॥ Sanvichchatakam Odia Lyrics ॥
॥ ସଂଵିଚ୍ଛତକମ୍ ॥
॥ ଅଥ ତ୍ୟାଗରାଜଵିରଚିତମ୍ ସଂଵିଚ୍ଛତକମ୍ ॥
ୟସ୍ୟା ନିତ୍ୟଂ ଚରଣକମଲଦ୍ଵନ୍ଦ୍ଵମୈଶ୍ଚର୍ୟବୀଜଂ
ପ୍ରଧ୍ୟାୟନ୍ତୋ ହୃଦୟକମଲେ ପୁଣ୍ୟଭାଜୋ ମୁନୀନ୍ଦ୍ରାଃ ।
ନିର୍ଦ୍ଵନ୍ଦ୍ଵଂ ତତ୍ ସମରସମହୋ ପ୍ରାପ୍ୟ ତିଷ୍ଠନ୍ତି ତସ୍ମିନ୍
ତସ୍ୟୈ ଦେଵ୍ୟୈ ତପନରୁଚୟେ ତତ୍ତ୍ଵତୋଽସ୍ତୁ ପ୍ରଣାମଃ ॥ ୧ ॥
ୟା କଲ୍ୟାଣଗୁଣପ୍ରସୂଃ ପରଶିଵାନନ୍ଦାମୃତସ୍ୟନ୍ଦିନୀ
ଭୂମାନନ୍ଦମୟୀ ପରାପରମୟୀ ତେଜୋମୟୀ ଵାଙ୍ଗ୍ମୟୀ ।
ଆଦ୍ୟାନ୍ତାର୍ଣତନୂଃ ଶିଵାଦିଵସୁଧାନ୍ତାନ୍ତଃପ୍ରକାଶାତ୍ମିକା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨ ॥
ୟସ୍ୟାଂ ପ୍ରୋତମିଦଂ ଚତୁର୍ଦଶଜଗତ୍ ସୂତ୍ରେ ମଣିସ୍ତୋମଵଦ୍
ୟସ୍ୟାଂ ଭାତି ଜଡଂ ଜଡେତରମିଦଂ ସ୍ତମ୍ଭାଦିଵଦ୍ ଦାରୁଣି ।
ୟସ୍ୟାଂ ପଶ୍ୟତି ଵିଶ୍ଵମଜ୍ଞହୃଦୟାଃ ସ୍ଥାଣୌ ପୁମାଂସଂ ୟଥା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩ ॥
ମୂଲୌଡ୍ୟାଣଗଲୋପରୋଧନମହାମୁଦ୍ରାପ୍ରସନ୍ନା ପରା
ତେଜଃପୁଞ୍ଜମୟୀ ସଦା ଗତିୟୁତା ହଂସୀ ସହସ୍ରାରକମ୍ ।
ଅମ୍ଭୋଜଂ ପରହଂସକେଲିସଦନଂ ୟା ପ୍ରାପ୍ୟ ଲେଭେ ମୁଦଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪ ॥
ପ୍ରାଣାପାନରଵୀନ୍ଦୁୟୋଗପରମାନନ୍ଦପ୍ରବୁଦ୍ଧା ସତୀ
ସଂସୁପ୍ତା ଶ୍ରୁତିପତ୍ରପଦ୍ମଶୟନେ ସୌଷୁମ୍ନଵୀଥ୍ୟାଦ୍ୟୁତମ୍ ।
ଵର୍ଷତ୍ୟସଭାନଟଂ ସମରସାନନ୍ଦାମୃତଂ ପ୍ରାପ୍ୟ ୟା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫ ॥
ୟା ମିତ୍ରାଵରୁଣାଲୟାତ୍ ସମୁଦିତା ତେଜୋମୟୀ ଵଲ୍ଲରୀ
ଵୀଣାଦଣ୍ଡତରୁଶ୍ରିତା ଶିଵଵିୟଦ୍ୟାନ୍ତୀ ସ୍ଵଭାଵାତ୍ ସଦା ।
ନାନାଵର୍ଣପଦାଦିପୁଷ୍ପନିଚୟାନ୍ ସ୍ଵସ୍ମିନ୍ କିରନ୍ତୀଚ୍ଛୟା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬ ॥
ୟା ଚୈକୋତ୍ତରଖାଦିପଞ୍ଚକଗୁଣାକାରାର୍ଣମନ୍ତ୍ରାତ୍ମିକା
ୟା ପୀତାରୁଣଶୁଭ୍ରଵିଗ୍ରହମୟୀ ସଂଧ୍ୟାତ୍ରୟେ ରାଜତେ ।
ୟାପ୍ୟେକାକ୍ଷରନାଦସଂତତିସୁଖୋଦ୍ବୋଧୈକମୂର୍ତିଃ ପରା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭ ॥
ୟାଵ୍ୟକ୍ତା ନଵଵାରନାଥକରୁଣାପାଙ୍ଗା ପ୍ରକାଶାତ୍ମିକା
ନୀଲେନ୍ଦୀଵରପଦ୍ମହର୍ଷକରଦୃକ୍ତତ୍ତ୍ଵାର୍ଣମୁକ୍ତାଵଲିଃ ।
କାମେଶ୍ୟାଦିସୁଧାଂଶୁଷୋଡଶକଲାପୂର୍ଣାତ୍ମଵକ୍ତ୍ରାମ୍ବୁଜା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮ ॥
ୟା ସୀମା ନଵଖଣ୍ଡଚକ୍ରଵସୁଧାଲଂକାରମେରୋଃ ପରା
ନାନାଦେଶିକୟୋଗିନୀମଣିଲସଚ୍ଛୁଭ୍ରାଦିଵର୍ଣାଵନେଃ ।
କାମେଶାଙ୍କନିରଭ୍ରନିର୍ମଲମହାକାଶସ୍ଥଵିଦ୍ୟୁଲ୍ଲତା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯ ॥
ୟସ୍ୟାଃ ପ୍ରୀତିରହର୍ନିଶଂ କୁଲଗିରିସ୍ରୋତଃସୁଧାୟାଂ ପରା
ନିଷ୍କାମପ୍ରଣତାନ୍ତରଙ୍ଗକୁସୁମେ ହ୍ରୀଂକାରଘଣ୍ଟାଧ୍ଵନୌ ।
ଗନ୍ଧେଽହଂ ଶିଵ ଏଵ ନାନ୍ୟ ଇତି ୟୋ ଦୀପେ ଵିମର୍ଶାତ୍ମକେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୧୦ ॥
ୟା ଚିତ୍ରଂ ତ୍ରିପୁରା ପୁରାନ୍ତକସମାଶ୍ଲିଷ୍ଟା ପରା ଜ୍ୟୋତିଷାମ୍
ଅଦ୍ଵୈତାପି ଶିଵାର୍ଧର୍ମୂର୍ତିରମଲା ପାଶାପହା ପାଶିନୀ ।
ପଦ୍ମାରାଧ୍ୟପଦାରଵିନ୍ଦୟୁଗଲା ଭିକ୍ଷାଟନେଶପ୍ରିୟା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୧୧ ॥
ୟା ଦୂରା ଲଲିତାପି ଦୁଷ୍କୃତଜୁଷାଂ ୟା କୋମଲାଙ୍ଗ୍ୟଦ୍ରିଜା
ୟା ନୀଲାମ୍ବୁଦମେଚକାପି ଭୁଵନଂ ଵିଦ୍ୟୋତୟତ୍ୟଦ୍ଭୁତମ୍ ।
ୟା କଲ୍ୟାଣଗୁଣପ୍ରଵାହସୁମହାଵାରାଂନିଧିର୍ନିର୍ଗୁଣା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୧୨ ॥
ନିଷ୍କ୍ରୋଧା ନତଲୋକମୃତ୍ୟୁମଥନେ ୟା ବଦ୍ଧକଚ୍ଛା ସଦା
ନିର୍ଵୈରା ନିଜପୂଜନାଦିକୃତିନାଂ ଦୈନ୍ୟେ ଦ୍ଵିଷନ୍ତ୍ୟଦ୍ଭୁତମ୍ ।
