॥ Kamasikashtakam Odia Lyrics ॥
॥ କାମାସିକାଷ୍ଟକମ୍ ॥
ଶ୍ରୀଵେଦାନ୍ତଦେଶିକୃତମ୍ ।
(କାଞ୍ଚ୍ୟାଂ)
ଶ୍ରୁତୀନାମୁତ୍ତରଂ ଭାଗଂ ଵେଗଵତ୍ୟାଶ୍ଚ ଦକ୍ଷିଣମ୍ ।
କାମାଦଧିଵସନ୍ ଜୀୟାତ୍କଶ୍ଚିଦଦ୍ଭୁତକେସରୀ ॥ ୧ ॥
ତପନେନ୍ଦ୍ଵଗ୍ନିନୟନଃ ତାପାନପଚିନୋତୁ ନଃ ।
ତାପନୀୟରହସ୍ୟାନାଂ ସାରଃ କାମାସିକାହରିଃ ॥ ୨ ॥
ଆକଣ୍ଠମାଦିପୁରୁଷଂ କଣ୍ଠୀରଵମୁପରି କୁଣ୍ଠିତାରାତିମ୍ ।
ଵେଗୋପକଣ୍ଠସଙ୍ଗାଦ୍ଵିମୁକ୍ତଵୈକୁଣ୍ଠବହୁମତିମୁପାସେ ॥ ୩ ॥
ବନ୍ଧୁମଖିଲସ୍ୟ ଜନ୍ତୋର୍ବନ୍ଧୁରପର୍ୟଙ୍କବନ୍ଧରମଣୀୟମ୍ ।
ଵିଷମଵିଲୋଚନମୀଡେ ଵେଗଵତୀପୁଲିନକେଲିନରସିଂହମ୍ ॥ ୪ ॥
ସ୍ଵସ୍ଥାନେଷୁ ମରୁଦ୍ଗଣାନ୍ ନିୟମୟନ୍ ସ୍ଵାଧୀନସର୍ଵେନ୍ଦ୍ରିୟଃ
ପର୍ୟଙ୍କସ୍ଥିରଧାରଣାପ୍ରକଟିତପ୍ରତ୍ୟଙ୍ମୁଖାଵସ୍ଥିତିଃ ।
ପ୍ରାୟେଣ ପ୍ରଣିପେଦୁଷଃ ପ୍ରଭୁରସୌ ୟୋଗଂ ନିଜଂ ଶିକ୍ଷୟନ୍
କାମାନାତନୁତାଦଶେଷ ଜଗତାଂ କାମାସିକା କେସରୀ ॥ ୫ ॥
ଵିକସ୍ଵରନଖସ୍ଵରୁକ୍ଷତହିରଣ୍ୟଵକ୍ଷଃସ୍ଥଲୀ
ନିରର୍ଗଲଵିନିର୍ଗଲଦ୍ରୁଧିରସିନ୍ଧୁସନ୍ଧ୍ୟାୟିତାଃ ।
ଅଵନ୍ତୁ ମଦନାସିକା ମନୁଜପଞ୍ଚଵକ୍ତ୍ରସ୍ୟ ମାଂ
ଅହମ୍ପ୍ରଥମିକା ମିଥଃ ପ୍ରକଟିତାହଵା ବାହଵଃ ॥ ୬ ॥
ସଟାପଟଲଭୀଷଣେ ସରଭସାଟ୍ଟହାସୋଦ୍ଭଟେ
ସ୍ଫୁରତ୍କ୍ରୁଧିପରିସ୍ଫୁଟଭ୍ରୁକୁଟିକେଽପି ଵକ୍ତ୍ରେ କୃତେ ।
କୃପାକପଟକେସରିନ୍ ଦନୁଜଡିମ୍ଭଦତ୍ତସ୍ତନା
ସରୋଜସଦୃଶା ଦୃଶା ଵ୍ୟତିଵିଷଜ୍ୟ ତେ ଵ୍ୟଜ୍ୟତେ ॥ ୭ ॥
ତ୍ଵୟି ରକ୍ଷତି ରକ୍ଷକୈଃ କିମନ୍ୟୈସ୍ତ୍ଵୟି ଚାରକ୍ଷତି ରକ୍ଷକୈଃ କିମନ୍ୟୈଃ ।
ଇତି ନିଶ୍ଚିତଧୀଃ ଶ୍ରୟାମି ନିତ୍ୟଂ ନୃହରେ ଵେଗଵତୀତଟାଶ୍ରୟଂ ତ୍ଵାମ୍ ॥ ୮ ॥
ଇତ୍ଥଂ ସ୍ତୁତଃ ସକୃଦିହାଷ୍ଟଭିରେଷ ପଦ୍ୟୈଃ
ଶ୍ରୀଵେଙ୍କଟେଶରଚିତୈସ୍ତ୍ରିଦଶେନ୍ଦ୍ରଵନ୍ଦ୍ୟଃ ।
ଦୁର୍ଦାନ୍ତଘୋରଦୁରିତଦ୍ଵିରଦେନ୍ଦ୍ରଭେଦୀ
କାମାସିକାନରହରିର୍ଵିତନୋତୁ କାମାନ୍ ॥ ୯ ॥
ଇତି ଶ୍ରୀଵେଦାନ୍ତଦେଶିକୃତଂ କାମାସିକାଷ୍ଟକଂ ସମ୍ପୂର୍ଣମ୍ ।
– Chant Stotra in Other Languages –
Kamasikashtakam Lyrics in Sanskrit » English » Bengali » Gujarati » Kannada » Malayalam » Telugu » Tamil