪ ॥
বিশ্রান্তং যস্য বৈ চিত্তং জন্তোস্তৎপরমার্থসৎ ।
ব্যবহৃত্যৈ করোত্যন্যৎসদাচারাদতদ্রসম্ ॥ ৪৫ ॥
দ্বিৎবৈকৎবাদিকলনা নেহ কাচন বিদ্যতে ।
সত্তামাত্রং চ দৃগিয়মিতশ্চেদলমীক্ষ্যতে ॥ ৪৬ ॥
অদৃশ্যদৃশ্যসদসন্মূর্তামূর্তদৃশামিহ ।
নৈবাস্তি ন চ নাস্ত্যেব কর্তা ভোক্তাথবা ক্বচিৎ ॥ ৪৭ ॥
ইদমিত্থমনাদ্যন্তং জগৎপর্যায়মাত্মনি ।
ব্রহ্মৈকঘনমাশান্তং স্থিতং স্থাণুরিবাধ্বনি ॥ ৪৮ ॥
যদেব ব্রহ্মবুদ্ধ্যাদি তদেবৈতন্নিরংজনম্ ।
যদেব গগনং শান্তং শূন্যং বিদ্ধি তদেব তৎ ॥ ৪৯ ॥
কেশোণ্ড্রকাদয়ো ব্যোম্নি যথা সদসদাত্মকাঃ ।
দ্বিতামিবাগতা ভান্তি পরে বুদ্ধ্যাদয়স্তথা ॥ ৫০ ॥
তথা বুদ্ধ্যাদি দেহাদি বেদনাদি পরাপরে ।
অনেকান্যপ্যনন্যানি শূন্যৎবানি যথাংবরে ॥ ৫১ ॥
সুষুপ্তাদ্বিশতঃ স্বপ্নমেকনিদ্রাত্মনো যথা ।
সর্গস্থস্যাপি ন দ্বিৎবং নৈকৎবং ব্রহ্মণস্তথা ॥ ৫২ ॥
এবমেব কচত্যচ্ছা ছায়েয়ং স্বা মহাচিতেঃ ।
ন চ কিংচন নামাংগ কচত্যচ্ছৈবমাস্থিতা ॥ ৫৩ ॥
চিদ্ব্যোম্নি হি চিদাকাশমেব স্বমমলং বপুঃ ।
চেত্যং দৃশ্যমিবাভাতি স্বপ্নেষ্বিব যথাস্থিতম্ ॥ ৫৪ ॥
অন্যথানুপপত্ত্যার্থকারণাভাবতঃ স্বতঃ ।
চিদ্ব্যোমাত্মানমেবাদৌ দৃশ্যমিত্যেব পশ্যতি ॥ ৫৫ ॥
সর্গাদাবেব খাত্মৈব দৃশ্যং ভাতি নিরাকৃতি ।
সংভ্রমঃ স্বপ্নসংকল্পমিথ্যাজ্ঞানেষ্বিবাভিতঃ ॥ ৫৬ ॥
স্বপ্নবত্তচ্চ নির্ধর্ম মনাগপি ন ভিদ্যতে ।
বিকার্যপি সধর্মাপি চিদ্ব্যোম্নো বস্তুনো মলাৎ ॥ ৫৭ ॥
তৎস্বপ্ননগরাকারং সধর্মাপ্যসধর্মকম্ ।
শিবাদনন্যমেবেত্থং স্থিতমেব নিরন্তরম্ ॥ ৫৮ ॥
দৃশ্যং স্বপ্নাদ্রিবৎস্বচ্ছং মনাগপি ন ভিদ্যতে ।
তস্মাচ্চিদ্ব্যোম চিদ্ব্যোম্নঃ শূন্যৎবং গগনাদিব ॥ ৫৯ ॥
যদেব তৎপরং ব্রহ্ম সর্বরূপবিবর্জিতম্ ।
তদেবেদং তথাভূতমেব সর্গতয়া স্থিতম্ ॥ ৬০ ।
স্বপ্নেঽনুভূয়তে চৈতৎস্বপ্নে হ্যাত্মৈব ভাসতে ।
পুরাদিৎবেন ন তু সৎপুরাদিরচিতং তদা ॥ ৬১ ॥
স্বপ্নে চ প্রত্যভিজ্ঞায়াঃ সংস্কারস্য স্মৃতেস্তথা ।
ন সত্তা তদিদং দৃষ্টমিত্যর্থস্যাত্যসংভবাৎ ॥ ৬২ ॥
তস্মাদেতত্ত্রয়ং ত্যক্ত্বা যদ্ভানং ব্রহ্মসংবিদঃ ।
তস্য দৃষ্টার্থসাদৃশ্যান্মূঢৈঃ স্মৃত্যাদিতোহিতা ॥ ৬৩ ॥
যথা যত্রৈব লহরী বারিণ্যেতি পুনঃ পুনঃ ।
তত্রৈবেতি তথা তদ্বদনন্যা খে পরে জগৎ ॥ ৬৪ ॥
বিধয়ঃ প্রতিষেধাশ্চ সর্ব এব সদৈব চ ।
বিভক্তাশ্চ বিমিশ্রাশ্চ পরে সন্তি ন সন্তি চ ॥ ৬৫ ॥
তস্মাৎসদ্ব্রহ্ম সর্বাত্ম কিমিবাত্র ন বিদ্যতে ।
সৈব সত্তৈব সর্বাত্ম চৈতদপ্যেতদাত্মকম্ ॥ ৬৬ ॥
ভ্রান্তস্য ভ্রমণং ভূমের্ন ভূভ্রান্তৈব বা গণৈঃ ।
ন শাম্যতি জ্ঞাতুরপি তথাভ্যাসং বিনাত্র দৃক্ ॥ ৬৭ ॥
শাস্ত্রস্যাস্য তু যন্নাম বাদনং তদ্বিনাপরঃ ।
অভ্যাসো দৃশ্যসংশান্ত্যৈ ন ভূতো ন ভবিষ্যতি ॥ ৬৮ ॥
ন জীবন্নমৃতং চিত্তং রোধমায়াতি সংসৃতেঃ ।
অবিনাভাবিদেহৎবাদ্বোধাত্ত্বেতন্ন পশ্যতি ॥ ৬৯ ॥
সর্বদৈবাবিনাভাবি চিত্তং দৃশ্যশরীরয়োঃ ।
ইহ চামুত্র চৈতস্য বোধান্তে শাম্যতঃ স্বয়ম্ ॥ ৭০ ॥
চিত্তদৃশ্যশরীরাণি ত্রীণি শাম্যন্তি বোধতঃ ।
পবনস্পন্দসৈন্যানি কারণাভাবতো যথা ॥ ৭১ ॥
কারণং মৌর্খ্যমেবাস্য তচ্চাস্মাদেব শাস্ত্রতঃ ।
কিংচিৎসংস্কৃতবুদ্ধীনাং বাচিতাদেব শাম্যতি ॥ ৭২ ॥
অবুদ্ধমুত্তরগ্রংথাৎপূর্বং পূর্বং হি বুধ্যতে ।
গ্রংথং পদপদার্থজ্ঞঃ খেদবান্ন নিবর্ততে ॥ ৭৩ ॥
উপায়মিদমেবাতো বিদ্ধি শাস্ত্রং ভ্রমক্ষয়ে ।
অনন্যসাধারণতাং গতমিত্যনুভূয়তে ॥ ৭৪ ॥
তস্মাদস্মান্মহাশাস্ত্রাদ্যথাশক্তি বিচারয়েৎ ।
ভাগৌ দ্বৌ ভাগমেকং বা তেন দুঃখক্ষয়ো ভবেৎ ॥ ৭৫ ॥
আরুষেয়মিদমিতি প্রমাদাচ্চেন্ন রোচতে ।
তদন্যদাত্মবিজ্ঞানশাস্ত্রং কিংচিদ্বিচারয়েৎ ॥ ৭৬ ॥
অনর্থেনাবিচারেণ বয়ঃ কুর্যান্ন ভস্মসাৎ ।
বোধেন জ্ঞানসারেণ দৃশ্যং কর্তব্যমাত্মসাৎ ॥ ৭৭ ॥
আয়ুষঃ ক্ষণ একোঽপি সর্বরত্নৈর্ন লভ্যতে ।
নীয়তে তদ্বৃথা যেন প্রমাদঃ সুমহানহো ॥ ৭৮ ॥
অনুভূতমপি চ নো সদৃশ্যমিদং দ্রষ্টৃসহিতমপি ।
স্বপ্ননিজমরণবাংধবরোদনমিব সদিব কচিতমপি ॥ ৭৯ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু পরমার্থগীতাসু
অদ্বৈতয়ুক্তির্নাম পঞ্চসপ্তত্যধিকশততমঃ সর্গঃ ॥ ১৭৫ ॥ -৩-
॥ অথ পংচমোঽধ্যায়ঃ ॥
॥ সত্যবর্ণনম্ ॥
শ্রীরাম উবাচ ।
অকারণকমেবেদং জগদ্ব্রহ্ম পরাৎপদাৎ ।
যদি প্রবর্ততে নাম স্বপ্নসংকল্পনাদিবৎ ॥ ১ ॥
তদকারণতঃ সিদ্ধেঃ সংভবেঽন্যদকারণম্ ।
কথং ন জায়তে বস্তু ক্বচিৎকিংচিৎকদাচন ॥ ২ ॥
বসিষ্ঠ উবাচ ।
যদ্যথা কল্পিতং যেন স সম্পশ্যতি তত্তথা ।
কল্পনৈবান্যথা ন স্যাত্তাদৃক্কারণবিচ্যুতেঃ ॥ ৩ ॥
যথেদং কল্পিতং দৃশ্যং মনসা যেন তত্তথা ।
বেত্ত্যসৌ যাদৃগন্যেন কল্পিতং বেত্ত্যসৌ তথা ॥ ৪ ॥
কল্পনাকল্পনাত্মৈকং তচ্চ ব্রহ্ম স্বভাবতঃ ।
কল্পনাত্মেদৃশং জন্তুর্যথা কেশনখাদিমান্ ॥ ৫ ॥
অকারণপদার্থৎবং সকারণপদার্থতা ।
ব্রহ্মণি দ্বয়মপ্যস্তি সর্বশক্ত্যাত্ম তদ্যতঃ ॥ ৬ ॥
যতঃ স্যাদ্ব্রহ্মণস্ত্বন্যৎক্বচিৎকিংচিৎকদাচন ।
তৎকারণবিকল্পেন সংয়োগস্তস্য যুজ্যতে ॥ ৭ ॥
যত্র সর্বমনাদ্যন্তং নানানানাত্ম ভাসতে ।
ব্রহ্মৈব শান্তমেকাত্ম তত্র কিং কস্য কারণম্ ॥ ৮ ॥
নেহ প্রবর্ততে কিংচিন্ন চ নাম নিবর্ততে ।
স্থিতমেকমনাদ্যন্তং ব্রহ্মৈব ব্রহ্ম খাত্মকম্ ॥ ৯ ॥
কিং কস্য কারণং কেন কিমর্থং ভবতু ক্ব বা ।
কিং কস্য কারণং কেন কিমর্থং মাস্তু বা ক্বচিৎ ॥ ১০ ॥
নেহ শূন্যং ন বা শূন্যং ন সন্নাসন্ন মধ্যতা ।
বিদ্যতে ন মহাশূন্যে ন নেতি ন ন নেতি চ ॥ ১১ ॥
ইদং ন কিংচিৎকিংচিদ্বা যন্নামাস্ত্যথ নাস্তি বা ।
সর্বং ব্রহ্মৈব তদ্বিদ্ধি যত্তথৈবাতথৈব তৎ ॥ ১২ ॥
শ্রীরাম উবাচ ।
অতজ্ঞবিষয়ে ব্রহ্মন্কার্যে কারণসংভবে ।
কিমকারণতাত্ম স্যাৎকথং বেতি বদ প্রভো ॥ ১৩ ॥
বসিষ্ঠ উবাচ ।
অতজ্ঞো নাম নাস্ত্যেব তাবত্তজ্জ্ঞজনং প্রতি ।
অসতো ব্যোমবৃক্ষস্য বিচারঃ কীদৃশস্ততঃ ॥ ১৪ ॥
একবোধময়াঃ শান্তবিজ্ঞানঘনরূপিণঃ ।
তজ্জ্ঞাস্তেষামসদ্রূপে কথমর্থে বিচারণা ॥ ১৫ ॥
অতজ্জ্ঞৎবং চ বোধেঽন্তরবভাতি তদংগতা ।
গতে স্বপ্নসুষুপ্তেঽন্তরিব নিদ্রাত্ম কেবলম্ ॥ ১৬ ॥
তথাপ্যভ্যুপগম্যাপি মূর্খনিশ্চয় উচ্যতে ।
প্রয়েদমণু সর্বাত্ম যস্মাদ্ব্রহ্ম নিরাময়ম্ ॥ ১৭ ॥
সন্ত্যকারণকা এব সন্তি কারণজাস্তথা ।
ভাবাঃ সংবিদ্যথা যস্মাৎকল্প্যতে লভ্যতে তথা ॥ ১৮ ॥
সর্বকারণসংশান্তৌ সর্বানুভবশালিনাম্ ।
সর্গস্য কারণং নাস্তি তেন সর্গস্ত্বকারণঃ ॥ ১৯ ॥
হৃদয়ংগমতাত্যক্তমীশ্বরাদি প্রকল্প্যতে ।
যদত্র কিংচিদুঃস্বাদু ব্যর্থং বাগ্জালমেব তৎ ॥ ২০ ॥
অন্যথানুপপত্ত্যৈব স্বপ্নাভাকলনাদৃতে ।
স্থূলাকারাত্মিকা কাচিন্নাস্তি দৃশ্যস্য দৃশ্যতা ॥ ২১ ॥
স্বপ্নপৃথ্ব্যাদ্যনুভবে কিমবুদ্ধস্য কারণম্ ।
চিৎস্বভাবাদৃতে ব্রূহি স্বপ্নার্থো নাম কীদৃশঃ ॥ ২২ ॥
স্বপ্নার্থো হ্যপরিজ্ঞাতো মহামোহভরপ্রদঃ ।
পরিজ্ঞাতো ন মোহায় যথা সর্গাস্তথৈব চ ॥ ২৩ ॥
শুষ্কতর্কহঠাবেশাদ্যদ্বাপ্যনুভবোজ্ঝিতম্ ।
কল্প্যতে কারণং কিংচিৎসা মৌর্খ্যাভিনিবেশিতা ॥ ২৪ ॥
অগ্নেরৌষ্ণ্যমপাং শৈত্যং প্রাকাশ্যং সর্বতেজসাম্ ।
স্বভাবো বাখিলার্থানাং কিমবুদ্ধস্য কারণম্ ॥ ২৫ ॥
কিং ধ্যাতৃশতলব্ধস্য ধ্যেয়স্যৈকস্য কারণম্ ।
কিং চ গংধর্বনগরে পুরে ভিত্তিষু কারণম্ ॥ ২৬ ॥
ধর্মাদ্যমুত্রামূর্তৎবান্মূর্তে দেহে ন কারণম্ ।
দেহস্য কারণং কিং স্যাত্তত্র সর্গাদিভোগিনঃ ॥ ২৭ ॥
ভিত্ত্যভিত্ত্যাদিরূপাণাং জ্ঞানস্য জ্ঞানবাদিনঃ ।
কিং কারণমনন্তানামুৎপন্নধ্বংসিনাং মুহুঃ ॥ ২৮ ॥
স্বভাবস্য স্বভাবোঽসৌ কিল কারণমিত্যপি ।
যদুচ্যতে স্বভাবস্য সা পর্যায়োক্তিকল্পতা ॥ ২৯ ॥
তস্মাদকারণা ভ্রান্তির্ভাবা ভান্তি চ কারণম্ ।
অজ্ঞে জ্ঞে ৎবখিলং কার্যং কারণাদ্ভবতি স্থিতম্ ॥ ৩০ ॥
যদ্বৎস্বপ্নপরিজ্ঞানাৎস্বপ্নে দ্রব্যাপহারিভিঃ ।
ন দুঃখাকরণং তদ্বজ্জীবিতং তত্ত্বদর্শনাৎ ॥ ৩১ ॥
সর্গাদাবেব নোৎপন্নং দৃশ্যং চিদ্গগনং ৎবিদম্ ।
স্বরূপং স্বপ্নবদ্ভাতি নান্যদত্রোপপদ্যতে ॥ ৩২ ॥
অন্যা ন কাচিৎকলনা দৃশ্যতে সোপপত্তিকা ।
অস্মান্ন্যায়াদৃতে কস্মাদ্ব্রহ্মৈবৈষানুভূতিভূঃ ॥ ৩৩ ॥
ঊর্ম্যাবর্তদ্রবৎবাদি শুদ্ধে জলঘনে যথা ।
