॥ Sanvichchatakam Bengali Lyrics ॥
॥ সংবিচ্ছতকম্ ॥
॥ অথ ত্যাগরাজবিরচিতম্ সংবিচ্ছতকম্ ॥
য়স্যা নিত্যং চরণকমলদ্বন্দ্বমৈশ্চর্যবীজং
প্রধ্যায়ন্তো হৃদয়কমলে পুণ্যভাজো মুনীন্দ্রাঃ ।
নির্দ্বন্দ্বং তত্ সমরসমহো প্রাপ্য তিষ্ঠন্তি তস্মিন্
তস্যৈ দেব্যৈ তপনরুচয়ে তত্ত্বতোঽস্তু প্রণামঃ ॥ ১ ॥
য়া কল্যাণগুণপ্রসূঃ পরশিবানন্দামৃতস্যন্দিনী
ভূমানন্দময়ী পরাপরময়ী তেজোময়ী বাঙ্গ্ময়ী ।
আদ্যান্তার্ণতনূঃ শিবাদিবসুধান্তান্তঃপ্রকাশাত্মিকা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২ ॥
য়স্যাং প্রোতমিদং চতুর্দশজগত্ সূত্রে মণিস্তোমবদ্
য়স্যাং ভাতি জডং জডেতরমিদং স্তম্ভাদিবদ্ দারুণি ।
য়স্যাং পশ্যতি বিশ্বমজ্ঞহৃদয়াঃ স্থাণৌ পুমাংসং য়থা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩ ॥
মূলৌড্যাণগলোপরোধনমহামুদ্রাপ্রসন্না পরা
তেজঃপুঞ্জময়ী সদা গতিয়ুতা হংসী সহস্রারকম্ ।
অম্ভোজং পরহংসকেলিসদনং য়া প্রাপ্য লেভে মুদং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪ ॥
প্রাণাপানরবীন্দুয়োগপরমানন্দপ্রবুদ্ধা সতী
সংসুপ্তা শ্রুতিপত্রপদ্মশয়নে সৌষুম্নবীথ্যাদ্যুতম্ ।
বর্ষত্যসভানটং সমরসানন্দামৃতং প্রাপ্য য়া
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫ ॥
য়া মিত্রাবরুণালয়াত্ সমুদিতা তেজোময়ী বল্লরী
বীণাদণ্ডতরুশ্রিতা শিববিয়দ্যান্তী স্বভাবাত্ সদা ।
নানাবর্ণপদাদিপুষ্পনিচয়ান্ স্বস্মিন্ কিরন্তীচ্ছয়া
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬ ॥
য়া চৈকোত্তরখাদিপঞ্চকগুণাকারার্ণমন্ত্রাত্মিকা
য়া পীতারুণশুভ্রবিগ্রহময়ী সংধ্যাত্রয়ে রাজতে ।
য়াপ্যেকাক্ষরনাদসংততিসুখোদ্বোধৈকমূর্তিঃ পরা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭ ॥
য়াব্যক্তা নববারনাথকরুণাপাঙ্গা প্রকাশাত্মিকা
নীলেন্দীবরপদ্মহর্ষকরদৃক্তত্ত্বার্ণমুক্তাবলিঃ ।
কামেশ্যাদিসুধাংশুষোডশকলাপূর্ণাত্মবক্ত্রাম্বুজা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮ ॥
য়া সীমা নবখণ্ডচক্রবসুধালংকারমেরোঃ পরা
নানাদেশিকয়োগিনীমণিলসচ্ছুভ্রাদিবর্ণাবনেঃ ।
কামেশাঙ্কনিরভ্রনির্মলমহাকাশস্থবিদ্যুল্লতা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯ ॥
য়স্যাঃ প্রীতিরহর্নিশং কুলগিরিস্রোতঃসুধায়াং পরা
নিষ্কামপ্রণতান্তরঙ্গকুসুমে হ্রীংকারঘণ্টাধ্বনৌ ।
গন্ধেঽহং শিব এব নান্য ইতি য়ো দীপে বিমর্শাত্মকে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ১০ ॥
য়া চিত্রং ত্রিপুরা পুরান্তকসমাশ্লিষ্টা পরা জ্যোতিষাম্
অদ্বৈতাপি শিবার্ধর্মূর্তিরমলা পাশাপহা পাশিনী ।
পদ্মারাধ্যপদারবিন্দয়ুগলা ভিক্ষাটনেশপ্রিয়া
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ১১ ॥
য়া দূরা ললিতাপি দুষ্কৃতজুষাং য়া কোমলাঙ্গ্যদ্রিজা
য়া নীলাম্বুদমেচকাপি ভুবনং বিদ্যোতয়ত্যদ্ভুতম্ ।
য়া কল্যাণগুণপ্রবাহসুমহাবারাংনিধির্নির্গুণা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ১২ ॥
নিষ্ক্রোধা নতলোকমৃত্যুমথনে য়া বদ্ধকচ্ছা সদা
নির্বৈরা নিজপূজনাদিকৃতিনাং দৈন্যে দ্বিষন্ত্যদ্ভুতম্ ।
