॥ Mookapanchasati Bengali Lyrics ॥
॥ শ্রীমূকপঞ্চশতী ॥
মাতা মরকতশ্যামা মাতঙ্গী মদশালিনী ।
কুর্যাত্ কটাক্ষং কল্যাণী কদম্ববনবাসিনী ॥
॥ শ্রীঃ ॥
॥ শ্রীচন্দ্রমৌলীশ্বরায় নমঃ ॥
॥ শ্রীকারণপরচিদ্রূপায়ৈ নমঃ ॥
শ্রীমূকমহাকবিপ্রণীতা
॥ শ্রীঃ ॥
॥ শ্রীমূকপঞ্চশতী ॥
শ্রীকামাক্ষীপরদেবতায়াঃ পাদারবিন্দয়োঃ
ভক্তিভরেণ সমর্পিতম্ ॥
আর্যামেব বিভাবয়ন্মনসি য়ঃ পাদারবিন্দং পুরঃ
পশ্যন্নারভতে স্তুতিং স নিয়তং লব্ধ্বা কটাক্ষচ্ছবিম্ ।
কামাক্ষ্যা মৃদুলস্মিতাংশুলহরীজ্যোত্স্নাবয়স্যান্বিতা-
মারোহত্যপবর্গসৌধবলভীমানন্দবীচীময়ীম্ ॥
[মন্দস্মিত ১০১ ]
শ্রীমত্পরমহংসপরিব্রাজকাচার্যবর্য শ্রীকামকোটিপীঠাধীশ্বর-
জগদ্গুরু শ্রীমত্ চন্দ্রশেখরেন্দ্রসরস্বতী শ্রীপাদানাং
শ্রীমুখেন সমদ্ভাসিতা
॥ শ্রীঃ ॥
॥ শ্রীচন্দ্রমৌলীশ্বর ॥
মুদ্রা
স্বস্তি শ্রীমদখিলভূমণ্ডলালংকার-ত্রয়স্ত্রিংশত্কোটি-
দেবতাসেবিত শ্রীকামাক্ষীদেবীসনাথ-শ্রীমদেকাম্রনাথ-
শ্রীমহাদেবীসনাথ-শ্রীহস্তিনিরিনাথ-সাক্ষাত্কারপরম-
অধিষ্ঠানসত্যব্রতনামাঙ্কিত-কাঞ্চীদিব্যক্ষেত্রে শারদা-
মঠসুস্থিতানাম্, অতুলিতসুধারসমাধুর্যকমলাসনকামিনী-
ধম্মিল্ল সম্ফুল্লমল্লিকামালিকানিষ্যন্দমকরন্দঝরী-
সৌবস্তিকবাঙ্নিগুম্ভবিজৃম্ভণানন্দতুন্দিলিতমণীষি-
মণ্ডলানাম্, অনবরতাদ্বৈতবিদ্যাবিনোদরসিকানাম্,
নিরন্তরালংকৃতীকৃতশান্তিদান্তিভূম্নাম্, সকলভুবন-
চক্রপ্রতিষ্ঠাপক শ্রীচক্রপ্রতিষ্ঠাবিখ্যাতয়শোঽলংকৃতানাম্,
নিখিলপাষণ্ডষণ্ডকণ্টকোদ্ধাটনেন বিশদীকৃতবেদবেদান্ত-
মার্গষণ্মতপ্রতিষ্ঠাপকাচার্যাণাম্, শ্রীমত্পরমহংসপরিব্রাজক-
আচার্যবর্য-শ্রীজগদ্গুরু শ্রীমচ্ছংকরভগবত্পাদাচার্যাণাম্
অধিষ্ঠানে সিংহাসনাভিষিক্ত শ্রীমন্মহাদেবেন্দ্রসরস্বতী-
সংয়মীন্দ্রাণাম্, অন্তেবাসিবর্য শ্রীমচ্চন্দ্রশেখরেন্দ্রসরস্বতী
শ্রীপাদৈঃ ।
ক্রিয়তে নারায়ণস্মৃতিঃ
তত্রভবান্ মূক ইতি সুপ্রসিদ্ধঃ মহাকবিশিরোমণিঃ
শ্রীকামাক্ষীদেবীকরুণাকটাক্ষতরঙ্গিতপুণ্যকবিতারসপূরঃ
`মূকপঞ্চশতী’ ইতি কর্তুর্নাম্না প্রসিদ্ধমিমং লোকোত্তরং
গ্রন্থং প্রণীয় ভূমণ্ডলেঽনুত্তমং পুণ্যয়শোবিশেষং শাশ্বতীং
পরানন্দানুভূতিং চ লব্ধবানিতি সুবিদিতমেব । স্তোত্ররত্নে
চাস্মিন্ কাঞ্চীমধ্যগত কামকোটিপীঠাধিষ্ঠাত্রীম্
ইন্দুমৌলেরৈশ্বর্যরূপাং শ্রীকামাক্ষীং পরদেবতাম্,
আরূঢয়ৌবনাটোপা, তরুণিমসর্বস্বং, নিত্যতরুণী,
লাবণ্যামৃততরঙ্গমালা, বিভ্রমসমবায়সারসন্নাহা,
শৃঙ্গারাদ্বৈততন্ত্রসিদ্ধান্তং, মীনধ্বজতন্ত্রপরমতাত্পর্যং\,
কন্দর্পসূতিকাপাঙ্গী, মনসিজসাম্রাজ্যগর্ববীজং,
পুষ্পায়ুধবীর্যসরসপরিপাটী, মদনাগমসময়দীক্ষিত-
কটাক্ষা, কুসুমশরগর্বসম্পত্কোশগৃহম্, অনঙ্গব্রহ্মতত্ত্ব-
বোধসিরা, পঞ্চশরশাস্ত্রবোধনপরমাচার্যদৃষ্টিপাতা
ইত্যাদিরূপেণ বর্ণয়ন্ পুনঃ লাবণ্যমৃতপরকাষ্ঠাভূতাং
তামেব পরদেবতাং, কারণপরচিদ্রূপা, কৈবল্যানন্দকন্দঃ,
আম্নায়রহস্যম্, উপনিষদরবিন্দকুহরমধুধারা,
বাঙ্মনোঽতীতা, আনন্দাদ্বৈতকন্দলী, মুক্তিবীজম্,
আগমসল্লাপসারয়াথার্থ্যং, বোধামৃতবীচী, অভিদাকৃতিঃ,
ঐকাত্ম্যপ্রকৃতিঃ, নিগমবচস্সিদ্ধান্তঃ, গুরুমূর্তিঃ, ইত্যেবং-
রূপেণ সাক্ষত্কুর্বন্ য়ৌবনশৃঙ্গারাদিবিষয়রসানুভব-
সামগ্রীং জ্ঞানবৈরাগ্যাদিব্রহ্মানন্দানুভবসামগ্রীত্বেন
সম্পাদয়ন্ –
শিব শিব পশ্যন্তি সমং শ্রীকামাক্ষীকটাক্ষিতাঃ পুরুষাঃ ।
বিপিনং ভবনমমিত্রং মিত্রং লোষ্টং চ য়ুবতিবিম্বোষ্ঠম্ ॥
ইতি পরদেবতানুগ্রহফলীভূতাং পরবৈরাগ্যকাষ্ঠাং প্রকটয়তি ।
[আর্যা ৪৮ ]
পদ্মপঞ্চশতকাত্মকেঽত্র গ্রন্থে শতকানাং য়া আনুপূর্বী
তস্যাময়ং বিশেষো দৃশ্যতে । য়থা কশ্চন শিশুঃ চক্ষুরাদি
ইন্দ্রিয়প্রাগল্ভ্যাবির্ভাবাত্পূর্বং মনোবৃত্তিমাত্রেণ কলয়তি
স্বেপ্সিতম্ ; এবমার্যাশতকে ভক্তশিশোঃ মনঃ প্রবৃত্তিম্
অম্বিকায়াঃ স্বরূপানুসন্ধানপটীয়সীং সম্পাদয়তি
কবিপুঙ্গবঃ ; অয়মাশয়ঃ –
অন্তরপি বহিরপি ত্বং জন্তুততেরন্তকান্তকৃদহন্তে ।
চিন্তিতসন্তানবতাং সন্ততমপি তন্তনীষি মহিমানম্ ॥
ইতি শ্লোকেন সূচিতঃ ॥ [আর্যা ৯৮ ]
দ্বিতীয়শতকে তাবত্ য়থা কিঞ্চিত্প্রবৃদ্ধগ্রহণশক্তিঃ
বালকঃ খান্তিকে বিদ্যমানস্য বস্তুনঃ দর্শন-
স্পর্শনাদিভিঃ আহ্লাদমধিগচ্ছতি তদ্বত্ ভক্তবালকঃ
অত্যন্তমধোভাগে বিদ্যমানস্য স্বস্যান্তিকত্বেনৈব
জগন্মাতুঃ নিরন্তরধ্যানফলীভূত পাদারবিন্দ দর্শন-
আনন্দমনুভবতীত্যয়মাশয়ঃ –
মরালীনাং য়ানাভ্যসনকলনামূলগুরবে
দরিদ্রাণাং ত্রাণব্যতিকরসুরোদ্যানতরবে ।
তমস্কাণ্ডপ্রৌঢিপ্রকটনতিরস্কারপটবে
জনোঽয়ং কামাক্ষ্যাশ্চরণনলিনায় স্পৃহয়তে ॥
ইতি শ্লোকেন সূচিতঃ ॥ [পাদারবিন্দ ৩ ]
য়থা মনসঃ জ্ঞানেন্দ্রিয়াণাং চ স্ফূর্ত্যনন্তরমেব
বাক্প্রসরতি, তথৈব আর্যাপাদারবিন্দশতকয়োরনন্তরং
স্বপ্রেমাস্পদং বস্তু নিরর্গলং স্তোতুমারভতে –
পাণ্ডিত্যং পরমেশ্বরি স্তুতিবিধৌ নৈবাশ্রয়ন্তে গিরাং
বৈরিঞ্চান্যপি গুম্ফনানি বিগলদ্গর্বাণি শর্বাণি তে ।
স্তোতুং ত্বাং পরিফুল্লনীলনলিনশ্যামাক্ষি কামাক্ষি মাং
বাচালীকুরুতে তথাপি নিতরাং ত্বত্পাদসেবাদরঃ ॥
ইতাদিনা স্তুতিশতকেন । [স্তুতি ১ ]
লৌকিকাবিদ্যাদিষু কুশলঃ কশ্চন য়থা লৌকিকসম্পদঃ
প্রাপ্তুর্মহো ভবতি তদ্বত্ পূর্বকৃতস্তুতিফলত্বেন ভক্তঃ
অম্বিকায়াঃ কটাক্ষবিশেষমধিগম্য পরসংবিদনুভূত্য-
উচিততেজঃপুষ্ট্যাদিপাত্রং ভবতীত্যয়মাশয়ঃ-
অস্তং ক্ষণান্নয়তু মে পরিতাপসূর্য-
মানন্দচন্দ্রমসমানয়তাং প্রকাশম্ ।
কালান্ধকারসুষমাং কলয়ন্ দিগন্তে
কামাক্ষি কোমলকটাক্ষনিশাগমস্তে ॥
ইত্যাদিভির্বর্ণনৈঃ কটাক্ষশতকে সূচিতঃ ॥ [কটাক্ষ ৬ ]
য়থা লৌকিকসম্পত্সম্পূর্ণঃ কশ্চন সমগ্রয়ৌবনঃ
লৌকিকশৃঙ্গারসুখানুভবায় পাত্রং ভবতি, তদ্বত্
দেব্যাঃ পরমানুগ্রহপাত্রীভূতঃ তদীয়মন্দস্মিত-
চন্দ্রিকাসনাথঃ আনন্দচন্দ্র ইব অলৌকিক-
নিরতিশয়ানন্দানুভবাত্মকঃ প্রকাশত ইতি
অমূমেব ভাবপ্রণালিকাং মহাকবিঃ স্বয়মেব
পঞ্চশতীপুর্তিম্পদ্যেন আবিষ্যকরোতি । য়থা –
আর্যামেব বিভাবয়ন্মনসি য়ঃ পাদারবিন্দং পুরঃ
পশ্যন্নারভতে স্তুতিং স নিয়তং লব্ধ্বা কটাক্ষচ্ছবিম্ ।
কামাক্ষ্যা মৃদুলস্মিতাংশুলহরীজ্যোত্স্নাবয়স্যান্বিতা-
মারোহত্যপবর্গসৌধবলভীমানন্দবীচীময়ীম্ ॥
ইতি । [মন্দস্মিত ১০১ ]
অস্যা লোকোত্তরায়াঃ স্তুতেঃ পঠনমাত্রেণ তত্ক্ষণে
মহাকবিনাঽমুনা অন্ততঃ পরদেবতয়ৈব বা
ঐকাত্ম্যমনুভবতীব সাধকঃ ।
তদিদং গ্রন্থরত্নং দ্রাবিডভাষাময়ার্থানুবাদ-
সহিতমচিরাদেব মহতা পরিশ্রমেণ ভক্তিভরেণ
মুদ্রাপ্য শ্রী কামাক্ষী দেবী কুম্ভাভিষেক শুভ-
মুহূর্ত এব উপহারীকৃতবতে, মুদ্রাপণদিবিষয়ে পরমং
সাহায়্যমাচরিতবদ্ভয়ঃ, তদ্গ্রন্থপঠিতৃভ্যশ্চ
ভক্তপুঙ্গবেভ্যঃ শ্রীকামাক্ষীকটাক্ষাঃ সমুল্ল-
সন্ত্বিত্যাশাস্মহে ॥
॥ ইতি নারায়ণস্মৃতিঃ ॥
॥ আর্যাশতকম্ ॥
কারণপরচিদ্রূপা কাঞ্চীপুরসীম্নি কামপীঠগতা ।
কাচন বিহরতি করুণা কাশ্মীরস্তবককোমলাঙ্গলতা ॥ ১ ॥
কংচন কাঞ্চীনিলয়ং করধৃতকোদণ্ডবাণসৃণিপাশম্ ।
কঠিনস্তনভরনম্রং কৈবল্যানন্দকন্দমবলম্বে ॥ ২ ॥
চিন্তিতফলপরিপোষণচিন্তামণিরেব কাঞ্চিনিলয়া মে ।
চিরতরসুচরিতসুলভা চিত্তং শিশিরয়তু চিত্সুখাধারা ॥ ৩ ॥
কুটিলকচং কঠিনকুচং কুন্দস্মিতকান্তি কুঙ্কুমচ্ছায়ম্ ।
কুরুতে বিহৃতিং কাঞ্চ্যাং কুলপর্বতসার্বভৌমসর্বস্বম্ ॥ ৪ ॥
পঞ্চশরশাস্ত্রবোধনপরমাচার্যেণ দৃষ্টিপাতেন ।
কাঞ্চীসীম্নি কুমারী কাচন মোহয়তি কামজেতারম্ ॥ ৫ ॥
পরয়া কাঞ্চীপুরয়া পর্বতপর্যায়পীনকুচভরয়া ।
পরতন্ত্রা বয়মনয়া পঙ্কজসব্রহ্মচারিলোচনয়া ॥ ৬ ॥
ঐশ্বর্যমিন্দুমৌলেরৈকাত্ম্যপ্রকৃতি কাঞ্চিমধ্যগতম্ ।
ঐন্দবকিশোরশেখরমৈদম্পর্যং চকাস্তি নিগমানাম্ ॥ ৭ ॥
শ্রিতকম্পসীমানং শিথিলিতপরমশিবধৈর্যমহিমানম্ ।
কলয়ে পটলিমানং কংচন কঞ্চুকিতভুবনভূমানম্ ॥ ৮ ॥
আদৃতকাঞ্চীনিলয়মাদ্যামারূঢয়ৌবনাটোপাম্ ।
আগমবতংসকলিকামানন্দাদ্বৈতকন্দলীং বন্দে ॥ ৯ ॥
তুঙ্গাভিরামকুচভরশৃঙ্গারিতমাশ্রয়ামি কাঞ্চিগতম্ ।
গঙ্গাধরপরতন্ত্রং শৃঙ্গারাদ্বৈততন্ত্রসিদ্ধান্তম্ ॥ ১০ ॥
কাঞ্চীরত্নবিভূষাং কামপি কন্দর্পসূতিকাপাঙ্গীম্ ।
পরমাং কলামুপাসে পরশিববামাঙ্কপীঠিকাসীনাম্ ॥ ১১ ॥
কম্পাতীচরাণাং করুণাকোরকিতদৃষ্টিপাতানাম্ ।
কেলীবনং মনো মে কেষাংচিদ্ভবতু চিদ্বিলাসানাম্ ॥ ১২ ॥
আম্রতরুমূলবসতেরাদিমপুরুষস্য নয়নপীয়ূষম্ ।
আরব্ধয়ৌবনোত্সবমাম্নায়রহস্যমন্তরবলম্বে ॥ ১৩ ॥
অধিকাঞ্চি পরময়োগিভিরাদিমপরপীঠসীম্নি দৃশ্যেন ।
অনুবদ্ধং মম মানসমরুণিমসর্বস্বসম্প্রদায়েন ॥ ১৪ ॥
অঙ্কিতশংকরদেহামঙ্কুরিতোরোজকঙ্কণাশ্লেষৈঃ ।
অধিকাঞ্চি নিত্যতরুণীমদ্রাক্ষং কাংচিদদ্ভুতাং বালাম্ ॥ ১৫ ॥
মধুরধনুষা মহীধরজনুষা নন্দামি সুরভিবাণজুষা ।
চিদ্বপুষা কাঞ্চিপুরে কেলিজুষা বন্ধুজীবকান্তিমুষা ॥ ১৬ ॥
মধুরস্মিতেন রমতে মাংসলকুচভারমন্দগমনেন ।
মধ্যেকাঞ্চি মনো মে মনসিজসাম্রাজ্যগর্ববীজেন ॥ ১৭ ॥
ধরণিময়ীং তরণিময়ীং পবনময়ীং গগনদহনহোতৃময়ীম্ ।
অম্বুময়ীমিন্দুময়ীমম্বামনুকম্পমাদিমামীক্ষে ॥ ১৮ ॥
লীনস্থিতি মুনিহৃদয়ে ধ্যানস্তিমিতং তপস্যদুপকম্পম্ ।
পীনস্তনভরমীডে মীনধ্বজতন্ত্রপরমতাত্পর্যম্ ॥ ১৯ ॥
শ্বেতা মন্থরহসিতে শাতা মধ্যে চ বাড্ভনোঽতীতা ।
শীতা লোচনপাতে স্ফীতা কুচসীম্নি শাশ্বতী মাতা ॥ ২০ ॥
পুরতঃ কদা ন করবৈ পুরবৈরিবিমর্দপুলকিতাঙ্গলতাম্ ।
পুনতীং কাঞ্চীদেশং পুষ্পায়ুধবীর্যসরসপরিপাটীম্ ॥ ২১ ॥
পুণ্যা কাঽপি পুরন্ধ্রী পুঙ্খিতকন্দর্পসম্পদা বপুষা ।
পুলিনচরী কম্পায়াঃ পুরমথনং পুলকনিচুলিতং কুরুতে ॥ ২২ ॥
তনিমাদ্বৈতবলগ্নং তরুণারুণসম্প্রদায়তনুলেখম্ ।
তটসীমনি কম্পায়াস্তরুণিমসর্বস্বমাদ্যমদ্রাক্ষম্ ॥ ২৩ ॥
পৌষ্টিককর্মবিপাকং পৌষ্পশরং সবিধসীম্নি কম্পায়াঃ ।
অদ্রাক্ষমাত্তয়ৌবনমভ্যুদয়ং কংচিদর্ধশশিমৌলৈঃ ॥ ২৪ ॥
সংশ্রিতকাঞ্চীদেশে সরসিজদৌর্ভাগ্যজাগ্রদুত্তংসে ।
সংবিন্ময়ে বিলীয়ে সারস্বতপুরুষকারসাম্রাজ্যে ॥ ২৫ ॥
মোদিতমধুকরবিশিখং স্বাদিমসমুদায়সারকোদণ্ডম্ ।
আদৃতকাঞ্চীখেলনমাদিমমারুণ্যভেদমাকলয়ে ॥ ২৬ ॥
উররীকৃতকাঞ্চিপুরীমুপনিষদরবিন্দকুহরমধুধারাম্ ।
উন্নম্রস্তনকলশীমুত্সবলহরীমুপাস্মহে শম্ভোঃ ॥ ২৭ ॥
এণশিশুদীর্ঘলোচনমেনঃপরিপন্থি সন্ততং ভজতাম্ ।
একাম্রনাথজীবিতমেবম্পদদূরমেকমবলম্বে ॥ ২৮ ॥
স্ময়মানমুখং কাঞ্চীভয়মানং কমপি দেবতাভেদম্ ।
দয়মানং বীক্ষ্য মুহুর্বয়মানন্দামৃতাম্বুধৌ মগ্নাঃ ॥ ২৯ ॥
কুতুকজুষি কাঞ্চিদেশে কুমুদতপোরাশিপাকশেখরিতে ।
কুরুতে মনোবিহারং কুলগিরিপরিবৃঢকুলৈকমণিদীপে ॥ ৩০ ॥
বীক্ষেমহি কাঞ্চিপুরে বিপুলস্তনকলশগরিমপরবশিতম্ ।
বিদ্রুমসহচরদেহং বিভ্রমসমবায়সারসন্নাহম্ ॥ ৩১ ॥
কুরুবিন্দগোত্রগাত্রং কূলচরং কমপি নৌমি কম্পায়াঃ ।
কূলংকষকুচকুম্ভং কুসুমায়ুধবীর্যসারসংরম্ভম্ ॥ ৩২ ॥
কুডূমলিতকুচকিশোরৈঃ কুর্বাণৈঃ কাঞ্চিদেশসৌহার্দম্ ।
কুঙ্কুমশোণৈর্নিচিতং কুশলপথং শম্ভুসুকৃতসম্ভারৈঃ ॥ ৩৩ ॥
অঙ্কিতকচেন কেনচিদন্ধংকরণৌষধেন কমলানাম্ ।
অন্তঃপুরেণ শম্ভোরলংক্রিয়া কাঽপি কল্প্যতে কাঞ্চ্যাম্ ॥ ৩৪ ॥
ঊরীকরোমি সন্ততমূষ্মলফালেন ললিতং পুংসা ।
উপকম্পমুচিতখেলনমুর্বীধরবংশসম্পদুন্মেষম্ ॥ ৩৫ ॥
অঙ্কুরিতস্তনকোরকমঙ্কালংকারমেকচূতপতেঃ ।
আলোকেমহি কোমলমাগমসংলাপসারয়াথার্থ্যম্ ॥ ৩৬ ॥
পুঞ্জিতকরুণমুদঞ্চিতশিঞ্জিতমণিকাঞ্চি কিমপি কাঞ্চিপুরে ।
মঞ্জরিতমৃদুলহাসং পিঞ্জরতনুরুচি পিনাকিমূলধনম্ ॥ ৩৭ ॥
লোলহৃদয়োঽস্তি শম্ভোর্লোচনয়ুগলেন লেহ্যমানায়াম্ ।
ললিতপরমশিবায়াং লাবণ্যামৃততরঙ্গমালায়াম্ ॥ ৩৮ ॥
মধুকরসহচরচিকুরৈর্মদনাগমসময়দীক্ষিতকটাক্ষৈঃ ।
মণ্ডিতকম্পাতীরৈর্মঙ্গলকন্দৈর্মমাস্তু সারূপ্যম্ ॥ ৩৯ ॥
বদনারবিন্দবক্ষোবামাঙ্কতটীবশংবদীভূতা ।
পূরুষত্রিতয়ে ত্রেধা পুরন্ধ্রিরূপা ত্বমেব কামাক্ষি ॥ ৪০ ॥
বাধাকরীং ভবাব্ধেরাধারাদ্যম্বুজেষু বিচরন্তীম্ ।
আধারীকৃতকাঞ্চী বোধামৃতবীচিমেব বিমৃশামঃ ॥ ৪১ ॥
কলয়াম্যন্তঃ শশধরকলয়াঽঙ্কিতমৌলিমমলচিদ্বলয়াম্ ।
অলয়ামাগমপীঠীনিলয়াং বলয়াঙ্কসুন্দরীমম্বাম্ ॥ ৪২ ॥
শর্বাদিপরমসাধকগুর্বানীতায় কামপীঠজুষে ।
সর্বাকৃতয়ে শোণিমগর্বায়াস্মৈ সমর্প্যতে হৃদয়ম্ ॥ ৪৩ ॥
সময়া সান্ধ্যময়ূখৈঃ সময়া বুদ্ধয়া সদৈব শীলিতয়া ।
উময়া কাঞ্চীরতয়া ন ময়া লভ্যতে কিং নু তাদাত্ম্যম্ ॥ ৪৪ ॥
জন্তোস্তব পদপূজনসন্তোষতরঙ্গিতস্য কামাক্ষি ।
বন্ধো য়দি ভবতি পুনঃ সিন্ধোরম্ভস্সু বম্ভ্রমীতি শিলা ॥ ৪৫ ॥
কুণ্ডলি কুমারি কুটিলে চণ্ডি চরাচরসবিত্রি চামুণ্ডে ।
গুণিনি গুহারিণি গুহ্যে গুরুমূর্তে ত্বাং নমামি কামাক্ষি ॥ ৪৬ ॥
অভিদাকৃতির্ভিদাকৃতিরচিদাকৃতিরপি চিদাকৃতির্মাতঃ ।
অনহন্তা ত্বমহন্তা ভ্রময়সি কামাক্ষি শাশ্বতী বিশ্বম্ ॥ ৪৭ ॥
শিব শিব পশ্যন্তি সমং শ্রীকামাক্ষীকটাক্ষিতাঃ পুরুষাঃ ।
বিপিনং ভবনমমিত্রং মিত্রং লোষ্টং চ য়ুবতিবিম্বোষ্ঠম্ ॥ ৪৮ ॥
কামপরিপন্থিকামিনি কামেশ্বরি কামপীঠমধ্যগতে ।
কামদুঘা ভব কমলে কামকলে কামকোটি কামাক্ষি ॥ ৪৯ ॥
মধ্যেহৃদয়ং মধ্যেনিটিলং মধ্যেশিরোঽপি বাস্তব্যাম্ ।
চণ্ডকরশক্রকার্মুকচন্দ্রসমাভাং নমামি কামাক্ষীম্ ॥ ৫০ ॥
অধিকাঞ্চি কেলিলোলৈরখিলাগময়ন্ত্রতন্ত্রময়ৈঃ ।
অতিশীতং মম মানসমসমশরদ্রোহিজীবনোপায়ৈঃ ॥ ৫১ ॥
