Adhyaya numbering is different from Gautami mahatma with 105 Adhyayas are inserted from 70th Adhyaya in the encoding.
॥ Vyasagita from Brahma Purana Bengali Lyrics ॥
॥ ব্যাসগীতা ব্রহ্মপুরাণে ॥
অধ্যায়ঃ ২৩৪ (১২৬)
আত্যন্তিকলয়নিরূপণম্
ব্যাস উবাচ
আধ্যাত্মিকাদি ভো বিপ্রা জ্ঞাৎবা তাপত্রয়ং বুধঃ ।
উৎপন্নজ্ঞানবৈরাগ্যঃ প্রাপ্নোত্যাত্যন্তিকং লয়ম্ ॥ ২৩৪.১ ॥
আধ্যাত্মিকোঽপি দ্বিবিধা শারীরো মানসস্তথা ।
শারীরো বহুভির্ভেদৈর্ভিদ্যতে শ্রূয়তাং চ সঃ ॥ ২৩৪.২ ॥
শিরোরোগপ্রতিশ্যায়জ্বরশূলভগংদরৈঃ ।
গুল্মার্শঃশ্বয়থুশ্বাসচ্ছর্দ্যাদিভিরনেকধা ॥ ২৩৪.৩ ॥
তথাঽক্ষিরোগাতীসারকুষ্ঠাঙ্গাময়সংজ্ঞকৈঃ ।
ভিদ্যতে দেহজস্তাপো মানসং শ্রোতুমর্হথ ॥ ২৩৪.৪ ॥
কামক্রোধভদ্বেষলোভমোহবিষাদজঃ ।
শোকাসূয়াবমানের্ষ্যামাৎসর্যাভিভবস্তথা ॥ ২৩৪.৫ ॥
মানসোঽপি দ্বিজশ্রেষ্ঠাস্তাপো ভবতি নৈকধা ।
ইত্যেবমাদিভির্ভেদৈস্তাপো হ্যাধ্যাত্মিকঃ স্মৃতঃ ॥ ২৩৪.৬ ॥
মৃগপক্ষিমনুষ্যাদ্যৈঃ পিশাচোরগরাক্ষসৈঃ ।
সরীসৃপাদ্যৈশ্চ নৃণাং জন্যতে চাঽঽধিভৌতিকঃ ॥ ২৩৪.৭ ॥
শীতোষ্ণবাতবর্ষাম্বুবৈদ্যুতাদিসমুদ্ভবঃ ।
তাপো দ্বিজবরশ্রেষ্ঠাঃ কথ্যতে চাঽঽধিদৈবিকঃ ॥ ২৩৪.৮ ॥
গর্ভজন্মজরাজ্ঞানমৃত্যুনারকজং তথা ।
দুঃখং সহস্রশো ভেদৈর্ভিদ্যতে মুনিসত্তমাঃ ॥ ২৩৪.৯ ॥
সুকুমারতনুর্গর্ভে জন্তুর্বহুমলাবৃতে ।
উল্বসংবেষ্টিতো ভগ্নপৃষ্ঠগ্রীবাস্থিসংহতিঃ ॥ ২৩৪.১০ ॥
অত্যম্লকটুতীক্ষ্ণোষ্ণলবণৈর্মাতৃভোজনৈঃ ।
অতিতাপিভিরত্যর্থং বাধ্যমানোঽতিবেদনঃ ॥ ২৩৪.১১ ॥
প্রসারণাকুঞ্চনাদৌ নাগা(ঙ্গা)নাং প্রভুরাত্মনঃ ।
শকৃন্মূত্রমহাপঙ্কশায়ী সর্বত্র পীডিতঃ ॥ ২৩৪.১২ ॥
নিরুচ্ছ্বাসঃ সচৈতন্যঃ স্মরঞ্জন্মশতান্যথ ।
আস্তে গর্ভেঽতিদুঃখেন নিজকর্মনিবন্ধনঃ ॥ ২৩৪.১৩ ॥
জায়মানঃ পুরীষাসৃঙ্মূত্রশুক্রাবিলাননঃ ।
প্রাজাপত্যেন বাতেন পীড্যমানাস্থিবন্ধনঃ ॥ ২৩৪.১৪ ॥
অধোমুখস্তৈঃ ক্রিয়তে প্রবলৈঃ সূতিমারুতৈঃ ।
ক্লেশৈর্নিষ্ক্রান্তিমাপ্নোতি জঠরান্মাতুরাতুরঃ ॥ ২৩৪.১৫ ॥
মূর্চ্ছামবাপ্য মহতীং সংস্পৃষ্টো বাহ্যবায়ুনা ।
বিজ্ঞানভ্রংসমাপ্নোতি জাতস্তু মুনিসত্তমাঃ ॥ ২৩৪.১৬ ॥
কণ্টকৈরিব তুন্নাঙ্গঃ ক্রকচৈরিব দারিতঃ ।
পূতিব্রণান্নিপতিতো ধরণ্যাং ক্রিমিকো যথা ॥ ২৩৪.১৭ ॥
কণ্ডূয়নেঽপি চাশক্তঃ পরিবর্তেঽপ্যনীশ্বরঃ ।
স্তনপানাদিকাহারমবাপ্নোতি পরেচ্ছয়া ॥ ২৩৪.১৮ ॥
অশুচিস্রস্তরে সুপ্তঃ কীটদংশাদিভিস্তথা ।
ভক্ষ্যমাণোঽপি নৈবৈষাং সমর্থো বিনিবারণে ॥ ২৩৪.১৯ ॥
জন্মদুঃখান্যনেকানি জন্মনোঽনন্তরাণি চ ।
বালভাবে যদাপ্নোতি আধিভূতাদিকানি চ ॥ ২৩৪.২০ ॥
অজ্ঞানতমসা ছন্নো মূঢান্তঃ করণো নরঃ ।
ন জানাতি কুতঃ কোঽহং কুত্র গন্তা কিমাত্মকঃ ॥ ২৩৪.২১ ॥
কেন বন্ধেন বদ্ধোঽহং কারণং কিমকারণম্ ।
কিং কার্যং কিমকার্যং বা কিং বাচ্যং কিং ন চোচ্যতে ॥ ২৩৪.২২ ॥
কো ধর্মঃ কশ্চ বাঽধর্মঃ কস্মিন্বর্তেত বৈ কথম্ ।
কিং কর্তব্যমকর্তব্যং কিং বা কিং গুণদোষবৎ ॥ ২৩৪.২৩ ॥
এবং পশুসমৈর্মূঢৈরজ্ঞানপ্রভবং মহৎ ।
অবাপ্যতে নরৈর্দুঃখং শিশ্নোদরপরায়ণৈঃ ॥ ২৩৪.২৪ ॥
অজ্ঞানং তামসো ভাবঃ কার্যারম্ভপ্রবৃত্তয়ঃ ।
অজ্ঞানিনাং প্রবর্তন্তে কর্মলোপস্ততো দ্বিজাঃ ॥ ২৩৪.২৫ ॥
নরকং কর্মণাং লোপাৎফলমাহুর্মহর্ষয়ঃ ।
তস্মাদজ্ঞানিনাং দুঃখমিহ চামুত্র চোত্তমম্ ॥ ২৩৪.২৬ ॥
জরাজর্জরদেহশ্চ শিথিলাবয়বঃ পুমান্ ।
বিচলচ্ছীর্ণদশনো বলিস্নায়ুশিরাবৃতঃ ॥ ২৩৪.২৭ ॥
দূরপ্রনষ্টনয়নো ব্যোমান্তর্গততারকঃ ।
নাসাবিবরনির্যাতরোমপুঞ্জশ্চলদ্বপুঃ ॥ ২৩৪.২৮ ॥
প্রকটীভূতসর্বাস্থির্নতপৃষ্ঠাস্থিসংহতিঃ ।
উৎসন্নজঠরাগ্নিৎবাদল্পাহারোল্পচেষ্টিতঃ ॥ ২৩৪.২৯ ॥
কৃচ্ছ্রচংক্রমণোত্থানশয়নাসনচেষ্টিতঃ ।
মন্দীভবচ্ছ্রোত্রনেত্রগলল্লালাবিলাননঃ ॥ ২৩৪.৩০ ॥
অনায়ত্তৈঃ সমস্তৈশ্চ করণৈর্মরণোন্মুখঃ ।
তৎক্ষণেঽপ্যনুভূতানামস্মর্তাঽখিলবস্তুনাম্ ॥ ২৩৪.৩১ ॥
সকৃদুচ্চারিতে বাক্যে সমুদ্ভূতমহাশ্রমঃ ।
শ্বাসকাসাময়ায়াসসমুদ্ভূতপ্রজাগরঃ ॥ ২৩৪.৩২ ॥
অন্যেনোত্থাপ্যতেঽন্যেন তথা সংবেশ্যতে জরী ।
ভৃত্যাত্মপুত্রদারাণামপমানপরাকৃতঃ ॥ ২৩৪.৩৩ ॥
প্রক্ষীণাখিলশৌচশ্চ বিহারাহারসংস্পৃহঃ ।
হাস্যঃ পরিজনস্যাপি নির্বিণ্ণাশেষবান্ধবঃ ॥ ২৩৪.৩৪ ॥
অনুভূতমিবান্যস্মিঞ্জন্মন্যাত্মবিচেষ্টিতম্ ।
সংস্মরন্যৌবনে দীর্ঘং নিঃশ্বসিত্যতিতাপিতঃ ॥ ২৩৪.৩৫ ॥
এবমাদীনি দুঃখানি জরায়ামনুভূয় চ ।
মরণে যানি দুঃখানি প্রাপ্নোতি শৃণু তান্যপি ॥ ২৩৪.৩৬ ॥
শ্লথগ্রীবাঙ্ঘ্রিহস্তোঽথ প্রাপ্তো বেপথুনা নরঃ ।
মুহুর্গ্লানিপরশ্চাসৌ মুহুর্জ্ঞানবলন্বিতঃ ॥ ২৩৪.৩৭ ॥
হিরণ্যধান্যতয়ভার্যাভৃত্যগৃহাদিষু ।
এতে কথং ভবিষ্যন্তীত্যতীবমমতাকুলঃ ॥ ২৩৪.৩৮ ॥
মর্মবিদ্ভির্মহারোগৈঃ ক্রকচৈরিব দারুণৈঃ ।
শরৈরিবান্তকস্যোগ্রৈশ্ছিদ্যমানাস্থিবন্ধনঃ ॥ ২৩৪.৩৯ ॥
পরিবর্তমানতারাক্ষিহস্তপাদং মুহুঃ ক্ষিপন্ ।
সংশুষ্যমাণতাল্বোষ্ঠকণ্ঠো ঘুরঘুরায়তে ॥ ২৩৪.৪০ ॥
নিরুদ্ধকণ্ঠদেশীঽপি উদানশ্বাসপীডিতঃ ।
তাপেন মহতা ব্যাপ্তস্তৃষা ব্যাপ্তস্তথা ক্ষুধা ॥ ২৩৪.৪১ ॥
ক্লেশাদুৎক্রান্তিমাপ্নোতি যাম্যকিংকরপীডিতঃ ।
তাপেন মহাত ব্যাপ্তস্তৃষা ব্যাপ্তস্তথা ক্ষুধা ॥ ২৩৪.৪২ ॥
এতান্যন্যানি চোগ্রাণি দুঃখানি মরণে নৃণাম্ ।
শৃণুধ্বং দর্শং যানি প্রাপ্যন্তে পুরুষৈর্মৃতৈঃ ॥ ২৩৪.৪৩ ॥
যাম্যকিংকরপাশাদিগ্রহণং দণ্ডতাডনম্ ।
যমস্য দর্শনং চোগ্রমুগ্রমার্গবিলোকনম্ ॥ ২৩৪.৪৪ ॥
করম্ভবালুকাবিহ্নিয়ন্ত্রশস্ত্রাদিভীষণে ।
প্রত্যেকং যাতনায়াশ্চ যাতনাদি দ্বিজোত্তমাঃ ॥ ২৩৪.৪৫ ॥
ক্রকচৈঃপীড্যমানানাংমৃ(মূ)ষায়াং চাপি ধ্মাপ্যতাম্ ।
কুঠারৈঃ পাট্যমানানাংভূমৌ চাপি নিখন্যতাম্ ॥ ২৩৪.৪৬ ॥
শূলেষ্বারোপ্যমাণানাং ব্যাঘ্রবক্ত্রে প্রবেশ্যতাম্ ।
গৃধ্রৈঃ সংভক্ষ্যমাণানাং দ্বীপিভিশ্চোপভুজ্যতাম্ ॥ ২৩৪.৪৭ ॥
ক্বথ্যতাং তৈলমধ্যে চ ক্লিদ্যতাং ক্ষারকর্দমে ।
উচ্চন্নিপাত্যমানানাং ক্ষিপ্যতাং ক্ষেপয়ন্ত্রকৈঃ ॥ ২৩৪.৪৮ ॥
নরকে যানি দুঃখানি পাপহেতূদ্ভবানি বৈ ।
প্রাপ্যন্তে নারকৈর্বিপ্রাস্তেষাং সংখ্যা ন বিদ্যতে ॥ ২৩৪.৪৯ ॥
ন কেবলং দ্বিজশ্রেষ্ঠা নরকে দুঃখপদ্ধতিঃ ।
স্বর্গেঽপি পাতভীতস্য ক্ষয়িষ্ণোর্নাস্তি নির্বৃতিঃ ॥ ২৩৪.৫০ ॥
পুনশ্চ গর্ভো ভবতি জায়তে চ পুনর্নরঃ ।
গর্ভে বিলীয়তে ভূয়ো জায়মানোঽস্তমেতি চ ॥ ২৩৪.৫১ ॥
জাতমাত্রশ্চ ম্রিয়তে বালভাবে চ যৌবনে ।
যদ্যৎপ্রীতিকরং পুংসাং বস্তু বিপ্রাঃ প্রজায়তে ॥ ২৩৪.৫২ ॥
তদেব দুঃখবৃক্ষস্য বীজৎবমুপগচ্ছতি ।
কলত্রপুত্রমিত্রাদিগৃহক্ষেত্রধনাদিকৈঃ ॥ ২৩৪.৫৩ ॥
ক্রিয়তে ন তথা ভূরি সুখং পুংসাং যথাঽসুখম্ ।
ইতি সংসারদুঃখার্কতাপতাপিতচেতসাম্ ॥ ২৩৪.৫৪ ॥
বিমুক্তিপাদপচ্ছায়ামৃতে কুত্র সুখং নৃণাম্ ।
তদস্য ত্রিবিধস্যাপি দুঃখজাতস্য পণ্ডিতৈঃ ॥ ২৩৪.৫৫ ॥
গর্ভজন্মজরাদ্যেষু স্থানেষু প্রভবিষ্যতঃ ।
নিরস্তাতিশয়াহ্লাদং সুখভাবৈকলক্ষণম্ ॥ ২৩৪.৫৬ ॥
ভেষজং ভগবৎপ্রাপ্তিরেকা চাঽঽত্যন্তিকী মতা ।
তস্মাত্তৎপ্রাপ্তয়ে যত্নঃ কর্তব্যঃ পণ্ডিতৈর্নরৈঃ ॥ ২৩৪.৫৭ ॥
তৎপ্রাপ্তিহেতুর্জ্ঞানং চ কর্ম চোক্তং দ্বিজোত্তমাঃ ।
আগমোত্থং বিবেকাচ্চ দ্বিধা জ্ঞানং তথোচ্যতে ॥ ২৩৪.৫৮ ॥
শব্দব্রহ্মাঽঽগমময়ং পরং ব্রহ্ম বিবেকজম্ ।
অন্ধং তম ইবাজ্ঞানং দীপবচ্চেন্দ্রিয়োদ্ভবম্ ॥ ২৩৪.৫৯ ॥
যথা সূর্যস্তথা জ্ঞানং যদ্বৈ বিপ্রা বিবেকজম্ ।
মনুরপ্যাহ বেদার্থং স্মৃৎবা যন্মুনিসত্তমাঃ ॥ ২৩৪.৬০ ॥
তদেতচ্ছ্রুয়তামত্র সংবন্ধে গদতো মম ।
দ্বে ব্রহ্মণী বেদিতব্যে শব্দব্রহ্ম পরং চ যৎ ॥ ২৩৪.৬১ ॥
শব্দব্রহ্মণি নিষ্ণাতঃ পরং ব্রহ্মধিগচ্ছতি ।
দ্বে বিদ্যে বেদিতব্যে ইতি চাঽঽথর্বণী শ্রুতিঃ ॥ ২৩৪.৬২ ॥
পরয়া হ্যক্ষরপ্রাপ্তিরৃগ্বেদাদিময়াঽপরা ।
যত্তদব্যক্তমজরমচিন্ত্যমজমব্যযম্ ॥ ২৩৪.৬৩ ॥
অনির্দেশ্যমরূপং চ পাণিপাদাদ্যসংয়ুতম্ ।
বিত্তং সর্বগতং নিত্যং ভূতয়োনিমকারণম্ ॥ ২৩৪.৬৪ ॥
ব্যাপ্যং ব্যাপ্যং যতঃ সর্বং তদ্বৈ পশ্যন্তি সূরয়ঃ ।
তদ্ব্রহ্ম পরমং ধাম তদ্ব্যেয়ং মোক্ষকাঙ্ক্ষিভিঃ ॥। ২৩৪.৬৫ ॥
শ্রুতিবাক্যোদিতং সূক্ষ্মং তদ্বিষ্ণোঃ পরমং পদম্ ।
উৎপত্তিং প্রলয়ং চৈব ভূতানামগতিং গতিম্ ॥ ২৩৪.৬৬ ॥
বেত্তি বিদ্যামবিদ্যাং চ স বাচ্যো ভগবানিতি ।
জ্ঞানশক্তিবলবৈশ্বর্যবীর্যতেজাংস্যশেষতঃ ॥ ২৩৪.৬৭ ॥
ভগবচ্ছব্দবাচ্যানি চ স বাচ্যো ভগবানিতি ।
জ্ঞানশক্তিবলৈশ্বর্যবীর্যতেজাংস্যশেষতঃ ॥ ২৩৪.৬৮ ॥
ভূতেষু চ স সর্বাত্মা বাসুদেবস্ততঃ স্মৃতঃ ।
উবাচেদং মহর্ষিভ্যঃ পুরা পৃষ্টঃ প্রজাপতিঃ ॥ ২৩৪.৬৯ ॥
নামাব্যাখ্যামনন্তস্য বাসুদেবস্য তত্ত্বতঃ ।
ভূতেষু বসতে যোঽন্তর্বসন্ত্যত্র চ তানি যৎ ॥
ধাতা বিধাতা জগতাং বাসুদেবস্ততঃ প্রভুঃ ॥ ২৩৪.৭০ ॥
সসর্বভূতপ্রকৃতির্গুণাংশ্চ, দোষাংশ্চ সর্বান্স(ন)গুণো হ্যতীতঃ ।
অতীতসর্বাবরণোঽখিলাত্মা, তেনাঽঽবৃতং যদ্ভবনান্তরালম্ ॥ ২৩৪.৭১ ॥
সমস্তকল্যাণগুণাত্মকো হি, স্বশক্তিলেশাদৃতভূতসর্গঃ ।
ইচ্ছাগৃহীতাভিমতোরুদেহঃ, সংসাধিতাশেষজগদ্ধিতোঽসৌ ॥ ২৩৪.৭২ ॥
তেজোবলৈশ্বর্যমহাবরোধঃ, স্ববীর্যশক্ত্যাদিগুণৈকরাশিঃ ।
পরঃ পরাণাং সকলা ন যত্র, ক্লেশাদয়ঃ সন্তি পরাপরেশে ॥ ২৩৪.৭৩ ॥
স ঈশ্বরো ব্যষ্টিসমষ্টিরূপোঽব্যক্তস্বরূপঃ প্রকটস্বরূপঃ ।
সর্বেশ্বরঃ সর্বদৃক্সর্ববেত্তা, সমস্তশক্তিঃ পরমেশ্বরাখ্যঃ ॥ ২৩৪.৭৪ ॥
সংজ্ঞায়তে যেন তদস্তদোষং শুদ্ধং পরং নির্মলমেকরূপম্ ।
সংদৃশ্যতে বাঽঽপ্যথ গম্যতে বা,তজ্জ্ঞানমজ্ঞানমতোঽন্যদুক্তম্ ॥ ২৩৪.৭৫ ॥
ইতি শ্রীমহাপুরাণে আদিব্রাহ্মে ব্যাসর্ষিসংবাদ আত্যন্তিকলয়নিরূপণং নাম
চতুস্ত্রিংশদধিকদ্বিশততমোঽধ্যায়ঃ ॥ ২৩৪ ॥
অধ্যায়ঃ ২৩৫ (১২৭)
যোগাভ্যাসনিরূপণম্
মুনয় ঊচুঃ
ইদানীং ব্রূহি যোগং চ দুঃখসংয়োগভেষজম্ ।
যং বিদিৎবাঽব্যযং তত্র যুঞ্জামঃ পুরুষোত্তমম্ ॥ ২৩৫.১ ॥
শ্রুৎবা স বচনং তেষাং কুষ্ণদ্বৈপায়নস্তদা ।
অব্রবীৎপরমপ্রীতো যোগী যোগবিদাং বরঃ ॥ ২৩৫.২ ॥
যোগং বক্ষ্যামি ভো বিপ্রাঃ শৃণুধ্বং ভবনাশনম্ ।
যমভ্যস্যাঽঽপ্নু যাদ্যোগী মোক্ষং পরমদুর্লভম্ ॥ ২৩৫.৩ ॥
শ্রুৎবাঽঽদৌ যোগশাস্ত্রাণি গুরুমারাধ্য ভক্তিতঃ ।
ইতিহাসং পুরাণং চ বেদাংশ্চৈব বিচক্ষণঃ ॥ ২৩৫.৪ ।
আহারং যোগদোষাংশ্চ দেশকালং চ বুদ্ধিমান্ ।
জ্ঞাৎবা সমভ্যসেদ্যোগং নির্দ্বদ্বো নিষ্পরিগ্রহঃ ॥ ২৩৫.৫ ॥
ভুঞ্জন্সক্তুং যবাগূং চ তক্রমূলফলং পয়ঃ ।
যাবকং কণপিণ্যাকমাহারং যোগসাধনম্ ॥ ২৩৫.৬ ॥
ন মনোবিকলে ধ্মাতে ন শ্রান্তে ক্ষুধিতে তথা ।
ন দ্বংদ্বে ন চ শীতে চ ন চোষ্ণে নানিলাত্মকে ॥ ২৩৫.৭ ॥
সশব্দে ন জলাভ্যাসে জীর্ণগোষ্ঠে চতুষ্পথে ।
সরীসৃপে শ্মশানে চ ন নদ্যন্তেঽগ্নিসংনিধৌ ॥ ২৩৫.৮ ॥
ন চৈত্যে ন চ বল্মীকে সভয়ে কূপসংনিধৈ ।
ন শুষ্কপর্ণনিচয়ে যোগং যুঞ্জীত কর্হিচিৎ ॥ ২৩৫.৯ ॥
দেশানেতাননাদৃত্য মূঢৎবাদ্যো যুনক্তি বৈ ।
প্রবক্ষ্যে তস্য যে দোষা জায়ন্তে বিঘ্নকারকাঃ ॥ ২৩৫.১০ ॥
বাধির্যং জডতা লোপঃ স্মৃতের্মূকৎবমন্ধতা ।
জ্বরশ্চ জায়তে সদ্যস্তদ্বদজ্ঞানসংভবঃ ॥ ২৩৫.১১ ॥
তস্মাৎসর্বাত্মনা কার্যা রক্ষা যোগবিদা সদা ।
ধর্মার্থকামমোক্ষণাং শরীরং সাধনং যতঃ ॥ ২৩৫.১২ ॥
আশ্রমে বিজনে গুহ্যে নিঃশব্দে নির্ভয়ে নগে ।
শূন্যাগারে শুচৌরম্যে চৈকান্তে দেবতালয়ে ॥ ২৩৫.১৩ ॥
রজন্যাঃ পশ্চিমে যামে পূর্বে চ সুসমাহিতঃ ।
পূর্বাহ্ণে মধ্যমে চাহ্নি যুক্তাহারো জিতেন্দ্রিয়ঃ ॥ ২৩৫.১৪ ॥
আসীনঃ প্রাঙ্মুখো রম্য আসনে সুখনিশ্চলে ।
নাতিনীচে ন চোচ্ছ্রিতে নিস্পৃহঃ সত্যবাক্ষুচিঃ ॥ ২৩৫.১৫ ॥
যুক্তনিদ্রো জিতক্রোধঃ সর্বভূতহিতে রতঃ ।
সর্বদ্বংদ্বসহো ধীরঃ সমকায়াঙ্ঘ্রিমস্তকঃ ॥ ২৩৫.১৬ ॥
নাভৌ নিধায় হস্তৌ দ্বৌ শান্তঃ পদ্মাসনে স্থিতঃ ।
সংস্থাপ্য দৃষ্টিং নাসাগ্রে প্রাণানায়ম্য বাগ্যতঃ ॥ ২৩৫.১৭ ॥
সমাহৃত্যেন্দ্রিয়গ্রামং মনসা হৃদয়ে মুনিঃ ।
প্রণবং দীর্ঘমুদ্যম্য সংবৃতাস্যঃ সুনিশ্চলঃ ॥ ২৩৫.১৮ ॥
রজসা তমসো বৃত্তিং সত্ত্বেন রজসস্তথা ।
সংছাদ্য নির্মলং শান্তে স্থিতঃ সংবৃতলোচনঃ ॥ ২৩৫.১৯ ॥
হৃৎপদ্মকোটরে লীনং সর্বব্যাপি নিরঞ্জনম্ ।
যুঞ্জীত শান্তে স্থিতঃ সংবৃতলোচনঃ ॥ ২৩৫.২০ ॥
করণেন্দ্রিয়ভূতানি ক্ষেত্রজ্ঞে প্রথমং ন্যসেৎ ।
ক্ষেত্রজ্ঞশ্চ পরে যোজ্যস্ততো যুঞ্জতি যোগবিৎ ॥ ২৩৫.২১ ॥
মনো যস্যান্তমভ্যেতি পরমাত্মনি চঞ্চলম্ ।
সংত্যজ্য বিষয়াংস্তস্য যোগসিদ্ধিঃ প্রকাশিতা ॥ ২৩৫.২২ ॥
যদা নির্বিষয়ং চিত্তং পরে ব্রহ্মণি লীয়তে ।
সমাধৌ যোগয়ুক্তস্য তদাঽভ্যেতি পরং পদম্ ॥ ২৩৫.২৩ ॥
অসংসক্তং যদা চিত্তং যোগিনঃ সর্বকর্মসু ।
ভবত্যানন্দমাসাদ্য তদা নির্বাণমৃচ্ছতি ॥ ২৩৫.২৪ ॥
শুদ্ধং ধামত্রয়াতীতং তুর্যাখ্যং পুরুষোত্তমম্ ।
প্রাপ্য যোগবলাদ্যোগী মুচ্যতে নাত্র সংশয়ঃ ॥ ২৩৫.২৫ ॥