ଭକ୍ତାନାଂ ଭୟମୋଚିନୀ ଭଵରତା ଶ୍ରୀକାମରାଜାତ୍ମିକା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୧୩ ॥
ଵିଦ୍ୟାରଣ୍ୟପୁଲିନ୍ଦିକା ଶ୍ରୁତିଗିରା ତତ୍ତ୍ଵୋପଦେଷ୍ଟ୍ରୀ ସତାଂ
ଵାରାହୀ ନକୁଲୀ ଵିଲାସକୁତୁକା ୟାପ୍ୟୁତ୍ତମବ୍ରାହ୍ମଣୀ ।
ୟା ଚିତ୍ରଂ ସୁଖଶାନ୍ତ୍ୟତୀତଵସୁଧା ଶ୍ରୀଚଣ୍ଡିକା ଶୂଲିନୀ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୧୪ ॥
ୟା ଶାଲା ନିଗମାଗମସ୍ମୃତିକଲାଲୀଲାତତେସ୍ତ୍ର୍ୟକ୍ଷରୀ
ୟା ଫାଲାକ୍ଷମହାସତୀ ସ୍ମରକଲାହେଲା ପରାପ୍ୟଦ୍ଭୁତମ୍ ।
ୟା କାଲାନଲକାନ୍ତିମତ୍ୟପି ସଦା ନୀଲାଲକା ଶୀତଲା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୧୫ ॥
କଲ୍ୟାଣାଚଲକାର୍ମୁକସ୍ୟ ମହିଷୀ ପୁଣ୍ଡ୍ରେକ୍ଷୁଚାପାଦ୍ଭୁତଂ
ଲକ୍ଷ୍ମୀଵଲ୍ଲଭସାୟକସ୍ୟ ରମଣୀ ପୁଷ୍ପେଷୁହସ୍ତାମ୍ବୁଜା ।
ୟା ରାମା ପରମେଶ୍ଵରସ୍ୟ ଲଲିତା ଲୋକତ୍ରୟେଽତ୍ୟଦ୍ଭୁତଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୧୬ ॥
ୟା ଵାଚାମଧିଦେଵତାପ୍ୟଵିଷୟା ଵାଚାଂ ଶ୍ରୁତେର୍ଵର୍ଣିତୁଂ
ଶ୍ରୋତ୍ରାଦୀନ୍ଦ୍ରିୟଦେଵତାପି ନ ଜଡୈଃ ଶ୍ରୋତ୍ରାଦିଭିର୍ଜ୍ଞାୟତେ ।
ଅନ୍ତଃସ୍ଥାମପି ୟାଂ ପ୍ରଚୋଦକତୟା ନୋ ଜାନତେ ଜନ୍ତଵଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୧୭ ॥
ୟା ଵୀଣା ପରମେଶ୍ଵରାଙ୍କନିଲୟା ହ୍ରୀଂକାରମନ୍ତ୍ରୀ ସଦା
ଶ୍ୟାମା କାଲସୁମୂର୍ଚ୍ଛନାଦିକଲନାହୀନାପି ରାଗିଣ୍ୟହୋ ।
ନାଥେନାହତନାଦଵିଭ୍ରମଵତୀ ସ୍ଥାଣୁଂ ଶିଵଂ ଚାକରୋତ୍
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୧୮ ॥
ୟା ମୋହାନ୍ଧତମୋଽପନୋଦନଵିଧୌ ବୋଧାତ୍ମିକା କୌମୁଦୀ
ସଂସାରାର୍ଣଵତାରଣେ ଦୃଢତରା ନୌକେନ୍ଦ୍ରଚାପପ୍ରଭା ।
ଦାରିଦ୍ର୍ୟାଦ୍ରିଵିଦାରଣେ କନକରୁଗ୍ ଦମ୍ଭୋଲିରିଚ୍ଛାତ୍ମିକା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୧୯ ॥
ୟା ତାପତ୍ରୟଜାଡ୍ୟଶୋକଶମନେ କାଚିନ୍ନୃଣାଂ ସ୍ଵର୍ଧୁନୀ
ୟା ଶାନ୍ତ୍ୟାଦିଗୁଣପ୍ରଵାଲମନିସଂଵୃଦ୍ଧୌ ସୁଧାମ୍ବୋନିଧିଃ ।
ପ୍ରତ୍ୟଗ୍ଦୃଷ୍ଟ୍ୟସିତାବ୍ଜପୋଷଣଵିଧୌ ଜାଡ୍ୟାପହା ଦୀର୍ଘିକା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨୦ ॥
ଶୋକାରଣ୍ୟକୁଠାରିକା ଶୁଭଫଲୋଦ୍ୟାନସ୍ୟ ୟା ଵାପିକା
ପାପକ୍ଷ୍ଵେଲସୁପର୍ଣକଲ୍ପଘୁଟିକା ପ୍ରାଜ୍ଞାଜ୍ଞୟୋରମ୍ବିକା ।
ଆଶୋଚ୍ଚାଟନମୂଲିକା ଵିପଣିକା ଵାଗର୍ଥଵୃଦ୍ଧେଃ କଵେଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨୧ ॥
ୟା ଵାଞ୍ଛାପରିପୂରଣେ ସୁରଲତା ମୋକ୍ଷେନ୍ଦିରା ଦେଵତା
ସ୍ରଷ୍ଟ୍ରାଦେଃ କୁଲଦେଵତା ସୁଚରିତା ଵିଦ୍ୟାସୁ ସର୍ଵୋନ୍ନତା ।
ନିତ୍ୟାନନ୍ଦରତା ସୁକର୍ମମୁଦିତା ଲୋକତ୍ରୟାରାଧିତା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨୨ ॥
ସାରାସାରପୟୋଵିଵେଚନଵିଧୌ ହଂସୀ ପରଂ ତୁ ତ୍ଵିଷା
ଶ୍ୟାମା ମୋହତମୋପନୋଦନଵିଧୌ ହଂସଃ ସଦା ଭାସକଃ ।
ପ୍ରଜ୍ଞାସୌଧଵିହାରିନିସ୍ତୁଲମହାଜ୍ୟୋତ୍ସ୍ନା ଦିଵାପି ଧ୍ରୁଵା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨୩ ॥
ୟା ଚିନ୍ତାମଣିରେଵ ଦୋଷଶମନେ ଦାନେ ପରଂ ତ୍ଵଦ୍ରିଜା
ଵାସନ୍ତୀ ପିକସୁନ୍ଦରୀ ଶ୍ରୁତିସୁଖାଲାପେ ସ୍ଵୟଂ ପଞ୍ଚମୀ ।
ୟାନେ ୟୌଵନସିନ୍ଧୁତୀରକରିଣୀ ପଦ୍ମାଟଵୀରକ୍ଷିଣୀ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨୪ ॥
ୟା ଶଂଭୋର୍ନୟନୋତ୍ପଲେନ୍ଦୁଵଦନା କଂଦର୍ପଦୂତୀକ୍ଷଣା
ଚେତଶ୍ଚାତକନୀଲନୀରଦକଚାଜୀଵାତୁସୀମନ୍ତିନୀ ।
ଶୃଙ୍ଗାରାଦ୍ଵୟଶାନ୍ତିପାଠସୁକୃତଶ୍ରେୟଃଫଲାଗ୍ରୟସ୍ତନୀ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨୫ ॥
ୟା ତ୍ର୍ୟକ୍ଷସ୍ୟ ମନୋରଥଃ କିମୁ ତପଃପାକଃ ସୁଖଂ ନୈଜକଂ