ভক্তানাং ভয়মোচিনী ভবরতা শ্রীকামরাজাত্মিকা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ১৩ ॥
বিদ্যারণ্যপুলিন্দিকা শ্রুতিগিরা তত্ত্বোপদেষ্ট্রী সতাং
বারাহী নকুলী বিলাসকুতুকা য়াপ্যুত্তমব্রাহ্মণী ।
য়া চিত্রং সুখশান্ত্যতীতবসুধা শ্রীচণ্ডিকা শূলিনী
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ১৪ ॥
য়া শালা নিগমাগমস্মৃতিকলালীলাততেস্ত্র্যক্ষরী
য়া ফালাক্ষমহাসতী স্মরকলাহেলা পরাপ্যদ্ভুতম্ ।
য়া কালানলকান্তিমত্যপি সদা নীলালকা শীতলা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ১৫ ॥
কল্যাণাচলকার্মুকস্য মহিষী পুণ্ড্রেক্ষুচাপাদ্ভুতং
লক্ষ্মীবল্লভসায়কস্য রমণী পুষ্পেষুহস্তাম্বুজা ।
য়া রামা পরমেশ্বরস্য ললিতা লোকত্রয়েঽত্যদ্ভুতং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ১৬ ॥
য়া বাচামধিদেবতাপ্যবিষয়া বাচাং শ্রুতের্বর্ণিতুং
শ্রোত্রাদীন্দ্রিয়দেবতাপি ন জডৈঃ শ্রোত্রাদিভির্জ্ঞায়তে ।
অন্তঃস্থামপি য়াং প্রচোদকতয়া নো জানতে জন্তবঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ১৭ ॥
য়া বীণা পরমেশ্বরাঙ্কনিলয়া হ্রীংকারমন্ত্রী সদা
শ্যামা কালসুমূর্চ্ছনাদিকলনাহীনাপি রাগিণ্যহো ।
নাথেনাহতনাদবিভ্রমবতী স্থাণুং শিবং চাকরোত্
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ১৮ ॥
য়া মোহান্ধতমোঽপনোদনবিধৌ বোধাত্মিকা কৌমুদী
সংসারার্ণবতারণে দৃঢতরা নৌকেন্দ্রচাপপ্রভা ।
দারিদ্র্যাদ্রিবিদারণে কনকরুগ্ দম্ভোলিরিচ্ছাত্মিকা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ১৯ ॥
য়া তাপত্রয়জাড্যশোকশমনে কাচিন্নৃণাং স্বর্ধুনী
য়া শান্ত্যাদিগুণপ্রবালমনিসংবৃদ্ধৌ সুধাম্বোনিধিঃ ।
প্রত্যগ্দৃষ্ট্যসিতাব্জপোষণবিধৌ জাড্যাপহা দীর্ঘিকা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২০ ॥
শোকারণ্যকুঠারিকা শুভফলোদ্যানস্য য়া বাপিকা
পাপক্ষ্বেলসুপর্ণকল্পঘুটিকা প্রাজ্ঞাজ্ঞয়োরম্বিকা ।
আশোচ্চাটনমূলিকা বিপণিকা বাগর্থবৃদ্ধেঃ কবেঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২১ ॥
য়া বাঞ্ছাপরিপূরণে সুরলতা মোক্ষেন্দিরা দেবতা
স্রষ্ট্রাদেঃ কুলদেবতা সুচরিতা বিদ্যাসু সর্বোন্নতা ।
নিত্যানন্দরতা সুকর্মমুদিতা লোকত্রয়ারাধিতা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২২ ॥
সারাসারপয়োবিবেচনবিধৌ হংসী পরং তু ত্বিষা
শ্যামা মোহতমোপনোদনবিধৌ হংসঃ সদা ভাসকঃ ।
প্রজ্ঞাসৌধবিহারিনিস্তুলমহাজ্যোত্স্না দিবাপি ধ্রুবা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২৩ ॥
য়া চিন্তামণিরেব দোষশমনে দানে পরং ত্বদ্রিজা
বাসন্তী পিকসুন্দরী শ্রুতিসুখালাপে স্বয়ং পঞ্চমী ।
য়ানে য়ৌবনসিন্ধুতীরকরিণী পদ্মাটবীরক্ষিণী
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২৪ ॥
য়া শংভোর্নয়নোত্পলেন্দুবদনা কংদর্পদূতীক্ষণা
চেতশ্চাতকনীলনীরদকচাজীবাতুসীমন্তিনী ।
শৃঙ্গারাদ্বয়শান্তিপাঠসুকৃতশ্রেয়ঃফলাগ্রয়স্তনী
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২৫ ॥
য়া ত্র্যক্ষস্য মনোরথঃ কিমু তপঃপাকঃ সুখং নৈজকং
