॥ Bhartrihari’s Shringara Ashatak Bengali Lyrics ॥
॥ শৃংগারশতকং ভর্তৃহরিবিরচিতম্ ॥
॥ শ্রী ॥
বসংততিলকা
শম্ভুঃ স্বয়ম্ভুহরয়ো হরিণেক্ষণানাং
য়েনাক্রিয়ন্ত সততং গৃহকর্মদাসাঃ ॥
বাচামগোচরচরিত্রবিচিত্রিতায়
তস্মৈ নমো ভগবতে কুসুমায়ুধায় ॥ ১ ॥
শিখরিণী
ক্বচিত্সুভ্রূভঙ্গৈঃ ক্বচিদপি চ লজ্জাপরিণতৈঃ
ক্বচিদ্ ভীতিত্রস্তৈঃ ক্বচিদপি চ লীলাবিলসিতৈঃ ॥
কুমারীণামেভির্বদনকমলৈর্নেত্রচলিতৈঃ
স্ফুরন্নীলাব্জানাং প্রকরপরিপূর্ণা ইব দিশঃ ॥ ২ ॥
অনুষ্টুভ্
মুগ্ধে! ধানুষ্কতা কেয়মপূর্বা ত্বয়ি দৃশ্যতে ।
য়য়া বিধ্যসি চেতাংসি গুণৈরেব ন সায়কৈঃ ॥ ৩ ॥
শিখরিণী
অনাঘ্রাতং পুষ্পং; কিসলয়মলূনং কররুহৈ-
রনাবিদ্ধং রত্নং মধু নবমনাস্বাদিতরসম্ ॥
অখণ্ডং পুণ্যানাং ফলমিব চ তদ্রূপমনঘং
ন জানে ভোক্তারং কমিহ সমুপস্থাস্যতি বিধিঃ ॥ ৪ ॥
%এ Fরোম্ শাকুন্তল
শিখরিণী
স্মিতং কিঞ্চিদ্ বক্ত্রে সরলতরলো দৃষ্টিবিভবঃ
পরিস্পন্দো বাচামভিনববিলাসোক্তিসরসঃ ॥
গতানামারম্ভঃ কিসলয়িতলীলাপরিকরঃ
স্পৃশন্ত্যাস্তারুণ্যং কিমিহ ন হি রম্যং মৃগদৃশঃ? ॥ ৫ ॥
শার্দূলবিক্রীডিত
ব্যাদীর্ঘেণ চলেন বক্রগতিনা তেজস্বিনা ভোগিনা
নীলাব্জদ্যুতিনাঽহিনা বরমহং দষ্টো, ন তচ্চক্ষুষা ॥
দষ্টে সন্তি চিকিত্সকা দিশি-দিশি প্রায়েণ ধর্মার্থিনো
মুগ্ধাক্ষীক্ষণবীক্ষিতস্য ন হি মে বৈদ্যো ন চাপ্যৌষধম্ ॥ ৬ ॥
বংশস্থ
স্মিতেন ভাবেন চ লজ্জয়া ভিয়া
পরাঙ্মুখৈরর্ধকটাক্ষবীক্ষণৈঃ ॥
বচোভিরীর্ষ্যাকলহেন লীলয়া
সমস্তভাবৈঃ খলু বন্ধনং স্ত্রিয়ঃ ॥ ৭ ॥
শালিনী
ভ্রূচাতুর্যাকুঞ্চিতাক্ষাঃ কটাক্ষাঃ
স্নিগ্ধা বাচো লজ্জিতাশ্চৈব হাসাঃ ॥
লীলামন্দং প্রস্থিতং চ স্থিতং চ
স্ত্রীণামেতদ্ ভূষণং চায়ুধং চ ॥ ৮ ॥
শার্দূলবিক্রীডিত
বক্ত্রং চন্দ্রবিডম্বি পঙ্কজপরীহাসক্ষমে লোচনে
বর্ণঃ স্বর্ণমপাকরিষ্ণুরলিনীজিষ্ণুঃ কচানাং চয়ঃ ॥
বক্ষোজাবিভকুম্ভবিভ্রমহরৌ গুর্বী নিতম্বস্থলী
বাচাং হারি চ মার্দবং য়ুবতিষু স্বাভাবিকং মণ্ডনম্ ॥ ৯ ॥
শার্দূলবিক্রীডিত
দ্রষ্টব্যেষু কিমুত্তমং মৃগদৃশঃ প্রেমপ্রসন্নং মুখং
ঘ্রাতব্যেষ্বপি কিং? তদাস্যপবনঃ, শ্রব্যেষু কিং? তদ্বচঃ ॥
কিং স্বাদ্যেষু? তদোষ্ঠপল্লবরসঃ; স্পৃশ্যেষু কিং ? তদ্বপুঃ
ধ্যেয়ং কিং? নবয়ৌবনং সহৃদয়ৈঃ সর্বত্র তদ্বিভ্রমাঃ ॥ ১০ ॥
বসন্ততিলকা
এতাশ্চলদ্বলয়সংহতিমেখলোত্থ
ঝংকারনূপুরপরাজিতরাজহংস্যঃ ॥
কুর্বন্তি কস্য ন মনো বিবশং তরুণ্যো
বিত্রস্তমুগ্ধহরিণীসদৃশৈঃ কটাক্ষৈঃ ॥ ১১ ॥
দোধক
কুঙ্কুমপঙ্ককলঙ্কিতদেহা গৌরপয়োধরকম্পিতহারা ।
নূপুরহংসরণত্পদপদ্মা কং ন বশীকুরুতে ভুবি রামা ? ॥ ১২ ॥
বসন্ততিলকা
নূনং হি তে কবিবরা বিপরীতবোধা
য়ে নিত্যমাহুরবলা ইতি কামিনীস্তাঃ ॥
