Gayatri Atharvashirsha in Bengali

॥ Gayatri Atharvashirsha Bengali Lyrics ॥

॥ গায়ত্র্যথর্বশীর্ষম্ ॥

শ্রীগণেশায় নমঃ ॥

নমস্কৃত্য ভগবান্ যাজ্ঞবল্ক্যঃ স্বয়ং পরিপৃচ্ছতি
ৎবং ব্রূহি ভগবন্ গায়ত্র্যা উৎপত্তিং শ্রোতুমিচ্ছামি ॥ ১ ॥

ব্রহ্মোবাচ ।
প্রণবেন ব্যাহৃতয়ঃ প্রবর্তন্তে তমসস্তু পরং জ্যোতিষ্কঃ পুরুষঃ স্বয়ম্ ।
ভূর্বিষ্ণুরিতি হ তাঃ সাঙ্গুল্যা মথেৎ ॥ ২ ॥

মথ্যমানাৎফেনো ভবতি ফেনাদ্বুদ্বুদো ভবতি বুদ্বুদাদণ্ডং ভবতি
অণ্ডবানাত্মা ভবতি আত্মন আকাশো ভবতি আকাশাদ্বায়ুর্ভবতি
বায়োরগ্নির্ভবতি অগ্নেরোঙ্কারো ভবতি ওঙ্কারাদ্ব্যাহৃতির্ভবতি
ব্যাহৃত্যা গায়ত্রী ভবতি গায়ত্র্যাঃ সাবিত্রী ভবতি সাবিত্র্যাঃ
সরস্বতী ভবতি সরস্বত্যা বেদা ভবন্তি বেদেভ্যো ব্রহ্মা ভবতি
ব্রহ্মণো লোকা ভবন্তি তস্মাল্লোকাঃ প্রবর্তন্তে চৎবারো বেদাঃ সাঙ্গাঃ
সোপনিষদঃ সেতিহাসাস্তে সর্বে গায়ত্র্যাঃ প্রবর্তন্তে যথাঽগ্নির্দেবানাং
ব্রাহ্মণো মনুষ্যাণাং মেরুঃ শিখরিণাং গঙ্গা নদীনাং বসন্ত ঋতূনাং
ব্রহ্মা প্রজাপতীনামেবাসৌ মুখ্যো গায়ত্র্যা গায়ত্রী ছন্দো ভবতি ॥ ৩ ॥

কিং ভূঃ কিং ভুবঃ কিং স্বঃ কিং মহঃ কিং জনঃ কিং তপঃ কিং সত্যং
কিং তৎ কিং সবিতুঃ কিং বরেণ্যং কিং ভর্গঃ কিং দেবস্য কিং ধীমহি
কিং ধিয়ঃ কিং যঃ কিং নঃ কিং প্রচোদয়াৎ ॥ ৪ ॥

ভূরিতি ভূর্লোকঃ ভুব ইত্যন্তরিক্ষলোকঃ ।
স্বরিতি স্বর্লোকো মহ ইতি মহর্লোকো জন ইতি জনো লোকস্তপ
ইতি তপোলোকঃ সত্যমিতি সত্যলোকঃ ।
ভূর্ভুবঃস্বরোমিতি ত্রৈলোক্যম্ ॥ ৫ ॥

তদসৌ তেজো যত্তেজসোঽগ্নির্দেবতা সবিতুরিত্যাদিত্যস্য বরেণ্যমিত্যন্নম্ ।
অন্নমেব প্রজাপতির্ভর্গ ইত্যাপঃ ।
আপো বৈ ভর্গ এতাবৎসর্বা দেবতা দেবস্যেন্দ্রো বৈ দেবয়দ্দিবং
তদিন্দ্রস্তস্মাৎসর্বকৃৎ পুরুষো নাম বিষ্ণুঃ ॥ ৬ ॥

ধীমহি কিমধ্যাত্মং তৎপরমং পদমিত্যধ্যাত্মং যো ন ইতি পৃথিবী বৈ
যো নঃ প্রচোদয়াৎ কাম ইমাঁল্লোকান্ প্রচ্যাবয়ন্ যো নৃশংস্যোঽস্তো-
ষ্যস্তৎপরমো ধর্ম ইত্যেষা গায়ত্রী কিঙ্গোত্রা কত্যক্ষরা কতিপদা
কতিকুক্ষিঃ কতিশীর্ষা চ ॥ ৭ ॥

