॥ Nitishatak Bengali Lyrics ॥
॥ নীতিশতকং ভর্তৃহরিকৃত ॥
দিক্কালাদ্যনবচ্ছিন্নানন্তচিন্মাত্রমূর্তয়ে ।
স্বানুভূত্যেকনামায় নমঃ শান্তায় তেজসে ॥ ১ ॥
য়াং চিন্তয়ামি সততং ময়ি সা বিরক্তা
সাপ্যন্যমিচ্ছতি জনং স জনোঽন্যসক্তঃ ।
অস্মত্কৃতে চ পরিশুষ্যতি কাচিদন্যা
ধিক্ তাং চ তং চ মদনং চ ইমাং চ মাং চ ॥ ২ ॥
অজ্ঞঃ সুখমারাধ্যঃ সুখতরমারাধ্যতে বিশেষজ্ঞঃ ।
জ্ঞানলবদুর্বিগ্ধং ব্রহ্মাপি নরং ন রঞ্জয়তি ॥ ৩ ॥
প্রায়ঃ কন্দুকপাতেনোত্পতত্যার্যঃ পতন্নপি ।
তথা পতত্যনার্যস্তু মৃত্পিণ্ডপতনং তথা ॥ ৪ ॥
লভেত সিকতাসু তৈলমপি য়ত্নতঃ পীডয়ন্
পিবেচ্চ মৃগতৃষ্ণিকাসু সলিলং পিপাসার্দিতঃ ।
কদাচিদপি পর্যটন্শশবিষাণমাসাদয়েন্
ন তু প্রতিনিবিষ্টমূর্খজনচিত্তমারাধয়েত্ ॥ ৫ ॥
ব্যালং বালমৃণালতন্তুভিরসৌ রোদ্ধুং সমুজ্জৃম্ভতে
ছেত্তুং বজ্রমণীং শিরীষকুসুমপ্রান্তেন সন্নহ্যতি ।
মাধুর্যং মধুবিন্দুনা রচয়িতুং ক্ষারাম্বুধেরীহতে
নেতুং বাঞ্ছতি য়ঃ খলান্পথি সতাং সূক্তৈঃ সুধাস্যন্দিভিঃ ॥ ৬ ॥
স্বায়ত্তমেকান্তগুণং বিধাত্রা
বিনির্মিতং ছাদনমজ্ঞতায়াঃ ।
বিশেষতঃ সর্ববিদাং সমাজে
বিভূষণং মৌনমপণ্ডিতানাম্ ॥ ৭ ॥
য়দা কিঞ্চিজ্জ্ঞোঽহং গজ ইব মদান্ধঃ সমভবম্
তদা সর্বজ্ঞোঽস্মীত্যভবদবলিপ্তং মম মনঃ ।
য়দা কিঞ্চিত্কিঞ্চিদ্বুধজনসকাশাদবগতম্
তদা মূর্খোঽস্মীতি জ্বর ইব মদো মে ব্যপগতঃ ॥ ৮ ॥
কৃমিকুলচিতং লালাক্লিন্নং বিগন্ধি জুগুপ্সিতং
নিরূপমরসং প্রীত্যা খাদন্নরাস্থি নিরামিষম্ ।
সুরপিতমপি শ্বা পার্শ্বস্থং বিলোক্য ন শঙ্কতে
ন হি গণয়তি ক্ষুদ্রো জন্তুঃ পরিগ্রহফল্গুতাম্ ॥ ৯ ॥
শিরঃ শার্বং স্বর্গাত্পশুপতিশিরস্তঃ ক্ষিতিধরং
মহীধ্রাদুত্তুঙ্গাদবনিমবনেশ্চাপি জলধিম্ ।
অধোঽধো গঙ্গেয়ং পদমুপগতা স্তোকমথবা
বিবেকভ্রষ্টানাং ভবতি বিনিপাতঃ শতমুখঃ ॥ ১০ ॥
শক্যো বারয়িতুং জলেন হুতভুক্ছত্রেণ সূর্যাতপ্তো
নাগেন্দ্রো নিশিতাঙ্কুশেন সমদো দণ্ডেন গোগর্দভৌ ।
ব্যাধির্ভেষজসঙ্গ্রহৈশ্চ বিবিধৈর্মন্ত্রপ্রয়োগৈর্বিষং
সর্বস্যৌষধমস্তি শাস্ত্রবিহিতং মূর্খস্য নাস্ত্যৌষধম্ ॥ ১১ ॥
সাহিত্যসঙ্গীতকলাবিহীনঃ সাক্ষাত্পশুঃ পুচ্ছবিষাণহীনঃ ।
তৃণং ন খাদন্নপি জীবমানঃ তদ্ভাগধেয়ং পরমং পশূনাম্ ॥ ১২ ॥
য়েষাং ন বিদ্যা ন তপো ন দানং
জ্ঞানং ন শীলং ন গুণো ন ধর্মঃ ।
তে মর্ত্যলোকে ভুবি ভারভূতাঃ
মনুষ্যরূপেণ মৃগাশ্চরন্তি ॥ ১৩ ॥
বরং পর্বতদুর্গেষু ভ্রান্তং বনচরৈঃ সহ ।
ন মূর্খজনসম্পর্কঃ সুরেন্দ্রভবনেষ্বপি ॥ ১৪ ॥
শাস্ত্রোপস্কৃতশব্দসুন্দরগিরঃ শিষ্যপ্রদেয়াগমা
বিখ্যাতাঃ কবয়ো বসন্তি বিষয়ে য়স্য প্রভোর্নির্ধনাঃ ।
