॥ Devi Geetaa Bengali Lyrics ॥
॥ দেবীগীতা ॥
॥ শ্রী গণেশায় নমঃ ॥
॥ ওঁ নমঃ শ্রী দেব্যৈ ॥
অথ শ্রীমদ্দেবীগীতা প্রারভ্যতে ।
॥ অথ প্রথমোঽধ্যায়ঃ ॥
হিমালয় উবাচ –
যোগং চ ভক্তিসহিতং জ্ঞানং চ শ্রুতিসংমতম্ ।
বদস্ব পরমেশানি ৎবমেবাহং যতো ভবেঃ ॥
ব্যাস উবাচ –
ইতি তস্য বচঃ শ্রুৎবা প্রসন্নমুখপঙ্কজা ।
বক্তুমারভতাম্বা সা রহস্যং শ্রুতিগূহিতম্ ॥
শৃণ্বন্তু নির্জরাঃ সর্বে ব্যাহরন্ত্যা বচো মম ।
যস্য শ্রবণমাত্রেণ মদ্রূপৎবং প্রপদ্যতে ॥ ১ ॥
অহমেবাস পূর্বং মে নান্যৎকিঞ্চিন্নগাধিপ ।
তদাত্মরূপং চিৎসংবিৎপরব্রহ্মৈকনামকম্ ॥ ২ ॥
অপ্রতর্ক্যমনির্দেশ্যমনৌপম্যমনাময়ম্ ।
তস্য কাচিৎস্বতঃসিদ্ধা শক্তির্মায়েতি বিশ্রুতা ॥ ৩ ॥
ন সতী সা নাসতী সা নোভয়াত্মা বিরোধতঃ ।
এতদ্বিলক্ষণা কাচিদ্বস্তুভূতাঽস্তি সর্বদা ॥ ৪ ॥
পাবকস্যোষ্ণতেবেয়মুষ্ণাংশোরিব দীধিতিঃ ।
চন্দ্রস্য চন্দ্রিকেবেয়ং মমেয়ং সহজা ধ্রুবা ॥ ৫ ॥
তস্যাং কর্মাণি জীবানাং জীবাঃ কালাশ্চ সঞ্চরে ।
অভেদেন বিলীনাঃ স্যুঃ সুষুপ্তৌ ব্যবহারবৎ ॥ ৬ ॥
স্বশক্তেশ্চ সমায়োগাদহং বীজাত্মতাং গতা ।
স্বধারাবরণাত্তস্যা দোষৎবং চ সমাগতম্ ॥ ৭ ॥
চৈতন্যস্য সমায়োগান্নিমিত্তৎবং চ কথ্যতে ।
প্রপঞ্চপরিণামাচ্চ সমবায়িৎবমুচ্যতে ॥ ৮ ॥
কেচিত্তাং তপ ইত্যাহুস্তমঃ কেচিজ্জডং পরে ।
জ্ঞানং মায়া প্রধানং চ প্রকৃতিং শক্তিমপ্যজাম্ ॥ ৯ ॥
বিমর্শ ইতি তাং প্রাহুঃ শৈবশাস্ত্রবিশারদাঃ ।
অবিদ্যামিতরে প্রাহুর্বেদতত্ত্বার্থচিন্তকাঃ ॥ ১০ ॥
এবং নানাবিধানি স্যুর্নামানি নিগমাদিষু ।
তস্যাজডৎবং দৃশ্যৎবাজ্জ্ঞাননাশাত্ততোঽসতী ॥১১ ॥
চৈতন্যস্য ন দৃশ্যৎবং দৃশ্যৎবে জডমেব তৎ ।
স্বপ্রকাশং চ চৈতন্যং ন পরেণ প্রকাশিতম্ ॥ ১২ ॥
অনবস্থাদোষসত্ত্বান্ন স্বেনাপি প্রকাশিতম্ ।
কর্মকর্তৃবিরোধঃ স্যাত্তস্মাত্তদ্দীপবৎস্বয়ম্ ॥ ১৩ ॥
প্রকাশমানমন্যেষাং ভাসকং বিদ্ধি পর্বত ।
অত এব চ নিত্যৎবং সিদ্ধং সংবিত্তনোর্মম ॥ ১৪ ॥
জাগ্রৎস্বপ্নসুষুপ্ত্যাদৌ দৃশ্যস্য ব্যভিচারতঃ ।
সংবিদো ব্যভিচারশ্চ নানুভূতোঽস্তি কর্হিচিৎ ॥ ১৫ ॥
যদি তস্যাপ্যনুভবতর্হ্যযং যেন সাক্ষিণা ।
অনুভূতঃ স এবাত্র শিষ্টঃ সংবিদ্বপুঃ পুরা ॥ ১৬ ॥
অত এব চ নিত্যৎবং প্রোক্তং সচ্ছাস্ত্রকোবিদঃ ।
আনন্দরূপতা চাস্যাঃ পরপ্রেমাস্পদৎবতঃ ॥ ১৭ ॥
মা ন ভূবং হি ভূয়াসমিতি প্রেমাত্মনি স্থিতম্ ।
সর্বস্যান্যস্য মিথ্যাৎবাদসঙ্গৎবং স্ফুটং মম ॥ ১৮ ॥
অপরিচ্ছিন্নতাপ্যেবমত এব মতা মম ।
তচ্চ জ্ঞানং নাত্মধর্মো ধর্মৎবে জডতাঽঽত্মনঃ ॥ ১৯ ॥
জ্ঞানস্য জডশেষৎবং ন দৃষ্টং ন চ সংভবি ।
চিদ্ধর্মৎবং তথা নাস্তি চিতশ্চিন্ন হি ভিদ্যতে ॥ ২০ ॥
তস্মাদাত্মা জ্ঞানরূপঃ সুখরূপশ্চ সর্বদা ।
সত্যঃ পূর্ণোঽপ্যসঙ্গশ্চ দ্বৈতজালবিবর্জিতঃ ॥ ২১ ॥
স পুনঃ কামকর্মাদিয়ুক্তয়া স্বীয়মায়যা ।
পূর্বানুভূতসংস্কারাৎকালকর্মবিপাকতঃ ॥ ২২ ॥
অবিবেকাচ্চ তত্ত্বস্য সিসৃক্ষাবান্প্রজায়তে ।
অবুদ্ধিপূর্বঃ সর্গোঽয়ং কথিতস্তে নগাধিপ ॥ ২৩ ॥
এতদ্ধি যন্ময়া প্রোক্তং মম রূপমলৌকিকম্ ।
অব্যাকৃতং তদব্যক্তং মায়াশবলমিত্যপি ॥ ২৪ ॥
প্রোচ্যতে সর্বশাস্ত্রেষু সর্বকারণকারণম্ ।
তত্ত্বানামাদিভূতং চ সচ্চিদানন্দবিগ্রহম্ ॥ ২৫ ॥
সর্বকর্মঘনীভূতমিচ্ছাজ্ঞানক্রিয়াশ্রয়ম্ ।
হ্রীঙ্কারমন্ত্রবাচ্যং তদাদিতত্ত্বং তদুচ্যতে ॥ ২৬ ॥
তস্মাদাকাশ উৎপন্নঃ শব্দতন্মাত্ররূপকঃ ।
ভবেৎস্পর্শাত্মকো বায়ুস্তেজো রূপাত্মকং পুনঃ ॥ ২৭ ॥
জলং রসাত্মকং পশ্চাত্ততো গন্ধাত্মিকা ধরা ।
শব্দৈকগুণ আকাশো বায়ুঃ স্পর্শরবান্বিতঃ ॥ ২৮ ॥
শব্দস্পর্শরূপগুণং তেজ ইত্যুচ্যতে বুধৈঃ ।
শব্দস্পর্শরূপরসৈরাপো বেদগুণাঃ স্মৃতাঃ ॥ ২৯ ॥
শব্দস্পর্শরূপরসগন্ধৈঃ পঞ্চগুণা ধরা ।
তেভ্যোঽভবন্মহৎসূত্রং যল্লিঙ্গং পরিচক্ষতে ॥ ৩০ ॥
সর্বাত্মকং তৎসম্প্রোক্তং সূক্ষ্মদেহোঽয়মাত্মনঃ ।
অব্যক্তং কারণো দেহঃ স চোক্তঃ পূর্বমেব হি ॥ ৩১ ॥
যস্মিঞ্জগদ্বীজরূপং স্থিতং লিঙ্গোদ্ভবো যতঃ ।
ততঃ স্থূলানি ভূতানি পঞ্চীকরণমার্গতঃ ॥ ৩২ ॥
পঞ্চ সঙ্খ্যানি জায়ন্তে তৎপ্রকারস্ত্বথোচ্যতে ।
পূর্বোক্তানি চ ভূতানি প্রত্যেকং বিভজেদ্দ্বিধা ॥ ৩৩ ॥
একৈকং ভাগমেকস্য চতুর্ধা বিভজেদ্গিরে ।
স্বস্বেতরদ্বিতীয়াংশে যোজনাৎপঞ্চ পঞ্চ তে ॥ ৩৪ ॥
তৎকার্যং চ বিরাড্ দেহঃ স্থূলদেহোঽয়মাত্মনঃ ।
পঞ্চভূতস্থসত্ত্বাংশৈঃ শ্রোত্রাদীনাং সমুদ্ভবঃ ॥ ৩৫ ॥
জ্ঞানেন্দ্রিয়াণাং রাজেন্দ্র প্রত্যেকং মীলিতৈস্তু তৈঃ ।
অন্তঃকরণমেকং স্যাদ্বৃত্তিভেদাচ্চতুর্বিধম্ ॥ ৩৬ ॥
যদা তু সঙ্কল্পবিকল্পকৃত্যং
তদা ভবেত্তন্মন ইত্যভিখ্যম্ ।
স্যাদ্বুদ্ধিসংজ্ঞং চ যদা প্রবেত্তি
সুনিশ্চিতং সংশয়হীনরূপম্ ॥ ৩৭ ॥
অনুসন্ধানরূপং তচ্চিত্তং চ পরিকীর্তিতম্ ।
অহঙ্কৃত্যাঽঽত্মবৃত্যা তু তদহঙ্কারতাং গতম্ ॥ ৩৮ ॥
তেষাং রজোংঽশৈর্জাতানি ক্রমাৎকর্মেন্দ্রিয়াণি চ ।
প্রত্যেকং মীলিতৈস্তৈস্তু প্রাণো ভবতি পঞ্চধা ॥ ৩৯ ॥
হৃদি প্রাণো গুদেঽপানো নাভিস্থস্তু সমানকঃ ।
কণ্ঠদেশেপ্যুদানঃ স্যাদ্ব্যানঃ সর্বশরীরগঃ ॥ ৪০ ॥
জ্ঞানেন্দ্রিয়াণি পঞ্চৈব পঞ্চ কর্মেন্দ্রিয়াণি চ ।
প্রাণাদি পঞ্চকং চৈব ধিয়া চ সহিতং মনঃ ॥ ৪১ ॥
এতৎসূক্ষ্মশরীরং স্যান্মম লিঙ্গং যদুচ্যতে ।
তত্র যা প্রকৃতিঃ প্রোক্তা সা রাজন্বিবিধা স্মৃতা ॥ ৪২ ॥
সত্ত্বাত্মিকা তু মায়া স্যাদবিদ্যা গুণমিশ্রিতা ।
স্বাশ্রয়ং যা তু সংরক্ষেৎসা মায়েতি নিগদ্যতে ॥ ৪৩ ॥
তস্যাং যৎপ্রতিবিম্বং স্যাদ্বিম্বভূতস্য চেশিতুঃ ।
স ঈশ্বরঃ সমাখ্যাতঃ স্বাশ্রয়জ্ঞানবান্ পরঃ ॥ ৪৪ ॥
সর্বজ্ঞঃ সর্বকর্তা চ সর্বানুগ্রহকারকঃ ।
অবিদ্যায়াং তু যৎকিঞ্চিৎপ্রতিবিংবং নগাধিপ ॥ ৪৫ ॥
তদেব জীবসংজ্ঞং স্যাৎসর্বদুঃখাশ্রয়ং পুনঃ ।
দ্বয়োরপীহ সম্প্রোক্তং দেহত্রয়মবিদ্যযা ॥ ৪৬ ॥
দেহত্রয়াভিমানাচ্চাপ্যভূন্নামত্রয়ং পুনঃ ।
প্রাজ্ঞস্তু কারণাত্মা স্যাৎসূক্ষ্মধী তু তৈজসঃ ॥ ৪৭ ॥
স্থূলদেহী তু বিশ্বাখ্যস্ত্রিবিধঃ পরিকীর্তিতঃ ।
এবমীশোঽপি সম্প্রোক্ত ঈশসূত্রবিরাট্পদৈঃ ॥ ৪৮ ॥
প্রথমো ব্যষ্টিরূপস্তু সমষ্ট্যাত্মা পরঃ স্মৃতঃ ।
স হি সর্বেশ্বরঃ সাক্ষাজ্জীবানুগ্রহকাম্যযা ॥ ৪৯ ॥
করোতি বিবিধং বিশ্বং নানাভোগাশ্রয়ং পুনঃ ।
মচ্ছক্তিপ্রেরিতো নিত্যং ময়ি রাজন্প্রকল্পিতঃ ॥ ৫০ ॥
ইতি শ্রীদেবীভাগবতে দেবীগীতায়াং প্রথমোঽধ্যায়ঃ ॥
॥ অথ দ্বিতীয়োঽধ্যায়ঃ ॥
দেব্যুবাচ –
মন্মায়াশক্তিসংক্লৃপ্তংজগৎসর্বং চরাচরম্ ।
সাপি মত্তঃ পৃথঙ্ মায়া নাস্ত্যেব পরমার্থতঃ ॥ ১ ॥
ব্যবহারদৃশা সেয়ং মায়াঽবিদ্যেতি বিশ্রুতা ।
