॥ Sage Valmiki Gangashtakam Telugu Lyrics ॥
॥ గఙ్గాష్టకం శ్రీవాల్మికివిరచితమ్ ॥
మాతః శైలసుతా-సపత్ని వసుధా-శృఙ్గారహారావలి
స్వర్గారోహణ-వైజయన్తి భవతీం భాగీరథీం ప్రార్థయే ।
త్వత్తీరే వసతః త్వదంబు పిబతస్త్వద్వీచిషు ప్రేఙ్ఖతః
త్వన్నామ స్మరతస్త్వదర్పితదృశః స్యాన్మే శరీరవ్యయః ॥ ౧ ॥
త్వత్తీరే తరుకోటరాన్తరగతో గఙ్గే విహఙ్గో పరం
త్వన్నీరే నరకాన్తకారిణి వరం మత్స్యోఽథవా కచ్ఛపః ।
నైవాన్యత్ర మదాన్ధసిన్ధురఘటాసంఘట్టఘణ్టారణ-
త్కారస్తత్ర సమస్తవైరివనితా-లబ్ధస్తుతిర్భూపతిః ॥ ౨ ॥
ఉక్షా పక్షీ తురగ ఉరగః కోఽపి వా వారణో వాఽ-
వారీణః స్యాం జనన-మరణ-క్లేశదుఃఖాసహిష్ణుః ।
న త్వన్యత్ర ప్రవిరల-రణత్కిఙ్కిణీ-క్వాణమిత్రం
వారస్త్రీభిశ్చమరమరుతా వీజితో భూమిపాలః ॥ ౩ ॥
కాకైర్నిష్కుషితం శ్వభిః కవలితం గోమాయుభిర్లుణ్టితం
స్రోతోభిశ్చలితం తటామ్బు-లులితం వీచీభిరాన్దోలితమ్ ।
దివ్యస్త్రీ-కర-చారుచామర-మరుత్సంవీజ్యమానః కదా
ద్రక్ష్యేఽహం పరమేశ్వరి త్రిపథగే భాగీరథీ స్వం వపుః ॥ ౪ ॥
అభినవ-బిసవల్లీ-పాదపద్మస్య విష్ణోః
మదన-మథన-మౌలేర్మాలతీ-పుష్పమాలా ।
జయతి జయపతాకా కాప్యసౌ మోక్షలక్ష్మ్యాః
క్షపిత-కలికలఙ్కా జాహ్నవీ నః పునాతు ॥ ౫ ॥
ఏతత్తాల-తమాల-సాల-సరలవ్యాలోల-వల్లీలతా-
చ్ఛత్రం సూర్యకర-ప్రతాపరహితం శఙ్ఖేన్దు-కున్దోజ్జ్వలమ్ ।
గన్ధర్వామర-సిద్ధ-కిన్నరవధూ-తుఙ్గస్తనాస్పాలితం
స్నానాయ ప్రతివాసరం భవతు మే గాఙ్గం జలం నిర్మలమ్ ॥ ౬ ॥
గాఙ్గం వారి మనోహారి మురారి-చరణచ్యుతమ్ ।
త్రిపురారి-శిరశ్చారి పాపహారి పునాతు మామ్ ॥ ౭ ॥
పాపాపహారి దురితారి తరఙ్గధారి
శైలప్రచారి గిరిరాజ-గుహావిదారి ।
ఝఙ్కారకారి హరిపాద-రజోపహారి
గాఙ్గం పునాతు సతతం శుభకారి వారి ॥ ౮ ॥
గఙ్గాష్టకం పఠతి యః ప్రయతః ప్రభాతే
వాల్మీకినా విరచితం శుభదం మనుష్యః ।
ప్రక్షాల్య గాత్ర-కలికల్మష-పఙ్క-మాశు
మోక్షం లభేత్ పతతి నైవ నరో భవాబ్ధౌ ॥ ౯ ॥
॥ ఇతి వాల్మీకివిరచితం గఙ్గాష్టకం సమ్పూర్ణమ్ ॥
– Chant Stotra in Other Languages –
Sage Valmiki Gangashtakam » Sanskrit » English » Bengali » Gujarati » Kannada » Malayalam » Odia » Tamil