ଦକ୍ଷସ୍ୟେଵ ତପଃଫଲଂ କୁଲଧନଂ ଦୈଵଂ ହିମାଦ୍ରେରପି ।
ଭାଗ୍ୟଂ ଭକ୍ତଜନସ୍ୟ ଦେଶିକଦୃଶୋଃ ଶ୍ଲାଧ୍ୟଂ କଵୀନାଂ ଗିରାଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨୬ ॥
ସେତୁର୍ଦୁଃଖମହୋଦଧେର୍ମଣିମୟଚ୍ଛାୟା ଵିଭୋସ୍ତତ୍ତରୋଃ
ପାନ୍ଥାନାଂ ପରମାର୍ଥିନାଂ ପ୍ରତିପଦଂ କାରୁଣ୍ୟପାଥଃପ୍ରପା ।
ସତ୍ୟାନନ୍ଦଚିଦନ୍ନଦାନଵିଲସଚ୍ଛାଲା ଚ କଲ୍ୟାଣଧୀଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨୭ ॥
ୟା ଲୋକତ୍ରିତୟୈକରତ୍ନମଜଡଂ ଭାନ୍ଵିନ୍ଦୁଭାଶୀତଲଂ
ନିର୍ଦୋଷଂ ଗୁଣଵର୍ଜିତଂ ଚ ନିଖିଲୈଶ୍ଚର୍ୟପ୍ରଦଂ ଦେହିନାମ୍ ।
ଚିତ୍ରଂ ଭିକ୍ଷୁକସାର୍ଵଭୌମନିଲୟଂ ଲୋକତ୍ରୟେ ଭାସତେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨୮ ॥
ୟାପର୍ଣାପ୍ୟନପାୟକଲ୍ପଲତିକା ସ୍ଥାଣୁଃ ପତିଃ କଲ୍ପକୋ
ୟସ୍ୟା ଭକ୍ତଫଲପ୍ରପୂରଣଵିଧୌ ପୁତ୍ରୋ ଵିଶାଖୋଽଦ୍ଭୁତମ୍ ।
ଇତ୍ଥଂ ନିତ୍ୟକୁଟୁମ୍ବିନୀ ତ୍ରିଜଗତାଂ ରକ୍ଷାକରୀ ରାଜତେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୨୯ ॥
ୟା ପୁଣ୍ୟାଶ୍ରମ ଏଵ ଶାଂକରତପଃସିଦ୍ଧ୍ୟୈ ମହାୟୋଗିନାଂ
ନିର୍ଵୈରୋ ଗଜପଞ୍ଚଵକ୍ତ୍ରଗତିମଧ୍ୟଃ ଶାନ୍ତିରଙ୍ଗସ୍ଥଲମ୍ ।
ନିର୍ଦ୍ଵନ୍ଦ୍ଵସ୍ତନଚକ୍ରଵାକଲସିତଃ କୋକାରିଚୂଡାମଣିଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩୦ ॥
ୟା କେଦାରମମୂଲ୍ୟମାନମଭୟଂ ନିଷ୍ପଙ୍କମାଶାସ୍ପଦଂ
ଶ୍ରୀକଣ୍ଠେତରଭୋଗବନ୍ଧରହିତଂ କଲ୍ପେ କଦାପ୍ୟଦ୍ଭୁତମ୍ ।
ପ୍ରଜ୍ଞାଶାଲିନ ଏଵ ଦିତ୍ସତି ବତ ଜ୍ଞାନାଙ୍କୁରଂ କସ୍ୟଚିତ୍
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩୧ ॥
ୟା ଚିତ୍ରଂ କରିଣୀ ହିମାଚଲଭଵା ତାମ୍ରାରଵିନ୍ଦେକ୍ଷଣା
କାନ୍ତ୍ୟା ଭର୍ତ୍ସୟତୀ ଵରଂ ମରତକଂ ପାଶାଙ୍କୁଶୋକ୍ଷ୍ଵନ୍ଵିତା ।
ପଞ୍ଚାସ୍ୟପ୍ରଭୁମଞ୍ଚକୋପରି ଵସତ୍ୟାନନ୍ଦପୁର୍ୟାଂ ମୁଦା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩୨ ॥
ଏଣାଙ୍କାର୍ଭକମାତ୍ମକୁନ୍ତଲତମୋରାତ୍ର୍ୟାମପି ଦ୍ୟୋତୟ-
ତ୍ୟାଶ୍ଚର୍ୟଂ ୟମିନାଂ କଟାକ୍ଷୟମୁନାକଲ୍ଲୋଲମାଲାଂ ଚ ୟା ।
ନିତ୍ୟଂ ଵକ୍ତ୍ରଶଶାଙ୍କମନ୍ଦହସିତଜ୍ୟୋତ୍ସ୍ନାଂ କୃପାୟାଂ ଗୁରୋଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩୩ ॥
ୟା ଦୃଷ୍ଟିଃ ଶ୍ରୁତିମୂଲଶୀଲନପରା ନୀଲାଞ୍ଜନାଦ୍ରିଶ୍ରିୟଂ
ସ୍ଵାତ୍ମସ୍ମେରପୟୋଦଧୌ ସହଭଵଂ ଶ୍ରୀଵଲ୍ଲଭଂ ତନ୍ଵତୀ ।
ଵାତ୍ସଲ୍ୟାନ୍ନତଲୋକମୋହିତିମିରଂ ଚିତ୍ରଂ ଧୁନୀତେ ଚ ୟା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩୪ ॥
ୟା କାରୁଣ୍ୟକଟାକ୍ଷନୀଲଵନଜଦ୍ଵେଷ୍ୟାତ୍ମଜାମ୍ଭଃସ୍ଵହୋ
ମୁଗ୍ଧସ୍ନିଗ୍ଧମୃଦୁସ୍ମିତାମରଧୁନୀଵୀଚୀଵିଲାସାଶ୍ରିତେ ।
ସୁସ୍ନାତଂ ନିଜପାଦପଙ୍କଜରଜଃସିକ୍ତଂ ବତ ଵ୍ୟାତନୋତ୍
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩୫ ॥
ଶ୍ରୀକଣ୍ଠାର୍ଧଶରୀରିଣୀ ଧ୍ରୁଵମପି ଶ୍ରୀକାନ୍ତସୋଦର୍ୟହୋ
ନାରାୟଣ୍ୟପି ସର୍ଵଦା କୁଲନଗୋତ୍ତଂସାତ୍ମଜାତ୍ୟଦ୍ଭୁତମ୍ ।
ପ୍ରାଲେୟାଚଲକନ୍ୟକାପି ସକଲାହଂରୂପିଣୀ ୟାଦ୍ଭୁତମ୍
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩୬ ॥
ଆନଙ୍ଗସ୍ମୃତିସଂପ୍ରଦାୟମଖିଲଂ ସ୍ଵାପାଙ୍ଗଶିଷ୍ୟେଣ ୟା
କାମଦ୍ରୋହିଣମେଵ ଶିକ୍ଷୟତି ହା ଲୋକୋତ୍ତରାତ୍ୟଦ୍ଭୁତମ୍ ।
ତେନୈଵାତ୍ମପଦାରଵିନ୍ଦରସପାନୋଥଂ ତ୍ରିଲୋକେଽନ୍ୟଥା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩୭ ॥
ବନ୍ଧୂକସ୍ତବକଂ ରୁଚା ପରିହସତ୍ୟମ୍ଭୋଜମପ୍ୟଦ୍ଭୁତଂ
କର୍ଣାସ୍ୟେକ୍ଷଣପାଣିନା ଵନଚରଂ ମଧ୍ୟେନ ଵକ୍ଷୋରୁହା ।
ଗତ୍ୟା ସ୍ଵାଦୁଗିରା ସୁଧାକରକଲୋତ୍ତଂସୈଶ୍ଚ ନୀଲାଲକୈଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩୮ ॥
ନିଃସ୍ପନ୍ଦଂ ନିଗମାଗମାଦ୍ୟଵିଷୟଂ ଶ୍ରୋତ୍ରାଦିହୀନଂ ପରଂ
ନିଃଶବ୍ଦଂ ତଦହୋ ପୁମାଂସମକରୋତ୍ କାମେଶ ଇତ୍ୟାଖ୍ୟୟା ।
ୟା ଚିତ୍ରଂ ନିଜଦାସମଚ୍ଛହୃଦୟଂ ଶକ୍ତ୍ୟା ତନୋତ୍ୟନ୍ୟଥା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୩୯ ॥
ଵାଗର୍ଥେନ ୟଥା ୟୁତାପି ପରମାନନ୍ଦାତ୍ମନା ଶୂଲିନା
ନିତ୍ୟଂ ୟା ଵିହରତ୍ୟହୋ ଜନମନୋଗେହେଷୁ ମୁଗ୍ଧେଷୁ ହା ।
ନିର୍ଭୀତା କୁଲଟେଵ କର୍ମ କୁରୁତେ ସର୍ଵେନ୍ଦ୍ରିୟାଣାଂ ସଦା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪୦ ॥
ନାସାମୌକ୍ତିକଦୈତ୍ୟଦେଶିକମହୋ ମନ୍ଦସ୍ମିତୈଃ ପୁଷ୍ଣତୀ
ତାଟଙ୍କଦ୍ୟୁତିଭିର୍ଦିନେଶଶଶିନୌ ଦେଵୌ ତିରସ୍କୁର୍ଵତୀ ।
ମାରାରେର୍ଗୁହମେଧିନୀ ମନସିଜଂ ରକ୍ଷତ୍ୟପାଙ୍ଗୋଟଜେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪୧ ॥
ବନ୍ଧଚ୍ଛେଦଵିଚକ୍ଷଣା ପଶୁଜନସ୍ତୋମାତିଦୂରାଦ୍ଭୁତଂ
ୟା ରକ୍ଷତ୍ୟଗରାଜଶେଖରସୁତାପ୍ୟାମ୍ନାୟସୂତ୍ରୈର୍ଦୃଢମ୍ ।
ବଦ୍ଧ୍ଵା ଦେଵପଶୂନ୍ ସଦା ପଶୁପତେଃ ସଂସର୍ଗଦୋଷେଣ ହା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪୨ ॥
ଧାରା ଦେଶିକଦିଵ୍ୟଦୃଷ୍ଟିମଧୁନୋ ମାରାରିନେତ୍ରାମୃତଂ
ଧାରା ଦୁର୍ମତଦାରୁଦାରିପରଶୋସ୍ତାରାଵଲିର୍ୟୋଗିନାମ୍ ।
ତୀରଂ ମନ୍ତ୍ରମହୋଦଧେଃ କଵିଗିରାଂ ପୂରଃ ସୁଖାମ୍ଭୋନିଧେଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪୩ ॥
କାମାକ୍ଷୀତି ଵଦନ୍ତି କେଚନ ବୁଧାଃ କାମେଶ୍ଵରୀତ୍ୟଦ୍ଭୁତଂ
ରାମାସ୍ତୋମଶିରୋମଣୀତି ମଦନାରାତେର୍ଦୃଶୋଃ ପାରଣା ।
ସୀମା ଭୂମସୁଖସ୍ୟ ଚିନ୍ମୟକଲା ଶୃଙ୍ଗାରମୂର୍ତିଶ୍ଚ ୟା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪୪ ॥
ମୁଗ୍ଧସ୍ନିଗ୍ଧକଟାକ୍ଷମିତ୍ରତନୟା ୟସ୍ୟାଃ ସଦାନନ୍ଦିନୀ
ମନ୍ଦସ୍ମେରପୟୋନିଧିଂ ନିଜପତିଂ ସଂଗମ୍ୟ ଵାଣୀଶ୍ରିୟଃ ।
ସଂସୂୟ ପ୍ରଦଦାତ୍ୟୟାଚିତତତ୍ୟା ଭକ୍ତେଭ୍ୟ ଏଵାଦରାତ୍
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪୫ ॥
ଔନ୍ନତ୍ୟଂ ମୁହୁରେତି ଚିତ୍ରମମରଶ୍ରେଣୀଷୁ ୟଦ୍ୟୋଗତୋ
ଦକ୍ଷଦ୍ଵେଷ୍ୟପି ଭିକ୍ଷୁକୋଽପି ଵିଷମାକ୍ଷୋଽପ୍ୟୁକ୍ଷୟାନୋଽପି ଵା ।
ଅଜ୍ଞାତାନ୍ଵୟସଂଭଵୋଽପି ନିଗମାତୀତୋଽପି ଲୁବ୍ଧସ୍ତଥା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪୬ ॥
ୟା ଲୋକୈକସୁମଙ୍ଗଲା ସ୍ମରକଲା ନୀଲାମ୍ବୁଦଶ୍ୟାମଲା
ଡୋଲା ଶଂକରଲୋଚନଦ୍ଵୟଶିଶୋର୍ମାଲାଷ୍ଟସିଦ୍ଧିଶ୍ରିୟାମ୍ ।
କାଲାତୀତକଲା କଲାନିଧିକଲୋତ୍ତଂସାତୁଲା ନିର୍ମଲା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪୭ ॥
ଅସ୍ତଂ ୟା ନଲିନେକ୍ଷଣେନ ନୟତି କ୍ଷୋଭାତପଂ ୟୋଗିନାଂ
ସ୍ଵାନନ୍ଦାମୃତଚନ୍ଦ୍ରିକାଂ କରୁଣୟା ନିତ୍ୟଂ ତନୋତ୍ୟଦ୍ଭୁତମ୍ ।
ଵର୍ଷତ୍ୟାନନପଙ୍କଜେ ସୁକଵିତାପୀୟୂଷଧାରାଃ କଵେଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪୮ ॥
ୟା ଵିଦ୍ୟୁତ୍କମଲେଷୁ ତିଷ୍ଠତି ପରା ତାପିଞ୍ଛଗୁଚ୍ଛଚ୍ଛଵି-
ଶ୍ଚିତଂ ପ୍ରାଣଭୃତାଂ ଦୃଶୋଃ ସୁଖକରୀ ଭୀମପ୍ରକାଶିନ୍ୟଲମ୍ ।
ଜ୍ୟୋତିଃ ଶୀତଲଭୂଭୃତସ୍ତ୍ରିଭୁଵନକ୍ଷେମପ୍ରଵାହପ୍ରଦା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୪୯ ॥
ୟା କାଚିଦ୍ଧରିଣୀ ମରାଲଗମନା ଚିଦ୍ଵ୍ୟୋମସଂଚାରିଣୀ
ହ୍ରୀଂକାରସ୍ଵନସଂତତେଃ ପରଵଶା ହୃଦ୍ୟାନଵଦ୍ୟା ଦୃଶାମ୍ ।
ଅସ୍ତ୍ରୈଵ୍ୟାର୍ଧଵରଂ ପିନାକିନମହୋ ସଂମୋହୟନ୍ତ୍ୟନ୍ଵହଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫୦ ॥
ଧେନୁର୍ୟା ପରମାତ୍ମନଃ ପଶୁପତେଃ ସର୍ଵଜ୍ଞତାଦୋହିନୀ
ଚିତ୍ରଂ ଷଣ୍ମୁଖଵକ୍ରତୁଣ୍ଡଜନନୀ ପ୍ରାଲେୟଶୈଲାତ୍ମଜା ।
