॥ Mahakalasahasranamastotram Bengali Lyrics ॥
॥ শ্রীমহাকালসহস্রনামস্তোত্রম্ ॥
শ্রীপ্রকৃষ্টনন্দোক্তাগমে
ঋষিরুবাচ –
মহাকালসহস্রং তু শ্রোতুমিচ্ছামি সুব্রত! ।
কথয়স্ব প্রসাদেন শিষ্যায় বক্তুমর্হসি ॥ ১ ॥
সূত উবাচ –
সুধাময়ঃ সুতঃ শ্রীমান্ সুদামা নাম বৈ দ্বিজঃ ।
তেন গোপীপতিঃ কৃষ্ণো বিদ্যামভ্যসিতুঙ্গতঃ ॥ ২ ॥
সান্দীপনান্তিকেঽবন্ত্যাং গতৌ তৌ পঠনার্থিনৌ ।
চতুঃষষ্টিঃ কলাঃ সর্বাঃ কৃতা বিদ্যাশ্চতুর্দশ ॥ ৩ ॥
একদা প্রাহ কৃষ্ণং স সুদামা দ্বিজসত্তমঃ ।
সুদামোবাচ –
মহাকালং প্রতিবিল্বং কেন মন্ত্রেণ বাঽর্পণম্ ॥ ৪ ॥
করোমি বদ মে কৃষ্ণ ! কৃপয়া সাত্ত্বতাম্পতে ! ।
শ্রীকৃষ্ণ উবাচ –
শৃণু মিত্র! মহাপ্রাজ্ঞ! কথয়ামি তবাগ্রতঃ ॥ ৫ ॥
সহস্রং কালকালস্য মহাকালস্য বৈ দ্বিজ ! ।
সুগোপ্যং সর্বদা বিপ্র! ভক্তায়াভাষিতং ময়া ॥ ৬ ॥
কুরু বিল্বার্পণং তেন য়েন ত্বং বিন্দসে সুখম্ ।
সহস্রস্যাস্য ঋষ্যোঽহং ছন্দোঽনুষ্টুপ্ তথৈব চ ॥ ৭ ॥
দেবঃ প্রোক্তো মহাকালো বিনিয়োগশ্চ সিদ্ধয়ে ।
সঙ্কল্প্যৈবং ততো ধ্যায়েন্মহাকালবিভুং মুদা ॥ ৮ ॥
বিনিয়োগঃ ।
ওঁ অস্য শ্রীমহাকালসহস্রনামস্তোত্রমালামন্ত্রস্য শ্রীকৃষ্ণঋষিঃ ।
অনুষ্টুপ্ছন্দঃ । শ্রীমহাকালো দেবতা । ওঁ বীজম্ । নমঃ শক্তিঃ ।
মহাকালায়েতি কীলকম্ । সর্বার্থসিদ্ধ্যর্থে পাঠে বিনিয়োগঃ ।
ঋষ্যাদিন্যাসঃ ।
ওঁ শ্রীকৃষ্ণর্ষয়ে নমঃ শিরসি । অনুষ্টুপ্ছন্দসে নমঃ মুখে ।
মহাকালদেবতায়ৈ নমঃ হৃদয়ে । ওঁ বীজায় নমঃ গুহ্যে ।
নমঃ শক্তয়ে নমঃ পাদয়োঃ । মহাকালায়েতি কীলকায় নমঃ নাভৌ ॥
শ্রীমহাকালপ্রীতর্থে সহস্রনামস্তোত্রপাঠে বিনিয়োগায় নমঃ সর্বাঙ্গে ॥
করন্যাসঃ এবং হৃদয়াদিন্যাসঃ ॥
করন্যাসঃ ।
ওঁ অঙ্গুষ্ঠাভ্যাং নমঃ । মহাকালায় তর্জনীভ্যাং নমঃ ।
নমঃ মধ্যমাভ্যাং নমঃ । ওঁ অনামিকাভ্যাং নমঃ ।
মহাকালায় কনিষ্ঠিকাভ্যাং নমঃ ।
নমঃ করতলকরপৃষ্ঠাভ্যাং নমঃ ॥
অঙ্গন্যাসঃ ।
ওঁ হৃদয়ায় নমঃ । মহাকালায় শিরসে স্বাহা ।
নমঃ শিখায়ৈ বষট্ । ওঁ কবচায় হুম্ ।
মহাকালায় নেত্রত্রয়ায় বৌষট্ । নমঃ অস্ত্রায় ফট্ ।
ব্যাপকন্যাসঃ ওঁ মহাকালায় নমঃ ॥
অথ ধ্যানং
কুঙ্কুমাগরুকস্তূরীকেশরেণ বিচর্চিতম্ ।
নানাপুষ্পস্রজালঙ্কৃদ্বিল্বমৌলিবলান্বিতম্ ॥ ৯ ॥
পুরো নন্দী স্থিতো বামে গিরিরাজকুমারিকা ।
ব্রাহ্মণৈরাবৃতং নিত্যং মহাকালমহং ভজে ॥ ১০ ॥