নন্দতি মম হৃদি কাচন মন্দিরয়ন্তা নিরন্তরং কাঞ্চীম্ ।
ইন্দুরবিমণ্ডলকুচা বিন্দুবিয়ন্নাদপরিণতা তরুণী ॥ ৫২ ॥
শম্পালতাসবর্ণং সম্পাদয়িতুং ভবজ্বরচিকিত্সাম্ ।
লিম্পামি মনসি কিংচন কম্পাতটরোহি সিদ্ধভৈষজ্যম্ ॥ ৫৩ ॥
অনুমিতকুচকাঠিন্যামধিবক্ষঃপীঠমঙ্গজন্মরিপোঃ ।
আনন্দদাং ভজে তামানঙ্গব্রহ্মতত্ববোধসিরাম্ ॥ ৫৪ ॥
ঐক্ষিষি পাশাঙ্কুশধরহস্তান্তং বিস্ময়ার্হবৃত্তান্তম্ ।
অধিকাঞ্চি নিগমবাচাং সিদ্ধান্তং শূলপাণিশুদ্ধান্তম্ ॥ ৫৫ ॥
আহিতবিলাসভঙ্গীমাব্রহ্মস্তম্বশিল্পকল্পনয়া ।
আশ্রিতকাঞ্চীমতুলামাদ্যাং বিস্ফূর্তিমাদ্রিয়ে বিদ্যাম্ ॥ ৫৬ ॥
মূকোঽপি জটিলদুর্গতিশোকোঽপি স্মরতি য়ঃ ক্ষণং ভবতীম্ ।
একো ভবতি স জন্তুর্লোকোত্তরকীর্তিরেব কামাক্ষি ॥ ৫৭ ॥
পঞ্চদশবর্ণরূপং কংচন কাঞ্চীবিহারধৌরেয়ম্ ।
পঞ্চশরীয়ং শম্ভোর্বঞ্চনবৈদগ্ধ্যমূলমবলম্বে ॥ ৫৮ ॥
পরিণতিমতীং চতুর্ধা পদবীং সুধিয়াং সমেত্য সৌষুম্নীম্ ।
পঞ্চাশদর্ণকল্পিতমদশিল্পাং ত্বাং নমামি কামাক্ষি ॥ ৫৯ ॥
আদিক্ষন্মম গুরুরাডাদিক্ষান্তাক্ষরাত্মিকাং বিদ্যাম্ ।
স্বাদিষ্ঠচাপদণ্ডাং নেদিষ্ঠামেব কামপীঠগতাম্ ॥ ৬০ ॥
তুষ্যামি হর্ষিতস্মরশাসনয়া কাঞ্চিপুরকৃতাসনয়া ।
স্বাসনয়া সকলজগদ্ভাসনয়া কলিতশম্বরাসনয়া ॥ ৬১ ॥
প্রেমবতী কম্পায়াং স্থেমবতী য়তিমনস্সু ভূমবতী ।
সামবতী নিত্যগিরা সোমবতী শিরসি ভাতি হৈমবতী ॥ ৬২ ॥
কৌতুকিনা কম্পায়াং কৌসুমচাপেন কীলিতেনান্তঃ ।
কুলদৈবতেন মহতা কুড্মলমুদ্রাং ধুনোতু নঃপ্রতিভা ॥ ৬৩ ॥
য়ূনা কেনাপি মিলদ্দেহা স্বাহাসহায়তিলকেন ।
সহকারমূলদেশে সংবিদ্রূপা কুটুম্বিনী রমতে ॥ ৬৪ ॥
কুসুমশরগর্বসম্পত্কোশগৃহং ভাতি কাঞ্চিদেশগতম্ ।
স্থাপিতমস্মিন্কথমপি গোপিতমন্তর্ময়া মনোরত্নম্ ॥ ৬৫ ॥
দগ্ধষডধ্বারণ্যং দরদলিতকুসুম্ভসম্ভৃতারুণ্যম্ ।
কলয়ে নবতারুণ্যং কম্পাতটসীম্নি কিমপি কারুণ্যম্ ॥ ৬৬ ॥
অধিকাঞ্চি বর্ধমানামতুলাং করবাণি পারণামক্ষ্ণোঃ ।
আনন্দপাকভেদামরুণিমপরিণামগর্বপল্লবিতাম্ ॥ ৬৭ ॥
বাণসৃণিপাশকার্মুকপাণিমমুং কমপি কামপীঠগতম্ ।
এণধরকোণচূডং শোণিমপরিপাকভেদমাকলয়ে ॥ ৬৮ ॥
কিং বা ফলতি মমান্যৌর্বিম্বাধরচুম্বিমন্দহাসমুখী ।
সম্বাধকরী তমসামম্বা জাগর্তি মনসি কামাক্ষী ॥ ৬৯ ॥
মঞ্চে সদাশিবময়ে পরিশিবময়ললিতপৌষ্পপর্যঙ্কে ।
অধিচক্রমধ্যমাস্তে কামাক্ষী নাম কিমপি মম ভাগ্যম্ ॥ ৭০ ॥
রক্ষ্যোঽস্মি কামপীঠীলাসিকয়া ঘনকৃপাম্বুরাশিকয়া ।
শ্রুতিয়ুবতিকুন্তলীমণিমালিকয়া তুহিনশৈলবালিকয়া ॥ ৭১ ॥
লীয়ে পুরহরজায়ে মায়ে তব তরুণপল্লবচ্ছায়ে ।
চরণে চন্দ্রাভরণে কাঞ্চীশরণে নতার্তিসংহরণে ॥ ৭২ ॥
মূর্তিমতি মুক্তিবীজে মূর্ধ্নি স্তবকিতচকোরসাম্রাজ্যে ।
মোদিতকম্পাকূলে মুহুর্মুহুর্মনসি মুমুদিষাঽস্মাকম্ ॥ ৭৩ ॥
বেদময়ীং নাদময়ীং বিন্দুময়ীং পরপদোদ্যদিন্দুময়ীম্ ।
মন্ত্রময়ীং তন্ত্রময়ীং প্রকৃতিময়ীং নৌমি বিশ্ববিকৃতিময়ীম্ ॥ ৭৪ ॥
পুরমথনপুণ্যকোটী পুঞ্জিতকবিলোকসূক্তিরসধাটী ।
মনসি মম কামকোটী বিহরতু করুণাবিপাকপরিপাটী ॥ ৭৫ ॥
কুটিলং চটুলং পৃথুলং মৃদুলং কচনয়নজঘনচরণেষু ।
অবলোকিতমবলম্বিতমধিকম্পাতটমমেয়মস্মাভিঃ ॥ ৭৬ ॥
প্রত্যঙ্মুখ্যা দৃষ্টয়া প্রসাদদীপাঙ্কুরেণ কামাক্ষ্যাঃ ।
পশ্যামি নিস্তুলমহো পচেলিমং কমপি পরশিবোল্লাসম্ ॥ ৭৭ ॥
বিদ্যে বিধাতৃবিষয়ে কাত্যায়নি কালি কামকোটিকলে ।
ভারতি ভৈরবি ভদ্রে শাকিনি শাম্ভবি শিবে স্তুবে ভবতীম্ ॥ ৭৮ ॥
মালিনি মহেশচালিনি কাঞ্চীখেলিনি বিপক্ষকালিনি তে ।
শূলিনি বিদ্রুমশালিনি সুরজনপালিনি কপালিনি নমোঽস্তু ॥ ৭৯ ॥
দেশিক ইতি কিং শংকে তত্তাদৃক্তব নু তরুণিমোন্মেষঃ ।
কামাক্ষি শূলপাণেঃ কামাগমসময়দীক্ষায়াম্ ॥ ৮০ ॥
বেতণ্ডকুম্ভডম্বরবৈতণ্ডিককুচভরার্তমধ্যায় ।
কুঙ্কুমরুচে নমস্যাং শংকরনয়নামৃতায় রচয়ামঃ ॥ ৮১ ॥
অধিকাঞ্চিতমণিকাঞ্চনকাঞ্চীমধিকাঞ্চি কাংচিদদ্রাক্ষম্ ।
অবনতজনানুকম্পামনুকম্পাকূলমস্মদনুকূলাম্ ॥ ৮২ ॥
পরিচিতকম্পাতীরং পর্বতরাজন্যসুকৃতসন্নাহম্ ।
পরগুরুকৃপয়া বীক্ষে পরমশিবোত্সঙ্গমঙ্গলাভরণম্ ॥ ৮৩ ॥
দগ্ধমদনস্য শম্ভোঃ প্রথীয়সীং ব্রহ্মচর্যবৈদগ্ধীম্ ।
তব দেবি তরুণিমশ্রীচতুরিমপাকো ন চক্ষমে মাতঃ ॥ ৮৪ ॥
মদজলতমালপত্রা বসনিতপত্রা করাদৃতখানিত্রা ।
বিহরতি পুলিন্দয়োষা গুঞ্জাভূষা ফণীন্দ্রকৃতবেষা ॥ ৮৫ ॥
অঙ্কে শুকিনী গীতে কৌতুকিনী পরিসরে চ গায়কিনী ।
জয়সি সবিধেঽম্ব ভৈরবমণ্ডলিনী শ্রবসি শঙ্খকুণ্ডলিনী ॥ ৮৬ ॥
প্রণতজনতাপবর্গা কৃতবহুসর্গা সসিংহসংসর্গা ।
কামাক্ষি মুদিতভর্গা হতরিপুবর্গা ত্বমেব সা দুর্গা ॥ ৮৭ ॥
শ্রবণচলদ্বেতণ্ডা সমরোদ্দণ্ডা ধুতাসুরশিখণ্ডা ।
দেবি কলিতান্ত্রষণ্ডা ধৃতনরমুণ্ডা ত্বমেব চামুণ্ডা ॥ ৮৮ ॥
উর্বীধরেন্দ্রকন্যে দর্বীভরিতেন ভক্তপূরেণ ।
গুর্বীমকিংচনার্তি খর্বীকুরুষে ত্বমেব কামাক্ষি ॥ ৮৯ ॥
তাডিতরিপুপরিপীডনভয়হরণ নিপুণহলমুসলা ।
ক্রোডপতিভীষণমুখী ক্রীডসি জগতি ত্বমেব কামাক্ষি ॥ ৯০ ॥
স্মরমথনবরণলোলা মন্মথহেলাবিলাসমণিশালা ।
কনকরুচিচৌর্যশীলা ত্বমম্ব বালা করাব্জধৃতমালা ॥ ৯১ ॥
বিমলপটী কমলকুটী পুস্তকরুদ্রাক্ষশস্তহস্তপুটী ।
কামাক্ষি পক্ষ্মলাক্ষী কলিতবিপঞ্চী বিভাসি বৈরিঞ্চী ॥ ৯২ ॥
কুঙ্কুমরুচিপিঙ্গমসৃক্পঙ্কিলমুণ্ডালিমণ্ডিতং মাতঃ ।
শ্রীকামাক্ষি তদীয়সঙ্গমকলামন্দীভবত্কৌতুকঃ
জয়তি তব রূপধেয়ং জপপটপুস্তকবরাভয়করাব্জম্ ॥ ৯৩ ॥
কনকমণিকলিতভূষাং কালায়সকলহশীলকান্তিকলাম্ ।
কামাক্ষি শীলয়ে ত্বাং কপালশূলাভিরামকরকমলাম্ ॥ ৯৪ ॥
লোহিতিমপুঞ্জমধ্যে মোহিতভুবনে মুদা নিরীক্ষন্তে ।
বদনং তব কুবয়ুগলং কাঞ্চীসীমাং চ কেঽপি কামাক্ষি ॥ ৯৫ ॥
জলধিদ্বিগুণিতহুতবহদিশাদিনেশ্বরকলাশ্বিনেয়দলৈঃ ।
নলিনৈর্মহেশি গচ্ছসি সর্বোত্তরকরকমলদলমমলম্ ॥ ৯৬ ॥
সত্কৃতদেশিকচরণাঃ সবীজনির্বীজয়োগনিশ্রেণ্যা ।
অপবর্গসৌধবলভীমারোহন্ত্যম্ব কেঽপি তব কৃপয়া ॥ ৯৭ ॥
অন্তরপি বহিরপি ত্বং জন্তুততেরন্তকান্তকৃদহন্তে ।
চিন্তিতসন্তানবতাং সন্ততমপি তন্তনীষি মহিমানম্ ॥ ৯৮ ॥
কলমঞ্জুলবাগনুমিতগলপঞ্জরগতশুকগ্রহৌত্কণ্ঠ্যাত্ ।
অম্ব রদনাম্বরং তে বিম্বফলং শম্বরারিণা ন্যস্তম্ ॥ ৯৯ ॥
জয় জয় জগদম্ব শিবে জয় জয় কামাক্ষি জয় জয়াদ্রিসুতে ।
জয় জয় মহেশদয়িতে জয় জয় চিদ্গগনকৌমুদীধারে ॥ ১০০ ॥
আর্যাশতকং ভক্ত্যা পঠতামার্যাকটাক্ষেণ ।
নিস্সরতি বদনকমলাদ্বাণী পীয়ূষধোরণী দিব্যা ॥ ১০১ ॥
আর্যাশতকং সম্পূর্ণম্ ॥
॥ পাদারবিন্দশতকম্ ॥
মহিম্নঃ পন্থানং মদনপরিপন্থিপ্রণয়িনি
প্রভুর্নির্ণেতুং তে ভবতি য়তমানোঽপি কতমঃ ।
তথাপি শ্রীকাঞ্চীবিহৃতিরসিকে কোঽপি মনসো
বিপাকস্ত্বত্পাদস্তুতিবিধিষু জল্পাকয়তি মাম্ ॥ ১ ॥
গলগ্রাহী পৌরন্দরপুরবনীপল্লবরুচাং
ধৃতপাথম্যানামরুণমহসামাদিমগুরুঃ ।
সমিন্ধে বন্ধূকস্তবকসহয়ুধ্বা দিশি দিশি
প্রসর্পন্কামাক্ষ্যাশ্চরণকিরণানামরুণিমা ॥ ২ ॥
মরালীনাং য়ানাভ্যসনকলনামূলগুরবে
দরিদ্রাণাং ত্রাণব্যতিকরসুরোদ্যানতরবে ।
তমস্কাণ্ডপ্রৌঢিপ্রকটনতিরস্কারপটবে
জনোঽয়ং কামাক্ষ্যাশ্চরণনলিনায় স্পৃহয়তে ॥ ৩ ॥
বহন্তী সৈন্দূরীং সরণিমবনম্রামরপুলী-
পুরন্ধ্রীসীমন্তে কবিকমলবালার্কসুষমা ।
ত্রয়ীসীমন্তিন্যাঃ স্তনতটনিচোলারুণপটী
বিভান্তী কামাক্ষ্যাঃ পদনলিনকান্তির্বিজয়তে ॥ ৪ ॥
প্রণম্রীভূতস্য প্রণয়কলহত্রস্তমনসঃ
স্মরারাতেশ্চূডাবিয়তি গৃহমেধী হিমকরঃ ।
য়য়োঃ সান্ধ্যাং কান্তিং বহতি সুষমাভিশ্চরণয়োঃ
তয়োর্মে কামাক্ষ্যা হৃদয়মপতন্দ্রং বিহরতাম্ ॥ ৫ ॥
য়য়োঃ পীঠায়ন্তে বিবুধমুকুটীনাং পটলিকা
য়য়োঃ সৌধায়ন্তে স্বয়মুদয়ভাজো ভণিতয়ঃ ।
য়য়োঃ দাসায়ন্তে সরসিজভবাদ্যাশ্চরণয়োঃ
তয়োর্মে কামাক্ষ্যা দিনমনু বরীবর্তু হৃদয়ম্ ॥ ৬ ॥
নয়ন্তী সংকোচং সরসিজরুচং দিক্পরিসরে
সৃজন্তী লৌহিত্যং নখকিরণচন্দ্রার্ধখচিতা ।
কবীন্দ্রাণাং হৃত্কৈরববিকসনোদ্যোগজননী
স্ফুরন্তী কামাক্ষ্যাঃ চরণরুচিসন্ধ্যা বিজয়তে ॥ ৭ ॥
বিরাবৈর্মাঞ্জীরৈঃ কিমপি কথয়ন্তীব মধুরং
পুরস্তাদানম্রে পুরবিজয়িনি স্মেরবদনে ।
বয়স্যেব প্রৌঢা শিথিলয়তি য়া প্রেমকলহ-
প্ররোহং কামাক্ষ্যাঃ চরণয়ুগলী সা বিজয়তে ॥ ৮ ॥
সুপর্বস্ত্রীলোলালকপরিচিতং ষট্পদকুলৈঃ
স্ফুরল্লাক্ষারাগং তরুণতরণিজ্যোতিররুণৈঃ ।
ভৃতং কান্ত্যম্ভোভিঃ বিসৃমরমরন্দৈঃ সরসিজৈঃ
বিধত্তে কামাক্ষ্যাঃ চরণয়ুগলং বন্ধুপদবীম্ ॥ ৯ ॥
রজঃসংসর্গেঽপি স্থিতমরজসামেব হৃদয়ে
পরং রক্তত্বেন স্থিতমপি বিরক্তৈকশরণম্ ।
অলভ্যং মন্দানাং দধদপি সদা মন্দগতিতাং
বিধত্তে কামাক্ষ্যাঃ চরণয়ুগমাশ্চর্যলহরীম্ ॥ ১০ ॥
জটালা মঞ্জীরস্ফুরদরুণরত্নাংশুনিকরৈঃ
নিষিদন্তী মধ্যে নখরুচিঝরীগাঙ্গপয়সাম্ ।
জগত্ত্রাণং কর্তুং জননি মম কামাক্ষি নিয়তং
তপশ্চর্যাং ধত্তে তব চরণপাথোজয়ুগলী ॥ ১১ ॥
তুলাকোটিদ্বন্দ্বক্কণিতভণিতাভীতিবচসোঃ
বিনম্রং কামাক্ষী বিসৃমরমহঃপাটলিতয়োঃ ।
ক্ষণং বিন্যাসেন ক্ষপিততমসোর্মে ললিতয়োঃ
পুনীয়ান্মূর্ধানং পুরহরপুরন্ধ্রী চরণয়োঃ ॥ ১২ ॥
ভবানি দ্রুহ্যেতাং ভবনিবিডিতেভ্যো মম মুহু-
স্তমোব্যামোহেভ্যস্তব জননি কামাক্ষি চরণৌ ।
য়য়োর্লাক্ষাবিন্দুস্ফুরণধরণাদ্ধ্বর্জটিজটা-
কুটীরা শোণাঙ্কং বহতি বপুরেণাঙ্ককলিকা ॥ ১৩ ॥
পবিত্রীকুর্যুর্নুঃ পদতলভুবঃ পাটলরুচঃ
পরাগাস্তে পাপপ্রশমনধুরীণাঃ পরশিবে ।
কণং লব্ধুং য়েষাং নিজশিরসি কামাক্ষি বিবশা
বলন্তো ব্যাতন্বন্ত্যহমহমিকাং মাধবমুখাঃ ॥ ১৪ ॥
বলাকামালাভির্নখরুচিময়ীভিঃ পরিবৃতে
বিনম্রস্বর্নারীবিকচকচকালাম্বুদকুলে ।
স্ফুরন্তঃ কামাক্ষি স্ফুটদলিতবন্ধূকসুহৃদ-
স্তটিল্লেখায়ন্তে তব চরণপাথোজকিরণাঃ ॥ ১৫ ॥
সরাগঃ সদ্বেষঃ প্রসৃমরসরোজে প্রতিদিনং
নিসর্গাদাক্রামন্বিবুধজনমূর্ধানমধিকম্ ।
কথংকারং মাতঃ কথয় পদপদ্মস্তব সতাং
নতানাং কামাক্ষি প্রকটয়তি কৈবল্যসরণিম্ ॥ ১৬ ॥
জপালক্ষ্মীশোণো জনিতপরমজ্ঞাননলিনী-
বিকাসব্যাসঙ্গো বিফলিতজগজ্জাড্যগরিমা ।
মনঃপূর্বাদ্রিং মে তিলকয়তু কামাক্ষি তরসা
তমস্কাণ্ডদ্রোহী তব চরণপাথোজরমণঃ ॥ ১৭ ॥
নমস্কুর্মঃ প্রেঙ্খন্মণিকটকনীলোত্পলমহঃ-
পয়োধৌ রিঙ্খদ্ভির্নখকিরণফেনৈর্ধবলিতে ।
স্ফুটং কুর্বাণায় প্রবলচলদৌর্বানলশিখা-
বিতর্কং কামাক্ষ্যাঃ সততমরুণিম্নে চরণয়োঃ ॥ ১৮ ॥
শিবে পাশায়েতামলঘুনি তমঃকূপকুহরে
দিনাধীশায়েতাং মম হৃদয়পাথোজবিপিনে ।
নভোমাসায়েতাং সরসকবিতারীতিসরিতি
ত্বদীয়ৌ কামাক্ষি প্রসৃতকিরণৌ দেবি চরণৌ ॥ ১৯ ॥
নিষক্তং শ্রুত্যন্তে নয়নমিব সদ্বৃত্তরুচিরৈঃ
সমৈর্জুষ্টং শুদ্ধৈরধরমিব রম্যৈর্দ্বিজগণৈঃ ।
শিবে বক্ষোজন্মদ্বিতয়মিব মুক্তাশ্রিতমুমে
ত্বদীয়ং কামাক্ষি প্রণতশরণং নৌমি চরণম্ ॥ ২০ ॥
নমস্যাসংসজ্জন্নমুচিপরিপন্থিপ্রণয়িনী-
নিসর্গপ্রেঙ্খোলত্কুরলকুলকালাহিশবলে ।
নখচ্ছায়াদুগ্ধোদধিপয়সি তে বৈদ্রুমরুচাং
প্রচারং কামাক্ষি প্রচুরয়তি পাদাব্জসুষমা ॥ ২১ ॥
কদা দূরীকর্তুং কটুদুরিতকাকোলজনিতং
মহান্তং সন্তাপং মদনপরিপন্থিপ্রিয়তমে ।
ক্ষণাত্তে কামাক্ষি ত্রিভুবনপরীতাপহরণে
পটীয়াংসং লপ্স্যে পদকমলসেবামৃতরসম্ ॥ ২২ ॥
য়য়োঃ সান্ধ্যং রোচিঃ সততমরুণিম্নে স্পৃহয়তে
য়য়োশ্চান্দ্রী কান্তিঃ পরিপততি দৃষ্ট্বা নখরুচিম্ ।
য়য়োঃ পাকোদ্রেকং পিপঠিষতি ভক্ত্যা কিসলয়ং
ম্রদিম্নঃ কামাক্ষ্যা মনসি চরণৌ তৌ তনুমহে ॥ ২৩ ॥
জগন্নেদং নেদং পরমিতি পরিত্যজ্য য়তিভিঃ
কুশাগ্রীয়স্বান্তৈঃ কুশলধিষণৈঃ শাস্ত্রসরণৌ ।
গবেষ্যং কামাক্ষি ধ্রুবমকৃতকানাং গিরিসুতে
গিরামৈদম্পর্যং তব চরণপদ্মং বিজয়তে ॥ ২৪ ॥
কৃতস্নানং শাস্ত্রামৃতসরসি কামাক্ষি নিতরাং
দধানং বৈশদ্যং কলিতরসমানন্দসুধয়া ।
অলংকারং ভূমের্মুনিজনমনশ্চিন্ময়মহা-
পয়োধেরন্তস্স্থং তব চরণরত্নং মৃগয়তে ॥ ২৫ ॥
মনোগেহে মোহোদ্ভবতিমিরপূর্ণে মম মুহুঃ
দরিদ্রাণীকুর্বন্দিনকরসহস্রাণি কিরণৈঃ ।
বিধত্তাং কামাক্ষি প্রসৃমরতমোবঞ্চনচণঃ
ক্ষণার্ধং সান্নিধ্যং চরণমণিদীপো জননি তে ॥ ২৬ ॥
কবীনাং চেতোবন্নখররুচিসম্পর্কি বিবুধ-
স্রবন্তীস্রোতোবত্পটুমুখরিতং হংসকরবৈঃ ।
দিনারম্ভশ্রীবন্নিয়তমরুণচ্ছায়সুভগং
মদন্তঃ কামাক্ষ্যাঃ স্ফুরতু পদপঙ্কেরুহয়ুগম্ ॥ ২৭ ॥
সদা কিং সম্পর্কাত্প্রকৃতিকঠিনৈর্নাকিমুকুটৈঃ
তটৈর্নীহারাদ্রেরধিকমণুনা য়োগিমনসা ।
বিভিন্তে সংমোহং শিশিরয়তি ভক্তানপি দৃশাম্
অদৃশ্যং কামাক্ষি প্রকটয়তি তে পাদয়ুগলম্ ॥ ২৮ ॥
পবিত্রাভ্যামম্ব প্রকৃতিমৃদুলাভ্যাং তব শিবে
পদাভ্যাং কামাক্ষি প্রসভমভিভূতৈঃ সচকিতৈঃ ।
প্রবালৈরম্ভোজৈরপি চ বনবাসব্রতদশাঃ
সদৈবারভ্যন্তে পরিচরিতনানাদ্বিজগণৈঃ ॥ ২৯ ॥
চিরাদ্দৃশ্যা হংসৈঃ কথমপি সদা হংসসুলভং
নিরস্যন্তী জাড্যং নিয়তজডমধ্যৈকশরণম্ ।
অদোষব্যাসঙ্গা সততমপি দোষাপ্তিমলিনং
পয়োজং কামাক্ষ্যাঃ পরিহসতি পাদাব্জয়ুগলী ॥ ৩০ ॥
সুরাণামানন্দপ্রবলনতয়া মণ্ডনতয়া
নখেন্দুজ্যোত্স্নাভির্বিসৃমরতমঃখণ্ডনতয়া ।
পয়োজশ্রীদ্বেষব্রতরততয়া ত্বচ্চরণয়োঃ
বিলাসঃ কামাক্ষি প্রকটয়তি নৈশাকরদশাম্ ॥ ৩১ ॥
সিতিম্না কান্তীনাং নখরজনুষাং পাদনলিন-
চ্ছবীনাং শোণিম্না তব জননি কামাক্ষি নমনে ।
লভন্তে মন্দারগ্রথিতনববন্ধূককুসুম-
স্রজাং সামীচীন্যং সুরপুরপুরন্ধ্রীকচভরাঃ ॥ ৩২ ॥
স্ফুরন্মধ্যে শুদ্ধে নখকিরণদুগ্ধাব্ধিপয়সাং
বহন্নব্জং চক্রং দরমপি চ লেখাত্মকতয়া ।