দক্ষস্যেব তপঃফলং কুলধনং দৈবং হিমাদ্রেরপি ।
ভাগ্যং ভক্তজনস্য দেশিকদৃশোঃ শ্লাধ্যং কবীনাং গিরাং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২৬ ॥
সেতুর্দুঃখমহোদধের্মণিময়চ্ছায়া বিভোস্তত্তরোঃ
পান্থানাং পরমার্থিনাং প্রতিপদং কারুণ্যপাথঃপ্রপা ।
সত্যানন্দচিদন্নদানবিলসচ্ছালা চ কল্যাণধীঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২৭ ॥
য়া লোকত্রিতয়ৈকরত্নমজডং ভান্বিন্দুভাশীতলং
নির্দোষং গুণবর্জিতং চ নিখিলৈশ্চর্যপ্রদং দেহিনাম্ ।
চিত্রং ভিক্ষুকসার্বভৌমনিলয়ং লোকত্রয়ে ভাসতে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২৮ ॥
য়াপর্ণাপ্যনপায়কল্পলতিকা স্থাণুঃ পতিঃ কল্পকো
য়স্যা ভক্তফলপ্রপূরণবিধৌ পুত্রো বিশাখোঽদ্ভুতম্ ।
ইত্থং নিত্যকুটুম্বিনী ত্রিজগতাং রক্ষাকরী রাজতে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ২৯ ॥
য়া পুণ্যাশ্রম এব শাংকরতপঃসিদ্ধ্যৈ মহায়োগিনাং
নির্বৈরো গজপঞ্চবক্ত্রগতিমধ্যঃ শান্তিরঙ্গস্থলম্ ।
নির্দ্বন্দ্বস্তনচক্রবাকলসিতঃ কোকারিচূডামণিঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩০ ॥
য়া কেদারমমূল্যমানমভয়ং নিষ্পঙ্কমাশাস্পদং
শ্রীকণ্ঠেতরভোগবন্ধরহিতং কল্পে কদাপ্যদ্ভুতম্ ।
প্রজ্ঞাশালিন এব দিত্সতি বত জ্ঞানাঙ্কুরং কস্যচিত্
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩১ ॥
য়া চিত্রং করিণী হিমাচলভবা তাম্রারবিন্দেক্ষণা
কান্ত্যা ভর্ত্সয়তী বরং মরতকং পাশাঙ্কুশোক্ষ্বন্বিতা ।
পঞ্চাস্যপ্রভুমঞ্চকোপরি বসত্যানন্দপুর্যাং মুদা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩২ ॥
এণাঙ্কার্ভকমাত্মকুন্তলতমোরাত্র্যামপি দ্যোতয়-
ত্যাশ্চর্যং য়মিনাং কটাক্ষয়মুনাকল্লোলমালাং চ য়া ।
নিত্যং বক্ত্রশশাঙ্কমন্দহসিতজ্যোত্স্নাং কৃপায়াং গুরোঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩৩ ॥
য়া দৃষ্টিঃ শ্রুতিমূলশীলনপরা নীলাঞ্জনাদ্রিশ্রিয়ং
স্বাত্মস্মেরপয়োদধৌ সহভবং শ্রীবল্লভং তন্বতী ।
বাত্সল্যান্নতলোকমোহিতিমিরং চিত্রং ধুনীতে চ য়া
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩৪ ॥
য়া কারুণ্যকটাক্ষনীলবনজদ্বেষ্যাত্মজাম্ভঃস্বহো
মুগ্ধস্নিগ্ধমৃদুস্মিতামরধুনীবীচীবিলাসাশ্রিতে ।
সুস্নাতং নিজপাদপঙ্কজরজঃসিক্তং বত ব্যাতনোত্
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩৫ ॥
শ্রীকণ্ঠার্ধশরীরিণী ধ্রুবমপি শ্রীকান্তসোদর্যহো
নারায়ণ্যপি সর্বদা কুলনগোত্তংসাত্মজাত্যদ্ভুতম্ ।
প্রালেয়াচলকন্যকাপি সকলাহংরূপিণী য়াদ্ভুতম্
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩৬ ॥
আনঙ্গস্মৃতিসংপ্রদায়মখিলং স্বাপাঙ্গশিষ্যেণ য়া
কামদ্রোহিণমেব শিক্ষয়তি হা লোকোত্তরাত্যদ্ভুতম্ ।
তেনৈবাত্মপদারবিন্দরসপানোথং ত্রিলোকেঽন্যথা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩৭ ॥
বন্ধূকস্তবকং রুচা পরিহসত্যম্ভোজমপ্যদ্ভুতং
কর্ণাস্যেক্ষণপাণিনা বনচরং মধ্যেন বক্ষোরুহা ।
গত্যা স্বাদুগিরা সুধাকরকলোত্তংসৈশ্চ নীলালকৈঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩৮ ॥
নিঃস্পন্দং নিগমাগমাদ্যবিষয়ং শ্রোত্রাদিহীনং পরং
নিঃশব্দং তদহো পুমাংসমকরোত্ কামেশ ইত্যাখ্যয়া ।
য়া চিত্রং নিজদাসমচ্ছহৃদয়ং শক্ত্যা তনোত্যন্যথা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৩৯ ॥
বাগর্থেন য়থা য়ুতাপি পরমানন্দাত্মনা শূলিনা
নিত্যং য়া বিহরত্যহো জনমনোগেহেষু মুগ্ধেষু হা ।
নির্ভীতা কুলটেব কর্ম কুরুতে সর্বেন্দ্রিয়াণাং সদা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪০ ॥
নাসামৌক্তিকদৈত্যদেশিকমহো মন্দস্মিতৈঃ পুষ্ণতী
তাটঙ্কদ্যুতিভির্দিনেশশশিনৌ দেবৌ তিরস্কুর্বতী ।
মারারের্গুহমেধিনী মনসিজং রক্ষত্যপাঙ্গোটজে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪১ ॥
বন্ধচ্ছেদবিচক্ষণা পশুজনস্তোমাতিদূরাদ্ভুতং
য়া রক্ষত্যগরাজশেখরসুতাপ্যাম্নায়সূত্রৈর্দৃঢম্ ।
বদ্ধ্বা দেবপশূন্ সদা পশুপতেঃ সংসর্গদোষেণ হা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪২ ॥
ধারা দেশিকদিব্যদৃষ্টিমধুনো মারারিনেত্রামৃতং
ধারা দুর্মতদারুদারিপরশোস্তারাবলির্যোগিনাম্ ।
তীরং মন্ত্রমহোদধেঃ কবিগিরাং পূরঃ সুখাম্ভোনিধেঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪৩ ॥
কামাক্ষীতি বদন্তি কেচন বুধাঃ কামেশ্বরীত্যদ্ভুতং
রামাস্তোমশিরোমণীতি মদনারাতের্দৃশোঃ পারণা ।
সীমা ভূমসুখস্য চিন্ময়কলা শৃঙ্গারমূর্তিশ্চ য়া
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪৪ ॥
মুগ্ধস্নিগ্ধকটাক্ষমিত্রতনয়া য়স্যাঃ সদানন্দিনী
মন্দস্মেরপয়োনিধিং নিজপতিং সংগম্য বাণীশ্রিয়ঃ ।
সংসূয় প্রদদাত্যয়াচিততত্যা ভক্তেভ্য এবাদরাত্
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪৫ ॥
ঔন্নত্যং মুহুরেতি চিত্রমমরশ্রেণীষু য়দ্যোগতো
দক্ষদ্বেষ্যপি ভিক্ষুকোঽপি বিষমাক্ষোঽপ্যুক্ষয়ানোঽপি বা ।
অজ্ঞাতান্বয়সংভবোঽপি নিগমাতীতোঽপি লুব্ধস্তথা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪৬ ॥
য়া লোকৈকসুমঙ্গলা স্মরকলা নীলাম্বুদশ্যামলা
ডোলা শংকরলোচনদ্বয়শিশোর্মালাষ্টসিদ্ধিশ্রিয়াম্ ।
কালাতীতকলা কলানিধিকলোত্তংসাতুলা নির্মলা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪৭ ॥
অস্তং য়া নলিনেক্ষণেন নয়তি ক্ষোভাতপং য়োগিনাং
স্বানন্দামৃতচন্দ্রিকাং করুণয়া নিত্যং তনোত্যদ্ভুতম্ ।
বর্ষত্যাননপঙ্কজে সুকবিতাপীয়ূষধারাঃ কবেঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪৮ ॥
য়া বিদ্যুত্কমলেষু তিষ্ঠতি পরা তাপিঞ্ছগুচ্ছচ্ছবি-
শ্চিতং প্রাণভৃতাং দৃশোঃ সুখকরী ভীমপ্রকাশিন্যলম্ ।
জ্যোতিঃ শীতলভূভৃতস্ত্রিভুবনক্ষেমপ্রবাহপ্রদা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৪৯ ॥
য়া কাচিদ্ধরিণী মরালগমনা চিদ্ব্যোমসংচারিণী
হ্রীংকারস্বনসংততেঃ পরবশা হৃদ্যানবদ্যা দৃশাম্ ।
অস্ত্রৈব্যার্ধবরং পিনাকিনমহো সংমোহয়ন্ত্যন্বহং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫০ ॥
ধেনুর্যা পরমাত্মনঃ পশুপতেঃ সর্বজ্ঞতাদোহিনী
চিত্রং ষণ্মুখবক্রতুণ্ডজননী প্রালেয়শৈলাত্মজা ।
