Bhagavata Purana skandha 11, adhyaya 2-5.
Conversation between nimi of videhas and navayogi (nine sons of Rishabha) Kavi, Hari, Antariksha, Prabuddha, Pippalayana, Avirhorta, Drumila, Chamasa and Karabhajana.
॥ Jayanteya Gita from Shrimad Bhagavata Bengali Lyrics ॥
॥ জায়ন্তেয়গীতা শ্রীমদ্ভাগবতান্তর্গতম্ ॥
শ্রীশুক উবাচ ।
গোবিন্দভুজগুপ্তায়াং দ্বারবত্যাং কুরূদ্বহ ।
অবাৎসীন্নারদোঽভীক্ষ্ণং কৃষ্ণোপাসনলালসঃ ॥ ১১.২.১ ॥
কো নু রাজন্নিন্দ্রিয়বান্মুকুন্দচরণাম্বুজম্ ।
ন ভজেৎসর্বতোমৃত্যুরুপাস্যমমরোত্তমৈঃ ॥ ১১.২.২ ॥
তমেকদা তু দেবর্ষিং বসুদেবো গৃহাগতম্ ।
অর্চিতং সুখমাসীনমভিবাদ্যেদমব্রবীৎ ॥ ১১.২.৩ ॥
শ্রীবসুদেব উবাচ ।
ভগবন্ভবতো যাত্রা স্বস্তয়ে সর্বদেহিনাম্ ।
কৃপণানাং যথা পিত্রোরুত্তমশ্লোকবর্ত্মনাম্ ॥ ১১.২.৪ ॥
ভূতানাং দেবচরিতং দুঃখায় চ সুখায় চ ।
সুখায়ৈব হি সাধূনাং ৎবাদৃশামচ্যুতাত্মনাম্ ॥ ১১.২.৫ ॥
ভজন্তি যে যথা দেবান্দেবা অপি তথৈব তান্ ।
ছায়েব কর্মসচিবাঃ সাধবো দীনবৎসলাঃ ॥ ১১.২.৬ ॥
ব্রহ্মংস্তথাপি পৃচ্ছামো ধর্মান্ভাগবতাংস্তব ।
যান্শ্রুৎবা শ্রদ্ধয়া মর্ত্যো মুচ্যতে সর্বতো ভয়াৎ ॥ ১১.২.৭ ॥
অহং কিল পুরানন্তং প্রজার্থো ভুবি মুক্তিদম্ ।
অপূজয়ং ন মোক্ষায় মোহিতো দেবমায়যা ॥ ১১.২.৮ ॥
যথা বিচিত্রব্যসনাদ্ভবদ্ভির্বিশ্বতোভয়াৎ ।
মুচ্যেম হ্যঞ্জসৈবাদ্ধা তথা নঃ শাধি সুব্রত ॥ ১১.২.৯ ॥
শ্রীশুক উবাচ ।
রাজন্নেবং কৃতপ্রশ্নো বসুদেবেন ধীমতা ।
প্রীতস্তমাহ দেবর্ষির্হরেঃ সংস্মারিতো গুণৈঃ ॥ ১১.২.১০ ॥
শ্রীনারদ উবাচ ।
সম্যগেতদ্ব্যবসিতং ভবতা সাৎবতর্ষভ ।
যৎপৃচ্ছসে ভাগবতান্ধর্মাংস্ত্বং বিশ্বভাবনান্ ॥ ১১.২.১১ ॥
শ্রুতোঽনুপঠিতো ধ্যাত আদৃতো বানুমোদিতঃ ।
সদ্যঃ পুনাতি সদ্ধর্মো দেববিশ্বদ্রুহোঽপি হি ॥ ১১.২.১২ ॥
ৎবয়া পরমকল্যাণঃ পুণ্যশ্রবণকীর্তনঃ ।
স্মারিতো ভগবানদ্য দেবো নারায়ণো মম ॥ ১১.২.১৩ ॥
অত্রাপ্যুদাহরন্তীমমিতিহাসং পুরাতনম্ ।
আর্ষভাণাং চ সংবাদং বিদেহস্য মহাত্মনঃ ॥ ১১.২.১৪ ॥
প্রিয়ব্রতো নাম সুতো মনোঃ স্বায়ম্ভুবস্য যঃ ।
তস্যাগ্নীধ্রস্ততো নাভিরৃষভস্তৎসুতঃ স্মৃতঃ ॥ ১১.২.১৫ ॥
তমাহুর্বাসুদেবাংশং মোক্ষধর্মবিবক্ষয়া ।
অবতীর্ণং সুতশতং তস্যাসীদ্ব্রহ্মপারগম্ ॥ ১১.২.১৬ ॥
তেষাং বৈ ভরতো জ্যেষ্ঠো নারায়ণপরায়ণঃ ।
বিখ্যাতং বর্ষমেতদ্যন্ নাম্না ভারতমদ্ভুতম্ ॥ ১১.২.১৭ ॥
স ভুক্তভোগাং ত্যক্ত্বেমাং নির্গতস্তপসা হরিম্ ।
উপাসীনস্তৎপদবীং লেভে বৈ জনৃনভিস্ত্রিভিঃ ॥ ১১.২.১৮ ॥
তেষাং নব নবদ্বীপ পতয়োঽস্য সমন্ততঃ ।
কর্মতন্ত্রপ্রণেতার একাশীতির্দ্বিজাতয়ঃ ॥ ১১.২.১৯ ॥
নবাভবন্মহাভাগা মুনয়ো হ্যর্থশংসিনঃ ।
শ্রমণা বাতরসনা আত্মবিদ্যাবিশারদাঃ ॥ ১১.২.২০ ॥
কবির্হবিরন্তরীক্ষঃ প্রবুদ্ধঃ পিপ্পলায়নঃ ।
আবির্হোত্রোঽথ দ্রুমিলশ্চমসঃ করভাজনঃ ॥ ১১.২.২১ ॥
ত এতে ভগবদ্রূপং বিশ্বং সদসদাত্মকম্ ।
আত্মনোঽব্যতিরেকেণ পশ্যন্তো ব্যচরন্মহীম্ ॥ ১১.২.২২ ॥
অব্যাহতেষ্টগতয়ঃ সুরসিদ্ধসাধ্য
গন্ধর্বয়ক্ষনরকিন্নরনাগলোকান্ ।
মুক্তাশ্চরন্তি মুনিচারণভূতনাথ
বিদ্যাধরদ্বিজগবাং ভুবনানি কামম্ ॥ ১১.২.২৩ ॥
ত একদা নিমেঃ সত্রমুপজগ্মুর্যদৃচ্ছয়া ।