॥ ইতি ধ্যানম্ ॥
ওঁ মহাকালো মহারূপো মহাদেবো মহেশ্বরঃ ।
মহাপ্রাজ্ঞো মহাশম্ভুর্মহেশো মোহভঞ্জনঃ ॥ ১১ ॥
মান্যো মন্মথহন্তা চ মোহনো মৃত্যুনাশনঃ ।
মান্যদো মাধবো মোক্ষো মোক্ষদো মরণাপহা ॥ ১২ ॥
মুহূর্তো মুনিবন্দ্যশ্চ মনুরূপো মনুর্মনুঃ ।
মন্মথারির্মহাপ্রাজ্ঞো মনোনন্দো মমত্বহা ॥ ১৩ ॥
মুনীশো মুনিকর্তা চ মহত্ত্বং মহদাধিপঃ ।
মৈনাকো মৈনকাবন্দ্যো মধ্বরিপ্রাণবল্লভঃ ॥ ১৪ ॥
মহালয়েশ্বরো মোক্ষো মেঘনাদেশ্বরাভিধঃ ।
মুক্তীশ্বরো মহামুক্তো মন্ত্রজ্ঞো মন্ত্রকারকঃ ॥ ১৫ ॥
মঙ্গলো মঙ্গলাধীশো মধ্যদেশপতির্মহান্ ।
মাগধো মন্মথো মত্তো মাতঙ্গো মালতীপতিঃ ॥ ১৬ ॥
মাথুরো মথুরানাথো মালবাধীশমন্যুপঃ ।
মারুতির্মীনপো মৌনো মার্কণ্ডো মণ্ডলো মৃডঃ ॥ ১৭ ॥
মধুপ্রিয়ো মধুস্নায়ী মিষ্টভোজী মৃণালধৃক্ ।
মঞ্জুলো মল্লমোদজ্ঞো মোদকৃন্মোদদায়কঃ ॥ ১৮ ॥
মুক্তিদো মুক্তরূপশ্চ মুক্তামালাবিভূষিতঃ ।
মৃকণ্ডো মোদপো মোদো মোদকাশনকারকঃ ॥ ১৯ ॥
য়জ্ঞো য়জ্ঞপতির্যজ্ঞো য়জ্ঞেশো য়জ্ঞনাশনঃ ।
য়জ্ঞতেজা য়শো য়োগী য়োগীশো য়োগদায়কঃ ॥ ২০ ॥
য়তিরূপো য়াজ্ঞবল্ক্যো য়জ্ঞকৃদ্ য়জ্ঞলুপ্তহা ।
য়জ্ঞমৃদ্ য়জ্ঞহা য়জ্ঞো য়জ্ঞভুগ্ য়জ্ঞসাধকঃ ॥ ২১ ॥
য়জ্ঞাঙ্গো য়জ্ঞহোতা চ য়জ্বানো য়জনো য়তিঃ ।
য়শঃপ্রদো য়শঃকর্তা য়শো য়জ্ঞোপবীতধৃক্ ॥ ২২ ॥
য়জ্ঞসেনো য়াজ্ঞিকশ্চ য়শোদাবরদায়কঃ ।
য়মেশো য়মকর্তা চ য়মদূতনিবারণঃ ॥ ২৩ ॥
য়াচকো য়মুনাক্রীডো য়াজ্ঞসেনীহিতপ্রদঃ ।
য়বপ্রিয়ো য়বরূপো য়বনান্তো য়বী য়বঃ ॥ ২৪ ॥
ঋগ্বেদো রোগহন্তা চ রন্তিদেবো রণাগ্রণীঃ ।
রৈবতো রৈবতাধীশো রৈবতেশ্বরসংজ্ঞকঃ ॥ ২৫ ॥
রামেশ্বরো রকারশ্চ রামপ্রিয়ো রমাপ্রিয়ঃ ।
রণী রণহরো রক্ষো রক্ষকো ঋণহারকঃ ॥ ২৬ ॥
রক্ষিতা রাজরূপো রাট্ রবো রূপো রজঃপ্রদঃ ।
রামচন্দ্রপ্রিয়ো রাজা রক্ষোঘ্নো রাক্ষসাধিপঃ ॥ ২৭ ॥
রক্ষসাং বরদো রামো রাক্ষসান্তকরো রথী ।
রথপ্রিয়ো রথস্থায়ী রথহা রথহারকঃ ॥ ২৮ ॥
রাবণপ্রিয়কৃদ্রাবস্বরূপশ্চ ঋতূরজঃ ॥
রতিবরপ্রদাতা চ রন্তিদেববরপ্রদঃ ॥ ২৯ ॥
রাজধানীপ্রদো রেতো রেবাভঞ্জো রবী রজী ।
ঋত্বিজো রসকর্তা চ রসজ্ঞো রসদায়কঃ ॥ ৩০ ॥
রুদ্রো রুদ্রাক্ষধৃগ্রৌদ্রো রত্নো রত্নৈর্বিভূষিতঃ ।
রূপেশ্বরো রমাপূজ্যো রুরুরাজ্যস্থলেশ্বরঃ ॥ ৩১ ॥
লক্ষো লক্ষপতির্লিঙ্গো লড্ডুকো লড্ডুকপ্রিয়ঃ ।
লীলাম্বরধরো লাভো লাভদো লাভকৃত্সদা ॥ ৩২ ॥