শ্রিতো মাত্স্যং রূপং শ্রিয়মপি দধানো নিরুপমাং
ত্রিধামা কামাক্ষ্যাঃ পদনলিননামা বিজয়তে ॥ ৩৩ ॥
নখশ্রীসন্নদ্ধস্তবকনিচিতঃ স্বৈশ্চ কিরণৈঃ
পিশঙ্গৈঃ কামাক্ষি প্রকটিতলসত্পল্লবরুচিঃ ।
সতাং গম্যঃ শঙ্কে সকলফলদাতা সুরতরুঃ
ত্বদীয়ঃ পাদোঽয়ং তুহিনগিরিরাজন্যতনয়ে ॥ ৩৪ ॥
বষট্কুর্বন্মাঞ্জীরকলকলৈঃ কর্মলহরী-
হবীংষি প্রৌদ্দণ্ডং জ্বলতি পরমজ্ঞানদহনে ।
মহীয়ান্কামাক্ষি স্ফুটমহসি জোহোতি সুধিয়াং
মনোবেদ্যাং মাতস্তব চরণয়জ্বা গিরিসুতে ॥ ৩৫ ॥
মহামন্ত্রং কিংচিন্মণিকটকনাদৈর্মৃদু জপন্
ক্ষিপন্দিক্ষু স্বচ্ছং নখরুচিময়ং ভাস্মনরজঃ ।
নতানাং কামাক্ষি প্রকৃতিপটুরচ্চাট্য মমতা-
পিশাচীং পাদোঽয়ং প্রকটয়তি তে মান্ত্রিকদশাম্ ॥ ৩৬ ॥
উদীতে বোধেন্দৌ তমসি নিতরাং জগ্মুষি দশাং
দরিদ্রাং কামাক্ষি প্রকটমনুরাগং বিদধতী ।
সিতেনাচ্ছাদ্যাঙ্গং নখরুচিপটেনাঙ্ঘ্রিয়ুগলী-
পুরন্ধ্রী তে মাতঃ স্বয়মভিসরত্যেব হৃদয়ম্ ॥ ৩৭ ॥
দিনারম্ভঃ সম্পন্নলিনবিপিনানামভিনবো
বিকাসো বাসন্তঃ সুকবিপিকলোকস্য নিয়তঃ ।
প্রদোষঃ কামাক্ষি প্রকটপরমজ্ঞানশশিন-
শ্চকাস্তি ত্বত্পাদস্মরণমহিমা শৈলতনয়ে ॥ ৩৮ ॥
ধৃতচ্ছায়ং নিত্যং সরসিরুহমৈত্রীপরিচিতং
নিধানং দীপ্তীনাং নিখিলজগতাং বোধজনকম্ ।
মুমুক্ষূণাং মার্গপ্রথনপটু কামাক্ষি পদবীং
পদং তে পাতঙ্গীং পরিকলয়তে পর্বতসুতে ॥ ৩৯ ॥
শনৈস্তীর্ত্বা মোহাম্বুধিমথ সমারোঢুমনসঃ
ক্রমাত্কৈবল্যাখ্যাং সুকৃতিসুলভাং সৌধবলভীম্ ।
লভন্তে নিঃশ্রেণীমিব ঝটিতি কামাক্ষি চরণং
পুরশ্চর্যাভিস্তে পুরমথনসীমন্তিনি জনাঃ ॥ ৪০ ॥
প্রচণ্ডার্তিক্ষোভপ্রমথনকৃতে প্রাতিভসরি-
ত্প্রবাহপ্রোদ্দণ্ডীকরণজলদায় প্রণমতাম্ ।
প্রদীপায় প্রৌঢে ভবতমসি কামাক্ষি চরণ-
প্রসাদৌন্মুখ্যায় স্পৃহয়তি জনোঽয়ং জননি তে ॥ ৪১ ॥
মরুদ্ভিঃ সংসেব্যা সততমপি চাঞ্চল্যরহিতা
সদারুণ্যং য়ান্তী পরিণতিদরিদ্রাণসুষমা ।
গুণোত্কর্ষান্মাঞ্জীরককলকলৈস্তর্জনপটুঃ
প্রবালং কামাক্ষ্যাঃ পরিহসতি পাদাব্জয়ুগলী ॥ ৪২ ॥
জগদ্রক্ষাদক্ষা জলজরুচিশিক্ষাপটুতরা
সমৈর্নম্যা রম্যা সততমভিগম্যা বুধজনৈঃ ।
দ্বয়ী লীলালোলা শ্রুতিষু সুরপালাদিমুকুটী-
তটীসীমাধামা তব জননি কামাক্ষি পদয়োঃ ॥ ৪৩ ॥
গিরাং দূরৌ চোরৌ জডিমতিমিরাণাং কৃতজগ-
ত্পরিত্রাণৌ শোণৌ মুনিহৃদয়লীলৈকনিপুণৌ ।
নখৈঃ স্মেরৌ সারৌ নিগমবচসাং খণ্ডিতভব-
গ্রহোন্মাদৌ পাদৌ তব জননি কামাক্ষি কলয়ে ॥ ৪৪ ॥
অবিশ্রান্তং পঙ্কং য়দপি কলয়ন্যাবকময়ং
নিরস্যন্কামাক্ষি প্রণমনজুষাং পঙ্কমখিলম্ ।
তুলাকোটিদ্বন্দং দধদপি চ গচ্ছন্নতুলতাং
গিরাং মার্গং পাদো গিরিবরসুতে লঙ্ঘয়তি তে ॥ ৪৫ ॥
প্রবালং সব্রীলং বিপিনবিবরে বেপয়তি য়া
স্ফুরল্লীলং বালাতপমধিকবালং বদতি য়া ।
রুচিং সান্ধ্যাং বন্ধ্যাং বিরচয়তি য়া বর্ধয়তু সা
শিবং মে কামাক্ষ্যাঃ পদনলিনপাটল্যলহরী ॥ ৪৬ ॥
কিরঞ্জ্যোত্স্নারীতিং নখমুখরুচা হংসমনসাং
বিতন্বানঃ প্রীতিং বিকচতরুণাম্ভোরুহরুচিঃ ।
প্রকাশঃ শ্রীপাদস্তব জননি কামাক্ষি তনুতে
শরত্কালপ্রৌঢিং শশিশকলচূডপ্রিয়তমে ॥ ৪৭ ॥
নখাঙ্কূরস্মেরদ্যুতিবিমলগঙ্গাম্ভসি সুখং
কৃতস্নানং জ্ঞানামৃতমমলমাস্বাদ্য নিয়তম্ ।
উদঞ্চন্মঞ্জীরস্ফুরণমণিদীপে মম মনো
মনোজ্ঞে কামাক্ষ্যাশ্চরণমণিহর্ম্যে বিহরতাম্ ॥ ৪৮ ॥
ভবাম্ভোধৌ নৌকাং জডিমবিপিনে পাবকশিখা-
মমর্ত্যেন্দ্রাদীনামধিমুকুটমুত্তংসকলিকাম্ ।
জগত্তাপে জ্যোত্স্নামকৃতকবচঃপঞ্জরপুটে
শুকস্ত্রীং কামাক্ষ্যা মনসি কলয়ে পাদয়ুগলীম্ ॥ ৪৯ ॥
পরত্মপ্রাকাশ্যপ্রতিফলনচুঞ্চুঃ প্রণমতাং
মনোজ্ঞস্ত্বত্পাদো মণিমুকুরমুদ্রাং কলয়তে ।
য়দীয়াং কামাক্ষি প্রকৃতিমসৃণাঃ শোধকদশাং
বিধাতুং চেষ্ঠন্তে বলরিপুবধূটীকচভরাঃ ॥ ৫০ ॥
অবিশ্রান্তং তিষ্ঠন্নকৃতকবচঃকন্দরপুটী-
কুটীরান্তঃ প্রৌঢং নখরুচিসটালীং প্রকটয়ন্ ।
প্রচণ্ডং খণ্ডত্বং নয়তু মম কামাক্ষি তরসা
তমোবেতণ্ডেন্দ্রং তব চরণকণ্ঠীরবপতিঃ ॥ ৫১ ॥
পুরস্তাত্কামাক্ষি প্রচুররসমাখণ্ডলপুরী-
পুরন্ধ্রীণাং লাস্যং তব ললিতমালোক্য শনকৈঃ ।
নখশ্রীভিঃ স্মেরা বহু বিতনুতে নূপুররবৈ-
শ্চমত্কৃত্যা শঙ্কে চরণয়ুগলী চাটুরচনাঃ ॥ ৫২ ॥
সরোজং নিন্দন্তী নখকিরণকর্পূরশিশিরা
নিষিক্তা মারারের্মুকুটশশিরেখাহিমজলৈঃ ।
স্ফুরন্তী কামাক্ষি স্ফুটরুচিময়ে পল্লবচয়ে
তবাধত্তে মৈত্রীং পথিকসুদৃশা পাদয়ুগলী ॥ ৫৩ ॥
নতানাং সম্পত্তেরনবরতমাকর্ষণজপঃ
প্ররোহত্সংসারপ্রসরগরিমস্তম্ভনজপঃ ।
ত্বদীয়ঃ কামাক্ষি স্মরহরমনোমোহনজপঃ
পটীয়ান্নঃ পায়াত্পদনলিনমঞ্জীরনিনদঃ ॥ ৫৪ ॥
বিতন্বীথা নাথে মম শিরসি কামাক্ষি কৃপয়া
পদাম্ভোজন্যাসং পশুপরিবৃঢপ্রাণদয়িতে ।
পিবন্তো য়ন্মুদ্রাং প্রকটমুপকম্পাপরিসরং
দৃশা নানন্দ্যন্তে নলিনভবনারায়ণমুখাঃ ॥ ৫৫ ॥
প্রণামোদ্যদ্বৃন্দারমুকুটমন্দারকলিকা-
বিলোলল্লোলম্বপ্রকরময়ধূমপ্রচুরিমা ।
প্রদীপ্তঃ পাদাব্জদ্যুতিবিততিপাটল্যলহরী-
কৃশানুঃ কামাক্ষ্যা মম দহতু সংসারবিপিনম্ ॥ ৫৬ ॥
বলক্ষশ্রীরৃক্ষাধিপশিশুসদৃক্ষৈস্তব নখৈঃ
জিঘৃক্ষুর্দক্ষত্বং সরসিরুহভিক্ষুত্বকরণে ।
ক্ষণান্মে কামাক্ষি ক্ষপিতভবসংক্ষোভগরিমা
বচোবৈচক্ষন্যং চরণয়ুগলী পক্ষ্মলয়তাত্ ॥ ৫৭ ॥
সমন্তাত্কামাক্ষি ক্ষততিমিরসন্তানসুভগান্
অনন্তাভির্ভাভির্দিনমনু দিগন্তান্বিরচয়ন্ ।
অহন্তায়া হন্তা মম জডিমদন্তাবলহরিঃ
বিভিন্তাং সন্তাপং তব চরণচিন্তামণিরসৌ ॥ ৫৮ ॥
দধানো ভাস্বত্তামমৃতনিলয়ো লোহিতবপুঃ
বিনম্রাণাং সৌম্যো গুরুরপি কবিত্বং চ কলয়ন্ ।
গতৌ মন্দো গঙ্গাধরমহিষি কামাক্ষি ভজতাং
তমঃকেতুর্মাতস্তব চরণপদ্মো বিজয়তে ॥ ৫৯ ॥
নয়ন্তীং দাসত্বং নলিনভবমুখ্যানসুলভ-
প্রদানাদ্দীনানামমরতরুদৌর্ভাগ্যজননীম্ ।
জগজ্জন্মক্ষেমক্ষয়বিধিষু কামাক্ষি পদয়ো-
র্ধুরীণামীষ্টে করস্তব ভণিতুমাহোপুরুষিকাম্ ॥ ৬০ ॥
জনোঽয়ং সন্তপ্তো জননি ভবচণ্ডাংশুকিরণৈঃ
অলব্ধবৈকং শীতং কণমপি পরজ্ঞানপয়সঃ ।
তমোমার্গে পান্থস্তব ঝটিতি কামাক্ষি শিশিরাং
পদাম্ভোজচ্ছায়াং পরমশিবজায়ে মৃগয়তে ॥ ৬১ ॥
জয়ত্যম্ব শ্রীমন্নখকিরণচীনাংশুকময়ং
বিতানং বিভ্রাণে সুরমুকুটসংঘট্টমসৃণে ।
নিজারুণ্যক্ষৌমাস্তরণবতি কামাক্ষি সুলভা
বুধৈঃ সংবিন্নারী তব চরণমাণিক্যভবনে ॥ ৬২ ॥
প্রতীমঃ কামাক্ষি স্ফুরিততরুণাদিত্যকিরণ-
শ্রিয়ো মূলদ্রব্যং তব চরণমদ্রীন্দ্রতনয়ে ।
সুরেন্দ্রাশামাপূরয়তি য়দসৌ ধ্বান্তমখিলং
ধুনীতে দিগ্ভাগানপি চ মহসা পাটলয়তে ॥ ৬৩ ॥
মহাভাষ্যব্যাখ্যাপটুশয়নমারোপয়তি বা
স্মরব্যাপারের্ষ্যাপিশুননিটিলং কারয়তি বা ।
দ্বিরেফাণামধ্যাসয়তি সততং বাধিবসতিং
প্রণম্রান্কামাক্ষ্যাঃ পদনলিনমাহাত্ম্যগরিমা ॥ ৬৪ ॥
বিবেকাম্ভস্স্রোতস্স্নপনপরিপাটীশিশিরিতে
সমীভূতে শাস্ত্রস্মরণহলসংকর্ষণবশাত্ ।
সতাং চেতঃক্ষেত্রে বপতি তব কামাক্ষি চরণো
মহাসংবিত্সস্যপ্রকরবরবীজং গিরিসুতে ॥ ৬৫ ॥
দধানো মন্দারস্তবকপরিপাটীং নখরুচা
বহন্দীপ্তাং শোণাঙ্গুলিপটলচাম্পেয়কলিকাম্ ।
অশোকোল্লাসং নঃ প্রচুরয়তু কামাক্ষি চরণো
বিকাসী বাসন্তঃ সময় ইব তে শর্বদয়িতে ॥ ৬৬ ॥
নখাংশুপ্রাচুর্যপ্রসৃমরমরালালিধবলঃ
স্ফুরন্মঞ্জীরোদ্যন্মরকতমহশ্শৈবলয়ুতঃ ।
ভবত্যাঃ কামাক্ষি স্ফুটচরণপাটল্যকপটো
নদঃ শোণাভিখ্যো নগপতিতনূজে বিজয়তে ॥ ৬৭ ॥
ধুনানং পঙ্কৌঘং পরমসুলভং কণ্টককুলৈঃ
বিকাসব্যাসঙ্গং বিদধদপরাধীনমনিশম্ ।
নখেন্দুজ্যোত্স্নাভির্বিশদরুচি কামাক্ষি নিতরাম্
অসামান্যং মন্যে সরসিজমিদং তে পদয়ুগম্ ॥ ৬৮ ॥
করীন্দ্রায় দ্রুহ্যত্যলসগতিলীলাসু বিমলৈঃ
পয়োজৈর্মাত্সর্যং প্রকটয়তি কামং কলয়তে ।
পদাম্ভোজদ্বন্দ্বং তব তদপি কামাক্ষি হৃদয়ং
মুনীনাং শান্তানাং কথমনিশমস্মৈ স্পৃহয়তে ॥ ৬৯ ॥
নিরস্তা শোণিম্না চরণকিরণানাং তব শিবে
সমিন্ধানা সন্ধ্যারুচিরচলরাজন্যতনয়ে ।
অসামর্থ্যাদেনং পরিভবিতুমেতত্সমরুচাং
সরোজানাং জানে মুকুলয়তি শোভাং প্রতিদিনম্ ॥ ৭০ ॥
উপাদিক্ষদ্দাক্ষ্যং তব চরণনামা গুরুরসৌ
মরালানাং শঙ্কে মসৃণগতিলালিত্যসরণৌ ।
অতস্তে নিস্তন্দ্রং নিয়তমমুনা সখ্যপদবীং
প্রপন্নং পাথোজং প্রতি দধতি কামাক্ষি কুতুকম্ ॥ ৭১ ॥
দধানৈঃ সংসর্গং প্রকৃতিমলিনৈঃ ষট্পদকুলৈঃ
দ্বিজাধীশশ্লাঘাবিধিষু বিদধদ্ভির্মুকুলতাম্ ।
রজোমিশ্রৈঃ পদ্মৈর্নিয়তমপি কামাক্ষি পদয়োঃ
বিরোধস্তে য়ুক্তো বিষমশরবৈরিপ্রিয়তমে ॥ ৭২ ॥
কবিত্বশ্রীমিশ্রীকরণনিপুণৌ রক্ষণচণৌ
বিপন্নানাং শ্রীমন্নলিনমসৃণৌ শোণকিরণৌ ।
মুনীন্দ্রাণামন্তঃকরণশরণৌ মন্দসরণৌ
মনোজ্ঞৌ কামাক্ষ্যা দুরিতহরণৌ নৌমি চরণৌ ॥ ৭৩ ॥
পরস্মাত্সর্বস্মাদপি চ পরয়োর্মুক্তিকরয়োঃ
নখশ্রীভির্জ্যোত্স্নাকলিততুলয়োস্তাম্রতলয়োঃ ।
নিলীয়ে কামাক্ষ্যা নিগমনুতয়োর্নাকিনতয়োঃ
নিরস্তপ্রোন্মীলন্নলিনমদয়োরেব পদয়োঃ ॥ ৭৪ ॥
স্বভাবাদন্যোন্যং কিসলয়মপীদং তব পদং
ম্রদিম্না শোণিম্না ভগবতি দধাতে সদৃশতাম্ ।
বনে পূর্বস্যেচ্ছা সততমবনে কিং তু জগতাং
পরস্যেত্থং ভেদঃ স্ফুরতি হৃদি কামাক্ষি সুধিয়াম্ ॥ ৭৫ ॥
কথং বাচালোঽপি প্রকটমণিমঞ্জীরনিনদৈঃ
সদৈবানন্দার্দ্রান্বিরচয়তি বাচংয়মজনান্ ।
প্রকৃত্যা তে শোণচ্ছবিরপি চ কামাক্ষি চরণো
মনীষানৈর্মল্যং কথমিব নৃণাং মাংসলয়তে ॥ ৭৬ ॥
চলত্তৃষ্ণাবীচীপরিচলনপর্যাকুলতয়া
মুহুর্ভ্রান্তস্তান্তঃ পরমশিববামাক্ষি পরবান্ ।
তিতীর্ষুঃ কামাক্ষি প্রচুরতরকর্মাম্বুধিমমুং
কদাহং লপ্স্যে তে চরণমণিসেতুং গিরিসুতে ॥ ৭৭ ॥
বিশুষ্যন্ত্যাং প্রজ্ঞাসরিতি দুরিতগ্রীষ্মসময়-
প্রভাবেণ ক্ষীণে সতি মম মনঃকেকিনি শুচা ।
ত্বদীয়ঃ কামাক্ষি স্ফুরিতচরণাম্ভোদমহিমা
নভোমাসাটোপং নগপতিসুতে কিং ন কুরুতে ॥ ৭৮ ॥
বিনম্রাণাং চেতোভবনবলভীসীম্নি চরণ-
প্রদীপে প্রাকাশ্যং দধতি তব নির্ধূততমসি ।
অসীমা কামাক্ষি স্বয়মলঘুদুষ্কর্মলহরী
বিঘূর্ণন্তী শান্তিং শলভপরিপাটীব ভজতে ॥ ৭৯ ॥
বিরাজন্তী শুক্তির্নখকিরণমুক্তামণিততেঃ
বিপত্পাথোরাশৌ তরিরপি নরাণাং প্রণমতাম্ ।
ত্বদীয়ঃ কামাক্ষি ধ্রুবমলঘুবহ্নির্ভববনে
মুনীনাং জ্ঞানাগ্নেররণিরয়মঙ্ঘির্বিজয়তে ॥ ৮০ ॥
সমস্তৈঃ সংসেব্যঃ সততমপি কামাক্ষি বিবুধৈঃ
স্তুতো গন্ধর্বস্ত্রীসুললিতবিপঞ্চীকলরবৈঃ ।
ভবত্যা ভিন্দানো ভবগিরিকুলং জৃম্ভিততমো-
বলদ্রোহী মাতশ্চরণপুরুহূতো বিজয়তে ॥ ৮১ ॥
বসন্তং ভক্তানামপি মনসি নিত্যং পরিলসদ্-
ঘনচ্ছায়াপূর্ণং শুচিমপি নৃণাং তাপশমনম্ ।
নখেন্দুজ্যোত্স্নাভিঃ শিশিরমপি পদ্মোদয়করং
নমামঃ কামাক্ষ্যাশ্চরণমধিকাশ্চর্যকরণম্ ॥ ৮২ ॥
কবীন্দ্রাণাং নানাভণিতিগুণচিত্রীকৃতবচঃ-
প্রপঞ্চব্যাপারপ্রকটনকলাকৌশলনিধিঃ ।
অধঃকুর্বন্নব্জং সনকভৃগুমুখ্যৈর্মুনিজনৈঃ
নমস্যঃ কামাক্ষ্যাশ্চরণপরমেষ্ঠী বিজয়তে ॥ ৮৩ ॥
ভবত্যাঃ কামাক্ষি স্ফুরিতপদপঙ্কেরুহভুবাং
পরাগাণাং পূরৈঃ পরিহৃতকলঙ্কব্যতিকরৈঃ ।
নতানামামৃষ্টে হৃদয়মুকুরে নির্মলরুচি
প্রসন্নে নিশ্শেষং প্রতিফলতি বিশ্বং গিরিসুতে ॥ ৮৪ ॥
তব ত্রস্তং পাদাত্কিসলয়মরণ্যান্তরমগাত্
পরং রেখারূপং কমলমমুমেবাশ্রিতমভূত্ ।
জিতানাং কামাক্ষি দ্বিতয়মপি য়ুক্তং পরিভবে
বিদেশে বাসো বা শরণগমনং বা নিজরিপোঃ ॥ ৮৫ ॥
গৃহীত্বা য়াথার্থ্যং নিগমবচসাং দেশিককৃপা-
কটাক্ষর্কজ্যোতিশ্শমিতমমতাবন্ধতমসঃ ।
য়তন্তে কামাক্ষি প্রতিদিবসমন্তর্দ্রঢয়িতুং
ত্বদীয়ং পাদাব্জং সুকৃতপরিপাকেন সুজনাঃ ॥ ৮৬ ॥
জডানামপ্যম্ব স্মরণসময়ে তবচ্চরণয়োঃ
ভ্রমন্মন্থক্ষ্মাভৃদ্ধুমুঘুমিতসিন্ধুপ্রতিভটাঃ ।
প্রসন্নাঃ কামাক্ষি প্রসভমধরস্পন্দনকরা
ভবন্তি স্বচ্ছন্দং প্রকৃতিপরিপক্কা ভণিতয়ঃ ॥ ৮৭ ॥
বহন্নপ্যশ্রান্তং মধুরনিনদং হংসকমসৌ
তমেবাধঃ কর্তুং কিমিব য়ততে কেলিগমনে ।
ভবস্যৈবানন্দং বিদধদপি কামাক্ষি চরণো
ভবত্যাস্তদ্দ্রোহং ভগবতি কিমেবং বিতনুতে ॥ ৮৮ ॥
য়দত্যন্তং তাম্যত্যলসগতিবার্তাস্বপি শিবে
তদেতত্কামাক্ষি প্রকৃতিমৃদুলং তে পদয়ুগম্ ।
কিরীটৈঃ সংঘট্টং কথমিব সুরৌঘস্য সহতে
মুনীন্দ্রাণামাস্তে মনসি চ কথং সূচিনিশিতে ॥ ৮৯ ॥
মনোরঙ্গে মত্কে বিবুধজনসংমোদজননী
সরাগব্যাসঙ্গং সরসমৃদুসংচারসুভগা ।
মনোজ্ঞা কামাক্ষি প্রকটয়তু লাস্যপ্রকরণং
রণন্মঞ্জীরা তে চরণয়ুগলীনর্তকবধূঃ ॥ ৯০ ॥
পরিষ্কুর্বন্মাতঃ পশুপতিকপর্দং চরণরাট্
পরাচাং হৃত্পদ্মং পরমভণিতীনাং চ মকুটম্ ।
ভবাখ্যে পাথোধৌ পরিহরতু কামাক্ষি মমতা-
পরাধীনত্বং মে পরিমুষিতপাথোজমহিমা ॥ ৯১ ॥
প্রসূনৈঃ সম্পর্কাদমরতরুণীকুন্তলভবৈঃ
অভীষ্টানাং দানাদনিশমপি কামাক্ষি নমতাম্ ।
স্বসঙ্গাত্কঙ্কেলিপ্রসবজনকত্বেন চ শিবে
ত্রিধা ধত্তে বার্তাং সুরভিরিতি পাদো গিরিসুতে ॥ ৯২ ॥
মহামোহস্তেনব্যতিকরভয়াত্পালয়তি য়ো
বিনিক্ষিপ্তং স্বস্মিন্নিজজনমনোরত্নমনিশম্ ।
স রাগস্যোদ্রেকাত্সততমপি কামাক্ষি তরসা
কিমেবং পাদোঽসৌ কিসলয়রুচিং চোরয়তি তে ॥ ৯৩ ॥
সদা স্বাদুংকারং বিষয়লহরীশালিকণিকাং
সমাস্বাদ্য শ্রান্তং হৃদয়শুকপোতং জননি মে ।
কৃপাজালে ফালেক্ষণমহিষি কামাক্ষি রভসাত্
গৃহীত্বা রুন্ধীথারস্তব পদয়ুগীপঞ্জরপুটে ॥ ৯৪ ॥
ধুনানং কামাক্ষি স্মরণলবমাত্রেণ জডিম-
জ্বরপ্রৌঢিং গূঢস্থিতি নিগমনৈকুঞ্জকুহরে ।
অলভ্যং সর্বেষাং কতিচন লভন্তে সুকৃতিনঃ
চিরাদন্বিষ্যন্তস্তব চরণসিদ্ধৌষধমিদম্ ॥ ৯৫ ॥
রণন্মঞ্জীরাভ্যাং ললিতগমনাভ্যাং সুকৃতিনাং
মনোবাস্তব্যাভ্যাং মথিততিমিরাভ্যাং নখরুচা ।
নিধেয়াভ্যাং পত্যা নিজশিরসি কামাক্ষি সততং