তত্ত্বদৃষ্ট্যা তু নাস্ত্যেব তত্ত্বমেবাস্তি কেবলম্ ॥ ২ ॥
সাহং সর্বং জগৎসৃষ্ট্বা তদন্তঃ প্রবিশাম্যহম্ ।
মায়া কর্মাদিসহিতা গিরে প্রাণপুরঃসরা ॥ ৩ ॥
লোকান্তরগতির্নো চেৎকথং স্যাদিতি হেতুনা ।
যথা যথা ভবন্ত্যেব মায়াভেদাস্তথা তথা ॥ ৪ ॥
উপাধিভেদাদ্ভিন্নাঽহং ঘটাকাশাদয়ো যথা ।
উচ্চনীচাদি বস্তূনি ভাসয়ন্ভাস্করঃ সদা ॥ ৫ ॥
ন দুষ্যতি তথৈবাহং দোষৈর্লিপ্তা কদাপি ন ।
ময়ি বুদ্ধ্যাদিকর্তৃৎবমধ্যস্যৈবাপরে জনাঃ ॥ ৬ ॥
বদন্তি চাত্মা কর্তেতি বিমূঢা ন সুবুদ্ধয়ঃ ।
অজ্ঞানভেদতস্তদ্বন্মায়ায়া ভেদতস্তথা ॥ ৭ ॥
জীবেশ্বরবিভাগশ্চ কল্পিতো মায়যৈব তু ।
ঘটাকাশমহাকাশবিভাগঃ কল্পিতো যথা ॥ ৮ ॥
তথৈব কল্পিতো ভেদো জীবাত্মপরমাত্মনোঃ ।
যথা জীববহুৎবং চ মায়যৈব ন চ স্বতঃ ॥ ৯ ॥
তথেশ্বরবহুৎবং চ মায়যা ন স্বভাবতঃ ।
দেহেন্দ্রিয়াদিসঙ্ঘাতবাসনাভেদভেদিতা ॥ ১০ ॥
অবিদ্যা জীবভেদস্য হেতুর্নান্যঃ প্রকীর্তিতঃ ।
গুণানাং বাসনাভেদভেদিতা যা ধরাধর ॥ ১১ ॥
মায়া সা পরভেদস্য হেতুর্নান্যঃ কদাচন ।
ময়ি সর্বমিদং প্রোতমোতং চ ধরণীধর ॥ ১২ ॥
ঈশ্বরোঽহং চ সূত্রাত্মা বিরাডাত্মাঽহমস্মি চ ।
ব্রহ্মাঽহং বিষ্ণুরুদ্রৌ চ গৌরী ব্রাহ্মী চ বৈষ্ণবী ॥ ১৩ ॥
সূর্যোঽহং তারকাশ্চাহং তারকেশস্তথাস্ম্যহম্ ।
পশুপক্ষিস্বরূপাঽহং চাণ্ডালোঽহং চ তস্করঃ ॥ ১৪ ॥
ব্যাধোঽহং ক্রূরকর্মাঽহং সৎকর্মোঽহং মহাজনঃ ।
স্ত্রীপুন্নপুংসকাকারোঽপ্যহমেব ন সংশয়ঃ ॥ ১৫ ॥
যচ্চ কিঞ্চিৎক্বচিদ্বস্তু দৃশ্যতে শ্রূয়তেঽপি বা ।
অন্তর্বহিশ্চ তৎসর্বং ব্যাপ্যাহং সর্বদা স্থিতা ॥ ১৬ ॥
ন তদস্তি ময়া ত্যক্তং বস্তু কিঞ্চিচ্চরাচরম্ ।
যদ্যস্তি চেত্তচ্ছূন্যং স্যাদ্বন্ধ্যাপুত্রোপমং হি তৎ ॥ ১৭ ॥
রজ্জুর্যথা সর্পমালাভেদৈরেকা বিভাতি হি ।
তথৈবেশাদিরূপেণ ভাম্যহং নাত্র সংশয়ঃ ॥ ১৮ ॥
অধিষ্ঠানাতিরেকেণ কল্পিতং তন্ন ভাসতে ।
তস্মান্মৎসত্তয়ৈবৈতৎসত্তাবন্নান্যথা ভবেৎ ॥ ১৯ ॥
হিমালয় উবাচ –
যথা বদসি দেবেশি সমষ্ট্যাঽঽত্মবপুস্ত্বিদম্ ।
তথৈব দ্রষ্টুমিচ্ছামি যদি দেবি কৃপা ময়ি ॥ ২০ ॥
ব্যাস উবাচ –
ইতি তস্য বচঃ শ্রুৎবা সর্বে দেবাঃ সবিষ্ণবঃ ।
ননন্দুর্মুদিতাত্মানঃ পূজয়ন্তশ্চ তদ্বচঃ ॥ ২১ ॥
অথ দেবমতং জ্ঞাৎবা ভক্তকামদুঘা শিবা ।
অদর্শয়ন্নিজং রূপং ভক্তকামপ্রপূরিণী ॥ ২২ ॥
অপশ্যংস্তে মহাদেব্যা বিরাডরূপং পরাৎপরম্ ।
দ্যৌর্মস্তকং ভবেদ্যস্য চন্দ্রসূর্যৌ চ চক্ষুষী ॥ ২৩ ॥
দিশঃ শ্রোত্রে বচো বেদাঃ প্রাণো বায়ুঃ প্রকীর্তিতঃ ।
বিশ্বং হৃদয়মিত্যাহুঃ পৃথিবী জঘনং স্মৃতম্ ॥ ২৪ ॥
নভস্তলং নাভিসরো জ্যোতিশ্চক্রমুরস্থলম্ ।
মহর্লোকস্তু গ্রীবা স্যাজ্জনো লোকো মুখং স্মৃতম্ ॥ ২৫ ॥
তপো লোকো ররাটিস্তু সত্যলোকাদধঃ স্থিতঃ ।
ইন্দ্রাদয়ো বাহবঃ স্যুঃ শব্দঃ শ্রোত্রং মহেশিতুঃ ॥ ২৬ ॥
নাসত্যদস্রৌ নাসে স্তৌ গন্ধো ঘ্রাণং স্মৃতো বুধৈঃ ।
মুখমগ্নিঃ সমাখ্যাতো দিবারাত্রী চ পক্ষ্মণী ॥ ২৭ ॥
ব্রহ্মস্থানং ভ্রূবিজৃংভোঽপ্যাপস্তালুঃ প্রকীর্তিতাঃ ।
রসো জিহ্বা সমাখ্যাতা যমো দংষ্ট্রাঃ প্রকীর্তিতাঃ ॥ ২৮ ॥
দন্তাঃ স্নেহকলা যস্য হাসো মায়া প্রকীর্তিতা ।
সর্গস্ত্বপাঙ্গমোক্ষঃ স্যাদ্ব্রীডোর্ধ্বোষ্ঠো মহেশিতুঃ ॥ ২৯ ॥
লোভঃ স্যাদধরোষ্ঠোঽস্যা ধর্মমার্গস্তু পৃষ্ঠভূঃ ।
প্রজাপতিশ্চ মেঢ্রং স্যাদ্যঃ স্রষ্টা জগতীতলে ॥ ৩০ ॥
কুক্ষিঃ সমুদ্রা গিরয়োঽস্থীনি দেব্যা মহেশিতুঃ ।
নদ্যো নাড্যঃ সমাখ্যাতা বৃক্ষাঃ কেশাঃ প্রকীর্তিতাঃ ॥ ৩১ ॥
কৌমারয়ৌবনজরাবয়োঽস্য গতিরুত্তমা ।
বলাহকাস্তু কেশাঃ স্যুঃ সন্ধ্যে তে বাসসী বিভোঃ ॥ ৩২ ॥
রাজঞ্ছ্রীজগদম্বায়াশ্চন্দ্রমাস্তু মনঃ স্মৃতঃ ।
বিজ্ঞানশক্তিস্তু হরী রুদ্রোন্তঃকরণং স্মৃতম্ ॥ ৩৩ ॥
অশ্বাদিজাতয়ঃ সর্বাঃ শ্রোণিদেশে স্থিতা বিভোঃ ।
অতলাদিমহালোকাঃ কট্যধোভাগতাং গতাঃ ॥ ৩৪ ॥
এতাদৃশং মহারূপং দদৃশুঃ সুরপুঙ্গবাঃ ।
জ্বালামালাসহস্রাঢ্যং লেলিহানং চ জিহ্বয়া ॥ ৩৫ ॥
দংষ্ট্রাকটকটারাবং বমন্তং বহ্নিমক্ষিভিঃ ।
নানায়ুধধরং বীরং ব্রহ্মক্ষত্রৌদনং চ যৎ ॥ ৩৬ ॥
সহস্রশীর্ষনয়নং সহস্রচরণং তথা ।
কোটিসূর্যপ্রতীকাশং বিদ্যুৎকোটিসমপ্রভম্ ॥ ৩৭ ॥
ভয়ঙ্করং মহাঘোরং হৃদক্ষ্ণোস্ত্রাসকারকম্ ।
দদৃশুস্তে সুরাঃ সর্বে হাহাকারং চ চক্রিরে ॥ ৩৮ ॥
বিকম্পমানহৃদয়া মূর্চ্ছামাপুর্দুরত্যযাম্ ।
স্মরণং চ গতং তেষাং জগদম্বেয়মিত্যপি ॥ ৩৯ ॥
অথ তে যে স্থিতা বেদাশ্চতুর্দিক্ষু মহাবিভোঃ ।
বোধয়ামাসুরত্যুগ্রং মূর্চ্ছাতো মূর্চ্ছিতান্সুরান্ ॥ ৪০ ॥
অথ তে ধৈর্যমালম্ব্য লব্ধ্বা চ শ্রুতিমুত্তমাম্ ।
প্রেমাশ্রুপূর্ণনয়না রুদ্ধকণ্ঠাস্তু নির্জরাঃ ॥ ৪১ ॥
বাষ্পগদ্গদদয়া বাচা স্তোতুং সমুপচক্রিরে ।
দেবা ঊচুঃ –
অপরাধং ক্ষমস্বাম্ব পাহি দীনাংস্ত্বদুদ্ভবান্ ॥ ৪২ ॥
কোপং সংহর দেবেশি সভয়া রূপদর্শনাৎ ।
কা তে স্তুতিঃ প্রকর্তব্যা পামরৈর্নিজরৈরিহ ॥ ৪৩ ॥
স্বস্যাপ্যজ্ঞেয় এবাসৌ যাবান্যশ্চ স্ববিক্রমঃ ।
তদর্বাগ্জায়মানানাং কথং স বিষয়ো ভবেৎ ॥ ৪৪ ॥
নমস্তে ভুবনেশানি নমস্তে প্রণবাত্মকে ।
সর্ব বেদান্তসংসিদ্ধে নমো হ্রীঙ্কারমূর্তয়ে ॥ ৪৫ ॥
যস্মাদগ্নিঃ সমুৎপন্নো যস্মাৎসূর্যশ্চ চন্দ্রমাঃ ।
যস্মাদোষধয়ঃ সর্বাস্তস্মৈ সর্বাত্মনে নমঃ ॥ ৪৬ ॥
যস্মাচ্চ দেবাঃ সংভূতাঃ সাধ্যাঃ পক্ষিণ এব চ ।
পশবশ্চ মনুষ্যাশ্চ তস্মৈ সর্বাত্মনে নমঃ ॥ ৪৭ ॥
প্রাণাপানৌ ব্রীহিয়বৌ তপঃ শ্রদ্ধা ঋতং তথা ।
ব্রহ্মচর্যং বিধিশ্চৈব যস্মাত্তস্মৈ নমো নমঃ ॥ ৪৮ ॥
সপ্ত প্রাণার্চিষো যস্মাৎসমিধঃ সপ্ত এব চ ।
হোমাঃ সপ্ত তথা লোকাস্তস্মৈ সর্বাত্মনে নমঃ ॥ ৪৯ ॥
যস্মাৎসমুদ্রা গিরয়ঃ সিন্ধবঃ প্রচরন্তি চ ।
যস্মাদোষধয়ঃ সর্বা রসাস্তস্মৈ নমো নমঃ ॥ ৫০ ॥
যস্মাদ্যজ্ঞঃ সমুদ্ভূতো দীক্ষায়ূপশ্চ দক্ষিণাঃ ।
ঋচো যজূংষি সামানি তস্মৈ সর্বাত্মনে নমঃ ॥ ৫১ ॥
নমঃ পুরস্তাৎপৃষ্ঠে চ নমস্তে পার্শ্বয়োর্দ্বয়োঃ ।
অধ ঊর্ধ্বং চতুর্দিক্ষু মাতর্ভূয়ো নমো নমঃ ॥ ৫২ ॥
উপসংহর দেবেশি রূপমেতদলৌকিকম্ ।
তদেব দর্শয়াস্মাকং রূপং সুন্দরসুন্দরম্ ॥ ৫৩ ॥
ব্যাস উবাচ –
ইতি ভীতান্সুরান্দৃষ্ট্বা জগদম্বা কৃপার্ণবা ।
সংহৃত্য রূপং ঘোরং তদ্দর্শয়ামাস সুন্দরম্ ॥ ৫৪ ॥
পাশাঙ্কুশবরাভীতিধরং সর্বাঙ্গকোমলম্ ।
করুণাপূর্ণনয়নং মন্দস্মিতমুখাম্বুজম্ ॥ ৫৫ ॥
দৃষ্ট্বা তৎসুন্দরং রূপং তদা ভীতিবিবর্জিতাঃ ।
শান্তিচিত্তা প্রণেমুস্তে হর্ষগদ্গদনিঃস্বনাঃ ॥ ৫৬ ॥
॥ ইতি শ্রীদেবীভাগবতে দেবীগীতায়াং দ্বিতীয়োঽধ্যায়ঃ ॥
॥ অথ তৃতীয়োঽধ্যায়ঃ ॥
শ্রীদেব্যুবাচ –
