॥ Sharika Sahasranamastotram Malayalam Lyrics ॥
॥ ശ്രീശാരികാസഹസ്രനാമസ്തോത്രം ॥
ശ്രീഭൈരവ ഉവാച –
യാ സാ ദേവീ പുരാഖ്യാതാ ശാരികാരൂപധാരിണീ ।
ജാലന്ധരരാക്ഷസഘ്നീ പ്രദ്യുംനശിഖരേ സ്ഥിതാ ॥ 1 ॥
തസ്യാ നാമസഹസ്രം തേ മന്ത്രഗര്‍ഭം ജയാവഹം ।
കഥയാമി പരാം വിദ്യാം സഹസ്രാഖ്യാഭിധാം ശിവേ ॥ 2 ॥
ശിലായാഃ ശാരികാഖ്യായാഃ പരസര്‍വസ്വരൂപിണീം ।
വിനാ നിത്യക്രിയാം ദേവി വിനാ ന്യാസം വിനാഽര്‍ചനം ॥ 3 ॥
വിനാ പുരസ്ക്രിയാം ജാപ്യം വിനാ ഹോമം ച തര്‍പണം ।
വിനാ ശ്മശാനഗമനം വിനാ സമയപൂജനം ॥ 4 ॥
യയാ ലഭേത് ഫലം സര്‍വം താം വിദ്യാ ശൃണു പാര്‍വതി ।
യാ ദേവീ ചേതനാ ലോകേ ശിലാരൂപാസ്തി ശാരികാ ॥
സൃജത്യവതി വിശ്വം തു സംഹരിഷ്യതി താമസീ ।
സൈവ സംസാരിണാം ദേവി പരമൈശ്വര്യദായിനീ ॥ 6 ॥
പരം പദം പ്രദാപ്യാന്തേ മഹാവിദ്യാത്മികാ ശിലാ ।
തസ്യാ നാമസഹസ്രം തേ വര്‍ണയാമി രഹസ്യകം ॥ 7 ॥
രഹസ്യം മമ സര്‍വസ്വം സകലാചാരവല്ലഭം ।
യോ ജപേത് പരമാം വിദ്യാം പഠേദാഖ്യാസഹസ്രകം ॥ 8 ॥
ധാരയേത് കവചം ദിവ്യം പഠേത സ്തോത്രേശ്വരം പരം ।
കിം തസ്യ ദുര്ലഭം ലോകേ നാപ്നുയാദ് യദ്യദീശ്വരി ॥ 9 ॥
അസ്യ നാംനാം സഹസ്രസ്യ മഹാദേവ ഋഷിഃ സ്മൃതഃ ।
ഛന്ദോഽനുഷ്ടുപ് ദേവതാ ച ശാരികാ പരികീര്‍തിതാ ॥ 10 ॥
ശര്‍മ ബീജം രമാ ശക്തിഃ സിന്ധുരഃ കീലകം സ്മൃതം ।
ധര്‍മാര്‍ഥകാമമോക്ഷാര്‍ഥേ വിനിയോഗഃ പ്രകീര്‍തിതഃ ॥ 11 ॥
ധ്യാനമസ്യാഃ പ്രവക്ഷ്യാമി ശൃണു പര്‍വതനന്ദിനി ।
॥ വിനിയോഗഃ ॥
അസ്യ ശ്രീശാരികാഭഗവതീസഹസ്രനാമസ്തോത്രസ്യ, ശ്രീമഹാദേവ ഋഷിഃ,
അനുഷ്ടുപ് ഛന്ദഃ, ശ്രീശാരികാ ഭഗവതീ ദേവതാ, ശാം ബീജം,
ശ്രീം ശക്തിഃ, ഫ്രാം കീലകം, ധര്‍മാര്‍ഥകാമമോക്ഷാര്‍ഥേ വിനിയോഗഃ
ഋഷ്യാദിന്യാസം കൃത്വാ, ഹ്രാംശ്രാമിത്യാദിനാ കരാങ്ഗന്യാസൌ ॥
॥ ഋഷ്യാദിന്യാസഃ ॥
ഓം ശ്രീമഹാദേവഋഷയേ നമഃ ശിരസി ।
അനുഷ്ടുപ്ഛന്ദസേ നമഃ മുഖേ ।
ശ്രീശാരികാഭഗവതീ ദേവതായൈ നമഃ ഹൃദയേ ॥
ശാം ബീജായ നമഃ ദക്ഷസ്തനേ ॥
ശ്രീം ശക്തയേ നമഃ വാമസ്തനേ ॥
ഫ്രാം കീലകായ നമഃ നാഭൌ ॥
ശ്രീശാരികാഭഗവതീ പ്രസാദസിദ്ധ്യര്‍ഥേ പാഠേ വിനിയോഗായ നമഃ പാദയോഃ ॥
॥ ഷഡങ്ഗന്യാസഃ ॥
॥ കരന്യാസഃ ॥
ഹ്രാം ശ്രാം അങ്ഗുഷ്ഠാഭ്യാം നമഃ । ഹ്രീം ശ്രീം തര്‍ജനീഭ്യാം നമഃ ।
ഹ്രൂം ശ്രൂം മധ്യമാഭ്യാം നമഃ । ഹൈം ശ്രൈം അനാമികാഭ്യാം നമഃ ।
ഹ്രൌം ശ്രൌം കനിഷ്ഠാഭ്യാം നമഃ । ഹ്രഃ ശ്രഃ കരതലകരപുഷ്ഠാഭ്യാം നമഃ ।
॥ അങ്ഗന്യാസഃ ॥
ഹ്രാം ശ്രാം ഹൃദയായ നമഃ । ഹ്രീം ശ്രീം ശിരസേ സ്വാഹാ ।
ഹ്രൂം ശ്രൂം ശിഖായൈ വഷട് । ഹൈം ശ്രൈം കവചായ ഹും ।
