॥ Pashupatabrahma Upanishad Bengali Lyrics ॥
॥ পাশুপতব্রহ্মোপনিষৎ ॥
পাশুপতব্রহ্মবিদ্যাসংবেদ্যং পরমাক্ষরম্ ।
পরমানন্দসম্পূর্ণং রামচন্দ্রপদং ভজে ॥
ওঁ ভদ্রং কর্ণেভিঃ শৃণুয়াম দেবাঃ ॥ ভদ্রং পশ্যেমাক্ষভির্যজত্রাঃ ॥
স্থিরৈরঙ্গৈস্তুষ্টুবাꣳসস্তনূভিঃ ॥ ব্যশেম দেবহিতং যদায়ুঃ ॥
স্বস্তি ন ইন্দ্রো বৃদ্ধশ্রবাঃ ॥ স্বস্তি নঃ পূষা বিশ্ববেদাঃ ॥
স্বস্তি নস্তার্ক্ষ্যো অরিষ্টনেমিঃ ॥ স্বস্তি নো বৃহস্পতির্দধাতু ॥
ওঁ শান্তিঃ শান্তিঃ শান্তিঃ ॥
হরিঃ ওঁ ॥ অথ হ বৈ স্বয়ংভূর্ব্রহ্মা প্রজাঃ সৃজানীতি কামকামো জায়তে
কামেশ্বরো বৈশ্রবণঃ । বৈশ্রবণো ব্রহ্মপুত্রো বালখিল্যঃ স্বয়ংভুবং
পরিপৃচ্ছতি জগতাং কা বিদ্যা কা দেবতা জাগ্রত্তুরীয়যোরস্য কো দেবো যানি
তস্য বশানি কালাঃ কিয়ৎপ্রমাণাঃ কস্যাজ্ঞয়া রবিচন্দ্রগ্রহাদয়ো ভাসন্তে
কস্য মহিমা গগনস্বরূপ এতদহং শ্রোতুমিচ্ছামি নান্যো জানাতি
ৎবং ব্রূহি ব্রহ্মন্ । স্বয়ংভূরুবাচ কৃৎস্নজগতাং মাতৃকা বিদ্যা
দ্বিত্রিবর্ণসহিতা দ্বিবর্ণমাতা ত্রিবর্ণসহিতা । চতুর্মাত্রাত্মকোঙ্কারো মম
প্রাণাত্মিকা দেবতা । অহমেব জগত্ত্রয়স্যৈকঃ পতিঃ । মম বশানি সর্বাণি
যুগান্যপি । অহোরাত্রাদয়ো মৎসংবর্ধিতাঃ কালাঃ । মম রূপা
রবেস্তেজশ্চন্দ্রনক্ষত্রগ্রহতেজাংসি চ । গগনো মম ত্রিশক্তিমায়াস্বরূপঃ
নান্যো মদস্তি । তমোমায়াত্মকো রুদ্রঃ সাৎবিকমায়াত্মকো বিষ্ণূ
রাজসমায়াত্মকো ব্রহ্মা ।
ইন্দ্রাদয়স্তামসরাজসাত্মিকা ন সাৎবিকঃ কোঽপি অঘোরঃ
সর্বসাধারণস্বরূপঃ । সমস্তয়াগানাং রুদ্রঃ পশুপতিঃ কর্তা ।
রুদ্রো যাগদেবো বিষ্ণুরধ্বর্যুর্হোতেন্দ্রো দেবতা যজ্ঞভুগ্
মানসং ব্রহ্ম মাহেশ্বরং ব্রহ্ম মানসং হংসঃ
সোঽহং হংস ইতি । তন্ময়যজ্ঞো নাদানুসংধানম্ ।
তন্ময়বিকারো জীবঃ । পরমাত্মস্বরূপো হংসঃ । অন্তর্বহিশ্চরতি
হংসঃ । অন্তর্গতোঽনকাশান্তর্গতসুপর্ণস্বরূপো হংসঃ ।
ষণ্ণবতিতত্ত্বতন্তুবদ্ব্যক্তং চিৎসূত্রত্রয়চিন্ময়লক্ষণং
নবতত্ত্বত্রিরাবৃতং ব্রহ্মবিষ্ণুমহেশ্বরাত্মকমগ্নিত্রয়কলোপেতং