সাঙ্খ্যায়নসগোত্রা গায়ত্রী চতুর্বিংশত্যক্ষরা ত্রিপদা
ষট্কুক্ষিঃ সাবিত্রী কশাস্ত্রয়ঃ পাদা ভবন্তি ॥ ৮ ॥

কাঽস্যাঃ কুক্ষিঃ কানি পঞ্চ শীর্ষাণি ।
ঋগ্বেদোঽস্যাঃ প্রথমঃ পাদো ভবতি যজুর্বেদো দ্বিতীয়ঃ
সামবেদস্তৃতীয়ঃ পূর্বা দিক্ প্রথমা কুক্ষির্ভবতি দক্ষিণা দ্বিতীয়া
পশ্চিমা তৃতীয়া উদীচী চতুর্থা ঊর্ধ্বা পঞ্চমী অধরা ষষ্ঠী
কুক্ষিঃ । ব্যাকরণমস্যাঃ প্রথমং শীর্ষং ভবতি শিক্ষা দ্বিতীয়ং
কল্পস্তৃতীয়ং নিরুক্তঃ জ্যোতিষাময়নং পঞ্চমম্ ॥ ৯ ॥

কিং লক্ষণং কিমু চেষ্টিতং কিমুদাহৃতং কিমক্ষরং দৈবত্যম্ ॥ ১০ ॥

লক্ষণং মীমাংসা অথর্ববেদো বিচেষ্টিতম্ ।
ছন্দোবিধিরিত্যুদাহৃতম্ ॥ ১১ ॥

কো বর্ণঃ কঃ স্বরঃ ।
শ্বেতো বর্ণঃ ষট্ স্বরাণি ইমান্যক্ষরাণি দৈবতানি ভবন্তি
পূর্বা ভবতি গায়ত্রী মধ্যমা সাবিত্রী পশ্চিমা সন্ধ্যা সরস্বতী ॥ ১২ ॥

প্রাতঃ সন্ধ্যা রক্তা রক্তপদ্মাসনস্থা রক্তাম্বরধরা
রক্তবর্ণা রক্তগন্ধানুলেপনা চতুর্মুখা অষ্টভুজা দ্বিনেত্রা
দণ্ডাক্ষমালাকমণ্ডলুস্রুক্স্রুবধারিণী সর্বাভরণভূষিতা কৌমারী
ব্রাহ্মী হংসবাহিনী ঋগ্বেদসংহিতা ব্রহ্মদৈবত্যা ত্রিপদা গায়ত্রী
ষট্ক্রুক্ষিঃ পঞ্চশীর্ষা অগ্নিমুখা রুদ্রশিববিষ্ণুহৃদয়া
ব্রহ্মকবচা সাঙ্খ্যায়নসগোত্রা ভূর্লোকব্যাপিনী অগ্নিস্তত্ত্বং
উদাত্তানুদাত্তস্বরিতস্বরমকার আত্মজ্ঞানে বিনিয়োগঃ ।
ইত্যেষা গায়ত্রী ॥ ১৩ ॥

মধ্যাহ্নসন্ধ্যা শ্বেতা শ্বেতপদ্মাসনস্থা শ্বেতাম্বরধরা
শ্বেতগন্ধানুলেপনা পঞ্চমুখী দশভুজা ত্রিনেত্রা শূলাক্ষমালা
কমণ্ডলুকপালধারিণী সর্বাভরণভূষিতা সাবিত্রী যুবতী মাহেশ্বরী
বৃষভবাহিনী যজুর্বেদসংহিতা রুদ্রদৈবত্যা ত্রিপদা সাবিত্রী ষট্কুক্ষিঃ
পঞ্চশীর্ষা অগ্নিমুখা রুদ্রশিখা ব্রহ্মকবচা ভারদ্বাজসগোত্রা
ভুবর্লোকব্যাপিনী বায়ুস্তত্ত্বং উদাত্তানুদাত্তস্বরিতস্বরমকারঃ
শ্বেতবর্ণ আত্মজ্ঞানে বিনিয়োগঃ । ইত্যেষা সাবিত্রী ॥ ১৪ ॥

