॥ Devi or Parvathisahasranamastotram Kannada Lyrics ॥
॥ ಶ್ರೀದೇವೀ ಅಥವಾ ಪಾರ್ವತಿಸಹಸ್ರನಾಮಸ್ತೋತ್ರಮ್ ಕೂರ್ಮಪುರಾಣಾನ್ತರ್ಗತಮ್ ॥
ಅಥ ದೇವೀಮಾಹಾತ್ಮ್ಯಮ್ ।
ಸೂತ ಉವಾಚ
ಇತ್ಯಾಕರ್ಣ್ಯಾಥ ಮುನಯಃ ಕೂರ್ಮರೂಪೇಣ ಭಾಷಿತಮ್ ।
ವಿಷ್ಣುನಾ ಪುನರೇವೈನಂ ಪ್ರಣತಾ ಹರಿಮ್ ॥ 12।1 ॥
ಋಷಯಃ ಊಚುಃ
ಕೈಷಾ ಭಗವತೀ ದೇವೀ ಶಂಕರಾರ್ದ್ಧಶರೀರಿಣೀ ।
ಶಿವಾ ಸತೀ ಹೈಮವತೀ ಯಥಾವದ್ಬ್ರೂಹಿ ಪೃಚ್ಛತಾಮ್ ॥ 12।2 ॥
ತೇಷಾಂ ತದ್ವಚನಂ ಶ್ರುತ್ವಾ ಮುನೀನಾಂ ಪುರುಷೋತ್ತಮಃ ।
ಪ್ರತ್ಯುವಾಚ ಮಹಾಯೋಗೀ ಧ್ಯಾತ್ವಾ ಸ್ವಂ ಪರಮಂ ಪದಮ್ ॥ 12।3 ॥
ಶ್ರೀಕೂರ್ಮ ಉವಾಚ
ಪುರಾ ಪಿತಾಮಹೇನೋಕ್ತಂ ಮೇರುಪೃಷ್ಠೇ ಸುಶೋಭನೇ ।
ರಹಸ್ಯಮೇತದ್ ವಿಜ್ಞಾನಂ ಗೋಪನೀಯಂ ವಿಶೇಷತಃ ॥ 12।4 ॥
ಸಾಂಖ್ಯಾನಾಂ ಪರಮಂ ಸಾಂಖ್ಯಂ ಬ್ರಹ್ಮವಿಜ್ಞಾನಮುತ್ತಮಮ್ ।
ಸಂಸಾರಾರ್ಣವಮಗ್ನಾನಾಂ ಜನ್ತೂನಾಮೇಕಮೋಚನಮ್ ॥ 12।5 ॥
ಯಾ ಸಾ ಮಾಹೇಶ್ವರೀ ಶಕ್ತಿರ್ಜ್ಞಾನರೂಪಾಽತಿಲಾಲಸಾ ।
ವ್ಯೋಮಸಂಜ್ಞಾ ಪರಾ ಕಾಷ್ಠಾ ಸೇಯಂ ಹೈಮವತೀ ಮತಾ ॥ 12।6 ॥
ಶಿವಾ ಸರ್ವಗತಾಽನಾನ್ತಾ ಗುಣಾತೀತಾತಿನಿಷ್ಕಲಾ ।
ಏಕಾನೇಕವಿಭಾಗಸ್ಥಾ ಜ್ಞಾನರೂಪಾಽತಿಲಾಲಸಾ ॥ 12।7 ॥
ಅನನ್ಯಾ ನಿಷ್ಕಲೇ ತತ್ತ್ವೇ ಸಂಸ್ಥಿತಾ ತಸ್ಯ ತೇಜಸಾ ।
ಸ್ವಾಭಾವಿಕೀ ಚ ತನ್ಮೂಲಾ ಪ್ರಭಾ ಭಾನೋರಿವಾಮಲಾ ॥ 12।8 ॥
ಏಕಾ ಮಾಹೇಶ್ವರೀ ಶಕ್ತಿರನೇಕೋಪಾಧಿಯೋಗತಃ ।
ಪರಾವರೇಣ ರೂಪೇಣ ಕ್ರೀಡತೇ ತಸ್ಯ ಸನ್ನಿಧೌ ॥ 12।9 ॥
ಸೇಯಂ ಕರೋತಿ ಸಕಲಂ ತಸ್ಯಾಃ ಕಾರ್ಯಮಿದಂ ಜಗತ್ ।
ನ ಕಾರ್ಯಂ ನಾಪಿ ಕರಣಮೀಶ್ವರಸ್ಯೇತಿ ಸೂರಯಃ ॥ 12।10 ॥
ಚತಸ್ರಃ ಶಕ್ತಯೋ ದೇವ್ಯಾಃ ಸ್ವರೂಪತ್ವೇನ ಸಂಸ್ಥಿತಾಃ ।
ಅಧಿಷ್ಠಾನವಶಾತ್ತಸ್ಯಾಃ ಶೃಣುಧ್ವಂ ಮುನಿಪುಂಗವಾಃ ॥ 12।11 ॥
ಶಾನ್ತಿರ್ವಿದ್ಯಾ ಪ್ರತಿಷ್ಠಾ ಚ ನಿವೃತ್ತಿಶ್ಚೇತಿ ತಾಃ ಸ್ಮೃತಾಃ ।
ಚತುರ್ವ್ಯೂಹಸ್ತತೋ ದೇವಃ ಪ್ರೋಚ್ಯತೇ ಪರಮೇಶ್ವರಃ ॥ 12।12 ॥
ಅನಯಾ ಪರಯಾ ದೇವಃ ಸ್ವಾತ್ಮಾನನ್ದಂ ಸಮಶ್ನುತೇ ।
ಚತುರ್ಷ್ವಪಿ ಚ ವೇದೇಷು ಚತುರ್ಮೂರ್ತಿರ್ಮಹೇಶ್ವರಃ ॥ 12।13 ॥
ಅಸ್ಯಾಸ್ತ್ವನಾದಿಸಂಸಿದ್ಧಮೈಶ್ವರ್ಯಮತುಲಂ ಮಹತ್ ।
ತತ್ಸಮ್ಬನ್ಧಾದನನ್ತಾಯಾ ರುದ್ರೇಣ ಪರಮಾತ್ಮನಾ ॥ 12।14 ॥
ಸೈಷಾ ಸರ್ವೇಶ್ವರೀ ದೇವೀ ಸರ್ವಭೂತಪ್ರವರ್ತಿಕಾ ।
ಪ್ರೋಚ್ಯತೇ ಭಗವಾನ್ ಕಾಲೋ ಹರಿಃ ಪ್ರಾಣೋ ಮಹೇಶ್ವರಃ ॥ 12।15 ॥
ತತ್ರ ಸರ್ವಮಿದಂ ಪ್ರೋತಮೋತಂಚೈವಾಖಿಲಂ ಜಗತ್ ।
ಸ ಕಾಲೋಽಗ್ನಿರ್ಹರೋ ರುದ್ರೋ ಗೀಯತೇ ವೇದವಾದಿಭಿಃ ॥ 12।16 ॥
ಕಾಲಃ ಸೃಜತಿ ಭೂತಾನಿ ಕಾಲಃ ಸಂಹರತೇ ಪ್ರಜಾಃ ।
ಸರ್ವೇ ಕಾಲಸ್ಯ ವಶಗಾ ನ ಕಾಲಃ ಕಸ್ಯಚಿದ್ ವಶೇ ॥ 12।17 ॥
ಪ್ರಧಾನಂ ಪುರುಷಸ್ತತ್ತ್ವಂ ಮಹಾನಾತ್ಮಾ ತ್ವಹಂಕೃತಿಃ ।
ಕಾಲೇನಾನ್ಯಾನಿ ತತ್ತ್ವಾನಿ ಸಮಾವಿಷ್ಟಾನಿ ಯೋಗಿನಾ ॥ 12।18 ॥
ತಸ್ಯ ಸರ್ವಜಗನ್ಮೂರ್ತಿಃ ಶಕ್ತಿರ್ಮಾಯೇತಿ ವಿಶ್ರುತಾ ।
ತದೇಯಂ ಭ್ರಾಮಯೇದೀಶೋ ಮಾಯಾವೀ ಪುರುಷೋತ್ತಮಃ ॥ 12।19 ॥
ಸೈಷಾ ಮಾಯಾತ್ಮಿಕಾ ಶಕ್ತಿಃ ಸರ್ವಾಕಾರಾ ಸನಾತನೀ ।
ವೈಶ್ವರೂಪಂ ಮಹೇಶಸ್ಯ ಸರ್ವದಾ ಸಮ್ಪ್ರಕಾಶಯೇತ್ ॥ 12।20 ॥
ಅನ್ಯಾಶ್ಚ ಶಕ್ತಯೋ ಮುಖ್ಯಾಸ್ತಸ್ಯ ದೇವಸ್ಯ ನಿರ್ಮಿತಾಃ ।
ಜ್ಞಾನಶಕ್ತಿಃ ಕ್ರಿಯಾಶಕ್ತಿಃ ಪ್ರಾಣಶಕ್ತಿರಿತಿ ತ್ರಯಮ್ ॥ 12।21 ॥
ಸರ್ವಾಸಾಮೇವ ಶಕ್ತೀನಾಂ ಶಕ್ತಿಮನ್ತೋ ವಿನಿರ್ಮಿತಾಃ ।
ಮಾಯಯೈವಾಥ ವಿಪ್ರೇನ್ದ್ರಾಃ ಸಾ ಚಾನಾದಿರನಶ್ವರಾಃ ॥ 12।22 ॥
ಸರ್ವಶಕ್ತ್ಯಾತ್ಮಿಕಾ ಮಾಯಾ ದುರ್ನಿವಾರಾ ದುರತ್ಯಯಾ ।
ಮಾಯಾವೀ ಸರ್ವಶಕ್ತೀಶಃ ಕಾಲಃ ಕಾಲಕಾರಃ ಪ್ರಭುಃ ॥ 12।23 ॥
ಕರೋತಿ ಕಾಲಃ ಸಕಲಂ ಸಂಹರೇತ್ ಕಾಲ ಏವ ಹಿ ।
ಕಾಲಃ ಸ್ಥಾಪಯತೇ ವಿಶ್ವಂ ಕಾಲಾಧೀನಮಿದಂ ಜಗತ್ ॥ 12।24 ॥
ಲಬ್ಧ್ವಾ ದೇವಾಧಿದೇವಸ್ಯ ಸನ್ನಿಧಿಂ ಪರಮೇಷ್ಠಿನಃ ।
ಅನನ್ತಸ್ಯಾಖಿಲೇಶಸ್ಯ ಶಂಭೋಃ ಕಾಲಾತ್ಮನಃ ಪ್ರಭೋಃ ॥ 12।25 ॥
ಪ್ರಧಾನಂ ಪುರುಷೋ ಮಾಯಾ ಮಾಯಾ ಚೈವಂ ಪ್ರಪದ್ಯತೇ ।
ಏಕಾ ಸರ್ವಗತಾನನ್ತಾ ಕೇವಲಾ ನಿಷ್ಕಲಾ ಶಿವಾ ॥ 12।26 ॥
ಏಕಾ ಶಕ್ತಿಃ ಶಿವೈಕೋಽಪಿ ಶಕ್ತಿಮಾನುಚ್ಯತೇ ಶಿವಃ ।
ಶಕ್ತಯಃ ಶಕ್ತಿಮನ್ತೋಽನ್ಯೇ ಸರ್ವಶಕ್ತಿಸಮುದ್ಭವಾಃ ॥ 12।27 ॥
ಶಕ್ತಿಶಕ್ತಿಮತೋರ್ಭೇದಂ ವದನ್ತಿ ಪರಮಾರ್ಥತಃ ।
ಅಭೇದಂಚಾನುಪಶ್ಯನ್ತಿ ಯೋಗಿನಸ್ತತ್ತ್ವಚಿನ್ತಕಾಃ ॥ 12।28 ॥
ಶಕ್ತಯೋ ಗಿರಜಾ ದೇವೀ ಶಕ್ತಿಮಾನಥ ಶಂಕರಃ ।
ವಿಶೇಷಃ ಕಥ್ಯತೇ ಚಾಯಂ ಪುರಾಣೇ ಬ್ರಹ್ಮವಾದಿಭಿಃ ॥ 12।29 ॥
ಭೋಗ್ಯಾ ವಿಶ್ವೇಶ್ವರೀ ದೇವೀ ಮಹೇಶ್ವರಪತಿವ್ರತಾ ।
ಪ್ರೋಚ್ಯತೇ ಭಗವಾನ್ ಭೋಕ್ತಾ ಕಪರ್ದೀ ನೀಲಲೋಹಿತಃ ॥ 12।30 ॥
ಮನ್ತಾ ವಿಶ್ವೇಶ್ವರೋ ದೇವಃ ಶಂಕರೋ ಮನ್ಮಥಾನ್ತಕಃ ।
ಪ್ರೋಚ್ಯತೇ ಮತಿರೀಶಾನೀ ಮನ್ತವ್ಯಾ ಚ ವಿಚಾರತಃ ॥ 12।31 ॥
ಇತ್ಯೇತದಖಿಲಂ ವಿಪ್ರಾಃ ಶಕ್ತಿಶಕ್ತಿಮದುದ್ಭವಮ್ ।
ಪ್ರೋಚ್ಯತೇ ಸರ್ವವೇದೇಷು ಮುನಿಭಿಸ್ತತ್ತ್ವದರ್ಶಿಭಿಃ ॥ 12।32 ॥
ಏತತ್ಪ್ರದರ್ಶಿತಂ ದಿವ್ಯಂ ದೇವ್ಯಾ ಮಾಹಾತ್ಮ್ಯಮುತ್ತಮಮ್ ।
ಸರ್ವವೇದಾನ್ತವೀದೇಷು ನಿಶ್ಚಿತಂ ಬ್ರಹ್ಮವಾದಿಭಿಃ ॥ 12।33 ॥
ಏಕಂ ಸರ್ವಗತಂ ಸೂಕ್ಷ್ಮಂ ಕೂಟಸ್ಥಮಚಲಂ ಧ್ರುವಮ್ ।
ಯೋಗಿನಸ್ತತ್ಪ್ರಪಶ್ಯನ್ತಿ ಮಹಾದೇವ್ಯಾಃ ಪರಂ ಪದಮ್ ॥ 12।34 ॥
ಆನನ್ದಮಕ್ಷರಂ ಬ್ರಹ್ಮ ಕೇವಲಂ ನಿಷ್ಕಲಂ ಪರಮ್ ।
ಯೋಗಿನಸ್ತತ್ಪ್ರಪಶ್ಯನ್ತಿ ಮಹಾದೇವ್ಯಾಃ ಪರಂ ಪದಮ್ ॥ 12।35 ॥
ಪರಾತ್ಪರತರಂ ತತ್ತ್ವಂ ಶಾಶ್ವತಂ ಶಿವಮಚ್ಯುತಮ್ ।
ಅನನ್ತಪ್ರಕೃತೌ ಲೀನಂ ದೇವ್ಯಾಸ್ತತ್ಪರಮಂ ಪದಮ್ ॥ 12।36 ॥
ಶುಭಂ ನಿರಂಜನಂ ಶುದ್ಧಂ ನಿರ್ಗುಣಂ ದ್ವೈತವರ್ಜಿತಮ್ ।
ಆತ್ಮೋಪಲಬ್ಧಿವಿಷಯಂ ದೇವ್ಯಾಸ್ತತಪರಮಂ ಪದಮ್ ॥ 12।37 ॥
ಸೈಷಾ ಧಾತ್ರೀ ವಿಧಾತ್ರೀ ಚ ಪರಮಾನನ್ದಮಿಚ್ಛತಾಮ್ ।
ಸಂಸಾರತಾಪಾನಖಿಲಾನ್ನಿಹನ್ತೀಶ್ವರಸಂಶ್ರಯಾ ॥ 12।38 ॥
ತಸ್ಮಾದ್ವಿಮುಕ್ತಿಮನ್ವಿಚ್ಛನ್ ಪಾರ್ವತೀಂ ಪರಮೇಶ್ವರೀಮ್ ।
ಆಶ್ರಯೇತ್ಸರ್ವಭೂತಾನಾಮಾತ್ಮಭೂತಾಂ ಶಿವಾತ್ಮಿಕಾಮ್ ॥ 12।39 ॥
ಲಬ್ಧ್ವಾ ಚ ಪುತ್ರೀಂ ಶರ್ವಾಣೀಂ ತಪಸ್ತಪ್ತ್ವಾ ಸುದುಶ್ಚರನ್ ।