তজ্জাড্যং বসুধাধিপস্য কবয়স্ত্বর্থং বিনাপীশ্বরাঃ
কুত্স্যাঃ স্যুঃ কুপরীক্ষকা ন মণয়ো য়ৈরর্ঘতঃ পাতিতাঃ ॥ ১৫ ॥
হর্তুর্যাতি ন গোচরং কিমপি শং পুষ্ণাতি য়ত্ সর্বদা-
ঽপ্যর্থিভ্যঃ প্রতিপাদ্যমানমনিষং প্রাপ্নোতি বৃদ্ধিং পরাম্ ।
কল্পান্তেষ্বপি ন প্রয়াতি নিধনং বিদ্যাখ্যমন্তর্ধনং
য়েষাং তান্ প্রতি মানমুজ্ঝত নৃপাঃ কস্তৈঃ সহ স্পর্ধতে ॥ ১৬ ॥
অধিগতপরমার্থান্ পণ্ডিতান্ মাবমংস্তা-
স্তৃণমিব লঘু লক্ষ্মীর্নৈব তান্ সংরুণদ্ধি ।
অভিনবমদলেখাশ্যামগণ্ডস্থলানাং
ন ভবতি বিষতন্তুর্বারণং বারণানাম্ ॥ ১৭ ॥
অম্ভোজিনীবনবিহারবিলাসমেব
হংসস্য হন্তি নিতরাং কুপিতো বিধাতা ।
ন ত্বস্য দুগ্ধজলভেদবিধৌ প্রসিদ্ধাং
বৈদগ্ধ্যকীর্তিমপহর্তুমসৌ সমর্থঃ ॥ ১৮ ॥
কেয়ূরাণি ন ভূষয়ন্তি পুরুষং হারা ন চন্দ্রোজ্জ্বলা
ন স্নানং ন বিলেপনং ন কুসুমং নালঙ্কৃতা মূর্ধজাঃ ।
বাণ্যেকা সমলঙ্করোতি পুরুষং য়া সংস্কৃতা ধার্যতে
ক্ষীয়ন্তে খলু ভূষণানি সততং বাগ্ভূষণং ভূষণম্ ॥ ১৯ ॥
বিদ্যা নাম নরস্য রূপমধিকং প্রচ্ছন্নগুপ্তং ধনং
বিদ্যা ভোগকরী য়শস্সুখকরী বিদ্যা গুরূণাং গুরুঃ ।
বিদ্যা বন্ধুজনো বিদেশগমনে বিদ্যা পরা দেবতা
বিদ্যা রাজসু পূজিতা ন তু ধনং বিদ্যাবিহীনঃ পশুঃ ॥ ২০ ॥
ক্ষান্তিশ্চেত্ কবচেন কিং কিমরিভিঃ ক্রোধোঽস্তি চেদ্দেহিনাং
জ্ঞাতিশ্চেদনলেন কিং য়দি সুহৃদ্ দিব্যৌষধৈঃ কিং ফলম্ ।
কিং সর্পৈর্যদি দুর্জনাঃ কিমু ধনৈর্বিদ্যা ন বন্দ্যা য়দি
ব্রীডা চেত্কিমু ভূষণৈঃ সুকবিতা য়দ্যস্তি রাজ্যেন কিম্ ॥ ২১ ॥
দাক্ষিণ্যং স্বজনে দয়া পরজনে শাঠ্যং সদা দুর্জনে
প্রীতিঃ সাধুজনে নয়ো নৃপজনে বিদ্বজ্জনে চার্জবম্ ।
শৌর্যং শত্রুজনে ক্ষমা গুরুজনে কান্তাজনে ধৃষ্টতা
য়ে চৈবং পুরুষাঃ কলাসু কুশলাস্তেষ্বেব লোকস্থিতিঃ ॥ ২২ ॥
জাড্যং ধিয়ো হরতি সিঞ্চতি বাচি সত্যং
মানোন্নতিং দিশতি পাপমপাকরোতি ।
চেতঃ প্রসাদয়তি দিক্ষু তনোতি কীর্তিং
সত্সঙ্গতিঃ কথয় কিং ন করোতি পুংসাম্ ॥ ২৩ ॥
জয়ন্তি তে সুকৃতিনঃ রসসিদ্ধাঃ কবীশ্বরাঃ ।
নাস্তি য়েষাং য়শঃকায়ে জরামরণজং ভয়ম্ ॥ ২৪ ॥
সূনুঃ সচ্চরিতঃ সতী প্রিয়তমা স্বামী প্রসাদোন্মুখঃ
স্নিগ্ধং মিত্রমবঞ্চকঃ পরিজনো নিষ্ক্লেশলেশং মনঃ ।
আকারো রুচিরঃ স্থিরশ্চ বিভবো বিদ্যাবদাতং মুখং
তুষ্টে বিষ্টপকষ্টহারিণি হরৌ সম্প্রাপ্যতে দেহিনা ॥ ২৫ ॥
প্রাণাঘাতান্নিবৃত্তিঃ পরধনহরণে সংয়মঃ সত্যবাক্যং
কালে শক্ত্যা প্রদানং য়ুবতিজনকথামূকভাবঃ পরেষাম্ ।
তৃষ্ণাস্রোতোবিভঙ্গো গুরুষু চ বিনয়ঃ সর্বভূতানুকম্পা
সামান্যঃ সর্বশাস্ত্রেষ্বনুপহতবিধিঃ শ্রেয়সামেষ পন্থাঃ ॥ ২৬ ॥
প্রারভ্যতে ন খলু বিঘ্নভয়েন নীচৈঃ
