॥ Arya Durgashtakam Telugu Lyrics ॥
॥ ఆర్యాదుర్గాష్టకమ్ ॥
శ్రీగణేశాయ నమః ॥
ఆర్యాదుర్గాఽభిధానా హిమనగదుహితా శఙ్కరార్ధాసనస్థా
మాతా షాణ్మాతురస్యాఖిలజనవినుతా సంస్థితా స్వాసనేఽగ్ర్యే ।
గీతా గన్ధర్వసిద్ధైర్విరచితబిరుదైర్యాఽఖిలాఙ్గేషు పీతా
సంవీతా భక్తవృన్దైరతిశుభచరితా దేవతా నః పునాతు ॥ ౧ ॥
మాతస్త్వాం సామ్బపత్నీం విదురఖిలజనా వేదశాస్త్రాశ్రయేణ
నాహం మన్యే తథా త్వాం మయి హరిదయితామమ్బుజైకాసనస్థామ్ ।
నిత్యం పిత్రా స దేశే నిజతనుజనితా స్థాప్యతే ప్రేమభావాత్
ఏతాదృశ్యానుభూత్యో దధితటసవిధే సంస్థితాం తర్కయామి ॥ ౨ ॥
నాసీదాలోకితా త్వత్తనురతిరుచిరాఽద్యావధీత్యాత్మదృష్ట్యా
లోకోక్త్యా మే భ్రమోఽభూత్సరసిజనిలయే నామయుగ్మాక్షరార్థాత్ ।
సోఽయం సర్వో నిరస్తస్తవ కనకమయీం మూర్తిమాలోక్య సద్యః
సాఽపర్ణా స్వర్ణవర్ణార్ణవతనుజనితే న శ్రుతా నాపి దృష్టా ॥ ౩ ॥
శ్రీసూక్తోక్తాద్యమన్త్రాత్కనకమయతనుః స్వర్ణకఞ్జోచ్చహారా
సారా లోకత్రయాన్తర్భగవతిభవతీత్యేవమేవాగమోక్తమ్ ।
తన్నామోక్తాక్షరార్థాత్కథమయి వితథం స్యాత్సరిన్నాథకన్యే
దృష్టార్థే వ్యర్థతర్కో హ్యనయపథగతిం సూచయత్యర్థదృష్ట్యా ॥ ౪ ॥
తన్వస్తే మాతరస్మిఞ్జగతి గుణవశాద్విశ్రుతాస్తిస్ర ఏవ
కాలీ శ్రీర్గీశ్చ తాసాం ప్రథమమభిహితా కృష్ణవర్ణా హ్మపర్ణా ।
లక్ష్మీస్తు స్వర్ణవర్ణా విశదతనురథో భారతీ చేదమూషు
స్వచ్ఛా నోనాపి కృష్ణా భగవతి భవతీ శ్రీరసీత్యేవ సిద్ధమ్ ॥ ౫ ॥
నామాద్యాయాః స్వరూపం కనకమయమిదం మధ్యమాయాశ్చ యాన-
మన్త్యాయాః సింహరూపం త్రితయమపి తనౌ ధారయన్త్యాస్తవేదృక్ ।
దృష్ట్వా నూత్నైవ సర్వా వ్యవహృతిసరణీరిన్దిరే చేదతర్క్యా
త్వామాద్యాం విశ్వవన్ద్యాం త్రిగుణమయతనుం చేతసా చిన్తయామి ॥ ౬ ॥
త్వద్రూపజ్ఞానకామా వివిధవిధసమాకౢప్తతర్కైరనేకై-
ర్నో శక్తా నిర్జరాస్తే విధి-హరి-హరసంజ్ఞా జగద్వన్ద్యపాదాః ।
కా శక్తిర్మే భవిత్రీ జలనిధితనయే జ్ఞాతుముగ్రం తవేదం
రూపం నామ్నా ప్రభావాదపి వితథఫలో మే బభూవ ప్రయత్నః ॥ ౭ ॥
అస్త్వమ్బ త్వయ్యనేకైరశుభశుభతరైః కల్పితైరమ్బ తర్కై-
రద్యాహం మన్దబుద్ధిః సరసిజనిలయే సాపరాధోఽస్మి జాతః ।
తస్మాత్త్వత్పాదపద్మద్వయనమితశిరా ప్రార్థయామ్యేతదేవ
క్షన్తవ్యో మేఽపరాధో హరిహరదయితే భేదబుద్ధిర్న మేఽస్తి ॥ ౮ ॥
ఆర్యాదుర్గాష్టకమిదమనన్తకవినా కృతమ్ ।
తవ ప్రీతికరం భూయాదిత్యభ్యర్థనమమ్బికే ॥ ౯ ॥
ఇతి శ్రీమదనన్తకవివిరచితమార్యాదుర్గాష్టకం సమ్పూర్ణమ్ ।
– Chant Stotra in Other Languages –
Sri Durga Slokam » Arya Durga Ashtakam Lyrics in Sanskrit » English » Bengali » Gujarati » Kannada » Malayalam » Odia » Tamil