॥ Sri Svaminyashtakam Telugu Lyrics ॥
॥ శ్రీస్వామిన్యష్టకమ్ ॥
రహస్యం శ్రీరాధేత్యఖిలనిగమానామివ ధనం
నిగూఢం యద్వాణీ జపత సతతం జాతు న పరమ్ ।
ప్రదోషే దృగ్మోషే పులినగమనాయాతిమధురం
బలత్తస్యాశ్చఞ్చచ్చరణయుగమాస్తాం మనసి మే ॥ ౧ ॥
అమన్దప్రేమార్ద్రప్రియకరతలం కుఙ్కుమపిష-
త్కుచద్వన్ద్వే వక్షస్యపి చ దధతీ చారు సతతమ్ ।
కృపాం కుర్యాద్రాధామయి రుచిరహేమాద్రిశిఖరో-
దితప్రావృణ్మేఘస్మరహరహరీ చూచుకమిషాత్ ॥ ౨ ॥
నిమన్త్ర్య ప్రాతర్యా నిజహృదయనాథం నిరుపమా
సుకౌమార్యైకాకిన్యతిఘనవనాదాత్మభవనే ।
వధియాన్నం స్వాదు స్వయమతిముదా భోజయతి సా
మయి ప్రీతా రాధా భవతు హరిసఙ్గార్పితమనాః ॥ ౩ ॥
విధాయ శ్యామాంసే నిజభుజలతామిన్దువదనం
కటాక్షైః పశ్యన్తీ కువలయదలాక్షీ మధుపతేః ।
ముదా గాయన్తీ యా మథురమురలీజాతనినదా-
నుసారం తారం సా ఫలతు మమ రాధావదనయోః ॥ ౪ ॥
అమన్దప్రేమార్ద్రాత్కిసలయమయాత్కోలశయనా-
దుషస్యుత్థాయాబ్జారుణతరకపోలాతిరుచిరా ।
గృహం యాన్తీ శ్రాన్తిస్థగితగతిరాస్యామ్బుజగతం
ఘనీభూతం రాధా రసమనుదినం మే వితరతు ॥ ౫ ॥
ప్రియేణాక్ష్ణా సంసూచితనవనికుఞ్జేషు వివిధ-
ప్రసూనైర్నిర్మాయాతిశయరుచిరం కేలిశయనమ్ ।
దిగత్యేషా గుఞ్జన్మధుపముఖరే ధారపవనీ-
శ్రితే క్రీడన్తీ మే నిజచరణదాస్యం వితరతు ॥ ౬ ॥
కదమ్బారూఢం యా నిజపతిమజానన్త్యహని త-
త్తలే కుర్వన్తీ స్వప్రియతమసఖీభిః సహ కథామ్ ।
అకస్మాదుద్వీక్ష్య స్ఫుటతరలహారోరసమితి
స్మితస్మేరవ్రీడాఽఽననముదిరదృక్ సా మమ గతిః ॥ ౭ ॥
న మే భూయాన్మోక్షో న పునరమరాధీశసదనం
న యోగో న జ్ఞానం న విషయసుఖం దుఃఖకదనమ్ ।
త్వదుచ్ఛిష్టం భోజ్యం తవ పదజలం పేయమపి త-
ద్రజో మూర్ధ్ని స్వామిన్యనుసవనమస్తు ప్రతిభవమ్ ॥ ౮ ॥
ఇతి శ్రీమద్గోపీజనచరణపఙ్కేరుహయుగా-
నుగత్యాఽఽనన్దామ్భోనిధివిభృతవాక్కాయమనసా ।
మయేదం ప్రాదుర్భావితమతిసుఖం విఠ్ఠలపదా-
భిధేయే మయ్యేవ ప్రతిఫలతు సర్వత్ర సతతమ్ ॥ ౯ ॥
ఇతి శ్రీవిఠ్ఠలేశ్వరవిరచితం స్వామిన్యష్టకం సమాప్తమ్ ।
– Chant Stotra in Other Languages –
Sri Svaminya Ashtakam Lyrics in Sanskrit » English » Bengali » Gujarati » Kannada » Malayalam » Odia » Tamil