নমস্তে পাদাভ্যাং নলিনমৃদুলাভ্যাং গিরিসুতে ॥ ৯৬ ॥
সুরাগে রাকেন্দুপ্রতিনিধিমুখে পর্বতসুতে
চিরাল্লভ্যে ভক্ত্যা শমধনজনানাং পরিষদা ।
মনোভৃঙ্গো মত্কঃ পদকমলয়ুগ্মে জননি তে
প্রকামং কামাক্ষি ত্রিপুরহরবামাক্ষি রমতাম্ ॥ ৯৭ ॥
শিবে সংবিদ্রূপে শশিশকলচূডপ্রিয়তমে
শনৈর্গত্যাগত্যা জিতসুরবরেভে গিরিসুতে ।
য়তন্তে সন্তস্তে চরণনলিনালানয়ুগলে
সদা বদ্ধং চিত্তপ্রমদকরিয়ূথং দৃঢতরম্ ॥ ৯৮ ॥
য়শঃ সূতে মাতর্মধুরকবিতাং পক্ষ্মলয়তে
শ্রিয়ং দত্তে চিত্তে কমপি পরিপাকং প্রথয়তে ।
সতাং পাশগ্রন্থিং শিথিলয়তি কিং কিং ন কুরুতে
প্রপন্নে কামাক্ষ্যাঃ প্রণতিপরিপাটী চরণয়োঃ ॥ ৯৯ ॥
মনীষাং মাহেন্দ্রীং ককুভমিব তে কামপি দশাং
প্রধত্তে কামাক্ষ্যাশ্চরণতরুণাদিত্যকিরণঃ ।
য়দীয়ে সম্পর্কে ধৃতরসমরন্দা কবয়তাং
পরীপাকং ধত্তে পরিমলবতী সূক্তিনলিনী ॥ ১০০ ॥
পুরা মারারাতিঃ পুরমজয়দম্ব স্তবশতৈঃ
প্রসন্নায়াং সত্যাং ত্বয়ি তুহিনশৈলেন্দ্রতনয়ে ।
অতস্তে কামাক্ষি স্ফুরতু তরসা কালসময়ে
সমায়াতে মাতর্মম মনসি পাদাব্জয়ুগলম্ ॥ ১০১ ॥
পদদ্বন্দ্বং মন্দং গতিষু নিবসন্তং হৃদি সতাং
গিরামন্তে ভ্রান্তং কৃতকরহিতানাং পরিবৃঢে ।
জনানামানন্দং জননি জনয়ন্তং প্রণমতাং
ত্বদীয়ং কামাক্ষি প্রতিদিনমহং নৌমি বিমলম্ ॥ ১০২ ॥
ইদং য়ঃ কামাক্ষ্যাশ্চরণনলিনস্তোত্রশতকং
জপেন্নিত্যং ভক্ত্যা নিখিলজগদাহ্লাদজনকম্ ।
স বিশ্বেষাং বন্দ্যঃ সকলকবিলোকৈকতিলকঃ
চিরং ভুক্ত্বা ভোগান্পরিণমতি চিদ্রূপকলয়া ॥ ১০৩ ॥
পাদারবিন্দশতকং সম্পূর্ণম্ ॥
॥ স্তুতিশতকম্ ॥
পাণ্ডিত্যং পরমেশ্বরি স্তুতিবিধৌ নৈবাশ্রয়ন্তে গিরাং
বৈরিঞ্চান্যপি গুম্ফনানি বিগলদ্গর্বাণি শর্বাণি তে ।
স্তোতুং ত্বাং পরিফুল্লনীলনলিনশ্যামাক্ষি কামাক্ষি মাং
বাচালীকুরুতে তথাপি নিতরাং ত্বত্পাদসেবাদরঃ ॥ ১ ॥
তাপিঞ্ছস্তবকত্বিষে তনুভৃতাং দারিদ্র্যমুদ্রাদ্বিষে
সংসারাখ্যতমোমুষে পুররিপোর্বামাঙ্কসীমাজুষে ।
কম্পাতীরমুপেয়ুষে কবয়তাং জিহ্বাকুটীং জগ্মুষে
বিশ্বত্রাণপুষে নমোঽস্তু সততং তস্মৈ পরংজ্যোতিষে ॥ ২ ॥
য়ে সন্ধ্যারুণয়ন্তি শংকরজটাকান্তারচন্রার্ভকং
সিন্দূরন্তি চ য়ে পুরন্দরবধূসীমন্তসীমান্তরে ।
পুণ্যং য়ে পরিপক্কয়ন্তি ভজতাং কাঞ্চীপুরে মামমী
পায়াসুঃ পরমেশ্বরপ্রণয়িনীপাদোদ্ভবাঃ পাংসবঃ ॥ ৩ ॥
কামাডম্বরপূরয়া শশিরুচা কম্রস্মিতানাং ত্বিষা
কামারেরনুরাগসিন্ধুমধিকং কল্লোলিতং তন্বতী ।
কামাক্ষীতি সমস্তসজ্জননুতা কল্যাণদাত্রী নৃণাং
কারুণ্যাকুলমানসা ভগবতী কম্পাতটে জৃম্ভতে ॥ ৪ ॥
কামাক্ষীণপরাক্রমপ্রকটনং সম্ভাবয়ন্তী দৃশা
শ্যামা ক্ষীরসহোদরস্মিতরুচিপ্রক্ষালিতাশান্তরা ।
কামাক্ষীজনমৌলিভূষণমণির্বাচাং পরা দেবতা
কামাক্ষীতি বিভাতি কাপি করুণা কম্পাতটিন্যাস্তটে ॥ ৫ ॥
শ্যামা কাচন চন্দ্রিকা ত্রিভুবনে পুণ্যাত্মনামাননে
সীমাশূন্যকবিত্ববর্ষজননী য়া কাপি কাদম্বিনী ।
মারারাতিমনোবিমোহনবিধৌ কাচিতত্তমঃকন্দলী
কামাক্ষ্যাঃ করুণাকটাক্ষলহরী কামায় মে কল্পতাম্ ॥ ৬ ॥
প্রৌঢধ্বান্তকদম্বকে কুমুদিনীপুণ্যাংকুরং দর্শয়ন্
জ্যোত্স্নাসংগমনেঽপি কোকমিথুনং মিশ্রং সমুদ্ভাবয়ন্ ।
কালিন্দীলহরীদশাং প্রকটয়ন্কম্রাং নভস্যদ্ভুতাং
কশ্চিন্নেত্রমহোত্সবো বিজয়তে কাঞ্চীপুরে শূলিনঃ ॥ ৭ ॥
তন্দ্রাহীনতমালনীলসুষমৈস্তারুণ্যলীলাগৃহৈঃ
তারানাথকিশোরলাঞ্ছিতকচৈস্তাম্রারবিন্দেক্ষণৈঃ ।
মাতঃ সংশ্রয়তাং মনো মনসিজপ্রাগল্ভ্যনাডিন্ধমৈঃ
কম্পাতীরচরৈর্ঘনস্তনভরৈঃ পুণ্যাঙ্করৈঃ শাংকরৈঃ ॥ ৮ ॥
নিত্যং নিশ্চলতামুপেত্য মরুতাং রক্ষাবিধিং পুষ্ণতী
তেজস্সংচয়পাটবেন কিরণানুষ্ণদ্যুতের্মুষ্ণতী ।
কাঞ্চীমধ্যগতাপি দীপ্তিজননী বিশ্বান্তরে জৃম্ভতে
কাচিচ্চিত্রমহো স্মৃতাপি তমসাং নির্বাপিকা দীপিকা ॥ ৯ ॥
কান্তৈঃ কেশরুচাং চয়ৈর্ভ্রমরিতং মন্দস্মিতৈঃ পুষ্পিতং
কান্ত্যা পল্লবিতং পদাম্বুরুহয়োর্নেত্রত্বিষা পত্রিতম্ ।
কম্পাতীরবনান্তরং বিদধতী কল্যাণজন্মস্থলী
কাঞ্চীমধ্যমহামণির্বিজয়তে কাচিত্কৃপাকন্দলী ॥ ১০ ॥
রাকাচন্দ্রসমানকান্তিবদনা নাকাধিরাজস্তুতা
মূকানামপি কুর্বতী সুরধুনীনীকাশবাগ্বৈভবম্ ।
শ্রীকাঞ্চীনগরীবিহাররসিকা শোকাপহন্ত্রী সতাম্
একা পুণ্যপরম্পরা পশুপতেরাকারিণী রাজতে ॥ ১১ ॥
জাতা শীতলশৈলতঃ সুকৃতিনাং দৃশ্যা পরং দেহিনাং
লোকানাং ক্ষণমাত্রসংস্মরণতঃ সন্তাপবিচ্ছেদিনী ।
আশ্চর্যং বহু খেলনং বিতনুতে নৈশ্চল্যমাবিভ্রতী
কম্পায়াস্তটসীম্নি কাপি তটিনী কারুণ্যপাথোময়ী ॥ ১২ ॥
ঐক্যং য়েন বিরচ্যতে হরতনৌ দম্ভাবপুম্ভাবুকে
রেখা য়ত্কচসীম্নি শেখরদশাং নৈশাকরী গাহতে ।
ঔন্নত্যং মুহুরেতি য়েন স মহান্মেনাসখঃ সানুমান্
কম্পাতীরবিহারিণা সশরণাস্তেনৈব ধাম্না বয়ম্ ॥ ১৩ ॥
অক্ষ্ণোশ্চ স্তনয়োঃ শ্রিয়া শ্রবণয়োর্বাহ্বোশ্চ মূলং স্পৃশন্
উত্তংসেন মুখেন চ প্রতিদিনং দ্রুহ্যন্পয়োজন্মনে ।
মাধুর্যেণ গিরাং গতেন মৃদুনা হংসাঙ্গনাং হ্রেপয়ন্
কাঞ্চীসীম্নি চকাস্তি কোঽপি কবিতাসন্তানবীজাঙ্কুরঃ ॥ ১৪ ॥
খণ্ডং চান্দ্রমসং বতংসমনিশং কাঞ্চীপুরে খেলনং
কালায়শ্ছবিতস্করীং তনুরুচিং কর্ণজপে লোচনে ।
তারুণ্যোষ্মনখম্পচং স্তনভরং জঙ্ঘাস্পৃশং কুন্তলং
ভাগ্যং দেশিকসংচিতং মম কদা সম্পাদয়েদম্বিকে ॥ ১৫ ॥
তন্বানং নিজকেলিসৌধসরণিং নৈসর্গিকীণাং গিরাং
কেদারং কবিমল্লসূক্তিলহরীসস্যশ্রিয়াং শাশ্বতম্ ।
অংহোবঞ্চনচুঞ্চু কিংচন ভজে কাঞ্চীপুরীমণ্ডনং
পর্যায়চ্ছবি পাকশাসনমণেঃ পৌষ্পেষবং পৌরুষম্ ॥ ১৬ ॥
আলোকে মুখপঙ্কজে চ দধতী সৌধাকরীং চাতুরীং
চূডালংক্রিয়মাণপঙ্কজবনীবৈরাগমপ্রক্রিয়া ।
মুগ্ধস্মেরমুখী ঘন্সতনতটীমূর্চ্ছালমধ্যাঞ্চিতা
কাঞ্চীসীমনি কামিনী বিজয়তে কাচিজ্জগন্মোহিনী ॥ ১৭ ॥
য়স্মিন্নম্ব ভবত্কটাক্ষরজনী মন্দেঽপি মন্দস্মিত-
জ্যোত্স্নাসংস্নপিতা ভবত্যভিমুখী তং প্রত্যহো দেহিনম্ ।
দ্রক্ষামাক্ষিকমাধুরীমদভরব্রীডাকরী বৈখরী
কামাক্ষি স্বয়মাতনোত্যভিসৃতিং বামেক্ষণেব ক্ষণম্ ॥ ১৮ ॥
কালিন্দীজলকান্তয়ঃ স্মিতরুচিস্বর্বাহিনীপাথসি
প্রৌঢধ্বান্তরুচঃ স্ফুটাধরমহোলৌহিত্যসন্ধ্যোদয়ে ।
মণিক্যোপলকুণ্ডলাংশুশিখিনি ব্যামিশ্রধূমশ্রিয়ঃ
কল্যাণৈকভুবঃ কটাক্ষসুষমাঃ কামাক্ষি রাজন্তি তে ॥ ১৯ ॥
কলকলরণত্কাঞ্চী কাঞ্চীবিভূষণমালিকা
কচভরলসচ্চন্দ্রা চন্দ্রাবতংসসধর্মিণী ।
কবিকুলগির্ঃ শ্রাবংশ্রাবং মিলত্পুলকাংকুরা
বিরচিতশিরঃকম্পা কম্পাতটে পরিশোভতে ॥ ২০ ॥
সরসবচসাং বীচী নীচীভবন্মধুমাধুরী
ভরিতভুবনা কীর্তির্মূর্তির্মনোভবজিত্বরী ।
জননি মনসো য়োগ্যং ভোগ্যং নৃণাং তব জায়তে
কথমিব বিনা কাঞ্চীভূষে কটাক্ষতরঙ্গিতম্ ॥ ২১ ॥
ভ্রমরিতসরিত্কূলো নীলোত্পলপ্রভয়াঽঽভয়া
নতজনতমঃখণ্ডী তুণ্ডীরসীম্নি বিজৃম্ভতে ।
অচলতপসামেকঃ পাকঃ প্রসূনশরাসন-
প্রতিভটমনোহারী নারীকুলৈকশিখামণিঃ ॥ ২২ ॥
মধুরবচসো মন্দস্মেরা মতঙ্গজগামিনঃ
তরুণিমজুষস্তাপিচ্ছাভাস্তমঃপরিপন্থিনঃ ।
কুচভরনতাঃ কুর্যুর্ভদ্রং কুরঙ্গবিলোচনাঃ
কলিতকরুণাঃ কাঞ্চীভাজঃ কপালিমহোত্সবাঃ ॥ ২৩ ॥
কমলসুষমাক্ষ্যারোহে বিচক্ষণবীক্ষণাঃ
কুমুদসুকৃতক্রীডাচূডালকুন্তলবন্ধুরাঃ ।
রুচিররুচিভিস্তাপিচ্ছশ্রীপ্রপঞ্চনচুঞ্চবঃ
পুরবিজয়িনঃ কম্পাতীরে স্ফুরন্তি মনোরথাঃ ॥ ২৪ ॥
কলিতরতয়ঃ কাঞ্চীলীলাবিধৌ কবিমণ্ডলী-
বচনলহরীবাসন্তীনাং বসন্তবিভূতয়ঃ ।
কুশলবিধয়ে ভূয়াসুর্মে কুরঙ্গবিলোচনাঃ
কুসুমবিশিখারাতেরক্ষ্ণাং কুতূহলবিভ্রমাঃ ॥ ২৫ ॥
কবলিততমস্কাণ্ডাস্তুণ্ডীরমণ্ডলমণ্ডনাঃ
সরসিজবনীসন্তানানামরুন্তুদশেখরাঃ ।
নয়নসরণের্নেদীয়ংসঃ কদা নু ভবন্তি মে
তরুণজলদশ্যামাঃ শম্ভোস্তপঃফলবিভ্রমাঃ ॥ ২৬ ॥
অচরমমিষুং দীনং মীনধ্বজস্য মুখশ্রিয়া
সরসিজভুবো য়ানং ম্লানং গতেন চ মঞ্জুনা ।
ত্রিদশসদসামন্নং খিন্নং গিরা চ বিতন্বতী
তিলকয়তি সা কম্পাতীরং ত্রিলোচনসুন্দরী ॥ ২৭ ॥
জননি ভুবনে চঙ্ক্রম্যেঽহং কিয়ন্তমনেহসং
কুপুরুষকরভ্রষ্টৈর্দুষ্টৈর্ধনৈরুদরম্ভরিঃ ।
তরুণকরুণে তন্দ্রাশূন্যে তরঙ্গয় লোচনে
নমতি ময়ি তে কিংচিত্কাঞ্চীপুরীমণিদীপিকে ॥ ২৮ ॥
মুনিজনমনঃপেটীরত্নং স্ফুরত্করুণানটী-
বিহরণকলাগেহং কাঞ্চীপুরীমণিভূষণম্ ।
জগতি মহতো মোহব্যাধের্নৃণাং পরমৌষধং
পুরহরদৃশাং সাফল্যং মে পুরঃ পরিজৃম্ভতাম্ ॥ ২৯ ॥
মুনিজনমোধাম্নে ধাম্নে বচোময়জাহ্নবী-
হিমগিরিতটপ্রাগ্ভারায়াক্ষরায় পরাত্মনে ।
বিহরণজুষে কাঞ্চীদেশে মহেশ্বরলোচন-
ত্রিতয়সরসক্রীডাসৌধাঙ্গণায় নমো নমঃ ॥ ৩০ ॥
মরকতরুচাং প্রত্যাদেশং মহেশ্বরচক্ষুষাম্
অমৃতলহরীপূরং পারং ভবাখ্যপয়োনিধেঃ ।
সুচরিতফলং কাঞ্চীভাজো জনস্য পচেলিমং
হিমশিখরিণো বংশস্যৈকং বতংসমুপাস্মহে ॥ ৩১ ॥
প্রণমনদিনারম্ভে কম্পানদীসখি তাবকে
সরসকবিতোন্মেষঃ পূষা সতাং সমুদঞ্চিতঃ ।
প্রতিভটমহাপ্রৌঢপ্রোদ্যত্কবিত্বকুমুদ্বতীং
নয়তি তরসা নিদ্রামুদ্রাং নগেশ্বরকন্যকে ॥ ৩২ ॥
শমিতজডিমারম্ভা কম্পাতটীনিকটেচরী
নিহতদুরিতস্তোমা সোমার্ধমুদ্রিতকুন্তলা ।
ফলিতসুমনোবাঞ্ছা পাঞ্চায়ুধী পরদেবতা
সফলয়তু মে নেত্রে গোত্রেশ্বরপ্রিয়নন্দিনী ॥ ৩৩ ॥
মম তু ধিষণা পীড্যা জাড্যাতিরেক কথং ত্বয়া
কুমুদসুষমামৈত্রীপাত্রীবতংসিতকুন্তলাম্ ।
জগতি শমিতস্তম্ভাং কম্পানদীনিলয়ামসৌ
শ্রিয়তি হি গলত্তন্দ্রা চন্দ্রাবতংসসধর্মিণীম্ ॥ ৩৪ ॥
পরিমলপরীপাকোদ্রেকং পয়োমুচি কাঞ্চনে
শিখরিণি পুনর্দ্বৈধীভাবং শশিন্যরুণাতপম্ ।
অপি চ জনয়ন্কম্বোর্লক্ষ্মীমনম্বুনি কোঽপ্যসৌ
কুসুমধনুষঃ কাঞ্চীদেশে চকাস্তি পরাক্রমঃ ॥ ৩৫ ॥
পুরদময়িতুর্বামোত্সঙ্গস্থলেন রসজ্ঞয়া
সরসকবিতাভাজা কাঞ্চীপুরোদরসীময়া ।
তটপরিসরৈর্নীহারাদ্রের্বচোভিরকৃত্রিমৈঃ
কিমিব ন তুলামস্মচ্চেতো মহেশ্বরি গাহতে ॥ ৩৬ ॥
নয়নয়ুগলীমাস্মাকীনাং কদা নু ফলেগ্রহীং
বিদধতি গতৌ ব্যাকুর্বাণা গজেন্দ্রচমত্ক্রিয়াম্ ।
মরতকরুচো মাহেশানা ঘনস্তননম্রিতাঃ
সুকৃতবিভবাঃ প্রাঞ্চঃ কাঞ্চীবতংসধুরন্ধরাঃ ॥ ৩৭ ॥
মনসিজয়শঃপারম্পর্যং মরন্দঝরীসুবাং
কবিকুলগিরাং কন্দং কম্পানদীতটমণ্ডনম্ ।
মধুরললিতং মত্কং চক্ষুর্মনীষিমনোহরং
পুরবিজয়িনঃ সর্বস্বং তত্পুরস্কুরুতে কদা ॥ ৩৮ ॥
শিথিলিততমোলীলাং নীলারবিন্দবিলোচনাং
দহনবিলসত্ফালাং শ্রীকামকোটিমুপাস্মহে ।
করধৃতসচ্ছূলাং কালারিচিত্তহরাং পরাং
মনসিজকৃপালীলাং লোলালকামলিকেক্ষণাম্ ॥ ৩৯ ॥
কলালীলাশালা কবিকুলবচঃকৈরববনী-
শরজ্জ্যোত্স্নাধারা শশধরশিশুশ্লাঘ্যমুকুটী ।
পুনীতে নঃ কম্পাপুলিনতটসৌহার্দতরলা
কদা চক্ষুর্মার্গং কনকগিরিধানুষ্কমহিষী ॥ ৪০ ॥
নমঃ স্তান্নম্রেভ্যঃ স্তনগরিমগর্বেণ গুরুণা
দধানেভ্যশ্চূডাভরণমমৃতস্যন্দি শিশিরম্ ।
সদা বাস্তবেভ্যঃ সুবিধভুবি কম্পাখ্যসরিতে
য়শোব্যাপারেভ্যঃ সুকৃতবিভবেভ্যো রতিপতেঃ ॥ ৪১ ॥
অসূয়ন্তী কাচিন্মরকতরুচো নাকিমুকুটী-
কদম্বং চুম্বন্তী চরণনখচন্দ্রাংশুপটলৈঃ ।
তমোমুদ্রাং বিদ্রাবয়তু মম কাঞ্চীর্নিলয়না
হরোত্সঙ্গশ্রীমন্মণিগৃহমহাদীপকলিকা ॥ ৪২ ॥
অনাদ্যন্তা কাচিত্সুজননয়নানন্দজননী
নিরুন্ধানা কান্তিং নিজরুচিবিলাসৈর্জলমুচাম্ ।
স্মরারেস্তারল্যং মনসি জনয়ন্তী স্বয়মহো
গলত্কম্পা শম্পা পরিলসতি কম্পাপরিসরে ॥ ৪৩ ॥
সুধাডিণ্ডীরশ্রীঃ স্মিতরুচিষু তুণ্ডীরবিষয়ং
পরিষ্কুর্বাণাসৌ পরিহসিতনীলোত্পলরুচিঃ ।
স্তনাভ্যামানম্রা স্তবকয়তু মে কাঙ্ক্ষিততরুং
দৃশামৈশানীনাং সুকৃতফলপাণ্ডিত্যগরিমা ॥ ৪৪ ॥
কৃপাধারাদ্রোণী কৃপণধিষণানাং প্রণমতাং
নিহন্ত্রী সন্তাপং নিগমমুকুটোত্তংসকলিকা ।
পরা কাঞ্চীলীলাপরিচয়বতী পর্বতসুতা
গিরাং নীবী দেবী গিরিশপরতন্ত্রা বিজয়তে ॥ ৪৫ ॥
কবিত্বশ্রীকন্দঃ সুকৃতপরিপাটী হিমগিরেঃ
বিধাত্রী বিশ্বেষাং বিষমশরবীরধ্বজপটী ।
সখী কম্পানদ্যাঃ পদহসিতপাথোজয়ুগলী
পুরাণো পায়ান্নঃ পুরমথনসাম্রাজ্যপদবী ॥ ৪৬ ॥
দরিদ্রাণা মধ্যে দরদলিততাপিচ্ছসুষমাঃ
স্তনাভোগক্কান্তাস্তরুণহরিণাঙ্কাঙ্কিতকচাঃ ।
হরাধীনা নানাবিবুধমুকুটীচুম্বিতপদাঃ
কদা কম্পাতীরে কথয় বিহরামো গিরিসুতে ॥ ৪৭ ॥
বরীবর্তু স্থেমা ত্বয়ি মম গিরাং দেবি মনসো
নরীনর্তু প্রৌঢা বদনকমলে বাক্যলহরী ।
চরীচর্তু প্রজ্ঞাজননি জডিমানঃ পরজনে
সরীসর্তু স্বৈরং জননি ময়ি কামাক্ষি করুণা ॥ ৪৮ ॥
ক্ষণাত্তে কামাক্ষি ভ্রমরসুষমাশিক্ষণগুরুঃ
কটাক্ষব্যাক্ষেপো মম ভবতু মোক্ষায় বিপদাম্ ।
নরীনর্তু স্বৈরং বচনলহরী নির্জরপুরী-
সরিদ্বীচীনীচীকরণপটুরাস্যে মম সদা ॥ ৪৯ ॥
পুরস্তান্মে ভূয়ঃপ্রশমনপরঃ স্তান্মম রুজাং
প্রচারস্তে কম্পাতটবিহৃতিসম্পাদিনি দৃশোঃ ।
ইমাং য়াচ্ঞামূরীকুরু সপদি দূরীকুরু তমঃ-
পরীপাকং মত্কং সপদি বুধলোকং চ নয় মাম্ ॥ ৫০ ॥
উদঞ্চন্তী কাঞ্চীনগরনিলয়ে ত্বত্করুণয়া
সমৃদ্ধা বাগ্ধাটী পরিহসিতমাধ্বী কবয়তাম্ ।
উপাদত্তে মারপ্রতিভটজটাজূটমুকুটী-
কুটীরোল্লাসিন্যাঃ শতমখতটিন্যা জয়পটীম্ ॥ ৫১ ॥
শ্রিয়ং বিদ্যাং দদ্যাজ্জননি নমতাং কীর্তিমমিতাং
সুপুত্রান্ প্রাদত্তে তব ঝটিতি কামাক্ষি করুণা ।
ত্রিলোক্যামাধিক্যং ত্রিপুরপরিপন্থিপ্রণয়িনি
প্রণামস্ত্বত্পাদে শমিতদুরিতে কিং ন কুরুতে ॥ ৫২ ॥
মনঃস্তম্ভং স্তম্ভং গময়দুপকম্পং প্রণমতাং
সদা লোলং নীলং চিকুরজিতলোলম্বনিকরম্ ।
গিরাং দূরং স্মেরং ধৃতশশিকিশোরং পশুপতেঃ
দৃশাং য়োগ্যং ভোগ্যং তুহিনগিরিভাগ্যং বিজয়তে ॥ ৫৩ ॥
ঘনশ্যামান্কামান্তকমহিষি কামাক্ষি মধুরান্