ନିର୍ନିଦ୍ରାମଲପୁଣ୍ଡରୀକନୟନା ଶୁଭ୍ରାଂଶୁଚୂଡାମଣିଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫୧ ॥
ୟାଂ ଦଣ୍ଡଂ ଵରଵିଦ୍ରୁମାତ୍ମକମତିଶ୍ଲକ୍ଷଣଂ ସୁସୂକ୍ଷ୍ମଂ ଧ୍ରୁଵଂ
ଗାଢଂ ନିର୍ଵିଷୟାଃ ପୁରାଣପୁରୁଷା ଆଲମ୍ବ୍ୟ ଗଚ୍ଛନ୍ତ୍ୟହୋ ।
ତୀର୍ତ୍ଵା ଦୁସ୍ତରଜନ୍ମପଙ୍କନିବିଡଂ ମାୟାମହୀମଣ୍ଡଲଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫୨ ॥
ୟା କୁମ୍ଭୋଦ୍ଭଵ ଏଵ ମନ୍ମଥରିପୋର୍ଧୈର୍ୟାମ୍ବୁଧେଃ ପ୍ରାଶନେ
ପ୍ରାରବ୍ଧାତ୍ମକଵିନ୍ଧ୍ୟଭୂଧରଗତିଧ୍ଵଂସେ ତଥା ଧୀମତାମ୍ ।
ଆଚାର୍ୟଃ ଶିଵବୋଧନେ ନିଜପତେରାନଙ୍ଗଦୀକ୍ଷାକ୍ରମେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫୩ ॥
ୟା କ୍ଷୀରାବ୍ଧିସହୋଦରସ୍ମିତରୁଚା କମ୍ବୁଂ ତିରସ୍କୁର୍ଵତୀ
କାମାରେର୍ହୃଦୟଂ ଵିଶୁଦ୍ଧମପି ସଂମୁଗ୍ଧଂ କରୋତ୍ୟନ୍ଵହମ୍ ।
ଆଶ୍ଚର୍ୟାଂ ନମତାଂ ଧୁନୋତି ତିମିରଂ ସ୍ଵାଜ୍ଞାନରୂପଂ ପରଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫୪ ॥
ୟସ୍ୟା ହାସମରାଲିକାମୃଦୁଗତିଃ ଶ୍ରୀକାମଜେତ୍ରେ ମୁଦା
ଵିଦ୍ୟାଂ ବୋଧୟିତୁଂ ପରାଂ ଵିତନୁତେଽପାଙ୍ଗାର୍କଜାତୋର୍ମିଷୁ ।
ସ୍ଥିତ୍ଵା ଶ୍ରୌତପଥସ୍ଥକୁଣ୍ଡଲୟୁଗେନାଲୋଚନାସଂତତଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫୫ ॥
ୟସ୍ୟା ଵୀକ୍ଷଣଶକ୍ରମେଚକମଣୀସାମ୍ରାଜ୍ୟସିଂହାସନଂ
ଶ୍ରିତ୍ଵା ପୁଷ୍ପଶରପ୍ରଭୁର୍ଵିଜୟତେ ତ୍ର୍ୟକ୍ଷସ୍ୟ ପାର୍ଶ୍ଵେଽଦ୍ଭୁତମ୍ ।
ପୀୟୂଷାର୍ଣଵଫେନଜେତୃସହିତଶ୍ରୀଚାମରାସେଵିତଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫୬ ॥
ନୀହାରାଦ୍ରିୟଶୋଽଭିଵର୍ଧନପରେ କୁଞ୍ଜେ କଟାକ୍ଷାତ୍ମକେ
ୟସ୍ୟାଃ କ୍ରୀଡତି ନୀଲକଣ୍ଠଵିମଲପ୍ରଜ୍ଞାମୟୂରାର୍ଭକଃ ।
ପଶ୍ୟନ୍ ନିତ୍ୟସୁଗନ୍ଧିକୁନ୍ତଲମୟୀଂ କାଦମ୍ବିନୀଂ ସଂତତଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫୭ ॥
ୟା ହାସାର୍ଜୁନଭୂଭୃତା ସୁଖୟତି ଦ୍ରାଗ୍ ଭୀମଚିତ୍ତଂ ପରଂ
ଧର୍ମଂ ପାଲୟତି ପ୍ରଵେଶୟତି ଵୈଵର୍ଣେଽନୁକୂଲାଂ ଗତିମ୍ ।
ମାଲିନ୍ୟଂ ନୟତେତରାଂ ଧ୍ରୁଵମହୋ ତଦ୍ଧାର୍ତରାଷ୍ଟ୍ରଂ କୁଲଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫୮ ॥
ୟା ମୁକ୍ତାଫଲମଦ୍ଭୁତଂ ଗିରିଭଵଂ ଶ୍ୟାମଂ ପ୍ରକାଶାସ୍ପଦଂ
ସତ୍ସୂତ୍ରଂ ସକଲାର୍ଥଦଂ ଶଶିକଲାଚୂଡଂ ତ୍ରିଣେତ୍ରଂ ଚରମ୍ ।
ନିର୍ଦୋଷଂଭଵକୌତୁକପ୍ରଦମନାଦ୍ୟନ୍ତଂ ପରଂ ନିସ୍ତୁଲଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୫୯ ॥
ୟା ଵାପୀ ଭୁଵନପ୍ରଦା ରସମୟୀ ତୃଷ୍ଣାର୍ଦିତାନାଂ ପରଂ
ନିଷ୍ପାଶାଭିଗତାଭିମାନମମତାପାଶାଭିଲାଷାନ୍ଵିତା ।
ସତ୍ପାତ୍ରେ ଫଲଦାୟିନୀ ସ୍ମୃତିମତାଂ ତାପତ୍ରୟଧ୍ଵଂସିନୀ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬୦ ॥
ଶୃଙ୍ଗାରାମ୍ବୁଧଵୀଚିଵିଭ୍ରମଵତୀ ଶୃଙ୍ଗାରବୀଜାନିଲ-
ଵ୍ୟାଲୋଲା କୁମୁଦପ୍ରିୟଧ୍ଵଜପଟୀ ପ୍ରତ୍ୟକ୍ଚରୀ ପାର୍ଵତୀ ।
ଦ୍ରୋଣୀ ୟା ଵିଷମେକ୍ଷଣାନୁସରଣୀ ଚିତ୍ରଂ ସଦା ରାଜତେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬୧ ॥
ୟସ୍ୟା ନୀରଦଭାଃ କଟାକ୍ଷୟଦୁପଃ କର୍ଣାନୁଵୃତ୍ତୋଽଦ୍ଭୁତଂ
ଦୀଵ୍ୟତ୍କୁଣ୍ଡଲହାସଚକ୍ରଜଲଜଶ୍ଲିଷ୍ଟଃ କୃପାନୀରଦଃ ।
ସ୍ଥାନୋର୍ଗୋକୁଲମନ୍ଵହଂ ନୟତି ତଦ୍ଵକ୍ଷୋଜଶୈଲାନ୍ତରଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬୨ ॥
ୟା ଚିତ୍ରଂ ମହତୀଂ ମହାଗୁଣଵତୀମପ୍ୟଶ୍ରିତଂ ସଂତତଂ
କାଠିନ୍ୟଂ ନ ଵିମୁଞ୍ଚତି ସ୍ତନୟୁଗଂ ମାନ୍ଦ୍ୟଂ ଗତିଃ କୁନ୍ତଲାଃ ।
କୌଟିଲ୍ୟଂ ନୟନାମ୍ବୁଜଂ ଚପଲତାଂ ବିମ୍ବାଧରୋ ରାଗିତାଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬୩ ॥
ୟା ମନ୍ଦସ୍ମିତକୌମୁଦୀଂ ଵିତନୁତେ ନିତ୍ୟୋଦିତେ ସର୍ଵତ-