ಸಭಾರ್ಯಃ ಶರಣಂ ಯಾತಃ ಪಾರ್ವತೀಂ ಪರಮೇಶ್ವರೀಮ್ ॥ 12।40 ॥
ತಾಂ ದೃಷ್ಟ್ವಾ ಜಾಯಮಾನಾಂ ಚ ಸ್ವೇಚ್ಛಯೈವ ವರಾನನಾಮ್ ।
ಮೇನಾ ಹಿಮವತಃ ಪತ್ನೀ ಪ್ರಾಹೇದಂ ಪರ್ವತೇಶ್ವರಮ್ ॥ 12।41 ॥
ಮೇನೋವಾಚ
ಪಶ್ಯ ಬಾಲಾಮಿಮಾಂ ರಾಜನ್ರಾಜೀವಸದೃಶಾನನಾಮ್ ।
ಹಿತಾಯ ಸರ್ವಭೂತಾನಾಂ ಜಾತಾ ಚ ತಪಸಾವಯೋಃ ॥ 12।42 ॥
ಸೋಽಪಿ ದೃಷ್ಟ್ವಾ ತತಃ ದೇವೀಂ ತರುಣಾದಿತ್ಯಸನ್ನಿಭಾಮ್ ।
ಕಪರ್ದಿನೀಂ ಚತುರ್ವಕ್ರಾಂ ತ್ರಿನೇತ್ರಾಮತಿಲಾಲಸಾಮ್ ॥ 12।43 ॥
ಅಷ್ಟಹಸ್ತಾಂ ವಿಶಾಲಾಕ್ಷೀಂ ಚನ್ದ್ರಾವಯವಭೂಷಣಾಮ್ ।
ನಿರ್ಗುಣಾಂ ಸಗುಣಾಂ ಸಾಕ್ಷಾತ್ಸದಸದ್ವ್ಯಕ್ತಿವರ್ಜಿತಾಮ್ ॥ 12।44 ॥
ಪ್ರಣಮ್ಯ ಶಿರಸಾ ಭೂಮೌ ತೇಜಸಾ ಚಾತಿವಿಹ್ವಲಃ ।
ಭೀತಃ ಕೃತಾಂಜಲಿಸ್ತಸ್ಯಾಃ ಪ್ರೋವಾಚ ಪರಮೇಶ್ವರೀಮ್ ॥ 12।45 ॥
ಹಿಮವಾನುವಾಚ
ಕಾ ತ್ವಂ ದೇವಿ ವಿಶಾಲಾಕ್ಷಿ ಶಶಾಂಕಾವಯವಾಂಕಿತೇ ।
ನ ಜಾನೇ ತ್ವಾಮಹಂ ವತ್ಸೇ ಯಥಾವದ್ಬ್ರೂಹಿ ಪೃಚ್ಛತೇ ॥ 12।46 ॥
ಗಿರೀನ್ದ್ರವಚನಂ ಶ್ರುತ್ವಾ ತತಃ ಸಾ ಪರಮೇಶ್ವರೀ ।
ವ್ಯಾಜಹಾರ ಮಹಾಶೈಲಂ ಯೋಗಿನಾಮಭಯಪ್ರದಾ ॥ 12।47 ॥
ದೇವ್ಯುವಾಚ
ಮಾಂ ವಿದ್ಧಿ ಪರಮಾಂ ಶಕ್ತಿಂ ಪರಮೇಶ್ವರಸಮಾಶ್ರಯಾಮ್ ॥ 12।48 ॥
ಅನನ್ಯಾಮವ್ಯಯಾಮೇಕಾಂ ಯಾಂ ಪಶ್ಯನ್ತಿ ಮುಮುಕ್ಷವಃ ।
ಅಹಂ ವೈ ಸರ್ವಭಾವಾನಾತ್ಮಾ ಸರ್ವಾನ್ತರಾ ಶಿವಾ ॥ 12।49 ॥
ಶಾಶ್ವತೈಶ್ವರ್ಯವಿಜ್ಞಾನಮೂರ್ತಿಃ ಸರ್ವಪ್ರವರ್ತಿಕಾ ।
ಅನನ್ತಾಽನನ್ತಮಹಿಮಾ ಸಂಸಾರಾರ್ಣವತಾರಿಣೀ ॥ 12।50 ॥
ದಿವ್ಯಂ ದದಾಮಿ ತೇ ಚಕ್ಷುಃ ಪಶ್ಯ ಮೇ ರೂಪಮೈಶ್ವರಮ್ ।
ಏತಾವದುಕ್ತ್ವಾ ವಿಜ್ಞಾನಂ ದತ್ತ್ವಾ ಹಿಮವತೇ ಸ್ವಯಮ್ ॥ 12।51 ॥
ಸ್ವಂ ರೂಪಂ ದರ್ಶಯಾಮಾಸ ದಿವ್ಯಂ ತತ್ ಪಾರಮೇಶ್ವರಮ್ ।
ಕೋಟಿಸೂರ್ಯಪ್ರಿತೀಕಾಶಂ ತೇಜೋಬಿಮ್ಬಂ ನಿರಾಕುಲಮ್ ॥ 12।52 ॥
ಜ್ವಾಲಾಮಾಲಾಸಹಸ್ರಾಢ್ಯಂ ಕಾಲಾನಲಶತೋಪಮಮ್ ।
ದಂಷ್ಟ್ರಾಕರಾಲಂ ದುರ್ದ್ಧರ್ಷಂ ಜಟಾಮಣಡಲಮಂಡಿತಮ್ ॥ 12।53 ॥
ಕಿರೀಟಿನಂ ಗದಾಹಸ್ತಂ ಶಂಕಚಕ್ರಧರಂ ತಥಾ ।
ತ್ರಿಶೂಲವರಹಸ್ತಂ ಚ ಘೋರರೂಪಂ ಭಯಾನಕಮ್ ॥ 12।54 ॥
ಪ್ರಶಾನ್ತಂ ಸೋಮ್ಯವದನಮನನ್ತಾಶ್ಚರ್ಯಸಂಯುತಮ್ ।
ಚನ್ದ್ರಾವಯವಲಕ್ಷ್ಮಾಣಂ ಚನ್ದ್ರಕೋಟಿಸಮಪ್ರಭಮ್ ॥ 12।55 ॥
ಕಿರೀಟಿನಂ ಗದಾಹಸ್ತಂ ನೂಪುರೈರುಪಶೋಭಿತಮ್ ।
ದಿವ್ಯಮಾಲ್ಯಾಮ್ಬರಧರಂ ದಿವ್ಯಗನ್ಧಾನುಲೇಪನಮ್ ॥ 12।56 ॥
ಶಂಖಚಕ್ರಧರಂ ಕಾಮ್ಯಂ ತ್ರಿನೇತ್ರಂ ಕೃತ್ತಿವಾಸಸಮ್ ।
ಅಂಡಸ್ಥಂ ಚಾಂಡಬಾಹ್ಯಸ್ಥಂ ಬಾಹ್ಯಮಾಭ್ಯನ್ತರಂ ಪರಮ್ ॥ 12।57 ॥
ಸರ್ವಶಕ್ತಿಮಯಂ ಶುಭ್ರಂ ಸರ್ವಾಕಾರಂ ಸನಾತನಮ್ ।
ಬ್ರಹ್ಮೋನ್ದ್ರೋಪೇನ್ದ್ರಯೋಗೀನ್ದ್ರೈರ್ವನ್ದ್ಯಮಾನಪದಾಮ್ಬುಜಮ್ ॥ 12।58 ॥
ಸರ್ವತಃ ಪಾಣಿಪಾದಾನ್ತಂ ಸರ್ವತೋಽಕ್ಷಿಶಿರೋಮುಖಮ್ ।
ಸರ್ವಮಾವೃತ್ಯ ತಿಷ್ಠನ್ತಂ ದದರ್ಶ ಪರಮೇಶ್ವರಮ್ ॥ 12।59 ॥
ದೃಷ್ಟ್ವಾ ತದೀದೃಶಂ ರೂಪಂ ದೇವ್ಯಾ ಮಾಹೇಶ್ವರಂ ಪರಮ್ ।
ಭಯೇನ ಚ ಸಮಾವಿಷ್ಟಃ ಸ ರಾಜಾ ಹೃಷ್ಟಮಾನಸಃ ॥ 12।60 ॥
ಆತ್ಮನ್ಯಾಧಾಯ ಚಾತ್ಮಾನಮೋಂಕಾರಂ ಸಮನುಸ್ಮರನ್ ।
ನಾಮ್ನಾಮಷ್ಟಸಹಸ್ರೇಣ ತುಷ್ಟಾವ ಪರಮೇಶ್ವರೀಮ್ ॥ 12।61 ॥
ಹಿಮವಾನುವಾಚ
ಶಿವೋಮಾ ಪರಮಾ ಶಕ್ತಿರನನ್ತಾ ನಿಷ್ಕಲಾಮಲಾ ।
ಶಾನ್ತಾ ಮಾಹೇಶ್ವರೀ ನಿತ್ಯಾ ಶಾಶ್ವತೀ ಪರಮಾಕ್ಷರಾ ॥ 12।62 ॥
ಅಚಿನ್ತ್ಯಾ ಕೇವಲಾಽನನ್ತ್ಯಾ ಶಿವಾತ್ಮಾ ಪರಮಾತ್ಮಿಕಾ ।
ಅನಾದಿರವ್ಯಯಾ ಶುದ್ಧಾ ದೇವಾತ್ಮಾ ಸರ್ವಗಾಽಚಲಾ ॥ 12।63 ॥
ಏಕಾನೇಕವಿಭಾಗಸ್ಥಾ ಮಾಯಾತೀತಾ ಸುನಿರ್ಮಲಾ ।
ಮಹಾಮಾಹೇಶ್ವರೀ ಸತ್ಯಾ ಮಹಾದೇವೀ ನಿರಂಜನಾ ॥ 12।64 ॥
ಕಾಷ್ಠಾ ಸರ್ವಾನ್ತರಸ್ಥಾ ಚ ಚಿಚ್ಛಕ್ತಿರತಿಲಾಲಸಾ ।
ನನ್ದಾ ಸರ್ವಾತ್ಮಿಕಾ ವಿದ್ಯಾ ಜ್ಯೋತೀರೂಪಾಽಮೃತಾಕ್ಷರಾ ॥ 12।65 ॥
ಶಾನ್ತಿಃ ಪ್ರತಿಷ್ಠಾ ಸರ್ವೇಷಾಂ ನಿವೃತ್ತಿರಮೃತಪ್ರದಾ ।
ವ್ಯೋಮಮೂರ್ತಿರ್ವ್ಯೋಮಲಯಾ ವ್ಯೋಮಾಧಾರಾಽಚ್ಯುತಾಽಮರಾ ॥ 12।66 ॥
ಅನಾದಿನಿಧನಾಽಮೋಘಾ ಕಾರಣಾತ್ಮಾಕುಲಾಕುಲಾ ।
ಸ್ವತಃ ಪ್ರಥಮಜಾನಾಭಿರಮೃತಸ್ಯಾತ್ಮಸಂಶ್ರಯಾ ॥ 12।67 ॥
ಪ್ರಾಣೇಶ್ವರಪ್ರಿಯಾ ಮಾತಾ ಮಹಾಮಹಿಷಘಾತಿನೀ ।
ಪ್ರಾಣೇಶ್ವರೀ ಪ್ರಾಣರೂಪಾ ಪ್ರಧಾನಪುರುಷೇಶ್ವರೀ ॥ 12।68 ॥
ಮಹಾಮಾಯಾ ಸುದುಷ್ಪೂರಾ ಮೂಲಪ್ರಕೃತಿರೀಶ್ವರೀ
ಸರ್ವಶಕ್ತಿಕಲಾಕಾರಾ ಜ್ಯೋತ್ಸ್ನಾ ದ್ಯೋರ್ಮಹಿಮಾಸ್ಪದಾ ॥ 12।69 ॥
ಸರ್ವಕಾರ್ಯನಿಯನ್ತ್ರೀ ಚ ಸರ್ವಭೂತೇಶ್ವರೇಶ್ವರೀ ।
ಸಂಸಾರಯೋನಿಃ ಸಕಲಾ ಸರ್ವಶಕ್ತಿಸಮುದ್ಭವಾ ॥ 12।70 ॥
ಸಂಸಾರಪೋತಾ ದುರ್ವಾರಾ ದುರ್ನಿರೀಕ್ಷ್ಯ ದುರಾಸದಾ ।
ಪ್ರಾಣಶಕ್ತಿಃ ಪ್ರಾಣವಿದ್ಯಾ ಯೋಗನೀಪರಮಾ ಕಲಾ ॥ 12।71 ॥
ಮಹವಿಭೂತಿದುರ್ದರ್ಷಾ ಮೂಲಪ್ರಕೃತಿಸಮ್ಭವಾ ।
ಅನಾದ್ಯನನ್ತವಿಭವಾ ಪರಮಾದ್ಯಾಪಕರ್ಷಿಣೀ ॥ 12।72 ॥
ಸರ್ಗಸ್ಥಿತ್ಯನ್ತಕರಣೀ ಸುದುರ್ವಾಚ್ಯಾದುರತ್ಯಯಾ ।
ಶಬ್ದಯೋನಿಃ ಶಬ್ದಮಯೀ ನಾದಾಖ್ಯಾ ನಾದವಿಗ್ರಹಾ ॥ 12।73 ॥
ಅನಾದಿರವ್ಯಕ್ತಗುಣಾ ಮಹಾನನ್ದಾ ಸನಾತನೀ ।
ಆಕಾಶಯೋನಿರ್ಯೋಗಸ್ಥಾ ಮಹಾಯೋಗೇಶ್ವರೇಶ್ವರೀ ॥ 12।74 ॥
ಮಹಾಮಾಯಾ ಸುದುಷ್ಪಾರಾ ಮೂಲಪ್ರಕೃತಿರೀಶ್ವರೀ
ಪ್ರಧಾನಪುರುಷಾತೀತಾ ಪ್ರಧಾನಪುರುಷಾತ್ಮಿಕಾ ॥ 12।75 ॥
ಪುರಾಣೀ ಚಿನ್ಮಯೀ ಪುಂಸಾಮಾದಿಃ ಪುರುಷರೂಪಿಣೀ ।
ಭೂತಾನ್ತರಾತ್ಮಾ ಕೂಟಸ್ಥಾ ಮಹಾಪುರುಷಸಂಜ್ಞಿತಾ ॥ 12।76 ॥
ಜನ್ಮಮೃತ್ಯುಜರಾತೀತಾ ಸರ್ವಶಕ್ತಿಸಮನ್ವಿತಾ ।
ವ್ಯಾಪಿನೀ ಚಾನವಚ್ಛಿನ್ನಾ ಪ್ರಧಾನಾನುಪ್ರವೇಶಿನೀ ॥ 12।77 ॥
ಕ್ಷೇತ್ರಜ್ಞಶಕ್ತಿರವ್ಯಕ್ತಲಕ್ಷಣಾ ಮಲವರ್ಜಿತಾ ।
ಅನಾದಿಮಾಯಾಸಂಭಿನ್ನಾ ತ್ರಿತತ್ತ್ವಾ ಪ್ರಕೃತಿಗ್ರಹಾ ॥ 12।78 ॥
ಮಹಾಮಾಯಾಸಮುತ್ಪನ್ನಾ ತಾಮಸೀ ಪೌರುಷೀ ಧ್ರುವಾ ।
ವ್ಯಕ್ತಾವ್ಯಕ್ತಾತ್ಮಿಕಾ ಕೃಷ್ಣಾ ರಕ್ತಾ ಶುಕ್ಲಾ ಪ್ರಸೂತಿಕಾ ॥ 12।79 ॥
ಅಕಾರ್ಯಾ ಕಾರ್ಯಜನನೀ ನಿತ್ಯಂ ಪ್ರಸವಧರ್ಮಿಣೀ ।
ಸರ್ಗಪ್ರಲಯನಿರ್ಮುಕ್ತಾ ಸೃಷ್ಟಿಸ್ಥಿತ್ಯನ್ತಧರ್ಮಿಣೀ ॥ 12।80 ॥
ಬ್ರಹ್ಮಗರ್ಭಾ ಚತುರ್ವಿಶಾ ಪದ್ಮನಾಭಾಽಚ್ಯುತಾತ್ಮಿಕಾ ।
ವೈದ್ಯುತೀ ಶಾಶ್ವತೀ ಯೋನಿರ್ಜಗನ್ಮಾತೇಶ್ವರಪ್ರಿಯಾ ॥ 12।81 ॥
ಸರ್ವಾಧಾರಾ ಮಹಾರೂಪಾ ಸರ್ವೈಶ್ವರ್ಯಸಮನ್ವಿತಾ ।