দৃশাং পাতানেতানমৃতজলশীতাননুপমান্ ।
ভবোত্পাতে ভীতে ময়ি বিতর নাথে দৃঢভব-
ন্মনশ্শোকে মূকে হিমগিরিপতাকে করুণয়া ॥ ৫৪ ॥
নতানাং মন্দানাং ভবনিগলবন্ধাকুলধিয়াং
মহান্ধ্যাং রুন্ধানামভিলষিতসন্তানলতিকাম্ ।
চরন্তীং কম্পায়াস্তটভুবি সবিত্রীং ত্রিজগতাং
স্মরামস্তাং নিত্যং স্মরমথনজীবাতুকলিকাম্ ॥ ৫৫ ॥
পরা বিদ্যা হৃদ্যাশ্রিতমদনবিদ্যা মরকত-
প্রভানীলা লীলাপরবশিতশূলায়ুধমনাঃ ।
তমঃপূরং দূরং চরণনতপৌরন্দরপুরী-
মৃগাক্ষী কামাক্ষী কমলতরলাক্ষী নয়তু মে ॥ ৫৬ ॥
অহন্তাখ্যা মত্কং কবলয়তি হা হন্ত হরিণী
হঠাত্সংবিদ্রূপং হরমহিষি সস্যাঙ্কুরমসৌ ।
কটাক্ষব্যাক্ষেপপ্রকটহরিপাষাণপটলৈঃ
ইমামুচ্চৈরুচ্চাটয় ঝটিতি কামাক্ষি কৃপয়া ॥ ৫৭ ॥
বুধে বা মূকে বা তব পততি য়স্মিন্ক্ষণমসৌ
কটাক্ষঃ কামাক্ষি প্রকটজডিমক্ষোদপটিমা ।
কথংকারং নাস্মৈ করমুকুলচূডালমুকুটা
নমোবাকং ব্রূয়ুর্নমুচিপরিপন্থিপ্রভৃতয়ঃ ॥ ৫৮ ॥
প্রতীচীং পশ্যামঃ প্রকটরুচিনীবারকমণি-
প্রভাসধ্রীচীনাং প্রদলিতষডাধারকমলাম্ ।
চরন্তীং সৌষুম্নে পথি পরপদেন্দুপ্রবিগল-
ত্সুধার্দ্রাং কামাক্ষীং পরিণতপরংজ্যোতিরুদয়াম্ ॥ ৫৯ ॥
জম্ভারাতিপ্রভৃতিমুকুটীঃ পাদয়োঃ পীঠয়ন্তী
গুম্ফান্বাচাং কবিজনকৃতান্স্বৈরমারাময়ন্তী ।
শম্পালক্ষ্মীং মণিগণরুচাপাটলৈঃ প্রাপয়ন্তী
কম্পাতীরে কবিপরিষদাং জৃম্ভতে ভাগ্যসীমা ॥ ৬০ ॥
চন্দ্রাপীডাং চতুরবদনাং চঞ্চলাপাঙ্গলীলাং
কুন্দস্মেরাং কুচভরনতাং কুন্তলোদ্ধূতভৃঙ্গাম্ ।
মারারাতের্মদনশিখিনং মাংসলং দীপয়ন্তীং
কামাক্ষীং তাং কবিকুলগিরাং কল্পবল্লীমুপাসে ॥ ৬১ ॥
কালাম্ভোদপ্রকরসুষমাং কান্তিভিস্তির্জয়ন্তী
কল্যাণানামুদয়সরণিঃ কল্পবল্লী কবীনাম্ ।
কন্দর্পারেঃ প্রিয়সহচরী কল্মষাণাং নিহন্ত্রী
কাঞ্চীদেশং তিলকয়তি সা কাপি কারুণ্যসীমা ॥ ৬২ ॥
ঊরীকুর্বন্নুরসিজতটে চাতুরীং ভূধরাণাং
পাথোজানাং নয়নয়ুগলে পরিপন্থ্যং বিতন্বন্ ।
কম্পাতীরে বিহরতি রুচা মোঘয়ন্মেঘশৈলীং
কোকদ্বেষং শিরসি কলয়ন্কোঽপি বিদ্যাবিশেষঃ ॥ ৬৩ ॥
কাঞ্চীলীলাপরিচয়বতী কাপি তাপিচ্ছলক্ষ্মীঃ
জাড্যারণ্যে হুতবহশিখা জন্মভূমিঃ কৃপায়াঃ ।
মাকন্দশ্রীর্মধুরকবিতাচাতুরী কোকিলানাং
মার্গে ভূয়ান্মম নয়নয়োর্মান্মথী কাপি বিদ্যা ॥ ৬৪ ॥
সেতুর্মাতর্মরতকময়ো ভক্তিভাজাং ভবাব্ধৌ
লীলালোলা কুবলয়ময়ী মান্মথী বৈজয়ন্তী ।
কাঞ্চীভূষা পশুপতিদৃশাং কাপি কালাঞ্জনালী
মত্কং দুঃখং শিথিলয়তু তে মঞ্জুলাপাঙ্গমালা ॥ ৬৫ ॥
ব্যাবৃণ্বানাঃ কুবলয়দলপ্রক্রিয়াবৈরমুদ্রাং
ব্যাকুর্বাণা মনসিজমহারাজসাম্রাজ্যলক্ষ্মীম্ ।
কাঞ্চীলীলাবিহৃতিরসিকে কাঙ্ক্ষিতং নঃ ক্রিয়াসুঃ
বন্ধচ্ছেদে তব নিয়মিনাং বদ্ধদীক্ষাঃ কটাক্ষাঃ ॥ ৬৬ ॥
কালাম্ভোদে শশিরুচি দলং কৈতকং দর্শয়ন্তী
মধ্যেসৌদামিনি মধুলিহাং মালিকাং রাজয়ন্তী ।
হংসারাবং বিকচকমলে মঞ্জুমুল্লাসয়ন্তী
কম্পাতীরে বিলসতি নবা কাপি কারুণ্যলক্ষ্মীঃ ॥ ৬৭ ॥
চিত্রং চিত্রং নিজমৃদুতয়া ভর্ত্সয়ন্পল্লবালীং
পুংসাং কামান্ভুবি চ নিয়তং পূরয়ন্পুণ্যভাজাম্ ।
জাতঃ শৈলান্ন তু জলনিধেঃ স্বৈরসংচারশীলঃ
কাঞ্চীভূষা কলয়তু শিবং কোঽপি চিন্তামণির্মে ॥ ৬৮ ॥
তাম্রাম্ভোজং জলদনিকটে তত্র বন্ধূকপুষ্পং
তস্মিন্মল্লীকুসুমসুষমাং তত্র বীণানিনাদম্ ।
ব্যাবৃন্বানা সুকৃতলহরী কাপি কাঞ্চিনগর্যাম্
ঐশানী সা কলয়তিতরামৈন্দ্রজালং বিলাসম্ ॥ ৬৯ ॥
আহারাংশং ত্রিদশসদসামাশ্রয়ে চাতকানাম্
আকাশোপর্যপি চ কলয়ন্নালয়ং তুঙ্গমেষাম্ ।
কম্পাতীরে বিহরতিতরাং কামধেনুঃ কবীনাং
মন্দস্মেরো মদননিগমপ্রক্রিয়াসম্প্রদায়ঃ ॥ ৭০ ॥
আর্দ্রীভূতৈরবিরলকৃপৈরাত্তলীলাবিলাসৈঃ
আস্থাপূর্ণৈরধিকচপলৈরঞ্চিতাম্ভোজশিল্পৈঃ ।
কান্তৈর্লক্ষ্মীললিতভবনৈঃ কান্তিকৈবল্যসারৈঃ
কাশ্মল্যং নঃ কবলয়তু সা কামকোটী কটাক্ষৈঃ ॥ ৭১ ॥
আধূন্বন্ত্যৈ তরলনয়নৈরাঙ্গজীং বৈজয়ন্তীম্
আনন্দিন্যৈ নিজপদজুষামাত্তকাঞ্চীপুরায়ৈ ।
আস্মাকীনং হৃদয়মখিলৈরাগমানাং প্রপঞ্চৈঃ
আরাধ্যায়ৈ স্পৃহয়তিতরামদিমায়ৈ জনন্যৈ ॥ ৭২ ॥
দূরং বাচাং ত্রিদশসদসাং দুঃখসিন্ধোস্তরিত্রং
মোহক্ষ্বেলক্ষিতিরুহবনে ক্রূরধারং কুঠারম্ ।
কম্পাতীরপ্রণয়ি কবিভির্বর্ণিতোদ্যচ্চরিত্রং
শান্ত্যৈ সেবে সকলবিপদাং শাংকরং তত্কলত্রম্ ॥ ৭৩ ॥
খণ্ডীকৃত্য প্রকৃতিকুটিলং কল্মষং প্রাতিভশ্রী-
শুণ্ডীরত্বং নিজপদজুষাং শূন্যতন্দ্রং দিশন্তী ।
তুণ্ডীরাখ্যৈ মহতি বিষয়ে স্বর্ণবৃষ্টিপ্রদাত্রী
চণ্ডী দেবী কলয়তি রতিং চন্দ্রচূডালচূডে ॥ ৭৪ ॥
য়েন খ্যাতো ভবতি স গৃহী পূরুষো মেরুধন্বা
য়দ্দৃক্কোণে মদননিগমপ্রাভবং বোভবীতি ।
য়ত্প্রীত্যৈব ত্রিজগদধিপো জৃম্ভতে কিম্পচানঃ
কম্পাতীরে স জয়তি মহান্কশ্চিদোজোবিশেষঃ ॥ ৭৫ ॥
ধন্যা ধন্যা গতিরিহ গিরাং দেবি কামাক্ষি য়ন্মে
নিন্দ্যাং ভিন্দ্যাত্সপদি জডতাং কল্মষাদুন্মিষন্তীম্ ।
সাধ্বী মাধ্বীরসমধুরতাভঞ্জিনী মঞ্জুরীতিঃ
বাণীবেণী ঝটিতি বৃণুতাত্স্বর্ধুনীস্পর্ধিনী মাম্ ॥ ৭৬ ॥
য়স্যা বাটী হৃদয়কমলং কৌসুমী য়োগভাজাং
য়স্যাঃ পীঠী সততশিশিরা শীকরৈর্মাকরন্দৈঃ ।
য়স্যাঃ পেটী শ্রুতিপরিচলন্মৌলিরত্নস্য কাঞ্চী
সা মে সোমাভরণমহিষী সাধয়েত্কাঙ্ক্ষিতানি ॥ ৭৭ ॥
একা মাতা সকলজগতামীয়ুষী ধ্যানমুদ্রাম্
একাম্রাধীশ্বরচরণয়োরেকতানাং সমিন্ধে ।
তাটঙ্কোদ্যন্মণিগণরুচা তাম্রকর্ণপ্রদেশা
তারুণ্যশ্রীস্তবকিততনুস্তাপসী কাপি বালা ॥ ৭৮ ॥
দন্তাদন্তিপ্রকটনকরী দন্তিভির্মন্দয়ানৈঃ
মন্দারাণাং মদপরিণতিং মথ্নতী মন্দহাসৈঃ ।
অঙ্কূরাভ্যাং মনসিজতরোরঙ্কিতোরাঃ কুচাভ্যা-
মন্তঃকাঞ্চি স্ফুরতি জগতামাদিমা কাপি মাতা ॥ ৭৯ ॥
ত্রিয়ম্বককুটুম্বিনীং ত্রিপুরসুন্দরীমিন্দিরাং
পুলিন্দপতিসুন্দরীং ত্রিপুরভৈরবীং ভারতীম্ ।
মতঙ্গকুলনায়িকাং মহিষমর্দনীং মাতৃকাং
ভণন্তি বিবুধোত্তমা বিহৃতিমেব কামাক্ষি তে ॥ ৮০ ॥
মহামুনিমনোনটী মহিতরম্যকম্পাতটী-
কুটীরকবিহারিণী কুটিলবোধসংহারিণী ।
সদা ভবতু কামিনী সকলদেহিনাং স্বামিনী
কৃপাতিশয়কিংকরী মম বিভূতয়ে শাংকরী ॥ ৮১ ॥
জডাঃ প্রকৃতিনির্ধনা জনবিলোচনারুন্তুদা
নরা জননি বীক্ষণং ক্ষণমবাপ্য কামাক্ষি তে ।
বচস্সু মধুমাধুরীং প্রকটয়ন্তি পৌরন্দরী-
বিভূতিষু বিডম্বনাং বপুষি মান্মথীং প্রক্রিয়াম্ ॥ ৮২ ॥
ঘন্সতনতটস্ফুটস্ফুরিতকঞ্চুলীচঞ্চলী-
কৃতত্রিপুরশাসনা সুজনশীলিতোপাসনা ।
দৃশোঃ সরণিমশ্নুতে মম কদা নু কাঞ্চীপুরে
পরা পরময়োগিনাং মনসি চিত্কুলা পুষ্কলা ॥ ৮৩ ॥
কবীন্দ্রহৃদয়েচরী পরিগৃহীতকাঞ্চীপুরী
নিরূঢকরুণাঝরী নিখিললোকরক্ষাকরী ।
মনঃপথদবীয়সী মদনশাসনপ্রেয়সী
মহাগুণগরীয়সী মম দৃশোঽস্তু নেদীয়সী ॥ ৮৪ ॥
ধনেন ন রমামহে খলজনান্ন সেবামহে
ন চাপলময়ামহে ভবভয়ান্ন দূয়ামহে ।
স্থিরাং তনুমহেতরাং মনসি কিং চ কাঞ্চীরত-
স্মরান্তককুটুম্বিনীচরণপল্লবোপাসনাম্ ॥ ৮৫ ॥
সুরাঃ পরিজনা বপুর্মনসিজায় বৈরায়তে
ত্রিবিষ্টপনিতম্বিনীকুচতটী চ কেলীগিরিঃ ।
গিরঃ সুরভয়ো বয়স্তরুণিমা দরিদ্রস্য বা
কটাক্ষসরণৌ ক্ষণং নিপতিতস্য কামাক্ষি তে ॥ ৮৬ ॥
পবিত্রয় জগত্ত্রয়ীবিবুধবোধজীবাতুভিঃ
পুরত্রয়বিমর্দিনঃ পুলককঞ্চুলীদায়িভিঃ ।
ভবক্ষয়বিচক্ষণৈর্ব্যসনমোক্ষণৈর্বীক্ষণৈঃ
নিরক্ষরশিরোমণিং করুণয়ৈব কামাক্ষি মাম্ ॥ ৮৭ ॥
কদা কলিতখেলনাঃ করুণয়ৈব কাঞ্চীপুরে
কলায়মুকুলত্বিষঃ শুভকদম্বপূর্ণাঙ্কুরাঃ ।
পয়োধরভরালসাঃ কবিজনেষু তে বন্ধুরাঃ
পচেলিমকৃপারসা পরিপতন্তি মার্গে দৃশোঃ ॥ ৮৮ ॥
অশোধ্যমচলোদ্ভবং হৃদয়নন্দনং দেহিনাম্
অনর্ঘমধিকাঞ্চি তত্কিমপি রত্নমুদ্দ্যোততে ।
অনেন সমলংকৃতা জয়তি শঙ্করাঙ্কস্থলী
কদাস্য মম মানসং ব্রজতি পেটিকাবিভ্রমম্ ॥ ৮৯ ॥
পরামৃতঝরীপ্লুতা জয়তি নিত্যমন্তশ্চরী
ভুবামপি বহিশ্চরী পরমসংবিদেকাত্মিকা ।
মহদ্ভিরপরোক্ষিতা সততমেব কাঞ্চীপুরে
মমান্বহমহংমতির্মনসি ভাতু মাহেশ্বরী ॥ ৯০ ॥
তমোবিপিনধাবিনং সততমেব কাঞ্চীপুরে
বিহাররসিকা পরা পরমসংবিদুর্বীরুহে ।
কটাক্ষনিগলৈর্দৃঢং হৃদয়দুষ্টদন্তাবলং
চিরং নয়তু মামকং ত্রিপুরবৈরিসীমন্তিনী ॥ ৯১ ॥
ত্বমেব সতি চণ্ডিকা ত্বমসি দেবি চামুণ্ডিকা
ত্বমেব পরমাতৃকা ত্বমপি য়োগিনীরূপিণী ।
ত্বমেব কিল শাম্ভবী ত্বমসি কামকোটী জয়া
ত্বমেব বিজয়া ত্বয়ি ত্রিজগদম্ব কিং ব্রূমহে ॥ ৯২ ॥
পরে জননি পার্বতি প্রণতপালিনি প্রাতিভ-
প্রদাত্রি পরমেশ্বরি ত্রিজগদাশ্রিতে শাশ্বতে ।
ত্রিয়ম্বককুটুম্বিনি ত্রিপদসঙ্গিনি ত্রীক্ষণে
ত্রিশক্তিময়ি বীক্ষণং ময়ি নিধেহি কামাক্ষি তে ॥ ৯৩ ॥
মনোমধুকরোত্সবং বিদধতী মনীষাজুষাং
স্বয়ম্প্রভববৈখরীবিপিনবীথিকালম্বিনী ।
অহো শিশিরিতা কৃপামধুরসেন কম্পাতটে
চরাচরবিধায়িনী চলতি কাপি চিন্মঞ্জরী ॥ ৯৪ ॥
কলাবতি কলাভৃতো মুকুটসীম্নি লীলাবতি
স্পৃহাবতি মহেশ্বরে ভুবনমোহনে ভাস্বতি ।
প্রভাবতি রমে সদা মহিতরূপশোভাবতি
ত্বরাবতি পরে সতাং গুরুকৃপাম্বুধারাবতি ॥ ৯৫ ॥
ত্বয়ৈব জগদম্বয়া ভুবনমণ্ডলং সূয়তে
ত্বয়ৈব করুণার্দ্রয়া তদপি রক্ষণং নীয়তে ।
ত্বয়ৈব খরকোপয়া নয়নপাবকে হূয়তে
ত্বয়ৈব কিল নিত্যয়া জগতি সন্ততং স্থীয়তে ॥ ৯৬ ॥
চরাচরজগন্ময়ীং সকলহৃন্ময়ীং চিন্ময়ীং
গুণত্রয়ময়ীং জগত্ত্রয়ময়ীং ত্রিধামাময়ীম্ ।
পরাপরময়ীং সদা দশদিশাং নিশাহর্ময়ীং
পরাং সততসন্ময়ীং মনসি চিন্ময়ীং শীলয়ে ॥ ৯৭ ॥
জয় জগদম্বিকে হরকুটুম্বিনি বক্ত্ররুচা
জিতশরদম্বুজে ঘনবিডম্বিনি কেশরুচা ।
পরমবলম্বনং কুরু সদা পররূপধরে
মম গতসংবিদো জডিমডম্বরতাণ্ডবিনঃ ॥ ৯৮ ॥
ভুবনজননি ভূষাভূতচন্দ্রে নমস্তে
কলুষশমনি কম্পাতীরগেহে নমস্তে ।
নিখিলনিগমবেদ্যে নিত্যরূপে নমস্তে
পরশিবময়ি পাশচ্ছেদহস্তে নমস্তে ॥ ৯৯ ॥
ক্বণত্কাঞ্চী কাঞ্চীপুরমণিবিপঞ্চীলয়ঝরী-
শিরঃকম্পা কম্পাবসতিরনুকম্পাজলনিধিঃ ।
ঘনশ্যামা শ্যামা কঠিনকুচসীমা মনসি মে
মৃগাক্ষী কামাক্ষী হরনটনসাক্ষী বিহরতাত্ ॥ ১০০ ॥
সমরবিজয়কোটী সাধকানন্দধাটী
মৃদুগুণপরিপেটী মুখ্যকাদম্ববাটী ।
মুনিনুতপরিপাটী মোহিতাজাণ্ডকোটী
পরমশিববধূটী পাতু মাং কামকোটী ॥ ১০১ ॥
ইমং পরবরপ্রদং প্রকৃতিপেশলং পাবনং
পরাপরচিদাকৃতিপ্রকটনপ্রদীপায়িতম্ ।
স্তবং পঠতি নিত্যদা মনসি ভাবয়ন্নম্বিকাং
জপৈরলমলং মখৈরধিকদেহসংশোষণৈঃ ॥ ১০২ ॥
স্তুতিশতকং সম্পূর্ণম্ ॥
॥ কটাক্ষশতকম্ ॥
মোহান্ধকারনিবহং বিনিহন্তুমীডে
মূকাত্মনামপি মহাকবিতাবদান্যান্ ।
শ্রীকাঞ্চিদেশশিশিরীকৃতিজাগরূকান্
একাম্রনাথতরুণীকরুণাবলোকান্ ॥ ১ ॥
মাতর্জয়ন্তি মমতাগ্রহমোক্ষণানি
মাহেন্দ্রনীলরুচিশিক্ষণদক্ষিণানি ।
কামাক্ষি কল্পিতজগত্ত্রয়রক্ষণানি
ত্বদ্বীক্ষণানি বরদানবিচক্ষণানি ॥ ২ ॥
আনঙ্গতন্ত্রবিধিদর্শিতকৌশলানাম্
আনন্দমন্দপরিঘূর্ণিতমন্থরাণাম্ ।
তারল্যমম্ব তব তাডিতকর্ণসীম্নাং
কামাক্ষি খেলতি কটাক্ষনিরীক্ষণানাম্ ॥ ৩ ॥
কল্লোলিতেন করুণারসবেল্লিতেন
কল্মাষিতেন কমনীয়মৃদুস্মিতেন ।
মামঞ্চিতেন তব কিংচন কুঞ্চিতেন
কামাক্ষি তেন শিশিরীকুরু বীক্ষিতেন ॥ ৪ ॥
সাহায়্যকং গতবতী মুহুরর্জনস্য
মন্দস্মিতস্য পরিতোষিতভীমচেতাঃ ।
কামাক্ষি পাণ্ডবচমূরিব তাবকীনা
কর্ণান্তিকং চলতি হন্ত কটাক্ষলক্ষ্মীঃ ॥ ৫ ॥
অস্তং ক্ষণান্নয়তু মে পরিতাপসূর্যম্
আনন্দচন্দ্রমসমানয়তাং প্রকাশম্ ।
কালান্ধকারসুষুমাং কলয়ন্দিগন্তে
কামাক্ষি কোমলকটাক্ষনিশাগমস্তে ॥ ৬ ॥
তাটাঙ্কমৌক্তিকরুচাঙ্কুরদন্তকান্তিঃ
কারুণ্যহস্তিপশিখামণিনাধিরূঢঃ ।
উন্মূলয়ত্বশুভপাদপমস্মদীয়ং
কামাক্ষি তাবককটাক্ষমতঙ্গজেতন্দ্রঃ ॥ ৭ ॥
ছায়াভরণে জগতাং পরিতাপহারী
তাটঙ্করত্নমণিতল্লজপল্লবশ্রীঃ ।
কারুণ্যনাম বিকিরন্মকরন্দজালং
কামাক্ষি রাজতি কটাক্ষসুরদ্রুমস্তে ॥ ৮ ॥
সূর্যাশ্রয়প্রণয়িনী মণিকুণ্ডলাংশু-
লৌহিত্যকোকনদকাননমাননীয়া ।
য়ান্তী তব স্মরহরাননকান্তিসিন্ধুং
কামাক্ষি রাজতি কটাক্ষকলিন্দকন্যা ॥ ৯ ॥
প্রাপ্নোতি য়ং সুকৃতিনং তব পক্ষপাতাত্
কামাক্ষি বীক্ষণবিলাসকলাপুরন্ধ্রী ।
সদ্যস্তমেব কিল মুক্তিবধূর্বৃণীতে
তস্মান্নিতান্তমনয়োরিদমৈকমত্যম্ ॥ ১০ ॥
য়ান্তী সদৈব মরুতামনুকূলভাবং
ভ্রূবল্লিশক্রধনুরুল্লসিতা রসার্দ্রা ।
কামাক্ষি কৌতুকতরঙ্গিতনীলকণ্ঠা
কাদম্বিনীব তব ভাতি কটাক্ষমালা ॥ ১১ ॥
গঙ্গাম্ভসি স্মিতময়ে তপনাত্মজেব
গঙ্গাধরোরসি নবোত্পলমালিকেব ।
বক্ত্রপ্রভাসরসি শৈবলমণ্ডলীব
কামাক্ষি রাজতি কটাক্ষরুচিচ্ছটা তে ॥ ১২ ॥
সংস্কারতঃ কিমপি কন্দলিতান্ রসজ্ঞ-
কেদারসীম্নি সুধিয়ামুপভোগয়োগ্যান্ ।
কল্যাণসূক্তিলহরীকলমাংকুরান্নঃ
কামাক্ষি পক্ষ্মলয়তু ত্বদপাঙ্গমেঘঃ ॥ ১৩ ॥
চাঞ্চল্যমেব নিয়তং কলয়ন্প্রকৃত্যা
মালিন্যভূঃ শ্রতিপথাক্রমজাগরূকঃ ।
কৈবল্যমেব কিমু কল্পয়তে নতানাং
কামাক্ষি চিত্রমপি তে করুণাকটাক্ষঃ ॥ ১৪ ॥
সংজীবনে জননি চূতশিলীমুখস্য
সংমোহনে শশিকিশোরকশেখরস্য ।
সংস্তম্ভনে চ মমতাগ্রহচেষ্টিতস্য
কামাক্ষি বীক্ষণকলা পরমৌষধং তে ॥ ১৫ ॥
নীলোঽপি রাগমধিকং জনয়ন্পুরারেঃ
লোলোঽপি ভক্তিমধিকাং দৃঢয়ন্নরাণাম্ ।
বক্রোঽপি দেবি নমতাং সমতাং বিতন্বন্
কামাক্ষি নৃত্যতু ময়ি ত্বদপাঙ্গপাতঃ ॥ ১৬ ॥
কামদ্রুহো হৃদয়য়ন্ত্রণজাগরূকা
কামাক্ষি চঞ্চলদৃগঞ্চলমেখলা তে ।
আশ্চর্যমম্ব ভজতাং ঝটিতি স্বকীয়-
সম্পর্ক এব বিধুনোতি সমস্তবন্ধান্ ॥ ১৭ ॥
কুণ্ঠীকরোতু বিপদং মম কুঞ্চিতভ্রূ-