য়াভির্বিলোলতরতারকদৃষ্টিপাতৈঃ
শক্রাদয়োঽপি বিজিতাস্ত্ববলাঃ কথং তাঃ ? ॥ ১৩ ॥
অনুষ্টুভ্
নূনমাজ্ঞাকরস্তস্যাঃ সুভ্রুবো মকরধ্বজঃ ।
য়তস্তন্নেত্রসঞ্চারসূচিতেষু প্রবর্ততে ॥ ১৪ ॥
শার্দূলবিক্রীডিত
কেশাঃ সংয়মিনঃ শ্রুতেরপি পরং পারং গতে লোচনে
অন্তর্বক্ত্রমপি স্বভাবশুচিভিঃ কীর্ণং দ্বিজানাং গণৈঃ ॥
মুক্তানাং সততাধিবাসরুচিরৌ বক্ষোজকুম্ভাবিমা
বিত্থং তন্বি! বপুঃ প্রশান্তমপি তে ক্ষোভং করোত্যেব নঃ ॥ ১৫ ॥
অনুষ্টুভ্
সতি প্রদীপে সত্যগ্নৌ সত্সু নানামণিষ্বপি ।
বিনা মে মৃগশাবাক্ষ্যা তমোভূতমিদং জগত্ ॥ ১৬ ॥
শার্দূলবিক্রীডিত
উদ্বৃত্তঃ স্তনভার এষ তরলে নেত্রে চলে ভ্রূলতে
রাগাধিষ্ঠিতমোষ্ঠপল্লবমিদং কুর্বন্তু নাম ব্যথাম্ ॥
সৌভাগ্যাক্ষরমালিকেব লিখিতা পুষ্পায়ুধেন স্বয়ং
মধ্যস্থাঽপি করোতি তাপমধিকং রোমাবলী কেন সা ? ॥ ১৭ ॥
অনুষ্টুভ্
মুখেন চন্দ্রকান্তেন মহানীলৈঃ শিরোরুহৈঃ ।
পাণিভ্যাং পদ্মরাগাভ্যাং রেজে রত্নময়ীব সা ॥ ১৮ ॥
অনুষ্টুভ্
গুরুণা স্তনভারেণ মুখচন্দ্রেণ ভাস্বতা ।
শনৈশ্চরাভ্যাং পাদাভ্যাং রেজে গ্রহময়ীব সা ॥ ১৯ ॥
বসংততিলকা
তস্যাঃ স্তনৌ য়দি ঘনৌ, জঘনং চ হারি
বক্ত্রং চ চারু তব চিত্ত কিমাকুলত্বম্ ॥
পুণ্যং কুরুষ্ব য়দি তেষু তবাস্তি বাঞ্ছা
পুণ্যৈর্বিনা ন হি ভবন্তি সমীহিতার্থাঃ ॥ ২০ ॥
বসন্ততিলকা
সম্মোহয়ন্তি মদয়ন্তি বিডম্বয়ন্তি
নির্ভর্ত্সয়ন্তি রময়ন্তি বিষাদয়ন্তি ॥
এতাঃ প্রবিশ্য সদয়ং হৃদয়ং নরাণাং
কিং নাম বামনয়না ন সমাচরন্তি ॥ ২১ ॥
রত্থোদ্ধতা
তাবদেব কৃতিনাং হৃদি স্ফুরত্যেষ নির্মলবিবেকদীপকঃ ।
য়াবদেব ন কুরঙ্গচক্ষুষাং তাড্যতে চটুললোচনাঞ্চলৈঃ ॥ ২২ ॥
মালিনী
বচসি ভবতি সঙ্গত্যাগমুদ্দিশ্য বার্তা
শ্রুতিমুখমুখরাণাং কেবলং পণ্ডিতানাম্ ॥
জঘনমরুণরত্নগ্রন্থিকাঞ্চীকলাপং
কুবলয়নয়নানাং কো বিহাতুং সমর্থঃ ? ॥ ২৩ ॥
আর্যা
স্বপরপ্রতারকোঽসৌ নিন্দতি য়োঽলীকপণ্ডিতো য়ুবতিম্ ।
য়স্মাত্তপসোঽপি ফলং স্বর্গস্তস্যাপি ফলং তথাপ্সরসঃ ॥ ২৪ ॥
অনুষ্টুভ্
অজিতাত্মসু সম্বদ্ধঃ সমাধিকৃতচাপলঃ ।
ভুজঙ্গকুটিলঃ স্তব্ধো ভ্রূবিক্ষেপঃ খলায়তে ॥ ২৫ ॥
স্রগ্ধরা
সন্মার্গে তাবদাস্তে প্রভবতি চ নরস্তাবদেবীন্দ্রিয়াণাং
লজ্জাং তাবদ্বিধত্তে বিনয়মপি সমালম্বতে তাবদেব ॥
ভ্রূচাপাকৃষ্টমুক্তাঃ শ্রবণপথগতা নীলপক্ষ্মাণ এতে
য়াবল্লীলাবতীনাং হৃদি ন ধৃতিমুষো দৃষ্টিবাণাঃ পতন্তি ॥ ২৬ ॥
শার্দূলবিক্রীডিত
বিশ্বামিত্রপরাশরপ্রভৃতয়ো বাতাম্বুপর্ণাশনাঃ
তেঽপি স্ত্রীমুখপঙ্কজং সুললিতং দৃষ্ট্বৈব মোহং গতাঃ ॥
শাল্যন্নং সঘৃতং পয়োদধিয়ুতং য়ে ভুঞ্জতে মানবাঃ
তেষামিন্দ্রিয়নিগ্রহো য়দি ভবেদ্বিন্ধ্যস্তরেত্সাগরম্ ॥ ২৭ ॥
উপজাতি
সুধাময়োঽপি ক্ষয়রোগশান্ত্যৈ নাসাগ্রমুক্তাফলকচ্ছলেন ॥