ವಿಶ್ವರೂಪಾ ಮಹಾಗರ್ಭಾ ವಿಶ್ವೇಶೇಚ್ಛಾನುವರ್ತಿನೀ ॥ 12।82 ॥
ಮಹೀಯಸೀ ಬ್ರಹ್ಮಯೋನಿಃ ಮಹಾಲಕ್ಷ್ಮೀಸಮುದ್ಭವಾ
ಮಹಾವಿಮಾನಮಧ್ಯಸ್ಥಾ ಮಹಾನಿದ್ರಾತ್ಮಹೇತುಕಾ ॥ 12।83 ॥
ಸರ್ವಸಾಧಾರಣೀ ಸೂಕ್ಷ್ಮಾ ಹ್ಯವಿದ್ಯಾ ಪಾರಮಾರ್ಥಿಕಾ ।
ಅನನ್ತರೂಪಾಽನನ್ತಸ್ಥಾ ದೇವೀ ಪುರುಷಮೋಹಿನೀ ॥ 12।84 ॥
ಅನೇಕಾಕಾರಸಂಸ್ಥಾನಾ ಕಾಲತ್ರಯವಿವರ್ಜಿತಾ ।
ಬ್ರಹ್ಮಜನ್ಮಾ ಹರೇರ್ಮೂರ್ತಿರ್ಬ್ರಹ್ಮವಿಷ್ಣುಶಿವಾತ್ಮಿಕಾ ॥ 12।85 ॥
ಬ್ರಹ್ಮೇಶವಿಷ್ಣುಜನನೀ ಬ್ರಹ್ಮಾಖ್ಯಾ ಬ್ರಹ್ಮಸಂಶ್ರಯಾ ।
ವ್ಯಕ್ತಾ ಪ್ರಥಮಜಾ ಬ್ರಾಹ್ಮೀ ಮಹತೀ ಜ್ಞಾನರೂಪಿಣೀ ॥ 12।86 ॥
ವೈರಾಗ್ಯೈಶ್ವರ್ಯಧರ್ಮಾತ್ಮಾ ಬ್ರಹ್ಮಮೂರ್ತಿರ್ಹೃದಿಸ್ಥಿತಾ ।
ಅಪಾಂಯೋನಿಃ ಸ್ವಯಂಭೂತಿರ್ಮಾನಸೀ ತತ್ತ್ವಸಂಭವಾ ॥ 12।87 ॥
ಈಶ್ವರಾಣೀ ಚ ಶರ್ವಾಣೀ ಶಂಕರಾರ್ದ್ಧಶರೀರಿಣೀ ।
ಭವಾನೀ ಚೈವ ರುದ್ರಾಣೀ ಮಹಾಲಕ್ಷ್ಮೀರಥಾಮ್ಬಿಕಾ ॥ 12।88 ॥
ಮಹೇಶ್ವರಸಮುತ್ಪನ್ನಾ ಭುಕ್ತಿಮುಕ್ತಿಫಲಪ್ರದಾ ।
ಸರ್ವೇಶ್ವರೀ ಸರ್ವವನ್ದ್ಯಾ ನಿತ್ಯಂ ಮುದಿತಮಾನಸಾ ॥ 12।89 ॥
ಬ್ರಹ್ಮೇನ್ದ್ರೋಪೇನ್ದ್ರನಮಿತಾ ಶಂಕರೇಚ್ಛಾನುವರ್ತಿನೀ ।
ಈಶ್ವರಾರ್ದ್ಧಾಸನಗತಾ ಮಹೇಶ್ವರಪತಿವ್ರತಾ ॥ 12।90 ॥
ಸಕೃದ್ವಿಭಾತಾ ಸರ್ವಾರ್ತಿ ಸಮುದ್ರಪರಿಶೋಷಿಣೀ ।
ಪಾರ್ವತೀ ಹಿಮವತ್ಪುತ್ರೀ ಪರಮಾನನ್ದದಾಯಿನೀ ॥ 12।91 ॥
ಗುಣಾಢ್ಯಾ ಯೋಗಜಾ ಯೋಗ್ಯಾ ಜ್ಞಾನಮೂರ್ತಿರ್ವಿಕಾಸಿನೀ ।
ಸಾವಿತ್ರೀಕಮಲಾ ಲಕ್ಷ್ಮೀಃ ಶ್ರೀರನನ್ತೋರಸಿ ಸ್ಥಿತಾ ॥ 12।92 ॥
ಸರೋಜನಿಲಯಾ ಮುದ್ರಾ ಯೋಗನಿದ್ರಾ ಸುರಾರ್ದಿನೀ ।
ಸರಸ್ವತೀ ಸರ್ವವಿದ್ಯಾ ಜಗಜ್ಜ್ಯೇಷ್ಠಾ ಸುಮಂಗಲಾ ॥ 12।93 ॥
ವಾಗ್ದೇವೀ ವರದಾ ವಾಚ್ಯಾ ಕೀರ್ತಿಃ ಸರ್ವಾರ್ಥಸಾಧಿಕಾ ।
ಯೋಗೀಶ್ವರೀ ಬ್ರಹ್ಮವಿದ್ಯಾ ಮಹಾವಿದ್ಯಾ ಸುಶೋಭನಾ ॥ 12।94 ॥
ಗುಹ್ಯವಿದ್ಯಾತ್ಮವಿದ್ಯಾ ಚ ಧರ್ಮವಿದ್ಯಾತ್ಮಭಾವಿತಾ ।
ಸ್ವಾಹಾ ವಿಶ್ವಂಭರಾ ಸಿದ್ಧಿಃ ಸ್ವಧಾ ಮೇಧಾ ಧೃತಿಃ ಶ್ರುತಿಃ ॥ 12।95 ॥
ನೀತಿಃ ಸುನೀತಿಃ ಸುಕೃತಿರ್ಮಾಧವೀ ನರವಾಹಿನೀ ।
ಪೂಜ್ಯಾ ವಿಭಾವರೀ ಸೌಮ್ಯಾ ಭೋಗಿನೀ ಭೋಗಶಾಯಿನೀ ॥ 12।96 ॥
ಶೋಭಾ ವಂಶಕರೀ ಲೋಲಾ ಮಾಲಿನೀ ಪರಮೇಷ್ಠಿನೀ ।
ತ್ರೈಲೋಕ್ಯಸುನ್ದರೀ ರಮ್ಯಾ ಸುನ್ದರೀ ಕಾಮಚಾರಿಣೀ ॥ 12।97 ॥
ಮಹಾನುಭಾವಾ ಸತ್ತ್ವಸ್ಥಾ ಮಹಾಮಹಿಷಮರ್ದಿನೀ ।
ಪದ್ಮಮಾಲಾ ಪಾಪಹರಾ ವಿಚಿತ್ರಾ ಮುಕುಟಾನನಾ ॥ 12।98 ॥
ಕಾನ್ತಾ ಚಿತ್ರಾಮ್ಬರಧರಾ ದಿವ್ಯಾಬರಣಭೂಷಿತಾ ।
ಹಂಸಾಖ್ಯಾ ವ್ಯೋಮನಿಲಯಾ ಜಗತ್ಸೃಷ್ಟಿವಿವರ್ದ್ಧಿನೀ ॥ 12।99 ॥
ನಿರ್ಯನ್ತ್ರಾ ಯನ್ತ್ರವಾಹಸ್ಥಾ ನನ್ದಿನೀ ಭದ್ರಕಾಲಿಕಾ ।
ಆದಿತ್ಯವರ್ಣಾ ಕೌಮಾರೀ ಮಯೂರವರವಾಹನಾ ॥ 12।100 ॥
ವೃಷಾಸನಗತಾ ಗೌರೀ ಮಹಾಕಾಲೀ ಸುರಾರ್ಚಿತಾ ।
ಅದಿತಿರ್ನಿಯತಾ ರೌದ್ರಾ ಪದ್ಮಗರ್ಭಾ ವಿವಾಹನಾ ॥ 12।101 ॥
ವಿರೂಪಾಕ್ಷೀ ಲೇಲಿಹಾನಾ ಮಹಾಪುರನಿವಾಸಿನೀ ।
ಮಹಾಫಲಾಽನವದ್ಯಾಂಗೀ ಕಾಮರುಪಾ ವಿಭಾವರೀ ॥ 12।102 ॥
ವಿಚಿತ್ರರತ್ನಮುಕುಟಾ ಪ್ರಣತಾರ್ತಿಪ್ರಭಂಜನೀ ।
ಕೌಶಿಕೀ ಕರ್ಷಣೀ ರಾತ್ರಿಸ್ತ್ರಿದಶಾರ್ತಿವಿನಾಶಿನೀ ॥ 12।103 ॥
ಬಹುರೂಪಾ ಸ್ವರೂಪಾ ಚ ವಿರೂಪಾ ರೂಪವರ್ಜಿತಾ ।
ಭಕ್ತಾರ್ತಿಶಮನೀ ಭವ್ಯಾ ಭವಭಾರವಿನಾಶನೀ ॥ 12।104 ॥
ನಿರ್ಗುಣಾ ನಿತ್ಯವಿಭವಾ ನಿಃಸಾರಾ ನಿರಪತ್ರಪಾ ।
ಯಶಸ್ವಿನೀ ಸಾಮಗೀತಿರ್ಭವಾಂಗನಿಲಯಾಲಯಾ ॥ 12।105 ॥
ದೀಕ್ಷಾ ವಿದ್ಯಾಧರೀ ದೀಪ್ತಾ ಮಹೇನ್ದ್ರವಿನಿಪಾತಿನೀ ।
ಸರ್ವಾತಿಶಾಯಿನೀ ವಿಶ್ವಾ ಸರ್ವಸಿದ್ಧಿಪ್ರದಾಯಿನೀ ॥ 12।106 ॥
ಸರ್ವೇಶ್ವರಪ್ರಿಯಾ ಭಾರ್ಯಾ ಸಮುದ್ರಾನ್ತರವಾಸಿನೀ ।
ಅಕಲಂಕಾ ನಿರಾಧಾರಾ ನಿತ್ಯಸಿದ್ಧಾ ನಿರಾಮಯಾ ॥ 12।107 ॥
ಕಾಮಧೇನುರ್ಬೃಹದ್ಗರ್ಭಾ ಧೀಮತೀ ಮೋಹನಾಶಿನೀ ।
ನಿಃಸಂಕಲ್ಪಾ ನಿರಾತಂಕಾ ವಿನಯಾ ವಿನಯಪ್ರಿಯಾ ॥ 12।108 ॥
ಜ್ವಾಲಾಮಾಲಾಸಹಸ್ರಾಢ್ಯಾ ದೇವದೇವೀ ಮನೋಮಯೀ ।
ಮಹಾಭಗವತೀ ಭರ್ಗಾ ವಾಸುದೇವಸಮುದ್ಭವಾ ॥ 12।109 ॥
ಮಹೇನ್ದ್ರೋಪೇನ್ದ್ರಭಗಿನೀ ಭಕ್ತಿಗಮ್ಯಾ ಪರಾವರಾ ।
ಜ್ಞಾನಜ್ಞೇಯಾ ಜರಾತೀತಾ ವೇದಾನ್ತವಿಷಯಾ ಗತಿಃ ॥ 12।110 ॥
ದಕ್ಷಿಣಾ ದಹನಾ ಮಾಯಾ ಸರ್ವಭೂತನಮಸ್ಕೃತಾ ।
ಯೋಗಮಾಯಾ ವಿಭಾಗಜ್ಞಾ ಮಹಾಮೋಹಾ ಮಹೀಯಸೀ ॥ 12।111 ॥
ಸಂಧ್ಯಾ ಸರ್ವಸಮುದ್ಭೂತಿರ್ಬ್ರಹ್ಮವೃಕ್ಷಾಶ್ರಯಾನತಿಃ ।
ಬೀಜಾಂಕುರಸಮುದ್ಭೂತಿರ್ಮಹಾಶಕ್ತಿರ್ಮಹಾಮತಿಃ ॥ 12।112 ॥
ಖ್ಯಾತಿಃ ಪ್ರಜ್ಞಾ ಚಿತಿಃ ಸಂಚ್ಚಿನ್ಮಹಾಭೋಗೀನ್ದ್ರಶಾಯಿನೀ ।
ವಿಕೃತಿಃ ಶಾಂಸರೀ ಶಾಸ್ತಿರ್ಗಣಗನ್ಧರ್ವಸೇವಿತಾ ॥ 12।113 ॥
ವೈಶ್ವಾನರೀ ಮಹಾಶಾಲಾ ದೇವಸೇನಾ ಗುಹಪ್ರಿಯಾ ।
ಮಹಾರಾತ್ರಿಃ ಶಿವಾಮನ್ದಾ ಶಚೀ ದುಃಸ್ವಪ್ನನಾಶಿನೀ ॥ 12।114 ॥
ಇಜ್ಯಾ ಪೂಜ್ಯಾ ಜಗದ್ಧಾತ್ರೀ ದುರ್ವಿಜ್ಞೇಯಾ ಸುರೂಪಿಣೀ ।
ತಪಸ್ವಿನೀ ಸಮಾಧಿಸ್ಥಾ ತ್ರಿನೇತ್ರಾ ದಿವಿ ಸಂಸ್ಥಿತಾ ॥ 12।115 ॥
ಗುಹಾಮ್ಬಿಕಾ ಗುಣೋತ್ಪತ್ತಿರ್ಮಹಾಪೀಠಾ ಮರುತ್ಸುತಾ ।
ಹವ್ಯವಾಹಾನ್ತರಾಗಾದಿಃ ಹವ್ಯವಾಹಸಮುದ್ಭವಾ ॥ 12।116 ॥
ಜಗದ್ಯೋನಿರ್ಜಗನ್ಮಾತಾ ಜನ್ಮಮೃತ್ಯುಜರಾತಿಗಾ ।
ಬುದ್ಧಿಮಾತಾ ಬುದ್ಧಿಮತೀ ಪುರುಷಾನ್ತರವಾಸಿನೀ ॥ 12।117 ॥
ತರಸ್ವಿನೀ ಸಮಾಧಿಸ್ಥಾ ತ್ರಿನೇತ್ರಾ ದಿವಿಸಂಸ್ಥಿತಾ ।
ಸರ್ವೇನ್ದ್ರಿಯಮನೋಮಾತಾ ಸರ್ವಭೂತಹೃದಿ ಸ್ಥಿತಾ ॥ 12।118 ॥
ಸಂಸಾರತಾರಿಣೀ ವಿದ್ಯಾ ಬ್ರಹ್ಮವಾದಿಮನೋಲಯಾ ।
ಬ್ರಹ್ಮಾಣೀ ಬೃಹತೀ ಬ್ರಾಹ್ಮೀ ಬ್ರಹ್ಮಭೂತಾ ಭವಾರಣೀ ॥ 12।119 ॥
ಹಿರಣ್ಮಯೀ ಮಹಾರಾತ್ರಿಃ ಸಂಸಾರಪರಿವರ್ತ್ತಿಕಾ ।
ಸುಮಾಲಿನೀ ಸುರೂಪಾ ಚ ಭಾವಿನೀ ತಾರಿಣೀ ಪ್ರಭಾ ॥ 12।120 ॥
ಉನ್ಮೀಲನೀ ಸರ್ವಸಹಾ ಸರ್ವಪ್ರತ್ಯಯಸಾಕ್ಷಿಣೀ ।
ಸುಸೌಮ್ಯಾ ಚನ್ದ್ರವದನಾ ತಾಂಡವಾಸಕ್ತಮಾನಸಾ ॥ 12।121 ॥
ಸತ್ತ್ವಶುದ್ಧಿಕರೀ ಶುದ್ಧಿರ್ಮಲತ್ರಯವಿನಾಶಿನೀ ।
ಜಗತ್ಪ್ರಿಯಾ ಜಗನ್ಮೂರ್ತಿಸ್ತ್ರಿಮೂರ್ತಿರಮೃತಾಶ್ ॥ 12।122 ॥
ನಿರಾಶ್ರಯಾ ನಿರಾಹಾರಾ ನಿರಂಕುರವನೋದ್ಭವಾ ।
ಚನ್ದ್ರಹಸ್ತಾ ವಿಚಿತ್ರಾಂಗೀ ಸ್ರಗ್ವಿಣೀ ಪದ್ಮಧಾರಿಣೀ ॥ 12।123 ॥
ಪರಾವರವಿಧಾನಜ್ಞಾ ಮಹಾಪುರುಷಪೂರ್ವಜಾ ।