তথেদং সর্গপর্যায়ং ব্রহ্মণি ব্রহ্ম ভাসতে ॥ ৩৪ ॥
স্পন্দাবর্তবিবর্তাদি নির্মলে পবনে যথা ।
তথায়ং ব্রহ্মপবনে সর্গস্পন্দোঽবভাসতে ॥ ৩৫ ॥
যথানন্তৎবসৌষির্যশূন্যৎবাদি মহাংবরে ।
স সন্নাসন্নবোধাত্ম তথা সর্গঃ পরাপরঃ ॥ ৩৬ ॥
এষু নিদ্রাদিকেষ্বেতে সূপলব্ধা অপি স্ফুটম্ ।
ভাবা অসন্ময়া এবমেতেঽনন্যাত্মকা যতঃ ॥ ৩৭ ॥
সর্গপ্রলয়সংস্থানান্যেবমাত্মনি চিদ্ঘনে ।
সৌম্যে স্বপ্নসুষুপ্তাভা শুদ্ধে নিদ্রাঘনে যথা ॥ ৩৮ ॥
স্বপ্নাৎস্বপ্নান্তরাণ্যাস্তে নিদ্রায়াং মানবো যথা ।
সর্গাৎসর্গান্তরাণ্যাস্তে স্বসত্তায়ামজস্তথা ॥ ৩৯ ॥
পৃথ্বাদিরহিতোঽপ্যেষ ব্রহ্মাকাশো নিরাময়ঃ ।
অতদ্বাংস্তদ্বদাভাতি যথা স্বপ্নানুভূতিষু ॥ ৪০ ॥
স্থিতা যথাস্যাং পশ্যন্তাং শব্দা ঘটপটাদয়ঃ ।
জাতাজাতাঃ স্থিতাঃ সর্গাস্তথানন্যে মহাচিতি ॥ ৪১ ॥
পশ্যন্তামেব পশ্যন্তী যথা ভাতি তথৈব চ ।
যথা শব্দাস্তথা সর্গাশ্চিতৈব চিতিচিন্ময়ঃ ॥ ৪২ ॥
কিং শাস্ত্রকং তত্র কথাবিচারৈ-
র্নির্বাসনং জীবিতমেব মোক্ষঃ ।
সর্গে ৎবসত্যেবপ্রকারণৎবা-
ৎসত্যেব নাস্ত্যেব ন নাম কাচিৎ ॥ ৪৩ ॥
এষা চ সিদ্ধেহ হি বাসনেতি
সা বোধসত্তৈব নিরন্তরৈকা ।
নানাৎবনানারহিতৈব ভাতি
স্বপ্নে চিদেবেহ পুরাদিরূপা ॥ ৪৪ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু সত্যবর্ণনং
নাম সপ্তসপ্তত্যধিকশততমঃ সর্গঃ ॥ ১৭৭ ॥ -৫-
॥ অথ ষষ্ঠঃ সর্গঃ ॥
॥ ঐন্দবোপাখ্যানম্ ॥
শ্রীরাম উবাচ ।
পদার্থা দ্বিবিধাঃ সন্তি মূর্তামূর্তা জগত্ত্রয়ে ।
যত্র সপ্রতিঘাঃ কেচিৎকেচিদপ্রতিঘা অপি ॥ ১ ॥
তানিহাপ্রতিঘানাঢুর্নান্যোন্যং বেল্লয়ন্তি যে ।
তাংশ্চ সপ্রতিঘানাহুরন্যোন্যং বেল্লয়ন্তি যে ॥ ২ ॥
ইহ সপ্রতিঘানং তু দৃষ্টমন্যোন্যবেল্লনম্ ।
নৎবপ্রতিঘরূপাণাং কেষাংচিদপি কিংচন ॥ ৩ ॥
তত্র সংবেদনং নাম যদিদং চংদ্রমণ্ডলে ।
ইতঃ পতত্যপ্রতিঘং তৎসর্বেণানুভূয়তে ॥ ৪ ॥
অর্ধপ্রবুদ্ধসংকল্পবিকল্পাদ্বৈতকল্পিতম্ ।
বদাম্যভ্যুপগম্যেদং ন তু বোধদশাস্থিতম্ ॥ ৫ ॥
কঃ প্রাণমারুতঃ ক্ষোভং জনয়ত্যাশয়স্থিতঃ ।
প্রবেশনির্গমভয়ং কথং বা বদ মে প্রভো ॥ ৬ ॥
কথমপ্রতিঘং নাম বেদনং প্রতিঘাত্মকম্ ।
ইমং দেহং চালয়তি ভারং ভারহরো যথা ॥ ৭ ॥
যদি সপ্রতিঘং বস্তু বেল্লত্যপ্রতিঘাত্মকম্ ।
কথং সংবিত্তিমাত্রেণ পুংসঃ শৈলো ন বল্গতি ॥ ৮ ॥
বসিষ্ঠ উবাচ ।
বিকাসমথ সংকোচমত্র নালী হৃদি স্থিতা ।
যদা যাতি তদা প্রাণশ্চ্ছেদৈরায়াতি যাতি চ ॥ ৯ ॥
বাহ্যোপস্করভস্রায়াং যথাকাশাস্পদাত্মকঃ ।
বায়ুর্যাত্যপি চায়াতি তথাত্র স্পংদনং হৃদি ॥ ১০ ॥
শ্রীরাম উবাচ ।
বহির্ভস্রাময়স্কারঃ সংকোচনবিকাসনৈঃ ।
যোজয়ত্যান্তরং নাডীং কশ্চালয়তি চালকঃ ॥ ১১ ॥
শতং কথং ভবেদেকং কথমেকং শতং ভবেৎ ।
কথং সচেতনা এতে কাষ্ঠলোষ্টূপলাদয়ঃ ॥ ১২ ॥
কস্মান্ন স্থাবরং বস্তু প্রস্পন্দ্যপি চমৎকৃতম্ ।
বস্তু জংগমমেবেহ স্পন্দিমাত্রেব কিং বদ ॥ ১৩ ॥
বসিষ্ঠ উবাচ ।
অন্তঃসংবেদনং নাম চালয়ত্যান্ত্রবেষ্টনম্ ।
বহির্ভস্রাময়স্কার ইব লোকেঽনুচেষ্টনম্ ॥ ১৪ ॥
শ্রীরাম উবাচ ।
বায়্বন্ত্রাদিশরীরস্থং সর্বং সপ্রতিঘং মুনে ।
কথমপ্রতিঘা সংবিচ্চালয়েদিতি মে বদ ॥ ১৫ ॥
সংবিদপ্রতিঘাকারা যদি সপ্রতিঘাত্মকম্ ।
চালয়েদচলিপ্যত্তদদূরমম্ভো যদিচ্ছয়া ॥ ১৬ ॥
সপ্রতিঘাপ্রতিঘয়োর্মিথো যদি পদার্থয়োঃ ।
বেল্লনং স্যাত্তদিচ্ছৈব কর্তৃকর্মেন্দ্রিয়ৈঃ ক্ব কিম্ ॥ ১৭ ॥
সপ্রতিঘাপ্রতিঘয়োঃ শেষো নাস্তি বহির্যথা ।
তথৈবান্তরহং মন্যে শেষং কথয় মে মুনে ॥ ১৮ ॥
অন্তঃস্বয়ং যোগিনা বা যথৈতদনুভূয়তে ।
অমূর্তস্যৈব মূর্তেন বেল্লনং তদ্বদাশু মে ॥ ১৯ ॥
বসিষ্ঠ উবাচ ।
সর্বসংদেহবৃক্ষাণাং মূলকাষমিদং বচঃ ।
সর্বৈকতানুভূত্যর্থং শৃণু শ্রবণভূষণম্ ॥ ২০ ॥
নেহ কিংচিন্ন নামাস্তি বস্তু সপ্রতিঘং ক্বচিৎ ।
সর্বদা সর্বমেবেদং শান্তমপ্রতিঘং ততম্ ॥ ২১ ॥
শুদ্ধং সংবিন্ময়ং সর্বং শান্তমপ্রতিঘাত্মকম্ ।
পদার্থজাতং পৃথ্ব্যাদি স্বপ্নসংকল্পয়োরিব ॥ ২২ ॥
আদাবন্তে চ নাস্তীদং কারণাভাবতোঽখিলম্ ।
ভ্রান্ত্যাত্মা বর্তমানাপি ভাতি চিৎস্বপ্নগা যথা ॥ ২৩ ॥
দ্যৌঃ ক্ষমা বায়ুরাকাশং পর্বতাঃ সরিতো দিশঃ ।
মহতা কারণৌঘেন বোধমপ্রতিঘং বিদুঃ ॥ ২৪ ॥
অন্তঃকরণভূতাদি মৃৎকাষ্ঠদৃষদাদি বা ।
সর্বং শূন্যমশূন্যং চ চেতনং বিদ্ধি নেতরৎ ॥ ২৫ ॥
তত্রৈবমৈন্দবাখ্যানং শৃণু শ্রবণভূষণম্ ।
ময়া চ পূর্বমুক্তং তৎকিংচান্যদভিবর্ণ্যতে ॥ ২৬ ॥
তথাপি বর্তমানোক্তপ্রশ্নবোধায় তচ্ছৃণু ।
যথেদং সর্বমদ্র্যাদি চিদিত্যেব তু ভোৎস্যতে ॥ ২৭ ।
কস্মিংশ্চিৎপ্রাক্তনেনৈব জগজ্জালেঽভবদ্দ্বিজঃ ।
তপোবেদক্রিয়াধারো ব্রহ্মন্নিন্দুরিতি স্মৃতঃ ॥ ২৮ ॥
দশ তস্যাভবন্পুত্রা জগতো দিক্তটা ইব ।
মহাশয়া মহাত্মানো মহতামাস্পদাং সতাং ॥ ২৯ ॥
স তেষাং কালবশতঃ পিতান্তর্ধিমুপায়যৌ ।
দশানাং ভগবান্রুদ্র একাদশ ইব ক্ষয়ে ॥ ৩০ ॥
তস্যানুগমনং চক্রে ভার্যা বৈধব্যভীতিভিঃ ।
অনুরক্তা দিনস্যেব সংধ্যা তারাবিলোচনা ॥ ৩১ ॥
তয়োস্তে তনয়া দুঃখকলিতা বিপিনং গতাঃ ।
কৃতৌর্ধ্বদেহিকাস্ত্যক্ত্বা ব্যবহারং সমাধয়ে ॥ ৩২ ॥
ধারণানাং সমস্তানাং কা স্যাদুত্তমসিদ্ধিদা ।
ধারণা যন্ময়াঃ সন্তঃ স্যামঃ সর্বেশ্বরা বয়ম্ ॥ ৩৩ ॥
ইতি তে তত্র সংচিন্ত্য বদ্ধপদ্মাসনা দশ ।
ইদং সংচিন্তয়ামাসুর্নির্বিঘ্নে কংদরোদরে ॥ ৩৪ ॥
পদ্মজাধিষ্ঠিতাশেষজগদ্ধারণয়া স্থিতাঃ ।
ভবাম পদ্মজোপেতং জগদ্রূপমবিঘ্নতঃ ॥ ৩৫ ॥
ইতি সংচিন্ত্য সব্রহ্ম জগদ্ধারণয়া চিরম্ ।
নিমীলিতদৃশস্তস্থুস্তে চিত্ররচিতা ইব ॥ ৩৬ ॥
অথৈতদ্ধারণাবদ্ধচিত্তাস্তে তাবদচ্যুতাঃ ।
আসন্মাসান্দশাষ্টৌ চ যাবত্তে তত্র দেহকাঃ ॥ ৩৭ ॥
শুষ্কাঃ কংকালতাং যাতাঃ ক্রব্যাদৈশ্চর্বিতাংগকাঃ ।
নাশমভ্যায়যুস্তত্র ছায়াভাগা ইঅবাতপৈঃ ॥ ৩৮ ॥
অহং ব্রহ্মা জগচ্চেদং সর্গোঽয়ং ভুবনান্বিতঃ ।
ইতি সম্পশ্যতাং তেষাং দীর্ঘকালোঽভ্যবর্তত ॥ ৩৯ ॥
তানি চিত্তান্যদেহানি দশৈকধ্যানতস্ততঃ ।
সম্পন্নানি জগন্ত্যেব দশ দেহানি বৈ পৃথক্ ॥ ৪০ ॥
ইতি তেষাং চিদিচ্ছাসাসম্পন্না সকলং জগৎ ।
অত্যংতস্বচ্ছরূপৈব স্থিতা চাকারবর্জিতা ॥ ৪১ ॥
সংবিন্ময়ৎবাজ্জগতাং তেষাং ভূম্যচলাদি তৎ ।
সর্বং চিদাত্মকং বিদ্ধি নো চেদন্যৎকিমুচ্যতাম্ ॥ ৪২ ॥
কিলয়ত্ত্রিজগজ্জালং তেষাং কিমাত্মতত্তথা ।
সংবিদাকাশশূন্যৎবমাত্রমেবেতরন্ন তৎ ॥ ৪৩ ॥
বিদ্যতে ন যথা কিংচিত্তরংগঃ সলিলাদৃতে ।
সংবিত্তৎবাদৃতে তদ্বদ্বিদ্যতে চলনাদিকম্ ॥ ৪৪ ॥
ঐংদবানি যথৈতানি চিন্ময়ানি জগন্তি খে ।
তথা চিন্ময়মেতেষু কাষ্ঠলোষ্টোপলাদ্যপি ॥ ৪৫ ॥
যথৈবৈংদবসংকল্পাস্তে জগত্ত্বমুপাগতাঃ ।
তথৈবাব্জজসংকল্পো জগত্ত্বময়মাগতঃ ॥ ৪৬ ॥
তস্মাদিহেমে গিরয়ো বসুধাপাদপা ঘনাঃ ।
মহাভূতানি সর্বং চ চিন্মাত্রময়মাততম্ ॥ ৪৭ ॥
চিদ্বৃক্ষাশ্চিন্মহী চিদ্দ্যৌশ্চিদাকাশং চিদদ্রয়ঃ ।
নাচিৎক্বচিৎসংভবতি তেষ্বৈংদবজগৎস্বিব ॥ ৪৮ ॥
চিন্মাত্রখকুলালেন স্বদেহচলচক্রকে ।
স্বশরীরমৃদা সর্গঃ কুতোঽয়ং ক্রিয়তেঽনিশম্ ॥ ৪৯ ॥
সংকল্পনির্মিতে সর্গে দৃষদশ্চেন্নচেতনাঃ ।
তদত্র লোষ্টশৈলাদি কিমেতদিতি কথ্যতাম্ ॥ ৫০ ॥
কলনস্মৃতিসংস্কারা দধত্যর্থং চ নোদরে ।
প্রাঙ্মৃষ্টং কল্পনাদীনামন্যৈবার্থকলাবতাম্ ॥ ৫১ ॥
তদ্ধামসংবিদো নাম্নি মণিরাশৌ মণির্যথা ।
সর্বাত্মনি তথা চিত্তে কশ্চিদর্থ উদেত্যলম্ ॥ ৫২ ॥
অকার্যকরণস্যার্থো ন ভিন্নো ব্রহ্মণঃ ক্বচিৎ ।
স্বভাব ইতি তেনেদং সর্বং ব্রহ্মেতি নিশ্চয়ঃ ॥ ৫৩ ॥
যথাপ্রবৃত্তং চিদ্বারি বহত্যাবর্ততেব নৌ ।
স্বয়ত্নেনাতিতীব্রেণ পরাত্মীয়াত্মনা বিনা ॥ ৫৪ ॥
পদ্মলীলা জগদিব প্রকচন্তি জগন্তি যৎ ।
চিন্মাত্রাদ্ব্রহ্মণঃ স্বস্মাদন্যানি ন মনাগপি ॥ ৫৫ ॥
অজাত্মানিরুদ্ধং চ সন্মাত্রং ব্রহ্ম খাত্মকম্ ।
শান্তং সদসতোর্মধ্যং চিদ্ভামাত্রমিদং জগৎ ॥ ৫৬ ॥
যৎসংবিন্ময়মদ্র্যাদিসংকল্পং জগতি স্থিতম্ ।
তদসংবিন্ময়মিতি বক্তাঽজ্ঞো জ্ঞৈর্বিহস্যতে ॥ ৫৭ ॥
জগন্ত্যাত্মেব সংকল্পময়ান্যেতানি বেত্তি খে ।
খাত্মকানি তথেদং চ ব্রহ্ম সংকল্পজং জগৎ ॥ ৫৮ ॥
যাবদ্যাবদিয়ং দৃষ্টিঃ শীঘ্রং শীঘ্রং বিলোক্যতে ।
তাবত্তাবদিদং দুঃখং শীঘ্রং শীঘ্রং বিলীয়তে ॥ ৫৯ ॥
