॥ Brihannila Tantra Tara Shatanama Stotra Lyrics Bengali Lyrics ॥
॥ তারাশতনামস্তোত্রম্ বৃহন্নীলতন্ত্রার্গতম্ ॥
শ্রীদেব্যুবাচ ।
সর্বং সংসূচিতং দেব নাম্নাং শতং মহেশ্বর ।
য়ত্নৈঃ শতৈর্মহাদেব ময়ি নাত্র প্রকাশিতম্ ॥ ২০-১ ॥
পঠিত্বা পরমেশান হঠাত্ সিদ্ধ্যতি সাধকঃ ।
নাম্নাং শতং মহাদেব কথয়স্ব সমাসতঃ ॥ ২০-২ ॥
শ্রীভৈরব উবাচ ।
শৃণু দেবি প্রবক্ষ্যামি ভক্তানাং হিতকারকম্ ।
য়জ্জ্ঞাত্বা সাধকাঃ সর্বে জীবন্মুক্তিমুপাগতাঃ ॥ ২০-৩ ॥
কৃতার্থাস্তে হি বিস্তীর্ণা য়ান্তি দেবীপুরে স্বয়ম্ ।
নাম্নাং শতং প্রবক্ষ্যামি জপাত্ স(অ)র্বজ্ঞদায়কম্ ॥ ২০-৪ ॥
নাম্নাং সহস্রং সংত্যজ্য নাম্নাং শতং পঠেত্ সুধীঃ ।
কলৌ নাস্তি মহেশানি কলৌ নান্যা গতির্ভবেত্ ॥ ২০-৫ ॥
শৃণু সাধ্বি বরারোহে শতং নাম্নাং পুরাতনম্ ।
সর্বসিদ্ধিকরং পুংসাং সাধকানাং সুখপ্রদম্ ॥ ২০-৬ ॥
তারিণী তারসংয়োগা মহাতারস্বরূপিণী ।
তারকপ্রাণহর্ত্রী চ তারানন্দস্বরূপিণী ॥ ২০-৭ ॥
মহানীলা মহেশানী মহানীলসরস্বতী ।
উগ্রতারা সতী সাধ্বী ভবানী ভবমোচিনী ॥ ২০-৮ ॥
মহাশঙ্খরতা ভীমা শাঙ্করী শঙ্করপ্রিয়া ।
মহাদানরতা চণ্ডী চণ্ডাসুরবিনাশিনী ॥ ২০-৯ ॥
চন্দ্রবদ্রূপবদনা চারুচন্দ্রমহোজ্জ্বলা ।
একজটা কুরঙ্গাক্ষী বরদাভয়দায়িনী ॥ ২০-১০ ॥
মহাকালী মহাদেবী গুহ্যকালী বরপ্রদা ।
মহাকালরতা সাধ্বী মহৈশ্বর্যপ্রদায়িনী ॥ ২০-১১ ॥
মুক্তিদা স্বর্গদা সৌম্যা সৌম্যরূপা সুরারিহা ।
শঠবিজ্ঞা মহানাদা কমলা বগলামুখী ॥ ২০-১২ ॥
মহামুক্তিপ্রদা কালী কালরাত্রিস্বরূপিণী ।
সরস্বতী সরিচ্শ্রেষ্ঠা স্বর্গঙ্গা স্বর্গবাসিনী ॥ ২০-১৩ ॥
হিমালয়সুতা কন্যা কন্যারূপবিলাসিনী ।
শবোপরিসমাসীনা মুণ্ডমালাবিভূষিতা ॥ ২০-১৪ ॥
দিগম্বরা পতিরতা বিপরীতরতাতুরা ।
রজস্বলা রজঃপ্রীতা স্বয়ম্ভূকুসুমপ্রিয়া ॥ ২০-১৫ ॥
স্বয়ম্ভূকুসুমপ্রাণা স্বয়ম্ভূকুসুমোত্সুকা ।
শিবপ্রাণা শিবরতা শিবদাত্রী শিবাসনা ॥ ২০-১৬ ॥
অট্টহাসা ঘোররূপা নিত্যানন্দস্বরূপিণী ।
মেঘবর্ণা কিশোরী চ য়ুবতীস্তনকুঙ্কুমা ॥ ২০-১৭ ॥
খর্বা খর্বজনপ্রীতা মণিভূষিতমণ্ডনা ।
