॥ Shankara Geetaa Bengali Lyrics ॥
॥ শঙ্করগীতা ॥
অথ শ্রীবিষ্ণুধর্মোত্তরে প্রথমখণ্ডান্তর্গতে শঙ্করগীতাসু
প্রথমোঽধ্যায়ঃ ॥১ ॥
মার্কণ্ডেয় উবাচ ।
কৈলাসশিখরে রম্যে নানাধাতুবিচিত্রিতে ।
নানাদ্রুমলতাকীর্ণে নানাপক্ষিনিনাদিতে ॥ ১ ॥
গঙ্গানির্ঝরসংজাতে সততং চারুনিঃস্বনে ।
দেবদেবং মহাদেবং পর্যপৃচ্ছত ভার্গবঃ ॥ ২ ॥
রাম উবাচ ।
দেবদেব মহাদেব গঙ্গালুলিতমূর্ধজ ।
শশাঙ্কলেখাসংয়ুক্ত জটাভারতিভাস্বর ॥ ৩ ॥
পার্বতীদত্তদেহার্ধ কামকালাঙ্গনাশন ।
ভগনেত্রান্তকাচিন্ত্য পূষ্ণো দশনশাতন ॥ ৪ ॥
ৎবত্তঃ পরতরং দেবং নান্যং পশ্যামি কঞ্চন ।
পূজয়ন্তি সদা লিঙ্গং তব দেবাঃ সবাসবাঃ ॥ ৫ ॥
স্তুবন্তি ৎবামৃষিগণা ধ্যায়ন্তি চ মুহুর্মুহুঃ ।
পূজয়ন্তি তথা ভক্ত্যা বরদং পরমেশ্বর ॥ ৬ ॥
জগতোঽস্য সমুৎপত্তিস্থিতিসংহারপালনে ।
ৎবামেকং কারণং মন্যে ৎবয়ি সর্বং প্রতিষ্ঠিতম্ ॥ ৭ ॥
কং ৎবং ধ্যায়সি দেবেশ তত্র মে সংশয়ো মহান্ ।
আচক্ষ্ব তন্মে ভগবন্ যদ্যনুগ্রাহ্যতা ময়ি ॥ ৮ ॥
প্রমাদসাম্মুখ্যতয়া ময়ৈতদ্বিস্রম্ভমাসাদ্য জগৎপ্রধান ।
ভবন্তমীড্যং প্রণিপত্য মূর্ধ্না পৃচ্ছামি সঞ্জাতকুতূহলাত্মা ॥ ৯ ॥
ইতি শ্রীবিষ্ণুধর্মোত্তরে প্রথমখণ্ডে মার্কণ্ডেয়বজ্রসংবাদে
পরশুরামোপাখ্যানে
শঙ্করগীতাসু রামপ্রশ্নো নমৈকপঞ্চাশত্তমোঽধ্যায়ঃ ॥৫১ ॥
অথ শ্রীবিষ্ণুধর্মোত্তরে প্রথমখণ্ডান্তর্গতে
শঙ্করগীতাসু দ্বিতীয়োঽধ্যায়ঃ ॥২ ॥
শঙ্কর উবাচ ।
ৎবদুক্তোঽয়মনুপ্রশ্নো রাম রাজীবলোচন ।
ৎবমেকঃ শ্রোতুমর্হোঽসি মত্তো ভৃগুকুলোদ্বহ ॥ ১ ॥
যত্তৎপরমকং ধাম মম ভার্গবনন্দন ।
যত্তদক্ষরমব্যক্তং পারং যস্মান্ন বিদ্যতে ।
জ্ঞানজ্ঞেয়ং জ্ঞানগম্যং হৃদি সর্বস্য চাশ্রিতম্ ॥ ২ ॥
ৎবামহং পুণ্ডরীকাক্ষং চিন্তয়ামি জনার্দনম্ ।
এতদ্রাম রহস্যং তে যথাবৎকথিতং বচঃ ॥ ৩ ॥
যে ভক্তাস্তমজং দেবং ন তে যান্তি পরাভবম্ ।
তমীশমজমব্যক্তং সর্বভূতপরায়ণম্ ॥ ৪ ॥
নারায়ণমনির্দেশ্যং জগৎকারণকারণম্ ।
সর্বতঃ পাণিপাদং তং সর্বতোঽক্ষিশিরোমুখম্ ॥ ৫ ॥
সর্বতঃ শ্রুতিমল্লোকে সর্বমাবৃত্য তিষ্ঠতি ।
সার্বেন্দ্রিয়গুণাভাসং সর্বেন্দ্রিয়বিবর্জিতম্ ॥ ৬ ॥
অসক্তং সর্বতশ্চৈব নির্গুণং গুণভোক্তৃ চ ।
বহিরন্তশ্চ ভূতনামচরশ্চর এব চ ॥ ৭ ॥
সূক্ষ্মৎবাত্তদবিজ্ঞেয়ং দূরস্থং চান্তিকং চ যৎ ।
অবিভক্তং বিভক্তেষু বিভক্তমিব চ স্থিতম্ ॥ ৮ ॥
ভূতবর্তি চ তজ্জ্ঞেয়ং গ্রসিষ্ণু প্রভবিষ্ণু চ । ভূতভর্তৃ-as per
BG)
জ্যোতিষামপি তজ্জ্যোতিঃ তমসাং পরমুচ্যতে ॥ ৯ ॥ (তমসঃ-as per BG)
অনাদিমৎপরং ব্রহ্ম ন সত্তন্নাঽসদুচ্যতে ।
প্রকৃতির্বিকৃতির্যোঽসৌ জগতাং ভূতভাবনঃ ॥ ১০ ॥
যস্মাৎপরতরং নাস্তি তং দেবং চিন্তয়াম্যহম্ ।
ইচ্ছামাত্রমিদং সর্বং ত্রৈলোক্যং সচরাচরম্ ॥ ১১ ॥
যস্য দেবাদিদেবস্য তং দেবং চিন্তয়াম্যহম্ ।
যস্মিন্ সর্বং যতঃ সর্বং যঃ সর্বং সর্বতশ্চ যঃ ॥ ১২ ॥
যশ্চ সর্বময়ো দেবস্তং দেবং চিন্তয়াম্যযম্ ।
যোগীশ্বরং পদ্মনাভং বিষ্ণুং জিষ্ণুং জগৎপতিম্ ॥ ১৩ ॥
জগন্নাথং বিশালাক্ষং চিন্তয়ামি জগদ্গুরুম্ ।
শুচিং শুচিপদং হংসং তৎপরং পরমেষ্ঠিনম্ ॥ ১৪ ॥
যুক্ত্বা সর্বাত্মনাঽঽত্মানং তং প্রপদ্যে জগৎপতিম্ ।
যস্মিন্ বিশ্বানি ভূতানি তিষ্ঠন্তি চ বিশন্তি চ ॥ ১৫ ॥
গুণভূতানি ভূতেশে সূত্রে মণিগণা ইব ।
যস্মিন্নিত্যে ততে তন্তৌ দৃষ্টে স্রগিব তিষ্ঠতি ॥ ১৬ ॥
সদসদ্গ্রথিতং বিশ্বং বিশ্বাঙ্গে বিশ্বকর্মণি ।
হরিং সহস্রশিরসং সহস্রচরণেক্ষণম্ ॥ ১৭ ॥
প্রাহুর্নারায়ণং দেবং যং বিশ্বস্য পরায়ণম্ ।
অণীয়সামণীয়াংসং স্থবিষ্ঠং চ স্থবীয়সাম্ ॥ ১৮ ॥
গরীয়সাং গরিষ্ঠং চ শ্রেষ্ঠং চ শ্রেয়সামপি ।
যং বাকেষ্বনুবাকেষু নিষৎসূপনিষৎস্বপি ॥ ১৯ ॥
গৃণন্তি সত্যকর্মাণং সত্যং সত্যেষু সামসু ।
চতুর্ভিশ্চতুরাত্মানং সত্ত্বস্থং সাত্ত্বতাং পতিম্ ॥ ২০ ॥
যং দিব্যৈর্দেবমর্চন্তি মুহ্যৈঃ পরমনামভিঃ ।
যমনন্যো ব্যপেতাশীরাত্মানং বীতকল্মষম্ ॥ ২১ ॥
ইষ্ট্বানন্ত্যায় গোবিন্দং পশ্যত্যাত্মন্যবস্থিতম্ ।
পুরাণঃ পুরুষঃ প্রোক্তো ব্রহ্মা প্রোক্তো যুগাদিষু ॥ ২২ ॥
ক্ষয়ে সঙ্কর্ষণঃ প্রোক্তস্তমুপাস্যমুপাস্মহে ।