ସ୍ତାଟଙ୍କାତ୍ମନି ଭାସ୍କରେ ସ୍ଵୟମହୋ କାଲାମ୍ବୁଦଶ୍ୟାମଲା ।
ବିମ୍ବୋଷ୍ଠଦ୍ୟୁତିସଂଧ୍ୟୟା ଦ୍ଵିଜଗଣେ ଶ୍ରୀଶାଂଭଵେ ରାଗିତାଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬୪ ॥
ଜାରେ ମାରକିରାତଜୀଵନକରେ ଚିତ୍ରଂ କଟାକ୍ଷାତ୍ମକେ
ୟସ୍ୟାଃ କୁଣ୍ଡଲରଶ୍ମିଵେଣୁକଲିତେ ଲଗ୍ନା ସୁଖଂ ରାଜତେ ।
କାମାରେର୍ମତିଶାରିକା ଶ୍ରୁତିଶିରୋଦ୍ୟାନାନ୍ତରୋଲ୍ଲାସିନୀ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬୫ ॥
ନିତ୍ୟଂ ସୋମକଲାଧରୋଽଧ୍ଵରପତିର୍ଵ୍ୟାଘ୍ରାଜିନାଲଂକୃତ-
ସ୍ତାଟଙ୍କଦ୍ୟୁତିଵହ୍ନିଵୀକ୍ଷଣଶିଖାଧୂମାତିଲୋଲେକ୍ଷଣଃ ।
ୟସ୍ୟା ହାସପୟୋନିଧାଵଵଭୃଥଵ୍ୟାଜେନ ମଜ୍ଜତ୍ୟହୋ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬୬ ॥
ୟସ୍ୟାଃ କାପି ଦୟାତ୍ମିକା ପ୍ରତିଦିନଂ ଶୈଲୂଷବାଲାଦ୍ଭୁତଂ
ନୀରାଗାଲୟକାଲଵର୍ଜିତଵତୀ ନିର୍ମୂର୍ଚ୍ଛନା କାମନା ।
ନିର୍ଲଜ୍ଜୈଵ ଦିଗମ୍ବରା ନଟତି ହା ସଂମୋହଶାନ୍ତ୍ୟୈ ନୃଣାଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬୭ ॥
ମାଙ୍ଗଲ୍ୟଂ ହରିନୀଲକାନ୍ତିସୁଗୁଣଂ ଶ୍ଲାଧ୍ୟଂ ସୁରସ୍ତ୍ରୀଜନୈ-
ର୍ୟସ୍ୟା ମଞ୍ଜୁଲଵୀକ୍ଷଣଂ ସ୍ମରହାରାଜସ୍ୟ ଦେଵ୍ୟା ରତେଃ ।
ଓଷ୍ଠଶୀର୍ଵରକୁଙ୍କୁମଂ ସ୍ମିତମହୋ ସ୍ରଙ୍ମାଧଵୀ ଶାଶ୍ଵତୀ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬୮ ॥
ଚିତ୍ରଂ କାପି ସୁଧା ଶିଵେତରସୁରାଲଭ୍ୟା ହିମାଦ୍ର୍ୟୁଦ୍ଭଵା
ଦ୍ରୁହ୍ୟନ୍ତୀ କୁରୁଵିନ୍ଦମାତ୍ମରୁଚିଭିର୍ଦୋଷାକରୋତ୍ତଂସିନୀ ।
ଆସ୍ତେ ୟା ମଦନଜ୍ଵରଂ ଶଶିଭୃତଃ ସଂଧୁକ୍ଷୟନ୍ତ୍ୟନ୍ଵହଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୬୯ ॥
ଅର୍ଧଂ ରାଜ୍ୟମନନ୍ୟସାଧ୍ୟମଖିଲୈଶ୍ଚର୍ୟପ୍ରଦଂ ଶୂଲିନଃ
ଶୁଦ୍ଧଂ ମୂର୍ତିମୟଂ ୟୟାତିଵିନୟୈଃ ପ୍ରାପ୍ତଂ ତଦନ୍ୟତ୍ ପୁନଃ ।
ଵ୍ୟାପ୍ତୁଂ ଵାଞ୍ଛତି ଗାରୁଡୋପଲଵପୁଃ କାନ୍ତ୍ୟା ମହତ୍ୟା ପରଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭୦ ॥
ଅର୍ଧଂ ସୋମକଲାଧରୀ ଶଶିକଲାଚୂଡସ୍ୟ ୟା ତ୍ର୍ୟମ୍ବକ-
ସ୍ତ୍ର୍ୟକ୍ଷାୟା ଅଥଵା ସନାତନତନୂ ଜାୟାପତୀ ଶାଶ୍ଵତୌ ।
ଏକଂ ଵେତ୍ୟଵଧାରିତୁଂ ମୁନିଵରା ଅଦ୍ୟାପ୍ୟଲଂ ନାଦ୍ଭୁତଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭୧ ॥
ଦାରିଦ୍ର୍ୟାସ୍ତଧରାଧରୋଽପି ପରମଂ ଭଦ୍ରୋଦୟୋଽତ୍ୟଦ୍ଭୁତଂ
ପାପାରଣ୍ୟଦଵାନଲୋଽପି ନମତାଂ କାରୁଣ୍ୟଧାରାଧରଃ ।
ୟା ଦୁହ୍ଖାମ୍ବୁଦମାଲିକାପଵନରାଣ୍ନୈଶ୍ଚଲ୍ୟରୂପାସ୍ତି ଵୈ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭୨ ॥
ଶ୍ରୌତଂ ମାର୍ଗମତୀତ୍ୟ ଗଚ୍ଛତି ମୁଦା କାପାଲିକଂ ଦୃକ୍ ପରଂ
ମଧ୍ୟଃ ଶୂନ୍ୟମତଂ ଗତୋଽତିଵିମଲେ ଦ୍ଵନ୍ଦ୍ଵେ କୁଚୌ ଦ୍ଵୈତିନୌ ।
ସୌରେ କୁଣ୍ଡଲୟୁଗ୍ମମାତ୍ମରୁଚିଭିର୍ୟସ୍ୟାଃ କୃପା ଶାଂଭଵେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭୩ ॥
ଵଲ୍ଲୀ କାପି ଶିଵାଙ୍କଣେ ଲସତି ୟା ମନ୍ଦସ୍ମିତୈଃ ପୁଷ୍ପିତା
ତାମ୍ବୂଲେନ ସୁଗନ୍ଧିତା ସୁଫଲିତା ଵକ୍ଷୋରୁହାଭ୍ୟାଂ ପରମ୍ ।
କାନ୍ତ୍ୟା ପଲ୍ଲଵିତା କଚୈର୍ଭ୍ରମରିତା ଦୃଗ୍ଭ୍ୟାଂ ପରଂ ପତ୍ରିତା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭୪ ॥
ୟସ୍ୟା ଵୀକ୍ଷଣଦେଶିକଃ ଶ୍ରୁତିଗତିସ୍ତେଜୋମୟଃ ସର୍ଵଵିତ୍
ସଂତୁଷ୍ଟୋ ଜିତକାମଶତ୍ରୁରଣିମାଦ୍ୟଷ୍ଟାଭିରାରାଧିତା ।
ସଚ୍ଚିତ୍ସୌଖ୍ୟରତଃ ଶିଵଂ ନଟମପି କ୍ଷିପ୍ରଂ କରୋତ୍ୟଦ୍ଭୁତଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭୫ ॥
ୟସ୍ୟାଶ୍ଚାରୁକପୋଲଦର୍ପଣତଲେ ଦୃଷ୍ଟ୍ଵା କପର୍ଦୀ ରୁଷା
ଭୀତୋ ଜହ୍ନୁସୁତାଂ ମୃଦୁସ୍ମିତମୟୀଂ ସଂକେତମିତ୍ଥଂ ଵ୍ୟଧାତ୍ ।
