॥ Siddha Geetaa Malayalam Lyrics ॥
॥ സിദ്ധഗീതാ ॥
അസ്ത്യസ്തമിതസർവാപദുദ്യത്സമ്പദുദാരധീഃ ।
വിദേഹാനാം മഹീപാലോ ജനകോ നാമ വീര്യവാൻ ॥ 1 ॥
കൽപവൃക്ഷോഽർഥിസാർഥാനാം മിത്രാലാനാം ദിവാകരഃ ।
മാധവോ ബന്ധുപുഷ്പാണാം സ്ത്രീണാം മകരകേതനഃ ॥ 2 ॥
ദ്വിജകൈരവശീതാംശുർദ്വിഷത്തിമിരഭാസ്കരഃ ।
സൗജന്യരത്നജലധിർഭുവം വിഷ്ണുരിവാസ്ഥിതഃ ॥ 3 ॥
പ്രഫുല്ലബാലലതികേ മഞ്ജരീപുഞ്ജപിഞ്ജിരേ ।
സ കദാചിന്മധൗ മത്തേ കോകിലാലാപലാസിനി ॥ 4 ॥
യയൗ കുസുമിതാഭോഗം സുവിലാസലതാംഗനം ।
ലീലയോപവനം കാന്തം നന്ദനം വാസവോ യഥാ ॥ 5 ॥
തസ്മിന്വരവനേ ഹൃദ്യേ കേസരോദ്ദാമമാരുതേ ।
ദൂരസ്ഥാനുചരഃ സാനുകുഞ്ജേഷു വിചചാര ഹ ॥ 6 ॥
അഥ ശുശ്രാവ കസ്മിംശ്ചിത്തമാലവനഗുൽമകേ ।
സിദ്ധാനാമപ്രദൃശ്യാനാം സ്വപ്രസംഗാദുദാഹൃതാഃ ॥ 7 ॥
വിവിക്തവാസിനാം നിത്യം ശൈലകന്ദരചാരിണാം ।
ഇമാഃ കമലപത്രാക്ഷ ഗീതാ ഗീതാത്മഭാവനാഃ ॥ 8 ॥
സിദ്ധാ ഊചുഃ ।
ദ്രഷ്ടുദൃശ്യസമായോഗാത്പ്രത്യയാനന്ദനിശ്ചയഃ ।
യസ്തം സ്വമാത്മതത്ത്വോത്ഥം നിഃസ്പന്ദം സമുപാസ്മഹേ ॥ 9 ॥
അന്യേ ഊചുഃ ।
ദ്രഷ്ടൃദർശനദൃശ്യാനി ത്യക്ത്വാ വാസനയാ സഹ ।
ദർശനപ്രഥമാഭാസമാത്മാനം സമുപാസ്മഹേ ॥ 10 ॥
അന്യേ ഊചുഃ ।
ദ്വയോർമധ്യഗതം നിത്യമസ്തിനാസ്തീതി പക്ഷയോഃ ।
പ്രകാശനം പ്രകാശ്യാനാമാത്മാനം സമുപാസ്മഹേ ॥ 11 ॥
അന്യേ ഊചുഃ ।
യസ്മിൻസർവം യസ്യ സർവം യതഃ സർവം യസ്മായിദം ।
യേന സർവം യദ്ധി സർവം തത്സത്യം സമുപാസ്മഹേ ॥ 12 ॥
അന്യേ ഊചുഃ ।
അശിരസ്കം ഹകാരാന്തമശേഷാകാരസംസ്ഥിതം ।
അജസ്രമുച്ചരന്തം സ്വം തമാത്മാനമുപാസ്മഹേ ॥ 13 ॥
അന്യേ ഊചുഃ ।
സന്ത്യജ്യ ഹൃദ്ഗുഹേശാനം ദേവമന്യം പ്രയാന്തി യേ ।
തേ രത്നമഭിവാഞ്ഛന്തി ത്യക്തഹസ്തസ്ഥകൗസ്തുഭാഃ ॥ 14 ॥
അന്യേ ഊചുഃ ।
സർവാശാഃ കില സന്ത്യജ്യ ഫലമേതദവാപ്യതേ ।
യേനാശാവിഷവല്ലീനാം മൂലമാലാ വിലൂയതേ ॥ 15 ॥
അന്യേ ഊചുഃ ।
ബുദ്ധ്വാപ്യത്യന്തവൈരസ്യം യഃ പദാർഥേഷു ദുർമതിഃ ।
ബധ്നാതി ഭാവനാം ഭൂയോ നരോ നാസൗ സ ഗർദഭഃ ॥ 16 ॥
അന്യേ ഊചുഃ ।
ഉത്ഥിതാനുത്ഥിതാനേതാനിന്ദ്രിയാഹീൻപുനഃ പുനഃ ।
ഹന്യാദ്വിവേകദണ്ഡേന വജ്രേണേവ ഹരിർഗിരീൻ ॥ 17 ॥
അന്യേ ഊചുഃ ।
ഉപശമസുഖമാഹരേത്പവിത്രം
സുശമവതഃ ശമമേതി സാധുചേതഃ ।
പ്രശമിതമനസഃ സ്വകേ സ്വരൂപേ
ഭവതി സുഖേ സ്ഥിതിരുത്തമാ ചിരായ ॥ 18 ॥
ഇത്യാർഷേ ശ്രീവാസിഷ്ഠമഹാരാമായണേ വാൽമികീയേ ദേവദൂതോക്തേ
മോക്ഷോപായേഷൂപശമപ്രകരണേ സിദ്ധഗീതാനാമാഷ്ടമഃ സർഗഃ ॥ 8 ॥
– Chant Stotra in Other Languages –
Siddha Gita in Sanskrit – English – Bengali – Gujarati – Kannada – Malayalam – Odia – Telugu – Tamil