কিঙ্কিণীশব্দসংয়ুক্তা নৃত্যন্তী রক্তলোচনা ॥ ২০-১৮ ॥
কৃশাঙ্গী কৃসরপ্রীতা শরাসনগতোত্সুকা ।
কপালখর্পরধরা পঞ্চাশন্মুণ্ডমালিকা ॥ ২০-১৯ ॥
হব্যকব্যপ্রদা তুষ্টিঃ পুষ্টিশ্চৈব বরাঙ্গনা ।
শান্তিঃ ক্ষান্তির্মনো বুদ্ধিঃ সর্ববীজস্বরূপিণী ॥ ২০-২০ ॥
উগ্রাপতারিণী তীর্ণা নিস্তীর্ণগুণবৃন্দকা ।
রমেশী রমণী রম্যা রামানন্দস্বরূপিণী ॥ ২০-২১ ॥
রজনীকরসম্পূর্ণা রক্তোত্পলবিলোচনা ।
ইতি তে কথিতং দিব্যং শতং নাম্নাং মহেশ্বরি ॥ ২০-২২ ॥
প্রপঠেদ্ ভক্তিভাবেন তারিণ্যাস্তারণক্ষমম্ ।
সর্বাসুরমহানাদস্তূয়মানমনুত্তমম্ ॥ ২০-২৩ ॥
ষণ্মাসাদ্ মহদৈশ্বর্যং লভতে পরমেশ্বরি ।
ভূমিকামেন জপ্তব্যং বত্সরাত্তাং লভেত্ প্রিয়ে ॥ ২০-২৪ ॥
ধনার্থী প্রাপ্নুয়াদর্থং মোক্ষার্থী মোক্ষমাপ্নুয়াত্ ।
দারার্থী প্রাপ্নুয়াদ্ দারান্ সর্বাগম(পুরো?প্রচো)দিতান্ ॥ ২০-২৫ ॥
অষ্টম্যাং চ শতাবৃত্ত্যা প্রপঠেদ্ য়দি মানবঃ ।
সত্যং সিদ্ধ্যতি দেবেশি সংশয়ো নাস্তি কশ্চন ॥ ২০-২৬ ॥
ইতি সত্যং পুনঃ সত্যং সত্যং সত্যং মহেশ্বরি ।
অস্মাত্ পরতরং নাস্তি স্তোত্রমধ্যে ন সংশয়ঃ ॥ ২০-২৭ ॥
নাম্নাং শতং পঠেদ্ মন্ত্রং সংজপ্য ভক্তিভাবতঃ ।
প্রত্যহং প্রপঠেদ্ দেবি য়দীচ্ছেত্ শুভমাত্মনঃ ॥ ২০-২৮ ॥
ইদানীং কথয়িষ্যামি বিদ্যোত্পত্তিং বরাননে ।
য়েন বিজ্ঞানমাত্রেণ বিজয়ী ভুবি জায়তে ॥ ২০-২৯ ॥
য়োনিবীজত্রিরাবৃত্ত্যা মধ্যরাত্রৌ বরাননে ।
অভিমন্ত্র্য জলং স্নিগ্ধং অষ্টোত্তরশতেন চ ॥ ২০-৩০ ॥
তজ্জলং তু পিবেদ্ দেবি ষণ্মাসং জপতে য়দি ।
সর্ববিদ্যাময়ো ভূত্বা মোদতে পৃথিবীতলে ॥ ২০-৩১ ॥
শক্তিরূপাং মহাদেবীং শৃণু হে নগনন্দিনি ।
বৈষ্ণবঃ শৈবমার্গো বা শাক্তো বা গাণপোঽপি বা ॥ ২০-৩২ ॥
তথাপি শক্তেরাধিক্যং শৃণু ভৈরবসুন্দরি ।
সচ্চিদানন্দরূপাচ্চ সকলাত্ পরমেশ্বরাত্ ॥ ২০-৩৩ ॥
শক্তিরাসীত্ ততো নাদো নাদাদ্ বিন্দুস্ততঃ পরম্ ।
অথ বিন্দ্বাত্মনঃ কালরূপবিন্দুকলাত্মনঃ ॥ ২০-৩৪ ॥
জায়তে চ জগত্সর্বং সস্থাবরচরাত্মকম্ ।
শ্রোতব্যঃ স চ মন্তব্যো নির্ধ্যাতব্যঃ স এব হি ॥ ২০-৩৫ ॥
