॥ Sri Shankaracharya Ashtakam Telugu Lyrics ॥
॥ శ్రీశఙ్కరాచార్యాష్టకమ్ ॥
శ్రీగణేశాయ నమః ।
అథ శ్రీశఙ్కరాచార్యాష్టకమ్ ।
ధర్మో బ్రహ్మేత్యుభయవిషయం జ్ఞాపయత్యేవ వేదో
నాయం లోకే పురుషమతిజః కావ్యకల్పానుకల్పః ।
ప్రామాణ్యం చ స్వయమిహ భవేదిత్యనూద్దిష్టవన్తం
భాష్యాచార్యం ప్రణమత సదా శఙ్కరం న్యాసివర్యమ్ ॥ ౧ ॥
ధర్మో నిత్యం విధివిషయతో జ్ఞాపయత్యేష వేద-
స్తస్మిన్నిష్ఠా ద్వివిధముదితా కామజాకామజాభ్యామ్ ।
కామ్యం కర్మ త్రిదివభువనాయేత్యనూద్దిష్టవన్తం
భాష్యాచార్యం ప్రణమత సదా శఙ్కరం న్యాసివర్యమ్ ॥ ౨ ॥
కామాపేతం భవతి మనసః శోధనాయాత్ర లోకే
తస్మాన్నూనం వివిదిషతి నా సాధనైః సంయుతః సన్ ।
తస్మాద్ధర్మం చరత మనుజా ఇత్యనూద్దిష్టవనతం
భాష్యాచార్యం ప్రణమత సదా శఙ్కరం న్యాసివర్యమ్ ॥ ౩ ॥
వేదో యస్మిన్ విధిముఖభిదా షడ్విధః శాస్త్రసిద్ధో
వైధో భేదో దశహతశతం పూర్వతన్త్రే ప్రసిద్ధః ।
ధర్మాద్యర్థః ప్రమితిపురతశ్చేత్యనూద్దిష్టవన్తం
భాష్యాచార్యం ప్రణమత సదా శఙ్కరం న్యాసివర్యమ్ ॥ ౪ ॥
అద్వైతార్థగ్రహణపటుతాం పూర్వతన్త్రానుకూలం
శాస్త్రాజ్జ్ఞాత్వా కురుత సుధియో ధర్మచర్యాం యథార్థమ్ ।
నోచేత్కష్టం నరకగమనం చేత్యనూద్దిష్టవన్తం
భాష్యాచార్యం ప్రణమత సదా శఙ్కరం న్యాసివర్యమ్ ॥ ౫ ॥
ద్వైతం మిథ్యా యది భవతి చేత్ప్రాప్యతేఽద్వైతసిద్ధి-
స్తస్యాః ప్రాప్త్యై ప్రథమమధునా సాధ్యతే ద్వైతనిష్ఠమ్ ।
మిథ్యాత్వం యచ్ఛ్రుతిశతగతం చేత్యనూద్దిష్టవన్తం
భాష్యాచార్యం ప్రణమత సదా శఙ్కరం న్యాసివర్యమ్ ॥ ౬ ॥
నానా నేహేత్యుపదిశతి వాగ్ద్వైతమిథ్యాత్వసిద్ధ్యై
ద్వైతం మిథ్యా పరిమితిగతేర్దృశ్యతః స్వప్నవత్స్యాత్ ।
ఏవంరూపా హ్యనుమితిమితిశేత్యనూద్దిష్టవన్తం
భాష్యాచార్యం ప్రణమత సదా శఙ్కరం న్యాసివర్యమ్ ॥ ౭ ॥
ఏవం మిథ్యా జగదిదమితి జ్ఞాయతాం నిశ్చయేన
బ్రహ్మాహం చేత్యలమనుభవః ప్రాప్యతాం వేదవాక్యాత్ ।
శాన్తో భూయాత్ తదను చ సుఖం చేత్యనూద్దిష్టవన్తం
శాన్త్యానన్దః ప్రణమతి యతిః శఙ్కరాచార్యమూర్తిమ్ ॥ ౮ ॥
శాన్త్యానన్దసరస్వత్యా కృతం శాఙ్కరమష్టకమ్ ।
యః పఠేద్భక్తిసంయుక్తః స సర్వాం సిద్ధిమాప్నుయాత్ ॥ ౯ ॥
ఇతి శ్రీపరమహంసపరివ్రాజకాచార్యశ్రీశాన్త్యానన్దసరస్వతివిరచితం
శ్రీశఙ్కరాచార్యాష్టకం సమాప్తమ్ ॥
– Chant Stotra in Other Languages –
Sri Shankaracharya Ashtakam Lyrics in Sanskrit » English » Bengali » Gujarati » Kannada » Malayalam » Odia » Tamil