॥ Ganesha Gita Sara Stotram Odia Lyrics ॥
॥ ଶ୍ରୀଗଣେଶଗୀତାସାରସ୍ତୋତ୍ରମ୍ ॥
ଶ୍ରୀ ଗଣେଶାୟ ନମଃ ।
ଶିବ ଉବାଚ ।
ଗଣେଶବଚନଂ ଶ୍ରୁତ୍ୱା ପ୍ରଣତା ଭକ୍ତିଭାବତଃ ।
ପପ୍ରଚ୍ଛୁସ୍ତଂ ପୁନଃ ଶାନ୍ତା ଜ୍ଞାନଂ ବ୍ରୂହି ଗଜାନନ ॥ ୧॥
ଗଣେଶ ଉବାଚ ।
ଦେହଶ୍ଚତୁର୍ୱିଧଃ ପ୍ରୋକ୍ତସ୍ତ୍ୱଂପଦଂ ବ୍ରହ୍ମଭିନ୍ନତଃ ।
ସୋଽହଂ ଦେହି ଚତୁର୍ଧା ତତ୍ପଦଂ ବ୍ରହ୍ମ ସଦୈକତଃ ॥ ୨॥
ସଂୟୋଗ ଉଭୟୋର୍ୟଚ୍ଚାସିପଦଂ ବ୍ରହ୍ମ କଥ୍ୟତେ ।
ସ୍ୱତ ଉତ୍ଥାନକଂ ଦେବା ବିକଲ୍ପକରଣାତ୍ରିଧା ॥ ୩॥
ସଦା ସ୍ୱସୁଖନିଷ୍ଠଂ ଯଦ୍ବ୍ରହ୍ମ ସାଂଖ୍ୟଂ ପ୍ରକୀର୍ତିତମ୍ ।
ପରତଶ୍ଚୋତ୍ଥାନକଂ ତତ୍ କ୍ରୀଡାହୀନତୟା ପରମ୍ ॥ ୪॥
ସ୍ୱତଃ ପରତ ଉତ୍ଥାନହୀନଂ ଯଦ୍ବ୍ରହ୍ମ କଥ୍ୟତେ ।
ସ୍ୱାନନ୍ଦଃ ସକଲାଭେଦରୂପଃ ସଂୟୋଗକାରକଃ ॥ ୫॥
ତଦେବ ପଞ୍ଚଧା ଜାତଂ ତନ୍ନିବୋଧତ ଈଶ୍ୱରାଃ ।
ସ୍ୱତଶ୍ଚ ପରତୋ ବ୍ରହ୍ମୋତ୍ଥାନଂ ଯତ୍ରିବିଧଂ ସ୍ମୃତମ୍ ॥ ୬॥
ବ୍ରହ୍ମଣୋ ନାମ ତଦ୍ୱେଦେ କଥ୍ୟତେ ଭିନ୍ନଭାବତଃ ।
ତୟୋରନୁଭବୋ ଯଶ୍ଚ ଯୋଗିନାଂ ହୃଦି ଜାୟତେ ॥ ୭॥
ରୂପଂ ତଦେବ ଜ୍ଞାତବ୍ୟମସଦ୍ୱେଦେଷୁ କଥ୍ୟତେ ।
ସା ଶକ୍ତିରିୟମାଖ୍ୟାତା ବ୍ରହ୍ମରୂପା ହ୍ୟସନ୍ମୟୀ ॥ ୮॥
ତତ୍ରାମୃତମୟାଧାରଃ ସୂର୍ୟ ଆତ୍ମା ପ୍ରକଥ୍ୟତେ ।
ଶକ୍ତିସୂର୍ୟମୟୋ ବିଷ୍ଣୁଶ୍ଚିଦାନନ୍ଦାତ୍ମକୋ ହି ସଃ ॥ ୯॥
ତ୍ରିବିଧେଷୁ ତଦାକାରସ୍ତତ୍କ୍ରିୟାହୀନରୂପକଃ ।
ନେତି ଶିବଶ୍ଚତୁର୍ଥୋଽୟଂ ତ୍ରିନେତି କାରକାତ୍ପରଃ ॥ ୧୦॥
ତ୍ରିବିଧଂ ମୋହମାତ୍ରଂ ଯନ୍ନିର୍ମୋହସ୍ତୁ ସଦାଶିବଃ ।
ତେଷାମଭେଦେ ଯଦ୍ବ୍ରହ୍ମ ସ୍ୱାନନ୍ଦଃ ସର୍ୱୟୋଗକଃ ॥ ୧୧॥
ପଞ୍ଚାନାଂ ବ୍ରହ୍ମଣାଂ ଯଚ୍ଚ ବିମ୍ବଂ ମାୟାମୟଂ ସ୍ମୃତମ୍ ।
ବ୍ରହ୍ମା ତଦେବ ବିଜ୍ଞେୟଃ ସର୍ୱାଦିଃ ସର୍ୱଭାବତଃ ॥ ୧୨॥
ବିମ୍ବେନ ସକଲଂ ସୃଷ୍ଟଂ ତେନାୟଂ ପ୍ରପିତାମହଃ ।
ଅସତ୍ସତ୍ସଦସଚ୍ଚେତି ସ୍ୱାନନ୍ଦରୂପା ବୟଂ ସ୍ମୃତାଃ ॥ ୧୩॥
ସ୍ୱାନନ୍ଦାଦ୍ୟତ୍ପରଂ ବ୍ରହ୍ମୟୋଗାଖ୍ୟଂ ବ୍ରହ୍ମଣାଂ ଭବେତ୍ ।
କେଷାମପି ପ୍ରବେଶୋ ନ ତତ୍ର ତସ୍ୟାପି କୁତ୍ରଚିତ୍ ॥ ୧୪॥
