॥ Krishna Lahari Stotram Kannada Lyrics ॥
॥ ಶ್ರೀ ಕೃಷ್ಣಲಹರೀ ಸ್ತೋತ್ರಂ ॥
ಕದಾ ಬೃಂದಾರಣ್ಯೇ ವಿಪುಲಯಮುನಾತೀರಪುಳಿನೇ
ಚರಂತಂ ಗೋವಿಂದಂ ಹಲಧರಸುದಾಮಾದಿಸಹಿತಮ್ ।
ಅಹೋ ಕೃಷ್ಣ ಸ್ವಾಮಿನ್ ಮಧುರಮುರಳೀಮೋಹನ ವಿಭೋ
ಪ್ರಸೀದೇತಿ ಕ್ರೋಶನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ ೧ ॥
ಕದಾ ಕಾಳಿಂದೀಯೈಃ ಹರಿಚರಣಮುದ್ರಾಂಕಿತತಟೈಃ
ಸ್ಮರನ್ಗೋಪೀನಾಥಂ ಕಮಲನಯನಂ ಸಸ್ಮಿತಮುಖಮ್ ।
ಅಹೋ ಪೂರ್ಣಾನಂದಾಂಬುಜವದನ ಭಕ್ತೈಕಲಲನ
ಪ್ರಸೀದೇತಿ ಕ್ರೋಶನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ ೨ ॥
ಕದಾಚಿತ್ಖೇಲಂತಂ ವ್ರಜಪರಿಸರೇ ಗೋಪತನಯೇ
ಕುತಶ್ಚಿತ್ಸಂಪ್ರಾಪ್ತಂ ಕಿಮಪಿ ಭಯದಂ ಹರವಿಭೋ ।
ಅಯೇ ರಾಧೇ ಕಿಂ ವಾ ಹರಸಿ ರಸಿಕೇ ಕಂಚುಕಯುಗಂ
ಪ್ರಸೀದೇತಿ ಕ್ರೋಶನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ ೩ ॥
ಕದಾಚಿದ್ಗೋಪೀನಾಂ ಹಸಿತಚಕಿತಂ ಸ್ನಿಗ್ಧನಯನಂ
ಸ್ಥಿತಂ ಗೋಪೀಬೃಂದೇ ನಟಮಿವ ನಟಂತಂ ಸುಲಲಿತಮ್ ।
ಸುರಾಧೀಶೈಸ್ಸರ್ವೈಃ ಸ್ತುತಪದಮಿಮಂ ಶ್ರೀಹರಿಮಿತಿ
ಪ್ರಸೀದೇತಿ ಕ್ರೋಶನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ ೪ ॥
ಕದಾಚಿತ್ಸಚ್ಛಾಯಾಶ್ರಿತಮಭಿಮಹಾಂತಂ ಯದುಪತಿಂ
ಸಮಾಧಿಸ್ವಚ್ಛಾಯಾಂಚಲ ಇವ ವಿಲೋಲೈಕಮಕರಮ್ ।
ಅಯೇ ಭಕ್ತೋದಾರಾಂಬುಜವದನ ನಂದಸ್ಯ ತನಯ
ಪ್ರಸೀದೇತಿ ಕ್ರೋಶನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ ೫ ॥
ಕದಾಚಿತ್ಕಾಳಿಂದ್ಯಾಂ ತಟತರುಕದಂಬೇ ಸ್ಥಿತಮಿಮಂ
ಸ್ಮಯಂತಂ ಸಾಕೂತಂ ಹೃತವಸನಗೋಪೀಸ್ತನತಟಮ್ ।
ಅಹೋ ಶಕ್ರಾನಂದಾಂಬುಜವದನ ಗೋವರ್ಧನಧರಂ
ಪ್ರಸೀದೇತಿ ಕ್ರೋಶನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ ೬ ॥
ಕದಾಚಿತ್ಕಾಂತಾರೇ ವಿಜಯಸಖಮಿಷ್ಟಂ ನೃಪಸುತಂ
ವದಂತಂ ಪಾರ್ಥೇಂದ್ರಂ ನೃಪಸುತ ಸಖೇ ಬಂಧುರಿತಿ ಚ ।
ಭ್ರಮಂತಂ ವಿಶ್ರಾಂತಂ ಶ್ರಿತಮುರಳಿ ರಮ್ಯಂ ಹರಿಮಿಮಂ
ಪ್ರಸೀದೇತಿ ಕ್ರೋಶನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ ೭ ॥
ಕದಾ ದ್ರಕ್ಷ್ಯೇ ಪೂರ್ಣಂ ಪುರುಷಮಮಲಂ ಪಂಕಜದೃಶಂ
ಅಹೋ ವಿಷ್ಣೋ ಯೋಗಿನ್ ರಸಿಕಮುರಳೀಮೋಹನ ವಿಭೋ ।
ದಯಾಂ ಕರ್ತುಂ ದೀನೇ ಪರಮಕರುಣಾಬ್ಧೇ ಸಮುಚಿತಂ
ಪ್ರಸೀದೇತಿ ಕ್ರೋಶನ್ನಿಮಿಷಮಿವ ನೇಷ್ಯಾಮಿ ದಿವಸಾನ್ ॥ ೮ ॥
ಇತಿ ವಾಸುದೇವಾನಂದಸರಸ್ವತೀಕೃತಮ್ ಶ್ರೀಕೃಷ್ಣಲಹರೀಸ್ತೋತ್ರಂ ।