॥ Ishvara Geetaa from Kurmapurana Bengali Lyrics ॥
॥ ঈশ্বরগীতা কূর্মপুরাণে ॥
প্রথমোঽধ্যায়ঃ
ঋষয় ঊচুঃ
ভবতা কথিতঃ সম্যক্ সর্গঃ স্বায়ংভুবস্ততঃ ।
ব্রহ্মাণ্ডস্যাস্য বিস্তারো মন্বন্তরবিনিশ্চয়ঃ ॥ ১.১ ॥
তত্রেশ্বরেশ্বরো দেবো বর্ণিভির্ধর্মতৎপরৈঃ ।
জ্ঞানয়োগরতৈর্নিত্যমারাধ্যঃ কথিতস্ত্বয়া ॥ ১.২ ॥
তদ্বদাশেষসংসারদুঃখনাশমনুত্তমম্ ।
জ্ঞানং ব্রহ্মৈকবিষয়ং যেন পশ্যেম তৎপরম্ ॥ ১.৩ ॥
ৎবং হি নারায়ণ সাক্ষাৎ কৃষ্ণদ্বৈপায়নাৎ প্রভো ।
অবাপ্তাখিলবিজ্ঞানস্তত্ত্বাং পৃচ্ছামহে পুনঃ ॥ ১.৪ ॥
শ্রুৎবা মুনীনাং তদ্ বাক্যং কৃষ্ণদ্বৈপায়নাৎ প্রভুম্ ।
সূতঃ পৌরাণিকঃ স্মৃৎবা ভাষিতুং হ্যুপচক্রমে ॥ ১.৫ ॥
অথাস্মিন্নন্তরে ব্যাসঃ কৃষ্ণদ্বৈপায়নঃ স্বয়ম্ ।
আজগাম মুনিশ্রেষ্ঠা যত্র সত্রং সমাসতে ॥ ১.৬ ॥
তং দৃষ্ট্বা বেদবিদ্বাংসং কালমেঘসমদ্যুতিম্ ।
ব্যাসং কমলপত্রাক্ষং প্রণেমুর্দ্বিজপুংগবাঃ ॥ ১.৭ ॥
পপাত দণ্ডবদ্ ভূমৌ দৃষ্ট্বাঽসৌ লোমহর্ষণঃ ।
প্রদক্ষিণীকৃত্য গুরুং প্রাঞ্জলিঃ পার্শ্বগোঽভবৎ ॥ ১.৮ ॥
পৃষ্টাস্তেঽনাময়ং বিপ্রাঃ শৌনকাদ্যা মহামুনিম্ ।
সমাশ্বাস্যাসনং তস্মৈ তদ্যোগ্যং সমকল্পয়ন্ ॥ ১.৯ ॥
অথৈতানব্রবীদ্ বাক্যং পরাশরসুতঃ প্রভুঃ ।
কচ্চিন্ন তপসো হানিঃ স্বাধ্যায়স্য শ্রুতস্য চ ॥ ১.১০ ॥
ততঃ স সূতঃ স্বগুরুং প্রণম্যাহ মহামুনিম্ ।
জ্ঞানং তদ্ ব্রহ্মবিষয়ং মুনীনাং বক্তুমর্হসি ॥ ১.১১ ॥
ইমে হি মুনয়ঃ শান্তাস্তাপসা ধর্মতৎপরাঃ ।
শুশ্রূষা জায়তে চৈষাং বক্তুমর্হসি তত্ত্বতঃ ॥ ১.১২ ॥
জ্ঞানং বিমুক্তিদং দিব্যং যন্মে সাক্ষাৎ ৎবয়োদিতম্ ।
মুনীনাং ব্যাহৃতং পূর্বং বিষ্ণুনা কূর্মরূপিণা ॥ ১.১৩ ॥
৩শ্রুৎবা সূতস্য বচনং মুনিঃ সত্যবতীসুতঃ
প্রণম্য শিরসা রুদ্রং বচঃ প্রাহ সুখাবহম্ ॥ ১.১৪ ॥
ব্যাস উবাচ
বক্ষ্যে দেবো মহাদেবঃ পৃষ্টো যোগীশ্বরৈঃ পুরা ।
সনৎকুমারপ্রমুখৈঃ স স্বয়ং সমভাষত ॥ ১.১৫ ॥
সনৎকুমারঃ সনকস্তথৈব চ সনন্দনঃ ।
অঙ্গিরা রুদ্রসহিতো ভৃগুঃ পরমধর্মবিৎ ॥ ১.১৬ ॥
কণাদঃ কপিলো যোগী বামদেবো মহামুনিঃ ।
শুক্রো বসিষ্ঠো ভগবান্ সর্বে সংয়তমানসাঃ ॥ ১.১৭ ॥
পরস্পরং বিচার্যৈতে সংশয়াবিষ্টচেতসঃ ।
তপ্তবন্তস্তপো ঘোরং পুণ্যে বদরিকাশ্রমে ॥ ১.১৮ ॥
অপশ্যংস্তে মহায়োগমৃষিং ধর্মসুতং শুচিম্ ।
নারায়ণমনাদ্যন্তং নরেণ সহিতং তদা ॥ ১.১৯ ॥
সংস্তূয় বিবিধৈঃ স্তোত্রৈঃ সর্বে বেদসমুদ্ভবৈঃ ।
প্রণেমুর্ভক্তিসংয়ুক্তা যোগিনো যোগবিত্তমম্ ॥ ১.২০ ॥
বিজ্ঞায় বাঞ্ছিতং তেষাং ভগবানপি সর্ববিৎ ।
প্রাহ গম্ভীরয়া বাচা কিমর্থং তপ্যতে তপঃ ॥ ১.২১ ॥
অব্রুবন্ হৃষ্টমনসো বিশ্বাত্মানং সনাতনম্ ।
সাক্ষান্নারায়ণং দেবমাগতং সিদ্ধিসূচকম্ ॥ ১.২২ ॥
বয়ং সংশয়মাপন্নাঃ সর্বে বৈ ব্রহ্মবাদিনঃ ।
ভবন্তমেকং শরণং প্রপন্নাঃ পুরুষোত্তমম্ ॥ ১.২৩ ॥
ৎবং হি বেৎসি পরমং গুহ্যং সর্বন্তু ভগবানৃষিঃ ।
নারায়ণঃ স্বয়ং সাক্ষাৎ পুরাণোঽব্যক্তপূরুষঃ ॥ ১.২৪ ॥
নহ্যন্যো বিদ্যতে বেত্তা ৎবামৃতে পরমেশ্বরম্ ।
শুশ্রূষাঽস্মাকমখিলং সংশয়ং ছেত্তুমর্হসি ॥ ১.২৫ ॥
কিং কারণমিদং কৃৎস্নং কোঽনুসংসরতে সদা ।
কশ্চিদাত্মা চ কা মুক্তিঃ সংসারঃ কিংনিমিত্তকঃ ॥ ১.২৬ ॥
কঃ সংসারপতীশানঃ কো বা সর্বং প্রপশ্যতি ।
কিং তৎ পরতরং ব্রহ্ম সর্বং নো বক্তুমর্হসি ॥ ১.২৭ ॥
এবমুক্তা তু মুনয়ঃ প্রাপশ্যন্ পুরুষোত্তমম্ ।
বিহায় তাপসং রূপং সংস্থিতং স্বেন তেজসা ॥ ১.২৮ ॥
বিভ্রাজমানং বিমলং প্রভামণ্ডলমণ্ডিতম্ ।
শ্রীবৎসবক্ষসং দেবং তপ্তজাম্বূনদপ্রভম্ ॥ ১.২৯ ॥
শঙ্খচক্রগদাপাণিং শার্ঙ্গহস্তং শ্রিয়াবৃতম্ ।
ন দৃষ্টস্তৎক্ষণাদেব নরস্তস্যৈব তেজসা ॥ ১.৩০ ॥
তদন্তরে মহাদেবঃ শশাঙ্কাঙ্কিতশেখরঃ ।
প্রসাদাভিমুখো রুদ্রঃ প্রাদুরাসীন্মহেশ্বরঃ ॥ ১.৩১ ॥
নিরীক্ষ্য তে জগন্নাথং ত্রিনেত্রং চন্দ্রভূষণম্ ।
তুষ্টবুর্হৃষ্টমনসো ভক্ত্যা তং পরমেশ্বরম্ ॥ ১.৩২ ॥
জয়েশ্বর মহাদেব জয় ভূতপতে শিব ।
জয়াশেষমুনীশান তপসাঽভিপ্রপূজিত ॥ ১.৩৩ ॥
সহস্রমূর্তে বিশ্বাত্মন্ জগদ্যন্ত্রপ্রবর্ত্তক ।
জয়ানন্ত জগজ্জন্মত্রাণসংহারকারক ॥ ১.৩৪ ॥
সহস্রচরণেশান শংভো যোগীন্দ্রবন্দিত ।
জয়াম্বিকাপতে দেব নমস্তে পরমেশ্বর ॥ ১.৩৫ ॥
সংস্তুতো ভগবানীশস্ত্র্যম্বকো ভক্তবৎসলঃ ।
সমালিঙ্গ্য হৃষীকেশং প্রাহ গম্ভীরয়া গিরা ॥ ১.৩৬ ॥
কিমর্থং পুণ্ডরীকাক্ষ মুনীন্দ্রা ব্রহ্মবাদিনঃ ।
ইমং সমাগতা দেশং কিং বা কার্যং ময়াঽচ্যুত ॥ ১.৩৭ ॥
আকর্ণ্য ভগবদ্বাক্যং দেবদেবো জনার্দনঃ ।
প্রাহ দেবো মহাদেবং প্রসাদাভিমুখং স্থিতম্ ॥ ১.৩৮ ॥
ইমে হি মুনয়ো দেব তাপসাঃ ক্ষীণকল্পষাঃ ।
অভ্যাগতানাং শরণং সম্যগ্দর্শনকাঙ্ক্ষিণাম্ ॥ ১.৩৯ ॥
যদি প্রসন্নো ভগবান্ মুনীনাং ভাবিতাত্মনাম্ ।
সন্নিধৌ মম তজ্জ্ঞানং দিব্যং বক্তুমিহার্হসি ॥ ১.৪০ ॥
ৎবং হি বেৎসি স্বমাত্মানং ন হ্যন্যো বিদ্যতে শিব ।
ততস্ত্বমাত্মনাত্মানং মুনীন্দ্রেভ্যঃ প্রদর্শয় ॥ ১.৪১ ॥
এবমুক্ত্বা হৃষীকেশঃ প্রোবাচ মুনিপুংগবান্ ।
প্রদর্শয়ন্ যোগসিদ্ধিং নিরীক্ষ্য বৃষভধ্বজম্ ॥ ১.৪২ ॥
সংদর্শনান্মহেশস্য শংকরস্যাথ শূলিনঃ ।
কৃতার্থং স্বয়মাত্মানং জ্ঞাতুমর্হথ তত্ত্বতঃ ॥ ১.৪৩ ॥
দ্রষ্টুমর্হথ বিশ্বেশং প্রত্যক্ষং পুরতঃ স্থিতম্ ।
মমৈব সন্নিধাবেব যথাবদ্ বক্তুমীশ্বরঃ ॥ ১.৪৪ ॥
নিশম্য বিষ্ণোর্বচনং প্রণম্য বৃষভধ্বজম্ ।
সনৎকুমারপ্রমুখাঃ পৃচ্ছন্তি স্ম মহেশ্বরম্ ॥ ১.৪৫ ॥
অথাস্মিন্নন্তরে দিব্যমাসনং বিমলং শিবম্ ।
কিমপ্যচিন্ত্যং গগনাদীশ্বরার্থে সমুদ্বভৌ ॥ ১.৪৬ ॥
তত্রাসসাদ যোগাত্মা বিষ্ণুনা সহ বিশ্বকৃৎ ।
তেজসা পূরয়ন্ বিশ্বং ভাতি দেবো মহেশ্বরঃ ॥ ১.৪৭ ॥
ততো দেবাদিদেবেশং শংকরং ব্রহ্মবাদিনঃ ।
বিভ্রাজমানং বিমলে তস্মিন্ দদৃশুরাসনে ॥ ১.৪৮ ॥
যং প্রপশ্যন্তিয়োগস্থাঃ স্বাত্মন্যাত্মানমীশ্বরমা ।
অনন্যতেজসং শান্তং শিবং দদৃশিরে কিল ॥ ১.৪৯ ॥
যতঃ প্রসূতির্ভূতানাং যত্রৈতৎ প্রবিলীয়তে ।
তমাসনস্থং ভূতানামীশং দদৃশিরে কিল ॥ ১.৫০ ॥
যদন্তরা সর্বমেতদ্ যতোঽভিন্নমিদং জগৎ ।
সবাসুদেবমাসীনং তমীশং দদৃশুঃ কিল ॥ ১.৫১ ॥
প্রোবাচ পৃষ্টো ভগবান্ মুনীনাং পরমেশ্বরঃ ।
নিরীক্ষ্য পুণ্ডরীকাক্ষং স্বাত্ময়োগমনুত্তমম্ ॥ ১.৫২ ॥
তচ্ছৃণুধ্বং যথান্যায়মুচ্যমানং ময়াঽনঘাঃ ।
প্রশান্তমানসাঃ সর্বে জ্ঞানমীশ্বরভাষিতম্ ॥ ১.৫৩ ॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) প্রথমোঽধ্যায়ঃ ॥ ১ ॥
দ্বিতীয়োঽধ্যায়ঃ
ঈশ্বর উবাচ ।
অবাচ্যমেতদ্ বিজ্ঞানমাত্মগুহ্যং সনাতনম্ ।
যন্ন দেবা বিজানন্তি যতন্তোঽপি দ্বিজাতয়ঃ ॥ ২.১ ॥
ইদং জ্ঞানং সমাশ্রিত্য ব্রহ্মভূতা দ্বিজোত্তমাঃ ।
ন সংসারং প্রপদ্যন্তে পূর্বেঽপি ব্রহ্মবাদিনঃ ॥ ২.২ ॥
গুহ্যাদ্ গুহ্যতমং সাক্ষাদ্ গোপনীয়ং প্রয়ত্নতঃ ।
বক্ষ্যে ভক্তিমতামদ্য যুষ্মাকং ব্রহ্মবাদিনাম্ ॥ ২.৩ ॥
আত্মায়ঃ কেবলঃ স্বচ্ছঃ শুদ্ধঃ সূক্ষ্মঃ সনাতনঃ ।
অস্তি সর্বান্তরঃ সাক্ষাচ্চিন্মাত্রস্তমসঃ পরঃ ॥ ২.৪ ॥
সোঽন্তর্যামী স পুরুষঃ স প্রাণঃ স মহেশ্বরঃ ।
স কালোঽত্রস্তদব্যক্তং স এবেদমিতি শ্রুতিঃ ॥ ২.৫ ॥
অস্মাদ্ বিজায়তে বিশ্বমত্রৈব প্রবিলীয়তে ।
স মায়ী মায়যা বদ্ধঃ করোতি বিবিধাস্তনূঃ ॥ ২.৬ ॥
ন চাপ্যযং সংসরতি ন চ সংসারময়ঃ প্রভুঃ ।
নায়ং পৃথ্বী ন সলিলং ন তেজঃ পবনো নভঃ ॥ ২.৭ ॥
ন প্রাণে ন মনোঽব্যক্তং ন শব্দঃ স্পর্শ এব চ ।
ন রূপরসগন্ধাশ্চ নাহং কর্ত্তা ন বাগপি ॥ ২.৮ ॥
ন পাণিপাদৌ নো পায়ুর্ন চোপস্থং দ্বিজোত্তমাঃ ।
ন কর্ত্তা ন চ ভোক্তা বা ন চ প্রকৃতিপূরুষৌ ॥ ২.৯ ॥
ন মায়া নৈব চ প্রাণা চৈতন্যং পরমার্থতঃ ।
যথা প্রকাশতমসোঃ সম্বন্ধো নোপপদ্যতে ॥ ২.১০ ॥
তদ্বদৈক্যং ন সংবন্ধঃ প্রপঞ্চপরমাত্মনোঃ
ছায়াতপৌ যথা লোকে পরস্পরবিলক্ষণৌ ॥ ২.১১ ॥
তদ্বৎ প্রপঞ্চপুরুষৌ বিভিন্নৌ পরমার্থতঃ ।