অনঙ্গসংজীবনদৃষ্টশক্তির্মুখামৃতং তে পিবতীব চন্দ্রঃ ॥ ২৮ ॥
শিখরিণী
অসারাঃ সন্ত্বেতে বিরসবিরসাশ্চৈব বিষয়া
জুগুপ্সন্তাং য়দ্বা ননু সকলদোষাস্পদমিতি ॥
তথাপ্যন্তস্তত্ত্বে প্রণিহিতধিয়ামপ্যনবলঃ
তদীয়ো নাখ্যেয়ঃ স্ফুরতি হৃদয়ে কোঽপি মহিমা ॥ ২৯ ॥
বসংততিলকা
বিস্তারিতং মকরকেতনধীবরেণ
স্ত্রীসংজ্ঞিতং বডিশমত্র ভবাম্বুরাশৌ ॥
য়েনাচিরাত্তদধরামিষলোলমর্ত্য-
মত্স্যাদ্বিকৃষ্য স পচত্যনুরাগবহ্নৌ ॥৩০ ॥
অনুষ্টুভ্
কামিনীকায়কান্তারে স্তনপর্বতদুর্গমে ।
মা সঞ্চর মনঃপান্থ ! তত্রাস্তে স্মরতস্করঃ ॥ ৩১ ॥
শিখরিণী
ন গম্যো মন্ত্রাণাং ন চ ভবতি ভৈষজ্যবিষয়ো
ন চাপি প্রধ্বংসং ব্রজতি বিবিধৈঃ শান্তিকশতৈঃ ॥
ভ্রমাবেশাদঙ্গে কমপি বিদধদ্ভঙ্গমসকৃত্
স্মরাপস্মারোঽয়ং ভ্রময়তি দৃশং ধূর্ণয়তি চ ॥ ৩২ ॥
অনুষ্টুভ্
তাবন্মহত্ত্বং পাণ্ডিত্যং কুলীনত্বং বিবেকিতা ।
য়াবজ্জ্বলতি নাঙ্গেষু হন্ত পঞ্চেষুপাবকঃ ॥ ৩৩ ॥
শার্দূলবিক্রীডিত
স্ত্রীমুদ্রাং ঝষকেতনস্য পরমাং সর্বার্থসম্পত্করীং
য়ে মূঢাঃ প্রবিহায় য়ান্তি কুধিয়ো মিথ্যাফলান্বেষিণঃ ॥
তে তেনৈব নিহত্য নির্দয়তরং নগ্নীকৃতা মুণ্ডিতাঃ
কেচিত্পঞ্চশিখীকৃতাশ্চ জটিলাঃ কাপালিকাশ্চাপরে ॥ ৩৪ ॥
শিখরিণী
কৃশঃ কাণঃ খঞ্জঃ শ্রবণরহিতঃ পুচ্ছবিকলো
ব্রণী পূয়ক্লিন্নঃ কৃমিকুলশতৈরাবৃততনুঃ ॥
ক্ষুধাক্ষামো জীর্ণঃ পিঠরককপালার্পিতগলঃ
শুনীমন্বেতি শ্বা ! হতমপি চ হন্ত্যেব মদনঃ ॥ ৩৫ ॥
বসংততিলকা
মত্তেভকুম্ভদলনে ভুবি সন্তি শূরাঃ
কেচিত্প্রচণ্ডমৃগরাজবধেঽপি দক্ষাঃ ॥
কিন্তু ব্রবীমি বলিনাং পুরতঃ প্রসহ্য
কংদর্পদর্পদলনে বিরলা মনুষ্যাঃ ॥ ৩৬ ॥
হরিণী
পরিমলভৃতো বাতাঃ শাখা নবাঙ্কুরকোটয়ো
মধুরবিরুতোত্কণ্ঠা বাচঃ প্রিয়াঃ পিকপক্ষিণাম্ ॥
বিরলসুরতস্বেদোদ্গারা বধূবদনেন্দবঃ
প্রসরতি মধৌ রাত্র্যাং জাতো ন কস্য গুণোদয়ঃ ? ॥ ৩৭ ॥
দ্রুতবিলম্বিত
মধুরয়ং মধুরৈরপি কোকিলা
কলরবৈর্মলয়স্য চ বায়ুভিঃ ॥
বিরহিণঃ প্রহিণস্তি শরীরিণো
বিপদি হন্ত সুধাঽপি বিষায়তে ॥ ৩৮ ॥
শার্দূলবিক্রীডিত
আবাসঃ কিলকিঞ্চিতস্য দয়িতাঃ পার্শ্বে বিলাসালসাঃ
কর্ণে কোকিলকামিনীকলরবঃ স্মেরো লতামণ্ডপঃ ॥
গোষ্ঠী সত্কবিভিঃ সমং কতিপয়ৈঃ সেব্যাঃ সিতাংশো করাঃ
কেষাঞ্চিত্সুখয়ন্তি ধন্যহৃদয়ং চৈত্রে বিচিত্রাঃ ক্ষপাঃ ॥ ৩৯ ॥
শার্দূলবিক্রীডিত
পান্থস্ত্রীবিরহাগ্নিতীব্রতরতামাতন্বতী মঞ্জরী
মাকন্দেষু পিকাঙ্গনাভিরধুনা সোত্কণ্ঠমালোক্যতে ॥
অপ্যেতে নবপাটলীপরিমলপ্রাগ্ভারপাটচ্চরা
বান্তি ক্লান্তিবিতানতানবকৃতঃ শ্রীখণ্ডশৈলানিলাঃ ॥৪০ ॥
আর্যা
প্রিয়পুরতো য়ুবতীনাং তাবত্পদমাতনোতি হৃদি মানঃ ।
ভবতি ন য়াবচ্চন্দনতরুসুরভির্নির্মলঃ পবনঃ ॥ ৪১ ॥