ମୁଗ୍ଧେ ଗଚ୍ଛ ନିଜସ୍ଥଲଂ ଦ୍ରୁତତର୍ଂ ଜାଗର୍ତି ଦୃଷ୍ଟିର୍ୟତଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭୬ ॥
ଶୃଙ୍ଗାରୈକରସଂ ଵସନ୍ତସୁହୃଦଂ କଂଦର୍ପଦର୍ପପ୍ରଦଂ
ଚିତ୍ରଂ କୋକନଦପ୍ରବୋଧନକରଂ ଚନ୍ଦ୍ରୋଦୟଂ ଶ୍ରୀକରମ୍ ।
ୟସ୍ୟା ହାସମୟଂ ଚିରମପ୍ୟାସ୍ତେ ପୁରାଣଃ ଶିଵଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭୭ ॥
ୟା କାଚିତ୍ ପିକକାମିନୀ ଶ୍ରୁତିଗତିଃ ସପ୍ତସ୍ଵରାଲାପିନୀ
ନିତ୍ୟଂ ମାଧଵବୋଧିନୀ ତ୍ରିଭୁଵନେ ନିଷ୍ପକ୍ଷପାତା ସୁଖମ୍ ।
ଚିତ୍ରଂ ଚୂତନଵପ୍ରସୂନଵିଶିଖଦ୍ଵେଷ୍ୟାଶ୍ରୟେ ରାଜତେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭୮ ॥
ୟସ୍ୟା ଵୀକ୍ଷଣମାନ୍ତ୍ରିକଃ ସୁକୃତିନାମଗ୍ରେସରଃ ଶଂକରୀ-
ମନ୍ତ୍ରାମ୍ଭୋନିଧିପାରଗଃ ସ୍ମିତଵିଭୂତ୍ୟୋଚ୍ଚାଲୟନ୍ ସର୍ଵଦା ।
ଦ୍ଵେଷଂ ଶଂକରକର୍ତୃକଂ ସୁମଶରେ ଵିଭ୍ରାଜତେ ଶାଶ୍ଵତଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୭୯ ॥
ୟସ୍ୟା ଦୃଗ୍ରମଣୀମଣିର୍ଵିଵଦତେ କାମାରିସଲ୍ଲାପନେ
ସ୍ଵାଧୀନପ୍ରିୟୟା ମୃଦୁସ୍ମିତଶରୀରିଣ୍ୟା ପରଂ ଗଙ୍ଗୟା ।
ଆଦ୍ୟାହଂଶ୍ରୁତିମୂଲଗାଧରଭଵା ତ୍ଵଂ ସ୍ଵୀକୃତେତି ଧ୍ରୁଵଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮୦ ॥
ୟା କାଚିଦ୍ ଭୁଜଗୀ ସଦା ସରଲଗା ପୀୟୂଷଦାୟିନ୍ୟହୋ
ପଦ୍ମାରଣ୍ୟଵିହାରିଣୀ ଶ୍ରୁତିମତୀ ତେଜସ୍ତନୂର୍ନିର୍ଭୟା ।
ଜନ୍ମାବ୍ଧିପ୍ଲଵଵର୍ଧିନୀ ଵଶୟତି ଶ୍ରୀନୀଲକଣ୍ଠଂ ଦୃଶା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮୧ ॥
ଆସ୍ୟାମ୍ଭୋଜଭଵା ପତିଂ ନିଜମନାଦ୍ୟନ୍ତଂ କଟାକ୍ଷାତ୍ମକଂ
ପୃଚ୍ଛନ୍ତୀତି ପୟୋନିଧେଃ ସ୍ମିତମୟାନ୍ମଜ୍ଜନ୍ମ କିଂ ଵାମ୍ବୁଜାତ୍ ।
ୟସ୍ୟା ନିଃସ୍ମରସଂପଦଂ ସୁଧନିକଂ କର୍ତୁଂ ଶିଵଂ କାଙ୍କ୍ଷତେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮୨ ॥
ୟସ୍ୟାଃ ପାଣିପରିଗ୍ରହେ ମୃଦୁତନୋର୍ହେମାଦ୍ରିଧନ୍ଵା ଶିଵଃ
ପାଦାନ୍ୟାସଵିଧୌ ଦୃଷଦ୍ୟପି ସୁରସ୍ତ୍ରୀଣାଂ ପୁରୋ ଲଜ୍ଜିତଃ ।
ମନ୍ଦାକ୍ଷଂ ଗତଵାନନଙ୍ଗକଲିକାଂ ୟାଂ ଵୀକ୍ଷିତୁଂ ନାଦ୍ଭୁତଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮୩ ॥
ୟସ୍ୟାଃ ପାଦକେଶଶୟଶ୍ରିୟମହୋ ଶ୍ରୁତ୍ଵାନିଲାଦନ୍ଵହଂ
ଗାଙ୍ଗାନ୍ୟମ୍ବୁରୁହାଣି ହନ୍ତ କତିଚିତ୍ ପ୍ରାପ୍ତୁଂ ପରାଂ ତାଂ ଦ୍ରୁତମ୍ ।
ପୀତ୍ଵା କ୍ଷୀରଲଵଂ ତପନ୍ତି ତପନଂ ପଶ୍ୟନ୍ତି ମଜ୍ଜନ୍ତ୍ୟଲଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮୪ ॥
ନିତ୍ୟଂ ସଂଧିମପେକ୍ଷତେ ସୁଚରିତା ଦୂତୀ କଟାକ୍ଷାତ୍ମିକା
ରାଜସ୍ୟାଧରରାମୟାପି ନ ତୟା ଗର୍ଭେ ଵହନ୍ତ୍ୟାମୃତମ୍ ।
କାମାରେ ରତିସାତ୍ତ୍ଵିକଦ୍ଵିଜମଣେର୍ମୋଦାୟ ସୁଶ୍ରେୟସେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮୫ ॥
ପକ୍ଷେ ଶୈଵମନୋମହୀଭୃତି ମନୋଜାଗ୍ନିଂ ଧ୍ରୁଵଂ ସାଧୟନ୍
ୟସ୍ୟା ମଞ୍ଜୁକଟାକ୍ଷଧୂମଶିଶୁନା ଶ୍ରୌତେନ ସଦ୍ଧେତୁନା ।
ଓଷ୍ଠଦ୍ଵନ୍ଦ୍ଵସଭାନ୍ତରେ ସ୍ମିତମୟୋ ନୈୟାୟିକୋ ଭାସତେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮୬ ॥
ୟା ପଦ୍ମଂ ହିମଶୈଲଜଂ ମରତକଂ ଭାସା ଭୃଶଂ ଭର୍ତ୍ସୟତ୍
କଂଦର୍ପସ୍ୟ ଜ୍ୟେନ୍ଦିରାଜନିଗୃହଂ ନିର୍ହେତୁକୋତ୍ଫୁଲ୍ଲନମ୍ ।
ସ୍ଥାଣୋର୍ଲୋଚନଭୃଙ୍ଗସଂଭ୍ରମକରଂ ଶୀତାଂଶୁଲେଖାଙ୍କିତଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮୭ ॥
ୟସ୍ୟା ମନ୍ଦଗତିଃ ପରଂ ଶୁଭଗତିଃ କାମସ୍ୟ କାମଦ୍ରୁହଃ
କାମୋଦ୍ରେକଗତିଶ୍ଚିରଂ ଭଜନକୃଦ୍ଧଂସାଙ୍ଗନାସଂତତେଃ ।
କାମଂ ଦତ୍ତଗତିଃ ସଦା ଵିଜୟତେ ହଂସାତ୍ମିକା ୟୋଗିନାଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮୮ ॥
ନିଃସ୍ନେହାପି ଶିଵାତିରାଗକଲିତା ୟା ଦୀପିକା କାପ୍ୟହୋ