বিতায়মানমৃষিভিরজনাভে মহাত্মনঃ ॥ ১১.২.২৪ ॥
তান্দৃষ্ট্বা সূর্যসঙ্কাশান্মহাভাগবতান্নৃপ ।
যজমানোঽগ্নয়ো বিপ্রাঃ সর্ব এবোপতস্থিরে ॥ ১১.২.২৫ ॥
বিদেহস্তানভিপ্রেত্য নারায়ণপরায়ণান্ ।
প্রীতঃ সম্পূজয়াং চক্রে আসনস্থান্যথার্হতঃ ॥ ১১.২.২৬ ॥
তান্রোচমানান্স্বরুচা ব্রহ্মপুত্রোপমান্নব ।
পপ্রচ্ছ পরমপ্রীতঃ প্রশ্রয়াবনতো নৃপঃ ॥ ১১.২.২৭ ॥
শ্রীবিদেহ উবাচ ।
মন্যে ভগবতঃ সাক্ষাৎপার্ষদান্বো মধুদ্বিসঃ ।
বিষ্ণোর্ভূতানি লোকানাং পাবনায় চরন্তি হি ॥ ১১.২.২৮ ॥
দুর্লভো মানুষো দেহো দেহিনাং ক্ষণভঙ্গুরঃ ।
তত্রাপি দুর্লভং মন্যে বৈকুণ্ঠপ্রিয়দর্শনম্ ॥ ১১.২.২৯ ॥
অত আত্যন্তিকং ক্ষেমং পৃচ্ছামো ভবতোঽনঘাঃ ।
সংসারেঽস্মিন্ক্ষণার্ধোঽপি সৎসঙ্গঃ শেবধির্নৃণাম্ ॥ ১১.২.৩০ ॥
ধর্মান্ভাগবতান্ব্রূত যদি নঃ শ্রুতয়ে ক্ষমম্ ।
যৈঃ প্রসন্নঃ প্রপন্নায় দাস্যত্যাত্মানমপ্যজঃ ॥ ১১.২.৩১ ॥
শ্রীনারদ উবাচ ।
এবং তে নিমিনা পৃষ্টা বসুদেব মহত্তমাঃ ।
প্রতিপূজ্যাব্রুবন্প্রীত্যা সসদস্যর্ত্বিজং নৃপম্ ॥ ১১.২.৩২ ॥
শ্রীকবিরুবাচ ।
মন্যেঽকুতশ্চিদ্ভয়মচ্যুতস্য পাদাম্বুজোপাসনমত্র নিত্যম্ ।
উদ্বিগ্নবুদ্ধেরসদাত্মভাবাদ্বিশ্বাত্মনা যত্র নিবর্ততে ভীঃ ॥ ১১.২.৩৩ ॥
যে বৈ ভগবতা প্রোক্তা উপায়া হ্যাত্মলব্ধয়ে ।
অঞ্জঃ পুংসামবিদুষাং বিদ্ধি ভাগবতান্হি তান্ ॥ ১১.২.৩৪ ॥
যানাস্থায় নরো রাজন্ন প্রমাদ্যেত কর্হিচিৎ ।
ধাবন্নিমীল্য বা নেত্রে ন স্খলেন্ন পতেদিহ ॥ ১১.২.৩৫ ॥
কায়েন বাচা মনসেন্দ্রিয়ৈর্বা বুদ্ধ্যাত্মনা বানুসৃতস্বভাবাৎ ।
করোতি যদ্যৎসকলং পরস্মৈ নারায়ণায়েতি সমর্পয়েত্তৎ ॥ ১১.২.৩৬ ॥
ভয়ং দ্বিতীয়াভিনিবেশতঃ স্যাদীশাদপেতস্য বিপর্যযোঽস্মৃতিঃ ।
তন্মায়যাতো বুধ আভজেত্তং ভক্ত্যৈকয়েশং গুরুদেবতাত্মা ॥ ১১.২.৩৭ ॥
অবিদ্যমানোঽপ্যবভাতি হি দ্বয়ো ধ্যাতুর্ধিয়া স্বপ্নমনোরথৌ যথা ।
তৎকর্মসঙ্কল্পবিকল্পকং মনো বুধো নিরুন্ধ্যাদভয়ং ততঃ স্যাৎ ॥ ১১.২.৩৮ ॥
শৃণ্বন্সুভদ্রাণি রথাঙ্গপাণের্জন্মানি কর্মাণি চ যানি লোকে ।
গীতানি নামানি তদর্থকানি গায়ন্বিলজ্জো বিচরেদসঙ্গঃ ॥ ১১.২.৩৯ ॥
এবংব্রতঃ স্বপ্রিয়নামকীর্ত্যা জাতানুরাগো দ্রুতচিত্ত উচ্চৈঃ ।
হসত্যথো রোদিতি রৌতি গায়ত্যুন্মাদবন্নৃত্যতি লোকবাহ্যঃ ॥ ১১.২.৪০ ॥
খং বায়ুমগ্নিং সলিলং মহীং চ জ্যোতীংষি সত্ত্বানি দিশো দ্রুমাদীন্ ।
সরিৎসমুদ্রাংশ্চ হরেঃ শরীরং যৎকিং চ ভূতং প্রণমেদনন্যঃ ॥ ১১.২.৪১ ॥
ভক্তিঃ পরেশানুভবো বিরক্তিরন্যত্র চৈষ ত্রিক এককালঃ ।
প্রপদ্যমানস্য যথাশ্নতঃ স্যুস্তুষ্টিঃ পুষ্টিঃ ক্ষুদপায়োঽনুঘাসম্ ॥ ১১.২.৪২ ॥
ইত্যচ্যুতাঙ্ঘ্রিং ভজতোঽনুবৃত্ত্যা ভক্তির্বিরক্তির্ভগবৎপ্রবোধঃ ।
ভবন্তি বৈ ভাগবতস্য রাজংস্ততঃ পরাং শান্তিমুপৈতি সাক্ষাৎ ॥ ১১.২.৪৩ ॥
শ্রীরাজোবাচ ।
অথ ভাগবতং ব্রূত যদ্ধর্মো যাদৃশো নৃণাম্ ।
যথাচরতি যদ্ব্রূতে যৈর্লিঙ্গৈর্ভগবৎপ্রিয়ঃ ॥ ১১.২.৪৪ ॥
শ্রীহবিরুবাচ ।
সর্বভূতেষু যঃ পশ্যেদ্ভগবদ্ভাবমাত্মনঃ ।
ভূতানি ভগবত্যাত্মন্যেষ ভাগবতোত্তমঃ ॥ ১১.২.৪৫ ॥
ঈস্বরে তদধীনেষু বালিশেষু দ্বিষৎসু চ ।
প্রেমমৈত্রীকৃপোপেক্ষা যঃ করোতি স মধ্যমঃ ॥ ১১.২.৪৬ ॥
অর্চায়ামেব হরয়ে পূজাং যঃ শ্রদ্ধয়েহতে ।
ন তদ্ভক্তেষু চান্যেষু স ভক্তঃ প্রাকৃতঃ স্মৃতঃ ॥ ১১.২.৪৭ ॥