তথাত্মা মলিনোঽসৃষ্টো বিকারী স্যাৎ স্বভাবতঃ ॥ ২.১২ ॥
নহি তস্য ভবেন্মুক্তির্জন্মান্তরশতৈরপি ।
পশ্যন্তি মুনয়ো যুক্তাঃ স্বাত্মানং পরমার্থতঃ ॥ ২.১৩ ॥
বিকারহীনং নির্দুঃ খমানন্দাত্মানমব্যযম্ ।
অহ কর্ত্তা সুখী দুঃখী কৃশঃ স্থূলেতি যা মতিঃ ॥ ২.১৪ ॥
সা চাহংকারকর্তৃৎবাদাত্মন্যারোপ্যতে জনৈঃ ।
বদন্তি বেদবিদ্বাংসঃ সাক্ষিণং প্রকৃতেঃ পরম্ ॥ ২.১৫ ॥
ভোক্তারমক্ষরং শুদ্ধং সর্বত্র সমবস্থিতম্ ।
তস্মাদজ্ঞানমূলো হি সংসারঃ সর্বদেহিনাম্ ॥ ২.১৬ ॥
অজ্ঞানাদন্যথা জ্ঞানাৎ তৎবং প্রকৃতিসংগতম্ ।
নিত্যোদিতং স্বয়ং জ্যোতিঃ সর্বগঃ পুরুষঃ পরঃ ॥ ২.১৭ ॥
অহংকারাবিবেকেন কর্ত্তাহমিতি মন্যতে ।
পশ্যন্তি ঋষয়োঽব্যক্তং নিত্যং সদসদাত্মকম্ ॥ ২.১৮ ॥
প্রধানং প্রকৃতিং বুদ্ধ্বা কারণং ব্রহ্মবাদিনঃ ।
তেনায়ং সংগতো হ্যাত্মা কূটস্থোঽপি নিরঞ্জনঃ ॥ ২.১৯ ॥
স্বাত্মানমক্ষরং ব্রহ্ম নাববুদ্ধ্যেত তত্ত্বতঃ ।
অনাত্মন্যাত্মবিজ্ঞানং তস্মাদ্ দুঃখং তথেতরৎ ॥ ২.২০ ॥
রগদ্বেষাদয়ো দোষাঃ সর্বে ভ্রান্তিনিবন্ধনাঃ ।
কর্মাণ্যস্য ভবেদ্ দোষঃ পুণ্যাপুণ্যমিতি স্থিতিঃ ॥ ২.২১ ॥
তদ্বশাদেব সর্বেষাং সর্বদেহসমুদ্ভবঃ ।
নিত্যঃ সর্বত্রগো হ্যাত্মা কূটস্থো দোষবর্জিতঃ ॥ ২.২২ ॥
একঃ স ভিদ্যতে শক্ত্যা মায়যা ন স্বভাবতঃ ।
তস্মাদদ্বৈতমেবাহুর্মুনয়ঃ পরমার্থতঃ ॥ ২.২৩ ॥
ভেদো ব্যক্তস্বভাবেন সা চ মায়াত্মসংশ্রয়া ।
যথা হি ধূমসম্পর্কান্নাকাশো মলিনো ভবেৎ ॥ ২.২৪ ॥
অন্তঃ করণজৈর্ভাবৈরাত্মা তদ্বন্ন লিপ্যতে ।
যথা স্বপ্রভয়া ভাতি কেবলঃ স্ফটিকোঽমলঃ ॥ ২.২৫ ॥
উপাধিহীনো বিমলস্তথৈবাত্মা প্রকাশতে ।
জ্ঞানস্বূপমেবাহুর্জগদেতদ্ বিচক্ষণাঃ ॥ ২.২৬ ॥
অর্থস্বরূপমেবান্যে পশ্যন্ত্যন্যে কুদৃষ্টয়ঃ ।
কূটস্থো নির্গুণো ব্যাপী চৈতন্যাত্মা স্বভাবতঃ ॥ ২.২৭ ॥
দৃশ্যতে হ্যর্থরূপেণ পুরুষৈর্জ্ঞানদৃষ্টিভিঃ ।
যথা স লক্ষ্যতে রক্তঃ কেবলঃ স্ফটিকো জনৈঃ ॥ ২.২৮ ॥
রক্তিকাদ্যুপধানেন তদ্বৎ পরমপূরুষঃ ।
তস্মাদাত্মাঽক্ষরঃ শুদ্ধো নিত্যঃ সর্বগতোঽব্যযঃ ॥ ২.২৯ ॥
উপাসিতব্যো মন্তব্যঃ শ্রোতব্যশ্চ মুমুক্ষুভিঃ ।
যদা মনসি চৈতন্যং ভাতি সর্বত্রগং সদা ॥ ২.৩০ ॥
যোগিনোঽব্যবধানেন তদা সম্পদ্যতে স্বয়ম্ ।
যদা সর্বাণি ভূতানি স্বাত্মন্যেবাভিপশ্যতি ॥ ২.৩১ ॥
সর্বভূতেষু চাত্মানং ব্রহ্ম সম্পদ্যতে তদা ।
যদা সর্বাণি ভূতানি সমাধিস্থো ন পশ্যতি ॥ ২.৩২ ॥
একীভূতঃ পরেণাসৌ তদা ভবতি কেবলম্ ।
যদা সর্বে প্রমুচ্যন্তে কামা যেঽস্য হৃদি স্থিতাঃ ॥ ২.৩৩ ॥
তদাঽসাবমৃতীভূতঃ ক্ষেমং গচ্ছতি পণ্ডিতঃ ।
যদা ভূতপৃথগ্ভাবমেকস্থমনুপশ্যতি ॥ ২.৩৪ ॥
তত এব চ বিস্তারং ব্রহ্ম সম্পদ্যতে তদা ।
যদা পশ্যতি চাত্মানং কেবলং পরমার্থতঃ ॥ ২.৩৫ ॥
মায়ামাত্রং জগৎ কৃৎস্নং তদা ভবতি নির্বৃতঃ ॥ ২.৩৬ ॥
যদা জন্মজরাদুঃখব্যাধীনামেকভেষজম্ ।
কেবলং ব্রহ্মবিজ্ঞানং জায়তেঽসৌ তদা শিবঃ ॥ ২.৩৭ ॥
যথা নদীনদা লোকে সাগরেণৈকতাং যয়ুঃ ।
তদ্বদাত্মাঽক্ষরেণাসৌ নিষ্কলেনৈকতাং ব্রজেৎ ॥ ২.৩৮ ॥
তস্মাদ্ বিজ্ঞানমেবাস্তি ন প্রপঞ্চো ন সংসৃতিঃ ।
অজ্ঞানেনাবৃতং লোকো বিজ্ঞানং তেন মুহ্যতি ॥ ২.৩৯ ॥
তজ্জ্ঞানং নির্মলং সূক্ষ্মং নির্বিকল্পং তদব্যযম্ ।
অজ্ঞানমিতরৎ সর্বং বিজ্ঞানমিতি তন্মতম্ ॥ ২.৪০ ॥
এতদ্বঃ কথিতং সাংখ্যং ভাষিতং জ্ঞানমুত্তমম্ ।
সর্ববেদান্তসারং হি যোগস্তত্রৈকচিত্ততা ॥ ২.৪১ ॥
যোগাৎ সংজায়তে জ্ঞানং জ্ঞানাদ্ যোগঃ প্রবর্ত্ততে ।
যোগজ্ঞানাভিয়ুক্তস্য নাবাপ্যং বিদ্যতে ক্বচিৎ ॥ ২.৪২ ॥
যদেব যোগিনো যান্তি সাংখ্যৈস্তদধিগম্যতে ।
একং সাংখ্যং চ যোগং চ যঃ পশ্যতি স তত্ত্ববিৎ ॥ ২.৪৩ ॥
অন্যে চ যোগিনো বিপ্রা ঐশ্বর্যাসক্তচেতসঃ ।
মজ্জন্তি তত্র তত্রৈব যে চান্যেকুণ্টবুদ্ধয়ঃ ॥ ২.৪৪ ॥
যত্তৎ সর্বগতং দিব্যমৈশ্বর্যমচলং মহৎ ।
জ্ঞানয়োগাভিয়ুক্তস্তু দেহান্তে তদবাপ্নুয়াৎ ॥ ২.৪৫ ॥
এষ আত্মাঽহমব্যক্তো মায়াবী পরমেশ্বরঃ ।
কীর্তিতঃ সর্ববেদেষু সর্বাত্মা সর্বতোমুখঃ ॥ ২.৪৬ ॥
সর্বকামঃ সর্বরসঃ সর্বগন্ধোঽজরোঽমরঃ ।
সর্বতঃ পাণিপাদোঽহমন্তর্যামী সনাতনঃ ॥ ২.৪৭ ॥
অপাণিপাদো জবনো গ্রহীতা হৃদি সংস্থিতঃ ।
অচক্ষুরপি পশ্যামি তথাঽকর্ণঃ শৃণোম্যহম্ ॥ ২.৪৮ ॥
বেদাহং সর্বমেবেদং ন মাং জানাতি কশ্চন ।
প্রাহুর্মহান্তং পুরুষং মামেকং তত্ত্বদর্শিনঃ ॥ ২.৪৯ ॥
পশ্যন্তি ঋষয়ো হেতুমাত্মনঃ সূক্ষ্মদর্শিনঃ ।
নির্গুণামলরূপস্য যত্তদৈশ্বর্যমুত্তমম্ ॥ ২.৫০ ॥
যন্ন দেবা বিজানন্তি মোহিতা মম মায়যা ।
বক্ষ্যে সমাহিতা যূয়ং শৃণুধ্বং ব্রহ্মবাদিনঃ ॥ ২.৫১ ॥
নাহং প্রশাস্তা সর্বস্য মায়াতীতঃ স্বভাবতঃ ।
প্রেরয়ামি তথাপীদং কারণং সূরয়ো বিদুঃ ॥ ২.৫২ ॥
যন্মে গুহ্যতমং দেহং সর্বগং তত্ত্বদর্শিনঃ ।
প্রবিষ্টা মম সায়ুজ্যং লভন্তে যোগিনোঽব্যযম্ ॥ ২.৫৩ ॥
তেষাং হি বশমাপন্না মায়া মে বিশ্বরূপিণী ।
লভন্তে পরমং শুদ্ধং নির্বাণং তে ময়া সহ ॥ ২.৫৪ ॥
ন তেষাং পুনরাবৃত্তিঃ কল্পকোটিশতৈরপি ।
প্রসাদান্মম যোগীন্দ্রা এতদ্ বেদানুসাসনম্ ॥ ২.৫৫ ॥
তৎপুত্রশিষ্যযোগিভ্যো দাতব্যং ব্রহ্মবাদিভিঃ ।
মদুক্তমেতদ্ বিজ্ঞানং সাংখ্যং যোগসমাশ্রয়ম্ ॥ ২.৫৬ ॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) দ্বিতীয়োঽধ্যায়ঃ ॥ ২ ॥
তৃতীয়োঽধ্যায়ঃ
ঈশ্বর উবাচ
অব্যক্তাদভবৎ কালঃ প্রধানং পুরুষঃ পরঃ ।
তেভ্যঃ সর্বমিদং জাতং তস্মাদ্ ব্রহ্মময়ং জগৎ ॥ ৩.১ ॥
সর্বতঃ পাণিপাদান্তং সর্বতোঽক্ষিশিরোমুখম্ ।
সর্বতঃ শ্রুতিমল্লোকে সর্বমাবৃত্য তিষ্ঠতি ॥ ৩.২ ॥
সর্বেন্দ্রিয়গুণাভাসং সর্বেন্দ্রিয়বিবর্জিতম্ ।
সর্বাধারং সদানন্দমব্যক্তং দ্বৈতবর্জিতম্ ॥ ৩.৩ ॥
সর্বোপমানরহিতং প্রমাণাতীতগোচরম্ ।
নির্বকল্পং নিরাভাসং সর্বাবাসং পরামৃতম্ ॥ ৩.৪ ॥
অভিন্নং ভিন্নসংস্থানং শাশ্বতং ধ্রুবমব্যযম্ ।
নির্গুণং পরমং ব্যোম তজ্জ্ঞানং সূরয়ো বিদুঃ ॥ ৩.৫ ॥
স আত্মা সর্বভূতানাং স বাহ্যাভ্যন্তরঃ পরঃ ।
সোঽহং সর্বত্রগঃ শান্তো জ্ঞানাত্মা পরমেশ্বরঃ ॥ ৩.৬ ॥
ময়া ততমিদং বিশ্বং জগদব্যক্তমূর্তিনা ।
মৎস্থানি সর্বভূতানি যস্তং বেদ স বেদবিৎ ॥ ৩.৭ ॥
প্রধানং পুরুষং চৈব তদ্বস্তু সমুদাহৃতম্ ।
তয়োরনাদিরুদ্দিষ্টঃ কালঃ সংয়োগজঃ পরঃ ॥ ৩.৮ ॥
ত্রয়মেতদনাদ্যন্তমব্যক্তে সমবস্থিতম্ ।
তদাত্মকং তদন্যৎ স্যাৎ তদ্রূপং মামকং বিদুঃ ॥ ৩.৯ ॥
মহদাদ্যং বিশেষান্তং সম্প্রসূতেঽখিলং জগৎ ।
যা সা প্রকৃতিরুদ্দিষ্টা মোহিনী সর্বদেহিনাম্ ॥ ৩.১০ ॥
পুরুষঃ প্রকৃতিস্থো হি ভুঙ্ক্তেয়ঃ প্রাকৃতান্ গুণান্ ।
অহংকারবিমুক্তৎবাৎ প্রোচ্যতে পঞ্চবিংশকঃ ॥ ৩.১১ ॥
আদ্যো বিকারঃ প্রকৃতের্মহানিতি চ কথ্যতে ।
বিজ্ঞাতৃশক্তির্বিজ্ঞানাৎ হ্যহংকারস্তদুত্থিতঃ ॥ ৩.১২ ॥
এক এব মহানাত্মা সোঽহংকারোঽভিধীয়তে ।
স জীবঃ সোঽন্তরাত্মেতি গীয়তে তত্ত্বচিন্তকৈঃ ॥ ৩.১৩ ॥
তেন বেদয়তে সর্বং সুখং দুঃ খং চ জন্মসু ।
স বিজ্ঞানাত্মকস্তস্য মনঃ স্যাদুপকারকম্ ॥ ৩.১৪ ॥
তেনাপি তন্ময়স্তস্মাৎ সংসারঃ পুরুষস্য তু ।
স চাবিবেকঃ প্রকৃতৌ সঙ্গাৎ কালেন সোঽভবৎ ॥ ৩.১৫ ॥
কালঃ সৃজতি ভূতানি কালঃ সংহরতি প্রজাঃ ।
সর্বে কালস্য বশগা ন কালঃ কস্যচিদ্ বশে ॥ ৩.১৬ ॥
সোঽন্তরা সর্বমেবেদং নিয়চ্ছতি সনাতনঃ ।
প্রোচ্যতে ভগবান্ প্রাণঃ সর্বজ্ঞঃ পুরুষোত্তমঃ ॥ ৩.১৭ ॥
সর্বেন্দ্রিয়েভ্যঃ পরমং মন আহুর্মনীষিণঃ ।
মনসশ্চাপ্যহংকারমহংকারান্মহান্ পরঃ ॥ ৩.১৮ ॥
মহতঃ পরমব্যক্তমব্যক্তাৎ পুরুষঃ পরঃ ।
পুরুষাদ্ ভগবান্ প্রাণস্তস্য সর্বমিদং জগৎ ॥ ৩.১৯ ॥
প্রাণাৎ পরতরং ব্যোম ব্যোমাতীতোঽগ্নিরীশ্বরঃ ।
সোঽহং ব্রহ্মাব্যযঃ শান্তো জ্ঞানাত্মা পরমেশ্বরঃ ।
নাস্তি মত্তঃ পরং ভূতং মাং বিজ্ঞায় মুচ্যতে ॥ ৩.২০ ॥
নিত্যং হি নাস্তি জগতি ভূতং স্থাবরজঙ্গমম্ ।
ঋতে মামেকমব্যক্তং ব্যোমরূপং মহেশ্বরম্ ॥ ৩.২১ ॥
