॥ Prapattyashtakam Telugu Lyrics ॥
॥ ప్రపత్త్యష్టకమ్ ॥
ఆవర్తపుర్యాం జనితం ప్రపద్యే పాణ్డ్యేశదేశే విహృతం ప్రపద్యే ।
శోణాచలప్రస్థచరం ప్రపద్యే భిక్షుం తపఃక్లేశసహం ప్రపద్యే ॥ ౧ ॥
ఆబ్రహ్మకీటాన్తసమం ప్రపద్యే జితారిషడ్వర్గమహం ప్రపద్యే ।
సర్వజ్ఞతాసారభృతం ప్రపద్యే నిస్సీమకారుణ్యనిధిం ప్రపద్యే ॥ ౨ ॥
అస్మాత్ప్రపఞ్చాదధికం ప్రపద్యే విశ్వాధికోక్తేర్విషయం ప్రపద్యే ।
కాలగ్రహగ్రాహభయాపనుత్యై కృతాన్తశిక్షాకృతినం ప్రపద్యే ॥ ౩ ॥
వినేతుమార్తిం విషయాధ్వజన్యాం విజ్ఞానమూర్తిం దధతం ప్రపద్యే ।
కన్దర్పదర్పజ్వరవారణాయ కామారిలీలావతారం ప్రపద్యే ॥ ౪ ॥
ఆజన్మవర్ణివ్రతినం ప్రపద్యే కుణ్డీభృతం దణ్డధరం ప్రపద్యే ।
బ్రహ్మాసనధ్యానరతం ప్రపద్యే బ్రహ్మాత్మభూయం యతినం ప్రపద్యే ॥ ౫ ॥
హరం ప్రపద్యే విజరం ప్రపద్యే స్వతన్త్రతాయాః సదనం ప్రపద్యే ।
అమేయసామర్థ్యవహం ప్రపద్యే విశుద్ధవిజ్ఞానివరం ప్రపద్యే ॥ ౬ ॥
దౌర్భాగ్య తాపత్రయ కర్మ మోహ సన్తాపహన్తారమహం ప్రపద్యే ।
యథార్థసఙ్కల్పమపేతపాపమవాప్త కామం విశుచం ప్రపద్యే ॥ ౭ ॥
మనః ప్రసాదం భజతాం దదానం ముగ్ధస్మితోల్లాసిముఖం ప్రపద్యే ।
వ్యథామశేషాం వ్యపనీయ మోదప్రదేన నామ్నా రమణం ప్రపద్యే ॥ ౮ ॥
శివం ప్రపద్యే శివదం ప్రపద్యే గురుం ప్రపద్యే గుణినం ప్రపద్యే ।
మదీయహృత్పద్మజుషం ప్రపద్యే శరణ్యమీశం శరణం ప్రపద్యే ॥ ౯ ॥
ప్రపత్తిం రమణస్యైతాం తన్వతాం తత్త్వదర్శినః
తత్క్రతున్యాయరసికాః తత్తాదృశఫలాప్తయే ॥ ౧౦ ॥
॥ ఇతి శ్రీజగదీశ శాస్త్రీ విరచితం ప్రపత్త్యష్టకమ్ సమ్పూర్ణమ్ ॥
– Chant Stotra in Other Languages –
Prapattyashtakam Eight Verses of Surrender Lyrics in Sanskrit » English » Bengali » Gujarati » Kannada » Malayalam » Odia » Tamil