॥ Sri Krishnashtakam 8 Telugu Lyrics ॥
॥ శ్రీకృష్ణాష్టకమ్ 8 ॥
శ్రీగోపగోకులవివర్ధన నన్దసూనో
రాధాపతే వ్రజజనార్తిహరావతార ।
మిత్రాత్మజాతటవిహారణ దీనబన్ధో
దామోదరాచ్యుత విభో మమ దేహి దాస్యమ్ ॥ ౧ ॥
శ్రీరాధికారమణ మాధవ గోకులేన్ద్ర-
సూనో యదూత్తమ రమార్చితపాదపద్మ ।
శ్రీశ్రీనివాస పురుషోత్తమ విశ్వమూర్త్తే
గోవిన్ద యాదవపతే మమ దేహి దాస్యమ్ ॥ ౨ ॥
గోవర్ధనోద్ధరణ గోకులవల్లభాద్య
వంశోద్భటాలయ హరేఽఖిలలోకనాథ ।
శ్రీవాసుదేవ మధుసూదన విశ్వనాథ
విశ్వేశ గోకులపతే మమ దేహి దాస్యమ్ ॥ ౩ ॥
రాసోత్సవప్రియ బలానుజ సత్త్వరాశే
భక్తానుకమ్పితభవార్తిహరాధినాథ ।
విజ్ఞానధామ గుణధామ కిశోరమృర్తే
సర్వేశ మఙ్గలతనో మమ దేహి దాస్యమ్ ॥ ౪ ॥
సద్ధర్మపాల గరుడాసన యాదవేన్ద్ర
బ్రహ్మణ్యదేవ యదునన్దన భక్తిదాన
సఙ్కర్షణప్రియ కృపాలయ దేవ విష్ణో
సత్యప్రతిజ్ఞ భగవన్ మమ దేహి దాస్యమ్ ॥ ౫ ॥
గోపీజనప్రియతమ క్రియయైకలభ్య
రాధావరప్రియ వరేణ్య శరణ్యనాథా ।
ఆశ్చర్యబాల వరదేశ్వర పూర్ణకామ
విద్వత్తమాశ్రయ విభో మమ దేహి దాస్యమ్ ॥ ౬ ॥
కన్దర్పకోటిమదహారణ తీర్థకీర్త్తే
విశ్వైకవన్ద్య కరుణార్ణవతీర్థపాద ।
సర్వజ్ఞ సర్వవరదాశ్రయకల్పవృక్ష
నారాయణాఖిలగురో మమ దేహి దాస్యమ్ ॥ ౭ ॥
వృన్దావనేశ్వర ముకున్ద మనోజ్ఞవేష
వంశీవిభూషితకరామ్బుజ పద్మనేత్ర ।
విశ్వేశ కేశవ వ్రజోత్సవ భక్తివశ్య
దేవేశ పాణ్డవపతే మమ దేహి దాస్యమ్ ॥ ౮ ॥
శ్రీకృష్ణస్తవరత్నమష్టకమిదం సర్వార్థదం శృణ్వతాం
భక్తానాం చ ప్రియం హరేశ్చ నితరాం యో వై పఠేత్పావనమ్ ।
తస్యాసౌ వ్రజరాజసూనురతులాం భక్తిం స్వపాదామ్బుజే
సత్సేవ్యే ప్రదదాతి గోకులపతిః శ్రీరాధికావల్లభః ॥ ౯ ॥
॥ ఇతి శ్రీమద్వల్లభాచార్యవిరచితం శ్రీకృష్ణాష్టకం సమ్పూర్ణమ్ ॥
– Chant Stotra in Other Languages –
Sri Krishna Mantra » Sri Krishnashtakam 8 Lyrics in Sanskrit » English » Bengali » Gujarati » Kannada » Malayalam » Odia » Tamil