ഹ്രൌം ശ്രൌം നേത്രത്രയായ വൌഷട് । ഹ്രഃ ശ്രഃ അസ്ത്രായ ഫട് ।
॥ ധ്യാനം ॥
ബാലാര്‍കകോടിസദൃശീമിന്ദുചൂഡാം കരാംബുജൈഃ ।
വരചക്രാഭയാസീംശ്ച ധാരയന്തീം ഹസന്‍മുഖീം ॥ 1 ॥
സിംഹാരൂഢാം രക്തവസ്ത്രാം രക്താഭരണഭൂഷിതാം ।
വാമദേവാങ്കനിലയാ ഹൃത്പദ്മേ ശാരികാം ഭജേ ॥ 2 ॥
ബാലാര്‍കകോടിദ്യുതിമിന്ദുചൂഡാം വരാസിചക്രാഭയബാഹുമാദ്യാം ।
സിംഹാധിരൂഢാം ശിവവാമദേഹലീനാം ഭജേ ചേതസി ശാരികേശീം ॥ 3 ॥
॥ സ്തോത്രം ॥
ഓം ഹ്രീം ശ്രീം ഹൂം ഫ്രാം ആം ശാം ശ്രീശാരികാ ശ്യാമസുന്ദരീ ।
ശിലാ ശാരീ ശുകീ ശാന്താ ശാന്തമാനസഗോചരാ ॥ 1 ॥
ശാന്തിസ്ഥാ ശാന്തിദാ ശാന്തിഃ ശ്യാമാ ശ്യാമപയോധരാ ।
ദേവീ ശശാങ്കബിംബാഭാ ശശാങ്കകൃതശേഖരാ ॥ 2 ॥
ശശാങ്കശോഭിലാവണ്യാ ശശാങ്കമധ്യവാസിനീ ।
ശാര്‍ദൂരലവാഹാ ദേവേശീ ശാര്‍ദൂലസ്ഥിതിരുത്തമാ ॥ 3 ॥
ശാദൂലചര്‍മവസനാ ശക്തിഃ ശാര്‍ദൂലവാഹനാ ।
ഗൌരീ പദ്മാവതീ പീനാ പീനവക്ഷോജകുട്മലാ ॥ 4 ॥
പീതാംബരാ രക്തദന്താ ദാഡിമീകുസുമോപമാ ।
സ്ഫുരദ്രത്നാംശുഖചിതാ രത്നമണ്ഡലവിഗ്രഹാ ॥ 5 ॥
രക്താംബരധരാ ദേവീ രത്നമാലാവിഭൂഷണാ ।
രത്നസമ്മൂര്‍ഛിതാത്മാ ച ദീപ്താ ദീപ്തശിഖാ ദയാ ॥ 6 ॥
ദയാവതീ കല്‍പലതാ കല്‍പാന്തദഹനോപമാ ।
ഭൈരവീ ഭീമനാദാ ച ഭയാനകമുഖീ ഭഗാ ॥ 7 ॥
കാരാ കാരുണ്യരൂപാ ച ഭഗമാലാവിഭൂഷണാ ।
ഭഗേശ്വരീ ഭഗസ്ഥാ ച കുരുകുല്ലാ കൃശോദരീ ॥ 8 ॥
കാദംബരീ പടോത്കൃഷ്ടാ പരമാ പരമേശ്വരീ ।
സതീ സരസ്വതീ സത്യാ സത്യാസത്യസ്വരൂപിണീ ॥ 9 ॥
പരമ്പരാ പടാകാരാ പാടലാ പാടലപ്രഭാ ।
പദ്മിനീ പദ്മവദനാ പദ്മാ പദ്മാകരാ ശിവാ ॥ 10 ॥
ശിവാശ്രയാ ശരച്ഛാന്താ ശചീ രംഭാ വിഭാവരീ ।
ദ്യുമണിസ്തരണാ പാഠാ പീഠേശീ പീവരാകൃതിഃ ॥ 11 ॥
അചിന്ത്യാ മുസലാധാരാ മാതങ്ഗീ മധുരസ്വനാ ।
വീണാഗീതപ്രിയാ ഗാഥാ ഗാരുഡീ ഗരുഡധ്വജാ ॥ 12 ॥
അതീവ സുന്ദരാകാരാ സുന്ദരീ സുന്ദരാലകാ ।
അലകാ നാകമധ്യസ്ഥാ നാകിനീ നാകിപൂജിതാ ॥ 13 ॥
പാതാലേശ്വരപൂജ്യാ ച പാതാലതലചാരിണീ ।
അനന്താഽനന്തരൂപാ ച ഹ്യജ്ഞാതാ (100) ജ്ഞാനവര്‍ധിനീ ॥ 14 ॥
അമേയാ ഹ്യപ്രമേയാ ച ഹ്യനന്താദിത്യരൂപിണീ ।
ദ്വാദശാദിത്യസമ്പൂജ്യാ ശമീ ശ്യാമാകബീജിനീ ॥ 15 ॥
വിഭാസാ ഭാസുരവര്‍ണാ സമസ്താസുരഘാതിനീ ।
സുധാമയീ സുധാമൂര്‍തിഃ സുധാ സര്‍വപ്രിയങ്കരീ ॥ 16 ॥
സുഖദാ ച സുരേശാനീ കൃശാനുവല്ലഭാ ഹവിഃ ।
സ്വാഹാ സ്വാഹേശനേത്രാ ച ഹ്യഗ്നിവക്ത്രാഽഗ്നിതര്‍പിതാ ॥ 17 ॥
സോമസൂര്യാഗ്നിനേത്രാ ച ഭൂര്‍ഭുവഃസ്വഃസ്വരൂപിണീ ।
ഭൂമിര്‍ഭൂദേവപൂജ്യാ ച സ്വയംഭൂഃ സ്വാത്മപൂജകാ ॥ 18 ॥