প্রারভ্য বিঘ্নবিহতা বিরমন্তি মধ্যাঃ ॥
বিঘ্নৈঃ পুনঃ পুনরপি প্রতিহন্যমানাঃ
প্রারব্ধমুত্তমগুণা ন পরিত্যজন্তি ॥ ২৭ ॥
অসন্তো নাভ্যর্থ্যাঃ সুহৃদপি ন য়াচ্যঃ কৃশধনঃ
প্রিয়া ন্যায়্যা বৃত্তির্মলিনমসুভঙ্গেঽপ্যসুকরম্ ।
বিপদ্যুচ্চৈঃ স্থেয়ং পদমনুবিধেয়ং চ মহতাং
সতাং কেনোদ্দিষ্টং বিষমমসিধারাব্রতমিদম্ ॥ ২৮ ॥
ক্ষুত্ক্ষামোঽপি জরাকৃশোঽপি শিথিলপ্রায়োঽপি কষ্টাং দশাম্
আপন্নোপি বিপন্নদীধিতিরপি প্রাণেষু গচ্ছত্স্বপি ।
মত্তেভেন্দ্রবিভিন্নকুম্ভকবলগ্রাসৈকবদ্ধস্পৃহঃ
কিং জীর্ণং তৃণমত্তি মানমহতামগ্রেসরঃ কেসরিঃ ॥ ২৯ ॥
স্বল্পস্নায়ুবসাবশেষমলিনং নির্মাংসমপ্যস্থিকং
শ্বা লব্ধ্বা পরিতোষমেতি ন তু তত্তস্য ক্ষুধাশান্তয়ে ।
সিংহো জম্বুকমঙ্কমাগতমপি ত্যক্ত্বা নিহন্তি দ্বিপং
সর্বঃ কৃচ্ছ্রগতোঽপি বাঞ্ছতি জনঃ সত্বানুরুপং ফলম্ ॥ ৩০ ॥
লাঙ্গুলচালনমধশ্চরণাবপাতং
ভূমৌ নিপত্য বদনোদরদর্শনং চ ।
শ্বা পিণ্ডদস্য কুরুতে গজপুঙ্গবস্তু
ধীরং বিলোকয়তি চাটুশতৈশ্চ ভুঙ্ক্তে ॥ ৩১ ॥
পরিবর্তিনি সংসারে মৃতঃ কো বা ন জায়তে ॥
স জাতো য়েন জাতেন য়াতি বংশঃ সমুন্নতিম্ ॥ ৩২ ॥
কুসুমস্তবকস্যেব দ্বয়ী বৃত্তির্মনস্বিনঃ ।
মূর্ধ্নি বা সর্বলোকস্য বিশীর্যেত বনেঽথবা ॥ ৩৩ ॥
সন্ত্যন্যেঽপি বৃহস্পতিপ্রভৃতয়ঃ সম্ভাবিতাঃ পঞ্চষাঃ
তান্ প্রত্যেষ বিশেষবিক্রমরুচী রাহুর্ন বৈরায়তে ।
দ্বাবেব গ্রসতে দিবাকরনিশাপ্রাণেশ্বরৌ ভাস্বরৌ
ভ্রাতঃ পর্বণি পশ্য দানবপতিঃ শীর্ষাবশেষাকৃতিঃ ॥ ৩৪ ॥
বহতি ভুবনশ্রেণিং শেষঃ ফণাফলস্থিতাং
কমঠপতিনা মধ্যে পৃষ্ঠং সদা চ ধার্যতে ।
তমপি কুরুতে ক্রোধাধীনং পয়োধিরনাদরা-
দহহ মহতাং নিঃসীমানশ্চরিত্রবিভূতয়ঃ ॥ ৩৫ ॥
বরং পক্ষচ্ছেদঃ সমদমঘবন্মুক্তকুলিশ-
প্রহারৈরুদ্গচ্ছদ্বহুলদহনোদ্গারগুরুভিঃ ।
তুষারাদ্রেঃ সূনোরহহ পিতরি ক্লেশবিবশে
ন চাসৌ সম্পাতঃ পয়সি পয়সাং পত্যুরুচিতঃ ॥ ৩৬ ॥
য়দচেতনোঽপি পাদৈঃ স্পৃষ্টঃ প্রজ্বলতি সবিতুরিনকান্তঃ ।
তত্তেজস্বী পুরুষঃ পরকৃতনিকৃতিং কথং সহতে ॥ ৩৭ ॥
সিংহঃশিশুরপি নিপততি মদমলিনকপোলভিত্তিষু গজেষু ।
প্রকৃতিরিয়ং সত্ববতাং ন খলু বয়সস্তেজসো হেতুঃ ॥ ৩৮ ॥
জাতির্যাতু রসাতলং গুণগণৈস্তত্রাপ্যধো গম্যতাং
শীলং শৈলতটাত্পতত্বভিজনঃ সন্দহ্যতাং বহ্নিনা ।
শৌর্যে বৈরিণি বজ্রমাশু নিপতত্বর্থোঽস্তু নঃ কেবলং
য়েনৈকেন বিনা গুণাস্তৃণলবপ্রায়াঃ সমস্তা ইমে ॥ ৩৯ ॥
তানীন্দ্রিয়াণ্যবিকলানি তদেব নাম
সা বুদ্ধিরপ্রতিহতা বচনং তদেব ।
অর্থোষ্মণা বিরহিতঃ পুরুষঃ ক্ষণেন
সোঽপ্যন্য এব ভবতীতি বিচিত্রমেতত্ ॥ ৪০ ॥
য়স্যাস্তি বিত্তং স নরঃ কুলীনঃ