ଝଞ୍ଝାମାରୁତଭୀତିଦାପି ଚପଲା ନିଷ୍କଲ୍ମଷା ସାଞ୍ଜନା ।
ତ୍ରୈଲୋକ୍ୟେଽପି ଵିରାଜତେ ଶ୍ରିତଵତୀ ଶ୍ରୀଶଂକରାଙ୍କଂ ଧ୍ରୁଵଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୮୯ ॥
ନିର୍ୟତ୍ନୈଵ ମହାସତୀ ସୁଚରିତା ୟା ଶୈଲରାଜାତ୍ମଜା
ନାଥଂ ଲୋକଵିଲକ୍ଷଣଂ ପ୍ରହୃତଵତ୍ୟଦ୍ୟାପି ସେଵାଜନେ ।
ଗାଣ୍ଡୀଵେନ ଵରାଶ୍ମଭିଶ୍ଚ ମୁସଲେନୋପାନହା ଵର୍ତତେ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯୦ ॥
ୟସ୍ୟାଃ ପାଦକିସାଲୟପ୍ରଭୁଵରଂ ୟାଚନ୍ତ୍ୟଜସ୍ରଂ ପରଂ
କସ୍ତୂର୍ୟଃ ସୁରୟୋଷିତାଂ ତିଲକିତାଃ ସଦ୍ଵାସନାଂ ରାଗିତାମ୍ ।
ବିମ୍ବୋଷ୍ଠଂ ମୃଦୁତାଂ ଶ୍ରିୟଂ ଚ ୟୁଗପଦ୍ଧସ୍ତାଃ ପ୍ରଵାଲପ୍ରିୟାଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯୧ ॥
ୟସ୍ୟାଃ ପାଦସହସ୍ରରଶ୍ମିଚରଲଂ କାମାରିଚିତ୍ତାତ୍ମକଂ
ହୈମଂ ଭ୍ରାମୟତି ପ୍ରଣାଶୟତି ସଂତାପଂ ସତାମଙ୍କୁରମ୍ ।
ପ୍ରଜ୍ଞାନାତ୍ମକମଦ୍ଭୁତଂ ଶିଶିରୟତ୍ୟକ୍ଷୀଣ୍ୟଲଂ ପଶ୍ୟତାଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯୨ ॥
ଚିତ୍ରଂ ୟା କୁରୁତେ ମନୋଽପି ୟମିନାଂ ବଦ୍ଧଂ ମହାୟତ୍ନତୋ
ମୁକ୍ତଂ ଶୋଣପଦାରଵିନ୍ଦୟୁଗଲେ ନୀରାଗିଣଂ ରାଗିଣମ୍ ।
ମଞ୍ଜୀରସ୍ଵନମନ୍ମଥସ୍ମିତରଵୈଃ ସଂମୋହନଂ ଶୂଲିନଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯୩ ॥
ପାଦାମ୍ଭୋଜରଜୋ ରଜାଂସି ହରତି ପ୍ରୌଢାନି ୟସ୍ୟା ନୃଣାଂ
ସତ୍ତ୍ଵଂ ଵର୍ଧୟତି ପ୍ରଦର୍ଶୟତି ସନ୍ମାର୍ଗଂ ସୁରାଣାମପି ।
ଜନ୍ମଵ୍ୟାଧିମୃତିପ୍ରଵାହମତୁଲଂ ସଂରୋଧୟତ୍ୟଦ୍ଭୁତଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯୪ ॥
ନାହଂ ଵିଶ୍ଵମିଦଂ ଚରାଚରମୟଂ ମାୟାଵିଲାସାସ୍ପଦଂ
ଦୃଶ୍ୟତ୍ଵାଦିତି ଶୋଧୟନ୍ତି ସୁଧିୟଃ ସର୍ଵଂ ୟୟା ପ୍ରଜ୍ଞୟା ।
ଆତ୍ମୈଵାୟମିଦଂ ଵଦନ୍ତି ପୁନସ୍ତୂଷ୍ଣୀଂଭଵନ୍ତଃ ସ୍ଥିତାଃ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯୫ ॥
ରାହୁଂ ନିନ୍ଦତି ଚନ୍ଦ୍ରଚୂଡଚିକୁରୈସ୍ତାଟଙ୍କକାନ୍ତ୍ୟା ରଵିଂ
ଵକ୍ତ୍ରାବ୍ଜେନ ଵିଧୁଂ ଗୁରୁଂ ନତଗିରା ସୌଗ୍ୟଂ ଦୃଶା ଭଦ୍ରୟା ।
ଗତ୍ୟା ମନ୍ଦମହୋ କୁଜଂ ତନୁରୁଚା ନାସାଗ୍ରମଣ୍ୟା କଵିଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯୬ ॥
ନିଃଶ୍ରେଣୀ କୃତିନାଂ ପରାମୃତଫଲପ୍ରାପ୍ତୌ ପ୍ରଵାଲଦ୍ୟୁତି-
ର୍ୟା ନୀଲାଞ୍ଜନମକ୍ଷରାତ୍ମକନିଧେଃ ସଂଦର୍ଶନେ ଶ୍ରୀମତାମ୍ ।
ନିତ୍ୟାନନ୍ଦରସା ପରୋକ୍ଷକରଣେ ଶ୍ରୀଦେଶିକଶ୍ରୀକୃପା
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯୭ ॥
ୟା କୁଣ୍ଠୀକୁରୁତେ ନିଜସ୍ତୁତିଵିଧୌ ଗର୍ଵାତ୍ ପ୍ରଵୃତ୍ତାଂ ଗିରଂ
ଵେଦାନାମପି ଗୀଷ୍ପତେରପି ମହାଭାଷ୍ୟାର୍ଥଵିଜ୍ଞାନିନଃ ।
ଦତ୍ତେ ଵାଗ୍ଭଵଵୈଭଵାମୃତଝରୀଂ ମୂକାଜ୍ଞୟୋର୍ଵାଗ୍ମିତାଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯୮ ॥
ଆଦ୍ୟାମମ୍ବୁରୁହେକ୍ଷଣାମନୁପମାମାପୀନତୁଙ୍ଗସ୍ତନୀ-
ମାର୍ୟାମାଗମସାରମୂର୍ତିମରୁଣାମାନନ୍ଦଚନ୍ଦ୍ରାନନାମ୍ ।
ସାଧ୍ଵୀଂ ସତ୍କଵିଵାଗ୍ଝରୀଂ ସମରସାନନ୍ଦାମୃତସ୍ୟନ୍ଦିନୀଂ
ସା ସଂଵିତ୍ ସୁକୃତୋଦୟା ସ୍ଫୁରତୁ ନଶ୍ଚିତ୍ତେ ସଦା ସର୍ଵଗା ॥ ୯୯ ॥
ଗୁରୁଚରଣସରୋଜଂ ଗୁପ୍ତଗଙ୍ଗାତରଙ୍ଗ-
ସ୍ତିମିତମମିତଶୁକ୍ଲଜ୍ୟୋତିଷାଂ ଜ୍ୟୋତିରେକମ୍ ।
ନିରୁପମମକରନ୍ଦସ୍ପନ୍ଦମାନନ୍ଦକନ୍ଦଂ
ନିଧନଜନନହୀନୋ ନିର୍ମଲୋଽହଂ ନିଷେଵେ ॥ ୧୦୦ ॥
ଶାର୍ଦୂଲଵୃତ୍ତମପି ସାଧୁ ଭଵତ୍ୟହୋ ତତ୍
ସାରସ୍ଵତଂ ସମରସାମୃତଲୋଚନାନାମ୍ ।
ସଦ୍ୟୋ ଜୟତ୍ୟଘରିପୁଂ ଶ୍ରୁତିମାର୍ଗୟୋଗାତ୍
ତ୍ୟାଗେଶସାନ୍ଦ୍ରକରୁଣାଦ୍ଭୁତମେଵ ଭଦ୍ରମ୍ ॥ ୧୦୧ ॥
ଇତ୍ୟାନନ୍ଦନାଥପାଦପପଦ୍ମୋପଜୀଵିନା କାଶ୍ୟପଗୋତ୍ରୋତ୍ପନ୍ନେନାନ୍ଧ୍ରେଣ
ତ୍ୟାଗରାଜନାମ୍ନା ଵିରଚିତଂ ସଂଵିଚ୍ଛତକଂ ସଂପୂର୍ଣମ୍