സ്വയംഭൂ പുഷ്പമാലാഢ്യാ സ്വയംഭൂ പുഷ്പവല്ലഭാ ।
ആനന്ദകന്ദലീ കന്ദാ സ്കന്ദമാതാ ശിലാലയാ ॥ 19 ॥
ചേതനാ ചിദ്ഭവാകാരാ ഭവപത്നീ ഭയാപഹാ ।
വിഘ്നേശ്വരീ ഗണേശാനീ വിഘ്നവിധ്വംസിനീ നിശാ ॥ 20 ॥
വശ്യാ വശിജനസ്തുത്യാ സ്തുതിഃ ശ്രുതിധരാ ശ്രുതിഃ ।
ശാസ്ത്രവിധാനവിജ്ഞാ ച വേദശാസ്ത്രാര്‍ഥകോവിദാ ॥ 21 ॥
വേദ്യാ വിദ്യാമയീ വിദ്യാ വിധാതൃവരദാ വധൂഃ ।
വധൂരൂപാ വധൂപൂജ്യാ വധൂപാനപ്രതര്‍പിതാ ॥ 22 ॥
വധൂപൂജനസന്തുഷ്ടാ വധൂമാലാവിഭൂഷണാ ।
വാമാ വാമേശ്വരീ വാംയാ കുലാകുലവിചാരിണീ ॥ 23 ॥
വിതര്‍കതര്‍കനിലയാ പ്രലയാനലസന്നിഭാ ।
യജ്ഞേശ്വരീ യജ്ഞമുഖാ യാജകാ യജ്ഞപാത്രകാ ॥ 24 ॥
യക്ഷേശ്വരീ യക്ഷധാത്രീ പാര്‍വതീ പര്‍വതാശ്രയാ ।
പിലമ്പിലാ പദസ്ഥാനാ പദദാ നരകാന്തകാ ॥ 25 ॥
നാരീ നര്‍മപ്രിയാ ശ്രീദാ ശ്രീദശ്രീദാ (200) ശരായുധാ ।
കാമേശ്വരീ രതിര്‍ഹൂതിരാഹുതിര്‍ഹവ്യവാഹനാ ॥ 26 ॥
ഹരേശ്വരീ ഹരിവധൂര്‍ഹാടകാങ്ഗദമണ്ഡിതാ ।
ഹപുഷാ സ്വര്‍ഗതിര്‍വൈദ്യാ സുമുഖാ ച മഹൌഷധിഃ ॥ 27 ॥
സര്‍വരോഗഹരാ മാധ്വീ മധുപാനപരായണാ ।
മധുസ്ഥിതാ മധുമയീ മധുദാനവിശാരദാ ॥ 28 ॥
മധുതൃപ്താ മധുരൂപാ മധൂകകുസുമപ്രഭാ ।
മാധവീ മാധവീവല്ലീ മധുമത്താ മദാലസാ ॥ 29 ॥
മാരപ്രിയാ മാരപൂജ്യാ മാരദേവപ്രിയങ്കരീ ।
മാരേശീ ച മൃത്യുഹരാ ഹരികാന്താ മനോന്‍മനാ ॥ 30 ॥
മഹാവൈദ്യപ്രിയാ വൈദ്യാ വൈദ്യാചാരാ സുരാര്‍ചിതാ ।
സാമന്താ പീനവപുഷീ ഗുടീ ഗുര്‍വീ ഗരീയസീ ॥ 31 ॥
കാലാന്തകാ കാലമുഖീ കഠോരാ കരുണാമയീ ।
നീലാ നാഭീ ച വാഗീശീ ദൂര്‍വാ നീലസരസ്വതീ ॥ 32 ॥
അപാരാ പാരഗാ ഗംയാ ഗതിഃ പ്രീതിഃ പയോധരാ ।
പയോദസദൃശച്ഛായാ പാരദാകൃതിലാലസാ ॥ 33 ॥
സരോജനിലയാ നീതിഃ കീര്‍തിഃ കീര്‍തികരീ കഥാ ।
കാശീ കാംയാ കപര്‍ദീശാ കാശപുഷ്പോപമാ രമാ ॥ 34 ॥
രാമാ രാമപ്രിയാ രാമഭദ്രദേവസമര്‍ചിതാ ।
രാമസമ്പൂജിതാ രാമസിദ്ധിദാ രാമരാജ്യദാ ॥ 35 ॥
രാമഭദ്രാര്‍ചിതാ രേവാ ദേവകീ ദേവവത്സലാ ।
ദേവപൂജ്യാ ദേവവന്ദ്യാ ദേവദാവനചര്‍ചിതാ ॥ 36 ॥
ദൂതീ ദ്രുതഗതിര്‍ദംഭാ ദാമിനീ വിജയാ ജയാ ।
അശേഷസുരസമ്പൂജ്യാ നിഃശേഷാസുരസൂദിനീ ॥ 37 ॥
വടിനീ വടമൂലസ്ഥാ ലാസ്യഹാസ്യൈകവല്ലഭാ ।
അരൂപാ നിര്‍ഗുണാ സത്യാ സദാസന്തോഷവര്‍ധിനീ ॥ 38 ॥
സോംയാ യജുര്‍വഹാ യാംയാ ( 300) യമുനാ യാമിനീ യമീ ।
ദാക്ഷീ ദയാ ച വരദാ ദാല്‍ഭ്യസേവ്യാ പുരന്ദരീ ॥ 39 ॥
പൌരന്ദരീ പുലോമേശീ പൌലോമീ പുലകാങ്കുരാ ।
പുരസ്ഥാ വനഭൂര്‍വന്യാ വാനരീ വനചാരിണീ ॥ 40 ॥
സമസ്തവര്‍ണനിലയാ സമസ്തവര്‍ണപൂജിതാ ।
സമസ്തവര്‍ണവര്‍ണാഢ്യാ സമസ്തഗുരുവല്ലഭാ ॥ 41 ॥