ವಿದ್ಯೇಶ್ವರಪ್ರಿಯಾ ವಿದ್ಯಾ ವಿದ್ಯುಜ್ಜಿಹ್ವಾ ಜಿತಶ್ರಮಾ ॥ 12।124 ॥
ವಿದ್ಯಾಮಯೀ ಸಹಸ್ರಾಕ್ಷೀ ಸಹಸ್ರವದನಾತ್ಮಜಾ ।
ಸಹಸ್ರರಶ್ಮಿಃ ಸತ್ತ್ವಸ್ಥಾ ಮಹೇಶ್ವರಪದಾಶ್ರಯಾ ॥ 12।125 ॥
ಕ್ಷಾಲಿನೀ ಸನ್ಮಯೀ ವ್ಯಾಪ್ತಾ ತೈಜಸೀ ಪದ್ಮಬೋಧಿಕಾ ।
ಮಹಾಮಾಯಾಶ್ರಯಾ ಮಾನ್ಯಾ ಮಹಾದೇವಮನೋರಮಾ ॥ 12।126 ॥
ವ್ಯೋಮಲಕ್ಷ್ಮೀಃ ಸಿಹರಥಾ ಚೇಕಿತಾನಾಮಿತಪ್ರಭಾ ।
ವೀರೇಶ್ವರೀ ವಿಮಾನಸ್ಥಾ ವಿಶೋಕಾಶೋಕನಾಶಿನೀ ॥ 12।127 ॥
ಅನಾಹತಾ ಕುಂಡಲಿನೀ ನಲಿನೀ ಪದ್ಮವಾಸಿನೀ ।
ಸದಾನನ್ದಾ ಸದಾಕೀರ್ತಿಃ ಸರ್ವಭೂತಾಶ್ರಯಸ್ಥಿತಾ ॥ 12।128 ॥
ವಾಗ್ದೇವತಾ ಬ್ರಹ್ಮಕಲಾ ಕಲಾತೀತಾ ಕಲಾರಣೀ ।
ಬ್ರಹ್ಮಶ್ರೀರ್ಬ್ರಹ್ಮಹೃದಯಾ ಬ್ರಹ್ಮವಿಷ್ಣುಶಿವಪ್ರಿಯಾ ॥ 12।129 ॥
ವ್ಯೋಮಶಕ್ತಿಃ ಕ್ರಿಯಾಶಕ್ತಿರ್ಜ್ಞಾನಶಕ್ತಿಃ ಪರಾಗತಿಃ ।
ಕ್ಷೋಭಿಕಾ ಬನ್ಧಿಕಾ ಭೇದ್ಯಾ ಭೇದಾಭೇದವಿವರ್ಜಿತಾ ॥ 12।130 ॥
ಅಭಿನ್ನಾಭಿನ್ನಸಂಸ್ಥಾನಾ ವಂಶಿನೀ ವಂಶಹಾರಿಣೀ ।
ಗುಹ್ಯಶಕ್ತಿರ್ಗುಣಾತೀತಾ ಸರ್ವದಾ ಸರ್ವತೋಮುಖೀ ॥ 12।131 ॥
ಭಗಿನೀ ಭಗವತ್ಪತ್ನೀ ಸಕಲಾ ಕಾಲಕಾರಿಣೀ ।
ಸರ್ವವಿತ್ ಸರ್ವತೋಭದ್ರಾ ಗುಹ್ಯಾತೀತಾ ಗುಹಾವಲಿಃ ॥ 12।132 ॥
ಪ್ರಕ್ರಿಯಾ ಯೋಗಮಾತಾ ಚ ಗಂಗಾ ವಿಶ್ವೇಶ್ವರೇಶ್ವರೀ ।
ಕಪಿಲಾ ಕಾಪಿಲಾ ಕಾನ್ತಾಕನಕಾಭಾಕಲಾನ್ತರಾ ॥ 12।133 ॥
ಪುಣ್ಯಾ ಪುಷ್ಕರಿಣೀ ಭೋಕ್ತ್ರೀ ಪುರಂದರಪುರಸ್ಸರಾ ।
ಪೋಷಣೀ ಪರಮೈಶ್ವರ್ಯಭೂತಿದಾ ಭೂತಿಭೂಷಣಾ ॥ 12।134 ॥
ಪಂಚಬ್ರಹ್ಮಸಮುತ್ಪತ್ತಿಃ ಪರಮಾರ್ಥಾರ್ಥವಿಗ್ರಹಾ ।
ಧರ್ಮೋದಯಾ ಭಾನುಮತೀ ಯೋಗಿಜ್ಞೇಯ ಮನೋಜವಾ ॥ 12।135 ॥
ಮನೋಹರಾ ಮನೋರಸ್ಥಾ ತಾಪಸೀ ವೇದರೂಪಿಣೀ ।
ವೇದಶಕ್ತಿರ್ವೇದಮಾತಾ ವೇದವಿದ್ಯಾಪ್ರಕಾಶಿನೀ ॥ 12।136 ॥
ಯೋಗೇಶ್ವರೇಶ್ವರೀ ಮಾತಾ ಮಹಾಶಕ್ತಿರ್ಮನೋಮಯೀ ।
ವಿಶ್ವಾವಸ್ಥಾ ವಿಯನ್ಮೂರ್ತ್ತಿರ್ವಿದ್ಯುನ್ಮಾಲಾ ವಿಹಾಯಸೀ ॥ 12।137 ॥
ಕಿಂನರೀ ಸುರಭಿರ್ವನ್ದ್ಯಾ ನನ್ದಿನೀ ನನ್ದಿವಲ್ಲಭಾ ।
ಭಾರತೀ ಪರಮಾನನ್ದಾ ಪರಾಪರವಿಭೇದಿಕಾ ॥ 12।138 ॥
ಸರ್ವಪ್ರಹರಣೋಪೇತಾ ಕಾಮ್ಯಾ ಕಾಮೇಶ್ವರೇಶ್ವರೀ ।
ಅಚಿನ್ತ್ಯಾಽಚಿನ್ತ್ಯವಿಭವಾ ಹೃಲ್ಲೇಖಾ ಕನಕಪ್ರಭಾ 12।139 ॥
ಕೂಷ್ಮಾಂಡೀ ಧನರತ್ನಾಢ್ಯಾ ಸುಗನ್ಧಾ ಗನ್ಧಾಯಿನೀ ।
ತ್ರಿವಿಕ್ರಮಪದೋದ್ಭೂತಾ ಧನುಷ್ಪಾಣಿಃ ಶಿವೋದಯಾ ॥ 12।140 ॥
ಸುದುರ್ಲಭಾ ಧನಾದ್ಯಕ್ಷಾ ಧನ್ಯಾ ಪಿಂಗಲಲೋಚನಾ ।
ಶಾನ್ತಿಃ ಪ್ರಭಾವತೀ ದೀಪ್ತಿಃ ಪಂಕಜಾಯತಲೋಚನಾ ॥ 12।141 ॥
ಆದ್ಯಾ ಹೃತ್ಕಮಲೋದ್ಭೂತಾ ಗವಾಂ ಮತಾ ರಣಪ್ರಿಯಾ ।
ಸತ್ಕ್ರಿಯಾ ಗಿರಿಜಾ ಶುದಿರ್ನಿತ್ಯಪುಷ್ಟಾ ನಿರನ್ತರಾ ॥ 12।142 ॥
ದುರ್ಗಾಕಾತ್ಯಾಯನೀಚಂಡೀ ಚರ್ಚಿಕಾ ಶಾನ್ತವಿಗ್ರಹಾ ।
ಹಿರಣ್ಯವರ್ಣಾ ರಜನೀ ಜಗದ್ಯನ್ತ್ರಪ್ರವರ್ತಿಕಾ ॥ 12।143 ॥
ಮನ್ದರಾದ್ರಿನಿವಾಸಾ ಚ ಶಾರದಾ ಸ್ವರ್ಣಮಾಲಿನೀ ।
ರತ್ನಮಾಲಾ ರತ್ನಗರ್ಭಾ ಪೃಥ್ವೀ ವಿಶ್ವಪ್ರಮಾಥಿನೀ ॥ 12।144 ॥
ಪದ್ಮಾನನಾ ಪದ್ಮನಿಭಾ ನಿತ್ಯತುಷ್ಟಾಽಮೃತೋದ್ಭವಾ ।
ಧುನ್ವತೀ ದುಃಪ್ರಕಮ್ಪಾ ಚ ಸೂರ್ಯಮಾತಾ ದೃಷದ್ವತೀ ॥ 12।145 ॥
ಮಹೇನ್ದ್ರಭಗಿನೀ ಮಾನ್ಯಾ ವರೇಣ್ಯಾ ವರದಯಿಕಾ ।
ಕಲ್ಯಾಣೀ ಕಮಲಾವಾಸಾ ಪಂಚಚೂಡಾ ವರಪ್ರದಾ ॥ 12।146 ॥
ವಾಚ್ಯಾ ವರೇಶ್ವರೀ ವನ್ದ್ಯಾ ದುರ್ಜಯಾ ದುರತಿಕ್ರಮಾ ।
ಕಾಲರಾತ್ರಿರ್ಮಹಾವೇಗಾ ವೀರಭದ್ರಪ್ರಿಯಾ ಹಿತಾ ॥ 12।147 ॥
ಭದ್ರಕಾಲೀ ಜಗನ್ಮಾತಾ ಭಕ್ತಾನಾಂ ಭದ್ರದಾಯಿನೀ ।
ಕರಾಲಾ ಪಿಂಗಲಾಕಾರಾ ಕಾಮಭೇದಾಽಮಹಾಮದಾ ॥ 12।148 ॥
ಯಶಸ್ವಿನೀ ಯಶೋದಾ ಚ ಷಡಧ್ವಪರಿವರ್ತ್ತಿಕಾ ।
ಶಂಖಿನೀ ಪದ್ಮಿನೀ ಸಾಂಖ್ಯಾ ಸಾಂಖ್ಯಯೋಗಪ್ರವರ್ತಿಕಾ ॥ 12।149 ॥
ಚೈತ್ರಾ ಸಂವತ್ಸರಾರೂಢಾ ಜಗತ್ಸಮ್ಪೂರಣೀಧ್ವಜಾ ।
ಶುಮ್ಭಾರಿಃ ಖೇಚರೀಸ್ವಸ್ಥಾ ಕಮ್ಬುಗ್ರೀವಾಕಲಿಪ್ರಿಯಾ ॥ 12।150 ॥
ಖಗಧ್ವಜಾ ಖಗಾರೂಢಾ ಪರಾರ್ಯಾ ಪರಮಾಲಿನೀ ।
ಐಶ್ವರ್ಯಪದ್ಮನಿಲಯಾ ವಿರಕ್ತಾ ಗರುಡಾಸನಾ ॥ 12।151 ॥
ಜಯನ್ತೀ ಹೃದ್ಗುಹಾ ಗಮ್ಯಾ ಗಹ್ವರೇಷ್ಠಾ ಗಣಾಗ್ರಣೀಃ ।
ಸಂಕಲ್ಪಸಿದ್ಧಾ ಸಾಮ್ಯಸ್ಥಾ ಸರ್ವವಿಜ್ಞಾನದಾಯಿನೀ ॥ 12।152 ॥
ಕಲಿಕಲ್ಪವಿಹನ್ತ್ರೀ ಚ ಗುಹ್ಯೋಪನಿಷದುತ್ತಮಾ ।
ನಿಷ್ಠಾ ದೃಷ್ಟಿಃ ಸ್ಮೃತಿರ್ವ್ಯಾಪ್ತಿಃ ಪುಷ್ಟಿಸ್ತುಷ್ಟಿಃ ಕ್ರಿಯಾವತೀ ॥ 12।153 ॥
ವಿಶ್ವಾಮರೇಶ್ವರೇಶಾನಾ ಭುಕ್ತಿರ್ಮುಕ್ತಿಃ ಶಿವಾಽಮೃತಾ ।
ಲೋಹಿತಾ ಸರ್ಪಮಾಲಾ ಚ ಭೀಷಣೀ ವನಮಾಲಿನೀ ॥ 12।154 ॥
ಅನನ್ತಶಯನಾಽನನ್ತಾ ನರನಾರಾಯಣೋದ್ಭವಾ ।
ನೃಸಿಂಹೀ ದೈತ್ಯಮಥನೀ ಶಂಖಚಕ್ರಗದಾಧರಾ ॥ 12।155 ॥
ಸಂಕರ್ಷಣಸಮುತ್ಪತ್ತಿರಮ್ಬಿಕಾಪಾದಸಂಶ್ರಯಾ ।
ಮಹಾಜ್ವಾಲಾ ಮಹಾಮೂರ್ತ್ತಿಃ ಸುಮೂರ್ತ್ತಿಃ ಸರ್ವಕಾಮಧುಕ್ ॥ 12।156 ॥
ಸುಪ್ರಭಾ ಸುಸ್ತನಾ ಸೌರೀ ಧರ್ಮಕಾಮಾರ್ಥಮೋಕ್ಷದಾ ।
ಭ್ರೂಮಧ್ಯನಿಲಯಾ ಪೂರ್ವಾ ಪುರಾಣಪುರುಷಾರಣಿಃ ॥ 12।157 ॥
ಮಹಾವಿಭೂತಿದಾ ಮಧ್ಯಾ ಸರೋಜನಯನಾ ಸಮಾ ।
ಅಷ್ಟಾದಶಭುಜಾನಾದ್ಯಾ ನೀಲೋತ್ಪಲದಲಪ್ರಭ12।158 ॥
ಸರ್ವಶಕ್ತ್ಯಾಸನಾರೂಢಾ ಸರ್ವಧರ್ಮಾರ್ಥವರ್ಜಿತಾ ।
ವೈರಾಗ್ಯಜ್ಞಾನನಿರತಾ ನಿರಾಲೋಕಾ ನಿರಿನ್ದ್ರಿಯಾ ॥ 12।159 ॥
ವಿಚಿತ್ರಗಹನಾಧಾರಾ ಶಾಶ್ವತಸ್ಥಾನವಾಸಿನೀ ।
ಸ್ಥಾನೇಶ್ವರೀ ನಿರಾನನ್ದಾ ತ್ರಿಶೂಲವರಧಾರಿಣೀ ॥ 12।160 ॥
ಅಶೇಷದೇವತಾಮೂರ್ತ್ತಿರ್ದೇವತಾ ವರದೇವತಾ ।
ಗಣಾಮ್ಬಿಕಾ ಗಿರೇಃ ಪುತ್ರೀ ನಿಶುಮ್ಭವಿನಿಪಾತಿನೀ ॥ 12।161 ॥
ಅವರ್ಣಾ ವರ್ಣರಹಿತಾ ತ್ರಿವರ್ಣಾ ಜೀವಸಂಭವಾ ।
ಅನನ್ತವರ್ಣಾಽನನ್ಯಸ್ಥಾ ಶಂಕರೀ ಶಾನ್ತಮಾನಸಾ ॥ 12।162 ॥
ಅಗೋತ್ರಾ ಗೋಮತೀ ಗೋಪ್ತ್ರೀ ಗುಹ್ಯರೂಪಾ ಗುಣೋತ್ತರಾ ।
ಗೌರ್ಗೀರ್ಗವ್ಯಪ್ರಿಯಾ ಗೌಣೀ ಗಣೇಶ್ವರನಮಸ್ಕೃತಾ ॥ 12।163 ॥
ಸತ್ಯಮಾತಾ ಸತ್ಯಸಂಧಾ ತ್ರಿಸಂಧ್ಯಾ ಸಂಧಿವರ್ಜಿತಾ ।
ಸರ್ವವಾದಾಶ್ರಯಾ ಸಾಂಖ್ಯಾ ಸಾಂಖ್ಯಯೋಗಸಮುದ್ಭವಾ ॥ 12।164 ॥
ಅಸಂಖ್ಯೇಯಾಽಪ್ರಮೇಯಾಖ್ಯಾ ಶೂನ್ಯಾ ಶುದ್ಧಕುಲೋದ್ಭವಾ ।
ಬಿನ್ದುನಾದಸಮುತ್ಪತ್ತಿಃ ಶಂಭುವಾಮಾ ಶಶಿಪ್ರಭಾ ॥ 12।165 ॥
ಪಿಷಂಗಾ ಭೇದರಹಿತಾ ಮನೋಜ್ಞಾ ಮಧುಸೂದನೀ ।