সায়ংসন্ধ্যা কৃষ্ণা কৃষ্ণপদ্মাসনস্থা কৃষ্ণাম্বরধরা
কৃষ্ণবর্ণা কৃষ্ণগন্ধানুলেপনা কৃষ্ণমাল্যাম্বরধরা
একমুখী চতুর্ভুজা দ্বিনেত্রা শঙ্খচক্রগদাপদ্মধারিণী
সর্বাভরণভূষিতা সরস্বতী বৃদ্ধা বৈষ্ণবী গরুডবাহিনী
সামবেদসংহিতা বিষ্ণুদৈবত্যা ত্রিপদা ষট্কুক্ষিঃ পঞ্চশীর্ষা
অগ্নিমুখা বিষ্ণুহৃদয়া রুদ্রশিখা ব্রহ্মকবচা কাশ্যপসগোত্রা
স্বর্লোকব্যাপিনী সূর্যস্তত্ত্বমুদাত্তানুদাত্তস্বরিতমকারঃ কৃষ্ণবর্ণো
মোক্ষজ্ঞানে বিনিয়োগঃ । ইত্যেষা সরস্বতী ॥ ১৫ ॥

রক্তা গায়ত্রী শ্বেতা সাবিত্রী কৃষ্ণবর্ণা সরস্বতী ।
প্রণবো নিত্যযুক্তশ্চ ব্যাহৃতীষু চ সপ্তসু ॥ ১৬ ॥

সর্বেষামেব পাপানাং সঙ্করে সমুপস্থিতে ।
দশ শতং সমভ্যর্চ্য গায়ত্রী পাবনী মহৎ ॥ ১৭ ॥

প্রহ্রাদোঽত্রির্বসিষ্ঠশ্চ শুকঃ কণ্বঃ পরাশরঃ ।
বিশ্বামিত্রো মহাতেজাঃ কপিলঃ শৌনকো মহান্ ॥ ১৮ ॥

যাজ্ঞবল্ক্যো ভরদ্বাজো জমদগ্নিস্তপোনিধিঃ ।
গৌতমো মুদ্গলঃ শ্রেষ্ঠো বেদব্যাসশ্চ লোমশঃ ॥ ১৯ ॥

অগস্ত্যঃ কৌশিকো বৎসঃ পুলস্ত্যো মাণ্ডুকস্তথা ।
দুর্বাসাস্তপসা শ্রেষ্ঠো নারদঃ কশ্যপস্তথা ॥ ২০ ॥

উক্তাত্যুক্তা তথা মধ্যা প্রতিষ্ঠান্যাসু পূর্বিকা ।
গায়ত্র্যুষ্ণিগনুষ্টুপ্ চ বৃহতী পঙ্ক্তিরেব চ ॥ ২১ ॥

ত্রিষ্টুপ্ চ জগতী চৈব তথাতিজগতী মতা ।
শক্বরী সাতিপূর্বা যাদষ্ট্যত্যষ্টী তথৈব চ ।
ধৃতিশ্চাতিধৃতিশ্চৈব প্রকৃতিঃ কৃতিরাকৃতিঃ ॥ ২২ ॥

বিকৃতিঃ সঙ্কৃতিশ্চৈব তথাতিকৃতিরুৎকৃতিঃ ।
ইত্যেতাশ্ছন্দসাং সংজ্ঞাঃ ক্রমশো বচ্মি সাম্প্রতম্ ॥ ২৩ ॥