সোঽহং সৃজামি সকলং সংহরামি সদা জগৎ ।
মায়ী মায়াময়ো দেবঃ কালেন সহ সঙ্গতঃ ॥ ৩.২২ ॥
মৎসন্নিধাবেষ কালঃ করোতি সকলং জগৎ ।
নিয়োজয়ত্যনন্তাত্মা হ্যেতদ্ বেদানুশাসনম্ ॥ ৩.২৩ ॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) তৃতীয়োঽধ্যায়ঃ ॥ ৩ ॥
চতুর্থোঽধ্যায়ঃ
ঈশ্বর উবাচ ।
বক্ষ্যে সমাহিতা যূয়ং শৃণুধ্বং ব্রহ্মবাদিনঃ ।
মাহাত্ম্যং দেবদেবস্য যেনে সর্বং প্রবর্ত্ততে ॥ ৪.১ ॥
নাহং তপোভির্বিবিধৈর্ন দানেন ন চেজ্যযা ।
শক্যো হি পুরুষৈর্জ্ঞাতুমৃতে ভক্তিমনুত্তমাম্ ॥ ৪.২ ॥
অহং হি সর্বভাবানামন্তস্তিষ্ঠামি সর্বগঃ ।
মাং সর্বসাক্ষিণং লোকো ন জানাতি মুনীশ্বরাঃ ॥ ৪.৩ ॥
যস্যান্তরা সর্বমিদং যো হি সর্বান্তকঃ পরঃ ।
সোঽহংধাতা বিধাতা চ কালোঽগ্নির্বিশ্বতোমুখঃ ॥ ৪.৪ ॥
ন মাং পশ্যন্তি মুনয়ঃ সর্বে পিতৃদিবৌকসঃ ।
ব্রহ্মা চ মনবঃ শক্রো যে চান্যে প্রথিতৌজসঃ ॥ ৪.৫ ॥
গৃণন্তি সততং বেদা মামেকং পরমেশ্বরম্ ।
যজন্তি বিবিধৈরগ্নিং ব্রাহ্মণা বৈদিকৈর্মখৈঃ ॥ ৪.৬ ॥
সর্বে লোকা নমস্যন্তি ব্রহ্মা লোকপিতামহঃ ।
ধ্যায়ন্তি যোগিনো দেবং ভূতাধিপতিমীশ্বরম্ ॥ ৪.৭ ॥
অহং হি সর্বহবিষাং ভোক্তা চৈব ফলপ্রদঃ ।
সর্বদেবতনুর্ভূৎবা সর্বাত্মা সর্বসম্প্লুতঃ ॥ ৪.৮ ॥
মাং পশ্যন্তীহ বিদ্বাংশো ধার্মিকা বেদবাদিনঃ ।
তেষাং সন্নিহিতো নিত্যং যে ভক্ত্যা মামুপাসতে ॥ ৪.৯ ॥
ব্রাহ্মণাঃ ক্ষত্রিয়া বৈশ্যা ধার্মিকা মামুপাসতে ।
তেষাং দদামি তৎ স্থানমানন্দং পরমং পদম্ ॥ ৪.১০ ॥
অন্যেঽপি যে স্বধর্মস্থাঃ শূদ্রাদ্যা নীচজাতয়ঃ ।
ভক্তিমন্তঃ প্রমুচ্যন্তে কালেন ময়ি সংগতাঃ ॥ ৪.১১ ॥
ন মদ্ভক্তা বিনশ্যন্তি মদ্ভক্তা বীতকল্মষাঃ ।
আদাবেব প্রতিজ্ঞাতং ন মে ভক্তঃ প্রণশ্যতি ॥ ৪.১২ ॥
যো বৈ নিন্দতি তং মূঢো দেবদেবং স নিন্দতি ।
যো হি পূজয়তে ভক্ত্যা স পূজয়তি মাং সদা ॥ ৪.১৩ ॥
পত্রং পুষ্পং ফলং তোয়ং মদারাধনকারণাৎ ।
যো মে দদাতি নিয়তং স মে ভক্তঃ প্রিয়ো মতঃ ॥ ৪.১৪ ॥
অহং হি জগতামাদৌ ব্রহ্মাণং পরমেষ্ঠিনম্ ।
বিদধৌ দত্তবান্ বেদানশেষানাত্মনিঃ সৃতান্ ॥ ৪.১৫ ॥
অহমেব হি সর্বেষাং যোগিনাং গুরুরব্যযঃ ।
ধার্মিকাণাং চ গোপ্তাঽহং নিহন্তা বেদবিদ্বিষাম্ ॥ ৪.১৬ ॥
অহং বৈ সর্বসংসারান্মোচকো যোগিনামিহ ।
সংসারহেতুরেবাহং সর্বসংসারবর্জিতঃ ॥ ৪.১৭ ॥
অহমেব হি সংহর্ত্তা সংস্রষ্টা পরিপালকঃ ।
মায়াবী মামীকা শক্তির্মায়া লোকবিমোহিনী ॥ ৪.১৮ ॥
মমৈব চ পরা শক্তির্যা সা বিদ্যতে গীয়তে ।
নাশয়ামি চ তাং মায়াং যোগিনাং হৃদি সংস্থিতঃ ॥ ৪.১৯ ॥
অহং হি সর্বশক্তীনাং প্রবর্ত্তকনিবর্ত্তকঃ ।
আধারভূতঃ সর্বাসাং নিধানমমৃতস্য চ ॥ ৪.২০ ॥
একা সর্বান্তরা শক্তিঃ করোতি বিবিধং জগৎ ।
আস্থায় ব্রহ্মাণো রূপং মন্ময়ী মদধিষ্ঠিতা ॥ ৪.২১ ॥
অন্যা চ শক্তির্বিপুলা সংস্থাপয়তি মে জগৎ ।
ভূৎবা নারায়ণোঽনন্তো জগন্নাথো জগন্ময়ঃ ॥ ৪.২২ ॥
তৃতীয়া মহতী শক্তির্নিহন্তি সকলং জগৎ ।
তামসী মে সমাখ্যাতা কালাখ্যা রুদ্ররূপিণী ॥ ৪.২৩ ॥
ধ্যানেন মাং প্রপশ্যন্তি কেচিজ্জ্ঞানেন চাপরে ।
অপরে ভক্তিয়োগেন কর্ময়োগেন চাপরে ॥ ৪.২৪ ॥
সর্বেষামেব ভক্তানামিষ্টঃ প্রিয়তমো মম ।
যো হি জ্ঞানেন মাং নিত্যমারাধয়তি নান্যথা ॥ ৪.২৫ ॥
অন্যে চ হরয়ে ভক্তা মদারাধনকাঙ্ক্ষিণঃ ।
তেঽপি মাং প্রাপ্নুবন্ত্যেব নাবর্ত্তন্তে চ বৈ পুনঃ ॥ ৪.২৬ ॥
ময়া ততমিদং কৃৎসনং প্রধানপুরুষাত্মকম্ ।
ময়্যেব সংস্থিতং চিত্তং ময়া সম্প্রের্যতে জগৎ ॥ ৪.২৭ ॥
নাহং প্রেরয়িতা বিপ্রাঃ পরমং যোগমাশ্রিতঃ ।
প্রেরয়ামি জগৎকৃৎস্নমেতদ্যো বেদ সোঽমৃতঃ ॥ ৪.২৮ ॥
পশ্যাম্যশেষমেবেদং বর্ত্তমানং স্বভাবতঃ ।
করোতি কালো ভগবান্ মহায়োগেশ্বরঃ স্বয়ম্ ॥ ৪.২৯ ॥
যোগঃ সম্প্রোচ্যতে যোগী মায়ী শাস্ত্রেষু সূরিভিঃ ।
যোগেশ্বরোঽসৌ ভগবান্ মহাদেবো মহান্ প্রভুঃ ॥ ৪.৩০ ॥
মহত্ত্বং সর্বতত্ত্বানাং বরৎবাৎ পরমেষ্ঠিনঃ ।
প্রোচ্যতে ভগবান্ ব্রহ্মা মহান্ ব্রহ্ময়োঽমলঃ ॥ ৪.৩১ ॥
যো মামেবং বিজানাতি মহায়োগেশ্বরেশ্বরম্ ।
সোঽবিকল্পেন যোগেন যুজ্যতে নাত্র সংশয়ঃ ॥ ৪.৩২ ॥
সোঽহং প্রেরয়িতা দেবঃ পরমানন্দমাশ্রিতঃ ।
নৃত্যামি যোগী সততং যস্তদ্ বেদ স বেদবিৎ ॥ ৪.৩৩ ॥
ইতি গুহ্যতমং জ্ঞানং সর্ববেদেষু নিষ্ঠিতম্ ।
প্রসন্নচেতসে দেয়ং ধার্মিকায়াহিতাগ্নয়ে ॥ ৪.৩৪ ॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) চতুর্থোঽধ্যায়ঃ ॥ ৪ ॥
পঞ্চমোঽধ্যায়ঃ
ব্যাস উবাচ ।
এতাবদুক্ত্বা ভগবান্ যোগিনাং পরমেশ্বরঃ ।
ননর্ত্ত পরমং ভাবমৈশ্বরং সম্প্রদর্শয়ন্ ॥ ৫.১ ॥
তং তে দদৃশুরীশানং তেজসাং পরমং নিধিম্ ।
নৃত্যমানং মহাদেবং বিষ্ণুনা গগনেঽমলে ॥ ৫.২ ॥
যং বিদুর্যোগতত্ত্বজ্ঞা যোগিনো যতমানসাঃ ।
তমীশং সর্বভূতানামাকশে দদৃশুঃ কিল ॥ ৫.৩ ॥
যস্য মায়াময়ং সর্বং যেনেদং প্রের্যতে জগৎ ।
নৃত্যমানঃ স্বয়ং বিপ্রৈর্বিশ্বেশঃ খলু দৃশ্যতে ॥ ৫.৪ ॥
যৎ পাদপঙ্কজং স্মৃৎবা পুরুষোঽজ্ঞানজং ভয়ম্ ।
জহতি নৃত্যমানং তং ভূতেশং দদৃশুঃ কিল ॥ ৫.৫ ॥
যং বিনিদ্রা জিতশ্বাসাঃ শান্তা ভক্তিসমন্বিতাঃ ।
জ্যোতির্ময়ং প্রপশ্যন্তি স যোগী দৃশ্যতে কিল ॥ ৫.৬ ॥
যোঽজ্ঞানান্মোচয়েৎ ক্ষিপ্রং প্রসন্নো ভক্তবৎসলঃ ।
তমেব মোচনং রুদ্রমাকাশে দদৃশুঃ পরম্ ॥ ৫.৮ ॥
সহস্রশিরসং দেবং সহস্রচরণাকৃতিম্ ।
সহস্রবাহুং জটিলং চন্দ্রার্ধকৃতশেখরম্ ॥ ৫.৮ ॥
বসানং চর্ম বৈয়াঘ্রং শূলাসক্তমহাকরম্ ।
দণ্ডপাণিং ত্রয়ীনেত্রং সূর্যসোমাগ্নিলোচনম্ ॥ ৫.৯ ॥
ব্রহ্মাণ্ডং তেজসা স্বেন সর্বমাবৃত্য চ স্থিতম্ ।
দংষ্ট্রাকরালং দুর্দ্ধর্ষং সূর্যকোটিসমপ্রভম্ ॥ ৫.১০ ॥
অণ্ডস্থং চাণ্ডবাহ্যস্থং বাহ্যমভ্যন্তরং পরম্ ।
সৃজন্তমনলজ্বালং দহন্তমখিলং জগৎ ।
নৃত্যন্তং দদৃশুর্দেবং বিশ্বকর্মাণমীশ্বরম্ ॥ ৫.১১ ॥
মহাদেবং মহায়োগং দেবানামপি দৈবতম্ ।
পশূনাং পতিমীশানং জ্যোতিষাং জ্যোতিরব্যযম্ ॥ ৫.১২ ॥
পিনাকিনং বিশালাক্ষং ভেষজং ভবরোগিণাম্ ।
কালাত্মানং কালকালং দেবদেবং মহেশ্বরম্ ॥ ৫.১৩ ॥
উমাপতিং বিরূপাক্ষং যোগানন্দময়ং পরম্ ।
জ্ঞানবৈরাগ্যনিলয়ং জ্ঞানয়োগং সনাতনম্ ॥ ৫.১৪ ॥
শাশ্বতৈশ্বর্যবিভবং ধর্মাধারং দুরাসদম্ ।
মহেন্দ্রোপেন্দ্রনমিতং মহর্ষিগণবন্দিতম্ ॥ ৫.১৫ ॥
আধারং সর্বশক্তীনাং মহায়োগেশ্বরেশ্বরম্ ।
যোগিনাং পরমং ব্রহ্ম যোগিনাং যোগবন্দিতম্ ।
যোগিনাং হৃদি তিষ্ঠন্তং যোগমায়াসমাবৃতম্ ॥ ॥
ক্ষণেন জগতো যোনিং নারায়ণমনাময়ম্ ॥ ৫.১৬ ॥
ঈশ্বরেণৈকতাপন্নমপশ্যন্ ব্রহ্মবাদিনঃ ।
দৃষ্ট্বা তদৈশ্বরং রূপং রুদ্রনারায়ণাত্মকম্ ।
কৃতার্থং মেনিরে সন্তঃ স্বাত্মানং ব্রহ্মবাদিনঃ ॥ ৫.১৮ ॥
সনৎকুমারঃ সনকো ভৃগুশ্চসনাতনশ্চৈব সনন্দনশ্চ ।
রৈভ্যোঽঙ্গিরা বামদেবোঽথ শুক্রো মহর্ষিরত্রিঃ কপিলো মরীচিঃ ॥ ৫.১৮ ॥
দৃষ্ট্বাঽথ রুদ্রং জগদীশিতারংতং পদ্মনাভাশ্রিতবামভাগম্ ।
ধ্যাৎবা হৃদিস্থং প্রণিপত্য মূর্ধ্নাবদ্ধ্বাঞ্জলিং স্বেষু
শিরঃ সু ভূয়ঃ ॥ ৫.১৯ ॥
ওঙ্কারমুচ্চার্য বিলোক্য দেব-মন্তঃ শরীরে নিহিতং গুহায়াম্ ।
সমস্তুবন্ ব্রহ্মময়ৈর্বচোভি-রানন্দপূর্ণায়তমানসাস্তে ॥ ৫.২০ ॥
মুনয় ঊচুঃ
ৎবামেকমীশং পুরুষং পুরাণংপ্রাণেশ্বরং রুদ্রমনন্তয়োগম্ ।
নমাম সর্বে হৃদি সন্নিবিষ্টংপ্রচেতসং ব্রহ্মময়ং পবিত্রম্ ॥ ৫.২১ ॥
ৎবাং পশ্যন্তি মুনয়ো ব্রহ্ময়োনিংদান্তাঃ শান্তা বিমলং রুক্মবর্ণম্ ।
ধ্যাৎবাত্মস্থমচলং স্বে শরীরে কবিং পরেভ্যঃ পরমং পরং চ ॥ ৫.২২ ॥
ৎবত্তঃ প্রসূতা জগতঃ প্রসূতিঃ সর্বাত্মভূস্ত্বং পরমাণুভূতঃ ।
অণোরণীয়ান্ মহতো মহীয়াং-স্ত্বামেব সর্বং প্রবদন্তি সন্তঃ ॥ ৫.২৩ ॥
হিরণ্যগর্ভো জগদন্তরাত্মা ৎবত্তোঽধিজাতঃ পুরুষঃ পুরাণঃ ।
সংজায়মানো ভবতা বিসৃষ্টো যথাবিধানং সকলং সসর্জ ॥ ৫.২৪ ॥
ৎবত্তো বেদাঃ সকলাঃ সম্প্রসূতা-স্ত্বয়্যেবান্তে সংস্থিতিং তে লভন্তে ।