চিদ্গ্রন্থিবন্ধনম্ । অদ্বৈতগ্রন্থিঃ যজ্ঞসাধারণাঙ্গং
বহিরন্তর্জ্বলনং যজ্ঞাঙ্গলক্ষণব্রহ্মস্বরূপো হংসঃ ।
উপবীতলক্ষণসূত্রব্রহ্মগা যজ্ঞাঃ । ব্রহ্মাঙ্গলক্ষণয়ুক্তো
যজ্ঞসূত্রম্ । তদ্ব্রহ্মসূত্রম্ । যজ্ঞসূত্রসংবংধী ব্রহ্ময়জ্ঞঃ ।
তৎস্বরূপোঽঙ্গানি মাত্রাণি মনো যজ্ঞস্য হংসো যজ্ঞসূত্রম্ ।
প্রণবং ব্রহ্মসূত্রং ব্রহ্ময়জ্ঞময়ম্ । প্রণবান্তর্বর্তী হংসো
ব্রহ্মসূত্রম্ । তদেব ব্রহ্ময়জ্ঞময়ং মোক্ষক্রমম্ ।
ব্রহ্মসন্ধ্যাক্রিয়া মনোয়াগঃ । সন্ধ্যাক্রিয়া মনোয়াগস্য লক্ষণম্ ।
যজ্ঞসূত্রপ্রণবব্রহ্ময়জ্ঞক্রিয়ায়ুক্তো ব্রাহ্মণঃ । ব্রহ্মচর্যেণ
হরন্তি দেবাঃ । হংসসূত্রচর্যা যজ্ঞাঃ । হংসপ্রণবয়োরভেদঃ ।
হংসস্য প্রার্থনাস্ত্রিকালাঃ । ত্রিকালস্ত্রিবর্ণাঃ । ত্রেতাগ্ন্যনুসন্ধানো যাগঃ ।
ত্রেতাগ্ন্যাত্মাকৃতিবর্ণোঙ্কারহংসানুসন্ধানোঽন্তর্যাগঃ ।
চিৎস্বরূপবত্তন্ময়ং তুরীয়স্বরূপম্ । অন্তরাদিত্যে জ্যোতিঃস্বরূপো হংসঃ ।
যজ্ঞাঙ্গং ব্রহ্মসম্পত্তিঃ । ব্রহ্মপ্রবৃত্তৌ তৎপ্রণবহংসসূত্রেণৈব
ধ্যানমাচরন্তি । প্রোবাচ পুনঃ স্বয়ংভুবং প্রতিজানীতে ব্রহ্মপুত্রো
ঋষির্বালখিল্যঃ । হংসসূত্রাণি কতিসংখ্যানি কিয়দ্বা প্রমাণম্ ।
হৃদ্যাদিত্যমরীচীনাং পদং ষণ্ণবতিঃ । চিৎসূত্রঘ্রাণয়োঃ স্বর্নির্গতা
প্রণবধারা ষডঙ্গুলদশাশীতিঃ । বামবাহুর্দক্ষিণকঠ্যোরন্তশ্চরতি
হংসঃ পরমাত্মা ব্রহ্মগুহ্যপ্রকারো নান্যত্র বিদিতঃ । জানন্তি তেঽমৃতফলকাঃ ।
সর্বকালং হংসং প্রকাশকম্ । প্রণবহংসান্তর্ধ্যানপ্রকৃতিং বিনা ন মুক্তিঃ ।
নবসূত্রান্পরিচর্চিতান্ । তেঽপি যদ্ব্রহ্ম চরন্তি । অন্তরাদিত্যে ন জ্ঞাতং
মনুষ্যাণাম্ । জগদাদিত্যো রোচত ইতি জ্ঞাৎবা তে মর্ত্যা বিবুধাস্তপন
প্রার্থনায়ুক্তা আচরন্তি ।
বাজপেয়ঃ পশুহর্তা অধ্বর্যুরিন্দ্রো দেবতা অহিংসা
ধর্ময়াগঃ পরমহংসোঽধ্বর্যুঃ পরমাত্মা দেবতা
পশুপতিঃ ব্রহ্মোপনিষদো ব্রহ্ম । স্বাধ্যায়যুক্তা
ব্রাহ্মণাশ্চরন্তি । অশ্বমেধো মহায়জ্ঞকথা ।
তদ্রাজ্ঞা ব্রহ্মচর্যমাচরন্তি । সর্বেষাং