গৃহীৎবাপীন্দ্রিয়ৈরর্থান্যো ন দ্বেষ্টি ন হৃষ্যতি ।
বিষ্ণোর্মায়ামিদং পশ্যন্স বৈ ভাগবতোত্তমঃ ॥ ১১.২.৪৮ ॥
দেহেন্দ্রিয়প্রাণমনোধিয়াং যো জন্মাপ্যযক্ষুদ্ভয়তর্ষকৃচ্ছ্রৈঃ ।
সংসারধর্মৈরবিমুহ্যমানঃ স্মৃত্যা হরের্ভাগবতপ্রধানঃ ॥ ১১.২.৪৯ ॥
ন কামকর্মবীজানাং যস্য চেতসি সম্ভবঃ ।
বাসুদেবৈকনিলয়ঃ স বৈ ভাগবতোত্তমঃ ॥ ১১.২.৫০ ॥
ন যস্য জন্মকর্মভ্যাং ন বর্ণাশ্রমজাতিভিঃ ।
সজ্জতেঽস্মিন্নহংভাবো দেহে বৈ স হরেঃ প্রিয়ঃ ॥ ১১.২.৫১ ॥
ন যস্য স্বঃ পর ইতি বিত্তেষ্বাত্মনি বা ভিদা ।
সর্বভূতসমঃ শান্তঃ স বৈ ভাগবতোত্তমঃ ॥ ১১.২.৫২ ॥
ত্রিভুবনবিভবহেতবেঽপ্যকুণ্ঠ
স্মৃতিরজিতাত্মসুরাদিভির্বিমৃগ্যাৎ ।
ন চলতি ভগবৎপদারবিন্দাল্
লবনিমিষার্ধমপি যঃ স বৈষ্ণবাগ্র্যঃ ॥ ১১.২.৫৩ ॥
ভগবত উরুবিক্রমাঙ্ঘ্রিশাখা নখমণিচন্দ্রিকয়া নিরস্ততাপে ।
হৃদি কথমুপসীদতাং পুনঃ স প্রভবতি চন্দ্র ইবোদিতেঽর্কতাপঃ ॥ ১১.২.৫৪ ॥
বিসৃজতি হৃদয়ং ন যস্য সাক্ষাদ্ধরিরবশাভিহিতোঽপ্যঘৌঘনাশঃ ।
প্রণয়রসনয়া ধৃতাঙ্ঘ্রিপদ্মঃ স ভবতি ভাগবতপ্রধান উক্তঃ ॥ ১১.২.৫৫ ॥
শ্রীরাজোবাচ ।
পরস্য বিষ্ণোরীশস্য মায়িনামপি মোহিনীম্ ।
মায়াং বেদিতুমিচ্ছামো ভগবন্তো ব্রুবন্তু নঃ ॥ ১১.৩.১ ॥
নানুতৃপ্যে জুষন্যুষ্মদ্ বচো হরিকথামৃতম্ ।
সংসারতাপনিস্তপ্তো মর্ত্যস্তত্তাপভেষজম্ ॥ ১১.৩.২ ॥
শ্রীঅন্তরীক্ষ উবাচ ।
এভির্ভূতানি ভূতাত্মা মহাভূতৈর্মহাভুজ ।
সসর্জোচ্চাবচান্যাদ্যঃ স্বমাত্রাত্মপ্রসিদ্ধয়ে ॥ ১১.৩.৩ ॥
এবং সৃষ্টানি ভূতানি প্রবিষ্টঃ পঞ্চধাতুভিঃ ।
একধা দশধাত্মানং বিভজন্জুষতে গুণান্ ॥ ১১.৩.৪ ॥
গুণৈর্গুণান্স ভুঞ্জান আত্মপ্রদ্যোতিতৈঃ প্রভুঃ ।
মন্যমান ইদং সৃষ্টমাত্মানমিহ সজ্জতে ॥ ১১.৩.৫ ॥
কর্মাণি কর্মভিঃ কুর্বন্সনিমিত্তানি দেহভৃৎ ।
তত্তৎকর্মফলং গৃহ্ণন্ভ্রমতীহ সুখেতরম্ ॥ ১১.৩.৬ ॥
ইত্থং কর্মগতীর্গচ্ছন্বহ্বভদ্রবহাঃ পুমান্ ।
আভূতসম্প্লবাৎসর্গ প্রলয়াবশ্নুতেঽবশঃ ॥ ১১.৩.৭ ॥
ধাতূপপ্লব আসন্নে ব্যক্তং দ্রব্যগুণাত্মকম্ ।
অনাদিনিধনঃ কালো হ্যব্যক্তায়াপকর্ষতি ॥ ১১.৩.৮ ॥
শতবর্ষা হ্যনাবৃষ্টির্ভবিষ্যত্যুল্বণা ভুবি ।
তৎকালোপচিতোষ্ণার্কো লোকাংস্ত্রীন্প্রতপিষ্যতি ॥ ১১.৩.৯ ॥
পাতালতলমারভ্য সঙ্কর্ষণমুখানলঃ ।
দহন্নূর্ধ্বশিখো বিষ্বগ্বর্ধতে বায়ুনেরিতঃ ॥ ১১.৩.১০ ॥
সংবর্তকো মেঘগণো বর্ষতি স্ম শতং সমাঃ ।
ধারাভির্হস্তিহস্তাভির্লীয়তে সলিলে বিরাট্ ॥ ১১.৩.১১ ॥
ততো বিরাজমুৎসৃজ্য্ বৈরাজঃ পুরুষো নৃপ ।
অব্যক্তং বিশতে সূক্ষ্মং নিরিন্ধন ইবানলঃ ॥ ১১.৩.১২ ॥
বায়ুনা হৃতগন্ধা ভূঃ সলিলৎবায় কল্পতে ।
সলিলং তদ্ধৃতরসং জ্যোতিষ্ট্বায়োপকল্পতে ॥ ১১.৩.১৩ ॥
হৃতরূপং তু তমসা বায়ৌ জ্যোতিঃ প্রলীয়তে ।
হৃতস্পর্শোঽবকাশেন বায়ুর্নভসি লীয়তে ॥ ১১.৩.১৪ ॥
কালাত্মনা হৃতগুণং নভ আত্মনি লীয়তে ॥ ১১.৩.১৪৫ ॥
ইন্দ্রিয়াণি মনো বুদ্ধিঃ সহ বৈকারিকৈর্নৃপ ।
প্রবিশন্তি হ্যহঙ্কারং স্বগুণৈরহমাত্মনি ॥ ১১.৩.১৫ ॥
এষা মায়া ভগবতঃ সর্গস্থিত্যন্তকারিণী ।
ত্রিবর্ণা বর্ণিতাস্মাভিঃ কিং ভূয়ঃ শ্রোতুমিচ্ছসি ॥ ১১.৩.১৬ ॥
শ্রীরাজোবাচ ।
যথৈতামৈশ্বরীং মায়াং দুস্তরামকৃতাত্মভিঃ ।
তরন্ত্যঞ্জঃ স্থূলধিয়ো মহর্ষ ইদমুচ্যতাম্ ॥ ১১.৩.১৭ ॥