যমেকং বহুধাঽঽত্মানং প্রাদুর্ভূতমধোক্ষজম্ ॥ ২৩ ॥
নান্যভক্তাঃ ক্রিয়াবন্তো যজন্তে সর্বকামদম্ ।
যমাহুর্জগতাং কোশং যস্মিন্ সন্নিহিতাঃ প্রজাঃ ॥ ২৪ ॥
যস্মিন্ লোকাঃ স্ফুরন্তীমে জলে শকুনয়ো যথা ।
ঋতমেকাক্ষরং ব্রহ্ম যত্তৎসদসতঃ পরম্ ॥ ২৫ ॥
অনাদিমধ্যপর্যন্তং ন দেবা নর্ষয়ো বিদুঃ ।
যং সুরাসুরগন্ধর্বাস্সসিদ্ধর্ষিমহোরগাঃ ॥ ২৬ ॥
প্রয়তা নিত্যমর্চন্তি পরমং দুঃখভেষজম্ ।
অনাদিনিধনং দেবমাত্ময়োনিং সনাতনম্ ॥ ২৭ ॥
অপ্রতর্ক্যমবিজ্ঞেয়ং হরিং নারায়ণং প্রভুম্ ।
অতিবায়্বিন্দ্রকর্মাণং চাতিসূর্যাগ্নিতেজসম্ ॥ ২৮ ॥
অতিবুদ্ধীন্দ্রিয়গ্রামং তং প্রপদ্যে প্রজাপতিম্ ।
যং বৈ বিশ্বস্য কর্তারং জগতস্তস্থুষাং পতিম্ ॥ ২৯ ॥
বদন্তি জগতোঽধ্যক্ষমক্ষরং পরমং পদম্ ।
যস্যাগ্নিরাস্যং দ্যৌর্মূর্ধা খং নাভিশ্চরণৌ ক্ষিতিঃ ॥ ৩০ ॥
চন্দ্রাদিত্যৌ চ নয়নে তং দেবং চিন্তয়াম্যহম্ ।
যস্য ত্রিলোকী জঠরে যস্য কাষ্ঠাশ্চ বাহনাঃ ॥ ৩১ ॥
যস্য শ্বাসশ্চ পবনস্তং দেবং চিন্তয়াম্যহম্ ।
বিষয়ে বর্তমানানাং যং তং বৈশেষিকৈর্গুণৈঃ ॥ ৩২ ॥
প্রাহুর্বিষয়গোপ্তারং তং দেবং চিন্তয়াম্যহম্ ।
পরঃ কালাৎপরো যজ্ঞাৎপরস্সদসতশ্চ যঃ ॥ ৩৩ ॥
অনাদিরাদির্বিশ্বস্য তং দেবং চিন্তয়াম্যহম্ ।
পদ্ভ্যাং যস্য ক্ষিতির্জাতা শ্রোত্রাভ্যাং চ তথা দিশঃ ॥ ৩৪ ॥
পূর্বভাগে দিবং যস্য তং দেবং চিন্তয়াম্যহম্ ।
নাভ্যাং যস্যান্তরিক্ষস্য নাসাভ্যাং পবনস্য চ ॥ ৩৫ ॥
প্রস্বেদাদম্ভসাং জন্ম তং দেবং চিন্তয়াম্যহম্ ॥ ৩৬ ॥
বরাহশীর্ষং নরসিংহরূপং
দেবেশ্বরং বামনরূপরূপম্ ।
ত্রৈলোক্যনাথং বরদং বরেণ্যং
তং রাম নিত্যং মনসা নতোঽস্মি ॥ ৩৭ ॥
বক্ত্রাদ্যস্য ব্রাহ্মণাস্সম্প্রভূতা
যদ্বক্ষসঃ ক্ষত্রিয়াঃ সম্প্রভূতাঃ ।
যস্যোরুয়ুগ্মাচ্চ তথৈব বৈশ্যাঃ
পদ্ভ্যাং তথা যস্য শূদ্রাঃ প্রসূতাঃ ॥ ৩৮ ॥
ব্যাপ্তং তথা যেন জগৎসমগ্রং
বিভূতিভির্ভূতভবোদ্ভবেন ।
দেবাধিনাথং বরদং বরেণ্যং
তং রাম নিত্যং মনসা নতোঽস্মি ॥ ৩৯ ॥
ইতি শ্রীবিষ্ণুধর্মোত্তরে প্রথমখণ্ডে মার্কণ্ডেয়বজ্রসংবাদে
শ্রীভার্গবরামপ্রশ্নে
শঙ্করগীতাসু ধ্যেয়নির্দেশো নাম দ্বিপঞ্চাশত্তমোঽধ্যায়ঃ ॥৫২ ॥
অথ শ্রীবিষ্ণুধর্মোত্তরে প্রথমখণ্ডান্তর্গতে শঙ্করগীতাসু
তৃতীয়োঽধ্যায়ঃ ॥৩ ॥
রাম উবাচ ।
বরাহং নরসিংহং চ বামনং চ মহেশ্বর ।
ৎবত্তোঽহং শ্রোতুমিচ্ছামি প্রাদুর্ভাবান্মহাত্মনঃ ॥ ১ ॥
শঙ্কর উবাচ ।
অদিতিশ্চ দিতিশ্চৈব দ্বে ভার্যে কশ্যপস্য চ ।
অদিতির্জনয়ামাস দেবানিন্দ্রপুরোগমান্ ॥ ২ ॥
দিতিশ্চ জনয়ামাস দ্বৌ পুত্রৌ ভীমবিক্রমৌ ।
হিরণ্যাক্ষং দুরাধর্ষং হিরণ্যকশিপুং তথা ॥ ৩ ॥
ততোঽভিষিক্তবান্ শক্রং দেবরাজ্যে প্রজাপতিঃ ।
দানবানাং তথা রাজ্যে হিরণ্যাক্ষং বলোৎকটম্ ॥ ৪ ॥
অভিষিচ্য তয়োঃ প্রাদাৎস্বর্গং পাতালমেব চ ।
পাতালং শাসতি তথা হিরণ্যাক্ষে মহাসুরে ॥ ৫ ॥
ধরাধারা ধরাং ত্যক্ত্বা খমুৎপেতূ রয়াৎপুরা । ধরাধরা?
পক্ষবন্তো মহাভাগ নূনং ভাব্যর্থচোদিতাঃ ॥ ৬ ॥
ধরাধরপরিত্যক্তা ধরা চলনিবন্ধনা ।
যদা তদা দৈত্যপুরং সকলং ব্যাপ্তমম্ভসা ॥ ৭ ॥
দৃষ্ট্বৈব স্বপুরং ব্যাপ্তমম্ভসা দিতিজোত্তমঃ ।
সৈন্যমুদ্যোজয়ামাস জাতশঙ্কঃ সুরান্ প্রতি ॥ ৮ ॥
উদ্যুক্তেন স সৈন্যেন দৈত্যানাং চতুরঙ্গিণা ।
বিজিত্য ত্রিদশাঞ্জন্যে আজহার ত্রিবিষ্টপম্ ॥ ৯ ॥
হৃতাধিকারাস্ত্রিদশা জগ্মুঃ শরণমঞ্জসা ।
দেবরাজং পুরস্কৃত্য বাসুদেবমজং বিভুম্ ॥ ১০ ॥
ত্রিদশান্ শরণং প্রপ্তান্ হিরণ্যাক্ষবিবাসিতান্ ।
সংয়োজ্যাভয়দানেন বিসসর্জ জনার্দনঃ ॥ ১১ ॥
বিসৃজ্য ত্রিদশান্ সর্বান্ চিন্তয়ামাস কেশবঃ ।
কিন্নু রূপমহং কৃৎবা ঘাতয়িষ্যে সুরার্দনম্ ॥ ১২ ॥
তির্যঙ্মনুষ্যদেবানামবধ্যঃ স সুরান্তকঃ ।
ব্রহ্মণো বরদানেন তস্মাত্তস্য বধেপ্সয়া ॥ ১৩ ॥
নৃবরাহো ভবিষ্যামি ন দেবো ন চ মানুষঃ ।
তির্যগ্রূপেণ চৈবাহং ঘাতয়িষ্যামি তং ততঃ ॥ ১৪ ॥
এতাবদুক্ত্বা সঙ্গেন নৃবরাহোঽভবৎপ্রভুঃ ।
চূর্ণিতাঞ্জনশৈলাভস্তপ্তজাম্বূনদাম্বরঃ ॥ ১৫ ॥
যমুনাবর্ত্তকৃষ্ণাঙ্গঃ তদাবর্ততনূরুহঃ ।
তদোঘ ইব দুর্বার্যস্তৎপিত্রা তেজসা সমঃ ॥ ১৬ ॥