নিঃস্পৃহঃ সর্বকামেভ্যঃ সর্বত্র প্রিয়দর্শনঃ ।
সর্বত্রানিত্যবুদ্ধিস্তু যোগী মুচ্যেত নান্যথা ॥ ২৩৫.২৬ ॥
ইন্দ্রিয়াণি ন সেবেন বৈরাগ্যেণ চ যোগবিৎ ।
সদা চাভ্যাসয়োগেন মুচ্যতে নাত্র সংশয়ঃ ॥ ২৩৫.২৭ ॥
ন চ পদ্মাসনাদ্যোগো ন নাসাগ্রনিরীক্ষণাৎ ।
মনসশ্চেন্দ্রিয়াণাং চ সংয়োগো যোগ উচ্যতে ॥ ২৩৫.২৮ ॥
এবং ময়া মুনিশ্রেষ্ঠা যোগঃ প্রোক্তো বিমুক্তিদঃ ।
সংসারমোক্ষহেতুশ্চ কিমন্যচ্ছ্রোতুমিচ্ছথ ॥ ২৩৫.২৯ ॥
লোমহর্ষণ উবাচ
শ্রুৎবা তে বচনং তস্য সাধু সাধ্বিতি চাব্রুবন্ ।
ব্যাসং প্রশস্য সম্পূজ্য পুনঃ প্রষ্টুং সমুদ্যতাঃ ॥ ২৩৫.৩০ ॥
ইতি শ্রীমহাপুরাণে আদিব্রাহ্মে ব্যাসর্ষিসংবাদে যোগাভ্যাসনিরূপণং নাম
পঞ্চত্রিংশদধিকদ্বিশততমোঽধ্যায়ঃ ॥ ২৩৫ ॥
অধ্যায়ঃ ২৩৬ (১২৮)
সাংখ্যযোগনিরূপণম্
মুনয় ঊচুঃ
তব বক্ত্রাব্ধিসংভূতমমৃতং বাঙ্ময়ং মুনে ।
পিবতাং নো দ্বিজশ্রেষ্ঠ ন নৃপ্তিরিহ দৃশ্যতে ॥ ২৩৬.১ ॥
তস্মাদ্যোগং মুনে ব্রূহি বিস্তরেণ বিমুক্তিদম্ ।
সাংখ্যং চ দ্বিপদাং শ্রেষ্ঠ শ্রোতুমিচ্ছামহে বয়ম্ ॥ ২৩৬.২ ॥
প্রজ্ঞাবাঞ্শ্রোত্রিয়ো যজ্বা খ্যাতঃ প্রাজ্ঞোঽনসূয়কঃ ।
সত্যধর্মমতির্ব্রহ্মন্কথং ব্রহ্মাধিগচ্ছতি ॥ ২৩৬.৩ ॥
তপসা ব্রহ্মচর্যেণ সর্বত্যাগেন মেধয়া ।
সাংখ্যে বা যদি বা যোগ এতৎপৃষ্টো বদস্ব নঃ ॥ ২৩৬.৪ ॥
মনসশ্চেন্দ্রিয়াণাং চ যথৈকাগয়্রমবাপ্যতে ।
যেনোপায়েন পুরুষস্তত্ত্বং ব্যাখ্যাতুমর্হসি ॥ ২৩৬.৫ ॥
ব্যাস উবাচ
নান্যত্র জ্ঞানতপসোর্নান্যত্রেন্দ্রিয়নিগ্রহাৎ ।
নান্যত্র সর্বসংত্যাগাৎসিদ্ধিং বিন্দতি কশ্চন ॥ ২৩৬.৬ ॥
মহাভূতানি সর্বাণি পূর্বসৃষ্টিঃ স্বয়ংভুবঃ ।
ভূয়িষ্ঠং প্রাণভৃদ্গ্রামে নিবিষ্টানি শরীরিষু ॥ ২৩৬.৭ ॥
ভূমের্দেহো জলাৎস্নেহো জ্যোতিষশ্চক্ষুষী স্মৃতে ।
প্রাণাপানাশ্রয়ো বায়ুঃকোষ্ঠাকাশং শরীরিণাম্ ॥ ২৩৬.৮ ॥
ক্রান্তৌ বিষ্ণুর্বলে শক্রঃ কোষ্ঠেঽগ্নির্ভোক্তুমিচ্ছতি ।
কর্ণয়োঃ প্রদিশঃ শ্রোত্রে জিহ্বায়াং বাক্সরস্বতী ॥ ২৩৬.৯ ॥
কর্ণৌ ৎবক্চক্ষুষী জিহ্বা নাসিকা চৈব পঞ্চমী ।
দশ তানীন্দ্রিয়োক্তানি দ্বারাণ্যাহারসিদ্ধয়ে ॥ ২৩৬.১০ ॥
শব্দস্পর্শৌ তথা রূপং রসং গন্ধং চ পঞ্চমম্ ।
ইন্দ্রিয়ার্থান্পৃথগ্বিদ্যাদিন্দ্রিয়েভ্যস্তু নিত্যদা ॥ ২৩৬.১১ ॥
ইন্দ্রিয়াণি মনো যুঙ্ক্তে অবশ্যা(শা)নিব রাজিনঃ(লঃ) ।
মনশ্চাপি সদা যুঙ্ক্তে ভূতাত্মা হৃদয়াশ্রিতঃ ॥ ২৩৬.১২ ॥
ইন্দ্রিয়াণাং তথৈবৈষাং সর্বেষামীশ্বরং মনঃ ।
নিয়মে চ বিসর্গে চ ভূতাত্মা মনসস্তথা ॥ ২৩৬.১৩ ॥
ইন্দ্রিয়াণীন্দ্রিয়ার্থশ্চ স্বভাবশ্চেতনা মনঃ ।
প্রাণাপানৌ চ জীবশ্চ নিত্যং দেহেষু দেহিনাম্ ॥ ২৩৬.১৪ ॥
আশ্রয়ো নাস্তি সত্ত্বস্য গুণশব্দো ন চেতনাঃ ।
সত্ত্বং হি তেজঃ সৃজতি ন গুণান্বৈ কথংচন ॥ ২৩৬.১৫ ॥
এবং সপ্তদশং দেহং বৃতং ষোডশভির্গুণৈঃ ।
মনীষী মনসা বিপ্রাঃ পশ্যত্যাত্মানমাত্মনি ॥ ২৩৬.১৬ ॥
ন হ্যং চক্ষুষা দুশ্যো ন চ সর্বৈরপীন্দ্রিয়ৈঃ ।
মনসা তু প্রদীপ্তেন মহানাত্মা প্রকশতে ॥ ২৩৬.১৭ ॥
অশব্দস্পর্শরূপং তচ্চ(চ্চা)রসাগন্ধমব্যযম্ ।
অশরীরং শরীরে স্বে নিরীক্ষেত নিরিন্দ্রিয়ম্ ॥ ২৩৬.১৮ ॥
অব্যক্তং সর্বদেহেষু মর্ত্যেষু পরমার্চিতম্ ।
যোঽনুপশ্যতি স প্রেত্য কল্পতে ব্রহ্মভূয়তঃ ॥ ২৩৬.১৯ ॥
বিদ্যাবিনয়সম্পন্নব্রাহ্মণে গবি হস্তিনি ।
শুনি চৈব শ্বপাকে চ পণ্ডিতাঃ সমদর্শিনঃ ॥ ২৩৬.২০ ॥
স হি সর্বেষু ভূতেষু জঙ্গমেষু ধ্রুবেষু চ ।
বসত্যেকো মহানাত্মা যেন সর্বমিদং ততম্ ॥ ২৩৬.২১ ॥
সর্বভূতেষু চাঽঽত্মানং সর্বভূতানি চাঽঽত্মনি ।
যদা পশ্যতি ভূতাত্মা ব্রহ্ম সম্পদ্যতে তদা ॥ ২৩৬.২২ ॥
যাবানাত্মনি বেদাঽঽত্মা তাবানাত্মা পরাত্মনি ।
য এবং সততং বেদ সোঽমৃতৎবায় কল্পতে ॥ ২৩৬.২৩ ॥
সর্বভূতাত্মভূতস্য সর্বভূতহিতস্য চ ।
দেবাপি মার্গে মুহ্যন্তি অপদস্য পদৈষিণঃ ॥ ২৩৬.২৪ ॥
শকুন্তানামিবাঽঽকাশে মৎস্যানামিব চোদকে ।
যথা গতির্ন দৃশ্যেন তথা জ্ঞানবিদাং গতিঃ ॥ ২৩৬.২৫ ॥
কালঃ পচতি ভূতানি সর্বাণ্যেবাঽঽত্মনাঽঽত্মনি ।
যস্মিস্তু পচ্যতে কালস্তন্ন বেদেহ কশ্চন ॥ ২৩৬.২৬ ॥
ন তদুর্ধ্বং ন তির্যক্চ নাধো ন চ পুনঃ পুনঃ ।
ন মধ্যে প্রতিগৃহ্ণীতে নৈব কিংচিন্ন কশ্চন ॥ ২৩৬.২৭ ॥
সর্বে তৎস্থা ইমে লোকা বাহ্যমেষাং ন কিংচন ।
যদ্যপ্যগ্রে সমাগচ্ছেদ্যতা বাণো গুণচ্যুতঃ ॥ ২৩৬.২৮ ॥
নৈবান্তং কারণস্যেয়াদ্যদ্যপি স্যান্মনোজবঃ ।
তস্মাৎসূক্ষ্মতরং নাস্তি নাস্তি স্থূলতরং তথা ॥ ২৩৬.২৯ ॥
সর্বতঃ পাণিপাদং তৎসর্বতোঽক্ষিশিরোমুখম্ ।
সর্বতঃশ্রুতিমল্লোকে সর্বমাবৃত্য তিষ্ঠতি ॥ ২৩৬.৩০ ॥
তদেবাণোরণুতরং তন্মহদ্ভ্যো মহত্তরম্ ।
তদন্তঃ সর্বভূতানাং ধ্রুবং তিষ্ঠন্ন দৃশ্যতে ॥ ২৩৬.৩১ ॥
অক্ষরং চ ক্ষরং চৈব দ্বেধা ভাবোঽয়মাত্মনঃ ।
ক্ষকঃ সর্বেষু ভূতেষু দিব্যং ৎবমৃতমক্ষরম্ ॥ ২৩৬.৩২ ॥
নবদ্বারং পুরং কৃৎবা হংসো হি নিয়তো বশী ।
ঈদৃশঃ সর্বভূতস্য স্থাবরস্য চরস্য চ ॥ ২৩৬.৩৩ ॥
হানেনাভিবিকল্পানাং নরাণাং সংচয়েন চ ।
শরীরাণামজস্যাঽঽহুর্হংসৎবং পারদর্শিনঃ ॥ ২৩৬.৩৪ ॥
হংসোক্তং চ ক্ষরং চৈব কূটস্থং যত্তদক্ষরম্ ।
তদ্বিদ্বানক্ষরং প্রাপ্য জহাতি প্রাণজন্মনী ॥ ২৩৬.৩৫ ॥
ব্যাস উবাচ
ভবতাং পৃচ্ছতাং বিপ্রা যথাবদিহ তত্ত্বতঃ ।
সাংখ্যং জ্ঞানেন সংয়ুক্তং তদেতৎকীর্তিতং ময়া ॥ ২৩৬.৩৬ ॥
যোগকৃত্যং তু ভো বিপ্রাঃ কীর্তয়িষ্যাম্যতঃ পরম্ ।
একৎবং বুদ্ধিমনসোরিন্দ্রিয়াণাং চ সর্বশঃ ॥ ২৩৬.৩৭ ॥
আত্মনো ব্যাপিনো জ্ঞানং জ্ঞানমেতদত্তুমম্ ।
তদেতদুপশান্তেন দান্তেনাধ্যাত্মশীলিনা ॥ ২৩৬.৩৮ ॥
আত্মারামেণ বুদ্ধেন বোদ্ধব্যং শুচিকর্মণা ।
যোগদোষান্সমুচ্ছিদ্য পঞ্চ যান্কবয়ো বিদুঃ ॥ ২৩৬.৩৯ ॥
কামং ক্রোদং চ লোভং চ ভয়ং স্বপ্নং পঞ্চমম্ ।
ক্রোধং শমেন জয়তি কামং সংকল্পবর্জনাৎ ॥ ২৩৬.৪০ ॥
সত্ত্বসংসেবনাদ্ধীরো নিদ্রামুচ্ছেত্তুমর্হতি ।
ধৃত্যা শিশ্নোদরং রক্ষেৎপাণিপাদং চ চক্ষুষা ॥ ২৩৬.৪১ ॥
চক্ষুঃ শ্রোত্রং চ মনসা মনো বাচং চ কর্মণা ।
অপ্রমাদাদ্ভয়ং জহ্যদ্দম্ভং প্রাজ্ঞোপসেবনাৎ ॥ ২৩৬.৪২ ॥
এবমেতান্যোগদোষাঞ্জয়েন্নিত্যমতন্দ্রিতঃ ।
অগ্নীংশ্চ ব্রাহ্মণাংশ্চাথ দেবতাঃ প্রণমেৎসদা ॥ ২৩৬.৪৩ ॥
বর্জয়েদুদ্ধতাং বাচং হিংসায়ুক্তাং মনোনুগাম্ ।
ব্রহ্মতেজোময়ং শুক্রং যস্য সর্বমিদং জগৎ ॥ ২৩৬.৪৪ ॥
এতস্য ভূতভূতস্য দৃষ্টং স্থাবরজঙ্গমম্ ।
ধ্যায়নমধ্যযনং দানং সত্যং হ্রীরার্জবং ক্ষমা ॥ ২৩৬.৪৫ ॥
শৌচং চৈবাঽঽত্মনঃ শুদ্ধিরিন্দ্রয়াণাং চ নিগ্রহঃ ।
এতৈর্বিবর্ঘতে তেজঃ পাপ্মানং চাপকর্ষতি ॥ ২৩৬.৪৬ ॥
সমঃ সর্বেষু ভূতেষু লভ্যালভ্যেন বর্তয়ন্
ধূতপাপ্মা তু তেজস্বী লঘ্বাহারো জিতেন্দ্রিয়ঃ ॥ ২৩৬.৪৭ ॥
তামত্রধৌ বশে কৃৎবা নিষেবেদ্ব্রহ্মণঃ পদম্ ।
মনসশ্চেন্দ্রিয়াণাং চ কৃৎবৈকাগ্রয়ং সমাহিতঃ ॥ ২৩৬.৪৮ ॥
পূর্বরাত্রে পরার্ধে চ ধারয়েন্মন আত্মনঃ ।
জন্তোঃ পঞ্চেন্দ্রিয়স্যাস্য যদ্যেকং ক্লিন্নমিন্দ্রিয়ম্ ॥ ২৩৬.৪৯ ॥
ততোঽস্য স্রবতি প্রজ্ঞা গিরেঃ পাদাদিবোদকম্ ।
মনসঃ পূর্বমাদদ্যাৎকূর্মাণামিব মৎস্যহা ॥ ২৩৬.৫০ ॥
ততঃ শ্রোত্রং ততশ্চক্ষুর্জিহ্বা ঘ্রাণং চ যোগবিৎ ।
তত এতানি সংয়ম্য মনসি স্থাপয়েদ্যদি ॥ ২৩৬.৫১ ॥
তথৈবাপোহ্য সংকল্পান্মনো হ্যাত্মনি ধারয়েৎ ।
পঞ্চেন্দ্রিয়াণি মনসি হৃদি সংস্থাপয়েদ্যদি ॥ ২৩৬.৫২ ॥
যদৈতান্যবতিষ্ঠন্তে মনঃ ষষ্ঠানি চাঽঽত্মনি ।
প্রসীদন্তি চ সংস্থায়াং তদা ব্রহ্ম প্রকাশতে ॥ ২৩৬.৫৩ ॥
বিধূম ইব দীপ্তার্চিরাগত্য ইব দীপ্তিমান্ ।
বৈদ্যুতোঽগ্নিরিবাঽঽকাশে পশ্যন্ত্যাত্মানমাত্মনি ॥ ২৩৬.৫৪ ॥
সর্ব তত্র তু সর্বত্র ব্যাপকৎবাচ্চ দৃশ্যতে ।
তং পশ্যন্তি মহাত্মানো ব্রাহ্মণা যে মনীষিণঃ ॥ ২৩৬.৫৫ ॥
ধৃতিমন্তো মহাপ্রাজ্ঞাঃ সর্বভূতহিতে রতাঃ ।
এবং পরিমিতং কালমাচরন্সংশিতব্রতঃ ॥ ২৩৬.৫৬ ॥
আসীনো হি রহস্যেকো গচ্ছেদক্ষরসাম্যতাম্ ।
প্রমোহো ভ্রম আবর্তো ঘ্রাণং শ্রবণদর্শনে ॥ ২৩৬.৫৭ ॥
অদ্ভুতানি রসঃ স্পর্শঃ শীতোষ্ণমারুতাকৃতিঃ ।
প্রতিভানুপসর্গাশ্চ প্রতিসংগৃহ্য যোগতঃ ॥ ২৩৬.৫৮ ॥
তাংস্তত্ত্ববিদনাদৃত্য সাম্যেনৈব নিবর্তয়েৎ ।
কুর্যাৎপরিচয়ং যোগে ত্রৈলোক্যে নিয়তো মুনিঃ ॥ ২৩৬.৫৯ ॥
গিরিশৃঙ্গে তথা চৈত্যে বৃক্ষমূলেষু যোজয়েৎ ।
সংনিয়ম্যেন্দ্রিয়গ্রামং কোষ্ঠে ভাণ্ডমনা ইব ॥ ২৩৬.৬০ ॥
একাগ্রং চিন্তয়েন্নিত্যং যোগান্নোদ্বিজতে মনঃ ।
যেনোপয়েন শক্যেত নিয়ন্তুং চঞ্চলং মনঃ ॥ ২৩৬.৬১ ॥
তত্র যুক্তো নিষেবেত ন চৈব বিচলেত্ততঃ ।
শূন্যাগারাণি চৈকাগ্রো নিবাসার্থমুপক্রমেৎ ॥ ২৩৬.৬২ ॥
নাতিব্রজেৎপরং বাচা কর্মণা মনসাঽপি বা ।
উপেক্ষকো যথাহারো লব্ধালব্ধসমো ভবেৎ ॥ ২৩৬.৬৩ ॥
যশ্চৈনমভিনন্দেত যশ্চৈনমভিবাদয়েৎ ।
সমস্তয়োশ্চাপ্যুভয়োর্নাভিধ্যায়েচ্ছুভাশুভম্ ॥ ২৩৬.৬৪ ॥
ন প্রহৃষ্যেন লাভেষু নালাভেষু চ চিন্তয়েৎ ।
সমঃ সর্বেষু ভূতেষু সধর্মা মাতরিশ্বনঃ ॥ ২৩৬.৬৫ ॥
এবং স্বস্থাত্মনঃ সাধোঃ সর্বত্র সমদর্শিনঃ ।
ষণ্মাসান্নিত্যযুক্তস্য শব্দব্রহ্মভিবর্ততে ॥ ২৩৬.৬৬ ॥
বেদনার্তান্পরান্দৃষ্ট্বা সমলষ্টাশ্মকাঞ্চনঃ ।
এবং তু নিরতো মার্গং বিরমেন্ন বিমীহিতঃ ॥ ২৩৬.৬৭ ॥
অপি বর্ণাবকৃষ্টস্তু নারী বা ধর্মকাঙ্ক্ষিণী ।
তাবপ্যেতেন মার্গেণ গচ্ছেতাং পরমাং গতিম্ ॥ ২৩৬.৬৮ ॥
অজং পুরাণমজরং সনাতনং, যমিন্দ্রিয়াতিগমগোচরং দ্বিজাঃ ।
অবেক্ষ্য চেমাং পরমেষ্ঠিসাম্যতাং, প্রয়ান্ত্যনাবৃত্তিগতিং মনীষিণঃ ॥ ২৩৬.৬৯ ॥
ইতি শ্রীমহাপুরাণে আদিব্রাহ্মে ব্যাসর্ষিসংবাদে সাংখ্যযোগনিরূপণং নাম
পঞ্চত্রিংশদধিকদ্বিশততমোধ্যায়ঃ ॥ ২৩৬ ॥
অধ্যায়ঃ ২৩৭ (১২৯)
জ্ঞানিনাং মোক্ষপ্রাপ্তিনিরূপণম্
মুনয় ঊচুঃ
যদ্যেবং বেদবচনং কুরু কর্ম ত্যজেতি চ ।
কাং দিশং বিদ্যযা যান্তি কাং চ গচ্ছন্তি কর্মণা ॥ ২৩৭.১ ॥
এতদ্বৈ শ্রোতুমিচ্ছমস্তদ্ভবান্প্রব্রবীতু নঃ ।
এতদন্যোন্যবৈরূপ্যং বর্ততে প্রতিকূলতঃ ॥ ২৩৭.২ ॥
ব্যাস উবাচ
শৃণুধ্বং মুনিশার্দূলা যৎপৃচ্ছধ্বং সমাসতঃ ।
কর্মবিদ্যাময়ৌ চৌভৌ ব্যাখ্যাস্যামি ক্ষরাক্ষরৌ ॥ ২৩৭.৩ ॥
যাং দিশং বিদ্যযা যান্তি যাং গচ্ছন্তি চ কর্মণা ।
শৃণুধ্বং সাংপ্রতং বিপ্রা গহনং হ্যেতদুত্তরম্ ॥ ২৩৭.৪ ॥
অস্তি ধর্ম ইতি যুক্তং নাস্তি তত্রৈব যো বদেৎ ।
যক্ষস্য সাদৃশ্যমিদং যক্ষস্যেদং ভবেদথ ॥ ২৩৭.৫ ॥
দ্বাবিমাবথ পন্থানৌ যত্র বেদাঃ প্রতিষ্ঠিতাঃ ।
প্রবৃত্তিলক্ষণো ধর্মো নিবৃত্তো বা বিভাষিতঃ ॥ ২৩৭.৬ ॥
কর্মণা বধ্যতে জন্তুর্বিদ্যযা চ বিমুচ্যতে ।
তস্মাৎকর্ম ন কুর্বন্তি যতয়ঃ পারদর্শিনঃ ॥ ২৩৭.৭ ॥
কর্মণা জায়তে প্রেত্য মূর্তিমান্ষোডশাত্মকঃ ।
বিদ্যযা জায়তে নিত্যমব্যক্তং হ্যক্ষরাত্মকম্ ॥ ২৩৭.৮ ॥
কর্ম ৎবেকে প্রশংসন্তি স্বল্পবুদ্ধিরতা নরাঃ ।
তেন তে দেহজালেন রময়ন্ত উপাসতে ॥ ২৩৭.৯ ॥
যে তু বুদ্ধিং পরাং প্রাপ্তা ধর্মনৈপুণ্যদর্শিনঃ ।
ন তে কর্ম প্রশংসন্তি কূপং নদ্যাং পিবন্নিবঃ ॥ ২৩৭.১০ ॥
কর্মণাং ফলমাপ্নোতি সুখদুঃখে ভবাভবৌ ।
বিদ্যযা তদবাপ্নোতি যত্র গৎবা ন শোচতি ॥ ২৩৭.১১ ॥
ন ম্রিয়তে যত্র গৎবা যত্র গৎবা ন জায়তে ।
ন জীর্যতে যত্র গৎবা যত্র গৎবা ন বর্ধতে ॥ ২৩৭.১২ ॥
যত্র তদ্ব্রহ্ম পরমমব্যক্তমচলং ধ্রুবম্ ।
অব্যাকৃতমনায়ামমমৃতং চাধিয়োগবিৎ ॥ ২৩৭.১৩ ॥
দ্বংদ্বৈর্ন যত্র বাধ্যন্তে মানসেন চ কর্মণা ।
সমাঃ সর্বত্র মৈত্রাশ্চ সর্বভূতহিতে রতাঃ ॥ ২৩৭.১৪ ॥
বিদ্যাময়োঽন্যঃ পুরুষো দ্বিজাঃ কর্মময়োঽপরঃ ।
বিপ্রাশ্চন্দ্রসমস্পর্শঃ সূক্ষ্ময়া কলয়া স্থিতঃ ॥ ২৩৭.১৫ ॥
তদেতদৃষিণা প্রোক্তং বিস্তরেণানুগীয়তে ।
ন বক্তুং শক্যতে দ্রষ্টুং চক্রতন্তুমিবাম্বরে ॥ ২৩৭.১৬ ॥
একাদশবিকারাত্মা কলাসংভারসংভৃতঃ ।
মূর্তিমানিতি তং বিদ্যাদ্বিপ্রাঃ কর্মগুণাত্মকম্ ॥ ২৩৭.১৭ ॥
দেবো যঃ সংশ্রিতস্তস্মিন্বুদ্ধীন্দুরিব পুষ্করে ।
ক্ষেত্রজ্ঞং তং বিজানীয়ান্নিত্যং যোগজিতাত্মকম্ ॥ ২৩৭.১৮ ॥
তমো রজশ্চ সত্ত্বং চ জ্ঞেয়ং জীবগুণাত্মকম্ ।
জীবমাত্মগুণং বিদ্যাদাত্মানং পরমাত্মনঃ ॥ ২৩৭.১৯ ॥
সচেতনং জীবগুণং বদন্তি, স চেষ্টতে জীবগুণং চ সর্বম্ ।
ততঃ পরং ক্ষেত্রবিদো বদন্তি, প্রকল্পয়ন্তো ভুবনানি সপ্ত ॥ ২৩৭.২০ ॥
ব্যাস উবাচ
প্রকৃত্যাস্তু বিকারা যে ক্ষেত্রজ্ঞাস্তে পরিশ্রুতাঃ ।
তে চৈনং ন প্রজানন্তি ন জানাতি স তানপি ॥ ২৩৭.২১ ॥
তৈশ্চৈব কুরুতে কার্যং মনঃ ষষ্ঠৈরিহেন্দ্রিয়ৈঃ ।
সুদান্তৈরিব সংয়ন্তা দৃঢঃ পরমবাজিভিঃ ॥ ২৩৭.২২ ॥
ইন্দ্রিয়েভ্যঃ পরা হ্যর্থা অর্থেভ্যঃ পরমং মনঃ ।
মনসস্তু পরা বুদ্ধির্বুদ্ধেরাত্মা মহান্পরঃ ॥ ২৩৭.২৩ ॥
মহতঃ পরমব্যক্তমব্যক্তাৎপরতোঽমৃতম্ ।
অমৃতান্ন পরং কিংচিৎসা কাষ্ঠা পরমা গতিঃ ॥ ২৩৭.২৪ ॥
এবং সর্বেষু ভূতেষু গূঢাত্মা ন প্রকাশতে ।