লজ্জারক্ষো লঘুরূপো লেখকো লেখকপ্রিয়ঃ ।
লাঙ্গলো লবণাব্ধীশো লক্ষ্মীপূজিতলক্ষকঃ ॥ ৩৩ ॥
লোকপালেশ্বরো লম্পো লঙ্কেশো লম্পকেশ্বরঃ ।
বহির্নেত্রো বরাঙ্গশ্চ বসুরূপো বসুপ্রদঃ ॥ ৩৪ ॥
বরেণ্যো বরদো বেদো বেদবেদাঙ্গপারগঃ ।
বৃদ্ধকালেশ্বরো বৃদ্ধো বিভবো বিভবপ্রদঃ ॥ ৩৫ ॥
বেণুগীতপ্রিয়ো বৈদ্যো বারাণসীস্থিতঃ সদা ।
বিশ্বেশো বিশ্বকর্তা চ বিশ্বনাথো বিনায়কঃ ॥ ৩৬ ॥
বেদজ্ঞো বর্ণকৃদ্বর্ণো বর্ণাশ্রমফলপ্রদঃ ।
বিশ্ববন্দ্যো বিশ্ববেত্তা বিশ্বাবসুর্বিভাবসুঃ ॥ ৩৭ ॥
বিত্তরূপো বিত্তকর্তা বিত্তদো বিশ্বভাবনঃ ।
বিশ্বাত্মা বৈশ্বদেবশ্চ বনেশো বনপালকঃ ॥ ৩৮ ॥
বনবাসী বৃষস্থায়ী বৃষভো বৃষভপ্রিয়ঃ ।
বিল্বীদলপ্রিয়ো বিল্বো বিশালনেত্রসংস্থিতঃ ॥ ৩৯ ॥
বৃষধ্বজো বৃষাধীশো বৃষভেশো বৃষপ্রিয়ঃ ।
বিল্বেশ্বরো বরো বীরো বীরেশশ্চ বনেশ্বরঃ ॥ ৪০ ॥
বিভূতিভূষিতো বেণ্যো ব্যালয়জ্ঞোপবীতকঃ ।
বিশ্বেশ্বরো বরানন্দো বটরূপো বটেশ্বরঃ ॥ ৪১ ॥
সর্বেশঃ সত্ত্বঃ সারঙ্গো সত্ত্বরূপঃ সনাতনঃ ।
সদ্বন্দ্যঃ সচ্চিদানন্দঃ সদানন্দঃ শিবপ্রিয়ঃ ॥ ৪২ ॥
শিবদঃ শিবকৃত্সাম্বঃ শশিশেখরশোভনঃ ।
শরণ্যঃ সুখদঃ সেব্যঃ শতানন্দবরপ্রদঃ ॥ ৪৩ ॥
সাত্ত্বিকঃ সাত্ত্বতঃ শম্ভুঃ শঙ্করঃ সর্বগঃ শিবঃ ।
সেবাফলপ্রদাতা চ সেবকপ্রতিপালকঃ ॥ ৪৪ ॥
শত্রুঘ্নঃ সামগঃ শৌরিঃ সেনানীঃ শর্বরীপ্রিয়ঃ ।
শ্মশানী স্কন্দসদ্বেদঃ সদা সুরসরিত্প্রিয়ঃ ॥ ৪৫ ॥
সুদর্শনধরঃ শুদ্ধঃ সর্বসৌভাগ্যদায়কঃ ।
সৌভাগ্যঃ সুভগঃ সূরঃ সূর্যঃ সারঙ্গমুক্তিদঃ ॥ ৪৬ ॥
সপ্তস্বরশ্চ সপ্তাশ্বঃ সপ্তঃ সপ্তর্ষিপূজিতঃ ।
শিতিকণ্ঠঃ শিবাধীশঃ সঙ্গমঃ সঙ্গমেশ্বরঃ ॥ ৪৭ ॥
সোমেশঃ সোমতীর্থেশঃ সর্পধৃক্স্বর্ণকারকঃ ।
স্বর্ণজালেশ্বরঃ সিদ্ধঃ সিদ্ধেশঃ সিদ্ধিদায়কঃ ॥ ৪৮ ॥
সর্বসাক্ষী সর্বরূপঃ সর্বজ্ঞঃ শাস্ত্রসংস্কৃতঃ ।
সৌভাগ্যেশ্বরঃ সিংহস্থঃ শিবেশঃ সিংহকেশ্বরঃ ॥ ৪৯ ॥
শূলেশ্বরঃ শুকানন্দঃ সহস্রধেনুকেশ্বরঃ ।
স্যন্দনস্থঃ সুরাধীশঃ সনকাদ্যর্চিতঃ সুধীঃ ॥ ৫০ ॥
ষডূর্মিঃ ষট্।সুচক্রজ্ঞঃ ষট্চক্রকবিভেদকঃ ।
ষডাননঃ ষডঙ্গজ্ঞঃ ষড্রসজ্ঞঃ ষডাননঃ ॥ ৫১ ॥
হরো হংসো হতারাতির্হিরণ্যো হাটকেশ্বরঃ ।
হেরম্বো হবনো হোতা হয়রূপো হয়প্রদঃ ॥ ৫২ ॥
হস্তিদো হস্তিত্বগ্ধারী হাহাহূহূবরপ্রদঃ ।
হব্যহেমহবিষ্যান্নো হাটকেশো হবিঃপ্রিয়ঃ ॥ ৫৩ ॥
হিরণ্যরেতা হংসজ্ঞো হিরণ্যো হাটকেশ্বরঃ ।
