॥ Sri Narasimha Dwadasa Nama Stotram Sanskrit Lyrics ॥
॥ श्री नृसिंह द्वादशनाम स्तोत्रम् ॥
अस्य श्रीनृसिंह द्वादशनामस्तोत्र महामन्त्रस्य वेदव्यासो भगवान् ऋषिः अनुष्टुप्छन्दः लक्ष्मीनृसिंहो देवता श्रीनृसिंह प्रीत्यर्थे विनियोगः ।
ध्यानम् ।
स्वभक्त पक्षपातेन तद्विपक्ष विदारणम् ।
नृसिंहमद्भुतं वन्दे परमानन्द विग्रहम् ॥
स्तोत्रम् ।
प्रथमं तु महाज्वालो द्वितीयं तूग्रकेसरी ।
तृतीयं वज्रदंष्ट्रश्च चतुर्थं तु विशारदः ॥ १ ॥
पञ्चमं नारसिंहश्च षष्ठः कश्यपमर्दनः ।
सप्तमो यातुहन्ता च अष्टमो देववल्लभः ॥ २ ॥
नव प्रह्लादवरदो दशमोऽनन्तहस्तकः ।
एकादशो महारुद्रो द्वादशो दारुणस्तथा ॥ ३ ॥
द्वादशैतानि नामानि नृसिंहस्य महात्मनः ।
मन्त्रराजेति विख्यातं सर्वपापविनाशनम् ॥ ४ ॥
क्षयापस्मारकुष्ठादि तापज्वरनिवारणम् ।
राजद्वारे महाघोरे सङ्ग्रामे च जलान्तरे ॥ ५ ॥
गिरिगह्वार आरण्ये व्याघ्रचोरामयादिषु ।
रणे च मरणे चैव शमदं परमं शुभम् ॥ ६ ॥
शतमावर्तयेद्यस्तु मुच्यते व्याधिबन्धनात् ।
आवर्तयेत्सहस्रं तु लभते वाञ्छितं फलम् ॥ ७ ॥
इति श्री नृसिंह द्वादशनाम स्तोत्रम् ।
– Chant Stotra in Other Languages –
Sri Narasimha Dwadasa Nama Stotram in English – Hindi – Kannada – Telugu – Tamil