॥ Ganga Ashtakam Telugu Lyrics ॥
॥ గఙ్గాష్టకమ్ ॥
న శక్తాస్త్వాం స్తోతుం విధిహరిహరా జహ్నతనయే
గుణోత్కర్షాఖ్యానం త్వయి న ఘటతే నిర్గుణపదే ।
అతస్తే సంస్తుత్యై కృతమతిరహం దేవి సుధియాం
వినిన్ద్యో యద్వేదాశ్చకితమభిగాయన్తి భవతీమ్ ॥ ౧ ॥
తథాఽపి త్వాం పాపః పతితజనతోద్ధారనిపుణే
ప్రవృత్తోఽహం స్తోతుం ప్రకృతిచలయా బాలకధియా ।
అతో దృష్టోత్సాహే భవతి భవభారైకదహనే
మయి స్తుత్యే గఙ్గే కురు పరకృపాం పర్వతసుతే ॥ ౨ ॥
న సంసారే తావత్కలుషమిహ యావత్తవ పయో
దహత్యార్యే సద్యో దహన ఇవ శుష్కం తృణచయమ్ ।
పలాయన్తే దృష్ట్వా తవ పరిచరానన్తకజనా
యథా వన్యా వాఽన్యే వనపతిభయాద్ వామనమృగాః ॥ ౩ ॥
జనా యే తే మాతర్నిధనసమయే తోయకణికాం
ముఖే కృత్వా ప్రాణాఞ్జహతి సురసఙ్ఘైరనువృతా ।
విమానే క్రీడన్తోఽమరపతిపదం యాన్తి నియతం
కథా తేషాం కా వా జనని తవ తీరే నివసతామ్ ॥ ౪ ॥
శివః సర్వారాధ్యో జనని విషతాపోపశమనం
చరీకర్తుం గఙ్గే కలికలుషభఙ్గే పశుపతిః ।
జటాయాం సన్ధత్త లలితలహరీం త్వాం సురనదీ
త్వదన్యా కా వన్ద్యా పరమమహితా వా త్రిభువనే ॥ ౫ ॥
జనస్తావన్మాతర్దురితభయతో బిభ్యతి సృతౌ
న యావత్త్వత్తీరం నయనపథమాయాతి విమలమ్ ।
యదాప్తం త్వత్తీరం తదను దురితానాం న గణనా
తతో గఙ్గే! వన్ద్యా మునిసముదయాస్త్వాం న జహతి ॥ ౬ ॥
నమామి త్వాం గఙ్గే శ్రుతివనవిహారైకనిపుణే
జగన్మాతర్మాతస్త్రిపురహరసేవ్యే విధినుతే ।
త్వమేవాద్యా దుర్గా జనహితకృతే త్వం ద్రవమయీ
స్వయం జాతా దేవి త్వమసి పరమం బ్రహ్మ విదితమ్ ॥ ౭ ॥
కదా గఙ్గే రమ్యే తటమధివసస్తే శివనుతే
శివే దుర్గే మాతః సకలఫలదే దేవదయితే ।
పరేశే సర్వేశే శ్రుతిశతనుతే దక్షతనయే
సదాఽహం సఞ్జల్పన్నిమిషమివ నేష్యామి దివసాన్ ॥ ౮ ॥
గఙ్గాష్టకమిదం పుణ్యం ప్రభాతే యః పఠేచ్ఛుచిః ।
సర్వాభీష్టం తతస్తస్మై దదాతి సురనిమ్నగా ॥ ౯ ॥
ఇతి స్వామి-శ్రీమదనన్తానన్దసరస్వతీవిరచితం గఙ్గాష్టకం సమ్పూర్ణమ్ ।
– Chant Stotra in Other Languages –
Ganga Ashtakam Lyrics in Sanskrit » English » Bengali » Gujarati » Kannada » Malayalam » Odia » Tamil