দৃশ্যতে ৎবগয়্রয়া বুদ্ধ্যা সূক্ষ্ময়া সূক্ষ্মদর্শিভিঃ ॥ ২৩৭.২৫ ॥
অন্তরাত্মনি সংলীয় মনঃষষ্ঠানি মেধয়া ।
ইন্দ্রিয়ৈরিন্দ্রিয়ার্থাংশ্চ বহুচিত্তমচিন্তয়ন্ ॥ ২৩৭.২৬ ॥
ধ্যানেঽপি পরমং কৃৎবা বিদ্যাসম্পাদিতং মনঃ ।
অনীশ্বরঃ প্রশান্তাত্মা ততো গচ্ছেৎপরং পদম্ ॥ ২৩৭.২৭ ॥
ইন্দ্রিয়াণাং তু সর্বেষাং বশ্যাত্মা চলিতস্মৃতিঃ ।
আত্মনঃ সম্প্রদানেন মর্ত্যো মৃত্যুমুপাশ্নুতে ॥ ২৩৭.২৮ ॥
বিহত্য সর্বসংকল্পান্সত্ত্বে চিত্তং নিবেশয়েৎ ।
সত্ত্বে চিত্তং সমাবেশ্য ততঃ কালংজরো ভবেৎ ॥ ২৩৭.২৯ ॥
চিত্তপ্রসাদেন যতির্জহাতীহ শুভাশুভম্ ।
প্রসন্নাত্মাঽঽত্মনি স্থিৎবা সুখমত্যন্তমশ্নুতে ॥ ২৩৭.৩০ ॥
লক্ষণং তু প্রসাদস্য যথা স্বপ্নে সুখং ভবেৎ ।
নির্বাতে বা যথা দীপো দীপ্যমানো ন কম্পতে ॥ ২৩৭.৩১ ॥
এবং পূর্বাপরে রাত্রে যুঞ্জন্নাত্মানমাত্মনা ।
লঘ্বাহারো বিশুদ্ধাত্মা পশ্যত্যাত্মানমাত্মনি ॥ ২৩৭.৩২ ॥
রহস্যং সর্ববেদানামনৈতিহ্যমনাগমম্ ।
আত্মপ্রত্যায়কং শাস্ত্রমিদং পুত্রানুশাসনম্ ॥ ২৩৭.৩৩ ॥
ধর্মাখ্যানেষু সর্বেষু সত্যাখ্যানেষু যদ্বসু ।
দশবর্ষসহস্রাণি নির্মথ্যামৃতমুদ্ধৃতম্ ॥ ২৩৭.৩৪ ॥
নবনীতং যথা দধ্নঃ কাষ্ঠাদগ্নির্যথৈব চ ।
তথৈব বিদুষাং জ্ঞানং মুক্তিহেতোঃ সমুদ্ধৃতম্ ॥ ২৩৭.৩৫ ॥
স্নাতকানামিদং শাস্ত্রং বাচ্যং পুত্রানুশাসনম্ ।
তদিদং নাপ্রশান্তায় নাদান্তায় তপস্বিনে ॥ ২৩৭.৩৬ ॥
নাবেদবিদুষে বাচ্যং তথা নানুগতায় চ ।
নাসূয়কায়ানৃজবে ন চানির্দিষ্টকারিণে ॥ ২৩৭.৩৭ ॥
ন তর্কশাস্ত্রদগ্ধায় তথৈব পিশুনায় চ ।
শ্লাঘিনে শ্লাঘনীয়ায় প্রশান্তায় তপস্বিনে ॥ ২৩৭.৩৮ ॥
ইদং প্রিয়ায় পুত্রায় শিষ্যায়ানুগতায় তু ।
রহস্যধর্মং বক্তব্যং নান্যস্মৈ তু কথংচন ॥ ২৩৭.৩৯ ॥
যদপ্যস্য মহীং দদ্যাদ্রত্নপূর্ণামিমাং নরঃ ।
ইতমেব ততঃ শ্রেয় ইতি মন্যেত তত্ত্ববিৎ ॥ ২৩৭.৪০ ॥
অতো গুহ্যতরার্থং তদধ্যাত্মমতিমানুষম্ ।
যত্তন্মহর্ষিভির্দুষ্টং বেদান্তেষু চ গীয়তে ॥ ২৩৭.৪১ ॥
তদ্যুষ্মভ্যং প্রয়চ্ছামি যন্মাং পৃচ্ছত সত্তমাঃ ।
যন্মে মনসি বর্তেত যস্তু বো হৃদি সংশয়ঃ ॥
শ্রুতং ভবদ্ভিস্তৎসর্বং কিমন্যৎকথয়ামি বঃ ॥ ২৩৭.৪২ ॥
মুনয় ঊচুঃ
অধ্যাত্মং বিস্তরেণেহ পুনরেব বদস্ব নঃ ।
যদধ্যাত্মং যথা বিদ্মো ভগবন্নৃষিসত্তম ॥ ২৩৭.৪৩ ॥
ব্যাস উবাচ
অধ্যাত্মং যদিদং বিপ্রাঃ পুরুষস্যেহ পঠ্যতে ।
যুষ্মভ্যং কথয়িষ্যামি তস্য ব্যাখ্যাঽবধার্যতাম্ ॥ ২৩৭.৪৪ ॥
ভীমিরাপস্তথা জ্যোতির্বায়ুরাকাশমেব চ ।
মহাভূতানি যশ্চৈব সর্বভূতেষু ভূতকৃৎ ॥ ২৩৭.৪৫ ॥
মুনয় ঊচুঃ
আকারং তু ভবেদ্যস্য যস্মিন্দেহং ন পশ্যতি ।
আকাসাদ্যং শরীরেষু কথং তদুপবর্ণয়েৎ ॥
ইন্দ্রিয়াণাং গুণাঃ কেচিৎকথং তানুপলক্ষয়েৎ ॥ ২৩৭.৪৬ ॥
ব্যাস উবাচ
এতদ্বো বর্ণয়িষ্যামি যথাবদনুদর্শনম্ ।
শৃণুধ্বং তদিহৈকাগ্য্রা যথাতত্ত্বং যথা চ তৎ ॥ ২৩৭.৪৭ ॥
শব্দঃ শ্রোত্রং তথা খানি ত্রয়মাকাশলক্ষণম্ ।
প্রাণশ্চেষ্টা তথা স্পর্শ এতে বায়ুগুণাস্ত্রয়ঃ ॥ ২৩৭.৪৮ ॥
রূপং চক্ষুর্বিপাকশ্চ ত্রিধা জ্যোতির্বিধীয়তে ।
রসোঽথ রসনং স্বেদো গুণাস্ত্বেতে ত্রয়োঽম্ভসাম্ ॥ ২৩৭.৪৯ ॥
ঘ্রেয়ং ঘ্রাণং শরীরং চ ভূমেরেতে গুণাস্ত্রয়ঃ ।
এতাবানিন্দ্রিয়গ্রামো ব্যাখ্যাতঃ পাঞ্চভৌতিকঃ ॥ ২৩৭.৫০ ॥
বায়োঃ স্পর্শো রসোঽদ্ভ্যশ্চ জ্যোতিষো রূপমুচ্যতে ।
আকাশপ্রভবঃ শব্দো গন্ধো ভূমিগুণঃ স্মৃতঃ ॥ ২৩৭.৫১ ॥
মনো বুদ্ধিঃ স্বভাবশ্চ গুণা এতে স্বয়োনিজাঃ ।
তে গুণানতিবর্তন্তে গুণেভ্যঃ পরমা মতাঃ ॥ ২৩৭.৫২ ॥
যথা কুর্ম ইবাঙ্গানি প্রসার্য সংনিয়চ্ছতি ।
এবমেবেন্দ্রিয়গ্রামং বুদ্ধিশ্রেষ্ঠো নিয়চ্ছতি ॥ ২৩৭.৫৩ ॥
যদূর্ধ্বং পাদতলয়োরবার্কের্দ্বং চ(গধশ্চ)পশ্যতি ।
এতস্মিন্নেব কৃত্যে সা বর্ততে বুদ্ধিরুত্তমা ॥ ২৩৭.৫৪ ॥
গুণৈস্তু নীয়তে বুদ্ধির্বুদ্ধিরেবেন্দ্রিয়াণ্যপি ।
মনঃষষ্ঠানি সর্বাণি বুদ্ধ্যা ভবাৎকুতো গৃণাঃ ॥ ২৩৭.৫৫ ॥
ইন্দ্রিয়াণি নরৈঃ পঞ্চ ষষ্ঠং তন্মন উচ্যতে ।
সপ্তমীং বুদ্ধিমেবাঽঽহুঃ ক্ষেত্রজ্ঞং বিদ্ধি চাষ্টমম্ ॥ ২৩৭.৫৬ ॥
চক্ষুরালোকনায়ৈব সংশয়ং কুরুতে মনঃ ।
বুদ্ধিরধ্যবসানায় সাক্ষী ক্ষেত্রজ্ঞ উচ্যতে ॥ ২৩৭.৫৭ ॥
রজস্তমশ্চ সত্ত্বং চ ত্রয় এতে স্বয়োনিজাঃ ।
সমাঃ সর্বেষু ভূতেষু তান্গুণানুপলক্ষয়েৎ ॥ ২৩৭.৫৮ ॥
তত্র যৎপ্রীতিসংয়ুক্তং কিংচিদাত্মনি লক্ষয়েৎ ।
প্রশান্তমিব সংয়ুক্তং সত্ত্বং তদুপধারয়েৎ ॥ ২৩৭.৫৯ ॥
যত্তু সংতাপসংয়ুক্তং কায়ে মনসি বা ভবেৎ ।
প্রবৃত্তং রজ ইত্যেবং তত্র চাপ্যুপলক্ষয়েৎ ॥ ২৩৭.৬০ ॥
যত্তু সংমোহসংয়ুক্তমব্যক্তং বিষমং ভবেৎ ।
অপ্রতর্ক্যমবিজ্ঞেয়ং তমস্তদুপদারয়েৎ ॥ ২৩৭.৬১ ॥
প্রহর্ষঃ প্রীতিরানন্দং স্বাম্যং স্বস্থাত্মচিত্ততা ।
অকস্মাদ্যদি বা কস্মাদ্বদন্তি সাত্ত্বিকান্গুণান্ ॥ ২৩৭.৬২ ॥
অভিমানো মৃষাবাদো লোভো মহোস্তথা ক্ষমা ।
লিঙ্গানি রজসস্তানি বর্তন্তে হেতুতত্ত্বতঃ ॥ ২৩৭.৬৩ ॥
তথা মোহঃ প্রমাদশ্চ তন্দ্রী নিন্দ্রাঽপ্রবোধিতা ।
কথংচিদভিবর্তন্তে বিজ্ঞেয়াস্তামসা গুণাঃ ॥ ২৩৭.৬৪ ॥
মনঃ প্রসৃজতে ভাবং বুদ্ধিরধ্যবসায়িনী ।
হৃদয়ং প্রিয়মেবেহ ত্রিবিধা কর্মচোদনা ॥ ২৩৭.৬৫ ॥
ইন্দ্রিয়েভ্যঃ পরা হ্যর্থা অর্থেভ্যশ্চ পরং মনঃ ।
মনসস্তু পরা বুদ্ধির্বুদ্ধেরাত্মা পরঃ স্মৃতঃ ॥ ২৩৭.৬৬ ॥
বুদ্ধিরাত্মা মনুষ্যস্য বুদ্ধিরেবাঽঽমনায়িকা ।
যদা বিকুরুতে ভাবং তদা ভবতি সা মনঃ ॥ ২৩৭.৬৭ ॥
ইন্দ্রিয়াণাং পৃথগ্ভাবাদ্বুদ্ধির্বিকুরুতে হ্যনু ।
ক্ষৃণ্বতী ভবতি শ্রোত্রং স্পৃশতী স্পর্শ উচ্যতে ॥ ২৩৭.৬৮ ॥
পশ্যন্তি চ ভবেদ্দৃষ্টী রসন্তী ভবেৎ ।
জিঘ্রন্তী ভবতি ঘ্রাণং বুদ্ধির্বিকুরুতে পৃথক্ ॥ ২৩৭.৬৯ ॥
ইন্দ্রিয়াণি তু তান্যাহুস্তেষাং বৃত্ত্যা বিতিষ্ঠতি ।
তিষ্ঠতি পুরুষে বুদ্ধির্বুদ্ধিভাবব্যবস্থিতা ॥ ২৩৭.৭০ ॥
কদাচিল্লভতে প্রীতিং কদাচিদপি শোচতি ।
ন সুখেন ন দুঃখেন কদাচিদিহ মুহ্যতে ॥ ২৩৭.৭১ ॥
স্বয়ং ভাবাত্মিকা ভাবাংস্ত্রীনেতানতিবর্ততে ।
সরিতাং সাগরো ভর্তা মহাবেলামিবোর্মিমান্ ॥ ২৩৭.৭২ ॥
যদা প্রার্থয়তে কিংচিত্তদা ভবতি সা মনঃ ।
অধিষ্ঠানে চ বৈ বুদ্ধ্যা পৃথগেতানি সংস্মরেৎ ॥ ২৩৭.৭৩ ॥
ইন্দ্রিয়াণি চ মেধ্যানি বিচেতব্যানি কৃৎস্নশঃ ।
সর্বাণ্যেবানুপূর্বেণ যদ্যদা চ বিধীয়তে ॥ ২৩৭.৭৪ ॥
অভিভাগমনা বুদ্ধির্ভাবো মনসি বর্ততে ।
প্রবর্তমানস্তু রজঃ সত্ত্বমপ্যতিবর্ততে ॥ ২৩৭.৭৫ ॥
যে বৈ ভাবেন বর্তন্তে সর্বেষ্বেতেষু তে ত্রিষু ।
অন্বর্থান্সম্প্রবর্তন্তে রথনেমিমরা ইব ॥ ২৩৭.৭৬ ॥
প্রদীপার্থং মনঃ কুর্যাদিন্দ্রিয়ৈর্বুদ্ধিসত্তমৈঃ ।
নিশ্চরদ্ভির্যথায়োগমুদাসীনৈর্যদৃচ্ছয়া ॥ ২৩৭.৭৭ ॥
এবং স্বভাবমেবেদমিতি বুদ্ধ্বা ন মুহ্যতি ।
অশোচন্সম্প্রহৃষ্যংশ্চ নিত্য বিগতমৎসরঃ ॥ ২৩৭.৭৮ ॥
ন হ্যাত্মা শক্যতে দ্রষ্টুমিন্দ্রিয়ৈঃ কামগোচরৈঃ ।
প্রবর্তমানৈরনেকৈর্কর্ধদুরৈরকৃতাত্মভিঃ ॥ ২৩৭.৭৯ ॥
তেষাং তু মনসা রশ্মীন্যদা সম্যঙ্নিয়চ্ছতি ।
তদা প্রকাশতেঽস্যাঽঽত্মা দীপদীপ্তা যথাঽঽকৃতিঃ ॥ ২৩৭.৮০ ॥
সর্বেষামেব ভূতানাং তমস্যুপগতে যথা ।
প্রকাশং ভবতে সর্বং তথৈবমুপধার্যতাম্ ॥ ২৩৭.৮১ ॥
যথা বারিচরঃ পক্ষী ন লিপ্যতি জলে চরন্ ।
বিমুক্তাত্মা তথা যোগী গুণদোষৈর্ন লিপ্যতে ॥ ২৩৭.৮২ ॥
এবমেব কৃতপ্রজ্ঞো ন দোষৈর্বিষয়াংশ্চরন্ ।
অসজ্জমানঃ সর্বেষু ন কথংচিৎপ্রলিপ্যতে ॥ ২৩৭.৮৩ ॥
ত্যক্ত্বা পূর্বকৃতং কর্মরতির্যস্য সদাঽঽত্মনি ।
সর্বভূতাত্মভূতস্য গুণসঙ্গেন সজ্জতঃ ॥ ২৩৭.৮৪ ॥
স্বয়মাত্মা প্রসবতি গুণেষ্বপি কদাচন ।
ন গুণা বিদুরাত্মানং গুণান্বেদ স সর্বদা ॥ ২৩৭.৮৫ ॥
পরিদধ্যাদ্গুণানাং স দ্রষ্টা চৈব যথাতথম্ ।
সত্তবক্ষেত্রজ্ঞয়োরেবমন্তরং লক্ষয়েন্নরঃ ॥ ২৩৭.৮৬ ॥
সৃজতে তু গুণানেক একো ন সৃজতে গুণান্ ।
পৃথগ্ভূতৌ প্রকৃত্যৈতৌ সম্প্রয়ুক্তৌ চ সর্বদা ॥ ২৩৭.৮৭ ॥
যথাঽশ্মনা হিরণ্যস্য সম্প্রয়ুক্তৌ তথৈব তৌ ।
মশকৌদুম্বরৌ বাঽপি সম্প্রয়ুক্তৌ যথা সহ ॥ ২৩৭.৮৮ ॥
ইষিকা বা যথা মুঞ্জে পৃথক্চ সহ চৈবাহ ।
তথৈব সহিতাবেতৌ অন্যোন্যস্মিন্প্রতিষ্ঠিতৌ ॥ ২৩৭.৮৯ ॥
ইতি শ্রীমহাপুরাণে আদিব্রাহ্মে ব্যাসর্ষিসংবাদে
সপ্তত্রিংশদধিকদ্বিশততমোধ্যায়ঃ ॥ ২৩৭ ॥
অধ্যায়ঃ ২৩৮ (১৩০)
গুণসর্জনকথনম্
ব্যাস উবাচ
সৃজতে তু গুণান্সত্ত্বে ক্ষেত্রজ্ঞস্ত্বধিতিষ্ঠতি ।
গুণান্বিক্রিয়তঃ সর্বানুদাসীনবদীশ্বরঃ ॥ ২৩৮.১ ॥
স্বভাবয়ুক্তং তৎসর্বং যদিমান্সৃজতে গুণান্ ।
ঊর্ণনাভির্যথা সূত্রং সৃজতে তদ্গুণাংস্তথা ॥ ২৩৮.২ ॥
প্রবৃত্তা ন নিবর্তন্তে প্রবৃত্তির্নোপলভ্যতে ।
এবমেক ব্যবস্যন্তি নিবৃত্তিমিতি চাপরে ॥ ২৩৮.৩ ॥
উভয়ং সম্প্রধার্যৈতদধ্যবস্যেদ্যথামতি ।
অনেনৈব বিধানেন ভবেদ্বৈ সংশয়ো মহান্ ॥ ২৩৮.৪ ॥
অনাদিনিধনো হ্যাত্মা তং বুদ্ধ্বা বিহরেন্নরঃ ।
অক্রুধ্যন্নপ্রহৃষ্যংশ্চ নিত্যং বিগতমৎসরঃ ॥ ২৩৮.৫ ॥
ইত্যেবং হৃদয়ে সর্বো বুদ্ধিচিন্তাময়ং দৃঢম্ ।
অনিত্যং সুখমাসীনমশোচ্যং ছিন্নসংশয়ঃ ॥ ২৩৮.৬ ॥
তরয়েৎপ্রচ্যুতাং পৃথ্বীং যথা পূর্ণাং নদীং নরাঃ ।
অবগাহ্য চ বিদ্বাংসো বিপ্রা লোলমিমং তথা ॥ ২৩৮.৭ ॥
ন তু তপ্যতি বৈ বিদ্বান্স্থলে চরতি তত্ত্ববিৎ ।
এবং বিচিন্ত্য চাঽঽত্মানং কেবলং জ্ঞানমাত্মনঃ ॥ ২৩৮.৮ ॥
তাং(তং)তু বুদ্ধ্বা নরঃ সর্গং ভূতানামাগতিং গতিম্ ।
সমচেষ্টশ্চ বৈ সম্যগ্লভতে শমমুত্তমম্ ॥ ২৩৮.৯ ॥
এতদ্দ্বিজন্মসামগ্য্রং ব্রাহ্মণস্য বিশেষতঃ ।
আত্মজ্ঞানসমস্নেহপর্যাপ্তং তৎপরায়ণম্ ॥ ২৩৮.১০ ॥
ৎবং বুদ্ধ্বা ভবেদ্বুদ্ধঃ কিমন্যদ্বুদ্ধলক্ষণম্ ।
বিজ্ঞায়ৈতদ্বিমুচ্যন্তে কৃতকৃত্যা মনীষিণঃ ॥ ২৩৮.১১ ॥
ন ভবতি বিদুষাং মহদ্ভয়ং, যদবিদুষাং সুমহদ্ভয়ং পরত্র ।
ন হি গতিরধিকাঽস্তি কস্যচিদ্ভবতি হি যা বিদুষঃ সনাতনী ॥ ২৩৮.১২ ॥
লোকে মাতরমসূয়তে নরস্তত্র দেবমনিরীক্ষ্য শোচতে ।
তত্র চেৎকুশলো ন শোচতে, যে বিদুস্তদুভয়ং কৃতাকৃতম্ ॥ ২৩৮.১৩ ॥
যৎকরোত্যনভিসংধিপূর্বকং, তচ্চ নিন্দয়তি যৎপুরা কৃতম্ ।
যৎপ্রিয়ং তদুভয়ং ন বাঽপ্রিয়ং, তস্য তজ্জনয়তীহ কুর্বতঃ ॥ ২৩৮.১৪ ॥
মুনয় ঊচুঃ
যস্মাদ্বর্মাৎপরো ধর্মো বিদ্যতে নেহ কশ্চন ।
যো বিশিষ্টশ্চ ভূতেভ্যস্তদ্ভবান্প্রব্রবীতু নঃ ॥ ২৩৮.১৫ ॥
ব্যাস উবাচ
ধর্মং চ সম্প্রবক্ষ্যামি পুরাণমৃষিভিঃ স্তুতম্ ।
বিশিষ্টং সর্বধর্মেভ্যঃ শৃণুধ্বং মুনিসত্তমাঃ ॥ ২৩৮.১৬ ॥
ইন্দ্রিয়াণি প্রমাথীনি বুদ্ধ্যা সংয়ম্য তত্ত্বতঃ ।
সর্বতঃ প্রসৃতানীহ পিতা বালানিবাঽঽত্মজান্ ॥ ২৩৮.১৭ ॥
মনসশ্চেন্দ্রিয়াণাং চাপ্যৈকাগ্রয়ং পরমং তপঃ ।
বিজ্ঞেয়ঃ সর্বধর্মেভ্যঃ স ধর্মঃ পর উচ্যতে ॥ ২৩৮.১৮ ॥
তানি সর্বাণি সংধায় মনঃ ষষ্ঠানি মেধয়া ।
আত্মতৃপ্তঃ স এবাঽঽসীদ্বহুচিন্ত্যমচিন্তয়ন্ ॥ ২৩৮.১৯ ॥
গোচরেভ্যো নিবৃত্তানি যদা স্থাস্যন্তি বেশ্মনি ।
তদা চৈবাঽঽত্মনাঽঽত্মানং পরং দ্রক্ষ্যথ শাশ্বতম্ ॥ ২৩৮.২০ ॥
সর্বাত্মানং মহাত্মানং বিধূমমিব পাবকম্ ।
প্রপশ্যন্তি মহাত্মানং ব্রাহ্মণা যে মনীষিণঃ ॥ ২৩৮.২১ ॥
যথা পুষ্পফলোপেতো বহুশাখো মহাদ্রুমঃ ।
আত্মনো নাভিজানীতে ক্ব মে পুষ্পং ক্ব মে ফলম্ ॥ ২৩৮.২২ ॥
এবমাত্মা ন জানীতে ক্ব গমিষ্যে কুতোঽন্বহম্ ।
অন্যো হ্যস্যান্তরাত্মাঽস্তি যঃ সর্বমনুপশ্যতি ॥ ২৩৮.২৩ ॥
জ্ঞানদীপেন দীপ্তেমন পশ্যত্যাত্মানমাত্মনা ।
দৃষ্ট্বাঽঽত্মানং তথা যূয়ং বিরাগা ভবত দ্বিজাঃ ॥ ২৩৮.২৪ ॥
বিমুক্তাঃ সর্বপাপেভ্যো মুক্তৎবচ ইবোরগাঃ ।
পরাং বুদ্ধিমবাপ্যেহাপ্যচিন্তা বিগতজ্বরাঃ ॥ ২৩৮.২৫ ॥
সর্বতঃ স্রোতসং ঘোরাং নদীং লোকপ্রবাহিণীম্ ।
পঞ্চেন্দ্রিয়গ্রাহবতীং মনঃসংকল্পরোধসম্ ॥ ২৩৮.২৬ ॥
লোভমোহতৃণচ্ছন্নাং কামক্রোধসরীসৃপাম্ ।
সত্যতীর্থানৃতক্ষোভাং ক্রোধপঙ্কাং সরিদ্বরাম্ ॥ ২৩৮.২৭ ॥
অব্যক্তপ্রভবাং শীঘ্রাং কামক্রোধসমাকুলাম্ ।
প্রতরধ্বং নদীং বুদ্ধ্যা দুস্তরামকৃতাত্মভিঃ ॥ ২৩৮.২৮ ॥
সংসারসাগরগমাং যোনিপাতালদুস্তরাম্ ।
আত্মজন্মোদ্ভবাং তাং তু জিহ্বাবর্তদুরাসদাম্ ॥ ২৩৮.২৯ ॥
যাং তরন্তি কৃতপ্রজ্ঞা ধৃতিমন্তো মনীষিণঃ ।
তাং তীর্ণঃ সর্বতো মুক্তো বিধূতাত্মাঽঽত্মবাঞ্শুচিঃ ॥ ২৩৮.৩০ ॥
উত্তমাং বুদ্ধিমাস্থায় ব্রহ্মভূয়ায় কল্পতে ।
উত্তীর্ণঃ সর্বসংক্লেশান্প্রসন্নাত্মা বিক্লমষঃ ॥ ২৩৮.৩১ ॥
ভূয়িষ্ঠানীব ভূতানি সর্বস্থানান্নিরীক্ষ্য চ ।
অক্রুধ্যন্নপ্রসীদংশ্চ ননৃশংসমতিস্তথা ॥ ২৩৮.৩২ ॥
ততো দ্রক্ষ্যথ সর্বেষাং ভূতানাং প্রভবাপ্যযাৎ ।
এতদ্বি সর্বধর্মেভ্যো বিশিষ্টং মেনিরে বুধাঃ ॥ ২৩৮.৩৩ ॥
ধর্মং ধর্মভৃতাং শ্রেষ্ঠা মনুয়ঃ সত্যদর্শিনঃ ।
আত্মানো ব্যাপিনো বিপ্রা ইতি পুত্রানুশাসনম্ ॥ ২৩৮.৩৪ ॥
প্রয়তায় প্রবক্তব্যং হিতায়ানুগতায় চ ।