আর্যা
সহকারকুসুমকেসরনিকরভরামোদমূর্চ্ছিতদিগন্তে ।
মধুরমধুবিধুরমধুপে মধৌ ভবেত্কস্য নোত্কণ্ঠা ॥ ৪২ ॥
বসন্ততিলকা
অচ্ছাচ্ছচন্দনরসার্দ্রকরা মৃগাক্ষ্যো
ধারাগৃহাণি কুসুমানি চ কৌমুদী চ ॥
মন্দো মরুত্সুমনসঃ শুচি হর্ম্যপৃষ্ঠং
গ্রীষ্মে মদং চ মদনং চ বিবর্ধয়ন্তি ॥ ৪৩ ॥
শিখরিণী
স্রজো হৃদ্যামোদা ব্যজনপবনশ্চন্দ্রকিরণাঃ
পরাগঃ কাসারো মলয়জরসঃ সীধু বিশদম্ ॥
শুচিঃ সৌধোত্সঙ্গঃ প্রতনু বসনং পঙ্কজদৃশো
নিদাধার্তা হ্যেতত্সুখমুপলভন্তে সুকৃতিনঃ ॥ ৪৪ ॥
দোধক
তরুণীবৈষোহীপিতকামা বিকসিতজাতীপুষ্পসুগন্ধিঃ ।
উন্নতপীনপয়োধরভারা প্রাবৃট্ কুরুতে কস্য ন হর্ষম্ ? ॥ ৪৫ ॥
মালিনী
বিয়দুপচিতমেঘং ভূময়ঃ কন্দলিন্যো
নবকুটজকদম্বামোদিনো গন্ধবাহাঃ ॥
শিখিকুলকলকেকারাবরম্যা বনান্তাঃ
সুখিনমসুখিনং বা সর্বমুত্কণ্ঠয়ন্তি ॥ ৪৬ ॥
আর্যা
উপরি ঘনং ঘনপটলং তির্যগ্গিরয়োঽপি নর্তিতময়ূরাঃ ।
ক্ষিতিরপি কন্দলধবলা দৃষ্টিং পথিকঃ ক্ব য়াপয়তু ? ॥ ৪৭ ॥
শিখরিণী
ইতো বিদ্যুদ্বল্লীবিলসিতমিতঃ কেতকিতরোঃ
স্ফুরদ্গন্ধঃ প্রোদ্যজ্জলদনিনদস্ফূর্জিতমিতঃ ॥
ইতঃ কেকীক্রিডাকলকলরবঃ পক্ষ্মলদৃশাং
কথং য়াস্যন্ত্যেতে বিরহদিবসাঃ সম্ভৃতরসাঃ ? ॥ ৪৮ ॥
শিখরিণী
অসূচীসংচারে তমসি নভসি প্রৌঢজলদ
ধ্বনিপ্রায়ে তস্মিন্ পততি দৃশদাং নীরনিচয়ে ॥
ইদং সৌদামিন্যাঃ কনককমনীয়ং বিলসিতং
মুদং চ গ্লানিং চ প্রথয়তি পথিষ্বেব সুদৃশাম্ ॥ ৪৯ ॥
শার্দূলবিক্রীডিত
আসারেষু ন হর্ম্যতঃ প্রিততমৈর্যাতুং য়দা শক্যতে
শীতোত্কম্পনিমিত্তমায়তদৃশা গাঢং সমালিঙ্গ্যতে ॥
জাতাঃ শীকরশীতলাশ্চ মরুতশ্চাত্যন্তখেদচ্ছিদো
ধন্যানাং বত দুর্সিনং সুদিনতাং য়াতি প্রিয়াসঙ্গমে ॥ ৫০ ॥
স্রগ্ধরা
অর্ধং নীত্বা নিশায়াঃ সরভসসুরতায়াসখিন্নশ্লথাঙ্গঃ
প্রোদ্ভূতাসহ্যতৃষ্ণো মধুমদনিরতো হর্ম্যপৃষ্ঠে বিবিক্তে ॥
সম্ভোগাক্লান্তকান্তাশিথিলভুজলতাঽঽবর্জিতং কর্করীতো
জ্যোত্স্নাভিন্নাচ্ছধারং ন পিবতি সলিলং শারদং মংদভাগ্যঃ ॥ ৫১ ॥
শার্দূলবিক্রীডিত
হেমন্তে দধিদুগ্ধসর্পিরশনা মাঞ্জিষ্ঠবাসোভৃতঃ
কাশ্মীরদ্রবসান্দ্রদিগ্ধবপুষঃ খিন্না বিচিত্রৈ রতৈঃ ॥
পীনোরুস্তনকামিনীজনকৃতাশ্লেষা গৃহ্যাভ্যন্তরে
তাম্বূলীদলপূগপূরিতমুখা ধন্যাঃ সুখং শেরতে ॥ ৫২ ॥
স্রগ্ধরা
প্রোদ্যত্প্রৌঢপ্রিয়ঙ্গুদ্যুতিভৃতি বিদলত্কুন্দমাদ্যদ্দ্বিরেফে
কালে প্রালেয়বাতপ্রচলবিকসিতোদ্দামমন্দারদাম্নি ॥
য়েষাং নো কণ্ঠলগ্না ক্ষণমপি তুহিনক্ষোদদক্ষা মৃগাক্ষী
তেষামায়াময়ামা য়মসদনসমা য়ামিনী য়াতি য়ূনাম্ ॥ ৫৩ ॥
%স্ শিশিরঋতু
স্রগ্ধরা
চুম্বন্তো গণ্ডভিত্তীরলকবতি মুখে সীত্কৃতান্যাদধানা
বক্ষঃসূত্কঞ্চুকেষু স্তনভরপুলকোদ্ভেদমাপাদয়ন্তঃ ॥
ঊরূনাকম্পয়ন্তঃ পৃথুজঘনতটাত্স্রংসয়ন্তোংঽশুকানি