পশ্যামস্ত্বাং জগতো হেতুভূতং নৃত্যন্তং স্বে হৃদয়ে সন্নিবিষ্টম্ ॥ ৫.২৫ ॥
ৎবয়ৈবেদং ভ্রাম্যতে ব্রহ্মচক্রংমায়াবী ৎবং জগতামেকনাথঃ ।
নমামস্ত্বাং শরণং সম্প্রপন্নায়োগাত্মানং চিৎপতিং দিব্যনৃত্যম্ ॥ ৫.২৬ ॥
পশ্যামস্ত্ত্বাং পরমাকাশমধ্যেনৃত্যন্তং তে মহিমানং স্মরামঃ ।
সর্বাত্মানং বহুধা সন্নিবিষ্টংব্রহ্মানন্দমনুভূয়ানুভূয় ॥ ৫.২৮ ॥
ওঁকারস্তে বাচকো মুক্তিবীজংৎবমক্ষরং প্রকৃতৌ গূঢরূপম্ ।
তত্ত্বাং সত্যং প্রবদন্তীহ সন্তঃস্বয়ংপ্রভং ভবতো যৎপ্রভাবম্ ॥ ৫.২৮ ॥
স্তুবন্তি ৎবাং সততং সর্ববেদানমন্তি ৎবামৃষয়ঃ ক্ষীণদোষাঃ ।
শান্তাত্মানঃ সত্যসংধং বরিষ্ঠবিশন্তি ৎবাং যতয়ো ব্রহ্মনিষ্ঠাঃ ॥ ৫.২৯ ॥
একো বেদো বহুশাখো হ্যনন্তস্ত্বামেবৈকং বোধয়ত্যেকরূপম্ ।
বংন্দ্যং ৎবাং যে শরণং সম্প্রপন্না-স্তেষাং শান্তিঃ শাশ্বতী
নেতরেষাম্ ॥ ৫.৩০ ॥
ভবানীশোঽনাদিমাংস্তেজোরাশি-র্ব্রহ্মা বিশ্বং পরমেষ্ঠী বরিষ্টঃ ।
স্বাত্মানন্দমনুভূয় বিশন্তেস্বয়ং জ্যোতিরচলো নিত্যমুক্তাঃ ॥ ৫.৩১ ॥
একো রুদ্রস্ত্বং করোষীহ বিশ্বংৎবং পালয়স্যখিলং বিশ্বরূপম্ ।
ৎবামেবান্তে নিলয়ং বিন্দতীদং নমামস্ত্বাং শরণং সম্প্রপন্নাঃ ॥ ৫.৩২ ॥
ৎবামেকমাহুঃ কবিমেকরুদ্রংব্রহ্মং বৃহন্তং হরিমগ্নিমীশম্ ।
ইন্দ্রং মৃত্যুমনিলং চেকিতানংধাতারমাদিত্যমনেকরূপম্ ॥ ৫.৩৩ ॥
ৎবমক্ষরং পরমং বেদিতব্যং ৎবমস্য বিশ্বস্য পরং নিধানম্ ।
ৎবমব্যযঃ শাশ্বতধর্মগোপ্তাসনাতনস্ত্বং পুরুষোত্তমোঽসি ॥ ৫.৩৪ ॥
ৎবমেব বিষ্ণুশ্চতুরাননস্ত্বং ৎবমেব রুদ্রো ভগবানপীশঃ ।
ৎবং বিশ্বনাথঃ প্রকৃতিঃ প্রতিষ্ঠাসর্বেশ্বরস্ত্বং
পরমেশ্বরোঽসি ॥ ৫.৩৫ ॥
ৎবামেকমাহুঃ পুরুষং পুরাণ-মাদিত্যবর্ণং তমসঃ পরস্তাৎ ।
চিন্মাত্রমব্যক্তমচিন্ত্যরূপংখং ব্রহ্ম শূন্যং প্রকৃতিং নির্গুণং
চ ॥ ৫.৩৬ ॥
যদন্তরা সর্বমিদং বিভাতি যদব্যযং নির্মলমেকরূপম্ ।
কিমপ্যচিন্ত্যং তব রূপমেতৎ তদন্তরা যৎপ্রতিভাতি তত্ত্বম্ ॥ ৫.৩৮ ॥
যোগেশ্বরং ভদ্রমনন্তশক্তিংপরায়ণং ব্রহ্মতনুং পুরাণম্ ।
নমাম সর্বে শরণার্থিনস্ত্বাংপ্রসীদ ভূতাধিপতে মহেশ ॥ ৫.৩৮ ॥
ৎবৎপাদপদ্মস্মরণাদশেষ-সংসারবীজং নিলয়ং প্রয়াতি ।
মনো নিয়ম্য প্রণিধায় কায়ংপ্রসাদয়ামো বয়মেকমীশম্ ॥ ৫.৩৯ ॥
নমো ভবায়াস্তু ভবোদ্ভবায়কালায় সর্বায় হরায় তুম্যম্ ।
নমোঽস্তু রুদ্রায় কপর্দিনে তে নমোঽগ্নয়ে দেব নমঃ শিবায় ॥ ৫.৪০ ॥
ততঃ স ভগবান্ প্রীতঃ কপর্দী বৃষবাহনঃ ।
সংহৃত্য পরমং রূপং প্রকৃতিস্থোঽভবদ্ ভবঃ ॥ ৫.৪১ ॥
তে ভবং বূতভব্যেশং পূর্ববৎ সমবস্থিতম্ ।
দৃষ্ট্বা নারায়ণং দেবং বিস্মিতং বাক্যমব্রুবন্ ॥ ৫.৪২ ॥
ভগবন্ ভূতভব্যেশ গোবৃষাঙ্কিতশাসন ।
দৃষ্ট্বা তে পরমং রূপং নির্বৃতাঃ স্ম সনাতন ॥ ৫.৪৩ ॥
ভবৎপ্রসাদাদমলে পরস্মিন্ পরমেশ্বরে ।
অস্মাকং জায়তে ভক্তিস্ত্বয়্যেবাব্যভিচারিণী ॥ ৫.৪৪ ॥
ইদানীং শ্রোতুমিচ্ছামো মাহাত্ম্যং তব শংকর ।
ভূয়োঽপি তারয়ন্নিত্যং যাথাত্ম্যং পরমেষ্ঠিনঃ ॥ ৫.৪৫ ॥
স তেষাং বাক্যমাকর্ণ্য যোগিনাং যোগসিদ্ধিদঃ ।
প্রাহঃ গম্ভীরয়া বাচা সমালোক্য চ মাধবম্ ॥ ৫.৪৬ ॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) পঞ্চমোঽধ্যায়ঃ ॥ ৫ ॥
ষষ্ঠোঽধ্যায়ঃ
ঈশ্বর উবাচ ।
শৃণুধ্বমৃষয়ঃ সর্বে যথাবৎ পরমেষ্ঠিনঃ ।
বক্ষ্যামীশস্য মাহাত্ম্যং যত্তদ্বেদবিদো বিদুঃ ॥ ৬.১ ॥
সর্বলোকৈকনির্মাতা সর্বলোকৈকরক্ষিতা ।
সর্বলোকৈকসংহর্ত্তা সর্বাত্মাঽহং সনাতনঃ ॥ ৬.২ ॥
সর্বেষামেব বস্তূনামন্তর্যামী মহেশ্বরঃ ।
মধ্যে চান্তঃ স্থিতং সর্বং নাহং সর্বত্র সংস্থিতঃ ॥ ৬.৩ ॥
ভবদ্ভিরদ্ভুতং দৃষ্টং যৎস্বরূপং তু মামকম্ ।
মমৈষা হ্যুপমা বিপ্রা মায়যা দর্শিতা ময়া ॥ ৬.৪ ॥
সর্বেষামেব ভাবানামন্তরা সমবস্থিতঃ ।
প্রেরয়ামি জগৎ কৃৎস্নং ক্রিয়াশাক্তিরিয়ং মম ॥ ৬.৫ ॥
যয়েদং চেষ্টতে বিশ্বং তৎস্বভাবানুবর্ত্তি চ ।
সোঽহং কালো জগৎ কৃৎস্নং প্রেরয়ামি কলাত্মকম্ ॥ ৬.৬ ॥
একাংশেন জগৎ কৃৎস্নং করোমি মুনিপুংগবাঃ ।
সংহরাম্যেকরূপেণ স্থিতাঽবস্থা মমৈব তু ॥ ৬.৭ ॥
আদিমধ্যান্তনির্মুক্তো মায়াতত্ত্বপ্রবর্ত্তকঃ ।
ক্ষোভয়ামি চ সর্গাদৌ প্রধানপুরুষাবুভৌ ॥ ৬.৮ ॥
তাভ্যাং সংজায়তে বিশ্বং সংয়ুক্তাভ্যাং পরস্পরম্ ।
মহদাদিক্রমেণৈব মম তেজো বিজৃম্ভতে ॥ ৬.৯ ॥
যো হি সর্বজগৎসাক্ষী কালচক্রপ্রবর্ত্তকঃ ।
হিরণ্যগর্ভো মার্ত্তণ্ডঃ সোঽপি মদ্দেহসংভবঃ ॥ ৬.১০ ॥
তস্মৈ দিব্যং স্বমৈশ্বর্যং জ্ঞানয়োগং সনাতনম্ ।
দত্তবানাত্মজান্ বেদান্ কল্পাদৌ চতুরো দ্বিজাঃ ॥ ৬.১১ ॥
স মন্নিয়োগতো দেবো ব্রহ্মা মদ্ভাবভাবিতঃ ।
দিব্যং তন্মামকৈশ্বর্যং সর্বদা বহতি স্বয়ম্ ॥ ৬.১২ ॥
স সর্বলোকনির্মাতা মন্নিয়োগেন সর্ববিৎ ।
ভূৎবা চতুর্মুখঃ সর্গং সৃজত্যেবাত্মসংভবঃ ॥ ৬.১৩ ॥
যোঽপি নারায়ণোঽনন্তো লোকানাং প্রভবাব্যযঃ ।
মমৈব পরমা মূর্তিঃ করোতি পরিপালনম্ ॥ ৬.১৪ ॥
যোঽন্তকঃ সর্বভূতানাং রুদ্রঃ কালাত্মকঃ প্রভুঃ ।
মদাজ্ঞয়াঽসৌ সততং সংহরিষ্যতি মে তনুঃ ॥ ৬.১৫ ॥
হব্যং বহতি দেবানাং কব্যং কব্যাশিনামপি ।
পাকং চ কুরুতে বহ্নিঃ সোঽপি মচ্ছক্তিনোদিতঃ ॥ ৬.১৬ ॥
ভুক্তমাহারজাতং চ পচতে তদহর্নিশম্ ।
বৈশ্বানরোঽগ্নির্ভগবানীশ্বরস্য নিয়োগতঃ ॥ ৬.১৭ ॥
যোঽপি সর্বাম্ভসাং যোনির্বরুণো দেবপুংগবঃ ।
সোঽপি সংজীবয়েৎ কৃৎস্নমীশস্যৈব নিয়োগতঃ ॥ ৬.১৮ ॥
যোঽন্তস্তিষ্ঠতি ভূতানাং বহির্দেবঃ প্রভঞ্জনঃ ।
মদাজ্ঞয়াঽসৌ ভূতানাং শরীরাণি বিভর্তি হি ॥ ৬.১৯ ॥
যোঽপি সংজীবনো নৄণাং দেবানামমৃতাকরঃ ।
সোমঃ স মন্নিয়োগেন চোদিতঃ কিল বর্ততে ॥ ৬.২০ ॥
যঃ স্বভাসা জগৎ কৃৎস্নং প্রকাশয়তি সর্বদা ।
সূর্যো বৃষ্টিং বিতনুতে শাস্ত্রেণৈব স্বয়ংভুবঃ ॥ ৬.২১ ॥
যোঽপ্যশেষজগচ্ছাস্তা শক্রঃ সর্বামরেশ্বরঃ ।
যজ্বনাং ফলদো দেবো বর্ত্ততেঽসৌ মদাজ্ঞয়া ॥ ৬.২২ ॥
যঃ প্রশাস্তা হ্যসাধূনাং বর্ত্ততে নিয়মাদিহ ।
যমো বৈবস্বতো দেবো দেবদেবনিয়োগতঃ ॥ ৬.২৩ ॥
যোঽপি সর্বধনাধ্যক্ষো ধনানাং সম্প্রদায়কঃ ।
সোঽপীশ্বরনিয়োগেন কুবেরো বর্ত্ততে সদা ॥ ৬.২৪ ॥
যঃ সর্বরক্ষসাং নাথস্তামসানাং ফলপ্রদঃ ।
মন্নিয়োগাদসৌ দেবো বর্ত্ততে নিরৃতিঃ সদা ॥ ৬.২৫ ॥
বেতালগণভূতানাং স্বামী ভোগফলপ্রদঃ ।
ঈশানঃ কিল ভক্তানাং সোঽপি তিষ্ঠন্মমাজ্ঞয়া ॥ ৬.২৬ ॥
যো বামদেবোঽঙ্গিরসঃ শিষ্যো রুদ্রগণাগ্রণীঃ ।
রক্ষকো যোগিনাং নিত্যং বর্ত্ততেঽসৌ মদাজ্ঞয়া ॥ ৬.২৭ ॥
যশ্চ সর্বজগৎপূজ্যো বর্ত্ততে বিঘ্নকারকঃ ।
বিনায়কো ধর্মরতঃ সোঽপি মদ্বচনাৎ কিল ॥ ৬.২৮ ॥
যোঽপি ব্রহ্মবিদাং শ্রেষ্ঠো দেবসেনাপতিঃ প্রভুঃ ।
স্কন্দোঽসৌ বর্ত্ততে নিত্যং স্বয়ংভূর্বিধিচোদিতঃ ॥ ৬.২৯ ॥
যে চ প্রজানাং পতয়ো মরীচ্যাদ্যা মহর্ষয়ঃ ।
সৃজন্তি বিবিধং লোকং পরস্যৈব নিয়োগতঃ ॥ ৬.৩০ ॥
যা চ শ্রীঃ সর্বভূতানাং দদাতি বিপুলাং শ্রিয়ম্ ।
পত্নী নারায়ণস্যাসৌ বর্ত্ততে মদনুগ্রহাৎ ॥ ৬.৩১ ॥
বাচং দদাতি বিপুলাং যা চ দেবী সরস্বতী ।
সাঽপীশ্বরনিয়োগেন চোদিতা সম্প্রবর্ত্ততে ॥ ৬.৩২ ॥
যাঽশেষপুরুষান্ ঘোরান্নরকাৎ তারয়িষ্যতি ।
সাবিত্রী সংস্মৃতা দেবী দেবাজ্ঞাঽনুবিধায়িনী ॥ ৬.৩৩ ॥
পার্বতী পরমা দেবী ব্রহ্মবিদ্যাপ্রদায়িনী ।
যাঽপি ধ্যাতা বিশেষেণ সাপি মদ্বচনানুগা ॥ ৬.৩৪ ॥
যোঽনন্তমহিমাঽনন্তঃ শেষোঽশেষামরপ্রভুঃ ।
দধাতি শিরসা লোকং সোঽপি দেবনিয়োগতঃ ॥ ৬.৩৫ ॥
যোঽগ্নিঃ সংবর্ত্তকো নিত্যং বডবারূপসংস্থিতঃ ।
পিবত্যখিলমম্ভোধিমীশ্বরস্য নিয়োগতঃ ॥ ৬.৩৬ ॥
যে চতুর্দশ লোকেঽস্মিন্ মনবঃ প্রথিতৌজসঃ ।
পালয়ন্তি প্রজাঃ সর্বাস্তেঽপি তস্য নিয়োগতঃ ॥ ৬.৩৭ ॥
আদিত্যা বসবো রুদ্রা মরুতশ্চ তথাঽশ্বিনৌ ।
অন্যাশ্চ দেবতাঃ সর্বা মচ্ছাস্ত্রেণৈব নিষ্ঠিতাঃ ॥ ৬.৩৮ ॥
গন্ধর্বা গরুডা ঋক্ষাঃ সিদ্ধাঃ সাধ্যাশ্চচারণাঃ ।
যক্ষরক্ষঃ পিশাচাশ্চ স্থিতাঃ সৃষ্টাঃ স্বয়ংভুবঃ ॥ ৬.৩৯ ॥