ମଦୀୟଂ ଦର୍ଶନଂ ତତ୍ର ଯୋଗେନ ଯୋଗିନାଂ ଭବେତ୍ ।
ସ୍ୱାନନ୍ଦେ ଦର୍ଶନଂ ପ୍ରାପ୍ତଂ ସ୍ୱସଂବେଦ୍ୟାତ୍ମକଂ ଚ ମେ ॥ ୧୫॥
ତେନ ସ୍ୱାନନ୍ଦ ଆସୀନଂ ବେଦେଷୁ ପ୍ରବଦନ୍ତି ମାମ୍ ।
ଚତୁର୍ଣାଂ ବ୍ରହ୍ମଣାଂ ଯୋଗାତ୍ସଂୟୋଗାଭେଦୟୋଗତଃ ॥ ୧୬॥
ସଂୟୋଗଶ୍ଚ ହ୍ୟଯୋଗଶ୍ଚ ତୟୋଃ ପରତୟୋର୍ମତଃ ।
ପୂର୍ଣଶାନ୍ତିପ୍ରଦୋ ଯୋଗଶ୍ଚିତ୍ତବୃତ୍ତିନିରୋଧତଃ ॥ ୧୭॥
କ୍ଷିପ୍ତଂ ମୂଢଂ ଚ ବିକ୍ଷିପ୍ତମେକାଗ୍ରଂ ଚ ନିରୋଧକଂ ।
ପଞ୍ଚଭୂମିମୟଂ ଚିତ୍ତଂ ତତ୍ର ଚିନ୍ତାମଣିଃ ସ୍ଥିତଃ ॥ ୧୮॥
ପଞ୍ଚଭୂତନିରୋଧେନ ପ୍ରାପ୍ୟତେ ଯୋଗିଭିର୍ହୃଦି ।
ଶାନ୍ତିରୂପାତ୍ମୟୋଗେନ ତତଃ ଶାନ୍ତିର୍ମଦାତ୍ମିକା ॥ ୧୯॥
ଏତଦ୍ୟୋଗାତ୍ମକଂ ଜ୍ଞାନଂ ଗାଣେଶଂ କଥିତଂ ମୟା ।
ନିତ୍ୟଂ ଯୁଞ୍ଜନ୍ତ ଯୋଗେନ ନୈବ ମୋହଂ ପ୍ରଗଚ୍ଛତ ॥ ୨୦॥
ଚିତ୍ତରୂପା ସ୍ୱୟଂ ବୁଦ୍ଧିଃ ସିଦ୍ଧିର୍ମୋହମୟୀ ସ୍ମୃତା ।
ନାନାବ୍ରହ୍ମବିଭେଦେନ ତାଭ୍ୟାଂ କ୍ରୀଡତି ତତ୍ପତିଃ ॥ ୨୧॥
ତ୍ୟକ୍ତ୍ୱା ଚିନ୍ତାଭିମାନଂ ଯେ ଗଣେଶୋଽହଂସମାଧିନା ।
ଭବିଷ୍ୟଥ ଭବନ୍ତୋଽପି ମଦ୍ରୂପା ମୋହବର୍ଜିତାଃ ॥ ୨୨॥
ଶିବ ଉବାଚ ।
ଇତ୍ୟୁକ୍ତ୍ୱା ବିରରାମାଥ ଗଣେଶୋ ଭକ୍ତବତ୍ସଲଃ ।
ତେଽପି ଭେଦଂ ପରିତ୍ୟଜ୍ୟ ଶାନ୍ତିଂ ପ୍ରାପ୍ତାଶ୍ଚ ତତ୍କ୍ଷଣାତ୍ ॥ ୨୩॥
ଏକବିଂଶତିଶ୍ଲୋକୈସ୍ତୈର୍ଗଣେଶେନ ପ୍ରକୀର୍ତିତମ୍ ।
ଗୀତାସାରଂ ସୁଶାନ୍ତେଭ୍ୟଃ ଶାନ୍ତିଦଂ ଯୋଗସାଧନୈଃ ॥ ୨୪॥
ଗଣେଶଗୀତାସାରଂ ଚ ଯଃ ପଠିଷ୍ୟତି ଭାବତଃ ।
ଶ୍ରୋଷ୍ୟତି ଶ୍ରଦ୍ଦଧାନଶ୍ଚେଦ୍ବ୍ରହ୍ମଭୂତସମୋ ଭବେତ୍ ॥ ୨୫॥
ଇହ ଭୁକ୍ତ୍ୱାଽଖିଲାନ୍ଭୋଗାନନ୍ତେ ଯୋଗମୟୋ ଭବେତ୍ ।
ଦର୍ଶନାତ୍ତସ୍ୟ ଲୋକାନାଂ ସର୍ୱପାପଂ ଲୟଂ ବ୍ରଜେତ୍ ॥ ୨୬॥
ଇତି ମୁଦ୍ଗଲପୁରାଣୋକ୍ତଂ ଗଣେଶଗୀତାସାରସ୍ତୋତ୍ରଂ ସମାପ୍ତମ୍ ।
– Chant Stotra in Other Languages –
Sri Ganesha Gita Sara Stotram in Sanskrit – English – Bengali – Gujarati – Kannada – Malayalam – Odia – Telugu – Tamil