স পণ্ডিতঃ স শ্রুতবান্ গুণজ্ঞঃ ।
স এব বক্তা স চ দর্শনীয়ঃ
সর্বে গুণাঃ কাঞ্চনমাশ্রয়ন্তি ॥ ৪১ ॥
দৌর্মন্ত্র্যান্নৃপতির্বিনশ্যতি য়তিঃ সঙ্গাত্ সুতো লালনাদ্
বিপ্রোঽনধ্যনাত্ কুলং কুতনয়াচ্ছীলং খলোপাসনাত্ ।
হ্রীর্মদ্যাদনবেক্ষণাদপি কৃষিঃ স্নেহঃ প্রবাসাশ্র-
য়ান্মৈত্রী চাপ্রণয়াত্ সমৃদ্ধিরনয়াত্ ত্যাগঃ প্রমাদাদ্ধনম্ ॥ ৪২ ॥
দানং ভোগো নাশস্তিস্রো গতয়ো ভবন্তি বিত্তস্য ।
য়ো ন দদাতি ন ভুঙ্ক্তে তস্য তৃতীয়া গতির্ভবতি ॥ ৪৩ ॥
মণিঃ শোণাল্লীঢঃ সমরবিজয়ী হেতিদলিতো
মদক্ষীবো নাগঃ শরদি সরিতঃ শ্যানপুলিনাঃ ।
কলাশেষশ্চন্দ্রঃ সুরতমৃদিতা বালবনিতা
তনিম্না শোভন্তে গলিতবিভবাশ্চার্থিষু নরাঃ ॥ ৪৪ ॥
পরিক্ষীণঃ কশ্চিত্স্পৃহয়তি য়বানাং প্রসৃতয়ে
স পশ্চাত্ সম্পূর্ণঃ কলয়তি ধরিত্রীং তৃণসমাম্ ।
অতশ্চানৈকান্ত্যাদ্গুরুলঘুতয়াঽর্থেষু ধনিনা-
মবস্থা বস্তূনি প্রথয়তি চ সঙ্কোচয়তি চ ॥ ৪৫ ॥
রাজন্ দুধুক্ষসি য়দি ক্ষিতিধেনুমেতাং
তেনাদ্য বত্সমিব লোকমমুং পুষাণ ।
তস্মিংশ্চ সম্যগনিশং পরিপোষ্যমাণে
নানাফলৈঃ ফলতি কল্পলতেব ভূমিঃ ॥ ৪৬ ॥
সত্যানৃতা চ পরুষা প্রিয়বাদিনী চ
হিংস্রা দয়ালুরপি চার্থপরা বদান্যা ।
নিত্যব্যয়া প্রচুরনিত্যধনাগমা চ
বারাঙ্গনেব নৃপনীতিরনেকরুপা ॥ ৪৭ ॥
আজ্ঞা কীর্তিঃ পালনং ব্রাহ্মণানাং
দানং ভোগঃ মিত্রসংরক্ষণং চ ।
য়েষামেতে ষড্গুণা ন প্রবৃতাঃ
কোঽর্থস্তেষাং পার্থিবোপাশ্রয়েণ ॥ ৪৮ ॥
য়দ্ধাত্রা নিজভালপট্টলিখিতং স্তোকং মহদ্বা ধনং
তত্ প্রাপ্নোতি মরুস্থলেঽপি নিতরাং মেরৌ ততো নাধিকম্ ।
তদ্ধীরো ভব বিত্তবত্সু কৃপণাং বৃত্তিং বৃথা মা কৃথাঃ
কূপে পশ্য পয়োনিধাবপি ঘটো গৃহ্ণাতি তুল্যং জলম্ ॥ ৪৯ ॥
ত্বমেব চাতকাধার ইতি কেষাং ন গোচরঃ ।
কিমম্ভোদ বদাস্মাকং কার্পণ্যোক্তিং প্রতীক্ষসে ॥ ৫০ ॥
রে রে চাতক সাবধানমনসা মিত্র ক্ষণং শ্রূয়তাম্
অম্ভোদা বহবো বসন্তি গগনে সর্বেঽপি নৈকাদৃশাঃ ।
কেচিদ্বৃষ্টিভিরার্দ্রয়ন্তি ধরণীং গর্জন্তি কেচিদ্বৃথা
য়ং য়ং পশ্যসি তস্য তস্য পুরতো মা ব্রূহি দীনং বচঃ ॥ ৫১ ॥
অকরুণত্বমকারণবিগ্রহঃ পরধনে পরয়োষিতি চ স্পৃহা ।
সুজনবন্ধুজনেষ্বসহিষ্ণুতা প্রকৃতিসিদ্ধমিদং হি দুরাত্মনাম্ ॥ ৫২ ॥
দুর্জনঃ পরিহর্তব্যো বিদ্যয়ালঙ্কৃতোঽপি সন্ ।
মণিনা ভূষিতঃ সর্পঃ কিমসৌ ন ভয়ঙ্করঃ ॥ ৫৩ ॥
লোভশ্চেদগুণেন কিং পিশুনতা য়দ্যস্তি কিং পাতকৈঃ
সত্যং চেত্তপসা চ কিং শুচি মনো য়দ্যস্তি তীর্থেন কিম্ ।
সৌজন্যং য়দি কিং গুণৈঃ সুমহিমা য়দ্যস্তি কিং মণ্ডনৈঃ
সদ্বিদ্যা য়দি কিং ধনৈরপয়শো য়দ্যস্তি কিং মৃত্যুনা ॥ ৫৫ ॥
শশী দিবসধূসরো গলিতয়ৌবনা কামিনী