কলাকাষ্ঠানিমেষাশ্চ মুহূর্ত্তা দিবসাঃ ক্ষপাঃ ।
ঋতবঃ পক্ষমাসাশ্চ স্থিতাঃ শাস্ত্রে প্রজাপতেঃ ॥ ৬.৪০ ॥
যুগমন্বন্তরাণ্যেব মম তিষ্ঠন্তি শাসনে ।
পরাশ্চৈব পরার্ধাশ্চ কালভেদাস্তথা পরে ॥ ৬.৪১ ॥
চতুর্বিধানি বূতানি স্থাবরাণি চরাণি চ ।
নিয়োগাদেব বর্ত্তন্তে দেবস্য পরমাত্মনঃ ॥ ৬.৪২ ॥
পাতালানি চ সর্বাণি ভুবনানি চ শাসনাৎ ।
ব্রহ্মাণ্ডানি চ বর্ত্তন্তে সর্বাণ্যেব স্বয়ংভুবঃ ॥ ৬.৪৩ ॥
অতীতান্যপ্যসংখ্যানি ব্রহ্মাণ্ডানি মমাজ্ঞয়া ।
প্রবৃত্তানি পদার্থৌঘৈঃ সহিতানি সমন্ততঃ ॥ ৬.৪৪ ॥
ব্রহ্মাণ্ডানি ভবিষ্যন্তি সহ বস্তুভিরাত্মগৈঃ ।
বহিষ্যন্তি সদৈবাজ্ঞাং পরস্য পরমাত্মনঃ ॥ ৬.৪৫ ॥
ভূমিরাপোঽনলো বায়ুঃ খং মনো বুদ্ধিরেব চ ।
ভূতাদিরাদিপ্রকৃতির্নিয়োগে মম বর্ত্ততে ॥ ৬.৪৬ ॥
যোঽশেষজগতাং যোনির্মোহিনী সর্বদেহিনাম্ ।
মায়া বিবর্ত্ততে নিত্যং সাপীশ্বরনিয়োগতঃ ॥ ৬.৪৭ ॥
যো বৈ দেহভৃতাং দেবঃ পুরুষঃ পঠ্যতে পরঃ ।
আত্মাঽসৌ বর্ত্ততে নিত্যমীশ্বরস্য নিয়োগতঃ ॥ ৬.৪৮ ॥
বিধূয় মোহকলিলং যয়া পশ্যতি তৎ পদম্ ।
সাঽপি বুদ্ধির্মহেশস্য নিয়োগবশবর্ত্তিনী ॥ ৬.৪৯ ॥
বহুনাঽত্র কিমুক্তেন মম শক্ত্যাত্মকং জগৎ ॥ ॥
ময়ৈব প্রের্যতে কৃৎস্নং ময়্যেব প্রলয়ং ব্রজেৎ ॥ ৬.৫০ ॥
অহং হি ভগবানীশঃ স্বয়ং জ্যোতিঃ সনাতনঃ ।
পরমাত্মার পরং ব্রহ্ম মত্তো হ্যন্যো ন বিদ্যতে ॥ ৬.৫১ ॥
ইত্যেতৎ পরমং জ্ঞানং যুষ্মাকং কথিতং ময়া ।
জ্ঞাৎবা বিমুচ্যতে জন্তুর্জন্মসংসারবন্ধনাৎ ॥ ৬.৫২ ॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) ষষ্ঠোঽধ্যায়ঃ ॥ ৬ ॥
সপ্তমোঽধ্যায়ঃ
ঈশ্বর উবাচ ।
শৃণুধ্বমৃষয়ঃ সর্বে প্রভাবং পরমেষ্ঠিনঃ ।
যং জ্ঞাৎবা পুরুষো মুক্তো ন সংসারে পতেৎ পুনঃ ॥ ৭.১ ॥
পরাৎ পরতরং ব্রহ্ম শাশ্বতং নিষ্কলং পরম্ ।
নিত্যানন্দং নির্বিকল্পং তদ্ধাম পরমং মম ॥ ৭.২ ॥
অহং ব্রহ্মবিদাং ব্রহ্মা স্বয়ংভূর্বিশ্বতোমুখঃ ।
মায়াবিনামহং দেবঃ পুরাণো হরিরব্যযঃ ॥ ৭.৩ ॥
যোগিনামস্ম্যহং শংভুঃ স্ত্রীণাং দেবী গিরীন্দ্রজা ।
আদিত্যানামহং বিষ্ণুর্বসূনামস্মি পাবকঃ ॥ ৭.৪ ॥
রুদ্রাণাং শংকরশ্চাহং গরুডঃ পততামহম্ ।
ঐরাবতো গজেন্দ্রাণাং রামঃ শস্ত্রপ্রভৃতামহম্ ॥ ৭.৫ ॥
ঋষীণাং চ বসিষ্ঠোঽহং দেবানাং চ শতক্রতুঃ ।
শিল্পিনাং বিশ্বকর্মাঽহং প্রহ্লাদোঽস্ম্যমরদ্বিষাম্ ॥ ৭.৬ ॥
মুনীনামপ্যহং ব্যাসো গণানাং চ বিনায়কঃ ।
বীরাণাং বীরভদ্রোঽহং সিদ্ধানাং কপিলো মুনিঃ ॥ ৭.৭ ॥
পর্বতানামহং মেরুর্নক্ষত্রাণাং চ চন্দ্রমাঃ ।
বজ্রং প্রহরণানাং চ ব্রতানাং সত্যমস্ম্যহম্ ॥ ৭.৮ ॥
অনন্তো ভোগিনাং দেবঃ সেনানীনাং চ পাবকিঃ ।
আশ্রমাণাং চ গৃহস্থোঽহমীশ্বরাণাং মহেশ্বরঃ ॥ ৭.৯ ॥
মহাকল্পশ্চ কল্পানাং যুগানাং কৃতমস্ম্যহম্ ।
কুবেরঃ সর্বয়ক্ষাণাং গণেশানাং চ বীরুকঃ ॥ ৭.১০ ॥
প্রজাপতীনাং দক্ষোঽহং নিরৃতিঃ সর্বরক্ষসাম্ ।
বায়ুর্বলবতামস্মি দ্বীপানাং পুষ্করোঽস্ম্যহম্ ॥ ৭.১১ ॥
মৃগেন্দ্রাণাং চ সিংহোঽহং যন্ত্রাণাং ধনুরেব চ ।
বেদানাং সামবেদোঽহং যজুষাং শতরুদ্রিয়ম্ ॥ ৭.১২ ॥
সাবিত্রী সর্বজপ্যানাং গুহ্যানাং প্রণবোঽস্ম্যহম্ ।
সূক্তানাং পৌরুষং সূক্তং জ্যেষ্ঠসাম চ সামসু ॥ ৭.১৩ ॥
সর্ববেদার্থবিদুষাং মনুঃ স্বায়ংভুবোঽস্ম্যহম্ ।
ব্রহ্মাবর্ত্তস্তু দেশানাং ক্ষেত্রাণামবিমুক্তকম্ ॥ ৭.১৪ ॥
বিদ্যানামাত্মবিদ্যাঽহং জ্ঞানানামৈশ্বরং পরম্ ।
ভূতানামস্ম্যহং ব্যোম সত্ত্বানাং মৃত্যুরেব চ ॥ ৭.১৫ ॥
পাশানামস্ম্যহং মায়া কালঃ কলয়তামহম্ ।
গতীনাং মুক্তিরেবাহং পরেষাং পরমেশ্বরঃ ॥ ৭.১৬ ॥
যচ্চান্যদপি লোকেঽস্মিন্ সত্ত্বং তেজোবলাধিকম্ ।
তৎসর্বং প্রতিজানীধ্বং মম তেজোবিজৃম্ভিতম্ ॥ ৭.১৭ ॥
আত্মানঃ পশবঃ প্রোক্তাঃ সর্বে সংসারবর্ত্তিনঃ ।
তেষাং পতিরহং দেবঃ স্মৃতঃ পশুপতির্বুধৈঃ ॥ ৭.১৮ ॥
মায়াপাশেন বধ্নামি পশূনেতান্ স্বলীলয়া ।
মামেব মোচকং প্রাহুঃ পশূনাং বেদবাদিনঃ ॥ ৭.১৯ ॥
মায়াপাশেন বদ্ধানাং মোচকোঽন্যো ন বিদ্যতে ।
মামৃতে পরমাত্মানং ভূতাধিপতিমব্যযম্ ॥ ৭.২০ ॥
চতুর্বিশতিতত্ত্বানি মায়া কর্ম গুণা ইতি ।
এতে পাশাঃ পশুপতেঃ ক্লেশাশ্চ পশুবন্ধনাঃ ॥ ৭.২১ ॥
মনো বুদ্ধিরহংকারঃ খানিলাগ্নিজলানি ভূঃ ।
এতাঃ প্রকৃতয়স্ত্বষ্টৌ বিকারাশ্চ তথাপরে ॥ ৭.২২ ॥
শ্রোত্রং ৎবক্চক্ষুষী জিহ্বা ঘ্রাণং চৈব তু পঞ্চমম্ ।
পায়ূপস্থং করৌ পাদৌ বাক্ চৈব দশমী মতা ॥ ৭.২৩ ॥
শব্দঃ স্পর্শশ্চ রূপং চ রসো গন্ধস্তথৈব চ ।
ত্রয়োবিংশতিরেতানি তত্ত্বানি প্রাকৃতানি ॥ ৭.২৪ ॥
চতুর্বিংশকমব্যক্তং প্রধানং গুণলক্ষণম্ ।
অনাদিমধ্যনিধনং কারণং জগতঃ পরম্ ॥ ৭.২৫ ॥
সত্ত্বং রজস্তমশ্চেতি গুণত্রয়মুদাহৃতম্ ।
সাম্যাবস্থিতিমেতেষামব্যক্তং প্রকৃতিং বিদুঃ ॥ ৭.২৬ ॥
সত্ত্বং জ্ঞানং তমোঽজ্ঞানং রজো মিশ্রমুদাহৃতম্ ।
গুণানাং বুদ্ধিবৈষম্যাদ্ বৈষম্যং কবয়ো বিদুঃ ॥ ৭.২৭ ॥
ধর্মাধর্মাবিতি প্রোক্তৌ পাশৌ দ্বৌ কর্মসংজ্ঞিতৌ ।
ময়্যর্পিতানি কর্মাণি নবন্ধায় বিমুক্তয়ে ॥ ৭.২৮ ॥
অবিদ্যামস্মিতাং রাগং দ্বেষং চাভিনিবেশকম্ ।
ক্লেশাখ্যাংস্তান্ স্বয়ং প্রাহ পাশানাত্মনিবন্ধনান্ ॥ ৭.২৯ ॥
এতেষামেব পাশানাং মায়া কারণমুচ্যতে ।
মূলপ্রকৃতিরব্যক্তা সা শক্তির্ময়ি তিষ্ঠতি ॥ ৭.৩০ ॥
স এব মূলপ্রকৃতিঃ প্রধানং পুরুষোঽপি চ ।
বিকারা মহদাদীনি দেবদেবঃ সনাতনঃ ॥ ৭.৩১ ॥
স এব বন্ধঃ স চ বন্ধকর্ত্তাস এব পাশঃ পশুভৃৎস এব ।
স বেদ সর্বং ন চ তস্য বেত্তাতমাহুরাদ্যং পুরুষং পুরাণম্ ॥ ৭.৩২ ॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) সপ্তমোঽধ্যায়ঃ ॥ ৭ ॥
অষ্টমোঽধ্যায়ঃ
ঈশ্বর উবাচ ।
অন্যদ্ গুহ্যতমং জ্ঞানং বক্ষ্যে ব্রাহ্মণপুংগবাঃ ।
যেনাসৌ তরতে জন্তুর্ঘোরং সংসারসাগরম্ ॥ ৮.১ ॥
অহং ব্রহ্মময়ঃ শান্তঃ শাশ্বতো নির্মলোঽব্যযঃ ।
একাকী ভগবানুক্তঃ কেবলঃ পরমেশ্বরঃ ॥ ৮.২ ॥
মম যোনির্মহদ্ ব্রহ্ম তত্র গর্ভং দধাম্যহম্ ।
মূল মায়াভিধানং তং ততো জাতমিদং জগৎ ॥ ৮.৩ ॥
প্রধানং পুরুষো হ্যত্মা মহান্ ভূতাদিরেব চ ।
তন্মাত্রাণি মহাভূতানীন্দ্রিয়াণি চ জজ্ঞিরে ॥ ৮.৪ ॥
ততোঽণ্ডমভবদ্ধৈমং সূর্যকোটিসমপ্রভম্ ।
তস্মিন্ জজ্ঞে মহাব্রহ্মা মচ্ছক্ত্যা চোপবৃংহিতঃ ॥ ৮.৫ ॥
যে চান্যে বহবো জীবা মন্ময়াঃ সর্ব এব তে ।
ন মাং পশ্যন্তি পিতরং মায়যা মম মোহিতাঃ ॥ ৮.৬ ॥
যাসু যোনিষু সর্বাসু সংভবন্তি হি মূর্ত্তয়ঃ ।
তাসাং মায়া পরা যোনির্মামেব পিতরং বিদুঃ ॥ ৮.৭ ॥
যো মামেবং বিজানাতি বীজিনং পিতরং প্রভুম্ ।
স ধীরঃ সর্বলোকেষু ন মোহমধিগচ্ছতি ॥ ৮.৮ ॥
ঈশানঃ সর্ববিদ্যানাং ভূতানাং পরমেশ্বরঃ ।
ওঙ্কারমূর্তির্ভগবানহং ব্রহ্মা প্রজাপতিঃ ॥ ৮.৯ ॥
সমং সর্বেষু ভূতেষু তিষ্ঠন্তং পরমেশ্বরম্ ।
বিনশ্যৎস্ববিনশ্যন্তং যঃ পশ্যতি স পশ্যতি ॥ ৮.১০ ॥
সমং পশ্যন্ হি সর্বত্র সমবস্থিতমীশ্বরম্ ।
ন হিনস্ত্যাত্মনাত্মানং ততো যাতি পরাংগতিম্ ॥ ৮.১১ ॥
বিদিৎবা সপ্ত সূক্ষ্মাণি ষডঙ্গং চ মহেশ্বরম্ ।
প্রধানবিনিয়োগজ্ঞঃ পরং ব্রহ্মাধিগচ্ছতি ॥ ৮.১২ ॥
সর্বজ্ঞতা তৃপ্তিরনাদিবোধঃ স্বতন্দতা নিত্যমলুপ্তশক্তিঃ ।
অনন্তশক্তিশ্চ বিভোর্বিদিৎবা ষডাহুরঙ্গানি মহেশ্বরস্য ॥ ৮.১৩ ॥
তন্মাত্রাণি মন আত্মা চ তানি সূক্ষ্মাণ্যাহুঃ সপ্ততত্ত্বাত্মকানি ।
যা সা হেতুঃ প্রকৃতিঃ সা প্রধানংবন্ধঃ প্রোক্তো বিনিয়োগোঽপি তেন ॥ ৮.১৪ ॥
যা সা শক্তিঃ প্রকৃতৌ লীনরূপাবেদেষূক্তা কারণং ব্রহ্ময়োনিঃ ।
তস্যা একঃ পরমেষ্ঠী পুরস্তা-ন্মহেশ্বরঃ পুরুষঃ সত্যরূপঃ ॥ ৮.১৫ ॥
ব্রহামা যোগী পরমাত্মা মহীয়ান্ ব্যোমব্যাপী বেদবেদ্যঃ পুরাণঃ ।
একো রুদ্রো মৃত্যুমব্যক্তমেকংবীজং বিশ্বং দেব একঃ স এব ॥ ৮.১৬ ॥
তমেবৈকং প্রাহুরন্যেঽপ্যনেকং ৎবেকাত্মানং কেচিদন্যংতমাহুঃ ।
অণোরণীয়ান্ মহতো মহীয়ান্ মহাদেবঃ প্রোচ্যতে বেদবিদ্ভিঃ ॥ ৮.১৭ ॥