চাপাঞ্চিতঃ শ্রিতবিদেহভবানুরাগঃ ।
রক্ষোপকারমনিশং জনয়ঞ্জগত্যাং
কামাক্ষি রাম ইব তে করুণাকটাক্ষঃ ॥ ১৮ ॥
শ্রীকামকোটি শিবলোচনশোষিতস্য
শৃঙ্গারবীজবিভবস্য পুনঃপ্ররোহে ।
প্রেমাম্ভসার্দ্রমচিরাত্প্রচুরেণ শঙ্কে
কেদারমম্ব তব কেবলদৃষ্টিপাতম্ ॥ ১৯ ॥
মাহাত্ম্যশেবধিরসৌ তব দুর্বিলঙ্ঘ্য-
সংসারবিন্ধ্যগিরিকুণ্ঠনকেলিচুঞ্চুঃ ।
ধৈর্যাম্বুধিং পশুপতেশ্চুলকীকরোতি
কামাক্ষি বীক্ষণবিজৃম্ভণকুম্ভজন্মা ॥ ২০ ॥
পীয়ূষবর্ষবশিশিরা স্ফুটদুত্পলশ্রী-
মৈত্রী নিসর্গমধুরা কৃততারকাপ্তিঃ ।
কামাক্ষি সংশ্রিতবতী বপুরষ্টমূর্তেঃ
জ্যোত্স্নায়তে ভগবতি ত্বদপাঙ্গমালা ॥ ২১ ॥
অম্ব স্মরপ্রতিভটস্য বপুর্মনোজ্ঞম্
অম্ভোজকাননমিবাঞ্চিতকণ্টকাভম্ ।
ভৃঙ্গীব চুম্বতি সদৈব সপক্ষপাতা
কামাক্ষি কোমলরুচিস্ত্বদপাঙ্গমালা ॥ ২২ ॥
কেশপ্রভাপটলনীলবিতানজালে
কামাক্ষি কুণ্ডলমণিচ্ছবিদীপশোভে ।
শঙ্কে কটাক্ষরুচিরঙ্গতলে কৃপাখ্যা
শৈলূষিকা নটতি শংকরবল্লভে তে ॥ ২৩ ॥
অত্যন্তশীতলমতন্দ্রয়তু ক্ষণার্ধম্
অস্তোকবিভ্রমমনঙ্গবিলাসকন্দম্ ।
অল্পস্মিতাদৃতমপারকৃপাপ্রবাহম্
অক্ষিপ্ররোহমচিরান্ময়ি কামকোটি ॥ ২৪ ॥
মন্দাক্ষরাগতরলীকৃতিপারতন্ত্র্যাত্
কামাক্ষি মন্থরতরাং ত্বদপাঙ্গডোলাম্ ।
আরুহ্য মন্দমতিকৌতুকশালি চক্ষুঃ
আনন্দমেতি মুহুরর্ধশশাঙ্কমৌলেঃ ॥ ২৫ ॥
ত্রৈয়ম্বকং ত্রিপুরসুন্দরি হর্ম্যভূমি-
রঙ্গং বিহারসরসী করুণাপ্রবাহঃ ।
দাসাশ্চ বাসবমুখাঃ পরিপালনীয়ং
কামাক্ষি বিশ্বমপি বীক্ষণভূভৃতস্তে ॥ ২৬ ॥
বাগীশ্বরী সহচরী নিয়মেন লক্ষ্মীঃ
ভ্রূবল্লরীবশকরী ভুবনানি গেহম্ ।
রূপং ত্রিলোকনয়নামৃতমম্ব তেষাং
কামাক্ষি য়েষু তব বীক্ষণপারতন্ত্রী ॥ ২৭ ॥
মাহেশ্বরং ঝটিতি মানসমীনমম্ব
কামাক্ষি ধৈর্যজলধৌ নিতরাং নিমগ্নম্ ।
জালেন শৃঙ্খলয়তি ত্বদপাঙ্গনাম্না
বিস্তারিতেন বিষমায়ুধদাশকোঽসৌ ॥ ২৮ ॥
উন্মথ্য বোধকমলাকারমম্ব জাড্য-
স্তম্বেরমং মম মনোবিপিনে ভ্রমন্তম্ ।
কুণ্ঠীকুরুষ্ব তরসা কুটিলাগ্রসীম্না
কামাক্ষি তাবককটাক্ষমহাঙ্কুশেন ॥ ২৯ ॥
উদ্বেল্লিতস্তবকিতৈর্ললিতৈর্বিলাসৈঃ
উত্থায় দেবি তব গাঢকটাক্ষকুঞ্জাত্ ।
দূরং পলায়য়তু মোহমৃগীকুলং মে
কামাক্ষি স্তবরমনুগ্রহকেসরীন্দ্রঃ ॥ ৩০ ॥
স্নেহাদৃতাং বিদলিতোত্পলকন্তিচোরাং
জেতারমেব জগদীশ্বরি জেতুকামঃ ।
মানোদ্ধতো মকরকেতুরসৌ ধুনীতে
কামাক্ষি তাবককটাক্ষকৃপাণবল্লীম্ ॥ ৩১ ॥
শ্রৌতীং ব্রজন্নপি সদা সরণিং মুনীনাং
কামাক্ষি সন্ততমপি স্মৃতিমার্গগামী ।
কৌটিল্যমম্ব কথমস্থিরতাং চ ধত্তে
চৌর্যং চ পঙ্কজরুচাং ত্বদপাঙ্গপাতঃ ॥ ৩২ ॥
নিত্যং শ্রেতুঃ পরিচিতৌ য়তমানমেব
নীলোত্পলং নিজসমীপনিবাসলোলম্ ।
প্রীত্যৈব পাঠয়তি বীক্ষণদেশিকেন্দ্রঃ
কামাক্ষী কিন্তু তব কালিমসম্প্রদায়ম্ ॥ ৩৩ ॥
ভ্রান্ত্বা মুহুঃ স্তবকিতস্মিতফেনরাশৌ
কামাক্ষি বক্ত্ররুচিসংচয়বারিরাশৌ ।
আনন্দতি ত্রিপুরমর্দননেত্রলক্ষ্মীঃ
আলম্ব্য দেবি তব মন্দমপাঙ্গসেতুম্ ॥ ৩৪ ॥
শ্যামা তব ত্রিপুরসুন্দরি লোচনশ্রীঃ
কামাক্ষি কন্দলিতমেদুরতারকান্তিঃ ।
জ্যোত্স্নাবতী স্মিতরুচাপি কথং তনোতি
স্পর্ধামহো কুবলয়ৈশ্চ তথা চকোরৈঃ ॥ ৩৫ ॥
কালাঞ্জনং চ তব দেবি নিরীক্ষণং চ
কামাক্ষি সাম্যসরণিং সমুপৈতি কান্ত্যা ।
নিশ্শেষনেত্রসুলভং জগতীষু পূর্ব-
মন্যত্ত্রিনেত্রসুলভং তুহিনাদ্রিকন্যে ॥ ৩৬ ॥
ধূমাঙ্কুরো মকরকেতনপাবকস্য
কামাক্ষি নেত্ররুচিনীলিমচাতুরী তে ।
অত্যন্তমদ্ভুতমিদং নয়নত্রয়স্য
হর্ষোদয়ং জনয়তে হরুণাঙ্কমৌলেঃ ॥৩৭ ॥
আরভ্ভলেশসময়ে তব বীক্ষণস্স
কামাক্ষি মূকমপি বীক্ষণমাত্রনম্রম্ ।
সর্বজ্ঞতা সকললোকসমক্ষমেব
কীর্তিস্বয়ংবরণমাল্যবতী বৃণীতে ॥ ৩৮ ॥
কালাম্বুবাহ উব তে পরিতাপহারী
কামাক্ষি পুষ্করমধঃকুরুতে কটাখ़্ষঃ ।
পূর্বঃ পরং ক্ষণরুচা সমুপৈতি মৈত্রী-
মন্যস্তু স।ততরুচিং প্রকটীকরোতি ॥ ৩৯ ॥
সূক্ষ্মেঽপি দুর্গমতরেঽপি গুরুপ্রসাদ-
সাহায়্যকেন বিচরন্নপবর্গমার্গে ।
সংসারপঙ্কনিচয়ে ন পতত্যমূং তে
কামাক্ষি গাঢমবলম্ব্য কটাক্ষয়ষ্টিম্ ॥ ৪০ ॥
কামাক্ষি সন্ততমসৌ হরিনীলরত্ন-
স্তম্ভে কটাক্ষরুচিপুঞ্জময়ে ভবত্যাঃ ।
বদ্ধোঽপি ভক্তিনিগলৈর্মম চিত্তহস্তী
স্তম্ভং চ বন্ধমপি মুঞ্চতি হন্ত চিত্রম্ ॥ ৪১ ॥
কামাক্ষি কাষ্ণর্যমপি সন্ততমঞ্জনং চ
বিভ্রন্নিসর্গতরলোঽপি ভবত্কটাক্ষঃ ।
বৈমল্যমন্বহমনঞ্জনতা চ ভূয়ঃ
স্থৈর্যং চ ভক্তহৃদয়ায় কথং দদাতি ॥ ৪২ ॥
মন্দস্মিতস্তবকিতং মণিকুণ্ডলাংশু-
স্তোমপ্রবালরুচিরং শিশিরীকৃতাশম্ ।
কামাক্ষি রাজতি কটাক্ষরুচেঃ কদম্বম্
উদ্যানমম্ব করুণাহরিণেক্ষণায়াঃ ॥ ৪৩ ॥
কামাক্ষি তাবককটাক্ষমহেন্দ্রনীল-
সিংহাসনং শ্রিতবতো মকরধ্বজস্য ।
সাম্রাজ্যমঙ্গলবিধৌ মুণিকুণ্ডলশ্রীঃ
নীরাজনোত্সবতরঙ্গিতদীপমালা ॥ ৪৪ ॥
মাতঃ ক্ষণং স্নপয় মাং তব বীক্ষিতেন
মন্দাক্ষিতেন সুজনৈরপরোক্ষিতেন ।
কামাক্ষি কর্মতিমিরোত্করভাস্করেণ
শ্রেয়স্করেণ মধুপদ্যুতিতস্করেণ ॥ ৪৫ ॥
প্রেমাপগাপয়সি মজ্জনমারচয়্য
য়ুক্তঃ স্মিতাংশুকৃতভস্মবিলেপনেন ।
কামাক্ষি কুণ্ডলমণিদ্যুতিভির্জটালঃ
শ্রীকণ্ঠমেব ভজতে তব দৃষ্টিপাতঃ ॥ ৪৬ ॥
কৈবল্যদায় করুণারসকিংকরায়
কামাক্ষি কন্দলিতবিভ্রমশংকরায় ।
আলোকনায় তব ভক্তশিবংকরায়
মাতর্নমোঽস্তু পরতন্ত্রিতশংকরায় ॥ ৪৭ ॥
সাম্রাজ্যমঙ্গলবিধৌ মকরধ্বজস্য
লোলালকালিকৃততোরণমাল্যশোভে ।
কামেশ্বরি প্রচলদুত্পলবৈজয়ন্তী-
চাতুর্যমেতি তব চঞ্চলদৃষ্টিপাতঃ ॥ ৪৮ ॥
মার্গেণ মঞ্জুকচকান্তিতমোবৃতেন
মন্দায়মানগমনা মদনাতুরাসৌ ।
কামাক্ষি দৃষ্টিরয়তে তব শংকরায়
সংকেতভূমিমচিরাদভিসারিকেব ॥ ৪৯ ॥
ব্রীডনুবৃত্তিরমণীকৃতসাহচর্যা
শৈবালিতাং গলরুচা শশিশেখরস্য ।
কামাক্ষি কান্তিসরসীং ত্বদপাঙ্গলক্ষ্মীঃ
মন্দং সমাশ্রয়তি মজ্জনখেলনায় ॥ ৫০ ॥
কাষায়মংশুকমিব প্রকটং দধানো
মাণিক্যকুণ্ডলরুচিং মমতাবিরোধী ।
শ্রুত্যন্তসীমনি রতঃ সুতরাং চকাস্তি
কামাক্ষি তাবককটাক্ষয়তীশ্বরোঽসৌ ॥ ৫১ ॥
পাষাণ এব হরিনীলমণির্দিনেষু
প্রম্লনতাং কুবলয়ং প্রকটীকরোতি ।
নৌমিত্তিকো জলদমেচকিমা ততস্তে
কামাক্ষি শূন্যমুপমনমপাঙ্গলক্ষ্ম্যাঃ ॥ ৫২ ॥
শৃঙ্গারবিভ্রমবতী সুতরাং সলজ্জা
নাসাগ্রমৌক্তিকরুচা কৃতমন্দহাসা ।
শ্যামা কটাক্ষসুষমা তব য়ুক্তমেতত্
কামাক্ষি চুম্বতি দিগম্বরবক্ত্রবিম্বম্ ॥ ৫৩ ॥
নীলোত্পলেন মধুপেন চ দৃষ্টিপাতঃ
কামাক্ষি তুল্য ইতি তে কথমামনন্তি ।
শৈত্যেন নিন্দয়তি য়দন্বহমিন্দুপাদান্
পাথোরুহেণ য়দসৌ কলহায়তে চ ॥ ৫৪ ॥
ওষ্ঠপ্রভাপটলবিদ্রুমমুদ্রিতে তে
ভ্রূবল্লিবীচিসুভগে মুখকান্তিসিন্ধৌ ।
কামাক্ষি বারিভরপূরণলম্বমান-
কালাম্বুবাহসরণিং লভতে কটাক্ষঃ ॥ ৫৫ ॥
মন্দস্মিতৈর্ধবলিতা মণিকুণ্ডলাংশু-
সম্পর্কলোহিতরুচিস্ত্বদপাঙ্গধারা ।
কামাক্ষি মল্লিকুসুমৈর্নবপল্লবৈশ্চ
নীলোত্পলৈশ্চ রচিতেব বিভাতি মালা ॥ ৫৬ ॥
কামাক্ষি শীতলকৃপারসনির্ঝরাম্ভঃ-
সম্পর্কপক্ষ্মলরুচিস্ত্বদপাঙ্গমালা ।
গোভিঃ সদা পুররিপোরভিলষ্যমাণা
দূর্বাকদম্বকবিডম্বনমাতনোতি ॥ ৫৭ ॥
হৃত্পঙ্কজং মম বিকাসয়তু প্রমুষ্ণ-
ন্নুল্লাসমুত্পলরুচেস্তমসাং নিরোদ্ধা ।
দোষানুষঙ্গজডতাং জগতাং ধুনানঃ
কামাক্ষি বীক্ষণবিলাসদিনোদয়স্তে ॥ ৫৮ ॥
চক্ষুর্বিমোহয়তি চন্দ্রবিভূষণস্য
কামাক্ষি তাবককটাক্ষতমঃপ্ররোহঃ ।
প্রত্যঙ্মুখং তু নয়নং স্তিমিতং মুনীনাং
প্রাকাশ্যমেব নয়তীতি পরং বিচিত্রম্ ॥ ৫৯ ॥
কামাক্ষি বীক্ষণরুচা য়ুধি নির্জিতং তে
নীলোত্পলং নিরবশেষগতাভিমানম্ ।
আগত্য তত্পরিসরং শ্রবণবতংস-
ব্যোজেন নূনমভয়ার্থনমাতনোতি ॥ ৬০ ॥
আশ্চর্যমম্ব মদানাভ্যুদয়াবলম্বঃ
কামাক্ষি চঞ্চলনিরীক্ষণবিভ্রমস্তে ।
ধৈর্যং বিধূয় তনুতে হৃদি রাগবন্ধং
শম্ভোস্তদেব বিপরীততয়া মুনীনাম্ ॥ ৬১ ॥
জন্তোঃ সকৃত্প্রণমতো জগদীড্যতাং চ
তেজাস্বিতাং চ নিশিতাং চ মতিং সভায়াম্ ।
কামাক্ষি মাক্ষিকঝরীমিব বৈখরীং চ
লক্ষ্মীং চ পক্ষ্মলয়তি ক্ষণবীক্ষণং তে ॥ ৬২ ॥
কাদম্বিনী কিময়তে ন জলানুষঙ্গং
ভৃঙ্গাবলী কিমুররীকুরুতে ন পদ্মম্ ।
কিং বা কলিন্দতনয়া সহতে ন ভঙ্গং
কামাক্ষি নিশ্চয়পদং ন তবাক্ষিলক্ষ্মীঃ ॥ ৬৩ ॥
কাকোলপাবকতৃণীকরণেঽপি দক্ষঃ
কামাক্ষি বালকসুধাকরশেখরস্য ।
অত্যন্তশীতলতমোঽপ্যনুপারতং তে
চিত্তং বিমোহয়তি চিত্রময়ং কটাক্ষঃ ॥ ৬৪ ॥
কার্পণ্যপূরপরিবর্ধিতমম্ব মোহ-
কন্দোদ্গতং ভবময়ং বিষপাদপং মে ।
তুঙ্গং ছিনত্তু তুহিনাদ্রিসুতে ভবত্যাঃ
কাঞ্চীপুরেশ্বরি কটাক্ষকুঠারধারা ॥ ৬৫ ॥
কামাক্ষি ঘোরভবরোগচিকিত্সনার্থ-
মভ্যর্থ্য দেশিককটাক্ষভিষক্প্রসাদাত্ ।
তত্রাপি দেবি লভতে সুকৃতী কদাচি-
দন্যস্য দুর্লভমপাঙ্গমহৌষধং তে ॥ ৬৬ ॥
কামাক্ষি দেশিককৃপাংকুরমাশ্রয়ন্তো
নানাতপোনিয়মনাশিতপাশবন্ধাঃ ।
বাসালয়ং তব কটাক্ষমমুং মহান্তো
লব্ধ্বা সুখং সমাধিয়ো বিচরন্তি লোকে ॥ ৬৭ ॥
সাকূতসংলপিতসম্ভৃতমুগ্ধহাসং
ব্রীডানুরাগসহচারি বিলোকনং তে ।
কামাক্ষি কামপরিপন্থিনি মারবীর-
সাম্রাজ্যবিভ্রমদশাং সফলীকরোতি ॥ ৬৮ ॥
কামাক্ষি বিভ্রমবলৈকনিধির্বিধায়
ভ্রূবল্লিচাপকুটিলীকৃতিমেব চিত্রম্ ।
স্বাধীনতাং তব নিনায় শশাঙ্কমৌলে-
রঙ্গার্ধরাজ্যসুখলাভমপাঙ্গবীরঃ ॥ ৬৯ ॥
কামাংকুরৈকনিলয়স্তব দৃষ্টিপাতঃ
কামাক্ষি ভক্তমনসাং প্রদদাতু কামান্ ।
রাগান্বিতঃ স্বয়মপি প্রকটীকরোতি
বৈরাগ্যমেব কথমেষ মহামুনীনাম্ ॥ ৭০ ॥
কালাম্বুবাহনিবহৈঃ কলহায়তে তে
কামাক্ষি কালিমমদেন সদা কটাক্ষঃ ।
চিত্রং তথাপি নিতরামমুমেব দৃষ্ট্বা
সোত্কণ্ঠ এব রমতে কিল নীলকণ্ঠঃ ॥ ৭১ ॥
কামাক্ষি মন্মথরিপুং প্রতি মারতাপ-
মোহান্ধকারজলদাগমনেন নৃত্যন্ ।
দুষ্কর্মকঞ্চুকিকুলং কবলীকরোতু
ব্যামিশ্রমেচকরুচিস্ত্বদপাঙ্গকেকী ॥ ৭২ ॥
কামাক্ষি মন্মথরিপোরবলোকনেষু
কান্তং পয়োজমিব তাবকমক্ষিপাতম্ ।
প্রেমাগমো দিবসবদ্বিকচীকরোতি
লজ্জাভরো রজনিবন্মুকুলীকরোতি ॥ ৭৩ ॥
মূকো বিরিঞ্চতি পরং পুরুষঃ কুরূপঃ
কন্দর্পতি ত্রিদশরাজতি কিম্পচানঃ ।
কামাক্ষি কেবলমুপক্রমকাল এব
লীলাতরঙ্গিতকটাক্ষরুচঃ ক্ষণং তে ॥ ৭৪ ॥
নীলালকা মধুকরন্তি মনোজ্ঞনাসা-
মুক্তারুচঃ প্রকটকন্দবিসাঙ্কুরন্তি ।
কারুণ্যমম্ব মকরন্দতি কামকোটি
মন্যে ততঃ কমলমেব বিলোচনং তে ॥ ৭৫ ॥
আকাংক্ষ্যমাণফলদানবিচক্ষণায়াঃ ।
কামাক্ষি তাবককটাক্ষককামধেনোঃ ।
সম্পর্ক এব কথমম্ব বিমুক্তপাশ-
বন্ধাঃ স্ফুটং তনুভৃতঃ পশুতাং ত্যজন্তি ॥ ৭৬ ॥
সংসারঘর্মপরিতাপজুষাং নরাণাং
কামাক্ষি শীতলতরাণি তবেক্ষিতানি ।
চন্দ্রাতপন্তি ঘনচন্দনকর্দমন্তি
মুক্তাগুণন্তি হিমবারিনিষেচনন্তি ॥ ৭৭ ॥
প্রেমাম্বুরাশিসততস্নপিতানি চিত্রং
কামাক্ষি তাবককটাক্ষনিরীক্ষণানি ।
সন্ধুক্ষয়ন্তি মুহুরিন্ধনরাশিরীত্যা
মারদ্রুহো মনসি মন্মথচিত্রভানুম্ ॥ ৭৮ ॥
কালাঞ্জনপ্রতিভটং কমনীয়কান্ত্যা
কন্দর্পতন্ত্রকলয়া কলিতানুভাবম্ ।
কাঞ্চীবিহাররসিকে কলুষার্তিচোরং
কল্লোলয়স্ব ময়ি তে করুণাকটাক্ষম্ ॥ ৭৯ ॥
ক্রান্তেন মন্মথদেন বিমোহ্যমান-
স্বান্তেন চূততরুমূলগতস্য পুংসঃ ।
কান্তেন কিংচিদবলোকয় লোচনস্য
প্রান্তেন মাং জননি কাঞ্চিপুরীবিভূষে ॥ ৮০ ॥
কামাক্ষি কোঽপি সুজনাস্ত্বদপাঙ্গসংগে
কণ্ঠেন কন্দলিতকালিমসম্প্রদায়াঃ ।
উত্তংসকল্পিতচকোরকুটুম্বপোষা
নক্তন্দিবসপ্রসবভূনয়না ভবন্তি ॥ ৮১ ॥
নীলোত্পলপ্রসবকান্তিনির্দশনেন
কারুণ্যবিভ্রমজুষা তব বীক্ষণেন ।
কামাক্ষি কর্মজলধেঃ কলশীসুতেন
পাশত্রয়াদ্বয়মমী পরিমোচনীয়াঃ ॥ ৮২ ॥
অত্যন্তচঞ্চলমকৃত্রিমমঞ্জনং কিং
ঝংকারভঙ্গিরহিতা কিমু ভৃঙ্গমালা ।
ধূমাঙ্কুরঃ কিমু হুতাশনসংগহীনঃ
কামাক্ষি নেত্ররুচিনীলিমকন্দলী তে ॥ ৮৩ ॥
কামাক্ষি নিত্যময়মঞ্জলিরস্তু মুক্তি-
বীজায় বিভ্রমমদোদয়ঘূর্ণিতায় ।
কন্দর্পদর্পপুনরুদ্ভবসিদ্ধিদায়
কল্যাণদায় তব দেবি দৃগঞ্চলায় ॥ ৮৪ ॥
দর্পাঙ্কুরো মকরকেতনবিভ্রমাণাং
নিন্দাঙ্কুরো বিদলিতোত্পলচাতুরীণাম্ ।
দীপাঙ্কুরো ভবতমিস্রকদম্বকানাং
কামাক্ষি পালয়তু মাং ত্বদপাঙ্গপাতঃ ॥ ৮৫ ॥
কৈবল্যদিব্যমণিরোহণপর্বতেভ্যঃ
কারুণ্যনির্ঝরপয়ঃকৃতমঞ্জনেভ্যঃ ।
কামাক্ষি কিংকরিতশঙ্করমানসেভ্য-
স্তেভ্যো নমোঽস্তু তব বীক্ষণবিভ্রমেভ্যঃ ॥ ৮৬ ॥
অল্পীয় এব নবমুত্পলমম্ব হীনা
মীনস্য বা সরণিরম্বুরুহাং চ কিং বা ।
দূরে মৃগীদৃগসমঞ্জসমঞ্জনং চ
কামাক্ষি বীক্ষণরুচৌ তব তর্কয়ামঃ ॥ ৮৭ ॥
মিশ্রীভবদ্গরলপঙ্কিলশঙ্করোরস্-
সীমাঙ্গণে কিমপি রিঙ্খণমাদধানঃ ।
হেলাবধূতললিতশ্রবণোত্পলোঽসৌ
কামাক্ষি বাল ইব রাজতি তে কটাক্ষঃ ॥ ৮৮ ॥
প্রৌঢিকরোতি বিদুষাং নবসূক্তিধাটী-
চূতাটবীষু বুধকোকিললাল্যমানম্ ।
মাধ্বীরসং পরিমলং চ নিরর্গলং তে
কামাক্ষি বীক্ষণবিলাসবসন্তলক্ষ্মীঃ ॥ ৮৯ ॥
কূলংকষং বিতনুতে করুণাম্বুবর্ষী
সারস্বতং সুকৃতিনঃ সুলভং প্রবাহম্ ।
তুচ্ছীকরোতি য়মুনাম্বুতরঙ্গভঙ্গীং
কামাক্ষি কিং তব কটাক্ষমহাম্বুবাহঃ ॥ ৯০ ॥
জগর্তি দেবি করুণাশুকসুন্দরী তে
তাটঙ্করত্নরুচিদাডিমখণ্ডশোণে ।
কামাক্ষি নির্ভরকটাক্ষমরীচিপুঞ্জ-
মাহেন্দ্রনীলমণিপঞ্জরমধ্যভাগে ॥ ৯১ ॥
কামাক্ষি সত্কুবলয়স্য সগোত্রভাবা-
দাক্রামতি শ্রুতিমসৌ তব দৃষ্টিপাতঃ ।
কিংচ স্ফুটং কুটিলতাং প্রকটীকরোতি
ভ্রূবল্লরীপরিচিতস্য ফলং কিমেতত্ ॥ ৯২ ॥
এষা তবাক্ষিসুষমা বিষমায়ুধস্য
নারাচবর্ষলহরী নগরাজকন্যে ।
শংকে করোতি শতধা হৃদি ধৈর্যমুদ্রাং
শ্রীকামকোটি য়দসৌ শিশিরাংশুমৌলেঃ ॥ ৯৩ ॥
বাণেন পুষ্পধনুষঃ পরিকল্প্যমান-