ಮಹಾಶ್ರೀಃ ಶ್ರೀಸಮುತ್ಪತ್ತಿಸ್ತಮಃಪಾರೇ ಪ್ರತಿಷ್ಠಿತಾ ॥ 12।166 ॥
ತ್ರಿತತ್ತ್ವಮಾತಾ ತ್ರಿವಿಧಾ ಸುಸೂಕ್ಷ್ಮಪದಸಂಶ್ರಯಾ ।
ಶನ್ತಾ ಭೀತಾ ಮಲಾತೀತಾ ನಿರ್ವಿಕಾರಾ ನಿರಾಶ್ರಯಾ ॥ 12।167 ॥
ಶಿವಾಖ್ಯಾ ಚಿತ್ತನಿಲಯಾ ಶಿವಜ್ಞಾನಸ್ವರೂಪಿಣೀ ।
ದೈತ್ಯದಾನವನಿರ್ಮಾತ್ರೀ ಕಾಶ್ಯಪೀ ಕಾಲಕರ್ಣಿಕಾ ॥ 12।168 ॥
ಶಾಸ್ತ್ರಯೋನಿಃ ಕ್ರಿಯಾಮೂರ್ತಿಶ್ಚತುರ್ವರ್ಗಪ್ರದರ್ಶಿಕಾ ।
ನಾರಾಯಣೀ ನರೋದ್ಭೂತಿಃ ಕೌಮುದೀ ಲಿಂಗಧಾರಿಣೀ ॥ 12।169 ॥
ಕಾಮುಕೀ ಲಲಿತಾಭಾವಾ ಪರಾಪರವಿಭೂತಿದಾ ।
ಪರಾನ್ತಜಾತಮಹಿಮಾ ಬಡವಾ ವಾಮಲೋಚನಾ ॥ 12।170 ॥
ಸುಭದ್ರಾ ದೇವಕೀ ಸೀತಾ ವೇದವೇದಾಂಗಪಾರಗಾ ।
ಮನಸ್ವಿನೀ ಮನ್ಯುಮಾತಾ ಮಹಾಮನ್ಯುಸಮುದ್ಭವಾ ॥ 12।171 ॥
ಅಮೃತ್ಯುರಮೃತಾಸ್ವಾದಾ ಪುರುಹೂತಾ ಪುರುಷ್ಟುತಾ ।
ಅಶೋಚ್ಯಾ ಭಿನ್ನವಿಷಯಾ ಹಿರಣ್ಯರಜತಪ್ರಿಯಾ ॥ 12।172 ॥
ಹಿರಣ್ಯಾ ರಾಜತೀ ಹೈಮಾ ಹೇಮಾಭರಣಭೂಷಿತಾ ।
ವಿಭ್ರಾಜಮಾನಾ ದುರ್ಜ್ಞೇಯಾ ಜ್ಯೋತಿಷ್ಟೋಮಫಲಪ್ರದಾ ॥ 12।173 ॥
ಮಹಾನಿದ್ರಾಸಮುದ್ಭೂತಿರನಿದ್ರಾ ಸತ್ಯದೇವತಾ ।
ದೀರ್ಘಾಕಕುದ್ಮಿನೀ ಹೃದ್ಯಾ ಶಾನ್ತಿದಾ ಶಾನ್ತಿವರ್ದ್ಧಿನೀ ॥ 12।174 ॥
ಲಕ್ಷ್ಮ್ಯಾದಿಶಕ್ತಿಜನನೀ ಶಕ್ತಿಚಕ್ರಪ್ರವರ್ತಿಕಾ ।
ತ್ರಿಶಕ್ತಿಜನನೀ ಜನ್ಯಾ ಷಡೂರ್ಮಿಪರಿವರ್ಜಿತಾ ॥ 12।175 ॥
ಸುಧಾಮಾ ಕರ್ಮಕರಣೀ ಯುಗಾನ್ತದಹನಾತ್ಮಿಕಾ ।
ಸಂಕರ್ಷಣೀ ಜಗದ್ಧಾತ್ರೀ ಕಾಮಯೋನಿಃ ಕಿರೀಟಿನೀ ॥ 12।176 ॥
ಐನ್ದ್ರೀ ತ್ರೈಲೋಕ್ಯನಮಿತಾ ವೈಷ್ಣವೀ ಪರಮೇಶ್ವರೀ ।
ಪ್ರದ್ಯುಮ್ನದಯಿತಾ ದಾತ್ರೀ ಯುಗ್ಮದೃಷ್ಟಿಸ್ತ್ರಿಲೋಚನಾ ॥ 12।177 ॥
ಮದೋತ್ಕಟಾ ಹಂಸಗತಿಃ ಪ್ರಚಂಡಾ ಚಂಡವಿಕ್ರಮಾ ।
ವೃಷಾವೇಶಾ ವಿಯನ್ಮಾತಾ ವಿನ್ಧ್ಯಪರ್ವತವಾಸಿನೀ ॥ 12।178 ॥
ಹಿಮವನ್ಮೇರುನಿಲಯಾ ಕೈಲಾಸಗಿರಿವಾಸಿನೀ ।
ಚಾಣೂರಹನ್ತೃತನಯಾ ನೀತಿಜ್ಞಾ ಕಾಮರೂಪಿಣೀ ॥ 12।179 ॥
ವೇದವಿದ್ಯಾವ್ರತಸ್ನಾತಾ ಧರ್ಮಶೀಲಾಽನಿಲಾಶನಾ ।
ವೀರಭದ್ರಪ್ರಿಯಾ ವೀರಾ ಮಹಾಕಾಮಸಮುದ್ಭವಾ ॥ 12।180 ॥
ವಿದ್ಯಾಧರಪ್ರಿಯಾ ಸಿದ್ಧಾ ವಿದ್ಯಾಧರನಿರಾಕೃತಿಃ ।
ಆಪ್ಯಾಯನೀ ಹರನ್ತೀ ಚ ಪಾವನೀ ಪೋಷಣೀ ಕಲಾ ॥ 12।181 ॥
ಮಾತೃಕಾ ಮನ್ಮಥೋದ್ಭೂತಾ ವಾರಿಜಾ ವಾಹನಪ್ರಿಯಾ ।
ಕರೀಷಿಣೀ ಸುಧಾವಾಣೀ ವೀಣಾವಾದನತತ್ಪರಾ ॥ 12।182 ॥
ಸೇವಿತಾ ಸೇವಿಕಾ ಸೇವ್ಯಾ ಸಿನೀವಾಲೀ ಗರುತ್ಮತೀ ।
ಅರುನ್ಧತೀ ಹಿರಣ್ಯಾಕ್ಷೀ ಮೃಗಾಂಕಾ ಮಾನದಾಯಿನೀ ॥ 12।183 ॥
ವಸುಪ್ರದಾ ವಸುಮತೀ ವಸೋರ್ದ್ಧಾರಾ ವಸುಂಧರಾ ।
ಧಾರಾಧರಾ ವರಾರೋಹಾ ವರಾವರಸಹಸ್ರದಾ ॥ 12।184 ॥
ಶ್ರೀಫಲಾ ಶ್ರೀಮತೀ ಶ್ರೀಶಾ ಶ್ರೀನಿವಾಸಾ ಶಿವಪ್ರಿಯಾ ।
ಶ್ರೀಧರಾ ಶ್ರೀಕರೀ ಕಲ್ಯಾ ಶ್ರೀಧರಾರ್ದ್ಧಶರೀರಿಣೀ ॥ 12।185 ॥
ಅನನ್ತದೃಷ್ಟಿರಕ್ಷುದ್ರಾ ಧಾತ್ರೀಶಾ ಧನದಪ್ರಿಯಾ ।
ನಿಹನ್ತ್ರೀ ದೈತ್ಯಸಂಘಾನಾಂ ಸಿಹಿಕಾ ಸಿಹವಾಹನಾ ॥ 12।186 ॥
ಸುಷೇಣಾ ಚನ್ದ್ರನಿಲಯಾ ಸುಕೀರ್ತಿಶ್ಛಿನ್ನಸಂಶಯಾ ।
ರಸಜ್ಞಾ ರಸದಾ ರಾಮಾ ಲೇಲಿಹಾನಾಮೃತಸ್ರವಾ ॥ 12।187 ॥
ನಿತ್ಯೋದಿತಾ ಸ್ವಯಂಜ್ಯೋತಿರುತ್ಸುಕಾ ಮೃತಜೀವನಾ ।
ವಜ್ರದಂಡಾ ವಜ್ರಜಿಹ್ವಾ ವೈದೇಹೀ ವಜ್ರವಿಗ್ರಹಾ ॥ 12।188 ॥
ಮಂಗಲ್ಯಾ ಮಂಗಲಾ ಮಾಲಾ ಮಲಿನಾ ಮಲಹಾರಿಣೀ ।
ಗಾನ್ಧರ್ವೀ ಗಾರುಡೀ ಚಾನ್ದ್ರೀ ಕಮ್ಬಲಾಶ್ವತರಪ್ರಿಯಾ ॥ 12।189 ॥
ಸೌದಾಮಿನೀ ಜನಾನನ್ದಾ ಭ್ರುಕುಟೀಕುಟಿಲಾನನಾ ।
ಕರ್ಣಿಕಾರಕರಾ ಕಕ್ಷ್ಯಾ ಕಂಸಪ್ರಾಣಾಪಹಾರಿಣೀ ॥ 12।190 ॥
ಯುಗಂಧರಾ ಯುಗಾವರ್ತ್ತಾ ತ್ರಿಸಂಧ್ಯಾ ಹರ್ಷವರ್ದ್ಧನೀ ।
ಪ್ರತ್ಯಕ್ಷದೇವತಾ ದಿವ್ಯಾ ದಿವ್ಯಗನ್ಧಾ ದಿವಾ ಪರಾ ॥ 12।191 ॥
ಶಕ್ರಾಸನಗತಾ ಶಾಕ್ರೀ ಸಾನ್ಧ್ಯಾ ಚಾರುಶರಾಸನಾ ।
ಇಷ್ಟಾ ವಿಶಿಷ್ಟಾ ಶಿಷ್ಟೇಷ್ಟಾ ಶಿಷ್ಟಾಶಿಷ್ಟಪ್ರಪೂಜಿತಾ ॥ 12।192 ॥
ಶತರೂಪಾ ಶತಾವರ್ತ್ತಾ ವಿನತಾ ಸುರಭಿಃ ಸುರಾ ।
ಸುರೇನ್ದ್ರಮಾತಾ ಸುದ್ಯುಮ್ನಾ ಸುಷುಮ್ನಾ ಸೂರ್ಯಸಂಸ್ಥಿತಾ ॥ 12।193 ॥
ಸಮೀಕ್ಷ್ಯಾ ಸತ್ಪ್ರತಿಷ್ಠಾ ಚ ನಿವೃತ್ತಿರ್ಜ್ಞಾನಪಾರಗಾ ।
ಧರ್ಮಶಾಸ್ತ್ರಾರ್ಥಕುಶಲಾ ಧರ್ಮಜ್ಞಾ ಧರ್ಮವಾಹನಾ ॥ 12।194 ॥
ಧರ್ಮಾಧರ್ಮವಿನಿರ್ಮಾತ್ರೀ ಧಾರ್ಮಿಕಾಣಾಂ ಶಿವಪ್ರದಾ ।
ಧರ್ಮಶಕ್ತಿರ್ಧರ್ಮಮಯೀ ವಿಧರ್ಮಾ ವಿಶ್ವಧರ್ಮಿಣೀ ॥ 12।195 ॥
ಧರ್ಮಾನ್ತರಾ ಧರ್ಮಮಯೀ ಧರ್ಮಪೂರ್ವಾ ಧನಾವಹಾ ।
ಧರ್ಮೋಪದೇಷ್ಟ್ರೀ ಧರ್ಮತ್ಮಾ ಧರ್ಮಗಮ್ಯಾ ಧರಾಧರಾ ॥ 12।196 ॥
ಕಾಪಾಲೀ ಶಕಲಾ ಮೂರ್ತ್ತಿಃ ಕಲಾ ಕಲಿತವಿಗ್ರಹಾ ।
ಸರ್ವಶಕ್ತಿವಿನಿರ್ಮುಕ್ತಾ ಸರ್ವಶಕ್ತ್ಯಾಶ್ರಯಾಶ್ರಯಾ ॥ 12।197 ॥
ಸರ್ವಾ ಸರ್ವೇಶ್ವರೀ ಸೂಕ್ಷ್ಮಾ ಸೂಕ್ಷ್ಮಾಜ್ಞಾನಸ್ವರೂಪಿಣೀ ।
ಪ್ರಧಾನಪುರುಷೇಶೇಷಾ ಮಹಾದೇವೈಕಸಾಕ್ಷಿಣೀ ॥ 12।198 ॥
ಸದಾಶಿವಾ ವಿಯನ್ಮೂರ್ತ್ತಿರ್ವಿಶ್ವಮೂರ್ತ್ತಿರಮೂರ್ತ್ತಿಕಾ ।
ಏವಂ ನಾಮ್ನಾಂ ಸಹಸ್ರೇಣ ಸ್ತುತ್ವಾಽಸೌ ಹಿಮವಾನ್ ಗಿರಿಃ ॥ 12।199 ॥
ಭೂಯಃ ಪ್ರಣಮ್ಯ ಭೀತಾತ್ಮಾ ಪ್ರೋವಾಚೇದಂ ಕೃತಾಂಜಲಿಃ ।
ಯದೇತದೈಶ್ವರಂ ರೂಪಂ ಘೋರಂ ತೇ ಪರಮೇಶ್ವರಿ ॥ 12।200 ॥
ಭೀತೋಽಸ್ಮಿ ಸಾಮ್ಪ್ರತಂ ದೃಷ್ಟ್ವಾ ರೂಪಮನ್ಯತ್ ಪ್ರದರ್ಶಯ ।
ಏವಮುಕ್ತಾಽಥ ಸಾ ದೇವೀ ತೇನ ಶೈಲೇನ ಪಾರ್ವತೀ ॥ 12।201 ॥
ಸಂಹೃತ್ಯ ದರ್ಶಯಾಮಾಸ ಸ್ವರೂಪಮಪರಂ ಪುನಃ ।
ನೀಲೋತ್ಪಲದಲಪ್ರಖ್ಯಂ ನೀಲೋತ್ಪಲಸುಗನ್ಧಿಕಮ್ ॥ 12।202 ॥
ದ್ವಿನೇತ್ರಂ ದ್ವಿಭುಜಂ ಸೌಮ್ಯಂ ನೀಲಾಲಕವಿಭೂಷಿತಮ್ ।
ರಕ್ತಪಾದಾಮ್ಬುಜತಲಂ ಸುರಕ್ತಕರಪಲ್ಲವಮ್ ॥ 12।203 ॥
ಶ್ರೀಮದ್ವಿಶಾಲಸಂವೃತ್ತಂಲಲಾಟತಿಲಕೋಜ್ಜ್ವಲಮ್ ।
ಭೂಷಿತಂ ಚಾರುಸರ್ವಾಂಗಂ ಭೂಷಣೈರತಿಕೋಮಲಮ್ ॥ 12।204 ॥
ದಧಾನಮುರಸಾ ಮಾಲಾಂ ವಿಶಾಲಾಂ ಹೇಮನಿರ್ಮಿತಾಮ್ ।
ಈಷತ್ಸ್ಮಿತಂ ಸುಬಿಮ್ಬೋಷ್ಠಂ ನೂಪುರಾರಾವಸಂಯುತಮ್ ॥ 12।205 ॥
ಪ್ರಸನ್ನವದನಂ ದಿವ್ಯಮನನ್ತಮಹಿಮಾಸ್ಪದಮ್ ।
ತದೀದೃಶಂ ಸಮಾಲೋಕ್ಯ ಸ್ವರೂಪಂ ಶೈಲಸತ್ತಮಃ ॥ 12।206 ॥
ಭೀತಿಂ ಸಂತ್ಯಜ್ಯ ಹೃಷ್ಟಾತ್ಮಾ ಬಭಾಷೇ ಪರಮೇಶ್ವರೀಮ್ ।
ಹಿಮವಾನುವಾಚ
ಅದ್ಯ ಮೇ ಸಫಲಂ ಜನ್ಮ ಅದ್ಯ ಮೇ ಸಫಲಂ ತಪಃ ॥ 12।207 ॥
ಯನ್ಮೇ ಸಾಕ್ಷಾತ್ತ್ವಮವ್ಯಕ್ತಾ ಪ್ರಸನ್ನಾ ದೃಷ್ಟಿಗೋಚರಾ ।