ব্যক্তং কান্তাজনানাং বিটচরিতকৃতঃ শৈশিরা বান্তি বাতাঃ ॥ ৫৪ ॥
শার্দূলবিক্রীডিত
কেশানাকুলয়ন্ দৃশো মুকুলয়ন্ বাসো বলাদাক্ষিপন্
আতন্বন্ পুলকোদ্গমং প্রকটয়ন্নাবেগকম্পং গতৈঃ ॥
বারংবারমুদারসীত্কৃতকৃতো দন্তচ্ছদান্পীডয়ন্
প্রায়ঃ শৈশির এষ সম্প্রতি মরুত্কান্তাসু কান্তায়তে ॥ ৫৫ ॥
উপজাতি
বিশ্রম্য বিশ্রম্য বনদ্রুমাণাং ছায়াসু তন্বী বিচচার কাচিত্ ।
স্তনোত্তরীয়েণ করোদ্ধৃতেন নিবারয়ন্তী শশিনো ময়ূখান্ ॥ ৫৬ ॥
হরিণী
প্রণয়মধুরাঃ প্রেমোদ্গাঢা রসাদলসাস্ততো
ভণিতিমধুরা মুগ্ধপ্রায়াঃ প্রকাশিতসম্মদাঃ ॥
প্রকৃতিসুভগা বিশ্রম্ভার্হাঃ স্মরোদয়দায়িনো
রহসি কিমপি স্বৈরালাপা হরন্তি মৃগীদৃশাম্ ॥ ৫৭ ॥
উপজাতি
অদর্শনে দর্শনমাত্রকামা
দৃষ্ট্বা পরিষ্বঙ্গসুখৈকলোলাঃ ॥
আলিঙ্গিতায়াং পুনরায়তাক্ষ্যাং
আশাস্মহে বিগ্রহয়োরভেদম্ ॥ ৫৮ ॥
রথোদ্ধতা
মালতী শিরসি জৃম্ভণোন্মুখী
চন্দনং বপুষি কুঙ্কুমান্বিতম্ ॥
বক্ষসি প্রিয়তমা মনোহরা
স্বর্গ এব পরিশিষ্ট আগতঃ ॥ ৫৯ ॥
শার্দূলবিক্রীডিত
প্রাঙ্মামেতি মনাগনাগতরসং জাতাভিলাষাং ততঃ
সব্রীডং তদনু শ্লথীকৃততনু প্রধ্বস্তধৈর্যং পুনঃ ॥
প্রেমার্দ্রং স্পৃহণীয়নির্ভররহঃক্রীডাপ্রগল্ভং ততো
নিঃশঙ্কাঙ্গবিকর্ষণাধিকসুখং রম্যং কুলস্ত্রীরতম্ ॥ ৬০ ॥
মালিনী
উরসি নিপতিতানাং স্রস্তধম্মিল্লকানাং
মুকুলিতনয়নানাং কিঞ্চিদুন্মীলিতানাম্ ॥
উপরিসুরতখেদস্বিন্নগণ্ডস্থলীনাং
অধরমধু বধূনাং ভাগ্যবন্তঃ পিবন্তি ॥ ৬১ ॥
অনুষ্টুভ্
উন্মত্তপ্রেমসংরম্ভাদারভন্তে য়দঙ্গনাঃ ॥
তত্র প্রত্যূহমাধাতুং ব্রহ্মাঽপি খলু কাতরঃ ॥ ৬২ ॥
আর্যা
আমীলিতনয়নানাং য়ত্সুরতরসোঽনু সংবিদং ভাতি ।
মিথুনৈর্মিথোঽবধারিতমবিতথমিদমেব কামনির্বহণম্ ॥ ৬৩ ॥
বসংততিলকা
মত্তেভকুম্ভপরিণাহিনি কুঙ্কুমার্দ্রে
কান্তাপয়োধরতটে রসখেদখিন্নঃ ॥
বক্ষো নিধায় ভুজপঞ্জরমধ্যবর্তী
ধন্যঃ ক্ষপাং ক্ষপয়তি ক্ষণলব্ধনিদ্রঃ ॥ ৬৪ ॥
অনুষ্টুভ্
এতত্কামফলং লোকে য়দ্দ্বয়োরেকচিত্ততা ।
অন্যচিত্তকৃতে কামে শবয়োরেব সঙ্গমঃ ॥ ৬৫ ॥
শালিনী
একো দেবঃ কেশবো বা শিবো বা হ্যেকং মিত্রং ভূপতির্বা য়তির্বা ।
একো বাসঃ পত্তনে বা বনে বা হ্যেকা ভার্যা সুংদরী বা দরী বা ॥ ৬৫-অ ॥
উপজাতি
মাত্সর্যমুত্সার্য বিচার্য কার্যমার্যাঃ সমর্যাদমিদং বদন্তু ॥
সেব্যা নিতম্বাঃ কিমু ভূধরণামুত স্মরস্মেরবিলাসিনীনাম্ ॥ ৬৬ ॥
অনুষ্টুভ্
আবাসঃ ক্রিয়তাং গাঙ্গে পাপবারিণি বারিণি ।
স্তনমধ্যে তরুণ্যা বা মনোহারিণি হারিণি ॥ ৬৭ ॥
মালিনী
দিশঃ বনহরিণীভ্যঃ স্নিগ্ধবংশচ্ছবীনাং
কবলমুপলকোটিচ্ছিন্নমূলং কুশানাম্ ॥
শুকয়ুবতিকপোলাপাণ্ডু তাম্বূলবল্লী-
দলমরূণনখাগ্রৈঃ পাটিতং বা বধূভ্যঃ ॥ ৬৯ ॥
স্রগ্ধরা