এবম্ হি যো বেদ গুহাশয়ং পরং প্রভুং পুরাণং পুরুষং বিশ্বরূপম্ ।
হিরণ্ময়ং বুদ্ধিমতাং পরাং গতিংসবুদ্ধিমান্ বুদ্ধিমতীত্য তিষ্ঠতি ॥ ৮.১৮ ॥
ইতি শ্রীকূর্মপারাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) অষ্টমোঽধ্যায়ঃ ॥ ৮ ॥
নবমোঽধ্যায়ঃ
ঋষয় ঊচুঃ ।
নিষ্কলো নির্মলো নিত্যো নিষ্ক্রিয়ঃ পরমেশ্বরঃ ।
তন্নো বদ মহাদেব বিশ্বরূপঃ কথং ভবান্ ॥ ৯.১ ॥
ঈশ্বর উবাচ ।
নাহং বিশ্বো ন বিশ্বং চ মামৃতে বিদ্যতে দ্বিজাঃ ।
মায়ানিমিত্তমত্রাস্তি সা চাত্মনি ময়া শ্রিতা ॥ ৯.২ ॥
অনাদিনিধনা শক্তির্মায়াঽব্যক্তসমাশ্রয়া ।
তন্নিমিত্তঃ প্রপঞ্চোঽয়মব্যক্তাদভবৎ খলু ॥ ৯.৩ ॥
অব্যক্তং কারণং প্রাহুরানন্দং জ্যোতিরক্ষরম্ ।
অহমেব পরং ব্রহ্ম মত্তো হ্যন্যন্ন বিদ্যতে ॥ ৯.৪ ॥
তস্মান্মে বিশ্বরূপৎবং নিশ্চিতং ব্রহ্মবাদিভিঃ ।
একৎবে চ পৃথক্ত্বং চ প্রোক্তমেতন্নিদর্শনম্ ॥ ৯.৫ ॥
অহং তৎ পরমং ব্রহ্ম পরমাত্মা সনাতনঃ ।
অকারণং দ্বিজাঃ প্রোক্তো ন দোষো হ্যাত্মনস্তথা ॥ ৯.৬ ॥
অনন্তা শক্তয়োঽব্যক্তা মায়যা সংস্থিতা ধ্রুবাঃ ।
তস্মিন্ দিবি স্থিতং নিত্যমব্যক্তং ভাতি কেবলম্ ॥ ৯.৭ ॥
যাভিস্তল্লক্ষ্যতে ভিন্নং ব্রগ্মাব্যক্তং সনাতনম্ ।
একয়া মম সায়ুজ্যমনাদিনিধনং ধ্রুবম্ ॥ ৯.৮ ॥
পুংসোঽন্যাভূদ্যথা ভূতিরন্যযা ন তিরোহিতম্ ।
অনাদিমধ্যং তিষ্ঠন্তং চেষ্টতেঽবিদ্যযা কিল ॥ ৯.৯ ॥
তদেতৎ পরমং ব্যক্তং প্রভামণ্ডলমণ্ডিতম্ ।
তদক্ষরং পরং জ্যোতিস্তদ্ বিষ্ণোঃ পরমং পদম্ ॥ ৯.১০ ॥
তত্র সর্বমিদং প্রোতমোতং চৈবাখিলং জগৎ ।
তদেব চ জগৎ কৃৎস্নং তদ্ বিজ্ঞায় বিমুচ্যতে ॥ ৯.১১ ॥
যতো বাচো নিবর্ত্তন্তে অপ্রাপ্য মনসা সহ ।
আনন্দং ব্রহ্মণো বিদ্বান্ বিভেতি ন কুতশ্চন ॥ ৯.১২ ॥
বেদাহমেতং পুরুষং মহান্ত-
মাদিত্যবর্ণং তমসঃ পরস্তাৎ ।
তদ্ বিজ্ঞায় পরিমুচ্যেত বিদ্বান্
নিত্যানন্দী ভবতি ব্রহ্মভূতঃ ॥ ৯.১৩ ॥
যস্মাৎ পরং নাপরমস্তি কিঞ্চিৎ
যজ্জ্যোতিষাং জ্যোতিরেকং দিবিস্থম্ ।
তদেবাত্মানং মন্যমানোঽথ বিদ্বা-
নাত্মনন্দী ভবতি ব্রহ্মভূতঃ ॥ ৯.১৪ ॥
তদপ্যযং কলিলং গূঢদেহং
ব্রহ্মানন্দমমৃতং বিশ্বধামা ।
বদন্ত্যেবং ব্রাহ্মণা ব্রহ্মনিষ্ঠা
যত্র গৎবা ন নিবর্ত্তেত ভূয়ঃ ॥ ৯.১৫ ॥
হিরণ্ময়ে পরমাকাশতত্ত্বে
যদর্চিষি প্রবিভাতীব তেজঃ ।
তদ্বিজ্ঞানে পরিপশ্যন্তি ধীরা
বিভ্রাজমানং বিমলং ব্যোম ধাম ॥ ৯.১৬ ॥
ততঃ পরং পরিপশ্যন্তি ধীরা
আত্মন্যাত্মানমনুভূয় সাক্ষাৎ ।
স্বয়ংপ্রভুঃ পরমেষ্ঠী মহীয়ান্
ব্রহ্মানন্দী ভগবানীশ এষঃ ॥ ৯.১৭ ॥
একো দেবঃ সর্বভূতেষু গূঢঃ
সর্বব্যাপী সর্বভূতান্তরাত্মা ।
তমেবৈকং যেঽনুপশ্যন্তি ধীরা-
স্তেষাং শান্তিঃ শাশ্বতীনেতরেষাম্ ॥ ৯.১৮ ॥
সর্বায়নশিরোগ্রীবঃ সর্বভূতগুহাশয়ঃ ।
সর্বব্যাপী চ ভগবান্ ন তস্মাদন্যদিষ্যতে ॥ ৯.১৯ ॥
ইত্যেতদৈশ্বরং জ্ঞানমুক্তং বো মুনিপুংগবাঃ ।
গোপনীয়ং বিশেষেণ যোগিনামপি দুর্লভম্ ॥ ৯.২০ ॥
ইতি শ্রীকূর্মপারাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) নবমোঽধ্যায়ঃ ॥ ৯ ॥
দশমোঽধ্যায়ঃ
ঈশ্বর উবাচ ।
অলিঙ্গমেকমব্যক্তং লিঙ্গং ব্রহ্মেতি নিশ্চিতম্ ।
স্বয়ংজ্যোতিঃ পরং তত্ত্বং পরে ব্যোম্নি ব্যবস্থিতম্ ॥ ১০.১ ॥
অব্যক্তং কারণং যত্তদক্ষরং পরমং পদম্ ।
নির্গুণং শুদ্ধবিজ্ঞানং তদ্ বৈ পশ্যন্তি সূরয়ঃ ॥ ১০.২ ॥
তন্নিষ্ঠাঃ শান্তসংকল্পা নিত্যং তদ্ভাবভাবিতাঃ ।
পশ্যন্তি তৎ পরং ব্রহ্ম যত্তল্লিঙ্গমিতি শ্রুতিঃ ॥ ১০.৩ ॥
অন্যথা নহি মাং দ্রষ্টুং শক্যং বৈ মুনিপুংগবাঃ ।
নহি তদ্ বিদ্যতে জ্ঞানং যতস্তজ্জ্ঞায়তে পরম্ ॥ ১০.৪ ॥
এতত্তৎপরমং জ্ঞানং কেবলং কবয়ো বিদুঃ ।
অজ্ঞানমিতরৎ সর্বং যস্মান্মায়াময়ং জগৎ ॥ ১০.৫ ॥
যজ্জ্ঞানং নির্মলং শুদ্ধং নির্বিকল্পং যদব্যযম্ ।
মমাত্মাঽসৌ তদেবেমিতি প্রাহুর্বিপশ্চিতঃ ॥ ১০.৬ ॥
যেঽপ্যনেকং প্রপশ্যন্তি তেঽপি পশ্যন্তি তৎপরম্ ।
আশ্রিতাঃ পরমাং নিষ্ঠাং বুদ্ধ্বৈকং তত্ত্বমব্যযম্ ॥ ১০.৭ ॥
যে পুনঃ পরমং তত্ত্বমেকং বানেকমীশ্বরম্ ।
ভক্ত্যা মাং সম্প্রপশ্যন্তি বিজ্ঞেয়াস্তে তদাত্মকাঃ ॥ ১০.৮ ॥
সাক্ষাদেব প্রপশ্যন্তি স্বাত্মানং পরমেশ্বরম্ ।
নিত্যানন্দং নির্বিকল্পং সত্যরূপমিতি স্থিতিঃ ॥ ১০.৯ ॥
ভজন্তে পরমানন্দং সর্বগং জগদাত্মকম্ ।
স্বাত্মন্যবস্থিতাঃ শান্তাঃ পরঽব্যক্তে পরস্য তু ॥ ১০.১০ ॥
এষা বিমুক্তিঃ পরমা মম সায়ুজ্যমুত্তমম্ ।
নির্বাণং ব্রহ্মণা চৈক্যং কৈবল্যং কবয়ো বিদুঃ ॥ ১০.১১ ॥
তস্মাদনাদিমধ্যান্তং বস্ত্বেকং পরমং শিবম্ ।
স ঈশ্বরো মহাদেবস্তং বিজ্ঞায় প্রমুচ্যতে ॥ ১০.১২ ॥
ন তত্র সূর্যঃ প্রবিভাতীহ চন্দ্রো
নক্ষত্রাণাং গণো নোত বিদ্যুৎ ।
তদ্ভাসিতং হ্যখিলং ভাতি বিশ্বং
অতীবভাসমমলং তদ্বিভাতি ॥ ১০.১৩ ॥
বিশ্বোদিতং নিষ্কলং নির্বিকল্পং
শুদ্ধং বৃহন্তং পরমং যদ্বিভাতি ।
অত্রান্তরে ব্রহ্মবিদোঽথ নিত্যং
পশ্যন্তি তত্ত্বমচলং যৎ স ঈশঃ ॥ ১০.১৪ ॥
নিত্যানন্দমমৃতং সত্যরূপং
শুদ্ধং বদন্তি পুরুষং সর্ববেদাঃ ।
তমোমিতি প্রণবেনেশিতারং
ধায়ায়ন্তি বেদার্থবিনিশ্চিতার্থাঃ ॥ ১০.১৫ ॥
ন ভূমিরাপো ন মনো ন বহ্নিঃ
প্রাণোঽনিলো গগনং নোত বুদ্ধিঃ ।
ন চেতনোঽন্যৎ পরমাকাশমধ্যে
বিভাতি দেবঃ শিব এব কেবলঃ ॥ ১০.১৬ ॥
ইত্যেতদুক্তং পরমং রহস্যং
জ্ঞানামৃতং সর্ববেদেষু গূঢম্ ।
জানাতি যোগী বিজনেঽথ দেশে
যুঞ্জীত যোগং প্রয়তো হ্যজস্ত্রম্ ॥ ১০.১৭ ॥
ইতী শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) দশমোঽধ্যায়ঃ ॥ ১০ ॥
একাদশোঽধ্যায়ঃ
ঈশ্বর উবাচ ।
অতঃ পরং প্রবক্ষ্যামি যোগং পরমদুর্লভম্ ।
যেনাত্মানং প্রপশ্যন্তি ভানুমন্তমিবেশ্বরম্ ॥ ১১.১ ॥
যোগাগ্নির্দহতি ক্ষিপ্রমশেষং পাপপঞ্জরম্ ।
প্রসন্নং জায়তে জ্ঞানং সাক্ষান্নির্বাণসিদ্ধিদম্ ॥ ১১.২ ॥
যোগাৎসংজায়তে জ্ঞানং জ্ঞানাদ্ যোগঃ প্রবর্ত্ততে ।
যোগজ্ঞানাভিয়ুক্তস্য প্রসীদতি মহেশ্বরঃ ॥ ১১.৩ ॥
এককালং দ্বিকালং বা ত্রিকালং নিত্যমেব বা ।
যে যুঞ্জন্তি মহায়োগং তে বিজ্ঞেয়া মহেশ্বরাঃ ॥ ১১.৪ ॥
যোগস্তু দ্বিবিধো জ্ঞেয়ো হ্যভাবঃ প্রথমো মতঃ ।
অপরস্তু মহায়োগঃ সর্বয়োগোত্তমোত্তমঃ ॥ ১১.৫ ॥
শূন্যং সর্বনিরাভাসং স্বরূপং যত্র চিন্ত্যতে ।
অভাবয়োগঃ স প্রোক্তো যেনাত্মানং প্রপশ্যতি ॥ ১১.৬ ॥
যত্র পশ্যতি চাত্মানং নিত্যানন্দং নিরঞ্জনম্ ।
ময়ৈক্যং স মহায়োগো ভাষিতঃ পরমেশ্বরঃ ॥ ১১.৭ ॥
যে চান্যে যোগিনাং যোগাঃ শ্রূয়ন্তে গ্রন্থবিস্তরে ।
সর্বে তে ব্রহ্ময়োগস্য কলাং নার্হন্তি ষোডশীম্ ॥ ১১.৮ ॥
যত্র সাক্ষাৎ প্রপশ্যন্তি বিমুক্তা বিশ্বমীশ্বরম্ ।
সর্বেষামেব যোগানাং স যোগঃ পরমো মতঃ ॥ ১১.৯ ॥
সহস্রশোঽথ শতশো যে চেশ্বরবহিষ্কৃতাঃ ।
ন তে পশ্যন্তি মামেকং যোগিনো যতমানসাঃ ॥ ১১.১০ ॥
প্রাণায়ামস্তথা ধ্যানং প্রত্যাহারোঽথ ধারণা ।
সমাধিশ্চ মুনিশ্রেষ্ঠা যমো নিয়ম আসনম্ ॥ ১১.১১ ॥
ময়্যেকচিত্ততায়োগো বৃত্ত্যন্তরনিরোধতঃ ।
তৎসাধনানি চান্যানি যুষ্মাকং কথিতানি তু ॥ ১১.১২ ॥
অহিংসা সত্যমস্তেয়ং ব্রহ্মচর্যাপরিগ্রহৌ ।
যমাঃ সংক্ষেপতঃ প্রোক্তাশ্চিত্তশুদ্ধিপ্রদা নৃণাম্ ॥ ১১.১৩ ॥
কর্মণা মনসা বাচা সর্বভূতেষু সর্বদা ।
অক্লেশজননং প্রোক্তা ৎবহিংসা পরমর্ষিভিঃ ॥ ১১.১৪ ॥
অহিংসায়াঃ পরো ধর্মো নাস্ত্যহিংসা পরং সুখম্ ।
বিধিনা যা ভবেদ্ধিংসা ৎবহিংসৈব প্রকীর্ত্তিতা ॥ ১১.১৫ ॥
সত্যেন সর্বমাপ্নোতি সত্যে সর্বং প্রতিষ্ঠিতম্ ।
যথার্থকথনাচারঃ সত্যং প্রোক্তং দ্বিজাতিভিঃ ॥ ১১.১৬ ॥
পরদ্রব্যাপহরণং চৌর্যাদঽথ বলেন বা ।
স্তেয়ং তস্যানাচরণাদস্তেয়ং ধর্মসাধনম্ ॥ ১১.১৭ ॥
কর্মণা মনসা বাচা সর্বাবস্থাসু সর্বদা ।
সর্বত্র মৈথুনত্যাগং ব্রহ্মচর্যং প্রচক্ষতে ॥ ১১.১৮ ॥
দ্রব্যাণামপ্যনাদানমাপদ্যপি তথেচ্ছয়া ।
অপরিগ্রহং ইত্যাহুস্তং প্রয়ত্নেন পালয়েৎ ॥ ১১.১৯ ॥