যাবদ্যাবদিয়ং দৃষ্টিঃ প্রেক্ষ্যতে ন চিরাচ্চিতা ।
তাবত্তাবদিদং দুঃখং ভবেৎপ্রতিঘনং ঘনম্ ॥ ৬০ ॥
দীর্ঘদুষ্কৃতমূঢানামিমাং দৃষ্টিমপশ্যতাম্ ।
সংসৃতির্বজ্রসারেয়ং ন কদাচিৎপ্রশাম্যতি ॥ ৬১ ॥
নেহাকৃতির্ন চ ভবাভবজন্মনাশাঃ
সত্তা ন চৈব ন চ নাম তথাস্ত্যসত্তা ।
শান্তং পরং কচতি কেবলমাত্মনীত্থং
ব্রহ্মাথবা কচনমপ্যলমত্র নাস্তি ॥ ৬২ ॥
আদ্যন্তবর্জিতমলভ্যলতাগ্রমূল-
নির্মাণমূলপরিবেশমশেষমচ্ছম্ ।
অন্তস্থনির্গগনসর্গকপুত্রকৌঘং
নিত্যং স্থিতং ননু ঘনং গতজন্মনাশম্ ॥ ৬৩ ॥
সন্মাত্রমন্তরহিতাখিলহস্তজাতং
পর্যন্তহীনগণনাঙ্গমমুক্তরূপম্ ।
আত্মাম্বরাত্মকমহং ৎবিদমেব সর্বং
সুস্তম্ভরূপমজমৌনমলং বিকল্পৈঃ ॥ ৬৪ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু ঐন্দবো
নামাষ্টসপ্তত্যধিকশততমঃ সর্গঃ ॥ ১৭৮ ॥ -৬-
॥ অথ সপ্তমঃ সর্গঃ ॥
॥ ব্রহ্মময়ৎবপ্রতিপাদনম্ ॥
বসিষ্ঠ উবাচ ।
এবং চিন্মাত্রমেবৈকং শুদ্ধং সত্ত্বং জগত্ত্রয়ম্ ।
সংভবন্তীহ ভূতানি নাজ্ঞবুদ্ধানি কানিচিৎ ॥ ১ ॥
তস্মাৎকুতঃ শরীরাদি বস্তু সপ্রতিঘং কুতঃ ।
যদিদং দৃশ্যতে কিংচিত্তদপ্রতিঘমাততম্ ॥ ২ ॥
স্থিতং চিদ্ব্যোম চিদ্ব্যোম্নি শান্তে শান্তং সমং স্থিতম্ ।
স্থিতমাকাশমাকাশে জ্ঞপ্তির্জ্ঞপ্তৌ বিজৃম্ভতে ॥ ৩ ॥
সর্বং সংবিন্ময়ং শান্তং সৎস্বপ্নং ইব জাগ্রতি ।
স্থিতমপ্রতিঘাকারং ক্বাসৌ সপ্রতিঘাং স্থিতিঃ ॥ ৪ ॥
ক্ব দেহ অবয়বাঃ ক্বান্ত্রবেষ্টনী ক্বাস্থিপংজরম্ ।
ব্যোমেবাপ্রতিঘং বিদ্ধি দেহং সপ্রতিঘোষমম্ ॥ ৫ ॥
সংবিৎকরৌ শিরঃ সংবিৎসংবিদিন্দ্রিয়বৃন্দকম্ ।
শান্তমপ্রতিঘং সর্বং ন সপ্রতিঘমস্তি হি ॥ ৬ ॥
ব্রহ্মব্যোম্নঃ স্বপ্নরূপস্বভাবৎবাজ্জগৎস্থিতেঃ ।
ইদং সর্বং সংভবতি সহেতুকমহেতুকম্ ॥ ৭ ॥
ন কারণং বিনা কার্যং ভবতীত্যুপপদ্যতে ।
যদ্যথা যেন নির্ণীতং তত্তথা তেন লক্ষ্যতে ॥ ৮ ॥
কারণেন বিনা কার্যং সদ্বদিত্যুপপদ্যতে ।
যথা ভাবিতমেবার্থং সংবিদাপ্নোত্যসংশয়ম্ ॥ ৯ ॥
যথা সংভবতি স্বপ্নে সর্বং সর্বত্র সর্বথা ।
চিন্ময়ৎবাত্তথা জাগ্রত্যস্তি সর্বাত্মরূপতা ॥ ১০ ॥
সর্বাত্মনি ব্রহ্মপদে নানানাত্মনি স্থিতা ।
অস্ত্যকারণকার্যাণাং সত্তা কারণজাপি চ ॥ ১১ ॥
একঃ সহস্রং ভবতি যথা হ্যেতে কিলৈন্দবাঃ ।
প্রয়াতা ভূতলক্ষৎবং সংকল্পজগতাং গণৈঃ ॥ ১২ ॥
সহস্রমেকং ভবতি সংবিদাং চ তথা হি যৎ ।
সায়ুজ্যে চক্রপাণ্যাদেঃ সর্গৈরেকং ভবেদ্বপুঃ ॥ ১৩ ॥
এক এক ভবত্যব্ধিঃ স্রবন্তীনাং শতৈরপি ।
এক এক ভবেৎকাল ঋতুসংবৎসরোৎকরৈঃ ॥ ১৪ ॥
সংবিদাকাশ এবায়ং দেহঃ স্বপ্ন ইবোদিতঃ ।
স্বপ্নাদ্রিবন্নিরাকারঃ স্বানুভূতিস্ফুটোঽপি চ ॥ ১৫ ॥
সংবিত্তিরেবানুভবাৎসৈবাননুভবাত্মিকা ।
দ্রষ্টৃদৃশ্যদৃশা ভাতি চিদ্ব্যোমৈকমতো জগৎ ॥ ১৬ ॥
বেদনাবেদনাত্মৈকং নিদ্রাস্বপ্নসুষুপ্তবৎ ।
বাতস্পন্দাবিবাভিন্নৌ চিদ্ব্যোমৈকমতো জগৎ ॥ ১৭ ॥
দ্রষ্টা দৃশ্যং দর্শনং চ চিদ্ভান পরমার্থখম্ ।
শূন্যস্বপ্ন ইবাভাতি চিদ্ব্যোমৈকমতো জগৎ ॥ ১৮ ॥
জগত্ত্বমসদেবেশে ভ্রান্ত্যা প্রথমসর্গতঃ ।
স্বপ্নে ভয়মিবাশেষং পরিজ্ঞাত প্রশাম্যতি ॥ ১৯ ॥
একস্যাঃ সংবিদঃ স্বপ্নে যথা ভানমনেকধা ।
নানাপদার্থরূপেণ সর্গাদৌ গগনে তথা ॥ ২০ ॥
বহুদীপে গৃহে চ্ছায়া বহ্ব্যো ভান্ত্যেকবদ্যথা ।
সর্বশক্তেস্তথৈবৈকা ভাতি শক্তিরনেকধা ॥ ২১ ॥
যৎসীকরস্ফুরণমম্বুনিধৌ শিবাখ্য
ব্যোম্নীব বৃক্ষনিকরস্ফুরণং স সর্গঃ ।
ব্যোম্নেষ বৃক্ষনিকরো ব্যতিরিক্তরূপো
ব্রহ্মাম্বুধৌ ন তু মনাগপি সর্গবিন্দুঃ ॥ ২২ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু
ব্রহ্মময়ৎবপ্রতিপাদনং নামৈকোনাশীত্যধিকশততমঃ
সর্গঃ ॥ ১৭৯ ॥ -৭-
॥ অথ অষ্টমোঽধ্যায়ঃ ॥
॥ তাপসোপাখ্যানম্ ॥
শ্রীরাম উবাচ ।
ইমং মে সংশয়ং ছিন্ধি ভগবন্ভাস্করং তমঃ ।
ভুবনস্যেব ভাবানাং সম্যগ্রূপানুভূতয়ে ॥ ১ ॥
কদাচিদহমেকাগ্রো বিদ্যাগেহে বিপশ্চিতাম্ ।
সংসদি স্থিতবান্যাবত্তাপসঃ কশ্চিদাগতঃ ॥ ২ ॥
বিদ্বান্ দ্বিজবরঃ শ্রীমান্বিদেহজনমণ্ডলাৎ ।
মহাতপাঃ কান্তিয়ুতো দুর্বাসা ইব দুঃসহঃ ॥ ৩ ॥
স প্রবিশ্যাভিবাদ্যাশু সভামাভাস্বরদ্যুতিম্ ।
উপবিশ্যাসনে তিষ্ঠন্নস্মাভিরভিবাদিতঃ ॥ ৪ ॥
বেদান্তসাংখ্যসিদ্ধান্তবাদান্সংহৃত্য সত্তমম্ ।
সুখোপবিষ্টং বিশ্রান্তং তমহং পৃষ্টবানিদম্ ॥ ৫ ॥
দীর্ঘাধ্বনা পরিশ্রান্তঃ সয়ত্ন ইব লক্ষ্যসে ।
বদাদ্য বদতাং শ্রেষ্ঠ কুত আগমনং কৃতম্ ॥ ৬ ॥
ব্রাহ্মণ উবাচ ।
এবমেতন্মহাভাগ সুমহায়ত্নবানহম্ ।
যদর্থমাগতোঽস্মীহ তস্যাকর্ণয় নির্ণয়ম্ ॥ ৭ ॥
বৈদেহো নাম দেশোঽস্তি সর্বসৌভাগ্যসংয়ুতঃ ।
স্বর্গস্যাস্বরসংস্থস্য প্রতিবিম্বমিবাবনৌ ॥ ৮ ॥
তত্রাহং ব্রাহ্মণো জাতঃ প্রাপ্তবিদ্যশ্চ সংস্থিতঃ ।
কুন্দাবদাদন্তৎবাৎকুন্দদন্ত ইতি শ্রুতঃ ॥ ৯ ॥
অথাহং জাতবৈরাগ্যঃ প্রবিহর্তুং প্রবৃত্তবান্ ।
দেবদ্বিজমুনীন্দ্রাণাং সংভ্রমাচ্ছমশান্তয়ে ॥ ১০ ॥
শ্রীপর্বতমখণ্ডেঽহং কদাচিৎপ্রাপ্তবানহম্ ।
তত্রাবসং চিরং কালং মৃদু দীর্ঘং তপশ্চরন্ ॥ ১১ ॥
তত্রাস্ত্যরণ্যং বিদিতং মুক্তং তৃণবনাদিভিঃ ।
ত্যক্ততেজস্তমোভ্রাদিভূমাবিব নভস্তলম্ ॥ ১২ ॥
তত্রাস্তি মধ্যে বিটপি লঘুঃ পেলবপল্লবঃ ।
স্থিত এষোঽম্বরে শূন্যে মন্দরশ্মিরিবাংশুমান্ ॥ ১৩ ॥
লম্বতে তস্য শাখায়াং পুরুষঃ পাবনাকৃতিঃ ।
ভানুর্ভানাবিব রশ্মিগৃহীতো গ্রথিতাকৃতিঃ ॥ ১৪ ॥
মৌঞ্জদামনি বদ্ধোর্ধ্বপাদো নিত্যমবাক্ষিরাঃ ।
অষ্ঠীলৎবং দধদিব মহাষ্ঠীলস্য শাল্মলেঃ ॥ ১৫ ॥
দৃষ্টঃ প্রাপ্তেন তং দেশং স কদাচিন্ময়া পুমান্ ।
বিচারিতো নিকটতো বক্ষঃস্থাঞ্জলিসম্পুটঃ ॥ ১৬ ॥
যাবজ্জীবত্যসৌ বিপ্রো নিঃশ্বসিত্যহতাকৃতিঃ ।
শীতবাতাতপস্পর্শান্সর্বান্বেত্তি চ কালজান্ ॥ ১৭ ॥
অনন্তরমসাবেকো নোপচর্যময়া বহূন্ ।
দিবসাতপখেদেন বিশ্রম্ভে পাতিতঃ শনৈঃ ॥ ১৮ ॥
পৃষ্টশ্চ কোঽসি ভগবন্কিমর্থং দারুণং তপঃ ।
করোষীদং বিশালাক্ষ লক্ষ্যালক্ষ্যাত্মজীবিতঃ ॥ ১৯ ॥
অথ তেনোক্তমর্থস্তে ক ইবানেন তাপস ।
অর্থে নাতিবিচিত্রা হি ভবন্তীচ্ছাঃ শরীরিণাম্ ॥ ২০ ॥
ইত্যুক্তবান্প্রয়ত্নেন সোঽনুবন্ধেন বৈ ময়া ।
যদা পৃষ্টস্তদা তেন মমোক্তমিদমুত্তরম্ ॥ ২১ ॥
মথুরায়ামহং জাতো বৃদ্ধিং যাতঃ পিতুর্গৃহে ।
বাল্যযৌবনয়োর্মধ্যে স্থিতঃ পদপদার্থবিৎ ॥ ২২ ॥
সমগ্রসুখসংভারকোশো ভবতি ভূমিপঃ ।
ইত্যহং শ্রুতবাংস্তত্র ভোগার্থী নবয়ৌবনঃ ॥ ২৩ ॥
অথ সপ্তমহাদ্বীপবিস্তীর্ণায়া ভুবঃ পতিঃ ।
স্যামিত্যহমুদারাত্মা পরিবিম্বিতবাংশ্চিরম্ ॥ ২৪ ॥
ইত্যর্থেন সমাগত্য দেশমিত্থমহং স্থিতঃ ।
অত্র দ্বাদশবর্ষাণি সমতীতানি মানদ ॥ ২৫ ॥
তদকারণমিত্রৎবং গচ্ছেষ্টং দেশমাশুগঃ ।
অহং চাভিমতপ্রাপ্তেরিত্থমেব দৃঢস্থিতিঃ ॥ ২৬ ॥
ইতি তেনেহমুক্তঃ সংস্তমিচ্ছং প্রোক্তবাঞ্ছৃণু ।
আশ্চর্যশ্রবণে চেতঃ খেদমেতি ন ধীমতঃ ॥ ২৭ ॥
সাধো যাবত্তয়া প্রাপ্তো ন নামাভিমতো বরঃ ।
ৎবদ্রক্ষাপরিচর্যার্থমিহ তাবদহং স্থিতঃ ॥ ২৮ ॥
ময়েত্যুক্তে স পাষাণ মৌনবানভমচ্ছমী ।
নিমীলিতেক্ষণঃ ক্ষীণরূপস্ত্বকলনো বহিঃ ॥ ২৯ ॥
তথাহং পুরতস্তস্য কাষ্ঠমৌনবতোঽবসম্ ।
ষণ্মাসান্বিগতোদ্বেগং বেগান্কালকৃতান্সহন্ ॥ ৩০ ॥
অর্কবিম্বাদ্বিনিষ্ক্রম্য তৎপ্রদেশান্তরে স্থিতম্ ।
একদা দৃষ্টবানস্মি পুরুষং ভানুভাস্বরম্ ॥ ৩১ ॥
স তেন পূজ্যতে যাবন্মনসা কর্মণা ময়া ।
উবাচ তাবদ্বচনমমৃতস্যন্দসুন্দরম্ ॥ ৩২ ॥
শাখাপ্রলম্বনপর হে ব্রহ্মন্দীর্ঘতাপস ।
তপঃ সংহর সংহারী গৃহাণাভিমতং বরম্ ॥ ৩৩ ॥
সপ্তাব্ধিদ্বীপবলয়াং পালয়িষ্যসি মেদিনীম্ ।
সপ্তবর্ষসহস্রাণি দেহেনানেন ধর্মতঃ ॥ ৩৪ ॥
এবং সমীহিতং দৎবা স দ্বিতীয়ো দিবাকরঃ ।
গন্তুমস্তমথার্কাব্ধিমবিশৎপ্রোদিতো যতঃ ॥ ৩৫ ॥
তস্মিন্যাতে ময়া প্রোক্তং তস্য শাখাতপস্বিনঃ ।
শ্রুতদৃষ্টানুভূতাগ্র্যবরদস্য বিবেকিনঃ ॥ ৩৬ ॥
সম্প্রাপ্তাভিমতং ব্রহ্মংস্তরুশাখাবলম্বনম্ ।
তপস্ত্যক্ত্বা যথা প্রাপ্তং ব্যবহারং সমাচর ॥ ৩৭ ॥
এবমঙ্গীকৃতবতঃ পাদৌ তস্য ময়া ততঃ ।
মুক্তৌ বিটপিনস্তস্মাদালানাৎকালভাবিব ॥ ৩৮ ॥
স্বাতঃ পবিত্রহস্তোঽসৌ চক্রে জপ্ত্বাঘমর্ষণম্ ।
ফলেন পুণ্যলব্ধেন বিটপাদ্ব্রতপারণম্ ॥ ৩৯ ॥
তৎপুণ্যবশতঃ প্রাপ্তৈঃ স্বাদুভিস্তৈস্তরোঃ ফলৈঃ ।