সরো বিগতবারিজং মুখমনক্ষরং স্বাকৃতেঃ ।
প্রভুর্ধনপরায়ণঃ সততদুর্গতঃ সজ্জনো
নৃপাঙ্গণগতঃ খলো মনসি সপ্ত শল্যানি মে ॥ ৫৬ ॥
ন কশ্চিচ্চণ্ডকোপানামাত্মীয়ো নাম ভূভুজাম্ ।
হোতারমপি জুহ্বানং স্পৃষ্টো দহতি পাবকঃ ॥ ৫৭ ॥
মৌনান্মূকঃ প্রবচনপটুর্বাতুলো জল্পকো বা
ধৃষ্টঃ পার্শ্বে বসতি চ সদা দূরতশ্চাপ্রগল্ভঃ ।
ক্ষান্ত্যা ভীরুর্যদি ন সহতে প্রায়শো নাভিজাতঃ
সেবাধর্মঃ পরমগহনো য়োগিনামপ্যগম্যঃ ॥ ৫৮ ॥
উদ্ভাসিতাখিলখলস্য বিশ্রুঙ্খলস্য
প্রাগ্জাতবিস্তৃতনিজাধমকর্মবৃত্তেঃ ।
দৈবাদবাপ্তবিভবস্য গুণদ্বিষোঽস্য
নীচস্য গোচরগতৈঃ সুখমাপ্যতে কৈঃ ॥ ৫৯ ॥
আরম্ভগুর্বী ক্ষয়িণী ক্রমেণ
লঘ্বী পুরা বৃদ্ধিমতী চ পশ্চাত্ ।
দিনস্য পূর্বার্ধপরার্ধভিন্না
ছায়েব মৈত্রী খলসজ্জনানাম্ ॥ ৬০ ॥
মৃগমীনসজ্জনানাং তৃণজলসন্তোষবিহিতবৃত্তিনাম্ ।
লুব্ধকধীবরপিশুনা নিষ্কারণবৈরিণো জগতি ॥ ৬১ ॥
বাঞ্ছা সজ্জনসঙ্গমে পরগুণে প্রীতির্গুরৌ নম্রতা
বিদ্যায়াং ব্যসনং স্বয়োষিতি রতির্লোকাপবাদাদ্ভয়ম্ ।
ভক্তিঃ শূলিনি শক্তিরাত্মদমনে সংসর্গমুক্তিঃ খলে
য়েষ্বেতে নিবসন্তি নির্মলগুণাস্তেভ্যো নরেভ্যো নমঃ ॥ ৬২ ॥
বিপদি ধৈর্যমথাভ্যুদয়ে ক্ষমা সদসী বাক্পটুতা য়ুধি বিক্রমঃ ।
য়শসি চাভিরুচির্ব্যসনং শ্রুতৌ প্রকৃতিসিদ্ধমিদং হি মহাত্মনাম্ ॥ ৬৩ ॥
প্রদানং প্রচ্ছন্নং গৃহমুপগতে সম্ভ্রমবিধিঃ
প্রিয়ং কৃত্বা মৌনং সদসি কথনং চাপ্যুপকৃতে ।
অনুত্সেকো লক্ষ্ম্যামনভিভবগন্ধাঃ পরকথাঃ
সতাং কেনোদ্দিষ্টং বিষমমসিধারাব্রতমিদম্ ॥ ৬৪ ॥
করে শ্লাঘ্যস্ত্যাগঃ শিরসি গুরুপাদপ্রণয়িতা
মুখে সত্যা বাণী বিজয়িভুজয়োর্বীর্যমতুলম্ ।
হৃদি স্বচ্ছা বৃত্তিঃ শ্রুতমধিগতং চ শ্রবণয়ো-
র্বিনাপ্যৈশ্বর্যেণ প্রকৃতিমহতাং মণ্ডনমিদম্ ॥ ৬৫ ॥
সম্পত্সু মহতাং চিত্তং ভবত্যুত্পলকোমলম্ ।
আপত্সু চ মহাশৈলশিলাসঙ্ঘাতকর্কশম্ ॥ ৬৬ ॥
সন্তপ্তায়সি সংস্থিতস্য পয়সো নামাপি ন জ্ঞায়তে
মুক্তাকারতয়া তদেব নলিনীপত্রস্থিতং রাজতে ।
স্বাত্যাং সাগরশুক্তিমধ্যপতিতং তন্মৌক্তিকং জায়তে
প্রায়েণাধমমধ্যমোত্তমগুণঃ সংসর্গতো জায়তে ॥ ৬৭ ॥
প্রীণাতি য়ঃ সুচরিতঃ পিতরং স পুত্রো
য়দ্ভর্তুরেব হিতমিচ্ছতি তত্ কলত্রম্ ।
তন্মিত্রমাপদি সুখে চ সমক্রিয়ং য়দ্
এতত্ ত্রয়ং জগতি পুণ্যকৃতো লভন্তে ॥ ৬৮ ॥
একো দেবঃ কেশবো বা শিবো বা
হ্যেকং মিত্রং ভূপতির্বা য়তির্বা ।
একো বাসঃ পত্তনে বা বনে বা
হ্যেকা ভার্যা সুন্দরী বা দরী বা ॥ ৬৯ ॥
নম্রত্বেনোন্নমন্তঃ পরগুণকথনৈঃ স্বান্ গুণান্ খ্যাপয়ন্তঃ
স্বার্থান্ সম্পাদয়ন্তো বিততপৃথুতরারম্ভয়ত্নাঃ পরার্থে ।
ক্ষান্ত্যৈবাক্ষেপরুক্ষাক্ষরমুখরমুখান্ দুর্জনান্ দূষয়ন্তঃ