তপঃ স্বাধ্যায়সংতোষৌ শৌচমীশ্বরপূজনম্ ।
সমাসান্নিয়মাঃ প্রোক্তা যোগসিদ্ধিপ্রদায়িনঃ ॥ ১১.২০ ॥
উপবাসপরাকাদিকৃচ্ছ্রচান্দ্রায়ণাদিভিঃ ।
শরীরশোষণং প্রাহুস্তাপসাস্তপ উত্তমম্ ॥ ১১.২১ ॥
বেদান্তশতরুদ্রীয়প্রণবাদিজপং বুধাঃ ।
সত্ত্বসিদ্ধিকরং পুংসাং স্বাধ্যায়ং পরিচক্ষতে ॥ ১১.২২ ॥
স্বাধ্যায়স্য ত্রয়ো ভেদা বাচিকোপাংশুমানসাঃ ।
উত্তরোত্তরবৈশিষ্ট্যং প্রাহুর্বেদার্থবেদিনঃ ॥ ১১.২৩ ॥
যঃ শব্দবোধজননঃ পরেষাং শৃণ্বতাং স্ফুটম্ ।
স্বাধ্যায়ো বাচিকঃ প্রোক্ত উপাংশোরথ লক্ষণম্ ॥ ১১.২৪ ॥
ওষ্ঠয়োঃ স্পন্দমাত্রেণ পরস্যাশব্দবোধকম্ ।
উপাংশুরেষ নির্দিষ্টঃ সাহস্রবাচিকোজপঃ ॥ ১১.২৫ ॥
যৎপদাক্ষরসঙ্গত্যা পরিস্পন্দনবর্জিতম্ ।
চিন্তনং সর্বশব্দানাং মানসং তং জপং বিদুঃ ॥ ১১.২৬ ॥
যদৃচ্ছালাভতো নিত্যমলং পুংসো ভবেদিতি ।
প্রাশস্ত্যমৃষয়ঃ প্রাহুঃ সংতোষং সুখলক্ষণম্ ॥ ১১.২৭ ॥
বাহ্যমাভ্যন্তরং শৌচং দ্বিধা প্রোক্তং দ্বিজোত্তমাঃ ।
মৃজ্জলাভ্যাং স্মৃতং বাহ্যং মনঃ শুদ্ধিরথান্তরম্ ॥ ১১.২৮ ॥
স্তুতিস্মরণপূজাভির্বাঙ্মনঃ কায়কর্মভিঃ ।
সুনিশ্চলা শিবে ভক্তিরেতদীশ্বরপূজনম্ ॥ ১১.২৯ ॥
যমাশ্চ নিয়মাঃ প্রোক্তাঃ প্রাণায়ামং নিবোধত ।
প্রাণঃ স্বদেহজো বায়ুরায়ামস্তন্নিরোধনম্ ॥ ১১.৩০ ॥
উত্তমাধমমধ্যৎবাৎ ত্রিধাঽয়ং প্রতিপাদিতঃ ।
য এব দ্বিবিধঃ প্রোক্তঃ সগর্ভোঽগর্ভ এব চ ॥ ১১.৩১ ॥
মাত্রাদ্বাদশকো মন্দশ্চতুর্বিশতিমাত্রকঃ ।
মধ্যমঃ প্রাণসংরোধঃ ষট্ত্রিংশান্মাত্রিকোত্তমঃ ॥ ১১.৩২ ॥
যঃ স্বেদকম্পনোচ্ছ্বাসজনকস্তু যথাক্রমম্ ।
মন্দমধ্যমমুখ্যানামানন্দাদুত্তমোত্তমঃ ॥ ১১.৩৩ ॥
সগর্ভমাহুঃ সজপমগর্ভং বিজপং বুধাঃ ।
এতদ্ বৈ যোগিনামুক্তং প্রাণায়ামস্য লক্ষণম্ ॥ ১১.৩৪ ॥
সব্যাহৃতিং সপ্রণবাং গায়ত্রীং শিরসা সহ ।
ত্রির্জপেদায়তপ্রাণঃ প্রাণায়ামঃ স উচ্যতে ॥ ১১.৩৫ ॥
রেচকঃ পূরকশ্চৈব প্রাণায়ামোঽথ কুম্ভকঃ ।
প্রোচ্যতে সর্বশাস্ত্রেষু যোগিভির্যতমানসৈঃ ॥ ১১.৩৬ ॥
রেচকো বাহ্যনিশ্বাসঃ পূরকস্তন্নিরোধনঃ ।
সাম্যেন সংস্থিতির্যা সা কুম্ভকঃ পরিগীয়তে ॥ ১১.৩৭ ॥
ইন্দ্রিয়াণাং বিচরতাং বিষয়েষু স্ববাবতঃ ।
নিগ্রহঃ প্রোচ্যতে সদ্ভিঃ প্রত্যাহারস্তু সত্তমাঃ ॥ ১১.৩৮ ॥
হৃৎপুণ্ডরীকে নাভ্যাং বা মূর্ধ্নি পর্বসুস্তকে ।
এবমাদিষু দেশেষু ধারণা চিত্তবন্ধনম্ ॥ ১১.৩৯ ॥
দেশাবস্থিতিমালম্ব্য বুদ্ধের্যা বৃত্তিসংততিঃ ।
বৃত্ত্যন্তরৈরসৃষ্টা যা তদ্ধ্যানং সূরয়ো বিদুঃ ॥ ১১.৪০ ॥
একাকারঃ সমাধিঃ স্যাদ্ দেশালম্বনবর্জিতঃ ।
প্রত্যযো হ্যর্থমাত্রেণ যোগসাধনমুত্তমম্ ॥ ১১.৪১ ॥
ধারণা দ্বাদশায়ামা ধ্যানং দ্বাদশধারণাঃ ।
ধ্যানং দ্বাদশকং যাবৎ সমাধিরভিধীয়তে ॥ ১১.৪২ ॥
আসনং স্বস্তিকং প্রোক্তং পদ্মমর্দ্ধাসনং তথা ।
সাধনানাং চ সর্বেষামেতৎসাধনমুত্তমম্ ॥ ১১.৪৩ ॥
ঊর্বোরুপরি বিপ্রেন্দ্রাঃ কৃৎবা পাদতলে উভে ।
সমাসীনাত্মনঃ পদ্মমেতদাসনমুত্তমম্ ॥ ১১.৪৪ ॥
একং পাদমথৈকস্মিন্ বিষ্টভ্যোরসি সত্তমাঃ ।
আসীনার্দ্ধাসনমিদং যোগসাধনমুত্তমম্ ॥ ১১.৪৫ ॥
উভে কৃৎবা পাদতলে জানূর্বোরন্তরেণ হি ।
সমাসীতাত্মনঃ প্রোক্তমাসনং স্বস্তিকং পরম্ ॥ ১১.৪৬ ॥
অদেশকালে যোগস্য দর্শনং হি ন বিদ্যতে ।
অগ্ন্যভ্যাসে জলে বাঽপি শুষ্কপর্ণচয়ে তথা ॥ ১১.৪৭ ॥
জন্তুব্যাপ্তে শ্মশানে চ জীর্ণগোষ্ঠে চতুষ্পথে ।
সশব্দে সভয়ে বাঽপি চৈত্যবল্মীকসংচয়ে ॥ ১১.৪৮ ॥
অশুভে দুর্জনাক্রান্তে মশকাদিসমন্বিতে ।
নাচরেদ্ দেহবাধে বা দৌর্মনস্যাদিসংভবে ॥ ১১.৪৯ ॥
সুগুপ্তে সুশুভে দেশে গুহায়াং পর্বতস্য তু ।
নদ্যাস্তীরে পুণ্যদেশে দেবতায়তনে তথা ॥ ১১.৫০ ॥
গৃহে বা সুশুভে রম্যে বিজনে জন্তুবর্জিতে ।
যুঞ্জীত যোগী সততমাত্মানং মৎপরায়ণঃ ॥ ১১.৫১ ॥
নমস্কৃত্যাথ যোগীন্দ্রান্ সশিষ্যাংশ্চ বিনায়কম্ ।
গুরুং চৈবাথ মাং যোগী যুঞ্জীত সুসমাহিতঃ ॥ ১১.৫২ ॥
আসনং স্বস্তিকং বদ্ধ্বা পদ্মমর্দ্ধমথাপি বা ।
নাসিকাগ্রে সমাং দৃষ্টিমীষদুন্মীলিতেক্ষণঃ ॥ ১১.৫৩ ॥
কৃৎবাঽথ নির্ভয়ঃ শান্তস্ত্যক্ত্বা মায়াময়ং জগৎ ।
স্বাত্মন্যবস্থিতং দেবং চিন্তয়েৎ পরমেশ্বরম্ ॥ ১১.৫৪ ॥
শিখাগ্রে দ্বাদশাঙ্গুল্যে কল্পয়িৎবাঽথ পঙ্কজম্ ।
ধর্মকন্দসমুদ্ভূতং জ্ঞাননালং সুশোভনম্ ॥ ১১.৫৫ ॥
ঐশ্বর্যাষ্টদলং শ্বেতং পরং বৈরাগ্যকর্ণিকম্ ।
চিন্তয়েৎ পরমং কোশং কর্ণিকায়াং হিরণ্ময়ম্ ॥ ১১.৫৬ ॥
সর্বশক্তিময়ং সাক্ষাদ্ যং প্রাহুর্দিব্যমব্যযম্ ।
ওংকারবাচ্যমব্যক্তং রশ্মিজালসমাকুলম্ ॥ ১১.৫৭ ॥
চিন্তয়েৎ তত্র বিমলং পরং জ্যোতির্যদক্ষরম্ ।
তস্মিন্ জ্যোতিষি বিন্যস্যস্বাত্মানং তদভেদতঃ ॥ ১১.৫৮ ॥
ধ্যায়ীতাকাশমধ্যস্থমীশং পরমকারণম্ ।
তদাত্মা সর্বগো ভূৎবা ন কিংচিদপি চিন্তয়েৎ ॥ ১১.৫৯ ॥
এতদ্ গুহ্যতমং ধ্যানং ধ্যানান্তরমথোচ্যতে ।
চিন্তয়িৎবা তু পূর্বোক্তং হৃদয়ে পদ্মমুত্তমম্ ॥ ১১.৬০ ॥
আত্মানমথ কর্ত্তারং তত্রানলসমৎবিষম্ ।
মধ্যে বহ্নিশিখাকারং পুরুষং পঞ্চবিংশকম্ ॥ ১১.৬১ ॥
চিন্তয়েৎ পরমাত্মানং তন্মধ্যে গগনং পরম্ ।
ওংকরবোধিতং তত্ত্বং শাশ্বতং শিবমচ্যুতম্ ॥ ১১.৬২ ॥
অব্যক্তং প্রকৃতৌ লীনং পরং জ্যোতিরনুত্তমম্ ।
তদন্তঃ পরমং তত্ত্বমাত্মাধারং নিরঞ্জনম্ ॥ ১১.৬৩ ॥
ধ্যায়ীত তন্ময়ো নিত্যমেকরূপং মহেশ্বরম্ ।
বিশোধ্য সর্বতত্ত্বানি প্রণবেনাথবা পুনঃ ॥ ১১.৬৪ ॥
সংস্থাপ্য ময়ি চাত্মানং নির্মলে পরমে পদে ।
প্লাবয়িৎবাত্মনো দেহং তেনৈব জ্ঞানবারিণা ॥ ১১.৬৫ ॥
মদাত্মা মন্মনা ভস্ম গৃহীৎবা ৎবগ্নিহোত্রজম্ ।
তেনোদ্ধৃত্য তু সর্বাঙ্গমগ্নিরিত্যাদিমন্ত্রতঃ ॥ ১১.৬৬ ॥
চিন্তয়েৎ স্বাত্মনীশানং পরং জ্যোতিঃ স্বরূপিণম্ ।
এষ পাশুপতো যোগঃ পশুপাশবিমুক্তয়ে ॥ ১১.৬৭ ॥
সর্ববেদান্তসারোঽয়মত্যাশ্রমমিতি শ্রুতিঃ ।
এতৎ পরতরং গুহ্যং মৎসায়ুজ্য প্রদায়কম্ ॥ ১১.৬৮ ॥
দ্বিজাতীনাং তু কথিতং ভক্তানাং ব্রহ্মচারিণাম্ ।
ব্রহ্মচর্যমহিংসা চ ক্ষমা শৌচং তপো দমঃ ॥ ১১.৬৯ ॥
সংতোষঃ সত্যমাস্তিক্যং ব্রতাঙ্গানি বিশেষতঃ ।
একেনাপ্যথ হীনেন ব্রতমস্য তু লুপ্যতে ॥ ১১.৭০ ॥
তস্মাদাত্মুগুণোপেতো মদ্ব্রতং বোঢুমর্হতি ।
বীতরাগভয়ক্রোধা মন্ময়া মামুপাশ্রিতাঃ ॥ ১১.৭১ ॥
বহবোঽনেন যোগেন পূতা মদ্ভাবমাগতাঃ ।
যে যথা মাং প্রপদ্যন্তে তাংস্তথৈব ভজাম্যহম্ ॥ ১১.৭২ ॥
জ্ঞানয়োগেন মাং তস্মাদ্ যজেত পরমেশ্বরম্ ।
অথবা ভক্তিয়োগেন বৈরাগ্যেণ পরেণ তু ॥ ১১.৭৩ ॥
চেতসা বোধয়ুক্তেন পূজয়েন্মাং সদা শুচিঃ ।
সর্বকর্মাণি সংন্যস্য ভিক্ষাশী নিষ্পরিগ্রহঃ ॥ ১১.৭৪ ॥
প্রাপ্নোতি মম সায়ুজ্যং গুহ্যমেতন্ময়োদিতম্ ।
অদ্বেষ্টা সর্বভূতানাং মৈত্রঃ করুণ এব চ ॥ ১১.৭৫ ॥
নির্মমো নিরহংকারো যো মদ্ভক্তঃ স মে প্রিয়ঃ ।
সংতুষ্টঃ সততং যোগী যতাত্মা দৃঢনিশ্চয়ঃ ॥ ১১.৭৬ ॥
ময়্যর্পিতমনো বুদ্ধির্যো মদ্ভক্তঃ স মে প্রিয়ঃ ।
যস্মান্নোদ্বিজতে লোকো লোকান্নোদ্বিজতে চ যঃ ॥ ১১.৭৭ ॥
হর্ষামর্ষভয়োদ্বেগৈর্মুক্তো যঃ স হি মে প্রিয়ঃ ।
অনপেক্ষঃ শুচির্দক্ষ উদাসীনো গতব্যথঃ ॥ ১১.৭৮ ॥
সর্বারম্ভপরিত্যাগী ভক্তিমান্ যঃ স মে প্রিয়ঃ ।
তুল্যনিন্দাস্তুতির্মৌনী সংতুষ্টো যেন কেনচিৎ ॥ ১১.৭৯ ॥
অনিকেতঃ স্থিরমতির্মদ্ভক্তো মামুপৈষ্যতি ।
সর্বকর্মাণ্যপি সদা কুর্বাণো মৎপরায়ণঃ ॥ ১১.৮০ ॥
মৎপ্রসাদাদবাপ্নোতি শাশ্বতং পরমং পদম্ ।
চেতসা সর্বকর্মাণি ময়ি সংন্যস্য মৎপরঃ ॥ ১১.৮১ ॥
নিরাশীর্নির্মমো ভূৎবা মামেকং শরণং ব্রজেৎ ।
ত্যক্ত্বা কর্মফলাসঙ্গং নিত্যতৃপ্তো নিরাশ্রয়ঃ ॥ ১১.৮২ ॥
কর্মণ্যপিপ্রবৃত্তোঽপি নৈব তেন নিবধ্যতে ।
নিরাশীর্যতচিত্তাত্মা ত্যক্তসর্বপরিগ্রহঃ ॥ ১১.৮৩ ॥
শারীরং কেবলং কর্ম কুর্বন্নাপ্নোতি তৎপদম্ ।
যদৃচ্ছালাভতুষ্টস্য দ্বন্দ্বাতীতস্য চৈব হি ॥ ১১.৮৪ ॥
কুর্বতো মৎপ্রসাদার্থং কর্ম সংসারনাশনম্ ।
মন্মনা মন্নমস্কারো মদ্যাজী মৎপরায়ণঃ ॥ ১১.৮৫ ॥