পূর্বোক্তব্রহ্ময়জ্ঞক্রমং মুক্তিক্রমমিতি ব্রহ্মপুত্রঃ
প্রোবাচ । উদিতো হংস ঋষিঃ । স্বয়ংভূস্তিরোদধে । রুদ্রো
ব্রহ্মোপনিষদো হংসজ্যোতিঃ পশুপতিঃ প্রণবস্তারকঃ স এবং বেদ ।
হংসাত্মমালিকাবর্ণব্রহ্মকালপ্রচোদিতা ।
পরমাত্মা পুমানিতি ব্রহ্মসম্পত্তিকারিণী ॥ ১ ॥
অধ্যাত্মব্রহ্মকল্পস্যাকৃতিঃ কীদৃশী কথা ।
ব্রহ্মজ্ঞানপ্রভাসন্ধ্যাকালো গচ্ছতি ধীমতাম্ ।
হংসাখ্যো দেবমাত্মাখ্যমাত্মতত্ত্বপ্রজা কথম্ ॥ ২ ॥
অন্তঃপ্রণবনাদাখ্যো হংসঃ প্রত্যযবোধকঃ ।
অন্তর্গতপ্রমাগূঢং জ্ঞাননালং বিরাজিতম্ ॥ ৩ ॥
শিবশক্ত্যাত্মকং রূপং চিন্ময়ানন্দবেদিতম্ ।
নাদবিন্দুকলা ত্রীণি নেত্রং বিশ্ববিচেষ্টিতম্ ॥ ৪ ॥
ত্রিয়ঙ্গানি শিখা ত্রীণি দ্বিত্রাণাং সংখ্যমাকৃতিঃ ।
অন্তর্গূঢপ্রমা হংসঃ প্রমাণান্নির্গতং বহিঃ ॥ ৫ ॥
ব্রহ্মসূত্রপদং জ্ঞেয়ং ব্রাহ্মং বিধ্যুক্তলক্ষণম্ ।
হংসার্কপ্রণবধ্যানমিত্যুক্তো জ্ঞানসাগরে ॥ ৬ ॥
এতদ্বিজ্ঞানমত্রেণ জ্ঞানসাগরপারগঃ ।
স্বতঃ শিবঃ পশুপতিঃ সাক্ষী সর্বস্য সর্বদা ॥ ৭ ॥
সর্বেষাং তু মনস্তেন প্রেরিতং নিয়মেন তু ।
বিষয়ে গচ্ছতি প্রাণশ্চেষ্টতে বাগ্বদত্যপি ॥ ৮ ॥
চক্ষুঃ পশ্যতি রূপাণি শ্রোত্রং সর্বং শৃণোত্যপি ।
অন্যানি কানি সর্বাণি তেনৈব প্রেরিতানি তু ॥ ৯ ॥
স্বং স্বং বিষয়মুদ্দিশ্য প্রবর্তন্তে নিরন্তরম্ ।
প্রবর্তকৎবং চাপ্যস্য মায়যা ন স্বভাবতঃ ॥ ১০ ॥
শ্রোত্রমাত্মনি চাধ্যস্তং স্বয়ং পশুপতিঃ পুমান্ ।
অনুপ্রবিশ্য শ্রোত্রস্য দদাতি শ্রোত্রতাং শিবঃ ॥ ১১ ॥
মনঃ স্বাত্মনি চাধ্যস্তং প্রবিশ্য পরমেশ্বরঃ ।
মনস্ত্বং তস্য সত্ত্বস্থো দদাতি নিয়মেন তু ॥ ১২ ॥
স এব বিদিতাদন্যস্তথৈবাবিদিতাদপি ।
অন্যেষামিন্দ্রিয়াণাং তু কল্পিতানামপীশ্বরঃ ॥ ১৩ ॥
তত্তদ্রূপমনু প্রাপ্য দদাতি নিয়মেন তু ।
ততশ্চক্ষুশ্চ বাক্চৈব মনশ্চান্যানি খানি চ ॥ ১৪ ॥
ন গচ্ছন্তি স্বয়ংজ্যোতিঃস্বভাবে পরমাত্মনি ।
অকর্তৃবিষয়প্রত্যক্প্রকাশং স্বাত্মনৈব তু ॥ ১৫ ॥
বিনা তর্কপ্রমাণাভ্যাং ব্রহ্ম যো বেদ বেদ সঃ ।
প্রত্যগাত্মা পরংজ্যোতির্মায়া সা তু মহত্তমঃ ॥ ১৬ ॥
