॥ Hansa Upanishad 15 Bengali Lyrics ॥
॥ হংসোপনিষৎ ॥
হংসাখ্যোপনিষৎপ্রোক্তনাদালির্যত্র বিশ্রমেৎ ।
তদাধারং নিরাধারং ব্রহ্মমাত্রমহং মহঃ ॥
ওঁ পূর্ণমদ ইতি শান্তিঃ ॥
গৌতম উবাচ ।
ভগবন্সর্বধর্মজ্ঞ সর্বশাস্ত্রবিশারদ ।
ব্রহ্মবিদ্যাপ্রবোধো হি কেনোপায়েন জায়তে ॥ ১ ॥
সনৎকুমার উবাচ ।
বিচার্য সর্ববেদেষু মতং জ্ঞাৎবা পিনাকিনঃ ।
পার্বত্যা কথিতং তত্ত্বং শৃণু গৌতম তন্মম ॥ ২ ॥
অনাখ্যেয়মিদং গুহ্যং যোগিনাং কোশসংনিভম্ ।
হংসস্যাকৃতিবিস্তারং ভুক্তিমুক্তিফলপ্রদম্ ॥ ৩ ॥
অথ হংসপরমহংসনির্ণয়ং ব্যাখ্যাস্যামঃ ।
ব্রহ্মচারিণে শান্তায় দান্তায় গুরুভক্তায় ।
হংসহংসেতি সদা ধ্যায়ন্সর্বেষু দেহেষু ব্যাপ্য বর্ততে ॥
যথা হ্যগ্নিঃ কাষ্ঠেষু তিলেষু তৈলমিব তং বিদিৎবা
মৃত্যুমত্যেতি ।
গুদমবষ্টভ্যাধারাদ্বায়ুমুত্থাপ্যস্বাধিষ্ঠাং ত্রিঃ
প্রদিক্ষিণীকৃত্য মণিপূরকং চ গৎবা অনাহতমতিক্রম্য
বিশুদ্ধৌ
প্রাণান্নিরুধ্যাজ্ঞামনুধ্যায়ন্ব্রহ্মরন্ধ্রং ধ্যায়ন্
ত্রিমাত্রোঽহমিত্যেবং সর্বদা ধ্যায়ন্ । অথো
নাদমাধারাদ্ব্রহ্মরন্ধ্রপর্যন্তং শুদ্ধস্ফটিকসঙ্কাশং
স বৈ ব্রহ্ম পরমাত্মেত্যুচ্যতে ॥ ১ ॥
অথ হংস ঋষিঃ । অব্যক্তা গায়ত্রী ছন্দঃ । পরমহংসো
দেবতা । অহমিতি বীজম্ । স ইতি শক্তিঃ ।
সোঽহমিতি কীলকম্ । ষট্ সঙ্খ্যযা
অহোরাত্রয়োরেকবিংশতিসহস্রাণি ষট্ শতান্যধিকানি
ভবন্তি ।
সূর্যায় সোমায় নিরঞ্জনায় নিরাভাসায় তনু সূক্ষ্মং
প্রচোদয়াদিতি অগ্নীষোমাভ্যাং বৌষট্
হৃদয়াদ্যঙ্গন্যাসকরন্যাসৌ ভবতঃ । এবং কৃৎবা হৃদয়ে
অষ্টদলে হংসাত্মানং ধ্যায়েৎ । অগ্নীষোমৌ
পক্ষাবোঙ্কারঃ শিরো বিন্দুস্তু নেত্রং মুখং রুদ্রো রুদ্রাণী
চরণৌ বাহূ কালশ্চাগ্নিশ্চোভে পার্শ্বে ভবতঃ ।
পশ্যত্যনাগারশ্চ শিষ্টোভয়পার্শ্বে ভবতঃ । এষোঽসৌ
পরমহংসো ভানুকোটিপ্রতীকাশঃ । যেনেদং ব্যাপ্তম্ ।
তস্যাষ্টধা বৃত্তির্ভবতি । পূর্বদলে পুণ্যে মতিঃ আগ্নেয়ে
নিদ্রালস্যাদয়ো ভবন্তি যাম্যে ক্রূরে মতিঃ নৈরৃতে পাপে
মনীষা বারুণ্যাং ক্রীডা বায়ব্যে গমনাদৌ বুদ্ধিঃ সৌম্যে
রতিপ্রীতিঃ ঈশানে দ্রব্যাদানং মধ্যে বৈরাগ্যং কেসরে
জাগ্রদবস্থা কর্ণিকায়াং স্বপ্নং লিঙ্গে সুষুপ্তিঃ পদ্মত্যাগে
তুরীয়ং যদা হংসো নাদে লীনো ভবতি তদা
তুর্যাতীতমুন্মননমজপোপসংহারমিত্যভিধীয়তে । এবং সর্বং
হংসবশাত্তস্মান্মনো হংসো বিচার্যতে । স এব জপকোট্যা
নাদমনুভবতি এবং সর্বং হংসবশান্নাদো দশবিধো জায়তে
। চিণীতি প্রথমঃ । চিঞ্চিণীতি দ্বিতীয়ঃ ।
ঘণ্টানাদস্তৃতীয়ঃ । শঙ্খনাদশ্চতুর্থঃ ।
পঞ্চমতন্ত্রীনাদঃ । ষষ্ঠস্তালনাদঃ । সপ্তমো বেণুনাদঃ
। অষ্টমো মৃদঙ্গনাদঃ । নবমো ভেরীনাদঃ ।
দশমো মেঘনাদঃ । নবমং পরিত্যজ্য দশমমেবাভ্যসেৎ ।
প্রথমে চিঞ্চিণীগাত্রং দ্বিতীয়ে গাত্রভঞ্জনম্ । তৃতীয়ে
খেদনং যাতি চতুর্থে কম্পতে শিরঃ ॥
পঞ্চমে স্রবতে তালু ষষ্ঠেঽমৃতনিষেবণম্ । সপ্তমে
গূঢবিজ্ঞানং পরা বাচা তথাষ্টমে ॥
অদৃশ্যং নবমে দেহং দিব্যং চক্ষুস্তথামলম্ । দশমে
পরমং ব্রহ্ম ভবেদ্ব্রহ্মাত্মসংনিধৌ ॥
তস্মিন্মনো বিলীয়তে মনসি সঙ্কল্পবিকল্পে দগ্ধে পুণ্যপাপে
সদাশিবঃ শক্ত্যাত্মা সর্বত্রাবস্থিতঃ স্বয়ংজ্যোতিঃ শুদ্ধো
বুদ্ধো নিত্যো নিরঞ্জনঃ শান্তঃ প্রকাশত ইতি ॥
ইতি বেদপ্রবচনং বেদপ্রবচনম্ ॥ ২ ॥
ওঁ পূর্ণমদ ইতি শান্তিঃ ॥
ইতি হংসোপনিষৎসমাপ্তা ॥
– Chant Stotra in Other Languages –
Hansa Upanishad in Sanskrit – English – Bengali – Gujarati – Kannada – Malayalam – Odia – Telugu – Tamil