সমাশ্বস্তাবসংক্ষুব্ধাবাবাং তত্র দিনত্রয়ম্ ॥ ৪০ ॥
সপ্তদ্বীপসমুদ্রমুদ্রিতদিশং ভোক্তুং সমগ্রাং মহীং
বিপ্রঃ পাদপলম্বিতেন বপুষা তপ্ত্বোর্ধ্বপাদস্তপঃ ।
সম্প্রাপ্যাভিমতং বরং দিনকৃতো বিশ্বস্য চাহ্নাং ত্রয়ং
সার্ধং মৎসুহৃদা স্বমেব সদনং গন্তুং প্রবৃত্তোঽভবৎ ॥ ৪১ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু তাপ্সোপাখ্যানং
নামাশীত্যধিকশততমঃ সর্গঃ ॥ ১৮০ ॥ -৮-
॥ অথ নবমোঽধ্যায়ঃ ॥
॥ গৌর্যাশ্রমবর্ণনম্ ॥
কুন্দদন্ত উবাচ ।
আবাসমন্তরে গন্তুং প্রবৃত্তৌ মুদিতাকৃতী ।
মথুরানগরীং চন্দ্রসূর্যাবিন্দ্রপুরীমিব ॥ ১ ॥
প্রাপ্য রোধাভিধং গ্রামং বিশ্রম্যাম্রবণাচলে ।
উষিতৌ দ্বে দিনে তস্মিন্সালীসে নগরে সুখম্ ॥ ২ ॥
অধ্বানন্দিতচিত্তাভ্যামাবাভ্যামতিবাহিতঃ ।
দ্বিতীয়েঽহনি শীতাম্বুস্নিগ্ধচ্ছায়াবনদ্রুমাঃ ॥ ৩ ॥
নদীতীরলতোন্মুক্তপুষ্পপ্রকরপাণ্ডুরাঃ ।
তরত্তরঙ্গঝাংকারগায়নানন্দিতাধ্বগাঃ ॥ ৪ ॥
স্নিগ্ধদ্রুমবনচ্ছায়রণন্মৃগবিহংগমাঃ ।
স্থূলশাদ্বলশাখাগ্রপ্রোতাবশ্যায়মৌক্তিকাঃ ॥ ৫ ।
জংগলাদ্রিপুরগ্রামশ্বভ্রাভূপস্থলাবনীঃ ।
সমুল্লংঘ্য দিনে তস্মিন্সরিৎস্রোতঃ সরাংসি চ ॥ ৬ ॥
নীতবন্তৌ নিশামাবাং কদলীকাননে ঘনে ।
তুষারশিশিরে শ্রান্তৌ কদলীদলতল্পকে ॥ ৭ ॥
প্রাপ্তাবাবাং তৃতীয়েঽহ্নি ষণ্ডষণ্ডকমণ্ডিতম্ ।
জঙ্গলং জনবিচ্ছেদবিভক্তং খমিবাকৃতম্ ॥ ৮ ॥
তত্র স প্রকৃতং মার্গং পরিত্যজ্য বনান্তরম্ ।
প্রবিশন্সমুবাচেদমকার্যকরণং বচঃ ॥ ৯ ॥
গচ্ছাবোঽত্রাশ্রমে গৌর্যা মুনিমণ্ডলমণ্ডিতে ।
ভ্রাতরো মে স্থিতাঃ সপ্ত বনেষ্বেবমিবার্থিনঃ ॥ ১০ ॥
ভ্রাতরোষ্টৌ বয়মিমে জাতানেকতয়া তয়া ।
একসংবিন্ময়া জাতা একসংকল্পনিশ্চয়াঃ ॥ ১১ ॥
তেন তেঽপ্যত্র তপসে স্বনিশ্চয়সমাশ্রয়াঃ ।
স্থিতা আগত্য বিবিধৈস্তপোভিঃ ক্ষপিতৈনসঃ ॥ ১২ ॥
তৈঃ সার্ধং ভ্রাতৃভিঃ পূর্বমাগত্যাহমিহাবসম্ ।
ষণ্মাসানাশ্রমে গৌর্যাস্তেন দৃষ্টো ময়ৈষ সঃ ॥ ১৩ ॥
পুষ্পখণ্ড তরুচ্ছায়া সুপ্তমুগ্ধমৃগার্ভকঃ ।
পর্ণোটজাগ্রবিশ্রান্তশুকোদ্গ্রাহিতশাস্ত্রদৃক্ ॥ ১৪ ॥
তদ্ব্রহ্মলোকসংকাশমেহি মুন্যাশ্রমং শ্রিয়ে ।
গচ্ছাবোঽচ্ছতরং তত্র চেতঃ পুণ্যৈর্ভবিষ্যতি ॥ ১৫ ॥
বিদুষামপি ধীরাণামপি তত্ত্ববিদামপি ।
ৎবরতে হি মনঃ পুংসামলংবুদ্ধিবিলোকনে ॥ ১৬ ॥
তেনেত্যুক্তে চ তাবাবাং প্রাপ্তৌ মুন্যাশ্রমং চ তম্ ।
যাবত্তত্র মহারণ্যে পশ্যাবশ্চান্তরূপিণম্ ॥ ১৭ ॥
ন বৃক্ষং নোটজং কিংচিন্ন গুল্মং ন চ মানবম্ ।
ন মুনিং নার্ভকং নান্যন্ন বেদিং ন চ বা দ্বিজম্ ॥ ১৮ ॥
কেবলং শূন্যমেবাতি তদরণ্যমনন্তকম্ ।
তাপোপতপ্তমভিতো ভূমৌ স্থিতমিবাম্বরম্ ॥ ১৯ ॥
হা কষ্টং কিমিদং জাতমিতি তস্মিন্বদত্যথ ।
আবাভ্যাং সুচিরং ভ্রান্ত্বা দৃষ্ট একত্র বৃক্ষকঃ ॥ ২০ ॥
স্নিগ্ধচ্ছবির্ঘনচ্ছায়ঃ শীতলোঽম্বুধরোপমঃ ।
তলে তস্য সমাধানে সংস্থিতো বৃদ্ধতাপসঃ ॥ ২১ ॥
আবামগ্রে মুনেস্তস্য চ্ছায়ায়াং শাদ্বলস্থলে ।
উপবিষ্টৌ চিরং যাবন্নাসৌ ধ্যানান্নিবর্ততে ॥ ২২ ॥
ততশ্চিরেণ কালেন ময়োদ্বেগেন চাপলাৎ ।
উক্তং মুনে প্রবুধ্যস্ব ধ্যানাদিত্যুচ্চকৈর্বচঃ ॥ ২৩ ॥
শব্দেনোচ্চৈর্মদীয়েন সম্প্রবুদ্ধোঽভবন্মুনিঃ ।
সিংহোঽম্বুদরবেণেব জৃম্ভাং কৃৎবাভ্যুবাচ চ ॥ ২৪ ॥
কৌ ভবন্তাবিমৌ সাধূ ক্বাসৌ গৌর্যাশ্রমো গতঃ ।
কেন বাহমিহানীতঃ কালোঽয়ং কশ্চ বর্ততে ॥ ২৫ ॥
তেনেত্যুক্তে ময়াপ্যুক্তং ভগবন্বিদ্ধি ঈদৃশম্ ।
ন কিংচিদাবাং বুদ্ধোঽপি কস্মাজ্জানাসি ন স্বয়ম্ ॥ ২৬ ॥
ইতি শ্রুৎবা স ভগবান্পুনর্ধ্যানময়োঽভবৎ ।
দদর্শোদন্তমখিলমস্মাকং স্বাত্মনস্তথা ॥ ২৭ ॥
মুহূর্তমাত্রেণোবাচ প্রবুধ্য ধ্যানতো মুনিঃ ।
শ্রূয়তামিদমাশ্চর্যমার্যৌ হি কার্যবেদিনৌ ॥ ২৮ ॥
যমিমং পশ্যথঃ সাধূ কদম্বতরুপুত্রকম্ ।
মদাস্পদমরণ্যান্যাধম্মিল্লমিব পুষ্পিতম্ ॥ ২৯ ॥
কেনাপি কারণেনাস্মিন্সতী বাগীশ্বরী সতী ।
অবসদ্দশবর্ষাণি সমস্তর্তুনিষেবিতা ॥ ৩০ ॥
তদা তেনেহবিস্তীর্ণমভবদ্ঘনকাননম্ ।
গৌরিবনমিতি খ্যাতং ভূষিতং কুসুমর্তুভিঃ ॥ ৩১ ॥
ভৃঙ্গাঙ্গনাজনমনোহরহারিগীত-
লীলাবিলোলকলকণ্ঠবিহংগমঙ্গ ।
পুষ্পাম্বুবাহশতচন্দ্রনভোবিতানং
রাজীবরেণুকণকীর্ণদিগন্তরালম্ ॥ ৩২ ॥
মন্দারকুন্দমকরন্দসুগন্ধিতাশং
সংসূচ্ছ্বসৎকুসুমরাশিশশাঙ্কনিষ্ঠম্ ।
সংতানকস্তবকহাসবিকাসকান্ত-
মামোদিমারুতসমস্তলতাঙ্গনৌঘম্ ॥ ৩৩ ॥
পুষ্কাকরস্য নগরং নবগীতভৃঙ্গং
ভৃঙ্গাঙ্গনাকুসুমখণ্ডকমণ্ডপাঢ্যম্ ।
চন্দ্রাংশুজালপরিকোমলপুষ্পদোলা-
দোলায়মানসুরসিদ্ধবধূসমূহম্ ॥ ৩৪ ॥
হারীতহংসশুককোকিলকোককাক-
চক্রাহ্বভাসকলবিঙ্ককুলাকুলাঙ্গম্ ।
মেরুণ্ডকুক্কুটকপিঞ্জলহেমচূড-
রাঢাময়ূরবককল্পিতকেলিরম্যম্ ॥ ৩৫ ॥
গন্ধর্বয়ক্ষসুরসিদ্ধকিরীটঘৃষ্ট-
পাদাব্জকর্ণিককদম্বসরস্বতীকম্ ।
বাতায়নং কনককোমলচম্পকৌঘ-
তারাম্বরাম্বুধরপূরগৃহীতগন্ধম্ ॥ ৩৬ ॥
মন্দানিলস্খলিতপল্লববালবল্লী-
বিন্যাসগুপ্তদিবসাধিপরশ্মিশীতম্ ।
পীতং কদম্বকরবীরকনালিকের-
তালীতমালকুলপুষ্পপরাগপূরৈঃ ॥ ৩৭ ॥
কহ্বারকীর্ণকুমুদোৎপলপদ্মখণ্ড-
বল্গচ্চকোরবককোককদম্বহংসম্ ।
তালীসগুগ্গুলকচন্দনপারিভদ্র-
ভদ্রদ্রুমোদবিহারিবিচিত্রশক্তি ॥ ৩৮ ॥
তস্মিন্বনে চিরমুবাস হরার্ধদেহা
কেনাপি কারণবশেন চিরায় গৌরী ।
ভূৎবা প্রসন্নশশিবিম্বমুখী কদম্ব-
বাগীশ্বরী শশিকলেব শিবস্য মূর্ধ্নি ॥ ৩৯ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু তাপসোপাখ্যানে
গৌর্যাশ্রমবর্ণনং নামৈকাশীত্যধিকশততমঃ
সর্গঃ ॥ ১৮১ ॥ -৯-
॥ অথ দশমোঽধ্যায়ঃ ॥
॥ সপ্তদীপেশ্বর ॥
বৃদ্ধতাপস উবাচ ।
তস্মিন্নেব কদম্বেঽস্মিন্বর্ষাণি স্বেচ্ছয়া দশ ।
স্থিৎবা গৌরী জগামাথ হরবামার্ধমন্দিরম্ ॥ ১ ॥
তৎস্পর্শামৃতসিক্তোঽয়ং কদম্বতরুপুত্রকঃ ।
উৎসঙ্গ ইব চাসীনো ন যাত্যেব পুরাণতাম্ ॥ ২ ॥
ততো গৌর্যা প্রয়াতায়াং তদ্বনং তাদৃশং মহৎ ।
সামান্যবনতাং যাতং জনবৃন্দোপজীবিতম্ ॥ ৩ ॥
মালবো নাম দেশোঽস্তি তত্রাহং পৃথিবীপতিঃ ।
কদাচিত্ত্যক্তরাজ্য শ্রীর্মুনীনামাশ্রমান্ভ্রমন্ ॥ ৪ ॥
ইমং দেশমনুপ্রাপ্ত ইহ চাশ্রমবাসিভিঃ ।
পূজিতোঽস্য কদম্বস্য ধ্যাননিষ্ঠস্তলে স্থিতঃ ॥ ৫ ॥
কেনচিত্ত্বথ কালেন ভ্রাতৃভিঃ সপ্তভিঃ সহ ।
ভবানভ্যাগতঃ পূর্বং তপোর্থমিমমাশ্রমম্ ॥ ৬ ॥
তপস্বিনোঽষ্টাবিহ তে তথা নাম তদাবসন্ ।
যথা তপস্বিনোঽন্যে তে তেষাং মান্যাস্তপস্বিনঃ ॥ ৭ ॥
কালেনান্তরমসাবেকঃ শ্রীপর্বতং গতঃ ।
স্বামিনং কার্তিকেয়ং চ দ্বিতীয়স্তপসে গতঃ ॥ ৮ ॥
বারাণসীং তৃতীয়স্তু চতুর্থোঽগাদ্ধিমাচলম্ ।
ইহৈব তে পরে ধীরাশ্চৎবারোঽন্যে পরং তপন্ ॥ ৯ ॥
সর্বেষামেব চৈতেষাং প্রত্যেকং ৎবেতদীপ্সিতম্ ।
যথা সমস্তদ্বীপায়া ভুবোঽস্যাঃ স্যাং মহীপতিঃ ॥ ১০ ॥
অথ সম্পাদিতং তেষাং সর্বেষামেতদীপ্সিতম্ ।
তপস্তুষ্টাভিরিষ্টভির্দেবতাভির্বরৈঃ ॥ ১১ ॥
তপতস্তে ততো যাতা ভ্রাতরঃ সদনং নিজম্ ।
ভূমৌ ধর্ময়ুগং ভুক্ত্বা বেধা ব্রহ্মপুরীমিব ॥ ১২ ॥
তদ্ভবদ্ভ্রাতৃভির্ভব্য বরদানবিধৌ তদা ।
ইদং বরোদ্যতা যত্নাৎপ্রার্থিতাঃ স্বেষ্টদেবতাঃ ॥ ১৩ ॥
দেব্যস্মাকমিমে সর্বে সপ্তদ্বীপেশ্বরৌ স্থিতৌ ।
সত্যাঃ প্রকৃতয়ঃ সন্তু সর্ব আশ্রমবাসিনঃ ॥ ১৪ ॥
তমিষ্টদেবতাসার্থমুররীকৃত্য সাদরম্ ।
তেষামস্ত্বেবমিত্যুক্ত্বা জগামান্তর্দ্ধিমীশ্বরী ॥ ১৫ ॥
তে ততঃ সদনং যাতাস্তেষামাশ্রমবাসিনঃ ।
সর্ব এব গতাঃ পশ্চাদেক এবাস্মি নো গতঃ ॥ ১৬ ॥
অহং কেবলমেকান্তে ধ্যানৈকগতমানসঃ ।
বাগীশ্বরীকদম্বস্য তলে তিষ্ঠামি শৈলবৎ ॥ ১৭ ॥
অথ কালে বহত্যস্মিন্নৃতুসংবৎসরাত্মনি ।
ইঅদং সর্বং বনং ছিন্নং জনৈঃ পর্যন্তবাসিভিঃ ॥ ১৮ ॥
ইদং কদম্বমম্লানং জনতাঃ পূজয়ন্ত্যলম্ ।
বাগীশ্বরীগৃহমিতি মাং চৈবৈকসমাধিগম্ ॥ ১৯ ॥
অথৈনং দেশমায়াতৌ ভবন্তৌ দীর্ঘতাপসৌ ।
এতত্ত্বৎকথিতং সর্বং ধ্যানদৃষ্টং ময়াখিলম্ ॥ ২০ ॥
তস্মাদুত্থায় হে সাধূ গচ্ছতং গৃহমাগতৌ ।
তত্র তে ভ্রাতরঃ সর্বে সংগতা দারবন্ধুভিঃ ॥ ২১ ॥
অষ্টানাং ভবতাং ভব্যং সদনে স্বে ভবিষ্যতি ।
মহাত্মনাং ব্রহ্মলোকে বসূনামিব সংগমঃ ॥ ২২ ॥
ইত্যুক্তে তেন স ময়া পৃষ্টঃ পরমতাপসঃ ।
সংদেহাদিদমাশ্চর্যমার্যাস্তদ্বর্ণয়াম্যহম্ ॥ ২৩ ॥
একৈব সপ্তদ্বীপাস্তি ভগবন্ভূরিয়ং কিল ।