আত্মজ্ঞানমিদং গুহ্যং সর্বগুহ্যতমং মহৎ ॥ ২৩৮.৩৫ ॥
অব্রবং যদহং বিপ্রা আত্মসাক্ষিকমঞ্জসা ।
নৈব স্ত্রী ন পুমানেবং ন চৈবেদং নপুংসকম্ ॥ ২৩৮.৩৬ ॥
অদুঃ খমসুখং ব্রহ্ম ভূতভব্যভবাত্মকম্ ।
যথা মতানি সর্বাণি তথৈতানি যথা তথা ।
কথিতানি ময়া বিপ্রা ভবন্তি ন ভবন্তি চ ॥ ২৩৮.৩৭ ॥
যথা মতানি সর্বাণি তথৈতানি যথা তথা ।
কথিতানি ময়া বিপ্রা ভবন্তি ন ভবন্তি চ ॥ ২৩৮.৩৮ ॥
তৎপ্রীতিয়ুক্তেন গুণান্বিতেন, পুত্রেণ সৎপুত্রদয়ান্বিতেন ।
দৃষ্ট্বা হিতং প্রীতমনা যদর্থং, ব্রূয়াৎসুতস্যেহ যদুক্তমেতৎ ॥ ২৩৮.৩৯ ॥
মুনয় ঊচুঃ
মোক্ষঃ পিতামহেনোক্ত উপায়ান্নানুপায়তঃ ।
তমুপায়ং যথান্যায়ং শ্রোতুমিচ্ছামহে মুনে ॥ ২৩৮.৪০ ॥
ব্যাস উবাচ
অস্মাসু তন্মহাপ্রাজ্ঞা যুক্তং নিপুণদর্শনম্ ।
যদুপায়েন সর্বার্থান্মৃগয়ধ্বং সদাঽনঘাঃ ॥ ২৩৮.৪১ ॥
ঘটোপকরণে বুদ্ধির্ঘটোৎপত্তৌ ন সা মতা ।
এবং ধর্মাদ্যুপায়ার্থ নান্যধর্মেষু কারণম্ ॥ ২৩৮.৪২ ॥
পূর্বে সমুদ্রেয়ঃ পন্থা ন স গচ্ছতি পশ্চিমম্ ।
একঃ পন্থা হি মোক্ষস্য তচ্ছৃণুধ্বং মমানঘাঃ ॥ ২৩৮.৪৩ ॥
ক্ষময়া ক্রোধমুচ্ছিন্দ্যাৎকামং সংকল্পবর্জনাৎ ।
সত্ত্বসংসেবনাদ্ধীরো নিদ্রামুচ্ছেত্তুমর্হতি ॥ ২৩৮.৪৪ ॥
অপ্রমাদাদ্ভয়ং রক্ষেদ্রক্ষেৎক্ষেত্রং চ সংবিদম্ ।
ইচ্ছাং দ্বেষং চ কামং চ ধৈর্যেণ বিনিবর্তয়েৎ ॥ ২৩৮.৪৫ ॥
নিদ্রাং চ প্রতিভাং চৈব জ্ঞানাভ্যাসেন তত্ত্ববিৎ ।
উপদ্রবাংস্তথা যোগী হিতজীর্ণমিতাশনাৎ ॥ ২৩৮.৪৬ ॥
লোভং মোহং চ সংতোষাদ্বিষয়াংস্তত্ত্বদর্শনাৎ ।
অনুক্রোশাদধর্মং চ জয়েদ্ধর্মমুপেক্ষয়া ॥ ২৩৮.৪৭ ॥
আয়ত্যা চ জয়েদাশাং সামর্থ্যং সঙ্গবর্জনাৎ ।
অনিত্যৎবেন চ স্নেহং ক্ষুধাং যোগেন পণ্ডিতঃ ॥ ২৩৮.৪৮ ॥
কারুণ্যেনাঽঽত্মনাঽঽত্মানং তৃষ্ণাং চ পরিতোষতঃ ।
উত্থানেন জয়েত্তন্দ্রাং বিতর্কং নিশ্চয়াজ্জয়েৎ ॥ ২৩৮.৪৯ ॥
মৌনেন বহুভাষাং চ শৌর্যেণ চ ভয়ং জয়েৎ ।
যচ্ছেদ্বাঙ্মনসী বুদ্ধ্যা তাং যচ্ছেজ্জ্ঞানচক্ষুষা ॥ ২৩৮.৫০ ॥
জ্ঞানমাত্মা মহান্যচ্ছেত্তং যচ্ছেচ্ছান্তিরাত্মনঃ ।
তদেতদুপশান্তেন বোদ্ধব্যং শুচিকর্মণা ॥ ২৩৮.৫১ ॥
যোগদোষান্সমুচ্ছিদ্য পঞ্চ যান্কবয়ো বিদুঃ ।
কামং ক্রোধং চ লোভং চ ভয়ং স্বপ্নং চ পঞ্চমম্ ॥ ২৩৮.৫২ ॥
পরিত্যজ্য নিষেবেত যথাবদ্যোগসাধনাৎ ।
ধ্যানমধ্যযনং দানং সত্যং হ্রীরার্জবং ক্ষমা ॥ ২৩৮.৫৩ ॥
শৌচমাচারতঃ শুদ্ধিরিন্দ্রিয়াণাং চ সংয়মঃ ।
এতৈর্বিবর্ধতে তেজঃ পাপ্মানমুপহন্তি চ ॥ ২৩৮.৫৪ ॥
সিধ্যন্তি চাস্য সংকল্পা বিজ্ঞানং চ প্রবর্ততে ।
ধূতপাতঃ স তেজস্বী লঘ্বাহারো জিতেন্দ্রিয়ঃ ॥ ২৩৮.৫৫ ॥
কামক্রোধৌ বশে কৃৎবা নির্বিশেদ্ব্রহ্মণঃ পদম্ ।
অমূঢৎবমসঙ্গিৎবং কামক্রোধবিবর্জনম্ ॥ ২৩৮.৫৬ ॥
অদৈন্যমনুদীর্ণৎবমনুদ্বেগো হ্যবস্থিতিঃ ।
এষ মার্গো হি মোক্ষস্য প্রসন্নো বিমলঃ শুচিঃ ॥
তথা বাক্কায়মনসাং নিয়মাঃ কামতোঽব্যযাঃ ॥ ২৩৮.৫৭ ॥
ইতি শ্রীমহাপুরাণে আদিব্রাহ্মে সাংখ্যযোগনিরূপণং নাম
অষ্টাত্রিংশদধিকদ্বিশততমোঽধ্যায়ঃ ॥ ২৩৮ ॥
অধ্যায়ঃ ২৩৯ (১৩১)
যোগবিধিনিরূপণম্
মুনয় ঊচুঃ
সাংখ্যং যোগস্য নো বিপ্র বিশেষং বক্তুমর্হসি ।
তব ধর্মজ্ঞ সর্বং হি বিদিতং মুনিসত্তম ॥ ২৩৯.১ ॥
ব্যাস উবাচ
সাংখ্যাং সাংখ্যং প্রশংসন্তি যোগান্যোগবিদুত্তমাঃ ।
বদন্তি কারণৈঃ শ্রেষ্ঠৈঃ স্বপক্ষোদ্ভবনায় বৈ ॥ ২৩৯.২ ॥
অনীশ্বরঃ কথং মুচ্যেদিত্যেবং মুনিসত্তমাঃ ।
বদন্তি কারণৈঃ শ্রেষ্ঠং যোগং সম্যঙ্মনীষিণঃ ॥ ২৩৯.৩ ॥
বদন্তি কারণং বেদং সাংখ্যং সম্যগ্দ্বিজাতয়ঃ ।
বিজ্ঞায়েহ গতীঃ সর্বা বিরক্তো বিষয়েষু যঃ ॥ ২৩৯.৪ ॥
ঊর্ধ্বং স দেহাৎসুব্যক্তং বিমুচ্যেদিতি নান্যথা ।
এতদাহুর্মহাপ্রাজ্ঞাঃ সাংখ্যং বৈ মোক্ষদর্শনম্ ॥ ২৩৯.৫ ॥
স্বপক্ষে কারণং গ্রাহ্যং সমর্থং বচনং হিতম্ ।
শিষ্টানাং হি মতং গ্রাহ্যং ভবদ্ভিঃ শিষ্টসংমতৈঃ ॥ ২৩৯.৬ ॥
প্রত্যক্ষং হেতবো যোগাঃ সাংখ্যাঃ শাস্ত্রবিনিশ্চয়াঃ ।
উভে চৈতে তত্ত্বে সমবেতে দ্বিজোত্তমাঃ ॥ ২৩৯.৭ ॥
উভে চৈতে মতে জ্ঞাতে মুনীন্দ্রাঃ শিষ্টসংমতে ।
অনুষ্ঠিতে যথাশাস্ত্রং নয়েতাং পরমাং গতিম্ ॥ ২৩৯.৮ ॥
তুল্যং শৌচং তয়োর্যুক্তং দয়া ভূতেষু চানঘাঃ ।
ব্রতানাং ধারণং তুল্যং দর্শনং ৎবসমং তয়োঃ ॥ ২৩৯.৯ ॥
মুনয় ঊচুঃ
যদি তুল্যং ব্রতং শৌচং দয়া চাত্র মহামুনে ।
তুল্যং তদ্দর্শনং কস্মাত্তন্নৌ ব্রূহি দ্বিজোত্তম ॥ ২৩৯.১০ ॥
ব্যাস উবাচ
রাগং মোহং তথা স্নেহং কামং ক্রোধং চ কেবলম্ ।
যোগাস্থিরোদিতান্দোষান্পঞ্চৈতান্প্রাপ্নুবন্তি তান্ ॥ ২৩৯.১১ ॥
যথা বাঽনিমিষাঃ স্থূলং জালং ছিত্ত্বা পুনর্জলম্ ।
প্রাপ্নুয়ুর্বিমলং মার্গং বিমুক্তাঃ সর্ববন্ধনৈঃ ॥ ২৩৯.১২ ॥
তথৈব বাগুরাং ছিত্ত্বা বলবন্তো যথা মৃগাঃ ।
প্রাপ্নুয়ুর্বিমলং মার্গং বিমুক্তাঃ সর্ববন্ধনৈঃ ॥ ২৩৯.১৩ ॥
লোভজানি তথা বিপ্রা বন্ধনানি বলান্বিতঃ ।
ছিত্ত্বা যোগাৎপরং মার্গং গচ্ছন্তি বিমলং শুভম্ ॥ ২৩৯.১৪ ॥
অচলাস্ত্বাবিলা বিপ্রা বাগুরাসু তথাঽঽপরে ।
বিনশ্যন্তি ন সংদেহস্তদ্বদ্যোগবলাদৃতে ॥ ২৩৯.১৫ ॥
বলহীনাশ্চ বিপ্রেন্দ্রা যথা জালং গতা দ্বিজাঃ ।
বন্ধং ন গচ্ছন্ত্যনঘা যোগাস্তে তু সুদুর্লভাঃ ॥ ২৩৯.১৬ ॥
যথা চ শকুনাঃ সূক্ষ্মং প্রাপ্য জালমরিন্দমাঃ ।
তত্রাশক্তা বিপদ্যন্তে মুচ্যন্তে তু বলান্বিতাঃ ॥ ২৩৯.১৭ ॥
কর্মজৈর্বন্ধনৈর্বদ্ধাস্তদ্বদ্যোগপরা দ্বিজাঃ ।
অবলা ন বিমুচ্যন্তে মুচ্যন্তে চ বলান্বিতাঃ ॥ ২৩৯.১৮ ॥
অল্পকশ্চ যথা বিপ্রা বহ্নিঃ শাম্যতি দুর্বলঃ ।
আক্রান্ত ইন্ধনৈঃ স্থূলৈস্তদ্বদ্যোগবলঃ স্মৃতঃ ॥ ২৩৯.১৯ ॥
স এব চ তদা বিপ্রা বহ্নির্জাতবলঃ পুনঃ ।
সমীরণগতঃ কৃৎস্নাং দহেৎক্ষিপ্রং মহীমিমাম্ ॥ ২৩৯.২০ ॥
তত্ত্বজ্ঞানবলো বিপ্রা বহ্নির্জাতবলঃ পুনঃ ।
সমীরণগতঃ কৃৎস্নাং দহেৎক্ষিপ্রং মহীমিমাম্ ॥ ২৩৯.২১ ॥
দুর্বলশ্চ যথা বিপ্রাঃ স্রোতসা হ্রিয়তে নরঃ ।
বলহীনস্তথা যোগী বিষয়ৈর্হ্রিয়তে চ সঃ ॥ ২৩৯.২২ ॥
তদেব তু যথা স্রোতসা বিষ্কম্ভয়তি বারণঃ ।
তদ্বদ্যোগবলং লব্ধবা ন ভবেদ্বিষয়ৈর্হৃতঃ ॥ ২৩৯.২৩ ॥
বিশন্তি বা বশাদ্বাঽথ যোগাদ্যোগবলন্বিতাঃ ।
প্রজাপতীন্মনূন্সর্বান্মহাভূতানি চেশ্বরাঃ ॥ ২৩৯.২৪ ॥
ন যমো নান্তকঃ ক্রুদ্ধো ন মৃত্যুর্ভীমবিক্রমঃ ।
বিশন্তে তদ্দ্বিজাঃ সর্বে যোগস্যামিততেজসঃ ॥ ২৩৯.২৫ ॥
আত্মনাং চ সহস্রাণি বহূনি দ্বিজসত্তমাঃ ।
যোগং কুর্যাদ্বলং প্রাপ্য তৈশ্চ সর্বৈর্মহীং চরেৎ ॥ ২৩৯.২৬ ॥
প্রাপ্নুয়াদ্বিষয়ান্কশ্চিৎপুনশ্চোগ্রং তপশ্চরেৎ ।
সংক্ষিপ্যেচ্চ পুনর্বিপ্রাঃ সূর্যস্তেজোগুণানিব ॥ ২৩৯.২৭ ॥
বলস্থস্য হি যোগস্য বলার্থং মুনিসত্তমাঃ ।
বিমোক্ষপ্রভবং বিষ্ণুমুপপন্নমসংশয়ম্ ॥ ২৩৯.২৮ ॥
বলানি যোগপ্রোক্তানি ময়ৈতানি দ্বিজোত্তমাঃ ।
নিদর্শনার্থং সূক্ষ্মাণি বক্ষ্যামি চ পুনর্দ্বিজাঃ ॥ ২৩৯.২৯ ॥
আত্মনশ্চ সমাধানে ধারণাং প্রতি বা দ্বিজাঃ ।
নিদর্শনানি সূক্ষ্মাণি সূক্ষ্মাণি শৃণুধ্বং মুনিসত্তমাঃ ॥ ২৩৯.৩০ ॥
অপ্রমত্তো যথা ধন্বী লক্ষ্যং হন্তি সমাহিতঃ ।
যুক্তঃ সম্যক্তথা যোগী মোক্ষং প্রাপ্নোত্যসংশয়ম্ ॥ ২৩৯.৩১ ॥
স্নেহপাত্রে যথা পূর্ণে মন আধায় নিশ্চলম্ ।
পুরুষো যুক্ত আরোহেৎসোপানং যুক্তমানসঃ ॥ ২৩৯.৩২ ॥
মুক্তস্তথাঽয়মাত্মানং যোগং তদ্বৎসুনিশ্চলম্ ।
করোত্যমলামাত্মানং ভাস্করোপমদর্শনে ॥ ২৩৯.৩৩ ॥
যথা চ নাবং বিপ্রেন্দ্রাঃ কর্ণধারঃ সমাহিতঃ ।
মহার্ণবগতাং শীঘ্রং নয়েদ্বিপ্রাংস্তু পত্তনম্ ॥ ২৩৯.৩৪ ॥
তদ্বদাত্মসমাধানং যুক্তো যোগেন যোগবিৎ ।
দুর্গমং স্থানমাপ্নোতি হিৎবা দেহমিমং দ্বিজাঃ ॥ ২৩৯.৩৫ ॥
সারথিশ্চ যথা যুক্তঃ সদশ্বান্সুসমাহিতঃ ।
প্রাপ্নোত্যাশু পরং স্থানং লক্ষ্যমুক্ত ইবাঽঽশুগঃ ॥ ২৩৯.৩৬ ॥
তথৈব চ দ্বিজা যোগী ধারণাসু সমাহিতঃ ।
প্রাপ্নোত্যশু পরং স্থানং লক্ষ্যমুক্ত ইবাঽঽশুগঃ ॥ ২৩৯.৩৭ ॥
আবিশ্যাঽঽত্মনি চাঽঽত্মানং যোঽবতিষ্ঠতি সোঽচলঃ ।
পাশং বহৎবে মীনানাং পদমাপ্নোতি সোঽজরম্ ॥ ২৩৯.৩৮ ॥
নাভ্যাং শীর্ষে চ কুক্ষৌ চ হৃদি বক্ষসি পার্শ্বয়োঃ ।
দর্শনে শ্রবণে বাঽপি ঘ্রাণে চামিতবিক্রমঃ ॥ ২৩৯.৩৯ ॥
স্থানেষ্বেতেষু যো যোগী মহাব্রতসমাহিতঃ ।
আত্মনা সূক্ষ্মমাত্মানং যুঙ্ক্তে সম্যগ্দ্বিজোত্তমাঃ ॥ ২৩৯.৪০ ॥
সুশীঘ্রমচলপ্রখ্যং কর্ম দগ্ধ্বা শুভাশুভম্ ।
উত্তমং যোগমাস্থায় যদীচ্ছতি বিমুচ্যতে ॥ ২৩৯.৪১ ॥
মুনয় ঊচুঃ
আহারান্কীদৃশান্কৃৎবা কানি জিৎবা চ সত্তম ।
যোগী বলমবাপ্নোতি তদ্ভবান্বক্তুমর্হতি ॥ ২৩৯.৪২ ॥
ব্যাস উবাচ
কণানাং ভক্ষণে যুক্তঃ পিণ্যাকস্য চ ভো দ্বিজাঃ ।
স্নেহানাং বর্জনে যুক্তো যোগী বলমবাপ্নুয়াৎ ॥ ২৩৯.৪৩ ॥
ভুঞ্জানো যাবকং রূক্ষং দীর্ঘকালং দ্বিজোত্তমাঃ ।
একাহারী বিশুদ্ধাত্মা যোগী বলমবাপ্নুয়াৎ ॥ ২৩৯.৪৪ ॥
পক্ষান্মাসানৃতূংশ্চিত্রান্সংচরংশ্চ গুহাস্তথা ।
অপঃ পীৎবা পয়োমিশ্রা যোগী বলমাবাপ্নুয়াৎ ॥ ২৩৯.৪৫ ॥
অখণ্ডমপি বা মাসং সততং মুনিসত্তমাঃ ।
উপোষ্য সম্যক্ষুদ্ধাত্মা যোগী বলমবাপ্যনুয়াৎ ॥ ২৩৯.৪৬ ॥
কামং জিৎবা তথা ক্রোধং শীতোষ্ণং বর্ষমেব চ ।
ভয়ং শোকং তথা স্বাপং পৌরুষীন্বিষয়াংস্তথা ॥ ২৩৯.৪৭ ॥
অরতিং দুর্জয়াং চৈব ঘোরাং দৃষ্ট্বা চ ভো দ্বিজাঃ ।
স্পর্শং নিদ্রাং তথা তন্দ্রাং দুর্জয়াং মুনিসত্তমাঃ ॥ ২৩৯.৪৮ ॥
দীপয়ন্তি মহাত্মানং সূক্ষ্মমাত্মানমাত্মনা ।
বীতরাগা মহাপ্রাজ্ঞা ধ্যানাধ্যযনসম্পদা ॥ ২৩৯.৪৯ ॥
দুর্গস্ত্বেষ মতঃ পন্থা ব্রাহ্মণানাং বিপশ্চিতাম্ ।
যঃ কশ্চিদ্ব্রজতি ক্ষিপ্রং ক্ষেমেণ মুনিপুংগবাঃ ॥ ২৩৯.৫০ ॥
যথা কশ্চিদ্বনং ঘোরং বহুসর্পসরীসৃপম্ ।
শ্বভ্রবত্তোয়হীনং চ দুর্গমং বহুকণ্টকম্ ॥ ২৩৯.৫১ ॥
অভক্তমটবীপ্রায়ং দাবদগ্ধমহীরুহম্ ।
পন্থানং তস্করাকীর্ণং ক্ষেমেণাভিপতেত্তথা ॥ ২৩৯.৫২ ॥
যোগমার্গং সমাসাদ্য যঃ কশ্চিদ্ব্রজতে দ্বিজঃ ।
ক্ষেমেণোপরমেন্মার্গাদ্বহুদোষোঽপি সংমতঃ ॥ ২৩৯.৫৩ ॥
আস্থেয়ং ক্ষুরধারাসু নিশিতাসু দ্বিজোত্তমাঃ ।
ধারণা সা তু যোগস্য দুর্গেয়মকৃতাত্মভিঃ ॥ ২৩৯.৫৪ ॥
বিষমা ধারণা বিপ্রা যান্তি বৈন শুভাং গতিম্ ।
নেতৃহীনা যথা নাবঃ পুরুষাণাং তু বৈ দ্বিজাঃ ॥ ২৩৯.৫৫ ॥
যস্তু তিষ্ঠতি যোগাধৌ ধারণাসু যথাবিধি ।
মরণং জন্মদুঃখিৎবং সুখিৎবং স বিশিষ্যতে ॥ ২৩৯.৫৬ ॥
নানাশাস্ত্রেষু নিয়তং নানামুনিনিষেবিতম্ ।
পরং যোগস্য পন্থানং নিশ্চিতং তং দ্বিজাতিষু ॥ ২৩৯.৫৭ ॥
পরং হি তদ্ব্রহ্মময়ং মুনীন্দ্রা, ব্রহ্মণমীশং বরদং চ বিষ্ণুম্ ।
ভবং চ ধর্মং চ মহানুভাবং যদ্ব্রহ্মপুত্রান্সুমহানুভাবান্ ॥ ২৩৯.৫৮ ॥
তমশ্চ কষ্টং সুমহদ্রজশ্চ, সত্ত্বং চ শুদ্ধং প্রকৃতিং পরাং চ ।
সিদ্ধিং চ দেবীং বরুণস্য পত্নীং, তেজশ্চ কৃৎস্নং সুমহচ্চ ধৈর্যম্ ॥
২৩৯.৫৯ ॥
তারাধিপং খে বিমলং সুতারং, বিশ্বাংশ্চ দেবানুরগান্পিতৄংশ্চ ।
শৈলাংশ্চ কৃৎস্নানুদধীংশ্চ বাঽচলান্নদীশ্চ সর্বাঃ সনগাংশ্চ
নাগান্ ॥ ২৩৯.৬০ ॥
সাধ্যাংস্তথা যক্ষগণান্দিশশ্চ, গন্ধর্বসিদ্ধান্পুরুষান্স্ত্রিয়শ্চ ।
পরস্পরং প্রাপ্য মহান্মহাত্মা বিশেত যোগী নচিরাদ্বিমুক্তঃ ॥ ২৩৯.৬১ ॥
কথা চ যা বিপ্রবরাঃ প্রসক্তা, দৈবে মহাবীর্যমতৌ শুভেয়ম্ ।
যোগান্স সর্বাননুভূয় মর্ত্যা, নারায়ণং তং দ্রুতমাপ্নুবন্তি ॥ ২৩৯.৬২ ॥
ইতি শ্রীমহাপুরাণে আদিব্রাহ্মে ব্যাসর্ষিসংবাদে যোগবিধিনিরূপণং নাম
একোনচৎবারিংশদধিকদ্বিশততমোঽধ্যায়ঃ ॥ ২৩৯ ॥
অধ্যায়ঃ ২৪০ (১৩২)
সাংখ্যবিধিনিরূপণম্
মুনয় ঊচুঃ
সম্যক্ক্রিয়েয়ং বিপ্রেন্দ্র বর্ণিতা শিষ্টসংমতা ।
যোগমার্গো যথান্যায়ং শিষ্যায়েহ হিতষিণা ॥ ২৪০.১ ॥
সাংখ্যে ৎবিদানীং ধর্মস্য বিধিং প্রব্রূহি তত্ত্বতঃ ।
ত্রিষু লোকেষু যজ্জ্ঞানং সর্বং তদ্বিদিতং হি তে ॥ ২৪০.২ ॥
ব্যাস উবাচ
শৃণুধ্বং মুনয়ঃ সর্বমাখ্যানং বিদিতাত্মনাম্ ।
বিহিতং যতিভির্বৃদ্ধৈঃ কপিলাদিভিরীশ্বরৈঃ ॥ ২৪০.৩ ॥
যস্মিন্সুবিভ্রামাঃ কেচিদ্দৃশ্যন্তে মুনিসত্তমাঃ ।
গুণাশ্চ যস্মিন্বহবো দোষহানিশ্চ কেবলা ॥ ২৪০.৪ ॥
জ্ঞানেন পরিসংখ্যায় সদোষান্বিষয়ান্দ্বিজাঃ ।
মানুষান্দুর্জয়ান্কৃৎস্নান্পৈশাচান্বিষয়াংস্তথা ॥ ২৪০.৫ ॥
বিষয়ানৌরগাঞ্জ্ঞাৎবা গন্ধর্ববিষয়াংস্তথা ।
পিতৄণাং বিষয়াঞ্জ্ঞাৎবা তির্যক্ত্বং চরতাং দ্বিজাঃ ॥ ২৪০.৬ ॥
সুপর্ণবিষয়াঞ্জ্ঞাৎবা মরুতাং বিষয়াংস্তথা ।
মহর্ষিবিষয়াংশ্চৈব রাজর্ষিবিষয়াংস্তথা ॥ ২৪০.৭ ॥
আসুরান্বিষয়াঞ্জ্ঞাৎবা বৈশ্বদেবাংস্তথৈব চ ।
দেবর্ষিবিষয়াঞ্জ্ঞাৎবা যোগানামপি বৈ পরান্ ॥। ২৪০.৮ ॥
বিষয়াংশ্চ প্রমাণস্য ব্রহ্মণো বিষয়াংতথা ।
আয়ুষশ্চ পরং কালং লোকৈর্বিজ্ঞায় তত্ত্বতঃ ॥ ২৪০.৯ ॥
সুখস্য চ পরং কালং বিজ্ঞায় মুনিসত্তমাঃ ।
প্রাপ্তকালে চ যদ্দুঃখং পততাং বিষয়ৈষিণাম্ ॥ ২৪০.১০ ॥
তির্যক্ত্বে পততাং বিপ্রাস্তথৈব নরকেষু যৎ ।
