ଭୁଵନ-କେଲିକଲା-ରସିକେ ଶିଵେ
ଝଟିତି ଝଞ୍ଝଣ-ଝଙ୍କୃତ-ନୂପୂରେ ।
ଧ୍ଵନିମୟଂ ଭଵ-ବୀଜମନଶ୍ଵରଂ
ଜଗଦିଦଂ ତଵ ଶବ୍ଦମୟଂ ଵପୁଃ ॥ ୧॥
ଵିଵିଧ-ଚିତ୍ର-ଵିଚିତ୍ରମଦ୍ଭୁତଂ
ସଦସଦାତ୍ମକମସ୍ତି ଚିଦାତ୍ମକମ୍ ।
ଭଵତି ବୋଧମୟଂ ଭଜତାଂ ହୃଦି
ଶିଵ ଶିଵେତି ଶିଵେତି ଵଚୋଽନିଶମ୍ ॥ ୨॥
ଜନନି ମଞ୍ଜୁଲ-ମଙ୍ଗଲ-ମନ୍ଦିରଂ
ଜଗଦିଦଂ ଜଗଦମ୍ବ ତଵେପ୍ସିତମ୍ ।
ଶିଵ-ଶିଵାତ୍ମକ-ତତ୍ତ୍ଵମିଦଂ ପରଂ
ହ୍ୟହମହୋ ନୁ ନତୋଽସ୍ମି ନତୋଽସ୍ମ୍ୟହମ୍ ॥ ୩॥
ସ୍ତୁତିମହୋ କିଲ କିଂ ତଵ କୁର୍ମହେ
ସୁରଗୁରୋରପି ଵାକ୍ପଟୁତା କୁତଃ ।
ଇତି ଵିଚାର୍ୟ ପରେ ପରମେଶ୍ଵରି
ହ୍ୟହମହୋ ନୁ ନତୋଽସ୍ମି ନତୋଽସ୍ମ୍ୟହମ୍ ॥ ୪॥
ଚିତି ଚମତ୍କୃତିଚିନ୍ତନମସ୍ତୁ ମେ
ନିଜପରଂ ଭଵଭେଦ-ନିକୃନ୍ତନମ୍ ।
ପ୍ରତିପଲଂ ଶିଵଶକ୍ତିମୟଂ ଶିଵେ
ହ୍ୟହମହୋ ନୁ ନତୋଽସ୍ମି ନତୋଽସ୍ମ୍ୟହମ୍ ॥ ୫॥
ଇତି ଶ୍ରୀଦତ୍ତାତ୍ରେୟାନନ୍ଦନାଥଵିରଚିତଂ ପ୍ରଣତିପଞ୍ଚକଂ ସମ୍ପୂର୍ଣମ୍ ।