ত্রাণেন ভক্তমনসাং করুণাকরেণ ।
কোণেন কোমলদৃশস্তব কামকোটি
শোণেন শোষয় শিবে মম শোকসিন্ধুম্ ॥ ৯৪ ॥
মারদ্রুহা মুকুটসীমনি লাল্যমানে
মন্দাকিনীপয়সি তে কুটিলং চরিষ্ণুঃ ।
কামাক্ষি কোপরভসাদ্বলমানমীন-
সন্দেহমঙ্কুরয়তি ক্ষণমক্ষিপাতঃ ॥ ৯৫ ॥
কামাক্ষি সংবলিতমৌক্তিককুণ্ডলাংশু-
চঞ্চত্সিতশ্রবণচামরচাতুরীকঃ ।
স্তম্ভে নিরন্তরমপাঙ্গময়ে ভবত্যা
বদ্ধশ্চকাস্তি মকরধ্বজমত্তহস্তী ॥ ৯৬ ॥
য়াবত্কটাক্ষরজনীসময়াগমস্তে
কামাক্ষি তাবদচিরান্নমতাং নরাণাম্ ।
আবির্ভবত্যমৃতদীধিতিবিম্বমম্ব
সংবিন্ময়ং হৃদয়পূর্বগিরীন্দ্রশৃঙ্গে ॥ ৯৭ ॥
কামাক্ষি কল্পবিটপীব ভবত্কটাক্ষো
দিত্সুঃ সমস্তবিভবং নমতাং নরাণাম্ ।
ভৃঙ্গস্য নীলনলিনস্য চ কান্তিসম্প-
ত্সর্বস্বমেব হরতীতি পরং বিচিত্রম্ ॥ ৯৮ ॥
অত্যন্তশীতলমনর্গলকর্মপাক-
কাকোলহারি সুলভং সুমনোভিরেতত্ ।
পীয়ূষমেব তব বীক্ষণমম্ব কিন্তু
কামাক্ষি নীলমিদমিত্যয়মেব ভেদঃ ॥ ৯৯ ॥
অজ্ঞাতভক্তিরসমপ্রসরদ্বিবেক-
মত্যন্তগর্বমনধীতসমস্তশাস্ত্রম্ ।
অপ্রাপ্তসত্যমসমীপগতং চ মুক্তেঃ
কামাক্ষি নৈব তব স্পৃহয়তি দৃষ্টিপাতঃ ॥ ১০০ ॥
(কামাক্ষি মামবতু তে করুণাকটাক্ষঃ)
পাতেন লোচনরুচেস্তব কামকোটি
পোতেন পতকপয়োধিভয়াতুরাণাম্ ।
পূতেন তেন নবকাঞ্চনকুণ্ডলাংশু-
বীতেন শীতলয় ভূধরকন্যকে মাম্ ॥ ১০১ ॥
কটাক্ষশতকং সম্পূর্ণম্ ॥
॥ মন্দস্মিতশতকম্ ॥
বধ্নীমো বয়মঞ্জলিং প্রতিদিনং বন্ধচ্ছিদে দেহিনাং
কন্দর্পাগমতন্ত্রমূলগুরবে কল্যাণকেলীভুবে ।
কামাক্ষ্যা ঘনসারপুঞ্জরজসে কামদ্রুহশ্চক্ষুষাং
মন্দারস্তবকপ্রভামদমুষে মন্দস্মিতজ্যোতিষে ॥ ১ ॥
সধ্রীচে নবমল্লিকাসুমনসাং নাসাগ্রমুক্তামণে-
রাচার্যায় মৃণালকাণ্ডমহসাং নৈসর্গিকায় দ্বিষে ।
স্বর্ধুন্যা সহ য়ুধ্বেন হিমরুচেরর্ধাসনাধ্যাসিনে
কামাক্ষ্যাঃ স্মিতমঞ্জরীধবলিমাদ্বৈতায় তস্মৈ নমঃ ॥ ২ ॥
কর্পূরদ্যুতিচাতুরীমতিতরামল্পীয়সীং কুর্বতী
দৌর্ভাগ্যোদয়মেব সংবিদধতী দৌষাকরীণাং ত্বিষাম্ ।
ক্ষুল্লানেব মনোজ্ঞমল্লিনিকরান্ফুল্লানপি ব্যঞ্জতী
কামাক্ষ্যা মৃদুলস্মিতাংশুলহরী কামপ্রসূরস্তু মে ॥ ৩ ॥
য়া পীনস্তনমণ্ডলোপরি লসত্কর্পূরলেপায়তে
য়া নীলেক্ষণরাত্রিকান্তিততিষু জ্যোত্স্নাপ্ররোহায়তে ।
য়া সৌন্দর্যধুনীতরঙ্গততিষু ব্যালোলহংসায়তে
কামাক্ষ্যাঃ শিশিরীকরোতু হৃদয়ং সা মে স্মিতপ্রাচুরী ॥ ৪ ॥
য়েষাং গচ্ছতি পূর্বপক্ষসরণিং কৌমুদ্বতঃ শ্বেতিমা
য়েষাং সন্ততমারুরুক্ষতি তুলাকক্ষ্যাং শরচ্চন্দ্রমাঃ ।
য়েষামিচ্ছতি কম্বুরপ্যসুলভামন্তেবসত্প্রক্রিয়াং
কামাক্ষ্যা মমতাং হরন্তু মম তে হাসত্বিষামঙ্কুরাঃ ॥ ৫ ॥
আশাসীমসু সন্ততং বিদধতী নৈশাকরীং ব্যাক্রিয়াং
কাশানামভিমানভঙ্গকলনাকৌশল্যমাবিভ্রতী ।
ঈশানেন বিলোকিতা সকুতুকং কামাক্ষি তে কল্মষ-
ক্লেশাপায়করী চকাস্তি লহরী মন্দস্মিতজ্যোতিষাম্ ॥ ৬ ॥
আরূঢস্য সমুন্নতস্তনতটীসাম্রাজ্যসিংহাসনং
কন্দর্পস্য বিভোর্জগত্ত্রয়প্রাকট্যমুদ্রানিধেঃ ।
য়স্যাশ্চামরচাতুরীং কলয়তে রশ্মিচ্ছটা চঞ্চলা
সা মন্দস্মিতমঞ্জরী ভবতু নঃ কামায় কামাক্ষি তে ॥ ৭ ॥
শম্ভোর্যা পরিরম্ভসম্ভ্রমবিধৌ নৈর্মল্যসীমানিধিঃ
গৈর্বাণীব তরঙ্গিণী কৃতমৃদুস্যন্দাং কলিন্দাত্মজাম্ ।
কল্মাষীকুরুতে কলঙ্কসুষমাং কণ্ঠস্থলীচুম্বিনীং
কামাক্ষ্যাঃ স্মিতকন্দলী ভবতু নঃ কল্যাণসন্দোহিনী ॥ ৮ ॥
জেতুং হারলতামিব স্তনতটীং সংজগ্মুষী সন্ততং
গন্তুং নির্মলতামিব দ্বিগুণিতাং মগ্না কৃপাস্ত্রোতসি ।
লব্ধুং বিস্ময়নীয়তামিব হরং রাগাকুলং কুর্বতী
মঞ্জুস্তে স্মিতমঞ্জরী ভবভয়ং মথ্নাতু কামাক্ষি মে ॥ ৯ ॥
শ্বেতাপি প্রকটং নিশাকররুচাং মালিন্যমাতন্বতী
শীতাপি স্মরপাবকং পশুপতেঃ সন্ধুক্ষয়ন্তী সদা ।
স্বাভাব্যাদধরাশ্রিতাপি নমতামুচ্চৈর্দিশন্তী গতিং
কামাক্ষি স্ফুটমন্তরা স্ফুরতু নস্ত্বন্মন্দহাসপ্রভা ॥ ১০ ॥
বক্ত্রশ্রীসরসীজলে তরলিতভ্রূবল্লিকল্লোলিতে
কালিম্না দধতী কটাক্ষজনুষা মাধুব্রতীং ব্যাপৃতিম্ ।
নির্নিদ্রামলপুণ্ডরীককুহনাপাণ্ডিত্যমাবিভ্রতী
কামাক্ষ্যাঃ স্মিতচাতুরী মম মনঃ কাতর্যমুন্মূলয়েত্ ॥ ১১ ॥
নিত্যং বাধিতবন্ধুজীবমধরং মৈত্রীজুষং পল্লবৈঃ
শুদ্ধস্য দ্বিজমণ্ডলস্য চ তিরস্কর্তারমপ্যাশ্রিতা ।
য়া বৈমল্যবতী সদৈব নমতাং চেতঃ পুনীতেতরাং
কামাক্ষ্যা হৃদয়ং প্রসাদয়তু মে সা মন্দহাসপ্রভা ॥ ১২ ॥
দ্রুহ্যন্তী তমসে মুহুঃ কুমুদিনীসাহায়্যমাবিভ্রতী
য়ান্তী চন্দ্রকিশোরশেখরবপুঃসৌধাঙ্গণে প্রেঙ্খণম্ ।
জ্ঞানাম্ভোনিধিবীচিকাং সুমনসাং কূলংকষাং কুর্বতী
কামাক্ষ্যাঃ স্মিতকৌমুদী হরতু মে সংসারতাপোদয়ম্ ॥ ১৩ ॥
কাশ্মীরদ্রবধাতুকর্দমরুচা কল্মাষতাং বিভ্রতী
হংসৌধৈরিব কুর্বতী পরিচিতিং হারীকৃতৈর্মৌক্তিকৈঃ ।
বক্ষোজন্মতুষারশৈলকটকে সংচারমাতন্বতী
কামাক্ষ্যা মৃদুলস্মিতদ্যুতিময়ী ভাগীরথী ভাসতে ॥ ১৪ ॥
কম্বোর্বংশপরম্পরা ইব কৃপাসন্তানবল্লীভুবঃ
সম্ফুল্লস্তবকা ইব প্রসৃমরা মূর্তাঃ প্রসাদা ইব ।
বাক্পীয়ূষকণা ইব ত্রিপথগাপর্যায়ভেদা ইব
ভ্রাজন্তে তব মন্দহাসকিরণাঃ কাঞ্চীপুরীনায়িকে ॥ ১৫ ॥
বক্ষোজে ঘনসারপত্ররচনাভঙ্গীসপত্নায়িতা
কণ্ঠে মৌক্তিকহারয়ষ্টিকিরণব্যাপারমুদ্রায়িতা ।
ওষ্ঠশ্রীনিকুরুম্বপল্লবপুটে প্রেঙ্খত্প্রসূনায়িতা
কামাক্ষি স্ফুরতাং মদীয়হৃদয়ে ত্বন্মন্দহাসপ্রভা ॥ ১৬ ॥
য়েষাং বিন্দুরিবোপরি প্রচলিতো নাসাগ্রমুক্তামণিঃ
য়েষাং দীন ইবাধিকণ্ঠময়তে হারঃ করালম্বনম্ ।
য়েষাং বন্ধুরিবোষ্ঠয়োররুণিমা ধত্তে স্বয়ং রঞ্জনং
কামাক্ষ্যাঃ প্রভবন্তু তে মম শিবোল্লাসায় হাসাঙ্কুরাঃ ॥ ১৭ ॥
য়া জাড্যাম্বুনিধিং ক্ষিণোতি ভজতাং বৈরায়তে কৈরবৈঃ
নিত্যং য়াং নিয়মেন য়া চ য়ততে কর্তুং ত্রিণেত্রোত্সবম্ ।
বিম্বং চান্দ্রমসং চ বঞ্চয়তি য়া গর্বেণ সা তাদৃশী
কামাক্ষি স্মিতমঞ্জরী তব কথং জ্যোত্স্নেত্যসৌ কীর্ত্যতে ॥ ১৮ ॥
আরুঢা রভসাত্পুরঃ পুররিপোরাশ্লেষণোপক্রমে
য়া তে মাতরুপৈতি দিব্যতটিনীশঙ্কাকরী তত্ক্ষণম্ ।
ওষ্ঠৌ বেপয়তি ভ্রুবৌ কুটিলয়ত্যানম্রয়ত্যাননং
তাং বন্দে মৃদুহাসপূরসুষমামেকাম্রনাথপ্রিয়ে ॥ ১৯ ॥
বক্ত্রেন্দোস্তব চন্দ্রিকা স্মিতততির্বল্গু স্ফুরন্তী সতাং
স্যাচ্চেদ্যুক্তিমিদং চকোরমনসাং কামাক্ষি কৌতূহলম্ ।
এতচ্চিত্রমহর্নিশং য়দধিকামেষা রুচিং গাহতে
বিম্বোষ্ঠদ্যুমণিপ্রভাস্বপি চ য়দ্বিব্বোকমালম্বতে ॥ ২০ ॥
সাদৃশ্যং কলশাম্বুধের্বহতি য়ত্কামাক্ষি মন্দস্মিতং
শোভামোষ্ঠরুচাম্ব বিদ্রুমভবামেতাদ্ভিদাং ব্রূমহে ।
একস্মাদুদিতং পুরা কিল পপৌ শর্বঃ পুরাণঃ পুমান্
এতন্মধ্যসমুদ্ভবং রসয়তে মাধুর্যরূপং রসম্ ॥ ২১ ॥
উত্তুঙ্গস্তনকুম্ভশৈলকটকে বিস্তারিকস্তূরিকা-
পত্রশ্রীজুষি চঞ্চলাঃ স্মিতরুচঃ কামাক্ষি তে কোমলাঃ ।
সন্ধ্যাদীধিতিরঞ্জিতা ইব মুহুঃ সান্দ্রাধরজ্যোতিষা
ব্যালোলামলশারদাভ্রশকলব্যাপারমাতন্বতে ॥ ২২ ॥
ক্ষীরং দূরত এব তিষ্ঠতু কথং বৈমল্যমাত্রাদিদং
মাতস্তে সহপাঠবীথিময়তাং মন্দস্মিতৈর্মঞ্জুলৈঃ ।
কিং চেয়ং তু ভিদাস্তি দোহনবশাদেকং তু সংজায়তে
কামাক্ষি স্বয়মর্থিতং প্রণমতামন্যত্তু দোদুহ্যতে ॥ ২৩ ॥
কর্পূরৈরমৃতৈর্জগজ্জননি তে কামাক্ষি চন্দ্রাতপৈঃ
মুক্তাহারগুণৈর্মৃণালবলয়ৈর্মুগ্ধস্মিতশ্রীরিয়ম্ ।
শ্রীকাঞ্চীপুরনায়িকে সমতয়া সংস্তূয়তে সজ্জনৈঃ
তত্তাদৃঙ্মম তাপশান্তিবিধয়ে কিং দেবি মন্দায়তে ॥ ২৪ ॥
মধ্যেগর্ভিতমঞ্জুবাক্যলহরীমাধ্বীঝরীশীতলা
মন্দারস্তবকায়তে জননি তে মন্দস্মিতাংশুচ্ছটা ।
য়স্যা বর্ধয়িতুং মুহুর্বিকসনং কামাক্ষি কামদ্রুহো
বল্গুর্বীক্ষণবিভ্রমব্যতিকরো বাসন্তমাসায়তে ॥ ২৫ ॥
বিম্বোষ্ঠদ্যুতিপুঞ্জরঞ্জিতরুচিস্ত্বন্মন্দহাসচ্ছটা ।
কল্যাণং গিরিসার্বভৌমতনয়ে কল্লোলয়ত্বাশু মে ।
ফুল্লন্মল্লিপিনদ্ধহল্লকময়ী মালেব য়া পেশলা
শ্রীকাঞ্চীশ্বরি মারমর্দিতুরুরোমধ্যে মুহুর্লম্বতে ॥ ২৬ ॥
বিভ্রাণা শরদভ্রবিভ্রমদশাং বিদ্যোতমানাপ্যসো
কামাক্ষি স্মিতমঞ্জরী কিরতি তে কারুণ্যধারারসম্ ।
আশ্চর্যং শিশিরীকরোতি জগতীশ্চালোক্য চৈনামহো
কামং খেলতি নীলকণ্ঠহৃদয়ং কৌতূহলান্দোলিতম্ ॥ ২৭ ॥
প্রেঙ্খত্প্রৌঢকটাক্ষকুঞ্জকুহরেষ্বত্যচ্ছগুচ্ছায়িতং
বক্ত্রেন্দুচ্ছবিসিন্ধুবীচিনিচয়ে ফেনপ্রতানায়িতম্ ।
নৈরন্তর্যবিজৃম্ভিতস্তনতটে নৈচোলপট্টায়িতং
কালুষ্যং কবলীকরোতু মম তে কামাক্ষি মন্দস্মিতম্ ॥ ২৮ ॥
পীয়ূষং তব মন্থরস্মিতমিতি ব্যর্থৈব সাপপ্রথা
কামাক্ষি ধ্রুবমীদৃশং য়দি ভবেদেতত্কথং বা শিবে ।
মন্দারস্য কথালবং ন সহতে মথ্নাতি মন্দাকিনী-
মিন্দুং নিন্দতি কীর্তিতেঽপি কলশীপাথোধিমীর্ষ্যায়তে ॥ ২৯ ॥
বিশ্বেষাং নয়নোত্সবং বিতনুতাং বিদ্যোততাং চন্দ্রমা
বিখ্যাতো মদনান্তকেন মুকুটীমধ্যে চ সংমান্যতাম্ ।
আঃ কিং জাতমনেন হাসসুষমামালোক্য কামাক্ষি তে
কালঙ্কীমবলম্বতে খলু দশাং কল্মাষহীনোঽপ্যসৌ ॥ ৩০ ॥
চেতঃ শীতলয়ন্তু নঃ পশুপতেরানন্দজীবাতবো
নম্রাণাং নয়নাধ্বসীমসু শরচ্চন্দ্রাতপোপক্রমাঃ ।
সংসারাখ্যসরোরুহাকরখলীকারে তুষারোত্করাঃ
কামাক্ষি স্মরকীর্তিবীজনিকরাস্ত্বন্মন্দহাসাঙ্কুরাঃ ॥ ৩১ ॥
কর্মৌঘাখ্যতমঃকচাকচিকরান্কামাক্ষি সংচিন্তয়ে
ত্বন্মন্দস্মিতরোচিষাং ত্রিভুবনক্ষেমংকরানঙ্কুরান্ ।
য়ে বক্ত্রং শিশিরশ্রিয়ো বিকসিতং চন্দ্রাতপাম্ভোরুহ-
দ্বেষোদ্ধেষোণচাতুরীমিব তিরস্কর্তুং পরিষ্কুর্বতে ॥ ৩২ ॥
কুর্যুর্নঃ কুলশৈলরাজতনয়ে কূলংকষং মঙ্গলং
কুন্দস্পর্ধনচুঞ্চবস্তব শিবে মন্দস্মিতপ্রক্রমাঃ ।
য়ে কামাক্ষি সমস্তসাক্ষিনয়নং সন্তোষয়ন্তীশ্বরং
কর্পূরপ্রকরা ইব প্রসৃমরাঃ পুংসামসাধারণাঃ ॥ ৩৩ ॥
কম্রেণ স্নপয়স্ব কর্মকুহনাচোরেণ মারাগম-
ব্যাখ্যাশিক্ষণদীক্ষিতেন বিদুষামক্ষীণলক্ষ্মীপুষা ।
কামাক্ষি স্মিতকন্দলেন কলুষস্ফোটক্রিয়াচুঞ্চুনা
কারুণ্যামৃতবীচিকাবিহরণপ্রাচুর্যধুর্যেণ মাম্ ॥ ৩৪ ॥
ত্বন্মন্দস্মিতকন্দলস্য নিয়তং কামাক্ষি শঙ্কামহে
বিম্বঃ কশ্চন নূতনঃ প্রচলিতো নৈশাকরঃ শীকরঃ ।
কিংচ ক্ষীরপয়োনিধিঃ প্রতিনিধিঃ স্বর্বাহিনীবীচিকা-
বিব্বোকোঽপি বিডম্ব এব কুহনা মল্লীমতল্লীরুচঃ ॥ ৩৫ ॥
দুষ্কর্মার্কনিসর্গকর্কশমহস্সম্পর্কতপতং মিল-
ত্পঙ্কং শঙ্করবল্লভে মম মনঃ কাঞ্চীপুরালংক্রিয়ে ।
অম্ব ত্বন্মৃদুলস্মিতামৃতরসে মঙ্ক্ত্বা বিধূয় ব্যথা-
মানন্দোদয়সৌধশৃঙ্গপদবীমারোঢুমাকাঙ্ক্ষতি ॥ ৩৬ ॥
নম্রাণাং নগরাজশেখরসুতে নাকালয়ানাং পুরঃ
কামাক্ষি ত্বরয়া বিপত্প্রশমেন কারুণ্যধারাঃ কিরন্ ।
আগচ্ছন্তমনুগ্রহং প্রকটয়ন্নানন্দবীজানি তে
নাসীরে মৃদুহাস এব তনুতে নাথে সুধাশীতলঃ ॥ ৩৭ ॥
কামাক্ষি প্রথমানবিভ্রমনিধিঃ কন্দর্পদর্পপ্রসূঃ
মুগ্ধস্তে মৃদুহাস এব গিরিজে মুষ্ণাতু মে কিল্বিষম্ ।
য়ং দ্রষ্টুং বিহিতে করগ্রহ উমে শম্ভুস্ত্রপামীলিতং
স্বৈরং কারয়তি স্ম তাণ্ডববিনোদানন্দিনা তণ্ডুনা ॥ ৩৮ ॥
ক্ষুণ্ণং কেনচিদেব ধীরমনসা কুত্রাপি নানাজনৈঃ
কর্মগ্রন্থিনিয়ন্ত্রিতৈরসুগমং কামাক্ষি সামান্যতঃ ।
মুগ্ধৈর্দ্রুষ্টুমশক্যমেব মনসা মূঢসয় মে মৌক্তিকং
মার্গং দর্শয়তু প্রদীপ ইব তে মন্দস্মিতশ্রীরিয়ম্ ॥ ৩৯ ॥
জ্যোত্স্নাকান্তিভিরেব নির্মলতরং নৈশাকরং মণ্ডলং
হংসৈরেব শরদ্বিলাসসময়ে ব্যাকোচমম্ভোরুহম্ ।
স্বচ্ছৈরেব বিকস্বরৈরুডুগুণৈঃ কামাক্ষি বিম্বং দিবঃ
পুণ্যৈরেব মৃদুস্মিতৈস্তব মুখং পুষ্ণাতি শোভাভরম্ ॥ ৪০ ॥
মানগ্রন্থিবিধুন্তুদেন রভসাদাস্বাদ্যমানে নব-
প্রেমাডম্বরপূর্ণিমাহিমকরে কামাক্ষি তে তত্ক্ষণম্ ।
আলোক্য স্মিতচন্দ্রিকাং পুনরিমামুন্মীলনং জগ্মুষীং
চেতঃ শীলয়তে চকোরচরিতং চন্দ্রার্ধচূডামণেঃ ॥ ৪১ ॥
কামাক্ষি স্মিতমঞ্জরীং তব ভজে য়স্যাস্ত্বিষামঙ্কুরা-
নাপীনস্তনপানলালসতয়া নিশ্শঙ্কমঙ্কেশয়ঃ ।
ঊর্ধ্বং বীক্ষ্য বিকর্ষতি প্রসৃমরানুদ্দাময়া শুণ্ডয়া
সূনুসুতে বিসশঙ্কয়াশু কুহনাদন্তাবলগ্রামণীঃ ॥ ৪২ ॥
গাঢাশ্লেষবিমর্দসম্ভ্রমবশাদুদ্দামমুক্তাগুণ-
প্রালম্বে কুচকুম্ভয়োর্বিগলিতে দক্ষদ্বিষো বক্ষসি ।
য়া সখ্যেন পিনহ্যতি প্রচুরয়া ভাসা তদীয়াং দশাং
সা মে খেলতু কামকোটি হৃদয়ে সান্দ্রস্মিতাংশুচ্ছটা ॥ ৪৩ ॥
মন্দারে তব মন্থরস্মিতরুচাং মাত্সর্যমালোক্যতে
কামাক্ষি স্মরশাসনে চ নিয়তো রাগোদয়ো লক্ষ্যতে ।
চান্দ্রীষু দ্যুতিমঞ্জরীষু চ মহান্দ্বেষাঙ্কুরো দৃশ্যতে
শুদ্ধানাং কথমীদৃশী গিরিসুতেঽতিশুদ্ধা দশা কথ্যতাম্ ॥ ৪৪ ॥
পীয়ূষং খলু পীয়তে সুরজনৈর্দুগ্ধাম্বুধির্মথ্যতে
মাহেশৈশ্চ জটাকলাপনিগডৈর্মন্দাকিনী নহ্যতে ।
শীতাংশুঃ পরিভূয়তে চ তমসা তস্মাদনেতাদৃশী
কামাক্ষি স্মিতমঞ্জরী তব বচোবৈদগ্ধ্যমুল্লঙ্ঘতে ॥ ৪৫ ॥
আশঙ্কে তব মন্দহাসলহরীমন্যাদৃশীং চন্দ্রিকা-
মেকাম্রেশকুটুম্বিনি প্রতিপদং য়স্যাঃ প্রভাসংগমে ।
বক্ষোজাম্বুরুহে ন তে রচয়তঃ কাংচিদ্দশাং কৌঙ্মলী-
মাস্যাম্ভোরুহমম্ব কিংচ শনকৈরালম্বতে ফুল্লতাম্ ॥ ৪৬ ॥
আস্তীর্ণাধরকান্তিপল্লবচয়ে পাতং মুহুর্জগ্মুষী
মারদ্রোহিণি কন্দলত্স্মরশরজ্বালাবলীর্ব্যঞ্জতী ।
নিন্দন্তী ঘনসারহারবলয়জ্যোত্স্নামৃণালানি তে
কামাক্ষি স্মিতচাতুরী বিরহিণীরীতিং জগাহেতরাম্ ॥ ৪৭ ॥
সূর্যালোকবিধৌ বিকাসমধিকং য়ান্তী হরন্তী তম-
স্সন্দোহং নমতাং নিজস্মরণতো দোষাকরদ্বেষিণী ।
নির্যান্তী বদনারবিন্দকুহরান্নির্ধূতজাড্যা নৃণাং