সন্তঃ সাশ্চর্যচর্যা জগতি বহুমতাঃ কস্য নাভ্যর্চনীয়াঃ ॥ ৭০ ॥
ভবন্তি নম্রাস্তরবঃ ফলোদ্গমৈ-
র্নবাম্বুভির্দূরবিলম্বিনো ঘনাঃ ।
অনুদ্ধতাঃ সত্পুরুষাঃ সমৃদ্ধিভিঃ
স্বভাব এবৈষ পরোপকারিণাম্ ॥ ৭১ ॥
শ্রোত্রং শ্রুতেনৈব ন কুণ্ডলেন
দানেন পাণির্ন তু কঙ্কণেন ।
বিভাতি কায়ঃ করুণাপরাণাং (বিভাতি কায়ঃ খলু সজ্জনানাং)
পরোপকারৈর্ন তু চন্দনেন ॥ ৭২ ॥
পাপান্নিবারয়তি য়োজয়তে হিতায়
গুহ্যং নিগূহতি গুণান্ প্রকটীকরোতি ।
আপদ্গতং চ ন জহাতি দদাতি কালে
সন্মিত্রলক্ষণমিদং নিগদন্তি সন্তঃ ॥ ৭৩ ॥
পদ্মাকরং দিনকরো বিকচীকরোতি
চন্দ্রো বিকাসয়তি কৈরবচক্রবালম্ ।
নাভ্যর্থিতো জলধরোঽপি জলং দদাতি
সন্তঃ স্বয়ং পরহিতে বিহিতাভিয়োগাঃ ॥ ৭৪ ॥
এতে সত্পুরুষাঃ পরার্থঘটকাঃ স্বার্থং পরিত্যজ্য য়ে
সামান্যাস্তু পরার্থমুদ্যমভৃতঃ স্বার্থাবিরোধেন য়ে ।
তেঽমী মানবরাক্ষসাঃ পরহিতং স্বার্থায় বিঘ্নন্তি য়ে
য়ে বিঘ্নন্তি নিরর্থকং পরহিতং তে কে ন জানীমহে ॥ ৭৫ ॥
ক্ষীরেণাত্মগতোদকায় হি গুণা দত্তাঃ পুরা তেঽখিলাঃ
ক্ষীরোত্তাপমবেক্ষ্য তেন পয়সা স্বাত্মা কৃশাণৌ হুতঃ ।
গন্তুং পাবকমুন্মনস্তদভবদ্ দৃষ্ট্বা তু মিত্রাপদং
য়ুক্তং তেন জলেন শাম্যতি সতাং মৈত্রী পুনস্ত্বীদৃশী ॥ ৭৬ ॥
ইতঃ স্বপিতি কেশবঃ কুলমিতস্তদীয়দ্বীষা-
মিতশ্চ শরণার্থিনাং শিখরিণাং গণাঃ শেরতে ।
ইতোঽপি বডবানলঃ সহ সমস্তসংবর্তকৈ-
রহো বিততমূর্জিতং ভারসহং চ সিন্ধোর্বপুঃ ॥ ৭৭ ॥
তৃষ্ণাং ছিন্ধি ভজ ক্ষমাং জহি মদং পাপে রতিং মা কৃথাঃ
সত্যং ব্রূহ্যনুয়াহি সাধুপদবীং সেবস্ব বিদ্বজ্জনম্ ।
মান্যান্ মানয় বিদ্বিষোঽপ্যনুনয় প্রখ্যাপয় প্রশ্রয়ং
কীর্তিং পালয় দুঃখিতে কুরু দয়ামেতত্ সতাং চেষ্টিতম্ ॥ ৭৮ ॥
মনসি বচসি কায়ে পুণ্যপীয়ূষপূর্ণাঃ
ত্রিভুবনমুপকারশ্রেণিভিঃ প্রীণয়ন্তঃ ।
পরগুণপরমাণূন্ পর্বতীকৃত্য নিত্যং
নিজহৃদি বিকসন্তঃ সন্তি সন্তঃ কিয়ন্তঃ ॥ ৭৯ ॥
কিং তেন হেমগিরিণা রজতাদ্রিণা বা
য়ত্রাশ্রিতাশ্চ তরবস্তরবন্ত এব ।
মন্যামহে মলয়মেব য়দাশ্রয়েণ
কঙ্কোলনিম্বকুটজা অপি চন্দনাঃ স্যুঃ ॥ ৮০ ॥
রত্নৈর্মহার্হৈস্তুতুষুর্ন দেবা
ন ভেজিরে ভীমবিষেণ ভীতিম্ ।
সুধাং বিনা ন প্রয়য়ুর্বিরামং
ন নিশ্চিতার্থাদ্বিরমন্তি ধীরাঃ ॥ ৮১ ॥
ক্বচিত্ পৃথ্বীশয়্যঃ ক্বচিদপি চ পর্যঙ্কশয়নঃ
ক্বচিচ্ছাকাহারঃ ক্বচিদপি চ শাল্যোদনরুচিঃ ।
ক্বচিত্ কণ্ঠাধারী ক্বচিদপি চ দিব্যাম্বরধরো
মনস্বী কার্যার্থী ন গণয়তি চ দুঃখং ন চ সুখম্ ॥ ৮২ ॥
ঐশ্বর্যস্য বিভূষণং সুজনতা শৌর্যস্য বাক্সংয়মো
জ্ঞানস্যোপশমঃ শ্রুতস্য বিনয়ো বিত্তস্য পাত্রে ব্যয়ঃ ।