ভূরিতি ছেন্দো ভুব ইতি ছন্দঃ স্বরিতি ছন্দো
ভূর্ভুবঃস্বরোমিতি দেবী গায়ত্রী ইত্যেতানি ছন্দাংসি প্রথমমাগ্নেয়ং
দ্বিতীয়ং প্রাজাপত্যং তৃতীয়ং সৌম্যং চতুর্থমৈশানং
পঞ্চমমাদিত্যং ষষ্ঠং বার্হস্পত্যং সপ্তমং পিতৃদৈবত্যমষ্টমং
ভগদৈবত্যং নবমমার্যমং দশমং সাবিত্রমেকাদশং ৎবাষ্ট্রং
দ্বাদশং পৌষ্ণং ত্রয়োদশমৈন্দ্রাগ্নং চতুর্দশং বায়ব্যং পঞ্চদশং
বামদৈবত্যং ষোডশং মৈত্রাবরুণং সপ্তদশমাঙ্গিরসমষ্টাদশং
বৈশ্বদেব্যমেকোনবিংশং বৈষ্ণবং বিংশং বাসবমেকবিংশং রৌদ্রং
দ্বাবিংশমাশ্বিনং ত্রয়োবিংশং ব্রাহ্মং চতুর্বিশং সাবিত্রম্ ॥ ২৪ ॥

দীর্ঘান্স্বরেণ সংয়ুক্তান্ বিন্দুনাদসমন্বিতান্ ।
ব্যাপকান্বিন্যসেৎপশ্চাদ্দশপঙ্ক্ত্যক্ষরাণি চ ।
দ্রবুপুংস ইতি প্রত্যক্ষবীজানি ।
প্রহ্লাদিনী প্রভা সত্যা বিশ্বা ভদ্রা বিলাসিনী ।
প্রভাবতী জয়া কান্তা শান্তা পদ্মা সরস্বতী ॥ ২৫ ॥

বিদ্রুমস্ফটিকাকারং পদ্মরাগসমপ্রভম্ ।
ইন্দ্রনীলমণিপ্রখ্যং মৌক্তিকং কুঙ্কুমপ্রভম্ ॥ ২৬ ॥

অঞ্জনাভং চ গাঙ্গেয়ং বৈডূর্যং চন্দ্রসন্নিভম্ ।
হারিদ্রং কৃষ্ণদুগ্ধাভং রবিকান্তিসমং ভবম্ ॥ ২৭ ॥

শুকপিচ্ছসমাকারং ক্রমেণ পরিকল্পয়েৎ ।
পৃথিব্যাপস্তথা তেজো বায়ুরাকাশ এব চ ॥ ২৮ ॥

গন্ধো রসশ্চ রূপং চ শব্দঃ স্পর্শস্তথৈব চ ॥ ২৯ ॥

ঘ্রাণং জিহ্বা চ চক্ষুশ্চ ৎবক্ শ্রোত্রং চ তথাপরম্ ।
উপস্থপায়ুপাদাদি পাণির্বাগপি চ ক্রমাৎ ॥ ৩০ ॥

মনো বুদ্ধিরহঙ্কারমব্যক্তং চ যথাক্রমম্ ।
সুমুখং সম্পুটং চৈব বিততং বিস্তৃতং তথা ।
একমুখং চ দ্বিমুখং ত্রিমুখং চ চতুর্মুখম্ ॥ ৩১ ॥

পঞ্চমুখং ষণ্মুখং চাধোমুখং চৈব ব্যাপকম্ ।
অঞ্জলীকং ততঃ প্রোক্তং মুদ্রিতং তু ত্রয়োদশম্ ॥ ৩২ ॥

শকটং যমপাশং চ গ্রথিতং সম্মুখোন্মুখম্ ।
প্রলম্বং মুষ্টিকং চৈব মৎস্যঃ কূর্মো বরাহকম্ ॥ ৩৩ ॥

সিংহাক্রান্তং মহাক্রান্তং মুদ্গরং পল্লবং তথা ।
এতা মুদ্রাশ্চতুর্বিশদ্গায়ত্র্যাঃ সুপ্রতিষ্ঠিতাঃ ॥ ৩৪ ॥