സമസ്തമുണ്ഡമാലാഢ്യാ മാലിനീ മധുപസ്വനാ ।
കോശപ്രദാ കോശവാസാ ചമത്കൃതിരലംബുസാ ॥ 42 ॥
ഹാസദാ സദസദ്രൂപാ സര്‍വവര്‍ണമയീ സ്മൃതിഃ ।
സര്‍വാക്ഷരമയീ വിദ്യാ മൂലവിദ്യേശ്വരീശ്വരീ ॥ 43 ॥
അകാരാ ഷോഡശാകാരാ കാരാബന്ധവിമോചിനീ ।
കകാരവ്യഞ്ജനാ ക്രാന്താ സര്‍വമന്ത്രാക്ഷരാലയാ ॥ 44 ॥
അണുരൂപാഽപ്യമലാ ച ത്രൈഗുണ്യാഽപ്യപരാജിതാ ।
അംബികാഽംബാലികാ ചാംബാ അനന്തഗുണമേഖലാ ॥ 45 ॥
അപര്‍ണാ പര്‍ണശാലാ ച സാട്ടഹാസാ ഹസന്തികാ ।
അദ്രികന്യാഽപ്യട്ടഹാസാഽപ്യജരാഽസ്വാഽപ്യരുന്ധതീ ॥ 46 ॥
അബ്ജാക്ഷീ ചാബ്ജിനീ ദേവീ ഹ്യംബുജാസനപൂജിതാ ।
അബ്ജഹസ്താ ഹ്യബ്ജപാദാ ചാബ്ജപൂജനതോഷിതാ ॥ 47 ॥
അകാരമാതൃകാ ദേവീ സര്‍വാനന്ദകരീ കലാ ।
ആനന്ദസുന്ദരീ ആദ്യാ ആഘൂര്‍ണാരുണലോചനാ ॥ 48 ॥
ആദിദേവാന്തകാഽക്രൂരാ ആദിത്യകുലഭൂഷണാ ।
ആംബീജമണ്ഡനാ ദേവീ ചാകാരമാതൃകാവലിഃ ॥ 49 ॥
ഇന്ദുസ്തുതേന്ദുബിംബാസ്യാ ഇനകോടിസമപ്രഭാ ।
ഇന്ദിരാ മന്ദുരാശാലാ ചേതിഹാസകഥാസ്മൃതിഃ ॥ 50 ॥
ഇലാ ചേക്ഷുരസാസ്വാദാ ഇകാരാക്ഷരഭൂഷിതാ ।
ഇന്ദ്രസ്തുതാ ചേന്ദ്രപൂജ്യാ ഇനഭദ്രാ ഇനേശ്വരീ ॥ 51 ॥
ഇഭഗതിരിഭഗീതിരികാരാക്ഷരമാതൃകാ ।
ഈശ്വരീ വൈഭവപ്രഖ്യാ ചേശാനീശ്വരവല്ലഭാ ॥ 52 ॥
ഈശാ കാമകലാദേവീ ഈകാരാശ്രിതമാതൃകാ 400 ।
ഉഗ്രപ്രഭോഗ്രചിത്താ ച ഉഗ്രവാമാങ്ഗവാസിനീ ॥ 53 ॥
ഉഷാ വൈഷ്ണവപൂജ്യാ ച ഉഗ്രതാരോല്‍മുകാനനാ ।
ഉമേശ്വരീശ്വരീ ശ്രേഷ്ഠാ ഉദകസ്ഥാ ഹ്യുദേശ്വരീ ॥ 54 ॥
ഉദകാഽച്ഛോദകദാ ച ഉകാരോദ്ഭാസമാതൃകാ ।
ഊഷ്മാ പ്യൂഷാ ഊഷണാ ച തഥോചിതവരപ്രദാ ॥ 55 ॥
ഋണഹര്‍ത്രീ ഋകാരേശീ ഋഌവര്‍ണാ ഌവര്‍ണഭാക് ।
ൡകാരഭ്രുകുടിര്‍ബാലാ ബാലാദിത്യസമപ്രഭാ ॥ 56 ॥
ഏണാങ്കമുകുടാ ചൈഹാ ഏകാരാക്ഷരബീജിതാ ।
ഏണപ്രിയാ ഏണമധ്യവാസിനീ ഏണവത്സലാ ॥ 57 ॥
ഏണാങ്കമധ്യസംസ്ഥാ ച ഐകാരോദ്ഭാസകൂടിനീ ।
ഓങ്കാരശേഖരാ ദേവീ ഔചിത്യപദമണ്ഡിതാ ॥ 58 ॥
അംഭോജനിലയസ്ഥാനാ അഃസ്വരൂപാ ച സ്വര്‍ഗതിഃ ।
ഷോഡശസ്വരരൂപാ ച ഷോഡശസ്വരഗായിനീ ॥ 59 ॥
ഷോഡശീ ഷോഡശാകാരാ കമലാ കമലോദ്ഭവാ ।
കാമേശ്വരീ കലാഭിജ്ഞാ കുമാരീ കുടിലാലകാ ॥ 60 ॥
കുടിലാ കുടിലാകാരാ കുടുംബസംയുതാ ശിവാ ।
കുലാ കുലപദേശാനീ കുലേശീ കുബ്ജികാ കലാ ॥ 61 ॥
കാമാ കാമപ്രിയാ കീരാ കമനീയാ കപര്‍ദിനീ ।
കാലികാ ഭദ്രകാലീ ച കാലകാമാന്തകാരിണീ ॥ 62 ॥
കപാലിനീ കപാലേശീ കര്‍പൂരചയചര്‍ചിതാ ।
കാദംവരീ കോമലാങ്ഗീ കാശ്മീരീ കുങ്കുമദ്യുതിഃ ॥ 63 ॥
കുന്താ കൂര്‍ചാര്‍ണബീജാഢ്യാ കമനീയാ കുലാഽകുലാ ।
കരാലാസ്യാ കരാലാക്ഷീ വികരാലസ്വരൂപിണീ ॥ 64 ॥