সংসারেঽস্মিন্নসারে পরিণতিতরলে দ্বে গতী পণ্ডিতানাং
তত্ত্বজ্ঞানামৃতাম্ভঃপ্লবলুলিতধিয়াং য়াতু কালঃ কথঞ্চিত্ ॥
নোচেন্মুগ্ধাঙ্গনানাং স্তনজঘনভরাভোগসম্ভোগিনীনাং
স্থূলোপস্থস্থলীষু স্থগিতকরতলস্পর্শলোলোদ্যতানাম্ ॥ ৭০ ॥
শিখরিণী
ভবন্তো বেদান্তপ্রণিহিতধিয়ামাপ্তগুরবো
বিশিত্রালাপানাং বয়মপি কবীনামনুচরাঃ ॥
তথাপ্যেতদ্ ব্রূমো ন হি পরহিতাত্পুণ্যমধিকং
ন চাস্মিন্সংসারে কুবলয়দৃশো রম্যমপরম্ ॥ ৭১ ॥
মালিনী
কিমিহ বহুভিরুক্তৈর্যুক্তিশূন্যৈঃ প্রলাপৈঃ
দ্বয়মিহ পুরুষাণাং সর্বদা সেবনীয়ম্ ॥
অভিনবমদলীলালালসং সুংদরীণাং
স্তনভরপরিখিন্নং য়ৌবনং ব বনং বা ॥ ৭২ ॥
স্রগ্ধরা
রাগস্যাগারমেকং নরকশতমহাদুঃখসম্প্রাপ্তিহেতুঃ
মোহস্যোত্পত্তিবীজং জলধরপটলং জ্ঞানতারাধিপস্য ॥
কন্দর্পস্যৈকমিত্রং প্রকটিতবিবিধস্পষ্টদোষপ্রবন্ধং
লোকেঽস্মিন্ন হ্যনর্থব্রজকুলভবনং য়ৌবনাদন্যদস্তি ॥ ৭৩ ॥
শার্দূলবিক্রীডিত
শৃংগারদ্রুমনীরদে প্রসৃমরক্রীডারস স্রোতসি
প্রদ্যুম্নপ্রিয়বান্ধবে চতুরতামুক্তাফলোদন্বতি ॥
তন্বীনেত্রচকোরপার্বণবিধৌ সৌভাগ্যলক্ষ্মীনিধৌ
ধন্যঃ কোঽপি ন বিক্রিয়াং কলয়তি প্রাপ্তে নবে য়ৌবনে ॥ ৭৪ ॥
স্রগ্ধরা
রাজংস্তৃষ্ণাম্বুরাশের্ন হি জগতি গতঃ কশ্চিদেবাবসানং
কো বার্থোঽর্থৈ প্রভূতৈঃ স্ববপুষি গলিতে য়ৌবনে সানুরাগে ॥
গচ্ছামঃ সদ্ম তাবদ্বিকসিতকুমুদেন্দীবরালোকিনীনাং
য়াবচ্চাক্রম্য রূপং ঝটিনি ন জরয়া লুপ্যতে প্রেয়সীনাম্ ॥ ৭৫ ॥
শার্দূলবিক্রীডিত
জান্ত্যন্ধায় চ দুর্মুখায় চ জরাজীর্ণাখিলাঙ্গায় চ
গ্রামীণায় চ দুষ্কুলায় চ গলত্কুষ্ঠাভিভূতায় চ ॥
য়চ্ছন্তীষু মনোহরং নিজবপুর্লক্ষ্মীলবাকাঙ্ক্ষয়া
পণ্যস্ত্রীষু বিবেককল্পলতিকাশস্ত্রীষু রজ্যেত কঃ ? ॥ ৭৬ ॥
অনুষ্টুভ্
বেশ্যাঽসৌ মদনজ্বালা রূপেন্ধনবিবর্ধিতা ।
কামিভির্যত্র হূয়ন্তে য়ৌবনানি ধনানি চ ॥ ৭৭ ॥
আর্যা
কশ্চুম্বতি কুলপুরুষো বেশ্যাধরপল্লবং মনোজ্ঞমপি ।
চারভটচৌরচেটকনটবিটনিষ্ঠীবনশরাবম্ ? ॥ ৭৮
স্রগ্ধরা
সংসারেঽস্মিন্নসারে কুনৃপতিভবনদ্বারসেবাবলম্ব
ব্যাসঙ্গধ্বস্তধৈর্যং কথমমলধিয়ো মানসং সংবিদধ্যু: ? ॥
য়দ্যেতাঃ প্রোদ্যদিন্দুদ্যুতিনি বয়ভৃতো ন স্যুরম্ভোজনেত্রাঃ
প্রেঙ্খত্কাঞ্চীকলাপাঃ স্তনভরবিনমন্মধ্যভাজস্তরুণ্যঃ ? ॥ ৭৯ ॥
শার্দূলবিক্রীডিত
সিদ্ধাধ্যাসিতকন্দরে হরবৃষস্কন্ধাবরুগ্ণদ্রুমে
গঙ্গাধৌতশিলাতলে হিমবতঃ স্থানে স্থিতে শ্রেয়সি ॥
কঃ কুর্বীত শিরঃ প্রমাণমলিনং ম্লানং মনস্বী জনো
য়দ্বিত্রস্তরকুরঙ্গশাবনয়না ন স্যুঃ স্মরাস্ত্রং স্ত্রিয়ঃ ॥ ৮০ ॥
অনুষ্টুভ্
সংসারোদধিনিস্তার পদবী ন দবীয়সী ।
অন্তরা দুস্তরা ন স্যুর্যদি রে মদিরেক্ষণা ॥ ৮১ ॥
ইংদ্রবজ্রা
সত্যং জনা বচ্মি ন পক্ষপাতাল্লোকেষু সপ্তস্বপি তথ্যমেতত্ ।
