॥ Bhavabandha Muktya Ashtakam Telugu Lyrics ॥
॥ భవబన్ధముక్త్యష్టకమ్ ॥
ఏకం ద్వితీయరహితం సదబాధితం చ
సచ్చిత్స్వరూపమితి యచ్ఛ్రుతిశీర్షపూగైః ।
జేగీయతే సకలలోకవివర్తభూతం
తద్భావయామి సతతం భవబన్ధముక్త్యై ॥ ౧ ॥
అన్నాసుమానసముఖప్రకృతీఞ్జగాద
కోశాన్ఛ్రుతిర్యదవబోధకృతేఽత్ర పఞ్చ ।
సర్వాన్తరం భృగుమునిప్రవరేణ దృష్టం
తద్భావయామి సతతం భవబన్ధముక్త్యై ॥ ౨ ॥
ఆనాశకేన తపసా బహుదక్షిణేన
యజ్ఞేన దాననిచయాచ్ఛ్రుతిపాఠతశ్చ ।
ఇచ్ఛన్తి వేత్తుమిహ యద్ధరణీసురాగ్ర్యా-
స్తద్భావయామి సతతం భవబన్ధముక్త్యై ॥ ౩ ॥
కశ్చిద్విపశ్చిదిహ సంసృతిసౌఖ్యవాఞ్ఛాం
సన్త్యజ్య సద్గురుముపేత్య కృపాపయోఽబ్ధిమ్ ।
విజ్ఞాయ తద్వచనతః ఖలు మోదతే య-
త్తద్భావయామి సతతం భవబన్ధముక్త్యై ॥ ౪ ॥
ప్రాణాన్నియమ్య తు మనో హృదయారవిన్దే
భ్రూగహ్వరే శిరసి వా ప్రణిధాయ సమ్యక్ ।
ధ్యాయన్తి యత్పరగురోర్వచనానుసారా-
త్తద్భావయామి సతతం భవబన్ధముక్త్యై ॥ ౫ ॥
యజ్జాగ్రదాదిసమయే ధృతవిశ్వముఖ్య-
నామాతనోతి బహిరన్తరవస్తుసేవామ్ ।
సుప్తావబోధసహితస్య సుఖస్య భోక్తృ
తద్భావయామి సతతం భవబన్ధముక్త్యై ॥ ౬ ॥
వాగాదయఃస్వవిషయేషు చరన్తి యేన
సఞ్చోదితాః ప్రభువరేణ యథా సుభృత్యాః ।
తత్సర్వకార్యకరణవ్యవహారసాక్షి
సఞ్చిన్తయామి సతతం భవబన్ధముక్త్యై ॥ ౭ ॥
సంన్యస్య కర్మనిచయం చ తదఙ్గభూతం
సూత్రం శిఖాం చ పునరప్యబలాదిరాగమ్ ।
బోధాయ యస్య యతతే పరిశుద్ధచిత్త-
స్తద్భావయామి సతతం భవబన్ధముక్త్యై ॥ ౮ ॥
పద్యాష్టకం పఠతి యోఽర్థవిబోధపూర్వం
సఞ్చిన్తయన్ననుదినం ప్రతిపాద్యవస్తుమ్ ।
భక్త్యా యుతః కలుషదూరనిజాన్తరఙ్గ-
స్తస్యాచిరాద్ధి భవితా భవబన్ధముక్తిః ॥ ౯ ॥
ఇతి శృఙ్గేరి శ్రీజగద్గురు శ్రీసచ్చిదానన్దశివాభినవనృసింహ-
భారతీస్వామిభిః విరచితం భవబన్ధముక్త్యష్టకం సమ్పూర్ణమ్ ।
– Chant Stotra in Other Languages –
Bhavabandha Muktya Ashtakam Lyrics in Sanskrit » English » Bengali » Gujarati » Kannada » Malayalam » Odia » Tamil