হনুমদীশো হরো হর্ষো হরসিদ্ধিপীঠগঃ ॥ ৫৪ ॥
হৈমো হৈমালয়ো হূহূহাহাহেতুর্হঠো হঠী ।
ক্ষত্রঃ ক্ষত্রপ্রদঃ ক্ষত্রী ক্ষেত্রজ্ঞঃ ক্ষেত্রনায়কঃ ॥ ৫৫ ॥
ক্ষেমঃ ক্ষেমপ্রদাতা চ ক্ষান্তিকৃত্ ক্ষান্তিবর্ধনঃ ।
ক্ষীরার্ণবঃ ক্ষীরভোক্তা ক্ষিপ্রাকূলক্ষিতেঃ পতিঃ ॥ ৫৬ ॥
ক্ষৌদ্ররসপ্রিয়ঃ ক্ষীরঃ ক্ষিপ্রসিদ্ধিপ্রদঃ সদা ।
জ্ঞানো জ্ঞানপ্রদো জ্ঞেয়ো জ্ঞানাতীতো জ্ঞপো জ্ঞয়ঃ ॥ ৫৭ ॥
জ্ঞানরূপো জ্ঞানগম্যো জ্ঞানী জ্ঞানবতাংবরঃ ।
অজো হ্যনন্তশ্চাব্যক্ত আদ্য আনন্দদায়কঃ ॥ ৫৮ ॥
অকথ আত্মা হ্যানন্দশ্চাজেয়ো হ্যজ আত্মভূঃ ।
আদ্যরূপো হ্যরিচ্ছেত্তাঽনাময়শ্চাপ্যলৌকিকঃ ॥
অতিরূপো হ্যখণ্ডাত্মা চাত্মজ্ঞানরতঃ সদা ।
আত্মবেত্তা হ্যাত্মসাক্ষী অনাদিশ্চান্তরাত্মগঃ ॥ ৬০ ॥
আনন্দেশোঽবিমুক্তেশশ্চালর্কেশোঽপ্সরেশ্বরঃ ।
আদিকল্পেশ্বরোঽগস্ত্যশ্চাক্রূরেশোঽরুণেশ্বরঃ ॥ ৬১ ॥
ইডারূপ ইভচ্ছেত্তা ঈশ্বরশ্চেন্দিরার্চিতঃ ।
ইন্দুরিন্দীবরশ্চেশ ঈশানেশ্বর ঈর্ষহা ॥ ৬২ ॥
ইজ্য ইন্দীবরশ্চেভ ইক্ষুরিক্ষুরসপ্রিয়ঃ ।
উমাকান্ত উমাস্বামী তথোমায়াঃ প্রমোদকৃত্ ॥ ৬৩ ॥
উর্বশীবরদশ্চৈব উচ্চৈরুত্তুঙ্গধারকঃ ।
একরূপ একস্বামী হ্যেকাত্মা চৈকরূপবান্ ॥ ৬৪ ॥
ঐরাবত ঐস্থিরাত্মা চৈকারৈশ্বর্যদায়কঃ ।
ওকার ওজস্বাংশ্চৈব হ্যৌখরশ্চৌখরাধিপঃ ॥ ৬৫ ॥
ঔষধ্য ঔষধিজ্ঞাতা হ্যোজোদ ঔষধীশ্বরঃ ।
অনন্তো হ্যন্তকশ্চান্তো হ্যন্ধকাসুরসূদনঃ ॥ ৬৬ ॥
অচ্যুতশ্চাপ্রমেয়াত্মা অক্ষরশ্চাশ্বদায়কঃ ।
অরিহন্তা হ্যবন্তীশশ্চাহিভূষণভৃত্সদা ॥ ৬৭ ॥
অবন্তীপুরবাসী চাপ্যবন্তীপুরপালকঃ ।
অমরশ্চামরাধীশো হ্যমরারিবিহিংসকঃ ॥ ৬৮ ॥
কামহা কামকামশ্চ কামদঃ করুণাকরঃ ।
কারুণ্যঃ কমলাপূজ্যঃ কপালী কলিনাশনঃ ॥ ৬৯ ॥
কামারিকৃত্কল্লোলঃ কালিকেশশ্চ কালজিত্ ।
কপিলঃ কোটিতীর্থেশঃ কল্পান্তঃ কালহা কবিঃ ॥ ৭০ ॥
কালেশ্বরঃ কালকর্তা কল্পাব্ধিঃ কল্পবৃক্ষকঃ ।
কোটীশঃ কামধেন্বীশঃ কুশলঃ কুশলপ্রদঃ ॥ ৭১ ॥
কিরীটী কুণ্ডলী কুন্তী কবচী কর্পরপ্রিয়ঃ ।
কর্পূরাভঃ কলাদক্ষঃ কলাজ্ঞঃ কিল্বিষাপহা ॥ ৭২ ॥
কুক্কুটেশঃ কর্কটেশঃ কুলদঃ কুলপালকঃ ।
কঞ্জাভিলাষী কেদারঃ কুঙ্কুমার্চিতবিগ্রহঃ ॥ ৭৩ ॥
কুন্দপুষ্পপ্রিয়ঃ কঞ্জঃ কামারিঃ কামদাহকঃ ।
কৃষ্ণরূপঃ কৃপারূপশ্চাথ কৃষ্ণার্চিতাঙ্ঘ্রিকঃ ॥ ৭৪ ॥।
কুণ্ডঃ কুণ্ডেশ্বরঃ কাণ্বঃ কেশবৈঃ পরিপূজিতঃ ।
কামেশ্বরঃ কলানাথঃ কণ্ঠেশঃ কুঙ্কুমেশ্বরঃ ॥ ৭৫ ॥