ತ್ವಯಾ ಸೃಷ್ಟಂ ಜಗತ್ ಸರ್ವಂ ಪ್ರಧಾನಾದ್ಯಂ ತ್ವಯಿ ಸ್ಥಿತಮ್ ॥ 12।208 ॥
ತ್ವಯ್ಯೇವ ಲೀಯತೇ ದೇವಿ ತ್ವಮೇವ ಚ ಪರಾ ಗತಿಃ ।
ವದನ್ತಿ ಕೇಚಿತ್ ತ್ವಾಮೇವ ಪ್ರಕೃತಿಂ ಪ್ರಕೃತೇಃ ಪರಾಮ್ ॥ 12।209 ॥
ಅಪರೇ ಪರಮಾರ್ಥಜ್ಞಾಃ ಶಿವೇತಿ ಶಿವಸಂಶ್ರಯಾತ್ ।
ತ್ವಯಿ ಪ್ರಧಾನಂ ಪುರುಷೋ ಮಹಾನ್ ಬ್ರಹ್ಮಾ ತಥೇಶ್ವರಃ ॥ 12।210 ॥
ಅವಿದ್ಯಾ ನಿಯತಿರ್ಮಾಯಾ ಕಲಾದ್ಯಾಃ ಶತಶೋಽಭವನ್ ।
ತ್ವಂ ಹಿ ಸಾ ಪರಮಾ ಶಕ್ತಿರನನ್ತಾ ಪರಮೇಷ್ಠಿನೀ ॥ 12।211 ॥
ಸರ್ವಭೇದವಿನಿರ್ಮುಕ್ತಾ ಸರ್ವೇಭೇದಾಶ್ರಯಾಶ್ರಯಾ ।
ತ್ವಾಮಧಿಷ್ಠಾಯ ಯೋಗೇಶಿ ಮಹಾದೇವೋ ಮಹೇಶ್ವರಃ ॥ 12।212 ॥
ಪ್ರಧಾನಾದ್ಯಂ ಜಗತ್ ಕೃತ್ಸ್ನಂ ಕರೋತಿ ವಿಕರೋತಿ ಚ ।
ತ್ವಯೈವ ಸಂಗತೋ ದೇವಃ ಸ್ವಮಾನನ್ದಂ ಸಮಶ್ನುತೇ ॥ 12।213 ॥
ತ್ವಮೇವ ಪರಮಾನನ್ದಸ್ತ್ವಮೇವಾನನ್ದದಾಯಿನೀ ।
ತ್ವಮಕ್ಷರಂ ಪರಂ ವ್ಯೋಮ ಮಹಜ್ಜ್ಯೋತಿರ್ನಿರಂಜನಮ್ ॥ 12।214 ॥
ಶಿವಂ ಸರ್ವಗತಂ ಸೂಕ್ಷ್ಮಂ ಪರಂ ಬ್ರಹ್ಮ ಸನಾತನಮ್ ।
ತ್ವಂ ಶಕ್ರಃ ಸರ್ವದೇವಾನಾಂ ಬ್ರಹ್ಮಾ ಬ್ರಹ್ಮವಿದಾಮಸಿ ॥ 12।215 ॥
ವಾಯುರ್ಬಲವತಾಂ ದೇವಿ ಯೋಗಿನಾಂ ತ್ವಂ ಕುಮಾರಕಃ ।
ಋಷೀಣಾಂ ಚ ವಸಿಷ್ಠಸ್ತ್ವಂ ವ್ಯಾಸೋ ವೇದವಿದಾಮಸಿ ॥ 12।216 ॥
ಸಾಂಖ್ಯಾನಾಂ ಕಪಿಲೋ ದೇವೋ ರುದ್ರಾಣಾಮಸಿ ಶಂಕರಃ ।
ಆದಿತ್ಯಾನಾಮುಪೇನ್ದ್ರಸ್ತ್ವಂ ವಸೂನಾಂ ಚೈವ ಪಾವಕಃ ॥ 12।217 ॥
ವೇದಾನಾಂ ಸಾಮವೇದಸ್ತ್ವಂ ಗಾಯತ್ರೀ ಛನ್ದಸಾಮಸಿ ।
ಅಧ್ಯಾತ್ಮವಿದ್ಯಾ ವಿದ್ಯಾನಾಂ ಗತೀನಾಂ ಪರಮಾ ಗತಿಃ ॥ 12।218 ॥
ಮಾಯಾ ತ್ವಂ ಸರ್ವಶಕ್ತೀನಾಂ ಕಾಲಃ ಕಲಯತಾಮಸಿ ।
ಓಂಕಾರಃ ಸರ್ವಗುಹ್ಯಾನಾಂ ವರ್ಣಾನಾಂ ಚ ದ್ವಿಜಾತ್ತಮಃ ॥ 12।219 ॥
ಆಶ್ರಮಾಣಾಂ ಚ ಗಾರ್ಹಸ್ಥ್ಯಮೀಶ್ವರಾಣಾಂ ಮಹೇಶ್ವರಃ ।
ಪುಂಸಾಂ ತ್ವಮೇಕಃ ಪುರುಷಃ ಸರ್ವಭೂತಹೃದಿ ಸ್ಥಿತಃ ॥ 12।220 ॥
ಸರ್ವೋಪನಿಷದಾಂ ದೇವಿ ಗುಹ್ಯೋಪನಿಷದುಚ್ಯತೇ ।
ಈಶಾನಶ್ಚಾಸಿ ಕಲ್ಪಾನಾಂ ಯುಗಾನಾಂ ಕೃತಮೇವ ಚ ॥ 12।221 ॥
ಆದಿತ್ಯಃ ಸರ್ವಮಾರ್ಗಾಣಾಂ ವಾಚಾಂ ದೇವಿ ಸರಸ್ವತೀ ।
ತ್ವಂ ಲಕ್ಷ್ಮೀಶ್ಚಾರುರೂಪಾಣಾಂ ವಿಷ್ಣುರ್ಮಾಯಾವಿನಾಮಸಿ ॥ 12।222 ॥
ಅರುನ್ಧತೀ ಸತೀನಾಂ ತ್ವಂ ಸುಪರ್ಣಃ ಪತತಾಮಸಿ ।
ಸೂಕ್ತಾನಾಂ ಪೌರುಷಂ ಸೂಕ್ತಂ ಸಾಮ ಜ್ಯೇಷ್ಟಂ ಚ ಸಾಮಸು ॥ 12।223 ॥
ಸಾವಿತ್ರೀ ಚಾಸಿ ಜಾಪ್ಯಾನಾಂ ಯಜುಷಾಂ ಶತರುದ್ರಿಯಮ್ ।
ಪರ್ವತಾನಾಂ ಮಹಾಮೇರುರನನ್ತೋ ಭೋಗಿನಾಮಸಿ ॥ 12।224 ॥
ಸರ್ವೇಷಾಂ ತ್ವಂ ಪರಂ ಬ್ರಹ್ಮ ತ್ವನ್ಮಯಂ ಸರ್ವಮೇವ ಹಿ ॥ 12।225 ॥
ರೂಪಂ ತವಾಶೇಷಕಲಾವಿಹೀನ-
ಮಗೋಚರಂ ನಿರ್ಮಲಮೇಕರೂಪಮ್ ।
ಅನಾದಿಮಧ್ಯಾನ್ತಮನನ್ತಾಮಾದ್ಯಂ
ನಮಾಮಿ ಸತ್ಯಂ ತಮಸಃ ಪರಸ್ತಾತ್ ॥ 12।226 ॥
ಯದೇವ ಪಶ್ಯನ್ತಿ ಜಗತ್ಪ್ರಸೂತಿಂ
ವೇದಾನ್ತವಿಜ್ಞಾನವಿನಿಶ್ಚಿತಾರ್ಥಾಃ ।
ಆನನ್ದಮಾತ್ರಂ ಪ್ರಣವಾಭಿಧಾನಂ
ತದೇವ ರೂಪಂ ಶರಣಂ ಪ್ರಪದ್ಯೇ ॥ 12।227 ॥
ಅಶೇಷಭೂತಾನ್ತರಸನ್ನಿವಿಷ್ಟಂ
ಪ್ರಧಾನಪುಂಯೋಗವಿಯೋಗಹೇತುಮ್ ।
ತೇಜೋಮಯಂ ಜನ್ಮವಿನಾಶಹೀನಂ
ಪ್ರಾಣಾಭಿಧಾನಂ ಪ್ರಣತೋಽಸ್ಮಿ ರೂಪಮ್ ॥ 12।228 ॥
ಆದ್ಯನ್ತಹೀನಂ ಜಗದಾತ್ಮಭೂತಂ
ವಿಭಿನ್ನಸಂಸ್ಥಂ ಪ್ರಕೃತೇಃ ಪರಸ್ತಾತ್ ।
ಕೂಟಸ್ಥಮವ್ಯಕ್ತವಪುಸ್ತಥೈವ
ನಮಾಮಿ ರೂಪಂ ಪುರುಷಾಭಿಧಾನಮ್ ॥ 12।229 ॥
ಸರ್ವಾಶ್ರಯಂ ಸರ್ವಜಗದ್ವಿಧಾನಂ
ಸರ್ವತ್ರಗಂ ಜನ್ಮವಿನಾಶಹೀನಮ್ ।
ಸೂಕ್ಷ್ಮಂ ವಿಚಿತ್ರಂ ತ್ರಿಗುಣಂ ಪ್ರಧಾನಂ
ನತೋಽಸ್ಮಿ ತೇ ರೂಪಮರೂಪಭೇದಮ್ ॥ 12।230 ॥
ಆದ್ಯಂ ಮಹಾನ್ತಂ ಪುರುಷಾತ್ಮರೂಪಂ
ಪ್ರಕೃತ್ಯವಸ್ಥಂ ತ್ರಿಗುಣಾತ್ಮಬೀಜಮ್ ।
ಐಶ್ವರ್ಯವಿಜ್ಞಾನವಿರಾಗಧರ್ಮೈಃ
ಸಮನ್ವಿತಂ ದೇವಿ ನತೋಽಸ್ಮಿ ರೂಪಮ್ ॥ 12।231 ॥
ದ್ವಿಸಪ್ತಲೋಕಾತ್ಮಕಮಮ್ಬುಸಂಸ್ಥಂ
ವಿಚಿತ್ರಭೇದಂ ಪುರುಷೈಕನಾಥಮ್ ।
ಅನನ್ತಭೂತೈರಧಿವಾಸಿತಂ ತೇ
ನತೋಽಸ್ಮಿ ರೂಪಂ ಜಗದಂಡಸಂಜ್ಞಮ್ ॥ 12।231 ॥
ಅಶೇಷವೇದಾತ್ಮಕಮೇಕಮಾದ್ಯಂ
ಸ್ವತೇಜಸಾ ಪೂರಿತಲೋಕಭೇದಮ್ ।
ತ್ರಿಕಾಲಹೇತುಂ ಪರಮೇಷ್ಠಿಸಂಜ್ಞಂ
ನಮಾಮಿ ರೂಪಂ ರವಿಮಂಡಲಸ್ಥಮ್ ॥ 12।232 ॥
ಸಹಸ್ರಮೂರ್ಧಾನಮನನ್ತಶಕ್ತಿಂ
ಸಹಸ್ರಬಾಹುಂ ಪುರುಷಂ ಪುರಾಣಮ್ ।
ಶಯಾನಮನ್ತಃ ಸಲಿಲೇ ತಥೈವ
ನಾರಾಯಣಾಖ್ಯಂ ಪ್ರಣತೋಽಸ್ಮಿ ರೂಪಮ್ ॥ 12।233 ॥
ದಂಷ್ಟ್ರಾಕರಾಲಂ ತ್ರಿದಶಾಭಿವನ್ದ್ಯಂ
ಯುಗಾನ್ತಕಾಲಾನಲಕಲ್ಪರೂಪಮ್ ।
ಅಶೇಷಭೂತಾಂಡವಿನಾಶಹೇತುಂ
ನಮಾಮಿ ರೂಪಂ ತವ ಕಾಲಸಂಜ್ಞಮ್ ॥ 12।234 ॥
ಫಣಾಸಹಸ್ರೇಣ ವಿರಾಜಮಾನಂ
ಭೋಗೀನ್ದ್ರಮುಖ್ಯೈರಭಿಪೂಜ್ಯಮಾನಮ್ ।
ಜನಾರ್ದನಾರೂಢತನುಂ ಪ್ರಸುಪ್ತಂ
ನತೋಽಸ್ಮಿ ರೂಪಂ ತವ ಶೇಷಸಂಜ್ಞಮ್ ॥ 12।235 ॥
ಅವ್ಯಾಹತೈಶ್ವರ್ಯಮಯುಗ್ಮನೇತ್ರಂ
ಬ್ರಹ್ಮಾಮೃತಾನನ್ದರಸಜ್ಞಮೇಕಮ್ ।
ಯುಗಾನ್ತಶೇಷಂ ದಿವಿ ನೃತ್ಯಮಾನಂ
ನತೋಽಸ್ಮಿ ರೂಪಂ ತವ ರುದ್ರಸಂಜ್ಞಮ್ ॥ 12।236 ॥
ಪ್ರಹೀಣಶೋಕಂ ವಿಮಲಂ ಪವಿತ್ರಂ
ಸುರಾಸುರೈರರ್ಚಿತಾಪಾದಪದ್ಮಮ್ ।
ಸುಕೋಮಲಂ ದೇವಿ ವಿಭಾಸಿ ಶುಭ್ರಂ
ನಮಾಮಿ ತೇ ರೂಪಮಿದಂ ಭವಾನಿ ॥ 12।237 ॥
ಓಂ ನಮಸ್ತೇಽಸ್ತು ಮಹಾದೇವಿ ನಮಸ್ತೇ ಪರಮೇಶ್ವರಿ ।
ನಮೋ ಭಗವತೀಶಾನಿ ಶಿವಾಯೈ ತೇ ನಮೋ ನಮಃ ॥ 12।238 ॥
ತ್ವನ್ಮಯೋಽಹಂ ತ್ವದಾಧಾರಸ್ತ್ವಮೇವ ಚ ಗತಿರ್ಮಮ ।
ತ್ವಾಮೇವ ಶರಣಂ ಯಾಸ್ಯೇ ಪ್ರಸೀದ ಪರಮೇಶ್ವರಿ ॥ 12।239 ॥
ಮಯಾ ನಾಸ್ತಿ ಸಮೋ ಲೋಕೇ ದೇವೋ ವಾ ದಾನವೋಽಪಿ ವಾ ।
ಜಗನ್ಮಾತೈವ ಮತ್ಪುತ್ರೀ ಸಂಭೂತಾ ತಪಸಾ ಯತಃ ॥ 12।240 ॥
ಏಷಾ ತವಾಮ್ಬಿಕಾ ದೇವಿ ಕಿಲಾಭೂತ್ಪಿತೃಕನ್ಯಕಾ ।
ಮೇನಾಽಶೇಷಜಗನ್ಮಾತುರಹೋ ಪುಣ್ಯಸ್ಯ ಗೌರವಮ್ ॥ 12।241 ॥
ಪಾಹಿ ಮಾಮಮರೇಶಾನಿ ಮೇನಯಾ ಸಹ ಸರ್ವದಾ ।
ನಮಾಮಿ ತವ ಪಾದಾಬ್ಜಂ ವ್ರಜಾಮಿ ಶರಣಂ ಶಿವಾಮ್ ॥ 12।242 ॥
ಅಹೋ ಮೇ ಸುಮಹದ್ ಭಾಗ್ಯಂ ಮಹಾದೇವೀಸಮಾಗಮಾತ್ ।
ಆಜ್ಞಾಪಯ ಮಹಾದೇವಿ ಕಿಂ ಕರಿಷ್ಯಾಮಿ ಶಂಕರಿ ॥ 12।243 ॥
ಏತಾವದುಕ್ತ್ವಾ ವಚನಂ ತದಾ ಹಿಮಗಿರೀಶ್ವರಃ ।
ಸಮ್ಪ್ರೇಕ್ಷಣಮಾಣೋ ಗಿರಿಜಾಂ ಪ್ರಾಂಜಲಿಃ ಪಾರ್ಶ್ವತೋಽಭವತ್ ॥ 12।244 ॥
ಅಥ ಸಾ ತಸ್ಯ ವಚನಂ ನಿಶಮ್ಯ ಜಗತೋಽರಣಿಃ ।