তৎপ্রবাহ ইবাক্ষোভ্যস্তৎপ্রবাহ ইবৌঘবান্ ।
তৎপ্রবাহামলতনুস্তৎপ্রবাহমনোহরঃ ॥ ১৭ ॥
সজলাঞ্জনকৃষ্ণাঙ্গঃ সজলাম্বুদসচ্ছবিঃ ।
পীতবাসাস্তদা ভাতি সবিদ্যুদিব তোয়দঃ ॥ ১৮ ॥
উরসা ধারয়ন্ হারং শশাঙ্কসদৃশচ্ছবিঃ ।
শুশুভে সর্বভূতাত্মা সবলাক ইবাম্বুদঃ ॥ ১৯ ॥
শশাঙ্কলেখাবিমলে দংষ্ট্রে তস্য বিরেজতুঃ ।
মেঘান্তরিতবিম্বস্য দ্বৌ ভাগৌ শশিনো যথা ॥ ২০ ॥
করাভ্যাং ধারয়ন্ ভাতি শঙ্খচক্রে জনার্দনঃ ।
চন্দ্রার্কসদৃশে রাম পাদচারীব পর্বতঃ ॥ ২১ ॥
মহাজীমূতসঙ্কাশো মহাজীমূতসন্নিভঃ ।
মহাজীমূতবদ্বেগী মহাবলপরাক্রমঃ ॥ ২২ ॥
দানবেন্দ্রবধাকাঙ্ক্ষী হিরণ্যাক্ষসভাং যয়ৌ ।
হিরণ্যাক্ষোঽপি তং দৃষ্ট্বা নৃবরাহং জনার্দনম্ ॥ ২৩ ॥
দানবাংশ্চোদয়ামাস তির্যগ্জাতমপূর্বকম্ ।
গৃহ্যতাং বধ্যতাং চৈব ক্রীডার্থং স্থাপ্যতাং তথা ॥ ২৪ ॥
ইত্যেবমুক্তঃ সংরব্ধঃ পাশহস্তাংস্তু দানবান্ ।
জিঘৃক্ষমাণাংশ্চক্রেণ জঘান শতশো রণে ॥ ২৫ ॥
হন্যমানেষু দৈত্যেষু হিরণ্যাক্ষোঽথ দানবান্ ।
চোদয়ামাস সংরব্ধান্ বরাহাধিককারণাৎ ॥ ২৬ ॥
চোদিতা দানবেন্দ্রেণ দানবাঃ শস্ত্রপাণয়ঃ ।
প্রববর্ষুস্তথা দেবং শস্ত্রবর্ষেণ কেশবম্ ॥ ২৭ ॥
দৈত্যাঃ শস্ত্রনিপাতেন দেবদেবস্য চক্রিণঃ ।
নৈব শেকুর্বৃথাকর্তুং যত্নবন্তোঽপি নির্ভয়াঃ ॥ ২৮ ॥
হন্যমানোঽপি দৈত্যেন্দ্রৈঃ দানবান্ মধুসূদনঃ ।
জঘান চক্রেণ তদা শতশোঽথ সহস্রশঃ ॥ ২৯ ॥
হন্যমানেষু সৈন্যেষু হিরণ্যাক্ষঃ স্বয়ং ততঃ ।
উত্থায় ধনুষা দেবং প্রববর্ষ সুরোত্তমম্ ॥ ৩০ ॥
হিরণ্যাক্ষস্তু তান্ দৃষ্ট্বা বিফলাংশ্চ শিলীমুখান্ ।
শিলীমুখাভান্ সম্পশ্যন্ সমপশ্যন্মহদ্ভয়ম্ ॥ ৩১ ॥
ততোঽস্ত্রৈর্যুয়ুধে তেন দেবদেবেন চক্রিণা ।
তান্যস্য ফলহীনানি চকার ভগবান্ স্বয়ম্ ॥ ৩২ ॥
ততো গদাং কাঞ্চনপট্টনদ্ধাং বিভূষিতাং কিঙ্কিণিজালসঙ্ঘৈঃ ।
চিক্ষেপ দৈত্যাধিপতিঃ স ঘোরাং তাং চাপি দেবো বিফলীচকার ॥ ৩৩ ॥
শক্তিং ততঃ পট্টবিনদ্ধমধ্যামুল্কানলাভাং তপনীয়চিত্রাম্ ।
চিক্ষেপ দৈত্যস্স বরাহকায়ে হুঙ্কারদগ্ধা নিপপাত সা চ ॥ ৩৪ ॥
ততস্ত্রিশূলং জ্বলিতাগ্রশূলং স শীঘ্রগং দেবগণস্য সঙ্খ্যে ।
দৈত্যাধিপস্তস্য সসর্জ বেগাদবেক্ষিতঃ সোঽপি জগাম ভূমিম্ ॥ ৩৫ ॥
শঙ্খস্বনেনাপি জনার্দনশ্চ বিদ্রাব্য দৈত্যান্ সকলান্ মহাত্মা ।
সকুণ্ডলং দৈত্যগণাধিপস্য চিচ্ছেদ চক্রেণ শিরঃ প্রসহ্য ॥ ৩৬ ॥
নিপাতিতে দৈত্যপতৌ স দেবঃ সম্পূজিতঃ শক্রপিতামহাভ্যাম্ ।
ময়া চ সর্বৈস্ত্রিদশৈঃ সমেতৈর্জগাম কাষ্ঠাং মনসা ৎবভীষ্টাম্ ॥ ৩৭ ॥
শক্রোঽপি লব্ধ্বা ত্রিদিবং মহাত্মা চিচ্ছেদ পক্ষান্ ধরণীধরাণাম্ ।
ররক্ষ চেমাং সকলাং ত্রিলোকীং ধর্মেণ ধর্মজ্ঞভৃতাং বরিষ্ঠঃ ॥ ৩৮ ॥
ইতি শ্রীবিষ্ণুধর্মোত্তরে প্রথমখণ্ডে শঙ্করগীতাসু নৃবরাহপ্রাদুর্ভাবে
হিরণ্যাক্ষবধো নাম ত্রিপঞ্চাশত্তমোঽধ্যায়ঃ ॥৫৩ ॥
অথ শ্রীবিষ্ণুধর্মোত্তরে প্রথমখণ্ডান্তর্গতে শঙ্করগীতাসু
চতুর্থোঽধ্যায়ঃ ॥৪ ॥
শঙ্কর উবাচ ।
হিরণ্যাক্ষে হতে দৈত্যে ভ্রাতা তস্য মহাত্মনঃ ।
হিরণ্যকশিপুর্নাম চকারোগ্রং মহত্তপঃ ॥ ১ ॥
দশবর্ষসহস্রাণি দশবর্ষশতানি চ ।
জয়োপবাসনিরতঃ স্নানমৌনাশ্রিতব্রতঃ ॥ ২ ॥
তপঃশমদমাভ্যাং চ ব্রহ্মচর্যেণ চানঘ ।
ব্রহ্মা প্রীতমনাস্তস্য স্বয়মাগত্য ভার্গব ॥ ৩ ॥
বিমানেনার্কবর্ণেন হংসয়ুক্তেন ভাস্বতা ।
আদিত্যৈস্সহিতঃ সাধ্যৈস্সহিতো মরুদশ্বিভিঃ ॥ ৪ ॥
রুদ্রৈর্বিশ্বসহায়ৈশ্চ যক্ষরাক্ষসপন্নগৈঃ ।
দিগ্ভির্বিদিগ্ভিশ্চ তথা খেচরৈশ্চ মহাগ্রহৈঃ ॥ ৫ ॥
নিম্নগাভিঃ সমুদ্রৈশ্চ মাসর্ত্বয়নসংধিভিঃ ।
নক্ষত্রৈশ্চ মুহূর্তৈশ্চ কালস্যাবয়বৈস্তথা ॥ ৬ ॥
দেবর্ষিভিঃ পুণ্যতমৈঃ সিদ্ধৈঃ সপ্তর্ষিভিস্তথা ।
রাজর্ষিভিঃ পুণ্যতমৈর্গন্ধর্বৈরপ্সরোগণৈঃ ॥ ৭ ॥
চরাচরগুরুঃ শ্রীমান্ বৃতঃ সর্বৈর্দিবৌকসৈঃ ।
ব্রহ্মা ব্রহ্মবিদাং শ্রেষ্ঠো দৈত্যং বচনমব্রবীৎ ॥ ৮ ॥
ব্রহ্মোবাচ ।
প্রীতোঽস্মি তব ভক্তস্য তপসানেন সুব্রত ।
বরং বরয় ভদ্রং তে যথেষ্টং কামমাপ্নুহি ॥ ৯ ॥
হিরণ্যকশিপুরুবাচ ।
ন দেবাসুরগন্ধর্বা ন যক্ষোরগরাক্ষসাঃ ।
ন মানুষাঃ পিশাচা বা হন্যুর্মাং দেবসত্তম ॥ ১০ ॥
ঋষয়োঽপি ন মাং শাপং ক্রুদ্ধা লোকপিতামহ ।