নান্যন্মনোহারি নিতম্বিনীভ্যো দুঃখৈকহেতুর্ন চ কশ্চিদন্যঃ ॥ ৮২ ॥
শার্দূলবিক্রীডিত
কান্তেত্যুত্পললোচনেতি বিপুলশ্রোণীভরেত্যুত্সুকঃ
পীনোত্তুঙ্গপয়োধরেতি সুমুখাম্ভোজেতি সুভ্রূরিতি ॥
দৃষ্ট্বা মাদ্যতি মোদতেঽভিরমতে প্রস্তৌতি বিদ্বানপি
প্রত্যক্ষাশুচিভস্ত্রিকাং স্ত্রিয়মহো মোহস্য দুশ্চেষ্টিতম্ ! ॥ ৮৩ ॥
অনুষ্টুভ্
স্মৃতা ভবতি তাপায় দৃষ্ট্বা চোন্মাদবর্ধিনী ।
স্পৃষ্টা ভবতি মোহায় ! সা নাম দয়িতা কথম্ ? ॥ ৮৪ ॥
অনুষ্টুভ্
তাবদেবামৃতময়ী য়াবল্লোচনগোচরা ।
চক্ষুঃপথাদতীতা তু বিষাদপ্যতিরিচ্যতে ॥ ৮৫ ॥
অনুষ্টুভ্
নামৃতং ন বিষং কিঞ্চিদেকাং মুক্ত্বা নিতম্বিনীম্ ।
সৈবামৃতরুতা রক্তা বিরক্তা বিষবল্লরী ॥ ৮৬ ॥
স্রগ্ধরা
আবর্তঃ সংশয়ানামবিনয়ভবনং পত্তনং সাহসানাং
দোষাণাং সংবিধানং কপটশতময়ং ক্ষেত্রমপ্রত্যয়ানাম্ ॥
স্বর্গদ্বারস্য বিঘ্নৌ নরকপুরমুখং সর্বমায়াকরণ্ডং
স্ত্রীয়ন্ত্রং কেন সৃষ্টং বিষমমৃতময়ং প্রাণিলোকস্য পাশঃ ॥ ৮৭ ॥
শার্দূলবিক্রীডিত
নো সত্যেন মৃগাঙ্ক এষ বদনীভূতো ন চেন্দীবর-
দ্বন্দ্বং লোচনতাং গতং ন কনকৈরপ্যঙ্গয়ষ্টিঃ কৃতা ॥
কিং ত্বেবং কবিভিঃ প্রতারিতমনাস্তত্ত্বং বিজানন্নপি
ত্বঙ্মাংসাস্থিময়ং বপুর্মৃগদৃশাং মন্দো জনঃ সেবতে ॥ ৮৮ ॥
উপজাতি
লীলাবতীনাং সহজা বিলাসাস্ত এব মূঢস্য হৃদি স্ফুরন্তি ॥
রাগো নলিন্যা হি নিসর্গসিদ্ধস্তত্র ভ্রমত্যেব বৃথা ষডঙ্ঘ্রিঃ ॥ ৮৯ ॥
শিখরিণী
য়দেতত্পূর্ণেন্দুদ্যুতিহরমুদারাকৃতিবরং
মুখাব্জং তন্বঙ্গ্যাঃ কিল বসতি তত্রাধরমধু ॥
ইদং তত্কিম্পাকদ্রুমফলমিবাতীব বিরসং
ব্যতীতেঽস্মিন্ কালে বিষমিব ভবিষ্যত্যসুখদম্ ॥ ৯০ ॥
শার্দূলবিক্রীডিত
অগ্রাহ্যং হৃদয়ং য়থৈব বদনং য়দ্দর্পণান্তর্গতং
ভাবঃ পর্বতসূক্ষ্মমার্গবিষমঃ স্ত্রীণাং ন বিজ্ঞায়তে ॥
চিত্তং পুষ্করপত্রতোয়তরলং বিদ্বদ্ভিরাশংসিতং
নারী নাম বিষাঙ্কুরৈরিব লতা দোষৈঃ সমং বর্ধিতা ॥ ৯১ ॥
অনুষ্টুভ্
জল্পন্তি সার্ধমন্যেন পশ্যন্ত্যন্যং সবিভ্রমম্ ।
হৃদ্গতং চিন্তয়ন্ত্যন্যং প্রিয়ঃ কো নাম য়োষিতাম্ ? ॥ ৯২ ॥
বৈতালীয়
মধু তিষ্ঠতি বাচি য়োষিতাং হৃদি হালাহলমেব কেবলম্ ।
অত এব নিপীয়তেঽধরো হৃদয়ং মুষ্টিভিরেব তাড্যতে ॥ ৯৩ ॥
মালিনী
ইহ হি মধুরগীতং নৃত্যমেতদ্রসোঽয়ং
স্ফুরতি পরিমলোঽসৌ স্পর্শ এষ স্তনানাম্ ।
ইতি হতপরমার্থৈরিন্দ্রিয়ৈর্ভাম্যমাণঃ
স্বহিতকরণদক্ষৈঃ পঞ্চভির্বঞ্চিতোঽসি ॥ ৯৪ ॥
মন্দাক্রান্তা
শাস্ত্রজ্ঞোঽপি প্রথিতবিনয়োঽপ্যাত্মবোধোঽপি বাঢং
সংসারেঽস্মিন্ভবতি বিরলো ভাজনং সদ্গতীনাম্ ॥
য়েনৈতস্মিন্নিরয়নগরদ্বারমুদ্ঘাটয়ন্তী
বামাক্ষীণাং ভবতি কুটিলা ভ্রূলতা কুঞ্চিকেব ॥ ৯৫ ॥
শার্দূলবিক্রীডিত