কন্থডেশঃ কপালেশঃ কায়াবরোহণেশ্বরঃ ।
করভেশঃ কুটুম্বেশঃ কর্কেশঃ কৌশলেশ্বরঃ ॥ ৭৬ ॥
কোশদঃ কোশভৃত্ কোশঃ কৌশেয়ঃ কৌশিকপ্রিয়ঃ ।
খচরঃ খচরাধীশঃ খচরেশঃ খরান্তকঃ ॥ ৭৭ ॥
খেচরৈঃ পূজিতপদঃ খেচরীসেবকপ্রিয়ঃ ।
খণ্ডেশ্বরঃ খড্গরূপঃ খড্গগ্রাহী খগেশ্বরঃ ॥ ৭৮ ॥
খেটঃ খেটপ্রিয়ঃ খণ্ডঃ খণ্ডপালঃ খলান্তকঃ ।
খাণ্ডবঃ খাণ্ডবাধীশঃ খড্গতাসঙ্গমস্থিতঃ ॥ ৭৯ ॥
গিরিশো গিরিজাধীশো গজারিত্বগ্বিভূষিতঃ ।
গৌতমো গিরিরাজশ্চ গঙ্গাধরো গুণাকরঃ ॥ ৮০ ॥
গৌতমীতটবাসী চ গালবো গোপতীশ্বরঃ ।
গোকর্ণো গোপতির্গর্বো মজারির্গরুডপ্রিয়ঃ ॥ ৮১ ॥
গঙ্গামৌলির্গুণগ্রাহী গারুডীবিদ্যয়া য়ুতঃ ।
গুরোর্গুরুর্গজারাতির্গোপালো গোমতীপ্রিয়ঃ ॥ ৮২ ॥
গুণদো গুণকর্তা চ গণেশো গণপূজিতঃ ।
গণকো গৌরবো গর্গো গন্ধর্বেণ প্রপূজিতঃ ॥ ৮৩ ॥
গোরক্ষো গুর্বিণীত্রাতা গেহো গেহপ্রদায়কঃ ।
গীতাধ্যায়ী গয়াধীশো গোপতির্গীতমোহিতঃ ॥ ৮৪ ॥
গিরাতীতো গুণাতীতো গডঃগেশো গুহ্যকেশ্বরঃ ।
গ্রহো গ্রহপতির্গম্যো গ্রহপীডানিবারণঃ ॥ ৮৫ ॥
ঘটনাদির্ঘনাধারো ঘনেশ্বরো ঘনাকরঃ ।
ঘুশ্মেশ্বরো ঘনাকারো ঘনরূপো ঘনাগ্রণীঃ ॥ ৮৬ ॥
ঘণ্টেবরো ঘটাধীশো ঘর্ঘরো ঘস্মরাপহা ।
ঘুষ্মেশো ঘোষকৃদ্ঘোষী ঘোষাঘোষো ঘনধ্বনিঃ ॥ ৮৭ ॥
ঘৃতপ্রিয়ো ঘৃতাব্ধীশো ঘণ্টো ঘণ্টঘটোত্কচঃ ।
ঘটোত্কচায় বরদো ঘটজন্মা ঘটেশ্বরঃ ॥ ৮৮ ॥
ঘকারো ঙকৃতো ঙশ্চ ঙকারো ঙকৃতাঙ্গজঃ ।
চরাচরশ্চিদানন্দশ্চিন্ময়শ্চন্দ্রশেখরঃ ॥ ৮৯ ॥
চন্দ্রেশ্বরশ্চামরেশশ্চামরেণ বিভূষিতঃ ।
চামরশ্চামরাধীশশ্চরাচরপতিশ্চিরঃ ॥ ৯০ ॥
চমত্কৃতশ্চন্দ্রবর্ণশ্চর্মভৃচ্চর্ম চামরী ।
চাণক্যশ্চর্মধারী চ চিরচামরদায়কঃ ॥ ৯১ ॥
চ্যবনেশশ্চরুশ্চারুশ্চন্দ্রাদিত্যেশ্বরাভিধঃ ।
চন্দ্রভাগাপ্রিয়শ্চণ্ডশ্চামরৈঃ পরিবীজিতঃ ॥ ৯২ ॥
ছত্রেশ্বরশ্ছত্রধারী ছত্রদশ্ছলহা ছলী ।
ছত্রেশশ্ছত্রকৃচ্ছত্রী ছন্দবিচ্ছন্দদায়কঃ ॥ ৯৩ ॥
জগন্নাথো জনাধারো জগদীশো জনার্দনঃ ।
জাহ্নবীধৃগ্জগত্কর্তা জগন্ময়ো জনাধিপঃ ॥ ৯৪ ॥
জীবো জীবপ্রদাতা চ জেতাঽথো জীবনপ্রদঃ ।
জঙ্গমশ্চ জগদ্ধাতা জগত্কেনপ্রপূজিতঃ ॥ ৯৫ ॥
জটাধরো জটাজূটী জটিলো জলরূপধৃক্ ।
জালন্ধরশিরশ্ছেত্তা জলজাঙ্ঘ্রির্জগত্পতিঃ ॥ ৯৬ ॥
জনত্রাতা জগন্নিধির্জটেশ্বরো জলেশ্বরঃ ।
ঝর্ঝরো ঝরণাকারী ঝূঞ্ঝকৃত্ ঝূঝহা ঝরঃ ॥ ৯৭ ॥
ঞকারশ্চ ঞমুবাসী ঞজনপ্রিয়কারকঃ ।
টকারশ্চ ঠকারশ্চ ডামরো ডমরুপ্রিয়ঃ ॥ ৯৮ ॥