കാംയാലകാ കാമദുഘാ കാമിനീ കാമപാലിനീ ।
കന്ഥാധരാ കൃപാകര്‍ത്രീ കകാരാക്ഷരമാതൃകാ ॥ 65 ॥
ഖഡ്ഗഹസ്താ ഖര്‍പരേശീ ഖേചരീ ഖഗഗാമിനീ ।
ഖേചരീമുദ്രയാ യുക്താ ഖേചരത്വപ്രദായിനീ ॥ 66 ॥
ഖഗാസനാ ഖലോലാക്ഷീ ഖേടേശീ ഖലനാശിനീ ।
ഖേവടകായുധഹസ്താ (500) ച ഖരാംശുദ്യുതിസന്നിഭാ ॥ 67 ॥
ഖാന്താ ഖബീജനിലയാ ഖകാരോല്ലാസമാതൃകാ ।
വൈഖരീ ബീജനിലയാ ഖരാ ഖേചരവല്ലഭാ ॥ 68 ॥
ഗുണ്യാ ഗജാസ്യജനനീ ഗണേശവരദാ ഗയാ ।
ഗോദാവരീ ഗദാഹസ്താ ഗങ്ഗാധരവരപ്രദാ ॥ 69 ॥
ഗോധാ ഗോവാഹനേശാനീ ഗരലാശനവല്ലഭാ ।
ഗാംഭീര്യഭൂഷണാ ഗങ്ഗാ ഗകാരാര്‍ണവിഭൂഷണാ ॥ 70 ॥
ഘൃണാ ഘോണാകരസ്തുത്യാ ഘുര്‍ഘുരാ ഘോരനാദിനീ ।
ഘടസ്ഥാ ഘടജാസേവ്യാ ഘനരൂപാ ഘുണേശ്വരീ ॥ 71 ॥
ഘനവാഹനസേവ്യാ ച ഘകാരാക്ഷരമാതൃകാ ।
ങാന്താ ങവര്‍ണനിലയാ ങാണുരൂപാ ങണാലയാ ॥ 72 ॥
ങേശാ ങേന്താ ങനാജാപ്യാ ങവര്‍ണാക്ഷരഭൂഷണാ ।
ചാമീകരരുചിശ്ചാന്ദ്രീ ചന്ദ്രികാ ചന്ദ്രരാഗിണീ ॥ 73 ॥
ചലാ ചലഞ്ചലാ ചേലാ ചന്ദ്രാ ചന്ദ്രകരാ ചലീ ।
ചഞ്ചുരീകസ്വനാലാപാ ചമത്കാരസ്വരൂപിണീ ॥ 74 ॥
ചടുലീ ചാടുകീ ചാര്‍വീ ചമ്പാ ചമ്പകസന്നിഭാ ।
ചീനാംശുകധരാ ചാട്വീ ചകാരാര്‍ണവിഭൂഷണാ ॥ 75 ॥
ഛത്രീ ച്ഛത്രധരാ ച്ഛിന്നാ ച്ഛിന്നമസ്താ ഛടച്ഛവിഃ ।
ഛായാസുതപ്രിയാ ച്ഛായാ ഛവര്‍ണാമലമാതൃകാ ॥ 76 ॥
ജഗദംബാ ജഗജ്ജ്യോതിര്‍ജ്യോതീരൂപാ ജടാധരാ ।
ജയദാ ജയകര്‍ത്രീ ച ജയസ്ഥാ ജയഹാസിനീ ॥ 77 ॥
ജഗത്പ്രിയാ ജഗത്പൂജ്യാ ജഗത്കര്‍ത്രീ ജരാതുരാ ।
ജ്വരഘ്നീ ജംഭദമനീ ജഗത്പ്രാണാ ജയാവഹാ ॥ 78 ॥
ജംഭാരവരദാ ജൈത്രീ ജീവനാ ജീവവാക്പ്രദാ ।
ജാഗ്രതീ ച ജഗന്നിദ്രാ ജഗദ്യോനിര്‍ജലന്ധരാ ॥ 79 ॥
ജാലന്ധരധരാ ജായാ ജകാരാക്ഷരമാതൃകാ ।
ഝമ്പാ ഝിഞ്ഝേശ്വരീ ഝാന്താ ഝകാരാക്ഷരമാതൃകാ ॥ 80 ॥
ഞാണുരൂപാ ഞിണാവാസാ (600) ഞകോരേശീ ഞണായുധാ ।
ഞവര്‍ഗബീജഭൂഷാഢ്യാ ഞകാരാക്ഷരമാതൃകാ ॥ 81 ॥
ടങ്കായുധാ ടകാരാഢ്യാ ടോടാക്ഷീ ടസുകുന്തലാ ।
ടങ്കായുധാ ടലീരൂപാ ടകാരാക്ഷരമാതൃകാ ॥ 82 ॥
ഠക്കുരാ ഠക്കുരേശാനീ ഠകാരത്രിതയേശ്വരീ ।
ഠഃസ്വരൂപാ ഠവര്‍ണാഢ്യാ ഠകാരാക്ഷരമാതൃകാ ॥ 83 ॥
ഡകാ ഡക്കേശ്വരീ ഡിംഭാ ഡവര്‍ണാക്ഷരമാതൃകാ ।
ഢിണീ ഢേഹാ ഢില്ലഹസ്താ ഢകാരാക്ഷരമാതൃകാ ॥ 84 ॥
ണേശാ ണാന്താ ണവര്‍ഗാന്താ ണകാരാക്ഷരഭൂഷണാ ।
തുരീ തുര്യാ തുലാരൂപാ ത്രിപുരാ താമസപ്രിയാ ॥ 85 ॥
തോതുലാ താരിണീ താരാ സപ്തവിംശതിരൂപിണീ ।
ത്രിപുരാ ത്രിഗുണാ ധ്യേയാ ത്ര്യംബകേശീ ത്രിലോകധൃത് ॥ 86 ॥
ത്രിവര്‍ഗേശീ ത്രയീ ത്ര്യക്ഷീ ത്രിപദാ വേദരൂപിണീ ।
ത്രിലോകജനനീ ത്രാതാ ത്രിപുരേശ്വരപൂജിതാ ॥ 87 ॥