নির্নিদ্রামলপুণ্ডরীকনয়না শুভ্রাংশুচূডামণিঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫১ ॥
য়াং দণ্ডং বরবিদ্রুমাত্মকমতিশ্লক্ষণং সুসূক্ষ্মং ধ্রুবং
গাঢং নির্বিষয়াঃ পুরাণপুরুষা আলম্ব্য গচ্ছন্ত্যহো ।
তীর্ত্বা দুস্তরজন্মপঙ্কনিবিডং মায়ামহীমণ্ডলং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫২ ॥
য়া কুম্ভোদ্ভব এব মন্মথরিপোর্ধৈর্যাম্বুধেঃ প্রাশনে
প্রারব্ধাত্মকবিন্ধ্যভূধরগতিধ্বংসে তথা ধীমতাম্ ।
আচার্যঃ শিববোধনে নিজপতেরানঙ্গদীক্ষাক্রমে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫৩ ॥
য়া ক্ষীরাব্ধিসহোদরস্মিতরুচা কম্বুং তিরস্কুর্বতী
কামারের্হৃদয়ং বিশুদ্ধমপি সংমুগ্ধং করোত্যন্বহম্ ।
আশ্চর্যাং নমতাং ধুনোতি তিমিরং স্বাজ্ঞানরূপং পরং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫৪ ॥
য়স্যা হাসমরালিকামৃদুগতিঃ শ্রীকামজেত্রে মুদা
বিদ্যাং বোধয়িতুং পরাং বিতনুতেঽপাঙ্গার্কজাতোর্মিষু ।
স্থিত্বা শ্রৌতপথস্থকুণ্ডলয়ুগেনালোচনাসংততং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫৫ ॥
য়স্যা বীক্ষণশক্রমেচকমণীসাম্রাজ্যসিংহাসনং
শ্রিত্বা পুষ্পশরপ্রভুর্বিজয়তে ত্র্যক্ষস্য পার্শ্বেঽদ্ভুতম্ ।
পীয়ূষার্ণবফেনজেতৃসহিতশ্রীচামরাসেবিতঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫৬ ॥
নীহারাদ্রিয়শোঽভিবর্ধনপরে কুঞ্জে কটাক্ষাত্মকে
য়স্যাঃ ক্রীডতি নীলকণ্ঠবিমলপ্রজ্ঞাময়ূরার্ভকঃ ।
পশ্যন্ নিত্যসুগন্ধিকুন্তলময়ীং কাদম্বিনীং সংততং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫৭ ॥
য়া হাসার্জুনভূভৃতা সুখয়তি দ্রাগ্ ভীমচিত্তং পরং
ধর্মং পালয়তি প্রবেশয়তি বৈবর্ণেঽনুকূলাং গতিম্ ।
মালিন্যং নয়তেতরাং ধ্রুবমহো তদ্ধার্তরাষ্ট্রং কুলং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫৮ ॥
য়া মুক্তাফলমদ্ভুতং গিরিভবং শ্যামং প্রকাশাস্পদং
সত্সূত্রং সকলার্থদং শশিকলাচূডং ত্রিণেত্রং চরম্ ।
নির্দোষংভবকৌতুকপ্রদমনাদ্যন্তং পরং নিস্তুলং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৫৯ ॥
য়া বাপী ভুবনপ্রদা রসময়ী তৃষ্ণার্দিতানাং পরং
নিষ্পাশাভিগতাভিমানমমতাপাশাভিলাষান্বিতা ।
সত্পাত্রে ফলদায়িনী স্মৃতিমতাং তাপত্রয়ধ্বংসিনী
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬০ ॥
শৃঙ্গারাম্বুধবীচিবিভ্রমবতী শৃঙ্গারবীজানিল-
ব্যালোলা কুমুদপ্রিয়ধ্বজপটী প্রত্যক্চরী পার্বতী ।
দ্রোণী য়া বিষমেক্ষণানুসরণী চিত্রং সদা রাজতে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬১ ॥
য়স্যা নীরদভাঃ কটাক্ষয়দুপঃ কর্ণানুবৃত্তোঽদ্ভুতং
দীব্যত্কুণ্ডলহাসচক্রজলজশ্লিষ্টঃ কৃপানীরদঃ ।
স্থানোর্গোকুলমন্বহং নয়তি তদ্বক্ষোজশৈলান্তরং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬২ ॥
য়া চিত্রং মহতীং মহাগুণবতীমপ্যশ্রিতং সংততং
কাঠিন্যং ন বিমুঞ্চতি স্তনয়ুগং মান্দ্যং গতিঃ কুন্তলাঃ ।
কৌটিল্যং নয়নাম্বুজং চপলতাং বিম্বাধরো রাগিতাং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬৩ ॥
য়া মন্দস্মিতকৌমুদীং বিতনুতে নিত্যোদিতে সর্বত-