শ্রীপ্রবুদ্ধ উবাচ ।
কর্মাণ্যারভমাণানাং দুঃখহত্যৈ সুখায় চ ।
পশ্যেৎপাকবিপর্যাসং মিথুনীচারিণাং নৃণাম্ ॥ ১১.৩.১৮ ॥
নিত্যার্তিদেন বিত্তেন দুর্লভেনাত্মমৃত্যুনা ।
গৃহাপত্যাপ্তপশুভিঃ কা প্রীতিঃ সাধিতৈশ্চলৈঃ ॥ ১১.৩.১৯ ॥
এবং লোকং পরম্বিদ্যান্নশ্বরং কর্মনির্মিতম্ ।
সতুল্যাতিশয়ধ্বংসং যথা মণ্ডলবর্তিনাম্ ॥ ১১.৩.২০ ॥
তস্মাদ্গুরুং প্রপদ্যেত জিজ্ঞাসুঃ শ্রেয় উত্তমম্ ।
শাব্দে পরে চ নিষ্ণাতং ব্রহ্মণ্যুপশমাশ্রয়ম্ ॥ ১১.৩.২১ ॥
তত্র ভাগবতান্ধর্মান্শিক্ষেদ্গুর্বাত্মদৈবতঃ ।
অমায়যানুবৃত্ত্যা যৈস্তুষ্যেদাত্মাত্মদো হরিঃ ॥ ১১.৩.২২ ॥
সর্বতো মনসোঽসঙ্গমাদৌ সঙ্গং চ সাধুষু ।
দয়াং মৈত্রীং প্রশ্রয়ং চ ভূতেষ্বদ্ধা যথোচিতম্ ॥ ১১.৩.২৩ ॥
শৌচং তপস্তিতিক্ষাং চ মৌনং স্বাধ্যায়মার্জবম্ ।
ব্রহ্মচর্যমহিংসাং চ সমৎবং দ্বন্দ্বসংজ্ঞয়োঃ ॥ ১১.৩.২৪ ॥
সর্বত্রাত্মেশ্বরান্বীক্ষাং কৈবল্যমনিকেততাম্ ।
বিবিক্তচীরবসনং সন্তোষং যেন কেনচিৎ ॥ ১১.৩.২৫ ॥
শ্রদ্ধাং ভাগবতে শাস্ত্রেঽনিন্দামন্যত্র চাপি হি ।
মনোবাক্কর্মদণ্ডং চ সত্যং শমদমাবপি ॥ ১১.৩.২৬ ॥
শ্রবণং কীর্তনং ধ্যানং হরেরদ্ভুতকর্মণঃ ।
জন্মকর্মগুণানাং চ তদর্থেঽখিলচেষ্টিতম্ ॥ ১১.৩.২৭ ॥
ইষ্টং দত্তং তপো জপ্তং বৃত্তং যচ্চাত্মনঃ প্রিয়ম্ ।
দারান্সুতান্গৃহান্প্রাণান্যৎপরস্মৈ নিবেদনম্ ॥ ১১.৩.২৮ ॥
এবং কৃষ্ণাত্মনাথেষু মনুষ্যেষু চ সৌহৃদম্ ।
পরিচর্যাং চোভয়ত্র মহৎসু নৃষু সাধুষু ॥ ১১.৩.২৯ ॥
পরস্পরানুকথনং পাবনং ভগবদ্যশঃ ।
মিথো রতির্মিথস্তুষ্টির্নিবৃত্তির্মিথ আত্মনঃ ॥ ১১.৩.৩০ ॥
স্মরন্তঃ স্মারয়ন্তশ্চ মিথোঽঘৌঘহরং হরিম্ ।
ভক্ত্যা সঞ্জাতয়া ভক্ত্যা বিভ্রত্যুৎপুলকাং তনুম্ ॥ ১১.৩.৩১ ॥
ক্বচিদ্রুদন্ত্যচ্যুতচিন্তয়া ক্বচিদ্
ধসন্তি নন্দন্তি বদন্ত্যলৌকিকাঃ ।
নৃত্যন্তি গায়ন্ত্যনুশীলয়ন্ত্যজং
ভবন্তি তূষ্ণীং পরমেত্য নির্বৃতাঃ ॥ ১১.৩.৩২ ॥
ইতি ভাগবতান্ধর্মান্শিক্ষন্ভক্ত্যা তদুত্থয়া ।
নারায়ণপরো মায়ামঞ্জস্তরতি দুস্তরাম্ ॥ ১১.৩.৩৩ ॥
শ্রীরাজোবাচ ।
নারায়ণাভিধানস্য ব্রহ্মণঃ পরমাত্মনঃ ।
নিষ্ঠামর্হথ নো বক্তুং যূয়ং হি ব্রহ্মবিত্তমাঃ ॥ ১১.৩.৩৪ ॥
শ্রীপিপ্পলায়ন উবাচ ।
স্থিত্যুদ্ভবপ্রলয়হেতুরহেতুরস্য
যৎস্বপ্নজাগরসুষুপ্তিষু সদ্বহিশ্চ ।
দেহেন্দ্রিয়াসুহৃদয়ানি চরন্তি যেন
সঞ্জীবিতানি তদবেহি পরং নরেন্দ্র ॥ ১১.৩.৩৫ ॥
নৈতন্মনো বিশতি বাগুত চক্ষুরাত্মা
প্রাণেন্দ্রিয়াণি চ যথানলমর্চিষঃ স্বাঃ ।
শব্দোঽপি বোধকনিষেধতয়াত্মমূলম্
অর্থোক্তমাহ যদৃতে ন নিষেধসিদ্ধিঃ ॥ ১১.৩.৩৬ ॥
সত্ত্বং রজস্তম ইতি ত্রিবৃদেকমাদৌ
সূত্রং মহানহমিতি প্রবদন্তি জীবম্ ।
জ্ঞানক্রিয়ার্থফলরূপতয়োরুশক্তি
ব্রহ্মৈব ভাতি সদসচ্চ তয়োঃ পরং যৎ ॥ ১১.৩.৩৭ ॥
নাত্মা জজান ন মরিষ্যতি নৈধতেঽসৌ
ন ক্ষীয়তে সবনবিদ্ব্যভিচারিণাং হি ।
সর্বত্র শশ্বদনপায়্যুপলব্ধিমাত্রং
প্রাণো যথেন্দ্রিয়বলেন বিকল্পিতং সৎ ॥ ১১.৩.৩৮ ॥
অণ্ডেষু পেশিষু তরুষ্ববিনিশ্চিতেষু প্রাণো হি জীবমুপধাবতি তত্র তত্র ।
সন্নে যদিন্দ্রিয়গণেঽহমি চ প্রসুপ্তে কূটস্থ আশয়মৃতে তদনুস্মৃতির্নঃ ॥ ১১.৩.৩৯ ॥
যর্হ্যব্জনাভচরণৈষণয়োরুভক্ত্যা
চেতোমলানি বিধমেদ্গুণকর্মজানি ।