ത്രികോണസ്ഥാ ത്രികോണേശീ കോണത്രയനിവാസിനീ ।
ത്രികോണപൂജനതുഷ്ടാ ത്രികോണപൂജനശ്രിതാ ॥ 88 ॥
ത്രികോണദാനസംലഗ്നാ സര്‍വകോണശുഭാര്‍ഥദാ ।
വസുകോണസ്ഥിതാ ദേവീ വസുകോണാര്‍ഥവാദിനീ ॥ 89 ॥
വസുകോണപൂജിതാ ച ഷട്ചക്രക്രമവാസിനീ ।
നാഗപത്രസ്ഥിതാ ശാരീ ത്രിവൃത്തപൂജനാര്‍ഥദാ ॥ 90 ॥
ചതുര്‍ദ്വാരാഗ്രഗാ ചക്രബാഹ്യാന്തരനിവാസിനീ ।
താമസീ തോമരപ്രഖ്യാ തുംബുരുസ്വനനാദിനീ ॥ 91 ॥
തുലാകോടിസ്വനാ താപീ തപസാം ഫലവര്‍ധിനീ ।
തരലാക്ഷീ തമോഹര്‍ത്രീ താരകാസുരഘാതിനീ ॥ 92 ॥
തരീ തരണിരൂപാ ച തകാരാക്ഷരമാതൃകാ ।
സ്ഥലീ സ്ഥവിരരൂപാ ച സ്ഥൂലാ സ്ഥാലീ സ്ഥലാബ്ജിനീ ॥
സ്ഥാവരേശാ സ്ഥൂലമൂഖീ ഥകാരാക്ഷരമാതൃകാ ।
ദൂതികാ ശിവദൂതീ ച ദണ്ഡായുധധരാ ദ്യുതിഃ ॥ 94 ॥
ദയാ ദീനാനുകമ്പാ ച ദംഭോലിധരവല്ലഭാ ।
ദേശാനുചാരിണീ ദ്രേക്കാ ദ്രാവിഡേശീ ദവീയസീ ॥ 95 ॥
ദാക്ഷായണീ ദ്രുമലതാ (700) ദേവമാതാഽധിദേവതാ ।
ദധിജാ ദുര്ലഭാദേവീ ദേവതാ പരമാക്ഷരാ ॥ 96 ॥
ദാമോദരസുപൂജ്യാ ച ദാമോദരവരപ്രദാ ।
ദനുപുത്രീവിനാശാ ച ദനുപുത്രകുലാര്‍ചിതാ ॥ 97 ॥
ദണ്ഡഹസ്താ ദണ്ഡിപൂജ്യാ ദമദാ ച ദമസ്ഥിതാ ।
ദശധേനുസുരൂപാ ച ദകാരാക്ഷരമാതൃകാ ॥ 98 ॥
ധര്‍ംയാ ധര്‍മപ്രസൂര്‍ധന്യാ ധനദാ ധനവര്‍ധിനീ ।
ധൃതിര്‍ധൂതീ ധന്യവധൂര്‍ധകാരാക്ഷരമാതൃകാ ॥ 99 ॥
നലിനീ നാലികാ നാപ്യാ നാരാചായുധധാരിണീ ।
നീപോപവനമധ്യസ്ഥാ നാഗരേശീ നരോത്തമാ ॥ 100 ॥
നരേശ്വരീ നൃപാരാധ്യാ നൃപപൂജ്യാ നൃപാര്‍ഥദാ ।
നൃപസേവ്യാ നൃപവന്ദ്യാ നരനാരായണപ്രസൂഃ ॥ 101 ॥
നര്‍തകീ നീരജാക്ഷീ ച നവര്‍ണാക്ഷരഭൂഷണാ ।
പദ്മേശ്വരീ പദ്മമുഖീ പത്രയാനാ പരാപരാ ॥ 102 ॥
പാരാവാരസുതാ പാഠാ പരവര്‍ഗവിമര്‍ദിനീ ।
പൂഃ പുരാരിവധൂഃ പമ്പാ പത്നീ പത്രീശവാഹനാ ॥ 103
പീവരാംസാ പതിപ്രാണാ പീതലാക്ഷീ പതിവ്രതാ ॥
പീഠാ പീഠസ്ഥിതാഽപീഠാ പീതാലങ്കാരഭൂഷണാ ॥ 104 ॥
പുരൂരവഃസ്തുതാ പാത്രീ പുത്രികാ പുത്രദാ പ്രജാ ।
പുഷ്പോത്തംസാ പുഷ്പവതീ പുഷ്പമാലാവിഭൂഷണാ ॥ 105 ॥
പുഷ്പമാലാതിശോഭാഢ്യാ പകാരാക്ഷരമാതൃകാ ।
ഫലദാ സ്ഫീതവസ്ത്രാ ച ഫേരവാരാവഭീഷണാ ॥ 106 ॥
ഫല്‍ഗുനീ ഫല്‍ഗുതീര്‍ഥസ്ഥാ ഫവര്‍ണാകൃതമണ്ഡലാ ।
ബലദാ ബാലഖില്യാ ച ബാലാ ബലരിപുപ്രിയാ ॥ 107 ॥
ബാല്യാവസ്ഥാ ബര്‍ബരേശീ ബകാരാകൃതിമാതൃകാ ।
ഭദ്രികാ ഭീമപത്നീ ച ഭീമാ ഭര്‍ഗശിഖാ ഭയാ ॥ 108
ഭയഘ്നീ ഭീമനാദാ ച ഭയാനകമുഖേക്ഷണാ ।
ഭില്ലീശ്വരീ ഭീതിഹരാ ഭദ്രദാ ഭദ്രകാരിണീ ॥ 109 ॥
ഭദ്രേശ്വരീ ഭദ്രധരാ ഭദ്രാഖ്യാ ഭാഗ്യവര്‍ധിനീ (800) ।
ഭഗമാലാ ഭഗാവാസാ ഭവാനീ ഭവതാരിണീ ॥ 110 ॥