তুল্যকালং ভবন্ত্যষ্টৌ সপ্তদ্বীপেশ্বরাঃ কথম্ ॥ ২৪ ॥
কদম্বতাপস উবাচ ।
অসমংজসমেতাবদেব নো যাবদুচ্যতে ।
ইদমন্যদসংবদ্ধতরং সংশ্রূয়তাং মম ॥ ২৫ ॥
এতেঽষ্টৌ ভ্রাতরস্তত্র তাপসা দেহসংক্ষয়ে ।
সপ্তদ্বীপেশ্বরাঃ সর্বে ভবিষ্যন্তি গৃহোদরে ॥ ২৬ ॥
অষ্টৌ হ্যেতে মহীপীঠেষ্বেতেষ্বেতেষু সদ্মসু ।
সপ্তদ্বীপেশ্বরা ভূপা ভবিষ্যন্তীহ মে শৃণু ॥ ২৭ ॥
অস্ত্যেতেষাং কিলাষ্টানাং ভার্যাষ্টকমনিন্দিতম্ ।
দিগন্তরাণাং নিয়তং তারাষ্টকমিবোজ্জ্বলম্ ॥ ২৮ ॥
তদ্ভার্যাষ্টকমেতেষু যাতেষু তপসে চিরম্ ।
বভূব দুঃখিতং স্ত্রীণাং যদ্বিয়োগোঽহিদুঃসহঃ ॥ ২৯ ॥
দুঃখিতাঃ প্রত্যযে তেষাং চক্রুস্তা দারুণং তপঃ ।
শতচান্দ্রায়ণং তাসাং তুষ্টাভূত্তেন পার্বতী ॥ ৩০ ॥
অদৃশ্যোবাচ সা তাসাং বচোঽন্তঃপুরমন্দিরে ।
দেবী সপর্যাবসরে প্রত্যেকং পৃথগীশ্বরী ॥ ৩১ ॥
দেব্যুবাচ ।
ভর্ত্রর্থমথ চাত্মার্থং গৃহ্যতাং বালিকে বরঃ ।
চিরং ক্লিষ্টাসি তপসা নিদাঘেনৈব মংজরী ॥ ৩২ ॥
ইত্যাকর্ণ্য বচো দেব্যা দত্তপুষ্পা চিরংটিকা ।
স্ববাসনানুসারেণ কুর্বাণৈবেশ্বরীস্তবম্ ॥ ৩৩ ॥
আনন্দমন্থরোবাচ বচনং মৃদুভাষিণী ।
আকাশসংস্থিতাং দেবীং ময়ূরীবাভ্রমালিকাম্ ॥ ৩৪ ॥
চিরংটিকোবাচ ।
দেবি দেবাধিদেবেন যথ তে প্রেমশংভুনা ।
ভর্ত্রা মম তথা প্রেম স ভর্তাস্তু মমামরঃ ॥ ৩৫ ॥
দেব্যুবাচ ।
আসৃষ্টের্নিয়তের্দার্ঢ্যাদমরৎবং ন লভ্যতে ।
তপোদানৈরতোঽন্যৎবং বরং বরয় সুব্রতে ॥ ৩৬ ॥
চিরংটিকোবাচ ।
অলভ্যমেতন্মে দেবি তন্মদ্ভর্তৃর্গৃহান্তরাৎ ।
মৃতস্য মা বিনির্যাতু জীবো বাহ্যমপি ক্ষণাৎ ॥ ৩৭ ॥
দেহপাতশ্চ মে ভর্তুর্যদা স্যাদাত্মমন্দিরে ।
তদেতদস্ত্বিতি বরূ দীয়তামম্বিকে মম ॥ ৩৮ ॥
দেব্যুবাচ ।
এবমস্তু সুতে ৎবং চ পত্যৌ লোকান্তরাস্থিতে ।
ভবিষ্যসি প্রিয়া ভার্যা দেহান্তে নাত্র সংশয়ঃ ॥ ৩৯ ॥
ইত্যুক্ত্বা বিররামাসৌ গৌর্যা গীর্গগনোদরে ।
মেঘমালাধ্বনিরিব নিরবদ্যসমুদ্যতা ॥ ৪০ ॥
দেব্যাং গতায়াং ভর্তারস্তাসাং কালেন কেনচিৎ ।
তে ককুব্ভ্যঃ সমাজগ্মুঃ সর্বে প্রাপ্তমহাবরাঃ ॥ ৪১ ॥
অদ্যায়মপি সংয়াতু ভার্যায়া নিকটং পতিঃ ।
ভ্রাতৃণাং বান্ধবানাং চ ভবৎবন্যোন্যসংগমঃ ॥ ৪২ ॥
ইদমন্যদথৈতেষামসমংজসমাকুলম্ ।
শৃণু কিংবৃত্তমাশ্চর্যমার্যকার্যোপরোধকম্ ॥ ৪৩ ॥
তপ্যতাং তপ এতেষাং পিতরৌ তৌ বধূ যুতৌ ।
তীর্থমুন্যাশ্রমশ্রেণীং দ্রষ্টুং দুঃখান্বিতৌ গতৌ ॥ ৪৪ ॥
শরীরনৈরপেক্ষ্যেণ পুত্রাণাং হিতকাম্যযা ।
গন্তুং কলাপগ্রামং তং যত্নবন্তৌ বভূবতুঃ ॥ ৪৫ ॥
তৌ প্রয়াতৌ মুনিগ্রাম মার্গে দদৃশতুঃ সিতম্ ।
পুরুষং কপিলং হ্রস্বং ভস্মাঙ্গং চোর্ধ্বমূর্ধজম্ ॥ ৪৬ ॥
ধূলীলবমনাদৃত্য তং জরৎপান্থশংকয়া ।
যদা তৌ জগ্মতুস্তেন স উবাচান্বিতঃ ক্রুধা ॥ ৪৭ ॥
সবধূক মহামূর্খ তীর্থার্থী দারসংয়ুতঃ ।
মাং দুর্বাসসমুল্লংঘ্য গচ্ছস্যবিহিতানতিঃ ॥ ৪৮ ॥
বধূনাং তে সুতানাং চ গচ্ছতস্তপসার্জিতাঃ ।
বিপরীতা ভবিষ্যন্তি লব্ধা অপি মহাবরাঃ ॥ ৪৯ ॥
ইত্যুক্তবন্তং তং যাবৎসদারোঽথ বধূয়ুতঃ ।
সন্মানং কুরুতে তাবন্মুনিরন্তর্ধিমায়যৌ ॥ ৫০ ॥
অথ তৌ পিতরৌ তেষাং সবধূকৌ সুদুঃখিতৌ ।
কৃশীভূতৌ দীনমুখৌ নিরাশৌ গৃহমাগতৌ ॥ ৫১ ॥
অতো বদাম্যহং তেষাং নৈকং নামাসমংজসম্ ।
অসমংজসলক্ষাণি গণ্ডে স্ফোটাঃ স্ফুটা ইব ॥ ৫২ ॥
চিদ্ব্যোমসংকল্পমহাপুএরেস্মি-
ন্নিত্থং বিচিত্রাণ্যসমংজসানি ।
নিঃশূন্যরূপেঽপি হি সংভবন্তি
দৃশ্যে যথা ব্যোমনি দৃশ্যজৃম্ভাঃ ॥ ৫৩ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু
তাপসোপাখ্যানান্তর্গতসপ্তদ্বীপেশ্বরো সপ্তদ্বীপেশ্বর
নাম ব্যশীত্যধিকশততমঃ সর্গঃ ॥ ১৮২ ॥ -১০-
॥ অথ একাদশোঽধ্যায়ঃ ॥
॥দ্বীপসপ্তকাষ্টকবর্ণনম্ ॥
কুন্দদন্ত উবাচ ।
ততঃ পৃষ্টো ময়া তত্র স গৌর্যাশ্রমতাপসঃ ।
তাপসংশুষ্কদর্ভাগ্রজরাজর্জরমূর্ধজঃ ॥ ১ ॥
একৈব সপ্তদ্বীপাস্তি বসুধা যত্র তত্র তে ।
সপ্তদ্বীপেশ্বরা অষ্টৌ ভবন্তি কথমুত্তমাঃ ॥ ২ ॥
যস্য জীবস্য সদনান্নাস্তি নির্গমনং বহিঃ ।
স করোতি কথং সপ্তদ্বীপেশৎবেন দিগ্জয়ম্ ॥ ৩ ॥
যৈর্বরা বরদৈর্দত্তাঃ শাপৈস্তে তদ্বিরুদ্ধতাম্ ।
কথং গচ্ছন্তি গচ্ছন্তি কথং ছায়া হি তাপতাম্ ॥ ৪ ॥
মিথোঽশক্যাং কথং ধর্মৌ স্থিতিমেকত্র গচ্ছতঃ ।
আধার এবাধেয়ৎবং করোতি কথমাত্মনি ॥ ৫ ॥
গৌর্যাশ্রমতাপস উবাচ ।
সম্পশ্যসি কিমেতেষাং ভো সাধো শৃণ্বনন্তরম্ ।
অষ্টমেঽস্মিন্সুসম্প্রাপ্তে তং প্রদেশং সবান্ধবম্ ॥ ৬ ॥
ইতো ভবন্তৌ তং দেশমাসাদ্য সুখসংস্থিতৌ ।
স্ববন্ধুসুখসংস্থানৌ কংচিৎকালং ভবিষ্যতঃ ॥ ৭ ॥
ততস্তেঽষ্টৌ মরিষ্যন্তি ভ্রাতরঃ ক্রমশো গৃহে ।
বান্ধবোঽথ করিষ্যন্তি তেষাং দেহাংস্তদগ্নিসাৎ ॥ ৮ ॥
তেষাং তে সংবিদাকাশঃ পৃথক্পৃথগবস্থিতাঃ ।
মুহূর্তমাত্রং স্থাস্যন্তি সুষুপ্তস্থা জডা ইব ॥ ৯ ॥
এতস্মিন্নন্তরে তেষাং তানি কর্মাণি ধর্মতঃ ।
একত্র সংঘটিষ্যন্তি বরশাপাত্মকানি খে ॥ ১০ ॥
কর্মাণি তান্যধিষ্ঠাতৃদেবরূপাণি পেটকম্ ।
বরশাপশরীরাণি করিষ্যন্তি পৃথক্ পৃথক্ ॥ ১১ ॥
বরাস্তেঽত্র গমিষ্যন্তি সুভগাঃ পদ্মপাণয়ঃ ।
ব্রহ্মদণ্ডায়ুধাশ্চন্দ্রধবলাঙ্গাশ্চতুর্ভুজাঃ ॥ ১২ ॥
শাপাস্তত্র ভবিষ্যন্তি ত্রিনেত্রাঃ শূলপাণয়ঃ ।
ভীষণাঃ কৃষ্ণমেঘাভা দ্বিভুজা ভ্রুকুটীমুখাঃ ॥ ১৩ ॥
বরা বদিষ্যন্তি
সুদূরং গম্যতাং শাপাঃ কালোঽস্মাকমুপাগতঃ ।
ঋতূনামিব তন্নাম কঃ সমর্থোঽতিবর্তিতুম্ ॥ ১৪ ॥
শাপা বদিষ্যন্তি
গম্যতাং হে বরা দূরং কালোঽস্মাকমুপাগতঃ ।
ঋতূনামিব তন্নাম কঃ সমর্থোঽতিবর্তিতুম্ ॥ ১৫ ॥
বরা বদিষ্যন্তি
কৃতা ভবন্তো মুনিনা বয়ং দিনকৃতা কৃতাঃ ।
মুনীনাং চাধিকো দেবো ভগবন্তং পুরা যতঃ ॥ ১৬ ॥
প্রবদৎসু বরেষ্বেবং শাপাঃ ক্রুদ্ধধিয়ো বরান্ ।
বিবস্বতা কৃতা যূয়ং বয়ং রুদ্রাংশতঃ কৃতাঃ ॥ ১৭ ॥
দেবানামধিকো রুদ্রো রুদ্রাংশপ্রভবো মুনিঃ ।
ইত্যুক্ত্বা প্রোদ্যতা তেষাং চক্রুঃশ্রুঙ্গাণ্যগা ইব ॥ ১৮ ॥
অশাপেষূদ্যতশৃঙ্গেষু বরা ইদমরাতিষু ।
বিহসন্তঃ প্রবক্ষ্যন্তি প্রমেয়ীকৃতনিশ্চয়ম্ ॥ ১৯ ॥
হে শাপাঃ পাপতাং ত্যক্ত্বা কার্যস্যান্তো বিচার্যতাম্ ।
যৎকার্যং কলহস্যান্তে তদেবাদৌ বিচার্যতাম্ ॥ ২০ ॥
পিতামহপুরীং গৎবা কলহান্তে বিনির্ণয়ঃ ।
কর্তব্যোঽস্মাভিরেততৎকিমাদৌ নেহ বিধীয়তে ॥ ২১ ॥
শাপৈর্বরোক্তমাকর্ণ্য বাঢমিত্যুররীকৃতম্ ।
কো ন গৃহ্ণাতি মূঢোঽপি বাক্যং যুক্তিসমন্বিতম্ ॥ ২২ ॥
ততঃ শাপা বরৈঃ সার্ধং যাস্যন্তি ব্রহ্মণঃ পুরম্ ।
মহানুভাবা হি গতিঃ সদা সংদেহনশনে ॥ ২৩ ॥
প্রণামপূর্বং তৎসর্বং যথাবৃত্তং পরস্পরম্ ।
ব্রহ্মণে কথয়িষ্যন্তি শ্রুৎবা তেষাং স বক্ষ্যতি ॥ ২৪ ॥
ব্রহ্মোবাচ ।
বরশাপাধিপা ভোভো যেঽন্তঃ সারা জয়ন্তি তে ।
কেঽন্তঃসারা ইতি মিথো নূনমন্বিষ্যতাং স্বয়ম্ ॥ ২৫ ॥
ইতি শ্রুৎবা প্রবিষ্টাস্তে সারতাং সমবেক্ষিতুম্ ।
বরাণাং হৃদয়ং শাপাঃ শাপানাং হৃদয়ং বরাঃ ॥ ২৬ ॥
তে পরস্পরমন্বিষ্য স্বয়ং হৃদয়সারতাম্ ।
জ্ঞাৎবা চ সমবায়েন প্রবক্ষ্যন্তি পিতামহম্ ॥ ২৭ ॥
শাপা বক্ষ্যন্তি
জিতাঃ প্রজানাথ বয়ং নান্তঃসারা বয়ং যতঃ ।
অন্তঃসারা বরা এব বজ্রস্তম্ভা ইবাচলাঃ ॥ ২৮ ॥
বয়ং কিলেমে ভগবন্বরাঃ শাপাশ্চ সর্বদা ।
ননু সংবিন্ময়া এব দেহোঽন্যোঽস্মাকমস্তি নো ॥ ২৯ ॥
বরদস্য হি যা সংবিদ্বরো দত্ত ইতি স্থিতা ।
সৈবার্থিনি ময়া লব্ধো বরোঽয়মিতি তিষ্ঠতি ॥ ৩০ ॥
বিজ্ঞপ্তিমাত্রবচনং দেহং সৈব ফলং ততঃ ।
পশ্যত্যনুভবত্যত্তি দেশকালশতভ্রমৈঃ ॥ ৩১ ॥
বরদাত্মা গৃহীতৎবাচ্চিৎকালান্তরসংভৃতা ।
যদা তদান্তঃসারাসৌ দুর্জয়া ন তু শাপজা ॥ ৩২ ॥
বরপ্রদানং বরদৈর্বরদানাং বরার্থিভিঃ ।
যদা সুচিরমভ্যস্তং বরাণাং সারতা তদা ॥ ৩৩ ॥
যদেব সুচিরং সংবিদভ্যস্যতি তদেব সা ।
সারমেবাশু ভবতি ভবত্যাশু চ তন্ময়ী ॥ ৩৪ ॥
শুদ্ধানামতিশুদ্ধৈব সংবিজ্জয়তি সংবিদাম্ ।
অশুদ্ধানাং ৎবশুদ্ধৈব কালাৎসাম্যং ন বিদ্যতে ॥ ৩৫ ॥
ক্ষণাংশেনাপি যো জ্যেষ্ঠো ন্যায়স্তেনাবপূর্যতে ।
নার্থে ন্যায়ান্তরং কিংচিৎকর্তুমুৎসহতে মদম্ ॥ ৩৬ ॥
সমেনোভয়কোটিস্থং মিশ্রং বস্তু ভবেৎসমম্ ।
বরশাপবিলাসেন ক্ষীরমিশ্রং যথা পয়ঃ ॥ ৩৭ ॥
সমাভ্যাং বরশাপাভ্যামথবা চিদ্দ্বিরূপতাম্ ।