ক্ব যূয়ং মন্দভাগ্যা বৈ ক্বেদং রূপং মহাদ্ভুতম্ ।
তথাপি ভক্তবাৎসল্যাদীদৃশং দর্শিতং ময়া ॥ ১ ॥
ন বেদাধ্যযনৈর্যোগৈর্ন দানৈস্তপসেজ্যযা ।
রূপং দ্রষ্টুমিদং শক্যং কেবলং মৎকৃপাং বিনা ॥ ২ ॥
প্রকৃতং শৃণু রাজেন্দ্র পরমাত্মাত্র জীবতাম্ ।
উপাধিয়োগাৎসম্প্রাপ্তঃ কর্তৃৎবাদিকমপ্যুত ॥ ৩ ॥
ক্রিয়াঃ করোতি বিবিধা ধর্মাধর্মৈকহেতবঃ ।
নানায়োনীস্ততঃ প্রাপ্য সুখদুঃখৈশ্চ যুজ্যতে ॥ ৪ ॥
পুনস্তৎসংস্কৃতিবশান্নানাকর্মরতঃ সদা ।
নানাদেহান্সমাপ্নোতি সুখদুঃখৈশ্চ যুজ্যতে ॥ ৫ ॥
ঘটীয়ন্ত্রবদেতস্য ন বিরামঃ কদাপি হি ।
অজ্ঞানমেব মূলং স্যাত্ততঃ কামঃ ক্রিয়াস্ততঃ ॥ ৬ ॥
তস্মাদজ্ঞাননাশায় যতেত নিয়তং নরঃ ।
এতদ্ধি জন্মসাফল্যং যদজ্ঞানস্য নাশনম্ ॥ ৭ ॥
পুরুষার্থসমাপ্তিশ্চ জীবন্মুক্তিদশাঽপি চ ।
অজ্ঞাননাশনে শক্তা বিদ্যৈব তু পটীয়সী ॥ ৮ ॥
ন কর্ম তজ্জং নোপাস্তির্বিরোধাভাবতো গিরে ।
প্রত্যুতাশাঽজ্ঞাননাশে কর্মণা নৈব ভাব্যতাম্ ॥ ৯ ॥
অনর্থদানি কর্মাণি পুনঃ পুনরুশন্তি হি ।
ততো রাগস্ততো দোষস্ততোঽনর্থো মহান্ভবেৎ ॥ ১০ ॥
তস্মাৎসর্বপ্রয়ত্নেন জ্ঞানং সম্পাদয়েন্নরঃ ।
কুর্বন্নেবেহ কর্মাণীত্যতঃ কর্মাপ্যবশ্যকম্ ॥ ১১ ॥
জ্ঞানাদেব হি কৈবল্যমতঃ স্যাত্তৎসমুচ্চয়ঃ ।
সহায়তাং ব্রজেৎকর্ম জ্ঞানস্য হিতকারি চ ॥ ১২ ॥
ইতি কেচিদ্বদন্ত্যত্র তদ্বিরোধান্ন সংভবেৎ ।
জ্ঞানাধৃদ্গ্রন্থিভেদঃ স্যাধৃদ্গ্রন্থৌ কর্মসংভবঃ ॥ ১৩ ॥
যৌগপদ্যং ন সংভাব্যং বিরোধাত্তু ততস্তয়োঃ ।
তমঃপ্রকাশয়োর্যদ্বদ্যৌগপদ্যং ন সংভবি ॥ ১৪ ॥
তস্মাৎসর্বাণি কর্মাণি বৈদিকানি মহামতে ।
চিত্তশুদ্ধ্যন্তমেব স্যুস্তানি কুর্যাৎপ্রয়ত্নতঃ ॥ ১৫ ॥
শমো দমস্তিতিক্ষা চ বৈরাগ্যং সত্ত্বসংভবঃ ।
তাবৎপর্যন্তমেব স্যুঃ কর্মাণি ন ততঃ পরম্ ॥ ১৬ ॥
তদন্তে চৈব সংন্যস্য সশ্রয়েদ্গুরুমাত্মবান্ ।
শ্রোত্রিয়ং ব্রহ্মনিষ্ঠং চ ভক্ত্যা নির্ব্যাজয়া পুনঃ ॥ ১৭ ॥
বেদান্তশ্রবণং কুর্যান্নিত্যমেবমতন্দ্রিতঃ ।
তত্ত্বমস্যাদিবাক্যস্য নিত্যমর্থং বিচারয়েৎ ॥ ১৮ ॥
তত্ত্বমস্যাদিবাক্যং তু জীবব্রহ্মৈক্যবোধকম্ ।
ঐক্যে জ্ঞাতে নির্ভয়স্তু মদ্রূপো হি প্রজায়তে ॥ ১৯ ॥
পদার্থাবগতিঃ পূর্বং বাক্যার্থাবগতিস্ততঃ ।
তৎপদস্য চ বাচ্যার্থো গিরেঽহং পরিকীর্তিতঃ ॥ ২০ ॥
ৎবংপদস্য চ বাচ্যার্থো জীব এব ন সংশয়ঃ ।
উভয়োরৈক্যমসিনা পদেন প্রোচ্যতে বুধৈঃ ॥ ২১ ॥
বাচ্যার্থয়োর্বিরুদ্ধৎবাদৈক্যং নৈব ঘটেত হ ।
লক্ষণাঽতঃ প্রকর্তব্যা তত্ত্বমোঃ শ্রুতিসংস্থয়োঃ ॥ ২২ ॥
চিন্মাত্রং তু তয়োর্লক্ষ্যং তয়োরৈক্যস্য সংভবঃ ।
তয়োরৈক্যং তথা জ্ঞাৎবা স্বাভেদেনাদ্বয়ো ভবেৎ ॥ ২৩ ॥
দেবদত্তঃ স এবায়মিতিবল্লক্ষণা স্মৃতা ।
স্থূলাদিদেহরহিতো ব্রহ্মসম্পদ্যতে নরঃ ॥ ২৪ ॥
পঞ্চীকৃতমহাভূতসংভূতঃ স্থূলদেহকঃ ।
ভোগালয়ো জরাব্যাধিসংয়ুতঃ সর্বকর্মণাম্ ॥ ২৫ ॥
মিথ্যাভূতোঽয়মাভাতি স্ফুটং মায়াময়ৎবতঃ ।
সোঽয়ং স্থূল উপাধিঃ স্যাদাত্মনো মে নগেশ্বর ॥ ২৬ ॥
জ্ঞানকর্মেন্দ্রিয়যুতং প্রাণপঞ্চকসংয়ুতম্ ।
মনোবুদ্ধিয়ুতং চৈতৎসূক্ষ্মং তৎকবয়ো বিদুঃ ॥ ২৭ ॥
অপঞ্চীকৃতভূতোত্থং সূক্ষ্মদেহোঽয়মাত্মনঃ ।
দ্বিতীয়োঽয়মুপাধিঃ স্যাৎসুখাদেরববোধকঃ ॥ ২৮ ॥
অনাদ্যনির্বাচ্যমিদমজ্ঞানং তু তৃতীয়কঃ ।
দেহোঽয়মাত্মনো ভাতি কারণাত্মা নগেশ্বর ॥ ২৯ ॥
উপাধিবিলয়ে জাতে কেবলাত্মাঽবশিষ্যতে ।
দেহত্রয়ে পঞ্চকোশা অন্তস্থাঃ সন্তি সর্বদা ॥ ৩০ ॥
পঞ্চকোশপরিত্যাগে ব্রহ্মপুচ্ছং হি লভ্যতে ।
নেতি নেতীত্যাদিবাক্যৈর্মম রূপং যদুচ্যতে ॥ ৩১ ॥
ন জায়তে ম্রিয়তে বা কদাচি-
ন্নায়ং ভূৎবা ন বভূব কশ্চিৎ ।
অজো নিত্যঃ শাশ্বতোঽয়ং পুরাণো
ন হন্যতে হন্যমানে শরীরে ॥ ৩২ ॥
হন্তা চেন্মন্যতে হন্তুং হতশ্চেন্মন্যতে হতম্ ।
উভৌ তৌ ন বিজানীতো নায়ং হন্তি ন হন্যতে ॥ ৩৩ ॥
অণোরণীয়ান্মহতো মহীয়া-
নাত্মাঽস্য জন্তোর্নিহিতো গুহায়াম্ ।
তমক্রতুঃ পশ্যতি বীতশোকো
ধাতুপ্রসাদান্মহিমানমস্য ॥ ৩৪ ॥
আত্মানং রথিনং বিদ্ধি শরীরং রথমেব তু ।
বুদ্ধিং তু সারথিং বিদ্ধি মনঃ প্রগ্রহমেব চ ॥ ৩৫ ॥
ইন্দ্রিয়াণি হয়ানাহুর্বিষয়াংস্তেষু গোচরান্ ।
আত্মেন্দ্রিয়মনোয়ুক্তং ভোক্তেত্যাহুর্মনীষিণঃ ॥ ৩৬ ॥
যস্ত্ববিদ্বান্ভবতি চামনস্কঃ সদাঽশুচিঃ ।
স তু তৎপদমবাপ্নোতি সংসারং চাধিগচ্ছতি ॥ ৩৭ ॥
যস্তু বিজ্ঞানবান্ভবতি সমনস্কঃ সদা শুচিঃ ।
স তু তৎপদমাপ্নোতি যস্মাদ্ভূয়ো ন জায়তে ॥ ৩৮ ॥
বিজ্ঞানসারথির্যস্তু মনঃ প্রগ্রহবান্নরঃ ।
সোঽধ্বনঃ পারমাপ্নোতি মদীয়ং যৎপরং পদম্ ॥ ৩৯ ॥
ইত্থং শ্রুত্যা চ মত্যা চ নিশ্চিত্যাত্মানমাত্মনা ।
ভাবয়েন্মামাত্মরূপাং নিদিধ্যাসনতোঽপি চ ॥ ৪০ ॥
যোগবৃত্তেঃ পুরা স্বামিন্ভাবয়েদক্ষরত্রয়ম্ ।
দেবীপ্রণবসংজ্ঞস্য ধ্যানার্থং মন্ত্রবাচ্যযোঃ ॥ ৪১ ॥
হকারঃ স্থূলদেহঃ স্যাদ্রকারঃ সূক্ষ্মদেহকঃ ।
ঈকারঃ কারাণাত্মাঽসৌ হ্রীঙ্কারোঽহং তুরীয়কম্ ॥ ৪২ ॥
এবং সমষ্টিদেহেঽপি জ্ঞাৎবা বীজত্রয়ং ক্রমাৎ ।
সমষ্টিব্যষ্ট্যোরেকৎবং ভাবয়েন্মতিমান্নরঃ ॥ ৪৩ ॥
সমাধিকালাৎপূর্বং তু ভাবয়িৎবৈবমাদৃতঃ ।
ততো ধ্যায়েন্নিলীনাক্ষো দেবীং মাং জগদীশ্বরীম্ ॥ ৪৪ ॥
প্রাণাপানৌ সমৌ কৃৎবা নাসাভ্যন্তরচারিণৌ ।
নিবৃত্তবিষয়াকাঙ্ক্ষো বীতদোষো বিমৎসরঃ ॥ ৪৫ ॥
ভক্ত্যা নির্ব্যাজয়া যুক্তো গুহায়াং নিঃস্বনে স্থলে ।
হকারং বিশ্বমাত্মানং রকারে প্রবিলাপয়েৎ ॥ ৪৬ ॥
রকারং তৈজসং দেবমীকারে প্রবিলাপয়েৎ ।
ঈকারং প্রাজ্ঞয়াত্মানং হ্রীঙ্কারে প্রবিলাপয়েৎ ॥ ৪৭ ॥
বাচ্যবাচকতাহীনং দ্বৈতভাববিবর্জিতম্ ।
অখণ্ডং সচ্চিদানন্দং ভাবয়েত্তচ্ছিখান্তরে ॥ ৪৮ ॥
ইতি ধ্যানেন মাং রাজন্সাক্ষাৎকৃত্য নরোত্তমঃ ।
মদ্রূপ এব ভবতি দ্বয়োরপ্যেকতা যতঃ ॥ ৪৯ ॥
যোগয়ুক্ত্যাঽনয়া দ্রষ্টা মামাত্মানং পরাৎপরম্ ।
অজ্ঞানস্য সকার্যস্য তৎক্ষণে নাশকো ভবেৎ ॥ ৫০ ॥
॥ ইতি শ্রীদেবীভাগবতে দেবীগীতায়াং তৃতীয়োঽধ্যায়ঃ ॥
॥ অথ চতুর্তোঽধ্যায়ঃ ॥
হিমালয় উবাচ –
যোগং বদ মহেশানি সাঙ্গ সংবিৎপ্রদায়কম্ ।
কৃতেন যেন যোগ্যোঽহং ভবেয়ং তত্ত্বদর্শনে ॥ ১ ॥
শ্রীদেব্যুবাচ –
ন যোগো নভসঃ পৃষ্ঠে ন ভূমৌ ন রসাতলে ।
ঐক্যং জীবাত্মনোরাহুর্যোগং যোগবিশারদাঃ ॥ ২ ॥
তৎপ্রত্যূহাঃ ষডাখ্যাতা যোগবিঘ্নকরানঘ ।
কামক্রোধৌ লোভমোহৌ মদমাৎসর্যসংজ্ঞকৌ ॥ ৩ ॥
যোগাঙ্গৈরেব ভিত্ত্বা তান্যোগিনো যোগমাপ্নুয়ুঃ ।
যমং নিয়মমাসনপ্রাণায়ামৌ ততঃপরম্ ॥ ৪ ॥
প্রত্যাহারং ধারণাখ্যং ধ্যানং সার্ধং সমাধিনা ।
অষ্টাঙ্গান্যাহুরেতানি যোগিনাং যোগসাধনে ॥ ৫ ॥
অহিংসা সত্যমস্তেয়ং ব্রহ্মচর্যং দয়াঽঽর্জবম্ ।