তস্মিন্বিশুদ্ধ উপলভ্যত আত্মতত্ত্বং
শাক্ষাদ্যথামলদৃশোঃ সবিতৃপ্রকাশঃ ॥ ১১.৩.৪০ ॥
শ্রীরাজোবাচ ।
কর্ময়োগং বদত নঃ পুরুষো যেন সংস্কৃতঃ ।
বিধূয়েহাশু কর্মাণি নৈষ্কর্ম্যং বিন্দতে পরম্ ॥ ১১.৩.৪১ ॥
এবং প্রশ্নমৃষীন্পূর্বমপৃচ্ছং পিতুরন্তিকে ।
নাব্রুবন্ব্রহ্মণঃ পুত্রাস্তত্র কারণমুচ্যতাম্ ॥ ১১.৩.৪২ ॥
শ্রীআবির্হোত্র উবাচ ।
কর্মাকর্ম বিকর্মেতি বেদবাদো ন লৌকিকঃ ।
বেদস্য চেশ্বরাত্মৎবাত্তত্র মুহ্যন্তি সূরয়ঃ ॥ ১১.৩.৪৩ ॥
পরোক্ষবাদো বেদোঽয়ং বালানামনুশাসনম্ ।
কর্মমোক্ষায় কর্মাণি বিধত্তে হ্যগদং যথা ॥ ১১.৩.৪৪ ॥
নাচরেদ্যস্তু বেদোক্তং স্বয়মজ্ঞোঽজিতেন্দ্রিয়ঃ ।
বিকর্মণা হ্যধর্মেণ মৃত্যোর্মৃত্যুমুপৈতি সঃ ॥ ১১.৩.৪৫ ॥
বেদোক্তমেব কুর্বাণো নিঃসঙ্গোঽর্পিতমীশ্বরে ।
নৈষ্কর্ম্যং লভতে সিদ্ধিং রোচনার্থা ফলশ্রুতিঃ ॥ ১১.৩.৪৬ ॥
য আশু হৃদয়গ্রন্থিং নির্জিহীঋষুঃ পরাত্মনঃ ।
বিধিনোপচরেদ্দেবং তন্ত্রোক্তেন চ কেশবম্ ॥ ১১.৩.৪৭ ॥
লব্ধ্বানুগ্রহ আচার্যাত্তেন সন্দর্শিতাগমঃ ।
মহাপুরুষমভ্যর্চেন্মূর্ত্যাভিমতয়াত্মনঃ ॥ ১১.৩.৪৮ ॥
শুচিঃ সম্মুখমাসীনঃ প্রাণসংয়মনাদিভিঃ ।
পিণ্ডং বিশোধ্য সন্ন্যাস কৃতরক্ষোঽর্চয়েদ্ধরিম্ ॥ ১১.৩.৪৯ ॥
অর্চাদৌ হৃদয়ে চাপি যথালব্ধোপচারকৈঃ ।
দ্রব্যক্ষিত্যাত্মলিণ্গানি নিষ্পাদ্য প্রোক্ষ্য চাসনম্ ॥ ১১.৩.৫০ ॥
পাদ্যাদীনুপকল্প্যাথ সন্নিধাপ্য সমাহিতঃ ।
হৃদাদিভিঃ কৃতন্যাসো মূলমন্ত্রেণ চার্চয়েৎ ॥ ১১.৩.৫১ ॥
সাঙ্গোপাঙ্গাং সপার্ষদাং তাং তাং মূর্তিং স্বমন্ত্রতঃ ।
পাদ্যার্ঘ্যাচমনীয়াদ্যৈঃ স্নানবাসোবিভূষণৈঃ ॥ ১১.৩.৫২ ॥
গন্ধমাল্যাক্ষতস্রগ্ভির্ধূপদীপোপহারকৈঃ ।
সাঙ্গম্সম্পূজ্য বিধিবৎস্তবৈঃ স্তুৎবা নমেদ্ধরিম্ ॥ ১১.৩.৫৩ ॥
আত্মানম্তন্ময়ম্ধ্যায়ন্মূর্তিং সম্পূজয়েদ্ধরেঃ ।
শেষামাধায় শিরসা স্বধাম্ন্যুদ্বাস্য সৎকৃতম্ ॥ ১১.৩.৫৪ ॥
এবমগ্ন্যর্কতোয়াদাবতিথৌ হৃদয়ে চ যঃ ।
যজতীশ্বরমাত্মানমচিরান্মুচ্যতে হি সঃ ॥ ১১.৩.৫৫ ॥
শ্রীরাজোবাচ ।
যানি যানীহ কর্মাণি যৈর্যৈঃ স্বচ্ছন্দজন্মভিঃ ।
চক্রে করোতি কর্তা বা হরিস্তানি ব্রুবন্তু নঃ ॥ ১১.৪.১ ॥
শ্রীদ্রুমিল উবাচ ।
যো বা অনন্তস্য গুনাননন্তাননুক্রমিষ্যন্স তু বালবুদ্ধিঃ ।
রজাংসি ভূমের্গণয়েৎকথঞ্চিৎকালেন নৈবাখিলশক্তিধাম্নঃ ॥ ১১.৪.২ ॥
ভূতৈর্যদা পঞ্চভিরাত্মসৃষ্টৈঃ
পুরং বিরাজং বিরচয়্য তস্মিন্ ।
স্বাংশেন বিষ্টঃ পুরুষাভিধানম্
অবাপ নারায়ণ আদিদেবঃ ॥ ১১.৪.৩ ॥
যৎকায় এষ ভুবনত্রয়সন্নিবেশো
যস্যেন্দ্রিয়ৈস্তনুভৃতামুভয়েন্দ্রিয়াণি ।
জ্ঞানং স্বতঃ শ্বসনতো বলমোজ ঈহা
সত্ত্বাদিভিঃ স্থিতিলয়োদ্ভব আদিকর্তা ॥ ১১.৪.৪ ॥
আদাবভূচ্ছতধৃতী রজসাস্য সর্গে
বিষ্ণুঃ স্থিতৌ ক্রতুপতির্দ্বিজধর্মসেতুঃ ।
রুদ্রোঽপ্যযায় তমসা পুরুষঃ স আদ্য
ইত্যুদ্ভবস্থিতিলয়াঃ সততং প্রজাসু ॥ ১১.৪.৫ ॥
ধর্মস্য দক্ষদুহিতর্যজনিষ্ট মূর্ত্যাং
নারায়ণো নর ঋষিপ্রবরঃ প্রশান্তঃ ।
নৈষ্কর্ম্যলক্ষণমুবাচ চচার কর্ম
যোঽদ্যাপি চাস্ত ঋষিবর্যনিষেবিতাঙ্ঘ্রিঃ ॥ ১১.৪.৬ ॥
ইন্দ্রো বিশঙ্ক্য মম ধাম জিঘৃক্ষতীতি
কামং ন্যযুঙ্ক্ত সগণং স বদর্যুপাখ্যম্ ।
গৎবাপ্সরোগণবসন্তসুমন্দবাতৈঃ
স্ত্রীপ্রেক্ষণেষুভিরবিধ্যদতন্মহিজ্ঞঃ ॥ ১১.৪.৭ ॥