তথা সতি কথং মায়াসংভবঃ প্রত্যগাত্মনি ।
তস্মাত্তর্কপ্রমাণাভ্যাং স্বানুভূত্যা চ চিদ্ঘনে ॥ ১৭ ॥
স্বপ্রকাশৈকসংসিদ্ধে নাস্তি মায়া পরাত্মনি ।
ব্যাবহারিকদৃষ্ট্যেয়ং বিদ্যাবিদ্যা ন চান্যথা ॥ ১৮ ॥
তত্ত্বদৃষ্ট্যা তু নাস্ত্যেব তত্ত্বমেবাস্তি কেবলম্ ।
ব্যাবহারিক দৃষ্টিস্তু প্রকাশাব্যভিচারিতঃ ॥ ১৯ ॥
প্রকাশ এব সততং তস্মাদদ্বৈত এব হি ।
অদ্বৈতমিতি চোক্তিশ্চ প্রকাশাব্যভিচারতঃ ॥ ২০ ॥
প্রকাশ এব সততং তস্মান্মৌনং হি যুজ্যতে ।
অয়মর্থো মহান্যস্য স্বয়মেব প্রকাশিতঃ ॥ ২১ ॥
ন স জীবো ন চ ব্রহ্মা ন চান্যদপি কিংচন ।
ন তস্য বর্ণা বিদ্যন্তে নাশ্রমাশ্চ তথৈব চ ॥ ২২ ॥
ন তস্য ধর্মোঽধর্মশ্চ ন নিষেধো বিধির্ন চ ।
যদা ব্রহ্মাত্মকং সর্বং বিভাতি তত এব তু ॥ ২৩ ॥
তদা দুঃখাদিভেদোঽয়মাভাসোঽপি ন ভাসতে ।
জগজ্জীবাদিরূপেণ পশ্যন্নপি পরাত্মবিৎ ॥ ২৪ ॥
ন তৎপশ্যতি চিদ্রূপং ব্রহ্মবস্ত্বেব পশ্যতি ।
ধর্মধর্মিৎববার্তা চ ভেদে সতি হি ভিদ্যতে ॥ ২৫ ॥
ভেদাভেদস্তথা ভেদাভেদঃ সাক্ষাৎপরাত্মনঃ ।
নাস্তি স্বাত্মাতিরেকেণ স্বয়মেবাস্তি সর্বদা ॥ ২৬ ॥
ব্রহ্মৈব বিদ্যতে সাক্ষাদ্বস্তুতোঽবস্তুতোঽপি চ ।
তথৈব ব্রহ্মবিজ্জ্ঞানী কিং গৃহ্ণাতি জহাতি কিম্ ॥ ২৭ ॥
অধিষ্ঠানমনৌপম্যমবাঙ্মনসগোচরম্ ।
যত্তদদ্রেশ্যমগ্রাহ্যমগোত্রং রূপবর্জিতম্ ॥ ২৮ ॥
অচক্ষুঃশ্রোত্রমত্যর্থং তদপাণিপদং তথা ।
নিত্যং বিভুং সর্বগতং সুসূখ্মং চ তদব্যযম্ ॥ ২৯ ॥
ব্রহ্মৈবেদমমৃতং তৎপুরস্তাদ্-
ব্রহ্মানন্দং পরমং চৈব পশ্চাৎ ।
ব্রহ্মানন্দং পরমং দক্ষিণে চ
ব্রহ্মানন্দং পরমং চোত্তরে চ ॥ ৩০ ॥
স্বাত্মন্যেব স্বয়ং সর্বং সদা পশ্যতি নির্ভয়ঃ ।
তদা মুক্তো ন মুক্তশ্চ বদ্ধস্যৈব বিমুক্ততা ॥ ৩১ ॥
এবংরূপা পরা বিদ্যা সত্যেন তপসাপি চ ।
ব্রহ্মচর্যাদিভির্ধর্মৈর্লভ্যা বেদান্তবর্ত্মনা ॥ ৩২ ॥
স্বশরীরে স্বয়ংজ্যোতিঃস্বরূপং পারমার্থিকম্ ।
ক্ষীণদোষঃ প্রপশ্যন্তি নেতরে মায়যাবৃতাঃ ॥ ৩৩ ॥
এবং স্বরূপবিজ্ঞানং যস্য কস্যাস্তি যোগিনঃ ।