ক্ষমা ধৃতির্মিতাহারঃ শৌচং চেতি যমা দশ ॥ ৬ ॥
তপঃ সন্তোষ আস্তিক্যং দানং দেবস্য পূজনম্ ।
সিদ্ধান্তশ্রবণং চৈব হ্রীর্মতিশ্চ জপো হুতম্ ॥ ৭ ॥
দশৈতে নিয়মাঃ প্রোক্তা ময়া পর্বতনায়ক ।
পদ্মাসনং স্বস্তিকং চ ভদ্রং বজ্রাসনং তথা ॥ ৮ ॥
বীরাসনমিতি প্রোক্তং ক্রমাদাসনপঞ্চকম্ ।
ঊর্বোরুপরি বিন্যস্য সম্যক্পাদতলে শুভে ॥ ৯ ॥
অঙ্গিষ্ঠৌ চ নিবধ্নীয়াদ্ধস্তাভ্যাং ব্যুৎক্রমাত্ততঃ ।
পদ্মাসনমিতি প্রোক্তং যোগিনাং হৃদয়ংগমম্ ॥ ১০ ॥
জানূর্বোরন্তরে সম্যক্কৃৎবা পাদতলে শুভে ।
ঋজুকায়ো বিশেদ্যোগী স্বস্তিকং তৎপ্রচক্ষতে ॥ ১১ ॥
সীবন্যাঃ পার্শ্বয়োর্ন্যস্য গুল্ফয়ুগ্মং সুনিশ্চিতম্ ।
বৃষণাধঃ পাদপার্ষ্ণী পাণিভ্যাং পরিবন্ধয়েৎ ॥ ১২ ॥
ভদ্রাসনমিতি প্রোক্তং যোগিভিঃ পরিপূজিতম্ ।
ঊর্বোঃ পাদৌ ক্রমান্ন্যস্য জান্বোঃপ্রত্যঙ্মুখাঙ্গুলী ॥ ১৩ ॥
করৌ বিদধ্যাদাখ্যাতং বজ্রাসনমনুত্তমম্ ।
একং পাদমধঃ কৃৎবা বিন্যস্যোরুং তথোত্তরে ॥ ১৪ ॥
ঋজুকায়ো বিশেদ্যোগী বীরাসনমিতীরিতম্ ।
ঈডয়াকর্ষয়েদ্বায়ুং বাহ্যং ষোডশমাত্রয়া
ধারয়েৎপূরিতং যোগী চতুঃষষ্ট্যা তু মাত্রয়া ॥ ১৫ ॥
সুষুম্নামধ্যগং সম্য দ্বাত্রিংশন্মাত্রয়া শনৈঃ ॥ ১৬ ॥
নাড্যা পিঙ্গলয়া চৈব রেচয়েদ্যোগবিত্তমঃ ।
প্রাণায়ামমিমং প্রাহুর্যোগশাস্ত্রবিশারদাঃ ॥ ১৭ ॥
ভূয়ো ভূয়ঃ ক্রমাত্তস্য বাহ্যমেবং সমাচরেৎ ।
মাত্রাবৃদ্ধিঃ ক্রমেণৈব সম্যগ্দ্বাদশ ষোডশ ॥ ১৮ ॥
জপধ্যানাদিভিঃ সার্থং সগর্ভং তং বিদুর্বুধাঃ ।
তদপেতং বিগর্ভং চ প্রাণায়ামং পরে বিদুঃ ॥ ১৯ ॥
ক্রমাদভ্যস্যতঃ পুংসো দেহে স্বেদোদ্গমোঽধমঃ ।
মধ্যমঃ কংপসংয়ুক্তো ভূমিত্যাগঃ পরো মতঃ ॥ ২০ ॥
উত্তমস্য গুণাবাপ্তির্যাবচ্ছীলনমিষ্যতে ।
ইন্দ্রিয়াণাং বিচরতাং বিষয়েষু নিরর্গলম্ ॥ ২১ ॥
বলাদাহরণং তেভ্যঃ প্রত্যাহারোঽভিধীয়তে ।
অঙ্গুষ্ঠগুল্ফজানূরুমূলাধারলিঙ্গনাভিষু ॥ ২২ ॥
হৃদ্গ্রীবাকণ্ঠদেশেষু লংবিকায়াং ততো নসি ।
ভ্রূমধ্যে মস্তকে মূর্ধ্নি দ্বাদশান্তে যথাবিধি ॥ ২৩ ॥
ধারণং প্রাণমরুতো ধারণেতি নিগদ্যতে ।
সমাহিতেন মনসা চৈতন্যান্তরবর্তিনা ॥ ২৪ ॥
আত্মন্যভীষ্টদেবানাং ধ্যানং ধ্যানমিহোচ্যতে ।
সমৎবভাবনা নিত্যং জীবাত্মপরমাত্মনোঃ ॥ ২৫ ॥
সমাধির্মাহুর্মুনয়ঃ প্রোক্তমষ্টাঙ্গলক্ষণম্ ।
ইদানীং কথয়ে তেঽহং মন্ত্রয়োগমনুত্তমম্ ॥ ২৬ ॥
বিশ্বং শরীরমিত্যুক্তং পঞ্চভূতাত্মকং নগ ।
চন্দ্রসূর্যাগ্নিতেজোভির্জীবব্রহ্মৈক্যরূপকম্ ॥ ২৭ ॥
তিস্রঃ কোট্যস্তদর্ধেন শরীরে নাডয়ো মতাঃ ।
তাসু মুখ্যা দশ প্রোক্তাস্তাভ্যস্তিস্রো ব্যবস্থিতাঃ ॥ ২৮ ॥
প্রধানা মেরুদণ্ডেঽত্র চন্দ্রসূর্যাগ্নিরূপিণী ।
ইডা বামে স্থিতা নাডী শুভ্রা তু চন্দ্ররূপিণী ॥ ২৯ ॥
শক্তিরূপা তু সা নাডী সাক্ষাদমৃতবিগ্রহা ।
দক্ষিণে যা পিঙ্গলাখ্যা পুংরূপা সূর্যবিগ্রহা ॥ ৩০ ॥
সর্বতেজোময়ী সা তু সুষুম্না বহ্নিরূপিণী ।
তস্যা মধ্যে বিচিত্রাখ্যে ইচ্ছাজ্ঞানক্রিয়াত্মকম্ ॥ ৩১ ॥
মধ্যে স্বয়ংভূলিঙ্গং তু কোটিসূর্যসমপ্রভম্ ।
তদূর্ধ্বং মায়াবীজং তু হরাত্মাবিন্দুনাদকম্ ॥ ৩২ ॥
তদূর্ধ্বং তু শিখাকারা কুণ্ডলী রক্তবিগ্রহা ।
দেব্যাত্মিকা তু সা প্রোক্তা মদভিন্না নগাধিপ ॥ ৩৩ ॥
তদ্বাহ্যে হেমরূপাভং বাদিসান্তচতুর্দলম্ ।
দ্রুতহেমসমপ্রখ্যং পদ্মং তত্র বিচিন্তয়েৎ ॥ ৩৪ ॥
তদূর্ধ্বং ৎবনলপ্রখ্যং ষড্দলং হীরকপ্রভম্ ।
বাদিলান্তষড্বর্ণেন স্বাধিষ্ঠানমনুত্তমম্ ॥ ৩৫ ॥
মূলাধার ষট্কোণং মূলাধারং ততো বিদুঃ ।
স্বশব্দেন পরং লিঙ্গং স্বাধিষ্ঠানং ততো বিদুঃ ॥ ৩৬ ॥
তদূর্ধ্বং নাভিদেশে তু মণিপূরং মহাপ্রভম্ ।
মেঘাভং বিদ্যুদাভং চ বহুতেজোময়ং ততঃ ॥ ৩৭ ॥
মণিবদ্ভিন্নং তৎপদ্মং মণিপদ্মং তথোচ্যতে ।
দশভিশ্চ দলৈর্যুক্তং ডাদিফান্তাক্ষরান্বিতম্ ॥ ৩৮ ॥
বিষ্ণুনাঽধিষ্ঠিতং পত্রং বিষ্ণ্বালোকনকারণম্ ।
তদূর্ধ্বেঽনাহতং পদ্মমুদ্যদাদিত্যসন্নিভম্ ॥ ৩৯ ॥
কাদিঠান্তদলৈরর্কপত্রৈশ্চ সমধিষ্ঠিতম্ ।
তন্মধ্যে বাণলিঙ্গং তু সূর্যায়ুতসমপ্রভম্ ॥ ৪০ ॥
শব্দব্রহ্মময়ং শব্দানাহতং তত্র দৃশ্যতে ।
অনাহতাখ্যং তৎপদ্মং মুনিভিঃ পরিকীর্তিতম্ ॥ ৪১ ॥
আনন্দসদনং তত্তু পুরুষাধিষ্ঠিতং পরম্ ।
তদূর্ধ্বং তু বিশুদ্ধাখ্যং দলষোডশপঙ্কজম্ ॥ ৪২ ॥
স্বরৈঃ ষোডশভির্যুক্তং ধূম্রবর্ণং মহাপ্রভম্ ।
বিশুদ্ধং তনুতে যস্মাজ্জীবস্য হংসলোকনাৎ ॥ ৪৩ ॥
বিশুদ্ধং পদ্মমাখ্যাতমাকাশাখ্যং মহাদ্ভুতম্ ।
আজ্ঞাচক্রং তদূর্ধ্বে তু আত্মনাঽধিষ্ঠিতং পরম্ ॥ ৪৪ ॥
আজ্ঞাসঙ্ক্রমণং তত্র তেনাজ্ঞেতি প্রকীর্তিতম্ ।
দ্বিদলং হক্ষসংয়ুক্তং পদ্মং তৎসুমনোহরম্ ॥ ৪৫ ॥
কৈলাসাখ্যং তদূর্ধ্বং তু রোধিনী তু তদূর্ধ্বতঃ ।
এবং ৎবাধারচক্রাণি প্রোক্তানি তব সুব্রত ॥ ৪৬ ॥
সহস্রারয়ুতং বিন্দুস্থানং তদূর্ধ্বমীরিতম্ ।
ইত্যেতৎকথিতং সর্বং যোগমার্গমনুত্তমম্ ॥ ৪৭ ॥
আদৌ পূরকয়োগেনাপ্যাধারে যোজয়েন্মনঃ ।
গুদমেঢ্রান্তরে শক্তিস্তামাকুঞ্চ্য প্রবোধয়েৎ ॥ ৪৮ ॥
লিঙ্গভেদক্রমেণৈব বিন্দুচক্রং চ প্রাপয়েৎ ।
শংভুনা তাং পরাশক্তিমেকীভূতাং বিচিন্তয়েৎ ॥ ৪৯ ॥
তত্রোত্থিতামৃতং যত্তু দ্রুতলাক্ষারসোপমম্ ।
পায়যিৎবা তু তাং শক্তিং মায়খ্যাং যোগসিদ্ধিদাম্ ॥ ৫০ ॥
ষট্চক্রদেবতাস্তত্র সন্তর্প্যামৃতধারয়া ।
আনয়েত্তেন মার্গেণ মূলাধারং ততঃ সুধীঃ ॥ ৫১ ॥
এবমভ্যস্যমানস্যাপ্যহন্যহনি নিশ্চিতম্ ।
পূর্বোক্তদূষিতা মন্ত্রাঃ সর্বে সিধ্যন্তি নান্যথা ॥ ৫২ ॥
জরামরণদুঃখাদ্যৈর্মুচ্যতে ভববন্ধনাৎ ।
যে গুণাঃ সন্তি দেব্যা মে জগন্মাতুর্যথা তথা ॥ ৫৩ ॥
তে গুণাঃ সাধকবরে ভবন্ত্যেব চান্যথা ।
ইত্যেবং কথিতং তাত বায়ুধারণমুত্তমম্ ॥ ৫৪ ॥
ইদানীং ধারণাখ্যং তু শৃণুষ্বাবহিতো মম ।
দিক্কালাদ্যনবচ্ছিন্নদেব্যাং চেতো বিধায় চ ॥ ৫৫ ॥
তন্ময়ো ভবতি ক্ষিপ্রং জীবব্রহ্মৈক্যযোজনাৎ ।
অথবা সমলং চেতো যদি ক্ষিপ্রং ন সিধ্যতি ॥ ৫৬ ॥
তদাবয়বয়োগেন যোগী যোগান্সমভ্যসেৎ ।
মদীয়হস্তপাদাদাবঙ্গে তু মধুরে নগ ॥ ৫৭ ॥
চিত্তং সংস্থাপয়েন্মন্ত্রী স্থানস্থানজয়াৎপুনঃ ।
বিশুদ্ধচিত্তঃ সর্বস্মিন্রূপে সংস্থাপয়েন্মনঃ ॥ ৫৮ ॥
যাবন্মনোলয়ং যাতি দেব্যাং সংবিদি পর্বত ।
তাবদিষ্টমিদং মন্ত্রী জপহোমৈঃ সমভ্যসেৎ ॥ ৫৯ ॥
মন্ত্রাভ্যাসেন যোগেন জ্ঞেয়জ্ঞানায় কল্পতে ।
ন যোগেন বিনা মন্ত্রো ন মন্ত্রেণ বিনা হি সঃ ॥ ৬০ ॥
দ্বয়োরভ্যাসয়োগো হি ব্রহ্মসংসিদ্ধিকারণম্ ।
তমঃপরিবৃতে গেহে ঘটো দীপেন দৃশ্যতে ॥ ৬১ ॥
এবং মায়াবৃতো হ্যাত্মা মনুনা গোচরীকৃতঃ ।
ইতি যোগবিধিঃ কৃৎস্নঃ সাঙ্গঃ প্রোক্তো ময়াঽধুনা ॥ ৬২ ॥