স্তাটঙ্কাত্মনি ভাস্করে স্বয়মহো কালাম্বুদশ্যামলা ।
বিম্বোষ্ঠদ্যুতিসংধ্যয়া দ্বিজগণে শ্রীশাংভবে রাগিতাং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬৪ ॥
জারে মারকিরাতজীবনকরে চিত্রং কটাক্ষাত্মকে
য়স্যাঃ কুণ্ডলরশ্মিবেণুকলিতে লগ্না সুখং রাজতে ।
কামারের্মতিশারিকা শ্রুতিশিরোদ্যানান্তরোল্লাসিনী
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬৫ ॥
নিত্যং সোমকলাধরোঽধ্বরপতির্ব্যাঘ্রাজিনালংকৃত-
স্তাটঙ্কদ্যুতিবহ্নিবীক্ষণশিখাধূমাতিলোলেক্ষণঃ ।
য়স্যা হাসপয়োনিধাববভৃথব্যাজেন মজ্জত্যহো
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬৬ ॥
য়স্যাঃ কাপি দয়াত্মিকা প্রতিদিনং শৈলূষবালাদ্ভুতং
নীরাগালয়কালবর্জিতবতী নির্মূর্চ্ছনা কামনা ।
নির্লজ্জৈব দিগম্বরা নটতি হা সংমোহশান্ত্যৈ নৃণাং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬৭ ॥
মাঙ্গল্যং হরিনীলকান্তিসুগুণং শ্লাধ্যং সুরস্ত্রীজনৈ-
র্যস্যা মঞ্জুলবীক্ষণং স্মরহারাজস্য দেব্যা রতেঃ ।
ওষ্ঠশীর্বরকুঙ্কুমং স্মিতমহো স্রঙ্মাধবী শাশ্বতী
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬৮ ॥
চিত্রং কাপি সুধা শিবেতরসুরালভ্যা হিমাদ্র্যুদ্ভবা
দ্রুহ্যন্তী কুরুবিন্দমাত্মরুচিভির্দোষাকরোত্তংসিনী ।
আস্তে য়া মদনজ্বরং শশিভৃতঃ সংধুক্ষয়ন্ত্যন্বহং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৬৯ ॥
অর্ধং রাজ্যমনন্যসাধ্যমখিলৈশ্চর্যপ্রদং শূলিনঃ
শুদ্ধং মূর্তিময়ং য়য়াতিবিনয়ৈঃ প্রাপ্তং তদন্যত্ পুনঃ ।
ব্যাপ্তুং বাঞ্ছতি গারুডোপলবপুঃ কান্ত্যা মহত্যা পরং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭০ ॥
অর্ধং সোমকলাধরী শশিকলাচূডস্য য়া ত্র্যম্বক-
স্ত্র্যক্ষায়া অথবা সনাতনতনূ জায়াপতী শাশ্বতৌ ।
একং বেত্যবধারিতুং মুনিবরা অদ্যাপ্যলং নাদ্ভুতং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭১ ॥
দারিদ্র্যাস্তধরাধরোঽপি পরমং ভদ্রোদয়োঽত্যদ্ভুতং
পাপারণ্যদবানলোঽপি নমতাং কারুণ্যধারাধরঃ ।
য়া দুহ্খাম্বুদমালিকাপবনরাণ্নৈশ্চল্যরূপাস্তি বৈ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭২ ॥
শ্রৌতং মার্গমতীত্য গচ্ছতি মুদা কাপালিকং দৃক্ পরং
মধ্যঃ শূন্যমতং গতোঽতিবিমলে দ্বন্দ্বে কুচৌ দ্বৈতিনৌ ।
সৌরে কুণ্ডলয়ুগ্মমাত্মরুচিভির্যস্যাঃ কৃপা শাংভবে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭৩ ॥
বল্লী কাপি শিবাঙ্কণে লসতি য়া মন্দস্মিতৈঃ পুষ্পিতা
তাম্বূলেন সুগন্ধিতা সুফলিতা বক্ষোরুহাভ্যাং পরম্ ।
কান্ত্যা পল্লবিতা কচৈর্ভ্রমরিতা দৃগ্ভ্যাং পরং পত্রিতা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭৪ ॥
য়স্যা বীক্ষণদেশিকঃ শ্রুতিগতিস্তেজোময়ঃ সর্ববিত্
সংতুষ্টো জিতকামশত্রুরণিমাদ্যষ্টাভিরারাধিতা ।
সচ্চিত্সৌখ্যরতঃ শিবং নটমপি ক্ষিপ্রং করোত্যদ্ভুতং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭৫ ॥
য়স্যাশ্চারুকপোলদর্পণতলে দৃষ্ট্বা কপর্দী রুষা
ভীতো জহ্নুসুতাং মৃদুস্মিতময়ীং সংকেতমিত্থং ব্যধাত্ ।