শপেয়ুস্তপসা যুক্তা বরমেতদ্বৃণোম্যহম্ ॥ ১১ ॥
ন শস্ত্রেণ ন চাস্ত্রেণ গিরিণা পাদপেন চ ।
ন শুষ্কেন ন চাঽঽর্দ্রেণ বধং মে স্যাৎকথঞ্চন ॥ ১২ ॥
ভবেয়মহমেবার্কঃ সোমো বায়ুর্হুতাশনঃ ।
সলিলং চান্তরিক্ষং চ নক্ষত্রাণি দিশো দশ ॥ ১৩ ॥
অহং ক্রোধশ্চ কামশ্চ বরুণো বাসবো যমঃ ।
ধনদশ্চ তথাধ্যক্ষো যক্ষঃ কিম্পুরুষাধিপঃ ॥ ১৪ ॥
ব্রহ্মোবাচ ।
এতে দিব্যবরাংস্তাত ময়া দত্তাস্তবাদ্ভুতাঃ ।
সর্বান্ কামানিমাংস্তস্মাৎপ্রাপ্স্যসি ৎবং ন সংশয়ঃ ॥ ১৫ ॥
শঙ্কর উবাচ ।
এবমুক্ত্বা স ভগবান্ জগামাকাশমেব হি ।
বৈরাজং দেবসদনং মহর্ষিগণসেবিতম্ ॥ ১৬ ॥
ততো দেবাশ্চ নাগাশ্চ গন্ধর্বা মুনয়স্তথা ।
বরপ্রদানং শ্রুৎবৈব পিতামহমুপস্থিতাঃ ॥ ১৭ ॥
দেবা ঊচুঃ ।
বরেণানেন ভগবন্ বধিষ্যতি স নোঽসুরঃ ।
তন্নঃ প্রসীদ ভগবন্ বধোঽপ্যস্য বিচিন্ত্যতাম্ ॥ ১৮ ॥
ভগবান্ সর্বভূতানাং স্বয়ম্ভূরাদিকৃৎপ্রভুঃ ।
স্রষ্টা চ হব্যকব্যানাং চাব্যক্তঃ প্রকৃতির্ধ্রুবঃ ॥ ১৯ ॥
শঙ্কর উবাচ ।
সর্বলোকহিতং বাক্যং শ্রুৎবা দেবঃ প্রজাপতিঃ ।
প্রোবাচ বরদো বাক্যং সর্বান্ দেবগণাংস্ততঃ ॥ ২০ ॥
ব্রহ্মোবাচ ।
অবশ্যং ত্রিদশাস্তেন প্রাপ্তব্যং তপসঃ ফলম্ ।
তত(?)স্তস্য বধং বিষ্ণুস্তপসোঽন্তে করিষ্যতি ॥ ২১ ॥
শঙ্কর উবাচ ।
এবং শ্রুৎবা সুরাঃ সর্বে বাক্যং পঙ্কজজন্মনঃ ।
স্বানি স্থানানি দিব্যানি জগ্মুস্তে বৈ মুদান্বিতাঃ ॥ ২২ ॥
লঘুমাত্রে বরে তস্মিন্ সর্বাঃ সোঽবাধত প্রজাঃ । (লব্ধমাত্রে?)
হিরণ্যকশিপুর্দৈত্যো বরদানেন দর্পিতঃ ॥ ২৩ ॥
আশ্রমেষু মহাত্মানো মুনীন্দ্রান্ সংশিতব্রতান্ ।
সত্যধর্মরতান্ দান্তান্ দুরাধর্ষো ভবংস্তু সঃ ॥ ২৪ ॥
দেবন্ ত্রিভুবনস্থাংশ্চ পরাজিত্য মহাসুরঃ ।
ত্রৈলোক্যং বশমানীয় স্বর্গে বসতি দানবঃ ॥ ২৫ ॥
যদা বরমদোন্মত্তো হ্যাবাসং কৃতবান্ দিবি ।
যাজ্ঞিয়ান্ কৃতবান্ দৈত্যানয়াজ্ঞেয়াশ্চ দেবতাঃ ॥ ২৬ ॥
আদিত্যবসবো রুদ্রা বিশ্বেদেবাস্তথাশ্বিনৌ ।
ভৃগবোঽঙ্গিরসঃ সাধ্যা মরুতশ্চ সবাসবাঃ ॥ ২৭ ॥
শরণ্যং শরণং বিষ্ণুমুপতস্থুর্মহাবলম্ ।
দেবং ব্রহ্মময়ং বিষ্ণুং ব্রহ্মভূতসনাতনম্ ॥ ২৮ ॥
ভূতভব্যভবিষ্যস্য প্রভুং লোকপরায়ণম্ ।
নারায়ণং বিভুং দেবাঃ শরণ্যং শরণং গতাঃ ॥ ২৯ ॥
দেবা ঊচুঃ ।
ত্রায়স্ব নোঽদ্য দেবেশ হিরণ্যকশিপোর্বধাৎ ।
ৎবং হি নঃ পরমো দেবো ব্রহ্মাদীনাং সুরোত্তম ॥ ৩০ ॥
প্রোৎফুল্লামলপত্রাক্ষ শত্রুপক্ষক্ষয়ঙ্কর ।
ক্ষয়ায় দিতিবংশস্য শরণং ৎবং ভবস্ব নঃ ॥ ৩১ ॥
শ্রীভগবানুবাচ ।
ভয়ং ত্যজধ্বমমরা অভয়ং বো দদাম্যহম্ ।
তথৈব ত্রিদিবং দেবাঃ প্রতিপদ্যত মাচিরম্ ॥ ৩২ ॥
এষোঽমুং সবলং দৈত্যং বরদানেন দর্পিতম্ ।
অবধ্যমমরেন্দ্রাণাং দানবেন্দ্রং নিহন্ম্যহম্ ॥ ৩৩ ॥
শঙ্কর উবাচ ।
এবমুক্ত্বা স ভগবান্ বিসৃজ্য ত্রিদিবেশ্বরান্ ।
নারসিংহং বপুশ্চক্রে সহস্রাংশুসমপ্রভম্ ॥ ৩৪ ॥
প্রাংশুং কনকশৈলাভং জ্বালাপুঞ্জবিভূষিতম্
।দৈত্যসৈন্যমহাম্ভোধিবডবানলবর্চসম্ ॥ ৩৫ ॥
সন্ধ্যানুরক্তমেঘাভং নীলবাসসমচ্যুতম্ ।
দেবদারুবনচ্ছন্নং যথা মেরুং মহাগিরিম্ ॥ ৩৬ ॥
সম্পূর্ণবক্ত্রদশনৈঃ শশাঙ্কশকলোপমৈঃ ।
পূর্ণং মুক্তাফলৈঃ শুভ্রৈঃ সমুদ্রমিব কাঞ্চনম্ ॥ ৩৭ ॥
নখৈর্বিদ্রুমসঙ্কাশৈর্বিরাজিতকরদ্বয়ম্ ।
দৈত্যনাথক্ষয়করৈঃ ক্রোধস্যেব যথাঙ্কুরৈঃ ॥ ৩৮ ॥
সটাভারং সকুটিলং বহ্নিজ্বালাগ্রপিঙ্গলম্ ।
ধারয়ন্ ভাতি সর্বাত্মা দাবানলমিবাচলঃ ॥ ৩৯ ॥
দৃশ্যাদৃশ্যমুখে তস্য জিহ্বাভ্যুদিতচঞ্চলা ।
প্রলয়ান্তাম্বুদস্যেব চঞ্চলা তু তডিল্লতা ॥ ৪০ ॥
আবর্তিভির্লোমঘনৈঃ ব্যাপ্তং বিগ্রহমূর্জিতম্ ।
মহাকটিতটস্কন্ধমলাতপ্রতিমেক্ষণম্ ॥ ৪১ ॥
কল্পান্তমেঘনির্ঘোষজ্বালানিঃশ্বাসমারুতম্ ।
দুর্নিরীক্ষ্যং দুরাধর্ষং বজ্রমধ্যবিভীষণম্ ॥ ৪২ ॥
কৃৎবা মূর্তিং নৃসিংহস্য দানবেন্দ্রসভাং যয়ৌ ।
তাং বভঞ্জ তু বেগেন দৈত্যানাং ভয়বর্ধনঃ ॥ ৪৩ ॥
ভজ্যমানাং সভাং দৃষ্ট্বা নৃসিংহেন মহাত্মনা ।
হিরণ্যকশিপূ রাজা দানবান্ সমচোদয়ৎ ॥ ৪৪ ॥
সত্ত্বজাতমিদং ঘোরং চাপূর্বং পুনরাগতম্ ।
ঘাতয়ধ্বং দুরাধর্ষং যেন মে নাশিতা সভা ॥ ৪৫ ॥
তস্য তদ্বচনং শ্রুৎবা দৈত্যাঃ শতসহস্রশঃ ।