॥ ইতি শ্রীদেবীভাগবতে দেবীগীতায়াং চতুর্থোঽধ্যায়ঃ ॥
॥ অথ পঞ্চমোঽধ্যায়ঃ ॥
শ্রীদেব্যুবাচ –
ইত্যাদি যোগয়ুক্তাত্মা ধ্যায়েন্মাং ব্রহ্মরূপিণীম্ ।
ভক্ত্যা নির্ব্যাজয়া রাজন্নাসনে সমুপস্থিতঃ ॥ ১ ॥
আবিঃ সন্নিহিতং গুহাচরং নাম মহৎপরম্ ।
অত্রৈতৎসর্বমর্পিতমেজৎপ্রাণনিমিষচ্চ যৎ ॥ ২ ॥
এতজ্জানথ সদসদ্বরেণ্যং
বিজ্ঞানাদ্যদ্বরিষ্ঠং প্রজানাম্ ।
যদর্চিমদ্যদণুভ্যোঽণু চ
যস্মিংল্লোকা নিহিতা লোকিনশ্চ ॥ ৩ ॥
তদেতদক্ষরং ব্রহ্ম স প্রাণস্তদু বাঙ্ মনঃ ।
তদেতৎসত্যমমৃতং তদ্বেদ্ধব্যং সৌম্য বিদ্ধি ॥ ৪ ॥
ধনুর্গৄৎবৌপনিষদং মহাস্ত্রং
শরং হ্যুপাসানিশিতং সন্ধয়ীত ।
আয়ম্য তদ্ভাবগতেন চেতসা
লক্ষ্যং তদেবাক্ষরং সৌম্য বিদ্ধি ॥ ৫ ॥
প্রণবো ধনুঃ শরো হ্যাত্মা ব্রহ্মতল্লক্ষ্যমুচ্যতে ।
অপ্রমত্তেন বেদ্ধব্যং শরবত্তন্ময়ো ভবেৎ ॥ ৬ ॥
যস্মিন্দ্যৌশ্চ পৃথিবী চান্তরিক্ষ-
মোতং মনঃ সহ প্রাণৈশ্চ সর্বৈঃ ।
তমেবৈকং জানথাত্মানমন্যা
বাচো বিমুঞ্চথা অমৃতস্যৈষ সেতুঃ ॥ ৭ ॥
অরা ইব রথনাভৌ সংহতা যত্র নাড্যঃ ।
স এষোন্তশ্চরতে বহুধা জায়মানঃ ॥ ৮ ॥
ওমিত্যেবং ধ্যায়থাত্মানং স্বস্তি বঃ পারায় তমসঃ পরস্তাৎ ।
দিব্যে ব্রহ্মপুরে ব্যোম্নি আত্মা সম্প্রতিষ্ঠিতঃ ॥ ৯ ॥
মনোময়ঃ প্রাণশরীরনেতা
প্রতিষ্ঠিতোঽন্নে হৃদয়ং সংনিধায় ।
তদ্বিজ্ঞানেন পরিপশ্যন্তি ধীরা
আনন্দরূপমমৃতং যদ্বিভাতি ॥ ১০ ॥
ভিদ্যতে হৃদয়গ্রন্থিশ্চ্ছিদ্যন্তে সর্বসংশয়াঃ ।
ক্ষীয়ন্তে চাস্য কর্মাণি তস্মিন্দৃষ্টে পরাবরে ॥ ১১ ॥
হিরণ্ময়ে পরে কোশে বিরজং ব্রহ্ম নিষ্কলম্ ।
তচ্ছুভ্রং জ্যোতিষাং জ্যোতিস্তদ্যদাত্মবিদো বিদুঃ ॥ ১২ ॥
ন তত্র সূর্যো ভাতি ন চন্দ্রতারকং
নেমা বিদ্যুতো ভান্তি কুতোঽয়মগ্নিঃ ।
তমেব ভান্তমনুভাতি সর্বং
তস্য ভাসা সর্বমিদং বিভাতি ॥ ১৩ ॥
ব্রহ্মৈবেদমমৃতং পুরস্তাদ্
ব্রহ্ম পশ্চাদ্ ব্রহ্ম দক্ষিণশ্চোত্তরেণ ।
অধশ্চোর্ধ্বং প্রসৃতং ব্রহ্ম
এবেদং বিশ্বং বরিষ্ঠম্ ॥ ১৪ ॥
এতাদৃগনুভবো যস্য স কৃতার্থো নরোত্তমঃ ।
ব্রহ্মভূতঃ প্রসন্নাত্মা ন শোচতি ন কাঙ্ক্ষতি ॥ ১৫ ॥
দ্বিতীয়াদ্বৈ ভয়ং রজংস্তদভাবাদ্বিভেতি ন ।
ন তদ্বিয়োগো মেঽপ্যস্তি মদ্বিয়োগোঽপি তস্য ন ॥ ১৬ ॥
অহমেব স সোঽহং বৈ নিশ্চিতং বিদ্ধি পর্বত ।
মদ্দর্শনং তু তত্র স্যাদ্যত্র জ্ঞানী স্থিতো মম ॥ ১৭ ॥
নাহং তীর্থে ন কৈলাসে বৈকুণ্ঠে বা ন কর্হিচিৎ ।
বসামি কিন্তু মজ্জ্ঞানিহৃদয়াংভোজমধ্যমে ॥ ১৮ ॥
মৎপূজাকোটিফলদং সকৃন্মজ্জ্ঞানিনোঽর্চনম্ ।
কুলং পবিত্রং তস্যাস্তি জননী কৃতকৃত্যকা ॥ ১৯ ॥
বিশ্বংভরা পুণ্যবতী চিল্লয়ো যস্য চেতসঃ ।
ব্রহ্মজ্ঞানং তু যৎপৃষ্টং ৎবয়া পর্বতসত্তম ॥ ২০ ॥
কথিতং তন্ময়া সর্বং নাতো বক্তব্যমস্তি হি ।
ইদং জ্যেষ্ঠায় পুত্রায় ভক্তিয়ুক্তায় শীলিনে ॥ ২১ ॥
শিষ্যায় চ যথোক্তায় বক্তব্যং নান্যথা ক্বচিৎ ।
যস্য দেবে পরা ভক্তির্যথা দেবে তথা গুরৌ ॥ ২২ ॥
তস্যৈতে কথিতা হ্যর্থাঃ প্রকাশন্তে মহাত্মনঃ ।
যেনোপদিষ্টা বিদ্যেয়ং স এব পরমেশ্বরঃ ॥ ২৩ ॥
যস্যায়ং সুকৃতং কর্তুমসমর্থস্ততো ঋণী ।
পিত্রোরপ্যধিকঃ প্রোক্তো ব্রহ্মজন্মপ্রদায়কঃ ॥ ২৪ ॥
পিতৃজাতং জন্ম নষ্টং নেত্থং জাতং কদাচন ।
তস্মৈ ন দ্রুহ্যেদিত্যাদি নিগমোঽপ্যবদন্নগ ॥ ২৫ ॥
তস্মাচ্ছাস্ত্রস্য সিদ্ধান্তো ব্রহ্মদাতা গুরুঃ পরঃ ।
শিবে রুষ্টে গুরুস্ত্রাতা গুরৌ রুষ্টে ন শঙ্করঃ ॥ ২৬ ॥
তস্মাৎসর্বপ্রয়ত্নেন শ্রীগুরুং তোষয়েন্নগ ।
কায়েন মনসা বাচা সর্বদা তৎপরো ভবেৎ ॥ ২৭ ॥
অন্যথা তু কৃতঘ্নঃ স্যাৎকৃতঘ্নে নাস্তি নিষ্কৃতিঃ ।
ইন্দ্রেণাথর্বণায়োক্তা শিরশ্ছেদপ্রতিজ্ঞয়া ॥ ২৮ ॥
অশ্বিভ্যাং কথনে তস্য শিরশ্ছিন্নং চ বজ্রিণা ।
অশ্বীয়ং তচ্ছিরো নষ্টং দৃষ্ট্বা বৈদ্যো সুরোত্তমৌ ॥ ২৯ ॥
পুনঃ সংয়োজিতং স্বীয়ং তাভ্যাং মুনিশিরস্তদা ।
ইতি সঙ্কটসম্পাদ্যা ব্রহ্মবিদ্যা নগাধিপ ।
লব্ধা যেন স ধন্যঃ স্যাৎকৃতকৃত্যশ্চ ভূধর ॥ ৩০ ॥
॥ ইতি শ্রীদেবীভাগবতে দেবীগীতায়াং পঞ্চমোঽধ্যায়ঃ ॥
॥ অথ ষষ্ঠোঽধ্যায়ঃ ॥
হিমালয় উবাচ –
স্বীয়াং ভক্তিং বদস্বাম্ব যেন জ্ঞাতং সুখেন হি ।
জায়তে মনুজস্যাস্য মধ্যমস্যবিরাগিণঃ ॥ ১ ॥
দেব্যুবাচ –
মার্গাস্ত্রয়ো মে বিখ্যাতা মোক্ষপ্রাপ্তৌ নগাধিপ ।
কর্ময়োগো জ্ঞানয়োগো ভক্তিয়োগশ্চ সত্তম ॥ ২ ॥
ত্রয়াণামপ্যযং যোগ্যঃ কর্তুং শক্যোঽস্তি সর্বথা ।
সুলভৎবান্মানসৎবাৎকায়চিত্তাদ্যপীডনাৎ ॥ ৩ ॥
গুণভেদান্মনুষ্যাণাং সা ভক্তিস্ত্রিবিধা মতা ।
পরপীডাং সমুদ্দিশ্য দংভং কৃৎবা পুরঃসরম্ ॥ ৩ ॥
মাৎসর্যক্রোধয়ুক্তো যস্তস্য ভক্তিস্তু তামসী ।
পরপীডাদিরহিতঃ স্বকল্যাণার্থমেব চ ॥ ৫ ॥
নিত্যং সকামো হৃদয়ে যশোর্থী ভোগলোলুপঃ ।
তত্তৎফলসমাবাপ্ত্যৈ মামুপাস্তেঽতিভক্তিতঃ ॥ ৬ ॥
ভেদবুদ্ধ্যা তু মাং স্বস্মাদন্যাং জানাতি পামরঃ ।
তস্য ভক্তিঃ সমাখ্যাতা নগাধিপ তু রাজসী ॥ ৭ ॥
পরমেশার্পণং কর্ম পাপসঙ্ক্ষালনায় চ ।
বেদোক্তৎবাদবশ্যং তৎকর্তব্যং তু ময়ানিশম্ ॥ ৮ ॥
ইতি নিশ্চিতবুদ্ধিস্তু ভেদবুদ্ধিমুপাশ্রিতঃ ।
করোতি প্রীয়তে কর্ম ভক্তিঃ সা নগ সাত্ত্বিকী ॥ ৯ ॥
পরভক্তেঃ প্রাপিকেয়ং ভেদবুদ্ধ্যবলম্বনাৎ ।
পূর্বপ্রোক্তেত্যুভে ভক্তী ন পরপ্রাপিকে মতে ॥ ১০ ॥
অধুনা পরভক্তিং তু প্রোচ্যমানাং নিবোধ মে ।
মদ্গুণশ্রবণং নিত্যং মম নামানুকীর্তনম্ ॥ ১১ ॥
কল্যাণগুণরত্নানামাকরায়াং ময়ি স্থিরম্ ।
চেতসো বর্তনং চৈব তৈলধারাসমং সদা ॥ ১২ ॥
হেতুস্তু তত্র কো বাপি ন কদাচিদ্ভবেদপি ।
সামীপ্যসার্ষ্টিসায়ুজ্যসলোক্যানাং ন চএষণা ॥ ১৩ ॥
মৎসেবাতোঽধিকং কিঞ্চিন্নৈব জানাতি কর্হিচিৎ ।
সেব্যসেবকতাভাবাতত্র মোক্ষং ন বাঞ্ছতি ॥ ১৪ ॥
পরানুরক্ত্যা মামেব চিন্তয়েদ্যো হ্যতন্দ্রিতঃ ।
স্বাভেদেনৈব মাং নিত্যং জানাতি ন বিভেদতঃ ॥ ১৫ ॥
মদ্রূপৎবেন জীবানাং চিন্তনং কুরুতে তু যঃ ।
যথা স্বস্যাত্মনি প্রীতিস্তথৈব চ পরাত্মনি ॥ ১৬ ॥
চৈতন্যস্য সমানৎবান্ন ভেদং কুরুতে তু যঃ ।
সর্বত্র বর্তমানাং মাং সর্বরূপাং চ সর্বদা ॥ ১৭ ॥
নমতে যজতে চৈবাপ্যাচাণ্ডালান্তমীশ্বরম্ ।
ন কুত্রাপি দ্রোহবুদ্ধিং কুরুতে ভেদবর্জনাৎ ॥ ১৮ ॥
মৎস্থানদর্শনে শ্রদ্ধা মদ্ভক্তদর্শনে তথা ।
মচ্ছাস্ত্রশ্রবণে শ্রদ্ধা মন্ত্রতন্ত্রাদিষু প্রভো ॥ ১৯ ॥
ময়ি প্রেমাকুলমতী রোমাঞ্চিততনুঃ সদা ।
প্রেমাশ্রুজলপূর্ণাক্ষঃ কণ্ঠগদ্গদনিস্বনঃ ॥ ২০ ॥
অনন্যেনৈব ভাবেন পূজয়েদ্যো নগাধিপ ।
মামীশ্বরীং জগদ্যোনিং সর্বকারণকারণম্ ॥ ২১ ॥
ব্রতানি মম দিব্যানি নিত্যনৈমিত্তিকান্যপি ।