স্বর্গস্য চ গুণাঞ্জ্ঞাৎবা দোষান্সর্বাংশ্চ ভো দ্বিজাঃ ॥ ২৪০.১১ ॥
বেদবাদে চ যে দোষা গুণা যে চাপি বৈদিকাঃ ।
জ্ঞানয়োগে চ যে দোষা জ্ঞানয়োগে চ যে গুণাঃ ॥ ২৪০.১২ ॥
সাংখ্যজ্ঞানে চ যে দোষাংস্তথৈব চ গুণাং তথা ।
ষড্গুণং চ নভো জ্ঞাৎবা তমশ্চ ত্রিগুণং মহৎ ॥ ২৪০.১৩ ॥
তমশ্চাষ্টগুণং জ্ঞাৎবা বুদ্ধিং সপ্তগুণাং তথা ।
ষড্গুণং চ নভো জ্ঞাৎবা তপশ্চ ত্রিগুণং মহৎ ॥ ২৪০.১৪ ॥
দ্বিগুণং চ রজো জ্ঞাৎবা সত্ত্বং চৈকগুণং পুনঃ ।
মার্গং বিজ্ঞায় তত্ত্বেন প্রলয়প্রেক্ষণেন তু ॥ ২৪০.১৫ ॥
জ্ঞানবিজ্ঞানসম্পন্নাঃ কারণৈর্ভাবিতাত্মভিঃ ।
প্রাপ্নুবন্তি শুভং মোক্ষং সূক্ষ্মা ইব নভঃ পরম্ ॥ ২৪০.১৬ ॥
রূপেণ দৃষ্টিং সংয়ুক্তাং ঘ্রাণং গন্ধগুণেন চ ।
শব্দগ্রাহ্যং তথা শ্রোত্রং জিহ্বাং রসগুণেন চ ॥ ২৪০.১৭ ॥
ৎবচং স্পর্শং তথা শক্যং বায়ুং চৈব তদাশ্রিতম্ ।
মোহং তমসি সংয়ুক্তং লোভং মোহেষু সংশ্রিতাঃ ॥ ২৪০.১৮ ॥
বিষ্ণুং ক্রান্তে বলে শক্রং কোষ্ঠে সক্তং তথাঽনলম্ ।
অপ্সু দেবীং সমায়ুক্তামাপস্তেজসি সংশ্রিতাঃ ॥ ২৪০.১৯ ॥
তেজো বায়ৌ তু সংয়ুক্তং বায়ুং নভসি চাঽঽশ্রিতম্ ।
নভো মহতি সংয়ুক্তং তমো মহসি সংস্থিতম্ ॥ ২৪০.২০ ॥
রজঃ সত্ত্বং তথা সক্তং সত্ত্বং সক্তং তথাঽঽত্মনি ।
সক্তমাত্মানমীশে চ দেবে নারায়ণে তথা ॥ ২৪০.২১ ॥
দেবং মোক্ষে চ সংয়ুক্তং ততো মোক্ষং চ ন ক্বচিৎ ।
জ্ঞাৎবা সত্ত্বগুণং দেহং বৃতং ষোডশভির্গুণৈঃ ॥ ২৪০.২২ ॥
স্বভাবং ভাবনাং চৈব জ্ঞাৎবা দেহসমাশ্রিতাম্ ।
মধ্যস্থমিব চাঽঽত্মানং পাপং যস্মিন্ন বিদ্যত ॥ ২৪০.২৩ ॥
দ্বিতীয়ং কর্ম বৈ জ্ঞাৎবা বিপ্রেন্দ্রা বিষ্যৈষিণাম্ ।
ইন্দ্রিয়াণীন্দ্রিয়ার্থাংশ্চ সর্বানাত্মনি সংশ্রিতান্ ॥ ২৪০.২৪ ॥
দুর্লভৎবং চ মোক্ষস্য বিজ্ঞায় শ্রুতিপূর্বকম্ ।
প্রাণাপানৌ সমানং চ ব্যানোদানৌ চ তত্ত্বতঃ ॥ ২৪০.২৫ ॥
আদ্যং চৈবানিলং জ্ঞাৎবা প্রভবং চানিলং পুনঃ ।
সপ্তধা তাংস্তথা শেষাসপ্তধা বিধিবৎপুনঃ ॥ ২৪০.২৬ ॥
প্রজাপতীনৃষীংশ্চৈব সর্গাংশ্চ সুবহূন্বরান্ ।
সপ্তর্ষীশ্চ বহূঞ্জ্ঞাৎবা রাজর্ষীংশ্চ পরংতপান্ ॥ ২৪০.২৭ ॥
সুরর্ষীন্মরুতশ্চান্যান্ব্রহ্মর্ষীন্সূর্যসংনিভান্ ।
ঐশ্বর্যাচ্চ্যাবিতান্দৃষ্ট্বা কালেন মহতা দ্বিজাঃ ॥ ২৪০.২৮ ॥
মহতাং ভূতসংঘানাং শ্রুৎবা নাশং চ ভো দ্বিজাঃ ।
গতিং বাচাং শুভাং জ্ঞাৎবা অর্চার্হাঃ পাপকর্মণাম্ ॥ ২৪০.২৯ ॥
বৈতরণ্যাং চ যদ্দুঃখং পতিতানাং যমক্ষয়ে ।
যোনিষু চ বিচিত্রাসু সংচারানশুভাংস্তথা ॥ ২৪০.৩০ ॥
জঠরে চাশুভে বাসং শোণিতোদকভাজনে ।
শ্লেষ্মমূত্রপুরীষে চ তীব্রগন্ধসমন্বিতে ॥ ২৪০.৩১ ॥
শুক্রশোণিতসংঘাতে মজ্জাস্নায়ুপরিগ্রহে ।
শিরশতসমাকীর্ণে নবদ্বারে পুরেঽথ বৈ ॥ ২৪০.৩২ ॥
বিজ্ঞায় হিতমাত্মানং যোগাংশ্চ বিবিধান্দ্বিজাঃ ।
তামসানাং চ জন্তূনাং রমণীয়ানৃতাত্মনাম্ ॥ ২৪০.৩৩ ॥
সাত্ত্বিকানাং চ জন্তূনাং কুৎসিতং মুনিসত্তমাঃ ।
গর্হিংতং মহাতামর্থে সাংখ্যানাং বিদিতাত্মনাম্ ॥ ২৪০.৩৪ ॥
উপপ্লবাংস্তথা ঘোরাঞ্শশিনস্তেজস্তথা ।
তারাণাং পতনং দৃষ্ট্বা নক্ষত্রাণাং চ পর্যযম্ ॥ ২৪০.৩৫ ॥
দ্বংদ্বানাং বিপ্রয়োগং চ বিজ্ঞায় কৃপণং দ্বিজাঃ ।
অন্যোন্যভক্ষণং দৃষ্ট্বা ভূতানামপি চাশুভম্ ॥ ২৪০.৩৬ ॥
বাল্যে মোহং চ বিজ্ঞায় পক্ষদেহস্য চাশুভম্ ।
রাগং মোহং চ সম্প্রাপ্তং ক্বচিৎসত্ত্বং সমাশ্রিতম্ ॥ ২৪০.৩৭ ॥
সহস্রেষু নরঃ কশ্চিন্মোক্ষবুদ্ধিং সমাশ্রিতঃ ।
দুর্লভৎবং চ মোক্ষস্য বিজ্ঞানং শ্রুতিপূর্বকম্ ॥ ২৪০.৩৮ ॥
বহুমানমলব্ধেষু লব্ধে মধ্যস্থতাং পুনঃ ।
বিষয়াণাং চ দৌরাত্ম্যং বিজ্ঞায় চ পুনর্দ্বিজাঃ ॥ ২৪০.৩৯ ॥
গতাসূনাং চ সত্ত্বানাং দেহান্ভিত্ত্বা তথা শুভান্ ।
বাসং কুলেষু জন্তূনাং মরণায় ধৃতাত্মনাম্ ॥ ২৪০.৪০ ॥
সাত্ত্বিকানাং চ জন্তূনাং দুঃখং বিজ্ঞায় ভো দ্বিজাঃ ।
ব্রহ্মঘ্নানাং গতিং জ্ঞাৎবা পতিতানাং সুদারুণাম্ ॥ ২৪০.৪১ ॥
সুরাপানে চ সক্তানাং ব্রাহ্মণানাং দুরাত্মনাম্ ।
গুরুদারপ্রসক্তানাং গতিং বিজ্ঞায় চাশুভাম্ ॥ ২৪০.৪২ ॥
জননীষু চ বর্তন্তে যেন সম্যগ্দ্বিজোত্তমাঃ ।
সদেবকেষু লোকেষু যেন বর্তন্তি মানবাঃ ॥ ২৪০.৪৩ ॥
তেন জ্ঞানেন বিজ্ঞায় গতিং চাশুভকর্মণাম্ ।
তির্যগ্যোনিগতানাং চ বিজ্ঞায় চ গতীঃ পৃথক্ ॥ ২৪০.৪৪ ॥
বেদবাদাংস্তথা চিত্রানৃতূনাং পর্যযাংস্তথা ।
ক্ষয়ং সংবৎসরাণাং চ মাসানাং চ ক্ষয়ং তথা ॥ ২৪০.৪৫ ॥
পক্ষক্ষয়ং তথা দৃষ্ট্বা দিবসানাং চ সংক্ষয়ম্ ।
ক্ষয় সংবৎসরাণাং চ মাসানাং চ ক্ষয়ং তথা ॥ ২৪০.৪৬ ॥
বৃদ্ধিং দৃষ্ট্বা সমুদ্রাণাং ক্ষয়ং তেষাং তথা পুনঃ ।
ক্ষয়ং ধনানাং দৃষ্ট্বা চ পুনর্বৃদ্ধিং তথৈব চ ॥ ২৪০.৪৭ ॥
সংয়োগানাং তথা দৃষ্ট্বা যুগানাং চ বিশেষতঃ ।
দেহবৈক্লব্যতাং চৈব সম্যগ্বিজ্ঞায় তত্ত্বতঃ ॥ ২৪০.৪৮ ॥
আত্মদোষাংশ্চ বিজ্ঞায় সর্বানাত্মনি সংস্থিতান্ ।
স্বদেহাদুত্থিতান্গন্ধাংস্তথা বিজ্ঞায় চাশুভাম্ ॥ ২৪০.৪৯ ॥
মুনয় ঊচুঃ
কানুৎপাতভবান্দোষান্পশ্যতি ব্রহ্মবিত্তম ।
এতং নঃ সংশয়ং কৃৎস্নং বক্তুমর্হস্যশেষতঃ ॥ ২৪০.৫০ ॥
ব্যাস উবাচ
পঞ্চ দোষান্দ্বিজা দেহে প্রবদন্তি মনীষিণঃ ।
মার্গজ্ঞাঃ কাপিলাঃ সাংখ্যাঃ শৃণুধ্বং মুনিসত্তমাঃ ॥ ২৪০.৫১ ॥
কামক্রোধৌ ভয়ং নিদ্রা পঞ্চমঃ শ্বাস উচ্যতে ।
এতে দোষাঃ শরীরেষু দৃশ্যন্তে সর্বদেহিনাম্ ॥ ২৪০.৫২ ॥
ছিন্দন্তি ক্ষময়া ক্রোধং কামং সংকল্পবর্জনাৎ ।
সত্ত্বসংসেবনান্নিদ্রামপ্রমাদাদ্ভয়ং তথা ॥ ২৪০.৫৩ ॥
ছিন্দন্তি পঞ্চমং শ্বাসমল্পাহারতয়া দ্বিজাঃ ।
গুণান্গুণশতৈর্জ্ঞাৎবা দোষান্দোষশতৈরপি ॥ ২৪০.৫৪ ॥
হেতূন্হেতুশতৈশ্চিত্রৈশ্চিত্রান্বিজ্ঞায় তত্ত্বতঃ ।
অপাং ফেনোপমং লোকং বিষ্ণোর্মায়াশতৈঃ কৃতম্ ॥ ২৪০.৫৫ ॥
চিত্রভিত্তিপ্রতীকাশং নলসারমনর্থকম্ ।
তমঃ সংভ্রমিতং দৃষ্ট্বা বর্ষবুদ্বুদসংনিভম্ ॥ ২৪০.৫৬ ॥
নাশপ্রায়ং সুখাধানং নাশোত্তরমহাভয়ম্ ।
রজস্তমসি সংমগ্নং পঙ্কে দ্বিপমিবাবশম্ ॥ ২৪০.৫৭ ॥
সাংখ্যা বিপ্রা মহাপ্রাজ্ঞাস্ত্যক্ত্বা স্নেহং প্রজাকৃতম্ ।
জ্ঞানজ্ঞেয়েন সাংখ্যেন ব্যাপিনা মহতা দ্বিজাঃ ॥ ২৪০.৫৮ ॥
রাজসানশুভান্গন্ধাংস্তামসাংশ্চ তথাবিধান্ ।
পুণ্যাংশ্চ সাত্ত্বিকান্গন্ধান্স্পর্শজান্দেহসংশ্রিতান্ ॥ ২৪০.৫৯ ॥
ছিত্ত্বাঽঽমজ্ঞানশস্ত্রেণ তপোদণ্ডেন সত্তমাঃ ।
ততো দুঃখাদিকং ঘোরং চিন্তাশোকমহাহ্রদম্ ॥ ২৪০.৬০ ॥
ব্যাধিমত্যুমহাঘোরং মহাভয়মহোরগম্ ।
ততঃ কূর্মং রজোমীনং প্রজ্ঞয়া সংতরন্ত্যুত ॥ ২৪০.৬১ ॥
স্নেহপঙ্কং জরাদুর্গং স্পর্শদ্বীপং দ্বিজোত্তমাঃ ।
কর্মাগাধং সত্যতীরং স্থিতং ব্রতমনীষিণঃ ॥ ২৪০.৬২ ॥
হর্ষসংঘমহাবেগং নানারসসমাকুলম্ ।
নানাপ্রীতিমহারত্নং দুঃখজ্বরসমীরিতম্ ॥ ২৪০.৬৩ ॥
শোকতৃষ্ণামহাবর্তং তীক্ষ্ণব্যাধিমহারুজম্ ।
অস্থিসংঘাতসংঘট্টং শ্লেষ্ময়োগং দ্বিজোত্তমাঃ ॥ ২৪০.৬৪ ॥
দানমুক্তাকরং ঘোরং শোণিতোদ্গারবিদ্রুমম্ ।
হসিতোৎক্রুষ্টনির্ঘোষং নানাজ্ঞাসুদুষ্করম্ ॥ ২৪০.৬৫ ॥
রোদনাশ্রুমলক্ষারং সঙ্গয়োগপরায়ণম্ ।
প্রলব্ধ্বা জন্মলোকো যং পুত্রবান্ধবপত্তনম্ ॥ ২৪০.৬৬ ॥
অহিংসাসত্যমর্যাদং প্রাণয়োগময়োর্মিলম্ ।
বৃন্দানুগামিনং ক্ষীরং সর্বভূতপয়োদধিম্ ॥ ২৪০.৬৭ ॥
মোক্ষদুর্লভবিষয়ং বাডবাসুখসাগরম্ ।
তরন্তি যতয়ঃ সিদ্ধা জ্ঞানয়োগেন চানঘাঃ ॥ ২৪০.৬৮ ॥
তীর্ত্বা চ দুস্তরং জন্ম বিশন্তি বিমলং নভঃ ।
ততস্তান্সুকৃতীঞ্জ্ঞাৎবা সূর্যো বহতিরশ্মিভিঃ ॥ ২৪০.৬৯ ॥
পদ্মতন্তুবদাবিশ্য প্রবহন্বিষয়ান্দ্বিজাঃ ।
তত্র তান্প্রবহো বায়ুঃ প্রতিগৃহ্ণাতি চানঘাঃ ॥ ২৪০.৭০ ॥
বীতরাগান্যতীন্সিদ্ধান্বীর্যযুক্তাংস্তপোধনান্ ।
সূক্ষ্মঃ শীতঃ সুগন্ধশ্চ সুখস্পর্শশ্চ ভো দ্বিজাঃ ॥ ২৪০.৭১ ॥
সপ্তানাং মরুতাং শ্রেষ্ঠো লোকান্গচ্ছতি যঃ শুভান্ ।
স তান্বহতি বিপ্রেন্দ্রা নভসঃ পরমাং গতিম্ ॥ ২৪০.৭২ ॥
নভো বহতি লোকেশান্রজসঃ পরমাং গতিম্ ।
রজো বহতি বিপ্রেন্দ্রাঃ সত্ত্বস্য পরমাংগতিম্ ॥ ২৪০.৭৩ ॥
সত্ত্বং বহতি শুদ্ধাত্মা পরং নারায়ণং প্রভুম্ ।
প্রভুর্বহতি শুদ্ধাত্মা পরমাত্মানমাত্মনা ॥ ২৪০.৭৪ ॥
পরমাত্মানমাসাদ্য তদ্ভূতা যতয়োঽমলাঃ ।
অমৃতৎবায় কল্পন্তে ন নিবর্তন্তি চ দ্বিজাঃ ॥ ২৪০.৭৫ ॥
পরমা সা গতির্বিপ্রা নির্দ্বন্দ্বানাং মহাত্মনাম্ ।
সত্যার্জবরতানাং বৈ সর্বভূতদয়াবতাম্ ॥ ২৪০.৭৬ ॥
মুনয় ঊচুঃ
স্থানমুত্তমমাসাদ্য ভগবন্তং স্থিরব্রতাঃ ।
আজন্মমরণং বা তে রমন্তে তত্র বা ন বা ॥ ২৪০.৭৭ ॥
যদত্র তথ্যং তত্ত্বং নো যথাবদ্বক্তুমর্হসি ।
ৎবদৃতে মানবং নান্যং প্রষ্টুমর্হাম সত্তম ॥ ২৪০.৭৮ ॥
মোক্ষদোষো মহানেষ প্রাপ্য সিদ্ধিং গতানৃষীন্ ।
যদি তত্রৈব বিজ্ঞানে বর্তন্তে যতয়ঃ পরে ॥ ২৪০.৭৯ ॥
প্রবৃত্তিলক্ষণং ধর্মং পশ্যাম পরমং দ্বিজ ।
মগ্নস্য হি পরে জ্ঞানে কিংতু দুঃখান্তরং ভবেৎ ॥ ২৪০.৮০ ॥
ব্যাস উবাচ
যথানায়ায়ং মুনিশ্রেষ্ঠাঃ প্রশ্নঃ পৃষ্টশ্চ সংকটঃ ।
বুধানামপি সংমোহঃ প্রশ্নেঽস্মিন্মুনিসত্তমাঃ ॥ ২৪০.৮১ ॥
অত্রাপি তত্ত্বং পরমং শৃণুধ্বং বচনং মম ।
বুদ্ধিশ্চ পরমা যত্র কপিলানাং মহাত্মনাম্ ॥ ২৪০.৮২ ॥
ইন্দ্রিয়াণ্যপি বুধ্যন্তে স্বদেহং দেহিনাং দ্বিজাঃ ।
করণান্যাত্মনস্তানি সূক্ষ্মং পশ্যন্তি তৈস্তু সঃ ॥ ২৪০.৮৩ ॥
আত্মনা বিপ্রহীণানি কাষ্ঠকুড্যসমানি তু ।
বিনশ্যন্তি ন সংদেহো বেলা ইব মহার্ণবে ॥ ২৪০.৮৪ ॥
ইন্দ্রিয়ৈঃ সহ সুপ্তস্য দেহিনো দ্বিজসত্তমাঃ ।
সূক্ষ্মশ্চরতি সর্বত্র নভসীব সমীরণঃ ॥ ২৪০.৮৫ ॥
স পশ্যতি যথান্যায়ং স্মৃৎবা স্পৃশতি চানঘাঃ ।
বুধ্যমানো যথাপূর্বমখিলেনেহ ভো দ্বিজাঃ ॥ ২৪০.৮৬ ॥
ইন্দ্রিয়াণি হ সর্বাণি স্বে স্বে স্থানে যথাবিধি ।
অনীশৎবাৎপ্রলীয়ন্তে সর্পা বিষহতা ইব ॥ ২৪০.৮৭ ॥
ইন্দ্রিয়াণি হ সর্বাণি স্বস্থানেষ্বেব সর্বশঃ ।
আক্রম্য গতয়ঃ সূক্ষ্মাব(শ্চ)রত্যাত্মা ন সংশয়ঃ ॥ ২৪০.৮৮ ॥
সত্ত্বস্য চ গুণান্কৃৎস্নান্রজসশ্চ গুণান্পুনঃ ।
গুণাংশ্চ তমসঃ সর্বান্গুণান্বুদ্ধেশ্চ সত্তমাঃ ॥ ২৪০.৮৯ ॥
গুণাংশ্চ মনসশ্চাপি নভসশ্চ গুণাংস্তথা ।
গুণান্বায়োশ্চ সর্বজ্ঞাঃ স্নেহজাংশ্চ গুণান্পুনঃ ॥ ২৪০.৯০ ॥
অপাং গুণাস্তথা বিপ্রাঃ পার্থিবাংশ্চ গুণানপি ।
সর্বানেব গুণৈর্ব্যাপ্য ক্ষেত্রজ্ঞেষু দ্বিজোত্তমাঃ ॥ ২৪০.৯১ ॥
আত্মা চরতি ক্ষেত্রজ্ঞঃ কর্মণা চ শুভাশুভে ।
শিষ্যা ইবমহাত্মানমিন্দ্রিয়াণি চ তং দ্বিজাঃ ॥ ২৪০.৯২ ॥
প্রকৃতিং চাপ্যতিক্রম্য সুদ্ধং সূক্ষ্মং পরাৎপরম্ ।
নারায়ণং মহাত্মানং নির্বিকারং পরাৎপরম্ ॥ ২৪০.৯৩ ॥
বিমুক্তং সর্বপাপেক্ষ্যঃ প্রবিষ্টং চ হ্যনাময়ম্ ।
পরমাত্মানমগুণং নির্বৃতং তং চ সপ্তমাঃ ॥ ২৪০.৯৪ ॥
শ্রেষ্ঠং তত্র মনো বিপ্রা ইন্দ্রিয়াণি চ ভোঃ দ্বিজাঃ ।
আগচ্ছন্তি যথাকালং গুরোঃ সংদেশকারিণঃ ॥ ২৪০.৯৫ ॥
শক্যং বাঽল্পেন কালেন শান্তিং প্রাপ্তুং গুণাংস্তথা ।
এবমুক্তেন বিপ্রেন্দ্রাঃ সাংখ্য যোগেন মোক্ষিণীম্ ॥ ২৪০.৯৬ ॥
সাংখ্যা বিপ্রা মহাপ্রাজ্ঞা গচ্ছন্তি পরমাং গতিম্ ।
জ্ঞানেনানেন বিপ্রেন্দ্রাস্তুল্যং জ্ঞানং ন বিদ্যতে ॥ ২৪০.৯৭ ॥
অত্র বঃ সংশয়ো মা ভূজ্জ্ঞানং সাংখ্যং পরং মতম্ ।
অক্ষরং ধ্রুবমেবোক্তং পূর্বং ব্রহ্ম সনাতনম্ ॥ ২৪০.৯৮ ॥
অনাদিমধ্যনিধনং নির্দ্বংদ্বং কর্তৃ শাশ্বতম্ ।
কূটস্থং চৈব নিত্যং চ যদ্বদন্তি শমাত্মকাঃ ॥ ২৪০.৯৯ ॥
যতঃ সর্বাঃ প্রবর্তন্তে সর্গপ্রলয়বিক্রিয়াঃ ।
এবং শংসন্তি শাস্ত্রেষু প্রবক্তারো মহর্ষয়ঃ ॥ ২৪০.১০০ ॥
সর্বে বিপ্রাশ্চ বেদাশ্চ তথা সামবিদো জনাঃ ।
ব্রহ্মণ্যং পরমং দেবমনন্তং পরমাচ্যুতম্ ॥ ২৪০.১০১ ॥
প্রর্থয়ন্তশ্চ তং বিপ্রা বদন্তি গুণবুদ্ধয়ঃ ।
সম্যগুক্তাস্তথা যোগাঃ সাংখ্যাশ্চামিতদর্শনাঃ ॥ ২৪০.১০২ ॥
অমূর্তিস্তস্য বিপ্রেন্দ্রাঃ সাংখ্যং মূর্তিরিতি শ্রুতিঃ ।
অভিজ্ঞানানি তস্যাঽঽহুর্মহান্তি মুনিসত্তমাঃ ॥ ২৪০.১০৩ ॥
দ্বিবিধানি হি ভূতানি পৃথিব্যাং দ্বিজসত্তমাঃ ।
অগম্যগম্যসংজ্ঞানি গম্যং তত্র বিশিষ্যতে ॥ ২৪০.১০৪ ॥
জ্ঞানং মহদ্বৈ মহতশ্চ বিপ্রা, বেদেষু সাংখ্যেষু তথৈব যোগে ।
যচ্চাপি দৃষ্টং বিধিবৎপুরাণে, সাংখ্যাগতং তন্নিখিলং মুনীন্দ্রাঃ ॥ ২৪০.১০৫ ॥
যচ্চেতিহাসেষু মহৎসু দৃষ্টং, যথার্থশাস্ত্রেষু বিশিষ্টদৃষ্টম্ ।
জ্ঞানং চ লোকে যদিহাস্তি কিংচিৎসাংখ্যাগতং তচ্চ মহামুনীন্দ্রাঃ ॥ ২৪০.১০৬ ॥
সমস্তদৃষ্টং পরমং বলং চ, জ্ঞানং চ মোক্ষশ্চ যথাবদুক্তম্ ।
তপাংসি সূক্ষ্মাণি চ যানি চৈব, সাংখ্যং যথাবদ্বিহিতানি বিপ্রাঃ ॥ ২৪০.১০৭ ॥
বিপর্যযং তস্য হিতং সদৈব, গচ্ছন্তি সাংখ্যাঃ সততং সুখেন ।
তাংশ্চাপি সংধার্য ততঃ কৃতার্থাঃ, পতন্তি বিপ্রায়তনেষু ভূয়ঃ ॥ ২৪০.১০৮ ॥
হিৎবা চ দেহং প্রবিশন্তি মোক্ষং দিবৌকসশ্চাপি চ যোগসাংখ্যাঃ ।
অতোঽধিকং তেঽভিরতা মহার্হে, সাখ্যে দ্বিজা ভো ইহ শিষ্টজুষ্টে ॥ ২৪০.১০৯ ॥