ಸಸ್ಮಿತಂ ಪ್ರಾಹ ಪಿತರಂ ಸ್ಮೃತ್ವಾ ಪಶುಪತಿಂ ಪತಿಮ್ ॥ 12।246 ॥
ದೇವ್ಯುವಾಚ
ಶೃಣುಷ್ವ ಚೈತತ್ ಪ್ರಥಮಂ ಗುಹ್ಯಮೀಶ್ವರಗೋಚರಮ್ ।
ಉಪದೇಶಂ ಗಿರಿಶ್ರೇಷ್ಠ ಸೇವಿತಂ ಬ್ರಹ್ಮವಾದಿಭಿಃ ॥ 12।247 ॥
ಯನ್ಮೇ ಸಾಕ್ಷಾತ್ ಪರಂ ರೂಪಮೈಶ್ವರಂ ದೃಷ್ಟಮದ್ಭುತಮ್ ।
ಸರ್ವಶಕ್ತಿಸಮಾಯುಕ್ತಮನನ್ತಂ ಪ್ರೇರಕಂ ಪರಮ್ ॥ 12।248 ॥
ಶಾನ್ತಃ ಸಮಾಹಿತಮನಾ ದಮ್ಭಾಹಂಕಾರವರ್ಜಿತಃ ।
ತನ್ನಿಷ್ಠಸ್ತತ್ಪರೋ ಭೂತ್ವಾ ತದೇವ ಶರಣಂ ವ್ರಜ ॥ 12।249 ॥
ಭಕ್ತ್ಯಾ ತ್ವನನ್ಯಯಾ ತಾತ ಪದ್ಭಾವಂ ಪರಮಾಶ್ರಿತಃ ।
ಸರ್ವಯಜ್ಞತಪೋದಾನೈಸ್ತದೇವಾರ್ಚ್ಚಯ ಸರ್ವದಾ ॥ 12।250 ॥
ತದೇವ ಮನಸಾ ಪಶ್ಯ ತದ್ ಧ್ಯಾಯಸ್ವ ಯಜಸ್ವ ಚ ।
ಮಮೋಪದೇಶಾತ್ಸಂಸಾರಂ ನಾಶಯಾಮಿ ತವಾನಘ ॥ 12।251 ॥
ಅಹಂ ವೈ ಮತ್ಪರಾನ್ ಭಕ್ತಾನೈಶ್ವರಂ ಯೋಗಮಾಸ್ಥಿತಾನ್ ।
ಸಂಸಾರಸಾಗರಾದಸ್ಮಾದುದ್ಧರಾಮ್ಯಚಿರೇಣ ತು ॥ 12।252 ॥
ಧ್ಯಾನೇನ ಕರ್ಮಯೋಗೇನ ಭಕ್ತ್ಯಾ ಜ್ಞಾನೇನ ಚೈವ ಹಿ ।
ಪ್ರಾಪ್ಯಾಽಹಂ ತೇ ಗಿರಿಶ್ರೇಷ್ಠ ನಾನ್ಯಥಾ ಕರ್ಮಕೋಟಿಭಿಃ ॥ 12।253 ॥
ಶ್ರುತಿಸ್ಮೃತ್ಯುದಿತಂ ಸಮ್ಯಕ್ ಕರ್ಮ ವರ್ಣಾಶ್ರಮಾತ್ಮಕಮ್ ।
ಅಧ್ಯಾತ್ಮಜ್ಞಾನಸಹಿತಂ ಮುಕ್ತಯೇ ಸತತಂ ಕುರು ॥ 12।254 ॥
ಧರ್ಮಾತ್ಸಂಜಾಯತೇ ಭಕ್ತಿರ್ಭಕ್ತ್ಯಾ ಸಮ್ಪ್ರಾಪ್ಯತೇ ಪರಮ್ ।
ಶ್ರುತಿಸ್ಮೃತಿಭ್ಯಾಮುದಿತೋ ಧರ್ಮೋ ಯಜ್ಞಾದಿಕೋ ಮತಃ ॥ 12।255 ॥
ನಾನ್ಯತೋ ಜಾಯತೇ ಧರ್ಮೋ ವೇದಾದ್ ಧರ್ಮೋ ಹಿ ನಿರ್ಬಭೌ ।
ತಸ್ಮಾನ್ಮುಮುಕ್ಷುರ್ಧರ್ಮಾರ್ಥೀ ಮದ್ರೂಪಂ ವೇದಮಾಶ್ರಯೇತ್ ॥ 12।256 ॥
ಮಮೈವೈಷಾ ಪರಾ ಶಕ್ತಿರ್ವೇದಸಂಜ್ಞಾ ಪುರಾತನೀ ।
ಋಗ್ಯಜುಃ ಸಾಮರೂಪೇಣ ಸರ್ಗಾದೌ ಸಮ್ಪ್ರವರ್ತ್ತತೇ ॥ 12।257 ॥
ತೇಷಾಮೇವ ಚ ಗುಪ್ತ್ಯರ್ಥಂ ವೇದಾನಾಂ ಭಗವಾನಜಃ ।
ಬ್ರಾಹ್ಮಣಾದೀನ್ ಸಸರ್ಜಾಥ ಸ್ವೇ ಸ್ವೇ ಕರ್ಮಣ್ಯಯೋಜಯತ್ ॥ 12।258 ॥
ಯೇ ನ ಕುರ್ವನ್ತಿ ತದ್ ಧರ್ಮಂ ತದರ್ಥಂ ಬ್ರಹ್ಮನಿರ್ಮಿತಾಃ ।
ತೇಷಾಮಧಸ್ತಾದ್ ನರಕಾಂಸ್ತಾಮಿಸ್ತ್ರಾದೀನಕಲ್ಪಯತ್ ॥ 12।259 ॥
ನ ಚ ವೇದಾದೃತೇ ಕಿಂಚಿಚ್ಛಾಸ್ತ್ರಂ ಧರ್ಮಾಭಿಧಾಯಕಮ್ ।
ಯೋಽನ್ಯತ್ರರಮತೇಸೋಽಸೌ ನ ಸಂಭಾಷ್ಯೋ ದ್ವಿಜಾತಿಭಿಃ ॥ 12।260 ॥
ಯಾನಿ ಶಾಸ್ತ್ರಾಣಿ ದೃಶ್ಯನ್ತೇ ಲೋಕೇಽಸ್ಮಿನ್ ವಿವಿಧಾನಿತು ।
ಶ್ರುತಿಸ್ಮೃತಿವಿರುದ್ಧಾನಿ ನಿಷ್ಠಾ ತೇಷಾಂ ಹಿ ತಾಮಸೀ ॥ 12।261 ॥
ಕಾಪಾಲಂ ಪಂಚರಾತ್ರಂ ಚ ಯಾಮಲಂ ವಾಮಮಾರ್ಹತಮ್ ।
ಏವಂವಿಧಾನಿ ಚಾನ್ಯಾನಿ ಮೋಹನಾರ್ಥಾನಿ ತಾನಿ ತು ॥ 12।262 ॥
ಯೇ ಕುಶಾಸ್ತ್ರಾಭಿಯೋಗೇನ ಮೋಹಯನ್ತೀಹ ಮಾನವಾನ್ ।
ಮಯಾ ಸೃಷ್ಟಾನಿ ಶಾಸ್ತ್ರಾಣಿ ಮೋಹಾಯೈಷಾಂ ಭವಾನ್ತರೇ ॥ 12।263 ॥
ವೇದಾರ್ಥವಿತ್ತಮೈಃ ಕಾರ್ಯಂ ಯತ್ ಸ್ಮೃತಂ ಕರ್ಮ ವೈದಿಕಮ್ ।
ತತ್ಪ್ರಯತ್ನೇನ ಕುರ್ವನ್ತಿ ಮತ್ಪ್ರಿಯಾಸ್ತೇ ಹಿ ಯೇ ನರಾಃ ॥ 12।264 ॥
ವರ್ಣಾನಾಮನುಕಮ್ಪಾರ್ಥಂ ಮನ್ನಿಯೋಗಾದ್ವಿರಾಟ್ ಸ್ವಯಮ್ ।
ಸ್ವಾಯಂಭುವೋ ಮನುರ್ಧಾರ್ಮಾನ್ ಮುನೀನಾಂ ಪೂರ್ವಮುಕ್ತವಾನ್ ॥ 12।265 ॥
ಶ್ರುತ್ವಾ ಚಾನ್ಯೇಽಪಿ ಮುನಯಸ್ತನ್ಮುಖಾದ್ ಧರ್ಮಮುತ್ತಮಮ್ ।
ಚಕ್ರುರ್ಧರ್ಮಪ್ರತಿಷ್ಠಾರ್ಥಂ ಧರ್ಮಶಾಸ್ತ್ರಾಣಿ ಚೈವ ಹಿ ॥ 12।266 ॥
ತೇಷು ಚಾನ್ತರ್ಹಿತೇಷ್ವೇವಂ ಯುಗಾನ್ತೇಷು ಮಹರ್ಷಯಃ ।
ಬ್ರಹ್ಮಣೋ ವಚನಾತ್ತಾನಿ ಕರಿಷ್ಯನ್ತಿ ಯುಗೇ ಯುಗೇ ॥ 12।267 ॥
ಅಷ್ಟಾದಶ ಪುರಾಣಾನಿ ವ್ಯಾಸೇನ ಕಥಿತಾನಿ ತು ।
ನಿಯೋಗಾದ್ ಬ್ರಹ್ಮಣೋ ರಾಜಂಸ್ತೇಷು ಧರ್ಮಃ ಪ್ರತಿಷ್ಠಿತಃ ॥ 12।268 ॥
ಅನ್ಯಾನ್ಯುಪಪುರಾಣಾನಿ ತಚ್ಛಿಷ್ಯೈಃ ಕಥಿತಾನಿ ತು ।
ಯುಗೇ ಯುಗೇಽತ್ರ ಸರ್ವೇಷಾಂ ಕರ್ತಾ ವೈ ಧರ್ಮಶಾಸ್ತ್ರವಿತ್ ॥ 12।269 ॥
ಶಿಕ್ಷಾ ಕಲ್ಪೋ ವ್ಯಾಕರಣಂ ನಿರುಕ್ತಂ ಛನ್ದ ಏವ ಚ ।
ಜ್ಯೋತಿಃ ಶಾಸ್ತ್ರಂ ನ್ಯಾಯವಿದ್ಯಾ ಮೀಮಾಂಸಾ ಚೋಪಬೃಂಹಣಮ್ ॥ 12।270 ॥
ಏವಂ ಚತುರ್ದಶೈತಾನಿ ವಿದ್ಯಾಸ್ಥಾನಾನಿ ಸತ್ತಮ ।
ಚತುರ್ವೇದೈಃ ಸಹೋಕ್ತಾನಿ ಧರ್ಮೋ ನಾನ್ಯತ್ರ ವಿದ್ಯತೇ ॥ 12।271 ॥
ಏವಂ ಪೈತಾಮಹಂ ಧರ್ಮಂ ಮನುವ್ಯಾಸಾದಯಃ ಪರಮ್ ।
ಸ್ಥಾಪಯನ್ತಿ ಮಮಾದೇಶಾದ್ ಯಾವದಾಭೂತಸಮ್ಪ್ಲವಮ್ ॥ 12।272 ॥
ಬ್ರಹ್ಮಣಾ ಸಹ ತೇ ಸರ್ವೇ ಸಮ್ಪ್ರಾಪ್ತೇ ಪ್ರತಿಸಂಚರೇ ।
ಪರಸ್ಯಾನ್ತೇ ಕೃತಾತ್ಮಾನಃ ಪ್ರವಿಶನ್ತಿ ಪರಂ ಪದಮ್ ॥ 12।273 ॥
ತಸ್ಮಾತ್ ಸರ್ವಪ್ರಯತ್ನೇನ ಧರ್ಮಾರ್ಥಂ ವೇದಮಾಶ್ರಯೇತ್ ।
ಧರ್ಮೇಣ ಸಹಿತಂ ಜ್ಞಾನಂ ಪರಂ ಬ್ರಹ್ಮ ಪ್ರಕಾಶಯೇತ್ ॥ 12।274 ॥
ಯೇ ತು ಸಂಗಾನ್ ಪರಿತ್ಯಜ್ಯ ಮಾಮೇವ ಶರಣಂ ಗತಾಃ ।
ಉಪಾಸತೇ ಸದಾ ಭಕ್ತ್ಯಾ ಯೋಗಮೈಶ್ವರಮಾಸ್ಥಿತಾಃ ॥ 12।275 ॥
ಸರ್ವಭೂತದಯಾವನ್ತಃ ಶಾನ್ತಾ ದಾನ್ತಾ ವಿಮತ್ಸರಾಃ ।
ಅಮಾನಿನೋ ಬುದ್ಧಿಮನ್ತಸ್ತಾಪಸಾಃ ಶಂಸಿತವ್ರತಾಃ ॥ 12।276 ॥
ಮಚ್ಚಿತ್ತಾ ಮದ್ಗತಪ್ರಾಣಾ ಮಜ್ಜ್ಞಾನಕಥನೇ ರತಾಃ ।
ಸಂನ್ಯಾಸಿನೋ ಗೃಹಸ್ಥಾಶ್ಚ ವನಸ್ಥಾ ಬ್ರಹ್ಮಚಾರಿಣಃ ॥ 12।277 ॥
ತೇಷಾಂ ನಿತ್ಯಾಭಿಯುಕ್ತಾನಾಂ ಮಾಯಾತತ್ತ್ವಂ ಸಮುತ್ಥಿತಮ್ ।
ನಾಶಯಾಮಿ ತಮಃ ಕೃತ್ಸ್ನಂ ಜ್ಞಾನದೀಪೇನ ಮಾ ಚಿರಾತ್ ॥ 12।278 ॥
ತೇ ಸುನಿರ್ಧೂತತಮಸೋ ಜ್ಞಾನೇನೈಕೇನ ಮನ್ಮಯಾಃ ।
ಸದಾನನ್ದಾಸ್ತು ಸಂಸಾರೇ ನ ಜಾಯನ್ತೇ ಪುನಃ ಪುನಃ ॥ 12।279 ॥
ತಸ್ಮಾತ್ ಸರ್ವಪ್ರಕಾರೇಣ ಮದ್ಭಕ್ತೋ ಮತ್ಪರಾಯಣಃ ।
ಮಾಮೇವಾರ್ಚಯ ಸರ್ವತ್ರ ಮನಸಾ ಶರಣಂ ಗತಃ ॥ 12।280 ॥
ಅಶಕ್ತೋ ಯದಿ ಮೇ ಧ್ಯಾತುಮೈಶ್ವರಂ ರೂಪಮವ್ಯಯಮ್ ।
ತತೋ ಮೇ ಸಕಲಂ ರೂಪಂ ಕಾಲಾದ್ಯಂ ಶರಣಂ ವ್ರಜ ॥ 12।281 ॥
ಯದ್ಯತ್ ಸ್ವರೂಪಂ ಮೇ ತಾತ ಮನಸೋ ಗೋಚರಂ ತವ ।
ತನ್ನಿಷ್ಠಸ್ತತ್ಪರೋ ಭೂತ್ವಾ ತದರ್ಚನಪರೋ ಭವ ॥ 12।282 ॥
ಯತ್ತು ಮೇ ನಿಷ್ಕಲಂ ರೂಪಂ ಚಿನ್ಮಾತ್ರಂ ಕೇವಲಂ ಶಿವಮ್ ।
ಸರ್ವೋಪಾಧಿವಿನಿರ್ಮುಕ್ತಮನನ್ತಮಮೃತಂ ಪರಮ್ ॥ 12।283 ॥
ಜ್ಞಾನೇನೈಕೇನ ತಲ್ಲಭ್ಯಂ ಕ್ಲೇಶೇನ ಪರಮಂ ಪದಮ್ ।
ಜ್ಞಾನಮೇವ ಪ್ರಪಶ್ಯನ್ತೋ ಮಾಮೇವ ಪ್ರವಿಶನ್ತಿ ತೇ ॥ 12।284 ॥
ತದ್ಬುದ್ಧಯಸ್ತದಾತ್ಮಾನಸ್ತನ್ನಿಷ್ಠಾಸ್ತತ್ಪರಾಯಣಾಃ ।
ಗಚ್ಛನ್ತ್ಯಪುನರಾವೃತ್ತಿಂ ಜ್ಞಾನನಿರ್ಧೂತಕಲ್ಮಷಾಃ ॥ 12।285 ॥
ಮಾಮನಾಶ್ರಿತ್ಯ ಪರಮಂ ನಿರ್ವಾಣಮಮಲಂ ಪದಮ್ ।
