॥ Manmahaprabhorashtakam Shrisvarupacharitamritam Bengali Lyrics ॥
॥ শ্রীমন্মহাপ্রভোরষ্টকম্ শ্রীস্বরূপচরিতামৃতম্ ॥
স্বরূপ ! ভবতো ভবত্বয়মিতি স্মিতস্নিগ্ধয়া
গিরৈব রঘুনাথমুত্পুলকিগাত্রমুল্লাসয়ন্ ।
রহস্যুপদিশন্ নিজপ্রণয়গূঢমুদ্রাং স্বয়ং
বিরাজতু চিরায় মে হৃদি স গৌরচন্দ্রঃ প্রভুঃ ॥ ১ ॥
স্বরূপ ! মম হৃদ্ব্রণং বত বিবেদ রূপঃ কথং
লিলেখ য়দয়ং পঠ ত্বমপি তালপত্রেঽক্ষরম্ ।
ইতি প্রণয়বেল্লিতং বিদধদাশু রূপান্তরং
বিরাজতু চিরায় মে হৃদি স গৌরচন্দ্রঃ প্রভুঃ ॥ ২ ॥
স্বরূপ ! পরকীয়সত্প্রবরবস্তুনাশেচ্ছতাং
দধজ্জন ইহ ত্বয়া পরিচিতো ন বেতীক্ষয়ম্ ।
সনাতনমুদিত্য বিস্মিতমুখং মহাবিস্মিতং
বিরাজতু চিরায় মে হৃদি স গৌরচন্দ্রঃ প্রভুঃ ॥ ৩ ॥
স্বরূপ ! হরিনাম য়জ্ জগদঘোষয়ং তেন কিং
ন বাচয়িতুমপ্যথাশকমিমং শিবানন্দজম্ ।
ইতি স্বপদলেহনৈঃ শিশুমচীকরন্ য়ঃ কবিং
বিরাজতু চিরায় মে হৃদি স গৌরচন্দ্রঃ প্রভুঃ ॥ ৪ ॥
স্বরূপ ! রসরীতিরম্বুজদৃশাং ব্রজে ভণ্যতাং
ঘনপ্রণয়মানজা শ্রুতিয়ুগং মমোত্কণ্ঠতে ।
রমা য়দিহ মানিনী তদপি লোকয়েতি ব্রুবন্
বিরাজতু চিরায় মে হৃদি স গৌরচন্দ্রঃ প্রভুঃ ॥ ৫ ॥
স্বরূপ ! রসমন্দিরং ভবসি মন্মুদামাস্পদং
ত্বমত্র পুরুষোত্তমে ব্রজভুবীব মে বর্তসে ।
ইতি স্বপরিরম্ভণৈঃ পুলকিনং ব্যধাত্তং চ য়ো
বিরাজতু চিরায় মে হৃদি স গৌরচন্দ্রঃ প্রভুঃ ॥ ৬ ॥
স্বরূপ ! কিমপীক্ষিতং ক্ব নু বিভো নিশি স্বপ্নতঃ
প্রভো কথয় কিং নু তন্নবয়ুবা বরাম্ভোধরঃ ।
ব্যধাত্কিময়মীক্ষ্যতে কিমু ন হীত্যগাত্তাং দশাং
বিরাজতু চিরায় মে হৃদি স গৌরচন্দ্রঃ প্রভুঃ ॥ ৭ ॥
স্বরূপ ! মম নেত্রয়োঃ পুরত এব কৃষ্ণো হসন্ন্
উপৈতি ন করগ্রহং বত দদাতি হা কিং সখে ।
ইতি স্খলতি ধাবতি শ্বসিতি ঘূর্ণতে য়ঃ সদা
বিরাজতু চিরায় মে হৃদি স গৌরচন্দ্রঃ প্রভুঃ ॥ ৮ ॥
স্বরূপচরিতামৃতং কিল মহাপ্রভোরষ্টকং
রহস্যতমমদ্ভুতং পঠতি য়ঃ কৃতী প্রত্যহম্ ।
স্বরূপপরিবারতাং নয়তি তং শচীনন্দনো
ঘনপ্রণয়মাধুরীং স্বপদয়োঃ সমাত্বাদয়ন্ ॥ ৯ ॥
ইতি শ্রীবিশ্বনাথচক্রবর্তিঠক্কুরবিরচিতস্তবামৃতলহর্যাং
শ্রীমহাপ্রভোরষ্টকং সম্পূর্ণম্ ।
– Chant Stotra in Other Languages –
Sri Manmahaprabhorashtakam Shrisvarupacharitamritam Lyrics in Sanskrit » English » Gujarati » Kannada » Malayalam » Odia » Telugu » Tamil