আয়ুধৈর্বিবিধৈর্জঘ্নুর্দেবদেবং জনার্দনম্ ॥ ৪৬ ॥
নানায়ুধসহস্রাণি তস্য গাত্রেষু ভার্গব ।
বিশীর্ণান্যেব দৃশ্যন্তে মৃল্লোষ্টানীব পর্বতে ॥ ৪৭ ॥
দৈত্যায়ুধানাং বৈফল্যং কৃৎবা হৎবা চ দানবান্ ।
করপাদপ্রহারৈশ্চ শতশোঽথ সহস্রশঃ ॥ ৪৮ ॥
জগ্রাহ বেগাদ্দৈতেয়ং হিরণ্যকশিপুং ততঃ ।
নৃসিংহহেতোর্বিক্রান্তমস্ত্রবর্ষমহাম্বুদম্ ॥ ৪৯ ॥
বেগেনোৎসঙ্গমারোপ্য কদলীদললীলয়া ।
দারয়ামাস দৈত্যেশং বক্ষস্থলমহাগিরিম্ ॥ ৫০ ॥
কৃৎবা তমসুভির্হীনং দৈত্যেশং কেশবঃ স্বয়ম্ ।
অসুরাণাং বিনাশং চ ক্রুদ্ধো নরহরির্ব্যধাৎ ॥ ৫১ ॥
হৎবাসুরং শোণিতবিন্দুচিত্রং সম্পূজ্য দেবাঃ সহ বাসবেন ।
জগ্মুঃ স্বধিষ্ণ্যানি মুদা সমেতা দেবোঽপ্যথান্তর্হিতমূর্তিরাস ॥ ৫২ ॥
ইতি শ্রিবিষ্ণুধর্মোত্তরে প্রথমখণ্ডে মার্কণ্ডেয়বজ্রসংবাদে শঙ্করগীতাসু
নরসিংহপ্রাদুর্ভাবো নাম চতুষ্পঞ্চাশত্তমোঽধ্যায়ঃ ॥৫৪ ॥
অথ শ্রীবিষ্ণুধর্মোত্তরে প্রথমখণ্ডান্তর্গতে শঙ্করগীতাসু
পঞ্চমোঽধ্যায়ঃ ॥৫ ॥
শঙ্কর উবাচ ।
হতে হিরণ্যকশিপৌ দানবে দেবকণ্টকে ।
হতশেষাস্তু দৈতেয়াঃ পাতালতলমাশ্রিতাঃ ॥ ১ ॥
পাতালতলসংস্থেষু দানবেষু মহায়শাঃ ।
প্রহ্লাদপৌত্রো ধর্মাত্মা বিরোচনসুতো বলিঃ ॥ ২ ॥
আরাধ্য তপসোগ্রেণ বরং লেভে পিতামহাৎ ।
অবধ্যৎবমজেয়ৎবং সমরেষু সুরাসুরৈঃ ॥ ৩ ॥
বরলব্ধং বলিং জ্ঞাৎবা পুনশ্চক্রুর্দিতেঃ সুতাঃ ।
প্রহৃষ্টা দৈত্যরাজানং প্রহ্লাদানুমতের্বলিম্ ॥ ৪ ॥
সম্প্রাপ্য দৈত্যরাজ্যং তু বলেন চতুরঙ্গিণা ।
জিৎবা দেবেশ্বরং শক্রমাজহারামরাবতীম্ ॥ ৫ ॥
স্থানভ্রষ্টো মহেন্দ্রোঽপি কশ্যপং শরণং গতঃ ।
কশ্যপেন তদা সার্ধং ব্রহ্মাণং শরণং গতঃ ॥ ৬ ॥
ব্রহ্মণাঽভিহিতো দেবং জগাম শরণং হরিম্ ।
অমৃতাধ্মাতমেঘাভং শঙ্খচক্রগদাধরম্ ॥ ৭ ॥
দেবোঽপ্যভয়দানেন সংয়োজ্য বলসূদনং ।
উবাচ বচনং কালে মেঘগংভীরয়া গিরা ॥ ৮ ॥
শ্রীভগবানুবাচ ।
গচ্ছ শক্র ভবিষ্যামি ত্রাতা তে বলসূদন ।
দেবরূপধরো ভূৎবা বঞ্চয়িষ্যামি তং বলিম্ ॥ ৯ ॥
শঙ্কর উবাচ ।
এবমুক্তস্তদা শক্রঃ প্রয়যৌ কশ্যপাশ্রমম্ ।
আদিদেশাদিতের্গর্ভং চাংশেনাথ চ সর্বদা ॥ ১০ ॥
গর্ভস্য এব তেজাংসি দানবেভ্যঃ স আদদে ।
ততঃ কালেন সুষুবে অদিতির্বামনাকৃতিম্ ॥ ১১ ॥
যস্মিন্ জাতে সুরগণাঃ প্রহর্ষমতুলং গতাঃ ।
ঋষয়শ্চ মহাভাগাস্ত্রৈকাল্যামলদর্শিনঃ ॥ ১২ ॥
এতস্মিন্নেব কালে তু হয়মেধায় দীক্ষিতঃ ।
বলির্দৈত্যপতিঃ শ্রিমান্ স্যালিগ্রামমুপাশ্রিতঃ ॥ ১৩ ॥
বামস্কন্ধে তমাদায় তস্য যজ্ঞে বৃহস্পতিঃ ।
অনয়দ্ভৃগুশার্দূল নূনং তস্যৈব মায়যা ॥ ১৪ ॥
যজ্ঞবাটং স সম্প্রাপ্য যজ্ঞং তুষ্টাব বামনঃ ।
আত্মানমাত্মনা ব্রহ্মন্ ভস্মচ্ছন্ন ইবানলঃ ॥ ১৫ ॥
প্রবেশয়ামাস চ তং বলির্ধর্মভৃতাং বরঃ ।
দদর্শ চ মহাভাগং বামনং সুমনোহরম্ ॥ ১৬ ॥
সংয়ুক্তসর্বাবয়বৈঃ পীনৈঃ সঙ্ক্ষিপ্তপর্বভিঃ ।
কৃষ্ণাজিনজটাদণ্ডকমণ্ডলুবিরাজিতম্ ॥ ১৭ ॥
বিক্রমিষ্যন্ যথা ব্যাঘ্রো লীয়তি স্ম স্ববিগ্রহম্ ।
বিক্রমিষ্যংস্তথৈবোর্বীং লীনগাত্রঃ স্ববিগ্রহে ॥ ১৮ ॥
এতস্মিন্নেব কালে তু হয়মেধায় দীক্ষিতঃ ।
তস্মাত্তু প্রার্থয়দ্রাজন্ দেহি মহ্যং ক্রমত্রয়ম্ ॥ ১৯ ॥
এবমুক্তস্তু দেবেন বলির্দৈত্যগণাধিপঃ ।
প্রদদাবুদকং তস্য পাবয়স্বেতি চাব্রবীৎ ॥ ২০ ॥
অন্ন্যচ্চ যদভীষ্টং তে তদ্গৃহাণ দ্বিজোত্তম ।
প্রতিজগ্রাহ চ জলং প্রবাত্যেব তদা হরিঃ ॥ ২১ ॥
উদঙ্মুখৈর্দৈত্যবরৈঃ বীক্ষ্যমাণ ইবাম্বুদঃ ।
আক্রমংস্তু হরির্লোকান্ দানবাঃ শস্ত্রপাণয়ঃ ॥ ২২ ॥
অভিদ্রবন্তি বেগেন নানাবক্ত্রশিরোধরাঃ ।
গরুডাননাঃ খড্গমুখা ময়ূরবদনাস্তদা ॥ ২৩ ॥
ঘোরা মকরবক্ত্রাশ্চ ক্রোষ্টুবক্ত্রাশ্চ দানবাঃ ।
আখুদর্দুরবক্ত্রাশ্চ ঘোরবৃকমুখাস্তথা ॥ ২৪ ॥
মার্জারশশবক্ত্রাশ্চ হংসকাকাননাস্তথা ।
গোধাশল্যকবক্ত্রাশ্চ অজাবিমহিষাননাঃ ॥ ২৫ ॥
সিংহব্যাঘ্রশৃগালানাং দ্বীপিবানরপক্ষিণাম্ ।
হস্ত্যশ্বগোখরোষ্ট্রাণাং ভুজগানাং সমাননাঃ ॥ ২৬ ॥
প্রতিগ্রহজলং প্রাপ্য ব্যবর্ধত তদা হরিঃ ।
উদঙ্মুখৈর্দেবগণৈরীক্ষমাণ ইবাম্বুদঃ ॥ ২৭ ॥
বিক্রমন্তং হরিং লোকান্ দানবাঃ শস্ত্রপাণয়ঃ ।