ডণ্ডধৃগ্ডমরুহস্তো ডাকিহৃড্ডমকেশ্বরঃ ।
ঢুণ্ঢো ঢুণ্ঢেশ্বরো ঢক্কো ঢক্কানাদপ্রিয়ঃ সদা ॥ ৯৯ ॥
ণকারো ণস্বরূপশ্চ ণুণোণিণোণকারণঃ ।
তন্ত্রজ্ঞস্ত্র্যম্বকস্তন্ত্রীতুম্বুরুস্তুলসীপ্রিয়ঃ ॥ ১০০ ॥
তূণীরধৃক্ তদাকারস্তাণ্ডবী তাণ্ডবেশ্বরঃ ।
তত্ত্বজ্ঞস্তত্ত্বরূপশ্চ তাত্ত্বিকস্তরবিপ্রভঃ ॥ ১০১ ॥
ত্রিনেত্রস্তরুণস্তত্ত্বস্তকারস্তলবাসকৃত্ ।
তেজস্বী তেজোরূপী চ তেজঃপুঞ্জপ্রকাশকঃ ॥ ১০২ ॥
তান্ত্রিকস্তন্ত্রকর্তা চ তন্ত্রবিদ্যাপ্রকাশকঃ ।
তাম্ররূপস্তদাকারস্তত্ত্বদস্তরণিপ্রিয়ঃ ॥ ১০৩ ॥
তান্ত্রেয়স্তমোহা তন্বী তামসস্তামসাপহা ।
তাম্রস্তাম্রপ্রদাতা চ তাম্রবর্ণস্তরুপ্রিয়ঃ ॥ ১০৪ ॥
তপস্বী তাপসী তেজস্তেজোরূপস্তলপ্রিয়ঃ ।
তিলস্তিলপ্রদাতা চ তূলস্তূলপ্রদায়কঃ ॥ ১০৫ ॥
তাপীশস্তাম্রপর্ণীশস্তিলকস্ত্রাণকারকঃ ।
ত্রিপুরঘ্নস্ত্রয়াতীতস্ত্রিলোচনস্ত্রিলোকপঃ ॥ ১০৬ ॥
ত্রিবিষ্টপেশ্বরস্তেজস্ত্রিপুরস্ত্রিপুরদাহকঃ ।
তীর্থস্তারাপতিস্ত্রাতা তাডিকেশস্তডিজ্জবঃ ॥ ১০৭ ॥
থকারশ্চ স্থুলাকারঃ স্থূলঃ স্থবিরঃ স্থানদঃ ।
স্থাণুঃ স্থায়ী স্থাবরেশঃ স্থম্ভঃ স্থাবরপীডহা ॥ ১০৮ ॥
স্থূলরূপস্থিতেঃ কর্তা স্থূলদুঃখবিনাশনঃ ।
থন্দিলস্থদলঃ স্থাল্যঃ স্থলকৃত্ স্থলভৃত্ স্থলী ॥ ১০৯ ॥
স্থলেশ্বরঃ স্থলাকারঃ স্থলাগ্রজঃ স্থলেশ্বরঃ ।
দক্ষো দক্ষহরো দ্রব্যো দুন্দুভির্বরদায়কঃ ॥ ১১০ ॥
দেবো দেবাগ্রজো দানো দানবারির্দিনেশ্বরঃ ।
দেবকৃদ্দেবভৃদ্দাতা দয়ারূপী দিবস্পতিঃ ॥ ১১১ ॥
দামোদরো দলাধারো দুগ্ধস্নায়ী দধিপ্রিয়ঃ ।
দেবরাজো দিবানাথো দেবজ্ঞো দেবতাপ্রিয়ঃ ॥ ১১২ ॥
দেবদেবো দানরূপো দূর্বাদলপ্রিয়ঃ সদা ।
দিগ্বাসা দরভো দন্তো দরিদ্রঘ্নো দিগম্বরঃ ॥ ১১৩ ॥
দীনবন্ধুর্দুরারাধ্যো দুরন্তো দুষ্টদর্পহা ।
দক্ষঘ্নো দক্ষহন্তা চ দক্ষজামাত দেবজিত্ ॥ ১১৪ ॥
দ্বন্দ্বহা দুঃখহা দোগ্ধা দুর্ধরো দুর্ধরেশ্বরঃ ।
দানাপ্তো দানভৃদ্দীপ্তদীপ্তির্দিব্যো দিবাকরঃ ॥ ১১৫ ॥
দম্ভহা দম্ভকৃদ্দম্ভী দক্ষজাপতির্দীপ্তিমান্ ।
ধন্বী ধনুর্ধরো ধীরো ধান্যকৃদ্ধান্যদায়কঃ ॥ ১১৬ ॥
ধর্মাধর্মভৃতো ধন্যো ধর্মমূর্তির্ধনেশ্বরঃ ।
ধনদো ধূর্জটির্ধান্যো ধামদো ধার্মিকো ধনী ॥ ১১৭ ॥
ধর্মরাজো ধনাধারো ধরাধরো ধরাপতিঃ ।
ধনুর্বিদ্যাধরো ধূর্তো ধূলিধূসরবিগ্রহঃ ॥ ১১৮ ॥
ধনুষো ধনুষাকারো ধনুর্ধরভৃতাংবরঃ ।
ধরানাথো ধরাধীশো ধনেশো ধনদাগ্রজঃ ॥ ১১৯ ॥