তেষাং তু তির্যগ্গমনং হি দৃষ্টং, নাধো গতিঃ পাপকৃতাং নিবাসঃ ।
ন বা প্রধানা অপি তে দ্বিজাতয়ো, যে জ্ঞানমেতন্মুনয়ো ন সক্তাঃ ॥ ২৪০.১১০ ॥
সাংখ্যাং বিশালং পরমং পুরাণং, মহার্ণবং বিমলমুদারকান্তম্ ।
কৃৎস্নং হি সাংখ্যা মুনয়া মহাত্মনারায়ণে ধারয়থাপ্রমেয়ম্ ॥ ২৪০.১১১ ॥
এতন্ময়োক্তং পরমং হি তত্ত্বং, নারায়ণাদ্বিশ্বমিদং পুরাণম্ ।
স সর্গকালে চ করোতি সর্গং, সংহারকালে চ হরেত ভূয়ঃ ॥ ২৪০.১১২ ॥
ইতি শ্রীমহাপুরাণে আদিব্রাহ্মে ব্যাসঋষিসংবাদে সাংখ্যবিধিনিরূপণং
নামৈকোনচৎবারিংশদধিকদ্বিশততমোঽধ্যায়ঃ ॥ ২৪০ ॥
অধ্যায়ঃ ২৪১ (১৩৩)
বসিষ্ঠকরালজনকসংবাদে ক্ষরাক্ষরবিচারনিরূপণম্
মুনয় ঊচুঃ
কিং তদক্ষরমিত্যুক্তং যস্মান্নাঽঽবর্ততে পুনঃ ।
কিংস্বিত্তৎক্ষরমিত্যুক্তং যস্মাদাবর্ততে পুনঃ ॥ ২৪১.১ ॥
অক্ষরাক্ষরয়োর্ব্যক্তিং পৃচ্ছামস্ত্বাং মহামুনে ।
উপলব্ধুং মুনিশ্রেষ্ঠ তত্ত্বেন মুনিপুংগব ॥ ২৪১.২ ॥
ৎবং হি জ্ঞানবিদাং শ্রেষ্ঠঃ প্রোচ্যসে বেদপারগৈঃ ।
ঋষিভিশ্চ মহাভাগৈর্যতিভিশ্চ মহাত্মভিঃ ॥ ২৪১.৩ ॥
তদেতচ্ছ্রোতুমিচ্ছাস্ত্বত্তঃ সর্বং মহামতে ।
ন তৃপ্তিমধিগচ্ছামঃ শৃণ্বন্তোঽমৃতমুত্তমম্ ॥ ২৪১.৪ ॥
ব্যাস উবাচ
অত্র বো বর্ণয়িষ্যামি ইতিহাসং পুরাতনম্ ।
বসিষ্ঠস্য চ সংবাদং করালজনকস্য চ ॥ ২৪১.৫ ॥
বসিষ্ঠং শ্রেষ্ঠমাসীনমৃষীণাং ভাস্করদ্যুতিম্ ।
পপ্রচ্ছ জনকো রাজা জ্ঞানং নৈঃশ্রেয়সং পরম্ ॥ ২৪১.৬ ॥
পরমাত্মনি কুশলমধ্যাত্মগতিনিশ্চয়ম্ ।
মৈত্রাবরুণমিমাসীনমভিবাদ্য কৃতাঞ্জলিঃ ॥ ২৪১.৭ ॥
স্বচ্ছন্দং সুকৃতং চৈব মধুরং চাপ্যনুল্বণম্ ।
পপ্রচ্ছর্ষিবরং রাজা করালজনকঃ পুরা ॥ ২৪১.৮ ॥
করালজনক উবাচ
ভগবঞ্শ্রোতুমিচ্ছামি পরং ব্রহ্ম সনাতনম্ ।
যস্মিন্ন পুনরাবৃত্তিং প্রাপ্নুবন্তি মনীষিণঃ ॥ ২৪১.৯ ॥
যচ্চ তৎক্ষরমিত্যুক্তং যত্রেদং ক্ষরতে জগৎ ।
যচ্চাক্ষরমিতি প্রোক্তং শিবং ক্ষেমমনাময়ম্ ॥ ২৪১.১০ ॥
বসিষ্ঠ উবাচ
শ্রূয়তাং পৃথিবীপাল ক্ষরতীদং যথা জগৎ ।
যত্র ক্ষরতি পূর্বেণ যাবৎকালেন চাপ্যথ ॥ ২৪১.১১ ॥
যুগং দ্বাদশসাহস্রং কল্পং বিদ্ধি চতুর্যুগম্ ।
দশকল্পশতাবর্তংমহস্তদ্ব্রাহ্মুচ্যতে ॥ ২৪১.১২ ॥
রাত্রিশ্চৈতাবতী রাজন্যস্যন্তে প্রতিবুধ্যতে ।
সৃজত্যনন্তকর্মাণি মহান্তং ভূতমগ্রজম্ ॥ ২৪১.১৩ ॥
মূর্তিমন্তমমূর্তাত্মা বিশ্বং শংভুঃ স্বয়ংভুবঃ ।
যত্রোৎপত্তিং প্রবক্ষ্যামি মূলতো নৃপসত্তম ॥ ২৪১.১৪ ॥
অণিমা লঘিমা প্রাপ্তিরীশানং জ্যোতিরব্যযম্ ।
সর্বতঃপাণিপাদান্তং সর্বতোঽক্ষিশিরোমুখম্ ॥ ২৪১.১৫ ॥
সর্বতঃশ্রুতিমল্লোকে সর্বমাবৃত্য তিষ্ঠতি ।
হিরণ্যগর্ভো ভগবানেষ বুদ্ধিরিতি স্মৃতিঃ ॥ ২৪১.১৬ ॥
মহানিতি চ যোগেষু বিরিঞ্চিরিতি চাপ্যথ ।
সাংখ্যে চ পঠ্যতে শাস্ত্রে নামভির্বহুধাত্মকঃ ॥ ২৪১.১৭ ॥
বিচিত্ররূপো বিশ্বাত্মা একাক্ষর ইতি শ্রুতঃ ।
ধৃতমেকাত্মকং যেন কৃৎস্নং ত্রৈলোক্যমাত্মনা ॥ ২৪১.১৮ ॥
তথৈব বহুরূপৎবাদ্বিশ্বরূপ ইতি শ্রুতঃ ।
এষ বৈ বিক্রিয়াপন্নঃ সৃজত্যাত্মানমাত্মনা ॥ ২৪১.১৯ ॥
প্রধানং তস্য সংয়োগাদুৎপন্নং সুমহৎপুরম্ ।
অহংকারং মহাতেজাঃ প্রজাপতিনমস্কৃতম্ ॥ ২৪১.২০ ॥
অব্যক্তাদ্ব্যক্তিমাপন্নং বিদ্যাসর্গং বদন্তি তম্ ।
মহান্তং চাপ্যহংকারমবিদ্যাসর্গ এব চ ॥ ২৪১.২১ ॥
অচরশ্চ চরশ্চৈব সমুৎপন্নৌ তথৈকতঃ ।
বিদ্যাঽবিদ্যোতি বিখ্যাতে শ্রুতিশাস্ত্রানুচিন্তকৈঃ ॥ ২৪১.২২ ॥
ভূতসর্গমহংকারত্তৃতীয়ং বিদ্ধি পার্থিব ।
অহংকারেষু নৃপতে চতুর্থং বিদ্ধি বৈকৃতম্ ॥ ২৪১.২৩ ॥
বায়ুর্জ্যোতিরথাঽঽকাশমাপোঽথ পৃথিবী তথা ।
শব্দস্পর্শৌ চ রূপং চ রসো গন্ধস্তথৈব চ ॥ ২৪১.২৪ ॥
এবং যুগপদুৎপন্নং দশবর্গমসংশয়ম্ ।
পঞ্চমং বিদ্ধি রাজেন্দ্র ভৌতিকং সর্গমর্থকৃৎ ॥ ২৪১.২৫ ॥
শ্রোত্রং ৎবক্চক্ষুষী জিহ্বা ঘ্রাণমেব চ পঞ্চমম্ ।
বাঘস্তৌ চৈব পাদৌ চ পায়ুর্মেঢ্রং তথৈব চ ॥ ২৪১.২৬ ॥
বুদ্ধীন্দ্রিয়াণি চৈতানি তথা কর্মেন্দ্রিয়াণি চ ।
সংভূতানীহ যুগপন্মনসা সহ পার্থিব ॥ ২৪১.২৭ ॥
এষা তত্ত্বচতুর্বিংশা সর্বাঽঽকৃতিঃ প্রবর্ততে ।
যাং জ্ঞাৎবা নাভিশোচন্তি ব্রাহ্মণাস্তত্ত্বদর্শিনঃ ॥ ২৪১.২৮ ॥
এবমেতৎসমুৎপন্নং ত্রৈলোক্যমিদমুত্তমম্ ।
বেদিতব্যং নরশ্রেষ্ঠ সদৈব নরকার্ণবে ॥ ২৪১.২৯ ॥
সয়ক্ষভূতগন্ধর্বে সকিংনরমহোরগে ।
সচারণপিশাচে বৈ সদেবর্ষিনিশাচরে ॥ ২৪১.৩০ ॥
সদংশকীটমশকে সপূতিকৃমিমূষকে ।
শুনি শ্বপাকে চৈণেয়ে সচাণ্ডালে সপুল্কসে ॥ ২৪১.৩১ ॥
হস্ত্যশ্বখরশার্দূলে সবৃকে গবি চৈব হ ।
যা চ মূর্তিশ্চ যৎকিংচিৎসর্বত্রৈতন্নিদর্শনম্ ॥ ২৪১.৩২ ॥
জলে ভুবি তথাঽঽকাশে নান্যত্রেতি বিনিশ্চয়ঃ ।
স্থানং দেহবতামাসীদিত্যেবনুশুশ্রুম ॥ ২৪১.৩৩ ॥
কৃৎস্নমেতাবতস্তাত ক্ষরতে ব্যক্তসংজ্ঞকঃ ।
অহন্যহনি ভূতাত্মা যচ্চাক্ষর ইতি স্মৃতম্ ॥ ২৪১.৩৪ ॥
ততস্তৎক্ষরমিত্যুক্তং ক্ষরতীদং যথা জগৎ ।
জগন্মোহাত্মকং চাঽঽহুরব্যক্তাদ্ব্যক্তসংজ্ঞকম্ ॥ ২৪১.৩৫ ॥
মহাংশ্চৈবাক্ষরো নিত্যমেতৎক্ষরবিবর্জনম্ ।
কথিতং তে মহারাজ যস্মান্নাঽঽবর্ততে পুনঃ ॥ ২৪১.৩৬ ॥
পঞ্চবিংশতিকোঽমূর্তঃ স নিত্যস্তত্ত্বসংজ্ঞকঃ ।
সত্ত্বসংশ্রয়ণাত্তৎবং সত্ত্বমাহুর্মনীষিণঃ ॥ ২৪১.৩৭ ॥
যদমূর্তিঃ সৃজদ্ব্যক্তং তন্মূর্তিমধিতিষ্ঠতি ।
চতুর্বিংশতিমো ব্যক্তো হ্যমূর্তিঃ পঞ্চবিংশকঃ ॥ ২৪১.৩৮ ॥
স এব হৃদি সর্বাসু মূর্তিষ্বাতিষ্ঠতাঽঽত্মবান্ ।
চেতয়ংশ্চেতনীং নিত্যং সর্বমূর্তিরমূর্তিমান্ ॥ ২৪১.৩৯ ॥
সর্গপ্রলয়ধর্মেণ স সর্গপ্রলয়াত্মকঃ ।
গোচরে বর্ততে নিত্যং নির্গুণো গুণসংজ্ঞিতঃ ॥ ২৪১.৪০ ॥
এবমেষ মহাত্মা চ সর্গপ্রলয়কোটিশঃ ।
বিকুর্বাণঃ প্রকৃতিমান্নাভিমন্যেত বুদ্ধিমান্ ॥ ২৪১.৪১ ॥
তমঃসত্ত্বরজোয়ুক্তস্তাসু তাস্বিহ যোনিষু ।
লীয়তে প্রতিবুদ্ধৎবাদবুদ্ধজনসেবনাৎ ॥ ২৪১.৪২ ॥
সহবাসনিবাসৎবাদ্বালোঽহমিতি মন্যতে ।
যোঽহং ন সোঽহমিত্যুক্তে গুণানেবানুবর্ততে ॥ ২৪১.৪৩ ॥
তমসা তামসান্ভাবন্বিবিধান্প্রতিপদ্যতে ।
রজসা রাজসাংশ্চৈব সাত্ত্বিকান্সত্ত্বসংক্ষয়াৎ ॥ ২৪১.৪৪ ॥
শুক্ললোহিতকৃষ্ণানি রূপাণ্যেতানি ত্রীণি তু ।
সর্বাণ্যেতানি রূপাণি জানীহি প্রাকৃতানি তু ॥ ২৪১.৪৫ ।
তামসা নিরয়ং যান্তি রাজসা মানুষানথ ।
সাত্ত্বিকা দেবলোকায় গচ্ছন্তি সুখভাগিনঃ ॥ ২৪১.৪৬ ॥
নিষ্কেবলেন পাপেন তির্যগ্যোনিমবাপ্নুয়াৎ ।
পুণ্যপাপেষু মানুষ্যং পুণ্যমাত্রেণ দেবতাঃ ॥ ২৪১.৪৭ ॥
এবমব্যক্তবিষয়ং মোক্ষমাহুর্মনীষিণঃ ।
পঞ্চবিংশতিমো যোঽয়ং জ্ঞানাদেব প্রবর্ততে ॥ ২৪১.৪৮ ॥
ইতি শ্রীমহাপুরাণে আদিব্রাহ্মে বসিষ্ঠকরালজনকসংবাদে
ক্ষরাক্ষরবিচারনিরূপণং নাম একচৎবারিংশদধিকদ্বিশততমোঽধ্যায়ঃ ॥
২৪১ ॥
অধ্যায়ঃ ২৪২ (১৩৪)
বশিষ্ঠকরালজনকসংবাদবর্ণনম্
বসিষ্ঠ উবাচ
এবমপ্রতিবুদ্ধৎবাদবুদ্ধমনুবর্ততে ।
দেহাদ্দেহসহস্রাণি তথা চ ন স ভিদ্যতে ॥ ২৪২.১ ॥
তির্যগ্যোনিসহস্রেষু কদাচিদ্দেবতাস্বপি ।
উৎপদ্যতি তপোয়োগাদ্গুণৈঃ সহ গুণক্ষয়াৎ ॥ ২৪২.২ ॥
মনুষ্যৎবাদ্দিবং যাতি দেবো মানুষ্যমেতি চ ।
মানুষ্যান্নিরয়স্থানমালয়ং প্রতিপদ্যতে ॥ ২৪২.৩ ॥
কোষকারো যথাঽঽত্মানং কীটঃ সমভিরুন্ধতি ।
সূত্রতন্তুগুণৈর্নিত্যং তথাঽয়মগুণো গুণৈঃ ॥ ২৪২.৪ ॥
দ্বংদ্বংমেতি চ নির্দ্বংদ্বস্তাসু তাস্বিহ যোনিষু ।
শীর্ষরোগেঽক্ষিরোগে চ দন্তশূলে গলগ্রহে ॥ ২৪২.৫ ॥
জলোদরেঽতিসারে চ গণ্ডমালবিচর্চিকে ।
শ্বত্রকুষ্ঠেঽগ্নিদগ্ধে চ সিধ্মাপস্মারয়োরপি ॥ ২৪২.৬ ॥
যানি চান্যানি দ্বংদ্বানি প্রাকৃতানি শরীরিণাম্ ।
উৎপদ্যন্তে বিচিত্রাণি তান্যেবাঽঽত্মাঽভিমন্যতে ॥ ২৪২.৭ ॥
অভিমানাতিমানানাং তথৈব সুকৃতান্যপি ।
একবাসাশ্চতুর্বাসাঃ শায়ী নিত্যমধস্তথা ॥ ২৪২.৮ ॥
মণ্ডূকশায়ী চ তথা বীরাসনগতস্তথা ।
বীরমাসনমাকাশে তথা শয়নমেব চ ॥ ২৪২.৯ ॥
ইষ্টকাপ্রস্তরে চৈব চক্রকপ্রস্তরে তথা ।
ভস্মাপ্রস্তরশায়ী চ ভূমিশয়্যানুলেপনঃ ॥ ২৪২.১০ ॥
বীরস্থানাম্বুপাকে চ শয়নং ফলকেষু চ ।
বিবিধাসু চ শয়্যাসু ফলগৃহ্যান্বিতাসু চ ॥ ২৪২.১১ ॥
উদ্যানে খললাগ্নে তু ক্ষৌমকৃষ্ণাজিনান্বিতঃ ।
মণিবালপরীধানো ব্যাঘ্রচর্মপরিচ্ছদঃ ॥ ২৪২.১২ ॥
সিংহচর্মপরীধানঃ পট্টবাসাস্তথৈব চ ।
ফলকং(?)পরিধানশ্চ তথা কটকবস্ত্রধৃক্ ॥ ২৪২.১৩ ॥
কটৈকবসনশ্চৈব চীরবাসাস্তথৈব চ ।
বস্ত্রাণি চান্যানি বহূন্যভিমত্য য বুদ্ধিমান্ ॥ ২৪২.১৪ ॥
ভোজনানি বিচিত্রাণি রত্নানি বিবিধানি চ ।
একরাত্রান্তরাশিৎবমেককালিভোজনম্ ॥ ২৪২.১৫ ॥
চতুর্থাষ্টমকালং চ ষষ্ঠকালিকমেব চ ।
ষড্রাত্রভোজনশ্চৈব তথা চাষ্টাহভোজনঃ ॥ ২৪২.১৬ ॥
মাসোপবাসী মূলাশী ফলাহারস্তথৈব চ ।
বায়ুভক্ষশ্চ পিণ্যাকদধিগোময়ভোজনঃ ॥ ২৪২.১৭ ॥
গোমূত্রভোজনশ্চৈব কাশপুষ্পাশনস্তথা ।
শৈবালভোজনশ্চৈব তথা চান্যেন বর্তয়ন্ ॥ ২৪২.১৮ ॥
বর্তয়ঞ্শীর্মপর্ণৈশ্চ প্রকীর্ণফলভোজনঃ ।
বিবিধানি চ কৃচ্ছ্রাণি সেবতে সিদ্ধিকাঙ্ক্ষয়া ॥ ২৪২.১৯ ॥
চান্দ্রায়ণানি বিধিবল্লিঙ্গানি বিবিধানি চ ।
চাতুরাশ্রম্যযুক্তানি ধর্মাধর্মাশ্রয়াণ্যপি ॥ ২৪২.২০ ॥
উপাশ্রয়ানপ্যপরান্পাখণ্ডান্বিবিধানপি ।
বিবিক্তাশ্চ শিলাছায়াস্তথা প্রস্রবণানি চ ॥ ২৪২.২১ ॥
পুলিনানি বিবিক্তানি বিবিধানি তপাংসি চ ।
যজ্ঞাংশ্চ বিবিধাকারান্বিদ্যাশ্চ বিবিধাস্তথা ॥ ২৪২.২২ ॥
নিয়মান্বিবিধাংশ্চাপি বিবিধানি তপাংসি চ ।
যজ্ঞাংশ্চ বিবিধাকারান্বিদ্যাশ্চ বিবিধাস্তথা ॥ ২৪২.২৩ ॥
বণিক্পথং দ্বিজক্ষত্রবৈশ্যশূদ্রাংস্তথৈব চ ।
দানাং চ বিবিধাকারং দীনান্ধকৃপণাদিষু ॥ ২৪২.২৪ ॥
অভিমন্যেত সংধাতুং তথৈব বিবিধান্গুণান্ ।
সত্ত্বং রজস্তমশ্চৈব ধর্মার্থৈ কাম এব চ ॥ ২৪২.২৫ ॥
যজনাধ্যযনে দানং তথৈবাঽঽহুঃ প্রতিগ্রহম্ ।
যাজনাধ্যাপনে চৈব তথাঽন্যদপি কিংচন ॥ ২৪২.২৬ ॥
যজনাধ্যযনে দানং তথৈবাঽঽহুঃ প্রতিগ্রহম্ ।
যাজনাধ্যাপনে চৈব তথাঽন্যদপি কিংচন ॥ ২৪২.২৭ ॥
জন্মমৃত্যুবিধানেন তথা বিশসনেন চ ।
শুভাশুভময়ং সর্বমেতদাহুঃ সনাতনম্ ॥ ২৪২.২৮ ॥
প্রকৃতিঃ কুরুতে দেবী ভয়ং প্রলয়মেব চ ।
দিবসান্তে গুণানেতানতীত্যৈকোঽবতিষ্ঠতে ॥ ২৪২.২৯ ॥
রশ্মিজালমিবাঽঽদিত্যস্তৎকালং সংনিয়চ্ছতি ।
এবমেবৈষ তৎসর্বং ক্রীডার্থমভিমন্যতে ॥ ২৪২.৩০ ॥
আত্মরূপগুণানেতান্বিবিধান্হৃদয়প্রিয়ান্ ।
এবমেতাং প্রকুর্বাণঃ সর্গপ্রলয়ধর্মিণীম্ ॥ ২৪২.৩১ ॥
ক্রিয়াং ক্রিয়াপথে রক্তস্ত্রিগুণস্ত্রিগুণাধিপঃ ।
ক্রিয়াক্রিয়াপতোপেতস্তথা তদিতি মন্যতে ॥ ২৪২.৩২ ॥
প্রকৃত্যা সর্বমেবেদং জগদন্ধীকৃতং বিভো ।
রজসা তমসা চৈব ব্যাপ্তং সর্বমনেকধা ॥ ২৪২.৩৩ ॥
এবং দ্বংদ্বান্যতীতানি মম বর্তন্তি নিত্যশঃ ।
মত্ত এতানি জায়ন্তে প্রলয়ে যান্তি মামপি ॥ ২৪২.৩৪ ॥
নিস্তর্তব্যাণ্থৈতানি সর্বাণীতি নরাধিপ ।
মন্যতে পক্ষবুদ্ধৎবাত্তথৈব সুকৃতান্যপি ॥ ২৪২.৩৫ ॥
ভোক্তব্যানি মমৈতানি বেবলোকগতেন বৈ ।
ইহৈব চৈনং ভোক্ষ্যামি শুভাসুভফলোদয়ম্ ॥ ২৪২.৩৬ ॥
সুখমেবং তু কর্তব্যং সকৃৎকৃৎবা সুখং মম ॥
যাবদেব তু মে সৌখ্যং জাত্যাং জাত্যাং ভবিষ্যতি ॥ ২৪২.৩৭ ॥
ভবিষ্যতি ন মে দুঃখং কৃতেনেহাপ্যনন্তকম্ ।
সুখদুঃখং হি মানুষ্যং নিরয়ে চাপি মজ্জনম্ ॥ ২৪২.৩৮ ॥
নিরয়াচ্চাপি মানুষ্যং কালেনৈষ্যাম্যহং পুনঃ ।
মনুষ্যৎবাচ্চ দেবৎবং দেবৎবাৎপৌরুষং পুনঃ ॥ ২৪২.৩৯ ॥
মনুষ্যৎবাচ্চ নিরয়ং পর্যায়েণোপগচ্ছতি ।
এষ এবং দ্বিজাতীনামাত্মা বৈ স গুণৈর্বৃতঃ ॥ ২৪২.৪০ ॥
তেন দেবমনুষ্যেষু নিরয়ং চোপপদ্যতে ।
মমৎবেনাঽঽবৃতো নিত্যং তত্রৈব পরিবর্ততে ॥ ২৪২.৪১ ॥
সর্গকোটিসহস্রাণি মরণান্তাসু মূর্তিষু ।
য এবং কুরুতে কর্ম শূভাশুভফলাত্মকম্ ॥ ২৪২.৪২ ॥
স এব ফলমাপ্নোতি ত্রিষু লোকেষু মূর্তিমান্ ।
প্রকৃতিঃ কুরুতে কর্মশুভশুভফলাত্মকম্ ॥ ২৪২.৪৩ ॥
প্রকৃতিশ্ব তথাঽঽনোতি ত্রিষু লোকেষু কামণা ।
তির্যগ্যোনিমনুষ্যৎবলে দেবলোকে তথৈব চ ॥ ২৪২.৪৪ ॥
ত্রীণি স্থানানি চৈতানি জানীয়াৎপ্রাকৃতানি হ ।
অলিঙ্গপ্রকৃতিৎবাচ্চ লিঙ্গৈরপ্যনুমীয়তে ॥ ২৪২.৪৫ ॥
তথৈব পৌরুষং লিঙ্গমনুমানাদ্ধি মন্যতে ।
স লিঙ্গান্তরমাসাদ্য প্রাকৃতং লিঙ্গমব্রণম্ ॥ ২৪২.৪৬ ॥
ব্রণদ্বারাণ্যধিষ্ঠায় কর্মাণ্যাত্মনি মন্যতে ।
শ্রোত্রাদীনি তু সর্বাণি পঞ্চ কর্মেন্দ্রিয়াণ্যথ ॥ ২৪২.৪৭ ॥
রাগাদীনি প্রবর্তন্তে গুণেষ্বিহ গুণৈঃ সহ ।
অহমেতানি বৈ কুর্বন্মমৈতানীন্দ্রিয়াণিহ ॥ ২৪২.৪৮ ॥
নিরিন্দ্রিয়ো হি মন্যেত ব্রণবানস্মি নির্ব্রণঃ ।
অলিঙ্গো লিঙ্গমাত্মানমকালং কালমাত্মনঃ ॥ ২৪২.৪৯ ॥
অসত্ত্বং সত্ত্বমাত্মানমমৃতং মৃতমাত্মনঃ ।
অমৃত্যুং মৃত্যুমাত্মাত্মানমভবং ভবমাত্মনঃ ॥ ২৪২.৫০ ॥
অক্ষেত্রং ক্ষেত্রমাত্মানমসঙ্গং সঙ্গমাত্মনঃ ।
অতত্ত্বং তত্ত্বমাত্মানমভবং ভবমাত্মনঃ ॥ ২৪২.৫১ ॥
অক্ষরং ক্ষরমাত্মানমবুদ্ধৎবাদ্ধি মন্যতে ।
এবমপ্রতিবুদ্ধৎবাদবুদ্ধজনসেবনাৎ ॥ ২৪২.৫২ ॥
