॥ Kunjabihari Ashtakam 2 Odia Lyrics ॥
ଦ୍ଵିତୀୟଂ ଶ୍ରୀକୁଞ୍ଜଵିହାର୍ୟଷ୍ଟକଂ
ନମଃ କୁଞ୍ଜଵିହାରିଣେ ।
ଅଵିରତରତିବନ୍ଧୁସ୍ମେରତାବନ୍ଧୁରଶ୍ରୀଃ
କବଲିତ ଇଵ ରାଧାପାଙ୍ଗଭଙ୍ଗୀତରଙ୍ଗୈଃ ।
ମୁଦିତଵଦନଚନ୍ଦ୍ରଶ୍ଚନ୍ଦ୍ରିକାପୀତଧାରୀ
ମୁଦିରମଧୁରକାନ୍ତିର୍ଭାତି କୁଞ୍ଜେ ଵିହାରୀ ॥ ୧ ॥
ତତସୁଷିରଘନାନାଂ ନାଦମାନଦ୍ଧଭାଜାଂ
ଜନୟତି ତରୁଣୀନାଂ ମଣ୍ଡଲେ ମଣ୍ଡିତାନାମ୍ ।
ତଟଭୁଵି ନଟରାଜକ୍ରୀଡୟା ଭାନୁପୁତ୍ର୍ୟାଃ
ଵିଦଧଦତୁଲଚାରିର୍ଭାତି କୁଞ୍ଜେ ଵିହାରୀ ॥ ୨ ॥
ଶିଖିନିଗଲିତଷଡ୍ଜେକୋକିଲେ ପଞ୍ଚମାଢ୍ୟେ
ସ୍ଵୟମପି ନଵଵଂଶ୍ୟୋଦ୍ଦାମୟନ୍ ଗ୍ରାମମୁଖ୍ୟମ୍ ।
ଧୃତମୃଗମଦଗନ୍ଧଃ ସୁଷ୍ଠୁଗାନ୍ଧାରସଂଜ୍ଞଂ
ତ୍ରିଭୁଵନଧୃତିହାରିର୍ଭାତି କୁଞ୍ଜେ ଵିହାରୀ ॥ ୩ ॥
ଅନୁପମକରଶାଖୋପାତ୍ତରାଧାଙ୍ଗୁଲୀକୋ
ଲଘୁ ଲଘୁ କୁସୁମାନାଂ ପର୍ୟଟନ୍ ଵାଟିକାୟାମ୍ ।
ସରଭସମନୁଗୀତଶ୍ଚିତ୍ରକଣ୍ଠୀଭିରୁଚ୍ଚୈଃ
ଵ୍ରଜନଵୟୁଵତୀଭିର୍ଭାତି କୁଞ୍ଜେ ଵିହାରୀ ॥ ୪ ॥
ଅହିରିପୁକୃତଲାସ୍ୟେ କୀଚକାରବ୍ଧଵାଦ୍ୟେ
ଵ୍ରଜଗିରିତଟରଙ୍ଗେ ଭୃଙ୍ଗସଙ୍ଗୀତଭାଜି ।
ଵିରଚିତପରିଚର୍ୟଶ୍ଚିତ୍ରତୌର୍ୟତ୍ରିକୋଣ-
ସ୍ତିମିତକରଣଵୃତ୍ତିର୍ଭାତି କୁଞ୍ଜେ ଵିହାରୀ ॥ ୫ ॥
ଦିଶି ଦିଶି ଶୁକଶାରୀମଣ୍ଡଲୈର୍ଗୂଢଲୀଲାଃ
ପ୍ରକଟମନୁପଠଦ୍ଭିର୍ନିର୍ମିତାଶ୍ଚର୍ୟପୂରଃ ।
ତଦତିରହସି ଵୃତ୍ତଂ ପ୍ରେୟସୀକର୍ଣମୂଲେ
ସ୍ମିତମୁଖମଭିଜଲ୍ପନ୍ ଭାତି କୁଞ୍ଜେ ଵିହାରୀ ॥ ୬ ॥
ତଵ ଚିକୁରକଦମ୍ବଂ ସ୍ତମ୍ଭତେ ପ୍ରେକ୍ଷ୍ୟ କେକୀ
ନୟନକମଲଲକ୍ଷ୍ମୀର୍ଵନ୍ଦତେ କୃଷ୍ଣସାରଃ ।
ଅଲିରଲମଲକାନ୍ତଂ ନୌତି ପଶ୍ୟେତି ରାଧାଂ
ସୁମଧୁରମଭିଶଂସନ୍ ଭାତି କୁଞ୍ଜେ ଵିହାରୀ ॥ ୭ ॥
ମଦନତରଲବାଲା ଚକ୍ରଵାଲେନ ଵିଷ୍ଵଗ୍-
ଵିଵିଧଵରକଲାନାଂ ଶିକ୍ଷୟା ସେଵ୍ୟମାନଃ ।
ସ୍ଖଲିତଚିକୁରଵେଶେ ସ୍କନ୍ଧଦେଶେ ପ୍ରିୟାୟାଃ
ପ୍ରଥିତପୃଥୁଲବାହୁର୍ଭାତି କୁଞ୍ଜେ ଵିହାରୀ ॥ ୮ ॥
ଇଦମନୁପମଲୀଲାହାରି କୁଞ୍ଜଵିହାରୀ
ସ୍ମରଣପଦମଧୀତେ ତୁଷ୍ଟଧୀରଷ୍ଟକଂ ୟଃ ।
ନିଜଗୁଣଵୃତୟା ଶ୍ରୀରାଧୟାରାଧିଽଽରାଧିତସ୍ତଂ
ନୟତି ନିଜପଦାବ୍ଜଂ କୁଞ୍ଜସଦ୍ମାଧିରାଜଃ ॥ ୯ ॥
ଇତି ଶ୍ରୀରୂପଗୋସ୍ଵାମିଵିରଚିତସ୍ତଵମାଲାୟାଂ ଶ୍ରୀକୁଞ୍ଜଵିହାର୍ୟଷ୍ଟକଂ
ଦ୍ଵିତୀୟଂ ସମ୍ପୂର୍ଣମ୍ ॥