বিজ্ঞায় শক্রকৃতমক্রমমাদিদেবঃ
প্রাহ প্রহস্য গতবিস্ময় এজমানান্ ।
মা ভৈর্বিভো মদন মারুত দেববধ্বো
গৃহ্ণীত নো বলিমশূন্যমিমং কুরুধ্বম্ ॥ ১১.৪.৮ ॥
ইত্থং ব্রুবত্যভয়দে নরদেব দেবাঃ
সব্রীডনম্রশিরসঃ সঘৃণং তমূচুঃ ।
নৈতদ্বিভো ৎবয়ি পরেঽবিকৃতে বিচিত্রং
স্বারামধীরনিকরানতপাদপদ্মে ॥ ১১.৪.৯ ॥
ৎবাং সেবতাং সুরকৃতা বহবোঽন্তরায়াঃ
স্বৌকো বিলঙ্ঘ্য পরমং ব্রজতাং পদং তে ।
নান্যস্য বর্হিষি বলীন্দদতঃ স্বভাগান্
ধত্তে পদং ৎবমবিতা যদি বিঘ্নমূর্ধ্নি ॥ ১১.৪.১০ ॥
ক্ষুত্তৃট্ত্রিকালগুণমারুতজৈহ্বশৈষ্ণান্
অস্মানপারজলধীনতিতীর্য কেচিৎ ।
ক্রোধস্য যান্তি বিফলস্য বশং পদে গোর্
মজ্জন্তি দুশ্চরতপশ্চ বৃথোৎসৃজন্তি ॥ ১১.৪.১১ ॥
ইতি প্রগৃণতাং তেষাং স্ত্রিয়োঽত্যদ্ভুতদর্শনাঃ ।
দর্শয়ামাস শুশ্রূষাং স্বর্চিতাঃ কুর্বতীর্বিভুঃ ॥ ১১.৪.১২ ॥
তে দেবানুচরা দৃষ্ট্বা স্ত্রিয়ঃ শ্রীরিব রূপিণীঃ ।
গন্ধেন মুমুহুস্তাসাং রূপৌদার্যহতশ্রিয়ঃ ॥ ১১.৪.১৩ ॥
তানাহ দেবদেবেশঃ প্রণতান্প্রহসন্নিব ।
আসামেকতমাং বৃঙ্ধ্বং সবর্ণাং স্বর্গভূষণাম্ ॥ ১১.৪.১৪ ॥
ওমিত্যাদেশমাদায় নৎবা তং সুরবন্দিনঃ ।
উর্বশীমপ্সরঃশ্রেষ্ঠাং পুরস্কৃত্য দিবং যয়ুঃ ॥ ১১.৪.১৫ ॥
ইন্দ্রায়ানম্য সদসি শৃণ্বতাং ত্রিদিবৌকসাম্ ।
ঊচুর্নারায়ণবলং শক্রস্তত্রাস বিস্মিতঃ ॥ ১১.৪.১৬ ॥
হংসস্বরূপ্যবদদচ্যুত আত্ময়োগং
দত্তঃ কুমার ঋষভো ভগবান্পিতা নঃ ।
বিষ্ণুঃ শিবায় জগতাং কলয়াবতির্ণস্
তেনাহৃতা মধুভিদা শ্রুতয়ো হয়াস্যে ॥ ১১.৪.১৭ ॥
গুপ্তোঽপ্যযে মনুরিলৌষধয়শ্চ মাৎস্যে
ক্রৌডে হতো দিতিজ উদ্ধরতাম্ভসঃ ক্ষ্মাম্ ।
কৌর্মে ধৃতোঽদ্রিরমৃতোন্মথনে স্বপৃষ্ঠে
গ্রাহাৎপ্রপন্নমিভরাজমমুঞ্চদার্তম্ ॥ ১১.৪.১৮ ॥
সংস্তুন্বতো নিপতিতান্শ্রমণানৃষীংশ্চ
শক্রং চ বৃত্রবধতস্তমসি প্রবিষ্টম্ ।
দেবস্ত্রিয়োঽসুরগৃহে পিহিতা অনাথা
জঘ্নেঽসুরেন্দ্রমভয়ায় সতাং নৃসিংহে ॥ ১১.৪.১৯ ॥
দেবাসুরে যুধি চ দৈত্যপতীন্সুরার্থে
হৎবান্তরেষু ভুবনান্যদধাৎকলাভিঃ ।
ভূৎবাথ বামন ইমামহরদ্বলেঃ ক্ষ্মাং
যাচ্ঞাচ্ছলেন সমদাদদিতেঃ সুতেভ্যঃ ॥ ১১.৪.২০ ॥
নিঃক্ষত্রিয়ামকৃত গাং চ ত্রিঃসপ্তকৃৎবো
রামস্তু হৈহয়কুলাপ্যযভার্গবাগ্নিঃ ।
সোঽব্ধিং ববন্ধ দশবক্ত্রমহন্সলঙ্কং
সীতাপতির্জয়তি লোকমলঘ্নকীঋতিঃ ॥ ১১.৪.২১ ॥
ভূমের্ভরাবতরণায় যদুষ্বজন্মা
জাতঃ করিষ্যতি সুরৈরপি দুষ্করাণি ।
বাদৈর্বিমোহয়তি যজ্ঞকৃতোঽতদর্হান্
শূদ্রান্কলৌ ক্ষিতিভুজো ন্যহনিষ্যদন্তে ॥ ১১.৪.২২ ॥
এবংবিধানি জন্মানি কর্মাণি চ জগৎপতেঃ ।
ভূরীণি ভূরিয়শসো বর্ণিতানি মহাভুজ ॥ ১১.৪.২৩ ॥
শ্রীরাজোবাচ ।
ভগবন্তং হরিং প্রায়ো ন ভজন্ত্যাত্মবিত্তমাঃ ।
তেষামশান্তকামানাং ক নিষ্ঠাবিজিতাত্মনাম্ ॥ ১১.৫.১ ॥
শ্রীচমস উবাচ ।
মুখবাহূরুপাদেভ্যঃ পুরুষস্যাশ্রমৈঃ সহ ।
চৎবারো জজ্ঞিরে বর্ণা গুণৈর্বিপ্রাদয়ঃ পৃথক্ ॥ ১১.৫.২ ॥
য এষাং পুরুষং সাক্ষাদাত্মপ্রভবমীশ্বরম্ ।
ন ভজন্ত্যবজানন্তি স্থানাদ্ভ্রষ্টাঃ পতন্ত্যধঃ ॥ ১১.৫.৩ ॥
দূরে হরিকথাঃ কেচিদ্দূরে চাচ্যুতকীর্তনাঃ ।
স্ত্রিয়ঃ শূদ্রাদয়শ্চৈব তেঽনুকম্প্যা ভবাদৃশাম্ ॥ ১১.৫.৪ ॥
বিপ্রো রাজন্যবৈশ্যৌ বা হরেঃ প্রাপ্তাঃ পদান্তিকম্ ।
শ্রৌতেন জন্মনাথাপি মুহ্যন্ত্যাম্নায়বাদিনঃ ॥ ১১.৫.৫ ॥