স্বয়মেবানুভবতি স্বপ্নেষ্বিব পুরাত্মিকা ॥ ৩৮ ॥
শিক্ষিতং ৎবত্ত এবেতি যত্তদেব তব প্রভো ।
পুনঃ প্রতীপং পঠিতং শীঘ্রং যামো নমোঽস্তু তে ॥ ৩৯ ॥
ইত্যুক্ত্বা স স্বয়ংশাপঃ ক্বাপি শাপগণো যয়ৌ ।
প্রশান্তে তিমিরে দৃষ্টে ব্যোম্নি কেশোণ্ড্রকং যথা ॥ ৪০ ॥
অথান্যো বরপূগোঽত্র গৃহনির্গমরোধকঃ ।
স্থানিস্থানমিবাদেশঃ সমানার্থোঽভ্যপূরয়ৎ ॥ ৪১ ॥
শাপস্থানকা বদিষ্যন্তি
সপ্তদ্বীপেশজীবানাং নির্যাণং শবসদ্মনঃ ।
দেবেশ বিদ্মো ন বয়মন্ধকূপাদিবাম্ভসাম্ ॥ ৪২ ॥
সপ্তদ্বীপেশ্বরানেতানিমে দ্বীপেষু সদ্মসু ।
কারয়ন্তি বরা বর্যা বীরা দিগ্বিজয়ং রণে ॥ ৪৩ ॥
তদেবমনিবার্যেঽস্মিন্বিরোধে বিবুধেশ্বর ।
যদনুষ্ঠেয়মস্মাভিস্তদাদিশ শিবায় নঃ ॥ ৪৪ ॥
ব্রহ্মোবাচ ।
সপ্তদ্বীপেশ্বরবরা গৃহরোধবরাশ্চ হে ।
কামঃ সম্পন্ন এবেহ ভবতাং ভবতামপি ॥ ৪৫ ॥
ব্রজতৈতদপেক্ষৎবং যাবন্নেষ্টাবপি ক্ষণাৎ ।
চিরং চিরায় সদনে সপ্তদ্বীপেশ্বরাঃ স্থিতাঃ ॥ ৪৬ ॥
সমনন্তরমেবৈতে দেহপাতাৎস্বসদ্মসু ।
সপ্তদ্বীপেশ্বরাঃ সর্বে সম্পন্নাঃ পরমং বরাঃ ॥ ৪৭ ॥
সর্বে বরা বদিষ্যন্তি
কুতো ভূমণ্ডলান্যষ্টৌ সপ্তদ্বীপানি ভূতয়ঃ ।
একমেবেহ ভূপীঠং শ্রুতং দৃষ্টং চ নেতরৎ ॥ ৪৮ ॥
কথং চৈতানি তিষ্ঠন্তি কস্মিংশ্চিদ্গৃহকোশকে ।
পদ্মাক্ষকোশকে সূক্ষ্মে কথং ভান্তি মতংগজাঃ ॥ ৪৯ ॥
ব্রহ্মোবাচ ।
যুক্তং যুষ্মাভিরস্মাভিঃ সর্বং ব্যোমাত্মকং জগৎ ।
স্থিতং চিৎপরমাণ্বন্তরন্তঃস্বপ্নোঽনুভূয়তে ॥ ৫০ ॥
ভাতি যৎপরমস্যাণোরন্তস্থস্বগৃহোদরে ।
স্ফুরিতং তৎকিমাশ্চর্যং কঃ স্ময়ঃ প্রকৃতেঃ ক্রমে ॥ ৫১ ॥
মৃতেরনন্তরং ভাতি যথাস্থিতমিদং জগৎ ।
শূন্যাত্মৈব ঘনাকারং তস্মিন্নৈব ক্ষণে চিতঃ ॥ ৫২ ॥
অণাবপি জগন্মাতি যত্র তত্র গৃহোদরে ।
সপ্তদ্বীপা বসুমতী কচতীতি কিমদ্ভুতম্ ॥ ৫৩ ॥
যদ্ভাতীদং চ চিত্তৎবং জগৎবং জগৎক্বচিৎ ।
চিন্মাত্রমেব তদ্ভাতি শূন্যৎবেন যথাম্বরম্ ॥ ৫৪ ॥
ইতি তে ব্রহ্মণা প্রোক্তা বরদেন বরাস্ততঃ ।
তানাধিভৌতিকভ্রান্তিময়ান্সংত্যজ্য দেহকান্ ॥ ৫৫ ॥
প্রণম্যাজং সমং জগ্মুরাতিবাহিকদেহিনঃ ।
সপ্তদ্বীপে চ দেবানাং গৃহকোশান্কচজ্জনান্ ॥ ৫৬ ॥
যাবত্তে তত্র সম্পন্না সপ্তদ্বীপাধিনায়কাঃ ।
অষ্টাবপীষ্টাপুষ্টানাং দিনাষ্টকমহীভুজাম্ ॥ ৫৭ ॥।
তে পরস্পরমজ্ঞাতা অজ্ঞাশ্চান্যোন্যবন্ধবঃ ।
অন্যোন্যভূমণ্ডলগা অন্যোন্যাভিমতে হিতাঃ ॥ ৫৮ ॥
তেষাং কশ্চিদ্গৃহস্যান্তরেব তারুণ্যসুন্দরঃ ।
উজ্জয়িন্যাং মহাপুর্যাং রাজধান্যাং সুখে স্থিতঃ ॥ ৫৯ ॥
শাকদ্বীপাস্পদঃ কশ্চিন্নাগলোকজিগীষয়া ।
বিচরত্যব্ধিজঠরে সর্বদিগ্বিজয়োদ্যতঃ ॥ ৬০ ॥
কুশদ্বীপরাজধান্যাং নিরাধিঃ সকলপ্রজাঃ ।
কৃতদিগ্বিজয়ঃ কশ্চিৎসুপ্তঃ কান্তাবলম্বিতঃ ॥ ৬১ ॥
শাল্মলিদ্বীপশৈলেন্দ্রশিরঃপুর্যাঃ সরোবরে ।
জললীলারতঃ কশ্চিৎসহবিদ্যাধরীগণৈঃ ॥ ৬২ ॥
ক্রৌঞ্চদ্বীপে হেমপুরে সপ্তদ্বীপবিবর্ধিতে ।
প্রবৃত্তো বাজিমেধেন কশ্চিদ্যষ্টুং দিনাষ্টকম্ ॥ ৬৩ ॥
উদ্যতঃ শাল্মলিদ্বীপে কশ্চিদ্দ্বীপান্তচারিণা ।
যোদ্ধুমুদ্ধৃতদিগ্দন্তিদন্তাকৃষ্টকুলাচলঃ ॥ ৬৪ ॥
গোমেদদ্বীপকঃ কশ্চিৎপুষ্করদ্বীপরাট্ সুতাম্ ।
সমানেতুং বশাদ্যাতি কষৎসেনোঽষ্টমোঽভবৎ ॥ ৬৫ ॥
পুষ্করদ্বীপকঃ কশ্চিল্লোকালোকাদ্রিভূভুজঃ ।
দূতেন সহ নির্যাতো ধনভূমিদিদৃক্ষয়া ॥ ৬৬ ॥
প্রত্যেকমিত্থমেতেষাং দ্বীপদ্বীপাধিনাথতাম্ ।
কুর্বতাং স্বগৃহাকাশে দৃষ্ট্বা স্বপ্রতিভোচিতাম্ ॥ ৬৭ ॥
ত্যক্তাভিমানিকাকারা দ্বিবিধাস্তে বরাস্ততঃ ।
তৎসংবিদ্ভির্গৃহেষ্বন্তরেকতাং খানি খৈরিব ॥ ৬৮ ॥
যাস্যন্তি তে ভবিষ্যন্তি সম্প্রাপ্তাভিমতাশ্চিরম্ ।
সপ্তদ্বীপেশ্বরাস্তুষ্টা নন্বষ্টাবপি তুষ্টিমৎ ॥ ৬৯ ॥
ইত্যেতে প্রবিকসিতোদিতক্রিয়ার্থাঃ
প্রাপ্স্যন্তি প্রবিততবুদ্ধয়স্তপোভিঃ ।
অন্তর্যৎস্ফুরতি বিদস্তদেব বাহ্যে
নাপ্তং কৈস্তদুচিতকর্মভিঃ কিলেতি ॥ ৭০ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু
তাপসোপাখ্যানান্তর্গত দ্বীপসপ্তকাষ্টকবর্ণনং
নাম ত্রিসপ্তত্যধিকশততমঃ সর্গঃ ॥ ১৮৩ ॥ -১১-
॥ অথ দ্বাদশোঽধ্যায়ঃ ॥
॥ কুন্দদন্তোপদেশঃ ॥
কুন্দদন্ত উবাচ ।
ইত্যুক্তবানসৌ পৃষ্টঃ কদম্বতলতাপসঃ ।
সপ্তদ্বীপা ভুবোঽষ্টৌ তাঃ কথং ভ্রাতা গৃহেষ্বিতি ॥ ১ ॥
কদম্বতাপস উবাচ ।
চিদ্ধাতুরীদৃগেবায়ং যদেশ ব্যোমরূপ্যপি ।
সর্বগো যত্র যত্রাস্তে তত্র তত্রাত্মনি স্বয়ম্ ॥ ২ ॥
আত্মানমিত্থং ত্রৈলোক্যরূপেণান্যেন বা নিজম্ ।
পরিপশ্যতি রূপং স্বমত্যজন্নেব খাত্মকম্ ॥ ৩ ॥
কুন্দদন্ত উবাচ ।
একস্মিন্বিমলে শান্তে শিবে পরমকারণে ।
কথং স্বভাবসংসিদ্ধা নানাতা বাস্তবী স্থিতা ॥ ৪ ॥
কদম্বতাপস উবাচ ।
সর্বং শান্তং চিদাকাশং নানাস্তীহ ন কিংচন ।
দৃশ্যমানমপি স্ফারমাবর্তাত্মা যথাম্ভসি ॥ ৫ ॥
অসৎস্বেষু পদার্থেষু পদার্থা ইতি ভান্তি যৎ ।
চিৎখং স্বপ্নসুষুপ্তাত্ম তত্তস্যাচ্ছং নিজং বপুঃ ॥ ৬ ॥
সস্পন্দোঽপি হি নিঃস্পন্দঃ পর্বতোঽপি ন পর্বতঃ ।
যথা স্বপ্নেষু চিদ্ভাবঃস্বভোঽর্থগতস্তথা ॥ ৭ ॥
ন স্বভাবা ন চৈবার্থাঃ সন্তি সর্বাত্মকোচিতে ।
সর্গাদৌ কচিতং রূপং যদ্যথা তত্তথা স্থিতম্ ॥ ৮ ॥
ন চ নাম পরং রূপং কচনাকচনাত্মকম্ ।
দ্রব্যাত্মা চিচ্চ চিদ্ব্যোম স্থিতমিত্থং হি কেবলম্ ॥ ৯ ॥
একৈব চিদ্যথা স্বপ্নে সেনায়াং জনলক্ষতাম্ ।
গতেবাচ্ছৈব কচতি তথৈবাস্যাঃ পদার্থতা ॥ ১০ ॥
যৎস্বতঃ স্বাত্মনি স্বচ্ছে চিৎখং কচকচায়তে ।
তত্তেনৈব তদাকারং জগদিত্যনুভূয়তে ॥ ১১ ॥
অসত্যপি যথা বহ্নাবুষ্ণসংবিদ্ধি ভাসতে ।
সংবিন্মাত্রাত্মকে ব্যোম্নি তথার্থঃ স্বস্বভাসকঃ ॥ ১২ ॥
অসত্যপি যথা স্তম্ভে স্বপ্নে খে স্তম্ভতা বিদঃ ।
তথেদমস্যা নানাৎবমনন্যদপি চান্যবৎ ॥ ১৩ ॥
আদিসর্গে পদার্থৎবং তৎস্বভাবাচ্ছমেব চ ।
চিদ্ব্যোম্না যদ্যথা বুদ্ধং তত্তথাদ্যাপি বিন্দতে ॥ ১৪ ॥
পুষ্পে পত্রে ফলে স্তম্ভে তরুরেব যথা ততঃ ।
সর্ব সর্বত্র সর্বাত্ম পরমেব তথাঽপরম্ ॥ ১৫ ॥
পরমার্থাম্বরাম্ভোধাবাপঃ সর্গ পরংপরা ।
পরমার্থ মহাকাশে শূন্যতা সর্গসংবিদঃ ॥ ১৬ ॥
পরমার্থশ্চ সর্গশ্চ পর্যায়ৌ তরুবৃক্ষবৎ ।
বোধাদেতদবোধাত্তু দ্বৈতং দুঃখায় কেবলম্ ॥ ১৭ ॥
পরমার্থো জগচ্চেদকমিত্যেব নিশ্চয়ঃ ।
অধ্যাত্মশাস্ত্রবোধেন ভবেৎসৈষা হি মুক্ততা ॥ ১৮ ॥
সংকল্পস্য বপুর্ব্রহ্ম সংকল্পকচিদাকৃতেঃ ।
তদেব জগতো রূপং তস্মাদ্ব্রহ্মাত্মকং জগৎ ॥ ১৯ ॥
যতো বাচো নিবর্তন্তে ন নিবর্তন্ত এব বা ।
বিধয়ঃ প্রতিষেধাশ্চ ভাবাভাবদৃশস্তথা ॥ ২০ ॥
অমৌনমৌনং জীবাত্ম যৎপাষাণবদাসনম্ ।
যৎসদেবাসদাভাসাং তদ্ব্রহ্মাভিধমুচ্যতে ॥ ২১ ॥
সর্বস্মিন্নেকসুঘনে ব্রহ্মণ্যেব নিরাময়ে ।
কা প্রবৃত্তির্নিবৃত্তিঃ কা ভাবাভাবাদিবস্তুনঃ ॥ ২২ ॥
একস্যামেব নিদ্রায়াং সুষুপ্তস্বপ্নবিভ্রমাঃ ।
যদা ভান্ত্যবিচিত্রায়াং চিত্রা ইব নিরন্তরাঃ ॥ ২৩ ॥
এতস্যাং চিৎখসত্তায়াং তথা মূলকসর্গকাঃ ।
বহবো ভান্ত্যচিত্রায়াং চিত্রা ইব নিরন্তরাঃ ॥ ২৪ ॥
দ্রব্যে দ্রব্যান্তরশ্লিষ্টং যৎকার্যান্তরমাক্ষিপেৎ ।
তদ্বদন্তস্তথাভূতচিৎসারং স্ফুরণং মিথঃ ॥ ২৫ ॥
সর্বে পদার্থাশ্চিৎসারমাত্রমপ্রতিঘাঃ সদা ।
যথা ভান্তি তথা ভান্তি চিন্মাত্রৈকাত্মতাবশাৎ ॥ ২৬ ।
চিন্মাত্রৈকাত্মসারৎবাদ্যথাসংবেদনং স্থিতাঃ ।
নিঃস্পন্দা নির্মনস্কারাঃ স্ফুরন্তি দ্রব্যশক্তয়ঃ ॥ ২৭ ॥
অবিদ্যমানমেবেদং দৃশ্যতেঽথানুভূয়তে ।
জগৎস্বপ্ন ইবাশেষং সরুদ্রোপেন্দ্রপদ্মজম্ ॥ ২৮ ॥
বিচিত্রাঃ খলু দৃশ্যন্তে চিজ্জলে স্পন্দরীতয়ঃ ।
হর্ষামর্ষবিষাদোত্থজঙ্গমস্থাবরাত্মনি ॥ ২৯ ॥
স্বভাববাতাধূতস্য জগজ্জালচমৎকৃতেঃ ।
হা চিন্মরীচিপাংশ্বভ্রনীহারস্য বিসারিতা ॥ ৩০ ॥
যথা কেশোণ্ড্রকং ব্যোম্নি ভাতি ব্যামলচক্ষুষঃ ।
তথৈবেয়ং জগদ্ভান্তির্ভাত্যনাত্মবিদোঽম্বরে ॥ ৩১ ॥
যাবৎসংকল্পিতং তাবদ্যথা সংকল্পিতং তথা ।
যথা সংকল্পনগরং কচতীদং জগত্তথা ॥ ৩২ ॥
সংকল্পনগরে যাবৎসংকল্পসকলা স্থিতিঃ ।
ভবত্যেবাপ্যসদ্রূপা সতীবানুভবে স্থিতা ॥ ৩৩ ॥
প্রবহত্যেব নিয়তির্নিয়তার্থপ্রদায়িনী ।
স্থাবরং জঙ্গমং চৈব তিষ্ঠত্যেব যথাক্রমম্ ॥ ৩৪ ॥
জায়তে জঙ্গমং জীবাৎস্থাবরং স্থাবরাদপি ।
নিয়ত্যাধো বহত্যম্বু গচ্ছত্যূর্ধ্বমথানলঃ ॥ ৩৫ ॥