কুত্রচিদ্গমনং নাস্তি তস্য সম্পূর্ণরূপিণঃ ॥ ৩৪ ॥
আকাশমেকং সম্পূর্ণং কুত্রচিন্ন হি গচ্ছতি ।
তদ্বদ্ব্রহ্মাত্মবিচ্ছ্রেষ্ঠঃ কুত্রচিন্নৈব গচ্ছতি ॥ ৩৫ ॥
অভক্ষ্যস্য নিবৃত্ত্যা তু বিশুদ্ধং হৃদয়ং ভবেৎ ।
আহারশুদ্ধৌ চিত্তস্য বিশুদ্ধির্ভবতি স্বতঃ ॥ ৩৬ ॥
চিত্তশুদ্ধৌ ক্রমাজ্জ্ঞানং ত্রুট্যন্তি গ্রন্থয়ঃ স্ফুটম্ ।
অভক্ষ্যং ব্রহ্মবিজ্ঞানবিহীনস্যৈব দেহিনঃ ॥ ৩৭ ॥
ন সম্যগ্জ্ঞানিনস্তদ্বৎস্বরূপং সকলং খলু ।
অহমন্নং সদান্নাদ ইতি হি ব্রহ্মবেদনম্ ॥ ৩৮ ॥
ব্রহ্মবিদ্গ্রসতি জ্ঞানাৎসর্বং ব্রহ্মাত্মনৈব তু ।
ব্রহ্মক্ষত্রাদিকং সর্বং যস্য স্যাদোদনং সদা ॥ ৩৯ ॥
যস্যোপসেচনং মৃত্যুস্তং জ্ঞানী তাদৃশঃ খলু ।
ব্রহ্মস্বরূপবিজ্ঞানাজ্জগদ্ভোজ্যং ভবেৎখলু ॥ ৪০ ॥
জগদাত্মতয়া ভাতি যদা ভোজ্যং ভবেত্তদা ।
ব্রহ্মস্বাত্মতয়া নিত্যং ভক্ষিতং সকলং তদা ॥ ৪১ ॥
যদাভাসেন রূপেণ জগদ্ভোজ্যং ভবেত তৎ ।
মানতঃ স্বাত্মনা ভাতং ভক্ষিতং ভবতি ধ্রুবম্ ॥ ৪২ ॥
স্বস্বরূপং স্বয়ং ভুঙ্ক্তে নাস্তি ভোজ্যং পৃথক্ স্বতঃ ।
অস্তি চেদস্তিতারূপং ব্রহ্মৈবাস্তিৎবলক্ষণম্ ॥ ৪৩ ॥
অস্তিতালক্ষণা সত্তা সত্তা ব্রহ্ম ন চাপরা ।
নাস্তি সত্তাতিরেকেণ নাস্তি মায়া চ বস্তুতঃ ॥ ৪৪ ॥
যোগিনামাত্মনিষ্ঠানাং মায়া স্বাত্মনি কল্পিতা ।
সাক্ষিরূপতয়া ভাতি ব্রহ্মজ্ঞানেন বাধিতা ॥ ৪৫ ॥
ব্রহ্মবিজ্ঞানসম্পন্নঃ প্রতীতমখিলং জগৎ ।
পশ্যন্নপি সদা নৈব পশ্যতি স্বাত্মনঃ পৃথক্ ॥ ৪৬ ॥ ইত্যুপনিষৎ ॥
ওঁ ভদ্রং কর্ণেভিঃ শৃণুয়াম দেবাঃ ॥ ভদ্রং পশ্যেমাক্ষভির্যজত্রাঃ ॥
স্থিরৈরঙ্গৈস্তুষ্টুবাꣳসস্তনূভিঃ ॥ ব্যশেম দেবহিতং যদায়ুঃ ॥
স্বস্তি ন ইন্দ্রো বৃদ্ধশ্রবাঃ ॥ স্বস্তি নঃ পূষা বিশ্ববেদাঃ ॥
স্বস্তি নস্তার্ক্ষ্যো অরিষ্টনেমিঃ ॥ স্বস্তি নো বৃহস্পতির্দধাতু ॥
ওঁ শান্তিঃ শান্তিঃ শান্তিঃ ॥ হরিঃ ওঁ তৎসৎ ॥
ইতি পাশুপতব্রহ্মোপনিষৎসমাপ্তা ॥
– Chant Stotra in Other Languages –
Pashupata Brahma Upanishad in Sanskrit – English – Bengali – Gujarati – Kannada – Malayalam – Odia – Telugu – Tamil