মৎস্যকচ্ছপবক্ত্রাণাং দর্দুরাণাং সমাননাঃ ॥ ২৮ ॥
স্থূলদন্তা বিবৃত্তাক্ষা লম্বোষ্ঠজঠরাস্তথা ।
পিঙ্গলাক্ষা বিবৃত্তাস্যা নানাবাহুশিরোধরাঃ ॥ ২৯ ॥
স্থূলাগ্রনাসাশ্চিপিটা মহাহনুকপালিনঃ ।
চীনাংশুকোত্তরাসঙ্গাঃ কেচিৎকৃষ্ণাজিনাম্বরাঃ ॥ ৩০ ॥
ভুজঙ্গভরণাশ্চান্যে কেচিন্মুকুটভূষিতাঃ ।
সকুণ্ডলাঃ সকটকাঃ সশিরস্ত্রাণমস্তকাঃ ॥ ৩১ ॥
ধনুর্বাণধরাশ্চান্যে তথা তোমরপাণয়ঃ ।
খড্গচর্মধরাশ্চান্যে তথা পরিঘপাণয়ঃ ॥ ৩২ ॥
শতঘ্নীচক্রহস্তাশ্চ গদামুসলপাণয়ঃ ।
অশ্ময়ন্ত্রায়ুধোপেতা ভিণ্ডিপালায়ুধাস্তথা ॥ ৩৩ ॥
শূলোলূখলহস্তাশ্চ পরশ্বধধরাস্তথা ।
মহাবৃক্ষপ্রবহণা মহাপর্বতয়োধিনঃ ॥ ৩৪ ॥
ক্রমমাণং হৃষীকেশমুপাবর্তন্ত সর্বশঃ ।
স তান্ মমর্দ সর্বাত্মা তন্মুখান্ দৈত্যদানবান্ ॥ ৩৫ ॥
সরসীব মহাপদ্মান্ মহাহস্তীব দানবান্ ।
প্রমথ্য সর্বান্ দৈতেয়ান্ হস্তপাদতলৈস্ততঃ ॥ ৩৬ ॥
রূপং কৃৎবা মহাভীমমাজহারাঽঽশু মেদিনীম্ ।
তস্য বিক্রমতো ভূমিং চন্দ্রাদিত্যৌ স্তনান্তরে ॥ ৩৭ ॥
পরং প্রক্রমমাণস্য নাভিদেশে ব্যবস্থিতৌ ।
ততঃ প্রক্রমমাণস্য জানুদেশে ব্যবস্থিতৌ ॥ ৩৮ ॥
ততোঽপি ক্রমমাণস্য পদ্ভ্যাং দেবৌ ব্যবস্থিতৌ ।
জিৎবা স মেদিনীং কৃৎস্নাং হৎবা চাসুরপুঙ্গবান্ ॥ ৩৯ ॥
দদৌ শক্রায় বসুধাং বিষ্ণুর্বলবতাং বরঃ ।
স্বং রূপং চ তথাঽঽসাদ্য দানবেন্দ্রমভাষত ॥ ৪০ ॥
শ্রীভগবানুবাচ ।
যজ্ঞবাটে ৎবদীয়েঽস্মিন্ সালিগ্রামে মহাসুর ।
ময়া নিবিষ্টপাদেন মাপিতেয়ং বসুন্ধরা ॥ ৪১ ॥
প্রথমং তু পদং জাতং নৌর্বন্ধশিখরে মম ।
দ্বিতীয়ং মেরুশিখরে তৃতীয়ং নাভবৎক্বচিৎ ॥ ৪২ ॥
তন্মে বরয় দৈত্যেন্দ্র যন্ময়াঽঽপ্তং প্রতিগ্রহম্ ।
বলিরুবাচ ।
যাবতী বসুধা দেব ৎবয়ৈব পরিনির্মিতা ॥ ৪৩ ॥
তাবতী তে ন সম্পূর্ণা দেবদেব ক্রমত্রয়ম্ ।
ন কৃতং যত্ত্বয়া দেব কুতস্তন্মে মহেশ্বর ॥ ৪৪ ॥
ন চ তদ্বিদ্যতে দেব তথৈবান্যস্য কস্যচিৎ ।
শ্রীভগবানুবাচ ।
ন মে ৎবয়াঽঽপূর্যতে মে দানবেন্দ্র যথাশ্রুতম্ ॥ ৪৫ ॥
সুতলং নাম পাতালং বস তত্র সুসংয়তঃ ।
ময়ৈব নির্মিতা তত্র মনসা শোভনা পুরী ॥ ৪৬ ॥
জ্ঞাতিভিঃ সহ ধর্মিষ্ঠৈর্বস তত্র যথাসুখম্ ।
তত্র ৎবং ভোক্ষ্যসে ভোগান্ বিশিষ্টান্ বলসূদনাৎ ॥ ৪৭ ॥
অবাপ্স্যসি তথা ভোগান্ লোকাদ্বিধিবিবর্জিতান্ ।
প্রাকাম্যযুক্তশ্চ তথা লোকেষু বিহরিষ্যসি ॥ ৪৮ ॥
মন্বন্তরে দ্বিতীয়ে চ মহেন্দ্রৎবং করিষ্যসি ।
তেজসা চ মদীয়েন শক্রৎবে যোক্ষ্যসে বলে ॥ ৪৯ ॥
তব শত্রুগণান্ সর্বান্ ঘাতয়িষ্যাম্যহং তদা ।
ব্রহ্মণ্যস্ত্বং শরণ্যস্ত্বং যজ্ঞশীলঃ প্রিয়ংবদঃ ॥ ৫০ ॥
তপস্বী দানশীলশ্চ বেদবেদাঙ্গপারগঃ ।
তস্মাদ্যশোভির্বৃদ্ধ্যর্থং ময়া ৎবমভিসন্ধিতঃ ॥ ৫১ ॥
দেবরাজাধিকান্ ভোগান্ পাতালস্থোঽপি ভোক্ষ্যসে ।
সন্নিধানঞ্চ তত্রাহং করিষ্যাম্যসুরাধিপ ॥ ৫২ ॥
ময়া চ রংস্যসে সার্ধং স্পৃহণীয়ঃ সুরৈরপি ।
শক্রৎবং চ তথা কৃৎবা ভাব্যে সাবর্ণিকেঽন্তরে ॥ ৫৩ ॥
সর্বসংধিবিনির্মুক্তো ময়ৈব সহ রংস্যসে ॥ ৫৪ ॥
শঙ্কর উবাচ ।
ইত্যেবমুক্ত্বা সজলাম্বুদাভঃ প্রতপ্তচামীকরধৌতবস্ত্রঃ ।
অদর্শনং দেববরো জগাম শক্রশ্চ লেভে সকলাং ত্রিলোকীম্ ॥ ৫৫ ॥
ইতি শ্রীবিষ্ণুধর্মোত্তরে প্রথমখণ্ডে মার্কণ্ডেয়বজ্রসংবাদে শঙ্করগীতাসু
বামনপ্রাদুর্ভাবো নাম পঞ্চপঞ্চাশত্তমোঽধ্যায়ঃ ॥৫৫ ॥
অথ শ্রীবিষ্ণুধর্মোত্তরে প্রথমখণ্ডান্তর্গতে শঙ্করগীতাসু
ষষ্ঠোঽধ্যায়ঃ ॥৬ ॥
রাম উবাচ ।
তস্য দেবাদিদেবস্য বিষ্ণোরমিততেজসঃ ।
ৎবত্তোঽহং শ্রোতুমিচ্ছামি দিব্যা আত্মবিভূতয়ঃ ॥ ১ ॥
শঙ্কর উবাচ ।
ন শক্যা বিস্তরাদ্বক্তুং দেবদেবস্য ভূতয়ঃ ।
প্রাধান্যতস্তে বক্ষ্যামি শৃণুষ্বৈকমনা দ্বিজ ॥ ২ ॥
সর্গে ব্রহ্মা স্থিতৌ বিষ্ণুঃ সংহারে চ তথা হরঃ ।
বরুণো বায়ুরাকাশো জ্যোতিশ্চ পৃথিবী তথা ॥ ৩ ॥
দিশশ্চ বিদিশ্চাপি তথা যে চ দিগীশ্বরাঃ ।
আদিত্যা বসবো রুদ্রা ভৃগবোঽঙ্গিরসস্তথা ॥ ৪ ॥
সাধ্যাশ্চ মরুতো দেবা বিশ্বেদেবাস্তথৈব চ ।
অশ্বিনৌ পুরুহূতশ্চ গন্ধর্বাপ্সরসাং গণাঃ ॥ ৫ ॥
পর্বতোদধিপাতালা লোকা দ্বীপাশ্চ ভার্গব ।
তির্যগূর্ধ্বমধশ্চৈব ৎবিঙ্গিতং যশ্চ নেঙ্গতে ॥ ৬ ॥
সচ্চাসচ্চ মহাভাগ প্রকৃতির্বিকৃতিশ্চ যঃ ।
