॥ Tara Stotram Athava Tara Ashtakam Bengali Lyrics ॥
॥ তারাস্তোত্রম্ অথবা তারাষ্টকং ॥
শ্রীগণেশায় নমঃ ।
মাতর্নীলসরস্বতি প্রণমতাং সৌভাগ্যসম্পত্প্রদে
প্রত্যালীঢপদস্থিতে শবহৃদি স্মেরাননাম্ভোরুহে ।
ফুল্লেন্দীবরলোচনে ত্রিনয়নে কর্ত্রীকপালোত্পলে খঙ্গং
চাদধতী ত্বমেব শরণং ত্বামীশ্বরীমাশ্রয়ে ॥ ১ ॥
বাচামীশ্বরি ভক্তিকল্পলতিকে সর্বার্থসিদ্ধিশ্বরি
গদ্যপ্রাকৃতপদ্যজাতরচনাসর্বার্থসিদ্ধিপ্রদে ।
নীলেন্দীবরলোচনত্রয়য়ুতে কারুণ্যবারান্নিধে
সৌভাগ্যামৃতবর্ধনেন কৃপয়াসিঞ্চ ত্বমস্মাদৃশম্ ॥ ২ ॥
খর্বে গর্বসমূহপূরিততনো সর্পাদিবেষোজ্বলে
ব্যাঘ্রত্বক্পরিবীতসুন্দরকটিব্যাধূতঘণ্টাঙ্কিতে ।
সদ্যঃকৃত্তগলদ্রজঃপরিমিলন্মুণ্ডদ্বয়ীমূর্দ্ধজ-
গ্রন্থিশ্রেণিনৃমুণ্ডদামললিতে ভীমে ভয়ং নাশয় ॥ ৩ ॥
মায়ানঙ্গবিকাররূপললনাবিন্দ্বর্দ্ধচন্দ্রাম্বিকে
হুংফট্কারময়ি ত্বমেব শরণং মন্ত্রাত্মিকে মাদৃশঃ ।
মূর্তিস্তে জননি ত্রিধামঘটিতা স্থূলাতিসূক্ষ্মা
পরা বেদানাং নহি গোচরা কথমপি প্রাজ্ঞৈর্নুতামাশ্রয়ে ॥ ৪ ॥
ত্বত্পাদাম্বুজসেবয়া সুকৃতিনো গচ্ছন্তি সায়ুজ্যতাং
তস্যাঃ শ্রীপরমেশ্বরত্রিনয়নব্রহ্মাদিসাম্যাত্মনঃ ।
সংসারাম্বুধিমজ্জনে পটুতনুর্দেবেন্দ্রমুখ্যাসুরান্
মাতস্তে পদসেবনে হি বিমুখান্ কিং মন্দধীঃ সেবতে ॥ ৫ ॥
মাতস্ত্বত্পদপঙ্কজদ্বয়রজোমুদ্রাঙ্ককোটীরিণস্তে
দেবা জয়সঙ্গরে বিজয়িনো নিঃশঙ্কমঙ্কে গতাঃ ।
দেবোঽহং ভুবনে ন মে সম ইতি স্পর্দ্ধাং বহন্তঃ পরে
তত্তুল্যাং নিয়তং য়থা শশিরবী নাশং ব্রজন্তি স্বয়ম্ ॥ ৬ ॥
ত্বন্নামস্মরণাত্পলায়নপরান্দ্রষ্টুং চ শক্তা ন তে
ভূতপ্রেতপিশাচরাক্ষসগণা য়ক্ষশ্চ নাগাধিপাঃ ।
দৈত্যা দানবপুঙ্গবাশ্চ খচরা ব্যাঘ্রাদিকা জন্তবো
ডাকিন্যঃ কুপিতান্তকশ্চ মনুজান্ মাতঃ ক্ষণং ভূতলে ॥ ৭ ॥
লক্ষ্মীঃ সিদ্ধিগণশ্চ পাদুকমুখাঃ সিদ্ধাস্তথা বৈরিণাং
স্তম্ভশ্চাপি বরাঙ্গনে গজঘটাস্তম্ভস্তথা মোহনম্ ।
মাতস্ত্বত্পদসেবয়া খলু নৃণাং সিদ্ধ্যন্তি তে তে গুণাঃ
ক্লান্তঃ কান্তমনোভবোঽত্র ভবতি ক্ষুদ্রোঽপি বাচস্পতিঃ ॥ ৮ ॥
তারাষ্টকমিদং পুণ্যং ভক্তিমান্ য়ঃ পঠেন্নরঃ ।
প্রাতর্মধ্যাহ্নকালে চ সায়াহ্নে নিয়তঃ শুচিঃ ॥ ৯ ॥
লভতে কবিতাং বিদ্যাং সর্বশাস্ত্রার্থবিদ্ভবেত্
লক্ষ্মীমনশ্বরাং প্রাপ্য ভুক্ত্বা ভোগান্যথেপ্সিতান্ ।
কীর্তিং কান্তিং চ নৈরুজ্যং প্রাপ্যান্তে মোক্ষমাপ্নুয়াত্ ॥ ১০ ॥
॥ ইতি শ্রীনীলতন্ত্রে তারাস্তোত্রং অথবা তারাষ্টকং সম্পূর্ণম্ ॥
– Chant Stotra in Other Languages –
Sri Durga Stotram » Tarastotram Athava Tara Ashtakam Lyrics in Sanskrit » English » Gujarati » Kannada » Malayalam » Odia » Telugu » Tamil