ধর্মভৃদ্ধর্মসন্ত্রাতা ধর্মরক্ষো ধনাকরঃ ।
নর্মদো নর্মদাজাতো নর্মদেশো নৃপেশ্বরঃ ॥ ১২০ ॥
নাগভৃন্নাগলোকেশো নাগভূষণভূষিতঃ ।
নাগয়জ্ঞোপবীতেয়ো নগো নাগারিপূজিতঃ ॥ ১২১ ॥
নান্যো নরবরো নেমো নূপুরো নূপুরেশ্বরঃ ।
নাগচণ্ডেশ্বরো নাগো নগনাথো নগেশ্বরঃ ॥ ১২২ ॥
নীলগঙ্গাপ্রিয়ো নাদো নবনাথো নগাধিপঃ ।
পৃথুকেশঃ প্রয়াগেশঃ পত্তনেশঃ পরাশরঃ ॥ ১২৩ ॥
পুষ্পদন্তেশ্বরঃ পুষ্পঃ পিঙ্গলেশ্বরপূর্বজঃ ।
পিশাচেশঃ পন্নগেশঃ পশুপতীশ্বরঃ প্রিয়ঃ ॥ ১২৪ ॥
পার্বতীপূজিতঃ প্রাণঃ প্রাণেশঃ পাপনাশনঃ ।
পার্বতীপ্রাণনাথশ্চ প্রাণভৃত্ প্রাণজীবনঃ ॥ ১২৫ ॥
পুরাণপুরুষঃ প্রাজ্ঞঃ প্রেমজ্ঞঃ পার্বতীপতিঃ ।
পুষ্করঃ পুষ্করাধীশঃ পাত্রঃ পাত্রৈঃ প্রপূজিতঃ ॥ ১২৬ ॥
পুত্রদঃ পুণ্যদঃ পূর্ণঃ পাটাম্বরবিভূষিতঃ ।
পদ্মাক্ষঃ পদ্মস্রগ্ধারী পদ্মেন পরিশোভিতঃ ॥ ১২৭ ॥
ফণিভৃত্ ফণিনাথশ্চ ফেনিকাভক্ষকারকঃ ।
স্ফটিকঃ ফর্শুধারী চ স্ফটিকাভো ফলপ্রদঃ ॥ ১২৮ ॥
বদ্রীশো বলরূপশ্চ বহুভোজী বটুর্বটুঃ ।
বালখিল্যার্চিতো বালো ব্রহ্মেশো ব্রাহ্মণার্চিতঃ ॥ ১২৯ ॥
ব্রাহ্মণো ব্রহ্মহা ব্রহ্মা ব্রহ্মজ্ঞো ব্রাহ্মণপ্রিয়ঃ ।
ব্রাহ্মণস্থো ব্রহ্মরূপো ব্রাহ্মণপরিপালকঃ ॥ ১৩০ ॥
ব্রহ্মমূর্তির্ব্রহ্মস্বামী ব্রাহ্মণৈঃ পরিশোভিতঃ ।
ব্রাহ্মণারিহরো ব্রহ্ম ব্রাহ্মণাস্যৈঃ প্রতর্পিতঃ ॥ ১৩১ ॥
ভূতেশো ভূতনাথশ্চ ভস্মাঙ্গো ভীমবিক্রমঃ ।
ভীমো ভবহরো ভব্যো ভৈরবো ভয়ভঞ্জনঃ ॥ ১৩২ ॥
ভূতিদো ভুবনাধারো ভুবনেশো ভৃগুর্ভবঃ ।
ভারতীশো ভুজঙ্গেশো ভাস্করো ভিন্দিপালধৃক্ ॥ ১৩৩ ॥
ভূতো ভয়হরো ভানুর্ভাবনো ভবনাশনঃ ।
সহস্রনামভিশ্চৈতৈর্মহাকালঃ প্রসীদতু ॥ ১৩৪ ॥
অথ মহাকালসহস্রনামমাহাত্ম্যম্ ।
সূত উবাচ –
ইতীদং কীর্তিতং তেভ্যো মহাকালসহস্রকম্ ।
পঠনাত্ শ্রবণাত্ সদ্যো ধূতপাপো ভবেন্নরঃ ॥ ১৩৫ ॥
একবারং পঠেন্নিত্যং সর্বসত্যং প্রজায়তে ।
দ্বিবারং য়ঃ পঠেত্ সত্যং তস্য বশ্যং ভবেজ্জগত্ ॥ ১৩৬ ॥
ত্রিবারং পঠনান্মর্ত্যো ধনধান্যয়ুতো ভবেত্ ।
অতঃ স্থানবিশেষস্যেদানীং পাঠফলং শৃণু ॥ ১৩৭ ॥
বটমূলে –
বটমূলে পঠেন্নিত্যমেকাকী মনুজো য়দি ।
ত্রিবারঞ্চ দিনত্রিংশত্সিদ্ধির্ভবতি সর্বথা ॥ ১৩৮ ॥
মনোরথসিদ্ধৌ –
অশ্বত্থে তুলসীমূলে তীর্থে বা হরিহরালয়ে ।
শুচির্ভূত্বা পঠেদ্যো হি মনসা চিন্তিতং লভেত্ ॥ ১৩৯ ॥
সিদ্ধিদতীর্থে –
য়ত্র তীর্থোঽস্তি চাশ্বত্থো বটো বা দ্বিজসত্তম!