কৃমিকীটপতঙ্গানাং বয়সাং যোনয়স্তথা ॥ ৭ ॥
বিদ্যাধরাস্তথা যক্ষা নাগাঃ সর্পাঃ সকিন্নরাঃ ।
রাক্ষসাশ্চ পিশাচাশ্চ পিতরঃ কালসংধয়ঃ ॥ ৮ ॥
ধর্মার্থকামমোক্ষাশ্চ ধর্মদ্বারাণি যানি চ ।
যজ্ঞাঙ্গানি চ সর্বাণি ভূতগ্রামং চতুর্বিধম্ ॥ ৯ ॥
জরায়ুজাণ্ডজাশ্চৈব সংস্বেদজমথোদ্ভিজম্ ।
একজ্যোতিঃ স মরুতাং বসূনাং স চ পাবকঃ ॥ ১০ ॥
অহির্বুধ্ন্যশ্চ রুদ্রাণাং নাদৈবাশ্বিনয়োস্তথা ।
নারায়ণশ্চ সাধ্যানাং ভৃগূণাং চ তথা ক্রতুঃ ॥ ১১ ॥
আদিত্যানাং তথা বিষ্ণুরায়ুরঙ্গিরসাং তথা ।
বিশ্বেষাং চৈব দেবানাং রোচমানঃ সুকীর্তিতঃ ॥ ১২ ॥
বাসবঃ সর্বদেবানাং জ্যোতিষাং চ হুতাশনঃ ।
যমঃ সংয়মশীলানাং বিরূপাক্ষঃ ক্ষমাভৃতাম্ ॥ ১৩ ॥
যাদসাং বরুণশ্চৈব পবন প্লবতাং তথা ।
ধনাধ্যক্ষশ্চ যক্ষাণাং রুদ্রো রৌদ্রস্তথান্তরঃ ॥ ১৪ ॥
অনন্তঃ সর্বনাগানাং সূর্যস্তেজস্বিনাং তথা ।
গ্রহাণাং চ তথা চন্দ্রো নক্ষত্রাণাং চ কৃত্তিকা ॥ ১৫ ॥
কালঃ কলয়তাং শ্রেষ্ঠো যুগানাং চ কৃতং যুগম্ ।
কল্পং মন্বন্তরেশাশ্চ মনবশ্চ চতুর্দশ ॥ ১৬ ॥
স এব দেবঃ সর্বাত্মা যে চ দেবেশ্বরাস্তথা ।
সংবৎসরস্তু বর্ষাণাং চায়নানাং তথোত্তরঃ ॥ ১৭ ॥
মার্গশীর্ষস্তু মাসানাং ঋতূনাং কুসুমাকরঃ ।
শুক্লপক্ষস্তু পক্ষাণাং তিথীনাং পূর্ণিমা তিথিঃ ॥ ১৮ ॥
কারণানাং বধঃ (?) প্রোক্তো মুহূর্তানাং তথাঽভিজিৎ ।
পাতালানাং সুতলশ্চ সমুদ্রাণাং পয়োদধিঃ ॥ ১৯ ॥
জম্বূদ্বীপশ্চ দ্বীপানাং লোকানাং সত্য উচ্যতে ।
মেরুঃ শিলোচ্চয়ানাং চ বর্ষেষ্বপি চ ভারতম্ ॥ ২০ ॥
হিমালয়ঃ স্থাবরাণাং জাহ্নবী সরিতাং তথা ।
পুষ্করঃ সর্বতীর্থানাং গরুডঃ পক্ষিণাং তথা ॥ ২১ ॥
গন্ধর্বাণাং চিত্ররথঃ সিদ্ধানাং কপিলো মুনিঃ ।
ঋষীণাং চ ভৃগুর্দেবো দেবর্ষীণাং চ নারদঃ ॥ ২২ ॥
তথা ব্রহ্মর্ষীণাং চ অঙ্গিরাঃ পরিকীর্তিতঃ ।
বিদ্যাধরাণাং সর্বেষাং দেবশ্চিত্রাঙ্গদস্তথা ॥ ২৩ ॥
কংবরঃ কিন্নরাণাং চ সর্পাণামথ বাসুকিঃ । (কংধরঃ?)
প্রহ্লাদঃ সর্বদৈত্যানাং রম্ভা চাপ্সরসাং তথা ॥ ২৪ ॥
উচ্চৈঃশ্রবসমশ্বানাং ধেনূনাং চৈব কামধুক্ ।
ঐরাবতো গজেন্দ্রাণাং মৃগাণাং চ মৃগাধিপঃ ॥ ২৫ ॥
আয়ুধানাং তথা বজ্রো নরাণাং চ নরাধিপঃ ।
ক্ষমা ক্ষমাবতাং দেবো বুদ্ধির্বুদ্ধিমতামপি ।২৬ ॥
ধর্মাবিরুদ্ধঃ কামশ্চ তথা ধর্মভৃতাং নৃণাম্ ।
ধর্মো ধর্মভৃতাং দেবস্তপশ্চৈব তপস্বিনাম্ ॥ ২৭ ॥
যজ্ঞানাং জপয়জ্ঞশ্চ সত্যঃ সত্যবতাং তথা ।
বেদানাং সামবেদশ্চ অংশুনাং জ্যোতিষাং পতিঃ ॥ ২৮ ॥
গায়ত্রী সর্বমন্ত্রাণাং বাচঃ প্রবদতাং তথা ।
অক্ষরাণামকারশ্চ যন্ত্রাণাং চ তথা ধনুঃ ॥ ২৯ ॥
অধ্যাত্মবিদ্যা বিদ্যানাং কবীনামুশনা কবিঃ ।
চেতনা সর্বভূতানামিন্দ্রিয়াণাং মনস্তথা ॥ ৩০ ॥
ব্রহ্মা ব্রহ্মবিদাং দেবো জ্ঞানং জ্ঞানবতাং তথা ।
কীর্তিঃ শ্রীর্বাক্ চ নারীণাং স্মৃতির্মেধা তথা ক্ষমা ॥ ৩১ ॥
আশ্রমাণাং চতুর্থশ্চ বর্ণানাং ব্রাহ্মণস্তথা ।
স্কন্দঃ সেনাপ্রণেতৄণাং সদয়শ্চ দয়াবতাম্ ॥ ৩২ ॥
জয়শ্চ ব্যবসায়শ্চ তথোৎসাহবতাং প্রভুঃ ।
অশ্বত্থঃ সর্ববৃক্ষাণামোষধীনাং তথা যবঃ ॥ ৩৩ ॥
মৃত্যুঃ স এব ম্রিয়তামুদ্ভবশ্চ ভবিষ্যতাম্ ।
ঝষাণাং মকরশ্চৈব দ্যূতং ছলয়তাং তথা ॥ ৩৪ ॥
মানশ্চ সর্বগুহ্যানাং রত্নানাং কনকং তথা ।
ধৃতির্ভূমৌ রসস্তেজস্তেজশ্চৈব হুতাশনে ॥ ৩৫ ॥
বায়ুঃ স্পর্শগুণানাং চ খং চ শব্দগুণস্তথা ।
এবং বিভূতিভিঃ সর্বং ব্যাপ্য তিষ্ঠতি ভার্গব ॥ ৩৬ ॥
একাংশেন ভৃগুশ্রেষ্ঠ তস্যাংশত্রিতয়ং দিবি ।
দেবাশ্চ ঋষয়শ্চৈব ব্রহ্মা চাহং চ ভার্গব ॥ ৩৭ ॥
চক্ষুষা যন্ন পশ্যন্তি বিনা জ্ঞানগতিং দ্বিজ ।
জ্ঞাতা জ্ঞেয়স্তথা ধ্যাতা ধ্যেয়শ্চোক্তো জনার্দনঃ ॥ ৩৮ ॥
যজ্ঞো যষ্টা চ গোবিন্দঃ ক্ষেত্রং ক্ষেত্রজ্ঞ এব চ ।
অন্নমন্নাদ এবোক্তঃ স এব চ গুণত্রয়ম্ ।৩৯ ॥
গামাবিশ্য চ ভূতানি ধারয়ত্যোজসা বিভুঃ ।
পুষ্ণাতি চৌষধীঃ সর্বা সোমো ভূৎবা রসাত্মকঃ ॥ ৪০ ॥
প্রাণিনাং জঠরস্থোঽগ্নির্ভুক্তপাচী স ভার্গব ।
চেষ্টাকৃৎপ্রাণিনাং ব্রহ্মন্ স চ বায়ুঃ শরীরগঃ ॥ ৪১ ॥
যথাদিত্যগতং তেজো জগদ্ভাসয়তেঽখিলম্ ।
যচ্চন্দ্রমসি যচ্চাগ্নৌ তত্তেজস্তত্র কীর্তিতম্ ॥ ৪২ ॥
