॥ Sharabha Upanishad Bengali Lyrics ॥
॥ শরভোপনিষৎ ॥
সর্বং সন্ত্যজ্য মুনয়ো যদ্ভজন্ত্যাত্মরূপতঃ ।
তচ্ছারভং ত্রিপাদ্ব্রহ্ম স্বমাত্রমবশিষ্যতে ॥
ওঁ ভদ্রং কর্ণেভিঃ শৃণুয়াম দেবাঃ ।
ভদ্রং পশ্যেমাক্ষভির্যজত্রাঃ ।
স্থিরৈরঙ্গৈস্তুষ্টুবাꣳসস্তনূভিঃ ।
ব্যশেম দেবহিতং যদায়ুঃ ।
স্বস্তি ন ইন্দ্রো বৃদ্ধশ্রবাঃ । স্বস্তি নঃ পূষা বিশ্বদেবাঃ ।
স্বস্তি নস্তার্ক্ষ্যো অরিষ্টনেমিঃ । স্বস্তি নো বৃহস্পতির্দধাতু ॥
ওঁ শান্তিঃ শান্তিঃ শান্তিঃ ॥
অথ হৈনং পৈপ্পলাদো ব্রহ্মাণমুবাচ ভো ভগবন্
ব্রহ্মবিষ্ণুরুদ্রাণাং মধ্যে কো বা অধিকতরো ধ্যেয়ঃ
স্যাত্তত্ত্বমেব নো ব্রূহীতি ।
তস্মৈ স হোবাচ পিতামহশ্চ
হে পৈপ্পলাদ শৃণু বাক্যমেতৎ ।
বহূনি পুণ্যানি কৃতানি যেন
তেনৈব লভ্যঃ পরমেশ্বরোঽসৌ ।
যস্যাঙ্গজোঽহং হরিরিন্দ্রমুখ্যা
মোহান্ন জানন্তি সুরেন্দ্রমুখ্যাঃ ॥ ১ ॥
প্রভুং বরেণ্যং পিতরং মহেশং
যো ব্রহ্মাণং বিদধাতি তস্মৈ ।
বেদাংশ্চ সর্বান্প্রহিণোতি চাগ্র্যং
তং বৈ প্রভুং পিতরং দেবতানাম্ ॥ ২ ॥
মমাপি বিষ্ণোর্জনকং দেবমীড্যং
যোঽন্তকালে সর্বলোকান্সংজহার ॥ ৩ ॥
স একঃ শ্রেষ্ঠশ্চ সর্বশাস্তা স এব বরিষ্ঠশ্চ ।
যো ঘোরং বেষমাস্থায় শরভাখ্যং মহেশ্বরঃ ।
নৃসিংহং লোকহন্তারং সংজঘান মহাবলঃ ॥ ৪ ॥
হরিং হরন্তং পাদাভ্যামনুয়ান্তি সুরেশ্বরাঃ ।
মাবধীঃ পুরুষং বিষ্ণুং বিক্রমস্ব মহানসি ॥ ৫ ॥
কৃপয়া ভগবান্বিষ্ণুং বিদদার নখৈঃ খরৈঃ ।
চর্মাম্বরো মহাবীরো বীরভদ্রো বভূব হ ॥ ৬ ॥
স একো রুদ্রো ধ্যেয়ঃ সর্বেষাং সর্বসিদ্ধয়ে । যো ব্রহ্মণঃ পঞ্চবক্রহন্তা
তস্মৈ রুদ্রায় নমো অস্তু ॥ ৭ ॥
যো বিস্ফুলিঙ্গেন ললাটজেন সর্বং জগদ্ভস্মসাৎসংকরোতি ।
পুনশ্চ সৃষ্ট্বা পুনরপ্যরক্ষদেবং স্বতন্ত্রং প্রকটীকরোতি ।
তস্মৈ রুদ্রায় নমো অস্তু ॥ ৮ ॥
যো বামপাদেন জঘান কালং ঘোরং পপেঽথো হালহলং দহন্তম্ ।
তস্মৈ রুদ্রায় নমো অস্তু ॥ ৯ ॥
যো বামপাদার্চিতবিষ্ণুনেত্রস্তস্মৈ দদৌ চক্রমতীব হৃষ্টঃ ।
তস্মৈ রুদ্রায় নমো অস্তু ॥ ১০ ॥
যো দক্ষয়জ্ঞে সুরসঙ্ঘান্বিজিত্য
বিষ্ণুং ববন্ধোরগপাশেন বীরঃ ।
তস্মৈ রুদ্রায় নমো অস্তু ॥ ১১ ॥