মুগ্ধে গচ্ছ নিজস্থলং দ্রুততর্ং জাগর্তি দৃষ্টির্যতঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭৬ ॥
শৃঙ্গারৈকরসং বসন্তসুহৃদং কংদর্পদর্পপ্রদং
চিত্রং কোকনদপ্রবোধনকরং চন্দ্রোদয়ং শ্রীকরম্ ।
য়স্যা হাসময়ং চিরমপ্যাস্তে পুরাণঃ শিবঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭৭ ॥
য়া কাচিত্ পিককামিনী শ্রুতিগতিঃ সপ্তস্বরালাপিনী
নিত্যং মাধববোধিনী ত্রিভুবনে নিষ্পক্ষপাতা সুখম্ ।
চিত্রং চূতনবপ্রসূনবিশিখদ্বেষ্যাশ্রয়ে রাজতে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭৮ ॥
য়স্যা বীক্ষণমান্ত্রিকঃ সুকৃতিনামগ্রেসরঃ শংকরী-
মন্ত্রাম্ভোনিধিপারগঃ স্মিতবিভূত্যোচ্চালয়ন্ সর্বদা ।
দ্বেষং শংকরকর্তৃকং সুমশরে বিভ্রাজতে শাশ্বতঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৭৯ ॥
য়স্যা দৃগ্রমণীমণির্বিবদতে কামারিসল্লাপনে
স্বাধীনপ্রিয়য়া মৃদুস্মিতশরীরিণ্যা পরং গঙ্গয়া ।
আদ্যাহংশ্রুতিমূলগাধরভবা ত্বং স্বীকৃতেতি ধ্রুবং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮০ ॥
য়া কাচিদ্ ভুজগী সদা সরলগা পীয়ূষদায়িন্যহো
পদ্মারণ্যবিহারিণী শ্রুতিমতী তেজস্তনূর্নির্ভয়া ।
জন্মাব্ধিপ্লববর্ধিনী বশয়তি শ্রীনীলকণ্ঠং দৃশা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮১ ॥
আস্যাম্ভোজভবা পতিং নিজমনাদ্যন্তং কটাক্ষাত্মকং
পৃচ্ছন্তীতি পয়োনিধেঃ স্মিতময়ান্মজ্জন্ম কিং বাম্বুজাত্ ।
য়স্যা নিঃস্মরসংপদং সুধনিকং কর্তুং শিবং কাঙ্ক্ষতে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮২ ॥
য়স্যাঃ পাণিপরিগ্রহে মৃদুতনোর্হেমাদ্রিধন্বা শিবঃ
পাদান্যাসবিধৌ দৃষদ্যপি সুরস্ত্রীণাং পুরো লজ্জিতঃ ।
মন্দাক্ষং গতবাননঙ্গকলিকাং য়াং বীক্ষিতুং নাদ্ভুতং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮৩ ॥
য়স্যাঃ পাদকেশশয়শ্রিয়মহো শ্রুত্বানিলাদন্বহং
গাঙ্গান্যম্বুরুহাণি হন্ত কতিচিত্ প্রাপ্তুং পরাং তাং দ্রুতম্ ।
পীত্বা ক্ষীরলবং তপন্তি তপনং পশ্যন্তি মজ্জন্ত্যলং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮৪ ॥
নিত্যং সংধিমপেক্ষতে সুচরিতা দূতী কটাক্ষাত্মিকা
রাজস্যাধররাময়াপি ন তয়া গর্ভে বহন্ত্যামৃতম্ ।
কামারে রতিসাত্ত্বিকদ্বিজমণের্মোদায় সুশ্রেয়সে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮৫ ॥
পক্ষে শৈবমনোমহীভৃতি মনোজাগ্নিং ধ্রুবং সাধয়ন্
য়স্যা মঞ্জুকটাক্ষধূমশিশুনা শ্রৌতেন সদ্ধেতুনা ।
ওষ্ঠদ্বন্দ্বসভান্তরে স্মিতময়ো নৈয়ায়িকো ভাসতে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮৬ ॥
য়া পদ্মং হিমশৈলজং মরতকং ভাসা ভৃশং ভর্ত্সয়ত্
কংদর্পস্য জ্যেন্দিরাজনিগৃহং নির্হেতুকোত্ফুল্লনম্ ।
স্থাণোর্লোচনভৃঙ্গসংভ্রমকরং শীতাংশুলেখাঙ্কিতং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮৭ ॥
য়স্যা মন্দগতিঃ পরং শুভগতিঃ কামস্য কামদ্রুহঃ
কামোদ্রেকগতিশ্চিরং ভজনকৃদ্ধংসাঙ্গনাসংততেঃ ।
কামং দত্তগতিঃ সদা বিজয়তে হংসাত্মিকা য়োগিনাং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮৮ ॥
নিঃস্নেহাপি শিবাতিরাগকলিতা য়া দীপিকা কাপ্যহো