সাক্ষাত্কার্যশ্চ দেবেশি আগমৈর্বিবিধৈঃ শিবে ।
শ্রোতব্যঃ শ্রুতিবাক্যেভ্যো মন্তব্যো মননাদিভিঃ ॥ ২০-৩৬ ॥
উপপত্তিভিরেবায়ং ধ্যাতব্যো গুরুদেশতঃ ।
তদা স এব সর্বাত্মা প্রত্যক্ষো ভবতি ক্ষণাত্ ॥ ২০-৩৭ ॥
তস্মিন্ দেবেশি প্রত্যক্ষে শৃণুষ্ব পরমেশ্বরি ।
ভাবৈর্বহুবিধৈর্দেবি ভাবস্তত্রাপি নীয়তে ॥ ২০-৩৮ ॥
ভক্তেভ্যো নানাঘাসেভ্যো গবি চৈকো য়থা রসঃ ।
সদুগ্ধাখ্যসংয়োগে নানাত্বং লভতে প্রিয়ে ॥ ২০-৩৯ ॥
তৃণেন জায়তে দেবি রসস্তস্মাত্ পরো রসঃ ।
তস্মাত্ দধি ততো হব্যং তস্মাদপি রসোদয়ঃ ॥ ২০-৪০ ॥
স এব কারণং তত্র তত্কার্যং স চ লক্ষ্যতে ।
দৃশ্যতে চ মহাদে(ব?বি)ন কার্যং ন চ কারণম্ ॥ ২০-৪১ ॥
তথৈবায়ং স এবাত্মা নানাবিগ্রহয়োনিষু ।
জায়তে চ ততো জাতঃ কালভেদো হি ভাব্যতে ॥ ২০-৪২ ॥
স জাতঃ স মৃতো বদ্ধঃ স মুক্তঃ স সুখী পুমান্ ।
স বৃদ্ধঃ স চ বিদ্বাংশ্চ ন স্ত্রী পুমান্ নপুংসকঃ ॥ ২০-৪৩ ॥
নানাধ্যাসসমায়োগাদাত্মনা জায়তে শিবে ।
এক এব স এবাত্মা সর্বরূপঃ সনাতনঃ ॥ ২০-৪৪ ॥
অব্যক্তশ্চ স চ ব্যক্তঃ প্রকৃত্যা জ্ঞায়তে ধ্রুবম্ ।
তস্মাত্ প্রকৃতিয়োগেন বিনা ন জ্ঞায়তে ক্বচিত্ ॥ ২০-৪৫ ॥
বিনা ঘটত্বয়োগেন ন প্রত্যক্ষো য়থা ঘটঃ ।
ইতরাদ্ ভিদ্যমানোঽপি স ভেদমুপগচ্ছতি ॥ ২০-৪৬ ॥
মাং বিনা পুরুষে ভেদো ন চ য়াতি কথঞ্চন ।
ন প্রয়োগৈর্ন চ জ্ঞানৈর্ন শ্রুত্যা ন গুরুক্রমৈঃ ॥ ২০-৪৭ ॥
ন স্নানৈস্তর্পণৈর্বাপি নচ দানৈঃ কদাচন ।
প্রকৃত্যা জ্ঞায়তে হ্যাত্মা প্রকৃত্যা লুপ্যতে পুমান্ ॥ ২০-৪৮ ॥
প্রকৃত্যাধিষ্ঠিতং সর্বং প্রকৃত্যা বঞ্চিতং জগত্ ।
প্রকৃত্যা ভেদমাপ্নোতি প্রকৃত্যাভেদমাপ্নুয়াত্ ॥ ২০-৪৯ ॥
নরস্তু প্রকৃতির্নৈব ন পুমান্ পরমেশ্বরঃ ।
ইতি তে কথিতং তত্ত্বং সর্বসারমনোরমম্ ॥ ২০-৫০ ॥
ইতি শ্রীবৃহন্নীলতন্ত্রে ভৈরবভৈরবীসংবাদে তারাশতনাম
তত্ত্বসারনিরূপণং বিংশঃ পটলঃ ॥ ২০ ॥
– Chant Stotra in Other Languages –
Goddess Durga Slokam » Tara Shatanama Stotram from Brihannila Tantra Lyrics in Sanskrit » English » Gujarati » Kannada » Malayalam » Odia » Telugu » Tamil