কর্মণ্যকোবিদাঃ স্তব্ধা মূর্খাঃ পণ্ডিতমানিনঃ ।
বদন্তি চাটুকান্মূঢা যয়া মাধ্ব্যা গিরোৎসুকাঃ ॥ ১১.৫.৬ ॥
রজসা ঘোরসঙ্কল্পাঃ কামুকা অহিমন্যবঃ ।
দাম্ভিকা মানিনঃ পাপা বিহসন্ত্যচ্যুতপ্রিয়ান্ ॥ ১১.৫.৭ ॥
বদন্তি তেঽন্যোন্যমুপাসিতস্ত্রিয়ো গৃহেষু মৈথুন্যপরেষু চাশিষঃ ।
যজন্ত্যসৃষ্টান্নবিধানদক্ষিণং বৃত্ত্যৈ পরং ঘ্নন্তি পশূনতদ্বিদঃ ॥ ১১.৫.৮ ॥
শ্রিয়া বিভূত্যাভিজনেন বিদ্যযা ত্যাগেন রূপেণ বলেন কর্মণা ।
জাতস্ময়েনান্ধধিয়ঃ সহেশ্বরান্সতোঽবমন্যন্তি হরিপ্রিয়ান্খলাঃ ॥ ১১.৫.৯ ॥
সর্বেষু শশ্বত্তনুভৃৎস্ববস্থিতং
যথা খমাত্মানমভীষ্টমীশ্বরম্ ।
বেদোপগীতং চ ন শৃণ্বতেঽবুধা
মনোরথানাং প্রবদন্তি বার্তয়া ॥ ১১.৫.১০ ॥
লোকে ব্যবায়ামিষমদ্যসেবা নিত্যা হি জন্তোর্ন হি তত্র চোদনা ।
ব্যবস্থিতিস্তেষু বিবাহয়জ্ঞ সুরাগ্রহৈরাসু নিবৃত্তিরিষ্টা ॥ ১১.৫.১১ ॥
ধনং চ ধর্মৈকফলং যতো বৈ
জ্ঞানং সবিজ্ঞানমনুপ্রশান্তি ।
গৃহেষু যুঞ্জন্তি কলেবরস্য
মৃত্যুং ন পশ্যন্তি দুরন্তবীর্যম্ ॥ ১১.৫.১২ ॥
যদ্ঘ্রাণভক্ষো বিহিতঃ সুরায়াস্তথা পশোরালভনং ন হিংসা ।
এবং ব্যবায়ঃ প্রজয়া ন রত্যা ইমং বিশুদ্ধং ন বিদুঃ স্বধর্মম্ ॥ ১১.৫.১৩ ॥
যে ৎবনেবংবিদোঽসন্তঃ স্তব্ধাঃ সদভিমানিনঃ ।
পশূন্দ্রুহ্যন্তি বিশ্রব্ধাঃ প্রেত্য খাদন্তি তে চ তান্ ॥ ১১.৫.১৪ ॥
দ্বিষন্তঃ পরকায়েষু স্বাত্মানং হরিমীশ্বরম্ ।
মৃতকে সানুবন্ধেঽস্মিন্বদ্ধস্নেহাঃ পতন্ত্যধঃ ॥ ১১.৫.১৫ ॥
যে কৈবল্যমসম্প্রাপ্তা যে চাতীতাশ্চ মূঢতাম্ ।
ত্রৈবর্গিকা হ্যক্ষণিকা আত্মানং ঘাতয়ন্তি তে ॥ ১১.৫.১৬ ॥
এত আত্মহনোঽশান্তা অজ্ঞানে জ্ঞানমানিনঃ ।
সীদন্ত্যকৃতকৃত্যা বৈ কালধ্বস্তমনোরথাঃ ॥ ১১.৫.১৭ ॥
হিৎবাত্মমায়ারচিতা গৃহাপত্যসুহৃৎস্ত্রিয়ঃ ।
তমো বিশন্ত্যনিচ্ছন্তো বাসুদেবপরাঙ্মুখাঃ ॥ ১১.৫.১৮ ॥
শ্রী রাজোবাচ ।
কস্মিন্কালে স ভগবান্কিং বর্ণঃ কীদৃশো নৃভিঃ ।
নাম্না বা কেন বিধিনা পূজ্যতে তদিহোচ্যতাম্ ॥ ১১.৫.১৯ ॥
শ্রীকরভাজন উবাচ ।
কৃতং ত্রেতা দ্বাপরং চ কলিরিত্যেষু কেশবঃ ।
নানাবর্ণাভিধাকারো নানৈব বিধিনেজ্যতে ॥ ১১.৫.২০ ॥
কৃতে শুক্লশ্চতুর্বাহুর্জটিলো বল্কলাম্বরঃ ।
কৃষ্ণাজিনোপবীতাক্ষান্বিভ্রদ্দণ্ডকমণ্ডলূ ॥ ১১.৫.২১ ॥
মনুষ্যাস্তু তদা শান্তা নির্বৈরাঃ সুহৃদঃ সমাঃ ।
যজন্তি তপসা দেবং শমেন চ দমেন চ ॥ ১১.৫.২২ ॥
হংসঃ সুপর্ণো বৈকুণ্ঠো ধর্মো যোগেশ্বরোঽমলঃ ।
ঈশ্বরঃ পুরুষোঽব্যক্তঃ পরমাত্মেতি গীয়তে ॥ ১১.৫.২৩ ॥
ত্রেতায়াং রক্তবর্ণোঽসৌ চতুর্বাহুস্ত্রিমেখলঃ ।
হিরণ্যকেশস্ত্রয়্যাত্মা স্রুক্স্রুবাদ্যুপলক্ষণঃ ॥ ১১.৫.২৪ ॥
তং তদা মনুজা দেবং সর্বদেবময়ং হরিম্ ।
যজন্তি বিদ্যযা ত্রয়্যা ধর্মিষ্ঠা ব্রহ্মবাদিনঃ ॥ ১১.৫.২৫ ॥
বিষ্ণুর্যজ্ঞঃ পৃশ্নিগর্ভঃ সর্বদেব উরুক্রমঃ ।
বৃষাকপির্জয়ন্তশ্চ উরুগায় ইতীর্যতে ॥ ১১.৫.২৬ ॥
দ্বাপরে ভগবাঞ্শ্যামঃ পীতবাসা নিজায়ুধঃ ।
শ্রীবৎসাদিভিরঙ্কৈশ্চ লক্ষণৈরুপলক্ষিতঃ ॥ ১১.৫.২৭ ॥
তং তদা পুরুষং মর্ত্যা মহারাজোপলক্ষণম্ ।
যজন্তি বেদতন্ত্রাভ্যাং পরং জিজ্ঞাসবো নৃপ ॥ ১১.৫.২৮ ॥
নমস্তে বাসুদেবায় নমঃ সঙ্কর্ষণায় চ ।
প্রদ্যুম্নায়ানিরুদ্ধায় তুভ্যং ভগবতে নমঃ ॥ ১১.৫.২৯ ॥
নারায়ণায় ঋষয়ে পুরুষায় মহাত্মনে ।