ಪ್ರಾಪ್ಯತೇ ನ ಹಿ ರಾಜೇನ್ದ್ರ ತತೋ ಮಾಂ ಶರಣಂ ವ್ರಜ ॥ 12।286 ॥
ಏಕತ್ವೇನ ಪೃಥಕ್ತ್ವೇನ ತಥಾ ಚೋಭಯಥಾಪಿ ವಾ ।
ಮಾಮುಪಾಸ್ಯ ಮಹಾರಾಜ ತತೋ ಯಾಸ್ಯಾಸಿ ತತ್ಪದಮ್ ॥ 12।287 ॥
ಮಾಮನಾಶ್ರಿತ್ಯ ತತ್ತತ್ತ್ವಂ ಸ್ವಭಾವವಿಮಲಂ ಶಿವಮ್ ।
ಜ್ಞಾಯತೇ ನ ಹಿ ರಾಜೇನ್ದ್ರ ತತೋ ಮಾಂ ಶರಣಂ ವ್ರಜ ॥ 12।288 ॥
ತಸ್ಮಾತ್ ತ್ವಮಕ್ಷರಂ ರೂಪಂ ನಿತ್ಯಂ ಚಾರೂಪಮೈಶ್ವರಮ್ ।
ಆರಾಧಯ ಪ್ರಯತ್ನೇನ ತತೋ ಬನ್ಧಂ ಪ್ರಹಾಸ್ಯಸಿ ॥ 12।289 ॥
ಕರ್ಮಣಾ ಮನಸಾ ವಾಚಾ ಶಿವಂ ಸರ್ವತ್ರ ಸರ್ವದಾ ।
ಸಮಾರಾಧಯ ಭಾವೇನ ತತೋ ಯಾಸ್ಯಸಿ ತತ್ಪದಮ್ ॥ 12।290 ॥
ನ ವೈ ಪಶ್ಯನ್ತಿ ತತ್ತತ್ತ್ವಂ ಮೋಹಿತಾ ಮಮ ಮಾಯಯಾ ।
ಅನಾದ್ಯನನ್ತಂ ಪರಮಂ ಮಹೇಶ್ವರಮಜಂ ಶಿವಮ್ ॥ 12।291 ॥
ಸರ್ವಭೂತಾತ್ಮಭೂತಸ್ಥಂ ಸರ್ವಾಧಾರಂ ನಿರಂಜನಮ್ ।
ನಿತ್ಯಾನನ್ದಂ ನಿರಾಭಾಸಂ ನಿರ್ಗುಣಂ ತಮಸಃ ಪರಮ್ ॥ 12।292 ॥
ಅದ್ವೈತಮಚಲಂ ಬ್ರಹ್ಮ ನಿಷ್ಕಲಂ ನಿಷ್ಪ್ರಪಂಚಕಮ್ ।
ಸ್ವಸಂವೇದ್ಯಮವೇದ್ಯಂ ತತ್ ಪರೇ ವ್ಯೋಮ್ನಿ ವ್ಯವಸ್ಥಿತಮ್ ॥ 12।293 ॥
ಸೂಕ್ಷ್ಮೇಣ ತಮಸಾ ನಿತ್ಯಂ ವೇಷ್ಟಿತಾ ಮಮ ಮಾಯಯಾ ।
ಸಂಸಾರಸಾಗರೇ ಘೋರೇ ಜಾಯನ್ತೇ ಚ ಪುನಃ ಪುನಃ ॥ 12।294 ॥
ಭಕ್ತ್ಯಾ ತ್ವನನ್ಯಯಾ ರಾಜನ್ ಸಮ್ಯಗ್ ಜ್ಞಾನೇನ ಚೈವ ಹಿ ।
ಅನ್ವೇಷ್ಟವ್ಯಂ ಹಿ ತದ್ ಬ್ರಹ್ಮ ಜನ್ಮಬನ್ಧನಿವೃತ್ತಯೇ ॥ 12।295 ॥
ಅಹಂಕಾರಂ ಚ ಮಾತ್ಸರ್ಯಂ ಕಾಮಂ ಕ್ರೋಧಪರಿಗ್ರಹಮ್ ।
ಅಧರ್ಮಾಭಿನಿವೇಶಂ ಚ ತ್ಯಕ್ತ್ವಾ ವೈರಾಗ್ಯಮಾಸ್ಥಿತಃ ॥ 12।296 ॥
ಸರ್ವಭೂತೇಷು ಚಾತ್ಮಾನಂ ಸರ್ವಭೂತಾನಿ ಚಾತ್ಮನಿ ।
ಅನ್ವೀಕ್ಷ್ಯ ಚಾತ್ಮನಾತ್ಮಾನಂ ಬ್ರಹ್ಮಭೂಯಾಯ ಕಲ್ಪತೇ ॥ 12।297 ॥
ಬ್ರಹ್ಮಭೂತಃ ಪ್ರಸನ್ನಾತ್ಮಾ ಸರ್ವಭೂತಾಭಯಪ್ರದಃ ।
ಐಶ್ವರೀಂ ಪರಮಾಂ ಭಕ್ತಿಂ ವಿನ್ದೇತಾನನ್ಯಗಾಮಿನೀಮ್ ॥ 12।298 ॥
ವೀಕ್ಷತೇ ತತ್ಪರಂ ತತ್ತ್ವಮೈಶ್ವರಂ ಬ್ರಹ್ಮನಿಷ್ಕಲಮ್ ।
ಸರ್ವಸಂಸಾರನಿರ್ಮುಕ್ತೋ ಬ್ರಹ್ಮಣೇಯವಾವತಿಷ್ಠತೇ ॥ 12।299 ॥
ಬ್ರಹ್ಮಣೋ ಹಿ ಪ್ರತಿಷ್ಠಾಽಯಂ ಪರಸ್ಯ ಪರಮಃ ಶಿವಃ ।
ಅನನ್ಯಶ್ಚಾವ್ಯಯಸ್ಚೈಕಶ್ಚಾತ್ಮಾಧಾರೋ ಮಹೇಶ್ವರಃ ॥ 12।300 ॥
ಜ್ಞಾನೇನ ಕರ್ಮಯೋಗೇನ ಭಕ್ತಿಯೋಗೇನ ವಾ ನೃಪ ।
ಸರ್ವಸಂಸಾರಮುಕ್ತ್ಯರ್ಥಮೀಶ್ವರಂ ಶರಣಂ ವ್ರಜ ॥ 12।301 ॥
ಏಷ ಗುಹ್ಯೋಪದೇಶಸ್ತೇ ಮಯಾ ದತ್ತೋ ಗಿರೀಶ್ವರ ।
ಅನ್ವೀಕ್ಷ್ಯ ಚೈತದಖಿಲಂ ಯಥೇಷ್ಟಂ ಕರ್ತ್ತುಮರ್ಹಸಿ ॥ 12।302 ॥
ಅಹಂ ವೈ ಯಾಚಿತಾ ದೇವೈಃ ಸಂಜಾತಾ ಪರಮೇಶ್ವರಾತ್ ।
ವಿನಿನ್ದ್ಯ ದಕ್ಷಂ ಪಿತರಂ ಮಹೇಶ್ವರವಿನಿನ್ದಕಮ್ ॥ 12।303 ॥
ಧರ್ಮಸಂಸ್ಥಾಪನಾರ್ಥಾಯ ತವಾರಾಧನಕಾರಣಾತ್ ।
ಮೇನಾದೇಹಸಮುತ್ಪನ್ನಾ ತ್ವಾಮೇವ ಪಿತರಂ ಶ್ರಿತಾ ॥ 12।304 ॥
ಸ ತ್ವಂ ನಿಯೋಗಾದ್ದೇವಸ್ಯ ಬ್ರಹ್ಮಣಃ ಪರಮಾತ್ಮನಃ ।
ಪ್ರಿದಾಸ್ಯಸೇ ಮಾಂ ರುದ್ರಾಯ ಸ್ವಯಂವರಸಮಾಗಮೇ ॥ 12।305 ॥
ತತ್ಸಂಬನ್ಧಾಚ್ಚ ತೇ ರಾಜನ್ ಸರ್ವೇ ದೇವಾಃ ಸವಾಸವಾಃ ।
ತ್ವಾಂ ನಮಸ್ಯನ್ತಿ ವೈ ತಾತ ಪ್ರಸೀದತಿ ಚ ಶಂಕರಃ ॥ 12।306 ॥
ತಸ್ಮಾತ್ಸರ್ವಪ್ರಯತ್ನೇನ ಮಾಂ ವಿದ್ಧೀಶ್ವರಗೋಚರಾಮ್ ।
ಸಮ್ಪೂಜ್ಯ ದೇವಮೀಶಾನಂ ಶರಣ್ಯಂ ಶರಣಂ ವ್ರಜ ॥ 12।307 ॥
ಸ ಏವಮುಕ್ತೋ ಭಗವಾನ್ ದೇವದೇವ್ಯಾ ಗಿರೀಶ್ವರಃ ।
ಪ್ರಣಮ್ಯ ಶಿರಸಾ ದೇವೀಂ ಪ್ರಾಂಜಲಿಃ ಪುನರಬ್ರವೀತ್ ॥ 12।308 ॥
ವಿಸ್ತರೇಣ ಮಹೇಶಾನಿ ಯೋಗಂ ಮಾಹೇಶ್ವರಂ ಪರಮ್ ।
ಜ್ಞಾನಂ ವೈ ಚಾತ್ಮನೋ ಯೋಗಂ ಸಾಧನಾನಿ ಪ್ರಚಕ್ಷ್ವ ಮೇ ॥ 12।309 ॥
ತಸ್ಯೈತತ್ ಪರಮಂ ಜ್ಞಾನಮಾತ್ಮಯೋಗಮುತ್ತಮಮ್ ।
ಯಥಾವದ್ ವ್ಯಾಜಹಾರೇಶಾಸಾಧನಾನಿಚ ವಿಸ್ತರಾತ್ ॥ 12।310 ॥
ನಿಶಮ್ಯ ವದನಾಮ್ಭೋಜಾದ್ ಗಿರೀನ್ದ್ರೋ ಲೋಕಪೂಜಿತಃ ।
ಲೋಕಮಾತುಃ ಪರಂ ಜ್ಞಾನಂ ಯೋಗಾಸಕ್ತೋಽಭವತ್ಪುನಃ ॥ 12।311 ॥
ಪ್ರದದೌ ಚ ಮಹೇಶಾಯ ಪಾರ್ವತೀಂ ಭಾಗ್ಯಗೌರವಾತ್ ।
ನಿಯೋಗಾದ್ಬ್ರಹ್ಮಣಃ ಸಾಧ್ವೀಂ ದೇವಾನಾಂ ಚೈವ ಸಂನಿಧೌ ॥ 12।312 ॥
ಯ ಇಮಂ ಪಠತೇಽಧ್ಯಾಯಂ ದೇವ್ಯಾ ಮಾಹಾತ್ಮ್ಯಕೀರ್ತನಮ್ ।
ಶಿವಸ್ಯ ಸಂನಿಧೌ ಭಕ್ತ್ಯಾ ಸುಚಿಸ್ತದ್ಭಾವಭಾವಿತಃ ॥ 12।313 ॥
ಸರ್ವಪಾಪವಿನಿರ್ಮುಕ್ತೋ ದಿವ್ಯಯೋಗಸಮನ್ವಿತಃ ।
ಉಲ್ಲಂಘ್ಯ ಬ್ರಹ್ಮಣೋ ಲೋಕಂ ದೇವ್ಯಾಃ ಸ್ಥಾನಮವಾಪ್ನುಯಾತ್ ॥ 12।314 ॥
ಯಶ್ಚೈತತ್ ಪಠತಿ ಸ್ತೋತ್ರಂ ಬ್ರಾಹ್ಮಣಾನಾಂ ಸಮೀಪತಃ ।
ಸಮಾಹಿತಮನಾಃ ಸೋಽಪಿ ಸರ್ವಪಾಪೈಃ ಪ್ರಮುಚ್ಯತೇ ॥ 12।315 ॥
ನಾಮ್ನಾಮಷ್ಟಸಹಸ್ರಂ ತು ದೇವ್ಯಾ ಯತ್ ಸಮುದೀರಿತಮ್ ।
ಜ್ಞಾತ್ವಾಽರ್ಕಮಂಡಲಗತಾಂ ಸಂಭಾವ್ಯ ಪರಮೇಶ್ವರೀಮ್ ॥ 12।316 ॥
ಅಭ್ಯರ್ಚ್ಯ ಗನ್ಧಪುಷ್ಪಾದ್ಯೈರ್ಭಕ್ತಿಯೋಗಸಮನ್ವಿತಃ ।
ಸಂಸ್ಮರನ್ಪರಮಂ ಭಾವಂ ದೇವ್ಯಾ ಮಾಹೇಶ್ವರಂ ಪರಮ್ ॥ 12।317 ॥
ಅನನ್ಯಮಾನಸೋ ನಿತ್ಯಂ ಜಪೇದಾಮರಣಾದ್ ದ್ವಿಜಃ ।
ಸೋಽನ್ತಕಾಲೇ ಸ್ಮೃತಿಂ ಲಬ್ಧ್ವಾ ಪರಂ ಬ್ರಹ್ಮಾಧಿಗಚ್ಛತಿ ॥ 12।318 ॥
ಅಥವಾ ಜಾಯತೇ ವಿಪ್ರೋ ಬ್ರಾಹ್ಮಣಾನಾಂ ಕುಲೇ ಶುಚೌ ।
ಪೂರ್ವಸಂಸ್ಕಾರಮಾಹಾತ್ಮ್ಯಾದ್ ಬ್ರಹ್ಮವಿದ್ಯಾಮವಾಪ್ನುಯಾತ್ ॥ 12।319 ॥
ಸಮ್ಪ್ರಾಪ್ಯ ಯೋಗಂ ಪರಮಂ ದಿವ್ಯಂ ತತ್ ಪಾರಮೇಶ್ವರಮ್ ।
ಶಾನ್ತಃ ಸರ್ವಗಾತೋ ಭೂತ್ವಾ ಶಿವಸಾಯುಜ್ಯಮಾಪ್ನುಯಾತ್ ॥ 12।320 ॥
ಪ್ರತ್ಯೇಕಂ ಚಾಥ ನಾಮಾನಿ ಜುಹುಯಾತ್ ಸವನತ್ರಯಮ್ ।
ಪೂತನಾದಿಕೃತೈರ್ದೋಷೈರ್ಗ್ರಹದೋಷೈಶ್ಚ ಮುಚ್ಯತೇ ॥ 12।321 ॥
ಜಪೇದ್ ವಾಽಹರಹರ್ನಿತ್ಯಂ ಸಂವತ್ಸರಮತನ್ದ್ರಿತಃ ।
ಶ್ರೀಕಾಮಃ ಪಾರ್ವತೀಂ ದೇವೀಂ ಪೂಜಯಿತ್ವಾ ವಿಧಾನತಃ ॥ 12।322 ॥
ಸಮ್ಪೂಜ್ಯ ಪಾರ್ಶ್ವತಃ ಶಂಭುಂ ತ್ರಿನೇತ್ರಂ ಭಕ್ತಿಸಂಯುತಃ ।
ಲಭತೇ ಮಹತೀಂ ಲಕ್ಷ್ಮೀಂ ಮಹಾದೇವಪ್ರಸಾದತಃ ॥ 12।323 ॥
ತಸ್ಮಾತ್ ಸರ್ವಪ್ರಯತ್ನೇನ ಜಪ್ತವ್ಯಂ ಹಿ ದ್ವಿಜಾತಿಭಿಃ ।
ಸರ್ವಪಾಪಾಪನೋದಾರ್ಥಂ ದೇವ್ಯಾ ನಾಮ ಸಹಸ್ರಕಮ್ ॥ 12।324 ॥
ಪ್ರಸಂಗಾತ್ ಕಥಿತಂ ವಿಪ್ರಾ ದೇವ್ಯಾ ಮಾಹಾತ್ಮ್ಯಮುತ್ತಮಮ್ ।
ಅತಃ ಪರಂ ಪ್ರಜಾಸರ್ಗಂ ಭೃಗ್ವಾದೀನಾಂ ನಿಬೋಧತ ॥ 12।325 ॥
ಇತಿ ಶ್ರೀಕೂರ್ಮಪುರಾಣೇ ಷಟ್ಸಾಹಸ್ತ್ರ್ಯಾಂ ಸಂಹಿತಾಯಾಂ ಪೂರ್ವವಿಭಾಗೇ
ದ್ವಾದಶೋಽಧ್ಯಾಯಃ ॥ 12 ॥