নিত্যং যঃ কুরুতে ভক্ত্যা বিত্তশাঠ্যবিবর্জিতঃ ॥ ২২ ॥
মদুৎস্বদিদৃক্ষা চ মদুৎস্বকৃতিস্তথা ।
জায়তে যস্য নিয়তং স্বভাবাদেব ভূধর ॥ ২৩ ॥
উচ্চৈর্গায়ংশ্চ নামানি মমৈব খলু নৃত্যতি ।
অহঙ্কারাদিরহিতো দেহতাদাত্ম্যবর্জিতঃ ॥ ২৪ ॥
প্রারব্ধেন যথা যচ্চ ক্রিয়তে তত্তথা ভবেৎ ।
ন মে চিন্তাস্তি তত্রাপি দেহসংরক্ষণাদিষু ॥ ২৫ ॥
ইতি ভক্তিস্তু যা প্রোক্তা পরভক্তিস্তু সা স্মৃতা ।
যস্যাং দেব্যতিরিক্তং তু ন কিঞ্চিদপি ভাব্যতে ॥ ২৬ ॥
ইত্থং জাতা পরা ভক্তির্যস্য ভূধর তত্ত্বতঃ ।
তদৈব তস্য চিন্মাত্রে মদ্রূপে বিলয়ো ভবেৎ ॥ ২৭ ॥
ভক্তেস্তু যা পরা কাষ্ঠা সৈব জ্ঞানং প্রকীর্তিতম্ ।
বৈরাগ্যস্য চ সীমা সা জ্ঞানে তদুভয়ং যতঃ ॥ ২৮ ॥
ভক্তৌ কৃতায়াং যস্যাপি প্রারব্ধবশতো নগ ।
ন জায়তে মম জ্ঞানং মণিদ্বীপং স গচ্ছতি ॥ ২৯ ॥
তত্র গৎবাঽখিলান্ভোগাননিচ্ছন্নপি চর্চ্ছতি ।
তদন্তে মম চিদ্রূপজ্ঞানং সম্যগ্ভবেন্নগ ॥ ৩০ ॥
তেন যুক্তঃ সদৈব স্যাজ্জ্ঞানান্মুক্তির্ন চান্যথা ।
ইহৈব যস্য জ্ঞানং স্যাধৃদ্গতপ্রত্যগাত্মনঃ ॥ ৩১ ॥
মম সংবিৎপরতনোস্তস্য প্রাণা ব্রজন্তি ন ।
ব্রহ্মৈব সংস্তদাপ্নোতি ব্রহ্মৈব ব্রহ্ম বেদ যঃ ॥ ৩২ ॥
কণ্ঠচামীকরসমমজ্ঞানাত্তু তিরোহিতম্ ।
জ্ঞানাদজ্ঞাননাশেন লব্ধমেব হি লভ্যতে ॥ ৩৩ ॥
বিদিতাবিদিতাদন্যন্নগোত্তম বপুর্মম ।
যথাঽঽদর্শে যথাঽঽত্মনি যথা জলে তথা পিতৃলোকে ॥ ৩৪ ॥
ছায়াতপৌ তথা স্বচ্ছৌ বিবিক্তৌ তদ্বদেব হি ।
মম লোকে ভবেজ্জ্ঞানং দ্বৈতভানবিবর্জিতম্ ॥ ৩৫ ॥
যস্তু বৈরাগ্যবানেব জ্ঞানহীনো ম্রিয়েত চেৎ ।
ব্রহ্মলোকে বসেন্নিত্যং যাবৎকল্পং ততঃপরম্ ॥ ৩৬ ॥
শুচীনাং শ্রীমতাং গেহে ভবেত্তস্যা জনিঃ পুনঃ ।
করোতি সাধনং পশ্চাত্ততো জ্ঞানং হি জায়তে ॥ ৩৭ ॥
অনেকজন্মভী রাজঞ্জ্ঞানং স্যান্নৈকজন্মনা ।
ততঃ সর্বপ্রয়ত্নেন জ্ঞানার্থং যত্নমাশ্রয়েৎ ॥ ৩৮ ॥
নোচেন্মহাবিনাশঃ স্যাজ্জন্মেতদ্দুর্লভং পুনঃ ।
তত্রাপি প্রথমে বর্ণে বেদে প্রাপ্তিশ্চ দুর্লভা ॥ ৩৯ ॥
শমাদিষট্কসম্পত্তির্যোগসিদ্ধিস্তথৈব চ ।
তথোত্তমগুরুপ্রাপ্তিঃ সর্বমেবাত্র দুর্লভম্ ॥ ৪০ ॥
তথেন্দ্রিয়াণাং পটুতা সংস্কৃতৎবং তনোস্তথা ।
অনেকজন্মপুণ্যৈস্তু মোক্ষেচ্ছা জায়তে ততঃ ॥ ৪১ ॥
সাধনে সফলেঽপ্যেবং জায়মানেঽপি যো নরঃ ।
জ্ঞানার্থং নৈব যততে তস্য জন্ম নিরর্থকম্ ॥ ৪২ ॥
তস্মাদ্রাজন্যথাশক্ত্যা জ্ঞানার্থং যত্নমাশ্রয়েৎ ।
পদে পদেঽশ্বমেধস্য ফলমাপ্নোতি নিশ্চিতম্ ॥ ৪৩ ॥
ঘৃতমিব পয়সি নিগূঢং ভূতে চ বসতি বিজ্ঞানম্ ।
সততং মন্থয়িতব্যং মনসা মন্থানভূতেন ॥ ৪৪ ॥
জ্ঞানং লব্ধ্বা কৃতার্থঃ স্যাদিতি বেদান্তদিণ্ডিমঃ ।
সর্বমুক্তং সমাসেন কিং ভূয়ঃ শ্রোতুমিচ্ছসি ॥ ৪৫ ॥
॥ ইতি শ্রীদেবীভাগবতে দেবীগীতায়াং ষষ্ঠোঽধ্যায়ঃ ॥
॥ অথ সপ্তমোঽধ্যায়ঃ ॥
হিমালয় উবাচ –
কতি স্থানানি দেবেশি দ্রষ্টব্যানি মহীতলে ।
মুখ্যানি চ পবিত্রাণি দেবীপ্রিয়তমানি চ ॥ ১ ॥
ব্রতান্যপি তথা যানি তুষ্টিদান্যুৎসবা অপি ।
তৎসর্বং বদ মে মাতঃ কৃতকৃত্যো যতো নরঃ ॥ ২ ॥
শ্রীদেব্যুবাচ –
সর্বং দৃশ্যং মম স্থানং সর্বে কালা ব্রতাত্মকাঃ ।
উৎসবাঃ সর্বকালেষু যতোঽহং সর্বরূপিণী ॥ ৩ ॥
তথাপি ভক্তবাৎসল্যাৎকিঞ্চিৎকিঞ্চিদথোচ্যতে ।
শৃণুষ্বাবহিতো ভূৎবা নগরাজ বচো মম ॥ ৪ ॥
কোলাপুরং মহাস্থানং যত্র লক্ষ্মীঃ সদা স্থিতা ।
মাতুঃপুরং দ্বিতীয়ং চ রেণুকাধিষ্ঠিতং পরম্ ॥ ৫ ॥
তুলজাপুরং তৃতীয়ং স্যাৎসপ্তশৃঙ্গং তথৈব চ ।
হিঙ্গুলায়াং মহাস্থানং জ্বালামুখ্যাস্তথৈব চ ॥ ৬ ॥
শাকংভর্যাঃ পরং স্থানং ভ্রামর্যাঃ স্থানমুত্তমম্ ।
শ্রীরক্তদন্তিকাস্থানং দুর্গাস্থানং তথৈব চ ॥ ৭ ॥
বিন্ধ্যাচলনিবাসিন্যাঃ স্থানং সর্বোত্তমোত্তমম্ ।
অন্নপূর্ণামহাস্থানং কাঞ্চীপুরমনুত্তমম্ ॥ ৮ ॥
ভীমাদেব্যাঃ পরং স্থানং বিমলাস্থানমেব চ ।
শ্রীচন্দ্রলামহাস্থানং কৌশিকীস্থানমেব চ ॥ ৯ ॥
নীলাংবায়াঃ পরং স্থানং নীলপর্বতমস্তকে ।
জাংবূনদেশ্বরীস্থানং তথা শ্রীনগরং শুভম্ ॥ ১০ ॥
গুহ্যকাল্যা মহাস্থানং নেপালে যৎপ্রতিষ্ঠিতম্ ।
মীনাক্ষ্যাঃ পরমং স্থানং যচ্চ প্রোক্তং চিদংবরে ॥ ১১ ॥
বেদারণ্যং মহাস্থানং সুন্দর্যা সমধিষ্ঠিতম্ ।
একাংবরং মহাস্থানং পরশক্ত্যা প্রতিষ্ঠিতম্ ॥ ১২ ॥
মহালসা পরং স্থানং যোগেশ্বর্যাস্তথৈব চ ।
তথা নীলসরস্বত্যাঃ স্থানং চীনেষু বিশ্রুতম্ ॥ ১৩ ॥
বৈদ্যনাথে তু বগলাস্থানং সর্বোত্তমং মতম্ ।
শ্রীমচ্ছ্রীভুবনেশ্বর্যা মণিদ্বীপং মম স্মৃতম্ ॥ ১৪ ॥
শ্রীমত্ত্রিপুরভৈরব্যাঃ কামাখ্যায়োনিমণ্ডলম্ ।
ভূমণ্ডলে ক্ষেত্ররত্নং মহামায়াধিবাসিতম্ ॥ ১৫ ॥
নাতঃ পরতরং স্থানং ক্বচিদস্তি ধরাতলে ।
প্রতিমাসং ভবেদ্দেবী যত্র সাক্ষাদ্রজস্বলা ॥ ১৬ ॥
তত্রত্যা দেবতাঃ সর্বাঃ পর্বতাত্মকতাং গতাঃ ।
পর্বতেষু বসন্ত্যেব মহত্যো দেবতা অপি ॥ ১৭ ॥
তত্রত্যা পৃথিবী সর্বা দেবীরূপা স্মৃতা বুধৈঃ ।
নাতঃ পরতরং স্থানং কামাখ্যায়োনিমণ্ডলাৎ ॥ ১৮ ॥
গায়ত্র্যাশ্চ পরং স্থানং শ্রীমৎপুষ্করমীরিতম্ ।
অমরেশে চণ্ডিকা স্যাৎপ্রভাসে পুষ্করেক্ষিণী ॥ ১৯ ॥
নৈমিষে তু মহাস্থানে দেবী সা লিঙ্গধারিণী ।
পুরুহূতা পুষ্করাক্ষে আষাঢৌ চ রতিস্তথা ॥ ২০ ॥
চণ্ডমুণ্ডী মহাস্থানে দণ্ডিনী পরমেশ্বরী ।
ভারভূতৌ ভবেদ্ভূতির্নাকুলে নকুলেশ্বরী ॥ ২১ ॥
চন্দ্রিকা তু হরিশ্চন্দ্রে শ্রীগিরৌ শাঙ্করী স্মৃতা ।
জপ্যেশ্বরে ত্রিশূলা স্যাৎসূক্ষ্মা চাম্রাতকেশ্বরে ॥ ২২ ॥
শাঙ্করী তু মহাকালে শর্বাণী মধ্যমাভিধে ।
কেদারাখ্যে মহাক্ষেত্রে দেবী সা মার্গদায়িনী ॥ ২৩ ॥
ভৈরবাখ্যে ভৈরবী সা গয়ায়াং মঙ্গলা স্মৃতা ।
স্থাণুপ্রিয়া কুরুক্ষেত্রে স্বায়ংভুব্যপি নাকুলে ॥ ২৪ ॥
কনখলে ভবেদুগ্রা বিশ্বেশা বিমলেশ্বরে ।
অট্টহাসে মহানন্দা মহেন্দ্রে তু মহান্তকা ॥ ২৫ ॥
ভীমে ভীমেশ্বরী প্রোক্তা রুদ্রাণী ৎবর্ধকোটিকে ॥ ২৬ ॥
অবিমুক্তে বিশালাক্ষী মহাভাগা মহালয়ে ।
গোকর্ণে ভদ্রকর্ণী স্যাদ্ভদ্রা স্যাদ্ভদ্রকর্ণকে ॥ ২৭ ॥
উৎপলাক্ষী সুবর্ণাক্ষে স্থাণ্বীশা স্থাণুসংজ্ঞকে ।
কমলালয়ে তু কমলা প্রচণ্ডা ছগলণ্ডকে ॥ ২৮ ॥
কুরণ্ডলে ত্রিসন্ধ্যা স্যান্মাকোটে মুকুটেশ্বরী ।
মণ্ডলেশে শাণ্ডকী স্যাৎকালী কালঞ্জরে পুনঃ ॥ ২৯ ॥
শঙ্কুকর্ণে ধ্বনিঃ প্রোক্তা স্থূলা স্যাৎস্থূলকেশ্বরে ।
জ্ঞানিনাং হৃদয়াংভোজে হৃল্লেখা পরমেশ্বরী ॥ ৩০ ॥
প্রোক্তানীমানি স্থানানি দেব্যাঃ প্রিয়তমানি চ ।
তত্তৎক্ষেত্রস্য মাহাত্ম্যং শ্রুৎবা পূর্বং নগোত্তম ॥ ৩১ ॥
তদুক্তেন বিধানেন পশ্চাদ্দেবীং প্রপূজয়েৎ ।
অথবা সর্বক্ষেত্রাণি কাশ্যাং সন্তি নগোত্তম ॥ ৩২ ॥