যো লীলয়ৈব ত্রিপুরং দদাহ
বিষ্ণুং কবিং সোমসূর্যাগ্নিনেত্রঃ ।
সর্বে দেবাঃ পশুতামবাপুঃ
স্বয়ং তস্মাৎপশুপতির্বভূব ।
তস্মৈ রুদ্রায় নমো অস্তু ॥ ১২ ॥
যো মৎস্যকূর্মাদিবরাহসিংহা-
ন্বিষ্ণুং ক্রমন্তং বামনমাদিবিষ্ণুম্ ।
বিবিক্লবং পীড্যমানং সুরেশং
ভস্মীচকার মন্মথং যমং চ ।
তস্মৈ রুদ্রায় নমো অস্তু ॥ ১৩ ॥
এবং প্রকারেণ বহুধা প্রতুষ্ট্বা
ক্ষমাপয়ামাসুর্নীলকণ্ঠং মহেশ্বরম্ ।
তাপত্রয়সমুদ্ভূতজন্মমৃত্যুজরাদিভিঃ ।
নাবিধানি দুঃখানি জহার পরমেশ্বরঃ ॥১৪ ॥
এবং মন্ত্রৈঃ প্রার্থ্যমান আত্মা বৈ সর্বদেহিনাম্ ।
শঙ্করো ভগবানাদ্যো ররক্ষ সকলাঃ প্রজাঃ ॥ ১৫ ॥
যৎপাদাম্ভোরুহদ্বন্দ্বং মৃগ্যতে বিষ্ণুনা সহ ।
স্তুৎবা স্তুত্যং মহেশানমবাঙ্মনসগোচরম্ ॥ ১৬ ॥
ভক্ত্যা নম্রতনোর্বিষ্ণোঃ প্রসাদমকরোদ্বিভুঃ ।
যতো বাচো নিবর্তন্তে অপ্রাপ্য মনসা সহ ।
আনন্দং ব্রহ্মণো বিদ্বান্ন বিভেতি কদাচনেতি ॥ ১৭ ॥
অণোরণীয়ান্মহতো মহীয়া-
নাত্মাস্যজন্তোর্নিহিতো গুহায়াম্ ।
তমক্রতুং পশ্যতি বীতশোকো
ধাতুঃপ্রসাদান্মহিমানমীশম্ ॥ ১৮ ॥
বসিষ্ঠবৈয়াসকিবামদেব-
বিরিঞ্চিমুখ্যৈর্হৃদি ভাব্যমানঃ ।
সনৎসুজাতাদিসনাতনাদ্যৈ-
রীড্যো মহেশো ভগবানাদিদেবঃ ॥ ১৯ ॥
সত্যো নিত্যঃ সর্বসাক্ষী মহেশো
নিত্যানন্দো নির্বিকল্পো নিরাখ্যঃ ।
অচিন্ত্যশক্তির্ভগবান্গিরীশঃ
স্বাবিদ্যযা কল্পিতমানভূমিঃ ॥ ২০ ॥
অতিমোহকরী মায়া মম বিষ্ণোশ্চ সুব্রত ।
তস্য পাদাম্বুজধ্যানাদ্দুস্তরা সুতরা ভবেৎ ॥ ২১ ॥
বিষ্ণুর্বিশ্বজগদ্যোনিঃ স্বাংশভূতৈঃ স্বকৈঃ সহ ।
মমাংশসংভবো ভূৎবা পালয়ত্যখিলং জগৎ ॥ ২২ ॥
বিনাশং কালতো যাতি ততোঽন্যৎসকলং মৃষা ।
ওঁ তস্মৈ মহাগ্রাসায় মহাদেবায় শূলিনে ।
মহেশ্বরায় মৃডায় তস্মৈ রুদ্রায় নমো অস্তু ॥ ২৩ ॥
একো বিষ্ণুর্মহদ্ভূতং পৃথগ্ভূতায়নেকশঃ ।
ত্রীংল্লোকান্ব্যাপ্য ভূতাত্মা ভুঙ্ক্তে বিশ্বভুগব্যযঃ ॥ ২৪ ॥
চতুর্ভিশ্চ চতুর্ভিশ্চ দ্বাভ্যাং পঞ্চমিরেব চ ।
হূয়তে চ পুনর্দ্বাভ্যাং স মে বিষ্ণুঃ প্রসীদতু ॥ ২৫ ॥
ব্রহ্মার্পণং ব্রহ্ম হবির্ব্রহ্মাগ্নৌ ব্রহ্মণা হুতম্ ।
ব্রহ্মৈব তেন গন্তব্যং ব্রহ্মকর্মসমাধিনা ॥ ২৬ ॥