ঝঞ্ঝামারুতভীতিদাপি চপলা নিষ্কল্মষা সাঞ্জনা ।
ত্রৈলোক্যেঽপি বিরাজতে শ্রিতবতী শ্রীশংকরাঙ্কং ধ্রুবং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৮৯ ॥
নির্যত্নৈব মহাসতী সুচরিতা য়া শৈলরাজাত্মজা
নাথং লোকবিলক্ষণং প্রহৃতবত্যদ্যাপি সেবাজনে ।
গাণ্ডীবেন বরাশ্মভিশ্চ মুসলেনোপানহা বর্ততে
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯০ ॥
য়স্যাঃ পাদকিসালয়প্রভুবরং য়াচন্ত্যজস্রং পরং
কস্তূর্যঃ সুরয়োষিতাং তিলকিতাঃ সদ্বাসনাং রাগিতাম্ ।
বিম্বোষ্ঠং মৃদুতাং শ্রিয়ং চ য়ুগপদ্ধস্তাঃ প্রবালপ্রিয়াঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯১ ॥
য়স্যাঃ পাদসহস্ররশ্মিচরলং কামারিচিত্তাত্মকং
হৈমং ভ্রাময়তি প্রণাশয়তি সংতাপং সতামঙ্কুরম্ ।
প্রজ্ঞানাত্মকমদ্ভুতং শিশিরয়ত্যক্ষীণ্যলং পশ্যতাং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯২ ॥
চিত্রং য়া কুরুতে মনোঽপি য়মিনাং বদ্ধং মহায়ত্নতো
মুক্তং শোণপদারবিন্দয়ুগলে নীরাগিণং রাগিণম্ ।
মঞ্জীরস্বনমন্মথস্মিতরবৈঃ সংমোহনং শূলিনঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯৩ ॥
পাদাম্ভোজরজো রজাংসি হরতি প্রৌঢানি য়স্যা নৃণাং
সত্ত্বং বর্ধয়তি প্রদর্শয়তি সন্মার্গং সুরাণামপি ।
জন্মব্যাধিমৃতিপ্রবাহমতুলং সংরোধয়ত্যদ্ভুতং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯৪ ॥
নাহং বিশ্বমিদং চরাচরময়ং মায়াবিলাসাস্পদং
দৃশ্যত্বাদিতি শোধয়ন্তি সুধিয়ঃ সর্বং য়য়া প্রজ্ঞয়া ।
আত্মৈবায়মিদং বদন্তি পুনস্তূষ্ণীংভবন্তঃ স্থিতাঃ
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯৫ ॥
রাহুং নিন্দতি চন্দ্রচূডচিকুরৈস্তাটঙ্ককান্ত্যা রবিং
বক্ত্রাব্জেন বিধুং গুরুং নতগিরা সৌগ্যং দৃশা ভদ্রয়া ।
গত্যা মন্দমহো কুজং তনুরুচা নাসাগ্রমণ্যা কবিং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯৬ ॥
নিঃশ্রেণী কৃতিনাং পরামৃতফলপ্রাপ্তৌ প্রবালদ্যুতি-
র্যা নীলাঞ্জনমক্ষরাত্মকনিধেঃ সংদর্শনে শ্রীমতাম্ ।
নিত্যানন্দরসা পরোক্ষকরণে শ্রীদেশিকশ্রীকৃপা
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯৭ ॥
য়া কুণ্ঠীকুরুতে নিজস্তুতিবিধৌ গর্বাত্ প্রবৃত্তাং গিরং
বেদানামপি গীষ্পতেরপি মহাভাষ্যার্থবিজ্ঞানিনঃ ।
দত্তে বাগ্ভববৈভবামৃতঝরীং মূকাজ্ঞয়োর্বাগ্মিতাং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯৮ ॥
আদ্যামম্বুরুহেক্ষণামনুপমামাপীনতুঙ্গস্তনী-
মার্যামাগমসারমূর্তিমরুণামানন্দচন্দ্রাননাম্ ।
সাধ্বীং সত্কবিবাগ্ঝরীং সমরসানন্দামৃতস্যন্দিনীং
সা সংবিত্ সুকৃতোদয়া স্ফুরতু নশ্চিত্তে সদা সর্বগা ॥ ৯৯ ॥
গুরুচরণসরোজং গুপ্তগঙ্গাতরঙ্গ-
স্তিমিতমমিতশুক্লজ্যোতিষাং জ্যোতিরেকম্ ।
নিরুপমমকরন্দস্পন্দমানন্দকন্দং
নিধনজননহীনো নির্মলোঽহং নিষেবে ॥ ১০০ ॥
শার্দূলবৃত্তমপি সাধু ভবত্যহো তত্
সারস্বতং সমরসামৃতলোচনানাম্ ।
সদ্যো জয়ত্যঘরিপুং শ্রুতিমার্গয়োগাত্
ত্যাগেশসান্দ্রকরুণাদ্ভুতমেব ভদ্রম্ ॥ ১০১ ॥
ইত্যানন্দনাথপাদপপদ্মোপজীবিনা কাশ্যপগোত্রোত্পন্নেনান্ধ্রেণ
ত্যাগরাজনাম্না বিরচিতং সংবিচ্ছতকং সংপূর্ণম্