তত্র নিত্যং বসেন্নিত্যং দেবীভক্তিপরায়ণঃ ।
তানি স্থানানি সম্পশ্যঞ্জপন্দেবীং নিরন্তরম্ ॥ ৩৩ ॥
ধ্যায়ংস্তচ্চরণাংভোজং মুক্তো ভবতি বন্ধনাৎ ।
ইঅমানি দেবীনামানি প্রাতরুত্থায় যঃ পঠেৎ ॥ ৩৪ ॥
ভস্মীভবন্তি পাপানি তৎক্ষণান্নগ সৎবরম্ ।
শ্রাদ্ধকালে পঠেদেতান্যমলানি দ্বিজাগ্রতঃ ॥ ৩৫ ॥
মুক্তাস্তৎপিতরঃ সর্বে প্রয়ান্তি পরমাং গতিম্ ।
অধুনা কথয়িষ্যামি ব্রতানি তব সুব্রত ॥ ৩৬ ॥
নারীভিশ্চ নরৈশ্চৈব কর্তব্যানি প্রয়ত্নতঃ ।
ব্রতমনন্ততৃতীয়াখ্যং রসকল্যাণিনীব্রতম্ ॥ ৩৭ ॥
আর্দ্রানন্দকরং নাম্না তৃতীয়ায়াং ব্রতং চ যৎ ।
শুক্রবারবতং চৈব তথা কৃষ্ণচতুর্দশী ॥ ৩৮ ॥
ভৌমবারব্রতং চৈব প্রদোষব্রতমেব চ ।
যত্র দেবো মহাদেবো দেবীং সংস্থাপ্য বিষ্টরে ॥ ৩৯ ॥
নৃত্যং করোতি পুরতঃ সার্ধং দবৈর্নিশামুখে ।
তত্রোপোষ্য রজন্যাদৌ প্রদোষে পূজয়াচ্ছিবাম্ ॥ ৪০ ॥
প্রতিপক্ষং বিশেষেণ তদ্দেবীপ্রীতিকারকম্ ।
সোমবারব্রতং চৈব মমাতিপ্রিয়কৃন্নগ ॥ ৪১ ॥
তত্রাপি দেবীং সম্পূজ্য রাত্রৌ ভোজনমাচরেৎ ।
নবরাত্রদ্বয়ং চৈব ব্রতং প্রীতিকরং মম ॥ ৪২ ॥
এবমন্যান্যপি বিভো নিত্যনৈমিত্তিকানি চ ।
ব্রতানি কুরুতে যো বৈ মৎপ্রীত্যর্থং বিমৎসরঃ ॥ ৪৩ ॥
প্রাপ্নোতি মম সায়ুজ্যং স মে ভক্তঃ স মে প্রিয়ঃ ।
উৎসবানপি কুর্বীত দোলোৎসবমুখান্বিভো ॥ ৪৪ ॥
শয়নোৎসবং তথা কুর্যাত্তথা জাগরণোৎসবম্ ।
রথোৎসবং চ মে কুর্যাদ্দমনোৎসবমেব চ ॥ ৪৫ ॥
পবিত্রোৎসবমেবাপি শ্রাবণে প্রীতিকারকম্ ।
মম ভক্তঃ সদা কুর্যাদেবমন্যান্মহোৎসবান্ ॥ ৪৬ ॥
মদ্ভক্তান্ভোজয়েৎপ্রীত্যা তথা চৈব সুবাসিনীঃ ।
কুমারীবটুকাংশ্চাপি মদ্বুদ্ধ্যা তদ্গতান্তরঃ ॥ ৪৭ ॥
বিত্তশাঠ্যেন রহিতো যজেদেতান্সুমাদিভিঃ ।
য এবং কুরুতে ভক্ত্যা প্রতিবর্ষমতন্দ্রিতঃ ॥ ৪৮ ॥
স ধন্যঃ কৃতকৃত্যোঽসৌ মৎপ্রীতেঃ পাত্রমঞ্জসা ।
সর্বমুক্তং সমাসেন মম প্রীতিপ্রদায়কম্ ।
নাশিষ্যায় প্রদাতব্যং নাভক্তায় কদাচন ॥ ৪৯ ॥
॥ ইতি শ্রীদেবীভাগবতে দেবীগীতায়াং সপ্তমোঽধ্যায়ঃ ॥
॥ অথ অষ্টমোঽধ্যায়ঃ ॥
হিমালয় উবাচ –
দেবদেবি মহেশানি করুণাসাগরেঽম্বিকে ।
ব্রূহি পূজাবিধিং সম্যগ্যথাবদধুনা নিজম্ ॥ ১ ॥
শ্রীদেব্যুবাচ –
বক্ষ্যে পূজাবিধিং রাজন্নম্বিকায়া যথাপ্রিয়ম্ ।
অত্যন্তশ্রদ্ধয়া সার্ধং শৃণু পর্বতপুঙ্গব ॥ ২ ॥
দ্বিবিধা মম পূজা স্যাদ্বাহ্যা চাভ্যান্তরাপি চ ।
বাহ্যাপি দ্বিবিধা প্রোক্তা বৈদিকী তান্ত্রিকী তথা ॥ ৩ ॥
বৈদিক্যর্চাপি দ্বিবিধা মূর্তিভেদেন ভূধর ।
বৈদিকী বৈদিকৈঃ কার্যা বেদদীক্ষা সমন্বিতৈঃ ॥ ৪ ॥
তন্ত্রোক্তদীক্ষাবদ্ভিস্তু তান্ত্রিকী সংশ্রিতা ভবেৎ ।
ইত্থং পূজারহস্যং চ ন জ্ঞাৎবা বিপরীতকম্ ॥ ৫ ॥
করোতি যো নরো মূঢঃ স পতত্যেব সর্বথা ।
তত্র যা বৈদিকী প্রোক্তা প্রথমা তাং বদাম্যহম্ ॥ ৬ ॥
যন্মে সাক্ষাৎপরং রূপং দৃষ্টবানসি ভূধর ।
অনন্তশীর্ষনয়নমনন্তচরণং মহৎ ॥ ৭ ॥
সর্বশক্তিসমায়ুক্তং প্রেরকং যৎপরাৎপরম্ ।
তদেব পূজয়েন্নিত্যং নমেদ্ধ্যায়েৎস্মরেদপি ॥ ৮ ॥
ইত্যেতৎপ্রথমাচার্যাঃ স্বরূপং কথিতং নগ ।
শান্তঃ সমাহিতমনা দংভাহঙ্কারবর্জিতঃ ॥ ৯ ॥
তৎপরো ভব তদ্যাজী তদেব শরণং ব্রজ ।
তদেব চেতসা পশ্য জপ ধ্যায়স্ব সর্বদা ॥ ১০ ॥
অনন্যযা প্রেময়ুক্তভক্ত্যা মদ্ভাবমাশ্রিতঃ ।
যজ্ঞৈর্যজ তপোদানৈর্মামেব পরিতোষয় ॥ ১১ ॥
ইত্থং মমানুগ্রহতো মোক্ষ্যসে ভববন্ধনাৎ ।
মৎপরা যে মদাসক্তচিত্তা ভক্তপরা মতাঃ ॥ ১২ ॥
প্রতিজানে ভবাদস্মাদুদ্ধারাম্যচিরেণ তু ।
ধ্যানেন কর্ময়ুক্তেন ভক্তিজ্ঞানেন বা পুনঃ ॥ ১৩ ॥
প্রাপ্যাহং সর্বথা রাজন্ন তু কেবলকর্মভিঃ ।
ধর্মাৎসঞ্জায়তে ভক্তির্ভক্ত্যা সঞ্জায়তে পরম্ ॥ ১৪ ॥
শ্রুতিস্মৃতিভ্যামুদিতং যৎস ধর্মঃ প্রকীর্তিতঃ ।
অন্যশাস্ত্রেণ যঃ প্রোক্তো ধর্মাভাসঃ স উচ্যতে ॥ ১৫ ॥
সর্বজ্ঞাৎসর্বশক্তেশ্চ মত্তো বেদঃ সমুত্থিতঃ ।
অজ্ঞানস্য মমাভাবাদপ্রমাণা ন চ শ্রুতিঃ ॥ ১৬ ॥
স্মৃতয়শ্চ শ্রুতেরর্থং গৃহীৎবৈব চ নির্গতাঃ ।
মন্বাদীনাং স্মৃতীনাং চ ততঃ প্রামাণ্যমিষ্যতে ॥ ১৭ ॥
ক্বচিৎকদাচিত্তন্ত্রার্থকটাক্ষেণ পরোদিতম্ ।
ধর্মং বদন্তি সোংঽশস্তু নৈব গ্রাহ্যোঽস্তি বৈদিকৈঃ ॥ ১৮ ॥
অন্যেষাং শাস্ত্রকর্তৄণামজ্ঞানপ্রভবৎবতঃ ।
অজ্ঞানদোষদুষ্টৎবাত্তদুক্তের্ন প্রমাণতা ॥ ১৯ ॥
তস্মান্মুমুক্ষুর্ধর্মার্থং সর্বথা বেদমাশ্রয়েৎ ।
রাজাজ্ঞা চ যথা লোকে হন্যতে ন কদাচন ॥ ২০ ॥
সর্বেশায়া মমাজ্ঞা সা শ্রুতিস্ত্যাজ্যা কথং নৃভিঃ ।
মদাজ্ঞারক্ষণার্থং তু ব্রহ্মক্ষত্রিয়জাতয়ঃ ॥ ২১ ॥
ময়া সৃষ্টাস্ততো জ্ঞেয়ং রহস্যং মে শ্রুতের্বচঃ ।
যদা যদা হি ধর্মস্য গ্লানির্ভবতি ভূধর ॥ ২২ ॥
অভ্যুত্থানমধর্মস্য তদা বেষান্বিভর্ম্যহম্ ।
দেবদৈত্যবিভাগশ্চাপ্যত এবাভবন্নৃপ ॥ ২৩ ॥
যে ন কুর্বন্তি তদ্ধর্মং তচ্ছিক্ষার্থং ময়া সদা ।
সম্পাদিতাস্তু নরকাস্রাসো যচ্ছ্রবণাদ্ভবেৎ ॥ ২৪ ॥
যো বেদধর্মমুজ্ঝিত্য ধর্মমন্যং সমাশ্রয়েৎ ।
রাজা প্রবাসয়েদ্দেশান্নিজাদেতানধর্মিণঃ ॥ ২৫ ॥
ব্রাহ্মণৈর্ন চ সংভাষ্যাঃ পঙ্ক্তিগ্রাহ্যা ন চ দ্বিজৈঃ ।
অন্যানি যানি শাস্ত্রাণি লোকেঽস্মিন্বিবিধানি চ ॥ ২৬ ॥
শ্রুতিস্মৃতিবিরুদ্ধানি তামসান্যেব সর্বশঃ ।
বামং কাপালকং চৈব কৌলকং ভৈরবাগমঃ ॥ ২৭ ॥
শিবেন মোহনার্থায় প্রণীতো নান্যহেতুকঃ ।
যক্ষশাপাদ্ ভৃগোঃ শাপাদ্দধীচস্য চ শাপতঃ ॥ ২৮ ॥
দগ্ধা যে ব্রাহ্মণবরা বেদমার্গবহিষ্কৃতাঃ ।
তেষামুদ্ধরণার্থায় সোপানক্রমতঃ সদা ॥ ২৯ ॥
শৈবাশ্চ বৈষ্ণবাশ্চৈব সৌরাঃ শাক্তাস্তথৈব চ ।
গাণপত্যা আগমাশ্চ প্রণীতাঃ শঙ্করেণ তু ॥ ৩০ ॥
তত্র বেদাবিরুদ্ধোংঽশোঽপ্যুক্ত এব ক্বচিৎক্বচিৎ ।
বৈদিকস্তদ্গ্রহে দোষো ন ভবত্যেব কর্হিচিৎ ॥ ৩১ ॥
সর্বথা বেদভিন্নার্থে নাধিকারী দ্বিজো ভবেৎ ।
বেদাধিকারহীনস্তু ভবেত্তত্রাধিকারবান্ ॥ ৩২ ॥
তস্মাৎসর্বপ্রয়ত্নেন বৈদিকো বেদমাশ্রয়েৎ ।
ধর্মেণ সহিতং জ্ঞানং পরং ব্রহ্ম প্রকাশয়েৎ ॥ ৩৩ ॥
সর্বৈষণাঃ পরিত্যজ্য মামেব শরণং গতাঃ ।
সর্বভূতদয়াবন্তো মানাহঙ্কারবর্জিতাঃ ॥ ৩৪ ॥
মচ্চিত্তা মদ্গতপ্রাণা মৎস্থানকথনে রতাঃ ।
সংন্যাসিনো বনস্থাশ্চ গৃহস্থা ব্রহ্মচারিণঃ ॥ ৩৫ ॥
উপাসন্তে সদা ভক্ত্যা যোগমৈশ্বরসংজ্ঞিতম্ ।
তেষাং নিত্যাভিয়ুক্তানামহমজ্ঞানজং তমঃ ॥ ৩৬ ॥
জ্ঞানসূর্যপ্রকাশেন নাশয়ামি ন সংশয়ঃ ।
ইত্থং বৈদিকপূজায়াঃ প্রথমায়া নগাধিপ ॥ ৩৭ ॥
স্বরূপমুক্তং সঙ্ক্ষেপাদ্দ্বিতীয়ায়া অথো ব্রুবে ।
মূর্তৌ বা স্থণ্ডিলে বাপি তথা সূর্যেন্দুমণ্ডলে ॥ ৩৮ ॥
জলেঽথবা বাণলিঙ্গে যন্ত্রে বাপি মহাপটে ।