ওঁ মূর্ঘ্নি সঙ্ঘাতে ব্রহ্মা বিষ্ণুর্ললাটে রুদ্রো ভ্রূমধ্যে
চক্ষুশ্চন্দ্রাদিত্যৌ কর্ণয়োঃ শুক্রবৃহস্পতী নাসিকে বায়ুদৈবত্যং
প্রভাতং দোষা উভে সন্ধ্যে মুখমগ্নির্জিহ্বা সরস্বতী গ্রীবা স্বাধ্যায়াঃ
স্তনয়োর্বসবো বাহ্বোর্মরুতঃ হৃদয়ং পর্জন্যমাকাশমপরং
নাভিরন্তরিক্ষং কটিরিন্দ্রিয়াণি জঘনং প্রাজাপত্যং কৈলাসমলয়ৌ
ঊরূ বিশ্বেদেবা জানুভ্যাং জান্বোঃ কুশিকৌ জঙ্ঘয়োরয়নদ্বয়ং সুরাঃ
পিতরঃ পাদৌ পৃথিবী বনস্পতির্গুল্ফৌ রোমাণি মুহূর্তাস্তে বিগ্রহাঃ
কেতুমাসা ঋতবঃ সন্ধ্যাকালত্রয়মাচ্ছাদনং সংবৎসরো নিমিষঃ
অহোরাত্রাবাদিত্যচন্দ্রমসৌ সহস্রপরমাং দেবীং শতমধ্যাং
দশাপরাম্ । সহস্রনেত্রীং দেবীং গায়ত্রীং শরণমহং প্রপদ্যে ॥ ৩৫ ॥

তৎসবিতুর্বরদায় নমঃ তৎপ্রাতরাদিত্যায় নমঃ ।
সায়মধীয়ানো রাত্রিকৃতং পাপং নাশয়তি ॥ ৩৬ ॥

প্রাতরধীয়ানো রাত্রিকৃতং পাপং নাশয়তি ।
তৎসায়ম্প্রাতঃ প্রয়ুঞ্জানোঽপাপো ভবতি ।
য ইদং গায়ত্র্যথর্বশীর্ষং ব্রাহ্মণঃ প্রয়তঃ পঠেৎ ।
চৎবারো বেদা অধীতা ভবন্তি ।
সর্বেষু তীর্থেষু স্নাতো ভবতি সর্বৈদেবৈর্জ্ঞাতো ভবতি ।
সর্বপ্রত্যূহাৎপূতো ভবতি ॥ ৩৭ ॥

অপেয়পানাৎপূতো ভবতি ॥ ৩৮ ॥

অভক্ষ্যভক্ষণাৎপূতো ভবতি ।
অলেহ্যলেহনাৎপূতো ভবতি ।
অচোষ্যচোষণাৎপূতো ভবতি ।
সুরাপানাৎপূতো ভবতি ॥ ৩৯ ॥

সুবর্ণস্তেয়াৎপূতো ভবতি ।
পঙ্ক্তিভেদনাৎপূতো ভবতি ।
পতিতসম্ভাষণাৎপূতো ভবতি ।
অনৃতবচনাৎপূতো ভবতি ।
গুরুতল্পগমনাৎপূতো ভবতি ।
অগম্যাগমনাৎপূতো ভবতি ।
বৃষলীগমনাৎপূতো ভবতি ॥ ৪০ ॥

ব্রহ্মহত্যায়াঃ পূতো ভবতি ।
ভ্রূণহত্যায়াঃ পূতো ভবতি ।
বীরহত্যায়াঃ পূতো ভবতি ।
অব্রহ্মচারী সুব্রহ্মচারী ভবতি ॥ ৪১ ॥

অনেনাথর্বর্শার্ষেণাধীতেন ক্রতুশতেনেষ্টং ভবতি ।
ষষ্টিসহস্রং গায়ত্রী জপ্তা ভবতি ।
অষ্টৌ ব্রাহ্মণান্ গ্রাহয়েদর্থসিদ্ধির্ভবতি ।
য ইদং গায়ত্র্যথর্বশীর্ষং ব্রাহ্মণঃ প্রয়তঃ পঠেৎ ।
স সর্বপাপৈঃ প্রমুচ্যতে ব্রহ্মলোকে মহীয়তে ব্রহ্মলোকে মহীয়তে ॥ ৪২ ॥

ইতি গায়ত্র্যথর্বশীর্ষং সম্পূর্ণম্ ॥

– Chant Stotra in Other Languages –

Sri Saraswati Slokam » Gayatri Atharvashirsha Lyrics in Sanskrit » English » Gujarati » Kannada » Malayalam » Odia » Telugu » Tamil

Share this

Leave a Reply

Your email address will not be published. Required fields are marked *