॥ Sri Vatapatyashtakam Telugu Lyrics ॥
॥ శ్రీవటపత్యష్టకమ్ ॥
భవం సృష్ట్వా దేవః స్వయమిహ నివిష్టో భవముఖే
సహస్రాస్యో భూత్వా ఫలమనుభవఞ్ఛాస్త్యవికృతః ।
పరం దేవైః సేవ్యం రసముపనిషద్వేద్యమమితం
నమామి శ్రీనాథం భవభయహరం శ్రీవటపతిమ్ ॥ ౧ ॥
చిదానన్దం సత్యం జగదుదయరక్షాలయకరం
యదజ్ఞానాచ్ఛుక్తౌ రజతమివ విశ్వం విలసితమ్ ।
పునర్యద్విజ్ఞానం భ్రమహరమభేదం తమనఘం
నమామి శ్రీనాథం భవభయహరం శ్రీవటపతిమ్ ॥ ౨ ॥
పురాణో యో దేవో నివసతి వటేశస్తనుభృతాం
హృదమ్భోజే ద్రష్టా విదితమహిమా సౌఖ్యసదనమ్ ।
తమారాధ్యం సిద్ధైః సురమనుజసంసేవితపదం
నమామి శ్రీనాథం భవభయహరం శ్రీవటపతిమ్ ॥ ౩ ॥
మహామోహాగారేఽతివిపది భవాబ్ధౌ నిపతితో
న పశ్యామి త్వత్తోఽన్యదిహ శరణం మే సుఖకరమ్ ।
దయాసిన్ధో మాముద్ధర సపది తస్మాచ్ఛరణదం
నమామి శ్రీనాథం భవభయహరం శ్రీవటపతిమ్ ॥ ౪ ॥
అసారే సంసారే వికృతినిలయే క్లేశబహులే
రుచిం బధ్నన్త్యజ్ఞాః సుఖమధులవాయాన్తవిరసే ।
త్వమేవాస్మిన్సారో జగతి తమహం త్వా రసఘనం
నమామి శ్రీనాథం భవభయహరం శ్రీవటపతిమ్ ॥ ౫ ॥
కదాఽహం మోక్ష్యేఽస్మాన్నిబిడతమసో బన్ధనగృహాత్
ప్రభో సంసారాత్త్వచ్ఛ్రవణమననధ్యానరహితః ।
న యోగం సాఙ్ఖ్యం వా కమపి సదుపాయం చ కలయే
నమామి శ్రీనాథం భవభయహరం శ్రీవటపతిమ్ ॥ ౬ ॥
నిరాకారం స్వామిఞ్జయతు తవ రూపం శ్రుతినుత-
మహం తు త్వాం మన్యే కరచరణయుక్తం గుణనిధిమ్ ।
శివేశః శ్రీశో వా భవతు న భిదా యత్ర తమహం
నమామి శ్రీనాథం భవభయహరం శ్రీవటపతిమ్ ॥ ౭ ॥
జడే దృశ్యే దుఃఖే నిపుణమతిహేయే చ జగతి
మృషారూపే పుంసాం సదితి సుఖమాదేయమితి ధీః ।
యదస్తిత్వానన్దప్రతిఫలనమూలా తమమృతం
నమామి శ్రీనాథం భవభయహరం శ్రీవటపతిమ్ ॥ ౮ ॥
విభాతు తన్నాథ మదీయమానసే
త్వదీయరూపం సుమనోహరం విభో ।
అజాదిదేవైరపి యస్య చిన్తనం
స్వచిత్తశుద్ధ్యై సతతం విధీయతే ॥ ౯ ॥
మాయారామప్రోక్తమేతత్సురమ్యం
శ్రీశస్తోత్రం శ్రీవటేశాష్టకాఖ్యమ్ ।
అస్తు శ్రీశస్తేన తుష్టః స్తువభ్ద్యో
దిశ్యాచ్ఛ్రేయః శాశ్వతం స్వాశ్రితేభ్యః ॥ ౧౦ ॥
తత్త్వజ్ఞానప్రదం భక్తివైరాగ్యపరివర్ధనమ్ ।
పఠితవ్యమిదం నిత్యం స్తోత్రం శ్రీపతితుష్టిదమ్ ॥ ౧౧ ॥
వ్యాధికాలే చ మోహాన్ధ్యే విపత్తౌ శ్రద్ధయా పఠేత్ ।
య ఇదం స భయాన్ముక్తః సుఖమక్షయ్యమశ్నుతే ॥ ౧౨ ॥
ఇతి వేదాన్తతీర్థపణ్డితశ్రీమాయారామకృతం వటపత్యష్టకం సమాప్తమ్ ।
– Chant Stotra in Other Languages –
Sri Vatapatya Ashtakam Lyrics in Sanskrit » English » Bengali » Gujarati » Kannada » Malayalam » Odia » Tamil