তথা শ্রীহৃদয়াংভোজে ধ্যাৎবা দেবীং পরাৎপরাম্ ॥ ৩৯ ॥
সগুণাং করুণাপূর্ণাং তরুণীমরুণারুণাম্ ।
সৌন্দর্যসারসীমান্তাং সর্বাবয়বসুন্দরাম্ ॥ ৪০ ॥
শৃঙ্গাররসসম্পূর্ণাং সদা ভক্তার্তিকাতরাম্ ।
প্রসাদসুমুখীমম্বাং চন্দ্রখণ্ডাশিখণ্ডিনীম্ ॥ ৪১ ॥
পাশাঙ্কুশবরাভীতিধরামানন্দরূপিণীম্ ।
পূজয়েদুপচারৈশ্চ যথাবিত্তানুসারতঃ ॥ ৪২ ॥
যাবদান্তরপূজায়ামধিকারো ভবেন্ন হি ।
তাবদ্বাহ্যামিমাং পূজাং শ্রয়েজ্জাতে তু তাং ত্যজেৎ ॥ ৪৩ ॥
আভ্যন্তরা তু যা পূজা সা তু সংবিল্লয়ঃ স্মৃতঃ ।
সংবিদেবপরং রূপমুপাধিরহিতং মম ॥ ৪৪ ॥
অতঃ সংবিদি মদ্রূপে চেতঃ স্থাপ্যং নিরাশ্রয়ম্ ।
সংবিদ্রূপাতিরিক্তং তু মিথ্যা মায়াময়ং জগৎ ॥ ৪৫ ॥
অতঃ সংসারনাশায় সাক্ষিণীমাত্মরূপিণীম্ ।
ভাবয়ন্নির্মনস্কেন যোগয়ুক্তেন চেতসা ॥ ৪৬ ॥
অতঃপরং বাহ্যপূজাবিস্তারঃ কথ্যতে ময়া ।
সাবধানেন মনসা শৃণু পর্বতসত্তম ॥ ৪৭ ॥
॥ ইতি শ্রীদেবীভাগবতে দেবীগীতায়াং অষ্টমোঽধ্যায়ঃ ॥
॥ অথ নবমোঽধ্যায়ঃ ॥
শ্রীদেব্যুবাচ –
প্রাতরুত্থায় শিরসি সংস্মরেৎপদ্মমুজ্জ্বলম্ ।
কর্পূরাভং স্মরেত্তত্র শ্রীগুরুং নিজরূপিণম্ ॥ ১ ॥
সুপ্রসন্নং লসদ্ভূষাভূষিতং শক্তিসংয়ুতম্ ।
নমস্কৃত্য ততো দেবীং কুণ্ডলীং সংস্মরেদ্বুধঃ ॥ ২ ॥
প্রকাশমানাং প্রথমে প্রয়াণে
প্রতিপ্রয়াণেঽপ্যমৃতায়মানাম্ ।
অন্তঃপদব্যামনুসঞ্চরন্তী-
মানন্দরূপামবলাং প্রপদ্যে ॥ ৩ ॥
ধ্যাৎবৈবং তচ্ছিখামধ্যে সচ্চিদানন্দরূপিণীম্ ।
মাং ধ্যায়েদথ শৌচাদিক্রিয়াঃ সর্বাঃ সমাপয়েৎ ॥ ৪ ॥
অগ্নিহোত্রং ততো হুৎবা মৎপ্রীত্যর্থং দ্বিজোত্তমঃ ।
হোমান্তে স্বাসনে স্থিৎবা পূজাসঙ্কল্পমাচরেৎ ॥ ৫ ॥
ভূতশুদ্ধিং পুরা কৃৎবা মাতৃকান্যাসমেব চ ।
হৃল্লেখামাতৃকান্যাসং নিত্যমেব সমাচরেৎ ॥ ৬ ॥
মূলাধারে হকারং চ হৃদয়ে চ রকারকম্ ।
ভ্রূমধ্যে তদ্বদীকারং হ্রীঙ্কারং মস্তকে ন্যসেৎ ॥ ৭ ॥
তত্তন্মন্ত্রোদিতানন্যান্ন্যাসান্সর্বান্সমাচরেৎ ।
কল্পয়েৎস্বাত্মনো দেহে পীঠং ধর্মাদিভিঃ পুনঃ ॥ ৮ ॥
ততো ধ্যায়েন্মহাদেবীং প্রাণায়ামৈর্বিজৃম্ভিতে ।
হৃদম্ভোজে মম স্থানে পঞ্চপ্রেতাসনে বুধঃ ॥ ৯ ॥
ব্রহ্মা বিষ্ণুশ্চ রুদ্রশ্চ ঈশ্বরশ্চ সদাশিবঃ ।
এতে পঞ্চ মহাপ্রেতাঃ পাদমূলে মম স্থিতাঃ ॥ ১০ ॥
পঞ্চভূতাত্মকা হ্যেতে পঞ্চাবস্থাত্মকা অপি ।
অহং ৎবব্যক্তচিদ্রূপা তদতীতাঽস্মি সর্বথা ॥ ১১ ॥
ততো বিষ্টরতাং যাতাঃ শক্তিতন্ত্রেষু সর্বদা ।
ধ্যাৎবৈবং মানসৈর্ভোগৈঃ পূজয়েন্মাং জপেদপি ॥ ১২ ॥
জপং সমর্প্য শ্রীদেব্যৈ ততোঽর্ঘ্যস্থাপনং চরেৎ ।
পাত্রাসাদনকং কৃৎবা পূজাদ্রব্যাণি শোধয়েৎ ॥ ১৩ ॥
জলেন তেন মনুনা চাস্ত্রমন্ত্রেণ দেশিকঃ ।
দিগ্বন্ধং চ পুরা কৃৎবা গুরূন্নৎবা ততঃ পরম্ ॥ ১৪ ॥
তদনুজ্ঞাং সমাদায় বাহ্যপীঠে ততঃ পরম্ ।
হৃদিস্থাং ভাবিতাং মূর্তিং মম দিব্যাং মনোহরাম্ ॥ ১৫ ॥
আবাহয়েত্ততঃ পীঠে প্রাণস্থাপনবিদ্যযা ।
আসনাবাহনে চার্ঘ্যং পাদ্যাদ্যাচমনং তথা ॥ ১৬ ॥
স্নানং বাসোদ্বয়ং চৈব ভূষণানি চ সর্বশঃ ।
গন্ধপুষ্পং যথায়োগ্যং দত্ত্বা দেব্যৈ স্বভক্তিতঃ ॥ ১৭ ॥
যন্ত্রস্থানামাবৃতীনাং পূজনং সম্যগাচরেৎ ।
প্রতিবারমশক্তানাং শুক্রবারো নিয়ম্যতে ॥ ১৮ ॥
মূলদেবীপ্রভারূপাঃ স্মর্তব্যা অঙ্গদেবতাঃ ।
তৎপ্রভাপটলব্যাপ্তং ত্রৈলোক্যং চ বিচিন্তয়েৎ ॥ ১৯ ॥
পুনরাবৃত্তিসহিতাং মূলদেবীং চ পূজয়েৎ ।
গন্ধাদিভিঃ সুগন্ধৈস্তু তথা পুষ্পৈঃ সুবাসিতৈঃ ॥ ২০ ॥
নৈবেদ্যৈস্তর্পণৈশ্চৈব তাংবূলৈর্দক্ষিণাদিভিঃ ।
তোষয়েন্মাং ৎবৎকৃতেন নাম্নাং সাহস্রকেণ চ ॥ ২১ ॥
কবচেন চ সূক্তেনাহং রুদ্রেভিরিতি প্রভো ।
দেব্যথর্বশিরোমন্ত্রৈর্হৃল্লেখোপনিষদ্ভবৈঃ ॥ ২২ ॥
মহাবিদ্যামহামন্ত্রৈস্তোষয়েন্মাং মুহুর্মুহুঃ ।
ক্ষমাপয়েজ্জগদ্ধাত্রীং প্রেমার্দ্রহৃদয়ো নরঃ ॥ ২৩ ॥
পুলকাঙ্কিতসর্বাঙ্গৈর্বাল্যরুদ্ধাক্ষিনিঃস্বনঃ ।
নৃত্যগীতাদিঘোষেণ তোষয়েন্মাং মুহুর্মুহুঃ ॥ ২৪ ॥
বেদপারায়ণৈশ্চৈব পুরাণৈঃ সকলৈরপি ।
প্রতিপাদ্যা যতোঽহং বৈ তস্মাত্তৈস্তোষয়েত্তু মাম্ ॥ ২৫ ॥
নিজ সর্বস্বমপি মে সদেহং নিত্যশোঽর্পয়েৎ ।
নিত্যহোমং ততঃ কুর্যাদ্ব্রাহ্মণাংশ্চ সুবাসিনীঃ ॥ ২৬ ॥
বটুকান্পামরাননন্যান্দেবীবুদ্ধ্যা তু ভোজয়েৎ ।
নৎবা পুনঃ স্বহৃদয়ে ব্যুৎক্রমেণ বিসর্জয়েৎ ॥ ২৭ ॥
সর্বং হৃল্লেখয়া কুর্যাৎপূজনং মম সুব্রত ।
হৃল্লেখা সর্বমন্ত্রাণাং নায়িকা পরমা স্মৃতা ॥ ২৮ ॥
হৃল্লেখাদর্পণে নিত্যমহং তু প্রতিবিম্বিতা ।
তস্মাধৃল্লেখয়া দত্তং সর্বমন্ত্রৈঃ সমর্পিতম্ ॥ ২৯ ॥
গুরুং সম্পূজ্য ভৃষাদ্যৈঃ কৃতকৃত্যৎবমাবহেৎ ।
য এবং পূজয়েদ্দেবীং শ্রীমদ্ভুবনসুন্দরীম্ ॥ ৩০ ॥
ন তস্য দুর্লভং কিঞ্চিৎকদাব্হিৎক্বচিদস্তি হি ।
দেহান্তে তু মণিদ্বীপং মাম যাত্যেব সর্বথা ॥ ৩১ ॥
জ্ঞেয়ো দেবীস্বরূপোঽসৌ দেবা নিত্যং নমন্তি তম্ ।
ইতি তে কথিতং রাজন্মহাদেব্যাঃ প্রপূজনম্ ॥ ৩২ ॥
বিমৃশ্যৈতদশেষেণাপ্যধিকারানুরূপতঃ ।
কুরু মে পূজনং তেন কৃতার্থস্ত্বং ভবিষ্যসি ॥ ৩৩ ॥
ইদং তু গীতাশাস্ত্রং মে নাশিষ্যায় বদেৎক্বচিৎ ।
নাভক্তায় প্রদাতব্যং ন ধূর্তায় চ দুর্হৃদে ॥ ৩৪ ॥
এতৎপ্রকাশনং মাতুরুদ্ধাটনমুরোজয়োঃ ।
তস্মাদবশ্যং যত্নেন গোপনীয়মিদং সদা ॥ ৩৫ ॥
দেয়ং ভক্তায় শিষ্যায় জ্যেষ্ঠপুত্রায় চৈব হি ।
সুশীলায় সুবেষায় দেবীভক্তিয়ুতায় চ ॥ ৩৬ ॥
শ্রাদ্ধকালে পঠেদেতদ্ ব্রাহ্মণানাং সমীপতঃ ।
তৃপ্তাস্তৎপিতরঃ সর্বে প্রয়ান্তি পরমং পদম্ ॥ ৩৭ ॥
ব্যাস উবাচ –
ইত্যুক্ত্বা সা ভগবতী তত্রৈবান্তরধীয়ত ।
দেবাশ্চ মুদিতাঃ সর্বে দেবীদর্শনতোঽভবন্ ॥ ৩৮ ॥
ততা হিমালয়ে জজ্ঞে দেবী হৈমবতী তু সা ।
যা গৌরীতি প্রসিদ্ধাসীদ্দত্তা সা শঙ্করায় চ ॥ ৩৯ ॥
ততঃ স্কন্দঃ সমুদ্ভূতস্তারকস্তেন পাতিতঃ ।
সমুদ্রমন্থনে পূর্বং রত্নান্যাসুর্নরাধিপ ॥ ৪০ ॥
তত্র দেবৈস্তুতা দেবী লক্ষ্মীপ্রাপ্ত্যর্থমাদরাৎ ।
তেষামনুগ্রহার্থায় নির্গতা তু রমা ততঃ ॥ ৪১ ॥
বৈকুণ্ঠায় সুরৈর্দত্তা তেন তস্য শমাভবৎ ।
ইতি তে কথিতং রাজন্দেবীমাহাত্ম্যমুত্তমম্ ॥ ৪২ ॥
গৌরীলক্ষ্ম্যোঃ সমুদ্ভূতিবিষয়ং সর্বকামদম্ ।
ন বাচ্যং ৎবেতদন্যস্মৈ রহস্যং কথিতং যতঃ ॥ ৪৩ ॥
গীতা রহস্যভূতেয়ং গোপনীয়া প্রয়ত্নতঃ ।
সর্বমুক্তং সমাসেন যৎপৃষ্টং তৎবয়ানঘ ।
পবিত্রং পাবনং দিব্যং কিং ভূয়ঃ শ্রোতুমিচ্ছসি ॥ ৪৪ ॥
॥ ইতি শ্রীদেবীভাগবতে দেবীগীতায়াং নবমোঽধ্যায়ঃ ॥
॥ ইতি শ্রীমদ্দেবীগীতা সমাপ্তা ॥
– Chant Stotra in Other Languages –
Devi Gita in Sanskrit – English – Bengali – Gujarati – Kannada – Malayalam – Odia – Telugu – Tamil