সর্গকোটিসহস্রাণি পতনান্তানি গচ্ছতি ।
জন্মান্তরসহস্রাণি মরণান্তানি গচ্ছতি ॥ ২৪২.৫৩ ॥
তির্যগ্যোনিমনুষ্যৎবে দেবলোকে তথৈব চ ।
চন্দ্রমা ইব কোশানাং পুনস্তত্র সহস্রশঃ ॥ ২৪২.৫৪ ॥
নীয়তেঽপ্রতিবুদ্ধৎবাদেবমেব কুবুদ্ধিমান্ ।
কলা পঞ্চদশী যোনিস্তদ্ধাম ইতি পঠ্যতে ॥ ২৪২.৫৫ ॥
নিত্যমেব বিজানীহি সোমং বৈ ষোডশাংশকৈঃ ।
কলয়া জায়তেঽজস্রং পুনঃ পুনরবুদ্ধিমান্ ॥ ২৪২.৫৬ ॥
ধীমাংশ্চায়ং ন ভবতি নৃপ এবং হি জায়তে ।
ষোডশী তু কলা সূক্ষ্মা স সোম উপধার্যতাম্ ॥ ২৪২.৫৭ ॥
ন তূপয়ূজ্যতে দেবৈর্দৈবানপি যুনক্তি সঃ ।
মমৎবং ক্ষপয়িৎবা তু জায়তে নৃপসত্তম ॥
প্রকৃতেস্ত্রিগুণায়াস্তু স এব ত্রিগুণো ভবেৎ ॥ ২৪২.৫৮ ॥
ইতি শ্রীমহাপুরাণে আদিব্রাহ্মে বসিষ্ঠকরালজনকসংবাদে
দ্বিচৎবারিংশদধিকদ্বিশততমোঽধ্যায়ঃ ॥ ২৪২ ॥
রহ্মপুরাণম্
অধ্যায়ঃ ২৪৩ (১৩৫)
বশিষ্ঠং প্রতি মোক্ষধর্মবিষয়কো জনকপ্রশ্নঃ
জনক উবাচ
অক্ষরক্ষরয়োরেষ দ্বয়োঃ সংবন্ধ ইষ্যতে ।
স্ত্রীপুংসয়োর্বা সম্বন্ধ স বৈ পুরুষ উচ্যতে ॥ ২৪৩.১ ॥
ঋতে তু পুরুষং নেহ স্ত্রী গর্ভান্ধারয়ত্যুত ।
ঋতে স্ত্রিয়ং ন পুরুষো রূপং নির্বর্ততে তথা ॥ ২৪৩.২ ॥
অন্যোন্যস্যাভিসংবন্ধানয়োন্যগুণসংশ্রয়াৎ ।
রূপং নির্বর্তয়েদেতদেবং সর্বাসু যোনিষু ॥ ২৪৩.৩ ॥
রত্যর্থমতিসংয়োগাদন্যোন্যগুমসংশ্রয়াৎ ।
ঋতৌ নির্বর্ততে রূপং তদ্বক্ষ্যামি নিদর্শনম্ ॥ ২৪৩.৪ ॥
যে গুণাঃ পরুষস্যেহ যে চ মাতুর্গুণাস্তথা ।
অস্থি স্নায়ু চ মজ্জা চ জানীমঃ পিতৃতো দ্বিজ ॥ ২৪৩.৫ ॥
ৎবঙ্মাসশোণিতং চেতি মাতৃজান্যনুশুশ্রুম ।
এবমেতদ্দ্বিজশ্রেষ্ঠ বেদশাস্ত্রেষু পঠ্যতে ॥ ২৪৩.৬ ॥
প্রমাণং যচ্চ বেদোক্তং শাস্ত্রোক্তং যচ্চ পঠ্যতে ।
বেদশাস্ত্রপ্রমাণং চ প্রমাণং তৎসনাতনম্ ॥ ২৪৩.৭ ॥
এবমেবাভিসম্বন্ধৌ নিত্যং প্রকৃতিপূরুষৌ ।
যচ্চাপি ভগবংস্তস্মান্মোক্ষধর্মো ন বিদ্যতে ॥ ২৪৩.৮ ॥
অথবাঽনন্তরকৃতং কিংচিদেব নিদর্শনম্ ।
তন্মমাঽঽচক্ষ্ব তত্ত্বেন প্রত্যক্ষো হ্যসি সর্বদা ॥ ২৪৩.৯ ॥
মোক্ষকামা বয়ং চাপি কাঙ্ক্ষামো যদনাময়ম্ ।
অজেয়মজরং নিত্যমতীন্দ্রিয়মনীশ্বরম্ ॥ ২৪৩.১০ ॥
বসিষ্ঠ উবাচ
যদেতদুক্তং ভবতা বেদশাস্ত্রনিদর্শনম্ ।
এবমেতদ্যতা বক্ষ্যে তত্ত্বগ্রাহী যথা ভবান্ ॥ ২৪৩.১১ ॥
ধার্যতে হি ৎবায়া গ্রন্থ উভয়োর্বেদশাস্ত্রয়োঃ ।
ন চ গ্রন্থস্য তত্ত্বজ্ঞো যথাতত্ত্বং নরেশ্বর ॥ ২৪৩.১২ ॥
যো হি বেদে চ শাস্ত্রে চ গ্রান্থধারণতৎপরঃ ।
ন চ গ্রন্তার্থতত্ত্বজ্ঞস্তস্য তদ্ধারণং বৃথা ॥ ২৪৩.১৩ ॥
ভারং স বহতে তস্য গ্রন্থস্যার্থং ন বেত্তি যঃ ।
যস্তু গ্রন্থার্থতত্ত্বজ্ঞো নাস্য গ্রন্থাগমো বৃথা ॥ ২৪৩.১৪ ॥
গ্রন্থস্যার্থং স পৃষ্টস্তু মাদৃশো বক্তুমর্হতি ।
যথাতত্ত্বাভিগমনাদর্থং তস্য স বিন্দতি ॥ ২৪৩.১৫ ॥
ন যঃ সমুৎসুকঃ কশ্চিদ্গ্রন্থার্থং স্থূলবুদ্ধিমান্ ।
স কথং মন্দবিজ্ঞানো গ্রন্থং বক্ষ্যতি নির্ণয়াৎ ॥ ২৪৩.১৬ ॥
অজ্ঞাৎবা গ্রন্থতত্ত্বানি বাদং যঃ কুরুতে নরঃ ।
লোভাদ্বাঽপ্যথবা দম্ভাৎস পাপী নরকং ব্রজেৎ ॥ ২৪৩.১৭ ॥
নির্ণয়ং চাপি চ্ছিদ্রাত্মা ন তদ্বক্ষ্যতি তত্ত্বতঃ ।
সোঽপীহাস্যার্থতত্ত্বজ্ঞো যস্মান্নৈবাঽঽত্মবানপি ॥ ২৪৩.১৮ ॥
তস্মাত্ত্বং শৃণু রাজেন্দ্র যথৈতদনুদৃশ্যতে ।
যথা তত্ত্বেন সাংখ্যেষু যোগেষু চ মহাত্মসু ॥ ২৪৩.১৯ ॥
যদেব যোগাঃ পশ্যন্তি সাংখ্যং তদনুগম্যতে ।
একং সাংখ্যাং চ যোগং চ যঃ যপশ্যতি স বুদ্ধিমান্ ॥ ২৪৩.২০ ॥
ৎবঙ্মাংসং রুধিরং মেদঃ পিত্তং মজ্জাঽস্থি স্নায়ু চ ।
এতদৈন্দ্রিয়কং তাত যদ্ভবানিত্থমাত্থ মাম্ ॥ ২৪৩.২১ ॥
দ্রব্যাদ্দ্রব্যস্য নির্বৃত্তিরিন্দ্রিয়াদিন্দ্রিয়ং তথা ।
দেহাদ্দেহমবাপ্নোতি বীজাদ্বীজং তথৈব চ ॥ ২৪৩.২২ ॥
নিরিন্দ্রিয়স্য বীজস্য নির্দ্রব্যস্যাপি দেহিনঃ ।
কথং গুণা ভবিষ্যন্তি নির্গুণৎবান্মহাত্মনঃ ॥ ২৪৩.২৩ ॥
গুণা গুণেষু জায়ন্তে তত্রৈব বিরমন্তি চ ।
এবং গুণাঃ প্রকৃতিজা জায়ন্তে ন চ যান্তি চ ॥ ২৪৩.২৪ ॥
ৎবঙ্মাংসং রুধিরং মেদঃ পিত্তং মজ্জাঽস্তি স্নায়ু চ ।
অষ্টৌ তান্যথ শুক্রেণ জানীহি প্রাকৃতেন বৈ ॥ ২৪৩.২৫ ॥
পুমাংশ্চৈবাপুমাংস্চৈব স্ত্রীলিঙ্গং প্রাকৃতং স্মৃতম্ ।
বায়ুরেষ পুমাংশ্চৈব রস ইত্যভিধীয়তে ॥ ২৪৩.২৬ ॥
অলিঙ্গা প্রকৃতির্লিঙ্গৈরুপলভ্যতি সাঽঽত্মজৈঃ ।
যথা পুষ্পফলৈর্নিত্যং মূর্তং চামূর্তয়স্তথা ॥ ২৪৩.২৭ ॥
এবমপ্যনুমানেন স লিঙ্গমুপলভ্যতে ।
পঞ্চবিংশতিকস্তাত লিঙ্গেষু নিয়তাত্মকঃ ॥ ২৪৩.২৮ ॥
অনাদিনিধনোঽনন্তঃ সর্বদর্শনকেবলঃ ।
কেবলং ৎবভিমানিৎবাদ্গুণেষু গুণ উচ্যতে ॥ ২৪৩.২৯ ॥
গুণা গুণবতঃ সন্তি নির্গুণস্য কুতো গুণাঃ ।
তস্মাদেবং বিজানন্তি যে জনা গুণদর্শিনঃ ॥ ২৪৩.৩০ ॥
যদা ৎবেষ গুণানেতান্প্রাকৃতানভিমন্যতে ।
তদা স গুণবানেব গুণভেদান্প্রপশ্যতি ॥ ২৪৩.৩১ ॥
যত্তদ্বুদ্ধেঃ পরং প্রাহুঃ সাংখ্যযোগং চ সর্বশঃ ।
বুধ্যমানং মহাপ্রাজ্ঞাঃ প্রবুদ্ধপরিবর্জনাৎ ॥ ২৪৩.৩২ ॥
অপ্রবুদ্ধং যথা ব্যক্তং স্বগুণৈঃ প্রাহুরীশ্বরম্ ।
নির্গুণং চেশ্বরং নিত্যমধিষ্ঠাতারমেব চ ॥ ২৪৩.৩৩ ॥
প্রকৃতেশ্চ গুণানাং চ পঞ্চবিংশতিকং বুধাঃ ।
সাংখ্যযোগে চ কুশলা বুধ্যন্তে পরমৈষিণঃ ॥ ২৪৩.৩৪ ॥
যদা প্রবুদ্ধমব্যক্তমবস্থাত(প)ননী(ভী)রবঃ ।
বুধ্যমানং ন বুধ্যন্তেঽবগচ্ছন্তি সমং তদা ॥ ২৪৩.৩৫ ॥
এতন্নদর্শনং সম্যঙ্ন সম্যগনুদর্শনম্ ।
বুধ্যমানং প্রবুধ্যন্তে দ্বাভ্যাং পৃথগরিংদম ॥ ২৪৩.৩৬ ॥
পরস্পরেণৈতদুক্তং ক্ষরাক্ষরনিদর্শনম্ ।
একৎবদর্শনং চাস্য নানাৎবং চাস্য দর্শনম্ ॥ ২৪৩.৩৭ ॥
পঞ্চবিংশতিনিষ্ঠোঽয়ং তদা সম্যক্প্রচক্ষতে ।
একৎবদর্শনং চাস্য নানাৎবং চাস্য দর্শনম্ ॥ ২৪৩.৩৮ ॥
তত্ত্ববিত্তত্ত্বয়োরেব পৃথগেতন্নিদর্শনম্ ।
পঞ্চবিংসতিভিস্তত্ত্বং তত্ত্বমাহুর্মনীষিণঃ ॥ ২৪৩.৩৯ ॥
নিস্তত্ত্বং পঞ্চবিংশস্য পরমাহুর্মষিণঃ ।
বর্জ্যস্য বর্জ্যমাচারং তত্ত্বং তত্ত্বাৎসনাতনম্ ॥ ২৪৩.৪০ ॥
করালজনক উবাচ
নানাৎবৈকৎবমিত্যুক্তং ৎবয়ৈতদ্দ্বিজসত্তম ।
পশ্যতস্তদ্বি সংদিগ্ধমেতয়োর্বৈ নিদর্শনম্ ॥ ২৪৩.৪১ ॥
তথা বুদ্ধপ্রবুদ্ধাভ্যাং বুধ্যমানস্য চানঘ ।
স্থূলবুদ্ধ্যা ন পশ্যামি তত্ত্বমেতন্ন সংশয়ঃ ॥ ২৪৩.৪২ ॥
অক্ষরক্ষরয়োরুক্তং ৎবয়া যদপি কারণম্ ।
তদপ্যস্থিরবুদ্ধিৎবাৎপ্রনষ্টমিব মেঽনঘ ॥ ২৪৩.৪৩ ॥
তদেতচ্ছ্রোতুমিচ্ছামি নানাৎবৈকৎবদর্শনম্ ।
দ্বংদ্বং চৈবানিরুদ্ধং চ বুধ্যমানং চ তত্ত্বতঃ ॥ ২৪৩.৪৪ ॥
বিদ্যাবিদ্যে চ ভগবন্নক্ষরং ক্ষরমেব চ ।
সাংখ্যযোগং চ কৃৎস্নেন বুদ্ধাবুদ্ধিং পৃথক্পৃথক্ ॥ ২৪৩.৪৫ ॥
বসিষ্ঠ উবাচ
হন্ত তে সম্প্রবক্ষ্যামি যদেতদনুপৃচ্ছসি ।
যোগকৃত্যং মহারাজ পৃথগেব শৃণুষ্ব মে ॥ ২৪৩.৪৬ ॥
যোগকৃত্যং তু যোগানাং ধ্যানমেব পরং বলম্ ।
তচ্চাপি দ্বিবিধং ধ্যানমাহুর্বিদ্যাবিদো জনাঃ ॥ ২৪৩.৪৭ ॥
একগ্রতা চ মনসঃ প্রাণায়ামস্তথৈব চ ।
প্রাণায়ামস্তু সগুণো নির্গুণো মানসস্তথা ॥ ২৪৩.৪৮ ॥
মূত্রোৎসর্গে পুরীষে চ ভোজনে চ নরাধিপ(?) ।
দ্বিকালং নোপভৃঞ্জীত শেষং ভুঞ্জীত তৎপরঃ ॥ ২৪৩.৪৯ ॥
ইন্দ্রিয়াণীন্দ্রিয়ার্থেভ্যো নিবর্ত্য মনসা মুনিঃ ।
দশদ্বাদশভির্বাঽপি চতুর্বিংশাৎপরং যতঃ ॥ ২৪৩.৫০ ॥
স চোদনাভির্মতিমান্নাত্মানং চোদয়েদথ ।
তিষ্ঠন্তমজরং তং তু যত্তদুক্তং মনীষিভিঃ ॥ ২৪৩.৫১ ॥
বিশ্বাত্মা সততং জ্ঞেয় ইত্যেবমনুসুশ্রুম ।
দ্রব্যং হ্যহীনমনসো নান্যথেতি বিনিশ্চয়ঃ ॥ ২৪৩.৫২ ॥
বিমুক্তঃ সর্বসঙ্গেভ্যো লবাহারো জিতেন্দ্রিয়ঃ ।
পূর্বরাত্রে পার্ধে চ ধারয়ীত মনো হৃদি ॥ ২৪৩.৫৩ ॥
স্থিরীকৃত্যেন্দ্রিয়গ্রামং মনসা মিথিলেশ্বর ।
মনো বুদ্ধ্যা স্থিরং কৃৎবা পাষাণ ইব নিশ্চলঃ ॥ ২৪৩.৫৪ ॥
স্থাণুবচ্চাপ্যকম্প্যঃ স্যাদ্দারুবচ্চাপি নিশ্চলঃ ।
বুদ্ধ্যা বিধিবিধানজ্ঞাস্ততো যুক্তং প্রচক্ষতে ॥ ২৪৩.৫৫ ॥
ন শৃণোতি ন চাঽঽঘ্রাতি ন চ পশ্যতি কিংচন ।
ন চ সপর্শং বিজানাতি ন চ সংকল্পতে মনঃ ॥ ২৪৩.৫৬ ॥
ন চাপি মন্যতে কিংচিন্ন চ বুধ্যেত কাষ্ঠবৎ ।
তদা প্রকৃতিমাপন্নং যুক্তমাহুর্মনীষিণঃ ॥ ২৪৩.৫৭ ॥
ন ভাতি হি যথা দীপো দীপ্তিস্তদ্বচ্চ দৃশ্যতে ।
নিলিঙ্গস্চাধশ্চোর্ধ্বং চ তির্যগ্গতিমবাপ্নুয়াৎ ॥ ২৪৩.৫৮ ॥
তদা তদুপপন্নশ্চ যস্মিন্দৃষ্টে চ কথ্যতে ।
হৃদয়স্থোঽন্তরাত্মেতি জ্ঞেয়ো জ্ঞস্তাত মদ্বিধৈঃ ॥ ২৪৩.৫৯ ॥
নির্ধূম ইব সপ্তার্চিরাদিত্য ইব রশ্মিবান্ ।
বৈদ্যুতোঽগ্নিরিবাঽকাশে পস্যত্যাত্মানমাত্মনি ॥ ২৪৩.৬০ ॥
যং পস্যন্তি মহাত্মানো ধৃতিমন্তো মনীষিণঃ ।
ব্রাহ্মণা ব্রহ্ময়োনিস্থা হ্যযোনিমমৃতাত্মকম্ ॥ ২৪৩.৬১ ॥
তদেবাঽঽহুরণুভ্যোঽণু তন্মহদ্ভ্যো মহত্তরম্ ।
সর্বত্র সর্বভূতেষু ধ্রুবং তিষ্ঠন্ন দৃশ্যতে ॥ ২৪৩.৬২ ॥
বুদ্ধিদ্রব্যেণ দৃশ্যেন মনোদীপেন লোককৃৎ ।
মহতস্তমসস্ততাত পারে তিষ্ঠন্ন তামসঃ ॥ ২৪৩.৬৩ ॥
তমসো দূর ইত্যুক্তস্তত্ত্বজ্ঞৈর্বেদপারগৈঃ ।
বিমলো বিমতশ্চৈব নির্লিঙ্গোঽলিঙ্গসংজ্ঞকঃ ॥ ২৪৩.৬৪ ॥
যোগ এষ হি লোকানাং কিমন্যদ্যোগলক্ষণম্ ।
এবং পশ্যন্প্রপশ্যেন আত্মানমজরং পরম্ ॥ ২৪৩.৬৫ ॥
যোগদর্শনমেতাবদুক্তং তে তত্ত্বতো ময়া ।
সাংখ্যজ্ঞানং প্রবক্ষ্যামি পরিসংখ্যানিদর্শনম্ ॥ ২৪৩.৬৬ ॥
অব্যক্তমাহুঃ প্রখ্যানং পরাং প্রকৃতিমাত্মনঃ ।
তস্মান্মহাৎসমুৎপন্নং দ্বিতীয়ং রাজসত্তম ॥ ২৪৩.৬৭ ॥
অহংকারস্তু মহতস্তৃতীয় ইতি নঃ শ্রুতম্ ।
পঞ্চভূতান্যহংকারাদাহুঃ সাংখ্যাত্মদর্শিনঃ ॥ ২৪৩.৬৮ ॥
এতাঃ প্রকৃতয়স্ত্বষ্টৌ বিকারাশ্চাপি ষোডশ ।
পঞ্চ চৈব বিশেষাশ্চ তথা পঞ্চেন্দ্রিয়াণি চ ॥ ২৪৩.৬৯ ॥
এতাবদেব তত্ত্বানাং সাংখ্যমাহুর্মনীষিণঃ ।
সাংখ্যে সাংখ্যবিধানজ্ঞা নিত্যং সাংখ্যপথে স্থিতাঃ ॥ ২৪৩.৭০ ॥
যস্মাদ্যদভিজায়েত তত্তত্রৈব প্রলীয়তে ।
লীয়ন্তে প্রতিলোমানি গৃহ্যন্তে চান্তরাত্মনা ॥ ২৪৩.৭১ ॥
আনুলোম্যেন জায়ন্তে লীয়ন্তে প্রতিলোমতঃ ।
গুণা গুণেষু সততং সাগরস্যোর্ময়ো যথা ॥ ২৪৩.৭২ ॥
সর্গপ্রলয় এতাবান্প্রকৃতের্নৃপসত্তম ।
একৎবং প্রলয়ে চাস্য বহুৎবং চ তথা সৃজি ॥ ২৪৩.৭৩ ॥
এবমেব চ রাজেন্দ্র বিজ্ঞেয়ং জ্ঞানকোবিদৈঃ ।
অধিষ্ঠাতারমব্যক্তমস্যাপ্যেতন্নিদর্শনম্ ॥ ২৪৩.৭৪ ॥
একৎবং চ বহুৎবং চ প্রকৃতেরনুতত্ত্ববান্ ।
এক্তংব প্রলয়ে চাস্য বহুৎবং চ প্রবর্তনাৎ ॥ ২৪৩.৭৫ ॥
বহুলাঽঽত্মা রাজেন্দ্র প্রোচ্যতে যতিসত্তমৈঃ ।
অধিষ্ঠানাদধিষ্ঠাতা ক্ষেত্রাণামিতি নঃ শ্রুতম্ ॥ ২৪৩.৭৬ ॥
অধিষ্ঠাতেতি রাজেন্দ্র প্রোচ্যতে যতিসত্তমৈঃ ।
অধিষ্ঠানাদধিষ্ঠাতা ক্ষেত্রাণামিতি নঃশ্রুতম্ ॥ ২৪৩.৭৭ ॥
ক্ষেত্রং জানাতি চাব্যক্তং জ্ঞেত্রজ্ঞ ইতি চোচ্যতে ।
অব্যক্তিকে পুরে শেতে পুরুষশ্চেতি কথ্যতে ॥ ২৪৩.৭৮ ॥
অন্যদেব চ ক্ষেত্রং স্যাদন্যঃ ক্ষেত্রজ্ঞ উচ্যতে ।
ক্ষেত্রমব্যক্ত ইত্যুক্তং জ্ঞাতারং পঞ্চবিংশকম্ ॥ ২৪৩.৭৯ ॥
অন্যদেব চ জ্ঞানং স্যাদন্যজ্জ্ঞেয়ং তদুচ্যতে ।
জ্ঞানমব্যক্তমিত্যুক্তং জ্ঞেয়ো বৈ পঞ্চবিংশকম্ ॥ ২৪৩.৮০ ॥
অব্যক্তং ক্ষেত্রমিত্যুক্তং তথা সত্ত্বং তথেশ্বরম্ ।
অনীশ্বরমতত্ত্বং চ তত্ত্বং তৎপঞ্চবিংশকম্ ॥ ২৪৩.৮১ ॥
সাংক্যদর্শনমেতাবৎপরিসংখ্যা ন বিদ্যতে ।
সংখ্যাং প্রকুরুতে চৈব প্রকৃতিং চ প্রবক্ষ্যতে ॥ ২৪৩.৮২ ॥
চৎবারিংশচ্চতুর্বিংশৎপ্রতিসংখ্যায় তত্ত্বতঃ ।
সংখ্যা সহস্রকৃত্যা তু নিস্তত্ত্বঃ পঞ্চবিংশকঃ ॥ ২৪৩.৮৩ ॥
পঞ্চবিংশৎপ্রবুদ্ধাত্মা বুধ্যমান ইতি শ্রুতঃ ।
যদা বুধ্যতি আত্মানং তদা ভবতি কেবলঃ ॥ ২৪৩.৮৪ ॥
সম্যগ্দর্শনমেতাবদ্ভাষিতং তব তত্ত্বতঃ ।
এবমেতদ্বিজানন্তঃ সাম্যতাং প্রতিয়ান্ত্যুত ॥ ২৪৩.৮৫ ॥
সম্যঙ্নিদর্শনং নাম প্রত্যক্ষং প্রকৃতেস্তথা ।
গুণবত্ত্বাদ্যথৈতানি নির্গুণেভ্যস্তথা ভবেৎ ॥ ২৪৩.৮৬ ॥
সম্যঙ্নিদর্শনং নাম প্রত্যক্ষং প্রকৃতেস্তথা ।
গুণবত্ত্বাদ্যথৈতানি নির্গুণেভ্যস্তথা ভবেৎ ॥ ২৪৩.৮৭ ॥
পশ্যন্ত্যমতয়ো যে নচ সম্যক্তেষু চ দর্শনম্ ।
তে ব্যক্তিং প্রতিপদ্যন্তে পুনঃ পুনররিংদম ॥ ২৪৩.৮৮ ॥
সর্বমেতদ্বিজানন্তো ন সর্বস্য প্রবোধনাৎ ।
ব্যক্তিভূতা ভবিষ্যন্তি ব্যক্তস্যৈবানুবর্তনাৎ ॥ ২৪৩.৮৯ ॥
সর্বমব্যক্তমিত্যুক্তমসর্বঃ পঞ্চবিংশকঃ ।
য এবমভিজানন্তি ন ভয়ং তেষু বিদ্যতে ॥ ২৪৩.৯০ ॥
ইতি শ্রীমহাপুরাণে আদিব্রাহ্মে বসিষ্ঠকরালজনকসংবাদে
ত্রিচৎবারিংশদধিকদ্বিশততমোঽধ্যায়ঃ ॥ ২৪৩ ॥
অধ্যায়ঃ ২৪৪ (১৩৬)
বিদ্যাবিদ্যযোঃস্বরূপকথনম্
বসিষ্ঠ উবাচ
সাংখ্যদর্শনমেতাবদুক্তং তে নৃপসত্তম ।
বিদ্যাবিদ্যে ৎবিদানীং মে ৎবং নিবোধানুপূর্বশঃ ॥ ২৪৪.১ ॥
অভেদ্যমাহুরব্যক্তং সর্গপ্রলয়ধর্মিণঃ ।
সর্গপ্রলয় ইত্যুক্তং বিদ্যাবিদ্যে চ বিংশকঃ ॥ ২৪৪.২ ॥
পরস্পরস্য বিদ্যা বৈ তন্নিবোধানুপূর্বশঃ ।
যথোক্তমৃষিভিস্তাত সাংখ্যস্যাতিনিদর্শনম্ ॥ ২৪৪.৩ ॥
কর্মেন্দ্রিয়াণাং সর্বেষাং বিদ্যা বুদ্ধীন্দ্রিয়ং স্মৃতম্ ।