শ্রীকামাক্ষি তব স্মিতদ্যুতিময়ী চিত্রীয়তে চন্দ্রিকা ॥ ৪৮ ॥
কুণ্ঠীকুর্যুরমী কুবোধঘটনামস্মন্মনোমাথিনীং
শ্রীকামাক্ষি শিবংকরাস্তব শিবে শ্রীমন্দহাসাঙ্কুরাঃ ।
য়ে তন্বন্তি নিরন্তরং তরুণিমস্তম্বেরমগ্রামণী-
কুম্ভদ্বন্দ্ববিডম্বিনি স্তনতটে মুক্তাকুথাডম্বরম্ ॥ ৪৯ ॥
প্রেঙ্খন্তঃ শরদম্বুদা ইব শনৈঃ প্রেমানিলৈঃ প্রেরিতা
মজ্জন্তো মন্দনারিকণ্ঠসুষমাসিন্ধৌ মুহুর্মন্থরম্ ।
শ্রীকামাক্ষি তব স্মিতাংশুনিকরাঃ শ্যামায়মানশ্রিয়ো
নীলাম্ভোধরনৈপুণীং তত ইতো নির্নিদ্রয়ন্ত্যঞ্জসা ॥ ৫০ ॥
ব্যাপারং চতুরাননৈকবিহৃতৌ ব্যাকুর্বতী কুর্বতী
রুদ্রাক্ষগ্রহণং মহেশি সততং বাগূর্মিকল্লোলিতা ।
উত্ফুল্লং ধবলারবিন্দমধরীকৃত্য স্ফুরন্তী সদা
শ্রীকামাক্ষি সরস্বতী বিজয়তে ত্বন্মন্দহাসপ্রভা ॥ ৫১ ॥
কর্পূরদ্যুতিতস্করেণ মহসা কল্মাষয়ত্যাননং
শ্রীকাঞ্চীপুরনায়িকে পতিরিব শ্রীমন্দহাসোঽপি তে ।
আলিঙ্গত্যতিপীবরাং স্তনতটীং বিম্বাধরং চুম্বতি
প্রৌঢং রাগভরং ব্যনক্তি মনসো ধৈর্যং ধুনীতেতরাম্ ॥ ৫২ ॥
বৈশদ্যেন চ বিশ্বতাপহরণক্রীডাপটীয়স্তয়া
পাণ্ডিত্যেন পচেলিমেন জগতাং নেত্রোত্সবোত্পাদেন ।
কামাক্ষি স্মিতকন্দলৈস্তব তুলামারোঢুমুদ্যোগিনী
জ্যোত্স্নাসৌ জলরাশিপোষণতয়া দূষ্যাং প্রপন্না দশাম্ ॥ ৫৩ ॥
লাবণ্যাম্বুজিনীমৃণালবলয়ৈঃ শৃঙ্গারগন্ধদ্বিপ-
গ্রামণ্যঃ শ্রুতিচামরৈস্তরুণিমস্বারাজ্যতেজোঙ্কুরৈঃ ।
আনন্দামৃতসিন্ধুবীচিপৃষতৈরাস্যাব্জহংসৈস্তব
শ্রীকামাক্ষি মথান মন্দহসিতৈর্মত্কং মনঃকল্মষম্ ॥ ৫৪ ॥
উত্তুঙ্গস্তনমণ্ডলীপরিচলন্মাণিক্যহারচ্ছটা-
চঞ্চচ্ছোণিমপুঞ্জমধ্যসরণিং মাতঃ পরিষ্কুর্বতী ।
য়া বৈদগ্ধ্যমুপৈতি শংকরজটাকান্তারবাটীপত-
ত্স্বর্বাপীপয়সঃ স্মিতদ্যুতিরসৌ কামাক্ষি তে মঞ্জুলা ॥ ৫৫ ॥
সন্নামৈকজুষা জনেন সুলভং সংসূচয়ন্তী শনৈ-
রুত্তুঙ্গস্য চিরাদনুগ্রহতরোরুত্পত্স্যমানং ফলম্ ।
প্রাথম্যেন বিকস্বরা কুসুমবত্প্রাগল্ভ্যমভ্যেয়ুষী
কামাক্ষি স্মিতচাতুরী তব মম ক্ষেমংকরী কল্পতাম্ ॥ ৫৬ ॥
ধানুষ্কাগ্রসরস্য লোলকুটিলভ্রূলেখয়া বিভ্রতো
লীলালোকশিলীমুখং নববয়স্সাম্রাজ্যলক্ষ্মীপুষঃ ।
জেতুং মন্মথমর্দিনং জননি তে কামাক্ষি হাসঃ স্বয়ং
বল্গুর্বিভ্রমভূভৃতো বিতনুতে সেনাপতিপ্রক্রিয়াম্ ॥ ৫৭ ॥
য়ন্নাকম্পত কালকূটকবলীকারে চুচুম্বে ন য়দ্-
গ্লান্যা চক্ষুষি রূষিতানলশিখে রুদ্রস্য তত্তাদৃশম্ ।
চেতো য়ত্প্রসভং স্মরজ্বরশিখিজ্বালেন লেলিহ্যতে
তত্কামাক্ষি তব স্মিতাংশুকলিকাহেলাভবং প্রাভবম্ ॥ ৫৮ ॥
সম্ভিন্নেব সুপর্বলোকতটিনী বীচীচয়ৈর্যামুনৈঃ
সংমিশ্রেব শশাঙ্কদীপ্তিলহরী নীলৈর্মহানীরদৈঃ ।
কামাক্ষি স্ফুরিতা তব স্মিতরুচিঃ কালাঞ্জনস্পর্ধিনা
কালিম্না কচরোচিষাং ব্যতিকরে কাংচিদ্দশামশ্নুতে ॥ ৫৯ ॥
জানীমো জগদীশ্বরপ্রণয়িনি ত্বন্মন্দহাসপ্রভাং
শ্রীকামাক্ষি সরোজিনীমভিনবামেষা য়তঃ সর্বদা ।
আস্যেন্দোরবলোকেন পশুপতেরভ্যেতি সম্ফুল্লতাং
তন্দ্রালুস্তদভাব এব তনুতে তদ্বৈপরীত্যক্রমম্ ॥ ৬০ ॥
য়ান্তী লোহিতিমানমভ্রতটিনী ধাতুচ্ছটাকর্দমৈঃ
ভান্তী বালগভস্তিমালিকিরণৈর্মেঘাবলী শারদী ।
বিম্বোষ্ঠদ্যুতিপুঞ্জচুম্বনকলাশোণায়মানেন তে
কামাক্ষি স্মিতরোচিষা সমদশামারোঢুমাকাঙ্ক্ষতে ॥ ৬১ ॥
শ্রীকামাক্ষি মুখেন্দুভূষণমিদং মন্দস্মিতং তাবকং
নেত্রানন্দকরং তথা হিমকরো গচ্ছেদ্যথা তিগ্মতাম্ ।
শীতং দেবি তথা য়থা হিমজলং সন্তাপমুদ্রাস্পদং
শ্বেতং কিংচ তথা য়থা মলিনতাং ধত্তে চ মুক্তামণিঃ ॥ ৬২ ॥
ত্বন্মন্দস্মিতমঞ্জরীং প্রসৃমরাং কামাক্ষি চন্দ্রাতপং
সন্তঃ সন্ততমামনন্ত্যমলতা তল্লক্ষণং লক্ষ্যতে ।
অস্মাকং ন ধুনোতি তাপকমধিকং ধূনোতি নাভ্যন্তরং
ধ্বান্তং তত্খলু দুঃখিনো বয়মিদং কেনোতি নো বিদ্মহে ॥ ৬৩ ॥
নম্রস্য প্রণয়প্ররূঢকলহচ্ছেদায় পাদাব্জয়োঃ
মন্দং চন্দ্রকিশোরশেখরমণেঃ কামাক্ষি রাগেণ তে ।
বন্ধূকপ্রসবশ্রিয়ং জিতবতো বংহীয়সীং তাদৃশীং
বিম্বোষ্ঠস্য রুচিং নিরস্য হসিতজ্যোত্স্না বয়স্যায়তে ॥ ৬৪ ॥
মুক্তানাং পরিমোচনং বিদধতস্তত্প্রীতিনিষ্পাদিনী
ভূয়ো দূরত এব ধূতমরুতস্তত্পালনং তন্বতী ।
উদ্ভূতস্য জলান্তরাদবিরতং তদ্দূরতাং জগ্মুষী
কামাক্ষি স্মিতমঞ্জরী তব কথং কম্বোস্তুলামশ্নুতে ॥ ৬৫ ॥
শ্রীকামাক্ষি তব স্মিতদ্যুতিঝরীবৈদগ্ধ্যলীলায়িতং
পশ্যন্তোঽপি নিরন্তরং সুবিমলংমন্যা জগন্মণ্ডলে ।
লোকং হাসয়িতুং কিমর্থমনিশং প্রাকাশ্যমাতন্বতে
মন্দাক্ষং বিরহয়্য মঙ্গলতরং মন্দারচন্দ্রাদয়ঃ ॥ ৬৬ ॥
ক্ষীরাব্ধেরপি শৈলরাজতনয়ে ত্বন্মন্দহাসস্য চ
শ্রীকামাক্ষি বলক্ষিমোদয়নিধেঃ কিংচিদ্ভিদাং ব্রূমহে ।
একস্মৈ পুরুষায় দেবি স দদৌ লক্ষ্মীং কদাচিত্পুরা
সর্বেভ্যোঽপি দদাত্যসৌ তু সততং লক্ষ্মীং চ বাগীশ্বরীম্ ॥ ৬৭ ॥
শ্রীকাঞ্চীপুররত্নদীপকলিকে তান্যেব মেনাত্মজে
চাকোরাণি কুলানি দেবি সুতরাং ধন্যানি মন্যামহে ।
কম্পাতীরকুটুম্বচংক্রমকলাচুঞ্চূনি চঞ্চূপুটৈঃ
নিত্যং য়ানি তব স্মিতেন্দুমহসামাস্বাদমাতন্বতে ॥ ৬৮ ॥
শৈত্যপ্রক্রমমাশ্রিতোঽপি নমতাং জাড্যপ্রথাং ধূনয়ন্
নৈর্মল্যং পরমং গতোঽপি গিরিশং রাগাকুলং চারয়ন্ ।
লীলালাপপুরস্সরোঽপি সততং বাচংয়মান্প্রীণয়ন্
কামাক্ষি স্মিতরোচিষাং তব সমুল্লাসঃ কথং বর্ণ্যতে ॥ ৬৯ ॥
শ্রোণীচঞ্চলমেখলামুখরিতং লীলাগতং মন্থরং
ভ্রূবল্লীচলনং কটাক্ষবলনং মন্দাক্ষবীক্ষাচণম্ ।
য়দ্বৈদগ্ধ্যমুখেন মন্মথরিপুং সংমোহয়ন্ত্যঞ্জসা
শ্রীকামাক্ষি তব স্মিতায় সততং তস্মৈ নম্সকুর্মহে ॥ ৭০ ॥
শ্রীকামাক্ষি মনোজ্ঞমন্দহসিতজ্যোতিষ্প্ররোহে তব
স্ফীতশ্বেতিমসার্বভৌমসরণিপ্রাগল্ভ্যমভ্যেয়ুষি ।
চন্দ্রোঽয়ং য়ুবরাজতাং কলয়তে চেটীধুরং চন্দ্রিকা
শুদ্ধা সা চ সুধাঝরী সহচরীসাধর্ম্যমালম্বতে ॥ ৭১ ॥
জ্যোত্স্না কিং তনুতে ফলং তনুমতামৌষ্ণ্যপ্রশান্তিং বিনা
ত্বন্মন্দস্মিতরোচিষা তনুমতাং কামাক্ষি রোচিষ্ণুনা ।
সন্তাপো বিনিবার্যতে নববয়ঃপ্রাচুর্যমঙ্কূর্যতে
সৌন্দর্যং পরিপূর্যতে জগতি সা কীর্তিশ্চ সংচার্যতে ॥ ৭২ ॥
বৈমল্যং কুমুদশ্রিয়াং হিমরুচঃ কান্ত্যৈব সন্ধুক্ষ্যতে
জ্যোত্স্নারোচিরপি প্রদোষসময়ং প্রাপ্যৈব সম্পদ্যতে ।
স্বচ্ছত্বং নবমৌক্তিকস্য পরমং সংস্কারতো দৃশ্যতে
কামাক্ষ্যাঃ স্মিতদীধিতের্বিশদিমা নৈসর্গিকো ভাসতে ॥ ৭৩ ॥
প্রাকাশ্যং পরমেশ্বরপ্রণয়িনি ত্বন্মন্দহাসশ্রিয়ঃ
শ্রীকামাক্ষি মম ক্ষিণোতু মমতাবৈচক্ষণীমক্ষয়াম্ ।
য়দ্ভীত্যেব নিলীয়তে হিমকরো মেঘোদরে শুক্তিকা-
গর্ভে মৌক্তিকমণ্ডলী চ সরসীমধ্যে মৃণালী চ সা ॥ ৭৪ ॥
হেরম্বে চ গুহে হর্ষভরিতং বাত্সল্যমঙ্কূরয়ত্
মারদ্রোহিণি পূরুষে সহভুবং প্রেমাঙ্কুরং ব্যঞ্জয়ত্ ।
আনম্রেষু জনেষু পূর্ণকরুণাবৈদগ্ধ্যমুত্তালয়ত্
কামাক্ষি স্মিতমঞ্জসা তব কথংকারং ময়া কথ্যতে ॥ ৭৫ ॥
সংক্রুদ্ধদ্বিজরাজকোঽপ্যবিরতং কুর্বন্দ্বিজৈঃ সংগমং
বাণীপদ্ধতিদূরগোঽপি সততং তত্সাহচর্যং বহন্ ।
অশ্রান্তং পশুদুর্লভোঽপি কলয়ন্পত্যৌ পশূনাং রতিং
শ্রীকামাক্ষি তব স্মিতামৃতরসস্যন্দো ময়ি স্পন্দতাম্ ॥ ৭৬ ॥
শ্রীকামাক্ষি মহেশ্বরে নিরুপমপ্রেমাঙ্কুরপ্রক্রমম্ং
নিত্যং য়ঃ প্রকটীকরোতি সহজামুন্নিদ্রয়ন্মাধুরীম্ ।
তত্তাদৃক্তব মন্দহাসমহিমা মাতঃ কথং মানিতাং
তন্মূর্ধ্না সুরনিম্নগাং চ কলিকামিন্দোশ্চ তাং নিন্দতি ॥ ৭৭ ॥
য়ে মাধুর্যবিহারমণ্টপভুবো য়ে শৈত্যমুদ্রাকরা
য়ে বৈশদ্যদশাবিশেষসুভগাস্তে মন্দহাসাঙ্কুরাঃ ।
কামাক্ষ্যাঃ সহজং গুণত্রয়মিদং পর্যায়তঃ কুর্বতাং
বাণীগুম্ফনডম্বরে চ হৃদয়ে কীর্তিপ্ররোহে চ মে ॥ ৭৮ ॥
কামাক্ষ্যা মৃদুলস্মিতাংশুনিকরা দক্ষান্তকে বীক্ষণে
মন্দাক্ষগ্রহিলা হিমদ্যুতিময়ূখাক্ষেপদীক্ষাঙ্কুরাঃ ।
দাক্ষ্যং পক্ষ্মলয়ন্তু মাক্ষিকগুডদ্রাক্ষাভবং বাক্ষু মে
সূক্ষ্মং মোক্ষপথং নিরীক্ষিতুমপি প্রক্ষালয়েয়ুর্মনঃ ॥ ৭৯ ॥
জাত্যা শীতশীতলানি মধুরাণ্যেতানি পূতানি তে
গাঙ্গানীব পয়াংসি দেবি পটলান্যল্পস্মিতজ্যোতিষাম্ ।
এনঃপঙ্কপরম্পরামলিনিতামেকাম্রনাথপ্রিয়ে
প্রজ্ঞানাত্সুতরাং মদীয়ধিষণাং প্রক্ষালয়ন্তু ক্ষণাত্ ॥ ৮০ ॥
অশ্রান্তং পরতন্ত্রিতঃ পশুপতিস্ত্বন্মন্দহাসাঙ্কুরৈঃ
শ্রীকামাক্ষি তদীয়বর্ণসমতাসঙ্গেন শঙ্কামহে ।
ইন্দুং নাকধুনীং চ শেখরয়তে মালাং চ ধত্তে নবৈঃ
বৈকুণ্ঠৈরবকুণ্ঠনং চ কুরুতে ধূলীচয়ৈর্ভাস্মনৈঃ ॥ ৮১ ॥
শ্রীকাঞ্চীপুরদেবতে মৃদুবচস্সৌরভ্যমুদ্রাস্পদং
প্রৌঢপ্রেমলতানবীনকুসুমং মন্দস্মিতং তাবকম্ ।
মন্দং কন্দলতি প্রিয়স্য বদনালোকে সমাভাষণে
শ্লক্ষ্ণে কুঙ্মলতি প্ররূঢপুলকে চাশ্লোষণে ফুল্লতি ॥ ৮২ ॥
কিং ত্রৈস্রোতসমম্বিকে পরিণতং স্রোতশ্চতুর্থং নবং
পীয়ূষস্য সমস্ততাপহরণং কিংবা দ্বিতীয়ং বপুঃ ।
কিংস্বিত্ত্বন্নিকটং গতং মধুরিমাভ্যাসায় গব্যং পয়ঃ
শ্রীকাঞ্চীপুরনায়কপ্রিয়তমে মন্দস্মিতং তাবকম্ ॥ ৮৩ ॥
ভূষা বক্ত্রসরোরুহস্য সহজা বাচাং সখী শাশ্বতী
নীবী বিভ্রমসন্ততেঃ পশুপতেঃ সৌধী দৃশাং পারণা ।
জীবাতুর্মদনশ্রিয়ঃ শশিরুচেরুচ্চাটনী দেবতা
শ্রীকামাক্ষি গিরামভূমিময়তে হাসপ্রভামঞ্জরী ॥ ৮৪ ॥
সূতিঃ শ্বেতিমকন্দলস্য বসতিঃ শৃঙ্গারসারশ্রিয়ঃ
পূর্তিঃ সূক্তিঝরীরসস্য লহরী কারুণ্যপাথোনিধেঃ ।
বাটী কাচন কৌসুমী মধুরিমস্বারাজ্যলক্ষ্ম্যাস্তব
শ্রীকামাক্ষি মমাস্তু মঙ্গলকরী হাসপ্রভাচাতুরী ॥ ৮৫ ॥
জন্তূনাং জনিদুঃখমৃত্যুলহরীসন্তাপনং কৃন্ততঃ
প্রৌঢানুগ্রহপূর্ণশীতলরুচো নিত্যোদয়ং বিভ্রতঃ ।
শ্রীকামাক্ষি বিসৃত্বরা ইব করা হাসাঙ্কুরাস্তে হঠা-
দালোকেন নিহন্যুরন্ধতমসস্তোমস্য মে সন্ততিম্ ॥ ৮৬ ॥
উত্তুঙ্গস্তনমণ্ডলস্য বিলসল্লাবণ্যলীলানটী-
রঙ্গস্য স্ফুটমূর্ধ্বসীমনি মুহুঃ প্রাকাশ্যমভ্যেয়ুষী ।
শ্রীকামাক্ষি তব স্মিতদ্যুতিততির্বিম্বোষ্ঠকান্ত্যঙ্কুরৈঃ
চিত্রাং বিদ্রুমমুদ্রিতাং বিতনুতে মৌক্তীং বিতানশ্রিয়ম্ ॥ ৮৭ ॥
স্বাভাব্যাত্তব বক্ত্রমেব ললিতং সন্তোষসম্পাদনং
শম্ভোঃ কিং পুনরঞ্চিতস্মিতরুচঃ পাণ্ডিত্যপাত্রীকৃতম্ ।
অম্ভোজং স্বত এব সর্বজগতাং চক্ষুঃপ্রিয়ম্ভাবুকং
কামাক্ষি স্ফুরিতে শরদ্বিকসিতে কীদৃগ্বিধং ভ্রাজতে ॥ ৮৮ ॥
পুম্ভির্নির্মলমানসৌর্বিদধতে মৈত্রীং দৃঢং নির্মলাং
লব্ধ্বা কর্মলয়ং চ নির্মলতরাং কীর্তিং লভন্তেতরাম্ ।
সূক্তিং পক্ষ্মলয়ন্তি নির্মলতমাং য়ত্তাবকাঃ সেবকাঃ
তত্কামাক্ষি তব স্মিতস্য কলয়া নৈর্মল্যসীমানিধেঃ ॥ ৮৯ ॥
আকর্ষন্নয়নানি নাকিসদসাং শৈত্যেন সংস্তম্ভয়-
ন্নিন্দুং কিংচ বিমোহয়ন্পশুপতিং বিশ্বার্তিমুচ্চাটয়ন্ ।
হিংসত্সংসৃতিডম্বরং তব শিবে হাসাহ্বয়ো মান্ত্রিকঃ
শ্রীকামাক্ষি মদীয়মানসতমোবিদ্বেষণে চেষ্টতাম্ ॥ ৯০ ॥
ক্ষেপীয়ঃ ক্ষপয়ন্তু কল্মষভয়ান্যস্মাকমল্পস্মিত-
জ্যোতির্মণ্ডলচংক্রমাস্তব শিবে কামাক্ষি রোচিষ্ণবঃ ।
পীডাকর্মঠকর্মঘর্মসময়ব্যাপারতাপানল-
শ্রীপাতা নবহর্ষবর্ষণসুধাস্রোতস্বিনীশীকরাঃ ॥ ৯১ ॥
শ্রীকামাক্ষি তব স্মিতৈন্দবমহঃপূরে পরিম্ফূর্জতি
প্রৌঢাং বারিধিচাতুরীং কলয়তে ভক্তাত্মনাং প্রাতিভম্ ।
দৌর্গত্যপ্রসরাস্তমঃপটলিকাসাধর্ম্যমাবিভ্রতে
সর্বং কৈরবসাহচর্যপদবীরীতিং বিধত্তে পরম্ ॥ ৯২ ॥
মন্দারাদিষু মন্মথারিমহিষি প্রাকাশ্যরীতিং নিজাং
কাদাচিত্কতয়া বিশঙ্ক্য বহুশো বৈশদ্যমুদ্রাগুণঃ ।
সাতত্যেন তব স্মিতে বিতনুতে স্বৈরাসনাবাসনাম্ ॥ ৯৩ ॥
ইন্ধানে ভববীতিহোত্রনিবহে কর্মৌঘচণ্ডানিল-
প্রৌঢিম্না বহুলীকৃতে নিপতিতং সন্তাপচিন্তাকুলম্ ।
মাতর্মাং পরিষিঞ্চ কিংচিদমলৈঃ পীয়ূষবর্ষৈরিব
শ্রীকামাক্ষি তব স্মিতদ্যুতিকণৈঃ শৈশির্যলীলাকরৈঃ ॥ ৯৪ ॥
ভাষায়া রসনাগ্রখেলনজুষঃ শৃঙ্গারমুদ্রাসখী-
লীলাজাতরতেঃ সুখেন নিয়মস্নানায় মেনাত্মজে ।
শ্রীকামাক্ষি সুধাময়ীব শিশিরা স্রোতস্বিনী তাবকী
গাঢানন্দতরঙ্গিতা বিজয়তে হাসপ্রভাচাতুরী ॥ ৯৫ ॥
সন্তাপং বিরলীকরোতু সকলং কামাক্ষি মচ্চেতনা
মজ্জন্তী মধুরস্মিতামরধুনীকল্লোলজালেষু তে ।
নৈরন্তর্যমুপেত্য মন্মথমরুল্লোলেষু য়েষু স্ফুটং
প্রেমেন্দুঃ প্রতিবিম্বিতো বিতনুতে কৌতূহলং ধূর্জটেঃ ॥ ৯৬ ॥
চেতঃক্ষীরপয়োধিমন্থরচলদ্রাগাখ্যমন্থাচল-
ক্ষোভব্যাপৃতিসম্ভবাং জননি তে মন্দস্মিতশ্রীসুধাম্ ।
স্বাদংস্বাদমুদীতকৌতুকরসা নেত্রত্রয়ী শাংকরী
শ্রীকামাক্ষি নিরন্তরং পরিণমত্যানন্দবীচীময়ী ॥ ৯৭ ॥
আলোকে তব পঞ্চসায়করিপোরুদ্দামকৌতূহল-
প্রেঙ্খন্মারুতঘট্টনপ্রচলিতাদানন্দদুগ্ধাম্বুধেঃ ।
কাচিদ্বীচিরুদঞ্চতি প্রতিনবা সংবিত্প্ররোহাত্মিকা
তাং কামাক্ষি কবীশ্বরাঃ স্মিতমিতি ব্যাকুর্বতে সর্বদা ॥ ৯৮ ॥
সূক্তিঃ শীলয়তে কিমদ্রিতনয়ে মন্দস্মিতাত্তে মুহুঃ
মাধুর্যাগমসম্প্রদায়মথবা সূক্তের্নু মন্দস্মিতম্ ।
ইত্থং কামপি গাহতে মম মনঃ সন্দেহমার্গভ্রমিং
শ্রীকামাক্ষি ন পারমার্থ্যসরণিস্ফূর্তৌ নিধত্তে পদম্ ॥ ৯৯ ॥
ক্রীডালোলকৃপাসরোরুহমুখীসৌধাঙ্গণেভ্যঃ কবি-
শ্রেণীবাক্পরিপাটিকামৃতঝরীসূতীগৃহেভ্যঃ শিবে ।
নির্বাণাঙ্কুরসার্বভৌমপদবীসিংহাসনেভ্যস্তব
শ্রীকামাক্ষি মনোজ্ঞমন্দহসিতজ্যোতিষ্কণেভ্যো নমঃ ॥ ১০০ ॥
আর্যামেব বিভাবয়ন্মনসি য়ঃ পাদারবিন্দং পুরঃ
পশ্যন্নারভতে স্তুতিং স নিয়তং লব্ধ্বা কটাক্ষচ্ছবিম্ ।
কামাক্ষ্যা মৃদুলস্মিতাংশুলহরীজ্যোত্স্নাবয়স্যান্বিতাম্
আরোহত্যপবর্গসৌধবলভীমানন্দবীচীময়ীম্ ॥ ১০১ ॥
মন্দস্মিতশতকং সম্পূর্ণম্ ॥
শ্রী মূকপঞ্চশতী সম্পূর্ণা ॥
॥ ওঁ তত্ সত্ ॥