বহন্তি দেহয়ন্ত্রাণি জ্যোতীংষি প্রতপন্তি চ ।
বায়বো নিত্যগতয়ঃ স্থিতাঃ শৈলাদয়ঃ স্থিরাঃ ॥ ৩৬ ॥
জ্যোতির্ময়ং নিবৃত্তং তু ধারাসারাম্বরীকৃতম্ ।
যুগসংবৎসরাদ্যাত্ম কালচক্রং প্রবর্ততে ॥ ৩৭ ॥
ভূতলৈকান্তরাব্ধ্যদ্রিসংনিবেশঃ স্থিতায়তে ।
ভাবাভাবোগ্রহোৎসর্গদ্রব্যশক্তিশ্চ তিষ্ঠতি ॥ ৩৮ ॥
কুন্দদন্ত উবাচ ।
প্রাগ্দৃষ্টং স্মৃতিমায়াতি তৎস্বসংকল্পনান্যতঃ ।
ভাতি প্রথমসর্গে তু কস্য প্রাগ্দৃষ্টভাসনম্ ॥ ৩৯ ॥
তাপস উবাচ ।
অপূর্বং দৃশ্যতে সর্বং স্বপ্নে স্বমরণং যথা ।
প্রাগ্দৃষ্টং দৃষ্টমিত্যেব তত্রৈবাভ্যাসতঃ স্মৃতিঃ ॥ ৪০ ॥
চিত্ত্বাচ্চিদ্ব্যোম্নি কচতি জগৎসংকল্পপত্তনম্ ।
ন সন্নাসদিদং তস্মাদ্ভাতাভাতং যতঃ স্বতঃ ॥ ৪১ ॥
চিৎপ্রসাদেন সংকল্পস্বপ্নাদ্যদ্যানুভূয়তে ।
শুদ্ধং চিদ্ব্যোম সংকল্পপুরং মা স্মর্যতাং কথম্ ॥ ৪২ ॥
হর্ষামর্ষবিনির্মুক্তৈর্দুঃখেন চ সুখেন চ ।
প্রকৃতেনৈব মার্গেণ জ্ঞশ্চক্রৈরিব গম্যতে ॥ ৪৩ ॥
নিদ্রাব্যপগমে স্বপ্ননগরে যাদৃশং স্মৃতৌ ।
চিদ্ব্যোমাত্ম পরং বিদ্ধি তাদৃশং ত্রিজগদ্ভ্রমম্ ॥ ৪৪ ॥
সংবিদাভাসমাত্রং যজ্জগদিত্যভিশব্দিতম্ ।
তৎসংবিদ্ব্যোম সংশান্তং কেবলং বিদ্ধি নেতরৎ ॥ ৪৫ ॥
যস্মিন্সর্বং যতঃ সর্বং যৎসর্বং সর্বতশ্চ যৎ ।
সর্বং সর্বতয়া সর্বং তৎসর্বং সর্বদা স্থিতম্ ॥ ৪৬ ॥
যথেয়ং সংসৃতির্ব্রাহ্মী ভবতো যদ্ভবিষ্যতি ।
যথা ভানং চ দৃশ্যস্য তদেতৎকথিতং ময়া ॥ ৪৭ ॥
উত্তিষ্ঠতং ব্রজতমাস্পদমহ্নি পদ্মং
ভৃঙ্গাবিবাভিমতমাশু বিধীয়তাং স্বম্ ।
তিষ্ঠামি দুঃখমলমস্তসমাধিসংস্থং
ভূয়ঃ সমাধিমহমঙ্গ চিরং বিশামি ॥ ৪৮ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু
তাপসোপাখ্যানান্তর্গত কুন্দদন্তোপদেশো নাম
চতুঃশীত্যধিকশততমঃ সর্গঃ ॥ ১৮৪ ॥ -১২-
॥ অথ ত্রয়োদশোঽধ্যায়ঃ ॥
॥ কুন্দদন্তপ্রবোধঃ ॥
কুন্দদন্ত উবাচ ।
জরন্মুনিরপীত্যুক্ত্বা ধ্যানমীলিতলোচনঃ ।
আসীদস্পন্দিতপ্রাণমনাশ্চিত্র ইবার্পিতঃ ॥ ১ ॥
আবাভ্যাং প্রণয়োদারৈঃ প্রার্থিতোঽপি পুনঃপুনঃ ।
বাক্যৈঃ সংসারমবিদন্ন বচো দত্তবান্পুনঃ ॥ ২ ॥
আবাং প্রদেশতস্তস্মাচ্চলিৎবা মন্দমুৎসুকৌ ।
দিনৈঃ কতিপয়ৈঃ প্রাপ্তৌ গৃহং মুদিতবান্ধবম্ ॥ ৩ ॥
অথ তত্রোৎসবং কৃৎবা কথাঃ প্রোচ্য চিরংতনীঃ ।
স্থিতাস্তাবদ্বয়ং যাবৎসপ্তাপি ভ্রাতরোঽথ তে ॥ ৪ ॥
ক্রমেণ বিলয়ং প্রাপ্তাঃ প্রলয়েষ্বর্ণবা ইব ।
মুক্তোঽসৌ মে সখৈবৈক একার্ণব ইবাষ্টকঃ ॥ ৫ ॥
ততঃ কালেন সোঽপ্যস্তং দিনান্তেঽর্ক ইবাগতঃ ।
অহং দুঃখপ্রীতাত্মা পরং বৈধুর্যমাগতঃ ॥ ৬ ॥
ততোঽহং দুঃখিতো ভূয়ঃ কদম্বতরুতাপসম্ ।
গতো দুঃখোপঘাতায় তজ্জ্ঞানং প্রষ্টুমাদৃতঃ ॥ ৭ ॥
তত্র মাসত্রয়েণাসৌ সমাধিবিরতোঽভবৎ ।
প্রণতেন ময়া পৃষ্টঃ সন্নিদং প্রোক্তবানথ ॥ ৮ ॥
কদম্বতাপস উবাচ ।
অহং সমাধিবিরতঃ স্থাতুং শক্নোমি ন ক্ষণম্ ।
সমাধিমেব প্রবিশ্যাম্যহমাশু কৃতৎবরঃ ॥ ৯ ॥
পরমার্থোপদেশস্তে নাভ্যাসেন বিনানঘ ।
লগত্যত্র পরাং যুক্তিমিমাং শৃণু ততঃ কুরু ॥ ১০ ॥
অয়োধ্যানাম পূরস্তি তত্রাস্তি বসুধাধিপঃ ।
নাম্না দশরথস্তস্য পুত্রো রাম ইতি শ্রুতঃ ॥ ১১ ॥
সকাশং তত্র গচ্ছ ৎবং তস্মৈ কুলগুরুঃ কিল ।
বসিষ্ঠাখ্যো মুনিশ্রেষ্ঠঃ কথয়িষ্যতি সংসদি ॥ ১২ ॥
মোক্ষোপায়কথাং দিব্যাং তাং শ্রুৎবা সুচিরং দ্বিজ ।
বিশ্রান্তিমেষ্যসি পরে পদেঽহমিব পাবনে ॥ ১৩ ॥
ইত্যুক্ত্বা স সমাধানরসায়নমহার্ণবম্ ।
বিংবশাহমিমং দেশং ৎবৎসকাশমুপাগতঃ ॥ ১৪ ॥
এষোঽহমেতদ্বৃত্তং মে সর্বং কথিতবানহম্ ।
যথাবৃত্তং যথাদৃষ্টং যথাশ্রুতমখণ্ডিতম্ ॥ ১৫ ॥
শ্রীরাম উবাচ ।
সকুন্দদন্ত ইত্যাদিকথাকথনকোবিদঃ ।
স্থিতস্ততঃ প্রভৃত্যেব মৎসমীপগতঃ সদা ॥ ১৬ ॥
স এষ কুন্দদন্তাখ্যো দ্বিজঃ পার্শ্বে সমাস্থিতঃ ।
শ্রুতবান্সংহিতামেতাং মোক্ষোপায়াভিধামিহ ॥ ১৭ ॥
স এষ কুন্দদন্তাখ্যো মম পার্শ্বগতো দ্বিজঃ ।
অদ্য নিঃসংশয়ো জাতো ন বেতি পরিপৃচ্ছ্যতাম্ ॥ ১৮ ॥
শ্রীবাল্মীকিরুবাচ ।
ইত্যুক্তে রাঘবেণাথ প্রোবাচ বদতাংবরঃ ।
স বসিষ্ঠো মুনিশ্রেষ্ঠঃ কুন্দদন্তং বিলোকয়ন্ ॥ ১৯ ॥
শ্রীবসিষ্ঠ উবাচ ।
কুন্দদন্ত দ্বিজবর কথ্যতাং কিং ৎবয়ানঘ ।
বুদ্ধং শ্রুতবতা জ্ঞেয়ং মদুক্তং মোক্ষদং পরম্ ॥ ২০ ॥
কুন্দদন্ত উবাচ ।
সর্বসংশয়বিচ্ছেদি চেত এব জয়ায় মে ।
সর্বসংশয়বিচ্ছেদো জ্ঞাতং জ্ঞেয়মখণ্ডিতম্ ॥ ২১ ॥
জ্ঞাতং জ্ঞাতব্যমমলং দৃষ্টং দ্রষ্টব্যমক্ষতম্ ।
প্রাপ্তং প্রাপ্তব্যমখিলং বিশ্রান্তোঽস্মি পরে পদে ॥ ২২ ॥
বুদ্ধেয়ং ৎবদিদং সর্বং পরমার্থঘনং ঘনম্ ।
অনন্যেনাত্মনো ব্যোম্নি জগদ্রূপেণ জৃম্ভিতম্ ॥ ২৩ ॥
সর্বাত্মকতয়া সর্বরূপিণঃ সর্বগাত্মনঃ ।
সর্বং সর্বেণ সর্বত্র সর্বদা সংভবত্যলম্ ॥ ২৪ ॥
সংভবন্তি জগত্যন্তঃ সিদ্ধার্থকণকোটরে ।
ন সংভবন্তি চ যথা জ্ঞানমেতদশেষতঃ ॥ ২৫ ॥
গৃহেঽন্তঃ সংভবত্যেব সপ্তদ্বীপা বসুংধরা ।
গেহং চ শূন্যমেবাস্তে সত্যমেতদসংশয়ম্ ॥ ২৬ ॥
যদ্যদ্যদা বস্তু যথোদিতাত্ম
ভাতীহ ভূতৈরনুভূয়তে চ ।
তত্তত্তদা সর্বঘনস্তথাস্তে
ব্রহ্মেত্থমাদ্যন্তবিমুক্তমস্তি ॥ ২৭ ॥
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু
তাপসোপাখ্যানান্তর্গত কুন্দদন্তপ্রবোধো সপ্তদ্বীপেশ্বর
নাম পঞ্চাশীত্যধিকশততমঃ সর্গঃ ॥ ১৮৫ ॥ -১৩-
॥ অথ চতুর্দশোঽধ্যায়ঃ ॥
॥ সর্বং খল্বিদং ব্রহ্মেতিপ্রতিপাদনয়োগোপদেশঃ ॥
শ্রীবাল্মীকিরুবাচ ।
কুন্দদন্তে বদত্যেবং বসিষ্ঠো ভগবান্মুনিঃ ।
উবাচেদমনিন্দ্যাত্মা পরমার্থোচিতং বচঃ ॥ ১ ॥
শ্রীবসিষ্ঠ উবাচ ।
বত বিজ্ঞানবিশ্রান্তিরস্য জাতা মহাত্মনঃ ।
করামলকবদ্বিশ্বং ব্রহ্মেতি পরিপশ্যতি ॥ ২ ॥
কিলেদং ভ্রান্তিমাত্রাত্ম বিশ্বং ব্রহ্মেতি ভাত্যজম্ ।
ভ্রান্তির্ব্রহ্মৈব চ ব্রহ্ম শান্তমেকমনাময়ম্ ॥ ৩ ॥
যদ্যথা যেন যত্রাস্তি যাদৃগ্যাবদ্যদা যতঃ ।
তত্তথা তেন তত্রাস্তি তাদৃক্তাবত্তদা ততঃ ॥ ৪ ॥
শিবং শান্তমজং মৌনমমৌনমজরং ততম্ ।
সুশূন্যাশূন্যমভবমনাদিনিধনং ধ্রুবম্ ॥ ৫ ॥
যস্যা যস্যাস্ত্ববস্থায়াঃ ক্রিয়তে সংবিদা ভরঃ ।
সা সা সহস্রশাখৎবমেতি সেকৈর্যথা লতা ॥ ৬ ॥
পরো ব্রহ্মাণ্ডমেবাণুশ্চিদ্ব্যোম্নোন্তঃ স্থিতো যতঃ ।
পরমাণুরেব ব্রহ্মাণ্ডমন্তঃ স্থিতজগদ্যতঃ ॥ ৭ ॥
তস্মাচ্চিদাকাশমনাদিমধ্য-
মখণ্ডিতং সৌম্যমিদং সমস্তম্ ।
নির্বাণমস্তং গতজাতিবন্ধো
যথাস্থিতং তিষ্ঠ নিরাময়াত্মা ॥ ৮ ॥
স্বয়ং দৃশ্যং স্বয়ং দ্রষ্টৃ স্বয়ং চিত্ত্বং স্বয়ং জডম্ ।
স্বয়ং কিংচিন্ন কিংচিচ্চ ব্রহ্মাত্মন্যেব সংস্থিতম্ ॥ ৯ ॥
যথা যত্র জগত্যেতৎস্বয়ং ব্রহ্ম খমাত্মনি ।
স্বরূপমজহচ্ছান্তং যত্র সম্পদ্যতে তথা ॥ ১০ ॥
ব্রহ্ম দৃশ্যমিতি দ্বৈতং ন কদাচিদ্যথাস্থিতম্ ।
একৎবমেতয়োর্বিদ্ধি শূন্যৎবাকাশয়োরিব ॥ ১১ ॥
দৃশ্যমেব পরং ব্রহ্ম পরং ব্রহ্মৈব দৃশ্যতা ।
এতন্ন শান্তং নাঽশান্তং নানাকারং ন চাকৃতিঃ ॥ ১২ ॥
যাদৃক্প্রবোধে স্বপ্নাদিস্তাদৃগ্দেহো নিরাকৃতিঃ ।
সংবিন্মাত্রাত্মা প্রতিঘঃ স্বানুভূতোঽপ্যসন্ম্যঃ ॥ ১৩ ॥
সংবিন্ময়ো যথা জন্তুর্নিদ্রাত্মাস্তে জডোঽভবৎ ।
জডীভূতা তথৈবাস্তে সংবিৎস্থাবরনামিকা ॥ ১৪ ॥
স্থাবরৎবাজ্জডাচ্চিত্ত্বং জংগমাত্ম প্রয়াতি চিৎ ।
জীবঃ সুষুপ্তাত্মা স্বপ্নং জাগ্রচ্চৈব জগচ্ছতৈঃ ॥ ১৫ ॥
আমোক্ষমেষা জীবস্য ভুব্যম্ভস্যনিলেঽনলে ।
খে খাত্মভির্জগল্লক্ষৈঃ স্বপ্নাভৈর্ভাসতে স্থিতিঃ ॥ ১৬ ॥
চিচ্চিনোতি তথা জাড্যং নরো নিদ্রাস্থিতির্যথা ।
চিনোতি জডতাং চিত্ত্বং ন নাম জডতাবশাৎ ॥ ১৭ ॥
চিতা বেদন বেত্তারং স্থাবরং ক্রিয়তে বপুঃ ।
চিতা বেদন বেত্তারং জঙ্গমং ক্রিয়তে বপুঃ ॥ ১৮ ॥
যথা পুংসো নখাঃ পাদবেকমেব শরীরকম্ ।
তথৈকমেবাপ্রতিঘং চিতঃ স্থাবরজঙ্গমম্ ॥ ১৯ ॥
আদিসর্গে স্বপ্ন ইব যৎপ্রথামাগতং স্থিতম্ ।
চিতো রূপং জগদিতি তত্তথৈবান্ত উচ্যতে ॥ ২০ ॥
তচ্চৈবাপ্রতিঘং শান্তং যথাস্থিতমবস্থিতম্ ।
ন প্রথামাগতং কিংচিন্নাসীদপ্রথিতং হিতম্ ॥ ২১ ॥
অয়মাদিরয়ং চান্তঃ সর্গস্যেত্যবভাসতে ।
চিতঃ সুঘননিদ্রায়াঃ সুষুপ্তস্বপ্নকোষ্ঠতঃ ॥ ২২ ॥
স্থিত একো হ্যনাদ্যন্তঃ পরমার্থঘনো যতঃ ।
প্রলয়স্থিতিসর্গাণাং ন নামাপ্যস্তি মাং প্রতি ॥ ২৩ ॥
প্রলয়স্থিতিসর্গাদি দৃশ্যমানং ন বিদ্যতে ।