অক্রোধস্তপসঃ ক্ষমা প্রভবিতুর্ধর্মস্য নির্ব্যাজতা
সর্বেষামপি সর্বকারণমিদং শীলং পরং ভূষণম্ ॥ ৮৩ ॥
নিন্দন্তু নীতিনিপুণা য়দি বা স্তুবন্তু
লক্ষ্মীঃ সমাবিশতু গচ্ছতু ব য়থেষ্টম্ ।
অদ্যৈব বা মরণমস্তু য়ুগান্তরে বা
ন্যায়্যাত্পথঃ প্রবিচলন্তি পদং ন ধীরাঃ ॥ ৮৪ ॥
পাতিতোঽপি করাঘাতৈরুত্পতত্যেব কন্দুকঃ ।
প্রায়েণ সাধুবৃত্তনামস্থায়িন্যো বিপত্তয়ঃ ॥ ৮৫ ॥
আলস্যং হি মনুষ্যাণাং শরীরস্থো মহারিপুঃ ।
নাস্ত্যুদ্যমসমো বন্ধুঃ কুর্বাণো নাবসীদতি ॥ ৮৬ ॥
ছিন্নোঽপি রোহতি তরুশ্চন্দ্রঃ ক্ষীণোঽপি বর্ধতে লোকে ।
ইতি বিমৃশন্তঃ সন্তঃ সন্তপ্যন্তে ন লোকেঽস্মিন্ ॥ ৮৭ ॥
নেতা য়স্য বৃহস্পতিঃ প্রহরণং বজ্রং সুরাঃ সৈনিকাঃ
স্বর্গো দুর্গমনুগ্রহঃ খলু হরেরৈরাবতো বারণঃ ।
ইত্যৈশ্বর্যবলান্বিতোঽপি বলভিদ্ভগ্নঃ পরৈঃ সঙ্গরে
তদ্ব্যক্তং ননু দৈবমেব শরণং ধিগ্ধিগ্বৃথা পৌরুষম্ ॥ ৮৮ ॥
ভগ্নাশস্য করণ্ডপিণ্ডিততনোর্ম্লানেন্দ্রিয়স্য ক্ষুধা
কৃত্বাখুর্বিবরং স্বয়ং নিপতিতো নক্তং মুখে ভোগিনঃ ।
তৃপ্তস্তত্পিশিতেন সত্বরমসৌ তেনৈব য়াতঃ পথা
লোকাঃ পশ্যত দৈবমেব হি নৃণাং বৃদ্ধৌ ক্ষয়ে কারণম্ ॥ ৮৯ ॥
কর্মায়ত্তং ফলং পুংসাং বুদ্ধিঃ কর্মানুসারিণী ।
তথাপি সুধিয়া ভাব্যং সুবিচার্যৈব কুর্বতা ॥ ৯০ ॥
খল্বাটো দিবসেশ্বরস্য কিরণৈঃ সন্তাপিতো মস্তকে
বাঞ্ছন্দেশমনাতপং বিধিবশাত্তালস্য মূলং গতঃ ।
তত্রোচ্চৈর্মহতা ফলেন পততা ভগ্নং সশব্দং শিরঃ
প্রায়ো গচ্ছতি য়ত্র ভাগ্যরহিতস্তত্রাপদাং ভাজনম্ ॥ ৯১ ॥
রবিনিশাকরয়োর্গ্রহপীডনং গজভুজঙ্গময়োরপি বন্ধনম্ ।
মতিমতাং চ বিলোক্য দরিদ্রতাং বিধিরহো বলবানিতি মে মতিঃ ॥ ৯২ ॥
সৃজতি তাবদশেষগুণাকরং পুরুষরত্নমলঙ্করণং ভুবঃ ।
তদপি তত্ক্ষণভঙ্গি করোতি চেদহহ কষ্টমপণ্ডিততা বিধেঃ ॥ ৯৩ ॥
পত্রং নৈব য়দা করীরবিটপে দোষো বসন্তস্য কিং
নোলূকোঽপ্যবলোকতে য়দি দিবা সূর্যস্য কিং দূষণম্ ।
ধারা নৈব পতন্তি চাতকমুখে মেঘস্য কিং দূষণং
য়ত্পূর্বং বিধিনা ললাটলিখিতং তন্মার্জিতুং কঃ ক্ষমঃ ॥ ৯৪ ॥
নমস্যামো দেবান্ননু হতবিধেস্তেঽপি বশগা
বিধির্বন্দ্যঃ সোঽপি প্রতিনিয়তকর্মৈকফলদঃ ।
ফলং কর্মায়ত্তং য়দি কিমমরৈঃ কিঞ্চ বিধিনা
নমস্তত্কর্মভ্যো বিধিরপি ন য়েভ্যঃ প্রভবতি ॥ ৯৫ ॥
ব্রহ্মা য়েন কুলালবন্নিয়মিতো ব্রহ্মাণ্ডভাণ্ডোদরে
বিষ্ণুর্যেন দশাবতারগহনে ক্ষিপ্তো মহাসঙ্কটে ।
রুদ্রো য়েন কপালপাণিপুটকে ভিক্ষাটনং কারিতঃ
সূর্যো ভ্রাম্যতি নিত্যমেব গগনে তস্মৈ নমঃ কর্মণে ॥ ৯৬ ॥
নৈবাকৃতিঃ ফলতি নৈব কুলং ন শীলং
বিদ্যাপি নৈব ন চ য়ত্নকৃতাপি সেবা ।
ভাগ্যানি পূর্বতপসা খলু সঞ্চিতানি