সর্বস্য চাসৌ হৃদি সন্নিবিষ্টস্তস্মাৎস্মৃতির্জ্ঞানমপোহনং চ ।
সর্বৈশ্চ দেবৈশ্চ স এব বন্দ্যো বেদান্তকৃদ্বেদকৃদেব চাসৌ ॥৪৩ ॥
ইতি শ্রীবিষ্ণুধর্মোত্তরে প্রথমখণ্ডে মার্কণ্ডেয়বজ্রসংবাদে
শঙ্করগীতাসু
বিভূতিবর্ণনং নাম ষট্পঞ্চাশত্তমোঽধ্যায়ঃ ॥৫৬ ॥
অথ শ্রীবিষ্ণুধর্মোত্তরে প্রথমখণ্ডান্তর্গতে শঙ্করগীতাসু
সপ্তমোঽধ্যায়ঃ ॥৭ ॥
রাম উবাচ ।
আরাধ্যতে স ভগবান্ কর্মণা যেন শঙ্কর ।
তন্মমাচক্ষ্ব ভগবন্ সর্বসত্ত্বসুখপ্রদম্ ॥ ১ ॥
শঙ্কর উবাচ ।
সাধু রাম মহাভাগ সাধু দানবনাশন ।
যন্মাং পৃচ্ছসি ধর্মজ্ঞ কেশবারাধনং প্রতি ॥ ২ ॥
দিবসং দিবসার্ধং বা মুহূর্তমেকমেব বা ।
নাশশ্চাশেষপাপস্য ভক্তির্ভবতি কেশবে ॥ ৩ ॥
অনেকজন্মসাহস্রৈর্নানায়োন্যন্তরেষু চ ।
জন্তোঃ কল্মষহীনস্য ভক্তির্ভবতি কেশবে ॥ ৪ ॥
নাধন্যঃ কেশবং স্তৌতি নাধন্যোঽর্চয়তি প্রভুম্ ।
নমত্যধন্যশ্চ হরিং নাধন্যো বেত্তি মাধবম্ ॥ ৫ ॥
মনশ্চ তদ্ধি ধর্মজ্ঞ কেশবে যৎপ্রবর্ততে ।
সা বুদ্ধিস্তদ্ব্রতায়ৈব সততং প্রতিতিষ্ঠতি ॥ ৬ ॥
সা বাণী কেশবং দেবং যা স্তৌতি ভৃগুনন্দন ।
শ্রবণৌ তৌ শ্রুতা যাভ্যাং সততং তৎকথাঃ শুভাঃ ॥ ৭ ॥
অবেহি ধর্মজ্ঞ তথা তৎপূজাকরণাৎকরৌ ।
তদেকং সফলং কর্ম কেশবার্থায় যৎকৃতম্ ॥ ৮ ॥
যতো মুখ্যফলাবাপ্তৌ করণং সুপ্রয়োজনম্ ।
মনসা তেন কিং কার্যং যন্ন তিষ্ঠতি কেশবে ॥ ৯ ॥
বুদ্ধ্যা বা ভার্গবশ্রেষ্ঠ তয়া নাস্তি প্রয়োজনম্ ।
রোগঃ সা রসনা বাপি যয়া ন স্তূয়তে হরিঃ ॥ ১০ ॥
গর্তৌ ব্রহ্মব্রতৌ কর্ণৌ যাভ্যাং তৎকর্ম ন শ্রুতম্ ।
ভারভূতৈঃ করৈঃ কার্যং কি তস্য নৃপশোর্দ্বিজ ॥ ১১ ॥
যৈর্ন সম্পূজিতো দেবঃ শঙ্খচক্রগদাধরঃ ।
পাদৌ তৌ সফলৌ রাম কেশবালয়গামিনৌ ॥ ১২ ॥
তে চ নেত্রে মহাভাগ যাভ্যাং সন্দৃশ্যাতে হরিঃ ।
কিং তস্য চরণৈঃ কার্যং কৃতস্য নিপুণৈর্দ্বিজ ॥ ১৩ ॥
যাভ্যাং ন ব্রজতে জন্তুঃ কেশবালয়দর্শনে ।
জাত্যন্ধতুল্যং তং মন্যে পুরুষং পুরুষোত্তম ॥ ১৪ ॥
যো ন পশ্যতি ধর্মজ্ঞ কেশবার্চা পুনঃ পুনঃ ।
ক্লেশসংজননং কর্ম বৃথা তদ্ভৃগুনন্দন ॥ ১৫ ॥
কেশবং প্রতি যদ্রাম ক্রিয়তেঽহনি সর্বদা ।
পশ্য কেশবমারাধ্য মোদমানং শচীপতিম্ ॥ ১৬ ॥
যমঞ্চ বরুণঞ্চৈব তথা বৈশ্রবণং প্রভুম্ ।
দেবেন্দ্রৎবমতিস্ফীতং সর্বভূতিস্মিতং(??) পদম্ ॥ ১৭ ॥
হরিভক্তিদ্রুমাৎপুষ্পং রাজসাৎসাত্ত্বিকং ফলম্ ।
অণিমা মহিমা প্রাপ্তিঃ প্রাকাম্যং লঘিমা তথা ॥ ১৮ ॥
ঈশিৎবঞ্চ বশিৎবঞ্চ যত্র কামাবসায়িতা ।
আরাধ্য কেশবং দেবং প্রপ্যন্তে নাত্র সংশয়ঃ ॥ ১৯ ॥
হতপ্রত্যঙ্গমাতঙ্গো রুধিরারুণভূতলে ।
সঙ্গ্রামে বিজয়ং রাম প্রাপ্যতে তৎপ্রসাদতঃ ॥ ২০ ॥
মহাকটিতটশ্রোণ্যঃ পীনোন্নতপয়োধরাঃ ।
অকলঙ্কশশাঙ্কাভবদনা নীলমূর্ধজাঃ ॥ ২১ ॥
রময়ন্তি নরং স্বপ্নে দেবরামা মনোহরাঃ ।
সকৃদ্যেনার্চিতো দেবো হেলয়া বা নমস্কৃতঃ ॥ ২২ ॥
বেদবেদাঙ্গবপুষাং মুনীনাং ভাবিতাত্মনাম্ ।
ঋষিৎবমপি ধর্মজ্ঞ বিজ্ঞেয়ং তৎপ্রসাদজম্ ॥ ২৩ ॥
রমন্তে সহ রামাভিঃ প্রাপ্য বৈদ্যাধরং পদম্ ।
অন্যভাবতয়া নাম্নঃ কীর্তনাদপি ভার্গব ॥ ২৪ ॥
রত্নপর্যঙ্কশয়িতা মহাভোগাশ্চ ভোগিনঃ ।
বীজ্যন্তে সহ রামাভিঃ কেশবস্মরণাদপি ॥ ২৫ ॥
সৌগন্ধিকে বনে রম্যে কৈলাসপর্বতে দ্বিজ ।
যদ্যক্ষা বিহরন্তি স্ম তৎপ্রাহুঃ কুসুমং নতেঃ ॥ ২৬ ॥
রত্নচিত্রাসু রম্যাসু নন্দনোদ্যানভূমিষু ।
ক্রীডন্তি চ সহ স্ত্রীভির্গন্ধর্বীভিঃ কথাশ্রুতেঃ ॥ ২৭ ॥
চতুস্সমুদ্রবেলায়াং মেরুবিন্ধ্যপয়োধরাম্ ।
ধরাং যে ভুঞ্জতে ভূপাঃ প্রণিপাতস্য তৎফলম্ ॥ ২৮ ॥
তস্মাত্তবাহং বক্ষ্যামি যদ্যদা চরতঃ সদা ।
পুরুষস্যেহ ভগবান্ সুতোষস্তুষ্যতে হরিঃ ॥ ২৯ ॥
পূজ্যঃ স নিত্যং বরদো মহাত্মা স্তব্য স নিত্যং জগদেকবন্দ্যঃ ।
ধ্যেয়ঃ স নিত্যং সকলাঘহর্তা চৈতাবদুক্তং তব রাম গুহ্যম্ ॥ ৩০ ॥
ইতি শ্রীবিষ্ণুধর্মোত্তরে প্রথমখণ্ডে মার্কণ্ডেয়বজ্রসংবাদে
শঙ্করগীতাসু
ভক্তিফলপ্রদর্শনং নাম সপ্তপঞ্চাশত্তমোঽধ্যায়ঃ ॥৫৭ ॥
– Chant Stotra in Other Languages –
Shankara Gita in Sanskrit – English – Bengali – Gujarati – Kannada – Malayalam – Odia – Telugu – Tamil