ഭഗയോനിര്‍ഭഗാകാരാ ഭഗസ്ഥാ ഭഗരൂപിണീ ।
ഭഗലിങ്ഗാമൃതപ്രീതാ ഭകാരാക്ഷരമാതൃകാ ॥ 111 ॥
മാന്യാ മാനപ്രദാ മീനാ മീനകേതനലാലസാ ।
മദോദ്ധതാ മനോന്‍മാന്യാ മേനാ മൈനാകവത്സലാ ॥ 112 ॥
മധുമത്താ മധുപൂജ്യാ മധുദാ മധു മാധവീ ।
മാംസാഹാരാ മാംസപ്രീതാ മാംസഭക്ഷ്യാ ച മാംസദാ ॥ 113
മാരാര്‍താ മത്സ്യരൂപാ ച മത്സ്യധാതാ മഹത്തരാ ।
മേരുശൃങ്ഗാഗ്രതുങ്ഗാസ്യാ മോദകാഹാരപൂജിതാ ॥ 114 ॥
മാതങ്ഗിനീ മധുമത്താ മദമത്താ മദേശ്വരീ ।
മഞ്ജാ മുഗ്ധാനനാ മുഗ്ധാ മകാരാക്ഷരഭൂഷണാ ॥ 115 ॥
യശസ്വിനീ യതീശാനീ യത്നകര്‍ത്രീ യജുഃപ്രിയാ ।
യജ്ഞധാത്രീ യജ്ഞഫലാ യജുര്‍വേദഋചാംഫലാ ॥ 116 ॥
യശോദാ യതിസേവ്യാ ച യാത്രാ യാത്രികവത്സലാ ।
യോഗേശ്വരീ യോഗഗംയാ യോഗേന്ദ്രജനവത്സലാ ॥ 117 ॥
യദുപുത്രീ യമഘ്നീ ച യകാരാക്ഷരമാതൃകാ ।
രത്നേശ്വരീ രമാനാഥസേവ്യാ രഥ്യാ രജസ്വലാ ॥ 118 ॥
രാജ്യദാ രാജരാജേശീ രോഗഹര്‍ത്രീ രജോവതീ ।
രത്നാകരസുതാ രംയാ രാത്രീ രാത്രിപതിപ്രഭാ ॥ 119 ॥
രക്ഷോഘ്നീ രാക്ഷസേശാനീ രക്ഷോനാഥസമര്‍ചിതാ ।
രതിപ്രിയാ രതിമുഖ്യാ രകാരാകൃതിശേഖരാ ॥ 120 ॥
ലംബോദരീ ലലജ്ജിഹ്വാ ലാസ്യതത്പരമാനസാ ।
ലൂതാതന്തുവിതാനാസ്യാ ലക്ഷ്മീര്ലജ്ജാ ലയാലിനീ ॥ 121 ॥
ലോകേശ്വരീ ലോകധാത്രീ ലാടസ്ഥാ ലക്ഷണാകൃതിഃ ।
ലംബാ ലംബകചോല്ലാസാ ലകാരാകാരവര്‍ധിനീ ॥ 122 ॥
ലിങ്ഗേശ്വരീ ലിങ്ഗലിങ്ഗാ ലിങ്ഗമാലാ ലസദ്ദ്യുതിഃ ।
ലക്ഷ്മീരൂപാ രസോല്ലാസാ രാമാ രേവാ രജസ്വലാ ॥ 123 ॥
ലയദാ ലക്ഷണാ (900) ലോലാ ലകാരാക്ഷരമാതൃകാ ।
വാരാഹീ വരദാത്രീ ച വീരസൂര്‍വീരദായിനീ ॥ 124 ॥
വീരേശ്വരീ വീരജന്യാ വീരചര്‍വണചര്‍ചിതാ ।
വരായുധാ വരാകാ ച വാമനാ വാമനാകൃതിഃ ॥ 124 ॥
വധൂതാ വധകാ വധ്യാ വധ്യഭൂര്‍വാണിജപ്രിയാ ।
വസന്തലക്ഷ്മീര്‍വടുകീ വടുകാ വടുകേശ്വരീ ॥ 126 ॥
വടുപ്രിയാ വാമനേത്രാ വാമാചാരൈകലാലസാ ।
വാര്‍താ വാംയാ വരാരോഹാ വേദമാതാ വസുന്ധരാ ॥ 127
വയോയാനാ വയസ്യാ ച വകാരാക്ഷരമാതൃകാ ।
ശംഭുപ്രിയാ ശരച്ചര്യാ ശാദ്വലാ ശശിവത്സലാ ॥ 128 ॥
ശീതദ്യുതിഃ ശീതരസാ ശോണോഷ്ഠീ ശീകരപ്രദാ ।
ശ്രീവത്സലാഞ്ഛനാ ശര്‍വാ ശര്‍വവാമാങ്ഗവാസിനീ ॥ 129 ॥
ശശാങ്കാമലലക്ഷ്മീശ്ച ശാര്‍ദൂലതനുരദ്രിജാ ।
ശോഷഹര്‍ത്രീ ശമീമൂലാ ശകാരാകൃതിശേഖരാ ॥ 130 ॥
ഷോഡശീ ഷോഡശീരൂപാ ഷഢാ ഷോഢാ ഷഡാനനാ ।
ഷട്കൂടാ ഷഡ്രസാസ്വാദാ ഷഡശീതിമുഖാംബുജാ ॥ 131 ॥
ഷഡാസ്യജനനീ ഷണ്ഠാ ഷവര്‍ണാക്ഷരമാതൃകാ ।
സാരസ്വതപ്രസൂഃ സര്‍വാ സര്‍വഗാ സര്‍വതോമുഖാ ॥ 132 ॥
സമാ സീതാ സതീമാതാ സാഗരാഭയദായിനീ ।
സമസ്തശാപശമനീ സാലഭഞ്ജീ സുദക്ഷിണാ ॥ 133 ॥