এতন্ন চাত্মনশ্চান্যচ্চিত্রে চিত্রবধূর্যথা ॥ ২৪ ॥
কর্তব্যচিত্রসেনাস্মাদ্যথা চিত্রান্ন ভিদ্যতে ।
নানাঽনানৈব প্রতিঘা চিত্তত্ত্বে সর্গতা তথা ॥ ২৫ ॥
বিভাগহীনয়াপ্যেষ ভাগশ্চিদ্ধননিদ্রয়া ।
সুষুপ্তান্মুচ্যতে মোক্ষ ইতি স্বপ্নস্তু চিত্তকম্ ॥ ২৬ ॥
প্রলয়োঽয়মিয়ং সৃষ্টিরয়ং স্বপ্নো ঘনস্ত্বয়ম্ ।
ভাসোঽপ্রতিঘরূপস্য চিৎসহস্ররুচেরিতি ॥ ২৭ ॥
চিন্নিদ্রায়াঃ স্বপ্নময়ো ভাগশ্চিত্তমুদাহৃতম্ ।
তদেব মুচ্যতে ভূতং জীবো দেবসসুরাদিদৃক্ ॥ ২৮ ॥
এষ এব পরিজ্ঞাতঃ সুষুপ্তির্ভবতি স্বয়ম্ ।
যদা তদা মোক্ষ ইতি প্রোচ্যতে মোক্ষকাংক্ষিভিঃ ॥ ২৯ ॥
শ্রীরাম উবাচ ।
চিত্তং দেবাসুরাদ্যাত্ম চিন্নিদ্রা স্বাত্মদর্শনম্ ।
কিয়ৎপ্রমাণং ভগবন্কথমস্যোদরে জগৎ ॥ ৩০ ॥
শ্রীবসিষ্ঠ উবাচ ।
বিদ্ধি চিত্তং নরং দেবমসুরং স্থাবরং স্ত্রিয়ম্ ।
নাগং নগং পিশাচাদি খগকীটাদিরাক্ষসম্ ॥ ৩১ ॥
প্রমাণং তস্য চানন্তং বিদ্ধি যদ্যত্র রেণুতাম্ ।
আব্রহ্মস্তম্বপর্যন্তং জগদ্যাতি সহস্রশঃ ॥ ৩২ ॥
যদেতদাদিত্যপথাদূর্ধ্বং সংয়াতি বেদনম্ ।
এতচ্চিতং ভূতমেতদপর্যন্তামলাকৃতি ॥ ৩৩ ॥
এতদুগ্রং চিতো রূপমস্যান্তর্ভুবনর্দ্ধয়ঃ ।
যদায়ান্তি তদা সর্গশ্চিত্তাদাগত উচ্যতে ॥ ৩৪ ॥
চিত্তমেব বিদুর্জীবং তদাদ্যন্তবিবর্জিতম্ ।
খং ঘটেষ্বিব দেহেষু চাস্তে নাস্তে তদিচ্ছয়া ॥ ৩৫ ॥
নিম্নোন্নতান্ভুবো ভাগান্ গৃহ্ণাতি চ জহাতি চ ।
সরিৎপ্রবাহোঽঙ্গ যথা শরীরাণি তথা মনঃ ॥ ৩৬ ॥
অস্য ৎবাত্মপরিজ্ঞানাদেষ দেহাদিসংভ্রমঃ ।
শাম্যত্যাশ্বববোধেন মরুবাঃপ্রত্যযো যথা ॥ ৩৭ ॥
জগত্যন্তরণুর্যত্র তৎপ্রমাণং হি চেতসঃ ।
সদেব চ পুমাংস্তস্মাৎপুংসামন্তঃ স্থিতং জগৎ ॥ ৩৮ ॥
যাবৎকিংচিদিদং দৃশ্যং তচ্চিত্তং স্বপ্নভূষ্বিব ।
তদেব চ পুমাংস্তস্মাৎকো ভেদো জগদাত্মনোঃ ॥ ৩৯ ॥
চিদেবায়ং পদার্থৌঘো নাস্ত্যন্যস্মিন্পদার্থতা ।
ব্যতিরিক্তা স্বপ্ন ইব হেম্নীব কটকাদিতা ॥ ৪০ ॥
যথৈকদেশে সর্বত্র স্ফুরন্ত্যাপোঽম্বুধৌ পৃথক্ ।
ব্রহ্মণ্যনন্যা নিত্যস্থাশ্চিতো দৃশ্যাত্মিকাস্তথা ॥ ৪১ ॥
যথা দ্রবৎবমম্ভোধাবাপো জঠরকোশগাঃ ।
স্ফুরন্ত্যেবংবিদাঽনন্যাঃ পদার্থৌঘাস্তথাপরে ॥ ৪২ ॥
যথা স্থিতজগচ্ছালভঞ্জিকাকাশরূপধৃক্ ।
চিৎস্তম্ভোয়মপস্পন্দঃ স্থিত আদ্যন্তবর্জিতঃ ॥ ৪৩ ॥
যথাস্থিতমিদং বিশ্বং সংবিদ্ব্যোম্নি ব্যবস্থিতম্ ।
স্বরূপমত্যজচ্ছান্তং স্বপ্নভূমাবিবাখিলম্ ॥ ৪৪ ॥
সমতা সত্যতা সত্তা চৈকতা নির্বিকারিতা ।
আধারাধেয়তান্যোন্যং চৈতয়োর্বিশ্বসংবিদোঃ ॥ ৪৫ ॥
স্বপ্নসংকল্পসংসারবরশাপদৃশামিহ ।
সরোব্ধিসরিদম্বূনামিঅবান্যৎবং ন বাথবা ॥ ৪৬ ॥
শ্রীরাম উবাচ ।
বরশাপার্থসংবিত্তৌ কার্যকারণতা কথম্ ।
উপাদানং বিনা কার্যং নাস্ত্যেব কিল কথ্যতাম্ ॥ ৪৭ ॥
শ্রীবসিষ্ঠ উবাচ ।
স্ববদাতচিদাকাশকচনং জগদুচ্যতে ।
স্ফুরণে পয়সামব্ধাবাবর্তচলনং যথা ॥ ৪৮ ॥
ধ্বনন্তোঽব্ধিজলানীব ভান্তি ভাবাশ্চিদাত্মকাঃ ।
সংকল্পাদীনি নামানি তেষামাহুর্মনীষিণঃ ॥ ৪৯ ॥
কালেনাভ্যাসয়োগেন বিচারেণ সমেন চ ।
জাতের্বা সাত্ত্বিকৎবেন সাত্ত্বিকেনামলাত্মনা ॥ ৫০ ॥
সম্যগ্জ্ঞানবতো জ্ঞস্য যথা ভূতার্থদর্শিনঃ ।
বুদ্ধির্ভবতি চিন্মাত্ররূপা দ্বৈতৈক্যবর্জিতা ॥ ৫১ ॥
নিরাবরণবিজ্ঞানময়ী চিদ্ব্রহ্মরূপিণী ।
সংবিৎপ্রকাশমাত্রৈকদেহাদেহবিবর্জিতা ॥ ৫২ ॥
সোঽয়ং পশ্যত্যশেষেণ যাবৎসংকল্পমাত্রকম্ ।
স্বমাত্মকচনং শান্তমনন্যৎপরমার্থতঃ ॥ ৫৩ ॥
অস্যা ইদং হি সংকল্পমাত্রমেবাখিলং জগৎ ।
যথাসংকল্পনগরং যথা স্বপ্নমহাপুরম্ ॥ ৫৪ ॥
আত্মা স্বসংকল্পবরঃ স্ববদাতো যথা যথা ।
যদ্যথা সংকল্পয়তি তথা ভবতি তস্য তৎ ॥ ৫৫ ॥
সংকল্পনগরে বালঃ শিলাপ্রোড্ডয়নং যথা ।
সত্যং বেত্ত্যনুভূয়াশু স্ববিধেয়নিয়ন্ত্রণম্ ॥ ৫৬ ॥
স্বসংকল্পাত্মভূতেঽস্মিন্পরমাত্মা জগত্ত্রয়ে ।
বরশাপাদিকং সত্যং বেত্ত্যনন্যত্তথাত্মনঃ ॥ ৫৭ ॥
স্বসংকল্পপুরে তৈলং যথা সিদ্ধ্যতি সৈকতাৎ ।
কল্পনাৎসর্গসংকল্পৈর্বরাদীহ তথাত্মনঃ ॥ ৫৮ ॥
অনিরাবরণজ্ঞপ্তের্যতঃ শান্তা ন ভেদধীঃ ।
ততঃ সংকল্পনাদ্বৈতাদ্বরাদ্যস্য ন সিদ্ধ্যতি ॥ ৫৯ ॥
যা যথা কলনা রূঢা তাবৎসাদ্যাপি সংস্থিতা ।
ন পরাবর্তিতা যাবদ্যত্নাৎকল্পনয়ান্যযা ॥ ৬০ ॥
ব্রহ্মণ্যবয়বোন্মুক্তে দ্বিতৈকৎবে তথা স্থিরে ।
যথা সাবয়বে তত্ত্বে বিচিত্রাবয়বক্রমঃ ॥ ৬১ ॥
শ্রীরাম উবাচ ।
অনিরাবরণাজ্ঞানাৎকেবলং ধর্মচারিণঃ ।
শাপাদীন্সম্প্রয়চ্ছন্তি যথা ব্রহ্মংস্তথা বদ ॥ ৬২ ॥
বসিষ্ঠ উবাচ ।
সংকল্পয়তি যন্নাম সর্গাদৌ ব্রহ্ম ব্রহ্মণি ।
তত্তদেবানুভবতি যস্মাত্তত্তাস্তি নেতরৎ ॥ ৬৩ ॥
ব্রহ্ম বেত্তি যদাত্মানং স ব্রহ্মায়ং প্রজাপতিঃ ।
স চ নো ব্রহ্মণো ভিন্নং দ্রবৎবমিব বারিণঃ ॥ ৬৪ ॥
সংকল্পয়তি যন্নাম প্রথমোঽসৌ প্রজাপতিঃ ।
তত্তদেবাশু ভবতি তস্যেদং কল্পনং জগৎ ॥ ৬৫ ॥
নিরাধারং নিরালম্বং ব্যোমাত্ম ব্যোম্নি ভাসতে ।
দুর্দৃষ্টেরিব কেশোণ্ড্রং দৃষ্টমুক্তাবলীব চ ॥ ৬৬ ॥
সংকল্পিতাঃ প্রজাস্তেন ধর্মো দানং তপো গুণাঃ ।
বেদাঃ শাস্ত্রাণি ভূতানি পঞ্চ জ্ঞানোপদেশনাঃ ॥ ৬৭ ॥
তপস্বিনোঽথ বাদৈশ্চ যদ্ধ্যুরবিলম্বিতম্ ।
যদ্যদ্বেদবিদস্তৎস্যাদিতি তেনাথ কল্পিতম্ ॥ ৬৮ ॥
ইদং চিদ্ব্রহ্মচ্ছিদ্রং খং বায়ুশ্চেষ্টাগ্নিরুষ্ণতা ।
দ্রবোঽম্ভঃ কঠিনং ভূমিরিতি তেনাথ কল্পিতাঃ ॥ ৬৯ ॥
চিদ্ধাতুরীদৃশো বাসৌ যদ্যৎখাত্মাপি চেততি ।
তত্তথানুভবত্যাশু ৎবমহং স ইবাখিলম্ ॥ ৭০ ॥
যদ্যথা বেত্তি চিদ্ব্যোম তত্তথা তদ্ভবত্যলম্ ।
স্বপ্নে ৎবমহমাদীব সদাত্মাপ্যসদাত্মকম্ ॥ ৭১ ॥
শিলানৃতং যথা সত্যং সংকল্পনগরে তথা ।
জগৎসংকল্পনগরে সত্যং ব্রহ্মণ ঈপ্সিতম্ ॥ ৭২ ॥
চিৎস্বভাবেন শুদ্ধেন যদ্বুদ্ধং যচ্চ যাদৃশম্ ।
তদশুদ্ধোঽন্যথা কর্তুং ন শক্তঃ কীটকো যথা ॥ ৭৩ ॥
অভ্যস্তং বহুলং সংবিৎপশ্যতীতরদল্পকম্ ।
স্বপ্নে জাগ্রৎস্বরূপে চ বর্তমানেঽখিলং চ সৎ ॥ ৭৪ ॥
সদা চিদ্ব্যোম চিদ্ব্যোম্নি কচদেকমিদং নিজম্ ।
দ্রষ্টৃদৃশ্যাত্মকং রূপং পশ্যদাভাতি নেতরৎ ॥ ৭৫ ॥
একং দ্রষ্টা চ দৃশ্যং চ চিন্নভঃ সর্বগং যতঃ ।
তস্মাদ্যথেষ্টং যদ্যত্র দৃষ্টং তত্তত্র সৎসদা ॥ ৭৬ ॥
বায়্বঙ্গগস্পন্দনবজ্জলাঙ্গদ্রবভাববৎ ।
যথা ব্রহ্মণি ব্রহ্মৎবং তথাজস্যাঙ্গগং জগৎ ॥ ৭৭ ॥
ব্রহ্মৈবাহং বিরাডাত্মা বিরাডাত্মবপুর্জগৎ ।
ভেদো ন ব্রহ্মজগতোঃ শূন্যৎবাম্বরয়োরিব ॥ ৭৮ ॥
যথা প্রপাতে পয়সো বিচিত্রাঃ কণপঙ্ক্তয়ঃ ।
বিচিত্রদেশকালান্তা নিপতন্ত্যুৎপতন্তি চ ॥ ৭৯ ॥
নিপত্ত্যৈবৈকয়াঽঽকল্পং মনোবুদ্ধ্যাদিবর্জিতাঃ ।
আত্মন্যেবাত্মনো ভান্তি তথা যা ব্রহ্মসংবিদঃ ॥ ৮০ ॥
তাংভি স্বয়ং স্বদেহেষু বুদ্ধ্যাদিপরিকল্পনাঃ ।
কৃৎবোররীকৃতা সর্গশ্রীরদ্ভির্দ্রবতা যথা ॥ ৮১ ॥
তদেবং জগদিত্যস্তি দুর্বোধেন মম ৎবিদম্ ।
অকারণকমদ্বৈতমজাতং কর্ম কেবলম্ ॥ ৮২ ॥
অস্তস্থিতিঃ শরীরেঽস্মিন্যাদৃগ্রূপানুভূয়তেঃ ।
উপলাদৌ জডা সত্তা তাদৃশী পরমাত্মনঃ ॥ ৮৩ ॥
যথৈকস্যাং সুনিদ্রায়াং সুষুপ্তস্বপ্নকৌ স্থিতৌ ।
তথৈতে সর্গসংহারভাসৌ ব্রহ্মণি সংস্থিতে ॥ ৮৪ ॥
সুষুপ্তস্বপ্নয়োর্ভাতঃ প্রকাশতমসী যথা ।
একস্যামেব নিদ্রায়াং সর্গাসর্গো তথা পরে ॥ ৮৫ ॥
যথা নরোঽনুভবতি নিদ্রায়াং দৃষদঃ স্থিতিম্ ।
পরমাত্মানুভবতি তথৈতজ্জডসংস্থিতিম্ ॥ ৮৬ ॥
অঙ্গষ্ঠস্যাথবাঙ্গুল্যা বাতাদ্যস্পর্শনে সতি ।
যোঽন্যচিত্তস্যানুভবো দৃষদাদৌ স আত্মনঃ ॥ ৮৭ ॥
ব্যোমোপলজলাদীনাং যথা দেহানুভূতয়ঃ ।
তথাস্মাকমচিত্তানামদ্য নানানুভূতয়ঃ ॥ ৮৮ ॥
কালে কল্পেষু ভান্ত্যেতা যথাহোরাত্রসংবিদঃ ।
তথাঽসংখ্যাঃ পরে ভান্তি সর্গসংহারসংবিদঃ ॥ ৮৯ ॥
আলোকরূপমননানুভবৈষণেচ্ছা
মুক্তাত্মনি স্ফুরতি বারিঘনে স্বভাবাৎ ।
আবর্তবীচিবলয়াদি যথা তথায়ং
শান্তে পরে স্ফুরতি সংহৃতিসর্গপূগঃ ॥ ৯০ ।
ইত্যার্ষে শ্রীবাসিষ্ঠমহারামায়ণে বাল্মিকীয়ে
মোক্ষ-নির্বাণ উত্তরার্ধে ব্রহ্মগীতাসু
সর্বং খল্বিদং ব্রহ্মেতিপ্রতিপাদনয়োগোপদেশো
নাম ষডশীত্যধিকশততমঃ ॥ ১৮৬ ॥ -১৪-
– Chant Stotra in Other Languages –
Brahma Gita of Yoga Vasishtha in Sanskrit – English – Bengali – Gujarati – Kannada – Malayalam – Odia – Telugu – Tamil