স তীর্থঃ সিদ্ধিদঃ সর্বপাঠকস্য ন সংশয়ঃ ॥ ১৪০ ॥
তত্রৈকাগ্রমনা ভূত্বা য়ঃ পঠেচ্ছুভমানসঃ ।
য়ং য়ং কামমভিধ্যায়েত্তং তং প্রাপ্নোতি নিশ্চিতম্ ॥ ১৪১ ॥
মনসা চিন্তিতং সর্বং মহাকালপ্রসাদতঃ ।
লভতে সকলান্ কামান্ পঠনাচ্ছ্রবণান্নরঃ ॥ ১৪২ ॥
শতাবর্তপাঠফলং –
শতাবর্তং পঠেদ্যত্র চিন্তিতং লভতে ধ্রুবম্ ।
দুঃসাধ্যঃ সোঽপি সাধ্যঃ স্যাদ্দিনান্যেকোনবীংশতেঃ ॥ ১৪৩ ॥
মহাশিবরাত্রৌ পাঠফলম্ ।
শিবরাত্রিদিনে মর্ত্য উপবাসী জিতেন্দ্রিয়ঃ ।
নিশামধ্যে শতাবর্তপঠনাচ্চিন্তিতং লভেত্ ॥ ১৪৪ ॥
সহস্রাবর্তনং তত্র তীর্থে হ্যশ্বত্থসন্নিধৌ ।
পঠনাদ্ভুক্তির্মুক্তিশ্চ ভবতীহ কলৌ য়ুগে ॥ ১৪৫ ॥
তদ্দশাংশঃ ক্রিয়াদ্ধোমং তদ্দশাংশং চ তর্পণম্ ।
দশাংশং মার্জয়েন্মর্ত্যঃ সর্বসিদ্ধিঃ প্রজায়তে ॥ ১৪৬ ॥
গতং রাজ্যমবাপ্নোতি বন্ধ্যা পুত্রবতী ভবেত্ ।
কুষ্ঠরোগাঃ প্রণশ্যন্তি দিব্যদেহো ভবেন্নরঃ ॥ ১৪৭ ॥
সহস্রাবর্তপাঠেন মহাকালপ্রিয়ো নরঃ ।
মহাকালপ্রসাদেন সর্বসিদ্ধিঃ প্রজায়তে ॥ ১৪৮ ॥
শাপানুগ্রহসামর্থ্যং ভবতীহ কলৌ য়ুগে ।
সত্যং সত্যং ন সন্দেহঃ সত্যঞ্চ গদিতং মম ॥ ১৪৯ ॥
অবন্তিকাস্থিততীর্থেষু পাঠফলম্ ।
কোটিতীর্থে –
কোটিতীর্থে পঠেদ্বিপ্র! মহাকালঃ প্রসীদতি ।
রুদ্রসরোবরে –
পাঠাচ্চ রুদ্রসরসি কুষ্ঠপীডা নিবর্ততে ॥ ১৫০ ॥
সিদ্ধপীঠে –
সিদ্ধপীঠে পঠেদ্যো হি তস্য বশ্যং ভবেজ্জগত্ ।
শিপ্রাকূলে –
শিপ্রাকূলে পঠেত্প্রাজ্ঞো ধনধান্যয়ুতো ভবেত্ ॥ ১৫১ ॥
কালত্রয়ং পঠেদ্যশ্চ শত্রুনির্মূলনং ভবেত্ ।
ভৈরবালয়ে –
অপমৃত্যুমপাকুর্যাত্ পঠনাদ্ভৈরবালয়ে ॥ ১৫২ ॥
সিদ্ধবটস্যাধঃ –
সিদ্ধবটস্য চ্ছায়ায়াং পঠতে মনুজো য়দি ।
বন্ধ্যায়াং জায়তে পুত্রশ্চিরঞ্জীবী ন সংশয়ঃ ॥ ১৫৩ ॥
ঔখরে –
ঔখরে পঠনাত্ সদ্যো ভূতপীডা নিবর্ততে ।
গয়াকূপে –
গয়াকূপে পঠেদ্যো হি তুষ্টাঃ স্যুঃ পিতরস্ততঃ ॥ ১৫৪ ॥
গোমত্যাং –
গোমত্যাঞ্চ পঠেন্নিত্যং বিষ্ণুলোকমবাপ্নুয়াত্ ।
অঙ্কপাতে –
অঙ্কপাতে পঠেদ্যো হি ধূতপাপঃ প্রমুচ্যতে ॥ ১৫৫ ॥
খড্গতাসঙ্গমে –
খড্গতাসঙ্গমে সদ্যঃ খড্গসিদ্ধিমবাপ্নুয়াত্ ।
য়মতডাগে –
পঠেদ্যমতডাগে য়ো য়মদুঃখং ন পশ্যতি ॥ ১৫৬ ॥
নবনদ্যাং –
নবনদ্যাং পঠেদ্যো হি ঋদ্ধিসিদ্ধিপতির্ভবেত্ ।
য়োগিনীপুরতঃ –
য়োগিনীপুরতঃ পাঠং মহামারীভয়ং ন হি ॥ ১৫৭ ॥
বৃদ্ধকালেশ্বরান্তিকে –
পুত্রপৌত্রয়ুতো মর্ত্যো বৃদ্ধকালেশ্বরান্তিকে ।
পাঠস্থানে ঘৃতং দীপং নিত্যং ব্রাহ্মণভোজনম্ ॥ ১৫৮ ॥
একাদশাথবা পঞ্চ ত্রয়ো বাঽপ্যেকব্রাহ্মণঃ ।
ভোজনং চ য়থাসাধ্যং দদ্যাত্ সিদ্ধিসমুত্সুকঃ ॥ ১৫৯ ॥
বিধিবদ্ভক্তিমান্ শ্রদ্ধায়ুক্তো ভক্তঃ সদৈব হি ।
পঠন্ য়জন্ স্মরঁশ্চৈব জপন্ বাপি য়থামতি ।
মহাকালস্য কৃপয়া সকলং ভদ্রমাপ্নুয়াত্ ॥ ১৬০ ॥
ইতি শ্রীপ্রকৃষ্টনন্দোক্তাগমে শ্রীকৃষ্ণসুদাম্নঃ সংবাদে
মহাকালসহস্রনামস্তোত্রং সম্পূর্ণম্ ।
॥ ওঁ নমো নমঃ ॥ শিবার্পণমস্তু ।