സുഷുപ്തിഃ സുരസാ സാധ്വീ സാമഗാ സാമവേദജാ ।
സത്യപ്രിയാ സോമമുഖീ സൂത്രസ്ഥാ സൂതവല്ലഭാ ॥ 134 ॥
സനകേശീ സുനന്ദാ ച സ്വവര്‍ഗസ്ഥാ സനാതനീ ।
സേതുഭൂതാ സമസ്താശാ സകാരാക്ഷരവല്ലഭാ ॥ 134 ॥
ഹാലാഹലപ്രിയാ ഹേലാ ഹാഹാരാവവിഭൂഷണാ ।
ഹാഹാഹൂഹൂസ്വരൂപാ ച ഹലധാത്രീ ഹലിപ്രിയാ ॥ 136 ॥
ഹരിനേത്രാ ഘോരരൂപാ ഹവിഷ്യാ ഹൂതിവല്ലഭാ ।
ഹം ക്ഷം ലം ക്ഷഃ സ്വരൂപാ ച സര്‍വമാതൃകപൂജിതാ ॥ 137 ॥
ഓം ഐം സൌഃ ഹ്രീം മഹാവിദ്യാ ആം ശാം ഫ്രാം ഹൂംസ്വരൂപിണീ । (1000)
ഇതി ശ്രീശാരികാദേവ്യാ മന്ത്രനാമസഹസ്രകം ॥ 138 ॥
॥ ഫല ശ്രുതി ॥
പുണ്യം പുണ്യജനസ്തുത്യം നുത്യം വൈഷ്ണവപൂജിതം ।
ഇദം യഃ പഠതേ ദേവി ശ്രാവയേദ്യഃ ശൃണോതി ച ॥ 139
സ ഏവ ഭഗവാന്‍ ദേവഃ സത്യം സത്യം സുരേശ്വരി ।
ഏകകാലം ദ്വികാലം വാ ത്രികാലം പഠതേ നരഃ ॥ 140
വാമാചാരപരോ ദേവി തസ്യ പുണ്യഫലം ശൃണു ।
മൂകത്വം ബധിരത്വം ച കുഷ്ഠം ഹന്യാച്ച ശ്വിത്രികാം ॥ 141 ॥
വാതപിത്തകഫാന്‍ ഗുല്‍മാന്‍ രക്തസ്രാവം വിഷൂചികാം ।
സദ്യഃ ശമയതേ ദേവി ശ്രദ്ധയാ യഃ പഠേന്നിശി ॥ 142 ॥
അപസ്മാരം കര്‍ണപീഡാം ശൂലം രൌദ്രം ഭഗന്ദരം ।
മാസമാത്രം പഠേദ്യസ്തു സ രോഗൈര്‍മുച്യതേ ധ്രുവം ॥ 143 ॥
ഭൌമേ ശനിദിനേ വാപി ചക്രമധ്യേ പഠേദ്യദി ।
സദ്യസ്തസ്യ മഹേശാനി ശാരികാ വരദാ ഭവേത് ॥ 144 ॥
ചതുഷ്പഥേ പഠേദ്യസ്തു ത്രിരാത്രം രാത്രിവ്യത്യയേ ।
ദത്ത്വാ ബലിം സുരാം മുദ്രാം മത്സ്യം മാംസം സഭക്തകം ॥ 145
വബ്ബോലത്വഗ്രസാകീര്‍ണം ശാരീ പ്രാദുര്‍ഭവിപ്യതി ।
യഃ പഠേദ് ദേവി ലോലായാം ചിതായാം ശവസന്നിധൌ ॥ 146 ॥
പായമ്പായം ത്രിവാരം തു തസ്യ പുണ്യഫലം ശൃണു ।
ബ്രഹ്മഹത്യാം ഗുരോര്‍ഹത്യാം മദ്യപാനം ച ഗോവധം ॥ 147 ॥
മഹാപാതകസങ്ഘാതം ഗുരുതല്‍പഗതോദ്ഭവം ।
സ്തേയം വാ ഭ്രൂണഹത്യാം വാ നാശയേന്നാത്ര സംശയഃ ॥ 148 ॥
സ ഏവ ഹി രമാപുത്രോ യശസ്വീ ലോകപൂജിതഃ ।
വരദാനക്ഷമോ ദേവി വീരേശോ ഭൂതവല്ലഭഃ ॥ 149 ॥
ചക്രാര്‍ചനേ പഠേദ്യസ്തു സാധകഃ ശക്തിസന്നിധൌ ।
ത്രിവാരം ശ്രദ്ധയാ യുക്തഃ സ ഭവേദ്ഭൈരവേശ്വരഃ ॥ 150 ॥
കിങ്കിം ന ലഭതേ ദേവി സാധകോ വീരസാധകഃ ।
പുത്രവാന്‍ ധനവാംശ്ചൈവ സത്യാചാരപരഃ ശിവേ ॥ 151 ॥
ശക്തിം സമ്പൂജ്യ ദേവേശി പഠേത് സ്തോത്രം പരാമയം ।
ഇഹ ലോകേ സുഖം ഭുക്ത്വാ പരത്ര ത്രിദിവം വ്രജേത് ॥ 152 ॥
ഇതി നാമസഹസ്രം തു ശാരികായാ മനോരമം ।
ഗുഹ്യാദ്ഗുഹ്യതമം ലോകേ ഗോപനീയം സ്വയോനിവത് ॥ 153 ॥
॥ ഇതി ശ്രീരുദ്രയാമലേ തന്ത്രേ ദശവിദ്യാരഹസ്യേ
ശ്രീശാരികായാഃ സഹസ്രനാമസ്തോത്രം സമ്പൂര്‍ണം ॥