॥ ଅଦ୍ଵୈତ ପଞ୍ଚରତ୍ନମ୍ Odia Lyrics ॥
॥ ଶ୍ରୀଃ ॥
ନାହଂ ଦେହୋ ନେନ୍ଦ୍ରିୟାଣ୍ୟନ୍ତରଙ୍ଗୋ
ନାହଙ୍କାରଃ ପ୍ରାଣଵର୍ଗୋ ନ ବୁଦ୍ଧିଃ ।
ଦାରାପତ୍ୟକ୍ଷେତ୍ରଵିତ୍ତାଦିଦୂରଃ
ସାକ୍ଷୀ ନିତ୍ୟଃ ପ୍ରତ୍ୟଗାତ୍ମା ଶିଵୋଽହମ୍ ॥ ୧ ॥
ରଜ୍ଜ୍ଵଜ୍ଞାନାଦ୍ଭାତି ରଜ୍ଜୌ ୟଥାହିଃ
ସ୍ଵାତ୍ମାଜ୍ଞାନାଦାତ୍ମନୋ ଜୀଵଭାଵଃ ।
ଆପ୍ତୋକ୍ତ୍ୟାଽହିଭ୍ରାନ୍ତିନାଶୋ ସ ରଜ୍ଜୁ-
ର୍ଜୀଵୋ ନାହଂ ଦେଶିକୋକ୍ତ୍ୟା ଶିଵୋଽହମ୍ ॥ ୨ ॥
ଆଭାତୀଦଂ ଵିଶ୍ଵମାତ୍ମନ୍ୟସତ୍ୟମ୍
ସତ୍ୟଜ୍ଞାନାନନ୍ଦରୂପେ ଵିମୋହାତ୍ ।
ନିଦ୍ରାମୋହାତ୍ସ୍ଵପ୍ନଵତ୍ତନ୍ନ ସତ୍ୟମ୍
ଶୁଦ୍ଧଃ ପୂର୍ଣୋ ନିତ୍ୟ ଏକଃ ଶିଵୋଽହମ୍ ॥ ୩ ॥
ନାହଂ ଜାତୋ ନ ପ୍ରଵୃଦ୍ଧୋ ନ ନଷ୍ଟୋ
ଦେହସ୍ୟୋକ୍ତାଃ ପ୍ରାକୃତାଃ ସର୍ଵଧର୍ମାଃ ।
କର୍ତୃତ୍ଵାଦିଶ୍ଚିନ୍ମୟସ୍ୟାସ୍ତି ନାହଂ-
କାରସ୍ୟୈଵ ହ୍ୟାତ୍ମନୋ ମେ ଶିଵୋଽହମ୍ ॥ ୪ ॥
ମତ୍ତୋ ନାନ୍ୟତ୍କିଞ୍ଚିଦତ୍ରାସ୍ତି ଵିଶ୍ଵଂ
ସତ୍ୟଂ ବାହ୍ୟଂ ଵସ୍ତୁ ମାୟୋପକ୍ଲୃପ୍ତମ୍ ।
ଆଦର୍ଶାନ୍ତର୍ଭାସମାନସ୍ୟ ତୁଲ୍ୟଂ
ମୟ୍ୟଦ୍ଵୈତେ ଭାତି ତସ୍ମାଚ୍ଛିଵୋଽହମ୍ ॥ ୫ ॥
ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ
ଶ୍ରୀଗୋଵିନ୍ଦଭଗଵତ୍ପୂଜ୍ୟପାଦଶିଷ୍ୟସ୍ୟ
ଶ୍ରୀମଚ୍ଛଙ୍କରଭଗଵତଃ କୃତୌ
ଅଦ୍ଵୈତ ପଞ୍ଚରତ୍ନଂ ସମ୍ପୂର୍ଣମ୍ ॥