॥ Sri Gokula Natha Ashtakam Bengali Lyrics ॥
॥ শ্রীগোকুলনাথাষ্টকম্ ॥
ভবভীতজনাখিলভীতিহরং
হরবন্দিতনন্দতনূজরতম্ ।
রতবৃদ্ধগুরুদ্বিজভৃত্যজনং
জনদুর্লভমার্গসুবোধকরম্ ॥ ১ ॥
করপদ্মসুসেবিতশৈলধরং
ধরণীতলবিশ্রুতসাধুগুণম্ ।
গুণসিন্ধুবিমর্দিতদুষ্টমুখং
মুখকল্পিতমার্গনিবৃত্তিপরম্ ॥ ২ ॥
পরমপ্রিয়মঙ্গলবেষধরং
বরবন্ধুসুহৃত্সুতলব্ধসুখম্ ।
সুখসাগরমম্বুজচারুমুখং
মুখপঙ্কজকীর্তিতকৃষ্ণকথম্ ॥ ৩ ॥
কথনীয়গুণামৃতবারিনিধিং
নিধিসেবিতমর্চিতপদ্মপদম্ ।
পদপঙ্কজসংশ্রিতবিজ্ঞবুধং
বুধবিঠ্ঠলনাথচতুর্থসুতম্ ॥ ৪ ॥
সুতরাং করুণাব্ধিমনন্তগুণং
গুণরত্নবিরাজিতশুদ্ধতনুম্ ।
তনুরত্নবশীকৃতনন্দসুতং
সুতমিত্রকলত্রসুসেব্যপদম্ ॥ ৫ ॥
পদপঙ্কজপাবিতসাধুজনং
জনহেতুগৃহীতমনুষ্যতনুম্ ।
তনুকান্তিতিরস্কৃতপঞ্চশরং
শরণাগতরক্ষিতভক্তজনম্ ॥ ৬ ॥
জনতোষণপোষণদত্তহৃদং
হৃদয়ার্পিতগোপবধূরমণম্ ।
রমণীয়তরামলভক্তিকৃতং
কৃতকৃষ্ণকথামৃততৃপ্তজনম্ ॥ ৭ ॥
জনবাঞ্ছিতকামদরত্নগুণং
গুণভূষণভূষিতলোকগুরুম্ ।
গুরুগোকুলনাথমুপাস্যমহং
মহতাং পরিসেবিতমাকলয়ে ॥ ৮ ॥
শ্রীমদ্গোকুলনাথানামষ্টকং য়ঃ পঠেন্নরঃ ।
গোকুলেশপদাম্ভোজভক্তিং স লভতে পরাম্ ॥ ৯॥
ইতি সিংহাবলোকয়মকগর্ভ শ্রীগোকুলনাথাষ্টকং সম্পূর্ণম্ ।
– Chant Stotra in Other Languages –
Sri Vishnu Slokam » Sri Gokula Natha Ashtakam Lyrics in Sanskrit » English » Gujarati » Kannada » Malayalam » Odia » Telugu » Tamil