বিশ্বেশ্বরায় বিশ্বায় সর্বভূতাত্মনে নমঃ ॥ ১১.৫.৩০ ॥
ইতি দ্বাপর উর্বীশ স্তুবন্তি জগদীশ্বরম্ ।
নানাতন্ত্রবিধানেন কলাবপি তথা শৃণু ॥ ১১.৫.৩১ ॥
কৃষ্ণবর্ণং ৎবিষাকৃষ্ণং সাঙ্গোপাঙ্গাস্ত্রপার্ষদম্ ।
যজ্ঞৈঃ সঙ্কীর্তনপ্রায়ৈর্যজন্তি হি সুমেধসঃ ॥ ১১.৫.৩২ ॥
ধ্যেয়ং সদা পরিভবঘ্নমভীষ্টদোহং
তীর্থাস্পদং শিববিরিঞ্চিনুতং শরণ্যম্ ।
ভৃত্যার্তিহং প্রণতপাল ভবাব্ধিপোতং
বন্দে মহাপুরুষ তে চরণারবিন্দম্ ॥ ১১.৫.৩৩ ॥
ত্যক্ত্বা সুদুস্ত্যজসুরেপ্সিতরাজ্যলক্ষ্মীং
ধর্মিষ্ঠ আর্যবচসা যদগাদরণ্যম্ ।
মায়ামৃগং দয়িতয়েপ্সিতমন্বধাবদ্
বন্দে মহাপুরুষ তে চরণারবিন্দম্ ॥ ১১.৫.৩৪ ॥
এবং যুগানুরূপাভ্যাং ভগবান্যুগবর্তিভিঃ ।
মনুজৈরিজ্যতে রাজন্শ্রেয়সামীশ্বরো হরিঃ ॥ ১১.৫.৩৫ ॥
কলিং সভাজয়ন্ত্যার্যা গুণ জ্ঞাঃ সারভাগিনঃ ।
যত্র সঙ্কীর্তনেনৈব সর্বস্বার্থোঽভিলভ্যতে ॥ ১১.৫.৩৬ ॥
ন হ্যতঃ পরমো লাভো দেহিনাং ভ্রাম্যতামিহ ।
যতো বিন্দেত পরমাং শান্তিং নশ্যতি সংসৃতিঃ ॥ ১১.৫.৩৭ ॥
কৃতাদিষু প্রজা রাজন্কলাবিচ্ছন্তি সম্ভবম্ ।
কলৌ খলু ভবিষ্যন্তি নারায়ণপরায়ণাঃ ॥ ১১.৫.৩৮ ॥
ক্বচিৎক্বচিন্মহারাজ দ্রবিডেষু চ ভূরিশঃ ।
তাম্রপর্ণী নদী যত্র কৃতমালা পয়স্বিনী ॥ ১১.৫.৩৯ ॥
কাবেরী চ মহাপুণ্যা প্রতীচী চ মহানদী ।
যে পিবন্তি জলং তাসাং মনুজা মনুজেশ্বর ॥ ১১.৫.৪০ ॥
প্রায়ো ভক্তা ভগবতি বাসুদেবেঽমলাশয়াঃ ॥ ১১.৫.৪০৫ ॥
দেবর্ষিভূতাপ্তনৃণাং পিতৄণাং ন কিঙ্করো নায়মৃণী চ রাজন্ ।
সর্বাত্মনা যঃ শরণং শরণ্যং গতো মুকুন্দং পরিহৃত্য কর্তম্ ॥ ১১.৫.৪১ ॥
স্বপাদমূলম্ভজতঃ প্রিয়স্য ত্যক্তান্যভাবস্য হরিঃ পরেশঃ ।
বিকর্ম যচ্চোৎপতিতং কথঞ্চিদ্ধুনোতি সর্বং হৃদি সন্নিবিষ্টঃ ॥ ১১.৫.৪২ ॥
শ্রীনারদ উবাচ ।
ধর্মান্ভাগবতানিত্থং শ্রুৎবাথ মিথিলেশ্বরঃ ।
জায়ন্তেয়ান্মুনীন্প্রীতঃ সোপাধ্যায়ো হ্যপূজয়ৎ ॥ ১১.৫.৪৩ ॥
ততোঽন্তর্দধিরে সিদ্ধাঃ সর্বলোকস্য পশ্যতঃ ।
রাজা ধর্মানুপাতিষ্ঠন্নবাপ পরমাং গতিম্ ॥ ১১.৫.৪৪ ॥
ৎবমপ্যেতান্মহাভাগ ধর্মান্ভাগবতান্শ্রুতান্ ।
আস্থিতঃ শ্রদ্ধয়া যুক্তো নিঃসঙ্গো যাস্যসে পরম্ ॥ ১১.৫.৪৫ ॥
যুবয়োঃ খলু দম্পত্যোর্যশসা পূরিতং জগৎ ।
পুত্রতামগমদ্যদ্বাং ভগবানীশ্বরো হরিঃ ॥ ১১.৫.৪৬ ॥
দর্শনালিঙ্গনালাপৈঃ শয়নাসনভোজনৈঃ ।
আত্মা বাং পাবিতঃ কৃষ্ণে পুত্রস্নেহং প্রকুর্বতোঃ ॥ ১১.৫.৪৭ ॥
বৈরেণ যং নৃপতয়ঃ শিশুপালপৌণ্ড্র
শাল্বাদয়ো গতিবিলাসবিলোকনাদ্যৈঃ ।
ধ্যায়ন্ত আকৃতধিয়ঃ শয়নাসনাদৌ
তৎসাম্যমাপুরনুরক্তধিয়াং পুনঃ কিম্ ॥ ১১.৫.৪৮ ॥
মাপত্যবুদ্ধিমকৃথাঃ কৃষ্ণে সর্বাত্মনীশ্বরে ।
মায়ামনুষ্যভাবেন গূঢৈশ্বর্যে পরেঽব্যযে ॥ ১১.৫.৪৯ ॥
ভূভারাসুররাজন্য হন্তবে গুপ্তয়ে সতাম্ ।
অবতীর্ণস্য নির্বৃ
ত্যৈ যশো লোকে বিতন্যতে ॥ ১১.৫.৫০ ॥
শ্রীশুক উবাচ ।
এতচ্ছ্রুৎবা মহাভাগো বসুদেবোঽতিবিস্মিতঃ ।
দেবকী চ মহাভাগা জহতুর্মোহমাত্মনঃ ॥ ১১.৫.৫১ ॥
ইতিহাসমিমং পুণ্যং ধারয়েদ্যঃ সমাহিতঃ ।
স বিধূয়েহ শমলং ব্রহ্মভূয়ায় কল্পতে ॥ ১১.৫.৫২ ॥
Chant Stotra in Other Languages –
Jayanteya Gita from Srimad Bhagavata Lyrics in Sanskrit » English » Gujarati » Kannada » Malayalam » Odia » Telugu » Tamil