মামুপাস্তে যোগীশং জ্ঞাৎবা মাং পরমেশ্বরম্ ।
মদ্বুদ্ধয়ো মাং সততং বোধয়ন্তঃ পরস্পরম্ ॥ ১১.৮৬ ॥
কথয়ন্তশ্চ মাং নিত্যং মম সায়ুজ্যমাপ্নুয়ুঃ ।
এবং নিত্যাভিয়ুক্তানাং মায়েয়ং কর্মসান্বগম্ ॥ ১১.৮৭ ॥
নাশয়ামি তমঃ কৃৎস্নং জ্ঞানদীপেন ভাস্বতা ।
মদ্বুদ্ধয়ো মাং সততং পূজয়ন্তীহ যে জনাঃ ॥ ১১.৮৮ ॥
তেষাং নিত্যাভিয়ুক্তানাং যোগক্ষেমং বহাম্যহম্ ।
যেঽন্যে চ কামভোগার্থং যজন্তে হ্যন্যদেবতাঃ ॥ ১১.৮৯ ॥
তেষাং তদন্তং বিজ্ঞেয়ং দেবতানুগতং ফলম্ ।
যে চান্যদেবতাভক্তাঃ পূজয়ন্তীহ দেবতাঃ ॥ ১১.৯০ ॥
মদ্ভাবনাসমায়ুক্তা মুচ্যন্তে তেঽপি মানবাঃ ।
তস্মাদ্বিনশ্বরানন্যাংস্ত্যক্ত্বা দেবানশেষতঃ ॥ ১১.৯১ ॥
মামেব সংশ্রয়েদীশং স যাতি পরমং পদম্ ।
ত্যক্ত্বা পুত্রাদিষু স্নেহং নিঃ শোকো নিষ্পরিগ্রহঃ ॥ ১১.৯২ ॥
যজেচ্চামরণাল্লিঙ্গং বিরক্তঃ পরমেশ্বরম্ ।
যেঽর্চয়ন্তি সদা লিঙ্গং ত্যক্ত্বা ভোগানশেষতঃ ॥ ১১.৯৩ ॥
একেন জন্মনা তেষাং দদামি পরমৈশ্বরম্ ।
পরাত্মনঃ সদা লিঙ্গং কেবলং সন্নিরঞ্জনম্ ॥ ১১.৯৪ ॥
জ্ঞানাত্মকং সর্বগতং যোগিনাং হৃদি সংস্থিতম্ ।
যে চান্যে নিয়তা ভক্তা ভাবয়িৎবা বিধানতঃ ॥ ১১.৯৫ ॥
যত্র ক্বচন তল্লিঙ্গমর্চয়ন্তি মহেশ্বরম্ ।
জলে বা বহ্নিমধ্যে বা ব্যোম্নি সূর্যেঽথবাঽন্যতঃ ॥ ১১.৯৬ ॥
রত্নাদৌ ভাবয়িৎবেশমর্চয়েল্লিঙ্গমৈশ্বরম্ ।
সর্বং লিঙ্গময়ং হ্যেতৎ সর্বং লিঙ্গে প্রতিষ্ঠিতম্ ॥ ১১.৯৭ ॥
তস্মাল্লিঙ্গেঽর্চয়েদীশং যত্র ক্বচন শাশ্বতম্ ।
অগ্নৌ ক্রিয়াবতামপ্সু ব্যোম্নি সূর্যে মনীষিণাম্ ॥ ১১.৯৮ ॥
কাষ্ঠাদিষ্বেব মূর্খাণাং হৃদি লিঙ্গংতুয়োগিনাম্ ।
যদ্যনুৎপন্নিবিজ্ঞানো বিরক্তঃ প্রীতিসংয়ুতঃ ॥ ১১.৯৯ ॥
যাবজ্জীবং জপেদ্ যুক্তঃ প্রণবং ব্রহ্মণো বপুঃ ।
অথবা শতরুদ্রীয়ং জপেদামরণাদ্ দ্বিজঃ ॥ ১১.১০০ ॥
একাকী যতচিত্তাত্মা স যাতি পরমং পদম্ ।
বসেচ্চামরণাদ্ বিপ্রো বারাণস্যাং সমাহিতঃ ॥ ১১.১০১ ॥
সোঽপীশ্বরপ্রসাদেন যাতি তৎ পরমং পদম্ ।
তত্রোৎক্রমণকালে হি সর্বেষামেব দেহিনাম্ ॥ ১১.১০২ ॥
দদাতি তৎ পরং জ্ঞানং যেন মুচ্যতে বন্ধনাৎ ।
বর্ণাশ্রমবিধিং কৃৎস্নং কুর্বাণো মৎপরায়ণঃ ॥ ১১.১০৩ ॥
তেনৈব জন্মনা জ্ঞানং লব্ধ্বা যাতি শিবং পদম্ ।
যেঽপি তত্র বসন্তীহ নীচা বা পাপয়োনয়ঃ ॥ ১১.১০৪ ॥
সর্বে তরন্তি সংসারমীশ্বরানুগ্রহাদ্ দ্বিজাঃ ।
কিন্তু বিঘ্না ভবিষ্যন্তি পাপোপহতচেতসাম্ ॥ ১১.১০৫ ॥
ধর্মন্ সমাশ্রয়েৎ তস্মান্মুক্তয়ে নিয়তং দ্বিজাঃ ।
এতদ্ রহস্যং বেদানাং ন দেয়ং যস্য কস্য চিৎ ॥ ১১.১০৬ ॥
ধার্মিকায়ৈব দাতব্যং ভক্তায় ব্রহ্মচারিণে ।
ব্যাস উবাচ ।
ইত্যেতদুক্ত্বা ভগবানাত্ময়োগমনুত্তমম্ ॥ ১১.১০৭ ॥
ব্যাজহার সমাসীনং নারায়ণমনাময়ম্ ।
ময়ৈতদ্ ভাষিতং জ্ঞানং হিতার্থং ব্রহ্মবাদিনাম্ ॥ ১১.১০৮ ॥
দাতব্যং শান্তচিত্তেভ্যঃ শিষ্যেভ্যো ভবতা শিবম্ ।
উক্ত্বৈবমর্থং যোগীন্দ্রানব্রবীদ্ ভগবানজঃ ॥ ১১.১০৯ ॥
হিতায় সর্বভক্তানাং দ্বিজাতীনাং দ্বিজোত্তমাঃ ।
ভবন্তোঽপি হি মজ্জ্ঞানং শিষ্যাণাং বিধিপূর্বকম্ ॥ ১১.১১০ ॥
উপদেক্ষ্যন্তি ভক্তানাং সর্বেষাং বচনান্মম ।
অয়ং নারায়ণো যোঽহমীশ্বরো নাত্র সংশয়ঃ ॥ ১১.১১১ ॥
নান্তরং যে প্রপশ্যন্তি তেষাং দেয়মিদং পরম্ ।
মমৈষা পরমা মূর্ত্তির্নারায়ণসমাহ্বয়া ॥ ১১.১১২ ॥
সর্বভূতাত্মভূতস্থা শান্তা চাক্ষরসংজ্ঞিতা ।
যে ৎবন্যথা প্রপশ্যন্তি লোকে ভেদদৃশো জনাঃ ॥ ১১.১১৩ ॥
তে মুক্তিং প্রপশ্যন্তি জায়ন্তে চ পুনঃ পুনঃ ।
যে ৎবেনং বিষ্ণুমব্যক্তং মাঞ্চ দেবং মহেশ্বরম্ ॥ ১১.১১৪ ॥
একীভাবেন পশ্যন্তি ন তেষাং পুনরুদ্ভবঃ ।
তস্মাদনাদিনিধনং বিষ্ণুমাত্মানমব্যযম্ ॥ ১১.১১৫ ॥
মামেব সম্প্রপশ্যধ্বং পূজয়ধ্বং তথৈব হি ।
যেঽন্যথা মাং প্রপশ্যন্তি মৎবেবং দেবতান্তরম্ ॥ ১১.১১৬ ॥
তে যান্তি নরকান্ ঘোরান্ নাহং তেষু ব্যবস্থিতঃ ।
মূর্খং বা পণ্ডিতং বাপি ব্রাহ্মণং বা মদাশ্রয়ম্ ॥ ১১.১১৭ ॥
মোচয়ামি শ্বপাকং বা ন নারায়ণনিন্দকম্ ।
তস্মাদেষ মহায়োগী মদ্ভক্তৈঃ পুরুষোত্তমঃ ॥ ১১.১১৮ ॥
অর্চনীয়ো নমস্কার্যো মৎপ্রীতিজননায় হি ।
এবমুক্ত্বা সমালিঙ্গ্য বাসুদেবং পিনাকধৃক্ ॥ ১১.১১৯ ॥
অন্তর্হিতোঽভবৎ তেষাং সর্বেষামেব পশ্যতাম্ ।
নারায়ণোঽপি ভগবাংস্তাপসং বেষমুত্তমম্ ॥ ১১.১২০ ॥
জগ্রাহ যোগিনঃ সর্বাংস্ত্যক্ত্বা বৈ পরমং বপুঃ ।
জ্ঞানং ভবদ্ভিরমলং প্রসাদাৎ পরমেষ্ঠিনঃ ॥ ১১.১২১ ॥
সাক্ষাদ্দেব মহেশস্য জ্ঞানং সংসারনাশনম্ ।
গচ্ছধ্বং বিজ্বরাঃ সর্বে বিজ্ঞানং পরমেষ্ঠিনঃ ॥ ১১.১২২ ॥
প্রবর্ত্তয়ধ্বং শিষ্যেভ্যো ধার্মিকেভ্যো মুনীশ্বরাঃ ।
ইদং ভক্তায় শান্তায় ধার্মিকায়াহিতাগ্নয়ে ॥ ১১.১২৩ ॥
বিজ্ঞানমৈশ্বরং দেয়ং ব্রাহ্মণায় বিশেষতঃ ।
এবমুক্ত্বা স বিশ্বাত্মা যোগিনাং যোগবিত্তমঃ ॥ ১১.১২৪ ॥
নারায়ণো মহায়োগী জগামাদর্শনং স্বয়ম্ ।
তেঽপি দেবাদিদেবেশং নমস্কৃত্য মহেশ্বরম্ ॥ ১১.১২৫ ॥
নারায়ণং চ ভূতাদিং স্বানি স্থানানি লেভিরে ।
সনৎকুমারো ভগবান্ সংবর্ত্তায় মহামুনিঃ ॥ ১১.১২৬ ॥
দত্তবানৈশ্বরং জ্ঞানং সোঽপি সত্যব্রতায় তু ।
সনন্দনোঽপি যোগীন্দ্রঃ পুলহায় মহর্ষয়ে ॥ ১১.১২৭ ॥
প্রদদৌ গৌতমায়াথ পুলহোঽপি প্রজাপতিঃ ।
অঙ্গিরা বেদবিদুষে ভরদ্বাজায় দত্তবান্ ॥ ১১.১২৮ ॥
জৈগীষব্যায় কপিলস্তথা পঞ্চশিখায় চ ।
পরাশরোঽপি সনকাৎ পিতা মে সর্বতত্ত্বদৃক্ ॥ ১১.১২৯ ॥
লেভেতৎপরমং জ্ঞানং তস্মাদ্ বাল্মীকিরাপ্তবান্ ।
মমোবাচ পুরা দেবঃ সতীদেহভবাঙ্গজঃ ॥ ১১.১৩০ ॥
বামদেবো মহায়োগী রুদ্রঃ কিল পিনাকধৃক্ ।
নারায়ণোঽপি ভগবান্ দেবকীতনয়ো হরিঃ ॥ ১১.১৩১ ॥
অর্জুনায় স্বয়ং সাক্ষাৎ দত্তবানিদমুত্তমম্ ।
যদাহং লব্ধবান্ রুদ্রাদ্ বামদেবাদনুত্তমম্ ॥ ১১.১৩২ ॥
বিশেষাদ্ গিরিশে ভক্তিস্তস্মাদারভ্য মেঽভবৎ ।
শরণ্যং শরণং রুদ্রং প্রপন্নোঽহং বিশেষতঃ ॥ ১১.১৩৩ ॥
ভূতেশং গিরশং স্থাণুং দেবদেবং ত্রিশূলিনম্ ।
ভবন্তোঽপি হি তং দেবং শংভুং গোবৃষবাহনম্ ॥ ১১.১৩৪ ॥
প্রপদ্যন্তাং সপত্নীকাঃ সপুত্রাঃ শরণং শিবম্ ।
বর্ত্তধ্বং তৎপ্রসাদেন কর্ময়োগেন শংকরম্ ॥ ১১.১৩৫ ॥
পূজয়ধ্বং মহাদেব গোপতিং ব্যালভূষণম্ ।
এবমুক্তে পুনস্তে তু শৌনকাদ্যা মহেশ্বরম্ ॥ ১১.১৩৬ ॥
প্রণেমুঃ শাশ্বতং স্থাণুং ব্যাসং সত্যবতীসুতম্ ।
অব্রুবন্ হৃষ্টমনসঃ কৃষ্ণদ্বৈপায়নং প্রভুম্ ॥ ১১.১৩৭ ॥
সাক্ষাদ্দেবং হৃষীকেশং সর্বলোকমহেশ্বরম্ ।
ভবৎপ্রসাদাদচলা শরণ্যে গোবৃষধ্বজে ॥ ১১.১৩৮ ॥
ইদানীং জায়তে ভক্তির্যা দেবৈরপি দুর্লভা ।
কথয়স্ব মুনিশ্রেষ্ঠ কর্ময়োগমনুত্তমম্ ॥ ১১.১৩৯ ॥
যেনাসৌ ভগবানীশঃ সমারাধ্যো মুমুক্ষুভিঃ ।
ৎবৎসংনিধাবেব সূতঃ শৃণোতু ভগবদ্বচঃ ॥ ১১.১৪০ ॥
তদ্বচ্চাখিললোকানাং রক্ষণং ধর্মসংগ্রহম্ ।
যদুক্তং দেবদেবেন বিষ্ণুনা কূর্মরূপিণা ॥ ১১.১৪১ ॥
পৃষ্টেন মুনিভিঃ পূর্বং শক্রেণামৃতমন্থনে ।
শ্রুৎবা সত্যবতীসূনুঃ কর্ময়োগং সনাতনম্ ॥ ১১.১৪২ ॥
মুনীনাং ভাষিতং কৃৎস্নং প্রোবাচ সুসমাহিতঃ ।
য ইমং পঠতে নিত্যং সংবাদং কৃত্তিবাসসঃ ॥ ১১.১৪৩ ॥
সনৎকুমারপ্রমুখৈঃ সর্বপাপৈঃ প্রমুচ্যতে ।
শ্রাবয়েদ্ বা দ্বিজান্ শুদ্ধান্ ব্রহ্মচর্যপরায়ণান্ ॥ ১১.১৪৪ ॥
যো বা বিচারয়েদর্থং স যাতি পরমাং গতিম্ ।
যশ্চৈতচ্ছৃণুয়ান্নিত্যং ভক্তিয়ুক্তো দৃঢব্রতঃ ॥ ১১.১৪৫ ॥
সর্বপাপবিনির্মুক্তো ব্রহ্মলোকে মহীয়তে ।
তস্মাৎ সর্বপ্রয়ত্নেন পঠিতব্যো মনীষিভিঃ ॥ ১১.১৪৬ ॥
শ্রোতব্যশ্চাথ মন্তব্যো বিশেষাদ্ ব্রাহ্মণৈঃ সদা ॥ ১১.১৪৭ ॥
ইতি শ্রীকূর্মপুরাণে ষট্সাহস্ত্র্যাং সংহিতায়ামুপরিবিভাগে
(ঈশ্বরগীতাসু) একাদশোঽধ্যায়ঃ ॥ ১১ ॥
– Chant Stotra in Other Languages –
Ishvaragita from Kurmapurana in Sanskrit – English – Bengali – Gujarati – Kannada – Malayalam – Odia – Telugu – Tamil