উন্মীলত্ত্রিবলিতরঙ্গনিলয়া প্রোত্তুঙ্গপীনস্তন-
দ্বন্দ্বেনোদ্যতচক্রবাকমিথুনা বক্ত্রাম্বুজোদ্ভাসিনী ॥
কান্তাকারধরা নদীয়মভিতঃ ক্রূরাশয়া নেষ্যতে
সংসারার্ণবমজ্জনং য়দি তদা দূরেণ সন্ত্যজ্যতাম্ ॥ ৯৬ ॥
হরিণী
অপসর সখে দূরাদস্মাত্কটাক্ষবিষানলাত্
প্রকৃতিকুটিলাদ্যোষিত্সর্পাদ্বিলাসফণাভৃতঃ ॥
ইতরফণিনা দষ্টঃ শক্যশ্চিকিত্সিতুমৌষধে-
শ্চতুরবনিতাভোগিগ্রস্তং ত্যজন্তি হি মন্ত্রিণঃ ॥ ৯৭ ॥
পুষ্পিতাগ্রা
ইদমনুচিতমক্রমশ্চ পুংসাং
য়দিহ জরাস্বপি মান্মথা বিকারাঃ ।
য়দপি চ ন কৃতং নিতম্বিনীনাং
স্তনপতনাবধি জীবিতং রতং বা ॥ ৯৮ ॥
বসন্ততিলকা
ধন্যাস্ত এব তরলায়তলোচনানাং
তারুণ্যদর্পঘনপীনপয়োধরাণাম্ ॥
ক্ষামোদরোপরিলসত্ত্রিবলীলতানাং
দৃষ্ট্বাঽঽকৃতিং বিকৃতিমেতি মনো ন য়েষাম্ ॥ ৯৯ ॥
আর্যা
বিরহোঽপি সঙ্গমঃ খলু পরস্পরং সঙ্গতং মনো য়েষাম্ ।
হৃদয়মপি বিঘট্টিতং চেত্সঙ্গো বিরহং বিশেষয়তি ॥ ১০০ ॥
রথোদ্ধতা
কিং গতেন য়দি সা ন জীবতি
প্রাণিতি প্রিয়তমা তথাঽপি কিম্ ॥
ইত্যুদীর্য নবমেঘদর্শনে
ন প্রয়াতি পথিকঃ স্বমন্দিরম্ ॥ ১০১ ॥
হরিণী
বিরমত বুধা য়োষিত্সঙ্গাত্ সুখাত্ক্ষণভঙ্গুরাত্
কুরুত করুণামৈত্রীপ্রজ্ঞাবধূজনসঙ্গমম্ ॥
ন খলু নরকে হারাক্রান্তং ঘনস্তনমণ্ডলং
শরণমথবা শ্রোণীবিম্বং রণন্মণিমেখলম্ ॥ ১০২ ॥
শিখরিণী
য়দা য়োগাভ্যাসব্যসনবশয়োরাত্মমনসো-
রবিচ্ছিন্না মৈত্রী স্ফুরতি য়মিনস্তস্য কিমু তৈঃ ॥
প্রিয়াণামালাপৈরধরমধুভির্বক্ত্রবিধুভিঃ
সনিঃশ্বাসামোদৈঃ সকুচকলশাশ্লেষসুরতৈঃ ? ॥ ১০৩ ॥
শিখরিণী
সুধাশুভ্রং ধাম স্ফুরদমলরশ্মিঃ শশধরঃ
প্রিয়াবক্ত্রাম্ভোজং মলয়জরসশ্চাতিসুরভিঃ ॥
স্রজো হৃদ্যামোদাস্তদিদমখিলং রাগিণি জনে
করোত্যন্তঃক্ষোভং ন তু বিষয়সংসর্গবিমুখে ॥ ১০৪ ॥
মংদাক্রান্তা
বালে লীলামুকুলিতমমী সুংদরা দৃষ্টিপাতাঃ
কিং ক্ষিপ্যন্তে বিরম বিরম ব্যর্থ এষ শ্রমস্তে ॥
সম্প্রত্যন্ত্যে বয়সি বিরতং বাল্যমাস্থা বনান্তে
ক্ষীণো মোহস্তৃণমিব জগজ্জালমালোকয়ামঃ ॥ ১০৫ ॥
শিখরিণী
ইয়ং বালা মাং প্রত্যনবরতমিন্দীবরদল-
প্রভাচোরং চক্ষুঃ ক্ষিপতি কিমভিপ্রেতমনয়া ? ॥
গতো মোহোঽস্মাকং স্মরশবরবাণব্যতিকর-
জ্বলজ্জ্বালাঃ শাংতাস্তদপি ন বরাকী বিরমতি ॥ ১০৬ ॥
শার্দূলবিক্রীডিত
কিং কন্দর্প ! শরং কদর্থয়সি রে কোদণ্ডঝঙ্কারিতৈ ?
রে রে কোকিল কোমলং কলরবং কিং বা বৃথা জল্পসি ॥
মুগ্ধে ! স্নিগ্ধবিদগ্ধমুগ্ধমধুরৈর্লোলৈঃ কটাক্ষৈরলং
চেতঃ সম্প্রতি চংদ্রচূডচরণধ্যানামৃতে বর্ততে ॥১০৭ ॥
শিখরিণী
য়দাঽঽসীদজ্ঞানং স্মরতিমিরসঞ্চারজনিতং
তদা সর্বং নারীময়মিদমশেষং জগদভূত্ ।
ইদানীমস্মাকং পটুতরবিবেকাঞ্জনদৃশাং
সমীভূতা দৃষ্টিস্ত্রিভুবনমপি ব্রহ্ম মনুতে ॥ ১০৮ ॥
ভর্তৃহরিকৃত শতকত্রয়ী