বুদ্ধীন্দ্রিয়াণাং চ তথা বিশষা ইতি নঃ শ্রুতম্ ॥ ২৪৪.৪ ॥
বিষয়াণাং মনস্তেষাং বিদ্যামাহুর্মনীষিণঃ ।
মনসঃ পঞ্চ ভূতানি বিদ্যা ইত্যভিচক্ষতে ॥ ২৪৪.৫ ॥
অহংকারস্তু ভূতানাং পঞ্চানাং নাত্র সংশয়ঃ ।
অহংকারস্তথা বিদ্যা বুদ্ধির্বিদ্যা নরেশ্বর ॥ ২৪৪.৬ ॥
বুদ্ধ্যা প্রকৃতিরব্যক্তং তত্ত্বানাং পরমেশ্বরঃ ।
বিদ্যা জ্ঞেয়া নরশ্রেষ্ঠ বিধিশ্চ পরমঃ স্মৃতঃ ॥ ২৪৪.৭ ॥
অব্যক্তমপরং প্রাহুর্বিদ্যা বৈ পঞ্চবিংশকঃ ।
সর্বস্য সর্বমিত্যুক্তং জ্ঞেয়জ্ঞানস্য পারগঃ ॥ ২৪৪.৮ ॥
জ্ঞানমব্যক্তমিত্যুক্তং জ্ঞেয়ং বৈ পঞ্চবিংসকম্ ।
তথৈব জ্ঞানমব্যক্তং বিজ্ঞাতা পঞ্চবিংশকঃ ॥ ২৪৪.৯ ॥
বিদ্যাবিদ্যে তু তত্ত্বেন ময়োক্তে বৈ বিশেষতঃ ।
অক্ষরং চ ক্ষরং চৈব যদুক্তং তন্নিবোধ মে ॥ ২৪৪.১০ ॥
উভাবেতৌ ক্ষরাবুক্তৌ উভাবেতাবন(থা)ক্ষরৌ ।
কারণং তু প্রবক্ষ্যামি যথাজ্ঞানং তু জ্ঞানতঃ ॥ ২৪৪.১১ ॥
অনাদিনিধনাবেতৌ উভাবেবেশ্বরৌ মতৌ ।
তত্তবসংজ্ঞাবুভাবেব প্রোচ্যতে জ্ঞানচিন্তকৈঃ ॥ ২৪৪.১২ ॥
সর্গপ্রলয়ধর্মিৎবাদব্যক্তং প্রাহুরব্যযম্ ।
তদেতদ্গুণসর্গায় বিকুর্বাণং পুনঃ পুনঃ ॥ ২৪৪.১৩ ॥
গুণানাং মহদাদীনামুৎপদ্যতি পরস্পরম্ ।
অধিষ্ঠানং ক্ষেত্রমাহুরেতদ্বৈ পঞ্চবিংশকম্ ॥ ২৪৪.১৪ ॥
যদন্তর্গুণজালং তু তদ্ব্যক্তাত্মনি সংক্ষিপেৎ ।
তদহং তদ্গুণৈস্তস্তু পঞ্চবিংশে বিলীয়তে ॥ ২৪৪.১৫ ॥
গুণা গুণেষু লীয়ন্তে তদেকা প্রকৃতির্ভবেৎ ।
ক্ষেত্রজ্ঞোঽপি তদা তাবৎক্ষেত্রজ্ঞঃ সম্প্রণীয়তে ॥ ২৪৪.১৬ ॥
যদাঽক্ষরং প্রকৃতির্যং গচ্ছতে গুণসংজ্ঞিতা ।
নির্গুণৎবং চ বৈ দেহে গুণেষু পরিবর্তনাৎ ॥ ২৪৪.১৭ ॥
এবমেব চ ক্ষেত্রজ্ঞঃ ক্ষেত্রজ্ঞানপরিক্ষয়াৎ ।
প্রকৃত্যা নির্গুণস্ত্বেষ ইত্যেবমনুশুশ্রুম ॥ ২৪৪.১৮ ॥
ক্ষরো ভবত্যেষ যদা গুণবতী গুণেষ্বথ ।
প্রকৃতিং ৎবথ জনাতি নির্গুণৎবং তথাত্মনঃ ॥ ২৪৪.১৯ ॥
তথা বিশুদ্ধো ভবতি প্রকৃতে পরিবর্জনাৎ ।
অন্যোঽহমন্যেয়মিতি যদা বুধ্যতি বুদ্ধিমান্ ॥ ২৪৪.২০ ॥
তদৈষোঽব্যথতামেতি ন চ মিশ্রৎবমাব্রজেৎ ।
প্রকৃত্যা চৈষ রাজেন্দ্র মিশ্রোঽন্যোঽন্যস্য দৃশ্যতে ॥ ২৪৪.২১ ॥
যদা তু গুণজালং তৎপ্রাকৃতং বিজুগুপ্সতে ।
পশ্যতে চ পরং পশ্যংস্তদা পশ্যংস্তদা পশ্যন্নু সংসৃজেৎ ॥ ২৪৪.২২ ॥
কিং ময়া কৃতমেতাবদ্যোঽহং কালনিমজ্জনঃ ।
যথা মৎস্যো হ্যভিজ্ঞানাদনুবর্তিতবাঞ্জলম্ ॥ ২৪৪.২৩ ॥
অহমেব হি সংমোহাদন্যমন্যং জনাজ্জনম্ ।
মৎস্যো যথোদকজ্ঞানাদনুবর্তিতবানিহ ॥ ২৪৪.২৪ ॥
মৎস্যোঽন্যৎবমথাজ্ঞানাদুদকান্নাভিমন্যতে ।
আত্মানং তদবজ্ঞানাদন্যং চৈব ন বেদ্ম্যহম্ ॥ ২৪৪.২৫ ॥
মমাস্তু ধিক্কুবুদ্ধস্য যোঽহং মগ্ন ইমং পুনঃ ।
অনুবর্তিতবান্মোহাদন্যমন্যং জনাজ্জনম্ ॥ ২৪৪.২৬ ॥
অয়মনুভবেদ্বন্ধুরনেন সহ মে ভয়ম্ ।
সাম্যমেকৎবাতং যাতো যাদৃশস্তাদৃশস্ত্বহম্ ॥ ২৪৪.২৭ ॥
তুল্যতামিহ পশ্যামি সদৃশোঽহমনেন বৈ ।
অয়ং হি বিমলো ব্যক্তমহমীদৃশকস্তদা ॥ ২৪৪.২৮ ॥
যোঽহমজ্ঞানসংমোহাদজ্ঞয়া সম্প্রবৃত্তবান্ ।
সংসর্গাদতিসংসর্গাৎস্থিতঃ কালমিমং ৎবহম্ ॥ ২৪৪.২৯ ॥
সোঽহমেবং বশীভূতঃ কালমেতং ন বুদ্ধবান্ ।
উত্তমাধমমধ্যানাং তামহং কথমাবসে ॥ ২৪৪.৩০ ॥
সমানমায়যা চেহ সহবাসমহং কথম্ ।
গচ্ছাম্যবুদ্ধভাবৎবাদিহেদীনীং স্থিরো ব ॥ ২৪৪.৩১ ॥
সহবাসং ন যাস্যামি কালমেতং বিবঞ্চনাৎ ।
বঞ্চিতো হ্যনয়া যদ্ধি নির্বিকারো বিকারয়া ॥ ২৪৪.৩২ ॥
ন তত্তদপরাদ্দং স্যাদপরাধো হ্যযং মম ।
যোঽহমত্রভবং সক্তঃ পরাঙ্মুখমুপস্থিতঃ ॥ ২৪৪.৩৩ ॥
ততোঽস্মিন্বহুরূপোঽথ স্থিতো মূর্তিরমূর্তিমান্ ।
অমূর্তিশ্চাপ্যমূর্তাত্মা মমৎবেন প্রধর্ষিতঃ ॥ ২৪৪.৩৪ ॥
প্রকৃত্যা চ তয়া তেন তাসু তাস্বিহ যোনিষু ।
নির্মমস্য মমৎবেন বিকৃতং তাসু তাসু চ ॥ ২৪৪.৩৫ ॥
যোনিষু বর্তমানেন নষ্টসংজ্ঞেন চেতসা ।
সমতা ন ময়া কাচিদহংকারে কৃতা ময়া ॥ ২৪৪.৩৬ ॥
আত্মানং বহুধা কৃৎবা সোঽয়ং ভূয়ো যুনক্তি মাম্ ।
ইদানীমববুদ্ধোঽস্মি নির্মমো নিরহংকৃতঃ ॥ ২৪৪.৩৭ ॥
মমৎবং মনসা নিত্যমহংকারকৃতাত্মকম্ ।
অপলগ্নামিমাং হিৎবা সংশ্রয়িষ্যে নিরাময়ম্ ॥ ২৪৪.৩৮ ॥
অনেন সাম্যং যাস্যামি নানয়াঽহমচেতসা ।
ক্ষেমং মম সহানেন নৈবৈকমনয়া সহ ॥ ২৪৪.৩৯ ॥
এবং পরমসংবোধাৎপঞ্চবিংশোঽনুবুদ্ধবান্ ।
অক্ষরৎবং নিগচ্ছতি ত্যক্ত্বা ক্ষরমনাময়ম্ ॥ ২৪৪.৪০ ॥
অব্যক্তং ব্যক্তধর্মাণং সগুণং নির্গুণং তথা ।
নির্গুণং প্রথমং দৃষ্ট্বা তাদৃগ্ভবতি মৈথিল ॥ ২৪৪.৪১ ॥
অক্ষরক্ষরয়োরেতদুক্তং তব নিদর্শনম্ ।
ময়েহ জ্ঞানসম্পন্নং যথা শ্রুতিনিদ্রশনাৎ ॥ ২৪৪.৪২ ॥
নিঃসংদিগ্ধং চ সূক্ষ্মং চ বিশুদ্ধং বিমলং তথা ।
প্রবক্ষ্যামি তু তে ভূয়স্তন্নিবোধ যথাশ্রুতম্ ॥ ২৪৪.৪৩ ॥
সাংখ্যযোগো ময়া প্রোক্তঃ শাস্ত্রদ্বয়নিদর্শনাৎ ।
যদেব সাংক্যশাস্ত্রোক্তং যোগদর্শনমেব তৎ ॥ ২৪৪.৪৪ ॥
প্রবোধনপরং জ্ঞানং সাংখ্যানামবনীপতে ।
বিস্পষ্টং প্রোচ্যতে তত্র শিষ্যাণাং হিতকাম্যযা ॥ ২৪৪.৪৫ ॥
বৃহচ্চৈবমিদং শাস্ত্রমিত্যাহুর্বিদুষো জনাঃ ।
অস্মিংশ্চ শাস্ত্রে যোগানাং পুনর্ভবপুরঃসরম্ ॥ ২৪৪.৪৬ ॥
পঞ্চবিংশাৎপরং তত্ত্বং পঠ্যতে চ নরাধিপ ।
সাংখ্যানাং তু পরং তত্ত্বং যথাবদনুবর্ণিতম্ ॥ ২৪৪.৪৭ ॥
বুদ্ধমপ্রতিবুদ্ধং চ বুধ্যমানং চ তত্ত্বতঃ ।
বুধ্যমানং চ বুদ্ধৎবং প্রাহুর্যোগনিদর্শনম্ ॥ ২৪৪.৪৮ ॥
বুদ্ধমপ্রতিবুদ্ধং চ বুধ্যমানং চ তত্ত্বতঃ ।
বুধ্যমানং চ বুদ্ধৎবং প্রাহুর্যোগনিদর্শনম্ ॥ ২৪৪.৪৯ ॥
ইতি শ্রীমহাপুরাণে আদিব্রাহ্মে বসিষ্ঠকরালজনকসংবাদে
চতুশ্চৎবারিংশদধিকদ্বিশততমোঽধ্যায়ঃ ॥ ২৪৪ ॥
অধ্যায়ঃ ২৪৫ (১৩৭)
অজস্যাপি বিক্রিয়যা নানাভবনম্
বসিষ্ঠ উবাচ
অপ্রবুদ্ধমথাব্যক্তমিমং গুণনিধিং সদা ।
গুণানাং ধার্যতাং তত্ত্বং সৃজত্যাক্ষিপতে তথা ॥ ২৪৫.১ ॥
অজো হি ক্রীডয়া ভূপ বিক্রিয়াং প্রাপ্ত ইত্যুত ।
আত্মানং বহুধা কৃৎবা নানেন প্রতিচক্ষতে ॥ ২৪৫.২ ॥
এতদেবং বিকুর্বাণো বুধ্যমানো ন বুধ্যতে ।
গুণানাচরতে হ্যেষ সৃজত্যাক্ষিপতে তথা ॥ ২৪৫.৩ ॥
অব্যক্তবোধনাচ্চৈব বুধ্যমানং বদন্ত্যপি ।
ন ৎবেবং বুধ্যতেঽব্যক্তং সগুণং তাত নির্গুণম্ ॥ ২৪৫.৪ ॥
কদাচিত্ত্বেব খল্বেতত্তদাহুঃ প্রতিবুদ্ধকম্ ।
বুধ্যতে যদি চাব্যক্তমেতদ্বৈ পঞ্চবিংশকম্ ॥ ২৪৫.৫ ॥
বুধ্যমানো ভবত্যেষ মমাত্মক ইতি ক্ষুতঃ ।
অন্যোন্যপ্রতিবুদ্ধেন বদন্ত্যব্যক্তমচ্যুতম্ ॥ ২৪৫.৬ ॥
অব্যক্তবোধনাচ্চৈব বুধ্যমানং বদন্ত্যুত ।
পঞ্চবিংশং মহাত্মনাং ন চাসাবপি বুধ্যতে ॥ ২৪৫.৭ ॥
ষড্বিংশং বিমলং বুদ্ধমপ্রমেয়ং মহাদ্যুতে ।
সততং পঞ্চবিংশং তু চতুর্বিংশং বিবুধ্যতে ॥ ২৪৫.৮ ॥
দৃশ্যাদৃশ্যে হ্যনুগততৎস্বভাবে মহাদ্যুতে ।
অব্যক্তং চৈব তদ্ব্রহ্ম বুধ্যতে তাত কেবলম্ ॥ ২৪৫.৯ ॥
পঞ্চবিংশং চতুর্বিংশমাত্মানমনুপশ্যতি ।
বুধ্যমানো যদাঽঽত্মানমন্যাঽহমিতি মন্যতে ॥ ২৪৫.১০ ॥
তদা প্রকৃতিমানেষ ভবত্যব্যক্তলোচনঃ ।
বুধ্যতে চ পরাং বুদ্ধিং বিশুদ্ধামমলাং যথা(দা) ॥ ২৪৫.১১ ॥
ষড্বিংশং রাজশার্দূল তদা বুদ্ধঃ কৃতো ব্রজেৎ ।
ততস্ত্যজতি সোঽব্যক্তসর্গপ্রলয়ধর্মিণম্ ॥ ২৪৫.১২ ॥
নির্গুণাং প্রকৃতিং বেদ গুণয়ুক্তামচেতনাম্ ।
ততঃ কেবলধর্মাঽসৌ ভবত্যব্যক্তদর্শনাৎ ॥ ২৪৫.১৩ ॥
কেবলেন সমাগম্য বিমুক্তাত্মানমাপ্নুয়াৎ ।
এতত্তু তত্ত্বমিত্যাহুর্নিস্তত্ত্বমজরামরম্ ॥ ২৪৫.১৪ ॥
তত্ত্বসংশ্রবণাদেব তত্ত্বজ্ঞো জায়তে নৃপ ।
পঞ্চবিংশতিতত্ত্বানি প্রবদন্তি মনীষিণঃ ॥ ২৪৫.১৫ ॥
ন চৈব তত্ত্ববাংস্তাত সংসারেষু নিমজ্জতি ।
এষামুপৈতি তত্ত্বং হি ক্ষিপ্রং বুধ্যস্ব লক্ষণম্ ॥ ২৪৫.১৬ ॥
ষড্বিংশোঽয়মিতি প্রাজ্ঞো গৃহ্যমাণোঽজরামরঃ ।
কেবলেন বলেনৈব সমতাং যাত্যসংশয়ম্ ॥ ২৪৫.১৭ ॥
ষড্বিংশেন প্রবুদ্ধেন বুধ্যমানোঽপ্যবুদ্ধিমান্ ।
এতন্নানাৎবমিত্যুক্তং সাংখ্যশ্রুতিনিদর্শনাৎ ॥ ২৪৫.১৮ ॥
চেতনেন সমেতস্য পঞ্চবিংশতিকস্য হ ।
একৎবং বৈ ভবেত্তস্য যদা বুদ্ধ্যাঽনুবুধ্যতে ॥ ২৪৫.১৯ ॥
বুধ্যমানেন বুদ্ধেন সমতাং যাতি মৈতিল ।
সঙ্গধর্মা ভবত্যেষ নিঃসঙ্গাত্মা নরাধিপ ॥ ২৪৫.২০ ॥
নিঃসঙ্গাত্মানমাসাদ্য ষড্বিংশং কর্মজ বিদুঃ ।
বিভুস্ত্যজতি চাব্যক্তং যদা ৎবেতদ্বিবুধ্যতে ॥ ২৪৫.২১ ॥
চতুর্বিংশমগাধং চ ষড্বিংশস্য প্রবোধনাৎ ।
এষ হ্যপ্রতিবুদ্ধশ্চ বুধ্যমানস্তু তেঽনঘ ॥ ২৪৫.২২ ॥
উক্তো বুদ্ধশ্চ তত্ত্বেন যথাশ্রুতিনিদর্শনাৎ ।
মশকোদুম্বরে যদ্বদন্যৎবং তদ্বদেতয়োঃ(কতা) ॥ ২৪৫.২৩ ॥
মৎস্যোদকং যথা তদ্বদন্যৎপমুপলভ্যতে ।
এবমেব চ গন্তব্যং নানাৎবৈকৎবমেতয়োঃ ॥ ২৪৫.২৪ ॥
এতাবন্মোক্ষ ইত্যুক্তো জ্ঞানবিজ্ঞানসংজ্ঞিতঃ ।
পঞ্চবিংশতিকস্যাঽঽশু যোঽয়ং দেহে প্রবর্ততে ॥ ২৪৫.২৫ ॥
এষ মোক্ষয়িতব্যেতি প্রাহুরব্যক্তগোচরাৎ ।
সোঽয়মেবং বিমুচ্যেত নান্যথেতি বিনিশ্চয়ঃ ॥ ২৪৫.২৬ ॥
পরশ্চ পরধর্মা চ ভবত্যেব সমেত্য বৈ ।
বিশুদ্ধধর্মাশুদ্ধেন নাশুদ্ধেন চ বুদ্ধিমান্ ॥ ২৪৫.২৭ ॥
বিমুক্তধর্মা বুদ্ধেন সমেত্য পুরুষর্ষভ ।
বিয়োগধর্মিণা চৈব বিমুক্তাত্মা ভবত্যথ ॥ ২৪৫.২৮ ॥
বিমোক্ষিণা বিমোক্ষশ্চ সমেত্যেহ তথা ভবেৎ ।
শুচিকর্মা শুচিশ্চৈব ভবত্যমিতবুদ্ধিমান্ ॥ ২৪৫.২৯ ॥
বিমলাত্মা চ ভবতি সমেত্য বিমলাত্মনা ।
কেবলাত্মা তথা চৈব কেবলেন সমেত্য বৈ ॥
স্বতন্ত্রশ্চ স্বতন্ত্রেণ স্বতন্ত্রৎবমবাপ্যতে ॥ ২৪৫.৩০ ॥
এতাবদেতৎকথিতং ময়া তে তথ্যং মহারাজ যথার্থতত্ত্বম্ ।
অমৎসরস্ত্বং প্রতিগৃহ্য বুদ্ধ্যা, সনাতনং ব্রহ্ম বিশুদ্ধমাদ্যম্ ॥ ২৪৫.৩১ ॥
তদ্বেদনিষ্ঠস্য জনস্য রাজন্, প্রদেয়মেতৎপরমং ৎবয়া ভবেৎ ।
বিধিৎসামানায় নিবোধকারকং, প্রবোধহেতোঃ প্রণতস্য শাসনম্ ॥ ২৪৫.৩২ ॥
ন দেয়মেতচ্চ যথাঽনৃতাত্মনে, শঠায় ক্লীবায় ন জিহ্মবুদ্ধয়ে ।
ন পণ্ডিতজ্ঞানপরোপতাপিনে, দেয়ং তথা শিষ্যবিবোধনায় ॥ ২৪৫.৩৩ ॥
শ্রদ্ধান্বিতায়াথ গুণান্বিতায়, পরাপবাদাদ্বিরতায় নিত্যম্ ।
বিশুদ্ধয়োগায় বুধায় চৈব, কৃপাবতেঽথ ক্ষমিণে হিতায় ॥ ২৪৫.৩৪ ॥
বিবিক্তশীলায় বিধিপ্রিয়যায়, বিবাদহীনায় বহুশ্রুতায় ।
বিনীতবেশায় নহৈতুকাত্মনে, সদৈব গৃহ্যং ৎবিদমেব দেয়ম্ ॥ ২৪৫.৩৫ ॥
এতৈর্গুণৈর্হীনতমে ন দেয়মেতৎপরং ব্রহ্ম বিশুদ্ধমাহুঃ ।
ন শ্রেয়সে যোক্ষ্যতি তাদৃশে কৃতং, ধর্মপ্রবক্তারমপাত্রদানাৎ ॥ ২৪৫.৩৬ ॥
পৃথ্বীমিমাং বা যদি রত্নপূর্ণাং,দদ্যাদদেয়ং ৎবিদমব্রতায় ।
জিতেন্দ্রিয়ায় প্রয়তায় দেয়ং, দেয়ং পরং তত্ত্ববিদে নরেন্দ্র ॥ ২৪৫.৩৭ ॥
করাল মা তে ভয়মস্তি কিংচিদেতচ্চ্রুতং ব্রহ্ম পরং ৎবয়াঽদ্য ।
যথাবদুক্তং পরমং বপিত্রং, বিশোকমত্যন্তমনাদিমধ্যম্ ॥ ২৪৫.৩৮ ॥
অগাধমেতদজরামরং চ, নিরাময়ং বীতভয়ং শিবং চ ।
সমীক্ষ্য মোহং পরবাদসংজ্ঞমেতস্য তত্ত্বার্থমিমং বিদিৎবা ॥ ২৪৫.৩৯ ॥
অবাপ্তমেতদ্ধি পুরা সনাতনাদ্ধিরণ্যগর্ভাদ্ধি ততো নরাধিপ ।
প্রসাদ্য যত্নেন তমুগ্রতেজসং, সনাতনং ব্রহ্ম যথা ৎবয়ৈতৎ ॥ ২৪৫.৪০ ॥
পৃষ্টস্ত্বয়া চাঽস্মি যথা নরেন্দ্র, তথা ময়েদং ৎবয়ি নোক্তমন্যৎ ।
যথাঽবাপ্নং ব্রহ্মণো মে নরেন্দ্র, মহাজ্ঞানং মোক্ষবিদাং পরায়ণম্ ॥ ২৪৫.৪১ ॥
এতদুক্তং পরং ব্রহ্ম যস্মান্নাঽবর্ততে পুনঃ ।
পঞ্চবিশং মুনিশ্রেষ্ঠা বসিষ্ঠেন যথা পুরা ॥ ২৪৫.৪২ ॥
পুনরাবৃত্তিমাপ্নোতি পরমং জ্ঞানমব্যযম্ ।
নাতি বুধ্যতি তত্ত্বেন বুধ্যমানোঽজরামরম্ ॥ ২৪৫.৪৩ ॥
এতন্নিঃশ্রেয়সকরং জ্ঞানং পরমং ময়া ।
কথিতং তত্ত্বতো বিপ্রাঃ শ্রুৎবা দেবর্ষিতো দ্বিজাঃ ॥ ২৪৫.৪৪ ॥
হিরণ্যগর্ভাদৃষিণা বসিষ্ঠেন সমাহৃতম্ ।
বসিষ্ঠাদৃষিসার্দূলো নারদোঽবাপ্তবানিদম্ ॥ ২৪৫.৪৫ ॥
নারদাদ্বিদিতং মহ্যমেতদুক্তং সনাতনম্ ।
মা শুচধ্বং মুনিশ্রেষ্ঠাঃ শ্রুৎবৈতৎপরমং পদম্ ॥ ২৪৫.৪৬ ॥
যেন ক্ষরাক্ষরে ভিন্নে ন ভয়ং তস্য বিদ্যতে ।
বিদ্যতে তু ভয়ং যস্য যো নৈনং বেত্তি তত্ত্বতঃ ॥ ২৪৫.৪৭ ॥
অবিজ্ঞানাচ্চ মূঢাত্মা পুনঃ পুনরুপদ্রবান্ ।
প্রেত্য জাতিসহস্রাণি মরণান্তান্যুপাশ্নুতে ॥ ২৪৫.৪৮ ॥
দেবলোকং তথা তির্যঙ্মানুষ্যমপি চাশ্নুতে ।
যদি বা মুচ্যতে বাঽপি তস্মাদজ্ঞানসাগরাৎ ॥ ২৪৫.৪৯ ॥
অজ্ঞানসাগরে ঘোরে হ্যব্যক্তাগাধ উচ্যতে ।
অহন্যহনি মজ্জন্তি যত্র ভূতানি ভো দ্বিজাঃ ॥ ২৪৫.৫০ ॥
তস্মাদগাধাদব্যক্তাদুপক্ষীণাৎসনাতনাৎ ।
তস্মাদ্যুয়ং বিরজসকা বিতমস্কাশ্চ ভো দ্বিজাঃ ॥ ২৪৫.৫১ ॥
এবং ময়া মুনিশ্রেষ্ঠাঃ সারাৎসারতরং পরম্ ।
কথিতং পরমং মোক্ষং যং জ্ঞাৎবা ন নিবর্ততে ॥ ২৪৫.৫২ ॥
ন নাস্তিকায় দাতব্য নাভক্তায় কদাচন ।
ন দুষ্টমতয়ে বিপ্রা ন শ্রদ্ধাবিমুখায় চ ॥ ২৪৫.৫৩ ॥
ইতি শ্রীমহাপুরাণে আদিব্রাহ্মে বসিষ্ঠকরালজনকসংবাদসমাপ্তিনিরূপণং নাম
পঞ্চৎবারিংশদধিকদ্বিশততমোঽধ্যায়ঃ ॥ ২৪৫ ॥
– Chant Stotra in Other Languages –
Vyasagita from Brahma Purana in Sanskrit – English – Bengali – Gujarati – Kannada – Malayalam – Odia – Telugu – Tamil