শরা জীবাস্তদঙ্গেষু ভাতি নিত্যং হরিঃ স্বয়ম্ ।
ব্রহ্মৈব শরভঃ সাক্ষান্মোক্ষদোঽয়ং মহামুনে ॥ ২৭ ॥
মায়াবশাদেব দেবা মোহিতা মমতাদিভিঃ ।
তস্য মাহাত্ম্যলেশাংশং বক্তুং কেনাপ্য শক্যতে ॥ ২৮ ॥
পরাৎপরতরং ব্রহ্ম যৎপরাৎপরতো হরিঃ ।
পরাৎপরতরো হীশস্তস্মাত্তুল্যোঽধিকো ন হি ॥ ২৯ ॥
এক এব শিবো নিত্যস্ততোঽন্যৎসকলং মৃষা ।
তস্মাৎসর্বান্পরিত্যজ্য ধ্যেয়ান্বিষ্ণ্বাদিকান্সুরান্ ॥ ৩০ ॥
শিব এব সদা ধ্যেয়ঃ সর্বসংসারমোচকঃ ।
তস্মৈ মহাগ্রাসায় মহেশ্বরায় নমঃ ॥ ৩১ ॥
পৈপ্পলাদং মহাশাস্ত্রং ন দেয়ং যস্য কস্যচিৎ ।
নাস্তিকায় কৃতঘ্নায় দুর্বৃত্তায় দুরাত্মনে ॥ ৩২ ॥
দাংভিকায় নৃশংসায় শঠায়ানৃতভাষিণে ।
সুব্রতায় সুভক্তায় সুবৃত্তায় সুশীলিনে ॥ ৩৩ ॥
গুরুভক্তায় দান্তায় শান্তায় ঋজুচেতসে ।
শিবভক্তায় দাতব্যং ব্রহ্মকর্মোক্তধীমতে ॥ ৩৪ ॥
স্বভক্তায়ৈব দাতব্যমকৃতঘ্নায় সুব্রতম্ ।
ন দাতব্যং সদা গোপ্যং যত্নেনৈব দ্বিজোত্তম ॥ ৩৫ ॥
এতৎপৈপ্পলাদং মহাশাস্ত্রং যোঽধীতে শ্রাবয়েদ্দ্বিজঃ
স জন্মমরণেভ্যো মুক্তো ভবতি । যো জানীতে সোঽমৃতৎবং
চ গচ্ছতি । গর্ভবাসাদ্বিমুক্তো ভবতি । সুরাপানাৎপূতো
ভবতি । স্বর্ণস্তেয়াৎপূতো ভবতি । ব্রহ্মহত্যাৎপূতো
ভবতি । গুরুতল্পগমনাৎপূতো ভবতি । স সর্বান্বেদানধীতো
ভবতি । স সর্বান্দেবান্ধ্যাতো ভবতি । স সমস্তমহাপাতকো-
পপাতকাৎপূতো ভবতি । তস্মাদবিমুক্তমাশ্রিতো ভবতি ।
স সততং শিবপ্রিয়ো ভবতি । স শিবসায়ুজ্যমেতি । ন স
পুনরাবর্ততে ন স পুনরাবর্ততে । ব্রহ্মৈব ভবতি । ইত্যাহ
ভগবান্ব্রহ্মেত্যুপনিষৎ ॥
ওঁ ভদ্রং কর্ণেভিঃ শৃণুয়াম দেবাঃ ।
ভদ্রং পশ্যেমাক্ষভির্যজত্রাঃ ।
স্থিরৈরঙ্গৈস্তুষ্টুবাꣳসস্তনূভিঃ ।
ব্যশেম দেবহিতং যদায়ুঃ ।
স্বস্তি ন ইন্দ্রো বৃদ্ধশ্রবাঃ । স্বস্তি নঃ পূষা বিশ্ববেদাঃ ।
স্বস্তি নস্তার্ক্ষ্যো অরিষ্টনেমিঃ । স্বস্তি নো বৃহস্পতির্দধাতু ।
ওঁ শান্তিঃ শান্তিঃ শান্তিঃ ॥
ইতি শরভোপনিষৎসমাপ্তা ॥
– Chant Stotra in Other Languages –
Sharabha Upanishat in Sanskrit – English – Bengali – Gujarati – Kannada – Malayalam – Odia – Telugu – Tamil