কালে ফলন্তি পুরুষস্য য়থৈব বৃক্ষাঃ ॥ ৯৭ ॥
বনে রণে শত্রুজলাগ্নিমধ্যে
মহার্ণবে পর্বতমস্তকে বা ।
সুপ্তং প্রমত্তং বিষমস্থিতং বা
রক্ষন্তি পুণ্যানি পুরা কৃতানি ॥ ৯৮ ॥
য়া সাধূংশ্চ খলান্ করোতি বিদুষো মূর্খান্ হিতান্ দ্বেষিণঃ
প্রত্যক্ষং কুরুতে পরোক্ষমমৃতং হালাহলং তত্ক্ষণাত্ ।
তামারাধয় সত্ক্রিয়াং ভগবতীং ভোক্তুং ফলং বাঞ্ছিতং
হে সাধো ব্যসনৈর্গুণেষু বিপুলেষ্বাস্থাং বৃথা মা কৃথাঃ ॥ ৯৯ ॥
গুণবদগুণবদ্বা কুর্বতা কার্যজাতং
পরিণতিরবধার্যা য়ত্নতঃ পণ্ডিতেন ।
অতিরভসকৃতানাং কর্মণামাবিপত্তে-
র্ভবতি হৃদয়দাহী শল্যতুল্যো বিপাকঃ ॥ ১০০ ॥
স্থাল্যাং বৈদূর্যময়্যাং পচতি তিলকণাংশ্চান্দনৈরিন্ধনৌঘৈঃ
সৌবর্ণৈর্লাঙ্গলাগ্রৈর্বিলিখতি বসুধামর্কমূলস্য হেতোঃ ।
কৃত্বা কর্পূরখণ্ডান্ বৃতিমিহ কুরুতে কো দ্রবাণাং সমন্তাত্
প্রাপ্যেমাং কর্মভূমিং ন চরতি মনুজো য়স্তপো মন্দভাগ্যঃ ॥ ১০১ ॥
মজ্জত্বম্ভসি য়াতু মেরুশিখরং শত্রূন্ জয়ত্বাবহে
বাণিজ্যং কৃষিসেবনে চ সকলা বিদ্যাঃ কলাঃ শিক্ষতাম্ ।
আকাশং বিপুলং প্রয়াতু খগবত্কৃত্বা প্রয়ত্নং পরং
নাভাব্যং ভবতীহ কর্মবশতো ভাব্যস্য নাশঃ কুতঃ ॥ ১০২ ॥
ভীমং বনং ভবতি তস্য পুরং প্রধানং
সর্বো জনঃ স্বজনতামুপয়াতি তস্য ।
কৃত্স্না চ ভূর্ভবতি সন্নিধিরত্নপূর্ণা
য়স্যাস্তি পূর্বসুকৃতং বিপুলং নরস্য ॥ ১০৩ ॥
কো লাভো গুণিসঙ্গমঃ কিমসুখং প্রাজ্ঞেতরৈঃ সঙ্গতিঃ
কা হানিঃ সময়চ্যুতির্নিপুণতা কা ধর্মতত্ত্বে রতিঃ ।
কঃ শূরো বিজিতেন্দ্রিয়ঃ প্রিয়তমা কানুব্রতা কিং ধনং
বিদ্যা কিং সুখমপ্রবাসগমনং রাজ্যং কিমাজ্ঞাফলম্ ॥ ১০৪ ॥
অপ্রিয়বচনদরিদ্রৈঃ প্রিয়বচনাঢ্যৈঃ স্বদারপরিতুষ্টৈঃ ।
পরপরিবাদনিবৃত্তৈঃ ক্বচিত্ক্বচিন্মণ্ডিতা বসুধা ॥ ১০৫ ॥
কদর্থিতস্যাপি হি ধৈর্যবৃত্তের্ন শক্যতে ধৈর্যগুণঃ প্রমার্ষ্টুম্ ।
অধোমুখস্যাপি কৃতস্য বন্হের্নাধঃ শিখা য়াতি কদাচিদেব ॥ ১০৬ ॥
কান্তাকটাক্ষবিশিখা ন লুনন্তি য়স্য
চিত্তং ন নির্দহতি কোপকৃশানিতাপঃ ।
কর্ষন্তি ভূরিবিষয়াশ্চ ন লোভপাশৈ-
র্লোকত্রয়ং জয়তি কৃত্স্নমিদং স ধীরঃ ॥ ১০৭ ॥
একেনাপি হি শূরেণ পাদাক্রান্তং মহীতলম্ ।
ক্রিয়তে ভাস্করেণেব স্ফারস্ফুরিততেজসা ॥ ১০৮ ॥
বহ্নিস্তস্য জলায়তে জলনিধিঃ কুল্যায়তে তত্ক্ষণাত্
মেরুঃ স্বল্পশিলায়তে মৃগপতিঃ সদ্যঃ কুরঙ্গায়তে ।
ব্যালো মাল্যগুণায়তে বিষরসঃ পীয়ূষবর্ষায়তে
য়স্যাঙ্গেঽখিললোকবল্লভতমং শীলং সমুন্মীলতি ॥ ১০৯ ॥
লজ্জাগুণৌঘজননীং জননীমিব স্বাং
অত্যন্তশুদ্ধহৃদয়ামনুবর্তমানাম্ ।
তেজস্বিনঃ সুখমসূনপি সন্ত্যজন্তি
সত্যব্রতব্যসনিনো ন পুনঃ প্রতিজ্ঞাম্ ॥ ১১০ ॥